Luke

¹ Kaening laku acyikuh paw, zyn athua ccaccing paw, a ho`ae paw uccaw`ae kong kha ccaw te ccakhung khylan ccungccaw patae nynh phe a tho vae`ae. ² Tuhhawte atakaw lyaze mit te a muih`ae paw ccaekia`ae te bya hanlan ryalahtu`ae nynh kha-e`ae kha kaening kalan oun hopya`ae. ³ Tukeiccu kae mah atakaw te pawpaw balyn kha ahoyte phe ka thaethya koute kha-e kha na kalan athua thathyhte zei lan ahoypaw ka losah, sawtua lan um huaccepaw Theophilas. ⁴ Ou tuhte phe ae ccangpya vae`ae paw uccaw`ae kong kha ahmepaw ccaccing nynh thua cipaw na ny nawlan nynh thua. ⁵ Judah ram e siapharan Herod ccyh lya Abija aphu kya-e paw Zakharia acikuh paw ranpibawi lukheit a um, te a zu tuh Aaron ccanung`ae kya-e thua zah a min tuh Elizabeth nynh thua. ⁶ Te minmin luning tuh Bawipaw kawpyapaw`ae balynte phung`ae kha ccaenaw um lei lan marya a zui`ae paw thua zah Pachia malang paryh adingpaw nynh thua`ae. ⁷ Te Elizabeth tuh a tin keiccuze minmin tuh ccaaw hoi khyh`ae, te mih luning te paryh mih kum phe atang vae. ⁸ Ou tuhte Zakharia tuh amaw a phu`ae ryte Pachia malang ranpibawi rya a law lyakhe, ⁹ ranpibawi ryalaw phung thyhte, ccungthy dung`ae zah aning tuh Bawipaw kya-e athyaapaw tempal lungkhu lang tee lan zah mynkhuhpaw-upaw kha u lan accan. ¹⁰ Te mynkhuhpaw-upaw a u ccyh lya tuin ccungccaw zapi balyn tuh athyaapaw tempal atolang khe sawsang`ae. ¹¹ Te Bawipaw kya-e vaaw ccungccapaw tuh a kalan langkuh zah mynkhuhpaw-upaw ccaboi ranglang khe a thadyn. ¹² Te Zakharia nynh he a muih tuh a lungvawsaw zah rinaw a tungvaw accah. ¹³ Thuasalama vaaw ccungccapaw nynh, “Zakharia, rih nan, pawccecize na sawsangnaw tuh thaepya athua, te na zu Elizabeth nynh ccapaw ae sakpah cih zah a min tuh Johan cite na phu cih. ¹⁴ Te lungtuanaw te lungpawnaw na hoi cih zah a puinaw kya ccungccaw patae mih lungtua cih. ¹⁵ Pawccecize aning tuh Bawipaw mitmuihnaw kya a lesae cih, te misutui te aruikuh khopaw kha neih lan khyh; te aning tuh a nung vue ccaccei kya mawte Thyaa Muisaw te abeih cih. ¹⁶ Te Israel ccaaw`ae patae kha aning nynh mih Pachia Bawipaw kalan a paleih cih`ae. ¹⁷ Te paaw`ae thinlung kha ccaaw`ae hanlan paleih khylan, te kawngae lei`ae paw kha a ding`ae paw hawnaw kalan paleih khylan, Bawipaw hanlan ccungccaw`ae kha raeringkute paccyn khylan aning tuh Elijah kya-e muisaw thungnaw te Bawipaw malang a cceih cih,” a cipya. ¹⁸ Te Zakharia nynh vaaw ccungccapaw kha, “Pawcihtemou e hynh ka nyh cih? Pawccecize kae tuh a taw vae paw ccungccaw nynh ka thua, te ka zu mah a kum phe atang vae,” a cipya. ¹⁹ Te vaaw ccungccapaw nynh, “Kae tuh Pachia umnaw kya a thadyn paw Gabriel nynh ka thua; te kae tuh nang kha hynh-e lungtua lan um paw thungpang hynh hopya lan te muihsah khylan saw paw nynh ka thua. ²⁰ Te dotua, nang tuh e uccaw`ae accing makhia bya na ho lan khyh zah bya ho kho leite na um cih, pawccemacize accyh zawte accing cih paw ka bya`ae hynh na zyn khyh keiccu,” a cipya. ²¹ Te ccungccaw`ae nynh Zakharia kha ngaw`ae zah tempal kya khaw aro keiccu mih ngaeangthua. ²² Te aning he yn pou tuh mih kalan bya ho kho vae khyh; te minmin nynh aning tuh tempal kya vizin nynh a muih cite a tuase`ae; pawccecize aning nynh minmin kha kuih te tangpah`ae zah bya ho kho leite nynh a um vae. ²³ Ou tuhte a ranpibawi ryalawpaw nin`ae he athang tuh Zakharia tuh a inn lang a ki. ²⁴ Te tuh-e nin`ae koute a zu Elizabeth tuh ccaawpoi vae, te sawpaw sapangaw inn kya a khungkuh. ²⁵ Te Elizabeth nynh, “Ccungccaw`ae laku te ka maethyanaw kha lawpya khylan kamaw yn do ccyh lya Bawipaw nynh hynhte yn cyipya,” a ci. ²⁶ Te sawpaw sataruhnaw kya vaaw ccungccapaw Gabriel tuh Pachia kyate Galilee ram e Nazareth acikuh paw khua kalan, ²⁷ David ciihan paw, a min Josef acikuh paw ccungccapaw kalan a chiapya vae`ae paw liaccady kalan saw athua; tuh-e liaccady a min tuh Meri acikuh. ²⁸ Te vaaw ccungccapaw nynh tuh-e nung kalan thua zah, “Hei, maehoyccou nung, Bawipaw tuh nang ryte a um, nopi`ae lakuze nang tuh hythuaccou nung nynh na thua,” a cipya. ²⁹ Te Meri nynh he a muih tuh a hopya paw kya a lungvawsaw zah hynh-e tuh pawtecihpaw byabeihkupaw mou athua ngaw cite a thinlung kya a tua. ³⁰ Te vaaw ccungccapaw nynh, “Meri, rih nan, pawccecize nang tuh Pachia kya-e maehoynaw kha na mue. ³¹ Te dotua, na vue kya ccaaw na hoi cih zah Ccapaw lukheit na saah cih, te a min kha JESU cite na phu cih. ³² Aning tuh a lesae cih zah Ahang huaccepaw Pachia Ccapaw cite ko athua cih, te Bawipaw Pachia nynh amaw kha a paaw David suitungkhung kha a pya cih. ³³ Te aning nynh Jakob ciihan tungvaw zungzae a uk cih zah a peenaw tuh thangnaw um lan khyh,” a cipya. ³⁴ Oute Meri nynh vaaw ccungccapaw kha, “Pise ka nyh leite pawtemou tuh-e tuh athua kho cih?” a cipya. ³⁵ Te vaaw ccungccapaw nynh khung zah, “Thyaa Muisaw na tungvaw yn thua cih zah Ahang huaccepaw thungnaw nynh nang kha ae khung cih; tukeiccuze tuh-e athyaapaw lukheit nang na kyate yn pui cih paw tuh Pachia Ccapaw cite ko athua cih. ³⁶ Te dotua, na pui oh paw Elizabeth, a tinnung a ci`ae paw mah a kum tang vae mawte ccaawpoi zah atu hynh sawpaw sataruh acih vae. ³⁷ Pawccecize Pachia ryte tuh athua kho leipaw um lan khyh,” a cipya. ³⁸ Te Meri nynh, “Dotua, Bawipaw a seenung nynh ka thua, na bya thyhhawte ka tungvaw thua vae sah,” a ci. Te vaaw ccungccapaw tuh Meri kyate phe a pou. ³⁹ Te tuh-e nin`ae kya Meri tuh thokuh zah mua zung kya a um paw Judah khua langkhe arangte a cceih. ⁴⁰ Te Zakharia a inn lungkhu lang tee zah Elizabeth kha a beih. ⁴¹ Ou tuhte Meri nynh bya beih paw kha Elizabeth nynh he a thae tuh, a vue kya neitaw tuh a thohkuh, oute Elizabeth tuh Thyaa Muisaw te phe beih. ⁴² Te aning nynh roi accae lante a hopaw tuh: “Nopi`ae lakuze nang tuh hythuaccou nung nynh na thua, te na vue kya-e athae imua mah hythuaccoupaw nynh thua. ⁴³ Te ka Bawipaw a nung nynh kamaw kalan thua lante pawtemou e hynh kamaw kya acyikuh? ⁴⁴ Pawccecize dotua, na bya beih paw roi ka nakaring kya ccahe accae te ka vue kya neitaw nynh a lungtua zah a thohkuh. ⁴⁵ Te a zyn paw nopinung tuh hythuaccou nung nynh thua; pawccecize kha-e nung kya Bawipaw nynh a hopya paw bya tuh accing cih paw nynh thua,” a ci. ⁴⁶ Te Meri nynh, “Ka hiinnaw-muisaw nynh Bawipaw kha phu-esah, ⁴⁷ te ka muisaw tuh ka Khumtu Pachia kya a lungtua. ⁴⁸ Pawccecize a seenung kya-e zakawsangnaw kha a tuapya; pawccecize, atu kyate ciihan`ae balyn nynh kae tuh hythuaccou nung cite oun ko vae cih`ae. ⁴⁹ Pawccecize athungpaw Bawipaw nynh alepaw uccaw`ae kha kamaw kya phe yn cyipya vae; te a min tuh athyaapaw nynh thua. ⁵⁰ Te a ngaethya-umsanaw tuh amaw rawrih`ae paw tungvaw kya ciihan kyate ciihan kyacia atyn. ⁵¹ A kuihthaw te thawzung a langsaku; mih thinlung-tuakunaw kya a tansakuh`ae paw kha pung a phiasaku`ae. ⁵² Athungpaw ccungccaw`ae kha mih suitungkhung kyate sahbung`ae zah zakawsangsakuh`ae paw kha a hangthung`ae. ⁵³ A vuelaw`ae paw kha kou ahoy lang a dang`ae, thuasalama a hoirung`ae paw kha sasete a kisah`ae. ⁵⁴ - ⁵⁵ Ah minpaaw`ae kya, Abraham kya, te a ciihan kya zungzae a hosya vae hawte, a ngaethyaumsanaw liathuinaw kya a seepaw Israel kha phe a bawng vae,” a ci. ⁵⁶ Te Meri tuh Elizabeth ryte sawpaw sathung loukaw a umkheih`ae koute amaw a inn lang a ki. ⁵⁷ Te Elizabeth tuh ccaawpui lan accyh he azaw tuh ccaaw pise lukheit a saah. ⁵⁸ Te a innpaw`ae te a vaeccaw`ae nynh alepaw ngaethya-umsanaw kha Bawipaw nynh pawcihte nynh a tungvaw a langsapyaku cipaw he a thae`ae tuh amaw ryte mih lungtua`ae. ⁵⁹ Ou tuhte nin taryanaw kya imua vindung aw lan minmin tuh oun thua`ae; te minmin nynh a paaw min thyhte Zakharia cite a min a phu`ae. ⁶⁰ Te a nung nynh, “Tuhte thua khyh, thuasalama Johan cite nynh ko lan,” a ci. ⁶¹ Te minmin nynh, “Na pui oh paw kya hynh-e min a phukuh paw lukheit san um boi khyh,” a ci`ae. ⁶² Te minmin nynh a paaw kha pawtemou min na phury cite tangpya te a khia`ae. ⁶³ Te a paaw nynh zei nawlan ccalung kha ngiakuh`ae zah, “A min tuh Johan nynh thua,” cite a zei. Te minmin balyn tuh mih ngaeangthua. ⁶⁴ Te a khalang tuh vaekheihmawte yn ua zah a lae apia vae, te bya ho zah Pachia kha thehoysah. ⁶⁵ Te mih pe um`ae paw balyn tuh a rih`ae, te hynh-e thungpang tuh Judah pee mua kya um`ae paw balyn kalan po athaan. ⁶⁶ Te a thae`ae paw balyn nynh kha-e kha mih thinlung kya ccykekuh`ae zah, “E paw hynh pawtecihpaw imua mou athua ngaw?” a ci`ae. Te Bawipaw kuih nynh imohpaw kha a umkhae. ⁶⁷ Te a paaw Zakharia tuh Thyaa Muisaw te phe beih zah profehbya a ho, ⁶⁸ “Israel Pachia Bawipaw tuh thehoysah thuasah, pawccecize a ccungccaw`ae kha paebua zah a sawkhaw`ae. ⁶⁹ Te a seepaw David ciihan kyate aening hanlan khumnaw ki kha a langsaku vae. ⁷⁰ Laephipi athotakaw te a um paw amaw kya-e athyaapaw profeh`ae khalang kyate a ho hawte, ⁷¹ ah rhaw`ae kyate aening kha khum khylan, te aening oun hua`ae paw balyn kuih kyate luesah khylan, ⁷² ah minpaaw`ae kalan byakinpyakupaw ngaethya-umsanaw kha ccingsah khylan, te amaw kya-e athyaapaw byakin kha liathui khylan, ⁷³ ah paaw Abraham kalan kae pya cih oh cite ccaesakute bya a kinkupaw byakinnaw kha ccingsah khylan, ⁷⁴ - ⁷⁵ ah rhaw`ae kuih kyate luesah ah thua vae oh thyhte, Pachia malang ah hiin lungkhu oh balyn, thyaanaw te dingnaw te, rinaw hoi leite aening nynh amaw rya ah lawpya nawlan oh nynh thua. ⁷⁶ Te imohpaw, nang tuh Ahang Huaccepaw Pachia profeh cite ko na thua cih, pawccecize nang tuh Bawipaw a laanpi kha paccynpya khylan Bawipaw malang na cceih cih, ⁷⁷ mih seinaw`ae ngaethyanaw liate a ccungccaw`ae kalan khumnaw kong nynaw pya khylan; ⁷⁸ Ah Pachia kya-e nevyalyapaw ngaethyaumsanaw liate, ou tuh-e liate khuaninpaw paw nynh ahangnaw kyate aening kha oun paebua vae. ⁷⁹ Mohnaw te chinaw mynlyh kya a dahung`ae paw kha awnaw pya khylan, daenaw laanpi lungkhu lang aening ccu kha cciakhae khylan nynh thua,” cite a ho. ⁸⁰ Te imohpaw tuh lethung zah muisaw kya a thawsae, te Israel`ae kalan a langku nin a thua makhia aning tuh rangkaw nynh a um.

¹ Oute tuh-e nin`ae kya Sizar Aukastas nynh ram pynpi balyn milu ccazing lawku athua cih cite kaw a tho. ² E milu ccazing lawkunaw tuh Kuirinias hynh Siria ram uktu athua lyaze masaty ccazing lawkunaw nynh thua. ³ Te ccungccaw`ae balyn tuh milu ccazing lawku khylan mimaw mih khua raveih lang a cceih`ae. ⁴ Te Josef mah David ciihan athua keiccuze, Galilee pee Nazareth khua kyate Judah pee Bethlehem acikuh paw David khuapi kalan khe, ⁵ a zu lang a hoiku paw, ccaaw a poi paw Meri ryte ccazing lawku khylan a cceih`ae. ⁶ Te minmin tuin kya a um`ae lyakhe, Meri tuh neitaw pui lan a ninsaw accing. ⁷ Te Meri nynh a Ccatawccaaw kha puisah zah nolung uccaw te lung zah saring looh-aenaw kua kya a isah; pawccemacize mikhia thuanaw inn kya minmin hanlan akhaan um vae khyh. ⁸ Te tuin ram kya khuazi khe mih tuuphu kha ring`ae zah rangkaw kya a um`ae paw tuuring`ae a um`ae. ⁹ Te dotua, Bawipaw kya-e vaaw ccungccapaw nynh mih kalan yn thua zah Bawipaw phu-enaw tuh mih pepan phaephae a aw; te minmin tuh myarya a rih`ae. ¹⁰ Te vaaw ccungccapaw nynh minmin kha, “Rih nan oh, pawccecize dotua oh, ccungccaw balyn hanlan myarya lungtua lan um paw thungpang hoypaw kha kae thuakhaepya oh. ¹¹ Pawccecize atunin David khuapi kya Bawi Kri athua paw Khumtu kha nanning hanlan a pui vae. ¹² Te e hynh nanning hanlan muihsanaw athua cih, nanning nynh nolung uccaw te a lung`ae paw nosi, saring aenaw kua kya a isah`ae paw kha na la muih cih oh,” a cipya`ae. ¹³ Te vaaw ccungccapaw ryte vaawran e vaaw ccungccaw zapi tuh vaekheihmawte oun langkuh`ae zah Pachia kha thehoysah`ae zah, ¹⁴ “Ahang huaccenaw kya Pachia tuh phuesah thua sah, te laephi vawlan daenaw um sah, ccungccaw`ae kalan a ngaethya-umsanaw um sah!” a ci`ae. ¹⁵ Ou tuhte vaaw ccungccaw`ae tuh minmin kyate vaawran lang he a cceih`ae tuh tuuring`ae nynh, “Atu Bethlehem lang cceih oh sih lah Bawipaw nynh aening oun nysah paw hynh-e uccaw acyikuh paw hynh dotua oh sih,” cite lukheit te lukheit a hokuh`ae. ¹⁶ Te minmin tuh arangte cceih`ae zah Meri te Josef, te saring looh-aenaw kua kya a ih paw Nosi kha a muih`ae. ¹⁷ Te minmin nynh he a muih`ae tuh kha-e Imohpaw konglang mimaw a hopya`ae paw kha thungpang po athaansah`ae. ¹⁸ Te tuuring`ae nynh a ho`ae paw bya a thae paw ccungccaw`ae balyn tuh e uccaw kya mih ngaeangthua. ¹⁹ Thuasalama Meri nynh e uccaw`ae balyn kha a thinlung kya ccykekuh zah pei a tua a roih. ²⁰ Te tuurin`ae nynh mimaw kha a hopya`ae hawte a thae`ae paw te a muih`ae paw uccaw`ae balyn hanlan Pachia kha phu-esah`ae zah thehoysah biate a ki`ae. ²¹ Te Imua vindung awkunaw hanlan nin tarya he accing te, vue kya a poi mawze vaaw ccungccapaw nynh a phuty vae paw min khate JESU cite min a phu`ae. ²² - ²³ Te Bawipaw Kawbya kya, “Ccatawccaaw pise miakaw tuh BAWIPAW kalan athyaa ci athua cih,” cite azeiku hawte, Mawsi Kawbya thyhhawte Meri ccikannaw nin he accing tuh minmin nynh imohpaw kha Bawipaw kalan thuakhae khylan Jerusalem lang a cciakhae`ae. ²⁴ Te “Vafu saning, tukhyhze valaele” saning te silawnaw rae lan cite Bawipaw Kawbya kya a hoku thyhhawte silawnaw rae khylan a cceih`ae. ²⁵ Te dotua, a min Simeon acikuh paw ccungccaw lukheit Jerusalem kya a um. Tuh-e paw tuh adingpaw te Pachia kalan a pyakuh paw nynh thua, Israel`ae ngaengannaw kha a ngaehoi paw thua zah Thyaa Muisaw a tungvaw a um. ²⁶ Te aning tuh Bawipaw kya-e Kri a muih makhia chih la ngaw khyh cite Thyaa Muisaw nynh amaw kha a la phypya. ²⁷ Te aning tuh Muisaw liate tempal voidu kya a thua; te a nung te a paaw nynh Kawbya phung thyhte a hanlan cyipya lan cite Imua Jesu kha he a teekhae`ae tuh, ²⁸ Simeon nynh Imua kha a kuih kya dua zah Pachia kha hythuapya zah, ²⁹ “Lesae huapaw Bawipaw, na bya thyhhawte atu na seepaw hynh daebabilan yn pousah ccavae; ³⁰ Pawccecize na khumnaw kha ka mit nynh phe a muih vae, ³¹ Tuh-e tuh ccungccaw balyn muihnaw malang na paccynpaw; ³² Zenta`ae a awsah cih paw awnaw te na ccungccaw Israel`ae hanlan phuenaw nynh thua,” cite a ho. ³³ Amaw konglang a ho`ae paw uccaw`ae kya Josef te a nung tuh mih ngaeangthua. ³⁴ - ³⁵ Te Simeon nynh minmin kha hythuapya`ae zah a nung Meri kha, “Dotua, e Imua tuh Israel`ae patae khuliaku nawlan te thoku nawlan, ccungccaw patae thinlung-tuanaw`ae kha a langsaku nawlan thethya oun ho cih`ae paw muihsanaw hanlan paccynde paw nynh thua. Oute thaloi nynh na hiinnaw-muisaw kha mah ae thuin cih,” a cipya. ³⁶ Te Asher phin, Fanuel ccanung Anna acikuh paw profehnung lukheit a um. Aning tuh a kum phe tang vae, te vawpaw a hoinaw te kum sari cia a vawpaw ryte a umkheih`ae. ³⁷ Te aning tuh a kum sungtarya kum pali cia numae zah sawsangnaw te loohaesungnaw te khuazi khuadae Pachia rya kha laah zah tempal kyate a pou lei nung nynh thua. ³⁸ Te aning mah khahlya khe yn tee zah Bawipaw kalan lungtuabya a ho, te Jerusalem kya sawkhawnaw a ngaehoi`ae paw balyn kalan khe kha-e imohpaw kong kha a hopya`ae. ³⁹ Te a nung te a paaw nynh Bawipaw Kawbya thyhhawte pawpaw balyn kha phe a cyih`ae koute Galilee pee mimaw mih khua Nazareth lang a ki`ae. ⁴⁰ Te Imua tuh lethung zah muisaw kya a thawsae, hawnaw te phe abeih; te Pachia thawccinaw tuh a tungvaw a um. ⁴¹ Te a nung te a paaw tuh Kawtaw Poi kya kum takyh Jerusalem lang leih a cceih`ae. ⁴² Te Jesu tuh kum haw laening he acihte Kawtaw Poi phung thyhhawte minmin tuh Jerusalem lang a cceihthung`ae. ⁴³ Te poi nin`ae he athang te a nung te a paaw tuh a ki`ae, Imohpaw Jesu tuh Jerusalem kya zya a umhy ung, te Josef te a nung nynh kha-e kha nyh khyh`ae. ⁴⁴ Thuasalama minmin nynh a kikheih`ae paw kya nynh a umbua cih cite tua`ae zah nin kheit laanccia cia a cceih`ae; te mih vaeccaw`ae te a nyhkuh`ae paw kya a ccung`ae. ⁴⁵ Te minmin nynh amaw kha he a muih vae khyh`ae tuh Jerusalem lang bua ki`ae zah a ccung`ae. ⁴⁶ Ou tuhcihte nin thung a ccung`ae koute, minmin nynh amaw kha tempal kya ccangpatu`ae laku dahung zah mih bya kha ngae zah minmin bya a khia`ae paw kha a muih`ae. ⁴⁷ Te amaw bya a thae`ae paw balyn nynh a thaethyanaw te a byakhungnaw kya mih ngaeangthua. ⁴⁸ Te minmin nynh amaw kha he a muih`ae tuh mih ngaeangthua; te a nung nynh, “Ka Ccapaw, pawccemou kaening hynh hynhte nae cyi? Dotua, na paaw te kae tuh thinphang te nang kha kae ccung,” a cipya. ⁴⁹ Te aning nynh minmin kha, “Pawccemou kae tuh nae ccung oh? Ka Paaw rya ka law lan accan cipaw na nyh khyh oh tou?” a cipya`ae. ⁵⁰ Te minmin nynh mih kya a hopya`ae paw bya kha thaethya khyh`ae. ⁵¹ Te aning tuh a nung ry a paaw ryte cceihbung`ae zah Nazareth kya a thua`ae. Aning tuh minmin kaw a ngae; thuasalama a nung nynh hynh-e uccaw`ae kong balyn kha a thinlung kya a ccykeku. ⁵² Te Jesu tuh a pynsaw lethung zah hawnaw kya a kaethung, te Pachia te ccungccaw kya maehoynaw a mue.

¹ Te Tiberias Sizar uknaw kum haw laepangaw lya, Pontias Pilat tuh Judah pee uktu thua zah Herod tuh Galilee pee kya tetrach thua zah a neitaw Filip tuh Iturea pee te Trakhonitis pee kya tetrarch thua zah Lysanias tuh Abilene pee kya tetrach thua zah, ² Annas te Kaiafas tuh ranpibawi lupi`ae athua`ae lya, rangkaw kyakhe Pachia bya tuh Zakharia ccapaw Johan kalan yn thua. ³ Te Johan tuh Jordan vaw pepan ram balyn kya yn thua zah seinaw ngaethyanaw hanlan ngaesikunaw te asekuhpaw baptisma kong kha a ho. ⁴ Profeh Isaiah bya`ae kha ccauh kya azeiku thyhhawte, a hopaw tuh: “Rangkaw kya a sia paw lukheitpaw roi nynh, ‘BAWIPAW laanpi kha paccynpah oh, a laanpi kha lawbabinlan raepah oh. ⁵ Hunghua miakaw kha bia thua cih zah mua alepaw te mua taraw miakaw tingbung athua cih, te akoupaw laanpi`ae kha dingsah athua cih zah doungih-doungae a um paw laanpi`ae kha hoysah, nginsah athua cih. ⁶ Te ccungccaw balyn nynh Pachia kya-e khumnaw kha a muih cih`ae,’ a ci,” a ci. ⁷ Oute Johan nynh amaw kyae baptisma-in lan oun thua`ae paw ccungccaw zapi kha, “Pou fuparepaw ciihan`ae, yn thua vae cih paw thinrianaw kyate ccue khylan hung nynh mou nanning kha raering ae pya oh? ⁸ Tukeiccu ngaesikunaw te angaekuhpaw athae kha thaetua oh, te naemaw te naemaw kya, ‘Kaening nynh paaw lang Abraham kae hoi,’ cite mazi ci nan oh, pawccecize nanning kae hopya oh, Pachia tuh hynh-e lung`ae balyn hynh Abraham ccaaw`ae lang a tangsah khopaw nynh thua. ⁹ Te atu mah hae tuh thingku leihpaw kya nungde athua vae, tukeiccu ahoypaw athae thae leipaw thingku miakaw tuh nge thua zah maee lungkhu lang phung athua,” a ci. ¹⁰ Te ccungccaw`ae nynh, “Tuhte lanze pawmou kae cyih cih?” cite Johan kha a khia`ae. ¹¹ Aning nynh khung`ae zah minmin kha, “Angki zung ning a hoi paw nynh a hoi leipaw kha pyabua sah, te aepaw a hoi paw nynh tuh-e hawte cyih sah,” a cipya`ae. ¹² Oute nguntokhoi`ae paw mah baptisma-in lan oun thua`ae zah amaw kha, “Ccangpatupaw, pawmou kae cyih cih?” cite a khia`ae. ¹³ Te aning nynh minmin kha, “Nanning kaw ae pya oh paw laelan la khoi nan oh,” a cipya`ae. ¹⁴ Te tuhhawte rhawkaw`ae nynh amaw kha, “Pawmou kae cyih cih?” cite a khia`ae. Te aning nynh minmin kha, “Hung ccungccaw sanmah la luade nan oh, hung sanmah ahme lei lante seibede nan oh, te na mue oh paw amee khate nae lungryachih sah,” a cipya`ae. ¹⁵ Te ccungccaw`ae nynh Johan hynh Kri thua vema, thua khyh vema cipaw mih balynte ngaehoinaw te mih thinlung kya a tua`ae lyakhe; ¹⁶ Johan nynh minmin balyn kha khung`ae zah a hopaw tuh: “Kae nynh nanning kha tui kya baptisma kae insah oh; thuasalama kamaw laeze athung huapaw Lukheit yn thua cciamang, tuh-e paw a ccukoh rui phoupya lan san kae tuh ka ngaekuh khyh; aning nynh nanning kha Thyaa Muisaw kya te maee kya baptisma ae insah cih oh. ¹⁷ A zawnawpaw pahraw tuh a kuih kya um zah a sarahmin kha thyaapapinglan a cciccae cih, te chanvui kha a byng lungkhu lang a ruin cih, thuasalama asipaw tuh a chih kho leipaw maee te a rua cih,” a ci. ¹⁸ Te ccangpaw bya patae te thuihei`ae zah thehoypaw kha ccungccaw`ae kalan a hopya`ae. ¹⁹ Thuasalama tetrarch Herod kha a neitaw Filip zu Herodia konglang te Herod nynh a cyi paw ahoy leipaw balyn kha Johan nynh seinaw a muihsaku keiccuze, ²⁰ Herod nynh a seinaw balyn vawlan, e hynh biachihte Johan kha thunginn kya a saw. ²¹ Te tuhcihte ccungccaw`ae balyn tuh baptisma-in`ae zah Jesu mah baptisma-in bua. Te saw he a sang tuh vaawran hungkuh zah, ²² Thyaa Muisaw tuh vafu hawte pyn lante yn langkuh zah Jesu tungvaw a ccuh, te vaawran kyate roi yn ccae zah, “Nang tuh na kya ka lungrythua paw ka sungsahpaw ka Ccapaw nynh na thua,” a ci. ²³ Te Jesu kum sungthung loukaw acih tetuh ryalaw a tho. Ccungccaw`ae nynh Josef ccapaw cite a tua`ae; Josef tuh Heli ccapaw, ²⁴ Heli tuh Matthat ccapaw, Matthat tuh Levi ccapaw, Levi tuh Melkhi ccapaw, Melkhi tuh Janna ccapaw, Janna tuh Josef ccapaw, ²⁵ Josef tuh Mattathias ccapaw, Mattathias tuh Amos ccapaw, Amos tuh Nahum ccapaw, Nahum tuh Esli ccapaw, Esli tuh Naggai ccapaw, ²⁶ Naggai tuh Maath ccapaw, Maath tuh Mattathias ccapaw, Mattathias tuh Semei ccapaw, Semei tuh Josef ccapaw, Josef tuh Judah ccapaw, ²⁷ Judah tuh Joanna ccapaw, Joanna tuh Rhesa ccapaw, Rhesa tuh Zerubbabel ccapaw, Zerubbabel tuh Shealtiel ccapaw, Shealtiel tuh Neri ccapaw; ²⁸ Neri tuh Melkhi ccapaw, Melkhi tuh Addi ccapaw, Addi tuh Kosam ccapaw, Kosam tuh Elmodam ccapaw, Elmodam tuh Er ccapaw, ²⁹ Er tuh Joshua ccapaw, Joshua tuh Eliazar ccapaw, Eliazar tuh Jorim ccapaw, Jorim tuh Matthat ccapaw, Matthat tuh Levi ccapaw, ³⁰ Levi tuh Simeon ccapaw, Simeon tuh Judah ccapaw, Judah tuh Josef ccapaw, Josef tuh Jonan ccapaw, Jonan tuh Eliakim ccapaw, ³¹ Eliakim tuh Melea ccapaw, Melea tuh Menan ccapaw, Menan tuh Mattatha ccapaw, Mattatha tuh Nathan ccapaw, Nathan tuh David ccapaw, ³² David tuh Jessi ccapaw, Jessi tuh Obed ccapaw, Obed tuh Boaz ccapaw, Boaz tuh Salmon ccapaw, Salmon tuh Nahshon ccapaw; ³³ Nahshon tuh Amminadab ccapaw, Amminadab tuh Ram ccapaw, Ram tuh Hezron ccapaw, Hezron tuh Farez ccapaw, Farez tuh Judah ccapaw, ³⁴ Judah tuh Jakob ccapaw, Jakob tuh Isaak ccapaw, Isaak tuh Abraham ccapaw, Abraham tuh Terah ccapaw, Terah tuh Nahor ccapaw, ³⁵ Nahor tuh Serug ccapaw, Serug tuh Reu ccapaw, Reu tuh Peleg ccapaw, Peleg tuh Eber ccapaw, Eber tuh Shelah ccapaw, ³⁶ Shelah tuh Kainan ccapaw, Kainan tuh Arphasad ccapaw, Arphasad tuh Shem ccapaw, Shem tuh Noah ccapaw, Noah tuh Lamek ccapaw, ³⁷ Lamek tuh Methuselah ccapaw, Methuselah tuh Enok ccapaw, Enok tuh Jared ccapaw, Jared tuh Mahalalel ccapaw, Mahalalel tuh Kainan ccapaw, ³⁸ Kainan tuh Enos ccapaw, Enos tuh Seth ccapaw, Seth tuh Adam ccapaw, Adam tuh Pachia ccapaw nynh thua.

¹ Te Jesu tuh Thyaa Muisaw te beih zah Jordan vaw kyate a ki, te Muisaw nynh rangkaw langkhe a cciakhae. ² Nin sungpali cia diabolos nynh a tuh-ou. Te tuh-e nin`ae kya aning tuh pawpaw sanmah ae khyh, te tuh-e nin`ae he athang tuh a vuelaw vae. ³ Te diabolos nynh amaw kha, “Pachia Ccapaw na thua lanze e lung hynh sanlou lang a tang ccaw kawpya,” a cipya. ⁴ Te Jesu nynh khung zah, “ ‘Ccungccaw tuh sanlou kyalya te hiin lan khyh, thuasalama Pachia bya miakaw te nynh a hiin cih,’ cite Ccathyaa kya azeikuh,” a cipya. ⁵ Te diabolos nynh Jesu kha ahangpaw mua kalan cciakhae thung zah ccyh sosoh kya laephipi peenaw`ae balyn kha marya a muihsah. ⁶ Te diabolos nynh Jesu kha, “Kawhoinaw balynte mih phu-enaw tuh kamaw kalan pya athua vae keiccu, ka pya ry paw ccungccaw kha ka pya, te nang kha hynh-e kawhoinaw balyn hynh marya kae pya cih. ⁷ Tukeiccu kamaw hynh nae beik lanze hynh-e`ae balyn tuh na kya-e athua cih,” a cipya. ⁸ Te Jesu nynh khung zah, “Setan, ka nuhlang thungkuh! Pawccecize, ‘Na Pachia BAWIPAW kha na beik cih, amaw kyalya kha rya na lawpah cih,’ cite Ccathyaa kya azeikuh,” a ci. ⁹ Te Setan nynh Jesu kha Jerusalem lang cciakhae zah tempal avawlan paccy kya nung zah amaw kha, “Pachia Ccapaw na thua lanze, namaw te namaw e kyate toikubung tua. ¹⁰ Pawccecize Ccathyaa kya, ‘Nang khynsah khylan, a vaaw ccungccaw`ae kha nang na hanlan kawpya cih`ae. ¹¹ Na ccu kha lung kya na thuhku khyh nawlan minmin nynh mih kuih te ae dua cih`ae,’ cite azeikuh,” a cipya. ¹² Te Jesu nynh khung zah, “ ‘BAWIPAW na Pachia kha nang nynh na syntaw lan khyh,’ cite Ccathyaa nynh a ci,” a cipya. ¹³ Te diabolos nynh tuh-ounaw miakaw kha he a thangsah te Jesu kyate ccyh sosoh a poutaw. ¹⁴ Te Jesu tuh Muisaw thungnaw te Galilee lang ki zah amaw the tuh tuin ram pepan balyn po athaan. ¹⁵ Te Jesu nynh sinakok`ae kyakhe ccangpah`ae zah ccungccaw balyn nynh thehoysah`ae. ¹⁶ Te Jesu tuh a lethungnaw khua, Nazareth kyakhe thua zah leih a cyimae hawte, Sabbath nin kya sinakok lungkhu lang tee zah Ccathyaa ria lan a thadyn. ¹⁷ Te profeh Isaiah ccaleih kha amaw kalan a pya`ae. Te Jesu nynh ccaleih kha he a kia tuh hynhte azeikunaw kya a muih: ¹⁸ “BAWIPAW Muisaw tuh kamaw tungvaw a um, pawccemacize aning nynh ryachi`ae kha thehoypaw hopya khylan kamaw kha satho phe yn thuh vae; thinlung a koi`ae paw dansah khylan, ccungccaw`ae nynh a kyng`ae paw kalan sawkhawnaw kong hopya khylan, te mitmoh`ae kha ngawmuihnaw kong hopya khylan, vawsaw teing`ae paw kha luesah khylan, ¹⁹ BAWIPAW kya-e ngaehoi lan um paw kum kha hopya khylan, kamaw kha phe oun saw vae,” acikuh. ²⁰ Te aning nynh ccaleih kha kue zah a ccytupaw kha a pya, oute a dahung. Te sinakok kya um`ae paw balyn mit nynh amaw kha riri a do`ae. ²¹ Te Jesu nynh tho zah minmin kha, “Atunin hynh-e Ccathyaa tuh nae nakaring kya na thae oh hawte phe accing vae,” a cipya`ae. ²² Te ccungccaw balyn nynh amaw kha ccaekiakhan`ae zah a khalang kyate a toikuh paw thawccinaw bya`ae kya mih ngaeangthua. Te minmin nynh, “E paw hynh Josef ccapaw thua khyh tou?” a ci`ae. ²³ Te Jesu nynh minmin kha, “Nanning nynh, ‘Sibawipaw, namaw te namaw kha dansakuh tua! Kapernaum khua kya na cyipaw kae thae hawkhate hynhe namaw na khua kya mah cyi tua,’ cite e phungtangbya hynh kamaw kalan nae ho ccaccing cih oh,” a cipya`ae. ²⁴ Te Jesu nynh, “Byaccaccing kae hopya oh, profeh hung sanmah amaw khua kya tuh maehoynaw mue boi khyh. ²⁵ Thuasalama thanccingte kae hopya oh, Elijah ccyh lya kum thung te sataruh cia vaawran thuakaw khaw thua zah ram balyn kya myarya ccakangcci lya, Israel ram kya numae`ae patae a um`ae. ²⁶ Thuasalama tuh-e`ae lukheit kalan san Elijah kha saw thua khyh, thuasalama Sidon ram e Zarephath khua kya um paw numaenung kalan rou nynh saw athua. ²⁷ Te profeh Elisha ccyh lya Israel ram kya vaethyakaepaw patae a um`ae, thuasalama Siria paw Naaman laelan hung sanmah thyaasah thua khyh,” a ci. ²⁸ Te sinakok kya a um`ae paw balyn nynh hynh-e bya`ae kha he a thae`ae tuh myarya mih thinria. ²⁹ Te thokuh`ae zah Jesu kha khua kyate dee`ae zah tuh-e khua a saahnaw`ae mua zung, chiadung lante dae dawleihkuh lang tu lan cite a cciakhae`ae. ³⁰ Thuasalama Jesu tuh minmin ngaelaku te po pou zah po a cceih. ³¹ Oute Galilee ram e Kapernaum khua lang cceihbung zah Sabbath nin kya a ccangpya`ae. ³² Te kawhoinaw te bya a ho keiccuze ccungccaw`ae tuh a ccangpyanaw kya mih ngaeangthua. ³³ Atu sinakok kya athyaa leipaw raerangsaro muisaw a hoi paw ccungccaw lukheit a um. Te aning nynh, ³⁴ “Kae makhaete kae um sah! Nazareth paw Jesu, nang ryte kaening pawmou kae sekuh? Nang tuh kaening ro khylan tou nae thua? Nang tuh hung nynh na thua cipaw ka ny, Pachia kya-e Athyaapaw nynh na thua!” cite thawte a sia. ³⁵ Te Jesu nynh pe zah, “Yccae nan kha-e paw lungkhu kyate pou,” a cipya. Te raerangsaro nynh kha-e paw kha ccungccaw`ae laku kya phe vuasakuh zah maw muihsah leite a kyate phe a pou. ³⁶ Te ccungccaw`ae balyn tuh mih ngaeangthua zah, “E bya hynh pawtecihpaw bya mou! Pawccecize kawhoinaw te thungnaw ryte athyaa leipaw muisaw`ae kha kawpya zah minmin phe a pou`ae,” cite mimaw laku kya a hokuh`ae. ³⁷ Te a thungpang tuh tuh-e ram pepan e ahmin takyh kya balyn po athaan. ³⁸ Te Jesu tuh sinakok kyate thokuh zah Simon inn lungkhu lang a tee. Te Simon a zu nung tuh myarya a nge ling zah minmin nynh a hanlan Jesu kha a ngiapya`ae. ³⁹ Te Jesu nynh kha-e nung pe khe thadyn zah ngelingpaw kha a pe, te kha-e nung tuh phe dan, te nopinung tuh vaekheihmawte thokuh zah minmin elan ryalawpah vae`ae. ⁴⁰ Te khuanin he ccah tuh ccinaw aphuinphuin te a ccih`ae paw ngeccih`ae balyn kha amaw kalan oun cciakhae`ae, te Jesu nynh tuhe` ae milu raveih tungvaw khe a kuih khang zah minmin kha a dansah`ae. ⁴¹ Te raerangsaro`ae nynh mah, “Nang tuh Pachia Ccapaw Kri nynh na thua,” cite sia`ae zah ccungccaw patae kyate a pou`ae. Te Jesu nynh minmin kha pe`ae zah bya ho lan kaw ua khyh`ae, pawccecize minmin nynh aning tuh Kri nynh thua cipaw kha a ny`ae. ⁴² Te khua he yn dae tuh, Jesu tuh pou zah rangkaw langkhe a cceih. Te ccungccaw`ae nynh amaw kha ccung`ae zah amaw kalan a thua`ae, te minmin kyate a pou khyh nawlan a kang`ae. ⁴³ Te Jesu nynh minmin kha, “Pachia peenaw kong hynh ccangpaw khua`ae kalan mah ka ho hahe cih, pawccecize tuh-e khylan nynh kamaw tuh saw ka thua,” a cipya`ae. ⁴⁴ Te Galilee pee e sinakok`ae kyakhe phung a ho.

¹ Ou tuhcihte Jesu tuh Kenesaret kuaapi pe thadyn zah ccungccaw`ae nynh Pachia bya ngae khylan amaw kha phang lungnuaku`ae lyakhe, ² kuaapi akin lang a um paw kohlung ccangning kha a muih; thuasalama ngasaw kyngtu`ae tuh kohlung kyate pou`ae zah mih mia`ae kha a sing`ae. ³ Te Jesu tuh kohlung ccangning lakuze ccangkheit, Simon kya-e lungkhu langkhe tee zah kuaapi akin kyate ccapyh nuesaku lan Simon kha a ngia. Te kohlung kya dahung zah ccungccaw`ae kha a ccangpya`ae. ⁴ Te bya a hopaw he a thangsah te, Simon kha, “Akhunaw langkhe zaw lah ngasaw kyng khylan nae mia`ae kha vuatua oh,” a cipya. ⁵ Te Simon nynh amaw kha khung zah, “Bawipaw, khuazi zidae kae vua zah ccangkheit san kae kyng khyh; thuasala zemah na bya thyhte mia ka vua cih,” a cipya. ⁶ Te minmin nynh tuhte he a vua`ae tuh myarya alungpaw ngasaw`ae kha bung`ae zah mih mia tuh vyavya a pae vae. ⁷ Te minmin nynh ccangpaw kohlung kya um`ae paw miavuakheih`ae paw kha oun cceih`ae sah lah oun bawng`ae ccaw cite mih kuih te a ko`ae. Te minmin tuh oun thua`ae zah kohlung ccangning te vya phungkuh lan ngasaw kha phe a bia`ae. ⁸ Kha-e kha Simon Piter nynh he a muih tuh, Jesu ccukharu kin khe bakhung zah, “Pou Bawipaw, kae tuh a seipaw ccungccaw nynh ka thua, ka kyate beih pou,” a cipya. ⁹ Pawccecize Simon te amaw ryte umkheih`ae paw balyn tuh a kyng`ae paw ngasaw`ae kya mih ngaeangthua keiccu nynh thua. ¹⁰ Te Simon ryte a mungkuh`ae paw Zebedi ccaaw`ae James te Johan mah mih ngaeangthua. Te Jesu nynh Simon kha, “Rih nan, atu kyate nang tuh ccungccaw`ae nynh na kyng vae cih,” a cipya. ¹¹ Te mih kohlung`ae kha laerang lang he thuakhae`ae tuh marya cciataw`ae zah amaw kha a zui`ae. ¹² Ou tuhcihte Jesu tuh khua khuakheit kya a um lyakhe, dotua oh, vaethyaccinaw te phe abeihpaw ccungccapaw nynh Jesu kha he a muih tuh bakhung zah, “Bawipaw, na ry lan thua ze, kae hynh nae thyaasah kho,” cite a ngiaku. ¹³ Te Jesu nynh a kuih dyng zah kha-e paw kha hae zah, “Ka ry, nang thyaa ccavae,” a cipya. Te vaekheihmawte vaethyaccinaw tuh phe athyaa. ¹⁴ Te Jesu nynh, “E kong hynh hung ccungccaw san la hopah nan cite kaw a pya, thuasalama la cceih lah ranpibawi kalan namaw kha la muihsakuh, te Mawsi kawbya thyhhawte minmin kalan ccaekia lang, nang thyaasah na thua paw hanlan silawkunaw kha la rae,” cite bya a tawsya. ¹⁵ Te amaw the tuh houhouh thaan zah ccungccaw zapi pi nynh amaw bya thae khylan te mih ccinaw kyate dan khylan oun sueluakuh`ae. ¹⁶ Te Jesu tuh rangkaw langkhe leih cceih zah saw a sang he. ¹⁷ Ou tuhcihte nin kheit tuh, Jesu nynh a ccangpya`ae lyakhe, Jerusalem kya te Judah pee te Galilee pee e khua`ae balyn kyate oun thua`ae paw Farasi`ae te kawbya ccangpatu`ae tuh a dahung`ae, te minmin dansah khylan Bawipaw thungnaw tuh a langkuh. ¹⁸ Te dotua, ccungccaw`ae nynh kuihccuchihpaw ccungccapaw kha inawpaw te oun puih`ae zah amaw malang khe nung khylan teekhaenaw kha a ccungku`ae. ¹⁹ Te ccungccaw zapi keiccuze teekhaenaw he a muih vae khyh`ae tuh, innccukaly lang kaekhae`ae zah innccukaly kha kia`ae zah ngeccih kha inawpaw ryte ccungccaw`ae laku Jesu malang khe a sawbung`ae. ²⁰ Te Jesu nynh mih zynnaw kha he a muih tuh, ngeccih paw kha, “Ccungccapaw, na seinaw`ae ngaethya athua vae,” a cipya. ²¹ Te kawbya ccangpatu`ae te Farasi`ae nynh, “Pachia sarya paw bya ho paw e paw tuh hungmou? Pachia kyalya laelan hungmou seinaw a ngaethya kho?” cite a hokuh`ae. ²² Thuasalama Jesu nynh mih tuanaw kha he a nyh tuh minmin kha, “Nae thinlung kya pawccemou tuhte na tuaku oh? ²³ ‘Na seinaw tuh ngaethya athua vae,’ cipya paw tou azoihua, tukhyhze, ‘Thokuh lah cceih,’ cipya paw tou azoihua? ²⁴ Thuasalama Ccungccaw Ccapaw tuh laephi vawlan seinaw ngaethya lan kaw a hoi cipaw na ny nawlan oh,” cipah`ae zah, kuihccuchihpaw kha, “Nang kae hopya, thokuh lah na iphae kha lawkuh lah na inn lang cceih ccavae,” a cipya. ²⁵ Te tuh-e paw tuh minmin malang vaekheihmawte thokuh zah a inawpaw kha lawkuh zah Pachia kha phu-esahte a inn lang a cceih. ²⁶ Te ccungccaw`ae balyn tuh mih ngaeangthua zah rinaw te phe beih`ae zah, “Atunin ngaeang lan um paw uccaw`ae phe ah muih vae oh,” ci`ae zah Pachia kha phu-esah`ae. ²⁷ Te e uccaw`ae koute Jesu tuh pou zah ngunto khoinaw kya a dahung paw, Levi acikuh paw, ngunto khoitupaw kha a muih; te Jesu nynh, “Kamaw yn zui,” a cipya. ²⁸ Te aning nynh pawpaw balyn kha cciataw te thokuh zah amaw kha a zui. ²⁹ Te Levi nynh a inn kya Jesu elan poi pi kha a tuapya, te tuin kya ngunto khoitu`ae patae te ccangpaw ccungccaw`ae um`ae zah Jesu te zuitu`ae ryte aepaw a koihkheih`ae. ³⁰ Te kawbya ccangpatu`ae te Farasi`ae nynh zuitu`ae kha, “Pawccemou nanning nynh ngunto khoitu`ae te misei`ae ryte na aekheih oh zah na niakheih oh?” cite a seisah`ae. ³¹ Te Jesu nynh minmin kha, “A dan`ae paw nynh sibawi peki khyh`ae; thuasalama a ccih`ae paw nynh a peki`ae. ³² Kae tuh a ding`ae paw ko khylan kae thua khyh, thuasalama misei`ae nynh a ngaesiku ccaw`ae cite nynh kae thua,” cite a khung`ae. ³³ Te minmin nynh amaw kha, “Johan zuitu`ae tuh pei looh-aesung`ae zah sawsangnaw a rae`ae. Tuhhawte Farasi`ae zuitu`ae mah a cyihbua`ae, thuasalama nang na zuitu`ae tuh pawccemou ae`ae zah a nia`ae?” cite a khia`ae. ³⁴ Te Jesu nynh, “Zudy ccangvaepaw ryte a um`ae lya zudy ccangvaepaw a uno`ae kha looh-ae na sungsah kho cih oh tou? ³⁵ Thuasalama, zudy ccangvaepaw kha a uno`ae kyate lawpya nin ccyh yn thua cih, te tuin nin`ae kya minmin tuh looh-ae a la sung cih`ae,” a cipya`ae. ³⁶ Te minmin kha tousenaw phungpaw ccangkheit a hopya`ae: “Hung nynh sanmah uccaw arynpaw kha uccaw athawpaw te bia boi khyh, tuhte a bia lanze uccaw athawpaw nynh arynpaw kha phe siasahkuh cih, bianawpaw athawpaw tuh uccaw arynpaw te ccawkuhthya khyh. ³⁷ Te hung nynh sanmah misutui athawpaw kha arynpaw misu-saving bung kya ruin boi khyh, tuhte a ruin lanze misutui athawpaw nynh misu-saving bung kha phae pawsah cih zah misutui pung azu cih, te misu-saving bung mah phe aroh cih. ³⁸ Thuasalama misutui athawpaw tuh athawpaw misusaving bung lungkhu lang ruin hahe lanpaw nynh thua, oute nynh paryhte akhyn`ae. ³⁹ Arynpaw misutui kha phe a neih koute tuh hung nynh sanmah athawpaw misutui kha taloi ry he khyh, pawccecize, ‘Arynpaw nynh athuahua,’ a ci,” cite a hopya`ae.

¹ Ou tuhcihte masaty Sabbath athang koute, vaeningnaw Sabbath nin kya Jesu tuh loo kya po cceih zah, a zuitu`ae nynh looh avui kha zukuh`ae zah mih kuih te noi`ae zah a ae`ae. ² Te Farasi`ae abang nynh minmin kha, “Sabbath nin kya kawbya nynh cyi lan a ua leipaw kha pawccemou nanning nynh na cyi oh?” a ci`ae. ³ Te Jesu nynh, “David nynh amaw ryte um`ae paw ry mih vuelaw lya a cyi paw kha na ria boi khyh oh tou? ⁴ Pachia inn lungkhu lang tee zah ranpibawi laelan hung nynh sanmah ae lan kawbya nynh a ua leipaw Pachia malang nungpyapaw sanlou kha lawkuh zah a ae, te amaw ry um`ae paw kha mah a pyabua`ae paw kha na ria boi khyh oh tou?” cite a khung`ae. ⁵ Te Jesu nynh minmin kha, “Ccungccaw Ccapaw tuh Sabbath Bawipaw mah athua,” a cipya`ae. ⁶ Ou tuhcihte ccangpaw Sabbath nin kya Jesu tuh sinakok lungkhu lang tee zah a ccangpya`ae, te tuin kya a ranglang kuih achihpaw ccungccapaw lukheit a la um. ⁷ Te kawbya ccangpatu`ae te Farasi`ae nynh Jesu tungvaw seibenaw ccungpya khylan, Sabbath nin kya kha-e paw kha yn dansah ta, yn dansah khyh ta cite a dokhaw`ae. ⁸ Thuasalama Jesu nynh mih tuanaw kha phe nyh zah a kuih achihpaw ccungccapaw kha, “Thokuh lah e kya thadyn,” a cipya. Te aning tuh thokuh zah a thadyn. ⁹ Oute Jesu nynh, “Nanning kha ccangkheit kae khia tua cih oh: Sabbath nin kya ahoypaw cyi lan kawbya nynh a ua tou? Tukhyhze ahoy leipaw cyi lan tou a ua? Hiinnaw kha so khum lan a ua tou? Tukhyhze chia lan tou a ua?” cite a khia`ae. ¹⁰ Te minmin balyn pepan khe do zah, Jesu nynh kha-e paw kha, “Na kuih kha dyngtua,” a cipya. Te aning nynh a kuih kha dyng zah hawkheit lang hawte phe ahoy vae. ¹¹ Te minmin tuh thinrianaw te phe beih`ae zah Jesu kha pawte cyi lan cipaw lukheit te lukheit byahokuh`ae. ¹² Ou tuhcihte tuin nin`ae kya Jesu tuh sawsang lan mua lang cceih zah zi balyn Pachia kalan sawsangnaw a mang. ¹³ Te khua he dae te a zuitu`ae kha amaw kalan ko`ae zah, luhaw laening kha a po`ae, minmin kha locceihtu`ae cite min a phu`ae. ¹⁴ Tuh-e`ae tuh: Piter cite min a phu paw Simon te a neitaw Andru, James te Johan, Filip te Bartholomew, ¹⁵ Matthai te Thomas, Alfeas ccapaw James, Zelot acikuh paw Simon, ¹⁶ James ccapaw Judas, te Jesu a pheetupaw Judas Iskaria nynh thua`ae. ¹⁷ Te minmin ryte Jesu tuh mua kyate rungbung zah bialae kyakhe, a bya ngae khylan te mih ccinaw dan khylan Judah pee balyn kyate, Jerusalem kyate, rili kin um paw Tai khua te Sidon khua kyate oun thua`ae paw ccungccaw zapi te a zuitu`ae pataepi ry, ¹⁸ te athyaa leipaw muisaw nynh vawsaw a pya`ae paw ryte a thadyn`ae. Te minmin tuh dansah athua`ae. ¹⁹ Te Jesu kyate thungnaw pou zah ccungccaw`ae a dan`ae keiccuze ccungccaw zapi balyn nynh amaw kha hae khylan a ccung`ae. ²⁰ Te Jesu nynh a zuitu`ae kalan khe dothung zah, “Nanning ryachi`ae, hythuaccoupaw nynh na thua oh, pawccecize Pachia peenaw tuh nae kya-e nynh thua. ²¹ Atu vuelaw`ae paw nanning, hythuaccoupaw nynh na thua oh, pawccecize nae vue sosah athua cih. Atu a rah`ae paw nanning, hythuaccoupaw nynh na thua oh, pawccecize nae nuin cih oh. ²² Ccungccaw Ccapaw keiccuze ccungccaw`ae nynh ae hua oh zah mih kyate ae phia oh zah sarisarya ae nung oh zah nae the ae thyasah vae oh ze, nanning tuh hythuaccoupaw nynh na thua oh. ²³ Kha-e nin kya nanning lungtua oh lah lungpawnaw hanlan thohkuh oh! Pawccecize vaawran kya nae ryalaw mee tuh ale ccaccing; pawccecize kha-e hawte nynh mih minpaaw`ae nynh mah profeh`ae kha a la cyi`ae. ²⁴ “Thuasalama a hoirung`ae paw nanning, paw ngaethya lan na um oh babang. Pawccecize nanning tuh ngaengannaw kha phe na mue vae oh. ²⁵ Vueso`ae paw nanning, paw ngaethya lan na um oh babang. Pawccecize nae vuelaw cih. Atu a nuin`ae paw nanning, paw ngaethya lan na um oh babang. Pawccecize nae rah nae khui cih oh. ²⁶ Ccungccaw`ae balyn nynh thehoy ae ho vae oh ze nanning tuh paw ngaethya lan na um oh babang. Pawccecize mih minpaaw`ae nynh ahme leipaw profeh`ae kha khate a la cyi`ae. ²⁷ “Thuasalama ka bya a thae`ae paw nanning kae hopya oh, nae rhaw`ae kha sungsah oh lah nanning ae hua oh paw kha ahoypaw cyipah oh. ²⁸ Nanning thya ae law oh paw kha hythuapya oh lah nanning ae sarya oh paw hanlan sawsangpah oh. ²⁹ Te na mae hawkheit lang ae bia paw kha ccanglang kha mah tuapakuh; te na angkiccua ae lawpah paw kha na angkile lawku lan mah la kang nan. ³⁰ Nang ae ngiakuh paw ccungccaw miakaw kha pya lah na uccaw a lawkuh paw ccungccaw kha bua ngia nan vae. ³¹ Te naemaw nae kya ccungccaw`ae nynh cyih`ae sah cite na ry oh hawte ming`ae kalan mah cyih bua oh. ³² “Pawccecize nanning ae sungsah oh paw kha na sungsahru oh ze, paw thehoysahnaw mou na mue cih oh? Misei`ae nynh heize mimaw a sungsah`ae paw kha a sungsahru`ae khaw. ³³ Te nae kya hoynaw a rae`ae paw kalan hoynaw na raeru oh ze, paw thehoysahnaw mou na mue cih oh? Misei`ae nynh heize tuh-e hawte a cyibua`ae khaw. ³⁴ Te bua yn pyaru cih cite na ngaehoi oh paw ccungccaw`ae kha phua na koisaku oh ze paw thehoysahnaw mou na mue cih oh? Misei`ae nynh heize patae bua mueru lan cite misei`ae kha a koisaku`ae khaw. ³⁵ Thuasalama nanning nae rhaw`ae kha sungsah oh lah ahoypaw kha cyih oh, te pawpaw sanmah ngaehoi leite phua kha koisakuh oh; te nae ryalaw mee tuh ale cih zah nanning tuh Ahang Huaccepaw Pachia ccaaw`ae na thua cih oh. Pawccecize Pachia tuh lungtuabya ho lan a nyhthya leipaw te mihoy leipaw kalan thawcci thyapaw nynh thua. ³⁶ Tukeiccu nae Paaw nynh mah ngaethya-umsanaw a hoi hawte nanning mah ngaethya-umsanaw hoi oh. ³⁷ “Ming`ae kha byapia nan oh lah nanning byapia na thua lan khyh oh, ming`ae kha seibe nan oh lah nanning seibe na thua lan khyh oh, ming`ae seinaw kha ngaethya oh lah nae seinaw ngaethya athua ru cih. ³⁸ Ming`ae kha pyabua oh lah nanning pyaru na thua cih oh, phe dybiate phe ryhbiate ahoyte toupah oh, te phe aleikuh lante ccungccaw`ae nynh nae by phe thua lang ae pyaru cih oh. Pawccecize na tounaw oh paw ccaccei khate nanning kha mah bua toupya ru na thua cih oh,” a cipya`ae. ³⁹ Te Jesu nynh minmin kha tousenaw phungpaw ccangkheit hynhte a hopya`ae: “Mitmohpaw nynh mitmohpaw kha cciakhae kho cih ta? Mih luning te paryh hunghua lungkhu lang ccah lan khyh`ae ta? ⁴⁰ Siaimua tuh a ccangpatu laeze thyahua khyh, thuasalama phe ccing lang ccangpya athua paw siaimua miakaw tuh a ccangpatupaw hawte athua cih. ⁴¹ Te namaw na mit kya um paw thingpyng kha tuaku leite, pawccemou na unopaw mit kya um paw athupaw taraw kha na dopya? ⁴² Namaw na mit kya um paw thingtung kha muihku leite, pawccemou na unopaw kha, ‘Ka unopaw na mit kya-e athupaw taraw kha kae la khoipah,’ cite na ho kho? Pou cyihruh paw, namaw mit kya-e ccungthy kha masaty khoikuh ty lah oute na unopaw mit kya-e athupaw taraw kha khoipya lan ahoyte na muih cih. ⁴³ “Pawccecize ahoypaw thingku nynh ahoy leipaw athae thae khyh, ahoy leipaw thingku nynh zemah ahoypaw athae thae khyh. ⁴⁴ Pawccecize thingku miakaw tuh amaw athae te ny athua. Pawccecize ccungccaw`ae nynh hingpaw ku kyate thaeku lo boi khyh`ae, tahty ku kyate mah misu thae lo boi khyh`ae. ⁴⁵ Ahoypaw ccungccaw nynh a thinlung kya-e ahoypaw sisua bung kyate ahoypaw uccaw kha a pousah, te ahoy leipaw ccungccaw nynh a thinlung kya-e ahoy leipaw sisua bung kyate ahoy leipaw uccaw kha a pousah; pawccecize thinlung kya-e phe beihpaw thyhte khalang nynh leih a ho. ⁴⁶ “Te ka ho paw kha na cyih lei oh pite, pawccemou, ‘Bawipaw, Bawipaw,’ cite nae ko oh? ⁴⁷ Hunghung zemah kamaw kalan yn cceih zah ka ho paw kha thae zah a cyih paw tuh hung te mou aloku cipaw kae muihsah cih oh: ⁴⁸ Aning tuh phe khutheih lang tungkhu ccou zah lung vawlan tungpi bing zah inn a sak paw ccungccaw te nynh aloku; te tuileih tho zah tui nynh kha-e inn kha thawte asoh zemah hy khyh, pawccecize lung vawlan abingku keiccu nynh thua. ⁴⁹ Thuasalama ka bya kha thae zah a zui leipaw ccungccaw tuh tungpi bing leite laephi vawlan inn sak paw ccungccaw te nynh aloku; kha-e kha tui nynh thawte he asoh tuh vaekheihmawte phe apu, te kha-e inn tuh khaleih aroh,” a ci.

¹ Te ccungccaw`ae thaenaw kya a bya ho paw balyn kha he a thangsah koute Jesu tuh Kapernaum khua lungkhu lang a tee. ² Te rhawbawipaw lukheit a ryalawpatu tuh ccih zah a chih vae cih, aning tuh a bawipaw nynh kou sungsahpaw nynh thua. ³ Te Jesu kong kha rhawbawipaw nynh he a thae tuh, a rya lawpatu a dansah ccaw cite ngia khylan Jew piccang`ae kha Jesu kalan a saw`ae. ⁴ Te minmin nynh Jesu kalan he thua`ae te, “Aning tuh e hynh cyipya lan angaekuhpaw nynh thua a cipya`ae. ⁵ Pawccecize aning tuh kaening minphuin hynh sungsah zah kaening elan sinakok oun saahpah paw nynh thua,” cite Jesu kha thawte a ngia`ae. ⁶ Oute Jesu tuh minmin ryte a cceihbua. Te inn kyate asaw leinaw kya he a thua tuh rhawbawipaw nynh a ban`ae kha Jesu kalan saw`ae zah, “Bawipaw, namaw te namaw kha vawsaw pyakuh nan; pawccecize ka inn lungkhu lang nang tee lante kae tuh ka ngaekuh khyh. ⁷ Tuhhawte kamaw te kamaw mah nang na kalan ccia lan ka ngaekuh cite ka tuakuh khyh, thuasalama bya kawkheit ho lah ka rya yn lawpatu tuh a dan cih. ⁸ Pawccecize kae mah kawhoinaw zakaw a um paw ccungccaw lukheit nynh ka thua, ka kuihkaw rhawkaw`ae ka hoi zah lukheit kha, ‘Cceih,’ ka ci ze a cceih; te ccangpaw kha, ‘Rang,’ ka ci ze yn thua; te ka rya yn lawpatu kha, ‘E hynh cyih,’ ka ci ze a cyih,” cite a hosapya`ae. ⁹ E bya`ae kha Jesu nynh he a thae tuh a ngaeangthua zah nuhlang maeleihkuh zah amaw a zui`ae paw ccungccaw`ae kha, “Nanning kae hopya oh, hynhcih alepaw zynnaw tuh Israel`ae kya heize ka muih boi khyh,” a cipya`ae. ¹⁰ Te rhawbawipaw nynh yn saw`ae paw tuh inn lang ki`ae zah accihpaw ryalawpatu tuh phe a dan vae paw kha a muih`ae. ¹¹ Ou tuhcihte awkhualan Jesu tuh Nain acikuh paw khua kalan cceih zah a zuitu`ae patae te ccungccaw patae nynh a zui`ae. ¹² Te Jesu tuh khua koikua pe he a thua tuh, dotua, lukheit kyalya paw, numaenung ccapaw, achihpaw ccungccapaw oun cciakhae`ae paw a um, te khuapi kya-e ccungccaw patae tuh numaenung ryte oun cceih`ae. ¹³ Te Bawipaw nynh kha-e nung kha he a muih tuh ngaethyaumsanaw hoi zah amaw kha, “Rah nan,” a cipya. ¹⁴ Te Jesu nynh naekuh zah taang kha a hae; te kha-e a puih`ae paw tuh a thadyn`ae. Te Jesu nynh, “Ccangvaepaw, nang kae hopya, thokuh,” a ci. ¹⁵ Te achihpaw ccungccaw tuh dahung zah bya yn ho vae. Te Jesu nynh kha-e paw kha a nung kalan a pya. ¹⁶ Te mih balynte mih ri mih kaw thua zah Pachia kha thehoysah`ae. Abang nynh, “Aening laku alesaepaw profeh nynh yn langkuh vae,” a ci`ae. Te abang nynh, “Pachia nynh a ccungccaw`ae kha yn paebua vae,” a ci`ae. ¹⁷ Te amaw konglang hynh-e thungpang tuh Judah ram balyn te a pepan e ram`ae balyn kalan po athaan. ¹⁸ Te Johan zuitu`ae nynh hynh-e uccaw`ae balyn kong kha Johan marya a hopya`ae. ¹⁹ Te Johan nynh a zuitu`ae luning kha ko`ae zah Jesu kalan saw`ae zah, “Nang hynh yn thua lanpaw tuh na thua tou? Tukhyhze mingccangpaw tou kae la ngaehoi cih?” cite a khiasah`ae. ²⁰ Tuh-e ccungccaw`ae nynh Jesu kalan he a thua`ae te, minmin nynh, “Baptisma pyatu Johan nynh kaening hynh na kalan oun saw zah, ‘Nang hynh yn thua lanpaw tuh na thua tou? Tukhyhze mingccangpaw tou kae la ngaehoi ung cih,’ cite bya oun khiasah,” a cipya`ae. ²¹ Te tuin ccyh kya Jesu nynh ccungccaw patae kha mih ccihawnaw kyate thuasah, ahoy leipaw ccinaw kyate thuasah, ahoy leipaw muisaw`ae kyate thuasah a dansah`ae. Te mitmoh`ae patae kha ngawmuihsah`ae. ²² Oute Jesu nynh minmin kha, “La cceih oh lah nanning nynh na muih oh paw te na thae oh paw uccaw`ae kha Johan la hopah oh. Mitmoh`ae nynh ngawmuih vae`ae, ccukhou`ae nynh a cceih vae`ae, vaethyakae`ae paw a dan`ae, nawpang`ae nawthae`ae, a chih`ae paw thosah athua vae`ae, ryachi`ae kalan thehoypaw kha hopya athua vae. ²³ Te kae ka keiccuze a maeleihkuh leipaw ccungccaw tuh hythuaccoupaw nynh thua,” a cipya`ae. ²⁴ Te Johan nynh a saw`ae paw he a pou`ae te, Jesu nynh Johan konglang ccungccaw zapi kalan a hopya`ae paw tuh: “Nanning nynh paw do khylan mou rangkaw langkhe na ccia oh? Khivae nynh a he paw phaeku do khylan tou? ²⁵ Tukhyhze paw do khylan mou na ccia oh? Nebaleihpaw uccaw a lawkuh paw ccungccapaw do khylan tou? Dotua oh, lyccaccu lang uccaw lawkuh`ae zah kou hoy lang um`ae paw tuh siapharan inn kya nynh a um he`ae. ²⁶ Thuasalama paw do khylan mou na ccia oh? Profeh lukheit do khylan tou? Athua, nanning kae hopya oh, profeh lukheit lae heize alesae huapaw nynh thua. ²⁷ “Ccathyaa kya, ‘Dotua, na malang na ccianaw ae paccynpah cih paw ka zeccuetu kha na malang ka saw,’ cite azeikuh paw kha kha-e paw kha nynh a honuathepaw athua. ²⁸ “Pawccecize nanning kae hopya oh, nopi`ae nynh a saah`ae paw ccungccaw`ae laku Baptisma pyatu Johan laeze alesae huapaw profeh lukheit san um khyh; thuasalama Pachia peenaw kya adih huaccepaw ccungccaw tuh aning laeze a lesaehua,” a ci. ²⁹ Te amaw bya kha ccungccaw`ae balyn nynh he a thae`ae tuh, ngunto khoitu`ae nynh heize Johan kya-e baptisma kha inte Pachia kha thyaaccousah`ae. ³⁰ Thuasalama Farasi`ae te kawbya thya`ae paw tuh mih hanlan Pachia khuakhannaw kha ei`ae zah Johan kya-e baptisma kha in khyh`ae. ³¹ Te Bawipaw nynh, “E ccungccaw`ae hynh pawtemou ka losakuh cih? Minmin hynh pawtemou aloku`ae? ³² Minmin tuh kungkunaw hmin kya dahung`ae zah lukheit te lukheit kokuh`ae zah, ‘Phyly kae tupah oh zah na law khyh oh, michi law kae sahpah oh zah mah na rah khyh oh rei,’ cite a cih`ae paw imua`ae te nynh aloku`ae. ³³ “Pawccecize Baptisma pyatu Johan tuh sanlou mah ae leite misutui mah nia leite yn thua zah nanning nynh, ‘Aning tuh khozi bahkuhpaw nynh thua,’ na ci oh. ³⁴ Ccungccaw Ccapaw tuh aete niate yn thua zah nanning nynh, ‘Dotua oh, aemoh paw te misu-sanphing khu! Misei`ae te ngunto khoitu`ae banpaw khu!’ na ci oh. ³⁵ Thuasalama hawnaw tuh amaw a ccaaw`ae balyn nynh thyaaccousah athua,” a ci. ³⁶ Te Farasipaw lukheit nynh amaw ryte looh-aekheih lan Jesu kha a ko. Te Jesu tuh Farasipaw inn lang cceih zah ae lan a dahung. ³⁷ Te dotua, tuh-e khua kya um paw nopinung, miseinung nynh Farasipaw inn kya ae lan Jesu a dahung cipaw kha he a nyh tuh mynkhuhpaw satho alabasta lung tuihinbu bukheit kha ccyng zah, ³⁸ Jesu nuhlang a ccu leihpaw khe thadyn zah a rah, te a ccu kha a mitphi te singpah zah a lu kya-e a sang te a fupya, te a ccu kha myng zah satho a thuh. ³⁹ Te aepaw a kopah paw Farasipaw nynh kha-e kha he a muih tuh, “E ccungccapaw hynh profeh athua lanze amaw a hae paw nopinung hynh hung nynh thua cipaw te pawtecihpaw cipaw phe a nyh cih; pawccecize e nung tuh miseinung nynh thua,” a ciku. ⁴⁰ Te Jesu nynh, “Simon, kae hopya ry paw ccangkheit a um,” a cipya. Te Simon nynh, “Ccangpatu, ho ccaleih,” a ci. ⁴¹ Jesu nynh, “Phuasawtupaw lukheit la um zah a laeba umtu`ae luning a um`ae; lukheitpaw nynh denari phua zapangaw laeba um zah mingccangpaw tuh sungpangaw laeba um. ⁴² Te minmin nynh pyaru lanpaw kharyh he hoi khyh`ae tuh kha-e paw nynh paryh mawte phe a ngaethya`ae. Tukeiccu yn hopya tua, kha-e luning`ae kyaze hung nynh mou phuasawtupaw kha a sungsah hua cih?” cite a khia. ⁴³ Simon nynh khung zah, “Alunghua a ngaethya paw ccungccapaw kha nynh thua cih cite ka tua,” a ci. Te Jesu nynh, “Hmerarihlan nynh bya na pia,” a cipya. ⁴⁴ Te Jesu nynh nopinung kalan maeleihkuh zah Simon kha, “E nopinung hynh na muih tou? Kae tuh na inn lungkhu lang ka tee zah ka ccu singkunaw lanpaw tui nae pya khyh, thuasalama e nung nynh ka ccu hynh a mitphi te yn singpah zah a sang te yn fupya vae. ⁴⁵ Nang tuh kae hynh nae myng khyh, thuasalama e nung tuh inn kalan he ka tee ccyh te ka ccu hynh apaekuh lei lan po a myng. ⁴⁶ Nang tuh ka lu hynh satho nae thuh khyh, thuasalama e nung nynh ka ccu hynh mynkhuhpaw satho te phe yn thuhpya. ⁴⁷ Tukeiccu nang kae hopah, e nung a seinaw`ae pataepi kha ngaethya athua vae keiccu aning tuh pataepi a sungsah; thuasalama ccapyhpaw seinaw ngaethya athua paw ccungccaw nynh tuh ccapyh nynh a sungsah,” a cipya. ⁴⁸ Te Jesu nynh kha-e nung kha, “Na seinaw`ae tuh ngaethya athua vae,” a cipya. ⁴⁹ Te amaw ryte ccaboi kya a dahungkheih`ae paw nynh mimaw te mimaw kya, “Seinaw balyn a ngaethya paw hynh-e paw tuh hungmou?” cite a hokuh`ae. ⁵⁰ Te Jesu nynh nopinung kha, “Na zynnaw nynh phe ae khum vae, daebabilan la cceih ccavae,” a cipya.

¹ Ou tuhte, tuh-e koute, Jesu tuh Pachia peenaw kong thehoypaw kha hote, phyte khuapi te khua taraw kalan po khua a ccung. Te zuitu`ae luhaw laening tuh amaw ryte a mungkuh`ae. ² Te ahoy leipaw muisaw`ae kyate, te ccihawnaw`ae kyate a dan`ae paw nopi`ae abang, raerangsaro`ae lusari a kyate a pou paw Magdalin a ci`ae paw Meri, ³ te Herod kya-e synriatu Chuza a zu Joanna, te Susanna te mih uccaw`ae khate Jesu a bawng`ae paw ccangpaw nopi`ae patae a umbua`ae. ⁴ Te ccungccaw patae tuh khua takyh kyate amaw kalan oun thua`ae zah pynkheihlan he sueluakuh`ae tuh Jesu nynh tousenaw phungpaw ccangkheit a hopya`ae. A hopaw tuh: ⁵ “Ccaciivuatu lukheit nynh a ccacii vua lan a cceih; te he a vua tuh ccacii abang tuh laanpi kin ccah zah ccu te syde thua zah vawlae-e pavaw`ae nynh phe a tuh kou`ae. ⁶ Te abang tuh lung vawlan ccah zah ccahe a kei takaw mawte laedahpaw a um khyh keiccu karae arou. ⁷ Te abang tuh hingpaw`ae laku ccah zah hingpaw`ae ryte pokheih`ae zah hingpaw`ae nynh varyn a reihde`ae. ⁸ Te abang tuh laehoy kya ccah zah a po, te leih zakheit athae a thae,” a ci. Te hynh-e kong he a ho koute, “Thae nawlan nakaring a hoi paw ccungccaw tuh thaesah!” cite a sia. ⁹ Te a zuitu`ae nynh, “Hynh-e tousenaw phungpaw asuilan tuh pawmou?” cite amaw kha a khia`ae. ¹⁰ Te Jesu nynh, “Pachia peenaw kya-e byakhupaw`ae kong ny lan nanning tuh pya na thua oh; thuasalama mingccang`ae tuh, ‘mang muih`ae zah nyh khyh`ae, te mang thae`ae zemah a thaethya khyh`ae,’ keiccuze tousenaw phungpaw te hopya athua. ¹¹ “Atu tousenaw phungpaw tuh e hynh nynh thua: Ccacii tuh Pachia bya nynh thua. ¹² Laanpi kin ccah`ae paw tuh Pachia bya a thae`ae paw nynh thua, te minmin nynh oun zyn cih`ae zah khumnaw oun muesei cih`ae cite diabolos nynh yn cceih zah mih thinlung kyate Pachia bya phe a lawpya`ae paw kha nynh thua. ¹³ Lung vawlan ccah`ae paw tuh Pachia bya kha he a thae`ae te lungtuate a lawkuh`ae paw nynh thua, te tuh-e`ae tuh sosoh hung zyn`ae zah tuh-ounaw ccyh kya phe khuliakuh`ae paw, atynpaw tharui a hoi lei`ae paw kha nynh thua. ¹⁴ Te hingpaw`ae laku ccah`ae paw tuh Pachia bya kha a thae kou`ae te cceih`ae zah thinphangnaw hoirungnaw te laephi hiin hoysanaw`ae nynh varyn ve`ae zah piccangthua lan athae thae lei`ae paw kha nynh thua. ¹⁵ Thuasalama laehoy kya ccah`ae paw tuh Pachia bya kha he a thae`ae te athyaapaw, ahoypaw thinlung te ccykekuh`ae zah lungsaenaw te athae thae`ae paw kha nynh thua. ¹⁶ “Hung nynh sanmah maeekhua he a tyh te kee te khung khyh, ikhung kaw lang mah nung khyh, thuasalama oun tee`ae paw nynh awnaw kha a muih ccaw`ae cite maee awnawpaw vawlan nynh a nung. ¹⁷ Pawccecize alangkuh lei lanpaw aphirupaw uccaw pawsang um khyh, ny lei lanpaw te muih lei lanpaw thuru khopaw uccaw pawsang um khyh. ¹⁸ Tukeiccu nanning pawtemou na thae oh cipaw raeringkuh oh, pawccecize hunghung zemah a hoi paw ccungccaw tuh houh pyachih athua cih, te hunghung zemah a hoi leipaw ccungccaw tuh a hoi vosi cipaw hei kha lawpya athua cih,” bua a ci. ¹⁹ Oute a nung te a neitapaw`ae tuh amaw kalan oun thua`ae zah ccungccaw zapi alung keiccuze a kalan naekuh kho khyh`ae. ²⁰ Te ccungccaw abang nynh, “Na nung te na neitapaw`ae namaw ae muih ry`ae zah atolang nynh phang thadyn`ae,” cite amaw kha a hopya`ae. ²¹ Te Jesu nynh minmin kha khung`ae zah, “Ka nung te ka neitapaw`ae tuh Pachia bya thae`ae zah a zui`ae paw hynh-e`ae hynh nynh thua,” a ci. ²² Ou tuhcihte nin kheit tuh Jesu nynh a zuitu`ae ryte kohlung lungkhu lang tee`ae zah minmin kha, “Kuaapipi khuraw lang khuin zua oh sih,” a cipya`ae. Te minmin tuh kohlung te a cceih vae`ae. ²³ Thuasalama kohlung te he a cceih`ae tuh Jesu tuh a ih, te kuaapipi vawlan khise yn tho zah kohlung tuh tui te phe beih zah minmin tuh vawsawpi a tung`ae. ²⁴ Te zuitu`ae nynh amaw kalan cceih`ae zah a tho`ae; te, “Bawipaw, Bawipaw, aening ah chih vae cih oh,” cite a hopya`ae. Te Jesu nynh thokuh zah khise te tuileih atho paw kha a pe`ae, te tuileih te khise tuh dae zah daebabi vae. ²⁵ Te Jesu nynh minmin kha, “Nae zynnaw tuh teisangmou?” a cipya`ae. Te minmin tuh rih`ae zah mih ngaeangthua, te, “E paw hynh pawtecihpaw ccungccaw aa mou! Khisang te tui balyn kawpya zah minmin nynh a kaw a ngae`ae!” cite lukheit te lukheit a hokuh`ae. ²⁶ Te minmin tuh Galilee ram te arawsekuhpaw Kadarene ram lang a thua`ae. ²⁷ Te Jesu nynh laerang lang he thua tuh ccyhsaepi cia raerangsaro nynh bahkuh zah angki kiku leite, innvaw mah um leite, shawku kya leih um paw, tuin khua e ccungccapaw nynh yn tungku. ²⁸ Jesu kha he a muih tuh, raerae sia zah amaw malang khe bakhung zah, “Ahang Huaccepaw Pachia Ccapaw Jesu, nang kha paw kae cyi mou? Kae hynh vawsaw beih yn pya nan cite kae ngiaku,” cite thawte a sia. ²⁹ Pawccecize Jesu nynh athyaa leipaw muisaw kha kha-e paw kyate pou lan kaw phe a pya vae. Pawccecize kha-e muisaw nynh kha-e paw kha leih a kyng he; te kha-e paw kha sivarui te ccukhiinawpaw te khii`ae zah khia kya a nung`ae; te aning nynh a khiinaw`ae paw kha thoh pae zah raerangsaro nynh rangkaw langkhe leih a dee he keiccu nynh thua. ³⁰ Te Jesu nynh, “Na min hungmou?” cite a khia. Te aning nynh, “Legion,” a ci; pawccemacize raerangsaro`ae patae tuh amaw lungkhu langkhe a tee`ae keiccu nynh thua. ³¹ Te raerangsaro`ae nynh mimaw kha akhunaw lungkhu lang ccia lan kaw a pya khyh nawlan Jesu kha a ngiaku`ae. ³² Te tuin kya mua vawlan voh`ae phu kheit rangpaekuh`ae paw a um, te minmin nynh khae` ae lungkhu lang tee lan kaw a ua nawlan amaw kha a ngiaku`ae. Te Jesu nynh kaw a ua`ae. ³³ Oute raerangsaro`ae tuh ccungccapaw kyate pou`ae zah voh`ae lungkhu lang a tee`ae; te voh phu tuh apangnaw kyate kuaapi lungkhu lang thawmawte ccuebung`ae zah pung a phungkuh`ae. ³⁴ Te voh a laetu`ae nynh kha-e acyikuh paw kha he a muih`ae tuh, ccue`ae zah kha-e kong kha khuapi kya te khua taraw lang balyn a ho`ae. ³⁵ Oute ccungccaw`ae nynh acyikuh paw kha do khylan oun cceih`ae zah Jesu kalan oun thua`ae, te a kyate raerangsaro`ae a pou paw ccungccapaw tuh Jesu ccu leihpaw khe dahung zah uccaw a lawku paw te a thinlung akyh vae paw kha he muih`ae tuh a rih`ae. ³⁶ Raerangsaro`ae bahkuhpaw ccungccapaw tuh pawcihte nynh a dan cipaw kha a muih`ae paw ccungccaw`ae nynh oun thua`ae paw kha a hopyabua`ae. ³⁷ Oute Kadarene ram kya um`ae paw ccungccaw zapi balyn nynh eih rih kaesy`ae zah mih kyate a pou nawlan Jesu kha a ngia`ae; te Jesu tuh kohlung lungkhu lang tee zah phe a ki. ³⁸ Te a kyate raerangsaro a pou vae paw ccungccapaw nynh Jesu ryte umbua lan a ngiaku. Thuasalama Jesu nynh, ³⁹ “Namaw na inn lang la ki lah Pachia nynh na hanlan pawcih alepaw uccaw`ae nynh ae cyipya cipaw kha la ho,” cite hopah zah a saw. Te aning nynh cceih zah Jesu nynh pawcih alepaw uccaw`ae kha nynh a hanlan a cyipya cipaw kha khuapi balyn kya a hopya`ae. ⁴⁰ Ou tuhcihte Jesu he a ki tuh, ccungccaw zapi nynh amaw kha a cciadue`ae, pawccecize minmin balyn nynh amaw kha a ngaw`ae keiccu nynh thua. ⁴¹ Te, dotua, sinakok uktu, Jairu acikuh paw ccungccapaw lukheit yn thua zah Jesu ccu leihpaw khe bakhung zah a inn lang ccia lan amaw kha a ngiaku. ⁴² Pawccecize aning nynh kum haw laening loukaw acih vae paw, ccanung lukheit kyalya hoi zah tuh-e nung tuh vyavya a chih. Thuasalama Jesu he a cceih tuh ccungccaw`ae nynh phang lungnuaku`ae. ⁴³ Te kum haw laening cia chii lua ccinaw hoi zah a hoi paw balyn sibawi`ae kya marya thangkuh salamah hung kyate san a dan kho vae leipaw nopinung lukheit nynh, ⁴⁴ amaw nuhlang khe yn thua zah a boei dung kha zya a hae; te vaekheihmawte a chii lua paw tuh phe akang. ⁴⁵ Te Jesu nynh, “Hungmou yn hae?” a ci. Ccungccaw`ae balyn nynh kae nyh khyh he a ci`ae tuh Piter te amaw ryte a umkheih`ae paw nynh, “Bawipaw, ccungccaw zapi nynh phang ae lungnuakuh`ae zah ae bekuh`ae pite, nang nynh, ‘Hungmou yn hae?’ na ci,” cite a cipya`ae. ⁴⁶ Te Jesu nynh, “Lukhakheit nynh phe yn hae, pawccecize ka kyate thungnaw a pou paw kha ka ny,” a ci. ⁴⁷ Te nopinung nynh kae hynh ka thurukuh kho vae lan khyh cipaw kha he a nyh tuh thyngkute cceih zah amaw malang khe bakhung zah pawkeiccu nynh ka hae cipaw te vaekheihmawte phe a dannawpaw kong kha ccungccaw balyn malang khe a hopya. ⁴⁸ Te Jesu nynh, “Ka ccanung, na thawmuin sah, na zynnaw nynh phe ae dansah vae, daebabilan la cceih ccavae,” a cipya. ⁴⁹ Tuhte a ho cciamang lya tuin sinakok uktupaw inn kyate ccungccaw lukheit yn thua zah amaw kha, “Na ccanung kha phe chih vae, Ccangpatupaw kha vawsaw pya nan vae,” a cipya. ⁵⁰ Thuasalama Jesu nynh kha-e kha he a thae tuh, “Rih nan, zyn kyalya zyn lah na ccanung tuh a dan cih,” cite sinakok uktupaw kha a hopya. ⁵¹ Te inn kya he a thua tuh, Piter, James te Johan, te imohnung a nung te a paaw laelan hung sanmah inn lungkhu lang tee lan Jesu nynh ua khyh`ae. ⁵² Te inn lungkhu e ccungccaw`ae balyn nynh rah`ae zah a khui`ae; thuasalama Jesu nynh, “Rah nan oh, imohnung tuh chih khyh, thuasalama a i,” a ci. ⁵³ Te a chih cipaw phe ny`ae paw thua zah minmin nynh Jesu kha saryate a nuinse`ae. ⁵⁴ Te Jesu nynh minmin balyn kha pousah`ae zah imohnung kha a kuih te kyng zah, “Imohnung, thokuh,” cite a ko. ⁵⁵ Te a muisaw tuh bua thua zah, imohnung tuh vaekheihmawte po a thokuh; te amaw kha aepaw pya oh cite kaw a pya`ae. ⁵⁶ Te a paaw te a nung tuh mih ngaeangthua, thuasalama Jesu nynh acyikuh paw kha hung ccungccaw sanmah na hopah lan khyh oh cite minmin kha byatawsya`ae.

¹ Oute Jesu nynh a zuitu`ae luhaw laening kha pynkheihlan ko`ae zah raerangsaro`ae balyn tungvaw thungnaw te ccinaw`ae dansah nawlan minmin kha kawhoinaw a pya`ae. ² Te aning nynh Pachia peenaw kong ho khylan te ngeccih`ae dansah khylan minmin kha a saw`ae. ³ Te minmin kha, “Nae khuaccungnaw hanlan pawsang mah phukuh nan oh, hoitang, zaw, sanlou, phua mah phukuh nan oh. ⁴ Te pawtecihpaw inn kya na tee oh thua zemah tuin kyakhe la um oh lah kha-e kyate la pou oh. ⁵ Te hunghung zemah nanning kha innccung ae doih oh thua ze, kha-e khua kyate he na pou oh te minmin arawsetu ccaekia lang nae ccu kyate vuiping kha la pheihkuh oh,” cite a hopya`ae. ⁶ Te minmin tuh pou`ae zah thehoypaw kha hote ahmin takyh kya ngeccih dansah biate khua takyh langkhe khua a ccung`ae. ⁷ Atu Jesu nynh a cyipaw balyn kha Herod tetrach nynh a thae tuh a ngaeangthua, pawccemacize ccungccaw abang nynh Johan tuh a chih`ae paw kyate phe a thothui vae cite a ho`ae. ⁸ Te abang nynh Elijah nynh yn langkuh vae a ci`ae, te mingccang`ae nynh arynpaw profeh`ae lukhakheit nynh bua yn thothui vae a ci`ae. ⁹ Te Herod nynh, “Johan tuh kae nynh a lu phe ka paesah vae`ae, thuasalama hynhcihte a thungpang ka thae paw tuh-e paw tuh hungmou athua?” a ci. Tukeiccu Jesu kha muih lan a ccung. ¹⁰ Te locceihtu`ae nynh he oun ki`ae tuh mimaw nynh a cyi`ae paw balyn kha amaw kha a hopya`ae. Te Jesu nynh minmin kha ko`ae zah Bethsaida acikuh paw khua te asekuhpaw rangkaw langkhe mih makhaete a cciakhae`ae. ¹¹ Te ccungccaw zapi nynh kha-e kha he a nyh`ae tuh amaw kha a zui`ae, te Jesu nynh minmin kha lehkhan`ae zah mih kalan Pachia peenaw kong kha a hopya`ae, te dansah ahopaw ccungccaw`ae kha a dansah`ae. ¹² Te khuazi lan he cih tuh, luhaw laening nynh oun thua`ae zah amaw kha, “Ccungccaw`ae hynh hin pepan e khuapi`ae kalan te khua taraw`ae kalan cceih`ae sah lah ryanaw te aepaw a mueku ccaw`ae minmin hynh saw`ae; pawccecize aening tuh e rangkaw kya nynh ah um oh,” cite a hopya`ae. ¹³ Thuasalama Jesu nynh, “Minmin kha ae lanpaw pya oh,” a cipya`ae. Te minmin nynh, “Kaening nynh kae cceih cih zah e ccungccaw`ae balyn hanlan aepaw kae re khyh lanze, sanlou phe pangaw te ngasaw zawning laelan pawsang kae hoi khyh,” a ci`ae. ¹⁴ Pawccecize tuin kya pise piccang`ae thungpangaw loukaw a um`ae. Te a zuitu`ae kha, “Phu kheit kya sungpangaw ccite minmin kha dahungsah oh,” a cipya`ae. ¹⁵ Te zuitu`ae nynh ou tuhte cyih`ae zah minmin balyn kha a dahungsah`ae. ¹⁶ Oute Jesu nynh sanlou phe pangaw te ngasaw zawning kha laah zah vaawran lang dothung zah lungtuabya a ho, te eih zah ccungccaw zapi malang nyapya lan a zuitu`ae kha a pya`ae. ¹⁷ Te minmin balyn tuh ae`ae zah mih vue phe so kou, te alaepaw a eihpaw kha kee haw laening a khuin`ae. ¹⁸ Te ou tuhte Jesu tuh a makhaete sawsang lyakhe, a zuitu`ae oun thuabua`ae zah minmin kha, “Ccungccaw`ae nynh kamaw hynh hung oun ci`ae mou?” cite a khia`ae. ¹⁹ Te minmin nynh, “Baptisma pyatu Johan ae ci`ae, thuasalama abang nynh Elijah ae ci`ae, te mingccang`ae nynh langmaw lya-e profeh lukhakheit nynh bua a thothui vae ae ci`ae,” cite a khung`ae. ²⁰ Jesu nynh minmin kha, “Thuasalama nanning nynh so kae hynh hung nae ci oh mou?” cite a khia`ae. Piter nynh, “Nang tuh Pachia kya-e Kri nynh na thua,” a ci. ²¹ Te Jesu nynh kha-e uccaw kha hung sanmah a hopya khyh nawlan`ae minmin kha kawpya`ae zah tyntetyn lang byataw`ae. ²² Te, “Ccungccaw Ccapaw tuh patae yn teing hahe cih, te piccang`ae, alepaw ranpibawi`ae te kawbya ccangpatu`ae nynh oun vua cih`ae, oun theih cih`ae, te nin thungnaw kya yn thothui cih,” cite a hopya`ae. ²³ Te mih balyn kyakhe, “Lukhakheit nynh kamaw hynh yn zui ry lan thua ze, amaw te amaw kha yn vuakuh sah lah nin takyh a vaelantung kha puihkuh sah, te kamaw yn zui sah. ²⁴ Pawccecize hunghung zemah a hiinnaw kha a khumkuh ry paw tuh a hiinnaw kha a shung cih, thuasalama hunghung zemah kamaw keiccuze a hiinnaw kha a shung paw tuh a hiinnaw kha a khumkuh cih. ²⁵ Pawccecize ccungccaw lukheit nynh laephipi hynh khaleih a mue ze so amaw te amaw kha a shung lanze, tukhyhze ro athua ze, a hanlan pawmou athane? ²⁶ Pawccecize hunghung zemah kamaw te ka bya kha a mae yn thyakhae paw tuh Ccungccaw Ccapaw nynh amaw phu-enaw, a Paaw phu-enaw te athyaapaw vaaw ccungccaw`ae phu-enaw ry he yn thua te kha-e paw kha a maethyakhae ru cih. ²⁷ Thuasalama nanning kha byaccaccing kae hopya oh, Pachia peenaw kha a muih`ae cia chinaw a tytua cih lei`ae paw ccungccaw abang e kya a um`ae,” cite a hopya`ae. ²⁸ Ou tuhcihte e bya a ho koute nin tarya loukaw he acih tuh Jesu nynh Piter, Johan te James kha cciakhae`ae zah sawsang lan mua langkhe a cceihthung. ²⁹ Te saw he a sang tuh a mae muinsan tuh rulaekuh zah a uccaw arawpaw tuh phaephae a ah. ³⁰ Te, dotua, ccungccaw luning tuh amaw ryte byahokuh`ae; tuh-e`ae tuh Mawsi te Elijah nynh thua`ae. ³¹ Minmin tuh phu-enaw te oun langkuh`ae zah Jerusalem kya Jesu nynh a ccingsah vae cih paw a chi lanpaw kong kha a ho`ae. ³² Thuasalama Piter te a ban`ae tuh a ngawphukuh`ae; te he a thaekuh`ae tuh, Jesu phu-enaw te amaw ryte a thadyn`ae paw ccungccaw luning kha a muih`ae. ³³ Ou tuhte minmin nynh amaw kyate he phiakuh`ae tuh Piter nynh Jesu kha, “Bawipaw, e kya um paw tuh kaening elan ahoy; te bu ccangthung kae sak sah, na hanlan ccangkheit, Mawsi hanlan ccangkheit te Elijah hanlan ccangkheit,” cite paw nynh ka ho cipaw ny leite a hopya. ³⁴ Tuhte a ho cciamang lya, maeking yn langkuh zah minmin kha pung a khung`ae, te maeking lungkhu lang a tee`ae tuh minmin tuh a rih`ae. ³⁵ Te maeking kyate roi yn ccae zah, “E paw tuh ka sungsahpaw ka Ccapaw nynh thua, amaw bya kha la ngae oh,” a ci. ³⁶ Te roi he adae kou tuh Jesu makhae nynh a muih vae`ae. Te zuitu`ae nynh khahlya a muih`ae paw kha hung kya sanmah ho leite daetedae lang nynh a um`ae. ³⁷ Ou tuhcihte, awkhualan minmin tuh mua kyate he oun rungbung`ae tuh ccungccaw patae nynh amaw kha a cciadue`ae. ³⁸ Te, dotua, ccungccaw zapi kyate lukheitpaw nynh sia zah, “Ccangpatupaw, ka ccapaw nae dopya nawlan kae ngiaku, pawccecize aning tuh lukheit kyalya paw ka ccaaw nynh thua. ³⁹ Te, dotua, muisaw nynh kyng zah vaekheihmawte raerae leih a sia, te a taraphue phe thua lan a reih, te phe ccihtheih lang tua zah a kyate poutaw lan kou arusah. ⁴⁰ Te kha-e kha dee lan na zuitu`ae ka ngia`ae zah minmin nynh dee kho khyh`ae,” cite a hopya. ⁴¹ Te Jesu nynh khung zah, “Pou zyn lei`ae te a ccouseikuh`ae paw ciihan`ae, hohse cia mou nae kya ka um ung cih zah kae ngaesangpah ung cih oh? Na ccapaw tuh hynhlang yn cciakhae,” a ci. ⁴² Te imohpaw nynh he a cceih tuh raerangsaro nynh laephi kya khulia zah karaehosah. Te Jesu nynh athyaa leipaw muisaw kha pe zah imohpaw kha a dansah, te a paaw kalan bua a pya. ⁴³ Te ccungccaw`ae balyn tuh Pachia a lesaenaw kya mih ngaeangthua. Thuasalama Jesu nynh a cyipaw balyn kya ccungccaw miakaw mih ngaeangthua lyakhe, Jesu nynh a zuitu`ae kha, ⁴⁴ “Hynh-e bya`ae hynh nae nakaring lungkhu lang tee sah, pawccecize Ccungccaw Ccapaw tuh ccungccaw`ae kuih kalan ah a thua vae cih,” a cipya`ae. ⁴⁵ Thuasalama hynh-e a bya hopaw tuh minmin kyate thuru thua zah minmin nynh nyhthya khyh`ae zah thaethya khyh`ae, te tuh-e a bya hopaw konglang minmin nynh amaw khia lan mah phe a rih`ae. ⁴⁶ Oute zuitu`ae laku hungmou alesae huacce cih cipaw eikunaw a um. ⁴⁷ Te Jesu nynh mih thinlung-tuanaw kha nyte imua lukheit kha laah zah amaw pe khe a nung, ⁴⁸ te minmin kha, “Hunghung zemah hynh-e imua taraw hynh ka min te a lawkuh paw tuh kamaw kha yn lawkuh paw nynh thua, te hunghung zemah kamaw kha yn lawkuh paw tuh kamaw yn sawtupaw kha a lawkuh paw nynh thua. Pawccecize nanning balyn lakuze adih huaccepaw tuh alesaepaw athua cih,” cite a hopya`ae. ⁴⁹ Te Johan nynh, “Bawipaw, lukheitpaw nynh na min te raerangsaro a dee paw kha kaening nynh kae muih, te aning tuh kaening ryte a zuiku bua khyh keiccu kaening nynh kae khee,” a cipya. ⁵⁰ Te Jesu nynh, “Kha-e paw kha khee nan oh, pawccecize aening kha oun rawse leipaw tuh aening kalan a pang paw nynh thua,” a cipya. ⁵¹ Ou tuhcihte amaw kha vaaw lang lawthung lan accyh he azaw tuh, Jesu tuh Jerusalem lang ccia lan phang a noukuh. ⁵² Te zeccuetu`ae kha a malang a saw`ae, te minmin nynh cceih`ae zah amaw hanlan paccyn lan Samaria`ae khua khuakheit lungkhu lang a tee`ae. ⁵³ Jerusalem lang po suhlue lan a nouku keiccu kha-e khuaccaw`ae nynh amaw kha thua sah khyh`ae. ⁵⁴ Te a zuitu`ae James te Johan nynh kha-e kha he muih`ae tuh, “Bawipaw, Elijah nynh a cyi hawte, minmin hynh marya usah khylan vaawran kyate maee ccawsah bung lan kawpya lan nae ry ta?” cite a khia`ae. ⁵⁵ Thuasalama Jesu nynh maeleihkuh zah, “Nanning tuh pawtahawpaw muisaw kya-e nynh kae thua cipaw na nyhkuh khyh oh. ⁵⁶ Pawccecize Ccungccaw Ccapaw tuh ccungccaw`ae hiinnaw ro khylan yn thua khyh, thuasalama khum khylan nynh yn thua,” cite minmin kha a pe`ae. Te minmin tuh ccangpaw khua kalan khe a cceih`ae. ⁵⁷ Ou tuhcihte minmin tuh laanpi kya a ccia`ae lyakhe, ccungccaw lukheit nynh, “Bawipaw, na ccianaw miakaw lang kae zui cih,” cite a cipya. ⁵⁸ Te Jesu nynh, “Rang-ui`ae nynh laekarung a hoi`ae, te vawlae-e pavaw`ae nynh bu a hoi`ae, thuasalama Ccungccaw Ccapaw tuh a lu nungnaw san hoi khyh,” a cipya. ⁵⁹ Te Jesu nynh mingccangpaw kha, “Kamaw yn zui,” a cipya. Thuasalama aning nynh, “Bawipaw, masaty ka la cceih sah lah ka paaw kha ka la uh hin sah,” a ci. ⁶⁰ Jesu nynh, “A chih`ae paw nynh mih michi`ae kha la uh`ae sah, thuasalama nang tuh cceih lah Pachia peenaw kong kha la ho,” a cipya. ⁶¹ Te mingccangpaw nynh mah, “Bawipaw, namaw kae zui cih, thuasalama masaty ka la cceih sah lah ka inn kya um`ae paw kha ka la beihsya hin`ae,” a cipya. ⁶² Te Jesu nynh, “Hung zemah, thuetung kha kyng zah nuhlang a maeleihkuh paw tuh Pachia peenaw hanlan ngaekuh khyh,” a cipya.

¹ E uccaw`ae koute Bawipaw nynh ccangpaw sungsari kha mah khang`ae zah amaw a cceih vae cihnaw lang khua takyhte ahmin takyh langkhe, minmin kha luning luning ccite amaw malang khe a saw`ae. ² Oute minmin kha, “Loohrue lanpaw tuh alung ccaccing, thuasalama loohruetu`ae tuh azya, tukeiccu nanning nynh, loohruetu Bawipaw nynh a loohruenaw lungkhu lang ryalahtu`ae yn saw nawlan sawsang oh. ³ Nanning la cceih oh; dotua oh, suizaw`ae laku tuu`ae saw hawte nanning kha kae saw oh. ⁴ Phuabu thuasah, sohrae thuasah, ccukoh thuasah phukuh nan oh, te laanpi kya hung ccungccaw sanmah la beih nan oh. ⁵ “Te pawpaw inn kya na tee oh thua zemah, ‘E inn kya daenaw um sah,’ cite masaty la ho oh. ⁶ Te daenaw ccapaw tuh tuin kya a um lanze, na ho oh paw daenaw tuh tuin kya a um cih, a um khyh lanze nae kalan bua yn ki cih. ⁷ Te tuh-e inn kyakhe um oh lah ae pya oh paw kha la ae oh lah neih oh, pawccecize ryalahtu tuh a ryalaw mee mue lan accan. Inn kheit kyate inn kheit kalan la cceih nan oh. ⁸ “Te pawpaw khua lungkhu lang na tee oh zah ae thuasah oh ze, nae malang ae nyapya oh paw kha la ae oh. ⁹ Te khe kya a um paw ngeccih`ae kha la dansah oh lah minmin kha, ‘Pachia peenaw tuh nae kalan yn naekuh vae,’ cite la hopah oh. ¹⁰ Thuasalama pawpaw khua lungkhu lang na tee oh zah ae thuasah khyh oh ze, tuh-e khua kya-e laanpi`ae kalan khe po la cceih oh lah, ¹¹ ‘Kaening kya abekuhpaw nae khua-e vuiping ccaccei hynh nanning rawsete kae pheihku, tuhzemah Pachia peenaw tuh nanning kalan yn naekuh vae cipaw hynh la nyh ccaccing oh,’ cite minmin kha la hopah oh. ¹² Thuasalama tuh-e Nin kya tuh-e khua hanlan laeze Sodom khuapi hanlan ngaesang kho a um hua cih cipaw nanning kae hopya oh. ¹³ “Khorazin, nang tuh paw ngaethya lan na um babang! Bethsaida, nang tuh paw ngaethya lan na um babang! Pawccecize nanning kya acyikuh paw khuaruaru ryalawnaw`ae hynh Tai khua te Sidon khua kyakhe a la cyiku lanze, minmin tuh buri uccaw lawkute buhaw kya dahungte khawlya mawte phe a la ngaesikuh vae cih`ae. ¹⁴ Thuasalama byapianaw kya nanning hanlan laeze Tai te Sidon hanlan ngaesang kho a um hua cih. ¹⁵ Te Kapernaum, nang tuh vaawran phe thua lang hangthung na thua zemah Hades lang sawbung na thua cih. ¹⁶ “Nae bya a ngae paw tuh kamaw bya a ngae paw nynh thua, te nanning ae ei oh paw tuh kamaw kha yn ei paw nynh thua, te kamaw yn ei paw tuh kamaw yn sawtupaw kha a ei paw nynh thua,” cite a hopya`ae. ¹⁷ Te sungsari`ae tuh lungtuate bua oun ki`ae zah, “Bawipaw, na min liate raerangsaro`ae nynh heize kae kaw te a um`ae,” cite a hopya`ae. ¹⁸ Te Jesu nynh, “Khozawlaekuhpaw hawte Setan tuh vaawran kyate a ccawbung paw kha ka muih. ¹⁹ Dotua oh, nanning tuh fupaw`ae te zekang`ae syde kho nawlan te nae rhawpaw tae kho nawlan kawhoinaw balyn kae pya oh, te pawpaw nynh sanmah nanning kha maw ae muesah lan khyh oh. ²⁰ Tuhzemah muisaw`ae nynh nae kaw te a um`ae paw, tuh-e kyakhe nae lungtua nan sah, thuasalama nae min tuh vaawran kya zei athua paw kyahin nae lungtua sah,” a cipya`ae. ²¹ Tuh-e ccyh kya Jesu tuh Muisaw kya lungtua zah, “Vaawran te laephi Bawipaw, Pou Apang, nang nynh ahawpaw te athyapaw ccungccaw kyate e uccaw`ae hynh phe na thuru zah imua`ae kalan phe na phy vae keiccu na kalan lungtuabya kae ho. Athua nyng, Apang, hynhte acyikuh paw tuh na mitmuihnaw kya ahoypaw nynh thua. ²² Pawpaw balyn tuh Apang nynh kamaw kalan marya yn ah vae, te Paaw laelan hung ccungccaw nynh sanmah Ccapaw hynh hung nynh thua cipaw nyh khyh, te Paaw hynh hung nynh thua cipaw kha Ccapaw te Ccapaw nynh a phypya ry paw ccungccaw laelan hung nynh san nyh khyh,” a ci. ²³ Te Jesu nynh a zuitu`ae kalan maeleihkuh zah, “Atu na muih oh paw uccaw`ae a muih paw mit`ae tuh hythuaccou`ae paw nynh thua. ²⁴ Pawccecize nanning kae hopya oh, profeh`ae patae te siapharan`ae patae nynh na muih oh paw hynh muih a ry`ae zemah muih khyh`ae, te na thae oh paw hynh thae a ry`ae zemah thaebua khyh`ae,” cite mih makhaete a hopya`ae. ²⁵ Te, dotua, kawbya thyapaw lukheit nynh thadyn zah, “Ccangpatupaw, zungzae hiinnaw rhoccou khylan pawmou ka cyi cih?” cite Jesu kha a syntawtua. ²⁶ Jesu nynh, “Kawbya kya pawmou azeikuh? Pawtemou na ria?” a cipya. ²⁷ Te aning nynh khung zah, “ ‘BAWIPAW na Pachia kha na thinlung balyn te, na hiinnawmuisaw balyn te, na thawzung balyn te, te na tuanaw balynte na sungsah cih; te na innpaw kha namaw toulou hawte na sungsah cih,’ acihkuh,” a cipya. ²⁸ Te Jesu nynh, “Na hopaw tuh athua, tuhte la cyih lah na hiin cih,” a cipya. ²⁹ Thuasalama, aning nynh amaw te amaw kha thyaaccousaku ry zah Jesu kha, “Te ka innpaw tuh hungmou?” a ci. ³⁰ Te Jesu nynh khung zah, “Ccungccapaw lukheit tuh Jerusalem kyate Jeriko khua lang cceihbung zah damiah`ae laku phe a phungkuh, te damiah`ae nynh a uccaw kha phae`ae zah a bua`ae, te vya chih lante nung`ae zah phe cciataw`ae. ³¹ Te kha-e laanpi kyakhe ranpibawi lukheit cceihbung zah kha-e paw kha he a muih tuh ccanglang te phe a sibia. ³² Te tuhhawte Levi paw lukheit nynh tuh-e kya he a thua tuh kha-e paw kha do zah ccanglang te sibia zah phe a cciataw. ³³ Thuasalama Samariapaw lukheit tuh khuaccung zah tuh-e paw umnaw kyakhe a thua; te he a muih tuh ngaethya-umsanaw a hoi. ³⁴ Te ccianua zah a vaemaw kha chitui te misutui bupah zah uccaw te a hepya, te amaw a saring tungvaw khe khang zah balah-inn langkhe cciakhae zah a dooih. ³⁵ Te awkhualan ccia lan he cih tuh denari kianing kha thuakuh zah balah-inn ngawtupaw kha pya zah, ‘E paw hynh la dooih lah tuhlae na thangpaw kha bua kae thua te kae pyaru cih,’ a cipya. ³⁶ “Tuh-e luthung`ae lakuze hungmou tuh-e damiah`ae laku a phungkuh paw ccungccapaw a innpaw athua ngaw cite na tua?” a ci. ³⁷ Te kawbyathyapaw nynh, “Tuh-e paw tungvaw ngaethyaumsanaw a hoi paw nynh athua,” a ci. Te Jesu nynh, “La cceih lah nang mah tuh-e hawte la cyihbua,” a cipya. ³⁸ Ou tuhcihte Jesu te a zuitu`ae tuh khuaccung`ae zah khua khuakheit kya he a tee tuh Martha acikuh paw nopinung lukheit nynh Jesu kha a inn lang a thuasah. ³⁹ Te Martha nynh Meri acikuh paw a neitanung lukheit a hoi. Tuh-e nung tuh Jesu ccu leihpaw khe dahung zah a bya kha a ngae. ⁴⁰ Thuasalama Martha tuh thohae ryasuh paw te a thinlung sokhaekuh, te Jesu kalan cceih zah, “Bawipaw, ka neitanung nynh ka makhaete oun thohae sah paw hynh pawlang nae riapah khyh tou? Tukeiccu kamaw rya bawng lan hopah,” a cipya. ⁴¹ Te Jesu nynh khung zah, “Martha, Martha, nang tuh uccaw patae konglang na lungvawsaw zah na thinphang. ⁴² Thuasalama ahoboupaw uccaw ccangkheit rou nynh a um; tuh-e ahoypaw apung kha Meri nynh phe a poku vae, tuh-e apung tuh a kyate lawpya thua vae lan khyh,” a ci.

¹ Ou tuhcihte ahmin sang kheit kya Jesu nynh sawsang zah he a thangsah tuh, a zuitu`ae lukheit nynh, “Bawipaw, Johan nynh mah a zuitu`ae kha a ccangpya`ae hawte, kaening hynh sawsang lan oun ccangpabua,” a cipya. ² Te Jesu nynh minmin kha, “Nanning saw he na sang vae oh ze: ‘Vaawran kya um paw kaening Paaw, na min sawtuanaw um sah. Na peenaw thua ccavae sah. Vaawran kya na rynaw acyikuh hawte laephi vawlan cyikuh bua sah. ³ Nin takyh kae aepaw looh kha atunin kaening yn pyabua. ⁴ Te kae tungvaw a sei`ae paw miakaw kha kaening nynh mah kae ngaethya`ae keiccu kae seinaw kha oun la ngaethyabua. Te kaening hynh tuh-ounaw lungkhu lang oun cciakhae nan, thuasalama mihoy leipaw kyate oun khungtua,’ cite la ho oh,” a cipya`ae. ⁵ Oute Jesu nynh minmin kha, “Nanning laku lukhakheit nynh ruiban hoi zah ziraccyng khe a banpaw kalan cceih zah, ‘Ka ban, sanlou phethung yn ccoibua hin. ⁶ Pawccecize, ka banpaw lukheit tuh a khuaccungnaw kyate ka kya yn thua zah loohdang lanpaw, pawsang mah ka hoi khyh,’ a cipya. ⁷ “Te inn lungkhu a um paw nynh, ‘Mithyhmitpaw yn nung nan vae; atu thuakaw phe khawkuh vae, te ka ccaaw`ae mah kamaw ryte ikhung kya phe ih vae`ae, ka tho kho vae khyh zah kae pya kho vae khyh,’ cite a khung cih. ⁸ Nanning kae hopya oh, tuh-e paw nynh tho leite um zah a pya khyh zemah, a banpaw athua keiccu umtaw leite banban pei a ngiaku keiccu tuh tho ngaw zah ahobou zeih kha a pya cih. ⁹ “Te nanning kae hopya oh, ngia oh lah pya na thua cih oh, ccung oh lah na muih cih oh, khua oh lah hungpya na thua cih oh. ¹⁰ Pawccecize a ngia paw miakaw tuh a mue, te a ccung paw tuh a muih, te thuakaw a khua paw tuh hungpya athua cih. ¹¹ “Nanning lakuze paaw athua paw lukhakheit nynh, a ccapaw nynh sanlou a ngiaku ze lung kha pya ngaw ta? Tukhyhze ngasaw a ngiaku ze ngasaw hanpaw fuparepaw kha pya ngaw ta? ¹² Tukhyhze awtui kha a ngiaku ze zekang kha pya ngaw ta? ¹³ Nanning nynh na hoy lei oh pite, ahoypaw lasung`ae kha nae ccaaw`ae pya lan na ny oh lanze, vaawran um paw nae Paaw nynh amaw kalan a ngiakuh`ae paw kha Thyaa Muisaw kha pawcihmou houh a pya cih`ae?” cite a hopya`ae. ¹⁴ Te bya ho kho leipaw raerangsaro kha Jesu nynh a dee. Ou tuhte raerangsaro he a pou tuh bya ho kho leipaw tuh bya a ho vae, te ccungccaw zapi tuh mih ngaeangthua. ¹⁵ Thuasalama ccungccaw abang nynh, “Aning nynh khozi`ae uktupaw Beelzebub liate nynh khozi`ae kha a dee,” a ci`ae. ¹⁶ Te abang nynh amaw kha syntaw khylan vaawran kyate muihsanaw kha a ngia`ae. ¹⁷ Thuasalama, Jesu nynh mih tuanaw kha phe nyh zah minmin kha, “Amaw te amaw aphiakuhpaw peenaw miakaw tuh aroh cih, te amaw te amaw aphiakuhpaw innbyn tuh a khuliakuh cih. ¹⁸ Te Setan mah amaw te amaw a phiaku lanze pawtemou a peenaw tuh atyn kho cih? Pawccemacize nanning nynh kamaw kha Beelzebub liate nynh raerangsaro`ae a dee nae ci oh. ¹⁹ Te kae nynh Beelzebub liate raerangsaro`ae kha ka dee lanze, hung liate mou nae ccaaw`ae nynh minmin kha a dee`ae? Tukeiccu minmin tuh nanning byapiatu`ae athua cih`ae. ²⁰ Thuasalama kae nynh Pachia kuihdung liate raerangsaro`ae kha ka dee lanze, Pachia peenaw tuh nanning kya athua ccaccing vae. ²¹ “A thawsaepaw ccungccaw nynh zunghe ryte a inn kha a ngaw lya tuh a uccaw`ae akhyn. ²² Thuasalama amaw laeze a thawsae huapaw nynh he yn thua vae tetuh amaw kha phe a tae cih, te a doliakupaw a zunghe balyn kha a kyate a lawpah cih zah a lua paw uccaw`ae kha pung a nee cih. ²³ Kae ryte a um leipaw ccungccaw tuh kamaw yn rawsepaw nynh thua, te kae ryte a sueluakuh bua leipaw ccungccaw tuh a phiakuhpaw nynh thua. ²⁴ “Athyaa leipaw muisaw nynh ccungccapaw kyate he pou tuh arounaw hmin`ae lang po a cceih, hae-ungnaw kha ccungkuh zah muihkuh khyh, aning nynh, ‘Ka poutawnaw ka inn lang ka ki cih,’ a ci. ²⁵ Te he a thua tuh, kha-e inn tuh phe la phikuh zah a paccaankuh`ae paw kha a muih. ²⁶ Oute aning tuh cceih zah amaw laeze houh athahhua`ae paw ccangpaw muisaw lusari`ae kha a hoeibua`ae; te minmin tuh tee`ae zah kha-e paw kya a um`ae; te kha-e ccungccapaw kya-e nyalang acyihkuh paw tuh masaty e laeze houh seihua vae,” cite a hopya`ae. ²⁷ Ou tuhcihte, e uccaw`ae kong a ho lyakhe, kha-e phu kya-e nopinung lukheit nynh sia zah Jesu kha, “Nang ae saah paw vue te nang ae kua paw matei tuh hythuaccoupaw nynh thua,” a cipya. ²⁸ Thuasalama Jesu nynh, “Athua, Pachia bya kha thae zah a zui`ae paw tuh houh hythuaccou`ae paw nynh thua,” a ci. ²⁹ Te ccungccaw`ae pataepi a sueluakuh`ae lyakhe, Jesu nynh tho zah, “E ccungccaw`ae tuh ahoy leipaw ciihan nynh thua`ae, minmin nynh muihsanaw kha a ngiaku`ae; te profeh Jonah kya-e muihsanaw laelan ccangpaw muihsanaw tuh pya thua lan khyh`ae. ³⁰ Pawccecize Jonah tuh Nineveh`ae hanlan muihsanaw athua hawte, Ccungccaw Ccapaw mah e ccungccaw`ae hanlan muihsanaw athua cih. ³¹ Byapianaw kya Deilang-e siapharannung tuh e ciihan kya-e ccungccaw`ae ryte yn thokuh cih zah minmin kha seibe cih`ae, pawccecize aning tuh laephi athangnaw langte Solomon hawnaw bya kha thae khylan yn thua; te dotua, Solomon laeze alesae huapaw tuh e kya nynh a um. ³² Byapianaw kya Nineveh khua-e ccungccaw`ae tuh hynh-e she kya-e ccungccaw`ae ryte oun thokuh cih`ae zah hynh e she kya-e ccungccaw`ae kha sei oun be cih`ae, pawccecize minmin tuh Jonah phunghonaw kya phe a ngaesikuh`ae; te dotua, Jonah laeze a lesae huapaw tuh e kya nynh a um. ³³ “Hung ccungccaw nynh sanmah maeekhua kha he a tyh vae ze muih leinaw kya nung boi khyh, kee khung he khyh, thuasalama oun tee paw ccungccaw`ae nynh a awpaw kha a muih ccaw`ae cite maee awnawpaw vawlan nynh a nung. ³⁴ Pyn kya-e awnaw tuh mit nynh thua, tukeiccu na mit he ahoy vae ze na pyn balyn mah awnaw te phe beih, thuasalama na mit he ahoy vae khyh ze, na pyn balyn mah mohnaw te phe beih. ³⁵ Tukeiccu na kya um paw awnaw tuh mohnaw athua khyh nawlan la raeringkuh. ³⁶ Te na pyn balyn tuh mohnaw um leite awnaw te phe bia lanze, maeekhua a awpaw nynh awnaw ae pya hawte, na pyn khaleih tuh awnaw te phe beih cih,” a ci. ³⁷ Te tuhte a ho lya, Farasipaw lukheit nynh Jesu kha aepaw a kopya; te Jesu tuh cceih zah ae lan a dahung. ³⁸ Te zerya a ae maw a kuih a singkuty khyh paw kha Farasipaw nynh he a muih tuh a ngaeangthua. ³⁹ Te Bawipaw nynh, “Atu nanning Farasi`ae tuh banang te pake kha avawlan kyalya nynh na sing oh, thuasalama nae lungkhu tuh karangkunaw te hoyleinaw te nynh phe bia. ⁴⁰ Nanning mingaee`ae! Avawlan a raetu nynh alungkhu kha mah rae bia khyh tou? ⁴¹ Thuasalama na hoi oh paw uccaw`ae kha ryachi`ae pyabua oh; te dotua, pawpaw balyn tuh nae hanlan athyaapaw nynh thua. ⁴² “Thuasalama Farasi`ae, nanning paw ngaethya lan na um oh babang! Pawccecize, nanning nynh hangmae te pucinan te enaw-ekan`ae balyn kha pumhaw pumkheit na pya oh zah Pachia atazaenaw te a sungsanawpaw kha phe na kawtaw oh; e`ae hynh na cyi lan oh ccan zah ccangpaw mah cyi leite na um lan oh paw thua khyh. ⁴³ “Farasi`ae, nanning paw ngaethya lan na um oh babang! Pawccecize nanning tuh sinakok kya ahoy huaccepaw dahungnaw kha na ry oh zah kungkunaw kya sawtuate beihku na ry oh. ⁴⁴ “Kawbya ccangpatu`ae te Farasi`ae, cyihruh`ae, paw ngaethya lan na um oh babang! Pawccecize nanning tuh alang leipaw shawkhu te nynh na loku oh. Kha-e avawlan cceih`ae paw ccungccaw`ae nynh shawkhu a um paw hei kha nyh khyh`ae,” a cipya. ⁴⁵ Oute kawbya thya`ae paw kyaze lukheitpaw nynh khung zah, “ Ccangpatupaw, tuhte na hopaw tuh kaening mah nae sarya paw nynh thua,” a cipya. ⁴⁶ Te Jesu nynh, “Nanning, kawbya thya`ae paw mah paw ngaethya lan na um oh babang! Pawccecize nanning nynh phu lan myarya aripaw phupaw kha ccungccaw`ae na khang oh zah naemaw tuh nae kuihdung ccangkheit te san na tung khyh oh. ⁴⁷ “Nanning paw ngaethya lan na um oh babang! Pawccecize nanning nynh profeh`ae shawku kha na raepah oh zah nae minpaaw`ae nynh minmin kha a chia`ae. ⁴⁸ Thanccingte nanning nynh nae minpaaw`ae cyisahnaw kha nae nawccah cipaw alang; pawccecize minmin nynh profeh`ae kha phe a chia ccaccing`ae, te nanning nynh shawku`ae kha na raepya oh. ⁴⁹ Tukeiccu Pachia kya-e hawnaw nynh mah, ‘Minmin kalan profeh`ae te locceihtu`ae kha ka saw cih`ae, te minmin nynh abang kha theih ngaw`ae zah abang kha a tua-a sah cih`ae,’ a ci. ⁵⁰ Ou tuhte laephipi athonaw kyate alua paw profeh`ae balyn chii mee kha hynh-e ciihan`ae kya ngia athua nawlan. ⁵¹ Abel chii kyate tho zah silawhang te tempal laku kya a chia`ae paw Zakharia chii kyacia ngia athua cih`ae. Byaccaccing kae hopya oh, hynh-e tuh e ccungccaw`ae kya ngia athua cih. ⁵² “Kawbya thya`ae paw, paw ngaethya lan na um oh babang! Pawccecize nanning nynh nynawpaw toh kha phe na law oh; naemaw mah na tee khyh oh zah a tee`ae paw kha mah phang na khaw oh,” a ci. ⁵³ Tuhte hynh-e uccaw`ae kong a hopya`ae lyakhe, kawbya ccangpatu`ae te Farasi`ae nynh bya patae yn hosei ccaw cite Jesu kha thinriasah khylan thawte a ei`ae. ⁵⁴ A khalang kyate yn pou paw kha kyngpya lan zah seibe khylan amaw kha phang a dokhaw`ae.

¹ Tuin ccyh lya, riatae lei ccungccaw zapi pi tuh pynkheihlan sueluakuh`ae zah lukheit te lukheit sydekute a um`ae lyakhe, Jesu nynh tho zah a zuitu`ae kha, “Cyiruhnawpaw Farasi`ae ransi kha la raeringkuh oh. ² Pawccecize langsaku lei lante bong paw pawsang um khyh; ny lei lante thuruh paw mah um khyh. ³ Tukeiccu amohnaw kya na ho oh paw miakaw kha a awnaw kya thae athua cih; te alungkhu e akhaan kya nakaring kya na ho oh paw kha innccukaly kyate siakhae athua cih. ⁴ “Te ka ban oh, nanning kae hopya oh, pyn kha theih`ae zah tuhkoute pawsang cyih kho vae lei`ae paw raw kha rih nan oh. ⁵ Thuasalama hungmou ri lan accan cipaw kae hopah cih oh; pyn a theih koute kehenna maee lungkhu lang vua lan kawhoinaw a hoitupaw raw kha rih oh; athua, nanning kae hopya oh, amaw raw kha rih oh. ⁶ “Ccithya sapangaw kha daw phuapia pianing lang khaw a zua`ae? Te kha-e ccithya sakheit sanmah Pachia nynh ning khyh. ⁷ Thuasalama nae lu kya-e nae sang`ae heize marya ria athua. Tukeiccu rih nan oh; nanning tuh ccithya`ae patae laeze nae phutehua. ⁸ “Nanning kae hopya oh, hunghung zemah ccungccaw`ae malang kamaw kha ccaekia yn khan paw tuh, Ccungccaw Ccapaw nynh Pachia kya-e vaaw ccungccaw`ae malang kha-e paw kha ccaekia a khan cih. ⁹ Thuasalama ccungccaw`ae malang kamaw kha yn vua paw ccungccaw tuh Pachia kya-e vaaw ccungccaw`ae malang vua ru athua cih. ¹⁰ Te hunghung zemah Ccungccaw Ccapaw rawsete bya kawkheit a ho paw tuh ngaethya athua cih; thuasalama Thyaa Muisaw kha rawsete a sarya paw ccungccaw tuh ngaethya thua lan khyh. ¹¹ “Te nanning kha sinakok`ae kalan, te uktu`ae te kawhoitu`ae kalan he ae thuakhae vae oh ze pawtemou ka khung cih, pawmou ka khung cih, tukhyhze pawmou ka ho cih cipaw nae lungvawsaw nan sah. ¹² Pawccecize Thyaa Muisaw nynh kha-e ccyh ccaccei kyakhe na ho lan oh accanpaw kha ae ccangpah cih oh,” cite a hopya`ae. ¹³ Te ccungccaw zapi kyate lukheitpaw nynh Jesu kha, “Ccangpatupaw, rho uccaw yn nee bua nawlan ka upaw hynh hopah,” a cipya. ¹⁴ Te Jesu nynh, “Ccungccapaw, hung nynh mou kae hynh nanning tungvaw byapiatu lang, tukhyhze rho neetu lang yn khang?” a cipya. ¹⁵ Te Jesu nynh, “Nae lungkyh sah lah karangkunaw hynh raeringkuh oh; pawccecize ccungccaw lukheit hiinnaw tuh phe beih lang a hoi paw uccaw`ae kyakhe um khyh,” a cipya`ae. ¹⁶ Te Jesu nynh minmin kha tousenaw phungpaw ccangkheit a hopya`ae: “Mihoipaw lukheit kya-e lorang tuh looh myarya a voi. ¹⁷ Te a thinlung kya tuakuh zah, ‘Ka looh nungnaw ka hoi vae khyh zah pawmou ka cyih cih?’ a ciku. ¹⁸ “ ‘Te hynhte ka cyih cih, ka ccung-inn`ae kha ka phou cih zah ale huapaw ka sak cih, te tuin kya ka looh`ae te ka uccaw`ae balyn kha ka nung cih. ¹⁹ Te ka hiinnawmuisaw kha, “Ka hiinnaw-muisaw, nang tuh kum patae hanlan uccaw patae kha ccakhungpya na thua vae, hung um ccavae, ae lah neih, te lungtuate um, ka cipah cih,” ’ a ci. ²⁰ “Thuasalama tuhte a tuaku lyakhe, Pachia nynh kha-e paw kha, ‘Mingaeepaw, atu khuazi ccacceimaw na hiinnaw-muisaw kha lawpya athua cih, te na ccakhung paw uccaw`ae kha hung elan mou a tang cih?’ a cipya. ²¹ “Tukeiccu amaw hanlan sisua a ccakhungkuh paw ccungccaw tuh tuh-e paw te nynh aloku, te aning tuh Pachia malang a hoirungpaw thua khyh,” a ci. ²² Te Jesu nynh a zuitu`ae kha, “Tukeiccu nanning kae hopya oh, nae hiinnaw hanlan pawmou ka ae cih cite nae thinphang nan sah, nae pyn hanlan mah pawmou ka lawku cih cipaw nae thinphang nan sah. ²³ Pawccecize hiinnaw tuh aepaw laeze sunghua zah pyn tuh uccaw laeze asunghua. ²⁴ Va-aw`ae kha tuatua oh, pawccecize minmin tuh ccaciivuakuh khyh`ae zah looh mah rue khyh`ae, sua-inn mah hoi khyh`ae zah byng mah hoi khyh`ae, te Pachia nynh minmin kha looh a dang`ae, pavaw`ae laeze nanning tuh pawcihmou houh nae phutehua? ²⁵ Te nanning lakuze hungmou thinphangnaw liate amaw ahangnaw kha dung kheit a hangchih sahkuh khopaw um? ²⁶ Tuh-e adih huapaw uccaw san na cyikuh kho khyh oh lanze, pawccemou ccangpaw uccaw hanlan nae thinphang? ²⁷ “Lilipaw`ae pawcihte nynh a lethung`ae cipaw kha tuatua oh; minmin tuh loopho khyh`ae, law mah su khyh`ae; tuhzemah nanning kae hopya oh, Solomon a phu-enaw balyn nynh heize lilipaw ccangkheit tuhte ccaankuh kho khyh. ²⁸ Atunin um zah awkhualan tahkuamaee lungkhu lang phung athua paw rangkaw e lonua heize Pachia nynh tuhte a ccaan lan thua ze, nanning kha tuh-e laeze houh ae ccaan lan khyh oh tou? Pou zyn zya`ae? ²⁹ Pawmou kae ae cih, tukhyhze pawmou kae nia ngaw cite ccung nan oh; lungriathae te mah um nan oh. ³⁰ Pawccecize laephipi-e minphuin`ae nynh e uccaw`ae balyn hynh a ccung`ae paw nynh thua, te nanning nae Paaw nynh e uccaw`ae hynh nae hanlan aho cipaw phe a ny. ³¹ Thuasalama nanning tuh Pachia peenaw palia kha ccung oh; te e uccaw`ae balyn tuh pyachih na thua cih oh. ³² “Tuuphu taraw`ae, rih nan oh; pawccecize peenaw kha nanning pya lanpaw tuh nae Paaw a lungrythua paw nynh thua. ³³ “Na hoi oh paw kha zua oh lah ryachi`ae kha pyabua oh, te apue kho leipaw phuabu kha raekuh oh, miruh nynh a thuanua kho leinaw te laehaw nynh a ro kho leinaw, vaawran kyakhe athang kho leipaw sisua kha ccykuh oh. ³⁴ Pawccecize nae sisua umnaw kya nae thinlung mah a umbua cih. ³⁵ “Nae cce kha taesung sungkuh oh lah, nae maeekhua kha awkuh oh. ³⁶ Te zudy poi kyate mih bawipaw yn ki ngaw zah he yn thua te, thuakaw kha he a khua tuh vaekheihmawte thuakaw hungpya khylan cite a ngaw`ae paw see`ae hawte naemaw mah la um oh. ³⁷ See`ae nynh phang a ngaw`ae paw kha mih bawipaw nynh he yn thua te a muih ze, tuh-e see`ae tuh hythuaccou`ae paw nynh thua; byaccaccing kae hopya oh, mih bawipaw nynh taesung a sungkuh cih zah minmin kha ccaboi kya koihsah ngaw`ae zah amaw ccaccei nynh loohdang cih`ae. ³⁸ Te khuazi santari ccyhningnaw kya thuasah, ccyhthungnaw kya thuasah, a bawipaw nynh yn thua zah ou tuhte a muih lanze, tuh-e see`ae tuh hythuaccou`ae paw nynh thua. ³⁹ Thuasalama e hynh nyh oh, inn hoitupaw nynh paw ccyh kya nynh miruhpaw yn thua cih cipaw kha phe a ny lanze, a inn kha a kiabia khyh nawlan phe a ngaw cih cipaw na ny oh. ⁴⁰ Tukeiccu nanning mah raeringkuh oh; pawccecize na ngaehoi khyh oh ccyh lyakhe Ccungccaw Ccapaw tuh yn thua cih,” a cipya`ae. ⁴¹ Te Piter nynh, “Bawipaw, e tousenaw phungpaw hynh kaening hanlan tou na ho, tukhyhze ccungccaw balyn hanlan tou?” cite a khia. ⁴² Te Bawipaw nynh, “Accyh zaw vae ze mih hanpaw looh neesah lan, a inn kya um`ae paw tungvaw uktu lang, a bawipaw nynh a khang lanpaw, zyn lan um paw te ahawpaw synriatu tuh hungmou? ⁴³ Tuh-e see nynh tuhte a cyi paw kha a bawipaw nynh he yn thua lya a muih ze, tuh-e see tuh hythuaccoupaw nynh thua. ⁴⁴ Byaccaccing kae hopya oh, a bawipaw nynh kha-e paw kha a hoi paw balyn tungvaw uktu lan a khang cih. ⁴⁵ Thuasalama tuh-e see nynh a thinlung kyate, ‘Ka bawipaw yn thua lanpaw tuh aro ung cih,’ ci zah see pise`ae te nopi`ae kha bua`ae zah, ae zah neih zah a rui lya, ⁴⁶ tuh-e see nynh a ngawdae khyh nin kya te a tua khyh ccyh lya, a bawipaw tuh yn thua lanze, kha-e paw kha ccangning lang thoh bae cih zah a hanpaw kha zyn leitu`ae ryte a nungpah cih. ⁴⁷ “Te a bawipaw rynaw kha nyh zah a paccynkuh leipaw, a bawipaw rynaw a cyipah leipaw see tuh ccungbua patae a mue cih. ⁴⁸ Thuasalama a bawipaw rynaw kha nyh khyh zah ccungbua lan accanpaw a cyih paw see tuh ccungbua ccapyh nynh a mue cih. Pawccecize patae pya athua paw ccungccaw tuh patae a sangru cih; te pataepi a ccysah`ae paw ccungccaw miakaw tuh patae a ngiaru cih`ae. ⁴⁹ “Kae tuh laephi vawlan maee saw khylan nynh kae thua; te ka ry paw tuh, kha-e kha phe la rua ccavae sah ci nynh thua! ⁵⁰ Thuasalama ka in lanpaw baptisma ka hoi ung, tuh-e accing mawlaezung tuh pawcih babang mou ka lungriathae! ⁵¹ Laephi vawlan daenaw pya khylan nynh kae tuh kae thua cite tou na tua oh? Nanning kae hopya oh, tuhte thua khyh; thuasalama phiakunaw khylan nynh kae thua. ⁵² Pawccecize atu kyate tho ngaw zah inn innkheit kya ccungccaw lupangaw`ae tuh luthung nynh luning kha rawsete, luning nynh luthung kha rawsete a phiakuh cih`ae. ⁵³ Paaw nynh ccapaw kha rawsete, ccapaw nynh paaw kha rawsete, te nung nynh ccanung kha a rawsete, ccanung nynh nung kha rawsete, te ninnung nynh monung kha rawsete, monung nynh ninnung kha rawsete a phiakuh cih`ae,” a ci. ⁵⁴ Oute Jesu nynh ccungccaw zapi kha mah, “Nanning nynh niccaw langte maeking a pouthung paw kha na muih vae oh ze, ‘Khua yn rah cih,’ na ci oh; te khua arah sasaw. ⁵⁵ Te deilang te khivae azaw paw kha he na muih vae oh ze, ‘Khuanin yn so cih,’ na ci oh; te khuanin aso sasaw. ⁵⁶ Cyihruh`ae! Nanning nynh laephi mitmae te vaawlui mitmae kha na phiathya oh; thuasalama pawccemou atu e ccyh hynh na thaethya khyh oh? ⁵⁷ “Athua, pawccemou naemaw ccaccei nynh so ahmepaw kha bya na pia khyh oh tou? ⁵⁸ Nang ae rawsetupaw ryte byapiatu kalan na cciakheih lya oh laanpi kyakhe, ccawku kho nawlan thawte la zuakuh; tukhyh lanze byapiatu kalan ae cciakhae cih zah byapiatu nynh thung uktu kalan ae ah cih, te thung uktu nynh thung ae saw cih. ⁵⁹ Nang kae hopya, na rung lanpaw daw phuapia phe accing lang na pya makhia thung kyate na pou lan khyh,” cite a hopya`ae.

¹ Tuh-e ccyh lya, Galilee`ae mih chii kha mih silawkunaw`ae paw ryte Pilat nynh pung a pyde pya`ae cipaw kong Jesu a hopah`ae paw ccungccaw abang a um`ae. ² Te Jesu nynh tho zah, “Tuh-e Galilee`ae tuh tuhte a teing`ae keiccuze ccangpaw Galilee`ae balyn laeze a seihua`ae paw cite tou na tua oh? ³ Nanning kae hopya oh, tuhte thua khyh; thuasalama nanning mah na ngaesiku khyh oh ze, tuh-e hawte nae balynte marya na chih mamin cih oh. ⁴ Tukhyhze, Siloam kya innhangpaw nynh mih tungvaw tingthin`ae zah phe chia`ae paw luhaw laetarya`ae kha Jerusalem kya a um`ae paw ccungccaw`ae balyn laeze a seihua`ae paw cite tou na tua oh? ⁵ Nanning kae hopya oh, tuhte thua khyh; thuasalama nanning mah na ngaesiku khyh oh ze, tuh-e hawte nae balynte marya na chih mamin cih oh,” a cipya`ae. ⁶ Jesu nynh e tousenaw phungpaw hynh mah a ho: “Ccungccapaw lukheit nynh a misu khokhu kyakhe thaeku kukheit a la lin; te yn cceih zah kha-e ku kya a thae kha fui zah muih khyh. ⁷ Oute misu khokhu ngawtupaw kha, ‘Dotua, kum thung lungkhu hynh-e thaeku ku kalan kae cceih zah athae ka ccung zah ka muih khyh; nge ccavae; pawccemou laephi hynh a thangsah han?’ cite a hopya. ⁸ “Te aning nynh khung zah, ‘Bawipaw, atunin kum tuh hynh mawte umhin sah, a pepan lae ka thualeipah cih zah ia ka pungnua ung cih. ⁹ Te athae yn thae ze, ahoy; te yn thae vae khyh ze, khahkoute nge vae,’ a cipya,” a ci. ¹⁰ Te Jesu nynh Sabbath nin kya sinakok ccangkheit kyakhe a ccangpya`ae. ¹¹ Te, dotua, kum haw laetarya cia nyaakhaekunaw muisaw a hoi paw nopinung lukheit a um; tuh-e nung tuh a ke karae ky zah kharyh law kho khyh. ¹² Te Jesu nynh kha-e nung kha he a muih tuh ko zah, “Nopinung, na nyakhaekunaw kyate na lue vae,” a cipya. ¹³ Te kha-e nung tungvaw a kuih khang zah vaekheihmawte a ke tuh phe alaw vae; te aning nynh Pachia kha phu-esah. ¹⁴ Tuhte Jesu nynh Sabbath nin kya a dansah keiccuze, sinakok uktu nynh thinria te tho zah ccungccaw`ae kha, “Ccungccaw`ae nynh ryalaw lawkunaw lanpaw nin taruh a um, ou kha-e nin`ae kyakhe oun cceih oh lah dannaw kha oun mue oh, Sabbath nin kya tuh mue nan oh,” a cipya`ae. ¹⁵ Oute Bawipaw nynh khung zah, “Cyiruhpaw! Nanning milu raveih nynh Sabbath nin kya nae tangnuapaw, khyh ze nae lann kha a inn kyate na supah oh zah tui nia lan na cciakhae khyh oh tou? ¹⁶ Te, dotua, kum haw laetarya cia Setan nynh phang a hee paw, Abraham ccanung athua paw, e nopinung hynh hynh-e khiinaw kyate Sabbath nin kya supya lan ccan khyh tou?” a ci. ¹⁷ Te hynhte he a ho tuh, amaw rawsetu`ae balyn tuh maethya pung bongkuh`ae; te ccungccaw`ae balyn tuh Jesu nynh a cyipaw phu-e lan um paw uccaw`ae hanlan mih lungtua. ¹⁸ Oute Jesu nynh, “Pachia peenaw tuh pawtemou aloku? Te pawtemou ka touse cih? ¹⁹ Ccungccapaw lukheit nynh lawkuh zah a khokhu lungkhu lang a vua paw mungngia mung te nynh aloku; kha-e a mung tuh lethung zah a kupi lang phe a tang, te vawlae-e pavaw`ae nynh kha-e aran`ae kyakhe bu a luaku`ae,” a ci. ²⁰ Te Jesu nynh bua tho zah, “Pachia peenaw tuh pawtemou ka touse cih? ²¹ Tuh-e tuh, nopinung lukheit nynh laah zah vaepoi kawthung kya a phing paw, tuh-e vaepoi phe a thosah paw ransi te nynh aloku,” a ci. ²² Te Jesu tuh khuapi`ae te khua taraw`ae kalan po cceih zah ccangpya biate Jerusalem langkhe khuaccung. ²³ Oute ccungccaw lukheit nynh, “Bawipaw, khumnaw a mue`ae paw tuh azya`ae tou?” cite a khia. Te Jesu nynh, ²⁴ “Abypaw koikua kyate tee lan zuakuh oh; pawccecize, nanning kae hopya oh, ccungccaw patae nynh kha-e kya tee lan oun ccung cih`ae zah tee kho lan khyh`ae. ²⁵ Inn hoitupaw nynh vaekheit thokuh zah thuakaw kha phe a khaw koute, nanning nynh atolang khe na thadyn oh zah na khua oh, te, ‘Bawipaw, Bawipaw thuakaw oun hungpah,’ na ci oh; te aning nynh nanning kha, ‘Nanning paw kyate nae thua oh paw cipaw kae nynh khyh oh,’ ae cipah cih oh. ²⁶ Oute nanning nynh, ‘Namaw ry kae ae zah kae neihbua, kae khua laanpi`ae kya nae ccangpah,’ nae ci cih oh. ²⁷ Thuasalama aning nynh, ‘Nanning kae hopya oh, nanning paw kya-e cipaw kae nyh khyh oh; ccouseikunaw ryalahtu`ae nanning balyn kamaw kyate pou oh,’ ae cipah cih oh. ²⁸ Nanning nynh Abraham, Isaak te Jakob te profeh`ae balyn kha Pachia peenaw kya na muih oh zah naemaw tuh atolang dae vua na thua oh paw kha he nae muih oh tuh rawkhuinaw te hawzynaw oun um cih. ²⁹ Te minmin tuh nithua, niccaw, palung lang, deilang te oun thua cih`ae zah Pachia peenaw kya oun dahung cih`ae. ³⁰ Te, dotua, masaty athua cih`ae paw nyathyakou`ae um zah nyathyakou athua cih`ae paw masaty`ae a um,” a ci. ³¹ Tuh-e nin kya Farasi`ae abang oun thua`ae zah Jesu kha, “Toikuh lah e kyate pou, pawccecize Herod nynh chia lan ae ry,” a cipya`ae. ³² Te Jesu nynh minmin kha, “Nanning la cceih oh lah kha-e rang-ui kha, ‘Dotua, kae nynh raerangsaro`ae kha ka dee zah atunin te awkhualan ka dansah`ae, te nin thungnaw kya kae tuh ccingsah ka thua cih,’ cite la hopah oh. ³³ Tuhzemah atunin, awkhualan te sarakheih kae tuh solei ka cceih ung cih; pawccecize Jerusalem atolang khe profeh lukheit a chi lanpaw tuh thua kho khyh. ³⁴ “Pou Jerusalem, Jerusalem, profeh`ae a theih paw, te na kalan oun saw`ae paw ccungccaw`ae kha lung te a deih paw nang! Awpinung nynh a taw`ae kha a sake kawlan a suelua`ae hawte na ccaaw`ae kha pynkheihlan suelua lan pei ka ry zah nang nynh na ry khyh! ³⁵ Dotua oh, nae inn tuh nanning umnaw kho lei lante a um han; te byaccaccing kae hopya oh, ‘BAWIPAW min liate oun thua paw tuh hythuaccoupaw nynh thua!’ cite nanning nynh na ho mawlaezung oh nanning nynh kamaw hynh nae muih vae lan khyh oh,” a cipya`ae.

¹ Ou tuhcihte Sabbath nin kya Jesu nynh aepaw ae lan Farasi lupipaw lukheit inn lungkhu lang he a tee tuh minmin nynh a dophi`ae. ² Te, dotua oh, tuipoipaw ccinaw a hoi paw ccungccaw lukheit a malang khe a um. ³ Te Jesu nynh tho zah kawbya thya`ae paw te Farasi`ae kha, “Sabbath nin kya dansah lan kawbya nynh a ua tou?” cite a khia`ae. ⁴ Te minmin tuh daebabilan zya um`ae. Te Jesu nynh kha-e paw kha laah zah a dansah, te a cciasah. ⁵ Te minmin kha, “Nanning lakuze a vaetua, tukhyhze a lann kha Sabbath nin kya hunghua lungkhu lang a ccaw ze palou thua leite a um paw hungmou a um cih?” cite a khia`ae. ⁶ Te minmin nynh hynh-e uccaw`ae kya mah bua khung kho khyh`ae. ⁷ Te ko paw ccungccaw`ae nynh ahoy huaccepaw dahungnaw a poku`ae paw kha he a muih tuh, minmin kha Jesu nynh tousenaw phungpaw ccangkheit a hopya`ae: ⁸ “Nang kha zudy poi kalan lukhakheit nynh ae kobua ze ahoy huaccepaw dahungnaw kya la dahung nan, na dahung lanze, nang laeze sawtua lan um paw ccungccapaw kha kha-e paw nynh a kobua ze, ⁹ nang te kha-e paw a kotupaw nynh na kalan yn cceih ngaw zah, ‘E paw hynh dahungnaw pya,’ ae cipya ze, nang tuh maethya te ane huapaw dahungnaw lawku lan yn ccan vae cih. ¹⁰ Thuasalama nang kha ae kobua`ae ze, cceih lah ane huapaw dahungnaw kyakhe la dahung; ou khate nang ae kotupaw he yn thua vae ze, namaw kha, ‘Ka ban, ahang huapaw kalan khe dahung,’ ae cipya ccaw; oute tuh namaw ryte na dahungkheih oh paw malang khe nang tuh sawtuanaw na mue vae cih. ¹¹ Pawccecize hunghung zemah amaw te amaw a hangthungkuh paw tuh sawbung athua cih, te amaw te amaw zakawsangsakuhpaw tuh hangthung athua cih,” a ci. ¹² Oute Jesu nynh amaw a kotupaw kha mah, “Nang nynh awkhua loohdangkunaw, tukhyhze zete loohdangkunaw na rae vae ze, na ban`ae, na uno`ae, na vaeccaw`ae, a hoirung`ae paw innpaw`ae kha la ko nan`ae; tuhte na ko`ae ze minmin nynh mah bua ae ko ru cih`ae zah amee phe ae sangru cih`ae. ¹³ Thuasalama nang nynh poi na tua vae ze, ryachi`ae, kuihccu mitnaw ccing lei`ae paw, ccukhou`ae te mitmoh`ae kha la ko`ae. ¹⁴ Oute nang tuh hythuaccoupaw na thua cih. Pawccecize minmin nynh ae sangru kho khyh`ae keiccu, a ding`ae paw thothuinaw kya nang tuh amee sangru na thua cih,” a cipya. ¹⁵ Te amaw ryte aenaw kya a dahungkheih`ae paw lukheit nynh e bya`ae kha he a thae tuh Jesu kha, “Pachia peenaw kya sanlou a ae cih paw ccungccaw tuh hythuaccoupaw nynh thua!” a cipya. ¹⁶ Oute Jesu nynh tuh-e paw kha, “Ccungccapaw lukheit nynh zerya poipi kha rae zah ccungccaw patae a ko. ¹⁷ Te ko athua`ae paw kha, ‘Rang ccavae oh, pawpaw balyn atu paccyn athua vae,’ cite hosapya lan zerya ae ccyh kyakhe a seepaw kha a saw. ¹⁸ “Thuasalama minmin balyn nynh pung a seisah`ae. Masaty e paw nynh, ‘Laekua kuakheit ka re zah do lan ka ccia phe aho ung, beih yn ngaethya hin,’ a cipya. ¹⁹ “Te mingccangpaw nynh, ‘Tangnua toi pangaw ka re zah syntawtua lan ka la cceih ung cih, yn ngaethya hin,’ cite a ngiaku. ²⁰ “Te mingccangpaw nynh, ‘Zu phe ka hoi ung, tukeiccu kae cceih kho la khyh,’ a ci. ²¹ “Tukeiccu tuh-e seepaw nynh oun thua zah kha-e`ae kong kha a bawipaw kalan a hopya. Oute inn hoitupaw tuh a thinria zah a seepaw kha, ‘Khuapi e laanpi`ae te laan laku`ae langkhe la cceih kanmaw lah ryachi`ae, te kuihccu mitnaw ccing lei`ae paw, te ccukhou`ae te mitmoh`ae kha hynhlang oun cciakhae`ae,’ a cipya. ²² “Te a seepaw nynh, ‘Bawipaw, kaw nae pya thyhhawte phe ka cyi vae, tuhzemah akhaan mang accung ung,’ a ci. ²³ “Te a bawipaw nynh a seepaw kha, ‘Laanpi lepaw`ae te ku`ae kalan la cceih lah ka inn phe abia ccaw ccungccaw`ae kha tee lan oun nangse`ae. ²⁴ Pawccecize nang kae hopya, ko paw ccungccaw`ae hung nynh sanmah ka zerya hynh tangtua lan khyh`ae,’ a cipya,” cite a hopya. ²⁵ Te ccungccaw zapi pi tuh amaw ryte a cceih`ae. Te Jesu nynh maeleihkuh zah minmin kha, ²⁶ “Ccungccaw lukhakheit nynh kamaw kalan yn cceih zah a paaw, a nung, a zu, a ccaaw`ae, a uno`ae, a ccia`ae, te amaw hiinnaw hei kha a hua khyh lanze aning tuh ka zuitu lang thua kho lan khyh. ²⁷ Te hunghung zemah a vaelantung puihku leite kamaw yn zui paw tuh ka zuitu thua kho lan khyh. ²⁸ “Pawccecize nanning lakuze lukhakheit nynh innhangpaw innkheit sak lan a paccynku ze, kha-e phe thangsah lan, phua azaw lan hoi ta, cipaw ny khylan masaty dahung leite a um cih tou? ²⁹ Tukhyh lanze innhangpaw atung-accaw kha phe a bing koute kha-e kha a thangsah kho khyh ze, kha-e a muih`ae paw balyn nynh amaw kha sarya ngaw`ae zah, ³⁰ ‘E ccungccapaw tuh sak lan mang tho zah thangsah kho khyh,’ cite a ci cih`ae. ³¹ “Tukhyhze, siapharan lukheit nynh ccangpaw siapharanpaw kha rhawtuk lan a nouku ze, ccungccaw thungkuin te oun thokuh paw siapharanpaw kha ccungccaw thunghaw te ka dou kho ngaw ta cipaw masaty dahungty leite, tuakuty leite um ngaw ta? ³² A dou kho lan khyh ze, kha-e siapharanpaw laan sawpi a um lyakhe, zeccuetu kha saw zah ccawkunaw kha a ngiaku. ³³ Tukeiccu, tuhhawte nanning laku hunghung zemah a hoi paw balyn khaleih a cciataw leipaw tuh ka zuitu lang thua kho lan khyh. ³⁴ “Loi tuh ahoy; thuasalama loi nynh a enaw kha phe azo lanze pawtemou esah kho thua ung cih? ³⁵ Kha-e loi tuh laephi hanlan mah, athupaw pumnaw hanlan mah hoy vae khyh; ccungccaw`ae nynh ccaring a vua vae`ae. Thae nawlan nakaring a hoi paw nynh tuh thae sah!” a ci.

¹ Oute ngunto khoitu`ae balynte misei`ae nynh amaw bya ngae khylan amaw kalan oun naekuh`ae. ² Te Farasi`ae te kawbya ccangpatu`ae nynh, “E ccungccapaw hynh misei`ae kha lehkhan zah minmin ryte a aekheih,” cite a ccokuh`ae. ³ Te Jesu nynh e tousenaw phungpaw hynh minmin kha a hopya`ae: ⁴ “Nanning kya tuu zakheit a hoi paw ccungccaw nynh sakheit kha a zosah lanze, sungtakua satakua kha rangkaw khe cciataw zah azopaw kha a muih makhia ccung khyh tou? ⁵ Te kha-e kha he a muih vae ze lungtuate a raw vawlan khe a khangku. ⁶ Te innvaw he a thua tuh a ban`ae te innpaw`ae kha pynkheihlan ko`ae zah minmin kha, ‘Lung oun tuakhae oh, pawccecize azopaw ka tuu kha phe ka muih vae,’ a cipya`ae. ⁷ Nanning kae hopya oh, tuhhawte ngaesikunaw aho leipaw adingpaw ccungccaw`ae sungtakua lutakua tungvaw laeze a ngaesikuh paw misei lukheit tungvaw vaawran kya lungtuanaw houh a um hua cih. ⁸ “Tukhyhze, nopinung lukheit nynh ngunphua piahaw hoi zah, piakheit phe a zosah lanze maeekhua kha awkuh zah a muih makhia inn kha phi zah ahoyte ccung khyh tou? ⁹ Te he a muih tuh a ban`ae te innpaw`ae kha pynkheihlan ko`ae zah, ‘Lung oun tuakhae oh, pawccecize ka zosah paw phuapia kha phe ka muih vae,’ cite a hopya`ae. ¹⁰ Tuhhawte, nanning kae hopya oh, a ngaesikuh paw misei lukheit tungvaw Pachia kya-e vaaw ccungccaw`ae umnaw kya lungtuanaw a um,” a ci. ¹¹ Te Jesu nynh, “Ccungccapaw lukheit nynh ccapaw luning a hoi. ¹² Te asoipaw nynh a paaw kha tho zah, ‘Apang, rho uccaw`ae kyaze ka ccou lan accanpaw ka hanpaw kha yn pya ccavae,’ a cipya. Te aning nynh a hoi paw uccaw`ae kha minmin a nee`ae. ¹³ “Te nin eih aro mawze, asoipaw ccapaw nynh a uccaw balyn kha lawkuh zah asawnaw ram lang khuaccung zah tuin ram kya a uccaw`ae kha keisukeilae phya a mang. ¹⁴ Te a hoi paw balyn marya a mang kou tuh tuh-e ram kya myarya ccakangccih zah aning tuh a ryachi vae. ¹⁵ Te tuh-e ram kya-e ccungccapaw lukheit kalan cceih zah a la umbua, te aning nynh amaw kha voh`ae loohdang lan a loo lungkhu lang a saw. ¹⁶ Te aning tuh voh`ae nynh a ae`ae paw bia kaloh`ae hei kha a vue phe so lang ae a ry zemah hung ccungccaw nynh sanmah looh pya khyh`ae. ¹⁷ “Te amaw te amaw he yn nyhkuh tuh, ‘Ka paaw kya vaeluakuh`ae paw patae tuh sanlou ae tae lei a hoi`ae, te kae tuh vuelaw te ka chih vae cih! ¹⁸ Ka thokuh cih zah ka paaw kalan ka cceih cih zah amaw kha, “Apang, Pachia malang te na malang phe ka sei vae. ¹⁹ Te kae tuh na ccapaw cite ko lan ka ngaekuh vae khyh, na kya vaeluakuh`ae paw lukheit hawte yn nungbua,” ka cipah cih,’ a ciku. ²⁰ “Te thokuh zah a paaw kalan a cceih. Thuasalama laan sawpi a thua lyakhe a paaw nynh he a muih tuh ngaethya-umsanaw hoi zah ccuenua zah a nging kya pum zah a myng. ²¹ Te a ccapaw nynh, ‘Apang, Pachia malang te na malang phe ka sei vae, te na ccaaw cite ko lan kharyh ka ngaekuh vae khyh,’ a cipya. ²² “Thuasalama a paaw nynh a see`ae kha, ‘Ahoy huaccepaw uccaw kha oun laah oh lah amaw hynh lawsakuh oh, te a kuih kya kuihpu kha pusah oh lah a ccu kya ccukoh nawsah oh. ²³ Te athopaw tohlaw kha hynhlang oun cciakhae oh lah theih oh, te ah ae cih oh zah lungtuanaw ah rae cih oh. ²⁴ Pawccecize hynh-e ka ccapaw tuh a chih, te bua a hiin, aning tuh azo, te bua muih athua vae,’ a cipya`ae. Te minmin tuh lungtuanaw a tho vae`ae. ²⁵ “Te a ccapaw atawccapaw tuh loo kya a la um, te yn cceih zah inn pe he a thua tuh tyngdaw te lawpaw roi kha a thae. ²⁶ Te see`ae lukheit kha ko zah tuhe tuh pawmou cite a khia. ²⁷ Te aning nynh, ‘Na neitapaw kha phe yn thua vae, te na paaw nynh amaw kha ngedante bua a muihthui keiccuze, athopaw tohlaw kha a chiapya,’ a cipya. ²⁸ “Te aning tuh a thinria zah inn lungkhu lang tee vae khyh, tukeiccu a paaw nynh yn toikuh zah a soihbia. ²⁹ Te aning nynh tho zah a paaw kha, ‘Dotua, kum patae cia na rya ka laah, na kawpyapaw mah vaekheit san kae ei boi khyh, tuhzemah ka ban`ae ryte lungtuanaw kae rae ccaw cite mia taraw sakheit san nae pya boi khyh. ³⁰ Thuasalama ohhuanung`ae ryte na hoi paw uccaw marya a mang kou paw e na ccapaw tuh he yn thua mawte, athopaw tohlaw kha a hanlan na chiapya,’ a ci. ³¹ “Te a paaw nynh, ‘Ka ccapaw, nang tuh kamaw ryte tyty na um, te ka hoi paw balyn tuh na kya-e nynh thua. ³² Lungtuanaw ah rae lan oh ccan zah lungpaw lan accan, pawccecize e na neitapaw tuh chih zah atu a hiinthui vae, te zo zah atu muih thui athua vae,’ a cipya,” a ci.

¹ Te Jesu nynh a zuitu`ae kha mah a hopya`ae paw tuh: “Mihoipaw lukheit nynh synriatu lukheit a hoi, tuh-e synriatu nynh a bawipaw uccaw`ae kha phya a mang kou cite a bawipaw kalan seibe`ae. ² Te a bawipaw nynh kha-e paw kha ko zah, ‘Na konglang ka thae paw tuh pawtemou? Synriatu rya na lawnawpaw ccazing kha yn pya, pawccecize synriatu na thua kho vae lan khyh,’ a cipya. ³ “Oute synriatu nynh a thinlung kya, ‘Pawmou ka cyih vae cih? Ka bawipaw nynh synriatuthuanaw kha ka kyate phe yn lawpya vae, lae thae lan ka thae kho khyh, ngiaku lan ka maethah. ⁴ Synriatuthuanaw kyate he ka ccaw vae ze ming`ae nynh mih inn lang oun thuasah nawlan`ae pawte cyi lan cipaw ka nyku vae,’ a ci. ⁵ “Te a bawipaw kya-e laeba um`ae paw miakaw kha ko`ae zah, lukheitpaw kha, ‘Ka bawipaw kya hozeihmou laeba na um?’ cite a khia. ⁶ “Te aning nynh, ‘Chitui bath zakheit,’ a ci. Te aning nynh, ‘Na ccazing kha lawkuh lah arangte dahung lah sungpangnaw cite zeikuh,’ a cipya. ⁷ “Oute mingccangpaw kha, ‘Nang so hozeihmou lae na um?’ cite a khia. Te tuh-e paw nynh, ‘Chanvui kor zakheit,’ a ci. Te aning nynh, ‘Na ccazing kha lawkuh lah sungtarya cite zeikuh,’ a cipya. ⁸ Te atazae leipaw synriatu nynh hawrarih lante a cyi keiccu a bawipaw nynh thehoysah. Pawccecize hynh-e laephi ccungccaw`ae tuh mimaw mih she kya awnaw ccungccaw`ae laeze ahawhua`ae. ⁹ Te nanning kae hopya oh, he na shung vae oh ze zungzae umnaw lungkhu lang nanning ae lehkhan lan oh paw ruiban`ae kha ading leipaw phuasui khate raekuh oh. ¹⁰ Pyhtaripaw uccaw kya zyn lan um paw tuh pataepi kya mah zyn lan um paw nynh thua, te pyhtaripaw uccaw kya atazae leipaw tuh pataepi kya mah atazae leipaw nynh thua. ¹¹ Tukeiccu ading leipaw phuasui kya nanning nynh zyn lan na um khyh oh ze, ahmepaw hoirungnaw kha hung nynh mou nae kalan ae ah cih oh? ¹² Te mingccangpaw ccungccaw uccaw kya nanning nynh zyn lan na um khyh oh ze, hung nynh mou nae uccaw kha ae pya cih oh? ¹³ “See hung nynh sanmah bawi luning rya la kho khyh; pawccecize bawi lukheit kha a hua lanze lukheit kha a sungsah cih, tukhyhze lukheit kalan a pang ze lukheit kha pawlangria leite a nung cih. Pachia te phuasui kha paryh na ryaa kho khyh oh,” a cipya`ae. ¹⁴ Te phua a ry`ae paw Farasi`ae nynh mah kha-e bya`ae balyn kha thae`ae zah Jesu kha a nuinse`ae. ¹⁵ Te Jesu nynh minmin kha, “Nanning tuh ccungccaw`ae malang naemaw te naemaw na dingsakuh oh paw nynh na thua oh; thuasalama Pachia nynh nae thinlung kha a ny; pawccecize ccungccaw`ae laku myarya ahang lante tua paw uccaw tuh Pachia malang luathua-ae-ui lang um paw nynh thua. ¹⁶ “Kawbya te profeh`ae tuh Johan kyacia hanlan nynh thua. Johan ccyh kyate vae tuh Pachia peenaw thehoypaw kha ho thua vae zah ccungccaw miakaw nynh kha-e peenaw lungkhu lang a nangkuh`ae. ¹⁷ Kawbya kya-e ccafang taraw ccangkheit azo laeze vaawran te laephi zo azoihua. ¹⁸ “Hunghung zemah a zu kha maah zah ccangpaw nopi kha zu lang a hoi paw tuh milae zu a seikhaepaw nynh thua; te a vawpaw nynh a mya paw nopinung kha zu lang a hoi paw tuh milae zu a seikhaepaw nynh thua. ¹⁹ “Sekakungpaw uccaw te uccaw nebaleihpaw leih lawkuh zah myarya hoysahte nin takyh leih um paw mihoipaw lukheit a um. ²⁰ Te milae a ngiakuh paw, Lazaruh acikuh paw lukheit um zah aning tuh vaemaw te a pyn kya phe beih zah mihoipaw sakoih zung khe phang a huekuh. ²¹ Te mihoipaw ccaboi kyate accah paw loohmoi`ae kha ae lan a ry; tuhlaeze ui`ae nynh oun cceih`ae zah a vaemaw`ae kha a lya`ae. ²² “Ou tuhcihte Lazaruh tuh chih zah vaaw ccungccaw`ae nynh Abraham by vawlan a cciakhae`ae. Mihoipaw mah chih zah a u`ae. ²³ Te Hades kya myarya accih lang teingte, dothung zah asawpi e Abraham te a by vawlan um paw Lazaruh kha a muih. ²⁴ Te sia zah, ‘Apang Abraham, thaw beih yn ccih lah Lazaruh kha beih yn sawpah, a kuihdung kha tui kya yn dungsah lah ka lae hynh yn kyaasahpya ccaw, pawccecize kae tuh hynh-e maeephu kya myarya accih lang ka teing,’ a ci. ²⁵ “Thuasalama Abraham nynh, ‘Ka ccapaw, laephi vaw na hiin ccyh lya ahoypaw uccaw`ae kha na mue, te tuhhawte Lazaruh tuh athahpaw uccaw`ae kha a mue cipaw kha liathuitua; thuasalama atu aning tuh ngaengansah athua vae, te nang tuh myarya accih lan teingsah na thua. ²⁶ Te tuh-e`ae balyn laeze, kaening te nanning alaku kya myarya akhupaw hunghua pi kha rae athua vae. Tukeiccu e kyate nanning kalan a zua ry`ae paw nynh zua kho khyh`ae, khahlang te kaening kalan a zua ry`ae paw mah zua kho khyh`ae,’ a cipya. ²⁷ “Te mihoipaw nynh, ‘Tuhte lanze, apang, ka paaw inn lang Lazaruh kha yn la sawpah cite kae ngia. ²⁸ Pawccecize kae tuh uno lu pangaw ka hoi, minmin nynh hynh-e vawsaw teingnaw hmin lungkhu lang oun thuabua khyh ccaw`ae, aning nynh minmin kha a hopya`ae ccaw,’ a ci. ²⁹ “Abraham nynh, ‘Minmin tuh Mawsi te profeh`ae mang a hoi`ae, minmin bya kha la ngae`ae sah,’ a cipya. ³⁰ “Thuasalama aning nynh, ‘Apang Abraham, tuhte thua khyh; chinaw kyate lukheit nynh thothui zah minmin kalan a ccia lanze, minmin tuh a ngaesikuh cih`ae,’ a ci. ³¹ “Te Abraham nynh, ‘Minmin nynh Mawsi te profeh`ae bya kha a ngae khyh`ae ze lukheit nynh a chih`ae paw kyate a tho zemah minmin tuh soih kho um lae vae lan khyh`ae,’ a cipya,” cite a hopya`ae.

¹ Oute Jesu nynh zuitu`ae kha, “Maeleihsakunaw um leite thua kho lan khyh, thuasalama maeleihsakunaw a thuasah paw ccungccaw tuh paw ngaethya lan um babang! ² Hynh-e imua taraw`ae lukhakheit kha a maeleihsaku lae tuh a nging kyakhe mianawpaw lung ccangkheit kha sae`ae sah lah rili lungkhu lang ccaring vua lanze a hanlan ahoyhua cih. ³ “Naemaw te naemaw kha raeringkuh oh; na uno nynh na tungvaw a cyisei ze amaw kha la pe, te a ngaesiku ze la ngaethya. ⁴ Te nin kheit lungkhu na tungvaw vae sari sei zah nin kheit lungkhu vae sari na kalan yn ki zah, ‘Ka ngaesikuh,’ ae cipya ze na la ngaethya cih,” a cipya`ae. ⁵ Te locceihtu`ae nynh Bawipaw kha, “Kae zynnaw oun lungsapah,” a ci`ae. ⁶ Te Bawipaw nynh, “Nanning nynh mungngia mung mungkheit cia zynnaw na hoi oh ze hynh-e thaeku ku hynh, ‘Na tharui kyate phohkuh lah rili lungkhu lang la bingkuh,’ na cipya oh ze kha-e nynh nae kaw phe ae ngae cih oh. ⁷ “Thuasalama nanning lakuze lukhakheit nynh see lukheit hoi zah kha-e see nynh lei a thue ze thuasah, tukhyhze saring a ring ze thuasah, loo kyate he yn thua vae ze, ‘Rang lah ae lan dahung kanmaw,’ cite hung nynh mou na ci cih oh? ⁸ Thuasalama kha-e see kha, ‘Ka hanlan zerya yn hyngpah, te na tae kha cciakuh lah phe ka ae kou, phe ka neih kou cia aepaw kha yn dang, ou tuhkoute nynh nang na ae na neih ung cih,’ cite na cipah lan khyh oh tou? ⁹ Kawpya thyhhawte see nynh a cyipya keiccu, kha-e see kha a bawipaw nynh a kalan lungtuabya hopah cih ta? Lungtuabya hopah cih cite ka tua khyh. ¹⁰ Tuhhawte nanning mah ryalaw ae naw oh paw balyn kha he na cyi vae oh ze, ‘Aening tuh angae-aduakuh leipaw see`ae nynh ah thua oh, ah cyi lan oh paw rya kyalya nynh ah cyi oh,’ na ci cih oh,” cite a hopya`ae. ¹¹ Ou tuhcihte Jesu tuh Jerusalem lang cceih zah Samaria te Galilee laku kyate po a cceih. ¹² Te khua khuakheit lungkhu lang a tee tuh, asawpi lang a thadyn`ae paw, vaethyakae`ae paw ccungccaw luhaw nynh amaw kha a cciadue`ae. ¹³ Te minmin nynh mih roi saw`ae zah, “Bawipaw Jesu kaening hynh ngaethya oun umsah!” a ci`ae. ¹⁴ Te Jesu nynh he a muih`ae tuh minmin kha, “Cceih oh lah naemaw te naemaw kha ranpibawi`ae kalan la dosakuh oh,” a cipya`ae. Ou tuhcihte minmin nynh he a cceih`ae tuh mih vaethya phe athyaa kou. ¹⁵ Te minmin lakuze lukheitpaw nynh a vaethya phe athyaapaw kha he a muihkuh tuh, ki zah roi accae lante Pachia kha phuesah zah, ¹⁶ Jesu ccu leihpaw khe bakhung zah lungtuabya a ho; te tuh-e paw tuh Samariapaw nynh thua. ¹⁷ Te Jesu nynh tho zah, “Vaethya athyaa`ae paw kha luhaw thua khyh ta? Lutakua`ae so teisangmou a um`ae? ¹⁸ Hynh-e minphuin ccangpaw holeite Pachia phu-e pya lan oun ki paw muih lan um khyh rei,” a ci. ¹⁹ Te Jesu nynh kha-e paw kha, “Thokuh, la cceih ccavae, na zynnaw nynh phe ae dansah vae,” a cipya. ²⁰ Te Farasi`ae nynh Pachia peenaw tuh hotuhmou yn thua cih cite Jesu kha he a khia`ae tuh, Jesu nynh khung`ae zah, “Pachia peenaw tuh mitmuihnaw te yn thua khyh. ²¹ ‘E kyahin dotua!’ ‘Khuin kya dotua!’ cite mah oun ci lan khyh`ae; pawccecize dotua oh, Pachia peenaw tuh nanning lungkhu nynh a um,” a ci. ²² Te Jesu nynh zuitu`ae kha, “Nanning nynh Ccungccaw Ccapaw nin`ae kya-e nin kheit kha muih lan na ry oh ccyh yn thua cih zah na muih lan khyh oh. ²³ Te, ‘E kyahin do! Tukhyhze khuin kya khuin do!’ ae cipah cih oh; la cceih nan oh lah zui nan oh. ²⁴ Pawccecize khozaw nynh vaawlui sang kheit kaw te laekuh zah ccanglang vawlui kaw lang a aw hawte nynh Ccungccaw Ccapaw mah amaw nin ccyh kya athua cih. ²⁵ Thuasalama aning tuh masaty patae a teing hahe cih zah hynh-e ciihan`ae nynh oun vua cih`ae. ²⁶ “Te Noah ccyh lya a la cyiku hawte Ccungccaw Ccapaw ccyh kya mah oun cyikuh cih. ²⁷ Noah nynh sanphalung lungkhu lang phe a tee nin kyacia, ccungccaw`ae tuh ae`ae, neih`ae, zu hoeikuh`ae, zudykuh`ae, te tuipayn thua zah minmin balyn kha marya a ro`ae. ²⁸ “Tuhhawte nynh Lot she lya mah a la cyiku; ccungccaw`ae tuh a ae`ae, a neih`ae, uccaw a re`ae, a zua`ae, thingthae ccou`ae, inn sak`ae. ²⁹ Thuasalama Lot nynh Sodom khua kyate a pou nin ccaccei khe vaawran kyate maee te kemaee khuarah zah minmin balyn kha marya a ro`ae. ³⁰ “Ou tuhhawte nynh Ccungccaw Ccapaw he yn langku nin kya yn cyikuh cih. ³¹ Tuh-e nin kya, inn tungvaw um paw ccungccaw nynh inn lungkhu um paw a uccaw`ae lawku khylan rungbung nan vae sah; te lei kya um paw ccungccaw mah tuhhawte inn lang ki nan vae sah. ³² Lot a zu kha liathuitua oh. ³³ Hunghung zemah a hiinnaw khumku khylan a ccungkuh paw tuh hiinnaw kha a shung cih, te hunghung zemah a hiinnaw kha a shung paw tuh a hiinnaw kha a khynsah cih. ³⁴ Nanning kae hopya oh, tuh-e khuazi kya ikhung ccangkheit kya ccungccaw luning um`ae paw kha, lukheit law athua cih zah lukheitpaw kha cciataw athua cih. ³⁵ Pynkheihlan sungmia`ae paw nopi luning kha, lukheit law athua cih zah lukheit cciataw athua cih. ³⁶ Lei kya a um`ae paw ccungccaw luning kha, lukheit law thua cih zah lukheit kha cciataw athua cih,” a cipya`ae. ³⁷ Te minmin nynh khung`ae zah, “Teilangmou law athua cih`ae Bawipaw?” cite a khia`ae. Te Jesu nynh, “Michihrua a umnaw kya, langtaw`ae mah pynkheihlan a sueluakuh bua cih`ae,” a cipya`ae.

¹ Te Jesu nynh ccungccaw`ae tuh lungthang leite zungzae sawsang lan accan cite minmin kha tousenaw phungpaw ccangkheit a hopya`ae. ² A hopaw tuh: “Khuapi khuakheit kya Pachia rawrih khyh zah ccungccaw mah pawlangria leipaw byapiatu lukheit a um. ³ Te tuh-e khuapi kya numaenung lukheit a la um. Te aning nynh tuh-e paw kalan cceih zah, ‘Kamaw yn rawsetupaw kha ccae yn liapah,’ a cipya. ⁴ “Te aning nynh khaw cia cyipya leite a um; thuasalama ou tuhkoute byapiatu nynh amaw te amaw kya, ‘Pachia raw mah ka rih khyh zah ccungccaw mah pawlang ka ria khyh zemah, ⁵ hynh-e numaenung nynh vawsaw yn pya keiccu tuh a hanlan ccae ka liapah cih, tukhyh lanze banban pei yn cceih cih zah phe yn bangsah cih,’ a ciku,” a ci. ⁶ Te Bawipaw nynh, “Atazae leipaw byapiatu nynh a hopaw kha thae oh. ⁷ Te khaw cia a ngaesang zemah, Pachia nynh amaw kalan khuazi khuadae a sia`ae paw, amaw nynh a po`ae paw kha ccaeliapya leite um ngaw ta? ⁸ Nanning kae hopya oh, minmin kha arang mawte ccaeliapah cih`ae. Thuasalama Ccungccaw Ccapaw he yn thua vae ze aning nynh laephi vawlan zynnaw hynh muih ung vema?” a ci. ⁹ Te Jesu nynh mimaw te mimaw kha a ding`ae paw lang riakuh`ae zah mingccang`ae a dothatheih`ae paw kalan khe e tousenaw phungpaw hynh a ho: ¹⁰ “Ccungccaw luning nynh sawsang lan tempal kalan a cceihthung`ae; lukheit tuh Farasipaw thua zah lukheit tuh ngunto khoitu nynh thua. ¹¹ Farasipaw nynh thadyn zah a makhaete hynhte sawsangku, ‘Pou Pachia, kae tuh ccungccaw uccaw a luade`ae paw, atazae lei`ae paw, milae zu a seikhae`ae paw, te hynh-e ngunto khoitupaw hawte mah ka thua khyh keiccu, na kalan lungtuabya kae ho. ¹² Lonaw nawkheit ze vaening looh-ae ka sung, ka hoi paw abalyn kya-e pumhaw pumkheit ka pya,’ a ci. ¹³ “Te ngunto khoitu tuh asawnaw langkhe thadynte, a mit mah vaawran lang dothung ngan leite, thuasalama a by kha tukuh zah, ‘Pou Pachia, miseipaw kae hynh ngaethya yn umsah!’ a ci. ¹⁴ “Nanning kae hopya oh, tuh-e paw tuh Farasipaw laeze thyaaccoute a inn lang a ki; pawccecize amaw te amaw a hangthungkuh paw miakaw tuh sawbung athua cih; te amaw te amaw kha zakawsangsakuhpaw tuh hangthung athua cih,” a ci. ¹⁵ Te Jesu nynh a hae ccaw`ae cite nosi`ae kha mah amaw kalan oun cciakhae`ae; thuasalama zuitu`ae nynh kha-e kha he a muih`ae tuh minmin kha a pe`ae. ¹⁶ Thuasalama Jesu nynh minmin kha ko`ae zah, “Imua taraw`ae kha ka kalan oun cceih`ae sah, kang nan oh; pawccecize Pachia peenaw tuh khatahaw`ae paw elan nynh thua. ¹⁷ Byaccaccing kae hopya oh, hunghung zemah Pachia peenaw kha imua taraw hawte a lawku khyh ze, tuh-e peenaw lungkhu lang tee lan khyh,” a ci. ¹⁸ Te uktu lukheit nynh Jesu kha, “Ccangpatu hoypaw, zungzae hiinnaw rho ka ccou nawlan pawmou ka cyi cih?” cite a khia. ¹⁹ Te Jesu nynh, “Pawccemou kamaw hynh ahoypaw cite nae ko? Pachia lukheit laelan ahoypaw hung sanmah um khyh. ²⁰ ‘Milae zu seikhae nan,’ ‘Ccungccaw theih nan,’ ‘Ruh nan,’ ‘Ahme leipaw ccaekia lang tang nan,’ ‘Na paaw te na nung kha sawtua,’ acikuh paw kawpyapaw`ae kha na nyh khaw!” a cipya. ²¹ Te aning nynh, “Tuh-e`ae balyn tuh ka dih lya mawte phe ka zui kou vae,” a ci. ²² Te Jesu nynh tuh-e bya he a thae tuh kha-e paw kha, “Ccangkheit na bou ung, na hoi paw balyn kha zua lah ryachi`ae kha la nee`ae, te vaawran kya sisua na hoi cih, oute rang lah kamaw yn zui,” a cipya. ²³ Te aning nynh hynh-e bya kha he a thae tuh myarya a ngaethah, pawccecize aning tuh myarya a hoirungpaw nynh thua. ²⁴ Te kha-e paw myarya a ngaethyapaw kha Jesu nynh he a muih tuh, “A hoirung`ae paw nynh Pachia peenaw lungkhu lang tee lanpaw tuh pawcihmou aru! ²⁵ Pawccecize mihoipaw nynh Pachia peenaw lungkhu lang a tee lanpaw lae tuh kalauk nynh phynbang khu kya tee lan a zoihua,” a ci. ²⁶ Te tuh-e a thae paw ccungccaw`ae nynh, “Tuhte lanze hungmou khumnaw a mue kho cih?” a ci`ae. ²⁷ Te Jesu nynh, “Ccungccaw hanlan athua kho leipaw kha Pachia hanlan tuh athua kho,” a ci. ²⁸ Oute Piter nynh, “Dotua, kaening tuh pawpaw balyn marya kae cciataw zah namaw kha kae zui,” a ci. ²⁹ Te Jesu nynh, “Byaccaccing kae hopya oh, Pachia peenaw keiccuze inn thuasah, nungpaaw`ae thuasah, uteno`ae thuasah, zu thuasah, te ccaaw`ae thuasah a cciataw paw tuh, ³⁰ atu ccyh kya aleih patae mue leite um lan khyh, te yn thua lanpaw she kya zungzae hiinnaw mue leite um lan khyh,” a cipya`ae. ³¹ Oute Jesu nynh zuitu luhaw laening kha ccanglang cciakhae`ae zah, “Dotua oh, aening tuh Jerusalem lang nynh ah ccia oh, te Ccungccaw Ccapaw te asekuh lante profeh`ae nynh a zei`ae paw balyn tuh marya accing cih. ³² Pawccecize aning tuh Zenta`ae kalan pya athua cih, sarya athua cih, te dothatheih athua cih zah tuin te thoi athua cih. ³³ Te a tua a sah cih`ae zah a theih cih`ae, te nin thungnaw kya bua a thothui cih,” a cipya`ae. ³⁴ Te minmin nynh hynh-e`ae hynh ccangkheit san thaethya khyh`ae, te hynh-e bya hopaw tuh minmin kyate thuru athua, minmin nynh a hopaw uccaw`ae kong kha nyh khyh`ae. ³⁵ Ou tuhcihte Jesu tuh Jeriko te anaekunaw lang he a thua tuh, mitmohpaw lukheit tuh ngiakute laanpi pe a dahung. ³⁶ Te ccungccaw zapi a ccia`ae paw kha he a thae tuh, “Tuh-e tuh pawmou?” cite a khia. ³⁷ Te minmin nynh Nazareth paw Jesu nynh yn cceih cite a hopya`ae. ³⁸ Te aning nynh, “David Ccapaw, Jesu kae hynh ngaethya yn umsah!” cite a sia. ³⁹ Te malang a cceih`ae paw nynh zya a dae ccaw cite kha-e paw kha a sianua`ae, thuasalama aning nynh, “David Ccapaw, kae hynh ngaethya yn umsah!” cite houh a sia. ⁴⁰ Te Jesu tuh thadyn zah kha-e paw kha oun cciakhae oh cite kawpya`ae, te a pe lang he a naekuh te Jesu nynh, ⁴¹ “Na hanlan pawmou cyisah nae ry?” cite a khia. Te aning nynh, “Bawipaw, ngawmuih nynh ka ry,” a ci. ⁴² Te Jesu nynh, “Ngawmuih ccavae, na zynnaw nynh phe ae dansah vae,” a cipya. ⁴³ Te vaekheihmawte ngawmuih zah Pachia kha phu-esah biate amaw kha a zui; te ccungccaw`ae balyn nynh kha-e kha he a muih`ae tuh Pachia kha thehoysah`ae.

¹ Te Jesu tuh Jeriko khua lang tee zah po a cceih. ² Te dotua, ngunto khoitu`ae lakuze lupi athua paw, Zakia acikuh paw um zah aning tuh a hoirung. ³ Te aning nynh Jesu tuh hungmou thua cite muih a ry; te ccungccaw alung keiccuze muih kho khyh, pawccemacize aning tuh ane. ⁴ Te malang ccue khaw zah Jesu muih khylan thaeku ku kalan a kae; pawccecize Jesu tuh tuhlang po ccia lan acih vae. ⁵ Te tuh-e hmin kya Jesu he a thua tuh dothung zah kha-e paw kha a muih. Te amaw kha, “Zakia, rangsakuh lah yn rungbung, atunin na inn kya ka thua cih,” a cipya. ⁶ Te Zakia nynh arangte rungbung zah lungtuate amaw kha a thuasah. ⁷ Te ccungccaw`ae nynh kha-e kha he a muih`ae tuh, “Miseipaw lukheit a mikhiapaw lang thua lan nynh phe a ccia vae,” cite mih balynte a ccohkuh`ae. ⁸ Te Zakia nynh thadyn zah Bawipaw kha, “Bawipaw, dotua, ka uccaw`ae akhankuh kha ryachi`ae ka pya`ae, te lukhakheit kya-e uccaw ccangkhakheit kha ahme lei lante phe ka lawpyaku ze, leih pali ka pyaru,” a cipya. ⁹ Te Jesu nynh, “E paw mah Abraham ccapaw athua thyhhawte, atunin hynh-e inn kya khumnaw tuh a thua vae. ¹⁰ Pawccecize Ccungccaw Ccapaw tuh azopaw ccung khylan te khum khylan nynh yn thua,” a cipya. ¹¹ Te hynh-e bya`ae a thae`ae lyakhe, Jesu tuh Jerusalem lang a naeku vae keiccu te minmin nynh Pachia peenaw tuh vaekheihmawte yn thua vae cih cite a tua`ae keiccuze Jesu nynh tousenaw phungpaw ccangkheit biachih zah a hopya`ae. ¹² Tukeiccu a hopaw tuh: “Bawi lukheit tuh amaw hanlan peenaw kha lawku lan zah bua ki lan cite asawnaw ram langkhe a cceih. ¹³ A ccia maw, a see`ae luhaw kha ko`ae zah mina phua kiahaw pya`ae zah, ‘Bua kae thua cia kung la kunah oh,’ a cipya`ae. ¹⁴ “Thuasalama a ramccungccaw`ae nynh kha-e paw kha a hua`ae, te a nuhlang te ccungccaw saw`ae zah, ‘E paw nynh kaening oun uk lanpaw kae ry khyh,’ cite a hosapya`ae. ¹⁵ “Ou tuhcihte, tuh-e bawi tuh peenaw kha yn lawkuh zah he yn ki tuh phua a pyasya`ae paw see`ae nynh hozeihmou mue`ae cipaw ny khylan minmin kha amaw kalan a kosah`ae. ¹⁶ “Oute masaty e paw yn thua zah, ‘Bawipaw, na mina phua kha mina ccanghaw amia,’ cite a hopya. ¹⁷ “Te aning nynh kha-e paw kha, ‘Ahoy, nang see hoypaw, nang tuh myarya adihpaw uccaw kya zyn lan na um keiccuze khuapi khuahaw tungvaw kawhoinaw la hoi,’ a cipya. ¹⁸ “Te luningnaw e paw yn thua zah, ‘Bawipaw, na mina phua kha mina pangaw amia,’ cite a hopya. ¹⁹ “Te aning nynh tuhhawte, ‘Nang mah khuapi khuapangaw tungvaw kawhoinaw la hoy,’ a cipya. ²⁰ “Te ccangpaw lukheitpaw yn thua zah, ‘Bawipaw, pavua kya ka tung zah kae ccypya paw hynh-e na mina phua hynh do. ²¹ Pawccecize, nang tuh na ccyku leipaw kha na lawkuh zah na ccouku leipaw kha na ruekuh paw, eih cih kaesypaw ccungccaw na thua keiccu na raw kae rih,’ cite a hopya. ²² “Te aning nynh, ‘Na khalang kya-e thyhte bya kae pia cih, nang see hoy leipaw, kae tuh ka ccyku leipaw kha ka lawkuh zah ka ccouku leipaw ka ruekuh paw, eih cih kaesypaw cipaw mang na nyh paw nynh, ²³ pawccemou ka phua tuh bank kya na nung khyh? He kae thua vae ze ka phua tuh phuato ryte ka mue cih paw,’ a cipya. ²⁴ “Te aning nynh a pe thadyn`ae paw kha, ‘A kya-e mina phua kha laah oh lah ccanghaw a hoitupaw kha pya oh,’ a cipya`ae. ²⁵ Te minmin nynh, ‘Bawipaw, aning tuh mina ccanghaw a hoi khaw tou,’ a ci`ae. ²⁶ Pawccecize nanning kae hopya oh, ‘A hoi paw ccungccaw miakaw kha pyachih athua cih zah a hoi leipaw ccungccaw kyate a hoi thypaw kha heize lawpya athua cih. ²⁷ Thuasalama kae nynh ka uk lanpaw a ry lei`ae paw ka rhaw`ae kha hynhlang oun cciakhae oh lah ka malang mawhin theih oh,’ a cipya`ae,” a ci. ²⁸ Te tuhte he a ho koute Jesu tuh malang cceih zah Jerusalem lang a cceihthung. ²⁹ Ou tuhcihte Oliv acikuh paw mua leihpaw, Bethfake te Bethani khua pe he a thua tuh a zuitu`ae luning kha saw`ae zah, ³⁰ “Nae malang a um paw khua langkhe la cceih oh, tuin kya na teenaw oh kyakhe, hung ccungccaw nynh san a cciku boi leipaw lann taraw a khikuh paw kha na la muih cih oh, kha-e kha oun supah oh lah hynhlang oun cciakhae oh. ³¹ Te lukhakheit nynh, ‘Pawccemou na supya oh?’ cite ae khia oh ze, ‘Bawipaw nynh a peki keiccu,’ cite nae hopah cih oh,” a cipya`ae. ³² Te a saw`ae paw ccungccaw`ae tuh cceih`ae zah Jesu nynh mih kya a hopya`ae hawkhate a muih`ae. ³³ Te lann taraw kha he a supah`ae tuh, a hoitu`ae nynh, “Pawccemou lann taraw kha na supya oh?” a ci`ae. ³⁴ Te minmin nynh, “Bawipaw nynh a peki,” a ci`ae. ³⁵ Te minmin nynh lann taraw kha Jesu kalan a cciakhae`ae, te minmin nynh lann taraw tungvaw mih uccaw`ae kha de`ae zah Jesu kha a tungvaw a ccisaku`ae. ³⁶ Te he a cceih tuh ccungccaw zapi nynh mih uccaw`ae kha laanpi kya a phaepya`ae. ³⁷ Te Oliv Mua kyate rungbungnaw pe kya he a thua tuh zuitu`ae zapi khaleih nynh a muih`ae paw athungpaw ryalaw`ae balyn hanlan mih lungtua zah Pachia kha roi accae lante thehoysah`ae zah, ³⁸ “BAWIPAW min te yn thua paw Siapharan tuh hythuaccou sah! Vaawran kya daenaw um sah lah ahang huaccenaw kya phu-enaw um sah!” cite a sia`ae. ³⁹ Te ccungccaw zapi laku-e Farasi`ae abang nynh Jesu kha, “Ccangpatupaw, na zuitu`ae hynh pe`ae,” cite a hopya`ae. ⁴⁰ Te Jesu nynh tho zah, “Nanning kae hopya oh, hynh-e`ae nynh daetedae lang a um`ae zemah lung`ae nynh vaekheihmawte a sia cih`ae,” cite a hopya`ae. ⁴¹ Te Jerusalem pe Jesu he a thua tuh khualae kha do zah kha-e elan a rah: ⁴² “Nang na kya-e daenaw te asekuhpaw uccaw`ae hynh namaw ccyh kya atunin, nang ccaccei nynh na ny lanze ahoy cih paw! Thuasalama atu khae` ae tuh na mit kyate thuru athua. ⁴³ Pawccecize na rhaw`ae nynh na pepan kya rhawhu ae sahkhaw cih`ae zah ki pali kyate nang kha varyn ae koih cih`ae. ⁴⁴ Namaw te na lungkhu e na ccaaw`ae kha laephi te phe ngingkuh lang ae nung cih oh. Te minmin nynh na kya lung ccangkheit vawlan ccangkheit akhanthykuh lante ae cciatawpah lan khyh`ae. Tuhe nin ccyh na tungvaw yn thua cih. Pawccemacize Pachia nynh nang ae paebuanaw ccyh kha na ny khyh keiccu,” a ci. ⁴⁵ Te tempal voidu lungkhu lang cceih zah tuin kya a zua`ae paw te a re`ae paw kha dee`ae zah, ⁴⁶ minmin kha, “ ‘Ka inn tuh sawsangnaw inn nynh thua,’ cite azeikuh; thuasalama nanning nynh miruh`ae karung lang phe na rae oh,” a cipya`ae. ⁴⁷ Te Jesu nynh nin takyhte tempal kya a ccangpya`ae. Thuasalama alepaw ranpibawi`ae te kawbya ccangpatu`ae te ccungccaw`ae kyaze lupi`ae nynh amaw kha chia lan a ccung`ae. ⁴⁸ Tuhzemah ccungccaw`ae balyn nynh amaw bya kha myarya a ngae ry`ae keiccuze, minmin nynh cyi khonaw muihkuh khyh`ae.

¹ Ou tuhcihte nin kheit tuh Jesu nynh tempal kya ccungccaw`ae kha ccangpah`ae zah thehoypaw a ho lyakhe, alepaw ranpibawi`ae te kawbya ccangpatu`ae tuh piccang`ae ryte oun thua`ae zah, ² amaw kha, “Paw kawhoinaw te mou e uccaw`ae hynh na cyi? Tukhyhze hung nynh mou hynh-e kawhoinaw hynh nang ae pya? Kaening oun hopya tua,” a ci`ae. ³ Te Jesu nynh minmin kha, “Kae mah bya ccangkheit kae khia cih oh zah nae hopah cih oh. ⁴ Johan kya-e baptisma kha vaawran kyate tou, tukhyhze ccungccaw`ae kyate tou?” cite a khia`ae. ⁵ Te minmin nynh mimaw te mimaw hokuh`ae zah, “Aening nynh, ‘Vaawran kyate,’ ah ci oh ze, aning nynh, ‘Pawccemou te amaw kha na zyn khyh oh?’ he oun ci cih. ⁶ Thuasalama, ‘Ccungccaw`ae kyate,’ ah ci oh ze, ccungccaw`ae balyn nynh lung te oun deih cih`ae, pawccecize minmin nynh Johan tuh profeh nynh thua cite a zyn`ae,” a ciku`ae. ⁷ Oute minmin nynh, “Paw kyate cipaw kae nyh khyh,” cite a ci`ae. ⁸ Te Jesu nynh, “Kae mah paw kawhoinaw te nynh e uccaw`ae hynh ka cyi cipaw kae hopah lan khyh oh,” a cipya`ae. ⁹ Oute Jesu nynh ccungccaw`ae kha hynh-e tousenaw phungpaw hynh a hopya`ae: “Ccungccaw lukheit nynh misu khokhu kha rae zah misu ryalahtu`ae kha a hohsaku`ae, te asawnaw ram lang khaw ro lang khua a ccung. ¹⁰ Te athae lo ccyh kya misu ryalahtu`ae nynh khokhu e misu thae abang kha oun pya ccaw`ae cite mih kalan ryalahtu lukheit a saw; thuasalama misu ryalahtu`ae nynh kha-e paw kha bua`ae zah kuih ccakaete a kisah`ae. ¹¹ Te ccangpaw ryalahtu kha bua a saw, te minmin nynh kha-e paw kha mah vaemaw phe mue lan bua`ae zah maethya kou um lang tua`ae zah kuih ccakaete bua a kisah`ae. ¹² Te luthungnaw bua a saw ki, te minmin nynh kha-e paw kha mah vaemaw phe mue lan bua`ae zah dae a vua`ae. ¹³ “Te khokhu hoitupaw nynh, ‘Pawtepei ka cyih cih? Ka sungsahpaw ka ccapaw nynh ka saw vae cih, minmin nynh amaw kha he oun muih vae`ae ze a saw poh tua kho`ae,’ a ci. ¹⁴ “Thuasalama misu ryalahtu`ae nynh amaw kha he a muih`ae tuh, ‘E paw tuh rhoccoutu nynh thua; rang oh, amaw kha theih oh sih lah a rho uccaw tuh ah kya-e lang a tang ccaw,’ cite mimaw laku a hokuh`ae. ¹⁵ Tukeiccu minmin nynh amaw kha khokhu kyate atolang dae vua`ae zah phe a chia`ae. Tukeiccu khokhu hoitupaw nynh minmin kha pawtemou a cyih cih`ae? ¹⁶ Khokhu hoitupaw tuh yn thua cih zah tuh-e misu ccoutu`ae kha phe theih cih`ae zah misu khokhu kha mingccang`ae kalan nynh a pya vae cih,” a ci. Te ccungccaw`ae nynh kha-e kha he a thae`ae tuh, “Tuhte tuh thua nan sah!” a ci`ae. ¹⁷ Te Jesu nynh minmin kha do`ae zah, “ ‘Lung-inn saktu`ae nynh a nue`ae paw lung tuh aki lang-e abapi huapaw lung lang oun tang,’ cite azeikuh paw kha pawmou a hory? ¹⁸ “Hunghung zemah kha-e lung vawlan a ccah paw tuh phe akinkuh cih; thuasalama hunghung zemah kha-e lung nynh a ccawthin paw tuh palae tui lang a mia cih,” a ci. ¹⁹ Tuh ccyh lya alepaw ranpibawi`ae te kawbya ccangpatu`ae nynh kha-e tousenaw phungpaw kha kaening nynh oun honua cipaw a nyku`ae keiccuze amaw kha kyng lan a ccung`ae; tuhzemah minmin nynh ccungccaw`ae raw a rih`ae. ²⁰ Te minmin nynh Jesu kha dokhaw`ae zah a hopaw a bya kha kyngpya khylan, te ram uktu thungnaw te kawhoinaw kalan ah khylan cite adingpaw ccungccaw`ae lang a tang`ae paw dophitu`ae kha amaw kalan a saw`ae. ²¹ Te dophitu`ae nynh Jesu kha, “Ccangpatupaw, nang tuh hmerarihlan na ho zah na ccangpya cipaw kae ny, ccungccaw laesanaw na hoi khyh, Pachia kya-e ccianaw kha hmerarihlan na ccangpya cipaw kae ny. ²² Kaening nynh Sizar kalan ngunto pya lan accan tou? Ccan khyh tou?” cite a khia`ae. ²³ Thuasalama Jesu nynh mih thyaruhnaw kha phe nyh zah minmin kha, “Pawccemou nae syntawtua oh? ²⁴ Denari kiakheit kha yn dosatua oh. Kha-e kya hung muinsan te hung kya-e ccawzeipyapaw mou a um?” a ci. Minmin nynh, “Sizar kya-e,” cite a khung`ae. ²⁵ Te Jesu nynh, “Sizar uccaw`ae kha Sizar kalan pya oh lah Pachia uccaw`ae kha Pachia kalan pya oh,” a cipya`ae. ²⁶ Te minmin nynh a bya kha ccungccaw`ae malang kyngpah kho khyh`ae, te a khung`ae paw bya kha mih ngaeangthua zah daetedae lang zya um`ae. ²⁷ Oute thothuinaw um khyh cite a ei`ae paw Sadusi`ae nynh Jesu kalan oun thua`ae zah amaw kha, ²⁸ “Ccangpatupaw, ‘Zu a hoi vae paw ccungccaw nynh ccaaw hoi leite phe a chi lanze, kha-e a upaw ciihan azo khyh nawlan a zu kha a neitapaw nynh a umkhae cih,’ cite Mawsi nynh kaening kha oun zeipya. ²⁹ Atu uteno lusari acih`ae paw a um`ae. Atawccapaw nynh zuhoi zah ccaaw saah leite phe a chih. ³⁰ Te luningnaw nynh kha-e nung kha a zu lang umkhae zah ccaaw leite phe bua a chih. ³¹ Te luthungnaw nynh kha-e nung kha bua a umkhae, te tuhhawte lusarinaw nynh mah a umkhae, te minmin tuh ccaaw saah leite phe chih kou`ae. ³² Tuh-e`ae balyn koute tuh-e nopinung mah phe a chih. ³³ Tukeiccu thothuinaw kya tuh-e nung tuh minmin lakuze hung zu lang mou a tang cih? Pawccecize lusari mawte kha-e nung kha zu lang phe a umkhae`ae,” cite a khia`ae. ³⁴ Te Jesu nynh minmin kha khung`ae zah, “Atu she e ccaaw`ae tuh zuvaw tang`ae zah zuvaw tangnaw a rae`ae. ³⁵ Thuasalama nyalang e she kha thuasah, te a chih`ae paw kyate thothuinaw kha thuasah ccou lan angaekuh cite tua athua`ae paw nynh tuh zuvaw tang vae khyh`ae zah zuvaw tangnaw mah rae vae khyh`ae. ³⁶ Minmin tuh kharyh chih kho vae khyh`ae, pawccecize minmin tuh vaaw ccungccaw`ae te nynh aloku vae`ae, thothuinaw ccaaw`ae athua vae`ae thyhte Pachia ccaaw`ae nynh athua vae`ae. ³⁷ Te a chih`ae paw a thothui`ae cipaw tuh Mawsi nynh Bawipaw kha, ‘Abraham Pachia, Isaak Pachia te Jakob Pachia,’ cite thabu kya a ko lyakhe phe a langsaku vae. ³⁸ Pawccecize Pachia tuh a chih`ae paw Pachia thua khyh, thuasalama a hiin`ae paw Pachia nynh thua, pawccecize ccungccaw balyn tuh amaw kya nynh a hiin`ae,” a ci. ³⁹ Oute kawbya ccangpatu`ae abang nynh tho`ae zah, “Ccangpatupaw, na ho paw kou ahoy,” a ci`ae. ⁴⁰ Tuhkoute tuh minmin nynh byakhia ngan vae khyh`ae. ⁴¹ Te Jesu nynh minmin kha, “Pawtemou kawbya ccangpatu`ae nynh Kri tuh David Ccapaw nynh thua a ci`ae? ⁴² - ⁴³ Te Sam Ccauh kya David amaw ccaccei nynh, ‘BAWIPAW nynh ka Bawipaw kha, “Na rhaw`ae kha na ccusy lang kae raepya makhia, nang tuh ka ranglang khe dahung,” a cipya,’ a ci. ⁴⁴ Tukeiccu David nynh Kri kha ‘Bawipaw’ cite a ko lanze, pawtemou aning tuh a Ccapaw athua cih?” cite a khia`ae. ⁴⁵ Oute ccungccaw`ae balyn nynh a thaenaw`ae khe, Jesu nynh a zuitu`ae kha, ⁴⁶ “Kawbya ccangpatu`ae kha raeringkuh oh. Minmin tuh uccaw ccuabalaepaw kikute innlaepae ry`ae zah kungkunaw kya sawtuate byabeihku a ry`ae, te sinakok`ae kya ahoy huaccepaw tungkhung`ae kya dahung ry`ae zah poi kya ahoy huaccepaw akhaan kya um a ry`ae. ⁴⁷ Minmin tuh numae`ae inn kha luade`ae zah cyisakuthya nawlan asaepi sawsang`ae; minmin tuh ale huapaw detahnaw kha a mue cih`ae,” cite a hopya`ae.

¹ Te Jesu nynh ngawdo zah mihoi`ae nynh sisua bung lungkhu lang mih lungsing`ae a sang`ae paw kha a muih. ² Te a ryachipaw numaenung lukheit mah tuh-e kya daw phuapia pianing a sang paw kha a muih. ³ Te Jesu nynh, “Byaccaccing kae hopya oh, hynh-e a ryachipaw numaenung nynh minmin balyn laeze alunghua a sang vae. ⁴ Pawccecize minmin balyn tuh mih hoirungpaw pataepi kya-e kha Pachia hanlan lungsing lang a sang`ae, thuasalama aning tuh a ryachi pite a vuekuaku nawlan a hoithypaw balyn kha marya a sang vae,” a ci. ⁵ Te ccungccaw abang nynh tempal tuh apuithyapaw lung`ae te a hlu`ae paw uccaw`ae ryte paccaan athua paw kong kha a ho`ae; te Jesu nynh, ⁶ “Hynh-e uccaw`ae atu na muih oh paw hynh lung ccangkheit vawlan ccangkheit san a khangthykuh paw um vae leite, marya tingsah bung ccyh yn thua cih,” a ci. ⁷ Te minmin nynh amaw kha, “Ccangpatupaw, tuh-e uccaw`ae tuh hotuhmou yn cyikuh cih? Te tuh-e uccaw`ae yn thua nin ccyh yn nae vae ze paw muihsanaw mou yn langkuh cih?” cite a khia`ae. ⁸ Te Jesu nynh, “Nanning ling na thua khyh nawlan oh la raeringkuh oh, pawccecize ccungccaw patae nynh ka min te oun thua cih`ae zah, ‘Kae tuh Kri nynh ka thua,’ cite te, ‘Accyh anae vae,’ oun ci cih`ae; tukeiccu minmin nuhlang la zuikuh nan oh. ⁹ Te nanning nynh rhawtukkunaw kong te rhawtukkunaw lanpaw kong kha na thae vae oh ze la rih nan oh, pawccecize hynh-e uccaw`ae tuh masaty yn thuaty cih, thuasalama athangnaw taloi thua la lan khyh,” a ci. ¹⁰ Oute Jesu nynh minmin kha, “Minphuin phuinkheit te phuinkheit, ram ramkheit te ramkheit yn rawkuh cih`ae. ¹¹ Te khyzawvawkaw kya myarya arupaw innruisuekunaw, ccakangnaw te khuarang ccinaw yn thua cih, te vaawran kyate ri lan um paw uccaw te alepaw muihsanaw yn langkuh cih. ¹² “Thuasalama tuh-e`ae balyn acyikuh maw, kae ka min keiccuze ccungccaw`ae nynh ae kyng cih oh zah ae tua ae sah cih oh, sinakok kalan ae cciakhae cih oh zah thunginn lungkhu lang ae phang cih oh, siapharan`ae te uktu`ae malang ae thuakhae cih oh. ¹³ Te tuh-e tuh nae hanlan ccaekia lan a tang cih. ¹⁴ Tukeiccu pawtemou kae khung cih cipaw na tuakuty khyh nawlan oh nae thinlung kya la rya ccavae sah. ¹⁵ Pawccecize nanning ae rawsetu oh paw balyn nynh a ei kho lei`ae paw te a khee kho lei`ae paw hawnaw te ho khonaw kha kae nynh kae pya cih oh. ¹⁶ Te nanning kha nungpaaw`ae, uteno`ae te vaeccaw`ae te ruiban`ae nynh ae phee cih oh, te nanning abang kha minmin nynh ae chiasah cih oh. ¹⁷ Te kae ka min keiccuze ccungccaw balyn nynh nanning kha ae hua cih oh. ¹⁸ Thuasalama nae lu kya-e nae sang ccangkheit sanmah roh lan khyh. ¹⁹ Na ngaesangnaw oh liate nae hiinnaw-muisaw kha mue oh. ²⁰ “Te Jerusalem khuapi kha rhawkaw`ae nynh a koih`ae paw he nae muih vae oh ze, kha-e ronaw tuh anae vae cipaw la nyh ccavae oh. ²¹ Oute Judah ram kya a um`ae paw nynh mua lang ccue`ae sah, te khuapi lungkhu a um`ae paw nynh pou`ae sah, te khua taraw kya um`ae paw nynh khuapi lungkhu lang tee nan`ae sah. ²² Pawccecize Ccathyaa kya azeikuh paw balyn accing nawlan tuh-e nin tuh ccaeliarunaw nin nynh athua. ²³ Tuh-e nin ccyh kya ccaawpoi paw te mateizu paw imua a hoi paw nopi`ae tuh paw ngaethya lan um babang! Pawccecize Judah ram kya alepipaw vawsawrunaw yn thua cih zah hynh-e ccungccaw`ae tungvaw bungpawnaw yn thua cih. ²⁴ Te minmin tuh ahepaw thaloi te khulia athua cih`ae zah minphuin balyn kalan see lang tang lan cciakhae athua cih`ae; te Jerusalem tuh Zenta`ae ccyh azaw mawlaezung Zenta`ae nynh a syde cih`ae. ²⁵ “Te khuanin kya, sawpaw kya te awsi`ae kya muihsanaw yn langkuh cih, te laephi vawlan minphuin`ae kya vawsawrunaw te muihsanaw oun um cih, rili te tuileih`ae oun tho cih. ²⁶ Laephi vawlan oun cyikuh lanpaw uccaw`ae kha ngaehoi paw te ccungccaw`ae thinlung tuh rinaw keiccuze thawzung oun thang cih; pawccecize vaawran kya-e thungnaw`ae tuh oun hy cih. ²⁷ Oute minmin nynh Ccungccaw Ccapaw tuh alepaw phu-enaw te thungnaw ryte maeking kya yn rung paw kha oun muih cih`ae. ²⁸ Te hynh-e uccaw`ae he yn cyiku takaw vae ze nae lu`ae kha hangthung oh lah dothung oh, pawccecize nanning sawkhawnaw tuh anae vae,” a cipya`ae. ²⁹ Te Jesu nynh minmin kha tousenaw phungpaw ccangkheit a hopya`ae: “Thaeku ku te thingku`ae balyn kha dotua oh. ³⁰ Anaw he yn toih paw kha na muih vae oh ze hawning ccyh tuh anae vae cipaw na ny oh. ³¹ Ou tuh-e hawte, hynh-e uccaw`ae yn cyikupaw he nae muih vae oh ze, Pachia peenaw tuh anae vae cipaw kha la nyh ccavae oh. ³² “Byaccaccing kae hopya oh, hynh-e uccaw`ae balyn acyiku kou makhia atu-e ccungccaw`ae zo lan khyh`ae. ³³ Vaawran te laephi tuh azo cih, thuasalama ka bya`ae tuh zo lan khyh. ³⁴ “Te naemaw te naemaw kha la raeringkuh oh, tukhyh lanze ccyhkhakheit kya, eih rui lan niapaw te, ruinaw te, hynh-e hiinnaw elan thinphangnaw te nae thinlung tuh a vawsaw cih, te tua lei pite tuh-e Nin tuh nae tungvaw yn thua cih. ³⁵ Pawccecize laephi vawlan khaleih kya a um paw ccungccaw balyn tungvaw khe kaang hawte tuh-e Nin tuh yn thua cih. ³⁶ Tukeiccu nanning tuh yn thua vae cih paw hynh-e uccaw`ae balyn kyate lue lan angaekuh`ae paw na thua nawlan oh, te Ccungccaw Ccapaw malang thadyn lan angaekuh`ae paw na thua nawlan oh zungzae sawsang oh lah la ngaw oh,” a ci. ³⁷ Oute khuadae ccyh kya Jesu nynh tempal kyakhe a ccangpya`ae, te khuazi ccyh kya pou zah Oliv acikuh paw mua kyakhe a rya. ³⁸ Te awkhua takawte ccungccaw`ae balyn nynh amaw bya kha ngae khylan amaw kalan tempal voidu lungkhu lang oun thua`ae.

¹ Te Kawtaw Poi a ci`ae paw, Ransi py leipaw Sanlou Poi tuh anae vae. ² Te alepaw ranpibawi`ae te kawbya ccangpatu`ae nynh ccungccaw`ae raw a ri`ae keiccuze Jesu kha pawtemou chia lan cipaw a ccung`ae. ³ Te Setan nynh locceihtu luhaw laening kyaze lukheit athuabua paw Judas Iskaria lungkhu langkhe a tee. ⁴ Te kha-e paw nynh alepaw ranpibawi`ae te tempal ngawtu`ae kalan cceih zah Jesu kha pawtemou kae phee cih cipaw minmin kha bya hokhae`ae. ⁵ Te minmin tuh mih lungtua zah phua kae pya cih cite byakinpyaku`ae. ⁶ Te aning nynh mah byakinkuh zah ccungccaw zapi a um khyh`ae lyakhe Jesu kha minmin kalan ah khylan ccyhhoypaw kha a ccungku vae. ⁷ Oute Kawtaw Poi elan tuutaw chia lan accan nin Ransi py leipaw Sanlou Poi nin ccyh tuh a thua vae. ⁸ Te Jesu nynh Piter te Johan kha, “Aening ah ae ccaw oh, la cceih oh lah Kawtaw Poi kha ah hanlan la paccyn oh,” cite hopah`ae zah a saw`ae. ⁹ Te minmin nynh amaw kha, “Pawkyamou nae paccynsah ry?” cite a khia`ae. ¹⁰ Te Jesu nynh, “Dotua oh, khua lungkhu lang he na tee oh te tui re yn phu paw ccungccaw lukheit nynh ae la tungkuh cih oh, aning nynh a teenaw inn lungkhu lang amaw kha la zui oh. ¹¹ Te nanning nynh inn hoitu kha, ‘Ccangpatu nynh ka zuitu`ae ryte Kawtaw Poi kae aenaw lanpaw mikhia khaan tuh teisangmou a um? ae ci,’ cite la hopah oh. ¹² Te aning nynh phe paccynty paw akopaw palung khaan kha ae la muihsah cih oh, tuin kyakhe la paccyn oh,” a cipya`ae. ¹³ Te minmin nynh cceih`ae zah Jesu nynh mih kya a hopya`ae hawte a muih`ae, te minmin nynh Kawtaw Poi dangkunaw kha a paccyn`ae. ¹⁴ Te accyh he azawte Jesu tuh locceihtu luhaw laening ryte ccaboi kya a dahung`ae. ¹⁵ Te Jesu nynh minmin kha, “Ka teing maw hynh-e Kawtaw Poi hynh nanning ryte aekheih lan myarya ka peki. ¹⁶ Pawccecize, nanning kae hopya oh, Pachia peenaw kya Kawtaw Poi accing makhia e poi hynh ka ae boi vae lan khyh,” a cipya`ae. ¹⁷ Te banang kha laah zah lungtuabya a ho koute, “E banang hynh lawkuh oh lah naemaw kha neekuh oh. ¹⁸ Pawccecize nanning kae hopya oh, Pachia peenaw yn thua makhia cia, misutui kya-e niapaw hynh ka neih vae lan khyh,” a ci. ¹⁹ Te sanlou kha laah zah lungtuabya a ho, te eih zah minmin kha pya`ae zah, “E tuh nanning hanlan pya paw ka pyn nynh thua, kamaw liathui nawlan e hynh mang oh,” a ci. ²⁰ Tuhhawte zerya a ae`ae koute, banang kha mah lah zah, “E banang tuh nanning hanlan luasah paw ka chiise kya-e byakin thawpaw nynh thua. ²¹ Thuasalama, dotua oh, kamaw yn ahtupaw kuih tuh ccaboi vawlan kamaw ryte a pukheih. ²² Te laerui-awde athua vae thyhhawte Ccungccaw Ccapaw tuh a cceih ccaccing cih; thuasalama Ccungccaw Ccapaw a pheetupaw tuh paw ngaethya lan um babang!” a ci. ²³ Te zuitu`ae nynh hynh-e uccaw tuh hung nynh mou yn cyih vae cih cipaw mimaw te mimaw laku oun khiakuh vae`ae. ²⁴ Te zuitu`ae laku hungmou alehua lang tua athua cih cite mimaw kya eikunaw mah a um. ²⁵ Te Jesu nynh minmin kha, “Zenta siapharan`ae nynh uknaw kaw te a uk`ae, te mih tungvaw kawhoinaw a langsakutu`ae paw kha hoynaw oun raepatu cite a ko`ae. ²⁶ Thuasalama nanning tuh tuhte na cyih lan khyh oh; thuasalama nanning laku ale huapaw ccungccaw tuh ano huapaw hawte thua sah; te cciakhaetu athua paw nynh ryalawpatu hawte thua sah. ²⁷ Pawccecize aepaw a koih paw ccungccaw tou alehua? Tukhyhze a thohae paw tou alehua? Aepaw a koih paw alehua khazaw? Thuasalama kae tuh nanning laku a thohae paw hawte nynh ka thua. ²⁸ Nanning tuh tuh-ounaw ka tungnaw kya kamaw ryte po na umbua oh paw nynh na thua oh. ²⁹ Te ka Paaw nynh peenaw ccangkheit yn pya hawte, kae nynh nanning kha peenaw kae pya oh. ³⁰ Ka peenaw kya, ka ccaboi kya nanning nynh na ae bua, na nia bua nawlan oh, te Israel phin haw laening kha byapiate suitungkhung vawlan na dahungbua nawlan oh kaw kae pya oh,” a cipya`ae. ³¹ Te Bawipaw nynh, “Simon, Simon, dotua, chanvui kha pasaryh te ryh hawte nanning kha ryh lan Setan nynh ae peki oh. ³² Thuasalama na zynnaw aro khyh nawlan na hanlan saw kae sangpah; te ka kalan nae paleihku vae ze na uno`ae kha varyn la tynsah`ae,” a cipya. ³³ Te Piter nynh amaw kha, “Bawipaw, namaw ryte tuh thunginn lungkhu lang thuasah, chinaw kalan thuasah ccia lan paccynkute ka um,” a cipya. ³⁴ Te Bawipaw nynh, “Piter, nang kae hopya, nang nynh kamaw hynh ka nyh khyh cite vaethung nae vua maw, atunin awkhungpaw yn khua la lan khyh,” a cipya. ³⁵ Te Jesu nynh zuitu`ae kha, “Phuabu, sohrae, ccukoh phuku leite nanning kae saw lya oh kha, ccangkhakheit na ho na bou oh paw um tou?” cite a khia`ae. Te minmin nynh, “Pawsang um khyh,” a ci`ae. ³⁶ Oute Jesu nynh minmin kha, “Thuasalama atu tuh phuabu a hoi paw nynh kha-e kha ccyngkuh sah lah sohrae a hoi paw mah tuhhawte ccyngkuh sah, te thaloi a hoi leipaw nynh a uccaw kha zua sah lah thaloi kha rekuh sah. ³⁷ Pawccecize, nanning kae hopya oh, ‘Aning tuh kawbya zui leitu`ae ryte riakheih athua,’ cite azeikuh paw tuh kamaw tungvaw yn ccing cih, pawccecize ka konglang te asekuhpaw uccaw`ae tuh accing cih,” a cipya`ae. ³⁸ Te minmin nynh, “Bawipaw, dotua, e kya thaloi zung ning a um,” a ci`ae. Te Jesu nynh minmin kha, “Azaw vae,” a cipya`ae. ³⁹ Te Jesu tuh yn pou zah leih a cyi hawte, Oliv Mua lang a cceih, te a zuitu`ae nynh mah amaw kha a zui`ae. ⁴⁰ Te ahmin kya he a thua tuh, minmin kha, “Nanning tuh-ounaw lungkhu lang na tee khyh nawlan oh sawsang oh,” a cipya`ae. ⁴¹ Te minmin kyate lung oi khing loukaw asawnaw langkhe phiatawkuh`ae zah ccukharutung zah sawsang paw tuh: ⁴² “Apang, na rynaw athua ze, hynh-e banang hynh ka kyate oun lawpah; tuhzemah kamaw rynaw thua leite, namaw rynaw kha cyikuh sah,” a ci. ⁴³ Te vaawran langte vaaw ccungccapaw nynh amaw kalan yn langkuh zah amaw kha thawzung a pya. ⁴⁴ Te myarya a lungriathae pawte aning tuh thawmawte houh sawsang; te a vaesaw tuh laephi kalan accah paw chii hawte nynh thua. ⁴⁵ Te sawsangnaw kyate thokuh zah a zuitu`ae kalan he a thua tuh mih ngaethyanaw keiccuze minmin a i`ae paw kha a muih. ⁴⁶ Te minmin kha, “Pawccemou nanning na i oh? Tuh-ounaw lungkhu lang na tee khyh nawlan oh, tho oh lah sawsang oh,” a cipya`ae. ⁴⁷ Te tuhte a ho cciamang lyatuin dotua, ccungccaw zapi oun thua`ae, te luhaw laening kyaze lukheit athua paw, Judas acihkuh paw nynh minmin kha oun cciakhae`ae zah Jesu kha myng lan amaw kalan yn naeku. ⁴⁸ Thuasalama Jesu nynh, “Judas, Ccungccaw Ccapaw hynh nang nynh myngte tou na phee?” cite a khia. ⁴⁹ Te Jesu ryte um`ae paw nynh yn cyikuh lanpaw kha he a muih`ae tuh, Jesu kha, “Bawipaw, kaening nynh thaloi te kae bae cih`ae tou?” cite a khia`ae. ⁵⁰ Te lukheitpaw nynh ranpibawi paw a seepaw kha thoh bae zah a ranglang nakua thoh apae. ⁵¹ Te Jesu nynh tho zah, “Azaw vae,” a ci. Te Jesu nynh kha-e paw a nakua kha hae zah a dansah. ⁵² Oute Jesu nynh amaw kalan oun thua`ae paw alepaw ranpibawi`ae, tempal ngawtu`ae, te piccang`ae kha, “Miruhpaw kyng lan a ci`ae hawte thaloi ry tungbang ryte tou nae ccianua oh? ⁵³ Tempal kya nanning ryte nin takyh ka um he lyaze kamaw kha kyng lan na zuakuh khyh oh; thuasalama atu tuh nanning ccyh te mohnaw kya-e kawhoinaw ccyh nynh athua,” a cipya`ae. ⁵⁴ Oute minmin nynh Jesu kha kyng`ae zah ranpibawi lupi paw inn langkhe a cciakhae`ae. Te Piter nynh asawpi te a zui. ⁵⁵ Te minmin nynh inn maepaw angaelung kyakhe maee tua`ae zah pynkheihlan he a dahung`ae tuh Piter mah minmin laku a dahungbua. ⁵⁶ Te Piter nynh maee pe a dahung paw kha ryalawpatu liaccanung nynh he a muih tuh ahoy mawte do zah, “E paw mah Jesu ryte a mungkuh`ae paw nynh thua,” a ci. ⁵⁷ Te Piter nynh, “Nopinung, amaw kha ka nyh khyh,” cite Jesu kha a vua. ⁵⁸ Te khuekheih aro koute mingccangpaw nynh Piter kha muih zah, “Nang mah minmin kya a umbua paw nynh na thua,” a cipya. Te Piter nynh, “Ccungccapaw, ka thua khyh!” a ci. ⁵⁹ Te suimilan ccangkheit loukaw aro koute mingccangpaw lukheit nynh, “Thanccingte e paw mah Jesu ryte a mungkuh`ae paw nynh thua, pawccecize aning tuh Galileepaw nynh thua,” cite zynkute a ho. ⁶⁰ Te Piter nynh, “Ccungccapaw, paw nynh na ho cipaw ka nyh khyh,” a ci. Te tuhte a ho cciamang lya, vaekheihmawte awkhungpaw a khua. ⁶¹ Te Bawipaw nynh maeleihkuh zah Piter kha a do. Te, ‘Awkhungpaw a khua mawze, nang nynh vaethung nae vua cih,’ cite Bawipaw nynh a hopya paw bya kha Piter nynh a liathui vae. ⁶² Te Piter tuh atolang pou zah thawmawte a rah. ⁶³ Te Jesu a kyng`ae paw ccungccaw`ae nynh amaw kha sarya`ae zah a bua`ae. ⁶⁴ Te minmin nynh a mae kha phang bong`ae zah a mae kya a bia`ae, te, “Nang ae bia paw hynh hungmou? Hotua!” cite a khia`ae. ⁶⁵ Te minmin nynh amaw kha sarisarya lante ccangpaw uccaw kong patae a honua`ae. ⁶⁶ Te khua he adae tuh, ccungccaw piccang`ae, alepaw ranpibawi`ae te kawbya ccangpatu`ae nynh sueluakuh`ae zah Jesu kha kungsi zung lungkhu lang cciakhae`ae zah, ⁶⁷ “Nang tuh Kri na thua lanze oun hopah,” a ci`ae. Te Jesu nynh minmin kha, “Nanning kha kae hopya oh ze, na zyn lan khyh oh. ⁶⁸ Te kae nynh mah kae khia oh ze, nae khung lan khyh oh zah saw mah nae saw lan khyh oh. ⁶⁹ Thuasalama atu koute Ccungccaw Ccapaw tuh Pachia kya-e thungnaw ranglang kya nynh a dahung vae cih,” a cipya`ae. ⁷⁰ Oute minmin balyn nynh, “Tuhte lanze nang tuh Pachia Ccapaw tou?” a ci`ae. Te Jesu nynh, “Ka thua cipaw na ho oh latu,” a cipya`ae. ⁷¹ Te minmin nynh, “Paw ccaekia mou ahopaw a um ung? Pawccecize amaw a khalang kya-e aening ccaccei nynh phe ah thae vae oh,” a ci`ae.

¹ Te ccungccaw zapi khaleih nynh thokuh`ae zah Jesu kha Pilat kalan a cciakhae`ae. ² Te minmin nynh tho`ae zah, “E paw nynh ah minphuin phe a cciakhaesei paw kha kae muih, te Sizar kalan ngunto pya lan a khee, amaw te amaw hynh Kri, Siapharan nynh ka thua a ciku,” cite amaw kha seibe`ae. ³ Te Pilat nynh, “Nang hynh Jew`ae Siapharan na thua tou?” cite Jesu kha a khia. Te Jesu nynh khung zah, “Na ho hawte nynh thua,” a ci. ⁴ Oute Pilat nynh alepaw ranpibawi`ae te ccungccaw`ae kha, “E Ccungccapaw nynh a cyiseimenaw ka muih khyh,” a cipya`ae. ⁵ Te minmin tuh mih thin houh khykuh zah, “Aning nynh Galilee kyate tho zah hynh-e hmin kyacia, Judah ram balyn po ccangpah`ae zah ccungccaw`ae kha lungtho lan a hy`ae,” a ci`ae. ⁶ Pilat nynh Galilee cipaw he a thae tuh tuh-e paw tuh Galileepaw thua ta thua khyh ta cipaw a khia. ⁷ Herod kawhoinaw zakaw kya a um paw nynh thua cipaw ccahe a nyh tuh, Jesu kha Herod kalan a saw; tuh-e ccyh lya Herod mah Jerusalem kya nynh a um. ⁸ Te Herod nynh Jesu kha he a muih tuh myaryamaw a lungtua, pawccecize Jesu konglang kha patae thae vae zah langmawpi te Jesu kha muih lan a ry vae paw nynh thua; te Jesu nynh a rae paw muihsanaw ccangkhakheit kha muih lan a ngaehoi. ⁹ Oute Herod nynh Jesu kha bya patae a khia; thuasalama Jesu nynh kaw kheit san khung khyh. ¹⁰ Te alepaw ranpibawi`ae te kawbya ccangpatu`ae nynh thadyn`ae zah Jesu kha thawmawte seibe`ae. ¹¹ Te Herod te a rhawkaw`ae nynh Jesu kha pawlangria leite a sarya`ae, te lyccaccupaw uccaw kha lawsakuh`ae zah Pilat kalan bua a saw`ae. ¹² Te tuh-e nin ccaccei kya Pilat te Herod tuh hoyccaw lang a tang`ae; pawccecize langmaw tuh lukheit te lukheit a la rhawkuh`ae paw nynh thua. ¹³ Te Pilat nynh alepaw ranpibawi`ae, uktu`ae te ccungccaw`ae kha pynkheihlan ko`ae zah, ¹⁴ “Nanning nynh e Ccungccapaw hynh ccungccaw`ae a cciakhaeseipaw hawte ka kalan nae cciakhae oh; te dotua oh, nae malang khe akaw-aleih bya ka khia zah nanning nynh sei na be oh paw konglang te hynh-e Ccungccapaw kya seimenaw ka muih khyh. ¹⁵ Herod nynh mah muih khyh, pawccecize Herod kalan nanning kae sawsah vae oh; te dotua oh, chi lan accanpaw Jesu nynh a cyi paw kharyh um khyh. ¹⁶ Tukeiccu amaw hynh de ka tah cih zah ka luesah cih,” a cipya`ae. ¹⁷ Pawccecize tuh-e Kawtaw Poi kya ccungccaw`ae kalan lukhakheit kha a sawpya aho. ¹⁸ Te minmin balyn nynh, “E Ccungccapaw tuh theih lah kaening kalan Barabbas kha oun sawpah,” cite vaekheihmawte a sia`ae. ¹⁹ Tuh-e Barabbas tuh khualae kya rhawkunaw a rae keiccu, te ccungccaw a chia keiccuze thung a ccah paw nynh thua. ²⁰ Te Pilat nynh Jesu kha a luesah ry keiccuze minmin kha bua a hopya`ae. ²¹ Thuasalama minmin nynh, “Amaw kha khiade, khiade!” cite a sia`ae. ²² Te Pilat nynh minmin kha, “Pawccemou? Paw hoyleinaw mou a rae? Chinaw aphah paw seimenaw amaw kya ka muih khyh, tukeiccu amaw hynh de kae tah sah lah kae luesah,” cite vaethungnaw bua a ci. ²³ Thuasalama minmin nynh Jesu tuh khiade thuasah cite roi accae lante thawmawte a ngia`ae. Te minmin roi te alepaw ranpibawi`ae roi nynh phe a tae. ²⁴ Te Pilat nynh minmin nynh a ngia`ae hawte thuasah cite bya a pae. ²⁵ Te khualae rhawkunaw a pousah keiccu te ccungccaw chianaw keiccuze thung a ccah paw, minmin nynh a ngiaku`ae paw kha Pilat nynh a sawpya`ae; thuasalama Jesu kha mih rynaw kalan a ah. ²⁶ Te minmin nynh Jesu kha he cciakhae`ae tuh, khua taraw langte yn cceih paw, Sairin ram e paw Simon acikuh paw kha kyng`ae zah a tungvaw khe vaelantung kha khang`ae zah Jesu nuhlang te a puihsah`ae. ²⁷ Te ccungccaw aphupi nynh amaw kha a zui`ae; te amaw elan a rah a khui`ae paw nopi`ae mah a um`ae. ²⁸ Thuasalama Jesu nynh minmin kalan maeleihkuh zah, “Jerusalem ccanung`ae, kae ka hanlan rah nan oh, thuasalama naemaw hanlan te nae ccaaw`ae hanlan palia rah oh. ²⁹ Pawccecize, dotua oh, ‘Atinpaw, ccaawsaah boi leipaw vue`ae te imua nynh a zu boi leipaw matei`ae tuh hythuaccou`ae paw nynh thua,’ cite oun ho cih`ae paw nin`ae tuh yn thua cih. ³⁰ Oute minmin nynh, mua`ae kha, ‘Kaening hynh oun tingthin oh,’ oun cipah cih`ae zah mua taraw`ae kha, ‘Kaening hynh oun nethin oh,’ oun cipah cih`ae. ³¹ Pawccecize, ahinpaw thingku kya hynh-e uccaw`ae hynh minmin nynh a cyi`ae lanze aroupaw thingku kya pawmou acyikuh cih?” a ci. ³² Te ccungccahoy lei`ae luning kha mah Jesu ryte chia khylan a cciakhae bua`ae. ³³ Te Kalvari acikuh paw ahmin kya he a thua`ae tuh, tuin kya Jesu ryte tuh-e ccungccahoy lei`ae kha, a ranglang lukheit, a voilang lukheit a khiade`ae. ³⁴ Oute Jesu nynh, “Apang, minmin hynh ngaethya`ae, pawccecize paw nynh kae cyi cipaw nyh khyh`ae,” a ci. Te minmin nynh ccungthy dung`ae zah a uccaw kha a neeku`ae. ³⁵ Te ccungccaw`ae tuh phang dote a thadyn`ae. Te minmin ryte uktu`ae nynh mah nuinse`ae zah, “Aning nynh ming`ae kha a khum`ae; aning tuh Pachia nynh popaw Kri athua lanze amaw te amaw kha khumkuh sah,” a ci`ae. ³⁶ Te rhawkaw`ae nynh mah amaw kha a sarya`ae, amaw kalan oun cceih`ae zah misutui ariapaw kha pya`ae zah, ³⁷ “Nang tuh Jew`ae Siapharan na thua ze, namaw te namaw kha khumkuh tua,” a ci`ae. ³⁸ Te, “E PAW TUH JEW‘AE SIAPHARAN NYNH THUA,” cite Greek, Latin, Hebru ccaw te ccawzeipyapaw kha mah a luki khe a tawpya`ae. ³⁹ Te ccungccahoy lei`ae luning lakuze lukheitpaw nynh, “Nang tuh Kri na thua ze namaw te namaw kha khumkuh lah kaening hynh mah yn khum,” cite Jesu kha sarisarya a ci. ⁴⁰ Thuasalama lukheitpaw nynh kha-e paw kha khung zah, “Nang tuh e paw te phe alokuhpaw detahnaw kya mang na um pite Pachia raw na rih khyh tou? ⁴¹ Aening tuh ah cyisahnaw thyhte angaekuh lante amee ah mue paw thua zah accanpaw nynh thua; thuasalama e Ccungccapaw tuh pawsang mah a cyisei paw um khyh,” cite a pe. ⁴² Te aning nynh Jesu kha, “Bawipaw, na peenaw lungkhu lang he na thua vae ze kae hynh oun ning nan vae ii,” a cipya. ⁴³ Te Jesu nynh, “Byaccaccing kae hopya, atunin nang tuh kamaw ryte Paradis kya na umbua vae cih,” a cipya. ⁴⁴ Te tuh-e ccyh tuh ninthu suimilan haw laening loukaw thua zah zete suimilan ccangthung cia laephipi balyn tuh pung amoh. ⁴⁵ Te khuanin phe amoh; te tempal kya zokhawpaw boei tuh zung ning lang aseikuh. ⁴⁶ Te Jesu nynh thawte a sia koute, “Apang, ka muisaw hynh na kuih kya kae ah,” a ci. Tuhte he a ho koute a hy athang. ⁴⁷ Acyikuh paw kha rhawbawipaw nynh he a muih tuh, “Thanccingte, e paw tuh adingpaw Ccungccaw nynh thua!” cite Pachia kha phu-esah. ⁴⁸ Te tuh-e kya a thua paw ccungccaw`ae balyn nynh, khe kya acyikuh paw balyn kha do`ae zah mih by kha tukuh`ae zah a ki`ae. ⁴⁹ Te amaw ryte a nyhkuh`ae paw balynte Galilee kyate amaw oun zui`ae paw nopi`ae tuh asawpi langkhe thadyn`ae zah acyikuh paw kha a do`ae. ⁵⁰ Te dotua oh, Josef acikuh paw, kungsi memba lukheit um zah aning tuh ahoypaw te adingpaw ccungccaw nynh thua. ⁵¹ Aning tuh kungsi memba`ae khuakhannaw te cyisahnaw kya a nawccahbua khyh; Jew`ae khuapi, Arimathia khua paw thua zah amaw mah Pachia peenaw a ngaehoi paw nynh thua. ⁵² E paw nynh Pilat kalan cceih zah Jesu rhua kha a ngiaku. ⁵³ Te Jesu rhua kha sahbung zah boeirawpaw te a lung, te lung kya a karyn`ae paw, hung ccungccaw sanmah a ccynaw boi lei`ae paw, shawkhu kyakhe a ccy. ⁵⁴ Te tuh-e nin tuh Paccynku nin thua zah Sabbath nin thuanaw anae vae. ⁵⁵ Te Galilee kyate amaw ryte oun cceihkheih`ae paw nopi`ae mah zuikuh bua`ae zah a rhua kha pawcihte nynh a ccy`ae cipaw shaw kyakhe phe a dobua`ae. ⁵⁶ Te minmin tuh ki`ae zah amynthuapaw zimuin te mynkhuhpaw satho kha a paccyn`ae. Te kawpyapaw thyhte Sabbath nin kya tuh a hae-ung`ae.

¹ Te lonaw nawkheit kyaze masaty nin awkhua takaw khe, tuh-e nopi`ae tuh ccangpaw nopi`ae ryte, a paccyn`ae paw amynthuapaw kha ccyng`ae zah shaw kalan khe a cceih`ae. ² Te minmin nynh shaw kyate lung a nuekuh paw kha a muih`ae. ³ Te minmin nynh a lungkhu lang tee`ae zah Bawipaw Jesu rhua kha muih vae khyh`ae. ⁴ Ou tuhte minmin tuh tuh-e konglang myarya mih ngaeangthua lyakhe, dotua oh, phaephae ahpaw uccaw a lawkuh`ae paw ccungccaw luning tuh mih pe khe a thadyn`ae. ⁵ Te nopi`ae tuh rih`ae zah laephi kalan mih mae phang a tebing`ae lyakhe, tuh-e`ae nynh, “Pawccemou a chih`ae paw laku khe a hiinpaw kha nanning nynh na ccung oh? ⁶ Aning tuh e kya um vae khyh, phe a tho vae! Galilee pe kya a um lyaze nanning ae hopya oh paw, ⁷ ‘Ccungccaw Ccapaw tuh misei`ae kuih kalan pya athua cih zah khiade athua cih, te nin thungnaw kya bua a tho cih,’ a cipaw kha liathuitua oh,” cite a hopya`ae. ⁸ Te nopi`ae nynh a bya kha a liathui vae`ae. ⁹ Te shaw kyate ki`ae zah hynh-e uccaw`ae balyn kha luhaw laekheit kalan te tuhlaepaw zuitu`ae balyn kalan a hopya`ae. ¹⁰ Hynh-e uccaw`ae kong locceihtu`ae kalan a hopah`ae paw tuh: Meri Magdalin, Joanna, James a nung Meri, te minmin ryte a um`ae paw ccangpaw nopi`ae nynh thua`ae. ¹¹ Te mih bya`ae kha phungpaw huataw olante tua`ae zah locceihtu`ae nynh zyn khyh`ae. ¹² Thuasalama Piter tuh thokuh zah shaw kalan khe a ccue; te baling zah arawpaw uccaw amaw te a um paw kha a muih, te acyikuh paw kha a ngaeangthua zah a inn lang phe a ki. ¹³ Te dotua, zuitu`ae luning tuh tuh-e nin kya Jerusalem kyate me sari loukaw asawpaw Emmaus acikuh paw khua langkhe a cceih`ae. ¹⁴ Te minmin tuh acyikuh paw uccaw`ae balyn kong kha lukheit te lukheit a hokuh`ae. ¹⁵ Te ou tuhte minmin nynh pynkheihlan byaruakute byahoku`ae lyakhe, Jesu tuh yn naekuh zah minmin ryte a cceihbua. ¹⁶ Thuasalama mih mit tuh phang khaw thua zah amaw kha nyh khyh`ae. ¹⁷ Te Jesu nynh minmin kha, “Na cceih lalia lang oh te lukheit te lukheit na hoku oh paw nae bya tuh pawtecihpaw mou? Pawccemou nae ngae a thya?” cite a khia`ae. ¹⁸ Te minmin kyaze Klopas acikuh paw nynh khung zah, “Nang hynh Jerusalem kya mikhia tou hung na thua, te atu loukaw tuin kya acyikuh paw uccaw`ae kha na nyh khyh tou?” a ci. ¹⁹ Te Jesu nynh minmin kha, “Paw uccaw`ae mou?” cite a khia`ae. Te minmin nynh, “Nazareth paw Jesu kong. Aning tuh Pachia malang te ccungccaw balyn malang cyisahnaw kya te bya kya athungpaw Profeh nynh thua. ²⁰ Te amaw kha alepaw ranpibawi`ae te kaening oun uktu`ae nynh a chi ccaw cite seibe khylan ah`ae zah phe khiade`ae. ²¹ Thuasalama aning tuh Israel`ae kha oun sawkhaw vae cih paw nynh thua cite kaening nynh kae la ngaehoi; te hynh-e balyn laeze hynh-e uccaw`ae acyikunaw te atunin hynh nin thungnaw nynh thua. ²² Te kaening kae phu kya-e, awkhua takawte shaw kalan a thua`ae paw, nopi`ae abang nynh kae ngaeang oun thuasah`ae. ²³ Minmin nynh a rhua kha he muih vae khyh`ae tuh oun ki`ae zah Jesu tuh phe a hiin vae cite a hopah`ae paw vaaw ccungccaw`ae kya-e vizin kha mah kae muih cite oun hopya`ae. ²⁴ Te kaening ry a um`ae paw abang nynh shaw kalan khe cceih`ae zah nopi`ae nynh a ho`ae hawkhate a muih`ae; thuasalama Jesu tuh muih khyh`ae,” cite a hopya`ae. ²⁵ Oute Jesu nynh minmin kha, “Pou mingaee`ae, profeh`ae nynh a hosya`ae paw balyn zyn lan thinlung khysung`ae paw! ²⁶ Kri tuh hynh-e uccaw`ae hynh teing lan te a phu-enaw lungkhu lang tee lan ccan khyh tou?” a cipya`ae. ²⁷ Te Mawsi kyate tho zah Profeh`ae balyn nynh azei`ae paw, amaw kong te asekuhpaw Ccathyaa balyn kha minmin kalan ccaeteccae lang a hopya`ae. ²⁸ Te minmin a ccianaw lang`ae khua kya vyavya a thua`ae tuh, Jesu tuh po suhlue lan acih paw hawte a umsaku. ²⁹ Thuasalama minmin nynh, “Kae kya umbua hin, pawccecize khuanin vyavya nae vae, khua yn zi vae cih,” cite thawmawte a kang`ae. Te aning tuh minmin ryte um lan a teebua. ³⁰ Te ou tuhcihte minmin ry ccaboi kha ccahe a koih`ae tuh Jesu nynh sanlou kha laah zah hythua a pya, te eih zah minmin kha a pya`ae. ³¹ Te mih mit tuh oun aw vae zah amaw kha a ny vae`ae; te aning tuh mih muihnaw kyate phe azo. ³² Te minmin nynh, “Laanpi kya aening bya oun hopya lya te Ccathyaa oun ccaesapya lya kha aening ah thinlung kya u mawte oun u khazaw?” cite lukheit te lukheit a hokuh`ae. ³³ Te tuh-e suimilan ccyh kya minmin tuh thokuh`ae zah Jerusalem lang a ki`ae; te luhaw laekheit te minmin ryte pynkheihlan a sueluakuh`ae paw, ming`ae kha a muih`ae. ³⁴ Tuh-e`ae nynh, “Bawipaw tuh phe a thothui ccaccing vae, te Simon kalan phe a langkuh vae!” a ci`ae. ³⁵ Te minmin nynh laanpi kya acyikuh paw uccaw`ae kong te sanlou a ia lya minmin nynh amaw a ny`ae paw kong kha a ho`ae. ³⁶ Te tuhte minmin nynh a ho`ae lyakhe Jesu amaw ccaccei tuh minmin ngaelaku khe thadyn zah minmin kha, “Daenaw nae kya um sah,” a cipya`ae. ³⁷ Thuasalama minmin nynh khozithurae hynh sang phe kae muih vae cite tua`ae zah ohsikuh`ae zah a rih`ae. ³⁸ Te Jesu nynh minmin kha, “Pawccemou nae lungvawsaw? Pawccemou nae thinlung kya lunghiinnaw a um? ³⁹ Ka kuih te ka ccu hynh dotua oh! Kamaw sou ka thua, oun haetua oh lah oun dotua oh; pawccecize muisaw nynh tuh, kae nynh ka hoi paw na muih oh hawte, ngesaw te ru`ae hoi khyh,” a cipya`ae. ⁴⁰ Te tuhte he a ho koute, a kuih te a ccu kha a dosah`ae. ⁴¹ Te minmin tuh mih ngaeangthua zah mih lungtua keiccu a zyn kho la khyh lya`ae khe, Jesu nynh, “E kya ae lanpaw ccangkhakheit na hoi oh tou?” cite a khia`ae. ⁴² Te minmin nynh aruakuhpaw ngasaw pae kheit te khoilutui kha a pya`ae. ⁴³ Te Jesu nynh kha-e kha lawkuh zah mih malang khe a ae. ⁴⁴ Te Jesu nynh minmin kha, “Mawsi Kawbya kya thuasah, Profeh`ae ccauh kya thuasah, Sam kya thuasah kamaw te asekuh lante azeikuh paw miakaw tuh marya accing hahe cih cite nanning ryte ka um lyaze nanning kae hopya oh paw bya`ae tuh hynh-e`ae hynh nynh thua,” a cipya`ae. ⁴⁵ Oute minmin nynh Ccathyaa kha a thaethya ccaw`ae cite mih thinlung-tuanaw kha a hungpya`ae. ⁴⁶ Te minmin kha, “Hynhte azeikuh, te hynhte Kri tuh a teing ho zah nin thungnaw kya a chih`ae paw kyate a thothui aho. ⁴⁷ Te ngaesikunaw te seinaw`ae ngaethyanaw tuh Jerusalem kyate tho ngaw zah minphuin`ae balyn kalan amaw min liate ho athua cih. ⁴⁸ Te nanning tuh hynh-e uccaw`ae kong ccaekia`ae nynh na thua oh. ⁴⁹ Dotua oh, ka Paaw kya-e Byakinpyakupaw kha nae tungvaw ka saw; thuasalama vaawran kyate thungnaw kha pya na thua oh makhia Jerusalem khuapi kyakhe la umhin oh,” a cipya`ae. ⁵⁰ Te Jesu nynh zuitu`ae kha Bethani khua phe thua lang cia a cciakhae`ae, te a kuih kha hangthung zah minmin kha hythuapya`ae. ⁵¹ Ou tuhte, minmin kha hythuapya`ae lyakhe aning tuh minmin kyate phia thua zah vaawran langkhe lawthung athua vae. ⁵² Te minmin nynh amaw kha beiksya`ae zah lungtuanaw alepi te Jerusalem lang a ki`ae. ⁵³ Te Pachia kha thehoysah te, phu-esah te tempal kya pei a um`ae. Amen.