John

¹ Athotakaw lya Bya a um, te Bya tuh Pachia ryte a um`ae, te Bya tuh Pachia nynh thua. ² Tuh-e Bya tuh athotakaw lya Pachia ryte a um`ae. ³ Tynre balyn tuh amaw liate nynh rae athua, te rae paw hynh amaw leite ccangkheit san a raekuh paw um khyh. ⁴ Amaw kya tuh hiinnaw a um, te hiinnaw tuh ccungccaw`ae awnaw nynh thua. ⁵ Te awnaw tuh mohnaw kya a aw, thuasalama mohnaw nynh kha-e kha nyhthya khyh. ⁶ A min Johan cikuh paw, Pachia kyate saw paw ccungccaw lukheit a um. ⁷ Tuh-e paw tuh ccungccaw`ae balyn nynh amaw liate a zyn nawlan`ae, Awnaw kong ccaekiakhan khylan, ccaekia lang nynh yn thua. ⁸ Aning tuh tuh-e Awnaw thua khyh, thuasalama tuh-e Awnaw kong ccaekiakhan khylan saw paw nynh thua. ⁹ Tuh-e Awnaw tuh ahmepaw Awnaw nynh thua, tuh-e nynh laephipi kalan thuate ccungccaw miakaw kha a awsah. ¹⁰ Aning tuh laephipi kya um zah laephipi tuh amaw liate rae athua, tuhzemah laephipi nynh amaw kha nyh khyh. ¹¹ Aning tuh amaw ccungccaw`ae kalan yn thua, thuasalama amaw ccungccaw`ae nynh amaw kha lehkhan khyh`ae. ¹² Thuasalama amaw kha lehkhan`ae paw miakaw, amaw min a zyn`ae paw ccaccei kha Pachia ccaaw`ae lang thuanaw kaw aning nynh a pya`ae. ¹³ Minmin tuh chiisaw te saah paw thua khyh`ae, pynsaw rynaw te saah paw thua khyh`ae, ccungccapaw rynaw te saah paw mah thua khyh`ae, thuasalama Pachia rynaw thyhte saah paw nynh thua`ae. ¹⁴ Te Bya tuh pynsaw lang yn tang, Paaw nynh lukheit kyalya a saah paw a phu-enaw kha kaening nynh kae muih. Aning tuh thawccinaw te byaccing te phe beih. ¹⁵ Johan nynh tuh-e paw kong kha ccaekiakhan zah, “E paw tuh, ‘Kamaw koute yn thua cih paw ccungccapaw tuh kamaw laeze a lesaehua, pawccecize aning tuh kamaw laeze a umty,’ cite a kong ka hopaw kha nynh thua,” cite thawte a sia. ¹⁶ Te amaw ccingnaw kyate thawccinaw tungvaw thawccinaw kha aening balyn nynh ah mue oh. ¹⁷ Pawccecize Kawbya tuh Mawsi liate pya athua, thuasalama thawccinaw te byaccing tuh Jesu Kri liate nynh oun thua. ¹⁸ Hung ccungccaw nynh sanmah ccyhkhakheit kya san Pachia kha muih boi khyh, Paaw by vawlan a um paw, lukheit kyalya saah paw Ccapaw rou nynh amaw kha yn langsapya. ¹⁹ Te hynh-e tuh Jew`ae nynh, “Nang hungmou?” cite Johan kha khia khylan, ranpibawi`ae te Levi`ae kha Jerusalem kyate a saw lya`ae ze Johan kya-e ccaekia nynh thua. ²⁰ Te aning nynh vuankhan zah eikuh khyh, thuasalama, “Kae tuh Kri ka thua khyh,” cite a khung`ae. ²¹ Te minmin nynh amaw kha, “Tuhte lanze nang tuh hungmou? Elijah na thua tou?” cite a khia`ae. Te aning nynh, “Ka thua khyh,” a ci. “Nang tuh tuh-e Profeh tou?” cite bua a khia`ae. Te aning nynh, “Ka thua khyh,” a ci. ²² Oute minmin nynh amaw kha, “Nang tuh hungmou? Kaening oun saw`ae paw kalan kae la hopya ccaw`ae namaw te namaw kha hung na ciku mou?” cite a khia`ae. ²³ Johan nynh, “ ‘BAWIPAW a ccianaw kha lawbabinlan raepah oh,’ cite profeh Isaiah nynh a ho vae hawte, kae tuh rangkaw kya a sia paw lukheitpaw roi nynh ka thua,” a ci. ²⁴ Te a saw`ae paw ccungccaw`ae tuh Farasi`ae nynh thua`ae. ²⁵ Te minmin nynh Johan kha khia`ae zah, “Nang tuh tuh-e Kri na thua khyh, Elijah mah na thua khyh, tuh-e Profeh mah na thua khyh lanze, pawccemou nang nynh baptisma na insah`ae?” a cipya`ae. ²⁶ Johan nynh minmin kha khung`ae zah, “Kae nynh tui kya baptisma ka insah`ae, thuasalama nanning laku a thadyn paw, nanning nynh na ny lei oh paw Lukheit a um. ²⁷ Aning tuh kamaw koute yn thua paw, kae laeze a lesae huapaw nynh thua, amaw ccukoh rui phoupya lan san kae tuh ka ngaekuh khyh,” a ci. ²⁸ Hynh-e uccaw`ae hynh Jordan vaw khuraw lang, Johan nynh baptisma insahnaw Bethabara khua kya nynh acyiku. ²⁹ Awkhualan Johan nynh Jesu a kalan yn ccia paw kha muih zah, “Dotua oh, laephipi seinaw cciakhaetupaw Pachia Tuutaw khu! ³⁰ ‘Kamaw koute yn thua cih paw Ccungccapaw tuh kae laeze a lesae huapaw nynh thua,’ cite a konglang ka hopaw kha-e paw lahyn athua, pawccecize aning tuh kae laeze a umty. ³¹ Te amaw kha ka la nyh khyh, thuasalama aning tuh Israel`ae kalan langsapyaku athua cih cite ka ny, tukeiccu kae tuh tui kya baptisma insahte kae thua,” a ci. ³² Te Johan nynh hynhte ccaekiakhan, “Vafu hawte vaawran kyate yn rungbung paw Muisaw kha ka muih, te kha-e nynh amaw tungvaw khe a hae-ung. ³³ Te amaw kha ka la nyh khyh, thuasalama tui kya baptisma-insah lan kamaw yn sawtupaw nynh kae kha, ‘A tungvaw Muisaw rungbung zah a hae-ung paw na muih paw ccungccapaw, kha-e paw tuh Thyaa Muisaw kya baptisma insahtupaw nynh thua,’ cite yn hopya. ³⁴ Te kae nynh ka muih zah e paw tuh Pachia Ccapaw nynh thua cite ccaekia ka khan,” a ci. ³⁵ Bua awkhualan Johan te a zuitu`ae luning a thadyn`ae koute, ³⁶ Johan nynh Jesu a ccia paw kha do zah, “Dotua oh, Pachia Tuutaw khu!” a ci. ³⁷ Te zuitu`ae luning nynh a hopaw kha thae`ae zah Jesu kha a zui`ae. ³⁸ Te Jesu nynh maeleikuh zah minmin nynh a zui`ae paw kha a muih, te minmin kha, “Pawmou na ccung oh?” cite a khia`ae. Minmin nynh, “Rabbi” (tuh-e tuh he leih lanze Ccangpatu cipaw nynh thua), “Teisangmou na um?” a ci`ae. ³⁹ Jesu nynh minmin kha, “Rang oh lah oun dotua oh,” a cipya`ae. Minmin nynh cceih`ae zah a umnaw kha a muih`ae, te tuin nin amaw ryte a umkheih`ae, pawccecize khahlya kha suimilan ccanghawnaw loukaw acih vae. ⁴⁰ Johan nynh a hopaw thae`ae zah Jesu zui`ae paw luning lakuze lukheit tuh Simon Piter neitapaw Andru nynh thua. ⁴¹ Aning nynh masaty amaw a upaw Simon kha muih zah amaw kha, “Messiah” (Kri cite asuilan leih athua paw) “kha kaening nynh phe kae muih vae,” a cipya. ⁴² Te Simon kha Jesu kalan a cciakhae. Te Jesu nynh amaw kha he a muih tuh, “Nang tuh Jonah ccapaw Simon nynh na thua, nang tuh Sefas” (Lungtung cite asuilan leih athua paw) “cite ko na thua cih,” a cipya. ⁴³ Awkhualan Jesu tuh Galilee pee lungkhu lang ccia ry zah Filip kha a muih, te, “Kamaw yn zui,” a cipya. ⁴⁴ Filip tuh Andru te Piter`ae mih khua, Bethsaida paw nynh thua. ⁴⁵ Filip nynh Nathania kha muih zah, “Mawsi nynh Kawbya kya zei zah profeh`ae nynh a konglang a zei`ae paw Josef ccapaw, Nazareth paw Jesu kha kaening nynh phe kae muih vae,” cite a hopya. ⁴⁶ Te Nathania nynh, “Nazareth lungkhu te ahoypaw uccaw ccangkhakheit pou kho ngaw tou?” cite a khung. Filip nynh, “Rang lah yn dotua,” a cipya. ⁴⁷ Jesu nynh amaw kalan Nathania yn ccia paw kha muih zah, “Dotua oh, a kya thyaruhnaw a um leipaw Israelpaw ccaccing khu!” cite a konglang a ho. ⁴⁸ Nathania nynh amaw kha, “Pawtemou nang nynh kae hynh nae ny?” a ci. Jesu nynh khung zah, “Filip nynh nang ae ko maw, thaeku ku kaw na um lyakha phe kae muih vae,” a cipya. ⁴⁹ Nathania nynh, “Rabbi, nang tuh Pachia Ccapaw, nang tuh Israel Siapharan nynh na thua!” cite a khung. ⁵⁰ Jesu nynh khung zah, “ ‘Thaeku ku kaw phe kae muih vae,’ cite kae hopya keiccu tou nae zyn? Hynh-e uccaw`ae laeze ale huapaw nae muih ung cih,” a cipya. ⁵¹ Te Jesu nynh, “Byaccaccing, byaccaccing nang kae hopya, atu koute vaawran ahungkuhpaw kha nae muih cih zah Pachia kya-e vaaw ccungccaw`ae nynh Ccungccaw Ccapaw tungvaw a rungbung`ae paw te a kaethung`ae paw kha nae muih cih,” a cipya.

¹ Te nin thungnaw kya Galilee pee Kana khua kya zudy poi a um; te Jesu a nung tuin kya a umbua. ² Te Jesu te a zuitu`ae mah paryhte zudy poi kalan a kobua`ae. ³ Te misutui he thang tuh, Jesu a nung nynh amaw kha, “Minmin misutui hoi vae khyh`ae,” a cipya. ⁴ Jesu nynh, “Nopinung, nang te kae nynh e kya pawmou ah sekuh bua? Ka ccyh thua loh khyh,” a cipya. ⁵ A nung nynh thohae`ae kha, “Aning nynh nanning kalan ae hopya oh paw miakaw kha cyih vae oh lou,” cite a hopya`ae. ⁶ Te tuin kya Jew`ae ccikankunawpaw phung thyhte, zungkheit ze galan kawkuin, sungthung accung paw, tui nungnawpaw lungre retaruh a nung`ae. ⁷ Jesu nynh thohae`ae kha, “Lungre`ae kha tui bia oh,” a cipya`ae. Te minmin nynh kha-e`ae kha arae phe thua lan tui a bia`ae. ⁸ Te Jesu nynh minmin kha, “Atu sua oh lah thohae piccangpaw kalan cciakhae oh,” a cipya`ae. Te minmin nynh a cciakhae`ae. ⁹ Thohae piccangpaw nynh misutui lang rae athua paw tui kha he a niatua tuh, kha-e kha paw kyate yn thua cipaw nyh khyh, (thuasalama tui sua`ae paw thohae`ae nynh tuh phe ny`ae), thohae piccangpaw nynh zudy ccangvaepaw kha ko zah, ¹⁰ amaw kha, “Ccungccaw miakaw nynh atakaw lya tuh athuapaw misutui kha a nee`ae, te ccungccaw`ae phe a byn`ae koute tuh athua leipaw kha nynh a ruin he`ae, thuasalama nang tuh athuapaw misutui kha atu cia phe na nung,” a cipya. ¹¹ Hynh-e muihsanaw`ae athotakawnaw hynh Jesu nynh Galilee pee Kana khua kyakhe rae zah a phu-enaw kha a langsapya`ae, te a zuitu`ae nynh amaw kha a zyn`ae. ¹² Hynh-e koute Jesu tuh a nung ry, a neitapaw`ae te a zuitu`ae ryte Kapernaum khua lang a cceihbung`ae, te tuin kya nin patae um khyh`ae. ¹³ Te Jew`ae Kawtaw Poi tuh nae vae zah Jesu tuh Jerusalem lang a cceihthung. ¹⁴ Te tempal voidu kya vaetua tangnua`ae, tuu`ae te valaele`ae a zua`ae paw te phuaru`ae paw a dahung`ae paw kha a muih. ¹⁵ Te adihpaw liarue`ae khate bua`ae zah tuu`ae te tangnua`ae te minmin balyn kha tempal voidu kyate phe a dee`ae, te phuaru`ae paw phua kha phya phaepah`ae zah ccaboi`ae kha phe buleihpya`ae. ¹⁶ Te valaele zua`ae paw kha, “E uccaw`ae hynh e kyate cciakhae oh, ka Paaw inn hynh kungkunaw inn lang rae nan oh,” a cipya`ae. ¹⁷ Oute a zuitu`ae nynh, “Na inn kya-e duanaw rynaw thinlung nynh kamaw kha phe yn ae,” cite azeikuh paw kha a liathui vae`ae. ¹⁸ Oute Jew`ae nynh tho`ae zah Jesu kha, “Nang nynh e uccaw`ae hynhte na cyi paw hynh kaening kalan paw muihsanaw mou nae langsapyaku ngaw?” cite a khia`ae. ¹⁹ Jesu nynh khung`ae zah minmin kha, “E tempal hynh roh oh lah nin thung lungkhu ka thosah cih,” a cipya`ae. ²⁰ Oute Jew`ae nynh, “Hynh-e tempal saknaw kya sungpali kum taruh aro, te nang nynh e hynh nin thung kya phe nae sakthui cih tou?” a ci`ae. ²¹ Thuasalama Jesu nynh tuh amaw pyn athua paw tempal kha nynh a ho. ²² Tukeiccu a chih`ae paw kyate Jesu he thothui te a zuitu`ae nynh e bya, Jesu nynh mih kalan a hopya`ae paw kha a liathui`ae, te minmin nynh Ccathyaa te Jesu nynh a hosyapaw bya kha a zyn`ae. ²³ Atu Jerusalem khua Kawtaw Poi kya Jesu a um lya, poi nin kya, ccungccaw patae nynh Jesu nynh a rae paw muihsanaw kha muih`ae zah amaw min kha a zyn`ae. ²⁴ Thuasalama Jesu nynh amaw te amaw kha minmin kalan ahkuh khyh, pawccemacize ccungccaw balyn kha marya a ny. ²⁵ Te ccungccaw lungkhu paw nynh a um cipaw kha phe a ny keiccuze, ccungccaw konglang hung nynh sanmah ccaekiakhan lan hosah khyh.

¹ Jew`ae uktu, Nikodemas cikuh paw Farasipaw ccungccaw lukheit a um. ² Tuh-e paw nynh khuazi khe Jesu kalan yn thua zah, “Rabbi, nang tuh Pachia kyate yn thua paw ccangpatu nynh na thua cipaw ka ny, pawccecize Pachia nynh a umkhae khyh lanze hynh-e na rae paw muihsanaw`ae hynh hung ccungccaw nynh sanmah rae kho lan khyh,” cite a hopya. ³ Jesu nynh khung zah, “Byaccaccing, byaccaccing nang kha kae hopya, ccungccaw lukheit nynh a puithui khyh lanze Pachia peenaw kha muih kho lan khyh,” a cipya. ⁴ Nikodemas nynh, “A kum phe tang vae paw ccungccaw nynh pawtemou bua a pui kho ung cih? A nung vuebua lungkhu lang vaeningnaw bua a tee kho ung cih tou? Te bua pui kho ung ngaw zaw?” cite a khung. ⁵ Jesu nynh khung zah, “Byaccaccing, byaccaccing nang kae hopya, ccungccaw lukheit nynh tui te Muisaw te a pui khyh lanze Pachia peenaw lungkhu lang tee kho lan khyh. ⁶ Pynsaw kyate pui paw tuh pynsaw thua zah Muisaw kyate pui paw tuh muisaw nynh thua. ⁷ ‘Nanning na puithui hahe oh aho,’ cite kae hopya paw hynh na ngaeangthua nan sah. ⁸ Khisang nynh a rynaw lang azaw he, te nang nynh kha-e roi kha na thae, thuasalama paw kyate nynh yn thua cipaw te teilang nynh a ccia cipaw na nyh kho khyh, Muisaw kyate a pui paw miakaw tuh tuh-e hawte nynh athua,” a cipya. ⁹ Nikodemas nynh khung zah, “Hynh-e uccaw`ae tuh pawtemou athua kho cih?” a ci. ¹⁰ Jesu nynh khung zah, “Nang tuh Israel`ae ccangpatu na thua pite hynh-e uccaw`ae hynh na nyh khyh tou? ¹¹ Byaccaccing, byaccaccing nang kae hopya, kaening tuh kae ny paw kha kae ho zah kae muih paw kha ccaekia kae khan, thuasalama kae ccaekia kha nanning nynh na lehkhan khyh oh. ¹² Laephi uccaw`ae kong hynh nanning kae hopah oh zah na zyn lei oh pite vaawran e uccaw`ae kong kae hopya oh ze pawtemou na zyn vae cih oh? ¹³ Te hung ccungccaw sanmah vaawran kalan a kaethung paw um khyh, thuasalama vaawran kya a um paw, vaawran kyate yn rungbung paw Ccungccaw Ccapaw rou nynh a kae. ¹⁴ Te Mawsi nynh fupaw kha rangkaw kya a saethung hawte Ccungccaw Ccapaw mah saethung athua cih. ¹⁵ Ou tuhte hunghung zemah amaw a zyn paw tuh aro vae khyh nawlan, thuasalama zungzae hiinnaw a hoi nawlan nynh thua. ¹⁶ “Pawccecize hunghung zemah Pachia Ccapaw a zyn paw tuh aro vae khyh ccaw, thuasalama zungzae hiinnaw a hoi ccaw cite Pachia nynh laephi ccungccaw`ae kha myarya a sungsah pawte a hoithypaw a Ccapaw kha oun pya. ¹⁷ Pawccecize Pachia nynh laephi ccungccaw`ae kha byapia khylan a Ccapaw kha laephipi kalan yn saw khyh, thuasalama amaw liate laephi ccungccaw`ae hynh khum athua`ae ccaw cite nynh yn saw. ¹⁸ Amaw a zyn paw ccungccaw tuh byapia thua vae khyh, thuasalama a zyn leipaw tuh byapia phe athua vae, pawccemacize Pachia nynh a hoithypaw Ccapaw min kha a zyn khyh keiccu nynh thua. ¹⁹ Te byapianaw tuh hynhte nynh thua; awnaw tuh laephipi kalan yn thua zah ccungccaw`ae nynh awnaw laeze mohnaw kha a ryhua`ae, pawccemacize mih ryalaw`ae tuh aseipaw athua keiccu. ²⁰ Pawccecize ahoy leipaw a cyih paw miakaw nynh awnaw kha a hua, a cyisahnaw`ae kha yn langsakuh sei cih cite awnaw kalan mah yn thua khyh. ²¹ Thuasalama byaccing kha a cyih paw ccungccaw nynh tuh a cyisahnaw`ae tuh Pachia hanlan ryalawpaw nynh thua cite langsaku khylan awnaw kalan nynh yn thua,” a cipya. ²² Hynh-e uccaw`ae koute Jesu te a zuitu`ae tuh Judah ram lungkhu lang oun thua`ae zah tuin kya minmin ryte um`ae zah ccungccaw`ae kha baptismainsah` ae. ²³ Te Johan mah Salim khua te anaekunaw Enon kyakhe baptisma insah`ae. Pawccemacize tuin kya tuh tui alung; te ccungccaw`ae nynh oun thua`ae zah baptisma in`ae. ²⁴ Pawccecize Johan tuh thunginn lungkhu lang saw thua loh khyh. ²⁵ Oute Johan a zuitu`ae abang te Jew`ae laku ccikankunaw kong lante byaeikunaw yn pou. ²⁶ Te Johan zuitu`ae nynh Johan kalan cceih`ae zah, “Rabbi, Jordan vaw khuraw lang namaw ryte na um oh zah namaw nynh a kong ccaekia na khan paw, dotua, kha-e paw nynh baptisma insah`ae, te ccungccaw`ae balyn nynh amaw kalan oun thua`ae,” cite a hopya`ae. ²⁷ Johan nynh khung`ae zah, “Vaawran kyate pya athua khyh lanze, ccungccaw lukheit nynh pawsang mah mue kho lan khyh. ²⁸ ‘Kae tuh Kri ka thua khyh,’ thuasalama, ‘Amaw malang saw paw nynh ka thua,’ cite ka hopaw kya, naemaw ccaccei hynh kamaw ccaekia`ae nynh na thua oh. ²⁹ Akaepaw liaccanung a hoitu tuh zudy ccangvaepaw nynh thua, thuasalama zudy ccangvaepaw pe thadyn zah zudy ccangvaepaw roi a thae paw a banpaw tuh amaw roi a thae keiccuze myarya a lungtua; tuhhawte e ka lungtuanaw tuh accing. ³⁰ Aning tuh a kaethung cih, thuasalama kae tuh ka nyaabung cih. ³¹ “Vaawran langte yn thua paw tuh pawpaw balyn kyaze lupihua nynh thua; laephi kya-e ccungccaw tuh laephi ccungccaw thua zah laephi uccaw kong nynh a hothya. Vaawran kyate yn thua paw ccungccaw tuh pawpaw balyn kyaze lupihua nynh thua. ³² Te aning nynh a muih paw te a thae paw kha ccaekiakhan zah a ccaekiakhan paw kha hung ccungccaw nynh san lehkhan khyh`ae. ³³ A ccaekia kha lehkhan vae paw ccungccaw`ae nynh tuh Pachia tuh ahme cite kha-e kha tazeih phe a khia`ae. ³⁴ Pawccecize Pachia nynh yn saw paw ccungccaw nynh tuh Pachia kya-e bya`ae kha nynh a ho; pawccecize Pachia nynh kha-e paw kha tou kho um lei lan Muisaw kha a pya. ³⁵ Paaw nynh Ccapaw kha sungsah zah pawpaw balyn kha a kuih lungkhu lang marya a ah vae. ³⁶ Ccapaw kha a zyn paw ccungccaw tuh zungzae hiinnaw kha a hoi, te Ccapaw kha a zyn leipaw ccungccaw tuh hiinnaw kha muih lan khyh, thuasalama Pachia thinrianaw kha a tungvaw atyn,” a ci.

¹ Tukeiccu Johan laeze ccungccaw alunghua kha Jesu nynh zuitu lang tangsah`ae zah baptisma insah`ae cipaw kha Farasi`ae nynh phe thae vae`ae cite Bawipaw nynh he a nyh tuh, ² (Jesu amaw ccaccei nynh baptisma-insah khyh`ae, thuasalama a zuitu`ae nynh baptisma insah`ae), ³ Judah pee kha cciataw zah Galilee ram lungkhu lang Jesu tuh bua a pou. ⁴ Te Jesu tuh Samaria ram kha po a cciabia aho. ⁵ Oute Jakob nynh a ccapaw Josef a pya paw laekua pe, Samaria ram kya-e Sikha cikuh paw khua kyakhe a thua. ⁶ Tuin kya Jakob tuisung a um. Jesu tuh a khuaccungnaw kyate phe a bang keiccuze tuisung pe tuin a dahung. Accyh tuh suimilan ccangtaruhnaw loukaw athua vae. ⁷ Tuh-e kalan Samaria nopinung lukheit tui the lan yn thua zah Jesu nynh, “Nia lanpaw tui yn pyabua,” a cipya. ⁸ Pawccecize a zuitu`ae tuh aepaw re khylan khua lungkhu lang phe a la cceih`ae. ⁹ Oute Samaria nopinung nynh, “Pawtemou nang Jewpaw na thua paw nynh kae Samaria nopinung ka thua paw kya-e nia lanpaw nae ngiakupaw tuh?” a ci. Pawccecize Jew`ae tuh Samaria`ae ryte ccuepekunaw hoi khyh`ae. ¹⁰ Jesu nynh khung zah, “Nang nynh Pachia lasung hynh na la ny lanze thuasah, te, ‘Nia lanpaw tui yn pyabua,’ cite nang ae hopatupaw hynh na ny lanze thuasah, amaw kya-e hynh nang nynh phe na ngiakuh paleih cih zah aning nynh hiinnaw tui kha ae pya cih paw lahyn,” a cipya. ¹¹ Nopinung nynh, “Bawihaepaw, tui thenaw lanpaw pawsang na hoi khyh, te tuisung tuh akhu; paw kyate mou nang nynh tuh-e hiinnaw tui kha na hoi? ¹² Nang tuh hynh-e tuisung kaening oun pyatupaw, a ccaaw`ae te a saring`ae mah hynh-e kya-e a nia`ae hawte amaw mah a neihbua paw kaening minpaaw Jakob laeze na lesaehua tou?” a cipya. ¹³ Jesu nynh khung zah, “Hunghung zemah hynh-e tui a neih paw tuh tui bua a haw cih. ¹⁴ Thuasalama kae nynh ka pya cih paw tui a neih paw ccungccaw tuh a tuihaw boi vae lan khyh; thuasalama kae nynh ka pya cih paw tui tuh kha-e paw kya zungzae hiinnaw hanlan aphyhthung paw tuidy athua cih,” a cipya. ¹⁵ Nopinung nynh, “Bawihaepaw, ka tuihaw vae khyh ccaw, tui the lan hynhlang mah ka ccia vae khyh ccaw tuh-e tui tuh yn pyabua,” a cipya. ¹⁶ Jesu nynh, “La cceih, na vawpaw kha yn ko lah hynhlang yn thuakhae,” a cipya. ¹⁷ Nopinung nynh khung zah, “Vawpaw ka hoi khyh,” a ci. Jesu nynh, “ ‘Vawpaw ka hoi khyh,’ na cipaw tuh akyhpaw nynh na ho. ¹⁸ Pawccecize nang tuh vawpaw lu pangaw na hoi vae, te atu na hoi paw hynh na vawpaw thua khyh, hynh-e kya nang tuh hmerarihlan nynh na ho,” a cipya. ¹⁹ Nopinung nynh, “Bawihaepaw, nang tuh profeh lukheit nynh na thua cipaw ka tuasethya. ²⁰ Kaening kae minpaaw`ae tuh hynh-e mua kya nynh a la beik`ae; te nanning Jew`ae nynh tuh ccungccaw nynh beik lan accannaw hmin tuh Jerusalem kya nynh thua na ci oh,” a ci. ²¹ Jesu nynh, “Nopinung, kamaw hynh yn zyn, nanning nynh hynh-e mua kya mah thua vae leite, Jerusalem kya mah thua vae leite Paaw kha nae beik vae cih oh paw accyh tuh yn thua cciamang. ²² Nanning nynh na ny lei oh paw kha na beik oh, kaening tuh kae ny paw kha kae beik, pawccecize khumnaw tuh Jew`ae kyate nynh yn thua. ²³ Thuasalama ahmepaw a beiktu`ae paw nynh Paaw kha muisaw te thuasah, byaccing te thuasah oun beik cih`ae paw ccyh tuh yn thua cih. Tuh-e ccyh tuh atu yn thua cciamang. Pawccecize Paaw nynh khahtahawpaw ccungccaw`ae kha amaw beiktu`ae lang a ccung. ²⁴ Pachia tuh Muisaw nynh thua; te amaw a beik paw ccungccaw`ae nynh muisaw te thuasah, byaccing te thuasah a beik`ae aho hahe,” a ci. ²⁵ Nopinung nynh, “Messiah (Kri cikuh paw) yn thua vae cih cipaw ka ny; he yn thua te kaening kha pawpaw balyn pung oun hopah vae cih,” a cipya. ²⁶ Jesu nynh, “Na kalan bya a hopaw kae hynh Messiah nynh ka thua,” a cipya. ²⁷ Tuh ccyh lya a zuitu`ae oun thua`ae zah nopinung ryte byahoku`ae paw kha mih ngaeangthua. Tuhzemah hung nynh sanmah, “Pawmou na peki?” Tukhyhze, “Pawccemou kha-e nung ryte bya na hoku oh?” cite khia khyh`ae. ²⁸ Oute nopinung nynh a dawre kha phe cciataw zah khua lungkhu langkhe cceih zah ccungccaw`ae kha, ²⁹ “Ka cyi boi paw balyn marya yn hopah paw Ccungccapaw hynh rang oh lah oun dotua oh, tuh-e paw tuh Kri thua lan khyh tou?” a cipya`ae. ³⁰ Oute ccungccaw`ae nynh khua lungkhu te pou`ae zah amaw kalan oun thua`ae. ³¹ Tuh ccyh lyatuin zuitu`ae nynh amaw kha, “Rabbi, ae hin,” cite a soihbia`ae. ³² Thuasalama Jesu nynh minmin kha, “Nanning nynh na ny lei oh paw ae lanpaw looh ka hoi,” a cipya`ae. ³³ Tukeiccu zuitu`ae nynh, “Ccungccaw lukhakheit nynh ae lanpaw phe a ccyngpya vae vosi?” cite lukheit te lukheit a hokuh`ae. ³⁴ Jesu nynh minmin kha, “Ka looh tuh kamaw yn sawtupaw rynaw cyipya lanpaw te a ryalaw thangsah lanpaw hynh nynh thua. ³⁵ ‘Sawpaw sapali a um ung, tuhkoute loohrue ccyh yn thua vae cih,’ na ci khyh oh tou? Dotua oh, nanning kae hopya oh, dothung oh lah loo`ae khu dotua oh, pawccecize kha-e`ae tuh loohrue lan phe azaw vae. ³⁶ Te loohruepaw ccungccaw tuh ryalaw mee kha mue zah zungzae hiinnaw a thuasah paw athae apaw kha a ccakhung; ou tuhte, ccaciivua paw ccungccaw te loohruepaw ccungccaw pynkheihlan paryh mih lungtua ccaw. ³⁷ Ou tuhte, ‘Lukheitpaw nynh ccaciivua zah mingccangpaw nynh loohrue,’ cite a hokuh paw bya tuh e kyahin akyh. ³⁸ Naemaw nynh rya na law leinaw oh kya looh na rue ccaw oh cite nanning kha kae saw oh; ccangpaw ccungccaw`ae nynh ryalah`ae zah nanning tuh minmin mih ryalawnaw lungkhu lang na tee oh,” a cipya`ae. ³⁹ Te, “Kae nynh ka cyi boi paw balyn pung yn hopya,” cite ccaekiakhan paw nopinung bya liate kha-e khua kya-e Samaria`ae patae nynh Jesu kha a zyn`ae. ⁴⁰ Tukeiccu Samaria`ae nynh amaw kalan he thua`ae tuh mimaw ryte a umhin ccaw cite amaw kha a ngia`ae; te Jesu tuh tuin kya nin ning a um. ⁴¹ Te ccungccaw houh alunghua nynh amaw bya keiccuze a zyn`ae. ⁴² Nopinung kha, “Atu kaening kae zyn paw tuh nang nynh na hopaw keiccu thua vae khyh; pawccecize kaemaw ccaccei nynh a hopaw hynh phe kae thae vae zah e paw tuh laephi ccungccaw`ae Khumtu athua paw, Kri ccaccing nynh thua cipaw kae ny,” a cipya`ae. ⁴³ Te nin ning acih koute Jesu tuh tuin kyate pou zah Galilee pee lang a cceih. ⁴⁴ Pawccecize, profeh lukheit tuh amaw umnaw ram kya sawtuanaw mue khyh cite Jesu amaw ccaccei nynh ccaekiakhan vae. ⁴⁵ Oute Jesu tuh Galilee lang he a thua tuh Galilee ccungccaw`ae nynh amaw kha lehkhan`ae, pawccecize minmin mah poi kalan cceihbua`ae zah Jerusalem khua poi kya Jesu nynh a cyi paw balyn kha phe a muih bua`ae. ⁴⁶ Tukeiccu Jesu tuh tui kha misutui lang a raenaw hmin Galilee pee Kana khua lang bua a thua. Te Kapernaum khua kya a ccapaw accihpaw bawi lukheit a um. ⁴⁷ Tuh-e paw nynh Judah pee kyate Galilee pee lungkhu lang Jesu yn thua cipaw he a thae tuh, a kalan cceih zah a ccapaw kha dansah khylan cciabung lan thawte a ngia, pawccecize a ccapaw tuh a chih vae cih. ⁴⁸ Oute Jesu nynh, “Muihsanaw`ae te ngaeangnaw`ae hynh nanning nynh na muih khyh oh lanze kharyh na zyn lan khyh oh,” a ci. ⁴⁹ Tuh-e bawi nynh amaw kha, “Bawihaepaw, ka ccaaw a chi maw beih yn cceihbung,” a cipya. ⁵⁰ Jesu nynh, “La cceih ccavae, na ccapaw mang a hiin,” a cipya. Te tuh-e paw nynh Jesu nynh a kalan a hopaw bya kha zyn zah phe a cceih. ⁵¹ Te aning tuh a cciabung cciamang lyakhe, a see`ae nynh oun cciadue`ae zah, “Na ccapaw mang a hiin,” cite a hopya`ae. ⁵² Oute aning nynh minmin kha a ccapaw ahoyhua ccyh kha a khia`ae. Te minmin nynh, “Inkhawnin suimilan ccangsarinaw ccyh kya a ngelingpaw phe ahoy vae,” a cipya`ae. ⁵³ Tukeiccu a paaw nynh, ou tuh-e ccyh ccaccei kya nynh, Jesu nynh amaw kha, “Na ccapaw mang a hiin,” a cipya ccyh athua cipaw a ny; te amaw ccaccei te a innbyn khaleih nynh a zyn`ae. ⁵⁴ Hynh-e tuh Jesu nynh Judah pee kyate Galilee pee lungkhu lang he yn thua te bua a rae paw vaeningnaw muihsanaw nynh thua.

¹ Hynh-e koute Jew`ae poi ccangkheit a um, te Jesu tuh Jerusalem lang a cceihthung. ² Jerusalem kya Tuu koikua pe Hebru bya te Bethesda acikuh paw kuaa ccangkheit a um, tuh-e kuaa kyatuin saeleih dawkuhpaw ccangpangaw a um. ³ Tuh-e saeleihdawkuhpaw`ae kya a mitmohpaw, ccukhoupaw, te a ngesawroupaw, te ccinaw hoi paw ccungccaw pataepi nynh tui yn theku lanpaw kha ngawte a huekuh`ae. ⁴ Pawccecize, vaaw ccungccapaw nynh ccyhkhakheit kya kuaa lungkhu langkhe rungbung zah tui kha a piasah; ou tuhte tui he a pia koute masaty a phungkuh paw ccungccaw tuh pawpaw tahawpaw ccinaw a hoi zemah phe a dan. ⁵ Te sungthung kum tarya cia a ccih paw ccungccapaw lukheit tuin kya a la um. ⁶ Kha-e paw phang a huekupaw kha Jesu nynh he muih zah khaw cia a um vae hynhsan cipaw he a nyh tuh, “Na dan ry tou?” cite a khia. ⁷ Ngeccih paw nynh, “Bawihaepaw, tui kha piasah he athua vae ze kuaa lungkhu lang kae yn phungbua lanpaw hung ccungccaw san ka hoi khyh, thuasalama he ka ccia lya mingccangpaw nynh ka malang phe a phungku,” cite a khung. ⁸ Jesu nynh, “Thokuh, na iphae kha lawkuh lah cceih ccavae,” a cipya. ⁹ Te vaekheihmawte tuh-e paw tuh dansah athua vae, te a iphae kha lawkuh zah a cceih vae. Tuh-e nin tuh Sabbath nin nynh thua. ¹⁰ Tukeiccu Jew`ae nynh dansah athua paw ccungccapaw kha, “Sabbath nin nynh thua, na iphae puihku lan ccan khyh,” a cipya`ae. ¹¹ Thuasalama aning nynh, “Kamaw yn dansah paw ccungccapaw nynh, ‘Na iphae kha lawkuh lah cceih ccavae,’ yn cipya,” cite a khung`ae. ¹² Oute minmin nynh amaw kha, “ ‘Na iphae kha lawkuh lah cceih ccavae,’ ae cipah paw tuh hungmou?” cite a khia`ae. ¹³ Thuasalama dansah athua paw ccungccapaw nynh hung nynh thua cipaw nyh khyh; pawccecize tuin kya ccungccaw zapi a um`ae lyakhe Jesu tuh zya a pou vae. ¹⁴ Tuhkoute Jesu nynh kha-e paw kha tempal voidu kya muih zah amaw kha, “Dotua, nang tuh phe na dan vae; houh athah huapaw uccaw na tungvaw a thua khyh nawlan la sei nan vae,” a cipya. ¹⁵ Tuh-e ccungccapaw tuh pou zah amaw kha a dansah paw tuh Jesu nynh thua cite Jew`ae kha a hopya`ae. ¹⁶ Te kha-e uccaw`ae kha Sabbath nin kya phe a cyi keiccuze, Jew`ae nynh Jesu kha a tua-a sah`ae, te chia lan a nouku`ae. ¹⁷ Thuasalama Jesu nynh minmin kha, “Ka Paaw tuh atu cia ryalah, te kae mah rya ka lah,” cite a khung`ae. ¹⁸ Tukeiccu Jew`ae nynh amaw kha chia lan cite houh a nounuaku`ae, pawkeiccumacize, “Sabbath nin a ro kyalya thua leite Pachia kha mah a Paaw cikuh zah tuhte amaw te amaw kha Pachia ryte a nginsaku,” a ci`ae. ¹⁹ Oute Jesu nynh minmin kha, “Byaccaccing, byaccaccing, nanning kae hopya oh, Ccapaw nynh amaw te amaw pawsang mah cyih kho khyh, thuasalama Paaw nynh a cyi paw a muih paw rou nynh a cyi kho; pawccecize Paaw nynh a cyi paw miakaw kha Ccapaw nynh mah khahawte a cyibua. ²⁰ Pawccecize Paaw nynh Ccapaw kha sungsah zah amaw ccaccei nynh a cyipaw balyn kha Ccapaw marya a muihsah, te nanning nae ngaeangthua nawlan hynh-e`ae laeze ale huapaw ryalaw`ae kha Ccapaw kha a muihsah ung cih. ²¹ Pawccecize Paaw nynh a chih`ae paw kha thosah zah a hiinsah`ae hawte, ou tuhhawte Ccapaw nynh mah a ry paw ccungccaw`ae kha a hiinsah`ae. ²² Pawccecize Paaw nynh hung ccungccaw sanmah byapia khyh, thuasalama byapianaw miakaw kha Ccapaw kalan khaleih a ah. ²³ Ou tuhcihte ccungccaw balyn nynh Paaw kha sawtua`ae hawte Ccapaw mah sawtua ccaw`ae cite. Ccapaw sawtua leipaw ccungccaw tuh Ccapaw a sawtupaw Paaw kha sawtua leipaw nynh thua. ²⁴ “Byaccaccing, byaccaccing nanning kae hopya oh, ka bya thae zah kamaw yn sawtupaw a zyn paw ccungccaw tuh zungzae hiinnaw a hoi, te byapia thua vae lan khyh; thuasalama chinaw kyate hiinnaw kalan phe a khung vae. ²⁵ Byaccaccing, byaccaccing kae hopya oh, achihpaw ccungccaw`ae nynh Pachia Ccapaw roi oun thae cih`ae zah roi a thae`ae paw nynh oun hiin cih`ae ccyh, tuh-e ccyh tuh atu hynh yn thua cciamang. ²⁶ Pawccecize Paaw nynh amaw te amaw kya hiinnaw a hoi hawte, Ccapaw nynh amaw te amaw kya hiinnaw a hoi nawlan kaw a pya. ²⁷ Te aning tuh Ccungccaw Ccapaw thua keiccuze byapianaw tungvaw kawhoinaw kha mah amaw kha a pya. ²⁸ “E uccaw kya nae ngaeangthua nan sah; pawccecize shaw`ae kya a um`ae paw balyn nynh amaw roi kha oun thae cih`ae zah, ²⁹ oun pou cih`ae paw accyh tuh yn thua cih; ahoypaw a cyih`ae paw tuh hiinnaw thothuinaw kalan, te ahoy leipaw a cyih`ae paw tuh seibyapianaw thothuinaw kalan a pou cih`ae. ³⁰ Kae tuh kamaw te kamaw liate pawsang ka cyih kho khyh, kae tuh ka thae thyhte nynh bya ka pia; te ka byapianaw tuh ahme, pawccemacize kae tuh kamaw rynaw kha ka ccung khyh, thuasalama kamaw yn sawtupaw Paaw rynaw nynh ka ccung. ³¹ “Kae nynh kamaw konglang kha ccaekia ka khan lanze ka ccaekia tuh kyh khyh. ³² Kamaw konglang ccaekiakhantu mingccangpaw a um, te aning nynh kae ka konglang ccaekiakhan paw ccaekia tuh akyh cipaw ka ny. ³³ “Nanning nynh ccungccaw`ae kha Johan kalan na saw oh, te aning nynh byaccing hanlan ccaekia a khan. ³⁴ Thuasalama kae tuh ccungccaw kyate ccaekia ka mue khyh, thuasalama nanning tuh khum na thua ccaw oh cite nynh hynh-e uccaw`ae hynh ka ho. ³⁵ Johan tuh aruapaw te a awpaw maeekhua nynh thua: te nanning tuh amaw awnaw kyakhe sosoh hoysah lan na ry oh. ³⁶ “Thuasalama kae tuh Johan kya-e laeze ale huapaw ccaekia ka hoi; pawccecize Paaw nynh phe thangsah lan kamaw yn pya paw ryalaw`ae kha kae nynh ka law, kha-e ka ryalaw`ae nynh kae tuh Paaw nynh a saw paw cipaw ccaekia a khan. ³⁷ Te kamaw yn sawtupaw Paaw amaw ccaccei nynh mah kamaw konglang ccaekia a khan. Nanning nynh amaw roi kha vaekheit san na thae boi khyh oh, amaw muinsan mah na muih boi khyh oh. ³⁸ Te amaw bya nanning kya tyn khyh; pawccecize aning nynh a saw paw kha na zyn khyh oh. ³⁹ “Nanning nynh Ccathyaa kha thawte na ccung oh, pawccecize kha-e`ae kya nynh zungzae hiinnaw kae hoi cite na tuaku oh, te Ccathyaa`ae tuh kamaw konglang ccaekiakhan paw nynh thua. ⁴⁰ Te hiinnaw hoi khylan nanning nynh kamaw kalan nae thua ry khyh oh. ⁴¹ “Kae tuh ccungccaw`ae kyate phu-enaw ka ccou khyh. ⁴² Thuasalama nanning kya Pachia sungsanaw na hoi khyh oh cipaw ka ny. ⁴³ Kae tuh ka Paaw min liate kae thua zah nanning nynh leh nae khan khyh oh, mingccangpaw nynh amaw min liate yn thua lanze, kha-e paw kha leh nae khan cih oh. ⁴⁴ Lukheit te lukheit kyate thehoynaw kha na ccou oh zah Pachia kyalya kyate yn thua paw thehoynaw na peki lei oh paw nanning nynh pawtemou na zyn kho cih oh? ⁴⁵ “Paaw malang kae nynh nanning kha sei kae be cih oh cite tuakuh nan oh, nanning kha sei ae be oh paw lukheit a um, tuh-e paw tuh nanning nynh na ngaehoiku oh paw Mawsi kha nynh thua. ⁴⁶ Pawccecize, Mawsi kha na zyn oh lanze, kae hynh phe nae zyn cih oh paw, pawccecize aning tuh kamaw konglang nynh a zei. ⁴⁷ Thuasalama aning nynh a zei paw kha nanning nynh na zyn khyh oh ze, pawtemou ka bya`ae hynh na zyn rou cih oh?” a ci.

¹ Hynh-e uccaw`ae koute Jesu tuh Tiberias Rili cikuh paw Galilee Rili khuhlangraw a zua. ² Te ccungccaw zapi nynh amaw kha a zui`ae, pawkeiccumacize minmin nynh ngeccih`ae tungvaw Jesu nynh a cyi paw muihsanaw kha a muih`ae keiccu. ³ Te Jesu tuh mua vawlan khe kae zah tuin kya a zuitu`ae ryte a dahung`ae. ⁴ Te Jew`ae poi athua paw, Kawtaw Poi tuh anae vae. ⁵ Oute Jesu nynh ngawdo zah ccungccaw zapi a kalan oun thua`ae paw kha he a muih tuh Filip kha, “Hynh-e`ae nynh a ae ccaw`ae teilangmou sanlou ah re cih oh?” a cipya. ⁶ Te hynh-e a hopaw tuh Filip kha syntaw khylan nynh a ho, pawccecize paw nynh ka cyi vae cih cipaw amaw ccaccei nynh phe a ny paw nynh thua. ⁷ Filip nynh amaw kha khung zah, “Hynh-e`ae milu raveih nynh ccapyh cci a mue nawlan`ae denari phuapia zaning mee sanlou tuh minmin hanlan zaw lan khyh,” a ci. ⁸ Amaw zuitu lukheit athua paw, Simon Piter a neitapaw Andru nynh, ⁹ “Barli sanlou phe pangaw te ngasaw taraw zawning a hoi paw imohpaw e kya mang a um; thuasalama hynhzeih ccungccaw laku kya e`ae nynh pawlangmou tang cih?” a cipya. ¹⁰ Te Jesu nynh, “Ccungccaw`ae kha dahungsah oh,” a ci. Tuin kya lonua patae asae, tukeiccu milu lante thungpangaw loukaw acih paw ccungccaw`ae tuh a dahung`ae. ¹¹ Te Jesu nynh sanlou`ae kha laah zah lungtuabya he ho koute a zuitu`ae kalan ne`ae zah zuitu`ae nynh a dahung`ae paw kha a nee`ae. Te tuhhawte ngasaw`ae kha ccungccaw`ae nynh a ry`ae zeih a nee`ae. ¹² Ccungccaw`ae phe a byn`ae te Jesu nynh a zuitu`ae kha, “Pawsang avae khyh ccaw, alaepaw a eihpaw kha ccakhung oh,” a cipya`ae. ¹³ Tukeiccu zuitu`ae nynh ccungccaw`ae nynh a ae`ae paw kyate alaepaw kha ccakhung`ae zah barli sanlou phe pangaw kya-e a eihpaw, alaepaw tuh adihpaw kee haw laening phe abeih. ¹⁴ Ou tuhte Jesu nynh a rae paw muihsanaw kha kha-e ccungccaw`ae nynh he muih`ae tuh, “E paw tuh laephipi kalan yn thua cih paw Profeh ccaccing nynh thua,” a ci`ae. ¹⁵ Ccungccaw`ae nynh oun thua vae cih`ae zah amaw kha siapharan lang tang lan oun nangde cih`ae cipaw Jesu nynh phe a ny keiccuze, Jesu tuh a makhaete mua muakheit kalan bua a cceih. ¹⁶ Te zete he thua tuh a zuitu`ae tuh rili kalan a cceihbung`ae. ¹⁷ Te kohlung lungkhu lang tee`ae zah Kapernaum khua lang rili kha a zua`ae. Te phe moh vae zah Jesu tuh minmin kalan thua loh khyh. ¹⁸ Te myarya arupaw khisang azaw keiccuze, tuileih a tho. ¹⁹ Tukeiccu minmin nynh me thung, me pali loukaw cia he a zaw`ae te, Jesu nynh rili vawlan yn cceih zah kohlung kalan yn naekupaw kha a muih`ae, te minmin tuh a rih vae`ae. ²⁰ Thuasalama Jesu nynh minmin kha, “Kamaw nynh ka thua, rih nan oh,” a cipya`ae. ²¹ Oute minmin nynh amaw kha lungtuate kohlung lungkhu lang a teesah`ae, te kohlung tuh minmin a ccianaw`ae lang varan lang sosoh mawte phe thua kanmaw. ²² Tuh-e nin koute rili hawkheit lang raw kya a thadyn paw ccungccaw`ae nynh a zuitu`ae nynh a teenaw`ae paw kohlung ccangkheit laelan ccangpaw kohlung um vae khyh cipaw, te Jesu tuh a zuitu`ae ryte kohlung lungkhu lang teebua khyh, thuasalama a zuitu`ae makhae nynh a cceih`ae cipaw kha he a muih`ae tuh, ²³ tuhzemah Bawipaw nynh lungtuabya ho koute sanlou a la ae naw`ae te anaekunaw hmin kalan Tiberias khua kyate ccangpaw adihpaw kohlung`ae oun thua`ae. ²⁴ Ccungccaw`ae nynh Jesu tuh tuin kya um khyh cipaw, te a zuitu`ae mah um khyh`ae cipaw kha he a muih`ae keiccuze minmin mah kohlung lungkhu lang tee`ae zah Jesu kha ccung khylan Kapernaum khua lang oun thua`ae. ²⁵ Te minmin nynh Jesu kha rili hawkheit langraw kya he muih`ae tuh, “Rabbi, e kya hotuhmou na thua?” cite a khia`ae. ²⁶ Jesu nynh minmin kha khung`ae zah, “Byaccaccing, byaccaccing nanning kae hopya oh, muihsanaw`ae na muih oh keiccuze nanning nynh kamaw hynh nae ccung khyh oh, thuasalama nanning nynh sanlou`ae na ae oh zah nae vueso keiccu nynh nae ccung oh. ²⁷ Arohthyapaw aepaw hanlan ryalah nan oh, thuasalama Ccungccaw Ccapaw nynh nanning ae pya cih oh paw zungzae hiinnaw kalan cia atynpaw aepaw hanlan ryalah oh; pawccecize amaw kha Paaw Pachia nynh tazeih phe khia vae paw nynh thua,” a ci. ²⁸ Oute minmin nynh amaw kha, “Pachia nynh a ry paw ryalaw kae law nawlan, pawmou kae cyih cih?” cite a khia`ae. ²⁹ Jesu nynh minmin kha, “Pachia nynh yn saw paw amaw kha na zyn oh paw, kha-e kha nynh Pachia nynh a ry paw ryalaw tuh athua,” cite a khung`ae. ³⁰ Tukeiccu minmin nynh, “Kaening nynh kae muih zah nang kae zyn nawlan paw muihsanaw mou nae langsapyaku? Paw rya mou na law? ³¹ ‘Pachia nynh minmin ae lanpaw sanlou kha vaawran kyate a pya`ae,’ cite azeiku hawte, kaening kae minpaaw`ae nynh manna kha rangkaw kya a ae`ae,” a ci`ae. ³² Oute Jesu nynh minmin kha, “Byaccaccing, byaccaccing kae hopya oh, Mawsi nynh kha-e sanlou kha vaawran kyate nanning ae pya khyh oh, thuasalama ka Paaw nynh vaawran kyate accaccingpaw sanlou kha nanning ae pya oh. ³³ Pawccecize Pachia kya-e sanlou tuh vaawran kyate yn rungbung zah laephi ccungccaw`ae kalan hiinnaw a pyatupaw nynh thua,” a cipya`ae. ³⁴ Oute minmin nynh, “Bawipaw, tuh-e sanlou tuh pei oun pya,” a ci`ae. ³⁵ Te Jesu nynh minmin kha, “Kae tuh hiinnaw sanlou nynh ka thua. Kamaw kalan yn thua paw ccungccaw tuh a vuelaw boi vae lan khyh, te kamaw yn zyn paw ccungccaw tuh a tuihaw boi vae lan khyh. ³⁶ Thuasalama nanning nynh kamaw hynh phang nae muih oh zemah nae zyn khyh oh cite kae hopya vae oh. ³⁷ Paaw nynh kamaw yn pya paw ccungccaw`ae balyn nynh kamaw kalan oun thua cih`ae; te kamaw kalan yn thua paw ccungccaw tuh kharyh ka dee boi lan khyh. ³⁸ Pawccecize kae tuh kamaw rynaw kha cyi khylan vaawran kyate kae rungbung khyh, thuasalama kamaw yn sawtupaw rynaw cyi khylan nynh kae rungbung. ³⁹ Te kamaw yn sawtupaw Paaw a rynaw tuh, kamaw yn pya paw ccungccaw`ae balyn kha lukheit san ka zosah khyh nawlan, thuasalama nyathyakou nin kya minmin kha bua thosathui khylan nynh thua. ⁴⁰ Te kamaw yn sawtupaw a rynaw tuh, Ccapaw kha muih zah amaw kha a zyn paw miakaw nynh zungzae hiinnaw a hoi ccaw`ae cipaw nynh thua; te nyathyakou nin kya kha-e paw kha kae nynh ka thosah cih,” a ci. ⁴¹ Oute, “Kae tuh vaawran kyate yn rungbung paw sanlou nynh ka thua,” cite a ho keiccuze, Jew`ae nynh amaw kong kha byalung`ae. ⁴² Te minmin nynh, “E paw tuh Josef ccapaw Jesu thua khyh tou? A paaw te a nung tuh ah ny oh paw khaw? Pawtemou, ‘Kae tuh vaawran kyate kae rungbung paw,’ a ciku?” a ci`ae. ⁴³ Tukeiccu Jesu nynh khung`ae zah, “Naemaw te naemaw laku ccohkuh nan oh. ⁴⁴ Kamaw yn sawtupaw Paaw nynh a soih khyh lanze hung ccungccaw sanmah kamaw kalan thua kho lan khyh, te yn thua paw ccungccaw kha nyathyakou nin kya ka thosah cih. ⁴⁵ ‘Te minmin balyn tuh Pachia nynh a ccangpya`ae paw thua cih`ae,’ cite Profeh`ae ccauh kya azeikuh. Tukeiccu Paaw kya-e thae zah a ccangkuh paw ccungccaw miakaw nynh kamaw kalan oun thua`ae. ⁴⁶ Pachia kyate yn thua paw aning nynh Paaw kha a muih, aning laelan hung ccungccaw nynh san Paaw kha muih khyh. ⁴⁷ Byaccaccing, byaccaccing nanning kae hopya oh, kamaw yn zyn paw ccungccaw tuh zungzae hiinnaw a hoi. ⁴⁸ Kae tuh hiinnaw sanlou nynh ka thua. ⁴⁹ Nae minpaaw`ae nynh rangkaw kya manna kha a ae`ae, thuasalama phe chih`ae. ⁵⁰ E tuh ccungccaw lukhakheit nynh ae sah lah a chi vae khyh ccaw cite vaawran kyate yn rungbung paw sanlou nynh thua. ⁵¹ Kae tuh vaawran kyate yn rungbung paw ahiinpaw sanlou nynh ka thua, ccungccaw lukhakheit nynh hynh-e sanlou hynh a ae lanze zungzae a hiin vae cih; te kae nynh ka pya lanpaw sanlou tuh ka ngesaw nynh thua; tuh-e tuh laephi ccungccaw`ae hiinnaw hanlan nynh thua,” cite minmin kha a hopya`ae. ⁵² Tukeiccu Jew`ae nynh, “Pawtemou e ccungccapaw nynh amaw ngesaw kha aening ae lan yn pya kho cih?” cite mimaw te mimaw laku thawte a eikuh`ae. ⁵³ Oute Jesu nynh minmin kha, “Byaccaccing, byaccaccing nanning kae hopya oh, Ccungccaw Ccapaw a ngesaw kha na ae khyh oh zah a chii kha na nia khyh oh lanze nanning kya hiinnaw na hoi khyh oh. ⁵⁴ Hunghung zemah ka ngesaw kha ae zah ka chii a neih paw tuh zungzae hiinnaw a hoi, te kha-e paw kha nyathyakou nin kya ka thosah cih. ⁵⁵ Pawccecize ka ngesaw tuh aepaw ccaccing thua zah ka chii tuh niapaw ccaccing nynh thua. ⁵⁶ Ka ngesaw kha ae zah ka chii a neih paw ccungccaw tuh kamaw kya um zah kae mah a kya ka um. ⁵⁷ Ahiinpaw Paaw nynh kamaw hynh yn saw zah Paaw liate kae ka hiin hawte, kamaw yn ae paw ccungccaw tuh kamaw liate a hiin cih. ⁵⁸ E tuh vaawran kyate yn rungbung paw sanlou nynh thua, nae minpaaw`ae nynh manna a ae`ae pite a chi`ae hawte thua leite, hynh-e sanlou a ae paw ccungccaw tuh zungzae a hiin vae cih,” a cipya`ae. ⁵⁹ E uccaw`ae kong hynh Jesu nynh Kapernaum khua kya a ccangpya`ae lya sinakok kya nynh a ho. ⁶⁰ Tukeiccu a zuitu`ae patae nynh e kong he a thae`ae tuh, “E bya tuh arupaw byaho nynh thua, hung nynh mou a thaethya kho cih?” a ci`ae. ⁶¹ A zuitu`ae nynh tuh-e kong a ccohku`ae paw kha Jesu nynh a lung te he a nyh tuh minmin kha, “Hynh-e bya nynh nanning nae lung ae thangsah oh tou? ⁶² Ccungccaw Ccapaw nynh langmaw a umnaw kalan a kaethung paw kha na muih oh lanze pawte thua ngaw? ⁶³ Hiinnaw a pyatu tuh Muisaw nynh thua, pynsaw tuh pawsang ccungkia khyh; nanning kalan ka ho paw bya`ae hynh muisaw thua zah hiinnaw mah athua. ⁶⁴ Thuasalama nanning laku a zyn leipaw abang a um,” a cipya`ae. Pawccecize Jesu nynh atakaw lya mawte a zyn lei`ae paw tuh hung`ae nynh thua`ae cipaw te hung nynh amaw kha yn phee cih cipaw kha phe a ny vae. ⁶⁵ Te Jesu nynh, “Tukeiccu ka Paaw nynh kawpya khyh lanze hung ccungccaw sanmah kamaw kalan yn thua kho lan khyh cite nanning kalan phe kae hopya vae oh,” a ci. ⁶⁶ Tuh-e ccyh kyate a zuitu`ae patae tuh nuhlang ki`ae zah amaw ryte cceihkheih vae khyh`ae. ⁶⁷ Oute Jesu nynh zuitu luhaw laening kha, “Nanning so na cceihbua ry oh tou?” a cipya`ae. ⁶⁸ Oute Simon Piter nynh khung zah, “Bawipaw, hung kalan mou kae cceih cih? Nang nynh zungzae hiinnaw bya`ae na hoi. ⁶⁹ Te kaening nynh nang tuh Kri, a hiinpaw Pachia Ccapaw nynh na thua cipaw kae zyn zah kae ny,” a ci. ⁷⁰ Jesu nynh minmin kha khung`ae zah, “Nanning luhaw laening hynh kamaw nynh kae po khyh oh tou? Tuhzemah nanning lakuze lukheit tuh diabolos nynh thua,” a ci. ⁷¹ A honuapaw tuh Simon ccapaw, Judas Iskaria nynh thua; pawccecize aning tuh luhaw laening kyaze lukheit mang athua pite amaw kha a phee vae cih paw nynh thua.

¹ Hynh-e uccaw`ae koute Jesu tuh Galilee pee kya khua a ccung; pawccecize Jew`ae nynh amaw kha chia lan cite a ccung`ae keiccu Judah pee kya khuaccung ry khyh. ² Atu Jew`ae Bu Poi tuh anae vae. ³ Tukeiccu a neitapaw`ae nynh Jesu kha, “Na zuitu`ae nynh mah na cyi paw ryalaw`ae kha a muih bua ccaw`ae, e kyate toikuh lah Judah pee lungkhu lang cceih ccavae. ⁴ Pawccecize amaw te amaw kha oun nyh`ae sah cite a ccungkuh paw ccungccaw nynh tuh pawsang mah aphirute cyih boi khyh. Nang nynh e uccaw`ae hynh na cyi lan thua ze, laephi ccungccaw`ae kalan namaw te namaw kha langku tua,” a cipya`ae. ⁵ Pawccecize amaw a neitapaw`ae nynh heize amaw kha zyn khyh`ae. ⁶ Oute Jesu nynh minmin kha, “Ka ccyh thua loh khyh, thuasalama nanning ccyh tuh pei paccynku athua. ⁷ Laephi ccungccaw`ae nynh nanning ae hua kho khyh oh, thuasalama kamaw tuh oun hua`ae, pawkeiccumacize mih ryalawnaw`ae tuh aseipaw nynh thua cite kae nynh ccaekia ka khan keiccu. ⁸ Tuh-e poi kalan nanning la cceih oh, kae tuh tuh-e poi kalan ka cceih loh lan khyh, pawccecize ka ccyh phe ccing lan thua loh khyh,” a cipya`ae. ⁹ Hynh-e bya`ae hynh minmin kalan a ho koute Jesu tuh Galilee pee kya a um ung. ¹⁰ Thuasalama a neitapaw`ae nynh he cceihthung`ae tuh Jesu mah poi kalan a cceihthung bua, thuasalama alangkuh lei lante aphiru lante nynh a ccia. ¹¹ Oute Jew`ae nynh poi kya amaw kha ccung`ae zah, “Jesu tuh teisangmou a um?” a ci`ae. ¹² Te amaw te asekuh lante ccungccaw zapi laku kya byalungnaw patae a um; pawccecize ccungccaw abang nynh, “Aning tuh ccungccahoypaw nynh thua,” a ci`ae. Mingccang`ae nynh, “Ccungccahoypaw thua khyh, thuasalama aning nynh ccungccaw`ae kha a hyngpya`ae,” a ci`ae. ¹³ Tuhzemah Jew`ae rawri`ae keiccuze hung ccungccaw nynh sanmah amaw kong kha alangkuh lante ho khyh`ae. ¹⁴ Atu tuh-e poi akhankuh loukaw he acihte Jesu nynh tempal voidu lungkhu lang cceih zah a ccangpya`ae. ¹⁵ Te Jew`ae tuh mih ngaeangthua zah, “E ccungccapaw hynh a ccangkuh lei pite pawtepei ccaw a thya?” a ci`ae. ¹⁶ Jesu nynh minmin kha khung`ae zah, “Ka ccangpyanaw tuh kamaw kya-e thua khyh, thuasalama kamaw yn sawtupaw kya-e nynh thua. ¹⁷ Ccungccaw lukheit nynh Pachia rynaw kha a cyi ry lanze, ka ccangpyanaw kong kha a nyh cih, kha-e tuh Pachia kya-e tou? Tukhyhze kamaw kya-e tou ka ho cipaw a nyh cih. ¹⁸ Amaw te amaw kya-e a ho paw ccungccaw tuh amaw phu-enaw nynh a ccungku; thuasalama a sawtupaw phuenaw a ccung paw ccungccaw tuh ahmepaw thua zah dingleinaw amaw kya um khyh. ¹⁹ Mawsi nynh nanning kha Kawbya ae pya khyh oh tou? Tuhzemah nanning lakuze hung nynh san Kawbya kha na zui khyh oh rei? Pawccemou kamaw hynh chia lan nanning nynh nae ccung oh?” a ci. ²⁰ Ccungccaw`ae nynh khung`ae zah, “Nang tuh raerangsaro bahkuhpaw hynh sang na thua, nang chia khylan hungmou ae ccung?” a ci`ae. ²¹ Jesu nynh khung`ae zah, “Kae nynh ryalaw ccangkheit ka laah zah nanning balyn nae ngaeangthua. ²² Mawsi nynh nanning kha vindung awkunaw ae pya oh; kha-e tuh Mawsi kyate yn tho paw thua khyh, thuasalama minpaaw`ae kyate nynh a tho; te nanning nynh Sabbath nin kya ccungccapaw kha vindung na aw oh. ²³ Mawsi Kawbya tuh ro athua khyh nawlan, ccungccapaw lukheit tuh Sabbath nin kya vindung a awkuh lanze, kae nynh Sabbath nin kya ccungccaw lukheit ka dansah keiccu tou nanning nynh ka tungvaw nae thinria? ²⁴ Muihnaw te byapia nan oh, thuasalama adingpaw byapianaw te byapia oh,” a cipya`ae. ²⁵ Oute Jerusalem khua e ccungccaw abang nynh, “E paw tuh minmin nynh chia lan cite a ccung`ae paw kha thua khyh tou? ²⁶ Te dotua oh, aning tuh rawhoyte byaho, thuasalama minmin nynh paw bya san khung khyh`ae. Uktu`ae nynh, e paw tuh Kri ccaccing nynh thua cipaw hynh nyh ccaccing`ae vema? ²⁷ Tuhzemah kaening nynh e paw tuh paw kyate yn thua paw cipaw kae ny; thuasalama Kri tuh he yn thua vae ze, paw kyate nynh yn thua cipaw hung ccungccaw nynh san nyh lan khyh,” a ci`ae. ²⁸ Oute Jesu nynh tempal kya a ccangpya`ae lyakhe thawte sia zah, “Nanning nynh kamaw hynh nae ny oh, te paw kyate nynh kae thua cipaw mah nae ny oh; kae tuh kamaw ka rynaw te kae thua khyh, thuasalama kamaw yn sawtupaw tuh ahmepaw nynh thua, amaw kha nanning nynh na nyh khyh oh. ²⁹ Thuasalama kae tuh amaw kha ka ny; pawccecize kae tuh amaw kyate nynh kae thua, te aning nynh kamaw hynh yn saw,” a ci. ³⁰ Oute minmin nynh Jesu kha kyng lan a ccung vae`ae; thuasalama hung ccungccaw nynh san amaw kha kyng khyh`ae, pawkeiccumacize amaw ccyh zaw loh khyh. ³¹ Te ccungccaw patae nynh amaw kha zyn`ae zah, “Kri he yn thua vae ze, hynh-e ccungccapaw nynh a rae paw hynh-e muihsanaw`ae lae muihsanaw alunghua yn rae cih vema?” a ci`ae. ³² Amaw konglang ccungccaw`ae nynh tuhte pei ccohku`ae paw kha Farasi`ae nynh a thae`ae; te Farasi`ae te alepaw ranpibawi`ae nynh amaw kha kyng khylan tempal ngawtu`ae kha a saw`ae. ³³ Oute Jesu nynh minmin kha, “Kae tuh nanning ryte sosohtari nynh ka um, oute kamaw yn sawtupaw kalan ka cceih cih. ³⁴ Nanning nynh kamaw hynh nae ccung cih oh zah nae muih lan khyh oh, te ka umnaw kalan nae thua kho lan khyh oh,” a cipya`ae. ³⁵ Oute Jew`ae nynh mimaw te mimaw laku, “Aening nynh ah muih khyh nawlan oh aning tuh teilangmou a cceih vae cih? Greek`ae laku um`ae paw a phiakuh`ae paw Jew`ae kalan aning nynh cceih ngaw zah Greek`ae kha ccangpah ngaw`ae tou? ³⁶ ‘Nanning nynh kamaw hynh nae ccung cih oh zah nae muih lan khyh oh; te ka umnaw kalan nae thua kho lan khyh oh,’ cite aning nynh a hopaw hynh paw a horynaw mou athua?” cite a hoku`ae. ³⁷ Tuh-e poi, alesaepaw nin, nyathyakou nin kya, Jesu nynh thadyn zah, “Ccungccaw lukhakheit nynh a tuihaw lanze kamaw kalan rang sah lah neih sah. ³⁸ Kamaw yn zyn paw ccungccaw tuh, Ccathyaa nynh a ho hawte, a lungkhu langte ahiinpaw tuidy alua cih,”cite thawte a sia. ³⁹ Thuasalama hynh-e a hopaw tuh amaw zyn`ae paw nynh a mue vae cih`ae paw Muisaw kha nynh a honuathe; pawccecize Thyaa Muisaw kha pya thua loh khyh, pawkeiccumacize Jesu tuh phuesah thua loh khyh. ⁴⁰ Tukeiccu ccungccaw patae nynh hynh-e bya he thae`ae tuh, “E paw tuh profeh ccaccing nynh thua,” a ci`ae. ⁴¹ Mingccang`ae nynh, “E paw tuh Kri nynh thua,” a ci`ae. Thuasalama abang nynh, “Kri tuh Galilee kyate yn pou ngaw zaw? ⁴² Kri tuh David ciihan kyate, David umnaw khua, Bethlehem kyate nynh yn pou cih cite Ccathyaa nynh ho khyh tou?” a ci`ae. ⁴³ Tukeiccu amaw keiccuze ccungccaw`ae laku phu phiakunaw a um. ⁴⁴ Te ccungccaw abang nynh amaw kha kyng lan a ry`ae; thuasalama hung ccungccaw nynh san amaw kha kyng khyh`ae. ⁴⁵ Oute tempal ngawtu`ae tuh alepaw ranpibawi`ae te Farasi`ae kalan oun thua`ae; te minmin nynh, “Pawccemou amaw kha nae cciakhae khyh oh?” cite tempal ngawtu`ae kha a khia`ae. ⁴⁶ Tempal ngawtu`ae nynh, “E paw nynh a ho hawte hung ccungccaw nynh sanmah bya ho boi khyh,” cite a khung`ae. ⁴⁷ Oute Farasi`ae nynh, “Nanning so phe ae hyngpyabua vae oh tou? ⁴⁸ Uktu`ae te Farasi`ae nynh amaw zyn paw lukheit san a um tou? ⁴⁹ Thuasalama Kawbya a nyh lei`ae paw tuh-e ccungccaw zapi tuh thyalaw athua`ae,” cite a khung`ae. ⁵⁰ Farasi`ae kyaze lukheit athua paw, langmaw lya khuazi Jesu kalan a thua paw Nikodemas nynh minmin kha, ⁵¹ “Ccungccaw nynh a ho paw kha a thaety leite, a cyi paw a nyhty leite, ccungccaw kha aening ah Kawbya nynh byapia tou?” a cipya`ae. ⁵² Minmin nynh, “Nang so Galilee paw tou na thua? Galilee kyate profeh lukheit san pou boi khyh cipaw kha ccung lah dotua,” cite a khung`ae. ⁵³ Te ccungccaw miakaw mih inn raveih lang phe cceih`ae.

¹ Thuasalama Jesu tuh Oliv Mua kalan a cceih. ² Te awkhua takawte tempal voidu kalan bua cceih zah ccungccaw`ae balyn nynh amaw kalan oun thua`ae; te Jesu tuh dahung zah minmin kha a ccangpya`ae. ³ Te kawbya ccangpatu`ae te Farasi`ae nynh a vawpaw thua leipaw pise ryte a seipaw nopinung lukheit kha kyng`ae zah amaw kalan oun cciakhae`ae, te minmin nynh kha-e nung kha angaelaku kya he a nung`ae koute, ⁴ Jesu kha, “Ccangpatupaw, hynh-e nopinung hynh a vawpaw thua leipaw pise ryte a sei cciamang lya kyng paw nynh thua. ⁵ Te Kawbya kya khatahawpaw nopi`ae kha lung te deih lan Mawsi nynh kaw oun pya, thuasalama nang pawte na ho cih?” a cipya`ae. ⁶ Hynh-e minmin nynh a ho`ae paw tuh amaw kha seibe khylan a syntawnaw`ae paw nynh thua. Thuasalama Jesu nynh baling zah a kuihdung te laephi kya ccaw a zei. A thae leipaw hawte nynh a um. ⁷ Minmin nynh amaw kha pei he khia`ae tuh, Jesu nynh thokuh zah minmin kha, “Nanning lakuze seinaw a hoi leipaw ccungccaw nynh kha-e nung kha masaty lung te deih sah,” a cipya`ae. ⁸ Te bua baling zah lae vawlan ccaw a zei ki. ⁹ Te kha-e bya a thae`ae paw minmin tuh athya-ahoy nynawpaw thinlung nynh mih seinaw kha nysakuh`ae zah kum tang huapaw kyate tho zah nyathyakou um paw kyacia lukheit koute lukheit phya cceih`ae; te Jesu tuh a makhaete cciataw`ae zah nopinung tuh angaelaku kya phang thadyn. ¹⁰ Jesu nynh he thokuh tuh nopinung laelan hung sanmah muih vae khyh, te kha-e nung kha, “Nopinung, nang sei ae be`ae paw teisangmou um`ae? Hung nynh san seibya ae pia khyh`ae tou?” a cipya. ¹¹ Nopinung nynh, “Hung nynh san yn pia khyh, Bawipaw,” a ci. Te Jesu nynh, “Kae nynh mah nang hynh seibya kae pia khyh; la cceih lah la sei nan vae,” a cipya. ¹² Oute Jesu nynh, “Kae tuh laephipi awnaw nynh ka thua; kamaw yn zui paw ccungccaw tuh mohnaw kya cceih lan khyh, thuasalama hiinnaw kya-e awnaw kha a hoi cih,” cite bua a hopya`ae. ¹³ Tukeiccu Farasi`ae nynh amaw kha, “Nang tuh namaw konglang namaw nynh ccaekia na khan; na ccaekia tuh kyh khyh,” a cipya`ae. ¹⁴ Jesu nynh minmin kha khung`ae zah, “Kae nynh kamaw konglang ccaekia ka khan zemah ka ccaekia tuh akyh; pawccecize kae tuh paw kyate nynh kae thua cipaw ka nyh zah teilang nynh ka ccia cipaw ka ny; thuasalama nanning nynh kae paw kyate nynh kae thua cipaw te teilang nynh ka ccia cipaw na nyh khyh oh. ¹⁵ Nanning tuh ccungccaw lante nynh bya na pia oh; kae tuh hung sanmah bya ka pia khyh. ¹⁶ Tuhzemah kae tuh bya ka pia ze, ka byapianaw tuh ahme, pawccecize kae tuh ka makhae thua khyh, thuasalama kae tuh kamaw yn sawtupaw ka Paaw ryte nynh kae um. ¹⁷ Nae Kawbya kya mah ccungccaw luning ccaekia tuh akyh cite azeikuh. ¹⁸ Kae tuh kamaw konglang ccaekiakhan paw lukheit ka thua, te kamaw yn sawtupaw Paaw nynh kamaw konglang ccaekiakhan,” a ci. ¹⁹ Oute minmin nynh amaw kha, “Na Paaw tuh teisangmou um?” cite a khia`ae. Jesu nynh, “Nanning nynh kamaw mah nae nyh khyh oh, ka Paaw mah na nyh khyh oh; kamaw hynh phe nae la ny oh thua ze, ka Paaw mah phe na nyh cih oh paw,” a ci. ²⁰ Jesu nynh e bya`ae hynh tempal voidu kya a ccangpya`ae lya phua nungnaw kyakhe nynh a ho; te hung ccungccaw nynh san amaw kha kyng khyh`ae, pawccecize amaw ccyh zaw loh khyh. ²¹ Oute Jesu nynh minmin kha, “Kae ka la cceih cih zah nanning nynh kamaw kha nae ccung cih oh, te nae seinaw kya na chih cih oh, ka ccianaw lang nae thua kho lan khyh oh,” bua a cipya`ae. ²² Oute Jew`ae nynh, “ ‘Ka ccianaw lang nae thua kho lan khyh oh,’ a cipaw tuh amaw te amaw tou a theihkuh cih?” a ci`ae. ²³ Te Jesu nynh minmin kha, “Nanning tuh akaw lang-e nynh na thua oh, kae tuh luki lang-e nynh ka thua; nanning tuh hynhe laephipi kya-e nynh na thua oh; kae tuh hynh-e laephipi kya-e ka thua khyh. ²⁴ Tukeiccu nanning kha, ‘Nae seinaw kya na chih cih oh,’ cite kae hopya oh; pawccecize kae tuh aning nynh ka thua cipaw na zyn khyh oh ze, nae seinaw kya na chih cih oh,” a cipya`ae. ²⁵ Oute minmin nynh amaw kha, “Nang tuh hungmou?” a ci`ae. Te Jesu nynh minmin kha, “Kae tuh atakaw lya mawte nanning kae hopya oh hawte nynh ka thua. ²⁶ Nanning konglang ka ho lanpaw te byapia lanpaw patae a um; thuasalama kamaw yn sawtupaw tuh ahme, te amaw kyate ka thae paw uccaw`ae kha nynh laephi ccungccaw`ae kalan ka ho,” a cipya`ae. ²⁷ Paaw kong kha nynh Jesu nynh minmin kha a hopya`ae cipaw minmin nynh nyh khyh`ae. ²⁸ Oute Jesu nynh minmin kha, “Ccungccaw Ccapaw kha nanning nynh he nae saethung vae oh te, kae tuh aning nynh ka thua cipaw nae nyh cih oh, kamaw kaw te pawsang ka cyih khyh cipaw kha nae nyh cih oh; thuasalama ka Paaw nynh yn ccangpya hawte nynh hynhe` ae hynh ka ho. ²⁹ Te kamaw yn sawtupaw tuh kamaw ryte nynh a um, Paaw nynh ka makhaete yn nungsya khyh, pawccecize amaw lungrythua paw uccaw`ae kha nynh kae tuh pei ka cyi he,” a cipya`ae. ³⁰ E bya`ae hynh Jesu nynh he a ho tuh ccungccaw patae nynh amaw kha a zyn`ae. ³¹ Oute Jesu nynh amaw zyn`ae paw Jew`ae kha, “Nanning nynh ka bya kya na tyn oh ze, ka zuitu`ae ccaccing na thua cih oh. ³² Te nanning nynh byaccing kha nae nyh cih oh zah byaccing nynh nanning kha ae luesah cih oh,” a cipya`ae. ³³ Minmin nynh amaw kha, “Kaening tuh Abraham ciihan kae thua zah hung ccungccaw kya-e seetangnaw kya san kae um boi khyh; pawcihtemou nang nynh, ‘Nanning tuh luesah na thua cih oh,’ nae cipaw tu?” cite a khung`ae. ³⁴ Jesu nynh minmin kha khung`ae zah, “Byaccaccing, byaccaccing kae hopya oh, hunghung zemah seinaw ryalah paw tuh seinaw see nynh athua. ³⁵ Te see tuh inn kya zungzae um boi khyh; thuasalama ccapaw tuh zungzae a um. ³⁶ Tukeiccu Ccapaw nynh nanning kha ae luesah oh ze, nanning tuh na lue ccaccing cih oh. ³⁷ Nanning tuh Abraham ciihan nynh na thua oh cipaw ka ny; thuasalama kamaw chia lan nae ccung oh, pawkeiccumacize ka bya nanning kya umnaw hoi khyh. ³⁸ Kae tuh ka Paaw kya ka muih paw uccaw kha nynh ka ho; te nanning tuh nae paaw kya na muih oh paw kha na cyi oh,” a ci. ³⁹ Minmin nynh khung`ae zah amaw kha, “Abraham tuh kaening paaw nynh thua,” a cipya`ae. Jesu nynh minmin kha, “Nanning tuh Abraham ccaaw`ae na thua oh ze, Abraham ryalaw`ae khaw na lahbua cih oh. ⁴⁰ Thuasalama Pachia kya-e ka thae paw byaccing kha nanning kalan ae hopah oh paw, Ccungccapaw kamaw hynh chia lan atu nanning nynh nae ccung oh; Abraham tuh hynhte cyih khyh. ⁴¹ Nanning tuh nae paaw cyisahnaw nynh na cyi oh,” a cipya`ae. Oute minmin nynh amaw kha, “Kaening tuh ohhuakunaw kyate a pui paw kae thua khyh, kaening nynh Paaw lukheit kae hoi, tuh-e tuh Pachia nynh thua,” a cipya`ae. ⁴² Jesu nynh, “Pachia tuh nae Paaw a la thua ze, kamaw hynh nae sungsah cih oh; pawccecize kae tuh Pachia kyate kae pou zah kae thua, kamaw kaw te kae thua khyh, thuasalama Pachia nynh kamaw hynh yn saw. ⁴³ Pawccemou nanning nynh ka bya hynh na thaethya khyh oh? Nanning nynh ka bya na thae kho khyh oh keiccu nynh thua. ⁴⁴ Nanning tuh nae paaw diabolos kya-e nynh na thua oh, te nae paaw rynaw kha nanning nynh na cyi ry oh. Aning tuh atakaw lya mawte ccungccaw theihtupaw thua zah byaccing kya tyn khyh. Pawccecize amaw kya byaccing um khyh. Hyngbya he a ho vae ze amawthuanaw kha nynh a ho; pawccecize aning tuh mihyngpaw thua zah hyngbya paaw nynh athua. ⁴⁵ Te byaccing hynh kae hopya keiccu oh, nanning nynh kamaw nae zyn khyh oh. ⁴⁶ Nanning lakuze hung nynh mou kamaw hynh seinaw yn nysakuh? Te kae nynh byaccing ka ho lanze pawccemou nanning nynh kamaw hynh nae zyn khyh oh? ⁴⁷ Pachia kya-e ccungccaw nynh tuh Pachia bya`ae kha a ngae, nanning tuh Pachia kya-e na thua khyh oh keiccu a bya`ae kha na ngae khyh oh,” a cipya`ae. ⁴⁸ Oute Jew`ae nynh amaw kha khung`ae zah, “Nang tuh Samariapaw nynh na thua cipaw te raerangsaro bahkuhpaw nynh na thua cipaw hmerarihlan kae hopah khyh tou?” a ci`ae. ⁴⁹ Jesu nynh khung`ae zah, “Kae tuh raerangsaro bahkuhpaw ka thua khyh, thuasalama ka Paaw hynh saw ka tua, te nanning nynh kamaw hynh saw nae tua khyh oh. ⁵⁰ Kae tuh kamaw phu-enaw ka ccung khyh; phu-enaw ccung zah byapia paw lukheit a um. ⁵¹ Byaccaccing, byaccaccing kae hopya oh, ccungccaw lukhakheit nynh ka bya hynh a ngae lanze chinaw tung boi vae lan khyh,” a ci. ⁵² Oute Jew`ae nynh amaw kha, “Nang tuh raerangsaro bahkuhpaw cipaw atu kae ny. Abraham tuh a chih, te profeh`ae mah chih`ae, te nang nynh, ‘Ccungccaw lukhakheit nynh ka bya a ngae lanze chinaw tung boi vae lan khyh,’ na ci. ⁵³ Nang tuh a chih vae paw kaening paaw Abraham laeze na lesaehua tou? Profeh`ae mah chih`ae; namaw te namaw hynh hunglangmou na riakuh?” a ci`ae. ⁵⁴ Jesu nynh khung`ae zah, “Kamaw te kamaw phu-e ka pyaku ze, ka phu-enaw tuh accakaepaw nynh thua, kamaw phu-e yn pya paw tuh ka Paaw nynh thua; amaw kha nanning nynh, ‘Aning tuh kaening Pachia,’ na ci oh. ⁵⁵ Tuhzemah nanning nynh amaw kha na nyh khyh oh, thuasalama kae tuh amaw kha ka ny; te kae nynh, ‘Amaw kha ka nyh khyh,’ ka ci lanze, kae tuh nanning hawte mihyngpaw nynh ka thua cih, thuasalama kae tuh amaw kha ka nyh zah a hopaw kha ka ngae. ⁵⁶ Nanning nae paaw Abraham nynh kamaw ninsaw kha muih lan myarya a lungtua; te kha-e kha muih zah a lungtua,” a ci. ⁵⁷ Oute Jew`ae nynh amaw kha, “Nang tuh kum sungpangaw na cih loh leite Abraham tuh phe na muih tou?” a ci`ae. ⁵⁸ Jesu nynh, “Byaccaccing, byaccaccing kae hopya oh, Abraham a la um mawze kae tuh ka um,” a cipya`ae. ⁵⁹ Oute minmin nynh amaw kha deih lan lung`ae a khuinnuaku`ae; thuasalama Jesu nynh amaw te amaw rekuh zah minmin ngaelaku te cceih zah tempal voidu kyate po a pou.

¹ Te Jesu nynh po a cceih tuh a pui takawte a mitmohpaw ccungccapaw lukheit kha a muih. ² Te a zuitu`ae nynh amaw kha, “Rabbi, e paw nynh mitmohte a pui paw hynh, hung nynh sei keiccu mou, amaw tou a sei, tukhyhze a nung te a paaw tou sei`ae?” cite a khia`ae. ³ Jesu nynh khung`ae zah, “E ccungccapaw mah sei khyh, a nung te a paaw mah sei khyh`ae, thuasalama Pachia ryalaw`ae amaw kya langsaku ry keiccu nynh thua. ⁴ Ninthu ccyh lya kamaw yn sawtupaw ryalaw`ae kha ka laah cih; hung ccungccaw nynh san ryalaw kho khyh ccyh khuazi yn thua cih. ⁵ Laephipi kya kae ka um lungkhu balyn kae tuh laephipi awnaw nynh ka thua,” a ci. ⁶ Tuh-e he a ho koute Jesu nynh laephi kha a tuinthoi zah tuin kyate ccingccua kha rae zah mitmohpaw mit kha ccingccua a thuhpya. ⁷ Te amaw kha, “La cceih, Siloam kuaa kya la singkuh,” a cipya. (Siloam cipaw asuilan tuh ‘Saw’ cipaw nynh thua). Tukeiccu aning nynh cceih zah a singku, te ngawmuihte a ki. ⁸ Tukeiccu a innpaw`ae te aning tuh mitmohpaw nynh thua cipaw langmaw lya a muih`ae paw ccungccaw`ae nynh, “E paw hynh leih dahung zah a ngiakuh he paw kha thua khyh tou?” a ci`ae. ⁹ Ccungccaw abang nynh, “Kha-e paw nynh thua,” a ci`ae; mingccang`ae nynh, “Kha-e paw nynh alo,” a ci`ae; thuasalama amaw nynh, “Kae tuh aning nynh ka thua,” a ci. ¹⁰ Tukeiccu minmin nynh amaw kha, “Pawcihtemou na mit a aw?” a ci`ae. ¹¹ Aning nynh khung`ae zah, “Jesu acikuh paw ccungccapaw nynh ccingccua rae zah ka mit kya yn thuhpya, te, ‘Siloam kuaa kalan la cceih lah la singkuh,’ yn cipya, te ka cceih zah ka singkuh, te ngaw ka muih,” a ci. ¹² Oute minmin nynh, “Aning tuh teisangmou a um?” cite a khia`ae. Aning nynh, “Ka nyh khyh,” a ci. ¹³ Minmin nynh langmaw lya a mitmohpaw kha Farasi`ae kalan a cciakhae`ae. ¹⁴ Te Jesu nynh ccingccua rae zah kha-e paw mit a awsah lyakha Sabbath nin nynh thua. ¹⁵ Oute Farasi`ae nynh mah kha-e paw kha pawcihtemou ngaw na muih cite bua a khia`ae. Aning nynh minmin kha, “Aning nynh ka mit kya ccingccua yn thuhpah zah ka singbiakuh, te ngaw ka muih,” a cipya`ae. ¹⁶ Tukeiccu Farasi`ae abang nynh, “Tuh-e ccungccapaw tuh Pachia kyate yn thua paw thua khyh, pawccemacize Sabbath nin sung khyh,” a ci`ae. Mingccang`ae nynh, “Pawcihtemou miseipaw lukheit nynh khatahawpaw muihsanaw a rae kho cih?” a ci`ae. Te minmin laku kya phiakunaw a um. ¹⁷ Minmin nynh mitmohpaw kha, “Na mit ae awsah keiccu tuh-e paw tuh pawtemou na tua?” cite bua a khia`ae. Mitmohpaw nynh, “Aning tuh Profeh lukheit nynh thua,” a ci. ¹⁸ Thuasalama ngaw bua a muih paw a nung te a paaw kha a ko makhia`ae tuh kha-e paw tuh a mitmoh zah ngaw bua a muih paw nynh thua cite Jew`ae nynh zyn khyh`ae. ¹⁹ Te minmin nynh a nung te a paaw kha, “E paw hynh a pui lya mawte a mitmoh na ci oh paw nae ccapaw thua tou? Tuhte lanze atu pawcihtemou ngaw a muih?” cite a khia`ae. ²⁰ A nung te a paaw nynh minmin kha khung`ae zah, “E paw tuh kae ccapaw nynh thua cipaw te a pui lya mawte a mitmoh cipaw kae ny. ²¹ Thuasalama pawcihte nynh atu ngaw a muih cipaw kae nyh khyh, hung nynh a mit awsah cipaw mah kae nyh khyh; aning tuh piccangthua vae, amaw kha khia oh, amaw hanlan amaw nynh yn hokuh cih,” a ci`ae. ²² A nung te a paaw nynh Jew`ae rawri`ae keiccu nynh e bya`ae hynh a ho`ae; pawccecize Jesu tuh Kri nynh thua cite lukhakheit nynh ccaekiakhan lanze tuh-e paw tuh sinakok kyate dee lan cite Jew`ae nynh nawccawnaw phe a rae vae`ae. ²³ Tukeiccu nynh a nung te a paaw nynh, “Aning tuh piccangthua vae, amaw kha khia oh,” a ci`ae. ²⁴ Tukeiccu mitmohpaw kha minmin nynh bua ko`ae zah, “Pachia hynh phu-enaw pya, kha-e paw tuh miseipaw nynh thua cipaw kaening nynh kae ny,” a ci`ae. ²⁵ Aning nynh khung`ae zah, “Aning tuh miseipaw athua te thua khyh ka nyh khyh, ccangkheit ka ny paw tuh, kae tuh ka mit a la moh, atu ngaw ka muih vae,” a ci. ²⁶ Oute minmin nynh, “Aning nynh na tungvaw pawmou a cyi? Na mit pawcihtemou ae awsah?” cite bua a khia`ae. ²⁷ Aning nynh, “Nanning phe kae hopya vae oh, te na ngae khyh oh, pawccemou bua na thaery oh? Nanning so a zuitu`ae lan na tang ry oh tou?” cite a khung`ae. ²⁸ Oute minmin nynh amaw kha sarya`ae zah, “Nang nynh amaw zuitu na thua, thuasalama kaening tuh Mawsi zuitu`ae nynh kae thua. ²⁹ Pachia nynh Mawsi kalan byahopya cipaw kae ny, thuasalama e paw tuh paw kyate nynh yn thua cipaw kae nyh khyh,” a ci`ae. ³⁰ Tuh-e ccungccapaw nynh khung`ae zah, “Aning nynh ka mit phe yn awsah pite, aning tuh paw kyate nynh yn thua cipaw na ny khyh oh paw tuh ngaeang lan um paw uccaw nynh thua. ³¹ Pachia nynh misei`ae bya tuh thaepah khyh`ae cipaw aening ah nyh oh; thuasalama lukhakheit nynh Pachia kha beik zah a rynaw kha a cyi lanze, kha-e paw kha Pachia nynh a thaepya. ³² Mitmohte a pui paw ccungccapaw mit kha ccungccaw lukhakheit nynh phe awsah cipaw laephipi thotakaw te thae boi lan um khyh. ³³ E ccungccapaw tuh Pachia kyate yn thua paw a la thua khyh lanze, aning nynh pawsang mah cyi kho lan khyh,” a ci. ³⁴ Minmin nynh khung`ae zah, “Nang tuh seinaw`ae kya khaleih na pui paw nynh na thua, nang nynh tou kaening nae ccangpah?” a ci`ae. Te minmin nynh amaw kha phe a dee`ae. ³⁵ Farasi`ae nynh mitmohpaw kha phe dee`ae cipaw Jesu nynh a thae; te Jesu nynh mitmohpaw kha he a muih tuh, “Pachia Ccapaw kha na zyn tou?” cite a khia. ³⁶ Aning nynh, “Bawipaw, kae nynh amaw kha ka zyn lanpaw aning tuh hungmou?” cite a khung. ³⁷ Te Jesu nynh, “Nang nynh amaw kha phe na muih vae, te nang ryte atu bya hopaw hynh aning nynh thua,” a cipya. ³⁸ Te aning nynh, “Bawipaw, ka zyn!” ci zah amaw kha a beik. ³⁹ Te Jesu nynh, “Ngawmuih lei`ae paw kha ngawmuihsah khylan, te ngawmuih`ae paw kha mitmohsah khylan, kae tuh byapia khylan nynh hynh-e laephipi kalan kae thua,” a ci. ⁴⁰ Te Jesu ryte a um`ae paw Farasi`ae abang nynh hynh-e bya`ae hynh thae`ae zah amaw kha, “Kaening so kae mitmoh tou?” cite a khia`ae. ⁴¹ Jesu nynh, “Nanning tuh nae mit a la moh lanze seinaw na hoi cih lei oh paw, thuasalama atu nanning nynh, ‘Ngaw kae muih,’ na ci oh; keiccuze nae seinaw tuh phang a um.

¹ “Byaccaccing, byaccaccing kae hopya oh, tuu khiaa lungkhu lang sakoih kyate tee leite, ccangpaw kyate a kae paw ccungccaw tuh miruh te damiah nynh thua. ² Thuasalama sakoih kyate a tee paw tuh tuu`ae a ringtu nynh thua. ³ Kha-e paw kha sakoih ngawtupaw nynh sakoih a hungpya, te tuu`ae nynh a roi a syntaw`ae, te a tuu`ae kha mih min te ko`ae zah a poukhae`ae. ⁴ Te a tuu`ae kha he a poukhae vae ze, mih malang khe cciapah`ae zah tuu`ae nynh amaw kha a zui`ae, pawccecize minmin nynh a roi kha a syntaw`ae. ⁵ Te mikhiapaw kha minmin nynh zui lan khyh`ae, thuasalama kha-e paw kha a ccuetaw cih`ae, pawccecize minmin nynh mikhiapaw roi kha nyh khyh`ae,” a ci. ⁶ E tousenaw hynh Jesu nynh minmin kha a hopya`ae, thuasalama aning nynh a hopya`ae paw kha paw kong nynh athua cipaw minmin nynh thaethya khyh`ae. ⁷ Oute Jesu nynh minmin kha bua hopah`ae zah, “Byaccaccing, byaccaccing kae hopya oh, kae tuh tuu`ae teenaw sakoih nynh ka thua. ⁸ Kamaw malang oun thuaty`ae paw balyn tuh miruh`ae te damiah`ae nynh thua`ae, thuasalama tuu`ae nynh minmin roi kha ngaepah khyh`ae. ⁹ Kae tuh sakoih nynh ka thua, ccungccaw lukhakheit nynh kamaw kyate a tee lanze, aning tuh khum athua cih. Te aning tuh a tee, a pou cih zah rangpaw a muihkuh cih. ¹⁰ Miruh tuh ru khylan, chia khylan te syro khylan rou nynh yn thua; kae tuh tuu`ae nynh hiinnaw a hoi ccaw`ae cite, te kha-e kha phe beih lang a hoi ccaw`ae cite nynh kae thua. ¹¹ “Kae tuh ahoypaw tuuringtu nynh ka thua; ahoypaw tuuringtu nynh tuh a hiinnaw kha tuu`ae hanlan a pyaku. ¹² Thuasalama tuuringtu athua leipaw, tuu`ae a hoitu athua leipaw, hohpaw ccungccaw nynh tuh suizaw yn thua paw he a muih vae ze, tuu`ae kha cciataw zah phe a ccuetaw, te suizaw nynh tuu`ae kha kyng`ae zah pung phiasaku`ae. ¹³ Hohpaw ccungccaw nynh tuh a ccuetaw he, pawccemacize aning tuh hohpaw athua keiccu tuu`ae hanlan tua khyh. ¹⁴ “Kae tuh ahoypaw tuuringtu nynh ka thua, te ka tuu`ae kha ka nyh zah ka tuu`ae nynh mah kamaw kha oun ny`ae. ¹⁵ Kamaw kha ka Paaw nynh yn ny hawte, kae nynh mah ka Paaw kha ka ny, te ka hiinnaw kha tuu`ae hanlan ka pyaku. ¹⁶ Te hynh-e tuu khiaa kya a umbua leipaw ccangpaw tuu`ae kha ka hoi, minmin kha mah ka cciakhae hahe cih`ae zah minmin nynh ka roi a ngae cih`ae; te tuuringtu lukheit zakaw tuuphu phukheit lang oun tang cih`ae. ¹⁷ Kae nynh ka hiinnaw kha ka pyakuh zah ka hiinnaw kha bua ka lawkuh cih keiccuze ka Paaw nynh kamaw kha yn sungsah. ¹⁸ Hung ccungccaw nynh san kha-e hiinnaw kha ka kyate yn lawpah khyh, thuasalama kamaw lungryte nynh kha-e kha ka pyaku. Ka hiinnaw kha pyaku lan kawhoinaw te kha-e kha bua lawku lan kawhoinaw ka hoi. Hynh-e kawpyapaw hynh ka Paaw kyate nynh ka mue,” a ci. ¹⁹ Hynh-e bya`ae keiccuze Jew`ae laku phiakunaw bua a um. ²⁰ Te minmin lakuze ccungccaw patae nynh, “Aning tuh raerangsaro bahkuh zah angaee, pawccemou amaw bya kha na ngae oh?” a ci`ae. ²¹ Abang nynh, “E bya`ae tuh raerangsaro bahkuhpaw bya`ae thua khyh, raerangsaro nynh mitmohpaw mit kha a awsah kho cih tou?” a ci`ae. ²² Te khoccihsaw lyakhe Jerusalem kya Tempal Ahnaw Poi um zah, ²³ Jesu tuh tempal voidu lungkhu Solomon saeleih dawkuhpaw kya a cceih. ²⁴ Oute Jew`ae nynh amaw kha phang koihlu`ae zah, “Hohse cia mou nang nynh kaening hynh lunghiinnaw nae hoisah ung cih? Nang tuh Kri na thua lanze ccaerarihlan oun hopah,” a ci`ae. ²⁵ Jesu nynh minmin kha khung`ae zah, “Nanning phe kae hopya vae oh, te na zyn khyh oh; ka Paaw min te ka cyipaw ryalaw`ae nynh kamaw kong ccaekiakhan`ae. ²⁶ Thuasalama nanning tuh ka tuuphu lungkhu e na thua khyh oh keiccu nae kalan ka ho vae hawte nanning nynh nae zyn khyh oh. ²⁷ Ka tuu`ae nynh ka roi kha ngae`ae zah minmin kha ka ny`ae, te minmin nynh kamaw kha oun zui`ae. ²⁸ Te minmin kha zungzae hiinnaw ka pya`ae, te minmin tuh kharyh roh boi vae lan khyh`ae, hung nynh sanmah minmin kha ka kuih kyate yn lua kho vae lan khyh. ²⁹ Minmin kha kamaw kalan yn pyatupaw ka Paaw tuh hunghung balyn laeze a lesaehua, te hung nynh sanmah minmin kha ka Paaw kuih kyate lua kho lan khyh. ³⁰ Kae te ka Paaw tuh ccangkheit nynh kae thua,” a ci. ³¹ Oute Jew`ae nynh amaw kha deih lan cite lung bua a khuinnuaku`ae. ³² Jesu nynh khung`ae zah, “Ka Paaw kya-e ahoypaw ryalaw patae kha nanning phe kae langsapyaku vae oh, khae` ae kyaze pawtecihpaw ryalaw keiccu mou nanning nynh lung te deihbia lan nae ci oh?” a ci. ³³ Jew`ae nynh amaw kha khung`ae zah, “Ahoypaw ryalaw keiccu nang kha kae deih lan khyh, thuasalama Pachia thethyasabya na ho keiccu, te nang tuh ccungccaw mang na thua pite namaw te namaw Pachia lang na tangsaku keiccu nynh kae deih cih,” a ci`ae. ³⁴ Jesu nynh minmin kha khung`ae zah, “Nae Kawbya kya, ‘Nanning tuh pachia`ae nynh na thua oh, ka ci,’ cite zeikuh khyh tou? ³⁵ Pachia bya mih kalan a thua paw minmin kha aning nynh pachia`ae a ci lanze, (te Ccathyaa tuh roh kho lan khyh). ³⁶ Paaw nynh phe a thyaasah vae paw te laephipi kalan a saw vae paw amaw kha, ‘Kae tuh Pachia Ccapaw nynh ka thua,’ ka ci keiccuze, nanning nynh, ‘Nang tuh Pachia thethyasabya na ho,’ nae ci oh tou? ³⁷ Ka Paaw ryalaw`ae kha ka law khyh lanze, kamaw hynh oun zyn nan oh. ³⁸ Thuasalama ka law lanze, kamaw hynh nae zyn khyh oh zemah ryalaw`ae kha zyn oh, ou tuhte Paaw tuh kamaw kya um zah kae tuh amaw kya ka um paw kha nae nyh cih oh zah nae zyn oh ccaw,” a ci. ³⁹ Tukeiccu minmin nynh amaw kha kyng lan bua a ccung`ae, thuasalama mih kuih kyate phe a lue. ⁴⁰ Te Jesu tuh Jordan vaw khuraw langkhe bua cceih zah Johan nynh masaty baptisma insahnaw kyakhe a um. ⁴¹ Te ccungccaw patae amaw kalan oun thua`ae zah, “Johan nynh muihsanaw kharyh langsakuh khyh; thuasalama hynh-e Ccungccapaw konglang Johan nynh a hopaw balyn tuh marya ahme,” a ci`ae. ⁴² Te tuin kyakhe ccungccaw patae nynh amaw kha a zyn`ae.

¹ Meri te a unung Martha`ae khua, Bethani khua paw Lazaruh cikuh paw lukheitpaw tuh a la ccih. ² Accihpaw Lazaruh a ccianung tuh Bawipaw kha mynkhuhpaw sathothuhpah zah a ccu kha a sang te a fupah paw Meri nynh thua. ³ Tukeiccu a ccianung`ae nynh Bawipaw kalan ccungccaw saw`ae zah, “Bawipaw, dotua, na sungsahpaw ccungccapaw tuh accih,” cite a hosapya`ae. ⁴ Jesu nynh tuh-e bya he a thae tuh, “Hynh-e ccinaw tuh chinaw phah lanpaw thua khyh; thuasalama Pachia phu-enaw hanlan, ou tuhte Pachia Ccapaw phu-e ccou nawlan nynh thua,” a ci. ⁵ Jesu nynh Martha, a neitanung, te Lazaruh kha a sungsah`ae. ⁶ Tukeiccu Jesu nynh Lazaruh accih cipaw he a thae te, tuin a umnaw kya maw khe nin ning bua a um ung. ⁷ Ou tuhkoute Jesu nynh a zuitu`ae kha, “Judah ram lang bua cceih ccavae oh sih,” a cipya`ae. ⁸ Zuitu`ae nynh, “Rabbi, Jew`ae nynh atumaw khaw nang kha lung te deih lan ae ccung`ae, te tuhlang tuh ccia lan bua na cih tou?” a cipya`ae. ⁹ Jesu nynh, “Khuadae kya suimilan haw laening um khyh tou? Ccungccaw lukhakheit nynh khuadae kya a ccia ze thykuh khyh, pawkeiccumacize hynh-e laephipi kya-e awnaw liate ngaw a muihkuh. ¹⁰ Thuasalama ccungccaw lukhakheit nynh khuazi kya a ccia ze a thykuh, pawkeiccumacize amaw kya awnaw um khyh,” cite a khung`ae. ¹¹ Hynh-e`ae kong hynh Jesu nynh a ho, te he a ho koute, “Ah banpaw Lazaruh tuh a ih, tuhzemah amaw kha tho khylan kae ka cceih cih,” a cipya`ae. ¹² Oute a zuitu`ae nynh, “Bawipaw, aning tuh a i lanze, phe yn hoy cih,” a ci`ae. ¹³ Tuhzemah Jesu nynh tuh Lazaruh a chinaw kong kha nynh a ho, thuasalama minmin nynh tuh a i ccaccing paw nynh a ho cite a tua`ae. ¹⁴ Oute Jesu nynh, “Lazaruh tuh a chih vae,” cite ccaerarihlan a hopya`ae. ¹⁵ “Te nanning nynh na zyn nawlan oh, tuin kya kae ka la um khyh paw tuh nae hanlan ka lungtua, atu amaw kalan aening cceih oh sih,” a ci. ¹⁶ Oute Didymas acikuh paw Thomas nynh, “Bawipaw ryte ah chibua ccaw oh, aening mah cceihbua oh sih,” cite zuitu a ruiban`ae kha a hopya`ae. ¹⁷ Oute Jesu he yn thua tuh, Lazaruh kha shaw lungkhu a ccynaw`ae te nin pali phe acih vae cipaw a ny. ¹⁸ Atu Bethani khua tuh Jerusalem te anaekuh, me ning loukaw nynh asaw. ¹⁹ Te Martha te Meri tuh mih raepaw a chi keiccu minmin kha umkhae khylan Jew`ae patae oun thua`ae. ²⁰ Oute Martha nynh Jesu yn thua cipaw he a thae tuh, cceih zah Jesu kha a duehaw; thuasalama Meri tuh innvaw nynh phang a dahung. ²¹ Oute Martha nynh, “Bawipaw, e kya nang na um lanze, ka rae paw a chih cih leipaw. ²² Thuasalama atumaw Pachia kalan nang nynh na ngia paw miakaw tuh Pachia nynh ae pya cih cipaw ka ny,” cite Jesu kha a hopya. ²³ Jesu nynh, “Na rae paw bua yn tho cih,” a cipya. ²⁴ Martha nynh, “Nyathyakou nin kya, thothuinaw kya aning tuh bua yn tho cih cipaw tuh ka ny,” cite a khung. ²⁵ Jesu nynh, “Kae tuh thothuinaw te hiinnaw nynh ka thua; kamaw yn zyn paw ccungccaw tuh a chi zemah bua a hiin cih. ²⁶ Te kamaw yn zyn zah a hiinpaw ccungccaw miakaw tuh chih boi vae lan khyh. Hynh-e bya hynh na zyn tou?” cite a khia. ²⁷ Martha nynh, “Ou, Bawipaw, nang tuh laephipi kalan yn thua paw, Pachia Ccapaw, Kri nynh na thua cipaw ka zyn,” cite a khung. ²⁸ Te tuhcihte he a ho koute, Martha nynh cceih zah a neitanung Meri kha aphiru lante zya ko zah, “Ccangpatupaw yn thua vae, te nang kha ae ko,” a cipya. ²⁹ Tuh-e bya kha Meri nynh he a thae tuh, arangte thokuh zah Jesu kalan a cceih. ³⁰ Jesu tuh tuh-e ccyh lya khualae lungkhu lang yn thua loh khyh, thuasalama Martha te a tungkunaw`ae kya nynh a um ung. ³¹ Innvaw kya Meri a umkhae`ae paw Jew`ae nynh, Meri nynh arangte thokuh zah a ccia paw kha he muih`ae tuh, “Shawku lang raw khylan nynh a ccia,” cih`ae zah amaw kha a zui`ae. ³² Oute Meri nynh Jesu a umnaw kyakhe thua zah amaw kha he a muih tuh, a ccu leihpaw khe bakhung zah, “Bawipaw, e kya nang na um ze, ka raepaw a chih cih leipaw,” cite a hopya. ³³ Meri te amaw ryte oun thua`ae paw Jew`ae nynh a raw`ae paw kha Jesu nynh he a muih tuh myarya a thinlungccih zah a lungvawsaw. ³⁴ Te, “Teisangmou Lazaruh kha na ccy oh?” a ci. Minmin nynh, “Bawipaw, rang lah yn dotua,” a ci`ae. ³⁵ Jesu a rah. ³⁶ Oute Jew`ae nynh, “Dotua oh, Lazaruh kha pawcih babang mou a sungsah!” a ci`ae. ³⁷ Te abang nynh, “Mitmohpaw a mit a awsah paw e Ccungccapaw nynh Lazaruh kha chi leite umsah kho khyh tou?” a ci`ae. ³⁸ Tuhkoute Jesu tuh a thinlungccih ki zah shaw kalan a thua. Tuh-e shaw tuh lungkarung thua zah lung te phang a fu`ae. ³⁹ Jesu nynh, “Lung kha nue oh,” a ci. Te achihpaw a ccianung Martha nynh amaw kha, “Bawipaw, atu tuh phe thuh vae cih, pawccecize a chinaw te nin pali acih vae,” cite a hopya. ⁴⁰ Jesu nynh Martha kha, “Na zyn lanze Pachia phu-enaw na muih cih cite nang kha kae hopah khyh tou?” a cipya. ⁴¹ Oute minmin nynh achihpaw a ccynaw`ae kyate lung kha a nue`ae. Te Jesu nynh dothung zah, “Apang, ka bya nae thaepya vae keiccu na tungvaw ka lungtua. ⁴² Te ka bya hynh nang nynh pei leih nae thaepya cipaw ka ny; thuasalama ka pe thadyn paw ccungccaw`ae nynh kamaw tuh nang nynh na saw paw cipaw kha a zyn ccaw`ae cite, minmin khylan nynh hynhte ka ho,” a ci. ⁴³ Te hynhcihte Jesu nynh he a ho koute, “Lazaruh, yn pou!” cite thawte a sia. ⁴⁴ Te achihpaw ccungccapaw tuh yn pou zah a kuih te a ccu kha shaw uccaw te phang vekuh. A mae mah pavua te phang khiidekuh. Te Jesu nynh, “Amaw kha phoupah oh lah cceih sah,” a ci. ⁴⁵ Oute Meri kalan oun thua`ae paw Jew`ae patae nynh Jesu nynh a cyi paw uccaw kha muih`ae zah amaw kha a zyn`ae. ⁴⁶ Thuasalama ccungccaw abang tuh Farasi`ae kalan cceih`ae zah Jesu nynh a cyi paw uccaw kong kha a hopya`ae. ⁴⁷ Oute alepaw ranpibawi`ae te Farasi`ae nynh Sanhedrin kungsi meting ko`ae zah, “Aening nynh pawte cyi lan? Pawccecize e paw nynh muihsanaw`ae patae a langsaku vae. ⁴⁸ Amaw kha hynhcihte aening nynh ah sawphah oh lanze, ccungccaw balyn nynh amaw kha oun zyn cih`ae, te Rom`ae nynh oun thua cih`ae zah ah umnaw oh te ah minphuin hynh phe oun lawpah cih`ae,” a ci`ae. ⁴⁹ Te minmin lakuze tuh-e kum kya ranpibawi lupi lukheit athua paw Kaiafas nynh, “Nanning pawsang kharyh na nyh khyh oh. ⁵⁰ Minphuin khaleih aro khyh nawlan, ccungccaw lukheit nynh ccungccaw`ae hanlan a chi lanpaw tuh aening hanlan ahoyhua cipaw mah na tuase khyh oh,” a cipya`ae. ⁵¹ Te hynh-e bya hynh amaw kaw te ho khyh, thuasalama tuh-e kum kya ranpibawi athua thyhhawte, Jesu tuh kha-e minphuin hanlan yn chih vae cih cipaw te, ⁵² kha-e minphuin hanlan kyalya thua leite, phe a phiakuh`ae paw Pachia ccaaw`ae kha pynkheihlan suelua khylan, yn chih cih cipaw profehbya a ho paw nynh thua. ⁵³ Oute kha-e nin kyate vae tuh amaw kha chia lan minmin tuh khuakhankuh vae`ae. ⁵⁴ Tukeiccu Jesu tuh Jew`ae laku phe alangkuh lante cceih vae khyh, thuasalama tuin kyate rangkaw te anaekunaw Efrim cikuh paw khua lungkhu lang cceih zah tuin kya a zuitu`ae ryte a um`ae. ⁵⁵ Te Jew`ae Kawtaw Poi tuh nae vae zah ccungccaw patae nynh Kawtaw Poi maw mimaw te mimaw ccikanku khylan khua taraw kyate Jerusalem lang oun cceihthung`ae. ⁵⁶ Oute minmin nynh Jesu kha a ccung`ae; te tempal kin thadyn`ae zah, “Pawcihte na tua oh? Aning tuh poi kalan yn thuabua lan khyh tou?” cite mimaw te mimaw a hokuh`ae. ⁵⁷ Te alepaw ranpibawi`ae te Farasi`ae nynh, “Ccungccaw lukhakheit nynh Jesu kha teikya nynh um cipaw a ny lanze amaw kha kyng khylan, minmin kalan a thaesah cih,” cite kaw phe a pya vae`ae.

¹ Oute Kawtaw Poi azaw maw nin taruh ary kya, phe chih zah a chih`ae paw kyate a thosah paw Lazaruh umnaw Bethani khua khe Jesu yn thua. ² Tuin kya minmin nynh amaw kha zerya paccynpah`ae zah Martha tuh a thohae; thuasalama Lazaruh tuh Jesu ryte ccaboi kya a dahung`ae paw kya a umbua. ³ Oute Meri nynh myarya aphutepaw, accipaw spaiknard satho pound kheit kha lawkuh zah Jesu ccu kha thuh zah a ccu kha a sang te a fupya; te inn tuh satho myn te phe abeih. ⁴ Oute a zuitu`ae lukheit athua paw, Jesu kha a phee vae cih paw, Simon ccapaw Judas Iskaria nynh, ⁵ “Pawccemou hynh-e spaiknard satho hynh denari phua zathung lang a zua khyh, te ryachi`ae kha a pya khyh?” a ci. ⁶ Hynhte a hopaw tuh ryachi`ae hanlan a tua keiccu thua khyh, thuasalama aning tuh miruhpaw athua keiccu phua bawng kha ccy zah kha-e lungkhu lang a sang`ae paw kha leih a lawku keiccu nynh thua. ⁷ Oute Jesu nynh, “E nung hynh khamawte um sah; ka rhua ccy nin hanlan hynh-e hynh a cyi paw nynh thua. ⁸ Pawccecize ryachi`ae tuh nanning kya pei a um he`ae, thuasalama kae tuh nanning kya pei ka um lan khyh,” a ci. ⁹ Oute Jew ccungccaw`ae patae nynh Jesu tuh tuin kya a um cipaw a ny`ae, te minmin nynh Jesu a um keiccu kyalya thua leite a chih`ae paw kyate a thosah paw Lazaruh kha mah muih khylan cite oun thua`ae. ¹⁰ Thuasalama alepaw ranpibawi`ae nynh Lazaruh kha mah chia lan cite khuakhanku`ae. ¹¹ Pawkeiccumacize amaw keiccuze Jew`ae patae nynh pou`ae zah Jesu kha a zyn`ae. ¹² Tuh-e nin koute poi kalan oun thua`ae paw ccungccaw patae nynh Jesu Jerusalem lang yn thua cipaw he a thae`ae tuh, ¹³ saruitah ku ange`ae kha ccyngkute Jesu kha duehaw lan cceih`ae zah, “Hosanna! BAWIPAW min te yn thua paw Israel Siapharan tuh hythuaccou sah!” cite a sia`ae. ¹⁴ Te Jesu nynh anopaw lann kha he a muih tuh a tungvaw a cciku; tuh-e tuh; ¹⁵ “Zion ccanung rih nan; dotua, na Siapharan tuh anopaw lann tungvaw ccikute yn thua cciamang,” cite azeiku hawkhate nynh thua. ¹⁶ Hynh-e uccaw`ae kong hynh a zuitu`ae nynh atakaw lya tuh thaethya khyh`ae, thuasalama Jesu phu-esah he athua vae te, hynh-e uccaw`ae tuh amaw konglang azeikuh paw cipaw te hynh-e uccaw`ae tuh ccungccaw`ae nynh amaw kalan nynh a cyi`ae cipaw kha minmin nynh a liathui vae`ae. ¹⁷ Tukeiccu Jesu nynh shaw lungkhu kya-e Lazaruh kha ko zah a chih`ae paw kyate a thosah lyaze amaw ryte a um`ae paw ccungccaw`ae nynh amaw kong kha ccaekiakhan`ae. ¹⁸ Kha-e muihsanaw kha aning nynh phe a langsaku cipaw a thae`ae keiccu ccungccaw`ae nynh amaw kha a cciadue`ae. ¹⁹ Tukeiccu Farasi`ae nynh mimaw te mimaw laku, “Nanning nynh na tae vae lan khyh oh cipaw hynh nykuh oh, dotua oh, laephipi tuh amaw nuhlang nynh a zuiku vae!” cite a hoku`ae. ²⁰ Te Pachia beik khylan cite poi kalan oun thua`ae paw laku Greek`ae abang a umbua`ae. ²¹ Tukeiccu kha-e`ae nynh Galilee pee, Bethsaida khua paw Filip kalan oun thua`ae zah, “Bawihaepaw, kaening nynh Jesu kha kae muih ry,” cite a ngia`ae. ²² Filip nynh cceih zah Andru kha a hopya; te Andru te Filip nynh Jesu kha bua a hopya`ae. ²³ Te Jesu nynh minmin kha khung`ae zah, “Ccungccaw Ccapaw kha phu-esah nawlan accyh athua vae. ²⁴ Byaccaccing, byaccaccing kae hopya oh, chanvui ccacii nynh laephi lungkhu lang ccah khyh zah a chi khyh lanze amawte nynh phang a um; thuasalama a chi lanze athae patae a poukhae. ²⁵ Amaw hiinnaw kha a sungsahpaw ccungccaw tuh kha-e kha a shung cih; te hynh-e laephipi kya amaw hiinnaw kha a hua paw ccungccaw tuh kha-e kha zungzae hiinnaw hanlan a ccykuh cih. ²⁶ Ccungccaw lukhakheit nynh kamaw kha rya yn lawpya ze, kamaw hynh yn zui sah; te kamaw ka umnaw kya, rya yn lawpatu mah a umbua cih; lukhakheit nynh kamaw kha rya yn lawpya ze, kha-e paw kha ka Paaw nynh sawtuanaw a pya cih. ²⁷ “Atu ka hiinnaw-muisaw a lungriathae, te pawcihte ka ho cih? ‘Apang, hynh-e ccyh kyate yn khum,’ thuasalama e konglang nynh e ccyh kalan ka thua. ²⁸ Apang, na min hynh phu-esah,” a ci. Oute tuin kya vaawran kyate roi yn ccae zah, “Phe phu ka esah vae, te bua phu ka esah ung cih,” a ci. ²⁹ Tukeiccu tuin kya a thadyn`ae paw ccungccaw zapi nynh kha-e roi kha thae`ae zah, “Kholung thyh,” cite a ho`ae; abang nynh, “Vaaw ccungccapaw nynh amaw kalan byaho,” a ci`ae. ³⁰ Jesu nynh khung`ae zah, “Kamaw hanlan hynh-e roi tuh yn thua khyh, thuasalama nanning hanlan nynh yn thua. ³¹ Atu hynh-e laephipi tuh byapia athua, atu hynh-e laephipi uktu tuh ccaring dee athua cih. ³² Te kae tuh laephi kyate saethung ka thua vae ze, ccungccaw`ae balyn kha kamaw kalan ka dungbua cih`ae,” a ci. ³³ Hynh-e bya a hopaw tuh pawtahawpaw chinaw te nynh ka chih vae cih cipaw kha a langsapya`ae paw nynh thua. ³⁴ Ccungccaw`ae nynh amaw kha khung`ae zah, “Kri tuh zungzae atyn cih cite Kawbya kyate kaening nynh kae thae, te pawcihtemou nang nynh, ‘Ccungccaw Ccapaw tuh saethung yn thua cih,’ na cipaw tu? Tuh-e Ccungccaw Ccapaw tuh hungmou?” a ci`ae. ³⁵ Oute Jesu nynh, “Sosohtari kya awnaw tuh nanning kya a um, awnaw na hoi lya oh hin cceih oh, tukhyhze mohnaw nynh ae kyng sei cih oh, pawccecize mohnaw kya a cceih paw ccungccaw tuh teilang nynh ka ccia cipaw nykuh khyh. ³⁶ Awnaw na hoi lya oh hin awnaw ccaaw`ae na thua oh ccaw, awnaw kha zyn oh,” a cipya`ae. Jesu nynh hynh-e`ae a ho koute minmin kyate pou zah zya a rekuh. ³⁷ Jesu nynh muihsanaw`ae patae kha minmin malang a langsaku zemah minmin nynh amaw kha zyn khyh`ae. ³⁸ Profeh Isaiah nynh, “Bawipaw, kaening nynh kae hopaw bya kha hung nynh mou a zyn? BAWIPAW kuihthaw tuh hung kalan mou langsapyakute a um?” cite a hopaw bya accing nawlan nynh thua. ³⁹ Tukeiccu minmin nynh zyn kho khyh`ae; pawkeiccumacize Isaiah nynh bua a hopaw tuh; ⁴⁰ “Minmin nynh mih mit te a muih khyh nawlan`ae, mih thinlung te a thaethya khyh nawlan`ae, mih mit kha mohsah`ae zah mih thinlung kha a khungsah`ae, tukhyh lanze phe paleihkuh cih`ae zah phe ka dansah cih`ae paw,” a ci. ⁴¹ Isaiah nynh Bawipaw phuenaw kha he muih zah amaw konglang a ho lyakhe nynh hynhe bya`ae hynh a ho. ⁴² Tuhzemah uktu`ae patae nynh heize amaw kha a zyn`ae; thuasalama Farasi`ae keiccuze minmin nynh kae zyn cite ccaekiakhan khyh`ae. Ccaekiakhan`ae ze sinakok kyate phe a dee cih`ae. ⁴³ Pawccecize minmin tuh ccungccaw`ae nynh thehoysapaw kha Pachia nynh thehoysapaw laeze a ryhua`ae. ⁴⁴ Jesu nynh thawte sia zah, “Kamaw yn zyn paw ccungccaw tuh kamaw kyalya yn zyn paw thua khyh, thuasalama kamaw yn sawtupaw kha a zyn paw nynh thua. ⁴⁵ Te kamaw yn muih paw ccungccaw tuh kamaw yn sawtupaw kha a muih. ⁴⁶ Kamaw yn zyn paw miakaw nynh mohnaw kya pei a um khyh nawlan`ae kae tuh awnaw hawte laephipi kalan kae thua. ⁴⁷ “Te ccungccaw lukhakheit nynh ka bya thae zah a zyn khyh ze, amaw kha bya ka pia khyh; pawccecize kae tuh laephi ccungccaw`ae byapia khylan kae thua khyh, thuasalama laephi ccungccaw`ae khum khylan nynh kae thua. ⁴⁸ Kamaw kha yn vua zah ka bya a lawkuh leipaw ccungccaw kha byapia cih paw a um; ka hopaw ka bya ccaccei nynh amaw kha nyathyakou nin kya byapia cih. ⁴⁹ Pawccecize kamaw kaw te bya ka ho khyh, thuasalama kamaw yn sawtupaw ka Paaw nynh ka ho lanpaw te ka ccae lanpaw kha kaw phe yn pya vae. ⁵⁰ Te a kawpyapaw tuh zungzae hiinnaw nynh thua cipaw ka ny, tukeiccu ka hopaw miakaw tuh ka Paaw nynh kamaw kalan yn hopya thyhte nynh ka ho,” a ci.

¹ Kawtaw Poi a thua maw, Jesu nynh hynh-e laephipi kyate Paaw kalan a pou nawlan accyh azaw vae cipaw he a nyh tuh, laephipi kya a um`ae paw amaw a ccungccaw`ae kha sungsah`ae zah athangnaw cia minmin kha a sungsah`ae. ² Te zerya a ae`ae koute Jesu kha phee lan diabolos nynh Simon ccapaw Judas Iskaria thinlung lungkhu lang phe a sang vae. ³ Paaw nynh pawpaw balyn kha amaw kuih lungkhu lang marya a pya vae paw kha thuasah, aning tuh Pachia kyate yn thua paw kha thuasah, te Pachia kalan a ccia lanpaw kha thuasah Jesu nynh a ny pawte, ⁴ zerya aenaw kyate thokuh zah avawlan e uccaw`ae kha khakuh zah fukunawpaw pavua kha lawkuh zah a cce kya a veku. ⁵ Tuhkoute tui kha pakekhupaw lungkhu lang ccae zah a zuitu`ae ccu kha a singpya`ae, te a cce kya a vekupaw fukunawpaw pavua khate a fupya`ae. ⁶ Te Simon Piter kya he a thua tuh, Piter nynh, “Bawipaw, nang nynh ka ccu nae sing cih tou?” a ci. ⁷ Te Jesu nynh khung zah, “Ka cyi paw hynh atu nang nynh na nyh khyh, thuasalama nyalang nae nyh cih,” a cipya. ⁸ Piter nynh amaw kha, “Nang nynh ka ccu kharyh nae sing lan khyh!” a cipya. Jesu nynh khung zah, “Nang kha kae sing khyh ze, nang tuh kamaw te na sekuh bua lan khyh,” a cipya. ⁹ Simon Piter nynh, “Bawipaw, ka ccu kyalya thua leite ka kuih te ka lu kha mah yn sing bia,” a cipya. ¹⁰ Jesu nynh, “Tui phe singkuh vae paw ccungccaw tuh khaleih phe thyaa vae zah a ccu kyalya nynh sing aho vae; te nanning tuh na thyaa vae oh, thuasalama nae balynte tuh na thyaa khyh oh,” a cipya. ¹¹ Pawccecize hung nynh amaw kha yn phee cih cipaw phe a ny vae; tukeiccu nynh, “Nae balynte tuh na thyaa khyh oh,” a ci. ¹² Te mih ccu`ae kha phe a sing koute, a uccaw kha lawkuh zah bua a dahung, te, “Nanning kya ka cyi paw hynh na nyh oh tou? ¹³ Nanning nynh kamaw hynh Ccangpatu cite, Bawipaw cite nae ko oh; te na ho oh paw tuh akyhpaw nynh thua, pawccecize kae tuh ka thua sasaw. ¹⁴ Oute nae Bawipaw te Ccangpatu ka thua pite, kae nynh nae ccu`ae kha kae singpya oh ze, nanning mah lukheit te lukheit nae ccu`ae na singpyaku oh aho. ¹⁵ Pawccecize nanning kya ka cyi hawte nanning nynh mah na cyibua oh ccaw cite dosuinku lanpaw phe kae pyasya vae oh. ¹⁶ Byaccaccing, byaccaccing kae hopya oh, see tuh a bawipaw laeze lehua khyh, saw paw ccungccaw mah a sawtupaw laeze lehua khyh. ¹⁷ Hynh-e uccaw`ae kong hynh na nyh oh zah na cyi oh lanze nanning tuh hythuaccoupaw nynh na thua oh. ¹⁸ “Nanning balynte asekuh lante ka ho khyh, ka po`ae paw kha ka ny`ae, thuasalama Ccathyaa accing nawlan, ‘Kamaw ryte sanlou a aekheih paw nynh kamaw kha rawsete a ccu yn hangnua,’ cikuh paw Ccathyaa accing nawlan nynh thua. ¹⁹ Tuh-e he yn cyiku vae ze kae tuh aning nynh ka thua cipaw nae zyn nawlan oh, kha-e acyiku maw atu nanning kae hopya oh. ²⁰ Byaccaccing, byaccaccing kae hopya oh, ka saw paw lehkhan paw ccungccaw tuh kamaw kha yn lehkhan; te kamaw yn lehkhan paw ccungccaw tuh kamaw yn sawtupaw kha a lehkhan paw nynh thua,” a cipya`ae. ²¹ Jesu nynh tuhte he a ho koute, a muisaw a lungvawsaw zah, “Byaccaccing, byaccaccing kae hopya oh, nanning laku-e lukheit nynh kamaw hynh yn ah cih,” cite ccaekiakhan zah a ho. ²² Oute zuitu`ae tuh lukheit te lukheit dokuh`ae zah hung vema a honuathe cite a tuakuh`ae. ²³ Zuitu`ae laku Jesu nynh a sungsahpaw lukheitpaw tuh Jesu by kya phang a ngeikuh. ²⁴ Tukeiccu hung vema a honuathe cipaw kha a khia ccaw cite Simon Piter nynh kha-e paw kha syntawnaw a pya. ²⁵ Oute Jesu by kya a ngeikuh paw nynh, “Bawipaw, aning tuh hungmou athua?” cite Jesu kha a khia. ²⁶ Jesu nynh, “Aning tuh sanlou paekia kha moh he ka dung te ka pya cih paw ccungccaw nynh athua,” cite a khung. Te sanlou paekia kha moh dung zah kha-e kha Simon ccapaw Judas Iskaria kha a pya. ²⁷ Te sanlou paekia kha Judas nynh a lawkuh koute Setan nynh a lungkhu lang a tee vae. Te Jesu nynh, “Na cyi paw kha arangte cyih,” a cipya. ²⁸ Pawkeiccumou e bya hynh kha-e paw kalan a ho cipaw kha ccaboi kya a ae`ae paw laku lukheit nynh sanmah nyh khyh`ae. ²⁹ Pawccecize Judas Iskaria tuh phua bu a ccytu thua keiccuze, Jesu nynh amaw kha, “Poi kya ah hanlan ahopaw uccaw`ae kha la re,” a cipya, tukhyhze ryachi`ae kha ccangkhakheit a pya ccaw cite nynh, hynhte a hopya cite abang nynh a tua`ae. ³⁰ Oute Judas Iskaria tuh sanlou paekia kha he a lawkuh koute vaekheihmawte po a pou; tuh-e ccyh tuh khuazi nynh thua. ³¹ Tuhte aning he a pou tuh Jesu nynh, “Atu Ccungccaw Ccapaw tuh phu-esah thua vae zah Pachia mah Ccungccaw Ccapaw liate phu-esah athua vae. ³² Pachia tuh Ccungccaw Ccapaw liate phu-esah thua ze, Pachia nynh mah aning kha amaw ccaccei kya phu-esah cih, te aro mawze Ccungccaw Ccapaw kha phu-esah cih. ³³ “Ccaaw taraw`ae, kae tuh nanning ryte sosoh taraw nynh ka um cih. Nanning nynh kamaw kha nae ccung cih oh, te, ‘Ka ccianaw lang nanning nae thua kho lan khyh oh,’ cite Jew`ae kha ka hopya vae`ae hawte, atu nanning mah kae hopya oh. ³⁴ “Nanning lukheit te lukheit sungsakuh oh. Kae nynh nanning kae sungsah oh hawte nanning mah lukheit te lukheit na sungsaku nawlan oh athawpaw kawpyapaw kha nanning kae pya oh. ³⁵ Nanning nynh lukheit te lukheit sungsakunaw na hoi oh ze, kha-e liate ccungccaw`ae balyn nynh nanning tuh kamaw zuitu`ae cipaw ae nyh cih oh,” a cipya`ae. ³⁶ Simon Piter nynh, “Bawipaw, teilangmou na cceih cih?” cite a khia. Jesu nynh, “Ka ccianaw lang atu nang nynh nae zui kho lan khyh, thuasalama nyalang nang nynh nae zui cih,” cite a khung. ³⁷ Piter nynh amaw kha, “Bawipaw, pawccemou atu nang kae zui kho lan khyh? Na hanlan ka hiinnaw ka pyakuh cih,” a cipya. ³⁸ Jesu nynh khung zah, “Ka hanlan na hiinnaw tuh na pyakuh cih tou? Byaccaccing, byaccaccing kae hopya, nang nynh kamaw hynh vaethung nae vua cia awkhungpaw yn khua la lan khyh.

¹ “Nae thinlung vawsaw nan sah, Pachia kha zyn oh lah kamaw mah oun zyn oh. ² Ka Paaw inn kya umnaw khaan patae a um; a um khyh lanze um khyh cipaw phe kae hopah vae cih oh. Nanning hanlan umnaw paccyn khylan ka la cceih cih. ³ Te kae nynh ka cceih zah nanning hanlan umnaw he kae paccyn vae ze, bua kae thua cih zah nanning kha kamaw kalan kae hoeibua cih oh, ou khate kamaw ka umnaw kya nanning mah na umbua ccaw oh. ⁴ Te teilang nynh ka ccia cipaw na nyh oh zah ccianaw kha na ny oh,” a ci. ⁵ Thomas nynh, “Bawipaw, teilang nynh na ccia cipaw kae nyh khyh, te pawtemou ccianaw tuh kae nyh kho cih?” a cipya. ⁶ Jesu nynh, “Kae tuh laanpi byaccing te hiinnaw nynh ka thua; kamaw leite tuh hung ccungccaw nynh sanmah Paaw kalan thua kho khyh. ⁷ “Nanning nynh kamaw hynh phe nae ny oh ze, ka Paaw kha mah phe na nyh cih oh paw; te atu kyate Paaw kha na nyh oh zah amaw kha phe na muih vae oh,” a ci. ⁸ Filip nynh, “Bawipaw, Paaw kha kaening oun muihsah lah tuh-e tuh kaening hanlan azaw vae,” a cipya. ⁹ Jesu nynh, “Nanning ryte kae tuh khaw cia ka um vae, te kamaw hynh nae nyh loh khyh oh tou Filip? Kamaw phe yn muih vae paw ccungccaw tuh Paaw kha mah phe a muih vae; te pawcihtemou nang nynh, ‘Paaw kha kaening oun muihsah,’ na cipaw tuh? ¹⁰ Kae tuh Paaw kya ka um zah Paaw tuh kamaw kya a um cipaw hynh na zyn khyh tou? Nanning kalan ka hopaw bya`ae hynh kamaw kaw te ka ho khyh, thuasalama kamaw kya a um paw Paaw nynh ryalaw a lah. ¹¹ Kae tuh Paaw kya ka um cipaw te Paaw tuh kamaw kya a um cipaw hynh oun zyn oh, tukhyh zemah kha-e ryalaw`ae keiccu kamaw hynh oun zyn oh. ¹² Byaccaccing, byaccaccing kae hopya oh, kamaw yn zyn paw ccungccaw tuh ka cyi paw ryalaw`ae kha a cyihbua cih; te hynh-e`ae lae alepaw ryalaw kha mah a cyi cih; pawkeiccumacize kae tuh ka Paaw kalan ka cceih cih. ¹³ Te Paaw tuh Ccapaw kya phu-e a ccou nawlan nanning nynh ka min te nae ngia oh paw miakaw kha kae cyipah cih oh. ¹⁴ Nanning nynh ka min te ccangkhakheit nae ngia oh ze, nae ngia oh paw kha kae cyipah cih oh. ¹⁵ “Nanning nynh kamaw hynh nae sungsah oh ze ka kawpyapaw`ae hynh zui oh. ¹⁶ Te kae nynh Paaw kha kae ngia cih zah aning nynh ccangpaw Pangkhaetu kha nanning ae pya cih oh, ou tuhte aning tuh nanning ryte zungzae a um ccaw. ¹⁷ Aning tuh byaccing nysatupaw Muisaw nynh thua, tuh-e Muisaw tuh laephi ccungccaw`ae nynh ccou kho khyh`ae, pawkeiccumacize amaw kha muih khyh`ae zah nyh khyh`ae; thuasalama nanning nynh amaw kha na ny oh, pawccecize aning tuh nanning ryte um zah nanning kya a um cih. ¹⁸ Ngawraw`ae hawte nanning kha kae cciataw lan khyh oh; nanning kalan bua kae thua cih. ¹⁹ Sosoh acih koute laephi ccungccaw`ae nynh kamaw hynh oun muih vae lan khyh`ae, thuasalama nanning nynh tuh nae muih cih oh, pawkeiccumacize kae tuh ka hiin, nanning mah na hiinbua cih oh. ²⁰ Tuh-e nin kya kae tuh ka Paaw kya ka um paw te nanning kamaw kya na um oh paw, te kae nanning kya ka um paw kha nanning nynh nae nyh cih oh. ²¹ Ka kawpyapaw`ae kha hoi zah kha-e`ae a zui paw ccungccaw tuh kamaw yn sungsahpaw nynh thua, te kamaw yn sungsahpaw kha ka Paaw nynh a sungsah cih, te kae nynh mah ka sungsah cih zah kamaw kha a kalan ka muihsakuh cih,” a ci. ²² Iskaria athua leipaw, ccangpaw Judas nynh amaw kha, “Bawipaw, namaw kha laephi ccungccaw`ae muihsaku leite pawcihtemou kaening kha nae muihsakuh vae cih?” a cipya. ²³ Jesu nynh khung zah, “Ccungccaw lukhakheit nynh kamaw yn sungsah lanze, ka bya`ae kha a ngae cih; te ka Paaw nynh amaw kha a sungsah cih, te kaening nynh amaw kalan kae thua cih zah amaw ryte umnaw kae raekuh cih. ²⁴ Kamaw yn sungsah leipaw ccungccaw nynh tuh ka hopaw bya kha ngae khyh, te na thae oh paw bya hynh kamaw kya-e thua khyh, thuasalama kamaw yn sawtupaw ka Paaw kya-e nynh thua. ²⁵ “Nanning ryte phang ka um lya hynh-e uccaw`ae kong hynh nanning kae hopya vae oh. ²⁶ Thuasalama ka min liate Paaw nynh yn saw lanpaw Pangkhaetu, Thyaa Muisaw nynh pawpaw balyn ae ccangpah cih oh zah nanning kae hopya oh paw miakaw kha ae liathuisah cih oh. ²⁷ Daenaw nanning kya kae cciatawpya oh, ka kya-e daenaw kha nanning kae pya oh; laephi ccungccaw`ae nynh a pya`ae hawte nanning kae pya khyh oh. Nae thinlung vawsaw nan sah lah ri mah rih nan sah. ²⁸ “ ‘Kae ka la cceih cih zah nanning kalan bua kae thua cih,’ cite kae hopya oh paw kha phe na thae vae oh. Nanning nynh kamaw hynh nae sungsah oh ze, ‘Paaw kalan ka cceih cih,’ ka ci keiccu tuh nae lungtua cih; pawccecize ka Paaw tuh kae laeze a lesaehua. ²⁹ Te kha-e he yn cyiku vae ze, nanning nynh na zyn nawlan oh, kha-e acyiku maw atu nanning kha phe kae hopya vae oh. ³⁰ Atu koute kae tuh nanning ryte bya patae ka ho vae lan khyh, pawccecize hynh-e laephipi uktupaw tuh yn thua cciamang, tuhzemah aning nynh kamaw kya pawsang mah kaw hoi khyh. ³¹ Thuasalama kae nynh Paaw kha ka sungsah cipaw te, Paaw nynh kamaw kha kaw yn pya thyhhawte kae nynh ka cyi cipaw kha laephi ccungccaw`ae nynh a ny nawlan`ae nynh thua. Thokuh oh, e kyate cceih ccavae oh sih.

¹ “Kae tuh misu ku ccaccing nynh ka thua, te ka Paaw tuh khokhu dooihtupaw nynh thua. ² Kamaw kya athae thae leipaw aran miakaw kha aning nynh phya bae kou, te athae thae paw aran miakaw kha houh a thae nawlan teihpah zah a ccikanpya. ³ Kae hopya oh paw bya liate atu nanning tuh na thyaa vae oh. ⁴ Kamaw kya tyn oh lah kae mah nanning kya ka tyn cih. Aran nynh misu ku kya atyn khyh lanze amaw te amaw athae thae kho khyh hawte, nanning mah kamaw kya na tyn khyh oh ze na thae kho lan khyh oh. ⁵ “Kae tuh misu ku, nanning tuh aran`ae; kamaw kya atynpaw ccungccaw tuh kae mah amaw kya ka tyn, kha-e paw tuh athae patae thae; pawccecize kamaw leite nanning nynh pawsang na cyih kho khyh oh. ⁶ Ccungccaw lukheit nynh kamaw kya atyn khyh lanze aning tuh aran hawte ccaring vua athua, te karae arou; khahtahawpaw aran`ae kha ccungccaw`ae nynh suelua`ae zah maee lungkhu lang moh phung`ae, te maee nynh pung a u. ⁷ Nanning nynh kamaw kya na tyn oh zah ka bya`ae nynh nanning kya atyn ze, na ry oh paw kha nae ngia cih oh zah kha-e kha nanning hanlan cyipya athua cih. ⁸ Nanning nynh athae patae na thae oh liate ka Paaw tuh phu-esah athua, ou tuhte nanning tuh ka zuitu`ae na thua cih oh. ⁹ “Paaw nynh kamaw kha yn sungsah hawte nanning kha kae sungsah oh; ka sungsanaw kyahin tyn oh. ¹⁰ Kae nynh ka Paaw kawpyapaw`ae kha ka zui zah a sungsanaw kya ka tyn hawte nanning nynh ka kawpyapaw`ae hynh na zui oh ze ka sungsanaw kya na tyn cih oh. ¹¹ Nanning kya ka lungtuanaw a um nawlan te nae lungtuanaw phe accing nawlan nynh hynh-e bya`ae hynh kae hopya oh. ¹² Ka kawpyapaw tuh e hynh nynh thua, kae nynh nanning kae sungsah oh hawte nanning mah lukheit te lukheit sungsakuh oh. ¹³ Ccungccaw lukheit nynh a ban`ae hanlan a hiinnaw pyakupaw, hynh-e lae ale huapaw sungsakunaw tuh hung ccungccaw nynh sanmah hoi khyh. ¹⁴ Kaw kae pya oh paw miakaw kha nanning nynh na cyi oh ze nanning tuh ka ban`ae nynh na thua oh. ¹⁵ Atu te nanning hynh see`ae kae ci vae khyh oh; pawccecize see nynh tuh a bawipaw nynh a cyi paw kha nyh khyh; thuasalama nanning kha ka ban`ae kae ci vae oh; pawccecize ka Paaw kyate ka thae paw balyn kha nanning kalan marya kae nysah oh. ¹⁶ Nanning nynh kamaw hynh nae pokuh khyh oh; thuasalama kae nynh nanning kha kae po oh; te nanning nynh na cceih oh zah athae na thae nawlan oh, te nanning nae thae tuh atyn nawlan, te nanning nynh ka min te Paaw kya-e na ngiaku oh paw miakaw aning nynh ae pya nawlan oh nanning kha kae khang vae oh. ¹⁷ Nanning lukheit te lukheit na sungsaku nawlan oh hynh-e`ae hynh kaw kae pya oh. ¹⁸ “Laephi ccungccaw`ae nynh nanning kha ae hua oh ze, nanning kha ae hua maw oh khe kamaw kha oun hua`ae cipaw la nyh oh. ¹⁹ Nanning tuh laephipi kya-e na thua oh ze, laephipi nynh amaw kya-e tuh a sungsah cih; thuasalama nanning tuh laephipi kya-e na thua khyh oh keiccu, te kae nynh laephipi kyate phe kae po vae oh, tukeiccu nynh laephipi nynh nanning kha ae hua oh. ²⁰ ‘See tuh a bawipaw laeze lehua khyh,’ cite kae hopya oh paw ka bya kha liathui oh. Minmin nynh kamaw kha oun tua oun sah`ae ze nanning kha mah ae tua ae sah cih oh; minmin nynh ka bya kha a ngae`ae ze nanning bya kha mah a la ngae cih`ae. ²¹ Thuasalama kamaw min keiccuze minmin nynh hynh-e`ae balyn hynh nanning kalan a la cyi cih`ae, pawkeiccumacize minmin nynh kamaw yn sawtupaw kha nyh khyh`ae. ²² Kae nynh kae thua khyh zah mih kalan ka la ho khyh zetuh minmin tuh seinaw la hoi lan khyh`ae paw, thuasalama atu mih seinaw hanlan a dansaku nawlan`ae paw hoi khyh`ae. ²³ Kamaw yn hua paw ccungccaw tuh ka Paaw kha mah a hua paw nynh thua. ²⁴ Hung ccungccaw nynh sanmah a cyi leipaw ryalaw`ae kha minmin laku kae nynh phe ka la cyi khyh ze, minmin tuh seinaw la hoi lan khyh`ae paw, thuasalama atu minmin nynh phe muih vae`ae zah kamaw te ka Paaw kha paryh oun hua`ae. ²⁵ Thuasalama, ‘Akong um leite kamaw hynh minmin nynh oun hua`ae,’ cite mih Kawbya kya azeikuh paw bya accing nawlan nynh hynh-e hynh acyikuh. ²⁶ “Thuasalama Paaw kyate nanning kalan kae nynh kae saw lanpaw, Paaw kyate yn pou paw, byaccing Muisaw athua paw, Pangkhaetu tuh he yn thua vae ze, aning nynh kamaw kong kha ccaekia yn khan cih. ²⁷ Te atakaw te kamaw ryte na um oh keiccuze nanning mah ccaekia na la khan cih oh.

¹ “Nanning nae lungthang khyh nawlan hynh-e bya`ae hynh kae hopya oh. ² Minmin nynh nanning kha sinakok kyate ae dee cih oh; athua, nanning ae theih oh paw ccungccaw nynh Pachia rya nynh ka law cite a tuaku ccyh tuh yn thua vae cih. ³ Te minmin nynh Paaw kha nyh khyh`ae zah kamaw mah oun ny khyh`ae keiccuze hynh-e uccaw`ae hynh oun cyih cih`ae. ⁴ Thuasalama accyh he yn thua te hynh-e`ae kong kha phe kae hopya vae oh cipaw nanning nynh na liathui nawlan oh hynhe` ae hynh nanning kae hopya vae oh. Te kae tuh nanning ryte ka um keiccuze atakaw lyakha hynh-e`ae hynh nanning kae hopah khyh oh. ⁵ “Thuasalama atu kamaw yn sawtupaw kalan ka cceih cih; te nanning lakuze hung nynh sanmah, ‘Teilangmou na cceih cih?’ cite kamaw hynh nae khia khyh oh. ⁶ Thuasalama hynh-e uccaw`ae kong nanning kalan phe kae hopya vae oh keiccuze nae thinlung kya ngaethyanaw phe abeih. ⁷ Tuhzemah byaccing kha nanning kae hopya oh, nanning thanenaw hanlan ka la cceih cih; pawccecize kae nynh ka ccia khyh ze Pangkhaetu nanning kalan yn thua lan khyh, thuasalama ka ccia ze amaw kha nae kalan kae saw cih. ⁸ Te aning he yn thua te, aning nynh laephi ccungccaw`ae kha seinaw kong, dingnaw kong te byapianaw kong kha oun nysakuh cih`ae. ⁹ Minmin nynh kamaw kha yn zyn khyh`ae keiccuze seinaw kong kha a nysakuh cih`ae. ¹⁰ Kae nynh ka Paaw kalan ka cceih cih zah nanning nynh kamaw hynh nae muih vae lan khyh oh keiccuze dingnaw kong kha a nysakuh cih`ae. ¹¹ Hynh-e laephipi uktupaw tuh byapia athua vae keiccuze byapianaw kong kha a nysakuh cih`ae. ¹² “Nanning kalan ho lanpaw patae ka hoi ung, thuasalama nanning nynh kha-e`ae kha atu na lawkuh kho loh khyh oh. ¹³ Tuhzemah byaccing kya-e Muisaw he yn thua te nanning kha byaccing balyn lungkhu lang ae cciakhae cih oh, pawccecize aning nynh amaw a kaw te yn ho lan khyh; thuasalama aning nynh a thae paw miakaw kha yn ho cih; te yn thua lanpaw uccaw`ae kha ae hopah cih oh. ¹⁴ Aning nynh kamaw kha phu-enaw yn pya cih, pawccecize aning nynh kamaw kya-e kha yn lawkuh cih zah kha-e kha nanning kalan ae hopah cih oh. ¹⁵ Paaw nynh a hoi paw uccaw balyn tuh kamaw kya-e cci nynh thua; tukeiccu, ‘Aning nynh kamaw kya-e kha yn lawkuh cih zah kha-e kha nanning kalan ae hopah cih oh,’ cite kae hopya oh. ¹⁶ “Sosoh cihte nanning nynh kamaw hynh nae muih vae lan khyh oh; te sosoh cihte nanning nynh kamaw hynh bua nae muih cih oh, pawkeiccumacize kae tuh ka Paaw kalan ka cceih cih,” a ci. ¹⁷ Oute amaw zuitu`ae abang nynh, “ ‘Sosoh cihte nanning nynh kamaw hynh nae muih vae lan khyh oh, te sosoh cihte nanning nynh kamaw hynh bua nae muih cih oh, pawkeiccumacize kae tuh ka Paaw kalan ka cceih cih,’ cite aening kalan hynh-e a ho paw hynh pawmou a hory?” cite mimaw te mimaw laku a hokuh`ae. ¹⁸ Tukeiccu minmin nynh, “Aning nynh, ‘Sosoh cihte,’ cite hynh-e a hopaw hynh pawmou a hory? A hopaw bya hynh ah nyh khyh oh,” a ci`ae. ¹⁹ Minmin nynh amaw kha byakhia a ry`ae cipaw Jesu nynh phe nyh zah minmin kha, “ ‘Sosoh cihte nanning nynh kamaw hynh nae muih vae lan khyh oh, te sosoh cihte nanning nynh kamaw hynh bua nae muih cih oh,’ cite ka hopaw kong naemaw te naemaw tou na khiakuh oh? ²⁰ Byaccaccing, byaccaccing kae hopya oh, nanning tuh nae rah nae khui cih oh, thuasalama laephi ccungccaw`ae tuh mih lungtua cih; te nanning tuh nae ngaethah cih, thuasalama nae ngaethyanaw tuh lungtuanaw lang yn tang cih. ²¹ Nopinung nynh neitangia he cci vae ze ngaethyanaw a hoi, pawccemacize amaw ccyh phe azaw vae, thuasalama imua ccahe yn pui vae tetuh a vawsawnaw kha kharyh liathui vae khyh, pawccecize laephipi kalan ccungccaw lukheit a pui paw lungtuanaw keiccu nynh thua. ²² Tukeiccu nynh nanning mah atu ngaethyanaw na hoi oh; thuasalama kae nynh nanning kha bua kae muih cih oh zah nae lung oun tua cih, te nae lungtuanaw kha hung ccungccaw nynh san nae kyate ae lawpah lan khyh oh. ²³ Te tuh-e nin kya nanning nynh kamaw hynh pawsang nae khia vae lan khyh oh. Byaccaccing, byaccaccing kae hopya oh, ka min te nanning nynh Paaw kalan nae ngiaku oh paw miakaw kha aning nynh ae pya cih oh. ²⁴ Atu cia nanning nynh ka min te pawsang na ngia khyh oh, nae lungtuanaw phe accing nawlan ngia oh lah na mue cih oh. ²⁵ “Hynh-e uccaw`ae hynh nanning kalan tousenaw bya te nynh kae hopya oh; thuasalama nanning kalan tousenaw bya te kae hopya vae khyh oh ccyh yn thua cih, thuasalama Paaw kong kha ccaerarihlan kae hopah cih oh. ²⁶ Tuh-e nin kya nanning nynh ka min te nae ngia cih oh; te nanning hanlan Paaw kalan kae ngiapah cih oh cite nanning kae hopah khyh oh; ²⁷ pawccecize Paaw amaw ccaccei nynh nanning kha ae sungsah oh, pawkeiccumacize nanning nynh kamaw hynh nae sungsah oh zah kae tuh Pachia kyate nynh kae thua cipaw kha na zyn oh. ²⁸ Kae tuh Paaw kyate kae pou zah laephipi kalan kae thua vae; laephipi kyate bua ka pou cih zah Paaw kalan ka cceih ung cih,” a cipya`ae. ²⁹ A zuitu`ae nynh amaw kha, “Dotua, atu nang tuh tousenaw bya mang vae leite ccaerarihlan nynh na ho. ³⁰ Nang tuh pawpaw balyn na nyh zah hung ccungccaw nynh sanmah nang hynh byakhia ho vae khyh cipaw atu kae ny vae. Hynh-e liate nang tuh Pachia kyate nae thua paw cipaw kaening nynh kae zyn,” a cipya`ae. ³¹ Jesu nynh minmin kha khung`ae zah, “Atu na zyn oh tou? ³² Dotua oh, nanning milu raveih nynh naemaw umnaw raveih lang nae phiakuh cih oh zah ka makhaete nae ccuetaw cih oh paw ccyh tuh yn cceih zah atu yn thua vae; tuhzemah kae tuh ka makhae thua khyh, pawkeiccumacize kamaw kha Paaw nynh yn umkhae. ³³ “Nanning nynh kamaw kya daenaw na hoi nawlan oh hynh-e bya`ae hynh nanning kae hopya oh, laephipi kya nanning nynh vawsawnaw na la tung cih oh; thuasalama nae thawmuin sah; laephipi tuh phe ka tae vae,” a ci.

¹ Hynh-e bya`ae hynh he a ho koute Jesu nynh vaawran lang dothung zah, “Apang, accyh phe azaw vae; na Ccapaw nynh namaw kha phu ae esah nawlan na Ccapaw hynh phu-esah. ² Ccungccaw balyn tungvaw kya kawhoinaw kha amaw phe na pya vae hawte, nang nynh Ccapaw kalan na pya`ae paw ccungccaw miakaw kha Ccapaw nynh zungzae hiinnaw a pya nawlan Ccapaw hynh phuesah. ³ Te zungzae hiinnaw tuh e hynh nynh thua, ahmepaw Pachia nang kyalya te nang nynh na saw paw Jesu Kri hynh minmin nynh a ny`ae paw kha nynh thua. ⁴ Laephi vawlan namaw kha kae nynh phu phe kae esah vae; ka cyi lanpaw, nae pya paw ryalaw kha phe ka thangsah vae. ⁵ Te Pou Apang, laephipi a um mawze namaw ryte ka hoi vae paw phuenaw khate namaw ccaccei nynh atu phu yn esah. ⁶ “Laephipi kyate nang nynh kamaw nae pya paw ccungccaw`ae kalan na min kha phe ka langsah vae, minmin tuh na kya-e thua`ae zah kamaw kha nae pya; minmin nynh na bya kha a ngae`ae. ⁷ Nang nynh kamaw nae pya paw balyn tuh namaw kyate nynh yn thua cipaw kha atu minmin nynh phe a ny vae`ae. ⁸ Pawccecize nang nynh kamaw nae pya paw bya`ae kha kae nynh minmin kha ka pya`ae, te minmin nynh a lawku`ae, te kae tuh namaw kyate ka thua paw cipaw phe nyh ccaccing`ae zah kae tuh namaw nynh nae saw cipaw minmin nynh a zyn`ae. ⁹ Minmin hanlan saw ka sang; laephi ccungccaw`ae hanlan saw ka sang khyh; thuasalama nang nynh kamaw nae pya paw ccungccaw`ae hanlan nynh saw ka sang, pawccecize minmin tuh namaw kya-e nynh thua`ae. ¹⁰ Te kamaw kya-e balyn tuh namaw kya-e thua zah na kya-e tuh ka kya-e nynh thua, te minmin kya kae tuh phu-esah ka thua. ¹¹ Te atu te kae tuh laephipi kya ka um vae lan khyh, thuasalama minmin tuh laephipi kya nynh um`ae, te kae tuh namaw kalan kae cceih cih. Athyaapaw Apang, aening tuh ccangkheit ah thua hawte, nang nynh kamaw nae pya paw ccungccaw`ae nynh ccangkheit athua nawlan`ae minmin kha namaw min kya khynsah`ae. ¹² E laephipi kya minmin ryte ka um lyaze minmin kha na min kya ka khynsah`ae; ronaw ccapaw holeite nang nynh nae pya`ae paw ccungccaw`ae kha ka khynsah`ae zah hung sanmah ka zosah khyh, ou tuhte Ccathyaa accing nawlan. ¹³ “Te atu na kalan kae cceih vae cih zah minmin nynh kamaw kya-e lungtuanaw hynh mimaw kya phe beih lang a hoi nawlan`ae hynh-e uccaw`ae kong hynh laephipi kya ka ho. ¹⁴ Na bya kha minmin phe ka pya vae`ae; te laephi ccungccaw`ae nynh minmin kha a hua`ae, pawkeiccumacize kae tuh laephipi kya-e ka thua khyh hawte minmin mah laephipi kya-e thua khyh`ae. ¹⁵ Laephipi kyate minmin hynh nang nynh na law ccaw`ae cite kae ngia khyh, thuasalama ahoy leipaw kyate minmin kha na khynsah ccaw`ae cite nynh kae ngia. ¹⁶ Kae tuh laephipi kya-e ka thua khyh hawte minmin mah laephipi kya-e thua khyh`ae. ¹⁷ Na byaccing liate minmin hynh thyaasah`ae. Na bya tuh byaccing nynh thua. ¹⁸ Nang nynh kamaw hynh laephipi kalan nae saw hawte kae nynh mah minmin hynh laephipi kalan ka saw`ae. ¹⁹ Te byaccing liate minmin mah thyaasah athua nawlan`ae, minmin hanlan kamaw te kamaw kha ka thyaasaku. ²⁰ “Hynh-e`ae hanlan kyalya saw ka sang khyh, thuasalama minmin mih bya liate kamaw oun zyn cih`ae paw hanlan mah saw ka sang. ²¹ Nang nynh kamaw hynh nae saw cipaw laephi ccungccaw`ae nynh a zyn nawlan`ae, Apang, nang tuh kamaw kya na um zah kae tuh namaw kya ka um hawte, minmin mah aening kya pynkheit athua nawlan`ae, minmin balyn tuh pynkheit athua nawlan`ae saw ka sang. ²² Te aening tuh pynkheit ah thua hawte, minmin mah pynkheit athua nawlan`ae nang nynh nae pya vae paw phuenaw kha kae nynh minmin ka pya`ae. ²³ Minmin tuh pynkheit kya ccingsah athua nawlan`ae, kae minmin kya ka um zah nang kamaw kya na um, te nang nynh kamaw hynh nae saw cipaw te nang nynh kamaw hynh nae sungsah hawte minmin mah na sungsah`ae cipaw laephi ccungccaw`ae nynh a ny nawlan`ae, saw ka sang. ²⁴ Apang, nang nynh kamaw nae pya paw ka phu-enaw kha minmin nynh a muih bua ccaw`ae, nang nynh kamaw nae pya paw ccungccaw`ae mah ka umnaw kya kamaw ryte a umbua ccaw`ae ci ka ry, pawccecize laephipi atho mawze nang nynh kamaw hynh phe nae sungsah vae. ²⁵ Pou adingpaw Apang! Laephi ccungccaw`ae nynh namaw hynh ae nyh khyh`ae, thuasalama kae nynh namaw kha kae nyh zah nang nynh kamaw hynh nae saw cipaw hynh-e`ae nynh a ny`ae. ²⁶ Nang nynh kamaw nae sungsanawpaw sungsanaw tuh minmin kya a um nawlan, te kae minmin kya ka um nawlan, na min kha minmin kalan kae nynh phe ka nysah vae`ae zah bua ka nysah cih`ae,” a ci.

¹ Hynh-e bya`ae hynh Jesu nynh he a ho koute, a zuitu`ae ryte Kedron vaw khuraw lang a zua`ae, tuin kya khokhu ccangkheit um zah a zuitu`ae ry tuh-e lungkhu lang a tee`ae. ² Te amaw a pheetupaw Judas Iskaria mah tuh-e ahmin kha a nyh; pawccecize Jesu tuh a zuitu`ae ryte khalang khe pei leih a tungkuh he`ae. ³ Oute Judas tuh alepaw ranpibawi`ae te Farasi`ae nynh oun saw`ae paw tempal ngawtu`ae te rhawkawphu phukheit kha oun cciakhae`ae zah maeekhua ry, maeeccaw ry zunghe`ae ryte khalang khe oun thua`ae. ⁴ Jesu nynh amaw tungvaw yn thua lanpaw uccaw balyn kha marya a ny keiccu cceih zah minmin kha, “Hungmou na ccung oh?” cite a khia`ae. ⁵ Minmin nynh, “Nazareth paw Jesu,” cite a khung`ae. Jesu nynh minmin kha, “Kae tuh tuh-e paw nynh ka thua,” a cipya`ae. Te amaw a pheetupaw Judas Iskaria mah minmin ryte a thadyn bua. ⁶ Minmin kha, “Kae tuh tuh-e paw nynh ka thua,” cite he a hopah`ae tuh, minmin tuh nuhlang thungkuh`ae zah laephi kya a khuliakuh`ae. ⁷ Oute Jesu nynh, “Hungmou na ccung oh?” cite minmin kha bua a khia`ae. Te minmin nynh, “Nazareth paw Jesu nynh kae ccung,” a ci`ae. ⁸ Jesu nynh, “Kae tuh tuh-e paw nynh ka thua cite phe kae hopya vae oh, tukeiccu nanning nynh kamaw hynh nae ccung oh ze, hynh-e ccungccaw`ae tuh la cceih`ae sah,” cite a khung`ae. ⁹ “Nang nynh kamaw nae pya paw ccungccaw`ae kha hung sanmah ka zosah khyh`ae,” cite amaw nynh a hopaw bya accing nawlan nynh hynhte a ho. ¹⁰ Oute Simon Piter nynh a ccyngkupaw thaloi kha thuakuh zah ranpibawi a seepaw kha thoh bae zah a ranglang nakua thoh pae. Tuh-e seepaw a min tuh Malkhas acikuh. ¹¹ Oute Jesu nynh Piter kha, “Na thaloi kha a bu lungkhu lang sang, ka Paaw nynh kamaw yn pya paw banang tuh ka neih lan khyh tou?” a cipya. ¹² Oute rhawkawphu`ae, rhawbawi`ae te Jew`ae kya-e tempal ngawtu`ae nynh Jesu kha kyng`ae zah a khii`ae. ¹³ Te Annas kalan masaty a cciakhae`ae, pawccecize Annas tuh tuh-e kum kya ranpibawi lupi Kaiafas a zu paaw nynh thua. ¹⁴ Atu Kaiafas tuh ccungccaw`ae hanlan ccungccaw lukheit nynh a chi lanze ahoyhua cite Jew`ae kalan khuakhankhaetu kha nynh thua. ¹⁵ Te Simon Piter te ccangpaw zuitu lukheit nynh Jesu kha a zui`ae; tuh-e zuitu tuh ranpibawi lupi nynh a ny paw thua zah Jesu ryte ranpibawi lupi umnaw maepaw lungkhu lang a tee`ae. ¹⁶ Thuasalama Piter tuh thuakaw pe atolang khe a thadyn. Tukeiccu ranpibawi lupi nynh a ny paw tuh-e ccangpaw zuitu tuh pou zah thuakaw a ngawtu nopinung kha hopah zah Piter kha a teekhae. ¹⁷ Oute thuakaw a ngawtu nopinung nynh Piter kha, “Nang so hynh-e ccungccapaw zuitu`ae kyaze lukheit na thuabua khyh tou?” cite a khia. Piter nynh, “Ka thua khyh,” a ci. ¹⁸ Te see`ae te tempal ngawtu`ae tuh maeehue maeetuakuh`ae zah tuin kya a thadyn`ae; pawccecize tuh ccyh lya tuh akyaa, te minmin tuh maee ekuh`ae, te Piter tuh minmin ryte thadyn zah maee ekuhbua. ¹⁹ Oute ranpibawi lupi nynh Jesu kha a zuitu`ae konglang te a ccangpyanaw konglang bya a khia. ²⁰ Jesu nynh, “Laephi ccungccaw`ae kalan alangkuh lante phe ka ho vae; Jew`ae pynkheihlan pei leih tungkunaw`ae sinakok kya, te tempal voidu kya pei ka ccangpah`ae zah aphiru lante pawsang mah ka ho khyh. ²¹ Pawccemou kamaw hynh nae khia? Kae nynh minmin kalan paw nynh ka ho cipaw kha kamaw kya-e a thae paw ccungccaw`ae kha khia`ae; dotua, minmin nynh ka hopaw kha a ny`ae,” cite a khung. ²² Te tuhte he a ho tuh a pe thadyn paw tempal ngawtu lukheit nynh, “Nang nynh ranpibawi lupi kha tuhte cceih na khung ii?” cite Jesu kha a kuihphe te a bia. ²³ Jesu nynh, “Kae nynh ahoy leipaw ka ho ze ahoy khyhnaw kong ccaekia yn langsapah; thuasalama ahoypaw ka ho ze pawccemou nang nynh nae bia?” cite a khung. ²⁴ Te Annas nynh Jesu kha phang a hee`ae mawte ranpibawi lupi Kaiafas kalan a ky. ²⁵ Tuh ccyh lya Simon Piter tuh thadyn zah maee a ekuh. Tukeiccu minmin nynh, “Nang mah amaw zuitu`ae kyaze lukheit na thuabua khyh tou?” cite a khia`ae. “Ka thua khyh,” cite Piter nynh bua a ci. ²⁶ Piter nynh a nakua thoh pae lang a bae paw, vaeccaw athua paw ranpibawi see`ae lukheit nynh, “Nang tuh Jesu ryte khokhu kya na um oh paw kha kae muih khyh ngaw ii?” a ci. ²⁷ Oute Piter nynh bua a ei, te vaekheihmawte awkhungpaw a khua. ²⁸ Oute minmin nynh Jesu kha Kaiafas kyate Byapianaw Khaan lang a cciakhae`ae; te tuh ccyh tuh awkhua takaw nynh thua, te mimaw tuh Kawtaw Poi toobua lan a nouku`ae pawte phe kae thusei cih cite Byapianaw Khaan lungkhu lang teebua khyh`ae. ²⁹ Tukeiccu Pilat nynh minmin kalan toikuh zah, “Hynh-e ccungccapaw tungvaw paw seibenaw mou na hoi oh?” a ci. ³⁰ Minmin nynh khung`ae zah, “Aning tuh ccungccahoy leipaw athua khyh lanze na kalan kaening nynh kae ah lan khyh,” a cipya`ae. ³¹ Oute Pilat nynh minmin kha, “Amaw hynh nanning nynh lawkuh oh lah nae kawbya thyhte amaw kha byapia oh,” a cipya`ae. Tukeiccu Jew`ae nynh, “Kaening tuh hung ccungccaw sanmah chianaw kaw kae hoi khyh,” cite a khung`ae. ³² Tuhte a ho`ae paw tuh, Jesu nynh pawtahawpaw chinaw te nynh amaw kha ka chih vae cih cipaw a muihsah paw, Jesu nynh a hopaw bya accing nawlan nynh thua. ³³ Oute Pilat tuh Byapianaw Khaan lungkhu lang bua tee zah Jesu kha ko zah, “Nang hynh Jew`ae Siapharan na thua tou?” cite a khia. ³⁴ Jesu nynh, “Hynh-e bya hynh namaw lungte na ho paw tou? Tukhyhze mingccang`ae nynh tou kamaw kong hynh nang ae hopah`ae?” cite a khung. ³⁵ Pilat nynh, “Kae tuh Jew paw lukheit ka thua tou? Na ccungccaw`ae te alepaw ranpibawi`ae nynh nang kha kamaw kalan ae ah`ae, nang nynh pawmou phe na cyi?” cite a khia. ³⁶ Jesu nynh, “Ka peenaw tuh hynh-e laephipi kya-e thua khyh, ka peenaw tuh hynh-e laephipi kya-e athua ze kae tuh Jew`ae kalan ah ka thua khyh nawlan ka ccungccaw`ae nynh rhaw phe oun tukpah cih`ae; thuasalama atu ka peenaw tuh hynh-e kya thua khyh,” cite a khung. ³⁷ Tukeiccu Pilat nynh amaw kha, “Tuhte lanze nang tuh siapharan tou na thua?” a cipya. Jesu nynh, “Siapharan nynh ka thua cipaw na ho latu. Byaccing kalan ccaekiakhan khylan kae tuh kae pui zah hynh-e khylan nynh laephipi kalan kae thua. Byaccing te asekuhpaw ccungccaw miakaw nynh ka bya hynh a ngae,” cite a khung. ³⁸ Pilat nynh, “Byaccing tuh pawmou?” cite a khia. Te hynh-e a ho koute Pilat tuh Jew`ae kalan bua cceih zah minmin kha, “Amaw nynh a cyiseimenaw kharyh ka muih khyh. ³⁹ “Thuasalama Kawtaw Poi kya ccungccaw lukheit kha nanning kalan kae luesahpya he oh paw aphung kha na hoi oh; tukeiccu Jew`ae Siapharanpaw hynh nanning kalan kae luesahpya oh ze na ry oh tou?” a cipya`ae. ⁴⁰ Oute minmin balyn nynh, “Hynh-e paw kae luesah ry khyh, thuasalama Barabbas nynh kae luesah ry,” cite bua sia`ae. Tuh-e Barabbas tuh damiah nynh athua.

¹ Oute Pilat nynh Jesu kha lawsah`ae zah liarue te a buasah`ae. ² Te rhawkaw`ae nynh hingpaw lukhung kha khepah`ae zah a lu vawlan khungsah`ae, te minmin nynh sekakungpaw boeikhua kha a tungvaw zingsah`ae zah ³ “Jew`ae Siapharanpaw salan kae pya!” a ci`ae. Te minmin nynh mih kuih te amaw kha a bia`ae. ⁴ Tukeiccu Pilat nynh bua toikuh zah, “Dotua oh, amaw kya cyiseimenaw kharyh ka muih khyh cipaw nanning nynh na ny nawlan oh amaw hynh nae kalan kae cciakhae,” a cipya`ae. ⁵ Oute Jesu tuh hingpaw lukhung khungkuh zah sekakungpaw boeikhua zingkute yn pou. Te Pilat nynh minmin kha, “E ccungccapaw hynh la do oh!” a cipya`ae. ⁶ Tukeiccu alepaw ranpibawi`ae te tempal ngawtu`ae nynh Jesu kha he muih`ae tuh, “Amaw kha khiade oh, amaw kha khiade oh!” cite a sia`ae. Pilat nynh minmin kha, “Nanning nynh amaw hynh lawkuh oh lah khiade oh, kae tuh amaw kya cyiseinaw kharyh ka muih khyh,” a cipya`ae. ⁷ Jew`ae nynh, “Kaening nynh kawbya ccangkheit kae hoi, te kae kawbya liate aning tuh chi lan accan, pawkeiccumacize aning nynh amaw te amaw kha Pachia Ccapaw a ciku,” cite a khung`ae. ⁸ Tukeiccu Pilat nynh tuh-e bya he a thae tuh houh a rih. ⁹ Te Byapianaw Khaan lungkhu lang bua tee zah Jesu kha, “Nang hynh paw kyate mou nae thua?” cite a khia. Thuasalama Jesu nynh kaw kheit san khung khyh. ¹⁰ Oute Pilat nynh amaw kha, “Kamaw kalan bya na ho khyh tou? Kae tuh nang khiadenaw kaw te luesanaw kaw ka hoi paw hynh na nyh khyh tou?” a cipya. ¹¹ Jesu nynh, “Vaaw langte nang hynh kawpya athua khyh ze nang nynh ka tungvaw kya paw kaw sanmah na hoi kho khyh, tukeiccu nang na kalan kamaw yn ah paw ccungccaw tuh ale huapaw seinaw a hoi,” cite a khung. ¹² Te tuin ccyh kyate tho zah Pilat nynh Jesu kha luesanaw a ccung; thuasalama Jew`ae nynh, “E ccungccapaw hynh nang nynh na luesah lan thua ze, nang tuh Sizar banpaw na thua khyh; hunghung zemah amaw te amaw siapharan lang a tangsakuhpaw tuh Sizar kha rawsete bya ho paw nynh thua,” cite a sia`ae. ¹³ Tukeiccu Pilat nynh tuh-e bya he a thae tuh Jesu kha poukhae zah Hebru bya te Gabbatha cikuh zah, ‘Lungphae’ a ci`ae paw, byapianaw tungkhung kya a dahung. ¹⁴ Te tuh-e ccyh tuh Kawtaw Poi hanlan paccynnaw nin thua zah suimilan taruhnaw loukaw nynh thua, te Pilat nynh Jew`ae kha, “Nae Siapharanpaw hynh dotua oh!” a cipya`ae. ¹⁵ Thuasalama minmin nynh, “Amaw kha poukhae oh, amaw kha poukhae oh, amaw kha khiade oh!” cite a sia`ae. Pilat nynh, “Nae Siapharanpaw tuh ka khiade cih tou?” cite a khia`ae. Alepaw ranpibawi`ae nynh, “Sizar laelan kaening siapharan kae hoi khyh!” cite a khung`ae. ¹⁶ Tukeiccu Pilat nynh Jesu kha khiade khylan rhawkaw`ae kalan a ah. Te minmin nynh Jesu kha lawkuh`ae zah a cciakhae`ae. ¹⁷ Te Jesu tuh a vaelantung puihkute ‘Luru hmin’ a ci`ae paw ahmin kalan a cceih, tuh-e hmin tuh Hebru bya te ‘Golgotha’ cikuh. ¹⁸ Tuin kya minmin nynh Jesu kha ccangpaw ccungccaw luning ryte a khiade`ae, te a voilang lukheit a ranglang lukheit, Jesu tuh angaelaku nynh a um. ¹⁹ Te Pilat nynh ccawtawpya paw ccangkheit zei zah vaelantung vawlan khe a taw. Ccawtawpya paw kya azeikuh paw tuh, “JEW`AE SIAPHARAN, NAZARETH PAW JESU,” ci nynh thua. ²⁰ Oute hynh-e ccawtawpya paw hynh Jew`ae patae nynh a ria`ae. Pawccecize Jesu a khiadenaw`ae ahmin tuh khua kyate anaekuh, te tuh-e ccawtawpyapaw tuh Hebru bya, Greek bya, Latin bya te zei athua. ²¹ Oute Jew`ae kyaze alepaw ranpibawi`ae nynh Pilat kha, “ ‘Jew`ae Siapharanpaw,’ cite zei nan, thuasalama aning nynh, ‘Kae tuh Jew`ae Siapharan nynh ka thua,’ a ci, cite zei,” a cipya`ae. ²² Pilat nynh, “Phe ka zei vae paw tuh phe ka zei vae,” cite a khung`ae. ²³ Oute rhawkaw`ae nynh Jesu kha he a khiade`ae koute a uccaw`ae kha lawkuh`ae zah zung pali lang phia`ae zah lukheit ze zungkheit cci te a neeku`ae, te a angkiccua kha mah a khah`ae; tuh-e angkiccua tuh asuikunaw um leite alu te alia cia akuakuhpaw nynh thua. ²⁴ Tukeiccu minmin nynh, “E tuh phia nan oh sih, thuasalama hungmou a ccou cih cipaw ccungthy dung oh sih,” cite lukheit te lukheit a hokuh`ae. Tuh-e tuh, “Minmin nynh ka uccaw kha a neeku`ae, te ka uccaw kya minmin nynh ccungthy a dung`ae,” cite Ccathyaa nynh a hopaw accing nawlan nynh thua. Tukeiccu nynh rhawkaw`ae nynh hynhte a cyi`ae. ²⁵ Tuh ccyh lya Jesu vaelantung pe khe Jesu a nung, a nung neitanung, Kleofas zu Meri, te Meri Magdalin a thadyn`ae. ²⁶ Tukeiccu Jesu nynh a nung te amaw nynh a sungsahpaw zuitu a thadyn`ae paw kha he a muih tuh, a nung kha, “Nopinung, na ccapaw kha la do!” a cipya. ²⁷ Oute zuitu kha, “Na nung kha la do!” a cipya. Te tuh-e suimilan ccyh kyate tuh-e zuitu nynh a nung kha amaw a inn lang a cciakhae. ²⁸ Hynh-e koute, pawpaw balyn tuh atu marya accing vae cipaw Jesu nynh nyte, Ccathyaa accing nawlan, “Ka tuihaw,” a ci. ²⁹ Te tuin kya ariapaw misutui phe beihpaw lungre zungkheit a um, te minmin nynh phuesi tungkheit kha ariapaw misutui lungkhu lang moh dung`ae zah hyssop aran kya hede`ae zah Jesu a mung kalan a nungde`ae. ³⁰ Tukeiccu Jesu nynh ariapaw misutui kha a lyatua koute, “Athang vae,” a ci; te a lu tuh ting zah a muisaw kha a ah vae. ³¹ Tuh-e nin tuh Paccynku Nin thua zah awkhualan Sabbath nin tuh nin lesaepaw athua keiccuze, Jew`ae nynh michi rhua`ae kha Sabbath nin kya tuh vaelantung vawlan phang a um vae khyh ccaw cite, mih ccu`ae kha khyasah lan te mih rhua`ae kha law athua ccaw cite Pilat kha a ngiaku`ae. ³² Oute rhawkaw`ae nynh oun thua`ae zah Jesu ryte a khiade`ae paw lukheitpaw ccu kha a khya`ae, te ccangpaw ccu kha mah a khya`ae. ³³ Thuasalama minmin nynh Jesu kya he thua`ae tuh phe chih vae cipaw kha muih`ae zah a ccu kha khya vae khyh`ae. ³⁴ Thuasalama rhawkaw`ae kyaze lukheit nynh a naw kya ccoi te thuin zah chii te tui palou a pou. ³⁵ Te kha-e a muih paw ccungccaw nynh ccaekiakhan, te a ccaekia tuh ahme, te nanning nynh na zyn nawlan oh aning nynh a hopaw tuh ahme cipaw kha aning nynh a ny. ³⁶ Pawccecize hynh-e uccaw`ae acyikupaw tuh, “Amaw a ru ccangkheit san khya thua lan khyh,” acikuh paw Ccathyaa accing nawlan nynh thua. ³⁷ Te ccangpaw kya Ccathyaa nynh, “A thuin`ae paw ccungccapaw kha ccungccaw`ae nynh oun do cih`ae,” bua a ci. ³⁸ Te hynh-e koute, Jew`ae rawri keiccu aphiru lante Jesu zuitu athua paw, Arimathia khua paw Josef nynh Jesu rhua kha lawku lan Pilat kha a ngiaku, te Pilat nynh a ua. Tukeiccu aning nynh cceih zah Jesu rhua kha a lawku. ³⁹ Te langmaw lya khuazi Jesu kalan a thua paw Nikodemas mah pound zakheit loukaw aripaw mura te aloe a pydekuhpaw mynkhuhpaw kha yn ccyng zah tuhlang yn thuabua. ⁴⁰ Oute minmin nynh Jesu rhua kha laah`ae zah Jew`ae rhuaccykunaw phung thyhte, mynkhuhpaw ryte boei nebaleihpaw te a rhua kha a lung`ae. ⁴¹ Atu Jesu a khiadenaw`ae hmin kya khokhu ccangkheit a um, te tuh-e khokhu kya ccungccaw lukheit san a ccynaw boi loh lei`ae paw athawpaw shaw ccangkheit a um. ⁴² Jew`ae Paccynku Nin athua keiccu te shaw tuh anae keiccu tuin kyakhe Jesu rhua kha minmin nynh a ccy`ae.

¹ Lonaw nawkheit kyaze masaty nin awkhua takaw, phang amoh ung lyakhe Meri Magdalin tuh shaw kalan yn thua zah a fu`ae paw lung kha shaw kyate phe a nuekuh paw kha a muih. ² Oute Meri tuh ccue zah Simon Piter te Jesu nynh a sungsahpaw ccangpaw zuitu kalan thua zah minmin kha, “Ccungccaw`ae nynh Bawipaw rhua kha shaw kyate phe a law vae`ae, te paw kya nynh amaw kha a nung`ae cipaw kae nyh khyh,” a cipya`ae. ³ Tukeiccu Piter te tuh-e ccangpaw zuitu tuh thokuh`ae zah shawku kalan a cceih`ae. ⁴ Te mih luning te paryh ccue`ae zah ccangpaw zuitu nynh Piter kha po thoih zah shaw kalan masaty a thua. ⁵ Te baling zah a do tuh nebaleihpaw boei phang a um paw kha a muih, tuhzemah a lungkhu lang tee khyh. ⁶ Oute Simon Piter tuh yn dekuh bua zah yn thua, te shaw lungkhu lang po tee zah uccaw rawpaw amaw te phang a um paw kha a muih. ⁷ Te a lu henawpaw pavua tuh nebaleihpaw boei ryte pynkheihlan um leite a makhaete phang bikuh paw kha a muih. ⁸ Oute shaw kalan masaty a thua paw, tuh-e ccangpaw zuitu mah teebua zah a muih tuh a zyn. ⁹ Pawccecize aning tuh a chih`ae paw kyate bua a tho hahe cih cipaw Ccathyaa kha minmin nynh la nyh loh khyh`ae. ¹⁰ Oute zuitu`ae tuh mimaw mih inn lang bua a ki`ae. ¹¹ Thuasalama Meri tuh shaw atolang khe rawte phang thadyn, te a rah lalia lante baling zah shaw lungkhu lang a do. ¹² Te Jesu rhua a ccynaw`ae kyakhe, a lu lang lukheit, a ccu lang lukheit, vaaw ccungccaw`ae luning nynh arawpaw uccaw lawkute a dahung`ae paw kha a muih. ¹³ Te minmin nynh Meri kha, “Nopinung, pawccemou na raw?” a cipya`ae. Meri nynh, “Ccungccaw`ae nynh ka Bawipaw kha phe a law vae`ae, te pawkya nynh a nung`ae cipaw ka ny khyh keiccu nynh ka raw,” cite a khung`ae. ¹⁴ Te tuhte aning nynh he a ho koute, nuhlang khe maeleihkuh zah Jesu a thadyn paw kha a muih, tuhzemah Jesu nynh thua cipaw nyh khyh. ¹⁵ Jesu nynh, “Nopinung, pawccemou na raw? Hungmou na ccung?” a cipya. Meri nynh khokhu ngawtupaw vosi cite tua zah amaw kha, “Bawihaepaw, hynh-e kyate amaw kha phe na cciakhae vae thua ze, teisangmou na nung kamaw hynh beih yn hopah lah kae nynh amaw kha ka lawkuh cih,” a cipya. ¹⁶ Jesu nynh, “Meri!” cite a ko. Meri nynh maeleihkuh zah amaw kha, “Rabboni!” a ci, (tuh-e tuh Ccangpatu cipaw nynh thua). ¹⁷ Jesu nynh, “Yn tung nan hin, pawccecize kae tuh ka Paaw kalan ka kaethung loh khyh, thuasalama ka neitaw`ae kalan la cceih lah, kae tuh ka Paaw te nanning nae Paaw, ka Pachia te nanning nae Pachia kalan ka kaethung cih cipaw kha minmin kha la hopah`ae,” a cipya. ¹⁸ Meri Magdalin nynh cceih zah Bawipaw kha phe ka muih vae cipaw, te Bawipaw nynh hynh-e bya`ae hynh ka kalan yn hopya cipaw kha zuitu`ae kalan a hopya`ae. ¹⁹ Oute lonaw kyaze masaty nin athua paw tuh-e nin kya zete he athua tuh, Jew`ae rawri keiccuze zuitu`ae pynkheihlan a sueluakunaw`ae kya thuakaw`ae kha pung he a khaw`ae tuh, Jesu yn thua zah angaelaku khe thadyn zah minmin kha, “Daenaw nae kya um sah,” a cipya`ae. ²⁰ Te tuhte he a ho te, a kuih te a naw kha minmin kalan a muihsah`ae. Oute zuitu`ae nynh Bawipaw kha he muih`ae tuh mih lungtua. ²¹ Oute Jesu nynh minmin kha, “Daenaw nae kya um sah; ka Paaw nynh kamaw hynh yn saw hawte, nanning kha kae saw oh,” bua a cipya`ae. ²² Te hynh-e he a ho koute, Jesu nynh minmin tungvaw hysaw zah, “Nanning nynh Thyaa Muisaw hynh mue oh; ²³ nanning nynh ccungccaw lukhakheit seinaw`ae kha na ngaethya oh ze, mih seinaw`ae tuh ngaethya athua, nanning nynh lukhakheit seinaw`ae kha na tynsah oh ze, mih seinaw`ae tuh phang atyn,” a cipya`ae. ²⁴ Thuasalama luhaw laening kyaze lukheit athua paw Didymas cikuh paw Thomas tuh Jesu a thua lya zuitu`ae ryte umbua khyh. ²⁵ Tukeiccu ccangpaw zuitu`ae nynh, “Kaening nynh Bawipaw kha phe kae muih vae,” cite a hopya`ae. Thuasalama aning nynh, “A kuih kya-e thingkhia vaemaw ka muih khyh ze, thingkhia vaemaw lungkhu lang ka kuihdung te ka putua khyh ze, a naw lungkhu lang ka kuih te ka putua khyh ze ka zyn lan khyh,” a ci. ²⁶ Te nin tarya acih koute a zuitu`ae tuh inn lungkhu lang bua um`ae zah Thomas mah minmin ryte a umbua, thuakaw`ae tuh phang khawkuh pite Jesu yn thua zah angaelung khe thadyn zah, “Daenaw nanning kya um sah,” a ci. ²⁷ Oute aning nynh Thomas kha, “Na kuihdung kha hynhlang yn putua lah ka kuih`ae hynh dotua, te na kuih kha hynhlang yn dyng lah ka naw lungkhu lang putua, te zyn leite um nan, thuasalama zyn ccavae,” a cipya. ²⁸ Te Thomas nynh, “Ka Bawipaw te ka Pachia,” cite amaw kha a khung. ²⁹ Jesu nynh, “Thomas, nang tuh kamaw hynh nae muih keiccuze na zyn, kamaw hynh yn muih leite a zyn`ae paw tuh hythuaccou`ae paw nynh thua,” a cipya. ³⁰ Te hynh-e ccauh kya azeikuh leipaw ccangpaw muihsanaw`ae patae kha mah Jesu nynh a zuitu`ae mitmuihnaw kya a langsaku ccaccing. ³¹ Thuasalama Jesu tuh Kri, Pachia Ccapaw nynh thua cipaw nanning nynh na zyn nawlan oh, te tuhte na zyn oh zah amaw min liate nanning nynh hiinnaw na hoi ccaw oh cite nynh hynh-e`ae tuh zei athua.

¹ Hynh-e`ae koute Tiberias rili pe khe Jesu nynh zuitu`ae kalan amaw te amaw kha bua a langkuh, te a langkupaw tuh hynhcihte nynh athua: ² Simon Piter te Didymas cikuh paw Thomas, te Galilee pee Kana khuapaw Nathania, te Zebedi ccaaw`ae, te ccangpaw a zuitu`ae luning pynkheihlan la um`ae. ³ Simon Piter nynh minmin kha, “Ngasaw kyng lan ka cceih cih,” a cipya`ae. Minmin nynh, “Kaening mah kae cceihbua cih,” a ci`ae. Minmin tuh cceih`ae zah kohlung lungkhu lang vaekheihmawte a tee`ae, te kha-e khuazi tuh zawkheit san kyng khyh`ae. ⁴ Thuasalama khua he yn dae tuh Jesu tuh varan langkhe phang thadyn; thuasalama zuitu`ae nynh Jesu nynh thua cipaw nyh khyh`ae. ⁵ Oute Jesu nynh minmin kha, “Ka ccaaw oh, ae lanpaw ccangkhakheit san na hoi oh tou?” cite a khia`ae. Minmin nynh, “Kae hoi khyh,” cite a khung`ae. ⁶ Te Jesu nynh minmin kha, “Kohlung ranglang khe mia kha vua oh lah na kyng cih oh,” a cipya`ae. Tukeiccu minmin nynh mia kha vua`ae zah ngasaw eih lung keiccu mih mia kha sue kho vae khyh`ae. ⁷ Tukeiccu Jesu nynh a sungsah paw tuh-e zuitu nynh Piter kha, “E tuh Bawipaw nynh thua,” a cipya. Tukeiccu Simon Piter nynh Bawipaw nynh thua cipaw he a thae tuh avawlan e angki kha kikuh zah, (pawccecize ryalaw lya angki phe phaeku), rili lungkhu lang a sakuh bung. ⁸ Te ccangpaw zuitu`ae tuh ngasaw`ae kha mia ryte oun dungbia`ae zah kohlung taraw te oun thua`ae, pawccecize minmin tuh varan langte eih sawkuh khyh`ae, dung zaning loukaw nynh a sawkuh`ae. ⁹ Varan lang he oun thua`ae tuh tuin kya maeehue maee-e, te kha-e vawlan ngasaw ruakuh paw, te sanlou kha a muih`ae. ¹⁰ Jesu nynh minmin kha, “Atu na kyng oh paw ngasaw abang kha oun cciakhae oh,” a cipya`ae. ¹¹ Simon Piter nynh kohlung kalan kae zah alepaw ngasaw zakheit sungpangaw zawthung te phe beihpaw mia kha varan langkhe a dung, te ngasaw patae aci zemah mia tuh pae khyh. ¹² Jesu nynh minmin kha, “Rang oh lah awkhua looh hynh oun ae oh,” a cipya`ae. Bawipaw nynh athua cipaw kha a ny`ae keiccu zuitu`ae kyaze hung nynh sanmah, “Nang hungmou na thua?” cite khia ngan vae khyh`ae. ¹³ Oute Jesu nynh yn thua zah sanlou kha laah zah minmin kha a pya`ae, tuhhawte ngasaw kha mah a pya`ae. ¹⁴ Hynh-e tuh Jesu a chih`ae paw kyate a thothui koute a zuitu`ae kalan amaw a langkupaw vaethungnaw nynh thua. ¹⁵ Awkhua looh kha a ae`ae koute Jesu nynh Simon Piter kha, “Jonah ccapaw, Simon, hynh-e`ae nynh oun sungsah`ae laeze kamaw hynh nae sungsah tou?” cite a khia. Simon nynh, “Ou, Bawipaw, nang kae sungsah cipaw namaw phang na nyh,” a ci. Jesu nynh, “Ka tuutaw`ae kha looh la dang`ae,” a cipya. ¹⁶ Jesu nynh, “Jonah ccapaw, Simon, kamaw hynh nae sungsah tou?” cite vaeningnaw bua a khia. Simon nynh amaw kha, “Ou, Bawipaw, nang kae sungsah cipaw namaw phang na nyh,” a cipya. Jesu nynh, “Ka tuu`ae kha la dooih`ae,” a cipya. ¹⁷ Jesu nynh, “Jonah ccapaw, Simon, kamaw hynh nae sungsah tou?” cite vaethungnaw bua a khia. Bawipaw nynh, “Kamaw hynh nae sungsah tou?” cite vaethung cia a khia keiccu Piter a thinlungccih. Te Piter nynh amaw kha, “Bawipaw, nang tuh pawpaw balyn marya na ny, nang kae sungsah cipaw namaw phang na nyh,” a cipya. Jesu nynh, “Ka tuu`ae kha looh la dang`ae. ¹⁸ Byaccaccing, byaccaccing kae hopya, na no lya tuh namaw te namaw na cciakuh cih zah na rynaw lang na cceih cih, thuasalama he nae taw vae tetuh na kuih`ae kha na zo cih zah ming`ae nynh ae hede cih`ae zah na ry leinaw lang ae cciakhae cih`ae,” a cipya. ¹⁹ Jesu nynh hynh-e a hopaw tuh pawtahawpaw chinaw te nynh Piter nynh Pachia kha phu yn esah cih cipaw a langsapya paw nynh thua. Te hynhte he a ho koute, Jesu nynh Piter kha, “Kamaw hynh yn zui,” a cipya. ²⁰ Oute langmaw lya zerya aenaw kya Jesu by kha ngeikuh zah, “Bawipaw, nang ae phee cih paw tuh hungmou?” cite a khiatu, Jesu nynh a sungsahpaw zuitu mah yn zuiku bua paw kha Piter nynh maeleihkuh zah a muih. ²¹ Kha-e paw kha Piter nynh he a muih tuh Jesu kha, “Bawipaw, hynh-e paw so pawcihte athua cih?” cite a khia. ²² Jesu nynh, “Kamaw kae thua cia aning kha ka umsah ry ung ze, nang te pawmou asekuh? Nang tuh kamaw hynh yn zui,” a cipya. ²³ Oute hynh-e bya tuh uteno`ae laku kya, “Tuh-e zuitu tuh chih lan khyh a ci,” cite athaan; thuasalama aning tuh chih lan khyh cite Jesu nynh a kalan ho khyh, thuasalama, “Kamaw kae thua cia aning kha ka umsah ry ung ze, nang te pawmou asekuh?” cite rou nynh a ho. ²⁴ Hynh-e`ae kong ccaekiakhan paw tuh tuh-e zuitu thua zah hynh-e`ae kong a zeitu nynh thua, te a ccaekia tuh ahme cipaw kaening nynh kae ny. ²⁵ Te Jesu nynh a cyi paw ccangpaw uccaw mah patae a um ung, kha-e`ae kha khaleih zei athua ze, zeinaw lanpaw ccauh`ae kha laephipi nynh heize ccung kho lan khyh cite nynh ka tua. Amen.