Galatians

¹ Ccungccaw`ae kya-e locceihtu athua leipaw, ccungccaw liate mah athua leipaw, thuasalama a chih`ae paw kyate Jesu kha a thosatupaw Paaw Pachia te Jesu Kri liate locceihtu athua paw Paul, ² te kamaw ryte a um`ae paw uteno`ae balyn nynh Galati pee e kriccawbu`ae kha kae beihlang oh. ³ Paaw Pachia te ah Bawipaw Jesu Kri kyate thawccinaw te daenaw tuh nanning kya la um sah. ⁴ Ah Paaw Pachia rynaw thyhte hynh-e atu e ahoy leipaw she kyate aening kha luesah khylan cite, aening seinaw`ae hanlan Jesu nynh amaw te amaw kha a pyaku. ⁵ Tuh-e Paaw kalan phu-enaw tuh zungzae te zungzae la um sah. Amen. ⁶ Kri kya-e thawccinaw liate nanning ae kotu oh paw kyate ccangpaw thehoypaw kalan na paleihkuh kanmaw vae oh cipaw ka ngaeangthua. ⁷ Tuh-e thehoypaw tuh thehoypaw ccaccing thua khyh; thuasalama nanning kha vawsaw pya ae ry oh zah Kri thehoypaw kha ahme leipaw lang a paleihry`ae paw ccungccaw abang a um. ⁸ Thuasalama kaening zemah thuasah, tukhyhze vaawran kyate vaaw ccungccaw nynh zemah thuasah, nanning kalan kaening nynh phe kae hopya vae oh paw thehoypaw laelan ccangpaw thehoypaw kha a ho paw a um lanze aning tuh thyalaw thua sah. ⁹ Nanning nynh phe na lawku vae oh paw thehoypaw laelan ccangpaw thehoypaw kha nanning kalan a ho paw a um ze, tuh-e paw tuh thyalaw thua sah, cite langmaw lya phe kae ho vae hawte, atu kae nynh bua ka ho. ¹⁰ Pawccecize atu kae tuh ccungccaw kya-e maehoynaw tou ka ccungku? Tukhyhze Pachia kya-e tou? Tukhyhze kae tuh ccungccaw`ae lungrythuasah lan tou ka ccungku? Pawccecize kae nynh ccungccaw`ae lungrythuasah lan ka ccungku lanze, kae tuh Kri seepaw ka thua vae lan khyh. ¹¹ Thuasalama uteno`ae, kae nynh ka ho paw thehoypaw tuh ccungccaw kya-e thua khyh cipaw nanning kha kae nysah ry oh. ¹² Pawccecize kha-e thehoypaw kha kae nynh ccungccaw kyate ka mue khyh, kha-e kha hung nynh san yn ccangpah khyh`ae, thuasalama Jesu Kri kya-e byaphy liate nynh ka mue. ¹³ Pawccecize athang vae paw ccyh kya, Jew`ae beiknaw kya ka cyisahnaw kong kha nanning nynh phe na thae vae oh; Pachia kya-e kriccawbu kha tou kho um lei lan ka tua ka sah zah ro lan ka la zuakuh. ¹⁴ Ka minpaaw`ae kya-e phungzae`ae kha myaryamaw houh pangkhaete ka minphuin`ae kya kamaw te kae kum akhinkuh`ae paw patae laeze Jew`ae beiknaw kya ka la zuakuh hua. ¹⁵ - ¹⁶ Thuasalama Zenta`ae laku kya Jesu Kri thehoypaw kong kha ho khylan ka nung vue kyate kamaw yn phiatu te a thawccinaw liate yn kotupaw Pachia nynh kamaw kya a Ccapaw kong phy lan a lungry he thua tuh, chiisaw te khua ka rua kanmaw khyh. ¹⁷ Kamaw laeze langmaw locceihtu athuaty`ae paw kalan Jerusalem lang mah ka cceihthung khyh; thuasalama Arabia ram lungkhu lang nynh ka ccia, oute Damaskas lang bua ka ki. ¹⁸ Tuhkoute kum thung aro koute Piter te tungku khylan Jerusalem lang ka cceihthung, te amaw ryte nin haw laepangaw kae umkheih. ¹⁹ Thuasalama Bawipaw a neitaw James holeite ccangpaw locceihtu`ae hung sanmah ka muih khyh. ²⁰ Atu nanning kalan ka zei`ae paw hynh, dotua oh, Pachia malang ka hyng paw thua khyh. ²¹ Tuhkoute Siria te Silisia ram`ae lungkhu lang ka thua. ²² Te Kri kya um paw Judea pee e kriccawbu`ae kalan kae tuh ka mitmae langkute ny ka thua khyh. ²³ Thuasalama minmin nynh, “Langmaw lya aening oun tua oun sahtupaw nynh langmaw amaw nynh a ro paw zynnaw kha atu amaw nynh a ho ki vae,” cite kyalya nynh a thae`ae. ²⁴ Oute minmin nynh kamaw keiccuze Pachia kha thehoysah`ae.

¹ Oute kum haw laepali aro koute kae tuh Titu kha ka hoeibua zah Barnabas ryte Jerusalem lang bua kae cceihthung. ² Te byaphy liate ka cceihthung zah Zenta`ae laku ka hopaw thehoypaw khate minmin kha ka ccuepe`ae, thuasalama kae nynh ka cyi vae paw te ka cyi lei lanpaw kha pawpawte mah alakaw lang athua khyh nawlan sawtua lan um`ae paw kalan nynh ka makhaete ka hopya`ae. ³ Thuasalama kamaw ryte kae um paw Titu tuh Greek paw lukheit mang athua pite vindung awku lan nangse khyh`ae. ⁴ Te Kri Jesu kya kaening nynh kae hoi paw luenaw kha dophi lan zah kaening kha seetangnaw kalan thuakhae khylan cite ny leipaw ccungccaw`ae nynh aphiru lante oun thuakhae`ae paw ahme leipaw uteno`ae keiccu nynh tuhte a cyi`ae. ⁵ Ahmepaw thehoypaw tuh nanning kya po atyn ccaw cite, kaening nynh sosoh sanmah ahme leipaw uteno`ae kalan kae ahkuh khyh. ⁶ Thuasalama hynh-e`ae kyaze sawtua lan um`ae paw, minmin tuh hung ccungccaw athua`ae zemah, ka hanlan pawtua um khyh. Pachia tuh ccungccaw maedo khyh, pawccecize minmin te tungkupaw nynh ka phungho kha pawsang biachih khyh`ae. ⁷ Thuasalama arawsekuh lante, vindung awkuh`ae paw hanlan thehoypaw kha Piter kalan a pya hawte, vindung awkuh lei`ae paw hanlan thehoypaw kha kamaw kalan pya athua paw kha minmin nynh he nyh`ae zah, ⁸ (Pawccecize vindung awkuh`ae paw kalan Piter kha locceihtu thua lan ryalahtupaw nynh Zenta`ae kalan kae kha locceihtu thuasah lan ka kya mah ryalah kalang), ⁹ rungpi hawte a tua`ae paw James, Sefas te Johan nynh kamaw pya athua paw thawccinaw kha he nyh`ae tuh, mimaw tuh vindung awkuh`ae paw kalan ccia lan zah kaening tuh Zenta`ae kalan cciasah khylan ranglang kuih nawccawkhaenaw kha kamaw te Barnabas kha oun pya`ae. ¹⁰ Kaening nynh ryachi`ae kae ning lei lanpaw rou kha minmin nynh oun rypya`ae, tuh-e tuh kae nynh mah lungthote cyi lan ka nungdekupaw nynh thua. ¹¹ Thuasalama Antiok khua kalan Piter he yn thua tuh, aning tuh ccae lan a um keiccu a maedo leite ka pe. ¹² Pawccecize ccungccaw abang nynh James kyate oun thua maw`ae ze Piter tuh Zenta`ae ryte a aekheih`ae; thuasalama minmin he oun thua`ae tuh, Piter tuh vindung awkuh`ae paw rawri keiccuze nuhlang thungkuh zah Zenta`ae kyate phe a phiakuh. ¹³ Te ccangpaw Jew`ae tuh Piter ryte alokuh lante a cyiruh`ae; ou tuhte minmin cyiruhnaw nynh Barnabas kha mah mih kalan phe a pangsah bua. ¹⁴ Thuasalama minmin nynh thehoypaw kya-e byaccing thyhte hmerarihlan hiin khyh`ae cipaw he ka muih tuh, mih balyn malang Piter kha, “Nang nynh Jew ccungccaw na thua pite Jew`ae hawte um leite, Zenta`ae phung thyhte na um lanze, pawccemou nang nynh Zenta`ae kha Jew`ae phung thyhte um lan na nangse`ae? ¹⁵ “Pynsawthuanaw lante aening tuh Jew`ae ah thua oh zah Zenta`ae misei`ae ah thua khyh oh. ¹⁶ Te ccungccaw lukheit tuh Kawbya cyisahnaw`ae liate thyaaccoukuh khyh, thuasalama Jesu Kri zynnaw liate nynh thyaaccouku cipaw ah ny oh. Kri zynnaw liate aening tuh thyaaccou oh ccaw cite, Kawbya cyisahnaw`ae liate thua leite, Jesu Kri kha aening nynh phe ah zyn vae oh. Pawccecize Kawbya cyisahnaw`ae liate hung ccungccaw sanmah thyaaccou kho thua lan khyh. ¹⁷ “Thuasalama Kri liate thyaaccouku ccaw cite aening nynh ah ccung cciamang lya oh heize, ahmaw te ahmaw mah misei`ae cite ah muihku oh lanze, tukeiccu Kri tuh seinaw ryalahtu tou a thua? Tuhte thua khyh! ¹⁸ Pawccecize kae nynh phe ka ro vae paw uccaw kha bua ka sakthui lanze, kamaw te kamaw kha kawbya rohtupaw lang a raekuh paw nynh ka thua. ¹⁹ Pawccecize Pachia hanlan ka hiin kho nawlan, Kawbya liate kae tuh Kawbya kalan ka chih. ²⁰ Kae tuh Kri ryte khiade ka thua, tuhzemah ka hiin ung. Tuhzemah kae ka hiin khyh, thuasalama kae ka kya Kri nynh a hiin. Atu pynsaw kya kae ka hiin paw hiinnaw tuh kamaw hynh yn sungsah zah kae ka hanlan amaw te amaw a pyakuh paw Pachia Ccapaw zynnaw liate nynh ka hiin. ²¹ Pachia thawccinaw kha kae nynh ka vua khyh, pawccecize dingnaw tuh Kawbya liate a ccouku lanze, Kri tuh alakaw lang nynh a chihhang vae,” ka cipya.

¹ Pou Galati mingaee`ae, phe a khiade vae`ae paw Jesu Kri kha nanning laku ccaerarihlan langsapya athua vae te, byaccing kha nanning nynh na zyn khyh nawlan oh hung nynh mou nanning kha phe ae mua oh? ² Hynh-e kyalya hynh nynh nanning kyate ny ka ry: Kawbya cyisahnaw`ae liate tou nanning nynh Muisaw kha na mue oh? Tukhyhze zynnaw kya-e thaenaw liate tou na mue oh? ³ Myaryamaw na ngaee oh ang tou? Muisaw kya rya phe na tho vae oh pite, pynsaw liate tou atu nanning tuh ccingsah na thua oh? ⁴ Uccaw patae kha alakaw lang tou na teing hang oh? Alakaw lang tou a tanghang cih? ⁵ Tuhlaeze nanning kha Muisaw ae pya oh zah nanning laku thungnaw ryalahtupaw nynh kha-e kha Kawbya cyisahnaw`ae te tou a cyi? Tukhyhze zynnaw kya-e thaenaw liate tou a cyi? ⁶ Tuhhawte, “Abraham nynh Pachia kha zyn zah kha-e kha a hanlan dingnaw lang riapya athua.”. ⁷ Tukeiccu zynnaw a hoi`ae paw, minmin tuh Abraham ccaaw`ae nynh thua`ae cipaw nyh oh. ⁸ Pachia nynh Zenta`ae kha zynnaw liate thyaaccousah cih`ae cite Ccathyaa nynh phe muihty zah, “Nang na kya minphuin`ae balyn nynh hythuaccou cih`ae,” cite Abraham kalan thehoypaw kha phe a hoty vae. ⁹ Tukeiccu zynnaw a hoi`ae paw tuh a zyn paw Abraham ryte hythuaccou`ae paw nynh thua`ae. ¹⁰ Pawccecize Kawbya cyisahnaw a doliakuh`ae paw miakaw tuh thyalawnaw zakaw nynh um`ae; pawccecize, “Kawbya ccauh kya cyi lan azeikuh paw balyn kha pei a zui leipaw ccungccaw miakaw tuh thyalaw thua sah,” cite azeikuh. ¹¹ Thuasalama Pachia malang hung ccungccaw sanmah Kawbya liate thyaaccoupaw um khyh cipaw tuh ccaerarihlan lang alangkuh. Pawccecize, “Adingpaw ccungccaw tuh zynnaw liate nynh a hiin cih,” a cikuh. ¹² Kawbya tuh zynnaw te sekuh khyh. Thuasalama Ccathyaa nynh, “Kawbya`ae a zui paw ccungccaw tuh Kawbya`ae liate nynh a hiin cih,” a ci. ¹³ Pawccecize, “Thing kya sae athua paw ccungccaw miakaw tuh thyalawpaw nynh thua,” cite azeikuh hawte, Kri tuh aening keiccuze thyalawnaw a ccou paw thua zah Kawbya kya-e thyalawnaw kyate aening kha phe oun sawkhaw vae. ¹⁴ Ou tuhte Abraham nynh a mue paw hythuanaw tuh Jesu Kri liate Zenta`ae kalan a thuabua nawlan, aening nynh zynnaw liate byakinpyakupaw te asekuhpaw Muisaw kha ah mue nawlan oh. ¹⁵ Uteno`ae, ccungccaw`ae phung thyhte nynh ka ho. Ccungccaw lukheit kya-e byakin heize tynsah athua lanze, hung ccungccaw nynh san roh vae khyh, bia mah biachih vae khyh. ¹⁶ Byakinpyakupaw`ae kha Abraham te a ciihan hanlan nynh raepya athua. Pataepaw hawte, “Ciihan`ae hanlan,” cite Pachia nynh ho khyh; thuasalama lukheitpaw hawte, “Na ciihan hanlan,” cite nynh a ho, tuh-e paw tuh Kri nynh thua. ¹⁷ E hynh kae hopya oh; Kri kya Pachia nynh phe a tynsah vae paw byakin kha kum zapali sungthung alue koute a um paw Kawbya nynh roh kho vae khyh; byakinpyakupaw kha accakaepaw lang Kawbya nynh tangsah kho khyh. ¹⁸ Pawccecize rho uccaw tuh Kawbya kya-e athua lanze, byakinpyakupaw kya-e thua vae khyh, thuasalama Pachia nynh byakinpyakupaw liate nynh Abraham kha rho uccaw a pya. ¹⁹ Tuhte lanze pawkeiccumou Kawbya tuh yn thua? Byakinpyakupaw raepya athua paw kalan Ciihan a thua cia, cyiseinaw`ae keiccu nynh Kawbya tuh biachih athua. Vaaw ccungccaw`ae liate nynh kha-e kha ccawkunaw raetupaw kuih liate pya athua. ²⁰ Te ccawkunaw raetupaw tuh lukheit hanlan rou thua khyh, thuasalama Pachia tuh ccangkheit nynh thua. ²¹ Tuhte lanze Kawbya tuh Pachia kya-e byakinpyakupaw te arawsekuh tou? Tuhte thua khyh. Pawccecize hiinnaw phe a pya khopaw Kawbya kha pya a la thua vae ze, thanccing lante dingnaw tuh Kawbya liate nynh athua vae cih. ²² Thuasalama a zyn paw ccungccaw`ae kha Jesu Kri zynnaw liate byakinpyakupaw kha pya athua nawlan, Ccathyaa nynh ccungccaw balyn kha seinaw zakaw pung oun khung. ²³ Thuasalama zynnaw yn thua maw, aening tuh Kawbya zakaw nynh khung ah thua oh, nyalang yn langkuh vae cih paw zynnaw kalan phe oun la khawsung`ae. ²⁴ Tukeiccu aening tuh zynnaw liate thyaaccou ah thua nawlan oh, Kawbya tuh aening kha Kri kalan thuakhae khylan, aening yn ccangpatu nynh thua. ²⁵ Thuasalama zynnaw he yn thua koute, aening tuh yn ccangpatu zakaw ah um vae khyh oh. ²⁶ Pawccecize Kri Jesu zynnaw liate nanning balyn tuh Pachia ccaaw`ae nynh na thua oh. ²⁷ Pawccecize Kri lungkhu lang baptisma-in vae`ae paw nanning balyn tuh Kri kha phe na lawkuh vae oh paw nynh thua. ²⁸ Kri kya Jew paw ci um vae khyh, Greek paw ci um vae khyh, a luepaw ci um vae khyh, see ci um vae khyh, pise ci um vae khyh, nopi ci um vae khyh; pawccecize Kri Jesu kya nanning balyn tuh ccangkheitpaw nynh na thua vae oh. ²⁹ Te nanning tuh Kri kya-e na thua oh lanze, nanning tuh Abraham ciihan nynh na thua vae oh, te byakinpyakupaw thyhte rhoccoutu`ae nynh na thua vae oh.

¹ Atu kae hopya oh, rhoccoutu tuh uccaw balyn kha a hoitupaw mang athua zemah, imua athua lungkhu balyn tuh see lukheit te alaenaw um khyh. ² Thuasalama a paaw nynh a khyapaw ccyh azaw mawlaezung tuh dooihtu`ae te ringtu`ae zakaw nynh a um ung. ³ Tuhhawte aening mah imua`ae ah thua lya oh tuh laephipi e atakaw ccangpyanaw kya-e seetangnaw zakaw kya nynh ah la um oh. ⁴ - ⁵ Thuasalama accyh ccingnaw he yn thua tetuh Kawbya zakaw um`ae paw kha sawkhaw khylan, ccaaw`ae kya-e ccaawthuanaw kha aening nynh ah ccoubua nawlan oh, nopinung vue kya poisah zah Kawbya zakaw yn puisah paw a Ccapaw kha Pachia nynh yn saw. ⁶ Te nanning tuh ccaaw`ae na thua oh keiccuze, “Abba, Apang!” cite a kosah paw, a Ccapaw kya-e Muisaw kha nanning nae thinlung`ae lungkhu lang Pachia nynh phe a saw vae. ⁷ Tukeiccu nang tuh see na thua vae khyh, thuasalama ccapaw nynh na thua vae, te ccapaw na thua vae lanze Kri liate Pachia kya-e rhoccoutu nynh na thua vae. ⁸ Tuhzemah langmaw nanning nynh Pachia na la ny khyh oh lyakha, pachia athua lei`ae paw kha nanning nynh aphungpaw lante rya na lawpya oh. ⁹ Thuasalama atu nanning nynh Pachia kha phe na ny vae oh, tukhyhze Pachia nynh phe ae ny vae oh paw nynh a thawzyapaw, anyaapaw huhan`ae kalan pawccemou bua na paleihku oh? Pawccemou tuh-e kalan see lang bua tang khylan nanning nynh na ry ung oh? ¹⁰ Nanning nynh nin`ae te sawpaw`ae, kumvaelori`ae te kum`ae kha na tuasethya oh. ¹¹ Kae tuh nanning kya alakaw lang nynh ryalaw phe ka law hang vae cite nanning keiccu ka thinphang. ¹² Uteno`ae, kae tuh nanning hawte ka thua keiccu, kae hawte nanning thuabua oh cite kae ngia oh; nanning nynh ka tungvaw kharyh na cyihsei khyh oh. ¹³ Kae nynh ka pynsaw nyaanaw ryte nae kalan thehoypaw masaty ka ho cipaw kha nanning nynh na ny oh. ¹⁴ Ka pynsaw kya ka tungpaw syntawnaw kha nanning nynh pawlangria leite na um khyh oh, kamaw mah nae deebia khyh oh; thuasalama Pachia kya-e vaaw ccungccapaw hawte thuasah, Jesu Kri hawte thuasah kamaw kha nae lehkhan oh. ¹⁵ Tuhte lanze nanning nynh hythuanaw na ccou oh paw tuh pawmou athua? Pawccecize, athua kho ze nanning nynh nae mit`ae kha poh khoiku lan zah kamaw kha phe pya lan hei na ry oh cite langmaw nanning konglang ccaekia ka khan. ¹⁶ Tukeiccu atu kae nynh byaccing kha nanning kae hopya oh keiccu kae tuh nae rhawpaw lang tou ka tang? ¹⁷ Minmin nynh nanning ae lungmung oh paw tuh, nae hanlan ahoypaw elan thua khyh; ou nanning nynh minmin kha na lungmungru nawlan oh, te minmin nynh nanning kha kamaw kyate phiasaku lan ae ry oh paw te nynh thua. ¹⁸ Thuasalama nanning ryte kae ka um lya kyalya ahoypaw kha myarya na lungmung lan oh paw thua khyh, ahoypaw kha pei na lungmung lan oh paw nynh thua. ¹⁹ Kri kha nanning kya phe a raekuh lan cia ccaawpuinaw neitangia bua ka teingpya`ae paw ka ccaaw taraw`ae, ²⁰ atu nanning ryte um lan ka ry zah ka byaho rulaeku lan ka ry, pawccecize nanning kya lunghiinnaw ka hoi. ²¹ Kawbya zakaw a umry`ae paw nanning, Kawbya kha phe na thae vae oh khaw? Yn hopya tua oh. ²² Pawccecize Abraham nynh ccaaw`ae luning a hoi, lukheit tuh seenung ccaaw, lukheit tuh a luepaw nopinung ccaaw nynh thua cite Ccathyaa nynh a ho. ²³ Seenung ccaaw tuh pynsaw lante a pui paw nynh thua, thuasalama a luepaw nopinung ccaaw tuh byakinpyakupaw liate a puipaw nynh thua. ²⁴ Tuh-e`ae kong tuh tousenawpaw nynh thua: Pawccecize hynh-e nopi luning`ae tuh byakin`ae ccangning nynh thua; Hakar athua paw byakin ccangkheit tuh Sinai Mua kyate thua zah see ccaaw`ae kha a pousah. ²⁵ Pawccecize hynh-e Hakar tuh Arabia ram kya um paw Sinai Mua nynh thua, te atu um paw Jerusalem te nynh aloku. Amaw a ccaaw`ae ryte seetangnaw kya nynh um`ae. ²⁶ Thuasalama luki lang a um paw Jerusalem tuh aening balyn kya-e ah nung athua paw, a luepaw nopinung nynh thua. ²⁷ Pawccecize, “Ccaawsaah leipaw a tinnung nang, na lungtua sah; neitangia a teing lei nung nang, roisaw lah sia; pawccecize a cciataw vae`ae paw nopinung nynh vawpaw a hoi paw nopinung laeze ccaaw`ae patae a hoihua,” cite azeikuh. ²⁸ Uteno`ae, atu aening tuh Isaak hawte byakinpyakupaw kya-e ccaaw`ae nynh ah thua oh. ²⁹ Thuasalama pynsaw lante a pui paw ccaaw nynh Muisaw liate a pui paw ccaaw kha a tua a sah hawte, tuhawmawte nynh atu mah athua. ³⁰ Tuhzemah Ccathyaa nynh paw a ci mou? “Seenung te a ccapaw kha dae dee`ae; pawccecize seenung a ccapaw nynh a luepaw nopinung ccapaw ryte rhoccoutu lang tangkheih lan khyh,” a ci. ³¹ Tukeiccu uteno`ae, aening tuh seenung ccaaw`ae ah thua khyh oh, thuasalama a luepaw nopinung ccaaw`ae nynh ah thua oh.

¹ Tukeiccu Kri nynh aening phe oun luesah vae paw luenaw kyakhe tynkaring lang thadyn oh, seetangnaw kya-e taphu khate bua bawkuh nan vae oh. ² Dotua oh, kae Paul nynh nanning kae hopya oh paw tuh, nanning tuh vindung awkuh`ae paw na thua oh ze, Kri tuh nanning hanlan pawsang athanenaw um khyh. ³ Pawccecize vindung awkuh paw ccungccaw miakaw kalan ccaekia bua ka khan paw tuh kha-e paw tuh Kawbya khaleih zui lan laeba umtupaw nynh thua. ⁴ Kawbya liate thyaaccou`ae paw nanning miakaw hanlan Kri tuh nae hanlan pawlang tang vae khyh; nanning tuh thawccinaw kyate phe na khuliakuh vae oh. ⁵ Pawccecize aening tuh zynnaw liate dingnaw kya-e ngaehoinaw kha Muisaw liate nynh phang ah ngaw oh. ⁶ Pawccecize Jesu Kri kya vindung awkupaw thuasah, vindung awku leipaw mah thuasah pawsang thane khyh; thuasalama sungsakunaw liate ryalah paw zynnaw nynh athane. ⁷ Nanning tuh kou hoy lang na ccue vae oh, byaccing kha nanning nynh na ngae khyh nawlan oh hung nynh mou nanning kha ae khee oh? ⁸ Hynh-e soihnawpaw tuh nanning ae ko oh paw kyate yn thua khyh. ⁹ Ditaripaw ransi nynh vaedi khaleih kha pung a thosah. ¹⁰ Nanning lungccang na hoi lan khyh oh cite Bawipaw liate nae kya zynkunaw ka hoi. Thuasalama nanning vawsaw ae pyatu oh paw ccungccaw tuh hunghung athua zemah byapianaw kha a ing cih. ¹¹ Uteno`ae, kae nynh vindung awkunaw kong kha ka ho ung lanze, pawccemou tuasahkunaw kha pei ka teing ung? Tuhte ka ho lanze, vaelantung kya-e thykupawkunaw tuh phe adae cih. ¹² Nanning vawsaw ae pya oh paw ccungccaw`ae kha thoh bae`ae sah ci hei ka ry! ¹³ Pawccecize uteno`ae, nanning tuh luenaw kalan ko na thua vae oh, tuhzemah pynsaw ccyhhoypaw hanlan luenaw kha mang nan oh, thuasalama sungsakunaw liate lukheit te lukheit ryalawpakuh oh. ¹⁴ Pawccecize Kawbya balyn tuh, “Na innpaw kha namaw hawkhate na sungsah cih,” acikuh paw hynh-e bya kyahin phe accing. ¹⁵ Thuasalama nanning nynh lukheit te lukheit na teikuh oh zah na laangku oh ze, lukheit te lukheit na roku khyh nawlan oh la raeringkuh oh! ¹⁶ Te kae nynh, Muisaw te hiin oh lah pynsaw duanaw kha nanning nynh na ccingsah lang khyh oh, kae cipya oh. ¹⁷ Pawccecize pynsaw rynaw tuh Muisaw rynaw te rawsekuh zah Muisaw rynaw mah pynsaw rynaw te arawsekuh. Hynhe` ae tuh ccangkheit te ccangkheit arawsekuh`ae; tukeiccu nanning nynh na cyi ry oh paw kha na cyih khyh oh. ¹⁸ Thuasalama nanning kha Muisaw nynh ae cciakhae oh ze, nanning tuh Kawbya zakaw na um vae khyh oh. ¹⁹ Pynsaw cyisahnaw`ae tuh raerae a langkuh. Tuh-e`ae tuh: milae zu milae vawpaw seikhaepaw, ohhuakunaw, nungsikunaw, sahpaw eih rynaw; ²⁰ zohtuhbeiknaw, ccungccaw nawthyanaw, huakunaw, byalungnaw, ccungingkunaw, thinria bungpawnaw, ahmaw hanlan kyalya tuakunaw, lungnging leinaw, ahme leipaw ccangpyakunaw, ²¹ eiungnaw, ccungccaw chianaw, ruinaw, aeniapoituakunaw, te khahtahawpaw cyisahnaw`ae nynh thua. Khahtahawpaw uccaw`ae a cyih paw ccungccaw`ae tuh Pachia peenaw kha rhoccou lan khyh`ae cite langmaw lya ka ho vae hawte, kha-e`ae kong kha nanning kae hopyaty oh. ²² Thuasalama Muisaw thae tuh sungsakunaw, lungpawnaw, daenaw, lungsaenaw, tuathyanaw, hoynaw, lungzinaw, ²³ nevyalyanaw, sungku khonaw nynh thua. Khahtahawpaw a rawsepaw kawbya um khyh. ²⁴ Kri kya-e ccungccaw`ae nynh tuh pynsaw te pynsaw rynaw te duanaw`ae kha phe a khiade vae`ae. ²⁵ Aening nynh Muisaw kya ah hiin oh thua ze, Muisaw kya mah cceih oh sih. ²⁶ Lukheit te lukheit ccyaku te, lukheit te lukheit eiungkute accakaepaw pookunaw kha aening nynh peki nan oh sih.

¹ Uteno`ae, ccungccaw lukheit tuh seinaw kya phe a phungku lanze, muisaw ccungccaw`ae nanning nynh nevyalyapaw thinlung te khahtahawpaw ccungccaw kha a umtynaw kya bua umsah oh; namaw mah tuhounaw na tung khyh nawlan la raeringkuh. ² Lukheit te lukheit kya-e aripaw phupaw`ae kha duekute nanning nynh Kri kya-e kawbya kha la ccingsah oh. ³ Pawccecize ccungccaw lukheit nynh pawsang athua leite thanccingpaw maman lante a tuaku lanze, amaw te amaw kha a lingkuh paw nynh thua. ⁴ Te ccungccaw miakaw nynh amaw a ryalaw kha sihseikuh sah, te mingccangpaw kya thua leite amaw makhae kyakhe aning tuh lungpawnaw a hoi cih. ⁵ Pawccecize ccungccaw miakaw nynh amaw a phupaw kha a phukuh cih. ⁶ Bya a ccangkuh paw ccungccaw nynh a ccangpatupaw kha ahoypaw uccaw balyn khate neethungbua sah. ⁷ Lingsakuh nan oh, Pachia tuh pawlangria leite nung kho thua khyh; pawccecize ccungccaw lukheit nynh ccaciivua paw kha, a vua thyhte kha-e kha bua a rue cih. ⁸ Pawccecize a pynsaw hanlan ccaciivua paw nynh pynsaw kya-e aroh paw kha a rue cih; thuasalama Muisaw hanlan ccaciivua paw nynh tuh Muisaw kya-e zungzae hiinnaw kha a rue cih. ⁹ Te ahoypaw ryalawnaw kya thawbang lungthang nan oh sih; pawccecize tuhte ah lungthawthang khyh ze, accyh he yn zawte aening nynh ah ruekuh cih oh. ¹⁰ Tukeiccu aening nynh ccyhhoypaw ah mue oh thyhte, ccungccaw balyn hanlan ahoypaw cyipah oh sih. Abapi lante zynnaw kya-e innbyn`ae hanlan ahoypaw cyipah oh sih. ¹¹ Pawcih alepaw ccaw kha nynh kamaw ka kuih te nanning kalan ka zei cipaw na muih oh! ¹² Mimaw mih pynsaw maehoynaw a langsakuh ry`ae paw ccungccaw patae nynh nanning kha vindung awku lan ae nangse oh; tuhte a cyi`ae paw tuh Kri kya-e vaelantung keiccuze a tua a sahnaw`ae paw kha minmin nynh kae teing sei cih cite a tuaku`ae keiccu nynh thua. ¹³ Pawccecize vindung awkuh`ae paw mimaw mah Kawbya kha zui khyh`ae. Thuasalama nanning nae pynsaw kya a pookury`ae pawte nynh nanning kha vindung awkuh`ae sah ci ae ry oh. ¹⁴ Ah Bawipaw Jesu Kri kya-e vaelantung kya laelan kae nynh ka pooku lanpaw kharyh um khyh; tuh-e vaelantung liate laephipi tuh kae ka hanlan khiade thua vae zah kae mah laephipi hanlan khiade ka thua vae. ¹⁵ Pawccecize Kri Jesu kya tuh vindung awkupaw thuasah, vindung awku leipaw thuasah pawsang thane khyh, thuasalama raethawpaw kha nynh athane. ¹⁶ Hynh-e upadi phung thyhte a zui`ae paw ccungccaw`ae balyn tungvaw kya thuasah, Pachia kya-e Israel`ae kya thuasah, daenaw te ngaethya-umsanaw tuh la um vae sah. ¹⁷ Atu liate hung ccungccaw nynh sanmah kamaw hynh vawsaw yn pya nan vae sah; pawccecize Bawipaw Jesu kya-e vaemaw daelaepaw kha ka pyn kya a phubia paw nynh ka thua. ¹⁸ Uteno`ae, ah Bawipaw Jesu Kri kya-e thawccinaw tuh nae thinlung kya la um vae sah. Amen.