James

¹ Pachia te Bawipaw Jesu Kri seepaw kae James nynh pung pazaekuh lang a phiakuh`ae paw Israel phin haw laening kha kae beihlang oh. ² - ³ Ka uteno`ae, nae zynnaw kya-e syntawnaw nynh lungsaenaw kha a poukhae cipaw kha nyte, syntawnaw`ae aphuinphuin lungkhu lang he na phungku vae oh ze, kha-e kha marya lungtuanaw lang la ria oh. ⁴ Thuasalama nanning nynh pawsang hobounaw um leite khaleih phe na ccing nawlan oh, lungsaenaw nynh amaw kya-e accingpaw ryalaw kha hoi sah. ⁵ Nanning laku lukhakheit nynh hawnaw abou lanze, seibe leipaw, ccungccaw balyn kha hysate a pyatupaw Pachia kha aning nynh ngiakuh sah, te kha-e kha amaw kalan pya athua cih. ⁶ Thuasalama lunghiinnaw hoi leite, zynnaw te ngiakuh sah. Pawccecize lunghiinnaw a hoi paw tuh khivae nynh mung zah athekuhpaw rili kya-e tuileih te nynh aloku. ⁷ Pawccecize tuhte a um paw tuh-e ccungccapaw nynh tuh Bawipaw kyate ccangkhakheit ka mue cih cite tuakuh nan sah. ⁸ Tuanawthinlung apheipaw ccungccaw tuh a ccianaw balyn kya atyn leipaw nynh thua. ⁹ Zakawsang paw uno nynh tuh amaw hangthung athuanaw kyakhe lungtua sah. ¹⁰ Thuasalama mihoipaw nynh tuh amaw sawbungnaw kyakhe lungtua sah. Pawccemacize loo kya-e haetapaw hawte aning tuh azo cih. ¹¹ Pawccecize khuanin nynh asopaw ryte ccahe apaw tuh kha-e nynh lonua kha naansah zah kha-e apaw tuh akhuakuh, te apuithyapaw a muinsan tuh azo; tuhhawte mihoipaw mah a ccianaw kya aroh cih. ¹² Tuh-ounaw kha a ngaesang paw ccungccaw tuh hythuaccoupaw nynh thua; pawccecize aning tuh syntaw he athua koute, Bawipaw nynh amaw a sungsah`ae paw elan byakinpyakupaw hiinnaw suilukhung kha a mue cih. ¹³ Tuh-ounaw kha a tung vae ze, “Pachia nynh kae tuh yn tuhou,” cite hung ccungccaw nynh sanmah ho nan sah; pawccecize Pachia tuh ahoy leipaw liate tuhou kho thua lan khyh, amaw nynh mah hung ccungccaw sanmah tuh-ou boi khyh. ¹⁴ Thuasalama ccungccaw miakaw tuh amaw ryduanaw nynh soih zah he a sue vae ze, aning tuh ling athua vae. ¹⁵ Oute ryduanaw nynh ccaaw he a poi tuh kha-e nynh seinaw kha a saah. Te seinaw nynh he ale tuh chinaw kha a thuakhae. ¹⁶ Ka sungsahpaw uteno`ae, va lingsakuh nan oh. ¹⁷ Ahoypaw lasung miakaw te accingpaw lasung miakaw tuh a luki langte, te awnaw`ae Paaw kyate nynh oun thua`ae. Amaw kya tuh rulaekunaw um khyh zah paleihkunaw mynlyh cipaw um boi khyh. ¹⁸ Aening tuh amaw nynh a rae`ae paw balyn kyaze masaty a thae`ae phin ah thua nawlan oh, amaw a rynaw thyhte byaccing kya-e bya khate aening kha oun saah. ¹⁹ Tukeiccu ka sungsahpaw uteno`ae, ccungccaw miakaw tuh nawthae lan a khyrang sah, bya ho lan a khysung sah, thinria lan a khysung sah; ²⁰ pawccecize ccungccaw thinrianaw nynh Pachia kya-e dingnaw kha poukhae khyh. ²¹ Tukeiccu nungsikunaw balynte paepaeluipaw hoyleinaw kha dae nue oh lah, nae hiinnawmuisaw` ae a khum khopaw, bing athua paw Pachia bya kha lungnenaw te lawkuh oh. ²² Naemaw te naemaw kha lingku te, bya a thaetu`ae kyalya thua nan oh, thuasalama a cyihtu`ae la thua oh. ²³ Pawccecize lukhakheit tuh bya thaetu thua zah a cyihtu athua khyh ze, aning tuh a puikhaepaw a mae kha muinsado kya a dokuh paw ccungccapaw te nynh aloku. ²⁴ Pawccecize aning nynh amaw te amaw kha dokuh zah po a cceih, te aning tuh pawtecihpaw ccungccaw nynh thua cipaw kha phe a ning kanmaw. ²⁵ Thuasalama luenaw kya-e accingpaw kawbya lungkhu lang do zah kha-e kya po atynpaw ccungccaw tuh, a ningthyapaw thaetu thua khyh, thuasalama ryalaw a lahtu nynh thua, tuh-e ccungccapaw tuh a cyipaw kya hythuaccoupaw athua cih. ²⁶ Nanning laku lukhakheit nynh beiknaw lante a zuakuhpaw cite tuakuh zah a lae kha a kia khyh lanze, aning tuh amaw a thinlung a lingkuh paw nynh thua. Tuh-e paw beiknaw tuh accakaepaw nynh thua. ²⁷ Paaw Pachia malang accikuhpaw te anungsikuh leipaw beiknaw tuh e hynh nynh thua: Ngawraw`ae te numae`ae mih vawsawnaw kya paebua paw te amaw kha laephipi kyate kalouhku leite um paw kha nynh thua.

¹ Ka uteno`ae, phu-enaw Bawipaw athua paw, ah Bawipaw Jesu Kri zynnaw kya ccungccaw laesahnaw la hoi nan oh. ² Nanning na pumkunaw oh lungkhu lang ccungccaw lukheit nynh sui kuihpu te apuithyapaw uccaw lawkute yn teebua ze, te a ryachipaw mah anyaapaw uccaw lawkute yn teebua ze, ³ apuithyapaw uccaw te yn ccaankuh paw kha nanning nynh saw na tua oh zah, “E ahoypaw hmin kyahin dahung,” na cipah oh zah a ryachipaw kha, “Khuhlang khuin la thadyn,” tukhyhze, “Ka ccu nungnaw kyahin yn dahung,” na cipya oh lanze, ⁴ naemaw te naemaw laku ccungccaw laesanaw na hoi khyh oh tou? Te nanning tuh athahpaw tuanaw`ae ryte byapiatu`ae khaw na thua oh? ⁵ Ka sungsahpaw uteno`ae la ngaetua oh; hynh-e laephipi kya-e ryachi`ae kha zynnaw kya a hoirung nawlan`ae, te amaw a sungsah`ae paw hanlan byakinpyaku vae paw, peenaw rhoccoutu`ae lang Pachia nynh po khyh`ae tou? ⁶ Thuasalama nanning nynh ryachi`ae kha pawlangria leite na um oh. A hoirung`ae paw nynh nanning kha ae tua ae sah khyh oh zah byapianaw zung malang nanning kha ae sue khyh oh tou? ⁷ Nanning ae konaw oh paw, aphutepaw min kha minmin nynh thethya ho khyh`ae tou? ⁸ “Na innpaw kha namaw te namaw hawkhate na sungsah cih,” acikuh paw Ccathyaa thyhte alesaepaw kawbya kha na ccingsah oh ccaccing ze, kou hoy lan na cyih oh paw nynh thua. ⁹ Thuasalama maedonaw kha na hoi oh lanze, nanning tuh a sei`ae paw nynh na thua oh. Kawbya a lue`ae paw hawte kawbya nynh a sei cite a nysaku`ae paw nynh na thua oh. ¹⁰ Pawccecize hunghung zemah Kawbya khaleih kha zui salamah ccangkheit kya a thyku lanze, aning tuh kawbya marya a cyihseipaw nynh thua. ¹¹ Pawccecize, “Milae zu seikhae nan,” cite a hotupaw nynh, “Ccungccaw theih nan,” cite mah a hobia. Atu nang tuh milae zu na seikhae khyh zemah ccungccaw na chia lanze, nang tuh kawbya zui leipaw nynh na thua. ¹² Luenaw kya-e kawbya liate byapia athua vae cih`ae paw hawkhate, nanning mah bya ho oh lah tuhte cyih oh. ¹³ Pawccecize ngaethya-umsanaw a langsakuh leipaw ccungccaw tuh ngaethyaumsanaw leite byapianaw kha a mue cih. Ngaethya-umsanaw nynh byapianaw kha phe a tae. ¹⁴ Ka uteno`ae, ccungccaw lukheit nynh zynnaw ka hoi a ci zemah cyisahnaw`ae a hoi khyh ze pawmou athane? Kha-e zynnaw nynh amaw kha a khum kho cih tou? ¹⁵ Uno lukheit tukhyhze ccianung lukheit tuh uccaw leite um zah nin takyh aepaw kha hoi leite a um lanze, ¹⁶ te nanning kyaze lukheit nynh minmin kha, “Daebabilan la cceih oh, nae khua la lungsah lah nae vue la so sah,” a cipya`ae, tuhzemah pyn hanlan ahopaw kha-e uccaw`ae kha na pya khyh oh ze, pawmou athane? ¹⁷ Tuhhawte zynnaw mah cyisahnaw um leite, a makhaete tuh achihpaw nynh thua. ¹⁸ Athua, ccungccaw lukheit nynh, “Nang tuh zynnaw na hoi, te kae tuh cyisahnaw`ae ka hoi, na cyisahnaw um leite na zynnaw kha yn langsapya tua, te kae tuh ka zynnaw kha ka cyisahnaw`ae liate kae langsapah cih,” a ci ze a ci ngaw. ¹⁹ Nang nynh Pachia ccangkheit nynh a um cite na zyn, kou ahoy. Raerangsaro`ae nynh mah zyn`ae zah a thyngkuh`ae. ²⁰ Thuasalama, pou mingaeepaw, cyisahnaw`ae um leite zynnaw tuh a chih cipaw hynh na nyhry tou? ²¹ Ah minpaaw Abraham nynh silawhang vawlan a ccapaw Isaak kha silawnaw lang he a pya tuh, cyisahnaw`ae liate aning tuh thyaaccou khyh tou? ²² A zynnaw tuh a cyisahnaw`ae ryte pawcihte nynh ryalaw cipaw te cyisahnaw`ae liate nynh zynnaw tuh accingpaw lang rae athua cipaw kha na muih ta? ²³ “Abraham nynh Pachia kha zyn zah kha-e kha a hanlan dingnaw lang riapya athua,” acikuh paw Ccathyaa tuh phe accing. Te aning tuh Pachia banpaw cite ko athua. ²⁴ Oute ccungccaw tuh zynnaw kyalya liate thua leite, cyisahnaw`ae liate nynh thyaaccou a thua cipaw kha nanning nynh na muih oh. ²⁵ Tuhhawte ohhuanung Rahab kha mah, zeccuetu`ae kha innccung ua`ae zah minmin kha ccangpaw ccianaw kalan phe a saw`ae tuh, cyisahnaw`ae liate aning tuh thyaaccou thua khyh tou? ²⁶ Pawccecize muisaw um leite pyn tuh a chih, tuhhawte cyisahnaw`ae um leite zynnaw mah achihpaw nynh thua.

¹ Ka uteno`ae, aening tuh aru huapaw byapianaw kha ah mue cih oh cipaw kha nybiate ccangpatu`ae patae la thua nan oh. ² Pawccecize aening balyn tuh uccaw patae kya ah thypawkuh oh. Lukhakheit nynh bya kya a sei khyh ze, tuh-e paw tuh accingpaw ccungccaw nynh thua. Aning tuh a pyn khaleih kha a taekuh khopaw nynh thua. ³ Dotua oh, marang`ae nynh aening kaw a ngae ccaw`ae cite mih mung kya rangtei kha ah teisah oh, te mih pyn khaleih kha ah mae kho oh. ⁴ Sanphalung`ae kha mah dotua oh: kha-e`ae tuh myarya le`ae zah khivae arupaw rou nynh a mung kho zemah a mungtupaw nynh ditaripaw maenawpaw khate a rynaw langkhe phe a mae. ⁵ Tuhhawte lae tuh pyn kya-e ditaripaw athua zemah myarya a pookuh thya. Maee-ia taraw nynh pawcih alepaw lorang mah a u kho cipaw kha dotua oh! ⁶ Te lae tuh maee nynh thua. Seimenaw laephipi nynh thua. Tuhhawte nynh lae tuh ah pyn kya-e`ae laku athua, pyn khaleih kha a nungsisaku; te aphungpaw ccianaw kha maee vawlan khe a nung; te kha-e kha hell maee vawlan nung athua. ⁷ Pawccecize rangsaw`ae phin miakaw, pavaw`ae phin, vue te a vaw`ae paw phin, rili kya um paw ngasaw`ae phin kha ngaesah kho thua zah ccungccaw`ae nynh phe a la ngaesah`ae. ⁸ Thuasalama lae tuh hung ccungccaw nynh sanmah ngaesah kho khyh, uk kho leipaw athahpaw uccaw nynh thua, a chisah khopaw asy te nynh phe abia. ⁹ Tuh-e lae te ah Paaw Pachia kha hythua ah pya oh; te tuh-e te Pachia alo lante rae athua paw ccungccaw`ae kha thya ah law oh. ¹⁰ Khalang sang kheit kyate hythuanaw te thyalawnaw kha yn pou. Ka uno`ae, tuh-e`ae tuh tuhte cyiku lan ccan khyh. ¹¹ Tuidy ccangkheit nynh tuinaw sang kheit kyate tui epaw te tui khahpaw kha pousah ta? ¹² Ka uteno`ae, thaeku ku nynh oliv thae`ae kha thae kho ngaw ta? Misu ku nynh so thaeku thae kha thae kho ngaw ta? Tuhhawte tuinaw sangkheit nynh loi tuipaw te tui thuapaw kha paryh pousah khyh. ¹³ Nanning laku a lunghawpaw te a thaethyapaw ccungccaw tuh hungmou? Aning nynh hawnaw kya-e lungnenaw te ahoypaw ozia khate a ryalaw`ae kha langsakuh sah. ¹⁴ Thuasalama nae thinlung kya akhahpaw eiungnaw te peku maekunaw na hoi oh lanze, pookuh nan oh lah byaccing kha rawsete hyng nan oh. ¹⁵ Tuh-e hawnaw tuh luki langte yn thua paw thua khyh, thuasalama laephi hawnaw, pynsaw te asekuhpaw hawnaw te raerangsaro hawnaw nynh thua. ¹⁶ Pawccecize eiungnaw te peku maekunaw a umnaw tuh keisukeilae umnaw te athahpaw ryalaw`ae miakaw nynh a um. ¹⁷ Thuasalama luki lang-e hawnaw tuh masaty accikuh, oute ccawkunaw a umsah, nevyalya, soih lan a zoi, ngaethya-umsanaw te phe beih zah ahoypaw athae te phe beih, laesanaw um khyh zah cyiruhnaw um khyh. ¹⁸ Te ccawkunaw a rae`ae paw nynh dingnaw thae kha daenaw te ccaciivua`ae.

¹ Nanning laku rhawtukkunaw`ae te peku maekunaw`ae tuh paw kyate mou oun thua`ae? Nae pyn kya-e`ae kya rhawtukkuh`ae paw naemaw ryduanaw`ae kyate oun thua khyh`ae tou? ² Na ry na dua oh zah na hoi khyh oh. Na dua oh zah ccungccaw na chia oh, te na mue kho khyh oh. Na puihkuh oh zah rhaw na tukkuh oh. Tuhzemah na mue khyh oh; pawccemacize na ngia khyh oh. ³ Nanning nynh na ngia oh zemah na mue khyh oh; pawccemacize naemaw hoysanaw`ae hanlan karyh mang khylan phe na ngiakusei oh keiccu nynh thua. ⁴ Milae zu seikhaetu`ae te milae vawpaw seikhaetu`ae! Laephipi te vaeccawkunaw tuh Pachia ryte rhawkunaw nynh thua cipaw kha na nyh khyh oh tou? Tukeiccu hunghung zemah laephipi ruiban lang a tangry paw tuh Pachia rhawpaw lang a raekuh paw nynh thua. ⁵ “Aening kya a um paw Muisaw tuh ccunging lan ciate myarya a ry,” cite Ccathyaa nynh a hopaw hynh accakaepaw nynh thua cite tou na tua oh? ⁶ Thuasalama aning nynh thawccinaw kha houh lung a pya. Tukeiccu aning nynh, “Pachia tuh a pookuh`ae paw kha a rawse, thuasalama zakawsangsakuh`ae paw kha thaw a cci,” a ci. ⁷ Tukeiccu nanning Pachia kalan pyakuh oh. Diabolos kha rawse oh lah aning tuh nae kyate ae ccuetaw cih oh. ⁸ Pachia kalan naekuh oh lah aning mah nae kalan a naekuh cih. Misei`ae nae kuih kha ccikan oh, lungphei`ae paw nae thinlung kha thyaasah oh. ⁹ Ngaethah oh, khui oh lah rah oh. Nae nuinthuanaw tuh rawkhuinaw lang tang sah lah nae lungtuanaw tuh ngaethyanaw lang tang sah. ¹⁰ Bawipaw malang naemaw te naemaw zakawsangsakuh oh, lah aning nynh ae hangthung cih oh. ¹¹ Uteno`ae, lukheit te lukheit thethya hokuh nan oh. A uno kha thethya ho zah a uno byapia paw ccungccaw tuh kawbya kha thethya ho zah kawbya byapiatu nynh a thua. Thuasalama nang nynh kawbya kha bya na pia lanze, nang tuh kawbya kawngaepaw na thua khyh, byapiatu nynh na thua. ¹² A khum khopaw te a roh khopaw, Kawbya pyatu lukheit rou nynh a um. Mingccangpaw kha byapiatupaw nang tuh hungmou na thua? Awkhualan hanlan Pookuh nan ¹³ “Atunin, tukhyhze awkhualan tuhtahawpaw khuapi lungkhu lang ah cceih cih oh zah tuin kya kum kheit ah um ngaw oh, ah re cih oh zah ah zua cih oh, te amia mue lan,” cite a ho`ae paw nanning, atu ngaetua oh! ¹⁴ Tuhte na ho oh paw kya, awkhualan pawmou yn cyihkuh cih cipaw na nyh khyh oh. Pawccecize nae hiinnaw tuh pawmou athua? Nae hiinnaw tuh ccyh sosoh a langkuh koute phe avaepaw tuihu kha nynh athua. ¹⁵ Te, “Bawipaw nynh a ry lanze, aening ah hiin cih oh zah hynh-e khyh ze kha-e kha ah cyih cih oh,” cite nynh na ho lan oh accan. ¹⁶ Thuasalama atu nanning tuh na tansakunaw oh kya na pookuh oh; khahtahawpaw pookunaw balyn tuh ahoy leipaw nynh thua. ¹⁷ Tukeiccu ahoypaw cyi lanpaw kha nyh zah a cyih leipaw tuh a hanlan seinaw nynh thua.

¹ Mihoi`ae, atu ngaetua oh, nae tungvaw yn thua lanpaw vawsaw riathaenaw hanlan rah oh lah rawkhui oh. ² Nae hoirungnaw tuh phe aroh vae, te nae uccaw`ae tuh ari nynh phe a ae. ³ Nae sui te ngun tuh chihhangkae zah, kha-e chihhangkaepaw nynh nanning kha rawsete ccaekia lang a tang cih`ae zah maee hawte nae ngesaw kha a ae cih. Nyathyakou-e nin`ae hanlan nynh sisua kha na ccakhungku oh. ⁴ Ngaetua oh, nae leikua`ae kya ccatan aw`ae paw ryalahtu`ae kha ryalaw mee pya leite phe na hyngpya oh, te mih ryalaw mee nynh a sia`ae. Te loohruetu`ae siaruanaw tuh Sabaoth Bawipaw nakaring kalan phe a thua vae. ⁵ Laephi vawlan hoysanaw kya na hiin oh zah na hoysah oh. Chia nin lo nin hawkhate nae thinlung`ae kha na hoysakuh oh. ⁶ Adingpaw kha sei na be oh zah phe na chia oh; aning nynh nanning kha ae rawse ru khyh oh. ⁷ Tukeiccu uteno`ae, Bawipaw yn thua cia lungsaete la ngaw oh. Dotua oh, loophopaw nynh khuatui te hawkhua kha a mue cia, laephi kya-e aphutepaw athae apaw kha lungsaete phang a ngawdae. ⁸ Nanning mah nae lungsae sah, nae thinlung`ae kha tynsah oh; pawccecize Bawipaw yn thuanaw lanpaw tuh anae vae. ⁹ Uteno`ae, nanning byapia na thua khyh nawlan oh lukheit te lukheit ccohnuakuh nan oh; dotua oh, thuakaw malang byapiatu phang a thadyn. ¹⁰ Ka uteno`ae, Bawipaw min liate a ho`ae paw profeh`ae kha vawsaw teingnaw te lungsaenaw hanlan dosuinkupaw lang la lawkuh oh. ¹¹ Dotua oh, a ngaesang kho`ae paw tuh hythuaccou`ae paw ah ci oh. Joba a ngaesangnaw kong kha phe na thae vae oh, te Bawipaw tuh myarya thawccihthyapaw te ngaethya-umsanaw a hoi paw nynh thua cipaw kha Bawipaw nynh a thangsahnaw kyakhe phe na muih vae oh. ¹² Thuasalama ka uteno`ae, pawpaw balyn kya ccaesakuh nan oh, vaawran phyate mah ccaesakuh nan oh, laephi phyate mah ccaesakuh nan oh, pawpaw byakinkunaw te mah ccaesakuh nan oh. Thuasalama byapianaw lungkhu lang na phungku sei khyh nawlan oh, “Athua,” na ci oh paw kha “Athua,” ci oh lah “Thua khyh,” na ci oh paw kha “Thua khyh,” ci oh. ¹³ Nanning laku vawsaw teingpaw um tou? A um ze sawsang sah. A lungpaw paw um ta? A um ze sam law sah sah. ¹⁴ Nanning laku ngeccih um tou? A um ze kriccawbu kya-e pastor`ae kha ko sah lah minmin nynh Bawipaw min kya satho kha thuhpah`ae sah lah a tungvaw sawsangpah`ae sah. ¹⁵ Te zynnaw kya-e sawsangnaw nynh ngeccih kha a khum cih zah Bawipaw nynh kha-e paw kha a thosah cih. Seinaw kha phe a la rae ze aning tuh ngaethya athua cih. ¹⁶ Lukheit te lukheit na cyisei oh paw kha hopakuh oh; te nanning kha dansah na thua nawlan oh lukheit te lukheit sawsangpakuh oh. Adingpaw ccungccaw nynh thawmawte amawccih lante sawsangpaw tuh myarya a thanesah. ¹⁷ Elijah tuh aening hawte thuanaw alokuhpaw ccungccaw nynh thua, te aning nynh khuaraw khyh nawlan thawte sawsang; te laephi vawlan kum thung te sawpaw sataruh cia khuarah khyh. ¹⁸ Te aning nynh bua sawsang zah vaawran nynh khuarawsah, te laephi nynh a thae a pousah. ¹⁹ Uteno`ae, nanning laku lukhakheit tuh byaccing kyate phe cceihsei zah lukhakheit nynh amaw kha a paleihsaku lanze, ²⁰ miseipaw kha a ccianaw menaw kyate a paleihsakuh paw ccungccaw nynh tuh chinaw kyate hiinnaw-muisaw kha a khum cih zah seinaw pataepi kha a khawpah cih cipaw kha la nyh sah.