Hebrews

¹ Langmaw lyaze profeh`ae kyate ah minpaaw`ae kalan khe avae pataepi aphuinphuin te bya ho paw Pachia nynh, ² hynh-e nyathyakou nin ccyh kya vae tuh amaw a Ccapaw kyate nynh aening kalan khe bya yn hopya vae. Kha-e Ccapaw kha pawpaw balyn rhoccoutu lang phe a khang vae. Amaw liate nynh laephipi hynh mah a rae. ³ Tuh-e Ccapaw tuh Pachia phu-enaw awnawpaw te Pachiathuanaw muinsan langsakunawpaw nynh thua. Athungpaw a bya liate nynh pawpaw balyn kha po a tynsah. Aening seinaw`ae kha amaw ccaccei nynh he yn thyaasapah koute ahangnaw kya Lesaenaw ranglang khe a dahung vae. ⁴ Vaaw ccungccaw`ae laeze houh ahoy huaccepaw min kha rhoccounaw liate a mue keiccuze, Ccapaw tuh vaaw ccungccaw`ae laeze patae alesaehua. ⁵ Pawccecize, “Nang tuh ka Ccapaw nynh na thua, atunin nang kha phe kae saah vae,” cite thuasah; te bua, “Kae tuh a Paaw ka thua cih zah aning tuh ka Ccapaw athua cih,” cite thuasah, vaaw ccungccaw`ae kyaze hung kalan mou Pachia nynh a ho boi? ⁶ Te, masaty saah paw ccaaw kha laephi kalan he yn cciakhae lyaze, “Pachia vaaw ccungccaw`ae balyn nynh amaw kha beik`ae sah,” a ci. ⁷ Te vaaw ccungccaw`ae konglang kha Pachia nynh, “A vaaw ccungccaw`ae kha muisaw lang rae zah a ryalawpatu`ae kha maeesoi lang a rae,” a ci. ⁸ Thuasalama Ccapaw konglang tuh, “Pou Pachia, na suitungkhung tuh zungzae te zungzae cia atynpaw nynh thua. Dingnaw hoitang tuh na peenaw hoitang nynh thua. ⁹ Dingnaw kha na sungsah zah kawbya pawlangria leinaw kha na hua. Tukeiccuze pou Pachia, na Pachia nynh nang kha na ruiban`ae luki lungtuanaw satho kha phe ae thuh vae,” a ci. ¹⁰ Te, “Pou BAWIPAW, atakaw lyate nang nynh laephi athonaw kha na bing, te vaawran`ae tuh na kuih te na rae`ae paw nynh thua. ¹¹ Minmin tuh aroh cih`ae, thuasalama nang tuh na tyn zungzae. Te boeiningsungpue nynh apue hawte kha-e`ae tuh apue cih`ae. ¹² Te minmin kha uccaw zungkheit hawte na bi cih`ae zah minmin tuh a rulaekuh cih`ae. Thuasalama nang tuh na rulaekuh khyh zah na kum`ae tuh thang lan khyh,” a ci. ¹³ Thuasalama, “Na rhaw`ae kha na ccusy lang kae raepya makhia tuh, ka ranglang khe dahung,” cite vaaw ccungccaw`ae lakuze hung kalan san a ho boi tou? ¹⁴ Minmin balyn tuh khumnaw rho a ccou vae cih`ae paw kya ryalawpya khylan saw paw ryalawpatu muisaw`ae thua khyh`ae tou?

¹ Tukeiccuze aening nynh ah thae oh paw kha houh ah tua ah roih hahe lan oh paw nynh thua, tuhkhyh lanze po cciakhae`ae paw ah thuasei cih oh. ² Pawccecize vaaw ccungccaw`ae liate hopaw bya tuh rulae kho thua khyh zah cyiseimenaw miakaw te kawngae leinaw nynh cyisahnaw mee atazaepaw detahnaw kha a mue`ae lanze, ³ Bawipaw nynh masaty lya mawte a ho paw khumnaw, te amaw bya a thae`ae paw liate aening kya tynsah athua paw, myarya alepaw khumnaw kha aening nynh pawlang ah ria khyh oh ze, pawcihtemou ah lue cih oh? ⁴ M u i h s a n a w ` a e, khuaruarunaw`ae, te ngaeang lan um paw ryalaw aphuinphuin te Thyaa Muisaw nynh amaw rynaw thyhte a pya paw lasung`ae ryte Pachia nynh ccaekia a khan. ⁵ Pawccecize aening nynh ah ho oh paw, yn thua vae cih paw laephipi tuh Pachia nynh vaaw ccungccaw`ae kaw kya nung khyh. ⁶ Thuasalama Ccathyaa sangkheit kya lukheitpaw nynh, “Ccungccaw tuh paw thua zah te mou nang nynh na tua na lia? Tukhyhze, ccungccaw ccapaw tuh paw thua zah te mou nang nynh na la dooih? ⁷ Amaw kha vaaw ccungccaw`ae laeze ccapyh anehua lante na rae; amaw kha phu-enaw te sawtuanaw kha na khungsaku, na kuih te na rae paw uccaw`ae luki khe amaw kha na nung. ⁸ Pawpaw balyn kha amaw a ccu kawlang marya na nung,” cite ccaekiakhan zah a ho. Pawccecize pawpaw balyn kha amaw zakaw marya a nung cipaw tuh amaw zakaw a nung leipaw pawsang um khyh cipaw nynh thua. Thuasalama pawpaw balyn amaw zakaw marya a nung paw kha atu aening nynh ah muih loh khyh oh. ⁹ Thuasalama Pachia thawccinaw liate ccungccaw miakaw hanlan chinaw tangtua khylan, vaaw ccungccaw`ae laeze ccapyh anehua lante rae athua paw Jesu kha aening nynh ah muih oh. Chinaw a teing keiccuze aning tuh phu-enaw te sawtuanaw khate khungsah athua. ¹⁰ Pawccecize ccaaw`ae patae kha phu-enaw kalan a cciakhaenaw kya, pawpaw balyn tuh amaw liate um zah amaw hanlan athua paw, mih khumnaw lupi kha teingnaw liate ccingsah athua nawlan, Pachia hanlan angaekuhpaw nynh thua. ¹¹ Pawccecize a thyaasahtu te thyaasah athua paw balyn tuh paryhte ccangkheitpaw nynh thua`ae. Tukeiccu aning nynh minmin kha uno`ae cite ko lan a maethyakhaekuh khyh. ¹² Aning nynh, “Ka uno`ae kalan na min kha ka siakhae cih, pumkunaw kya namaw thehoysanaw law kha ka sah cih,” acikuh. ¹³ Te, “Amaw kha ka doliakuh cih,” bua acikuh. Te, “Kae te Pachia nynh kamaw yn pya paw imua`ae tuh e kya kae um,” bua acikuh. ¹⁴ Tukeiccuze imua`ae tuh chii te saw kha a neethungkuh bua`ae paw athua`ae keiccuze, Kri amaw mah tuhhawte chii te saw kha a neethungkuh bua, ou tuhte chinaw tungvaw thungnaw a hoitupaw diabolos kha, chinaw liate aning nynh ro khylan, ¹⁵ te chinaw rawri`ae keiccuze mih hiin lungkhu balyn seetangnaw kya um`ae paw kha luesah khylan nynh thua. ¹⁶ Pawccecize Kri nynh vaaw ccungccaw`ae kha bawng khyh`ae, thuasalama Abraham ciihan kha nynh a bawng. ¹⁷ Tukeiccu ccungccaw seinaw`ae hanlan lungdaesanaw rae khylan, Pachia te asekuhpaw uccaw`ae kya Kri tuh thawccithyapaw te zyn lan um paw Ranpibawi Lupi athua nawlan, pawpaw balyn kya amaw a uno`ae hawte rae athua lanpaw tuh accanpaw nynh thua. ¹⁸ Amaw nynh tuh-ounaw kha phe a teing vae keiccuze, tuh-ounaw a teing`ae paw kha bawng lan a cyih kho.

¹ Tukeiccuze vaawran te asekuhpaw konaw a neethungkuh bua`ae paw, athyaapaw uteno`ae, aening nynh ccaekia ah khan oh paw Locceihtu te Ranpibawi Lupi athua paw Kri Jesu kong kha tuatua oh. ² Mawsi nynh Pachia inn balyn kya zyn lan a um hawte, Jesu Kri mah amaw a khangtupaw kya zyn lan um paw nynh thua. ³ Inn saktupaw tuh inn laeze sawtuanaw a hoihua thyhhawte, Jesu tuh Mawsi laeze phu-enaw mue lan angaekuh huapaw nynh thua. ⁴ Pawccecize inn miakaw tuh ccungccaw lukhakheit nynh sak paw nynh thua, thuasalama pawpaw balyn a saktupaw tuh Pachia nynh thua. ⁵ Nyalang ho athua cih paw uccaw`ae kya-e ccaekia lang, see lukheit hawte Mawsi tuh Pachia inn balyn kya zyn lan um paw ccaccing nynh thua. ⁶ Thuasalama Kri tuh amaw a inn kya Ccapaw lukheit hawte zyn lan um paw nynh thua. Zynkunaw te ngaehoinaw kya-e lungtuanaw kha athangnaw cia tynkaring lang ah kynku oh ze, aening tuh amaw a inn nynh ah thua oh. ⁷ Tukeiccuze Thyaa Muisaw nynh, “Atunin amaw roi kha na thae lan oh ze, ⁸ rangkaw kya syntaw nin kya a rawse`ae lya hawte, nae thinlung kha khungsah nan oh. ⁹ Nae minpaaw`ae nynh kamaw kha yn tuhou` ae, yn syntaw`ae, te ka ryalaw`ae kha kum sungpali cia a muih`ae. ¹⁰ Tukeiccuze kae tuh kha-e ciihan kya ka thinlungccih zah, ‘Mih thinlung tuh palei cceihsei zah ka ccianaw kha nyh khyh`ae,’ ka ci. ¹¹ Tukeiccu ka thinrianaw kya, ‘Minmin tuh ka haeungnaw lungkhu lang tee lan khyh`ae,’ cite bya ka kinku,” a ci. ¹² Uteno`ae, nanning lukhakheit kya a hiinpaw Pachia kyate poutawnawpaw ahoy leipaw zyn leinaw thinlung a um khyh nawlan la raeringkuh oh. ¹³ Thuasalama, “Atunin,” cite ho athua lungkhu balyn lukheit te lukheit nin takyhte thawzung la pyakuh oh. Tukhyh lanze seinaw kya-e lingnaw liate nanning nae lungkhungsei cih. ¹⁴ Pawccecize aening nynh atakaw-e ah zynkunaw oh kha athangnaw cia tynkaring lang ah kyngku oh lanze, aening tuh Kri ryte a neethungkuh bua`ae paw nynh ah thua vae oh; ¹⁵ tuhte ah thua oh paw tuh, “Atunin amaw roi kha na thae oh lanze, rawsenaw kya hawte nae thinlung khung nan sah,” cite ho athua lyakhe ah thinlung khung khyh ze nynh thua. ¹⁶ Pawccecize phang a thae`ae pite amaw a rawse`ae paw tuh hung`ae mou? Mawsi nynh Izip ram kyate yn cciakhae`ae paw balyn kha thua khyh`ae tou? ¹⁷ Thuasalama kum sungpali lungkhu hung kya mou aning tuh a thinria? Mih rhua rangkaw kya a huekuh`ae paw, a sei`ae paw kya thua khyh tou? ¹⁸ Te a haeungnaw lungkhu lang minmin tuh tee lan khyh`ae cite hung kalan mou aning nynh ccaesaku? Kawngae lei`ae paw kalan thua khyh tou? ¹⁹ Tukeiccu zyn leinaw keiccuze minmin tuh tee kho khyh`ae cipaw ah muih oh.

¹ Tukeiccu, amaw hae-ungnaw lungkhu lang teenaw lanpaw byakinpyakupaw phang a um pite, nanning kyaze lukhakheit nynh kha-e kha phya kho leite a um lanpaw tuh, aening rikhae oh sih. ² Pawccecize minmin kalan mah hopya a la thua hawte, aening kalan thehoypaw tuh hopya athua vae; thuasalama a thae`ae paw nynh zynnaw te a lawku khyh`ae keiccuze, ho athua paw bya tuh minmin hanlan thane khyh. ³ Pawccecize a zyn`ae paw aening tuh kha-e hae-ungnaw lungkhu lang ah tee oh. Laephipi athonaw kyate ryalaw`ae tuh phe athang vae zemah, “Ka thinrianaw kya ccae ka sah hawte, ‘Ka haeungnaw lungkhu lang minmin nynh tee lan khyh`ae,’ ” cite a ho hawte nynh thua. ⁴ Pawccecize sangkheit kya nin sarinaw kong kha hynhte a ho, “Te nin sarinaw kya Pachia tuh a ryalaw`ae balyn kyate a hae-ung,” a ci. ⁵ Te tuh-e kya, “Minmin nynh ka hae-ungnaw lungkhu lang tee lan khyh`ae,” bua a ci. ⁶ Tukeiccu, ccungccaw abang hanlan tuh kha-e hae-ungnaw lungkhu lang tee khonaw phang a um, te masaty thehoypaw hopya athua`ae paw minmin tuh kawngae leinaw keiccuze tee khyh`ae. ⁷ “Atunin a roi kha na thae oh lanze nae thinlung khung nan sah,” cite langmaw lya a la ho vae hawte, ccyh khaw aro koute David kya, “Atunin” cite nin nin kheit kha a khyapya. ⁸ Pawccecize Joshua nynh minmin kha hae-ungnaw a la pya`ae ze, tuh-e koute nin ccangpaw kong kha Pachia nynh la ho vae lan khyh. ⁹ Tukeiccu Pachia ccungccaw`ae hanlan hae-ungnaw tuh a um ung. ¹⁰ Pawccecize Pachia nynh a ryalaw kyate a hae-ung hawte, Pachia kya-e hae-ungnaw lungkhu lang a tee paw ccungccaw tuh amaw ryalaw`ae kyate phe a haeung vae. ¹¹ Tukeiccu kawngae leinaw kya-e alokuhpaw dosuinku lanpaw thyhte hung sanmah a khuliakuh khyh nawlan, tuh-e hae-ungnaw lungkhu lang tee khylan aening thawte zuakuh oh sih. ¹² Pawccecize Pachia bya tuh ahiinpaw, athungpaw, te kynning mawte ahepaw thaloi laeze ahe huapaw nynh thua; hiinnawmuisaw te muisaw, kincui, te ru atungkunaw`ae phianaw cia hei a thuin khopaw, te thinlung kya-e tuanaw`ae te paccynkunaw`ae aphiathya paw nynh thua. ¹³ Amaw malang a langkuh leipaw rae paw uccaw pawsang um khyh. Thuasalama ahmaw konglang ah phypakuh cih oh paw amaw mitmuihnaw kya pawpaw balyn sahsete um zah raerae a langkuh. ¹⁴ Oute vaawran lang po a khung vae paw, alesaepaw Ranpibawi Lupi, Pachia Ccapaw Jesu ah hoi oh keiccu tuh ah ccaekiakhannaw kha tynkaring lang kyngkuh oh si. ¹⁵ Pawccecize aening ah nyaanaw oh kya thawccihthya leipaw Ranpibawi Lupi kha aening nynh ah hoi khyh oh, thuasalama aning tuh aening hawte pawpaw balyn lante tuh-ou a la thua, thuasalama sei leite nynh a um. ¹⁶ Tukeiccu ahoboupaw ccyh kya bawng kho nawlan, aening nynh ngaethyaumsanaw te thawccinaw ah mue nawlan oh, thawccinaw kya-e suitungkhung kalan rawhoy te cceih oh sih.

¹ Ccungccaw laku kyate popaw ranpibawi lupi miakaw tuh seinaw hanlan silawkunaw te lasung`ae kha pya khylan, Pachia lante asekuhpaw uccaw`ae kya ccungccaw`ae hanlan khang paw nynh thua. ² Amaw mah nyaanaw nynh phang ave paw athua keiccuze, aning tuh a nyhthya lei`ae paw tungvaw te a cceihsei`ae paw tungvaw ngaethya-umsanaw a hoi kho. ³ Te hynh-e keiccuze ccungccaw`ae hanlan te amaw hanlan, aning tuh seinaw hanlan silawpya lan ahopaw nynh thua. ⁴ Hynh-e sawtuanaw hynh hung ccungccaw nynh sanmah amaw kalan lawkuh khyh, thuasalama Aaron a ko hawte Pachia nynh a ko paw ccungccaw nynh a lawkuh. ⁵ Tuhhawte Kri mah Ranpibawi Lupi thua khylan amaw te amaw kha phu-esakuh khyh, thuasalama, “Nang tuh ka Ccapaw, atunin nang kha phe kae saah vae,” a cih paw nynh amaw kha phuesah. ⁶ Ccathyaa ccanglang kya, “Melkhizedekthuanaw thyhte, nang tuh zungzae ranpibawi nynh na thua,” cite mah a ho. ⁷ Aning tuh pynsaw lante a um lya chinaw kyate amaw kha a khum khopaw kalan thawte rawnaw te mitphi ryte, sawsangnaw te ngianaw kha a rae, te aning tuh Pachia rawri keiccuze thaepya athua. ⁸ Aning tuh Ccapaw mang athua zemah, a teingpaw uccaw`ae liate kawngaenaw kha a ccangkuh. ⁹ Te accingpaw lang rae athua koute, amaw kawngae`ae paw balyn hanlan aning tuh zungzae khumnaw athotupaw lang yn tang. ¹⁰ “Melkhizedekthuanaw thyhte,” Ranpibawi Lupi lante Pachia nynh phe a ko vae paw nynh thua. ¹¹ Amaw kong ho lanpaw patae kae hoi zemah nanning nynh na thaethya khyh oh keiccu tuh ccaesahpya lan aru. ¹² Pawccecize atu nanning tuh ccangpatu`ae lang hei tang phe na zaw vae oh zemah, Pachia bya`ae athonaw kha bua ccangpyaku na ho ung oh. Te looh tangpaw thua leite samatei bua aho ung paw nynh na thua oh. ¹³ Pawccecize samatei kyalya a neih ung paw ccungccaw miakaw tuh dingnaw bya kha nythyanaw hoi khyh, pawccecize aning tuh imua nynh thua ung. ¹⁴ Thuasalama looh tangpaw tuh piccang`ae hanlan nynh thua, tuh-e`ae tuh ahoypaw te athahpaw paryh phiathya khylan mih nythyanaw a mangkuh thya`ae paw nynh thua.

¹ Tukeiccuze Kri konglang atakaw ccangpyakunaw`ae kha cciataw te, piccangthuanaw kalan aening cceih oh sih. Achihpaw ryalaw kyate ngaesikunaw kong, Pachia zynnaw kong, ² baptisma ccangpyakunaw kong, kuih khang paw kong, a chih`ae paw thothuinaw kong, te zungzae byapianaw kong ccangpyakunaw lungbing kha bua bing vae leite piccangthuanaw kalan cceih oh sih. ³ Te Pachia nynh oun ua lanze, hynh-e hynh aening nynh a cyih cih oh. ⁴ Pawccecize vaekheit awsah athua vae`ae paw, vaawrane lasung phe a tangtua vae`ae paw, te Thyaa Muisaw kya-e a neethungkuh bua vae`ae paw, ⁵ te Pachia kya-e ahoypaw bya te yn thua vae cih paw she kyae thungnaw`ae phe a tangtua vae`ae paw, ⁶ kha-e`ae nynh a khuliaku`ae lanze, Pachia Ccapaw kha mimaw hanlan athaw lante a khiade`ae paw thua zah raerae alangkuh lang maethyasah`ae paw athua keiccuze minmin kha ngaesikunaw kalan bua thawsathui lanpaw tuh thua kho khyh. ⁷ Pawccecize laelung nynh amaw vawlan palei leih accah paw khuatui kha neih zah kha-e vawlan ryalahtupaw hanlan thingthae-eccang kha a pousahpya, te kha-e laelung tuh Pachia kyate hythuanaw kha a ccou. ⁸ Thuasalama hingpaw te thabu a pousah paw laelung tuh nue athua, te thyalawnaw kalan a naekuh vae, kha-e athangnaw tuh maee te rua lanpaw nynh thua vae. ⁹ Thuasalama sungsah`ae paw, hynhcihte nae kya kae ho zemah, nanning nynh khumnaw te azuikuh paw uccaw, nanning te asekuhpaw ahoyhuapaw uccaw`ae kha na cyih cih oh cite kae zynkuh. ¹⁰ Pawccecize amaw min hanlan na cyi oh paw, mithyaa`ae hanlan nanning nynh rya phe na lawpya vae oh paw te rya na lawpya ung oh paw kya, nae ryalaw te sungsahkunaw kya-e nae cyisahnaw kha phe ning lante Pachia tuh ading leipaw thua khyh. ¹¹ Te na ngaehoinaw oh kha phe aria nawlan, alokuhpaw thawte zuakunaw kha athangnaw cia nanning lu raveih nynh na langsaku nawlan oh kou kae ry. ¹² Ou tuhte nanning tuh nae thawnaw khyh nawlan, thuasalama byakinpyakupaw`ae kha zynnaw te ngaesangnaw liate rhoccou`ae paw thydokuh`ae paw na thua nawlan oh kae ry. ¹³ Pawccecize Pachia nynh Abraham kha bya he a kinpakuh tuh, amaw lae ale huapaw min phya lanpaw a um khyh keiccu, amaw te amaw kha ccaesakuh zah, ¹⁴ “Thanccingte nang kha hythua kae pya ccaccing cih zah kae pungthungsah ccaccing cih,” a ci. ¹⁵ Tukeiccu aning nynh lungsaete a ngaesang koute byakinpyakupaw kha a mue. ¹⁶ Pawccecize ccungccaw`ae nynh tuh ale huapaw min phyate ccae leih sahku`ae, te byakinkupaw nynh tuh hopaw kha tynsah zah byaeikunaw balyn kha a thangsah. ¹⁷ Tuhte Pachia nynh a byakinpyakupaw rhoccoutu`ae kya arulaekuh kho leipaw a khuakhannaw kha ccaerarihlan langsaku a ry keiccu a byakinkupaw liate a tynsah. ¹⁸ Aening khynnaw ah mue vae oh paw nynh tuh ah malang nungpya athua paw ngaehoinaw kha ah kynku kho nawlan oh, alepipaw thawzung pyanaw ah hoi kho nawlan oh, a hanlan hyng lanpaw athua kho leipaw Pachia nynh arulaekuh kho leipaw uccaw ccangning kya hynhte a cyi. ¹⁹ Kha-e ngaehoinaw kha zokhawpaw boei lungkhu lang phe a tee paw, phe ria zah tynkaringpaw hiinnawmuisaw kya-e sivawhinpi hawte aening nynh ah hoi oh. ²⁰ Melkhizedekthuanaw thyhte zungzae Ranpibawi Lupi athua paw Jesu, aening hanlan zeccuetupaw tuh tuh-e kalan phe a tee vae.

¹ Pawccecize tuh-e Melkhizedek, Salem siapharan, Ahang Huaccepaw Pachia kya-e ranpibawi nynh siapharan`ae chianaw kyate yn ki paw Abraham kha cciadue zah hythua a pya. ² Abraham nynh mah amaw kha luadepaw uccaw`ae balyn kya-e pumhaw pumkheit kha a pya. Masaty a min asuilan tuh “Dingnaw siapharan,” nynh thua, tuhkoute Salem siapharan mah athua, tuh-e tuh “Daenaw siapharan,” cipaw nynh thua. ³ Aning tuh paaw hoi khyh, nung hoi khyh, thokeinaw hoi khyh, umnaw atho nin hoi khyh zah hiinnaw athangnaw mah hoi khyh, thuasalama Pachia Ccapaw alo lante rae thua zah po atynpaw ranpibawi nynh thua. ⁴ E ccungccapaw tuh pawcih nynh alesae cipaw kha tuatua oh. Ciihan kyaze paaw athua paw Abraham nynh heize amaw kha luadepaw uccaw`ae kya-e pumhaw pumkheit kha a pya. ⁵ Ranpibawithuanaw a hoi`ae paw Levi ccaaw`ae nynh mih uno`ae athua paw, ccungccaw`ae tuh Abraham ciihan athua`ae zemah minmin kyate pumhaw pumkheit kha Kawbya thyhte lawku lan kawpyapaw a hoi`ae. ⁶ Thuasalama a thokeinaw kha Levi kyate suih athua leipaw Melkhizedek tuh Abraham kya-e pumhaw pumkheit kha ccou zah aning nynh byakinpyakupaw a mue paw Abraham kha hythua a pya. ⁷ Te anyaa huapaw kha alesae huapaw nynh hythua a pya cipaw tuh eiku lanpaw um khyh. ⁸ Te e kya a chihthyapaw ccungccaw`ae nynh pumhaw pumkheit kha a ccou`ae; thuasalama khuhlang tuh po a hiin cite ccaekia khanpya athua paw nynh pumhaw pumkheit kha a ccou. ⁹ Te pumhaw pumkheit a ccou paw Levi nynh mah Abraham kyate pumhaw pumkheit a pyabua cite ho lanpaw a um. ¹⁰ Pawccecize Melkhizedek nynh Abraham te a tungku lyakha Levi tuh a paaw pyn lungkhu nynh a um ung. ¹¹ Tukeiccuze, Levi kyate a tho paw ranpibawithuanaw kaw khe ccungccaw`ae nynh Kawbya kha a mue`ae keiccuze, ccingnaw tuh Levi kyate a tho paw ranpibawithuanaw liate athua lanze, Aaronthuanaw thyhte ko leite, Melkhizedekthuanaw thyhte ccangpaw ranpibawi yn pou lanpaw tuh pawmou aho ung? ¹² Pawccecize ranpibawithuanaw tuh rulae athua keiccuze Kawbya mah rulae aho vae. ¹³ Pawccecize e uccaw`ae nynh a honuathepaw ccungccaw tuh ccangpaw phuin nynh thua. Tuh-e phuin kyate hung ccungccaw nynh san silawhang kya ryalawpah boi khyh. ¹⁴ Pawccecize ah Bawipaw tuh Judah phuin kyate nynh yn langku cipaw tuh phe aria. Tuhe phuin tuh ranpibawithuanaw te asekuh cipaw Mawsi nynh kharyh ho khyh. ¹⁵ Te Melkhizedek alo lante ccangpaw ranpibawi alangku lanze, tuh-e tuh houh ariapaw nynh thua. ¹⁶ Tuh-e paw tuh pynsaw lante kawpyapaw, kawbya thyhte ranpibawi thua khyh, thuasalama athang kho leipaw hiinnaw kya-e thungnaw thyhte nynh athua. ¹⁷ Pawccecize Pachia nynh, “Nang tuh Melkhizedekthuanaw thyhte, zungzae ranpibawi nynh na thua,” cite ccaekia a khan. ¹⁸ Pawccecize, voihaw lante, langmaw-e kawpyatypaw tuh a thawzyanaw te accungkia khyhnaw keiccuze vua athua, ¹⁹ pawccecize Kawbya nynh pawsang ccingsah khyh; hawkheit lante, ahoy huapaw ngaehoinaw kha thuakhae athua, tuh-e ngaehoinaw liate aening tuh Pachia kalan ah naekuh oh. ²⁰ Te ccaesakunaw um leite aning tuh ranpibawi lang tangsah thua khyh. ²¹ Pawccecize minmin tuh ccaesakunaw um leite ranpibawi`ae lang yn tang`ae paw nynh thua. Thuasalama aning tuh, “BAWIPAW tuh ccaesakuh zah ngaesikuh vae lan khyh, ‘Nang tuh Melkhizedekthuanaw thyhte zungzae ranpibawi nynh na thua,’ ” cite amaw kha ccaesakunaw te a cipatupaw liate nynh ranpibawi lang yn tang. ²² Tuh-e ccaesakunaw liate Jesu tuh ahoy huapaw byakin kya-e aamahkhan lang yn tang. ²³ Te ranpibawi`ae tuh patae a um`ae, pawkeiccumacize po tynnaw kyate chinaw nynh a khaw`ae keiccuze nynh thua. ²⁴ Thuasalama Jesu tuh zungzae atyn keiccuze, arulaekuh kho leipaw ranpibawithuanaw kha a hoi. ²⁵ Amaw liate Pachia kalan oun cceih`ae paw hanlan ngiapyanaw rae khylan aning tuh zungzae a hiin keiccuze minmin kha athangnaw cia khum khylan a cyih kho. ²⁶ Pawccecize athyaapaw, seibe lan accan leipaw, anungsikuh leipaw, misei`ae kyate a phiakuhpaw, te vaawran`ae laeze ahanghua lang rae athua paw tuh-e Ranpibawi Lupi tuh aening hanlan angaekuhpaw nynh thua. ²⁷ Tuh-e ranpibawi lupi`ae hawte, masaty amaw seinaw hanlan, oute ccungccaw`ae seinaw hanlan nin takyh silawnaw rae ho vae khyh, pawccecize amaw a pyn a pyaku lyakhe, zungzae hanlan vaekheit te phe a ccingsah vae. ²⁸ Pawccecize Kawbya nynh nyaanaw a hoi paw ccungccaw`ae kha ranpibawi lang a khang. Thuasalama Kawbya koute yn thua paw ccaesakunaw kya-e bya nynh zungzae accingpaw Ccapaw kha a khang.

¹ Atu ah ho oh paw uccaw`ae kong abapi tuh: Vaawran`ae kya Lesaenaw suitungkhung ranglang a dahung paw, khahtahawpaw Ranpibawi Lupi kha aening ah hoi oh. ² Aning tuh ccungccaw nynh sak leipaw, Bawipaw nynh a sak paw beikbuu ccaccing athua paw athyaapaw hmin kya-e ryalahtu nynh thua. ³ Pawccecize ranpibawi lupi miakaw tuh lasung`ae te silawnawpaw khate silawpya khylan khang paw nynh thua. Tukeiccu hynh-e paw mah silawpya nawlan ccangkhakheit a hoi aho. ⁴ Pawccecize aning tuh laephi vawlan hin a la um lanze, ranpibawi la thua lan khyh, pawccecize Kawbya thyhte lasung te silawpah paw ranpibawi`ae a um. ⁵ Minmin tuh vaawran te asekuhpaw uccaw pungsan te mynlyh rya nynh a law`ae. Tuh-e keiccu Mawsi nynh beikbuu kha sak lan vae cite he a noukuh tuh, “Mua vawlan nang na kya langsapya athua paw pungsan thyhhawte pawpaw balyn kha na rae nawlan raeringkuh,” cite Pachia nynh Mawsi kha raering a pya. ⁶ Thuasalama Jesu tuh ahoy huapaw byakinpyakupaw kya thadynsah athua paw, ahoy huapaw byakin kya-e Daenaw Raetu mah athua keiccuze atu aning tuh ahoy huaccepaw ryalaw kha phe a mue vae. ⁷ Pawccecize masaty e byakin tuh seimenaw a la um khyh lanze, vaeningnaw byakin kha ccung la thua vae lan khyh. ⁸ Pawccecize ccungccaw`ae kya Pachia nynh seimenaw muihpah`ae zah a ho paw tuh, “ Ngaetua oh, nin`ae yn thua cih, BAWIPAW nynh a ci, Israel innbyn te Judah innbyn ryte athawpaw byakin ka rae cih nin ccyh yn thua cih, ⁹ Izip ram kyate minmin kha kuih te ka sue`ae zah ka cciakhae lya`ae nin kya mih minpaaw`ae ryte ka rae paw byakin thyhte thua vae lan khyh. Ka byakin kya minmin nynh atyn khyh`ae keiccuze kae mah minmin kha ka dooih khyh`ae, cite BAWIPAW nynh a ci. ¹⁰ Pawccecize tuh-e nin`ae koute Israel innbyn ryte ka rae cih paw byakin tuh e hynh nynh thua, cite BAWIPAW nynh a ci. Ka kawbya`ae kha mih tuanawthinlung kya ka sang cih zah kha-e`ae kha mih thinlung kya ka zei cih; te kae tuh mih Pachia ka thua cih zah minmin tuh ka ccungccaw`ae athua cih`ae. ¹¹ Te, ‘BAWIPAW kha nyh,’ cite hung ccungccaw nynh sanmah a innpaw kha ccangpah vae lan khyh`ae zah ccungccaw miakaw nynh a uno kha ccangpah vae lan khyh`ae. Pawccecize adih huapaw kyate tho zah ale huapaw kyacia kamaw kha marya yn nyh vae cih`ae. ¹² Pawccecize minmin ding leinaw kha ngaethya ka umsah cih`ae zah mih seinaw`ae te mih cyiseimenaw`ae kha kharyh ka ccykepah vae lan khyh`ae,” a ci. ¹³ “Byakin thawpaw,” a cipaw kya masaty byakin kha arynpaw lang phe a tangsah vae. Te ryn zah arohthyapaw uccaw tuh zo lan a cih vae.

¹ Oute masaty byakin nynh hei Pachia ryalawpyanaw kaw`ae te laephi-e athyaapaw hmin kha a hoi ccaccing. ² Pawccecize rae paw beikbuu a la um; masaty tuh-e lungkhu kya maeekhua awnawpaw te ccaboi, te nungpyapaw sanlou a um`ae, tuh-e khaan tuh athyaapaw hmin a ci`ae. ³ Te sanningnaw zokhawpaw boei nuhlang Athyaa Huaccepaw Hmin a ci`ae paw khaan a um. ⁴ Tuh-e khaan kya sui pakephepaw te sui te po alekuh lang a lae`ae paw byakin kua a um, tuh-e lungkhu kyatuin manna a nungnaw`ae paw sui ang, anaw toih paw Aaron hoitang te byakin lungphe`ae a um. ⁵ Te tuh-e byakin Kua vawlan phu-enaw kya-e cherub`ae nynh ngaethyaumsanaw tungkhung kha phang a dawkhaw`ae, kha-e kong kha atu aening nynh phe ccing lan ah ho kho loh khyh oh. ⁶ Kha-e uccaw`ae kha tuhcihte paccyn he athua tuh, ranpibawi`ae nynh Pachia ryalaw kha lawte, beikbuu masaty akhaan lungkhu langkhe leih a tee`ae. ⁷ Thuasalama sanningnaw akhaan lungkhu lang tuh ranpibawi lupi rou nynh chii ryte kum kheit ze vaekheit kyalya a tee. Amaw te ccungccaw`ae nynh nyku leite a rae`ae paw seinaw hanlan kha-e chii te aning nynh si a law. ⁸ Masaty beikbuu phang a thadyn lya tuh Athyaa Huaccepaw Hmin lungkhu lang ccianaw tuh hungpya thua loh khyh cipaw kha hynhcihte Thyaa Muisaw nynh a muihsah. ⁹ Tuh-e beikbuu tuh atu ccyh hanlan muihsanawpaw nynh thua; tuh-e kya Pachia pyapaw te silawkunaw`ae paw kha a pya`ae, tuh-e nynh mawtemaw nykunaw te asekuh lante ryalahtupaw kha ccingsah kho khyh. ¹⁰ Tuh-e tuh aepaw, niapaw, singkupaw aphuinphuin te pynsaw te asekuhpaw phunglang`ae kyalya thua zah raethuinaw ccyh kyacia rou nynh mang athua. ¹¹ Thuasalama Kri tuh yn thua vae cih paw ahoypaw uccaw`ae kya-e Ranpibawi Lupi hawte yn thua zah, kuih te rae leipaw, tuh-e horypaw tuh hynh-e raenaw kya-e athua leipaw, lesaehua zah houh accingpaw beikbuu liate, ¹² aening hanlan zungzae sawkhawnaw kha hoite, mia`ae te vaetuataw`ae chii liate thua vae leite, amaw a chii liate Athyaa Huaccepaw Hmin lungkhu lang vaekheit rou a tee. ¹³ Pawccecize tangnuapaw`ae te mia`ae chii, te maee te u paw vaetua tohlaw buhaw`ae khate a thyaa lei`ae paw kha theipaw nynh pynsaw ccikanku nawlan a thyaasah kho lanze, ¹⁴ zungzae tynpaw Muisaw liate Pachia kya ccaenaw um leipaw, amaw te amaw a pyakuh paw, Kri chii nynh achihpaw ryalaw kyate a hiinpaw Pachia rya lawpya khylan naemaw nykunaw thinlung kha pawcihmou houh a thyaasah kho cih? ¹⁵ Tukeiccuze masaty byakin kaw e cyiseimenaw kya-e sawkhawnaw hanlan chinaw la um vae zah, zungzae tynpaw rho uccaw kya-e byakinpyakupaw kha ko athua`ae paw nynh a mue nawlan`ae aning tuh athawpaw byakin kya-e Daenaw Raetu nynh thua. ¹⁶ Pawccecize rhosuinaw a umnaw kya tuh rhosuitupaw chinaw a um aho hahe. ¹⁷ Pawccecize rhosuitupaw a chih koute nynh rhosuinaw tuh cyi khonaw a hoi, rhosuitu phang a hiin lya tuh rhosuinaw nynh kharyh kaw hoi kho khyh. ¹⁸ Tukeiccu masaty byakin hei kha chii leite tynsah thua khyh. ¹⁹ Pawccecize Mawsi nynh Kawbya thyhte ccungccaw`ae balyn kha kawpyapaw miakaw kha a hopah`ae koute vaetuataw chii, te mia chii te tui ryte sekakungpaw tuuming te hyssop kha laah zah ccauh te ccungccaw`ae balyn kha thei`ae zah. ²⁰ “Hynh-e tuh Pachia nynh nanning ae pya oh paw byakin kya-e chii nynh thua,” a ci. ²¹ Tuhhawte beikbuu te Pachia ryalawnawpaw uccaw`ae balyn kha mah chii te pung a thei. ²² Te Kawbya thyhte pawpaw balyn vya thang lan chii liate thyaasah athua, te chii luanaw um leite seingaethyanaw um khyh. ²³ Tukeiccu vaawran kya um paw uccaw`ae pungsan kha khahtahawpaw silawnaw`ae te thyaasah lanpaw tuh ahobou paw nynh thua, te vaawran te asekuhpaw uccaw`ae tuh kha-e`ae laeze ahoy huapaw silawnaw te nynh thyaasah athua. ²⁴ Pawccecize thanccingpaw pungsan athua paw, kuih te rae paw athyaapaw hmin lungkhu lang Kri tuh tee khyh, thuasalama atu aening hanlan Pachia mitmuihnaw kya langku khylan, vaawran lungkhu lang nynh a tee. ²⁵ Tuhzemah ranpibawi lupi nynh amaw chii athua leipaw ryte Athyaa Huaccepaw Hmin lungkhu lang kum takyh a tee hawte, Kri nynh amaw te amaw kha pei pyaku lan tee vae khyh. ²⁶ Tuhte athua lanze, laephipi athotakaw te aning tuh pei a la teing vae cih; thuasalama atu she athangnaw kya, amaw silawnaw liate seinaw kha ccaring vua khylan vaekheit rou nynh a langku. ²⁷ Te ccungccaw`ae hanlan vaekheit chi lanpaw tuh laerui-awde paw thua zah tuh-e koute byapianaw a um hawte, ²⁸ Kri nynh ccungccaw patae seinaw kha phu khylan vaekheit kyalya a pyaku. Te amaw kha ngaehoite a ngaw paw ccungccaw`ae kha, khum khylan aning tuh seinaw leite vaeningnaw bua yn langkuh ung cih.

¹ Pawccecize Kawbya tuh yn thua vae cih paw ahoypaw uccaw`ae mynlyh thua zah uccaw`ae muinsan ccaccing thua khyh, kum takyhte a pya he`ae paw alokuhpaw silawnaw khate oun thua`ae paw kha kharyh ccingsah kho khyh. ² A ccingsah kho lanze, silawkunaw kha phe a la umtaw vae cih`ae khaw? Pawkeiccumacize a beiktu`ae tuh zungzae hanlan vaekheit te sei thyaasah athua vae`ae ze seinaw nykunawpaw la hoi lae vae lan khyh`ae. ³ Thuasalama kha-e silawnaw kya tuh seinaw bua liathuinaw kum takyhte a um. ⁴ Pawccecize tangnuapaw`ae te mia`ae chii nynh seinaw po lawpya lanpaw tuh thua kho khyh. ⁵ Tukeiccu laephipi lang Kri yn thua lyaze aning nynh, “Silawnaw te pyapawuccaw kha nang nynh na ry khyh, thuasalama kamaw hanlan pyn kha phe nae paccynpya vae. ⁶ Apynpi te maee te u paw silawkunaw`ae te seinaw hanlan silawnaw`ae kya nang na lungrythua khyh. ⁷ Oute kae nynh, ‘Ccauh kuekuhpaw kya kamaw konglang azeiku thyhte ngaetua, pou Pachia na rynaw rae khylan nynh kae tuh kae thua,’ ka ci,” cite a ho. ⁸ Luki langkhe, “Kawbya thyhte silawnaw te pyapawuccaw` ae, te apynpi te maee te u paw silawnaw`ae te, seinaw hanlan pyapaw-uccaw`ae kha na ry khyh, kha-e`ae kya na lungrythua khyh,” (tuh-e`ae tuh kawbya thyhte pyapaw nynh thua) cite a ho koute, ⁹ aning nynh, “Ngaetua, pou Pachia, kae tuh na rynaw rae khylan nynh kae thua,” a ci. Vaeningnaw-e kha tynsah khylan masaty-e kha phe a vua. ¹⁰ Tuh-e rynaw liate, Jesu Kri pyn kha zungzae hanlan vaekheit rou pyanaw liate aening tuh thyaasah athua vae oh. ¹¹ Te ranpibawi miakaw tuh nin takyh ryalawpya te a thadyn`ae, te seinaw kharyh a thyaasah kho leipaw alokuhpaw silawnaw khate pei silawpya`ae. ¹² Thuasalama hynh-e paw tuh seinaw elan silawnaw ccangkheit kha zungzae hanlan a pya koute, Pachia ranglang khe a dahung vae. ¹³ Tuh-e ccyh kyate a rhaw`ae kha a ccusy lang rae athua makhia phang a ngaw vae. ¹⁴ Pawccecize pyapaw-uccaw ccangkheit liate thyaasah athua cciamang`ae paw kha aning nynh zungzae a ccingsah`ae. ¹⁵ Te Thyaa Muisaw mah kaening kya ccaekia nynh thua; pawccecize langmaw lya, ¹⁶ “Tuh-e nin`ae koute minmin ryte ka rae lanpaw byakin tuh e hynh nynh thua, BAWIPAW nynh a ci: ka kawbya`ae kha mih thinlung kya ka sang cih zah kha-e`ae kha mih tuanawthinlung kyakhe ka zei cih,” cite a ho koute, ¹⁷ “Mih seinaw`ae te kawbya pawlangria leipaw mih cyisahnaw`ae kha kharyh ka ccykepah vae lan khyh`ae,” a ci. ¹⁸ Atu hynh-e seingaethyanaw a umnaw kya, seinaw hanlan pyapaw-uccaw kharyh um vae khyh. ¹⁹ Tukeiccuze uteno`ae, Jesu chii liate Athyaa Huaccepaw Hmin lungkhu lang tee lan rawhoynaw ah hoi oh keiccu, ²⁰ aening hanlan paccynpya athua paw, thaw zah ahiinpaw ccianawlaanpi liate, a pynsaw athua paw, zokhawpaw boei liate, ²¹ Pachia inn tungvaw Ranpibawi Lupi ah hoi oh keiccu, ²² ahoy leipaw mawtemaw nykunaw thinlung kyate ah thinlung tuh thei thua vae zah ah pyn tuh tui ccipaw te sing athua vae keiccuze phe ariapaw zynnaw te thinlung thanccingte aening nynh Pachia kalan naekuh oh sih. ²³ Ngaehoinaw kong ccaekiakhannaw kha hawlang hawlang pu leite varyn kyngkuh oh sih, pawccecize bya yn kinpakuh paw tuh zyn lan um paw nynh thua. ²⁴ Te sungsakunaw te ahoypaw ryalaw kha lungthosah khylan lukheit te lukheit tuapakuh oh sih. ²⁵ Ccungccaw abang nynh leih a cyimae`ae hawte, aening nynh pynkheihlan pumkupaw kha umtaw nan oh sih. Thuasalama lukheit te lukheit thawzung pyakuh oh sih. Nin tuh houhouh yn naekuh vae cipaw kha na muih oh hawte thawzung houh la pyakuh oh. ²⁶ Pawccecize byaccing nynaw kha aening nynh phe ah mue oh koute lungrarou te aening ah sei oh lanze, seinaw hanlan silawkunaw um lae vae khyh. ²⁷ Thuasalama ri lan um paw byapianaw yn thua lanpaw te rawsetu`ae kha phe ccung lan a u vae cih paw, bungpawnaw maee rou kha nynh a um vae. ²⁸ Mawsi Kawbya kha pawlangria leipaw ccungccaw tuh ccaekia luning khyhze luthung kaw khe ngaethya-umsanaw mue leite a chih. ²⁹ Pachia Ccapaw kha a ccu kaw syde zah amaw kha thyaasah athua paw byakin kya-e chiise kha athyaa leipaw uccaw lang ria zah thawccinaw Muisaw kha a saryapaw ccungccaw tuh pawcih alepaw detahnaw kha mou mue lan accan cite nanning nynh na tua oh? ³⁰ Pawccecize, “Ccaeliarunaw tuh kamaw kya-e nynh thua, kae nynh ccae ka liaru cih,” cite Bawipaw nynh a ci. Te, “BAWIPAW nynh a ccungccaw`ae kha byapia cih,” bua a ci, cite a hotupaw kha kaening nynh kae ny. ³¹ A hiinpaw Pachia kuih lungkhu lang boh ccaw lanpaw tuh ri lan um paw uccaw nynh thua. ³² Thuasalama nanning awsah na thua oh koute alepaw vawsawnaw kya-e teingnaw na ngaesang oh paw, langmaw-e nin`ae kha bua liathuitua oh. ³³ Vaekhakheit vae ze saryanaw`ae te vawsawnaw`ae liate nanning tuh maethyalaw na thua oh; te vaekhakheit vae ze nanning tuh tuhcihte a teing`ae paw ryte a mungkuh`ae paw nynh na thua oh. ³⁴ Pawccecize sivarui te yn khiinaw`ae kya nanning nynh thaw nae cci oh, te nanning nynh vaawran kya ahoy huapaw te atynpaw uccaw na hoi oh paw kha na nyku oh keiccu na hoi oh paw uccaw`ae ae luade oh paw kha lungtuate na ngaesang oh. ³⁵ Tukeiccuze alepipaw ryalaw mee a hoi paw nae rawhoynaw kha vua nan oh. ³⁶ Pawccecize Pachia rynaw kha na cyih oh koute byakinpyakupaw na mue nawlan oh ngaesangnaw na hoi oh aho. ³⁷ “Pawccecize sosohtari aro koute yn thua cih paw tuh yn thua vae cih; yn ro vae lan khyh. ³⁸ Te adingpaw ccungccaw tuh zynnaw liate nynh a hiin cih; thuasalama lukhakheit nynh nuhlang a sihku lanze ka muisaw tuh kha-e paw kya a lungrythua lan khyh,” a ci. ³⁹ Thuasalama aening tuh ronaw kalan nuhlang a sihkuh`ae paw ah thua khyh oh, thuasalama hiinnaw-muisaw khynnaw kalan zynnaw a hoi`ae paw nynh ah thua oh.

¹ Te zynnaw tuh ngaehoi paw uccaw`ae a um ccaccingpaw, muih loh leipaw uccaw`ae phe riasapaw kha nynh thua. ² Pawccecize kha-e zynnaw liate nynh langmaw-e ccungccaw`ae tuh thehoysanaw kha a ccou`ae. ³ Laephipi tuh Pachia bya liate nynh rae athua cipaw kha zynnaw liate nynh ah thaethya oh; ou tuhte muihpaw uccaw`ae hynh muih khopaw uccaw`ae te rae paw thua khyh`ae. ⁴ Zynnaw liate Abel nynh Kain silawnaw laeze ahoy huapaw silawnaw kha Pachia kalan a pya. Pachia nynh amaw lasung kong ccaekia he a khan tuh zynnaw liate aning tuh ading cite ccaekia a mue. Te aning tuh a chi vae zemah zynnaw liate bya a ho ung. ⁵ Enok tuh chinaw a tung vae khyh ccaw cite zynnaw liate lawthung athua. Te, “Pachia nynh amaw kha phe a lawthung vae keiccuze aning tuh muih lan um vae khyh.” Pawccecize lawthung athua maw, aning tuh Pachia lungrythuasah cipaw ccaekia kha a hoi. ⁶ Te zynnaw leite Pachia a lungrythuasah lanpaw tuh thua kho khyh. Pawccecize Pachia kalan yn thua paw ccungccaw nynh tuh Pachia tuh a um cipaw te amaw kha thawte a ccung`ae paw kha amee pyatu nynh thua cipaw kha a zyn hahe aho. ⁷ Noah tuh muih loh leipaw uccaw`ae kong kha Pachia nynh raering a pya koute a innbyn khumnaw hanlan Pachia rawrinaw te zynnaw liate sanphalung kha a sak, kha-e zynnaw liate laephipi kha seibe zah zynnaw liate athua paw dingnaw rhoccoutu lang yn tang. ⁸ Abraham nynh rho lang a ccou vae cih paw ram langkhe ccia khylan ko he athua tuh zynnaw liate kaw a ngae; te teilang nynh ka ccia cipaw ny leite a cceih. ⁹ Byakinpyakupaw ram kyakhe ccangpaw ram kya hawte zynnaw liate a um. Kha-e byakinpyakupaw kha amaw ry rhoccoutu athua`ae paw Isaak te Jakob ryte bu kyakhe a um`ae. ¹⁰ Pawccecize Pachia nynh a sak paw te a rae paw, athonaw a hoi paw khuapi kha aning nynh a ngaehoi. ¹¹ Sarah nynh mah amaw kha byakinpakuhtupaw tuh zyn lan um paw nynh thua cite a tuaku keiccuze ccaawpoi kho lan cipaw zynnaw liate thawzung a mue. Te ccaawsaah kho lan a kum phe alue vae zemah ccaaw kha a saah. ¹² Tukeiccuze achihpaw hawte athua vae paw lukheitpaw kyate vaawlui e awsi`ae hawte alungpaw, te rili kin um paw riatae leipaw laesia hawte ccaaw patae a pui`ae. ¹³ Hynh-e ccungccaw`ae balyn tuh byakinpyakupaw kha ccou leite zynnaw hoite phe chih`ae. Thuasalama asawpi te kha-e kha muihlang`ae zah a cciadue`ae, te minmin tuh laephi vawlan mikhia`ae te khuaccung`ae paw nynh kae thua cipaw ccaerarihlan a nyku`ae. ¹⁴ Pawccecize kha-e uccaw kong a ho`ae paw nynh minmin tuh mimaw ram nynh a ccung`ae cite ccaerarihlan a ho`ae. ¹⁵ Te a poutaw`ae paw ram kha minmin nynh palei a tuathui ccaccing`ae lanze, tuh-e kalan bua kithui lan ccyhhoypaw phe a hoi cih`ae paw. ¹⁶ Thuasalama minmin nynh ahoy huapaw ram, tuh-e tuh vaawran, kha nynh mih pe a ki. Tukeiccuze Pachia tuh mih Pachia cite koku lanpaw kha a maethah khyh. Pawccecize minmin hanlan khuapi kha Pachia nynh phe a paccynpya vae`ae. ¹⁷ Abraham tuh syntaw he athua lyakhe, zynnaw liate Isaak kha silawku nawlan a pya; te byakinpyakupaw a muetupaw nynh a hoithypaw a ccapaw kha phe a pya. ¹⁸ Amaw kong lante asekuh te, “Isaak kya nynh na ciihan tuh minphu athua cih,” cite hopya athua. ¹⁹ Pachia tuh achihpaw heize a thosathui kho cite aning nynh varyn a zyn; aning nynh muihsanaw lante a chih`ae paw kyate Isaak kha mah a mue. ²⁰ Isaak nynh yn thua vae cih paw uccaw`ae kong lante Jakob te Esau kha zynnaw liate hythua a pya`ae. ²¹ Jakob nynh a chidyn khe Josef ccaaw`ae kha zynnaw liate ccarou hythua a pya`ae, te a hoitang dung kyakhe phang ngeikute Pachia kha a beik. ²² Josef nynh chi lan he cih tuh Israel ccaaw`ae nynh a pou lan`ae paw kong kha zynnaw liate hosya zah amaw a ru`ae konglang te bya a tawsya`ae. ²³ Mawsi he a pui tuh apuithyapaw imua nynh thua cipaw kha a muih`ae keiccuze zynnaw liate siapharan awda kha ri vae leite a nung te a paaw nynh Mawsi kha zynnaw liate sawpaw sathung a thuru`ae. ²⁴ Mawsi nynh piccang he thua tuh Faro ccanung a ccapaw cite koku lanpaw kha zynnaw liate phe a ei. ²⁵ Seinaw kya-e lungrythuanaw kha sosoh hoysah lanpaw laeze Pachia ccungccaw`ae ryte vawsawnaw teing lanpaw kha a poku paleih. ²⁶ Izip ram kya-e sisua`ae laeze Kri keiccuze saryakunaw tuh asung huapaw hoirungnaw nynh thua cite a tuaku. Pawccecize nyalang mue lanpaw ryalaw mee kha nynh a tua. ²⁷ Siapharan thinrianaw kha ri leite Izip ram kha zynnaw liate a cciataw. Pawccecize muih kho leipaw Pachia kha a muih paw hawte aning tuh phang a ngaesang. ²⁸ Ccatawccaaw`ae a rohtupaw nynh Israel ccatawccaaw`ae kha a tung khyh nawlan, Mawsi nynh Kawtaw Poi te chii theipaw kha zynnaw liate a rae. ²⁹ Israel`ae nynh laerou kya ccia hawte zynnaw liate Rili Se kha po a zuaa`ae. Kha-e kha Izip`ae nynh he a zuaabua`ae tuh tui nynh pung a vu`ae. ³⁰ Jeriko khua lungruapi kha nin sari a voilu`ae koute, zynnaw liate lungruapi tuh pung ating. ³¹ Ohhuanung Rahab tuh dophitu`ae kha ahoyte innccung a thuasah`ae keiccuze zynnaw liate aning tuh kawngae lei`ae paw ryte chihbua khyh. ³² Tuhlaelan pawmou ka ho ung cih? Gideon kong, Barak kong, Samson kong, Jefthah kong, David kong, Samuel te profeh`ae kong ho lan ccyh ka zaw lan khyh. ³³ Tuh-e`ae tuh peenaw`ae kha zynnaw liate a tae`ae, dingnaw rya kha a law`ae, byakinpyakupaw a mue`ae, chindeih`ae khalang kha a myhsah`ae, ³⁴ maee thungnaw kha a the`ae, thaloi haw kyate a lue`ae, thawzyanaw kyate a thawsaepaw lang rae athua`ae, rhawdounaw kya a rawthungpaw lang a tang`ae, ramccangpaw rhawkaw`ae a ccuesah`ae paw nynh thua`ae. ³⁵ Nopi`ae nynh mih michi`ae kha hiinnaw kalan bua thosahnaw te a mue`ae, te mingccang`ae tuh ahoy huapaw thothuinaw kha mue khylan minmin nynh luesanaw kha lawku leite tuasahnaw kha a teing`ae. ³⁶ Te mingccang`ae tuh saryanaw te ziabuakunaw kha a teing`ae, athua, sivarui te khii`ae zah thungsaw`ae. ³⁷ Lung te a deih`ae, thing-aw te phaebua`ae, a syntaw`ae, thaloi te a chia`ae, tuuphua te miaphua kha kikuh`ae zah a khiakuh`ae; boeining leite ae van ae leite a um`ae, vawsaw a teing`ae, ming`ae nynh a tua-a sah`ae; ³⁸ laephipi tuh minmin te ngaekuh khyh. Minmin tuh rangkaw kya, mua`ae kya a la khiakuh`ae, lungkarung te laekarung`ae kya a la um`ae. ³⁹ Te minmin balyn tuh zynnaw liate thehoynaw a ccou`ae zemah byakinpyakupaw kha mue khyh`ae. ⁴⁰ Minmin tuh aening leite ccingsah athua khyh nawlan`ae Pachia nynh ahoy huapaw uccaw kha aening hanlan phe oun paccynpya vae.

¹ Tukeiccu aening mah ccaekia athua paw maeking pi nynh phang oun koihlu keiccuze, zoikadeih lang kaang oun kaesah paw seinaw te phupaw miakaw kha ccanglang dae nung oh sih lah aening malang a um paw ccuetaekunaw kyakhe lungsaenaw te ccue oh sih. ² Aening zynnaw athotu te ccingsatupaw Jesu kha rirido te ccue oh sih. Aning tuh maethyanaw kha pawlangria leite amaw malang nungpya athua paw lungtuanaw hanlan vaelantung kha phang ngaesang zah Pachia kya-e suitungkhung ranglang khe a dahung vae. ³ Pawccecize nanning nae hiinnawmuisaw`ae kya nae thawthang khyh nawlan te nae lungthawzya khyh nawlan misei`ae kya-e khahtahawpaw rawsenaw a ngaesangtupaw amaw kha la tuatua oh. ⁴ Nanning nynh seinaw dounaw kya chii phe lua lan ciate na dou loh khyh oh. ⁵ Te ccaaw`ae kya hopya hawte nanning hopya paw hynaw bya kha phe na ning vae oh. Tuh-e bya tuh: “Ka ccapaw, BAWIPAW thuiheinaw kha pawlangria leite um nan, amaw nynh ae pe vae ze na lungthang nan sah. ⁶ Pawccecize BAWIPAW nynh a sungsahpaw kha a thuihei, te aning nynh lehkhan paw ccaaw miakaw kha a zia a bua,” acikuh. ⁷ Thuiheinaw kha nanning nynh na ngaesang oh lanze, Pachia nynh nanning kha ccaaw`ae hawte ae ccuepe oh. Pawccecize paaw nynh a thuihei leipaw ccaaw um zaw? ⁸ Thuasalama ccungccaw miakaw nynh a mue`ae paw thuiheinaw kha nanning nynh na muebua khyh oh ze, nanning tuh ccaaw ccaccing na thua khyh oh, ccalah nynh na thua oh. ⁹ Tuhlaeze aening yn thuihei paw pynsaw lante paaw`ae ah hoi oh, te minmin kha saw ah tua oh; muisaw`ae Paaw kaw te tuhlae houh umte ah hiin lan khyh oh tou? ¹⁰ Pawccecize tuh-e paaw`ae nynh mimaw nynh ahoy cite a tua`ae thyhte sosoh nynh yn thuihei`ae. Thuasalama Pachia nynh tuh amaw kya-e thyaararihnaw kha a neethungkuh bua`ae paw ah thua nawlan oh, aening thanenaw hanlan nynh yn thuihei. ¹¹ Te thuiheinaw miakaw teing lya tuh lungpaw lan a um paw lo khyh, thuasalama ngaethya lan um paw nynh thua; tuhzemah thuiheinaw te kia athua`ae paw hanlan, kha-e nynh nyalang tuh daenaw te asekuhpaw dingnaw thae kha a thuakhaepya`ae. ¹² Tukeiccuze balae ting paw kuih`ae te a thawzyapaw ccukharu`ae kha thawsaesah oh. ¹³ Te ccukhoupaw ccu akhahku khyh nawlan, dansah athua paleih nawlan, nae ccu hanlan laanpi kha dingsah oh. ¹⁴ Ccungccaw balyn ryte ccawkute um paw te thyaanaw kha deesui oh; thyaanaw leite hung ccungccaw nynh sanmah Bawipaw kha muih lan khyh. ¹⁵ Pachia thawccinaw kha hung ccungccaw nynh san mue leite a um khyh nawlan, tukhyhlanze akhahpaw kyate yn pou paw tharui nynh nanning kha vawsaw ae pya khyh nawlan oh, te kha-e liate ccungccaw patae tuh nungsisaku athua cih`ae. ¹⁶ A ohhuakuhpaw a um khyh nawlan, tukhyhze a ccatawccaawthuanaw kha aepaw kawkheit lang phe a zuakuhpaw, Esau hawte Pachia pawlangria leipaw na thua khyh nawlan oh raeringkute ngawdo oh. ¹⁷ Pawccecize Esau nynh nyalang te hythuanaw kha rhoccou ry zah mitphi te thawmawte a ccung zemah ngaesiku nawlan a muihku vae khyh keiccuze aning tuh nue athua vae cipaw kha na ny oh. ¹⁸ Pawccecize nanning nynh kuih te tung kho um paw te maee nynh a u paw mua kalan, te maeking amanpaw kalan, mohnaw, khise, ¹⁹ mungkae roiccaepaw, bya roi a umnaw kalan khe na thua khyh oh; ou tuhte kha-e roi a thae`ae paw nynh bya kha mih kalan bua hopya athua vae khyh nawlan a ngia`ae. ²⁰ Pawccecize, “Saring nynh heize kha-e mua kha a tung lanze lung te deih athua cih, tukhyhze thee te kaw athua cih,” cite kawpyapaw kha minmin nynh ngaesang kho khyh`ae. ²¹ Te tuh-e muih paw tuh myarya ri lan um paw thua zah Mawsi nynh, “Myaryasangkae ka rih zah ka thyngkuh,” a ci. ²² Thuasalama nanning tuh Zion Mua kalan, a hiinpaw Pachia khualipi athua paw vaw Jerusalem kalan, riatae lei vaaw ccungccaw`ae phu kalan, ²³ vaawran kya min zei athua paw ccatawccaaw kya-e kriccawbu te lungtua lan um paw pumkunaw kalan, ccungccaw balyn Byapiatupaw Pachia kalan, phe ccing lang rae athua paw adingpaw ccungccaw muisaw`ae kalan, ²⁴ te byakin thaw kya-e Daenaw Raetu Jesu kalan, te Abel kya-e laeze ahoy huapaw uccaw`ae kong a hopaw theipaw chii kalan nynh na thua oh. ²⁵ A hotupaw kha nanning nynh na ei khyh nawlan oh raeringkuh oh. Pawccecize laephi vawlan a hotupaw kha a ei`ae paw minmin tuh detahnaw kha a lue khyh lan`ae ze, vaawran kyate a hotupaw kyate ah maeleihku oh lanze pawtemou ah lue kho cih oh. ²⁶ Tuh ccyh lya amaw roi nynh laephi kha a hysah; thuasalama atu aning nynh, “Tuhzemah laephi kyalya thua vae leite, vaawran kha mah vaekheit bua ka hy ung cih,” cite byakinkute a ho. ²⁷ Te hynh-e, “Tuhzemah vaekheit bua,” cipaw nynh a langsakupaw tuh hy kho a um leipaw uccaw`ae tuh po a um nawlan, ahy khopaw uccaw`ae, tuh-e tuh rae paw uccaw`ae nuenawpaw kha nynh thua. ²⁸ Tukeiccuze ahy kho leipaw peenaw kha a ccou oh keiccu tuh, sawtuanaw te rawrinaw ryte douccah lante Pachia kha rya ah lawpya nawlan oh thawccinaw kha hoi oh sih. ²⁹ Pawccecize aening ah Pachia tuh aruapaw maee nynh thua.

¹ Uteno sungsakunaw kha po tynsah oh. ² Mikhia`ae dooihpaw kha la ning nan oh. Pawccecize khate mikhia dooihnaw te abang nynh vaaw ccungccaw`ae kha tua lei pite innccung a la thuasah`ae. ³ Minmin ryte thungccahkheih`ae paw hawte naemaw kha tuakuh oh lah thungccah`ae paw kha la ning nan oh. Naemaw mah pyn kya na um oh paw athua hawte, vawsawnaw a teing`ae paw kha la ning nan oh. ⁴ Ccungccaw balyn laku zu te vaw tangnaw tuh pawpaw balyn kya sawtua lan um paw nynh thua, te anungsikuh leipaw ikhung mah sawtua lan um paw nynh thua; thuasalama a ohhuakuh`ae paw te milae zu, milae vawpaw ry asei`ae paw tuh Pachia nynh byapia cih`ae. ⁵ Nae hiinzia tuh phua duanaw a hoi leipaw thua sah, na hoi oh paw uccaw`ae khate nae lungryachih sah. Pawccecize amaw nynh, “Nang kha kae cciataw boi lan khyh zah kae vua boi lan khyh,” a ci. ⁶ Tukeiccu, “BAWIPAW tuh kamaw yn bawngtu thua zah ka rih vae lan khyh. Ccungccaw nynh kamaw kya pawmou a cyihkho cih?” cite aening nynh raw hoite ah ho kho vae cih oh. ⁷ Nae kya Pachia bya ae hopah oh paw, nanning ae uk oh paw kha la ning nan oh. Mih hiinzia nynh a poukhae paw kha tuabiate, mih zynnaw kha zui oh. ⁸ Jesu Kri tuh inkhawnin, atunin, te zungzae cia lae khyh. ⁹ Ccangpyakunaw aphuinphuin te alokuh leipaw ccangpyakunaw`ae nynh ae la cciakhaesei nan oh sah. Pawccecize aepaw te thua leite, thawccinaw liate thinlung thawsaesah paw tuh ahoypaw nynh thua. Aepaw kyalya phang a tua`ae paw tuh kha-e aepaw nynh thanesah khyh`ae. ¹⁰ Silawhang kha aening ah hoi oh. Tuh-e kya tuh beikbuu ryalawpatu`ae nynh aenaw kaw hoi khyh`ae. ¹¹ Pawccecize seinaw hanlan ranpibawi lupi nynh athyaapaw hmin lungkhu lang mih chii a teekhae paw, saring pyn`ae kha ryabuu atolang khe maee te a rua`ae. ¹² Tukeiccuze Jesu mah amaw a chii te ccungccaw`ae kha thyaasah khylan koikua atolang khe a teing. ¹³ Tukeiccuze aening nynh amaw kya-e saryanaw kha phubiate ryabuu atolang amaw kalan khe cceih oh sih. ¹⁴ Pawccecize e kya aening tuh po atynpaw khualipi ah hoi khyh oh, thuasalama yn thua vae cih paw khualipi kha nynh ah ccung oh. ¹⁵ Tukeiccu amaw min kya lungtuabya hote, ah khalang`ae thae athua paw, thehoysanawpaw silawkunaw kha amaw liate Pachia kalan pei pya oh sih. ¹⁶ Thuasalama ahoypaw cyi lanpaw te neethungbua lanpaw kha la ning nan oh. Pawccecize khahtahawpaw silawnaw`ae kya Pachia tuh a lungry kou thua. ¹⁷ Nanning ae uktu oh paw kaw kha ngae oh lah naemaw kha minmin kalan la pyakuh oh. Pawccecize minmin tuh mimaw konglang a phykuh cih`ae paw hawte, nae hiinnawmuisaw ae ringpah oh paw nynh thua. Ngaethyanaw te thua leite lungtuanaw te kha-e kha cyih`ae sah. Pawccecize tuhte ngaethyanaw te cyi paw tuh nae hanlan athane leipaw nynh thua. ¹⁸ Kaening hanlan saw yn sangpah oh. Kaening tuh mawtemaw nykunaw thinlung ahoypaw kae hoi zah pawpaw kya balyn kou hoy lante hiin lan kae ry cipaw kha kae nyku ccaccing. ¹⁹ Thuasalama kae tuh nae kalan taloi bua kae thua nawlan, hynh-e hanlan abapilante saw oun sangpah oh cite kae ngia oh. ²⁰ Atu zungzae atynpaw byakin kya-e chii liate, tuu`ae kya-e alesaepaw Tuuringtu, ah Bawipaw Jesu kha a chih`ae paw kyate bua a thuakhaetupaw, daenaw Pachia nynh, ²¹ amaw malang a lungrythua paw rya kha Jesu Kri liate nae kya lawte, amaw rynaw kha cyi khylan ahoypaw ryalaw miakaw kya nanning kha ae ccingsah vae oh sah. Amaw Jesu Kri kya zungzae te zungzae cia phu-enaw um sah. Amen. ²² Te uteno`ae hynawpaw bya hynh la ngaesang oh cite kae ngia oh; pawccecize nae kalan ccaky tuh pyhtari te nynh ka zei. ²³ Ah unopaw Timote kha phe a luesah vae`ae cipaw kha la nyh oh. Aning nynh aro maw yn thua lanze amaw ryte nanning kha kae muih cih oh. ²⁴ Nanning ae uktu oh paw balyn te mithyaa`ae balyn kha la beihlang oh. Itali ram kya a um`ae paw nynh nanning kha ae beihlang oh. ²⁵ Nanning balyn kya thawccinaw la um sah. Amen.