Colossians

¹ Pachia rynaw liate Jesu Kri kya-e locceihtu athua paw kae, Paul te kae unopaw Timote nynh, ² Kolosa kya um`ae paw mithyaa`ae te Kri kya zyn lan um paw uteno`ae kalan kae beihlang oh. Ah Paaw Pachia te Bawipaw Jesu Kri kyate thawccinaw te daenaw tuh nae kya la um sah! ³ - ⁴ Nanning nynh Kri Jesu na zyn oh cipaw te mithyaa`ae balyn kha na sungsah oh cipaw kha kaening nynh he kae thae tuh nanning hanlan pei sawsang te, ah Bawipaw Jesu Kri a Paaw athua paw Pachia kalan lungtuabya kae ho. ⁵ Thehoypaw kya-e byaccing bya kha langmaw lya nanning nynh na thae oh pawte, vaawran kya nanning hanlan nungpya athua paw ngaehoinaw kha na hoi oh. ⁶ Tuh-e thehoypaw tuh laephipi balyn kya po pazaeku vae hawte nanning kalan mah yn thua. Byaccing kya Pachia kya-e thawccinaw na nyh oh zah kha-e na thae oh nin kyate nanning kya mah athae thae hawte, teitei kya balyn athae kha a poukhae. ⁷ Kae sungsahpaw rya kae lahkheihtupaw, Epafras kyate nanning mah phe na ccangkuh vae oh thyhte, aning tuh nanning hanlan Kri kya-e zyn lan um paw ryalahtu nynh thua. ⁸ Muisaw kyate na sungsakunaw oh paw kong kha kaening kalan aning nynh oun hopya. ⁹ Hynh-e keiccu kaening mah kha-e kae thae nin te nanning hanlan saw pei kae sangpah oh, te hawnaw balyn kya amaw rynaw nynaw te muisaw lante thaethyanaw te phe na bia nawlan oh saw kae sangpya oh. ¹⁰ Ou tuhte ahoypaw ryalaw miakaw kya pung liate, Pachia nynaw kya lethungte pawpaw balyn kya a lungrythua lante Bawipaw te angaekuh lante na hiin nawlan oh; ¹¹ lungtuanaw ryte pawpaw kya balyn ngaesang kho nawlan te lungsae nawlan, alesaepaw a thungnaw thyhte, thawzung khaleih te thawsaesah na thua nawlan oh saw kae sangpya oh. ¹² Mithyaa`ae kya-e rho uccaw kha awnaw kya a neethungkuh bua`ae paw lang aening yn raetupaw Paaw kalan lungtuabya kae ho. ¹³ Amaw nynh mohnaw kawhoinaw kyate aening kha poh oun thua zah a sungsahpaw a Ccapaw kya-e peenaw lungkhu lang aening kha oun teesah. ¹⁴ Ccapaw a chiise liate nynh seingaethyanaw athuapaw sawkhawnaw kha aening ah mue oh. ¹⁵ Ccapaw tuh muih kho leipaw Pachia muinsan nynh thua, rae paw balyn kyaze ccatawccaaw nynh thua. ¹⁶ Pawccecize vaawran kya um paw, te laephi vaw um paw, muih khopaw te muih kho leipaw, suitungkhung`ae te ukkunaw`ae, lupi huacce thuanaw`ae te kawhoinaw`ae, pawpaw balyn tuh amaw liate rae thua`ae zah amaw hanlan nynh thua. ¹⁷ Te pawpaw balyn a um mawze aning tuh um zah pawpaw balyn tuh amaw liate nynh a um. ¹⁸ Aning tuh kriccawbu athua paw pyn kya-e lu nynh thua. Pawpaw balyn kya aning tuh ahang huaccepaw athua nawlan, athotakawnaw thua zah a chih`ae paw kyaze ccatawccaaw nynh thua. ¹⁹ Pawccecize pawpaw balyn ccingnaw tuh Ccapaw kya a um lanpaw kha Paaw a lungrythua. ²⁰ Laephi kya um paw uccaw`ae thuasah, vaawran kya um paw uccaw`ae thuasah pawpaw balyn kha Ccapaw liate Pachia te bua ccawsakuthui khylan a vaelantung kya-e a chiise liate rhaw daenaw kha a rae. ²¹ Te langmaw lya nanning tuh Pachia te na la ccawkuh lei oh paw, ahoy leipaw ryalaw`ae keiccuze nae tuanaw-thinlung kya rhaw`ae nynh na la thua oh paw, ²² tuhzemah atu tuh nanning kha athyaapaw, ccaenaw um leipaw, douccahpaw lante amaw malang thuakhae khylan chinaw liate amaw pyn kya phe ae ccawsakuthui vae oh. ²³ Nanning nynh zynnaw kya na bingkuh oh zah pia leite po na tyn oh ze, te vaawran zakaw um paw rae paw miakaw kalan ho athua vae paw, nanning nynh phe na thae vae oh paw, thehoypaw kya-e ngaehoinaw kyate na nueku khyh oh ze, amaw kalan ae thuakhae cih oh; kae Paul tuh tuh-e thehoypaw hanlan ryalahtu lang rae paw nynh ka thua. ²⁴ Nanning hanlan vawsaw ka teingnaw kya atu ka lungtua. Te kriccawbu athua paw amaw pyn hanlan Kri vawsaw teingnaw kya aboupaw kha ka pynsaw kya ka ccingsah. ²⁵ Pachia bya ccingsah khylan nanning hanlan kamaw pya athua paw Pachia kya-e synriatuthuanaw thyhte kae tuh kha-e kriccawbu hanlan ryalahtu lang rae ka thua. ²⁶ Tuh-e byakhupaw tuh she`ae kya te ciihan`ae kya thuru a la thua, thuasalama atu tuh amaw mithyaa`ae kalan langsapya athua vae. ²⁷ Zenta`ae laku hynh-e byakhupaw kya-e phu-enaw hoirungnaw kha mithyaa`ae nysah lan Pachia nynh a ry; tuh-e byakhupaw hoirungnaw tuh phuenaw kya-e ngaehoinaw athua paw, nanning kya a um paw Kri kha nynh thua. ²⁸ Kri Jesu kya accingpaw lang ccungccaw miakaw kha kaening nynh kae thuakhae nawlan, ccungccaw miakaw kha raeringnaw pyate, hawnaw balyn ryte ccangpyate Kri kong kha kaening nynh kae ho. ²⁹ Hynh-e eenaw hanlan kae mah rya ka lah, kamaw kya myarya athung lante ryalah paw a ryalawnaw thyhte thawte ka zuakuh.

¹ Nanning hanlan, te Laodisia khua kya um`ae paw hanlan, te pynsaw kya ka mae oun muih boi lei`ae paw patae hanlan, pawcih alepaw rawsekunaw nynh ka hoi cipaw na ny oh ka ry. ² Ou tuhte sungsakunaw kya pynkheihlan kheleku te, Paaw kya-e te Kri kya-e athua paw, Pachia kya-e byakhupaw nynaw kalan te thaethyanaw kya-e khaleih lungngaengankhaekunaw kalan phya khylan mih thinlung`ae tuh thawzungpya athua nawlan ka ry. ³ Kri kya hawnaw sisua`ae te nynaw sisua`ae balyn tuh thuru athua. ⁴ Hung ccungccaw nynh san soihpaw bya`ae te nanning kha ae ling khyh nawlan oh e hynh kae hopya oh. ⁵ Pawccecize kae tuh pynsaw lante nanning ryte ka umbua khyh zemah muisaw kya nanning ryte ka um. Nanning nynh angaekuh lante na cyi oh paw te Kri kya nae zynnaw a tynkaringpaw kha ka muih zah ka lungtua. ⁶ Tukeiccu Kri Jesu Bawipaw kha nanning nynh phe na lawku vae oh hawte, amaw kya hiin ccavae oh. ⁷ Amaw kya na bingkuh oh zah tynsathung na thua oh, te nanning tuh ccangpya na thua vae oh hawte, zynnaw kya tyn oh lah lungtuabya hote zynnaw kya phe biate amaw kya hiin oh. ⁸ Kri ccangpyanaw thyhte thua leite, ccungccaw`ae phung thyhte zui zah laephipi e atakaw phung`ae thyhte a zui paw, laephi thyahawnaw te accakaepaw lingkunaw`ae khate hung ccungccaw nynh san ae ro khyh nawlan oh la raeringkuh oh. ⁹ Pawccecize Pachiathuanaw ccingnaw balyn tuh Kri kya nynh pynsaw lante a um. ¹⁰ Lupi huaccenaw te kawhoinaw balyn kyaze lu athua paw, amaw kya nanning tuh ccingsah na thua oh. ¹¹ Kri kya-e vindung awkunaw liate pynsaw kya-e seinaw pyn kha khahku te, kuih te rae leipaw vindung awkunaw khate nanning mah amaw kya vindung aw na thua oh. ¹² Baptisma kya Kri ryte na uhkuh bua oh. Kri kha a chih`ae paw kyate a thosah paw Pachia kya-e ryalawnaw zynnaw liate amaw ryte nanning mah na thothui bua oh. ¹³ Te nae seinaw kya te pynsaw vindung awku leinaw kya na chih oh paw nanning kha Kri ryte pynkheihlan Pachia nynh ae hiinsah oh, na cyiseimenaw oh balyn kha ae ngaethya oh. ¹⁴ Aening oun rawsepaw te ah rhawpaw athua paw, kuih te zei paw kawpyapaw`ae kha marya a the; te kha-e kha cciakhae zah vaelantung kya phe a khiade vae. ¹⁵ Lupi huaccenaw`ae te kawhoinaw`ae kha marya khah zah raerae alangkuh lan maethyasah`ae, te vaelantung liate kha-e`ae kha phe a tae kou. ¹⁶ Tukeiccu aenaw kya, nianaw kya, athyaapaw nin sungnaw kya, sawpaw adiapaw sungnaw kya, tukhyhze Sabbath nin sungnaw kya, hung nynh san bya ae la pia nan oh sah. ¹⁷ Kha-e`ae tuh yn thua vae cih paw uccaw`ae kya-e mynlyh nynh thua`ae; thuasalama accaccingpaw tuh Kri kya-e nynh thua. ¹⁸ Ahme leipaw zakawsangsakunaw kya te vaaw ccungccaw`ae beiknaw kya lungrythua te, hung nynh san nae ryalaw mee kha ae la ling nan oh sah; tuh-e paw tuh a pynsaw tuanaw-thinlung liate accakaepaw kya a tansakuh paw, a muih leipaw uccaw`ae kalan a teenua paw, ¹⁹ lu kha varyn a kyngkuh leipaw nynh thua. Lu kyate pyn balyn tuh kuaa thua zah rukhua atungkunaw`ae kyate pynkheihlan a khelekuh`ae, Pachia kya-e lethungnaw te a lethung`ae. ²⁰ - ²¹ Tukeiccu laephipi kya-e atakaw phung`ae kyate nanning tuh Kri ryte na chi vae oh thua ze, laephipi kya phang na um oh paw hawte, pawccemou, “Hae nan, tangtua nan, kyng nan,” acikuh paw phungbya`ae kalan na ahku oh? ²² Kha-e`ae balyn tuh ccungccaw`ae ccangpyanaw te kawpyapaw`ae thyhte, mangnaw ryte azo cih paw uccaw`ae te asekuhpaw nynh thua. ²³ Kha-e`ae tuh mawtemaw raekupaw beiknaw kya, te ahme leipaw zakawsangsakunaw kya hawnaw langkunaw a hoi ccaccing, te pyn kha pawlangria khyh; tuhzemah pynsaw lung rynaw kha rawsete pawpaw lang um khyh`ae.

¹ Oute nanning tuh Kri ryte phe na thothui bua vae oh thua ze, Pachia ranglang Kri dahungnaw kya um paw vaawran lang-e uccaw`ae kha ccung oh. ² Vaawran lang-e uccaw`ae kya nae tuanaw-thinlung kha nung oh, laephi uccaw`ae kya nung nan oh. ³ Pawccecize nanning tuh na chih oh zah nae hiinnaw tuh Kri ryte Pachia kya thuru athua. ⁴ Aening hiinnaw athua paw, Kri he yn langkuh te, nanning mah phu-enaw kya amaw ryte nae langkuh bua vae cih oh. ⁵ Tukeiccuze ohhuakunaw, nungsikunaw, sungku kho leipaw rynaw, ahoy leipaw duanaw, zohtuhbeiknaw athua paw karangkunaw cikuh`ae paw laephi vawlan um paw nae pyn kya-e`ae kha chisah oh. ⁶ Khahtahawpaw uccaw`ae keiccu nynh Pachia thinrianaw tuh kawngae leipaw ccaaw`ae tungvaw khe a thua. ⁷ Kha-e`ae kya na um lya oh, nanning mah kha-e`ae kya nynh na la hiin oh. ⁸ Thuasalama atu hynh-e`ae balyn: thinrianaw, bungpawnaw, thinlung hoy leipaw, thethyahonaw, nae khalang kyate anungsikuhpaw bya hopaw kha la vua oh. ⁹ Ccungccaw rynpaw te a cyisahnaw`ae kha phe na vua vae oh thyhte lukheit te lukheit hyngpakuh nan oh. ¹⁰ Te amaw a raetupaw muinsan lonaw thyhte, nynaw kya thawsathui athua paw ccungccaw thawpaw kha phe na lawkuh vae oh paw nynh na thua oh. ¹¹ Tuh-e thawsathuinaw kya Greek ci um khyh, Jew ci um khyh, vindung awkuhpaw ci um khyh, vindung awkuh leipaw ci um khyh, barbariapaw ci um khyh, Saithiapaw ci um khyh, see ci um khyh, a luepaw ci um khyh; thuasalama Kri tuh pawpaw tynre thua zah pawpaw tynre kya balyn a um. ¹² Tukeiccuze Pachia nynh popaw, athyaapaw te sungsahpaw na thua oh hawte, ngaethya-umsanaw, thawccikunaw, zakawsangsakunaw, lungnenaw, lungsaenaw kha lawkuh oh. ¹³ Lukhakheit nynh mingccangpaw kha rawsete byaeikunaw a hoi lanze, lukheit te lukheit ngaesangpyakute, lukheit te lukheit ngaethyakute, Kri nynh nanning kha ae ngaethya vae oh hawte, khahawte nanning mah la cyih bua oh. ¹⁴ Hynh-e`ae balyn laelan ccingnaw kya-e sueluakunaw athua paw sungsakunaw kha lawkuh oh. ¹⁵ Te Pachia kya-e daenaw nynh nae thinlung kha ae la uk oh sah; tuh-e khylan nynh nanning mah pyn pynkheit kya ko na thua oh; te lungtuabya hothya oh. ¹⁶ Kri bya tuh hawnaw tynre te nanning kya phe beih lang la um sah. Bawipaw kalan nae thinlung kya thawccinaw ryte law sahte, sam law`ae, thehoynaw law`ae te muisaw law`ae kya lukheit te lukheit ccangpyakute raeringnaw pyakuh oh. ¹⁷ Te bya na ho oh zemah, ryalaw na law oh zemah, Bawipaw Jesu min liate pawpaw balyn kha cyih oh lah amaw liate Paaw Pachia kalan lungtuabya ho oh. ¹⁸ Zu`ae, Bawipaw kya angaekuhpaw athua hawte naemaw te naemaw kha nae vawpaw`ae kalan ahkuh oh. ¹⁹ Vawpaw`ae, nae zu`ae kha sungsah oh lah mih tungvaw eih rua ro paw thua nan oh. ²⁰ Ccaaw`ae, pawpaw balyn kya nae nungpaaw`ae kaw la ngae oh. Pawccecize hynh-e tuh Bawipaw a lungry paw nynh thua. ²¹ Paaw`ae, nae ccaaw`ae kha thinriasah nan oh, mih lung oun rohsei cih. ²² See`ae, ccungccaw`ae lungrythuasahpaw hawte thua leite, mitmuihnaw lante kyalya thua leite, Pachia rawrite, thinlungphei leite pynsaw lante nae bawi nae zua`ae kaw kha pawpaw balyn kya la ngae oh. ²³ Ccungccaw`ae rya a lah paw hawte thua leite, Bawipaw rya a lah paw hawte pawpaw na cyi oh zemah thinlung ccaccingte cyih oh. ²⁴ Rho uccaw athua paw ryalaw mee kha Bawipaw kyate na mue cih oh cipaw kha nyh oh. Pawccecize nanning tuh Kri Bawipaw rya nynh na law oh. ²⁵ Thuasalama aseipaw rya a lah paw ccungccaw tuh a cyi paw hanlan kha pyaru athua cih; laesakunaw cipaw um khyh.

¹ Bawizua`ae, nanning mah vaawran kya um paw Bawi kae hoi cipaw nyte, atazaepaw te atekuhpaw ryalaw mee kha nae see`ae kha pya oh. ² Sawsangnaw kalan tyty pyakuh oh lah lungtuabya hote ngaw oh. ³ Kri kya-e byakhupaw kha kae ho nawlan, ho khonaw thuakaw kha Pachia nynh oun hungpya nawlan kaening hanlan mah saw oun la sangpah oh; kha-e byakhupaw keiccuze kae tuh sivarui te khii ka thua. ⁴ Kae nynh ho lan ka ccan thyhte kha-e byakhupaw kha ka langsaku nawlan, saw oun la sangpah bua oh. ⁵ Accyh kha sawkhawku te, atolang-e ccungccaw`ae kya hawnaw te la um oh. ⁶ Ccungccaw miakaw kha pawcihte nynh khung lan cipaw na ny nawlan oh, nae byaho tuh thawccinaw ryte loi te pei la ekhaekuh sah. ⁷ Bawipaw kya zyn lan um paw te rya kae lahkheihpaw, sungsahpaw ka neitaw Taichikas nynh ka konglang balyn kha nae kalan ae la hopah cih oh. ⁸ Ou kha-e eenaw khylan nynh amaw kha nae kalan kae saw. Ou tuhte aning nynh nae konglang kha a ny nawlan te nae thinlung kha ngaengansah nawlan nynh kae saw. ⁹ Nanning kyaze lukheit athua paw, zyn lan um paw te sungsahpaw ka neitaw Onesimas ryte kae saw`ae. Minmin nynh e kya acyikuh paw balyn kha ae nysah cih oh. ¹⁰ Kamaw ryte thung kae ccahkheih paw Aristarkhas te Barnabas a ccianung ccapaw Markas te Justas acikuh paw Jesu nynh nanning kha ae beihlang oh. Markas konglang nanning bya kae tawsya vae oh. Nae kalan yn thua ze amaw kha leh la khan oh. ¹¹ Minmin tuh vindung awkuh`ae paw nynh thua. Minmin kyalya nynh Pachia peenaw hanlan rya kae lahkheihtu`ae te kamaw ngae yn ngansatu`ae athua. ¹² Nanning lakuze lukheit athua paw, Kri seepaw Epafras nynh ae beihlang oh. Nanning nynh phe ccing lan na thadyn nawlan oh, te Pachia rynaw balyn kya phe na bia nawlan oh aning nynh nae hanlan thawte saw pei ae sangpya oh. ¹³ Nanning hanlan te Laodisia khua um`ae paw, te Hierapolis khua kya um`ae paw hanlan aning tuh lungthonaw alepi a hoi cipaw kae nynh ccaekia ka khan. ¹⁴ Sungsahpaw sibawi Luka te Demas nynh ae beihlang oh. ¹⁵ Laodisia khua kya um`ae paw uno`ae te Nymphas te a inn kya um paw kriccawbu kha la beihlang oh. ¹⁶ Te hynh-e ccaky hynh nanning laku he na ria oh koute Laodisia kriccawbu kya mah la riasah bua oh. Te tuhhawte Laodisia kyate mue paw ccaky kha mah nanning nynh la riabua oh. ¹⁷ Te Arkhippas kha, “Bawipaw kya na mue paw ryalaw kha na thangsah nawlan, la raeringkuh,” cite la hopah oh. ¹⁸ E beihlangnaw hynh Paul ka kuih te nynh ka zei. Kamaw oun khiinaw`ae paw kha la liathui oh. Thawccinaw tuh nae kya la um sah. Amen.