Ephesians

¹ Pachia rynaw thyhte Jesu Kri kya-e locceihtu athua paw Paul nynh Efesa khua kya a um`ae paw mithyaa`ae te Kri Jesu kya zyn lan um`ae paw kalan kae beihlang oh. ² Ah Paaw Pachia te Bawipaw Jesu Kri kyate thawccinaw te daenaw tuh nae kya la um vae sah. ³ Kri kya vaawran te asekuhpaw muisaw hythuanaw`ae balyn ryte aening kha hythua oun pyatupaw ah Bawipaw Jesu Kri a Paaw Pachia ccaccei tuh thehoy te um sah. ⁴ Tuhhawte Pachia malang aening tuh sungsakunaw kya ah thyaa nawlan oh te ccaenaw a hoi leipaw ah thua nawlan oh, laephipi athotakaw mawze aening kha Kri kya phe oun po vae hawte. ⁵ A lungrythuasahpaw amaw a rynaw thyhte, Jesu Kri liate amaw kalan ccaaw`ae hawte ccaawthuanaw khylan aening kha langmawpi te phe oun la paccynde vae. ⁶ A Sungsahpaw Ccapaw kya aening oun lehkhannawpaw tuh a phuepaw a thawccinaw kha thehoysah khylan nynh thua. ⁷ Ccapaw a thawccinaw hoirungnaw thyhte, a chii liate seinaw`ae ngaethyanaw athua paw sawkhawnaw kha amaw kya aening nynh ah mue oh. ⁸ Tuh-e thawccinaw kha hawnaw balynte thaethyanaw te aening kalan paepaelui lan oun raepya vae. ⁹ Amaw nynh phe a paccynkuty vae paw ahoypaw a lungrythuanaw thyhte Pachia nynh a rynaw kya-e byakhupaw kha aening kalan phe yn nysah vae. ¹⁰ Ou tuhte accyh`ae accingnaw kya-e ccyhphianaw kya, aning nynh vaawran kya um paw te laephi kya um paw paryhte Kri amaw ccaccei kyakhe pawpaw balyn kha pynkheihlan sang kheit kya pung a suelua nawlan nynh thua. ¹¹ Amaw a khuakhannaw thyhte pawpaw balyn kha a cyihtupaw Pachia nynh amaw a eenaw thyhte langmawpi te phe a paccynde vae thyhte Kri kyakhe aening mah rhoccounaw kha ah mue oh. ¹² Ou tuhte Kri kha masaty a ngaehoikuh`ae paw aening tuh amaw phu-enaw thehoysah paw ah thua nawlan oh nynh thua. ¹³ Nanning mah nae kya-e khumnaw thehoypaw athua paw byaccing bya kha na thae oh koute amaw kha na zyn oh, nanning nynh amaw kha na zyn oh koute Pachia nynh byakinpyakupaw Thyaa Muisaw khate nanning tuh tazeihkhia na thua vae oh. ¹⁴ Pachia nynh a re vae paw, a hoi paw uccaw kha a sawkhaw makhia cia, tuh-e Muisaw tuh aening rho uccaw kya-e pyatypaw nynh thua, tuh-e tuh a phu-enaw kha thehoysah nawlan nynh thua. ¹⁵ Tukeiccu Bawipaw Jesu na zynnaw oh paw te mithyaa`ae balyn na sungsanaw oh paw kha he ka thae tuh, ¹⁶ nanning hanlan dae leite lungtuabya ka ho zah nanning kha ka sawsangnaw kya tyty kae lia oh. ¹⁷ Saw ka sang paw tuh: ah Bawipaw Jesu Kri a Pachia, phu-enaw Paaw nynh hawnaw muisaw te amaw kya-e nynaw byaphy kha nanning ae pya nawlan oh, ¹⁸ thaethya nawlan nae thinlung mit ae awsapya nawlan oh, amaw konawpaw ngaehoinaw tuh paw nynh thua cipaw na ny nawlan oh, te mithyaa`ae kya um paw amaw kya-e rho uccaw phuenaw hoirungnaw tuh paw nynh thua cipaw na ny nawlan oh, ¹⁹ te amaw kya-e myarya athungpaw thungnaw kya-e ryalawnaw thyhte, a zyn`ae paw aening kalan amaw kya-e a thawsaepaw thungnaw tuh hohcih nynh ale cipaw na ny nawlan oh, saw kae sangpya oh. ²⁰ Kri kha a chih`ae paw kyate thosah zah vaawran kya amaw a ranglang khe a dahungsah lya, kha-e thungnaw te nynh Kri kya Paaw nynh rya a law. ²¹ Alupihuanaw balyn, cyi khonaw balyn, thungnaw balyn, te ukkunaw balyn kya ahanghua lante a dahungsah, te atu she kyalya thua leite yn thua vae cih paw she kyacia minphukuh paw min miakaw balyn kya ahanghua lante a nung. ²² Te pawpaw balyn kha Kri a ccuphe kaw marya nung zah pawpaw balyn kyaze lu lang amaw kha kriccawbu hanlan a pya. ²³ Tuh-e kriccawbu tuh pawpaw kya pawpaw balyn phe biasah paw amaw ccingnaw athua paw a pyn nynh athua.

¹ Te ccouseikunaw`ae te seinaw`ae kya a chih vae`ae paw nanning kha Pachia nynh ae hiinsah oh. ² Langmaw lya nanning tuh hynh-e laephipi ccianaw thyhte kha-e`ae kya na la hiin oh, khivae kya-e thungnaw uktu bawi paw rynaw thyhte, kawngae lei`ae paw ccaaw`ae kya atu ryalah paw muisaw rynaw thyhte na la hiin oh. ³ Tuh-e`ae laku aening balyn mah langmaw lya pynsaw rynaw te thinlung rynaw kha ccingsah te ah pynsaw duanaw`ae kya ah la ciakuh bua oh. Mingccang`ae hawnaw te, aening mah thuanaw lante thinrianaw a ccou`ae paw ccaaw`ae nynh ah la thua oh. ⁴ Thuasalama ngaethya-umsanaw te phe beihpaw Pachia nynh aening kha myarya alepaw a sungsanaw te oun sungsah keiccu, ⁵ seinaw kya ah chi oh lyakhe, Kri ryte pynkheihlan aening kha oun hiinsah vae, (thawccinaw liate nanning tuh khum na thua vae oh), ⁶ te pynkheihlan oun thosah zah Kri Jesu kya vaawran hmin`ae kya pynkheihlan oun dahungsah vae. ⁷ Ou tuhte yn thua lanpaw she kya myaryamaw alungpaw a thawccinaw kha a tuathyanaw liate Kri Jesu kya aening kalan oun langsapya nawlan nynh thua. ⁸ Pawccecize thawccinaw keiccuze zynnaw liate nanning tuh khum na thua vae oh. Naemaw te naemaw liate thua khyh, Pachia lasung nynh thua. ⁹ Ryalawnaw liate thua khyh, tukhyh lanze lukhakheit nynh phe a pookuh sei cih. ¹⁰ Pawccecize aening tuh amaw nynh oun rae paw, ahoypaw ryalaw`ae law khylan Kri Jesu kya rae paw nynh ah thua oh. Tuh-e ahoypaw ryalaw`ae kya aening nynh ah hiin nawlan oh Pachia nynh phe a la paccynty vae. ¹¹ Tukeiccu langmaw lya, pynsaw kya kuih te rae paw vindung awkunaw a ccou`ae paw nynh nanning kha vindung awkuh lei`ae paw ae ci oh paw te pynsaw lante nanning tuh Zenta`ae na la thua oh paw kha liathui oh. ¹² Tuh ccyh lya nanning tuh Kri leite na la um oh paw, Israel khuaram toonaw kyate khycce`ae na la thua oh paw, byakinpyakupaw kya-e byakin`ae kyate mikhia`ae na la thua oh paw, ngaehoinaw hoi lei`ae paw, te laephipi kya Pachia leite na la um oh paw kha liathui oh. ¹³ Thuasalama langmaw lya kou na la sawkuh oh paw nanning kha Kri chii liate Kri Jesu kya atu tuh naesaku na thua vae oh. ¹⁴ Pawccecize amaw tuh aening bua ccawkunaw nynh thua. Aning nynh alaku-e arihkhawpaw lungrua kha pung tingsabung zah minphuin phinning kha phinkheit lang phe a rae vae. ¹⁵ Ccangpyakunaw`ae kya a um paw, kawpyapaw`ae Kawbya athua paw rhawkunaw kha amaw pynsaw kya phe a rosah vae; minphuin phinning kha amaw kya athawpaw ccungccaw ccangkheit lang rae khylan nynh bua ccawkunaw kha a rae. ¹⁶ Te aning nynh minphuin phinning kha pyn pynkheit kya Pachia te bua ccawsakuthui khylan nynh rhawkunaw kha vaelantung liate phe a maemih. ¹⁷ Te Kri nynh yn thua zah asawnaw kya um`ae paw nanning kalan te anaenaw kya um`ae paw kalan daenaw thehoypaw kha a ho. ¹⁸ Pawccecize amaw liate Muisaw ccangkheit liate aening paryh tuh Paaw kalan thua khonaw ah hoi oh. ¹⁹ Tukeiccu atu nanning tuh mikhia`ae te minphuinccang`ae na thua vae khyh oh, thuasalama mithyaa`ae ryte khuaccaw`ae nynh na thua vae oh, Pachia innbyn kya-e`ae nynh na thua vae oh. ²⁰ Nanning tuh locceihtu`ae te profeh`ae athua paw lung-inn athonaw vawlan sakthyh paw nynh na thua oh, Jesu Kri amaw tuh abapi huapaw alukipaccy lung nynh thua. ²¹ Amaw kya sak paw inn balyn tuh rekuhmamia lang sak thua zah Bawipaw kya athyaapaw tempal lang a lethung. ²² Muisaw liate Pachia a um nawlan nanning kha mah amaw kya pynkheihlan sak na thua oh.

¹ Tuh-e keiccuze kae Paul tuh nanning Zenta`ae hanlan Jesu Kri keiccu thungccahpaw nynh ka thua. ² Nanning thanenaw hanlan kamaw pya athua paw Pachia thawccinaw kya-e dooihnawrya kong kha nanning nynh phe na thae mamin vae cih oh. ³ Tuh-e tuh, byaphy liate Pachia nynh byakhupaw kha kamaw phe yn nysah vae (dyntari te ccaw phe kae zei vae hawte, ⁴ kha-e kha nanning nynh he na ria oh te, Kri kya-e byakhupaw kya ka nynaw kha nanning nynh na thaethya nawlan oh cite), ⁵ kha-e byakhupaw kha amaw kya-e athyaapaw locceihtu`ae te profeh`ae kalan Muisaw liate atu lya phe a phypya`ae hawte, ccangpaw she kya ccungccaw ccaaw`ae kalan la phypah khyh`ae. ⁶ Tuh-e tuh, thehoypaw liate Zenta`ae mah rhoccoubua`ae paw thua nawlan, phe alokuhpaw pyn kya-e thua nawlan, te Kri kya a byakinpyakupaw kya-e a neethungkuh bua`ae paw thua nawlan nynh thua. ⁷ Amaw thungnaw kya-e ccungkiapaw ryalawnaw liate, kamaw pya athua paw Pachia kyae thawccinaw lasung thyhte, kae tuh kha-e thehoypaw ryalahtu lang kae tang. ⁸ Tou kho um leipaw Kri kya-e hoirungnaw kha Zenta`ae kalan ka ho nawlan, mithyaa`ae balyn kyaze anyaa huapaw laeze houh anyaa huapaw kamaw kha hynh-e thawccinaw kha pya ka thua. ⁹ Pawpaw balyn Jesu Kri liate a raetupaw Pachia kya laephipi athotakaw kyate phisi athua paw kha-e byakhupaw kya-e vaeccawtangnaw tuh pawhynh nynh thua cipaw ccungccaw`ae balyn kha muihsah khylan hynh-e thawccinaw kha pya ka thua. ¹⁰ Tuhte muihsah rynawpaw tuh Pachia hawnaw aphuinphuin kha vaawran e uktu`ae kalan te kawhoitu`ae kalan kriccawbu liate atu nysah bua athua nawlan nynh thua. ¹¹ Tuh-e tuh ah Bawipaw Kri Jesu kya Pachia nynh zungzae atynpaw eenaw thyhte a ccingsahpaw nynh thua. ¹² Kri zynnaw liate zynkute rawhoynaw te Pachia kalan thua khonaw kha amaw kya ah hoi oh. ¹³ Tukeiccu nanning kya-e phuenaw athua paw, nanning hanlan ka teingpaw vawsawnaw`ae keiccuze nae lungthang khyh nawlan kae ngia oh. ¹⁴ Hynh-e keiccu nynh ah Bawipaw Jesu Kri a Paaw kalan ccukharu ka tung. ¹⁵ Amaw kyate nynh vaawran kya te laephi kya innbyn khaleih tuh minphu athua. ¹⁶ Saw ka sang paw tuh: amaw phu-enaw kya-e hoirungnaw thyhte Pachia nynh nanning kha ae pya nawlan oh, amaw Muisaw thungnaw liate alungkhu lang-e ccungccapaw kha thawzung te thawsaesah athua nawlan, ¹⁷ te zynnaw liate Kri tuh nanning thinlung kya a um nawlan; te sungsakunaw kya nanning tuh tharuisaw te bingku na thua vae oh thyhte, ¹⁸ mithyaa`ae balyn ryte Kri kya-e sungsanaw akopaw, asaepaw, akhupaw te ahangpaw kha na nythya nawlan oh, ¹⁹ nynaw po aluepaw Kri kya-e sungsanaw kha na ny nawlan oh; ou tuhte nanning tuh Pachia kyae ccingnaw balyn ryte phe na bia nawlan oh saw ka sang. ²⁰ Atu aening kya ryalah paw thungnaw thyhte, aening nynh ah ngia oh paw balyn, tukhyhze ah tua oh paw balyn laeze myaryamaw alunghua lante a cyih khopaw Pachia tuh, ²¹ Kri Jesu liate kriccawbu kya she balyn kya zungzae te zungzae cia phu-esah. Amen.

¹ Tukeiccu Bawipaw keiccuze thungccahpaw kae Paul nynh ko na thua oh paw nanning kha, kha-e konaw te angaekuh lante na hiin nawlan oh kae ngia oh. ² Pawpaw balyn kya zakawsangsakunaw te, lungnenaw te, ngaesangnaw te, sungsakunaw kya lukheit te lukheit ngaethyaku te, ³ ccawkunaw te sueluakunaw kya Muisaw kya-e lungngingnaw kha tynsah khylan thawte zuakuh oh. ⁴ Nanning konaw kya-e ngaehoinaw tuh ccangkheit kyalya athua hawte, pyn pynkheit, Muisaw ccangkheit, ⁵ Bawipaw ccangkheit, zynnaw ccangkheit, baptisma ccangkheit, ⁶ pawpaw balyn Paaw athua paw Pachia ccangkheit nynh a um. Tuh-e Pachia tuh pawpaw balyn luki a um paw, teitei balyn kya a um paw, te nanning balyn kya a um paw nynh thua. ⁷ Thuasalama Kri kya-e lasung tounawpaw thyhte aening lu raveih tuh thawccinaw kha pya ah thua oh. ⁸ Tukeiccu, “Aning nynh ahangnaw lang he a kaethung tuh, kyngte thungsaw`ae paw kha a cciakhae`ae, te ccungccaw`ae kha lasung a pya`ae,” cite a ho. ⁹ (Atu, “Aning tuh a kaethung,” a cipaw tuh pawmou a hory? Masaty laephi anehuanaw kalan mah a rungbung paw kha nynh thua. ¹⁰ Yn rungbung paw aning tuh pawpaw balyn kha phe biasah khylan, vaawran`ae balyn luki lang a kaethung paw aning maw kha nynh thua.) ¹¹ Te amaw ccaccei nynh ccungccaw abang kha locceihtuthuanaw, te abang kha profehthuanaw, abang kha evangelistthuanaw, abang kha pastor te ccangpatuthuanaw a pya`ae, ¹² tuhte a pya`ae paw tuh Kri pyn kha tynsathung khylan, ryalawnaw kya-e ryalaw hanlan mithyaa`ae kha paccyn khylan, ¹³ aening balyn nynh zynnaw kya lunglokunaw te Pachia Ccapaw nynaw lunglokunaw kya ah thua oh cia, Kri kya-e ccingnaw pynrua tounawpaw athua paw, piccangthua vae paw ccungccaw athuakuh cia ah thua nawlan oh; ¹⁴ ou tuhte ccungccaw`ae nynh hyngpyanaw liate, a cyisakuh thyapaw thyaruhnaw te a pheethyapaw pheenaw kya ccangpyanaw khivae miakaw nynh po cciakhae`ae zah nuhlang malang ahekuh`ae paw imua`ae kharyh ah thua vae khyh nawlan oh, ¹⁵ thuasalama sungsakunaw kya byaccing kha hote, aening tuh lu athua paw Kri kya pawpaw kya balyn ah lethung nawlan oh, ¹⁶ amaw kyate atungkunaw miakaw nynh thawpya zah pyn balyn tuh rekuhmamia lang tungkuh`ae zah akyngkuh`ae, pyn kya-e raveih nynh ccungkia lang rya a law`ae thyhte, sungsakunaw kya kha-e pyn kha tynsathung nawlan pyn kha a lethungsah. ¹⁷ Tukeiccuze tuhlaepaw Zenta`ae nynh accakaepaw mih tuanaw-thinlung kya a hiin`ae hawte nanning nynh na hiinbua khyh nawlan oh e hynh ka ho zah Bawipaw kya ccaekia ka khan. ¹⁸ Minmin kya nythyanaw kharyh a um khyh keiccu, mih thinlung mitmoh keiccu, mih thaethyanaw tuh karae amoh, Pachia kya-e hiinnaw kyate phe a phiakuh vae`ae. ¹⁹ Minmin tuh maethya ny leite, eih duanaw te nungsikunaw tynre kha cyi khylan mimaw te mimaw kha myarya ohhuakurynaw kalan a ahkuh`ae. ²⁰ Thuasalama nanning tuh Kri kong kha tuhte na ccangkuh khyh oh; ²¹ byaccing tuh Jesu kya a um hawte, amaw kong kha nanning nynh phe na thae vae oh zah amaw nynh phe ae ccangpya vae oh lanze, ²² langmaw nae ozia te asekuh lante a hyngthyapaw ryduanaw thyhte phe aroh vae paw arynpaw ccungccaw kha nanning nynh na vua nawlan oh, ²³ te nae tuanaw-thinlung muisaw kha thawsahte na um nawlan oh, ²⁴ te ahmepaw dingnaw kya te thyaanaw kya Pachia hawmawte rae athua paw, athawpaw ccungccaw kha nanning nynh na lawku nawlan oh nynh thua. ²⁵ Tukeiccu hyngbya kha nungbiate, “Nanning lu raveih nynh nae innpaw`ae ryte byaccing kha ho oh,” pawccecize aening tuh lukheit te lukheit pyn kyae` ae nynh ah thua oh. ²⁶ “Nae thinria zemah sei nan oh:” nae bungpawnaw khate khuanin ccawsah nan oh. ²⁷ Diabolos kha umnaw ua nan oh. ²⁸ Aruhpaw ccungccaw nynh kharyh ruh nan vae sah, thuasalama ahoboupaw ccungccaw kha pyabua lanpaw a hoi nawlan, amaw a kuih te ahoypaw ryalaw kha zuakute lah sah. ²⁹ Anungsikuhpaw bya kaw kheit san nae khalang kyate pou nan sah. Thuasalama a thaetu`ae kha Pachia thawccinaw a neethungbua nawlan, tynsathungnaw hanlan athanepaw ahoypaw bya palia pousah oh. ³⁰ Sawkhawnaw nin hanlan nanning tazeih ae khianaw oh paw, Pachia Thyaa Muisaw kha thinlungccisah nan oh. ³¹ Thinlung kya phang poi paw balyn, bungpawnaw, thinrianaw, sianuakupaw, te thethya hokupaw, milae rosahrynawpaw balyn kha nae kyate dae vua oh. ³² Te lukheit te lukheit thawccihkuh thya oh lah ngaethya-umsakuh oh, Kri kya Pachia nynh nanning kha ae ngaethya vae oh hawte lukheit te lukheit ngaethyakuh oh.

¹ Tukeiccu kou sungsahpaw ccaaw`ae na thua oh hawte, Pachia dosuinkuh`ae paw thua oh. ² Kri nynh aening kha yn sungsahpawte, Pachia malang mynkhuhpaw pyapaw te silawku nawlan amaw te amaw kha aening halan a pyaku hawte, sungsakunaw kya hiin oh. ³ Thuasalama mithyaa`ae elan angaekuh hawte ohhuakunaw, thyaa leinaw tynre, tukhyhze karangkunaw kha nanning laku ho ci um boi nan vae sah; ⁴ nungsikunaw, angaekuh leipaw ccyasakupaw, ngaeeccaccu lang bya hopaw mah um nan vae sah, thuasalama lungtuabya palia la ho oh. ⁵ Pawccecize, a ohhuakuhpaw, athyaa leipaw, zohtuhbeiktu athua paw a karangkuhpaw ccungccaw tuh Kri te Pachia peenaw kya rho uccaw kharyh hoibua khyh cipaw kha na ny oh. ⁶ Ccakaepaw bya`ae khate hung ccungccaw nynh san ae la ling nan oh sah; pawccecize khahtahawpaw uccaw`ae keiccu nynh Pachia thinrianaw tuh kawngae leipaw ccaaw`ae tungvaw kya a thua. ⁷ Tukeiccu nanning tuh minmin ryte la mungkuh bua nan oh. ⁸ Pawccecize langmaw lya nanning tuh mohnaw nynh na la thua oh, thuasalama atu tuh Bawipaw kya awnaw nynh na thua vae oh; tukeiccu awnaw ccaaw`ae hawte hiin oh. ⁹ Pawccecize Muisaw athae tuh hoynaw tynre kya, dingnaw te byaccing kya nynh a um. ¹⁰ Bawipaw lungrythua paw uccaw kha ccangku lan zuakuh oh. ¹¹ Te athae thae leipaw mohnaw ryalaw`ae ryte vaeccawtang nan oh, thuasalama kha-e`ae kha seinaw muihsakuh oh. ¹² Pawccecize minmin nynh aphiru lante a cyi`ae paw kha-e uccaw`ae kong kha ho lan heize maethya lan um paw nynh thua. ¹³ Thuasalama awnaw liate langsapya athua paw seinaw miakaw tuh ccaerarihlan muih kho athua, pawccecize pawpaw balyn a langsakuh thya paw tuh awnaw nynh thua. ¹⁴ Tukeiccu Pachia nynh, “A ih paw nang, tho ccavae, a chih`ae paw kyate tho lah Kri nynh nang kha awnaw ae pya cih,” a ci. ¹⁵ Tukeiccu angaeepaw hawte thua leite, thuasalama ahawpaw hawte myarya raeringkute hiin oh. ¹⁶ Ninsaw`ae tuh ahoy vae khyh keiccuze accyh kha mangkuh thya oh. ¹⁷ Tukeiccu ngaee nan vae oh, thuasalama Bawipaw rynaw tuh paw nynh thua cipaw kha thaethya ccavae oh. ¹⁸ Te azaw ci um leipaw misutui te rui nan oh, thuasalama Muisaw te phe beih oh. ¹⁹ Sam law`ae, thehoysanaw law`ae te muisaw law`ae khate lukheit te lukheit byahokuh oh lah nae thinlung kya ahoypaw roi sawbiate Bawipaw kalan law sah oh. ²⁰ Ah Bawipaw Jesu Kri min te Paaw Pachia kalan pawpaw balyn hanlan lungtuabya pei ho oh. ²¹ Pachia rawri sawtuanaw liate lukheit te lukheit ahkuh oh. ²² Zu`ae, Bawipaw kalan ahkupaw hawkhate, nae vawpaw`ae kalan ahkuh oh. ²³ Pawccecize Kri tuh kriccawbu lu athua hawte, vawpaw tuh zu lu nynh athua; te Kri tuh pyn Khumtu nynh athua. ²⁴ Tukeiccu kriccawbu nynh Kri kalan a ahku hawte zu`ae nynh pawpaw kya balyn mih vawpaw`ae kalan ahkuh`ae sah. ²⁵ Kri nynh kriccawbu kha sungsah zah amaw kha kha-e hanlan a pyaku hawte, vawpaw`ae nae zu`ae kha sungsah oh. ²⁶ Kri nynh bya athua paw tui te singpyanaw liate kriccawbu kha thyaasah nawlan te a ccikan nawlan; ²⁷ akalyhkuhpaw khyh ze, akhinkuhpaw, tukhyhze khahtahawpaw ccangkhakheit sanmah a um leipaw, aphu-epaw kriccawbu kha amaw kalan thuakhae khylan; ou tuhte kriccawbu tuh athyaa nawlan te ccaenaw um khyh nawlan amaw kha a pyaku. ²⁸ Tukeiccu vawpaw`ae nynh mimaw mih pyn a sungsah`ae hawmawte mih zu`ae kha a sungsah`ae aho. A zu a sungsahpaw tuh amaw kha a sungsakuh paw nynh thua. ²⁹ Pawccecize amaw a ngesaw a hua paw hung sanmah um khyh, thuasalama Bawipaw nynh kriccawbu kha a dooih a kua hawkhate, amaw pyn kha a dooih a kua. ³⁰ Pawccecize aening tuh amaw ngesaw kya-e, amaw ru`ae kya-e, te amaw a pyn kya-e`ae nynh athua oh. ³¹ “Hynh-e keiccuze pise nynh a nung te a paaw kha a cciataw cih zah a zu kalan a bekuh cih, te minmin luning tuh ngesaw kheit lang a tang cih`ae.” ³² E tuh myarya byakhupaw nynh thua. Thuasalama Kri te kriccawbu kong kha nynh ka ho. ³³ Tuhzemah nanning lu raveih nynh naemaw na sungsaku oh hawkhate nae zu`ae kha mah sungsah oh. Te zu nynh vawpaw kha sawtua sah.

¹ Imua`ae, Bawipaw kya nae nung nae paaw`ae kawngae oh, pawccecize tuh-e tuh ahmepaw nynh thua. ² Byakinpyakupaw te asekuhpaw masaty kawpyapaw tuh: “Na nung te na paaw kha sawtua,” acikuh, ³ “ou tuhte na hanlan ahoy nawlan, te laephi vawlan asaepi na hiin nawlan nynh thua.” ⁴ Te nanning paaw`ae, nae ccaaw`ae kha thinriasah nan oh, thuasalama Bawipaw kya-e ccangpyanaw te thuiheinaw khate minmin kha cciakhae thung oh. ⁵ See`ae, Kri kawngae hawte, rawrinaw te thyngkute, thinlung thanccingte, pynsaw lante nae bawizua`ae kawngae oh. ⁶ Ccungccaw lungrythuasahpaw hawte, mitmuihnaw kya kyalya kawngaepaw thua leite, thuasalama Kri kya-e see`ae hawte, thinlung kyate Pachia rynaw kha cyite, ⁷ ccungccaw`ae kalan ryalawpyapaw hawte thua leite, Bawipaw ryalawpah paw hawte, ahoypaw thinlung khate ryalawpah oh. ⁸ See athua zemah, a luepaw athua zemah, lukhakheit nynh ahoypaw kha a cyi ze, kha-e kha Bawipaw kyate a mue cih cipaw nyh oh. ⁹ Te nanning bawizua`ae, furawnaw kha sungku te, nae see`ae kha tuhhawte cyih bua oh. Nanning nae Bawipaw mah vaawran kya a um cipaw te amaw tuh hung ccungccaw sanmah maedo khyh cipaw kha nyh oh. ¹⁰ Nyathyakou ka uno`ae, Bawipaw kya te a thawsaenaw thungnaw kya nae thawsae sah. ¹¹ Diabolos hyngpyanaw kha na dou kho nawlan oh Pachia kya-e rhawuccaw khaleih kha lawkuh oh. ¹² Pawccecize aening tuh ngesaw te chii a hoi paw rhaw te ah doukuh oh paw thua khyh, thuasalama ahang huaccepaw`ae ryte, thungnaw`ae ryte, hynh-e she mohnaw kya-e uktu`ae ryte, vaawran um paw ahoy leipaw muisaw`ae ryte nynh ah doukuh oh. ¹³ Tukeiccu Pachia kya-e rhawuccaw khaleih kha lawkuh oh, ou tuhte athah-aruhpaw nin kya nanning nynh na douku kho nawlan oh, pawpaw balyn phe na thangsah kho nawlan oh te na thadynnua kho nawlan oh. ¹⁴ Tukeiccu, byaccing athua paw taesung khate nae cce kha cciaku te, te dingnaw athua paw bykhawphua kha zingku te; ¹⁵ te daenaw athua paw thehoypaw paccynkunaw kha ccukoh lang kohkute; ¹⁶ kha-e`ae balyn laelan, zynnaw athua paw rhawphua kha ccyngkute varyn thadyn oh; kha-e zynnaw te nynh ahoy leipaw lukheitpaw kya-e maee lang ruapaw thee`ae balyn kha nanning nynh na the kho cih oh. ¹⁷ Te khumnaw athua paw sivawlukhung te Pachia bya athua paw Muisaw thaloi kha ccyngkuh oh. ¹⁸ Sawsangnaw phin balynte, ngianaw balynte Muisaw kya sawsang zungzae oh; te mithyaa`ae balyn hanlan taemyasawkunaw balynte, ngianaw balynte ngawrando oh. ¹⁹ Te thehoypaw kya-e byakhupaw kha nysah khylan`ae, ka khalang hynh rawhoy te ka aw kho nawlan, ho khonaw kha kamaw pya ka thua nawlan, kae ka hanlan mah sawsang oh. ²⁰ Tuh-e thehoypaw hanlan kae tuh saw paw kosale ka thua zah kha-e keiccuze sivarui`ae te khii ka thua; tukeiccu ho lan ka ccang hawte kha-e kha rawhoy te ka ho kho nawlan saw oun sangpabua oh. ²¹ Thuasalama kamaw kya acyihkuh paw konglang kha nanning nynh na ny nawlan oh, sungsahpaw uno te Bawipaw kya zyn lan um paw ryalahtu athua paw Taichikas nynh pawpaw balyn kha nanning marya ae la nysah cih oh. ²² Alokuhpaw eenaw hanlan amaw kha nae kalan kae saw, ou tuhte nanning nynh kaening konglang kha na ny nawlan oh, te aning nynh nae thinlung kha ngaengansah khylan nynh kae saw. ²³ Paaw Pachia te Bawipaw Jesu Kri kyate daenaw te zynnaw ryte sungsakunaw tuh uteno`ae kyakhe la um sah. ²⁴ Ah Bawipaw Jesu Kri kha thinlung thanccingte a sungsah`ae paw balyn kya thawccinaw tuh la um sah. Amen.