Jude

¹ Jesu Kri seepaw, te James neitapaw, kae Jude nynh, Paaw Pachia liate thyaasah athua`ae paw te Jesu Kri kya ccy thua`ae zah ko athua`ae paw kalan ccaw kae ky oh. ² Ngaethya-umsanaw, daenaw te sungsakunaw tuh nanning kya la pungthung sah. ³ Sungsah`ae, aening nynh ah mue kalang oh paw khumnaw kong kha nae kalan zei lan thawte he ka zuakuh lyakhe, mithyaa`ae kalan vaekheit te zungzae cia a la pya vae`ae paw zynnaw hanlan nanning nynh thawte na dou nawlan oh nanning kha hy khylan nae kalan ccaw zei lan aho. ⁴ Pawccecize ccungccaw abang tuh nanning laku aphirute zya oun tee vae`ae. Minmin tuh langmawpi te seibenaw hanlan syntaw ah thua vae`ae paw, Pachia pawlangria lei`ae paw nynh thua`ae. Minmin tuh ah Pachia kya-e thawccinaw kha pynsaw eih ohhuakury nawlan a rulae`ae paw, te amakhae kyalya paw Bawipaw Pachia te ah Bawipaw Jesu Kri kha a vua`ae paw nynh thua`ae. ⁵ Tukeiccu, Bawipaw nynh Israel ccungccaw`ae kha Izip ram kyate phe a khum`ae, tuhkoute a zyn lei`ae paw kha phe bua a ro`ae cipaw kha nanning nynh phe na va ny vae oh zemah bua kae liathuisah ry oh. ⁶ Te masaty e mih thuanaw thyhte a um lei`ae paw, thuasalama mih umnaw phe a cciataw`ae paw vaaw ccungccaw`ae kha alesaepaw nin kya-e byapianaw hanlan, mohnaw zakaw khe zungzae atynpaw sivarui te Pachia nynh phang a khung`ae. ⁷ Tuhhawte Sodom te Komorah, te mih pepan e khuapi`ae mah tuh-e`ae hawkhate mimaw te mimaw kha ohhuakunaw kalan pyakuh`ae zah ccaccangpaw ngesaw rynaw kalan a zuiku`ae keiccu, zungzae maee te detahnaw kha a teing`ae, ou khate kha-e`ae tuh dosuinkupaw lang nung athua`ae. ⁸ Tuhhawte hynh-e maansatu`ae mah mih pynsaw kha a nungsisakuh`ae, kawhoinaw kha pawlangria khyh`ae; te a lesae`ae paw kha thethya a ho`ae. ⁹ Tuhzemah vaaw ccungccaw lupi Mikhael tuh Mawsi a rhua konglang te diabolos ryte doukuh`ae zah he a eikuh`ae tuh sanruinpaw seibenaw kha honua ngan khyh, thuasalama, “Bawipaw nynh nang kha ae pe sah!” a cipya. ¹⁰ Thuasalama kha-e ccungccaw`ae nynh tuh mimaw nynh a ny lei`ae paw kha-e uccaw`ae kong kha thethya a ho`ae; thuasalama nythyanaw a hoi lei`ae paw sarangpaw`ae hawte, puikhaepaw nynaw uccaw`ae khate mimaw te mimaw kha a rosaku`ae. ¹¹ Minmin tuh paw ngaethya lan a um babang! Pawccecize minmin tuh Kain ccianaw kya nynh phe a cciabua vae`ae. Te amia mue khylan Balaam cyiseinaw thyhte karangkute dekuh bua`ae zah Korah a dounaw kyakhe phe roh`ae. ¹² Minmin tuh nanning ryte poi he a tua`ae tuh na ry oh paw poi`ae kya ri leite, mimaw te mimaw kyalya loohdangkuh`ae paw, abekuhpaw athupaw nynh thua`ae. Minmin tuh khivae nynh po a cciakhae paw khuatui a um leipaw maeking`ae; vaening a chihpaw, atharui kyate phe khohbia`ae paw, athae a um leipaw, tangvaw ccyh-e thingku`ae; ¹³ mimaw maethyanaw tuiphua a pousah paw rili kya-e kou rupaw tuileih; po amohpaw mohnaw kha zungzae cia paccynpya athua paw azoupaw awsi`ae nynh thua`ae. ¹⁴ - ¹⁵ Te Adam kyate she sarinaw athua paw Enok mah hynh-e`ae kong hynh profehbya a ho. A ho paw tuh: “Dotua, Bawipaw tuh, ccungccaw balyn kha byapia khylan, minmin lakuze Pachia pawlangria lei`ae paw balyn nynh Pachia pawlangria leite a cyi`ae paw mih cyisahnaw`ae balyn kha seinaw muihsaku khylan, te Pachia pawlangria lei`ae paw misei`ae nynh amaw kha rawsete a ho`ae paw rehahanpaw mih byaho`ae kha muihsaku khylan, a mithyaa`ae thung haw ryte yn thua cih,” a ci. ¹⁶ Tuh-e`ae tuh pei ccohkuh`ae paw, milae seinaw muihpatu`ae, mimaw ryduanaw thyhte a hiin`ae paw nynh thua`ae. Te mih khalang nynh tansakupaw bya`ae kha a ho`ae; mimaw amia muenaw elan ccungccaw`ae kha thehoysah`ae paw nynh thua`ae. ¹⁷ Thuasalama sungsah`ae, ah Bawipaw Jesu Kri a locceihtu`ae nynh langmaw lya a ho`ae paw bya`ae kha nanning nynh la liathui oh. ¹⁸ Nyathyakou ccyh kya, mimaw kya-e Pachia pawlangria leipaw ryduanaw thyhte a hiin`ae paw, ccungccaw saryatu`ae yn langkuh cih`ae ae cipya oh paw kha la liathui oh. ¹⁹ Tuh-e ccungccaw`ae tuh ccungccaw a phiasakuh`ae paw, Muisaw hoi leite pynsaw kya ahoysah`ae paw nynh thua`ae. ²⁰ Thuasalama sungsah`ae, nanning tuh naemaw kyae athyaa huaccepaw zynnaw vawlan naemaw te naemaw kha tynsathungku te, Thyaa Muisaw kya sawsang te, ²¹ zungzae hiinnaw hanlan ah Bawipaw Jesu Kri kya-e ngaethya-umsanaw kha ngaehoite, Pachia sungsanaw kyakhe naemaw te naemaw kha ccykuh oh. ²² Te phiathyanaw kha hoibiate ccungccaw abang kha thawccih oh. ²³ Te pynsaw liate anungsikuhpaw uccaw hei kha huate, mingccang`ae kha maee lungkhu te dae sue oh lah rawrinaw te la khum oh. ²⁴ Atu thykupawkunaw kyate nanning kha khynsah khylan, te myarya lungtuanaw ryte a phu-enaw umnaw malang khe, seinaw leite nanning kha thuakhae khylan a cyih khotupaw, ²⁵ amakhae kyalya ahawpaw aening oun Khumtu Pachia tungvaw, phuenaw te lesaenaw, uknawkaw te thungnaw tuh atu te zungzae cia la um sah. Amen.