Acts

¹ - ² Pou Theophilas, Jesu nynh a popaw locceihtu`ae kalan Thyaa Muisaw liate kaw a pya`ae koute, amaw lawthung athua nin cia, a cyi paw te a ccangpyapaw balyn kha langmaw lya-e ccaw kya phe ka zei vae. ³ A teing koute kha-e locceihtu`ae kalan khe a sei kho leipaw ccaekia`ae patae te amaw a hiinnawpaw kong kha a langsapya`ae, nin sungpali cia minmin nynh a muih`ae, te Pachia peenaw te asekuhpaw uccaw`ae kong kha a hopya`ae. ⁴ Te locceihtu`ae ryte pynkheihlan sueluakuh`ae zah minmin nynh Jerusalem kyate a pou khyh nawlan`ae, thuasalama Paaw kya-e Byakinpyakupaw kha a ngaw nawlan`ae minmin kha kawpya`ae. “Tuh-e tuh, nanning nynh ka kyate phe na thae vae oh; ⁵ pawccecize Johan nynh tui kya baptisma a insah ccaccing`ae, thuasalama nanning tuh atu te nin patae aro maw Thyaa Muisaw kya baptisma-insah nae thua cih oh,” a cipya`ae paw kha nynh thua. ⁶ Tukeiccu locceihtu`ae nynh pynkheihlan he sueluakuh`ae tuh amaw kha, “Bawipaw, atu lyahin nang nynh peenaw kha Israel`ae kalan bua na pyathui cih`ae tou?” cite a khia`ae. ⁷ Te Jesu nynh minmin kha, “Paaw nynh amaw kawhoinaw kya a nung paw ccyh te kumvaelori tuh nanning nynh ny ho khyh. ⁸ Thuasalama Thyaa Muisaw nanning tungvaw he yn thua te nanning nynh thungnaw kha nae mue cih oh; te nanning tuh Jerusalem kya, Judea ram balyn kya, Samaria ram kya te laephi adianaw kyacia kamaw ccaekia`ae na la thua cih oh,” a cipya`ae. ⁹ Te hynh-e bya`ae he a ho koute minmin nynh a do`ae cciamang lyakhe Jesu tuh lawthung thua zah maeking nynh minmin mitmuihnaw kyate amaw kha zya a law. ¹⁰ Khahte lawthung athua paw Jesu kha locceihtu`ae nynh vaawran lang riri a do`ae cciamang lyakhe ccungccaw luning nynh arawpaw uccaw kha lawkute minmin pe khe oun thadyn`ae. ¹¹ Te kha-e`ae nynh, “Galilee ccungccaw`ae, pawccemou nanning nynh vaawran langkhe na dothung oh? Hynh-e paw Jesu, nanning kyate vaawran lang lawthung athua paw na muih oh hawte ou khahcihte bua yn thua cih,” a cipya`ae. ¹² Oute minmin tuh Jerusalem kyate Sabbath ninkheit laanccia asawpaw Oliv cikuh paw mua kyate Jerusalem lang a ki`ae. ¹³ Te minmin nynh he thua`ae tuh Piter, James, Johan, Andru, Filip, Thomas, Bartholomew, Matthai, Alfeas ccapaw James, Simon Zelot, te James neitaw Judas tuh a thuanaw`ae inn palung khaan langkhe a kaethung`ae. ¹⁴ Hynhe` ae balyn tuh Jesu a nung Meri te a neitaw`ae ry, nopi`ae ryte lunglokute sawsangnaw kya thawte a pyakuh`ae. ¹⁵ Te tuh-e ccyh kya milu lante zakheit lukuin loukaw acih`ae paw zuitu`ae laku Piter nynh thadyn zah, ¹⁶ “Uteno`ae, Jesu a kyng`ae paw kha a cciakhaetu Judas konglang Thyaa Muisaw nynh David khalang kyate a hoty paw Ccathyaa hynh accing aho. ¹⁷ Pawccecize aning tuh aening ryte riabua thua zah hynh-e Pachia ryalaw hynh a muebua. ¹⁸ “Atu kha-e paw nynh cyiseimenaw amee te laekua sang kheit a re; te a lutabing lante ccahbung zah a vue ngaelung te phae paw zah a ring balyn pung toikuh. ¹⁹ Te tuh-e kong Jerusalem kya a um`ae paw balyn nynh pung a ny`ae, tukeiccu mimaw mih bya te kha-e laekua kha, ‘Akeldama,’ a ci`ae, asuilan tuh, ‘Chii laekua,’ cipaw nynh thua. ²⁰ “Pawccecize Sam ccauh kya hynhte azeikuh: ‘Aning umnaw hmin tuh ccungccaw um leinaw lang tangsah lah hung ccungccaw nynh san khe kya um nan sah’; te, ‘Amaw ryalaw kha mingccangpaw nynh lawkuh sah,’ cite azeikuh. ²¹ - ²² “Tukeiccu Johan nynh baptisma insahnaw kyate tho zah Jesu tuh aening kyate lawthung athua nin cia, Bawipaw Jesu nynh aening laku tee zah pou te a um ccyh lya, aening ryte po a mungkuh bua`ae paw hynh-e ccungccaw`ae kyaze lukheit tuh amaw thothuinaw kong ho lan aening ryte ccaekia athua hahe aho,” a ci. ²³ Te minmin nynh ccungccaw luning, Jastas cite minphu`ae paw Barsabas cite a ko`ae paw Josef te Matthias kha a po`ae. ²⁴ Te minmin nynh, “Ccungccaw balyn thinlung a nyhtu, Bawipaw, nang nynh hynh-e luning`ae kyaze hungmou na po cipaw oun langsapakuh cite sawsang`ae. ²⁵ Ou khate Judas nynh amaw ungnaw lang ccia khylan cyiseimenaw liate phe a ccuetaw paw hynh-e ryalawnaw te locceihtuthuanaw kha na popaw ccungccaw nynh a muebua ccaw,” cite sawsang`ae. ²⁶ Te minmin nynh ccungthy kha dung`ae zah ccungthy tuh Matthias nynh a mue; te aning tuh locceihtu luhaw laekheit ryte riabua athua vae.

¹ Te Pentikos nin he thua tuh minmin balyn tuh ahmin sang kheit kya pynkheihlan pung a um`ae. ² Te myarya arupaw khise hawte roi ccangkheit tuh vaawran langte vaekheihmawte tuin kya yn thua zah minmin a umnaw`ae kha-e inn kyakhe phe abeih. ³ Te maee lo zah akuekuhpaw lae`ae tuh minmin kya oun langkuh zah milu raveih tungvaw kya accah. ⁴ Te minmin balyn tuh Thyaa Muisaw te phe beih`ae zah Muisaw nynh honaw a pya`ae thyhhawte minmin nynh ccangpaw bya te a ho`ae. ⁵ Te tuh-e ccyh lya vaawran zakaw um paw minphuin miakaw kyaze Pachia kalan a pyakuh`ae paw Jew`ae tuh Jerusalem kya a la um`ae. ⁶ Tuh-e roi tuh he accae te ccungccaw zapi tuh pynkheihlan oun thua`ae zah zuitu`ae nynh a ho`ae paw kha mimaw mih bya raveihte a thae`ae keiccuze mih ngaeangthua. ⁷ Te minmin balyn tuh mih ngaeangthua, mih khuaruaru zah, “Dotua oh, hynh-e`ae balyn tuh Galilee bya a ho`ae paw thua khyh`ae tou? ⁸ Te pawcihtemou aening nynh ah puikhae oh paw ahmaw bya raveihte ah thae oh paw tuh? ⁹ Parthian`ae, Medes`ae, Elamit`ae te Mesopotamia ram kya, Judah ram kya, Kapadosia ram kya, Pontas ram kya, Asia ram kya, ¹⁰ Frikia ram kya, Pamfilia ram kya, Izip ram kya, te Libia ram kya, Sirene pepan kya um`ae paw te Rom ram kya-e mikhia`ae, Jew`ae te beiknaw kalan a tee thaw`ae paw, ¹¹ Kretan`ae te Arab`ae nynh a ho`ae paw bya`ae hynh aening nynh ahmaw bya te ah thae oh paw tuh khuaruaru lan um paw Pachia ryalaw nynh athua,” cite lukheit te lukheit a hokuh`ae. ¹² Tukeiccu minmin balyn tuh mih khuaruaru, mih ngaeangthua zah, “Hynh-e hynh paw suilan mou?” cite lukheit te lukheit a hokuh`ae. ¹³ Ccungccaw abang nynh, “Hynh-e ccungccaw`ae tuh athawpaw misutui te nynh phe bia`ae,” cite sarisarya lante a ci`ae. ¹⁴ Thuasalama Piter nynh luhaw laekheit ryte thadynte a roi saw zah minmin a hopya`ae paw tuh: “Judah ccungccaw`ae, nanning te Jerusalem kya na um oh paw nae balynte hynh-e hynh nyh oh lah ka bya hynh oun ngaepya tua oh. ¹⁵ Pawccecize hynh-e ccungccaw`ae tuh nanning nynh na tua oh hawte rui khyh`ae, pawccecize atu tuh awkhua suimilan ccangthungnaw rou nynh acih ung. ¹⁶ Thuasalama hynh-e tuh profeh Joel nynh a la hosyapaw kha nynh athua. A ho paw tuh: ¹⁷ ‘Pachia nynh, nyathya nin kya hynhcihte yn cyikuh cih, minphuin balyn tungvaw kya ka Muisaw kha ka bu cih; te nae ccapaw`ae te nae ccanung`ae nynh profehbya ho cih`ae, te nae ccangvae`ae nynh vizin oun muih cih`ae, te nae pawpi`ae nynh maan oun sah cih`ae. ¹⁸ Tuh-e ccyh kya ka seepaw`ae te ka seenung`ae tungvaw ka Muisaw ka bu cih zah minmin nynh profehbya ho cih`ae. ¹⁹ Te luki lang vaawlui kya ngaeangnaw ka langsah cih zah akaw lang laephi vawlan chii, maee te maeekhuh muihsanaw`ae ka langsah cih. ²⁰ BAWIPAW kya-e alesaepaw te ri lan umpaw nin a thua maw khuanin tuh mohnaw lang tang cih zah sawpaw tuh chii lang yn tang cih. ²¹ Te ou tuhcihte hunghung zemah BAWIPAW min a ko paw ccungccaw tuh khum athua cih,’ a ci. ²² “Israel ccungccaw`ae, hynh-e bya`ae hynh ngaetua oh; naemaw nynh mah na ny oh hawte, Nazareth paw Jesu tuh nanning laku kya Pachia nynh nawccawkhaepaw ccungccaw nynh thua, amaw liate nynh nanning laku kya Pachia nynh ngaeang lan um paw ryalaw`ae, khuaruarunaw`ae te muihsanaw`ae kha a langsaku. ²³ Pachia kya-e nytynaw te paccynty paw khuakhannaw liate Jesu tuh ah athua, nanning nynh na kyng oh zah kawbya zui lei`ae paw kuih te na khiade oh zah phe na chia oh. ²⁴ Aning tuh chinaw kya-e ccinaw nynh phang kyngde lan athua kho khyh keiccuze kha-e ccinaw kyate Pachia nynh supah zah amaw kha phe a thosah vae. ²⁵ Pawccecize amaw konglang te David nynh a hopaw tuh: ‘Ka mitmaevaw kya BAWIPAW kha pei ka muih, pawccecize kae ka pia khyh nawlan aning tuh ka ranglang kya a um. ²⁶ Tukeiccu ka thinlung a lungpaw zah ka lae tuh a lungtua; tuhlaeze ka ngesaw mah ngaehoinaw kya a hae-ung cih. ²⁷ Pawccecize nang nynh ka hiinnaw-muisaw kha Hades kya na nungsya lan khyh zah, namaw kya-e Athyaapaw kha mah na thuhsah lan khyh. ²⁸ Nang nynh kamaw kha hiinnaw laanpi phe nae nysah vae. Na umnaw kya kamaw kha lungtuanaw te phe nae biasah cih,’ a ci. ²⁹ “Uteno`ae, ciihan kyaze paaw athua paw David kong hynh rhawhoyte kae hopya tua oh, David tuh chih zah u athua, te a shawku tuh aening kya atunin cia phang a um. ³⁰ Aning tuh profeh athua keiccu, pynsaw lante amaw ciihan lungkhu te Kri kha Pachia nynh yn thosah cih zah amaw suitungkhung vawlan dahungsah lan amaw kya Pachia nynh byakankupaw byakan kha phe a ny. ³¹ Hynh-e hynh muihty te, Kri thothuinaw kong kha, a muisaw tuh Hades kya cciataw thua khyh, a ngesaw nynh mah thuhnaw kha muih khyh, cite a ho. ³² Hynh-e Jesu hynh Pachia nynh phe thosah vae, hynh-e konglang kaening balyn tuh ccaekia`ae nynh kae thua. ³³ Tukeiccu aning tuh Pachia ranglang khe hangthung thua vae zah byakinpyakupaw Thyaa Muisaw kha Paaw kyate phe mue vae zah atu nanning nynh na muih oh zah na thae oh paw hynh-e hynh phe a bu vae. ³⁴ - ³⁵ “Pawccecize David tuh vaawran lang kae khyh; thuasalama David nynh amaw a hokupaw tuh: ‘ “Na rhaw`ae kha na ccusy lang kae raepya makhia cia, nang tuh ka ranglang khe dahung,” cite BAWIPAW nynh ka Bawipaw kha a cipya.’ ³⁶ “Tukeiccu nanning nynh na khiade oh paw Jesu ccaccei kha Pachia nynh Bawi lang te Kri lang phe a rae vae cipaw kha Israel minphuin balyn nynh ccaerarihlan nyh oh,” cite Piter nynh a ci. ³⁷ Atu hynh-e bya kha minmin nynh he a thae`ae tuh mih bung kya sua`ae zah Piter te ccangpaw locceihtu`ae kha, “Uteno`ae, pawmou kae cyih cih?” cite a khia`ae. ³⁸ Oute Piter nynh minmin kha, “Nae seinaw ngethya athua nawlan, ngaesikuh oh lah nanning milu raveihte Jesu Kri min kya baptisma-in oh, ou khate Thyaa Muisaw lasung kha na mue cih oh. ³⁹ Pawccecize byakinpyakupaw tuh nanning hanlan, nanning nae ccaaw`ae hanlan te asaw lang um`ae paw kya ah Bawipaw Pachia nynh a ko`ae paw balyn hanlan nynh thua,” a cipya`ae. ⁴⁰ Te ccangpaw bya patae te ccaekiakhan zah, “Thinlung kyh leipaw hynh-e ciihan kyate khumnaw muebua oh,” cite thawte a hy`ae. ⁴¹ Oute a bya kha lungtuate a lawkuh paw ccungccaw`ae tuh baptisma-in`ae; te tuh-e nin kya ccungccaw thungthung loukaw biachih athua. ⁴² Te minmin tuh locceihtu`ae ccangpyanaw kya te vaeccawkunaw kya, sanlou ianaw kya te sawsangnaw kya tynkaring lang po a umbua`ae. ⁴³ Te ccungccaw miakaw nynh rinaw a hoi`ae, te ngaeangnaw patae te muihsanaw`ae kha locceihtu`ae nynh a langsaku`ae. ⁴⁴ Te a zyn`ae paw balyn tuh pynkheihlan um`ae zah pawpaw balyn kha a hoikheih`ae. ⁴⁵ Te mih hoi paw te mih uccaw`ae kha zua`ae zah ccungccaw miakaw kalan ahobou thyhte a nee`ae. ⁴⁶ Te minmin tuh tempal kya nin takyh pynkheihlan sueluakuh`ae zah inn kheit koute inn kheit sanlou iathungku te, thinlung pynkheit te, lungtuate mih looh kha leih a ae`ae. ⁴⁷ Pachia kha thehoysah`ae zah ccungccaw`ae balyn malang maehoynaw kha a mue`ae. Te Bawipaw nynh khumnaw mue`ae paw kha nin takyhte kriccawbu kalan a biachih.

¹ Zete suimilan ccangtakuanaw sawsang ccyh lyakhe Piter te Johan tuh tempal kalan pynkheihlan a cceihthung`ae. ² Te a nung vue kya mawte a ccukhoupaw ccungccapaw lukheit kha oun puih`ae; tempal lungkhu lang a tee`ae paw kha bawngnaw ngiaku khylan ‘Puithya’ acikuh paw sakoih pe khe kha-e paw kha nin takyh leih a nung`ae. ³ Tempal lungkhu lang tee lan cih vae`ae paw Piter te Johan kha kha-e paw nynh he a muih tuh, ‘Yn pyabua oh’ cite a ngiaku`ae. ⁴ Te Piter nynh Johan ryte kha-e paw kha rirido zah, “Kaening hynh oun dotua,” a cipya. ⁵ Te aning nynh minmin kyate ccangkhakheit ka mue vae cih cite ngaehoite minmin kha a do. ⁶ Oute Piter nynh, “Phua te sui ka hoi khyh; thuasalama ka hoi paw kha nang kae pya; Nazareth paw Jesu Kri min te thokuh lah cceih,” a cipya. ⁷ Te a ranglang kuih te kyng zah a tho; te vaekheihmawte a ccu te a ccukhilua ru`ae tuh thawzung a mue`ae. ⁸ Te aning tuh thohkuh zah a thadyn, te cceih zah minmin ryte tempal lungkhu lang a tee`ae; laanpi cciate, thohkute Pachia kha thehoysah. ⁹ Tuhte cciabiate Pachia thehoysah te a um paw kha ccungccaw balyn nynh a muih`ae. ¹⁰ Te minmin nynh aning tuh tempal voidu kya Puithya Sakoih zung khe bawngnaw ngiaku lan leih dahung paw nynh athua cipaw kha a nyh`ae, te amaw kya acyikuh paw kong kha mih khuaruaru zah mih ngaeangthua. ¹¹ Te dansah athua vae paw ccukhoupaw nynh Piter te Johan kyakhe phang a bekuh tuh ccungccaw balyn nynh myarya ngaeangthua te mih kalan Solomon maepaw acikuh paw maepaw langkhe pynkheihlan a ccue`ae. ¹² Te kha-e kha Piter nynh he a muih tuh ccungccaw`ae kha, “Israel ccungccaw`ae, nanning pawccemou hynh-e hynh nae ngaeangthua? Hynh-e paw hynh kaening nynh kaemaw thungnaw te, Pachia phe kae zyn keiccuze kae cciasah khopaw hawte nanning nynh kaening hynh pawccemou raerae nae do oh? ¹³ Abraham, Isaak te Jakob Pachia, ah minpaaw`ae Pachia nynh a Ccapaw Jesu kha phu-esah vae; kha-e Jesu kha nanning nynh Pilat kalan na ah oh zah aning nynh saw lan he a noukuh tuh nanning nynh amaw kha saw lan phe na ei oh. ¹⁴ Thuasalama nanning nynh Athyaapaw te Adingpaw kha na vua oh zah ccungccaw theihtupaw kha nae kalan sawpya lan na ngiaku oh. ¹⁵ Te hiinnaw Bawipaw kha nanning nynh na chia oh, kha-e Bawipaw kha Pachia nynh a chih`ae paw kyate phe a thosah vae, ou kha-e konglang kaening tuh ccaekia`ae nynh kae thua. ¹⁶ Te Jesu min zynnaw liate, tuh-e amaw min nynh na muih oh zah na ny oh paw hynh-e paw hynh a thawsae sah. Athua, amaw kyate mue paw zynnaw nynh nanning balyn malang hynh-e paw hynh accingpaw dannaw kha a pya. ¹⁷ “Te atu mah, uteno`ae, nanning ae uk oh paw uktu`ae nynh a cyi`ae hawte nanning nynh mah na ny khyh oh keiccu nynh na cyi oh cipaw ka ny. ¹⁸ Thuasalama Kri tuh a teing cih cite langmaw lya Pachia nynh a profeh`ae balyn khalang kyate a langsaty paw kha, hynhte a ccingsah paw nynh thua. ¹⁹ Tukeiccu Bawipaw mitmuihnaw kyate thawzung thawsanaw ccyh yn thuasah nawlan, nae seinaw khawsungpya athua nawlan te, ²⁰ nanning hanlan a khang vae paw Jesu Kri kha Pachia nynh yn saw nawlan ngaesikuh oh lah lung paleihkuh oh. ²¹ Laephipi thotakaw te amaw kya-e athyaapaw profeh`ae khalang kyate Pachia nynh a hosyapaw uccaw balyn bua nungthuinaw a thua mawlaezung vaawran nynh kha-e Kri kha a lehkhan cih. ²² Pawccecize Mawsi nynh ah minpaaw`ae kalan, ‘BAWIPAW nae Pachia nynh nae uno`ae kyate kamaw yn lopaw Profeh lukheit kha nanning hanlan yn pousah cih. Aning nynh nanning kalan a hopaw miakaw kha na la ngae cih oh. ²³ Te ou tuhte kha-e Profehbya a ngae leipaw ccungccaw miakaw tuh amaw ccungccaw`ae laku kyate khaleih ro athua cih,’ a cipya`ae. ²⁴ “Athua, profeh Samuel kyate tho zah amaw koute a ho paw profeh`ae balyn nynh mah a la ho`ae hawte hynh-e nin`ae kong hynh a hoty`ae. ²⁵ Nanning tuh profeh`ae ccaaw nynh na thua oh; te Pachia nynh Abraham kalan, ‘Na ciihan kyate laephi kya-e minphuin balyn nynh hythuaccou cih`ae,’ cite a hopaw, ah minpaaw`ae ryte a rae paw byakin te asekuh`ae paw nynh na thua oh. ²⁶ Nanning milu raveih nynh cyiseinaw kyate na paleihku oh paw kya, nanning kha hythuapya khylan, Pachia nynh a Ccapaw Jesu kha thosah zah masaty nanning kalan yn saw,” cite Piter nynh a hopya`ae.

¹ Te locceihtu`ae nynh ccungccaw`ae kalan a hopya`ae lyakhe ranpibawi`ae, tempal ngawtu`ae te Sadusi`ae tuh oun thuabua`ae zah, ² locceihtu`ae nynh ccungccaw`ae kha ccangpah`ae zah Jesu liate a chih`ae paw kyate thothuinaw kong a ho`ae keiccuze myarya mih lungvaw a saw. ³ Te minmin nynh locceihtu`ae kha kyng`ae zah tuhlya khuazi vae keiccuze minmin kha awkhualan cia thunginn kya a nung`ae. ⁴ Tuhzemah mih phunghopaw kha a thae paw ccungccaw patae nynh a zyn`ae; tuhte a zyn`ae paw tuh milu lante thungpangaw loukaw acih`ae. ⁵ Ou tuhte awkhualan he athua tuh uktu`ae, piccang`ae, te kawbya ccangpatu`ae, ⁶ te ranpibawi lupi Annas, te Kaiafas, Johan, Alexanda te ranpibawi ciihan`ae balyn tuh Jerusalem kya pynkheihlan a sueluakuh`ae. ⁷ Te minmin nynh Piter te Johan kha angaelung kya nung`ae zah, “Paw thungnaw te mou, tukhyhze hung min liate mou nanning nynh hynh-e hynh na cyi oh?” cite a khia`ae. ⁸ Oute Piter tuh Thyaa Muisaw te phe beih zah minmin kha, “Ccungccaw uktu`ae te Israel piccang`ae nanning, ⁹ a cyikuh kho leipaw ccungccapaw hanlan rae paw ahoypaw ryalaw keiccu, pawcihte nynh aning tuh a dan cipaw keiccu, atunin kaening tuh akaw-aleih bya nae khia oh athua lanze; ¹⁰ nanning nynh na khiade oh zah Pachia nynh a chih`ae paw kyate a thosah paw Nazareth paw Jesu Kri min liate, amaw liate nynh hynh-e ccungccapaw tuh nanning malang ngedan te a thadyn cipaw hynh nanning balynte Israel ccungccaw`ae balyn nynh nyh oh. ¹¹ Hynh-e tuh, ‘Nanning inn saktu`ae nynh na nue oh paw lung, aki lang-e abapi huapaw lung lang yn tang paw kha nynh thua.’ ¹² Mingccangpaw kya khumnaw kharyh um khyh; pawccecize Jesu min laelan aening oun khum kho lanpaw vaawran zakaw ccungccaw`ae laku ccangpaw min um khyh,” cite a hopya`ae. ¹³ Atu Piter te Johan kya-e rawthungnaw kha minmin nynh muih`ae zah minmin tuh ccawthya lei`ae, huataw ccungccaw`ae cipaw kha he nyh`ae tuh mih ngaeangthua. Te minmin luning tuh Jesu ryte po umkheih`ae paw cipaw kha bua a nythui`ae. ¹⁴ Te dansah athua paw ccungccapaw nynh minmin ryte phang a thadyn paw kha a muih`ae tuh rawsete pawsang ho kho vae khyh`ae. ¹⁵ Thuasalama locceihtu`ae kha kungsi zung kyate pou lan kaw a pya`ae koute minmin nynh mimaw laku byahokuh`ae. ¹⁶ “Hynh-e ccungccaw`ae hynh pawte ah cyih cih oh? Minmin kyate raerae alangkuh paw muihsanaw kha Jerusalem kya um`ae paw balyn kalan phe langkuh vae zah aening nynh kha-e kha ah ei kho vae khyh oh. ¹⁷ Thuasalama kha-e kha ccungccaw`ae laku kya houh apazaeku khyh nawlan, atu te hung ccungccaw sanmah hynh-e min te a hopya vae khyh ccaw`ae minmin kha thawte ah khee ngaw oh,” cite a hokuh`ae. ¹⁸ Te minmin nynh locceihtu`ae kha ko`ae zah Jesu min liate kharyh a ho khyh nawlan`ae te a ccangpya khyh nawlan`ae kawpya`ae. ¹⁹ Thuasalama Piter te Johan nynh minmin kha, “Pachia kawngae laeze nanning kawngae hua lanpaw tuh Pachia malang akyh cih tou, kyh lan khyh tou cipaw naemaw nynh byapia oh. ²⁰ Pawccecize kaening tuh kae muih paw te kae thae paw uccaw`ae kong kha ho leite kae um kho khyh,” cite a khung`ae. ²¹ Te minmin nynh locceihtu`ae tungvaw detahnaw lanpaw pawsang he muih khyh`ae tuh furawsya ki`ae zah phe a cciasah`ae. Pawccecize kha-e acyikuh paw hanlan ccungccaw balyn nynh Pachia kha thehoysah`ae keiccu nynh thua. ²² Pawccecize hynh-e dannaw muihsanaw a tungvaw kya alangkuh paw ccungccapaw tuh kum sungpali lae acih vae. ²³ Te he a cciasah`ae te locceihtu`ae tuh mimaw mih phu kalan cceih`ae zah alepaw ranpibawi`ae te piccang`ae nynh mih kalan a hopya`ae paw balyn kha a thaesah`ae. ²⁴ Te minmin nynh kha-e kha he a thae`ae tuh, pynkheih lante Pachia kalan roisaw`ae zah, “Bawipaw, nang tuh vaawran te laephi te rili te kha-e kya um paw balyn a raetupaw Pachia nynh na thua. ²⁵ Nang nynh na seepaw David khalang kyate, ‘Pawccemou minphuin`ae nynh mih bungpaw zah ccungccaw`ae nynh ccakaepaw uccaw kong hynh a pheeku`ae? ²⁶ Laephi siapharan`ae nynh thadyn`ae zah uktu`ae nynh BAWIPAW te a Kri kha rawsete pynkheihlan a sueluakuh`ae,’ cite phe na hoty vae. ²⁷ - ²⁸ “Langmaw lya na kuih nynh cyi lan cite a paccynpaw te na eenaw nynh cyi lan a la paccyn vae paw miakaw kha cyi khylan, satho phe na thuh vae paw, athyaapaw na Ccapaw Jesu kha Herod te Pontias Pilat nynh Zenta`ae te Israel ccungccaw`ae ryte e khuapi kyahin pynkheihlan sueluakuh`ae zah a rawse`ae paw tuh thangccingpaw nynh thua. ²⁹ Te pou Bawipaw, atu minmin kya-e furawnaw hynh dotua. Na bya hynh rawhoy te kae ho kho nawlan rawthungnaw oun pyabua. ³⁰ Athyaapaw na Ccapaw Jesu min liate muihsanaw te ngaeangnaw`ae a langku nawlan, ngeccih dansah khylan na kuih yn dyngtua,” cite sawsang`ae. ³¹ Te minmin sawsang`ae koute pynkheihlan a sueluakunaw`ae ahmin tuh ahy; te minmin balyn tuh Thyaa Muisaw te beih`ae zah Pachia bya kha rawhoy te a ho`ae. ³² Te a zyn`ae paw ccungccaw zapi tuh thinlung ccangkheit te hiinnaw-muisaw ccangkheit hoi`ae zah hung nynh sanmah a uccaw ccangkhakheit kha kamaw kya-e ci vae khyh; thuasalama pawpaw balyn kha a mangkheih`ae. ³³ Te Bawipaw Jesu thothuinaw kong kha locceihtu`ae nynh alepipaw thungnaw te ccaekiakhan`ae zah alepipaw thawccinaw tuh minmin balyn tungvaw kya a um. ³⁴ Minmin laku ahoboupaw ccungccaw hung sanmah um khyh; pawccecize laekua hoi`ae paw te inn hoi`ae paw balyn nynh kha-e`ae kha zua`ae zah, a zuanaw`ae paw amee kha oun ccyng`ae. ³⁵ Locceihtu`ae ccu leihpaw khe a pung`ae; te lukhakheit hanlan ahobou thyhte ccungccaw miakaw kha a nee`ae. ³⁶ Te Barnabas cite locceihtu`ae nynh minphu`ae paw, (tuh-e asuilan tuh thawzungpyanaw ccapaw cipaw), Saiparas ram e paw Levi ciihan paw Joses tuh, ³⁷ a hoi paw laekua kha zua zah kha-e a zuanaw mee phua kha yn ccyng zah locceihtu`ae ccu leihpaw khe a nung.

¹ Thuasalama Ananias cikuh paw ccungccapaw nynh a zu Sapphira ryte a hoi`ae paw laekua kha a zua`ae. ² Te amee abang kha a zu mah a nyhbua lante a nungkubang. Te abang kha yn ccyng zah locceihtu`ae ccu leihpaw khe a nung. ³ Te Piter nynh, “Ananias, Thyaa Muisaw kha hyngpya khylan te laekua na zuanaw mee abang nungkubang khylan pawccemou Setan nynh na thinlung kha phe ae biasah? ⁴ Kha-e kha na zua maw, na kya-e thua khyh tou? Kha-e kha na zua koute namaw kaw khya khyh tou? Pawccemou na thinlung kya hynhcihte na poi? Ccungccaw`ae kha na hyngpah khyh lahyn, thuasalama Pachia lakha na hyngpya,” a ci. ⁵ Te Ananias tuh hynh-e bya he a thae tuh khuliakuh zah phe a chih; te hynh-e kong a thae`ae paw ccungccaw balyn tuh myarya a rih`ae. ⁶ Te ccangvae`ae nynh thokuh`ae zah Ananias kha ah lung`ae koute poukhae`ae zah a u`ae. ⁷ Te tuh-e koute suimilan ccangthung loukaw he aro koute a zu tuh paw nynh acyiku cipaw ny leite yn tee. ⁸ Te Piter nynh, “Laekua kha tuhzeih mawte tou na zua oh? Kamaw hynh yn hopya tua,” a cipya. Te aning nynh, “Athua, tuhzeih mawte nynh kae zua,” a ci. ⁹ Oute Piter nynh amaw kha, “Bawipaw Muisaw syntaw khylan pawcihtemou pynkheihlan nae lung aloku? Dotua, na vawpaw a uh`ae paw mih ccu tuh thuakawzung nynh a um ung, te nang kha mah ae cciakhae cih`ae,” a cipya. ¹⁰ Oute Sapphira tuh Piter ccu leihpaw khe vaekheihmawte khuliakuh zah phe a chih; te ccangvae`ae nynh tee`ae zah a chi paw kha he muih`ae tuh cciakhae`ae zah a vawpaw pe khe a uubua`ae. ¹¹ Te hynh-e kong a thae paw ccungccaw patae te kriccawbu balyn tuh myarya a rih`ae. ¹² Te locceihtu`ae kuih liate ccungccaw`ae laku muihsanaw`ae te khuaruarunaw`ae patae langsaku athua. Te minmin balyn tuh Solomon Maepaw kya pynkheihlan a um`ae. ¹³ Te tuhlaepaw hung ccungccaw sanmah minmin kalan pykuh bua ngan khyh`ae; thuasalama ccungccaw`ae nynh minmin kha kou a hothung`ae. ¹⁴ Te nopi ry, pise ry ccungccaw zapi zyntu`ae kha Bawipaw kalan houhouh biachih athua. ¹⁵ Piter nynh po yn ccia vae ze a mynlyh nynh san lukhakheit tungvaw kya a khaw ccaw cite ngeccih`ae kha laanpi lang oun cciakhae`ae zah ikhung te iphae vawlan a nung`ae. ¹⁶ A pepan e khua`ae kyate ccungccaw zapi mah Jerusalem lang oun thua`ae zah ngeccih`ae te athyaa leipaw muisaw`ae nynh vawsaw pya`ae paw kha oun cciakhae`ae; te minmin balyn tuh marya dansah athua`ae. ¹⁷ Oute ranpibawi lupi te amaw ryte umkheih`ae paw, Sadusi`ae balyn tuh thokuh`ae zah thinrianaw te phe beih`ae. ¹⁸ Te locceihtu`ae kha kyng`ae zah ranzae thunginn lungkhu khe a saw`ae. ¹⁹ Thuasalama khuazi khe Bawipaw kya-e vaaw ccungccapaw nynh thunginn thuakaw`ae kha hung zah minmin kha poukhae`ae zah, ²⁰ “Cceih oh, tempal kya thadyn oh lah hynh-e hiinnaw bya`ae balyn hynh ccungccaw`ae kalan hopah oh,” a cipya`ae. ²¹ Te minmin nynh kha-e kha he a thae`ae tuh awkhua takaw khe tempal lungkhu lang tee`ae zah a ccangpya`ae. Thuasalama ranpibawi lupi te amaw ryte umkheih`ae paw nynh oun thua`ae zah kungsi`ae te Israel ccungccaw`ae kya-e piccang`ae balyn kha ko`ae zah locceihtu`ae kha mih kalan cciakhae khylan ccungccaw`ae kha thunginn lang a saw`ae. ²² Thuasalama tempal ringtu`ae nynh thunginn kya thua`ae zah zuitu`ae kha he muih vae khyh`ae tuh ki`ae zah, ²³ “Thunginn tynkaringlan akhawkuh paw kha kae muih ccaccing, te thung a ngawtu`ae mah thuakaw malang atolang khe a la thadyn`ae; thuasalama thuakaw he kae hung tuh a lungkhu kya hung ccungccaw sanmah kae muih khyh!” cite a ho`ae. ²⁴ Atu ranpibawi lupi, te tempal ngawtu lupi te alepaw ranpibawi`ae nynh kha-e kong kha he thae`ae tuh paw vema yn cyikuh cih cite mih khuaruaru. ²⁵ Oute ccungccaw lukheit yn thua zah, “Dotua oh, nanning nynh thunginn kya na saw oh paw ccungccaw`ae tuh tempal kya thadyn`ae zah ccungccaw`ae kha a ccangpya`ae!” cite minmin kha a hopya`ae. ²⁶ Oute tempal ngawtu lupi tuh tempal ngawtu`ae ryte cceih`ae zah locceihtu`ae kha reihi- reih-ae nung leite a cciakhae`ae; pawccecize ccungccaw`ae nynh lung te oun deihsei cih`ae cite a rih`ae. ²⁷ Te minmin kha cciakhae`ae zah kungsi`ae malang khe a nung`ae. Te ranpibawi lupi nynh, ²⁸ “Hynh-e min te na ccangpah lan khyh oh cite tyntetyn lang nanning kha kaw kae pya khyh oh tou? Te dotua oh, nanning nynh Jerusalem kya nae doctrine te phe na biasah oh zah hynh-e Ccungccapaw chii hynh kaening tungvaw thuasah lan na paccynku oh!” cite minmin kha a khia`ae. ²⁹ Oute Piter te ccangpaw zuitu`ae nynh, “Ccungccaw`ae bya laeze Pachia bya hynh kaening tuh kae ngae hua aho. ³⁰ Nanning nynh thing vawlan na sae oh zah na chia oh paw Jesu kha aening ah minpaaw`ae Pachia nynh phe thosah vae. ³¹ Israel`ae kha ngaesikunaw te seingaethyanaw pya khylan Pachia nynh amaw kha uktu Bawi lang te Khumtu lang khang zah a ranglang khe phe a hangthung vae. ³² Te kaening tuh hynh-e uccaw`ae konglang a ccaekia`ae nynh kae thua; te Pachia nynh amaw kaw a ngae paw ccungccaw`ae kha a pya paw Thyaa Muisaw mah ccaekia nynh athuabua,” a ci`ae. ³³ Tuh-e bya he thae`ae tuh mih bungpaw zah minmin kha chia lan khuakhanku`ae. ³⁴ Oute ccungccaw`ae balyn nynh sawtua`ae paw, kawbya ccangpatu, Kamaliel acikuh paw, Farasipaw nynh kungsi kya thadyn zah locceihtu`ae kha atolang sosoh pousah lan kawpya`ae. ³⁵ Te ccungccaw`ae kha, “Israel ccungccaw`ae nanning, hynh-e ccungccaw`ae tungvaw cyi lan na paccynku vae oh paw hynh hoyte tuakuh oh. ³⁶ Pawccecize anuhlang lya Theudas acikuh paw nynh thokuh zah amaw te amaw kha ccungccaw lukheit nynh ka thuabua cite a pooku. Te ccungccaw zapali loukaw amaw kalan a mungkuh bua`ae. Aning tuh chia thua zah amaw kawngae`ae paw balyn tuh pung phiakuh`ae zah pawlang tang khyh`ae. ³⁷ Tuh-e paw koute milu ccazing law ccyh lyakhe Judas acikuh paw Galilee paw nynh thokuh zah ccungccaw patae kha amaw nuhlang a zuisahku`ae. Aning mah phe chih zah amaw a zui`ae paw balyn mah pung phiakuh`ae. ³⁸ Te atu nanning kha kae hopya oh, hynh-e ccungccaw`ae hynh sibia oh lah mimaw um lan um`ae sah; pawccecize hynh-e khuakhannaw te hynh-e ryalawnaw tuh ccungccaw`ae kya-e athua ze pawlang tang lan khyh. ³⁹ Thuasalama e tuh Pachia kya-e athua lanze nanning nynh na roh kho lan khyh oh; naemaw kha Pachia rawsetu`ae lang poh nae tang sei paleih oh zya,” cite a hopya`ae. ⁴⁰ Te tuh-e bya tuh minmin nynh mih nawccah; te minmin nynh locceihtu`ae kha ko`ae zah a bua`ae koute Jesu min te phung na ho vae lan khyh oh cite kawpya`ae zah minmin kha a cciasah`ae. ⁴¹ Locceihtu`ae tuh Jesu min hanlan maethyanaw teing lan angaekuh`ae cite oun tuabua`ae cikuh`ae zah kungsi`ae mitmuihnaw kyate lungtuate a pou`ae. ⁴² Te Jesu tuh Kri nynh thua cite tempal kya te inn takyh kya ccangpyanaw te phunghonaw kha nin takyh dae khyh`ae.

¹ Te tuh-e ccyh lya zuitu`ae he a pungthung`ae tuh Helenih`ae nynh Hebru`ae kha rawsete ccohnuakunaw yn pou; pawccecize Helenih`ae mih numae`ae kha nin takyh looh pyanaw kya pyabua khyh`ae cite a ccohnuaku`ae. ² Oute locceihtu luhaw laening nynh zuitu`ae patae kha ko`ae zah, “Aening nynh Pachia bya hynh cciataw te ccaboi rya hynh ah law lan oh ccan khyh. ³ Tukeiccu uteno`ae, Thyaa Muisaw te, hawnaw te phe beihpaw, thehoyccoupaw ccungccaw lusari kha nanning laku ccung oh, hynh-e ryalaw hanlan minmin kha ah khang oh ccaw. ⁴ Thuasalama aening tuh sawsangnaw kalan te Pachia bya ryalawnaw kalan hynh pei ah pyakuh ngaw oh,” a ci`ae. ⁵ Te tuh-e bya nynh ccungccaw zapi khaleih kha lungrythuasah. Te minmin nynh zynnaw te, Thyaa Muisaw te, phe beihpaw Stifen, te Filip, Prokhoras, Nikanor, Timon, Parmenas, te Antiok khua paw Jew beiknaw kalan a paleikuh paw Nikolas kha a po`ae. ⁶ Khae` ae kha locceihtu`ae malang a nung`ae; te locceihtu`ae nynh sawsangpah`ae zah mih kuih kha minmin tungvaw a khan`ae. ⁷ Te Pachia bya tuh pazaekuh zah zuitu`ae tuh Jerusalem kya houh pungthung`ae; te ranpibawi`ae patae pi nynh zynnaw kaw a ngae`ae. ⁸ Te Stifen tuh zynnaw te, thungnaw te, phe beihpaw thua zah myarya alepaw khuaruaru ngaeangnaw te muihsanaw kha ccungccaw`ae laku kya a langsaku. ⁹ Oute a lue`ae paw kya-e Sinakok a ci`ae paw kyate Sairenia`ae, Alexandria`ae, Silisia ram e te Asia ram e ccungccaw`ae abang nynh thokuh`ae zah Stifen ryte a eikuh`ae. ¹⁰ Tuhzemah Stifen nynh a honawpaw hawnaw te Muisaw kha minmin nynh khee kho khyh`ae. ¹¹ Oute, “Hynh-e paw nynh Mawsi te Pachia kha alue lante bya a ho paw kaening nynh phe kae thae,” cite a ho lanpaw ccungccaw`ae kha minmin nynh aphiru lante zya a soih`ae. ¹² Te minmin nynh ccungccaw`ae, piccang`ae te kawbya ccangpatu`ae kha a hy`ae; te Stifen kha ccianua`ae zah a kyng`ae, te kungsi zung lang a cciakhae`ae. ¹³ Te minmin nynh ahme leipaw ccaekia`ae kha konua`ae zah, kha-e`ae nynh, “Hynh-e paw nynh hynh-e athyaapaw hmin te Kawbya hynh alue lante bya pei a ho; ¹⁴ pawccecize, ‘Nazareth paw hynh-e Jesu nynh hynh-e hmin hynh yn roh cih zah Mawsi nynh aening oun pya paw phungbya kha yn rulae cih,’ cite hynh-e paw nynh a hopaw kha kaening nynh phe kae thae,” a ci`ae. ¹⁵ Te kungsi zung kya a dahung`ae paw balyn nynh Stifen kha rirido`ae tuh a mae kha vaaw ccungccapaw mae hawte a muih`ae.

¹ Te ranpibawi lupi nynh, “Tuh-e bya`ae tuh tuhte thua tou?” cite a khia. ² Te Stifen nynh, “Uteno`ae te paaw`ae, la ngaetua oh: Ah minpaaw Abraham nynh Haran kya a um maw, Mesopotamia ram kya a um lyaze phu-enaw Pachia nynh a kya langkuh zah, ³ ‘Na umnaw ram kyate pou lah na puithua`ae kha poutaw`ae lah kae nynh kae muihsah cih paw ram kalan khe cceih,’ a cipya. ⁴ “Oute Abraham tuh Kaldian ram kyate toikuh zah Haran kyakhe a um; te tuin kyate a paaw he chih tuh atu nanning na umnaw oh hynh-e ram kalan hin Pachia nynh a nuesaku. ⁵ Te e ram kya ccuphelyh sanmah Pachia nynh amaw kha rho lang pya khyh; tuhzemah Abraham nynh ccaaw lukheit san a saah mawze amaw te a ciihan`ae hanlan e ram hynh rho lang kae pya cih cite Pachia nynh bya phe kinpyaku vae. ⁶ Te Pachia nynh hynhte a ho: A ciihan`ae tuh ram ccangpaw kya a khia a vekuh cih`ae, te minmin tuh seetangnaw kalan cciakhae athua cih`ae zah kum zapali cia ming`ae nynh a tua a sah cih`ae. ⁷ ‘Te minmin seetangnaw kya a nung`ae paw minphuin kha kae nynh bya ka pia cih,’ Pachia nynh a ci; ‘ou tuhkoute minmin tuh a pou cih`ae zah hynh-e hmin kya kamaw kha rya yn lawpah cih`ae,’ a ci. ⁸ Te Pachia nynh vindung awkunaw te asekuhpaw byakinnaw kha Abraham kalan a pya. Tukeiccu Abraham nynh Isaak kha saah zah nin taryanaw kya vindung awpya, te Isaak nynh Jakob a saah, te Jakob nynh ciihan kyaze phinthonaw paaw`ae luhaw laening kha a saah. ⁹ “Te ciihan kyaze paaw`ae nynh eiungnaw hoi`ae zah Josef kha Izip ram lang a zua`ae. Thuasalama Pachia tuh Josef ryte um zah, ¹⁰ a vawsawnaw balyn kyate amaw kha luesah zah Izip siapharan Pharoh malang maehoynaw te hawnaw kha a pya; te Pharoh nynh Izip ram uktu lang te a innbyn balyn uktu lang Josef kha a khang. ¹¹ “Oute Izip ram balyn te Kanaan ram balyn kya ccakangnaw te alepipaw vawsawnaw um zah ah paaw`ae tuh ae lanpaw hoi vae khyh`ae. ¹² Thuasalama Jakob nynh Izip ram kya looh a um cipaw he a thae tuh ah minpaaw`ae kha masaty a saw`ae. ¹³ Te vaeningnaw kya Josef nynh a u`ae kha a nysaku`ae; te Josef puithua`ae kha Pharoh kalan a nysah`ae. ¹⁴ Oute Josef nynh a paaw Jakob kha byataw zah a puithua`ae balyn sungsari lu pangaw kha amaw kalan a kobua`ae. ¹⁵ Te Jakob tuh Izip ram lang cceihbung zah tuin kya amaw te ah minpaaw`ae tuh phe chih`ae. ¹⁶ Te minmin kha Shekem khua lan cciakhae`ae zah Shekem kyaze paaw athua paw Hamor a ccaaw`ae kya-e Abraham nynh phua te a re paw shawku kyakhe a ccy`ae. ¹⁷ “Thuasalama Pachia nynh Abraham kya byakinpyakupaw byakinnaw ccyh thuanaw he anae tuh kha-e ccungccaw`ae tuh Izip ram kya pungthung`ae zah, ¹⁸ Josef kha a nyh leipaw ccangpaw siapharan alangkuh cia a pungthung`ae. ¹⁹ Kha-e paw nynh aening ah puithua`ae kha phee`ae zah mih ccaaw taraw`ae kha a chi ccaw`ae cite ccaring na vua cih oh cite ah minpaaw`ae kha a tua a sah`ae. ²⁰ “Ou tuh-e ccyh lya tuin myarya apuithyapaw Mawsi tuh pui zah a paaw inn kya sathung cia a kua`ae. ²¹ Te aning kha ccaring he vua`ae te Pharoh ccanung nynh khuinkuh zah amaw a ccapaw lang a kuaku. ²² Te Mawsi tuh Izip ccungccaw`ae kya-e hawnaw balyn kha marya ccangkuh zah byahonaw kya te ryalawnaw kya a thungpaw nynh thua. ²³ “Te aning nynh kum sungpali he accing tuh Israel ccungccaw`ae a uno`ae kalan pae rynaw thinlung yn hoi. ²⁴ Te a unopaw lukheit kha Izippaw nynh a tua a sah paw kha he a muih tuh pangkhaw zah a hanlan ccaeliarupya, te Izippaw kha phe a buatheih. ²⁵ Te Pachia nynh minmin kha hynh-e paw kuih liate yn luesah cih`ae cipaw kha a uno`ae nynh mang a nyhthya cih`ae cite Mawsi nynh a tuaku; thuasalama minmin nynh nyhthya khyh`ae. ²⁶ Te awkhualan mimaw te mimaw a pekuh`ae paw kalan khe cceih zah, ‘Ccungccaw`ae pi hynh lou, nanning tuh uteno khaw na thua oh, pawccemou naemaw te naemaw na peku oh?’ cite minmin kha a phia`ae. ²⁷ “Thuasalama a innpaw paw kha atazae leite a cyihtupaw nynh Mawsi kha daetu zah, ‘Hung nynh mou nang hynh kaening tungvaw uktu lang te byapiatu lang ae khang? ²⁸ Inkhawnin Izippaw na chia hawte kamaw hynh chia lan nae ry tou?’ a ci. ²⁹ “Tuh-e bya kha Mawsi nynh he a thae tuh ccue zah Midian ram kyakhe mikhiapaw lang a tang, tuin kya ccapaw luning a saah. ³⁰ “Te kum sungpali he aro tuh Sinai Mua kin rangkaw khe thabu kya aruapaw maeesoi kyakhe Bawipaw kya-e vaaw ccungccapaw tuh Mawsi kalan a langkuh. ³¹ Kha-e kha Mawsi nynh he a muih tuh a ngaeangthua zah a pe lante do lan cite he a naekuh tuh Bawipaw kyate roi nynh a kalan yn ccae zah, ³² ‘Kae tuh na minpaaw`ae Pachia, Abraham Pachia, Isaak Pachia te Jakob Pachia nynh ka thua,’ a cipya. Te Mawsi tuh thyngkuh zah do ngan vae khyh. ³³ Oute BAWIPAW nynh, ‘Na phanah kha na ccu kyate khahkuh, pawccecize na thadynnaw hmin tuh athyaapaw laekua nynh thua. ³⁴ Izip ram kya um`ae paw ka ccungccaw`ae kya-e vawsaw riathaenaw kha phe ka muih ccaccing vae, te minmin nynh a siaruanaw`ae paw roi kha phe ka thae vae zah minmin kha thua khylan nynh kae rungbung; atu rang lah nang kha Izip ram lang kae saw cih,’ a cipya. ³⁵ “ ‘Hung nynh mou nang hynh uktu lang te byapiatu lang ae khang?’ cite minmin nynh a nue`ae paw kha-e Mawsi ccaccei kha Pachia nynh uktu lang te luesatu lang thabu kya yn langkuh paw vaaw ccungccapaw liate a saw paw nynh thua. ³⁶ Aning nynh Israel ccungccaw`ae kha poukhae`ae zah Izip ram kya, Rili Se kya te rangkaw kyakhe kum sungpali lungkhu khuaruaru ngaeangnaw te muihsanaw kha a langsapya`ae. ³⁷ “Tuh-e paw tuh Israel ccungccaw`ae kalan, ‘BAWIPAW nae Pachia nynh nae uno`ae kyate kamaw alopaw Profeh lukheit kha nanning hanlan yn pousah cih, amaw bya kha na ngae cih oh,’ cite a hotupaw Mawsi nynh athua. ³⁸ “Aning tuh rangkaw kya pumkunaw kya thuasah, Sinai Mua kya amaw kalan bya a hopah paw vaaw ccungccapaw ryte thuasah, aening ah minpaaw`ae ryte thuasah a la um paw, aening kalan pya lanpaw ahiinpaw byaphy kha a mue paw nynh thua. ³⁹ Amaw bya kha aening ah minpaaw`ae nynh la ngae khyh`ae, thuasalama phe a nue`ae. Te mih thinlung kyate Izip ram lang bua ki a ry`ae keiccu, ⁴⁰ Aaron kha, ‘Kaening malang a cceih lanpaw pachia`ae kha kaening hanlan yn raepah; Izip ram kyate kaening oun cciakhaetupaw hynh-e Mawsi kya pawcihte nynh acyiku cipaw kae nynh vae khyh,’ cite a hopya`ae. ⁴¹ Te tuh-e nin kya minmin nynh vaetua tohlaw kha rae`ae zah kha-e zohtuh kalan silawkunaw a rae`ae. Mimaw mih kuih te a rae`ae paw kya mih lungpaw. ⁴² Profeh`ae ccauh kya, ‘Pou Israel ccungccaw`ae, nanning nynh rangkaw kya kum sungpali cia na chia oh paw saring`ae te silawkunaw`ae kha kamaw kalan tou nae pya oh? ⁴³ Nanning nynh Moloh e bu te nae pachia Remphan kya-e awsi, beik lan na raeku oh paw azuh`ae kha phe na lawku vae oh; tukeiccu kae mah nanning kha Babilon khuapi khunglang kae cciakhae cih oh,’ cite azeikuh hawte, Pachia nynh paleihtawkuh`ae zah vaawran kya-e uccaw`ae kha beik khylan minmin kha phe a vua vae`ae. ⁴⁴ “Mawsi nynh a muih paw pungsan thyhte ccaekia te asekuhpaw beikbuu kha na rae cih cite Pachia nynh Mawsi kha a hopya hawte, rangkaw kya ccaekia te asekuhpaw beikbuu kha aening ah minpaaw`ae nynh a hoi`ae. ⁴⁵ Nuhlang te a thua`ae paw aening ah paaw`ae nynh kha-e beikbuu kha Zenta`ae nynh a peenaw`ae ram lungkhu lang Joshua ryte a teekhae`ae. Kha-e Zenta`ae kha Pachia nynh David she kyacia aening ah minpaaw`ae kyate a deepya`ae. ⁴⁶ David tuh Pachia kya-e maehoynaw kha mue zah Jakob Pachia umnaw lanpaw ahmin muepya lan a peki. ⁴⁷ Thuasalama Solomon nynh Pachia hanlan tempal kha a sak. ⁴⁸ “Tuhzemah Ahang Huaccepaw Pachia tuh kuih te rae paw tempal kya um khyh. ⁴⁹ “ ‘Vaawran tuh ka suitungkhung thua zah laephi tuh ka ccusynaw nynh thua; pawtahawpaw inn mou nanning nynh nae sakpah cih oh?’ BAWIPAW nynh a ci. ‘Tukhyhze ka hae-ungnaw ahmin tuh pawtahawpaw mou athua? ⁵⁰ Hynh-e`ae balyn tuh ka kuih nynh a rae paw thua khyh tou? a ci,’ cite profeh nynh a ho hawte nynh thua. ⁵¹ “Lungkhung`ae zah thinlung kya te nakaring kya vindung awkuh lei`ae paw nanning! Thyaa Muisaw kha pei na rawse oh; nae minpaaw`ae nynh a cyi`ae hawte nanning mah na cyibua oh. ⁵² Nae minpaaw`ae nynh hung profeh kha mou tuasah leite a nung`ae? Adingpaw Ccungccapaw yn thuanaw lanpaw kong a hopaty`ae paw kha minmin nynh phe chia`ae; atu nanning tuh kha-e Adingpaw a pheetu`ae te a theihtu`ae nynh na thua oh. ⁵³ Nanning tuh vaaw ccungccaw`ae paccynpyanaw liate kawbya kha na mue oh zemah na zui khyh oh,” cite Stifen nynh a ci. ⁵⁴ Minmin nynh hynh-e bya`ae kha he a thae`ae tuh mih bungpaw zah Stifen kha mih hawzynua`ae. ⁵⁵ Thuasalama Stifen tuh Thyaa Muisaw te phe beih zah vaawran langkhe riridothung zah Pachia phu-enaw te Pachia ranglang a thadyn paw Jesu kha a muih. ⁵⁶ Te Stifen nynh, “Dotua oh, vaawran ahungkuhpaw te Ccungccaw Ccapaw nynh Pachia ranglang a thadyn paw kha ka muih,” a ci. ⁵⁷ Oute minmin nynh roi accae lante thawte sia`ae zah mih nakaring kha huhkuh`ae zah pynkheih lante Stifen kha a ccuenua`ae, ⁵⁸ te khuapi atolang khe ccaring vua`ae zah lung te a deih`ae. Te ccaekia`ae nynh mih uccaw`ae kha Saul acikuh paw ccangvaepaw ccu leihpaw khe a pung`ae. ⁵⁹ Te minmin nynh lung te a deih`ae lyakhe, Stifen nynh Bawipaw kha ko zah, “Bawipaw Jesu, ka muisaw hynh yn lawpah,” a ci. ⁶⁰ Te a ccukharutung zah, “Bawipaw, hynh-e seinaw hynh minmin kya ccuinpah nan`ae,” cite roi accae lante a sia. Te hynh-e he a ho koute zya a ih vae.

¹ Te Stifen a chianaw`ae kya Saul mah a nawccahbua. Tuh ccyh lya Jerusalem kya um paw kriccawbu kya alepipaw tuasahnaw a um; te locceihtu`ae holeite, kriccaw`ae balyn tuh Judah pee te Samaria pee kya po phiariphiarae pung a um`ae. ² Te beiknaw lante a zuakuhpaw ccungccaw`ae nynh Stifen kha uh`ae zah a hanlan thawmawte a raw a khui`ae. ³ Saul nynh tuh kriccawbu thawte ronaw kha a rae. Inn takyh lungkhu lang tee zah nopi`ae, pise`ae kha sue`ae zah thunginn kya a sang`ae. ⁴ Tukeiccu phiariphiarae um`ae paw nynh ahmin takyh lang cceih`ae zah Pachia bya kha a ho`ae. ⁵ Oute Filip tuh Samaria khuapi lang cceihbung zah Kri thehoypaw kha a hopya`ae. ⁶ Te ccungccaw zapi nynh thae`ae zah Filip nynh a langsakupaw muihsanaw`ae kha he muih`ae tuh a hopaw bya kha pynkheihlan a ngae`ae. ⁷ Pawccecize athyaa leipaw muisaw bahkuhpaw ccungccaw`ae lungkhu te athyaa leipaw muisaw`ae tuh raerae sia`ae zah a pou`ae; te kuihccuchihpaw patae te a ccukhou`ae paw patae tuh a dan`ae. ⁸ Te tuh-e khuapi kya alepipaw lungtuanaw a um. ⁹ Thuasalama Simon acikuh paw ccungccapaw lukheit nynh tuh-e khuapi kya langmaw lya mitleihthyanaw la pia he zah amaw tuh alesaepaw ccungccaw nynh ka thua la cikuh zah Samaria khuapi kya-e ccungccaw`ae kha mih ngaeang la thuasah`ae. ¹⁰ Te adih huapaw kyate alehua paw kyacia, minmin balyn nynh amaw kalan khe mih nawtua`ae zah, “E ccungccapaw tuh Pachia kya-e alepaw thungnaw nynh thua,” cite a ho`ae. ¹¹ Te mitleihthyanaw te minmin kha khaw cia mih ngaeangthuasah vae`ae keiccuze minmin nynh amaw kalan mih nawtua`ae. ¹² Thuasalama Filip nynh Pachia peenaw konglang te Jesu Kri min kong a hopaw kha minmin nynh he a zyn`ae tuh nopi ry, pise ry baptisma-in`ae. ¹³ Oute Simon amaw mah a zyn bua vae; te baptisma-in koute Filip kya zuikuh bua zah alangkuh paw khuaruaru lan um paw ryalaw`ae te muihsanaw`ae kha muih zah a ngaeang myarya thua. ¹⁴ Te Jerusalem kya um paw locceihtu`ae nynh Pachia bya kha Samaria`ae nynh phe ccoubua vae`ae cipaw kha he a thae`ae tuh Piter te Johan kha minmin kalan a saw`ae. ¹⁵ Tuh-e`ae nynh he thua`ae tuh Samaria`ae nynh Thyaa Muisaw a ccoubua ccaw`ae cite mih hanlan sawsangpya`ae. ¹⁶ Pawccecize minmin tuh Bawipaw Jesu min kya kyalya baptisma-in`ae zah minmin kyaze hung tungvaw sanmah Thyaa Muisaw ccah bang loh khyh. ¹⁷ Oute Piter te Johan nynh mih kuih kha mih tungvaw khang`ae zah minmin nynh Thyaa Muisaw kha a mue`ae. ¹⁸ Te locceihtu`ae kuih khangnaw liate Thyaa Muisaw tuh mue athua cipaw kha Simon nynh he a muih tuh minmin kha phua pya`ae zah, ¹⁹ “A tungvaw kuih ka khang paw miakaw nynh Thyaa Muisaw a ccoubua nawlan kae mah hynh-e kawhoinaw kha yn pyabua oh,” a cipya`ae. ²⁰ Thuasalama Piter nynh, “Pachia lasung tuh phua te re kho lan cite na tuaku keiccuze na phua tuh namaw ryte rohsah! ²¹ Nang tuh hynh-e kya na sekuh bua khyh; pawccecize na thinlung tuh Pachia mitmuihnaw kya hme khyh. ²² Tukeiccu hynh-e na hoyleinaw kong hynh ngaesikuh lah na thinlung-tuanaw kha ngaethya na thua nawlan Pachia kalan sawsangkuh. ²³ Pawccecize nang tuh khyanaw kya-e sanyngkhaw kya te hoyleinaw kya-e seetangnaw kya nynh na um cipaw ka ny,” a cipya. ²⁴ Oute Simon nynh, “Hynh-e na hopaw uccaw`ae hynh ka tungvaw kya ccangkheit san a thua khyh nawlan nanning nynh ka hanlan Bawipaw kalan saw oun sangpah bua oh,” cite a khung. ²⁵ Te minmin nynh ccaekiakhan`ae zah Bawipaw bya kha he a ho`ae koute Jerusalem lang ki`ae zah Samaria`ae khua patae kya thehoypaw kha a ho`ae. ²⁶ Te Bawipaw kya-e vaaw ccungccapaw nynh Filip kha, “Thokuh lah Jerusalem kyate Gaza lang a cceihbung paw rangkaw laanpi khate alia langkhe cceihbung,” cite a hopya. Tuh-e tuh rangkaw nynh thua. ²⁷ Te Filip tuh thokuh zah a cceih. Te dotua, Ethiopia siapharannung Kandas kuihkaw alepipaw kawhoinaw hoitu, siapharannung sisua balyn dooihtu tingreihkuh paw Ethiopiapaw tuh Pachia beik lan cite Jerusalem lang cceih zah, ²⁸ he a ki lyakhe, amaw vaetualee kyakhe dahung zah profeh Isaiah ccauh kha a ria. ²⁹ Te Muisaw nynh Filip kha, “Cceih, naekuh lah hynh-e vaetualee kalan kaebua,” a cipya. ³⁰ Te Filip nynh a kalan khe ccue zah, tuh-e paw nynh profeh Isaiah ccauh a ria paw kha he a thae tuh, “Na ria paw kha nang nynh na thaethya tou?” cite a khia. ³¹ Te aning nynh, “Ccungccaw lukhakheit nynh yn hopya khyh lanze pawtemou kae nynh ka thaethya kho cih?” a ci. Te aning nynh Filip kha amaw ryte dahungkheih lan yn kaebua cite a ko. ³² Kha-e paw nynh a ria paw Ccathyaa tuh: “Sawtheihtupaw kalan a cciakhae`ae paw tuu hawte amaw kha a cciakhae`ae; te tuutaw nynh a mingngotupaw malang sia leite a um hawte aning tuh a mung kha a myh. ³³ Zakaw a sangsakunaw kya ming`ae nynh atazae lei lante amaw kha byapia`ae; amaw hiinnaw kha laephi kyate lawpya athua keiccuze hung nynh mou a ciihan`ae kha a thaesah vae cih?” a cikuh. ³⁴ Tuh-e tingreihkuh paw nynh, “Hynh-e hynh profeh nynh hungmou a honuathe? Amaw tou? Tukhyhze mingccangpaw tou a honuathe? Beih yn hopah,” cite Filip kha a khia. ³⁵ Oute Filip nynh kha-e Ccathyaa khate tho zah Jesu kong kha a hopya. ³⁶ Minmin nynh tuhte laanpi kya he a cceih`ae tuh tui umnaw sang kheit kya a thua`ae; te tingreihkuh paw nynh, “Dotua, hynh-e kya tui phang um; baptisma-in lan pawnynh mou kamaw hynh yn khaw?” a ci. ³⁷ Te Filip nynh, “Nang nynh na thinlung balynte na zyn thua ze na in kho,” a cipya. Te aning nynh, “Jesu Kri tuh Pachia Ccapaw cipaw ka zyn,” cite a khung. ³⁸ Te vaetualee kha thadyn sah lan kawpya zah minmin paryhte, Filip te tingreihkuh paw, tui lungkhu lang cceihbung`ae zah Filip nynh kha-e paw kha baptisma-in sah. ³⁹ Te minmin nynh tui kyate he oun pou`ae tuh Bawipaw kya-e Muisaw nynh Filip kha po zoukhae zah tingreihkuh paw nynh muih vae khyh; te aning tuh a ccianaw laanpi kya lungtuate a cceih. ⁴⁰ Thuasalama Filip tuh Azotas khua kyakhe langkuh zah tuin kyate Sisaria khua kyacia khua takyh kalan khe cciate thehoypaw kha a ho.

¹ Te Saul tuh Bawipaw zuitu`ae kha rawsete furawnaw te chianaw kha hy lang sue zah ranpibawi lupi kalan khe cceih zah, ² pise zemah, nopi zemah e Ccianaw kya-e lukhakheit kha a muih ze kyng lan zah Jerusalem lang cciakhae khylan cite Damaskas khua kya um paw sinakok uktu`ae kalan pya lanpaw ccaw`ae kha amaw kyakhe a ngiaku. ³ Te tuhte khuaccung zah Damaskas khua pe yn thua; te vaawran kyate awnaw nynh amaw po voilu lan vaekheihmawte phaephae a ah. ⁴ Te aning tuh laephi kya a khuliakuh; te, “Saul, Saul, pawccemou nang nynh kamaw hynh nae tua nae sah?” cite a hopah paw roi kha a thae. ⁵ Te Saul nynh, “Bawipaw, nang tuh hungmou?” cite a khung. Te Bawipaw nynh, “Kae tuh na tua na sah paw Jesu nynh ka thua; ccungzuing kha na sy lanze na hanlan arupaw nynh thua,” a cipya. ⁶ Te aning nynh thyngkute a ngaeangthua zah, “Bawipaw, pawmou nae cyisah ry?” a ci. Te Bawipaw nynh, “Thokuh lah khualae lungkhu langkhe cceih lah na cyi lanpaw kha ae la hopah cih`ae,” a cipya. ⁷ Te amaw ryte khuaccung`ae paw ccungccaw`ae tuh yccae leite a thadyn`ae, roi kha a thae`ae zemah hung ccungccaw san muih khyh`ae. ⁸ Te Saul tuh laephi kyate thokuh zah a mit he dae tuh hung sanmah muih kho vae khyh; te minmin nynh a kuih te kyng`ae zah Damaskas khua lungkhu lang a cciakhae`ae. ⁹ Te aning tuh nin thung cia ngawmuih khyh zah looh mah ae khyh, tui mah neih khyh. ¹⁰ Te Damaskas khua kya Ananias acikuh paw zuitu lukheit a um; Bawipaw nynh kha-e paw kalan vizin kyate, “Ananias,” cite a ko. Te aning nynh, “Bawipaw, dotua e kya mang ka um,” a ci. ¹¹ Te Bawipaw nynh, “Thokuh lah Adingpaw cite minphu`ae paw laanpi langkhe cceih lah Judas inn kyakhe Tarsuh khua paw Saul acikuh paw kha la ccung, pawccecize aning tuh sawsang cciamang. ¹² Ananias acikuh paw nynh yn tee zah a mit ngawmuih nawlan amaw tungvaw a kuih khang paw kha vizin kyate phe a muih vae,” a cipya. ¹³ Oute Ananias nynh, “Bawipaw, kha-e paw nynh Jerusalem kya na mithyaa`ae tungvaw hoyleinaw kha pawcih nynh a rae cipaw kha ccungccaw patae nynh a ho`ae paw ka thae. ¹⁴ Te na min a ko paw balyn kha kyng kho nawlan, e kya kawhoinaw kha alepaw ranpibawi`ae kyate a mue,” a ci. ¹⁵ Thuasalama Bawipaw nynh, “La cceih, pawccecize aning tuh Zenta`ae, siapharan`ae te Israel ccungccaw`ae malang kamaw min ccaekiakhan khylan kamaw nynh ka popaw uccaw nynh thua. ¹⁶ Pawccecize aning tuh kamaw min keiccuze pawcih nynh vawsaw teing cih cipaw kae nynh amaw kha ka langsapah cih,” a cipya. ¹⁷ Te Ananias tuh cceih zah inn lungkhu lang a tee; te a kuih kha Saul tungvaw khang zah, “Ka neitaw Saul, nae ccia lya laanpi kya na kalan yn langkuh paw Bawipaw Jesu ccaccei nynh, nang ngaw na muih nawlan te Thyaa Muisaw te phe na bia nawlan kamaw hynh yn saw,” a cipya. ¹⁸ Te vaekheihmawte Saul mit kyate ngasawkaleih akhuakuh paw hawte thua zah ngawmuih vae, te thokuh zah baptisma-in. ¹⁹ Te aning tuh aepaw ae zah a thaw yn sae vae. Oute Saul tuh Damaskas khua kya um paw zuitu`ae ryte nin khaw cia a umkheih`ae. ²⁰ Te Paul nynh sinakok kyakhe, “Jesu tuh Pachia Ccapaw nynh thua,” cite Kri kong kha palou a ho kanmaw vae. ²¹ Te a hopaw kha a thae paw balyn nynh mih ngaeangthua zah, “E paw hynh Jerusalem kya Bawipaw min te sawsang`ae paw kha a rohtu te minmin kha hee lan zah alepaw ranpibawi`ae kalan cciakhae khylan cite hynhlang yn cceihtupaw kha thua khyh tou?” a ci`ae. ²² Thuasalama Saul tuh a thaw houhouh sae zah hynh-e Jesu tuh Kri ccaccing nynh thua cite he a ccaesah tuh Damaskas khua kya um paw Jew`ae kha mih ngaeangthuasah`ae. ²³ Te nin patae aro koute Jew`ae nynh Saul kha chia lan cite khuakhanku`ae. ²⁴ Thuasalama kha-e mih khuakhannaw kha Saul nynh phe a ny. Te minmin nynh Saul kha kae chia ccaw cite koikua kha khuazi, khuadae pei a ngaw`ae. ²⁵ Tukeiccu zuitu`ae nynh Saul kha khuazi khe laah`ae zah sua kya phang`ae zah khua lungrua vawlan te a sawbung`ae. ²⁶ Te Saul nynh Jerusalem lang he a thua tuh zuitu`ae kalan mungku bua lan a noukuh; thuasalama minmin balyn nynh aning tuh zuitu nynh athua cipaw zyn khyh`ae zah amaw kha a rih`ae. ²⁷ Thuasalama Barnabas nynh amaw kha hoei zah locceihtu`ae kalan a cciakhae. Te aning nynh Bawipaw kha laanpi kya pawcihte nynh a muih cipaw, Bawipaw nynh a kalan byahopya paw te aning nynh Damaskas kya Jesu min te rawhoy te phungho cipaw kha a hopya`ae. ²⁸ Te Saul tuh Jerusalem kya locceihtu`ae ryte teekheih`ae zah a poukheih vae`ae. ²⁹ Te Saul nynh Bawipaw Jesu min te rawhoy te phung a ho; te Helenih`ae ryte bya a eikuh`ae; te minmin nynh Saul kha chia lan a nouku`ae. ³⁰ Kha-e kha uteno`ae nynh he nyh`ae tuh Saul kha Sisaria khua lang cciakhae bung`ae zah Tarsuh khua lang a saw`ae. ³¹ Oute Judah ram, Galilee ram te Samaria ram balyn kya kriccawbu`ae tuh daenaw hoi`ae zah tynsathung athua`ae. Te Bawipaw rawrinaw kya te Thyaa Muisaw ngaengansanaw kyakhe um`ae zah a pungthung`ae. ³² Ou tuhcihte Piter tuh ahmin takyh kalan po khuaccung zah Luda khua kya a um paw mithyaa`ae kalan po a thua. ³³ Te tuin kya kum tarya cia a iphae kya huekuh zah a kuihccuchihpaw Aenias acikuh paw ccungccapaw kha a muih. ³⁴ Te Piter nynh, “Aenias, Jesu Kri nynh nang kha ae dansah, thokuh lah na iphae kha kuekuh,” a cipya. Te aning tuh vaekheihmawte po a thokuh. ³⁵ Te Luda khua te Saron khua kya um`ae paw balyn nynh khae paw kha muih`ae zah Bawipaw kalan a paleihkuh`ae. ³⁶ Joppa khua kya Tabitha acikuh nung zuitu lukheit a um; Tabitha cipaw asuilan tuh Dorkas cipaw nynh thua. Tuh-e nopinung tuh ahoypaw ryalaw te thuasah, pyanaw cyisahnaw te thuasah phe beihpaw nynh thua. ³⁷ Te tuh-e nin ccyh lya aning tuh ccih zah phe a chih; tui he a sing`ae koute palung khaan kyakhe a nung`ae. ³⁸ Te Luda khua tuh Joppa khua te anaekuh paw thua zah tuh-e khua kya Piter a um cipaw kha zuitu`ae nynh he thae`ae tuh Piter nynh mih kalan arangte yn ccia ccaw cite ccungccaw luning kha Piter kalan saw`ae zah a kosah`ae. ³⁹ Oute Piter tuh thokuh zah minmin ryte a cceih`ae. He a thua tuh palung khaan lang a kaekhae`ae; te numae`ae balyn nynh a pe khe thadynte rah`ae zah minmin ryte Dorkas nynh a um lyaze a kua paw angki te uccaw`ae kha a muihsah`ae. ⁴⁰ Thuasalama Piter nynh minmin balyn kha pung a pousah`ae; te ccukharutung zah sawsang. Te kha-e a rhua kalan khe maeleihkuh zah, “Tabitha, tho,” a ci. Te kha-e nung nynh a mit kha dae zah Piter kha he a muih tuh thokuh zah a dahung. ⁴¹ Te Piter nynh a kuih kha pya zah po a tho; te mithyaa`ae te numae`ae kha ko`ae zah a hiin vae paw kha-e nung kha a muihsah`ae. ⁴² Te kha-e kong kha Joppa khua kya po a ny`ae, te ccungccaw patae nynh Bawipaw kha a zyn`ae. ⁴³ Ou tuhcihte Piter tuh Joppa khua kyakhe Simon acikuh paw saphua uccaw raetupaw ryte nin patae cia a umkheih`ae.

¹ Sisaria khua kya Itali rhawkawphu acikuh paw kyaze rhawkaw zakheit uktu rhawbawipaw Kawnelia acikuh paw ccungccapaw lukheit a um. ² Tuh-e paw tuh amaw inn kya um`ae paw balyn ryte Pachia kalan a zuakuhpaw te Pachia rawrihpaw thua zah ccungccaw`ae kha patae pya zah Pachia kalan tyty sawsangpaw nynh thua. ³ Nin kheit tuh zete suimilan ccangtakuanaw loukaw khe Pachia kya-e vaaw ccungccapaw nynh a kalan yn cceih zah, “Kawnelia!” cite a ko paw kha aning nynh vizin kya ccaerarihlan phe a muih. ⁴ Te vaaw ccungccapaw kha riri he a do tuh rih zah, “Bawipaw, e tuh pawmou?” cite a khia. Te vaaw ccungccapaw nynh, “Na sawsangnaw te ryachi`ae na bawngnawpaw tuh liathuinaw lante Pachia malang phe a thua vae. ⁵ Atu Joppa khua langkhe ccungccaw`ae kha saw lah Piter acikuh paw Simon kha kokuh. ⁶ Aning tuh saphua raetupaw Simon inn kya nynh a thua, a inn tuh rili kin nynh a um. Aning nynh na cyi lanpaw kha ae la hopah cih,” a cipya. ⁷ Te bya a hopah paw vaaw ccungccapaw he a pou koute, Kawnealia nynh a inn kya-e see`ae luning te amaw kha pei ryalawpah`ae paw kyaze Pachia kalan a zuakuhpaw rhawkapaw kha a ko`ae. ⁸ Te kha-e uccaw`ae kong balyn kha a hopah`ae koute minmin kha Joppa khua lang a saw`ae. ⁹ Awkhualan minmin tuh cceih`ae zah khua kalan he oun naekuh`ae tuh, Piter tuh suimilan ccangtaruhnaw khe sawsang khylan inn tungvaw langkhe a kae. ¹⁰ Te myarya a vuelaw zah aepaw a ae ry; thuasalama aepaw a dopya`ae lyakhe Piter tuh ngawphukuh zah, ¹¹ vaawran ahungkuhpaw te arae sangpali kya a khii`ae paw alepipaw boeiphae alopaw uccaw tuh amaw kalan yn rungbung zah laephi kalan yn sawbung`ae paw kha a muih. ¹² Tuh-e uccaw kya ccupali asae paw laephi kya-e rangsaw`ae phin, sarepaw`ae phin te vue te a vaw`ae paw phin balyn, te vawlae-e pavaw`ae phin a um. ¹³ Te roi ccangkheit a kalan yn thua zah, “Piter, thokuh, theih lah ae,” a cipya. ¹⁴ Thuasalama Piter nynh, “Bawipaw, thua kho lan khyh. Pawccecize huatawpaw te athyaa leipaw uccaw`ae hynh vaekheit sanmah ka ae boi khyh,” a ci. ¹⁵ Te vaeningnaw roi nynh, “Pachia nynh phe a thyaasah vae paw kha nang nynh huatawpaw ci nan,” a cipya. ¹⁶ Hynhcihte vaethung cia acyikuh koute tuhe uccaw tuh vaawran lang bua lawthung athua. ¹⁷ Piter nynh a muih paw vizin hynh paw suilan mou athua ngaw cite he a tuaku cciamang lyakhe, Kawnelia nynh yn saw`ae paw ccungccaw`ae tuh Simon inn kha oun zaahbia`ae zah sakoih malang khe a thadyn`ae. ¹⁸ Te Piter cite min thawpaw a hoi paw Simon kha e kya a thua tou cite khia lan a ko`ae. ¹⁹ Piter nynh vizin kong a tua cciamang lyakhe, Muisaw nynh, “Dotua, ccungccaw luthung nynh nang kha ae ccung`ae. ²⁰ Tukeiccu thokuh lah rungbung, lunghiinnaw kharyh hoi leite minmin ryte cceihbua, pawccecize minmin tuh kamaw nynh kae saw`ae paw nynh thua,” a cipya. ²¹ Oute Piter tuh Kawnelia nynh yn saw`ae paw ccungccaw`ae kalan khe rungbung zah, “Dotua oh, kae tuh nanning nynh na ccung oh paw nynh ka thua, paw konglang mou nanning nae thua oh?” a ci. ²² Te minmin nynh, “Pachia rawrih zah Jew minphuin balyn laku thehoyccoupaw te adingpaw, rhawbawipaw Kawnelia tuh nang kha amaw inn lang kosah lan zah na bya thae khylan athyaapaw vaaw ccungccapaw nynh phe a hopya vae,” a cipya`ae. ²³ Te Piter nynh minmin kha inn lungkhu lang ko`ae zah tuin kya a thuasah`ae. Te awkhualan Piter tuh minmin ryte cceihbua zah Joppa khua e uno`ae abang mah a zuikuh bua`ae. ²⁴ Te awkhualan koute minmin tuh Sisaria khua lungkhu lang a tee`ae. Te Kawnelia nynh minmin kha la ngaw`ae zah a vaeccaw`ae te a ruiban`ae kha a kobua`ae. ²⁵ Te Piter he yn tee tuh Kawnelia nynh cciadue zah a ccu leihpaw khe bakhungte a beik. ²⁶ Thuasalama Piter nynh aning kha tho zah, “Thadyn, kae mah ccungccaw nynh ka thua,” a cipya. ²⁷ Te Kawnelia ryte byahokuh`ae zah he a tee tuh ccungccaw patae pynkheihlan a um`ae paw kha a muih. ²⁸ Te Piter nynh, “Jew ccungccaw lukheit hanlan minphuin ccangpaw kalan ccia lanpaw te kungku lanpaw tuh aphung thua khyh cipaw nanning nynh na ny oh. Tuhzemah hung ccungccaw kha sanmah huatawpaw, thyaa khyh cite ka ci vae khyh nawlan Pachia nynh kae kha phe yn langsapya vae. ²⁹ Tukeiccu kae kha he oun ko`ae tuh mya leite kae cceih; tukeiccu pawkeiccumou kamaw hynh nae kosah oh cipaw kae khiatua ry oh?” a cipya`ae. ³⁰ Te Kawnelia nynh, “Nin pali aro vae, atu suimilan ccyh kyacia kae tuh looh-ae ka sung; suimilan ccangtakuanaw ccyh kya ka inn kyakhe saw ka sang, te dotua, uccaw phaephae ahpaw alawkuh paw ccungccapaw nynh ka malang khe thadyn zah, ³¹ ‘Kawnelia, na sawsangnaw tuh thaepya thua zah ryachi`ae na bawngnawpaw tuh Pachia malang syntaw athua vae. ³² Tukeiccu Joppa khua lang ccungccaw saw lah Piter acikuh paw Simon kha kokuh; aning tuh rili kin kya saphua raetupaw Simon inn kya nynh a thua. Aning nynh he yn thua vae ze nang kha ae hopah cih,’ yn cipya. ³³ Tukeiccu kae nynh arangte na kalan kae saw`ae, te nang nynh nae thua paw tuh kou hoy lan na cyi vae. Tukeiccu Pachia nynh nang ae hopya paw balyn kha ngae khylan kaening balyn tuh atu Pachia malang kae thua vae,” a ci. ³⁴ Oute Piter nynh a khalang kha aw zah, “Thanccing langte Pachia tuh ccungccaw maedo khyh cipaw ka ny. ³⁵ Thuasalama minphuin takyh kya amaw kha rawrih zah ahmepaw rya a lah paw ccungccaw tuh amaw nynh lehkhan. ³⁶ Pawpaw balyn kyaze Bawi athua paw, Jesu Kri liate daenaw thehoypaw kha hote, Israel ccungccaw`ae kalan Pachia nynh a saw paw bya, ³⁷ Johan nynh a ho paw baptisma koute Galilee ram kyate tho zah Judah ram balyn kya po thaesah athua paw kha-e bya kha nanning nynh na ny oh. ³⁸ Tuh-e tuh Pachia nynh Thyaa Muisaw te thuasah, thungnaw te thuasah Nazareth paw Jesu kha satho a thuh; Pachia nynh a umkhae keiccuze aning tuh ahoypaw rya kha lawte, diabolos nynh vawsaw a pya`ae paw balyn kha dansah te khua a ccung cipaw na ny oh. ³⁹ Te kaening tuh Jew`ae ram kya te Jerusalem kya Jesu nynh a cyi paw uccaw`ae balyn konglang ccaekia`ae nynh kae thua; amaw kha minmin nynh thing vawlan saete a chia`ae. ⁴⁰ Amaw kha Pachia nynh nin thungnaw kya thosah zah a muihsah`ae; ⁴¹ ccungccaw balyn kha muihsah khyh`ae, thuasalama Pachia nynh a poty vae paw ccaekia`ae athua paw, a chih`ae paw kyate a thothui koute amaw ryte aekheih`ae zah a neihkheih`ae paw, kaening kha nynh oun muihsah. ⁴² Te aning tuh a chihpaw te a hiinpaw byapiatu lang cite Pachia nynh sathothuhpaw nynh athua cipaw ccaekiakhan khylan te ccungccaw`ae kha hopya khylan kaening hynh aning nynh kaw oun pya. ⁴³ Hunghung zemah amaw kha a zyn paw tuh amaw min liate seingaethyanaw kha a mue cih cite profeh`ae balyn nynh amaw kong kha ccaekiakhan`ae,” a ci. ⁴⁴ Piter nynh tuh-e bya a ho cciamang lyakhe bya a thae`ae paw ccungccaw`ae balyn tungvaw khe Thyaa Muisaw accah. ⁴⁵ Te Zenta`ae tungvaw kya mah Thyaa Muisaw lasung tuh ccaenua athuabua keiccuze Piter ryte oun cceihkheih`ae paw vindung awkuh`ae paw zyntu`ae tuh mih ngaeangthua. ⁴⁶ Pawccecize khae` ae nynh bya ccangpaw te ho`ae zah Pachia phu-esah`ae paw kha minmin nynh a thae`ae. ⁴⁷ Oute Piter nynh, “Aening hawte Thyaa Muisaw a muebua`ae paw e ccungccaw`ae nynh baptisma-in khyh nawlan`ae hung nynh mou tui kha a khee kho cih?” a ci. ⁴⁸ Te Bawipaw min kya baptisma-in lan minmin kha kawpya`ae. Oute nin sosoh a umhin ccaw cite Piter kha a kangku`ae.

¹ Te Judah ram kya um`ae paw locceihtu`ae te uteno`ae nynh Zenta`ae mah Pachia bya lehkhan bua vae`ae cipaw kha a thae`ae. ² Te Piter tuh Jerusalem kya he yn thua tuh vindung awkuh`ae paw nynh, ³ “Nang tuh vindung awkuh leipaw ccungccaw`ae kalan na cceih zah minmin ryte na aekheih oh,” cite a seisah`ae. ⁴ Thuasalama Piter nynh kha-e konglang kha athonaw te atue te hynhte a hopya`ae: ⁵ “Kae tuh Joppa khua kya saw ka sang lyakhe, ka ngawphukuh zah alepipaw boeiphae alopaw uccaw ccangkheit tuh vaawran kyate kipali kyate oun sahbung`ae zah ka kalan yn thua paw kha vizin kya ka muih. ⁶ Kha-e kha riri ka do zah he ka tua tuh, ccupali asaepaw laephi kya-e lorangsaw`ae te sarepaw`ae te vue te a vaw`ae paw phin te vawlae-e pavaw`ae kha ka muih. ⁷ Te, ‘Piter, thokuh, theih lah ae,’ cite kamaw yn hopah paw roi kha ka thae. ⁸ Thuasalama kae nynh, ‘Thua kho lan khyh, Bawipaw! Pawccecize huatawpaw te athyaa leipaw uccaw`ae hynh vaekheit sanmah ka khalang lungkhu lang tee boi khyh,’ ka ci. ⁹ Thuasalama vaawran kyate roi nynh, ‘Pachia nynh phe a thyaasah vae paw kha nang nynh huatawpaw ci nan,’ cite bua yn khung. ¹⁰ Hynhcihte vaethung cia acikuh koute khae` ae balyn kha vaawran lang bua lawthung athua. ¹¹ Te dotua, tuh-e ccyh lya tuin Sisaria khua kyate kamaw kalan oun saw`ae paw ccungccaw`ae luthung tuh ka umnaw inn malang oun thua`ae. ¹² Te lunghiinnaw kharyh hoi leite, minmin ryte cciakheih lan Muisaw nynh kae kha yn hopya. Tuhlaeze hynh-e uno`ae lutaruh nynh kamaw ryte cceihbua`ae zah tuh-e ccungccapaw inn lungkhu lang kae tee. ¹³ Te vaaw ccungccapaw nynh a inn malang thadyn zah Kawnelia kha, ‘Joppa khua lang ccungccaw`ae saw lah Piter acikuh paw Simon kha kosah`ae. ¹⁴ Tuh-e paw nynh nang te na inn kya um`ae paw balyn nynh khumnaw na mue nawlan oh paw bya kha ae hopah cih oh,’ cite a hopya paw kha aning nynh kaening kha bua yn hopya. ¹⁵ Te kae nynh phung he ka ho tuh, atakaw lya aening tungvaw a ccaw hawte Thyaa Muisaw tuh minmin tungvaw kyakhe a ccahbua. ¹⁶ Oute, ‘Johan nynh tuh tui kya baptisma-insah ccaccing`ae, thuasalama nanning tuh Thyaa Muisaw te baptisma-insah na thua cih oh,’ cite Bawipaw nynh a ho paw a bya kha kae nynh ka liathui vae. ¹⁷ Bawipaw Jesu Kri a zyn`ae paw aening kha Pachia nynh lasung oun pya hawte minmin kha mah a pyabua`ae paw nynh thua; Pachia kha khee kho nawlan kae tuh pawtecihpaw ccungccaw mou ka thua?” cite Piter nynh a ci. ¹⁸ Hynh-e uccaw`ae kong minmin nynh he a thae`ae tuh zyadae`ae zah, “Tuhte lanze Pachia nynh Zenta`ae kha mah hiinnaw muesabua lan ngaesikunaw a pyabua`ae latu,” cite Pachia kha phu-esah`ae. ¹⁹ Oute Stifen konglang te atho paw vawsaw riathaenaw keiccuze phiariphiarae a um`ae paw ccungccaw`ae tuh Finisia, Saiparas, te Antiok khua phe thua lang cia cceih`ae zah Bawipaw bya kha hung kalan sanmah ho leite, Jew`ae kalan kyalya nynh a hopya`ae. ²⁰ Te kha-e`ae kyaze abang tuh Saiparas te Sairenia khua e ccungccaw`ae thua`ae zah Antiok khua kya he a thua`ae te Greek bya a ho`ae paw kalan Bawipaw Jesu kong kha a hopya`ae. ²¹ Te Bawipaw kuih tuh minmin ryte um zah ccungccaw patae nynh zyn`ae zah Bawipaw kalan a paleihkuh`ae. ²² Te kha-e thungpang kha Jerusalem kya um paw kriccawbu nynh he a thae tuh Antiok khua lang po a ccia ccaw cite minmin nynh Barnabas kha a saw`ae. ²³ Aning nynh he a thua tuh Pachia thawccinaw kha muih zah a lungtua, te eenaw a hoi paw thinlung te Bawipaw kya po atyn nawlan`ae minmin balyn kha thawzungpya`ae. ²⁴ Pawccecize aning tuh ccungccahoypaw thua zah Thyaa Muisaw te thuasah, zynnaw te thuasah phe beihpaw nynh thua. Te ccungccaw pataepi kha Bawipaw kalan biachih athua`ae. ²⁵ Oute Barnabas tuh Saul kha ccung khylan Tarsuh khua lang a cceih. ²⁶ Te he a muih tuh Antiok khua lang a cciakhae. Ou tuhcihte minmin tuh kum kheit lungkhu kriccawbu ryte umkheih`ae zah ccungccaw patae kha leih a ccangpya`ae. Te Antiok khua kyakhe nynh zuitu`ae kha Kriccaw`ae cite masaty ko athua`ae. ²⁷ Te tuh-e nin`ae kya profeh`ae abang tuh Jerusalem kyate Antiok khua lang oun thua`ae. ²⁸ Te minmin lakuze Akabus acikuh paw lukheit nynh thadyn zah, “Laephipi balyn kya myarya alepaw ccakangnaw yn thua vae cih,” cite Muisaw liate a hoty. Ou tuh-e ccakangnaw tuh Sizar siapharan Klaudias ccyh lya nynh athua. ²⁹ Oute zuitu`ae, luraveih nynh a taeningnaw thyhte Judah ram kya um`ae paw uno`ae kha bawngnaw kybua lan`ae cite byapaeku`ae. ³⁰ Tuhte minmin nynh cyih`ae zah Barnabas te Saul kyate kha-e kha kriccaw piccang`ae kalan a ky`ae.

¹ Tuh-e ccyh lya Herod siapharan nynh kriccawbu kya-e abang kha vawsaw pya khylan a kyng`ae. ² Te aning nynh Johan a upaw James kha thaloi te phe a chia. ³ Te kha-e nynh Jew`ae lungrythuasah cipaw kha he a muih tuh Piter kha mah ranoih a kyngsah`ae. Tuh lya tuh ransi py leipaw sanlou poi nin nynh thua. ⁴ Te Piter kha kyngsah`ae zah Kawtaw Poi koute ccungccaw`ae kalan thuakhae lan cite tuakuh zah Piter kha a ngawtu`ae rhawkaw haw laetaruh kuih kalan ah zah thunginn kya a saw. ⁵ Tukeiccu Piter tuh thunginn kya a um; thuasalama kriccawbu nynh amaw hanlan apaekuh lei lante Pachia kalan sawsangnaw te a ngiapya`ae. ⁶ Te Herod nynh Piter kha pousah lan a cidyn, kha-e khuazi khe, Piter tuh sivarui zung ning te hee`ae zah rhawkaw luning laku khe a i; thuakaw ngawtu`ae nynh thuakaw malang te thunginn kha a ngaw`ae. ⁷ Te Bawipaw kya-e vaaw ccungccapaw tuh yn langkuh zah thunginn kya phaephae yn aw; te Piter a napang kha phah bia zah, “Arangte tho kanmaw!” cipah zah Piter kha a tho. Te sivarui`ae tuh Piter kuih kyate pung accah. ⁸ Te vaaw ccungccapaw nynh Piter kha, “Taesung sungkuh lah na phanah kha nawkuh,” a cipya. Te Piter nynh a ho hawte a cyi. Te vaaw ccungccapaw nynh, “Na boei kha zingkuh lah kamaw hynh yn zui,” a cipya. ⁹ Te Piter nynh cceih zah amaw kha a zui, tuhzemah vaaw ccungccapaw nynh a cyi paw tuh thanccingpaw nynh thua cipaw nyh khyh, thuasalama vizin nynh ka muih cite nynh a tuaku. ¹⁰ Minmin nynh ccangkheitnaw te ccangningnaw a ngawtu`ae kha he a lue`ae te khua lungkhu lang a tee paw sivaw koikua kalan a thua`ae tuh, tuh-e koikua tuh amaw hung lan ahungkuh; te minmin tuh toikuh`ae zah laanpi ccangkheit kya a ccia lya`ae khe vaaw ccungccapaw tuh vaekheihmawte Piter kyate phe a pou. ¹¹ Te Piter nynh he a nyhkuh tuh, “Atu Bawipaw nynh a vaaw ccungccapaw yn saw zah Herod kuih kyate thuasah, Jew`ae balyn nynh ngaehoinaw kyate thuasah kamaw hynh phe yn luesah vae cipaw ccaerarihlan atu phe ka ny,” a ciku. ¹² Te kha-e kong kha a tua lyakhe, ccungccaw patae nynh pynkheihlan sueluakuh`ae zah sawsangnaw`ae, Marka acikuh paw, Johan a nung Meri inn lang yn thua. ¹³ Te Piter nynh koikua kalan e thuakaw kha he a khua tuh Rhoda cikuh paw nopinung taraw nynh nawngae lan yn cceih. ¹⁴ Te Piter roi cipaw he a nyh tuh a lungtua pawte thuakaw kha hung vae leite ccue kanmaw zah, “Koikua malang Piter phang thadyn,” cite a hopya`ae. ¹⁵ Te minmin nynh, “Nang tuh na ngae,” cite kha-e nung kha a ci`ae. Thuasalama aning nynh, “Thanccingpaw nynh thua,” cite thawte a ho. Te minmin nynh, “Piter a vaaw ccungccapaw nynh athua cih,” a ci`ae. ¹⁶ Thuasalama Piter nynh banban pei khua zah minmin nynh thuakaw kha he hung`ae tuh amaw kha muih`ae zah mih ngaeang pung thua. ¹⁷ Thuasalama Piter nynh minmin kha zya a dae ccaw`ae cite a kuih te piapah`ae zah Bawipaw nynh amaw kha pawcihte nynh a poukhae cipaw kha minmin kalan a hopya`ae. Te Piter nynh, “Cceih oh lah hynh-e`ae kong hynh James te uno`ae kha la hopah oh,” a ci. Oute toikuh zah ccanglang khe a cceih. ¹⁸ Te khua he yn dae tuh Piter kya acyikuh paw konglang khate rhawkaw`ae laku ngaluinngaluin ccaenaw alepi a um. ¹⁹ Te Herod nynh Piter kha ccung zah he muih khyh tuh a ngawtu`ae kha akaw-aleih byakhia`ae zah minmin tuh chia lan accan cite kaw a tho. Te Herod tuh Judah ram kyate Sisaria khua lang cceihbung zah tuin kya a um. ²⁰ Te Herod tuh Tai khua e ccungccaw`ae te Sidon khua e ccungccaw`ae elan myarya a thinria; thuasalama minmin nynh pynkheihlan a kalan oun thua`ae zah Blastas acikuh paw siapharanpaw kya-e ryaccinkhantu kha zya hykuh`ae zah a lungdae nawlan a ngiasah`ae. Pawccecize mih ram tuh siapharanpaw ram nynh a kuabua paw nynh thua. ²¹ Te a khya`ae paw nin kyakhe Herod tuh siapharan uccaw te ccaankuh zah a suitungkhung vawlan dahungte minmin kha byahopya`ae. ²² Te ccungccaw`ae nynh, “E roi tuh ccungccaw roi thua khyh, pachia roi nynh thua,” cite a sia`ae. ²³ Te Pachia kha phu-e a pya khyh keiccuze Bawipaw kya-e vaaw ccungccapaw nynh vaekheihmawte Herod kha a bua; te aning tuh zangpaw`ae nynh ae`ae zah phe a chih. ²⁴ Thuasalama Pachia bya tuh lethung zah houh a pungthung. ²⁵ Te Barnabas te Saul tuh mih ryalaw phe a thangsah`ae koute Jerusalem kyate ki`ae zah Marka acikuh paw Johan kha mah a hoeibua`ae.

¹ Antiok khua kya a um paw kriccawbu kya profeh`ae te ccangpatu`ae a la um`ae. Tuhe` ae tuh: Barnabas, Nika cite a ko`ae paw Simeon, Sairenia pee e paw Lusias, tetrarch Herod ryte a lethung kheih`ae paw Manaen, te Saul nynh thua`ae. ² Minmin nynh Bawipaw rya kha lah`ae zah looh-ae he sung`ae tuh, Thyaa Muisaw nynh, “Ka konua`ae paw ryalaw law khylan Barnabas te Saul kha kamaw hanlan accangte oun phiapah oh,” a ci. ³ Te minmin nynh looh-aesung`ae zah sawsang`ae, te minmin tungvaw mih kuih khang`ae zah minmin kha a saw`ae. ⁴ Tuhte minmin tuh Thyaa Muisaw nynh a saw`ae thyhte Selusia khua lang cceih`ae zah tuin kyate Saiparas tuikoih kalan sanphalung te a cceih`ae. ⁵ Te Salamis khua kya a um`ae lyakhe minmin nynh Jew`ae sinakok kyakhe Pachia bya kha a ho`ae; te minmin bawngtu lang Johan kha mah a hoeibua`ae. ⁶ Te minmin nynh tuikoih kya po cceih`ae zah Pafo khua he thua`ae tuh, nawthyapaw ahme leipaw profeh, Barjesu acikuh paw Jew paw lukheit kha a muih`ae. ⁷ Tuh-e paw tuh ram uktupaw, myarya ahawpaw Serkias Paulu ryte nynh a um`ae; Paulu nynh Pachia bya kha thae a ry keiccuze Barnabas te Saul kha a koku`ae. ⁸ Thuasalama nawthyapaw Elimas (pawccecize tuh-e tuh a min asuilan nynh thua) nynh ram uktupaw kha zynnaw kyate paleihsaku khylan zuakuh zah locceihtu`ae kha a rawse`ae. ⁹ Oute Paul cite mah a ko`ae paw Saul tuh Thyaa Muisaw te phe beih zah kha-e paw kha rirido zah, ¹⁰ “Thyaruhnaw balyn, hyngpyanaw balynte phe beihpaw diabolos ccapaw, dingnaw`ae balyn rhawpaw lou, nang tuh Bawipaw kya-e ahmepaw laanpi kha rosah leite na ung kho khyh tou? ¹¹ Atu maw, dotua, Bawipaw kuih tuh na tungvaw a thua cih, te nang tuh na mitmoh cih zah ccyh sosoh khuanin na muih lan khyh,” a cipya. Te vaekheihmawte a mit pung zi zah a tungvaw mohnaw a thua; te a kuih te a dungbua lanpaw ccungccaw kha a zaahku. ¹² Oute ram uktupaw nynh kha-e acyikuh paw kha he a muih tuh zyn zah Bawipaw kya-e ccangpyanaw kha a ngaeangthua. ¹³ Paul te a cceihkheih`ae paw tuh Pafo khua kyate rili kalan sahkuh`ae zah Pamfilia ram Perka khua khe he thua`ae tuh, Johan tuh minmin kyate pou zah sanphalung te Jerusalem lang a ki. ¹⁴ Thuasalama minmin tuh Perka khua kyate toikuh`ae zah Pisidia ram kya Antiok khua khe a thua`ae, te Sabbath nin kya sinakok lungkhu lang tee`ae zah a dahung`ae. ¹⁵ Te Kawbya te Profeh`ae ccauh kha a ria`ae koute sinakok uktu`ae nynh ccungccaw`ae kha oun saw`ae zah, “Uteno`ae, nanning nynh ccungccaw`ae thawzungpya lanpaw bya na hoi oh ze, hopah oh,” cite a hosapya`ae. ¹⁶ Te Paul nynh thadyn zah a kuih te piapah`ae zah, “Israel ccungccaw`ae te Pachia rawrih`ae paw nanning, ngaetua oh: ¹⁷ Hynh-e Israel ccungccaw`ae Pachia nynh aening ah minpaaw`ae kha po`ae zah Izip ram kya mikhia`ae hawte a um`ae lyakhe a hangthung`ae, te athungpaw a kuih te minmin kha kha-e ram kyate a poukhae`ae. ¹⁸ Te ccyh kum sungpali loukaw cia rangkaw kyakhe minmin ozia kha phang a ngaesang. ¹⁹ Te Kanaan ram kya-e minphuin`ae phin sari kha phe a ropah kou`ae te, kha-e`ae mih ram kha ccungthy dungte Israel`ae kha a nee`ae. ²⁰ “Te tuh-e`ae koute profeh Samuel alangku maw kum zapali sungpangaw loukaw cia byapiatu`ae kha Pachia nynh mih hanlan a pya`ae. ²¹ Tuhkoute minmin nynh siapharan kha ngiakuh`ae zah Pachia nynh Kish ccapaw Saul, Benjamin ciihan paw kha minmin hanlan kum sungpali cia a pya`ae. ²² Te kha-e paw kha he a nue koute David kha mih siapharan lang a khanpya`ae; David konglang te Pachia nynh ccaekiakhan zah a hopaw tuh: ‘Ka rynaw balyn a ccingsah cih paw, ka thinlung yn tung paw ccungccapaw, Jessi ccapaw David kha phe ka muih vae,’ a ci. ²³ Hynh-e ccungccapaw ciihan kyate, byakinpyakupaw thyhte Pachia nynh Khumtu Jesu kha Israel`ae hanlan phe a langsaku vae. ²⁴ Amaw yn thua maw, Johan nynh ngaesikunaw te asekuhpaw baptisma kong kha Israel ccungccaw balyn kalan phe a hoty vae. ²⁵ Te Johan nynh a ryalaw a thangsah dyn khe, ‘Kae hynh hung cite mou nae tua oh? Kae tuh kha-e paw ka thua khyh. Thuasalama dotua oh, kamaw nuhlang yn cceih paw Lukheit a um; kha-e paw a ccukoh khahpya lan sanmah kae tuh ka ngaekuh khyh,’ cite a ho. ²⁶ “Abraham ciihan athua paw uteno`ae, te nanning laku kyaze Pachia rawrih`ae paw, nanning kalan nynh hynh-e khumnaw bya tuh saw athua. ²⁷ Pawccecize Jerusalem kya um`ae paw te mih uktu`ae nynh amaw kha thuasah, Sabbath nin takyh kya a ria`ae paw profeh`ae bya kha thuasah a ny khyh`ae keiccuze, amaw kha seibenaw`ae liate minmin nynh profeh`ae bya kha a ccingsah`ae. ²⁸ Amaw kya chi lan accansah paw cyiseinaw ccangkheit san a muih lei`ae pite, Pilat nynh a chia ccaw cite minmin nynh a ngia`ae. ²⁹ Te amaw konglang azeikuh paw balyn kha minmin nynh phe a ccingsah`ae koute amaw rhua kha vaelantung kyate lah`ae zah shaw lungkhu a ccy`ae. ³⁰ Thuasalama Pachia nynh amaw kha a chih`ae paw kyate a thosah. ³¹ Te aning tuh Galilee ram kyate Jerusalem lang amaw ryte a cceihkheih`ae paw kalan nin patae cia a langkuh, tuh-e`ae tuh ccungccaw`ae kalan amaw ccaekia`ae nynh thua`ae. ³² Te minpaaw`ae kalan a rae paw byakinpyakupaw te asekuhpaw thungpang hoypaw kha kaening nynh nae kalan kae hopya oh. ³³ Sam ccangningnaw kya, ‘Nang tuh ka Ccapaw nynh na thua, atunin nang kha phe kae saah vae,’ cite azeiku hawte; Pachia nynh Jesu kha bua a thosathuinaw liate ah minpaaw`ae kya byakinpyakupaw kha mih ccaaw`ae aening hanlan a ccingsah. ³⁴ Te ronaw kalan kharyh a ki vae khyh nawlan, amaw kha a chih`ae paw kyate a thosah cipaw kha hynhcihte bua a ho; ‘David kya-e phe ariapaw thawccinaw kha nanning kae pya cih oh,’ a ci. ³⁵ Tukeiccu ccangpaw Sam kya mah, ‘Namaw kya-e Athyaapaw kha ronaw kalan thua lan na ua lan khyh,’ cite bua a ho. ³⁶ “David tuh amaw she lungkhu Pachia rynaw kha phe a rae koute, phe i zah a minpaaw`ae kya phe a ccybua`ae keiccu ronaw kalan phe a thua. ³⁷ Thuasalama Pachia nynh bua a thosah paw aning tuh ronaw kalan thua vae khyh. ³⁸ Tukeiccu uteno`ae, tuh-e Bawipaw liate nynh seinaw`ae ngaethyanaw kong kha nanning kalan hopya athua cipaw te, ³⁹ Mawsi Kawbya nynh thyaa ae ccousah kho khyh oh paw kyate, a zyn paw ccungccaw miakaw tuh amaw liate pawpaw balyn kyate thyaaccou`ae cipaw hynh nanning nynh nyh oh. ⁴⁰ Tukeiccu, profeh`ae kya ho athua paw uccaw kha nae tungvaw a thua khyh nawlan raeringkuh oh; a ho paw tuh: ⁴¹ ‘Ccungccaw sarya`ae paw nanning, dotua oh, nae ngaeangthua sah lah roh oh! Pawccecize nanning ccyh lya ryalaw ccangkheit kha kae nynh ka law, kha-e ryalaw kha ccungccaw lukheit nynh nanning kalan ae hopya oh zemah nanning nynh kharyh na zyn lan khyh oh,’ acikuh,” cite Paul nynh a hopya`ae. ⁴² Te Jew`ae tuh sinakok kyate he a pou`ae te, Zenta`ae nynh kha-e bya`ae kha malang Sabbath nin kya bua nae hopah ung cih oh cite a ngiaku`ae. ⁴³ Pumkunaw he athang te Jew`ae patae te Jew beiknaw kalan a tee thaw`ae paw, beiknaw lante azuakuh`ae paw nynh Paul te Barnabas kha a zui`ae; kha-e`ae nynh minmin kha hopah`ae zah Pachia thawccinaw kya atyn nawlan`ae a hy`ae. ⁴⁴ Te malang Sabbath nin kya Pachia bya kha ngae khylan a khuapi balynte vya ccing lang pynkheihlan oun thua`ae. ⁴⁵ Thuasalama Jew`ae nynh ccungccaw zapi kha he muih`ae tuh eiungnaw te phe beih`ae; te Paul nynh a ho paw kha rawse`ae zah a ei`ae, alue lante byaho`ae. ⁴⁶ Oute Paul te Barnabas nynh, “Pachia bya hynh masaty nanning hopya lan accanpaw nynh thua; thuasalama nanning nynh kha-e kha na vua oh zah zungzae hiinnaw tuh kae ngaekuh khyh cite bya na piaku oh keiccu, do oh, kaening tuh Zenta`ae kalan kae maeleihkuh vae. ⁴⁷ Pawccecize Bawipaw nynh, ‘Laephi athangnaw cia nang tuh khumnaw hanlan na thua nawlan, Zenta`ae hanlan awnaw lang nang kha phe kae khang vae,’ cite kaening kha kaw phe oun pya vae,” cite rawhoy te a ho`ae. ⁴⁸ Te kha-e bya kha Zenta`ae nynh he thae`ae tuh mih lungtua zah Bawipaw bya kha phuesah` ae; te zungzae hiinnaw hanlan khang athuapaw miakaw nynh a zyn`ae. ⁴⁹ Te Bawipaw bya tuh ram balyn kya khaleih apazaekuh. ⁵⁰ Thuasalama beiknaw lante a zuakuh`ae paw, sawtua lan um paw nopi`ae, te khualae e pise lupi`ae kha Jew`ae nynh hy`ae zah Paul te Barnabas tuasahnaw kha a pousah`ae; te mih ram kyate a deesah`ae. ⁵¹ Thuasalama Paul te Barnabas nynh mih ccu kya-e laenoi kha pheihnuakuh`ae zah Ikoniam khua langkhe a cceih`ae. ⁵² Te zuitu`ae tuh lungtuanaw ryte Thyaa Muisaw te phe beih`ae.

¹ Ou tuhcihte Ikonia khua kya minmin luning tuh paryhte Jew`ae sinakok lungkhu lang tee`ae zah phungho`ae; oute Jew`ae te Greek`ae ccungccaw zapipi nynh a zyn`ae. ² Thuasalama a zyn leipaw Jew`ae nynh Zenta`ae kha hy`ae zah uno`ae kha rawse khylan mih thinlung kha ahoy leipaw lan a rae`ae. ³ Tukeiccu minmin tuh khaw cia um`ae zah Bawipaw liate rawhoy te phung a ho`ae, Bawipaw nynh a thawccinaw bya hanlan ccaekia pya`ae zah muihsanaw te khuaruaru ngaeangnaw kha minmin kyate a langsaku. ⁴ Thuasalama khualae e ccungccaw zapi tuh thoh phiakuh`ae zah abang tuh Jew`ae kalan pang`ae zah abang tuh locceihtu`ae kalan a pang`ae. ⁵ Te Zenta`ae te Jew`ae nynh mih uktu`ae ryte locceihtu`ae kha zia lan`ae zah lung te deih lan`ae cite vaekheihte oun ccuenua`ae cipaw kha, ⁶ locceihtu`ae nynh he nyh`ae tuh Lykonia ram kya um paw Lystra khua te Derbe khua lang, te tuin pepan um paw khua lang a ccue`ae. ⁷ Tuin kya thehoynaw kha a ho`ae. ⁸ Te Lystra khua kya a nung vue kya mawte a ccukhoupaw, laanpi kharyh cceih boi leipaw, ccungccapaw lukheit tuh la dahung zah, ⁹ Paul nynh a hopaw bya kha a thae. Paul nynh kha-e paw kha rirido zah, phe dan lan ciate aning nynh zynnaw a hoi cipaw he a nyh tuh, ¹⁰ “Na ccu te lawbabinlan thadyn,” cite roi accae lante a hopya. Te aning tuh thokuh zah laanpi a cceih. ¹¹ Te Paul nynh a cyi paw kha ccungccaw`ae nynh he muih`ae tuh, “Khozi-pachia`ae nynh ccungccaw`ae alo lante aening kalan oun rungbung`ae,” cite Lykonia bya te mih roi saw`ae zah a ho`ae. ¹² Te minmin nynh Barnabas kha Zeus cite ko`ae zah Paul tuh phunghotu lupi athua keiccuze Herme cite a ko`ae. ¹³ Te tuh-e khua malang a um paw tempal a hoitu Zeus a ranpibawi nynh vaetua tangnua`ae te haetapawsi`ae kha koikua kalan yn cciakhae, ccungccaw zapi ryte silawkunaw rae lan cite a ry`ae. ¹⁴ Kha-e kha locceihtu`ae Barnabas te Paul nynh he a thae`ae tuh mih uccaw`ae kha ccahrae sei`ae zah ccungccaw`ae laku lang ccue`ae zah, ¹⁵ “Ccungccaw oh, pawccemou hynhte na cyi oh? Kaening mah nanning hawte ccungccaw`ae nynh kae thua, nanning nynh hynh-e accakaepaw uccaw`ae kyate vaawran te laephi, rili te kha-e`ae kya um paw miakaw balyn raetu, a hiinpaw Pachia kalan na paleihku oh ccaw cite kaening tuh nae kalan thehoypaw kae hopaw nynh kae thua. ¹⁶ Langmaw lya tuh Pachia nynh minphuin`ae balyn kha mimaw mih laanpi kya ccia lan a la ua`ae. ¹⁷ Tuhzemah ahoypaw oun cyipya paw kya amaw a um paw kha ccaekia langsaku leite um khyh, vaawran kyate khua oun rawsapya zah thingthae-eccang a pousah paw kumvaelori kha oun pya, ah thinlung kha aepaw te oun byngsah zah lungtuanaw te phe oun biasah,” cite thawmawte a sia`ae. ¹⁸ Te hynh-e byaho`ae paw khate mih kalan silawkunaw a rae khyh nawlan`ae ccungccaw zapi kha minmin nynh kou ru lante a khee kho`ae. ¹⁹ Te Jew`ae abang tuh Antiok te Ikonia khua`ae kyate tuhlang oun thua`ae zah ccungccaw zapi kha hy`ae zah Paul kha lung te a deih`ae, phe chih vae cite tua`ae zah khua atolang khe a sue`ae. ²⁰ Tuhzemah zuitu`ae nynh a pe phang thadynlu`ae lyakhe, Paul tuh thokuh zah khua lungkhu lang bua a tee. Awkhualan tuh Barnabas ryte Derbe khua lang a cceih`ae. ²¹ Tuh-e khua kya thehoypaw kha he ho`ae zah ccungccaw patae kha zuitu`ae lang a rae`ae koute, minmin tuh Lystra khua, Ikonia khua te Antiok khua lang bua a ki`ae. ²² Zuitu`ae thinlung kha thawzung pyate, zynnaw kya atyn nawlan`ae minmin kha hyte, “Aening tuh vawsawrunaw patae tungbiate nynh Pachia peenaw lungkhu lang ah tee hahe cih oh,” cite a hopya`ae. ²³ Te kriccawbu takyh kya piccang`ae kha khang`ae zah looh-aesung te sawsang`ae koute, minmin nynh a zyn`ae paw Bawipaw kalan minmin kha a ah`ae. ²⁴ Te minmin tuh Pisidia ram kha po a khung`ae koute Pamfilia ram lungkhu lang a thua`ae. ²⁵ Te minmin nynh Perka kya Bawipaw bya kha a ho`ae koute Attalia khua lang a cceihbung`ae. ²⁶ Te tuin kyate minmin nynh phe a lyng vae`ae paw ryalaw hanlan Pachia thawccinaw kalan mimaw kha a ahnaw`ae Antiok khua langkhe sanphalung te a cceih`ae. ²⁷ He thua`ae zah kriccawbu`ae kha pynkheihlan he suelua`ae koute Pachia nynh minmin ryte a cyi paw balyn, te Zenta`ae elan zynnaw thuakaw kha pawcihte nynh a hungpya`ae cipaw kha bua a hopyathui`ae. ²⁸ Te tuin kya minmin tuh zuitu`ae ryte khaw cia a umkheih`ae.

¹ Te Judah ram kyate Antiok lang oun thua`ae paw ccungccaw abang nynh, “Mawsi phungbya thyhhawte vindung aw na thua khyh oh ze khumpaw na thua kho lan khyh oh,” cite uteno`ae kha a ccangpya`ae. ² Tukeiccu Paul te Barnabas tuh tuh-e`ae ryte lungloku leinaw alepi hoi`ae zah eikunaw he a hoi`ae tuh, uteno`ae nynh Paul, Barnabas te minmin kyaze ccangpaw uno`ae abang tuh tuh-e konglang, locceihtu`ae te piccang`ae kalan Jerusalem lang cciathung lan accan cite byapae`ae. ³ Te kriccawbu nynh laanpi langkhe saw`ae zah Paul te Barnabas tuh Finisia te Samaria ram kha po a khung`ae, Zenta`ae rulaekunaw kong kha a hopya`ae; te uteno`ae balyn kha myarya mih lungtuasah`ae. ⁴ Te minmin Jerusalem kya he thua`ae tuh locceihtu`ae, pastor`ae te kriccawbu nynh lehkhan`ae, te Pachia nynh minmin mangte a cyi paw balyn kha minmin nynh bua a hopya`ae. ⁵ Thuasalama Farasi`ae phu kyate a zyn`ae paw abang nynh thadyn`ae zah, “Zenta`ae kha vindung ah aw oh ho zah Mawsi Kawbya zui lan kaw ah pya oh aho,” a ci`ae. ⁶ Oute locceihtu`ae te pastor`ae tuh tuh-e kong tuakheih lan a sueluakuh`ae. ⁷ Te eikunaw patae he a um tuh Piter nynh thadyn zah, “Uteno`ae, Zenta`ae nynh ka khalang kyate thehoypaw bya a thae nawlan`ae te a zyn nawlan`ae anuhlang lyakhe aening laku Pachia nynh yn po cipaw kha na ny oh. ⁸ Te thinlung a nyh paw Pachia nynh Thyaa Muisaw kha aening oun pya hawte minmin kha mah pyate minmin hanlan ccaekia a langsah. ⁹ Te zynnaw liate mih thinlung kha ccikan te, aening te minmin laku laesanaw umsah khyh. ¹⁰ Tukeiccu atu aening nynh mah thuasah, ah minpaaw`ae nynh mah thuasah ah phu kho lei oh paw taphu kha zuitu`ae nging vawlan khang lante pawccemou Pachia kha na syntaw oh? ¹¹ Thuasalama Bawipaw Jesu Kri thawccinaw liate minmin tuh khum athua`ae hawte aening mah khum ah thuabua cih oh cite ah zyn oh,” cite a hopya`ae. ¹² Oute ccungccaw zapi balyn tuh daebabilan um`ae zah Barnabas te Paul nynh mimaw kha Pachia nynh mangte ngaeang lan um paw ryalaw`ae te khuaruarunaw`ae Zenta`ae laku a langsakupaw kong a ho`ae paw kha a ngae`ae. ¹³ Te minmin tuh daetedae lang a um`ae koute, James nynh tho zah, “Uteno oh, ka ho paw hynh oun ngaepya tua oh: ¹⁴ amaw min hanlan Zenta`ae kyate ccungccaw phinkheit kha poh thua khylan Pachia nynh masaty Zenta`ae kha pawcihte nynh a pae`ae cipaw kha Simeon nynh phe a ho vae. ¹⁵ Te tuh-e bya te profeh`ae bya tuh accawkuh, Ccathyaa kya hynhte azeikuh hawte: ¹⁶ ‘Hynh-e koute kae tuh bua kae ki cih zah phe a pu vae paw David bu kha bua ka sakthui cih, te kha-e aronahpaw kha bua ka sakthui cih zah bua ka thadynsah cih; ¹⁷ Ou tuhte kamaw min liate ko athua`ae paw, Zenta`ae balyn mah athua`ae paw tuhlaepaw ccungccaw`ae nynh BAWIPAW kha a ccung`ae ccaw cite, hynh-e uccaw`ae balyn a raetupaw BAWIPAW nynh a ci,’ cite azeikuh. ¹⁸ “Laephipi thotakaw te Pachia nynh a ryalaw balyn kha marya a ny. ¹⁹ Tukeiccu kae nynh ka hory paw tuh, Zenta`ae laku kyate Pachia kalan oun paleihkuh`ae paw kha aening nynh vawsaw pya nan oh sih. ²⁰ Thuasalama zohtuh`ae nynh a nungsisaku`ae paw kha thuasah, ohhuakunaw kha thuasah, nging-o te a chia`ae paw kha thuasah, chii kha thuasah minmin nynh a sung nawlan`ae aening nynh ccaw ky oh sih. ²¹ Pawccecize Mawsi nynh langmaw lya mawte khua takyh kya a kawbya a ho`ae paw kha phe a hoi vae keiccu, Sabbath nin takyh sinakok`ae kya a kawbya tuh ria athua,” a ci. ²² Oute mimaw phu kyaze po athua`ae paw, uteno`ae lakuze cciakhaetu`ae Barsabas acikuh paw Judas te Sailas kha Antiok khua lang Paul te Barnabas ryte saw lan a ci`ae paw bya nynh locceihtu`ae, piccang`ae te kriccawbu khaleih kha mih lunghoysah. ²³ Te ccaw zei`ae zah minmin kyate a ky`ae paw tuh, “Locceihtu`ae, piccang`ae te uteno`ae nynh Antiok khua kya te Siria ram te Silisia ram kya na um oh paw Zenta`ae na thua oh paw uteno`ae kha kae beihlang oh! ²⁴ Kaening nynh kaw kae pya lei`ae paw, kaening kyate oun cceih`ae paw ccungccaw abang nynh nanning kha, ‘Vindung na awku oh ho zah Kawbya na zui oh aho,’ cipaw bya khate nanning kha vawsaw ae pya oh, nae lungria ae thaesah oh cipaw kaening nynh kae thae pawte, ²⁵ - ²⁶ ah Bawipaw Jesu Kri min hanlan mih hiinnaw chihchih hiinhiin acih`ae paw ccungccaw`ae, kae sungsahpaw Paul te Barnabas ryte, popaw ccungccaw`ae kha nanning kalan saw lan kaening nynh lunglokute kae tungkuh zah ahoy kae ci. ²⁷ Tukeiccu kaening nynh Judas te Sailas hynh nae kalan kae saw`ae, minmin nynh kha-e uccaw`ae kong kha mih khalang te ae la hopah cih oh. ²⁸ Pawccecize hynh-e ahopaw uccaw`ae laelan nanning tungvaw khe ari huapaw phupaw khang lanpaw tuh Thyaa Muisaw hanlan te kaening hanlan ahoypaw thua khyh. ²⁹ Tuh-e ahopaw uccaw`ae tuh: nanning nynh zohtuh kalan silawnawpaw`ae kha thuasah, chii kha thuasah, nging-ote a chia`ae paw kha thuasah, ohhuakunaw kha thuasah la sung oh. Kha-e`ae kha na sungku oh ze, kou ahoypaw nynh thua. Ngedan te.” cite a zei`ae. ³⁰ Tuhte minmin kha he a cciasah`ae tuh Antiok khua lang a thua`ae; te ccungccaw zapi kha pynkheihlan a suelua`ae koute ccaky kha a pya`ae. ³¹ Kha-e ccaw kha minmin nynh he a ria`ae tuh thawzung pyanawpaw athua keiccu mih lungtua. ³² Te Judas te Sailas mimaw mah profeh`ae athua`ae thyhte bya pataepi te uteno`ae kha thawzungpya`ae zah lungthawsaesah`ae. ³³ Te minmin tuh tuin kya ccyh khuekheih a um`ae koute uteno`ae nynh locceihtu`ae kalan ngaengante a kisah`ae. ³⁴ Tuhzemah Sailas tuh tuin kya umhy lanze ahoy cih cite a tuaku. ³⁵ Paul te Barnabas mah Antiok khua kya um`ae zah ccangpaw ccungccaw`ae patae ryte Bawipaw bya kha ccangpah`ae zah a hopya`ae. ³⁶ Te nin khaw aro koute Paul nynh Barnabas kha, “Aening nynh Bawipaw bya ah honaw khua takyh kya um`ae paw uteno`ae nynh pawcihtemou a um`ae cipaw ah dotua ccaw ki sih lah paebua sih`ae,” a cipya. ³⁷ Te Barnabas nynh Marka acikuh paw Johan kha mimaw ryte hoeibua lan phe a la tuaku vae. ³⁸ Thuasalama Paul nynh Pamfilia ram kyate, minmin kyate ki zah ryalawnaw kalan minmin ry a cceihbua vae leipaw Marka kha hoeibua lan ccang khyh cite varyn a tuaku. ³⁹ Tuhte minmin laku lungloku leinaw tuh eih ru keiccu lukheit te lukheit phiakuh`ae zah Barnabas nynh Marka kha hoei zah Saiparas tuikoih kalan kohlung te a cceih`ae. ⁴⁰ Te uteno`ae nynh Paul kha Bawipaw thawccinaw kalan he ah`ae te Paul nynh Sailas kha pokuh zah a pou. ⁴¹ Te kriccawbu`ae kha thawzung pyate Siria te Silisia ram lang po a cceih.

¹ Oute Paul tuh Derbe khua te Lystra khua lang a thua. Te dotua, tuin kya Timote acikuh paw zuitu lukheit a la um. A nung tuh a zyn paw Jew nopinung nynh thua, thuasalama a paaw tuh Greek paw nynh thua. ² Timote tuh Lystra khua te Ikonia khua kya um`ae paw uteno`ae nynh thehoyccousah`ae paw nynh thua. ³ Paul nynh kha-e paw kha amaw ryte cciasabua lan a ry. Te a paaw tuh Greek minphuin athua paw kha tuh-e ram kya um`ae paw Jew`ae balyn nynh phe a ny`ae keiccuze Timote kha hoei zah vindung a aw pya. ⁴ Te minmin nynh khua`ae kalan po cceih`ae zah Jerusalem kya um`ae paw locceihtu`ae te piccang`ae nynh byapaenaw`ae paw ccaw`ae kha a zui ccaw`ae cite po a nebia`ae. ⁵ Ou tuhte kriccawbu`ae tuh zynnaw kya tynsah thua`ae zah nin takyh milu akaethung. ⁶ Te Frikia te Galati ram kha po he a cceih`ae tuh Asia ram kya Pachia bya ho lanpaw kha Thyaa Muisaw nynh phe a khee`ae. ⁷ Te Mysia ram kalan he thua`ae tuh Bithynia ram lungkhu lang ccia lan a noukuh`ae, thuasalama Muisaw nynh ua khyh`ae. ⁸ Te minmin tuh Mysia ram kha po cciakhung`ae zah Troas khua lang a thua`ae. ⁹ Te khuazi khe Paul kalan vizin yn langkuh. Mesidonia paw lukheit nynh thadyn zah, “Mesidonia ram lang po yn cceih lah kaening hynh oun bawng,” cite Paul kha a ngia. ¹⁰ Te vizin kha a muih koute, Mesidonia ram lang ccia lan palou kae paccynkuh vae; minmin kalan thehoypaw ho khylan Bawipaw nynh kaening kha oun ko cite kae tuakuh. ¹¹ Tukeiccu Troas khua kyate kohlung te kae thokuh zah Samothrasia tuikoih kalan dingrarihlan kae cceih zah awkhualan tuh Neapolis khua kya kae thua. ¹² Te tuin kyate Mesidonia ram sang kheit kya abapihua paw khua, Rom koloni athua paw, Filipi khua kya kae thua zah tuin kya nin khaw cia kae um. ¹³ Te Sabbath nin kya kaening tuh khua akhunglang sawsangnaw leih raenaw`ae vawkhu kin langkhe kae cceih zah kae dahung, te tuhlang oun thua`ae paw nopi`ae kha kae hopya`ae. ¹⁴ Te sekakungpaw uccaw a zuatu, Thiatira khua e Lidia acikuh paw nopinung lukheit tuh Pachia a beik paw thua zah kaening kong kha yn thae; te Paul nynh a ho paw uccaw`ae kha hoyte ngae khylan Bawipaw nynh kha-e nung thinlung kha a hung. ¹⁵ Te kha-e nung te a innbyn`ae tuh baptisma-in kou`ae te, aning nynh, “Kae tuh Bawipaw hanlan zyn lan um paw cite nae tua oh ze ka inn lang rang oh lah umhin oh,” cite kaening kha thawte oun ngia. Te kaening kha thawte oun kang. ¹⁶ Ou tuhte kaening tuh sawsangnaw kalan kae ccia lya, malang e konglang hothyanaw a hoi paw muisaw bahkuhpaw seenung taraw lukheit nynh kaening kha yn cciadue. Malang yn cyikuh lanpaw kong a hotynaw liate a bawi a zua`ae kha patae a muepya`ae. ¹⁷ Kha-e nung nynh Paul te kaening kha yn zui zah, “Hynh-e ccungccaw`ae tuh aening kha khumnaw laanpi oun muihsah`ae paw, ahang huaccepaw Pachia see`ae nynh thua`ae,” cite thawte a sia. ¹⁸ Te aning nynh khate nin patae cia a cyi. Thuasalama Paul nynh thinlung ccite nuhlang maeleihkuh zah muisaw kha, “Kha-e nung lungkhu te pou, Jesu Kri min te kaw kae pya,” a cipya. Te tuh-e suimilan ccyh kya mawtuin aning tuh po a pou. ¹⁹ Te kha-e nung a bawi`ae nynh a muenaw`ae paw ngaehoinaw tuh um vae khyh cipaw kha he muih`ae tuh Paul te Sailas kha kyng`ae zah uccaw zuanaw hmin kalan kawhoitu`ae kalan khe a dung`ae. ²⁰ Te minmin kha khuabawi`ae kalan cciakhae`ae zah, “Hynh-e ccungccaw`ae tuh Jew`ae mang athua`ae pite ah khua kha myarya vawsaw oun pya`ae. ²¹ Te Rom`ae athua paw aening nynh lawku lan accan leipaw te zui lan accan leipaw phung`ae kha oun ccangpya`ae,” cite a hopya`ae. ²² Te minmin kha rawsete ccungccaw zapi tuh pynkheihlan a thokuh`ae, te khuabawi`ae nynh mih uccaw`ae kha ccarae sei`ae zah minmin kha tungbang te bua lan kawpya`ae. ²³ Te minmin nynh avae patae a bua`ae koute minmin kha thunginn lungkhu lang sah`ae zah ahoyte ring lan thung uktupaw kha byatawsya`ae. ²⁴ Khate byatawsya`ae thyhte thung uktupaw nynh minmin kha alungkhu-e thunginn lungkhu lang phang`ae zah mih ccu kha tunglua te phang khii`ae. ²⁵ Te ziraccyng khe Paul te Sailas nynh sawsang`ae zah Pachia thehoysanaw lawsah`ae; te thungccah`ae nynh a ngae`ae. ²⁶ Te tua lei pite thawte innruisuekuh zah thunginn leihpaw tuh pung ahy; te vaekheihmawte thuakaw`ae balyn pung hungkuh zah thungccah`ae miakaw kya-e sivarui`ae tuh pung phoukuh. ²⁷ Te thung uktupaw tuh a inaw kyate yn thaekuh zah thunginn thuakaw`ae pung ahungkuhpaw kha he a muih tuh thungccah`ae pung ccue vae cih`ae cite tua zah amaw te amaw chiaku lan vae cite a thaloi kha a thuaku. ²⁸ Thuasalama Paul nynh, “Namaw te namaw kha vawsaw pyakuh nan, pawccecize kae balynte e kya pung kae um,” cite thawte sia zah a hopya. ²⁹ Oute thung uktu nynh maee kha kokhae`ae zah arangte tee zah Paul te Sailas malang thyngkute a bakhung. ³⁰ Te minmin kha poukhae`ae zah, “Bawihaepaw oh; khumnaw mue khylan pawmou ka cyi cih?” cite a khia`ae. ³¹ Te minmin nynh, “Bawipaw Jesu Kri kha zyn lah nang tuh khum na thua cih, te na innbyn`ae mah khum athua cih`ae,” a cipya`ae. ³² Te minmin nynh kha-e paw te a inn kya um`ae paw balyn kha Bawipaw bya a hopya`ae. ³³ Te aning nynh Paul te Sailas kha tuh-e khuazi, tuh-e suimilan ccyh kya mawtuin cciakhae`ae zah mih vaemaw kha a singpya`ae; te aning te a innbyn`ae balyn tuh palou baptisma-in`ae. ³⁴ Te aning nynh minmin kha a inn lungkhu lang hoei`ae zah looh a dang`ae; te a innbyn`ae balyn ryte Pachia a zyn`ae pawte kou a lungtua. ³⁵ Te khua he yn dae tuh khuabawi`ae nynh palih bawi`ae kha saw`ae zah, “Kha-e ccungccaw`ae kha cceih`ae sah,” a cipya`ae. ³⁶ Te thung uktu nynh kha-e bya kha Paul kalan hopah zah, “Khuabawi`ae nynh nanning kha la saw ccavae oh cite ccungccaw`ae oun saw`ae, tukeiccu atu pou oh lah daebabilan la cceih ccavae oh,” a cipya. ³⁷ Thuasalama Paul nynh, “Rom`ae athua paw kaening hynh ahoyte akaw-aleih byakhia leite minmin nynh zapi malang oun bua`ae zah thunginn lungkhu lang oun saw`ae; te atu aphirute tou hung oun saw cih`ae? Tuhte ccei soh! Mimaw ccaccei oun cceih`ae sah lah kaening hynh oun thua`ae sah,” cite minmin kha a hopya`ae. ³⁸ Te palih bawi`ae nynh kha-e bya kha khuabawi`ae kalan a hopya`ae; te Paul te Sailas tuh Rom`ae nynh thua`ae cipaw minmin nynh he a thae`ae tuh a rih vae`ae. ³⁹ Te khuabawi`ae tuh oun cceih`ae zah minmin kha thawte bohkuh`ae zah a poukhae`ae; te kha-e khua kyate pou lan a ngia`ae. ⁴⁰ Te Paul te Sailas tuh thunginn kyate pou`ae zah Lidia inn lang a tee`ae; te minmin nynh uteno`ae kha he muih`ae tuh thawzungpya`ae zah a pou`ae.

¹ Te Paul te Sailas tuh Amfipolis khua te Apollonia khua kha po khung`ae zah Thesalonika khua lang a thua`ae, tuh-e kya Jew`ae sinakok ccangkheit a um. ² Te Paul tuh leih a cyimae hawte, minmin kalan teebua zah Sabbath nin ninthung cia minmin ryte Ccathyaa kya-e kha a hokuh`ae. ³ Kri tuh a teing ho zah a chih`ae paw kyate bua a thothui aho cite ccaesapah`ae zah a langsapya`ae. Te, “Nae kalan kae nynh ka hopaw hynh-e Jesu tuh Kri nynh athua,” cite a hopya`ae. ⁴ Te abang ccungccaw tuh zyn`ae zah Paul te Sailas ryte a mungkuh bua`ae; te beiknaw lante azuakuh`ae paw Greek ccungccaw zapipi te abapi huapaw nopi`ae patae mah a mungkuh bua`ae. ⁵ Thuasalama a zyn leipaw Jew`ae nynh mih eiung zah kungkunaw hmin kya-e ccungccahoy lei`ae kha a hoeinua`ae, te a khia a vekuh`ae paw kha suelua`ae zah khualae balyn kha siarisiarae a umsah`ae; te Jason a inn kha koih`ae zah minmin kha ccungccaw`ae malang poukhae lan a ccung`ae. ⁶ Minmin kha he muih khyh`ae tuh Jason te uno`ae abang kha khua uktu`ae kalan dung`ae zah, “Laephipi kubuleih`ae paw hynh-e ccungccaw`ae tuh hynhlang mah oun thua`ae. ⁷ Jason nynh minmin kha thuasah`ae, te minmin balyn nynh, ‘Jesu acikuh paw ccangpaw Siapharan a um,’ ci`ae zah Sizar siapharan awda`ae kha a rawse`ae,” cite thawte a sia`ae. ⁸ Te minmin nynh kha-e bya a thae`ae paw ccungccaw`ae te khua uktu`ae kha lungvawsawsah`ae. ⁹ Te Jason te mingccang`ae kyate aamahkhan pyakunawpaw a lawkuh`ae koute minmin kha a cciasah`ae. ¹⁰ Te uteno`ae nynh vaekheihmawte Paul te Sailas kha khuazi khe Beria khua lang a saw`ae; tuh-e khua kya he thua`ae te Jew`ae sinakok lungkhu lang a tee`ae. ¹¹ Beria khuaccaw`ae tuh Thesalonika khuaccaw`ae laeze mih lung-ua hua, minmin tuh pekinaw thinlung te Pachia bya kha lawkuh`ae zah tuh-e uccaw`ae tuh akyh vema, kyh khyh vema cipaw kha nin takyhte Ccathyaa te a dokhia`ae. ¹² Tukeiccu minmin kyaze ccungccaw patae nynh a zyn`ae; sawtua lan um paw Greek nopi`ae te pise`ae patae mah a zyn`ae. ¹³ Thuasalama Thesalonika khua kya-e Jew`ae nynh Beria khua kya Paul nynh Pachia bya a ho cipaw he a nyh`ae tuh, tuhlang tuin cceih`ae zah ccungccaw`ae kha a hy`ae. ¹⁴ Oute uteno`ae nynh vaekheihmawte Paul kha rili kalan ccia lan a saw`ae; thuasalama Sailas te Timote tuh tuin kya a um ung`ae. ¹⁵ Te Paul a saw`ae paw nynh Athen khua kyacia a saw`ae; te Sailas te Timote kha arangte a kalan oun cceih`ae sah cipaw kawpyapaw a mue`ae koute minmin tuh a ki`ae. ¹⁶ Paul nynh Sailas te Timote kha Athen khua kya a ngaw`ae lyakhe, kha-e khua tuh zohtuh`ae te phe abeih cipaw kha he a muih tuh a lung vawsaw. ¹⁷ Tukeiccu sinakok kyakhe Jew`ae te Pachia beik`ae paw ccungccaw`ae kha thuasah, kungkunaw hmin kya leih a tungkuh`ae paw kha thuasah nin takyh bya a hokhae`ae. ¹⁸ Oute Epikurian te Stoik filosofa`ae abang tuh Paul te a khungkuh`ae. Te abang nynh, “E paw katua-katua ccohkuh paw hynh pawmou a hory?” a ci`ae. Paul nynh Jesu te thothuinaw kong kha a hopya`ae keiccuze mingccang`ae nynh, “Aning tuh ramccangpaw pachia`ae kong a hopatupaw nynh alo,” a ci`ae. ¹⁹ Te minmin nynh Paul kha hoei`ae zah Areopakas lang cciakhae`ae zah, “Nang nynh na hopaw hynh-e ccangpyanaw athawpaw hynh kaening nynh kae nybua ze so? ²⁰ Pawccecize nang nynh kae nakaring te thae boi leipaw uccaw`ae kha nae thuakhae; tukeiccu hynh-e uccaw`ae asuilan tuh pawmou athua cipaw kae nyhry,” cite a hopya`ae. ²¹ Pawccecize Athen khuaccaw`ae balynte tuin kya um`ae paw mikhia`ae tuh athawpaw thungpang ho lanpaw te ngae lanpaw kya laelan mih ccyh kha thangsah he khyh`ae. ²² Oute Paul tuh Areopakas kungsi kyakhe thadyn zah, “Athen ccungccaw`ae, pawpaw balyn kya nanning tuh beiknaw kou na peki oh cipaw ka ny. ²³ Pawccecize po ka cceih zah na beik oh paw kha he ka do tuh, ‘NY LEIPAW PACHIA KALAN,’ cite ccawtawkuh paw silawhang ccangkheit kha ka muih. Tukeiccu nanning nynh ny leite na beik oh paw Pachia kong kha kae nynh kae hopya oh. ²⁴ Laephipi te tuin kya um paw uccaw balyn a raetupaw Pachia, aning tuh vaawran te laephi Bawipaw athua thyhhawte kuih te rae paw tempal`ae kya um khyh. ²⁵ Aning tuh ccungccaw balyn kha hiinnaw, hy te pawpaw balyn a pyatupaw athua thyhhawte, pawsang mah a hanlan ho khyh zah ccungccaw`ae kuih te lawpyaku mah a hanlan ho khyh. ²⁶ Te aning nynh laephi vawlan balyn um lan ccungccaw phin miakaw kha chii phinkheit kyate a rae; te mih ccyh ccangsapaw kha thuasah, mih umnaw ramri kha thuasah a khyapya`ae. ²⁷ Ou tuhte ccungccaw`ae nynh Bawipaw kha a ccung`ae ccaw cite, amaw tuh aening lu raveihte ah sawkuh khyh oh zemah, amaw kha zah`ae sah lah a muih`ae ccaw cite. ²⁸ Pawccecize aening tuh amaw kya nynh ah hiin oh, ah pia oh zah ah um oh; nanning lakuze ccawphuatu`ae abang nynh, ‘Aening mah amaw ciihan nynh ah thua oh,’ cite a phua`ae hawte nynh thua. ²⁹ Ou tuhte Pachia kya-e ciihan ah thua oh keiccu, ccungccaw cyithyanaw te tuanaw liate rae paw sui, khyh ze phua, khyh ze lung te nynh Pachiathuanaw tuh aloku cite aening nynh ah tua lan oh ccang khyh. ³⁰ Te hynh-e nynaw hoi khyh ccyh kha Pachia nynh a muih leipaw olante a um pya`ae, thuasalama atu tuh ahmin takyh kya um paw ccungccaw`ae balyn kha ngaesiku lan kaw a pya`ae. ³¹ Pawccemacize, Pachia nynh phe a khang vae paw Ccungccapaw liate laephi ccungccaw`ae kha dingnaw kya byapia cih paw nin, nin kheit kha phe a khyade vae. A chih`ae paw kyate amaw kha a thosahnaw liate ccungccaw balyn hanlan zyn lan um paw ccaekia kha phe a pya vae,” cite Paul nynh a ho. ³² Te minmin nynh a chih`ae paw thothuinaw kong kha he a thae`ae tuh abang nynh a sarya`ae; mingccang`ae nynh, “Hynh-e kong hynh kaening nynh na bya bua kae ngae ung cih,” a ci`ae. ³³ Ou tuhkoute Paul tuh minmin laku kyate phe a pou vae. ³⁴ Tuhzemah ccungccaw abang tuh Paul kalan pang`ae zah a zyn`ae; tuh-e`ae kya Dionisias cikuh paw Areopakas memba paw, Damaris cikuh paw nopinung lukheit te ccangpaw ccungccaw`ae a umbua`ae.

¹ Hynh-e`ae koute Paul tuh Athen khua kyate pou zah Korin khua kyakhe a thua. ² Te Jew`ae balyn tuh Rom khuapi kyate marya a pou cih`ae cite Klaudias siapharanpaw nynh kawpya keiccuze, aro mawze Itali ram kyate a la thua paw, Pontas ram kya a pui paw Akuila acikuh paw Jew paw te a zu Prisilla kha Paul nynh muih`ae zah minmin kyakhe a thua. ³ Te Paul tuh alokuhpaw ryalaw a lah paw athua keiccu minmin kya umbua zah rya a lahbua; pawccecize mih ryalaw tuh anuekuh thya paw ryabuu a raetu`ae nynh thua`ae. ⁴ Te Sabbath nin takyh Paul nynh sinakok kya bya hokhae`ae zah Jew`ae te Greek`ae kha a hy`ae. ⁵ Thuasalama Sailas te Timote Mesidonia ram kyate he oun thua`ae tuh Muisaw nynh Paul kha a lungthosah zah Jesu tuh Kri nynh thua cite Jew`ae kalan ccaekiakhan vae. ⁶ Te Jew`ae nynh rawse`ae zah alue lante bya he honua`ae tuh, Paul nynh a uccaw kha thyng zah, “Nae chii tuh naemaw nae lu vawlan thua vae sah, kae tuh ka thya; atu kyate kae tuh Zenta`ae kalan nynh ka cceih vae cih,” cite minmin kha a cipya`ae. ⁷ Te tuin kyate Paul tuh pou zah Pachia a beik paw, Jastas acikuh paw ccungccapaw inn lungkhu langkhe a tee; tuh-e paw inn tuh sinakok te phang abekuh. ⁸ Te sinakok uktupaw Krispas tuh amaw innbyn`ae balyn ryte Bawipaw kha a zyn`ae, te Korin khuaccaw`ae patae mah thae`ae zah a zyn`ae, te baptisma-in`ae. ⁹ Oute khuazi khe Bawipaw nynh Paul kalan vizin te bya hopah zah, “Rih nan, thuasalama ho ccaleih lah dae nan. ¹⁰ Pawccecize kae na kya ka um zah nang kha vaemaw muesah lan hung nynh san ae zia lan khyh; pawccecize hynh-e khua kya ccungccaw patae ka hoi,” a cipya. ¹¹ Te Paul nynh minmin kha Pachia bya ccangpyate kum kheit sataruh cia khe kya a um. ¹² Te Kalio tuh Akhai ram mangki lang a tang lya, Jew`ae nynh lungnging te Paul kha rawse`ae zah byapianaw tungkhung malang thuakhae`ae zah, ¹³ “Hynh-e paw nynh Kawbya te arawsekuh lante Pachia kha beik khylan ccungccaw`ae a soih`ae,” cite a hopya`ae. ¹⁴ Te Paul nynh a khalang aw lan he a noukuh tuh, Kalio nynh Jew`ae kha, “Pou Jew`ae, hynh-e tuh aseipaw uccaw te ahoy leipaw uccaw athua lanze nanning kha kae ngaesangpya nawlan oh akonglang a um cih. ¹⁵ Thuasalama hynh-e tuh bya konglang, min konglang te nae kawbya konglang te byakhianawpaw athua zetuh naemaw te naemaw la piakuh oh; pawccecize tuhtahawpaw konglang kae byapia lan ka ry khyh,” cite a hopya`ae. ¹⁶ Te minmin kha byapianaw tungkhung kyate pung a dee`ae. ¹⁷ Oute Greek`ae balyn nynh sinakok uktupaw Sosthene kha kyng`ae zah byapianaw tungkhung malang khe a bua`ae. Te Kalio tuh kha-e uccaw`ae kha pawlangria leite hung a ung. ¹⁸ Te Paul tuh tuin kya khaw a um ung. Te uteno`ae kyate akhue lawkuh zah tuin te Siria ram lang Prisilla te Akuila ryte sanphalung te a cceih`ae. Byakinkunaw phe a rae keiccuze Kenkhrea khua kyakhe a sang phe a ngokusya. ¹⁹ Te Efesa khua a thua`ae tuh Paul nynh minmin kha tuin kya a cciataw`ae; thuasalama amaw tuh sinakok lungkhu lang tee zah Jew`ae ryte byahokuh`ae. ²⁰ Te minmin nynh mimaw ryte khaw umkheih lan Paul kha he a ngia`ae tuh Paul tuh a nawccah khyh. ²¹ Thuasalama minmin kha beihsya`ae zah, “Atu yn um lanpaw hynh-e poi kha pawpawte thua zemah Jerusalem kya nynh ka la mangbua cih; thuasalama Pachia rynaw athua ze nanning kalan bua kae ki cih,” a cipya`ae. Te Efesa kyate sanphalung te a cceih. ²² Te aning tuh Sisaria khua kya he a thua tuh khualae lang kaethung zah kriccawbu kha a beih`ae, te Antiok lang a cceihbung. ²³ Te tuin kya azawlya a um koute Paul tuh pou zah Galati ram kyate Frikia ram kya po khuaccung zah zuitu`ae balyn kha thawzungpya`ae. ²⁴ Te Alexandria khua kya a pui paw, byaho kou apuakuh paw, Ccathyaa kou nyh paw, Apollos cikuh paw Jew paw lukheit tuh Efesa khua lang yn thua. ²⁵ Tuh-e ccungccapaw tuh Bawipaw laanpi kya thuihei paw nynh athua; muisaw kya lungthawsae paw thua zah aning nynh Bawipaw kya-e uccaw`ae kong kha ho zah hmerarihlan a ccangpya; tuhzemah Johan baptisma kong rou kha nynh a ny. ²⁶ Te aning nynh sinakok kyakhe rawhoyte yn ho vae. Akuila te Prisilla nynh a hopaw kha he a thae`ae tuh, kha-e paw kha mih kalan hoei`ae zah Pachia laanpi kha houh ahme lante a ccaesapya`ae. ²⁷ Te aning nynh Akhai ram lang po he a cceih ry tuh amaw kha lehkhan ccaw`ae cite uteno`ae nynh zuitu`ae kalan ccawzeipya`ae; te aning nynh he a thua tuh thawccinaw liate a zyn`ae paw kha patae a bawng`ae; ²⁸ pawccecize Jesu tuh Kri nynh thua cipaw kha Ccathyaa kyate langsapyate ccungccaw zapi malang Jew`ae kha rawhoy te phe a ei kho`ae.

¹ Ou tuhcihte Apollos tuh Korin khua kya a um lyakhe, Paul tuh thalang-e ram kha po yn cciakhung zah Efesa khua kya yn thua, te zuitu`ae abang kha a muih`ae. ² Te minmin kha, “He na zyn lya oh te Thyaa Muisaw na mue vae oh tou?” cite a khia`ae. Te minmin nynh, “Thyaa Muisaw a um cipaw heize kae thae boi khyh,” cite a khung`ae. ³ Te Paul nynh, “Tuhte lanze paw baptisma mou na in oh?” cite a khia`ae. Te minmin nynh, “Johan kya-e baptisma,” a ci`ae. ⁴ Oute Paul nynh, “Johan nynh tuh ngaesikunaw te asekuhpaw baptisma kha insah`ae zah amaw koute yn thua lanpaw kha a zyn`ae ccaw cite ccungccaw`ae kha a hopya`ae, tuh-e paw tuh Kri Jesu kha nynh thua,” a cipya`ae. ⁵ Minmin nynh he a thae`ae tuh, Bawipaw Jesu min kya baptismain` ae. ⁶ Te Paul nynh minmin tungvaw a kuih he a khang tuh Thyaa Muisaw minmin tungvaw yn thua; te minmin tuh bya ccangpaw te ho`ae zah profehbya a ho`ae. ⁷ Tuh-e ccungccaw`ae tuh abalynte luhaw laening loukaw acih`ae. ⁸ Te Paul tuh sinakok lungkhu lang tee zah sawpaw sathung cia Pachia peenaw te asekuhpaw uccaw`ae kong kha hokhae`ae zah soihbiate rawhoy te a ho. ⁹ Thuasalama ccungccaw abang tuh mih lungkhung zah zyn khyh`ae, ccungccaw zapi malang kha-e Ccianaw kong kha thethya he a ho`ae tuh Paul tuh minmin kyate pou zah zuitu`ae kha a poukhae`ae, te Tirannas kya-e siainn kyakhe nin takyh bya hokhae`ae. ¹⁰ Te tuhcihte kum ning cia aro, tukeiccu Asia ram kya um paw ccungccaw balyn, Jew`ae mah Greek`ae mah Bawipaw Jesu bya kha a thae`ae. ¹¹ Te Pachia nynh Paul kuih mangte acyikuh boi leipaw athungpaw ryalawnaw`ae kha a langsaku. ¹² Ou tuhte Paul a pyn kya-e pavua, tukhyhze taeccia uccaw ccangkhakheit kha ngeccih`ae kalan ccyngpah`ae zah ccinaw`ae tuh minmin kyate phe a pou, te ahoy leipaw muisaw`ae mah phe toikuh`ae. ¹³ Oute ahoy leipaw muisaw`ae adeethya`ae paw, a khia a vekuh`ae paw Jew`ae abang nynh, “Paul nynh a hopaw Jesu liate nanning kha kae dee oh,” cite ahoy leipaw muisaw`ae nynh a ccungnua`ae paw tungvaw khe Bawipaw Jesu min kha konua lan a lawku`ae. ¹⁴ Jew ranpibawi alepaw Skeva cikuh paw ccaaw`ae lusari a la um`ae, minmin nynh tuhte a cyih`ae. ¹⁵ Te ahoy leipaw muisaw nynh, “Jesu tuh ka nyh, Paul mah ka nyh, thuasalama nanning tuh hungmou na thua oh?” cite a khung`ae. ¹⁶ Te ahoy leipaw muisaw bahkuhpaw ccungccapaw nynh minmin tungvaw thohnuakuh`ae zah phe a tae`ae, te phe a risah`ae keiccu, minmin tuh kha-e inn kyate sasete ccue`ae zah vaemaw a muebia`ae. ¹⁷ Te hynh-e tuh Efesa kya um`ae paw Jew`ae te Greek`ae balyn nynh marya a ny`ae; te minmin balyn nynh rih`ae zah Bawipaw Jesu min kha phu-esah`ae. ¹⁸ Te a zyn paw ccungccaw patae oun thua`ae zah mih cyisahnaw`ae kha langsakuh`ae zah seiphykuh`ae. ¹⁹ Mitleihthya`ae paw patae nynh mah mih ccauh`ae kha marya oun ccyng`ae zah ccungccaw balyn malang khe maee te a rua`ae. Kha-e ccauh`ae mee kha tua`ae zah ngunphua thung sungpangaw mee acih cipaw a muih`ae. ²⁰ Ou tuhte Pachia bya tuh thungnaw te lethung zah a tae. ²¹ Hynh-e`ae acyikuh koute, Paul nynh Mesidonia ram te Akhai ram kha po he a khung koute Jerusalem lang ccia lan a thinlung kya noukuh zah, “Tuin kya he ka thua koute Rom khuapi mah ka muih hahe aho cih,” a ci. ²² Tukeiccu amaw ryalawpah`ae paw luning, Timote te Erastas kha Mesidonia ram lang a saw`ae, thuasalama amaw tuh Asia ram kya sosoh a umhy ung. ²³ Tuh ccyh lya tuh-e Ccianaw konglang te byalungnaw alepi apou. ²⁴ Pawccecize Demetrias cikuh paw phualaeetupaw lukheit nynh Artemis khozinung kya-e phua-inn taraw`ae kha rae zah phualaeetu`ae kha patae leih a muesah`ae. ²⁵ Tuh-e paw nynh phualaeetu`ae te tuhtahawpaw ryalah paw ccungccaw`ae kha ko`ae zah, “Ccungccaw oh, hynh-e ryalawnaw kya nynh aening muenaw tuh a um cipaw na ny oh. ²⁶ Te hynh-e Paul nynh, ‘Kuih te rae paw tuh pachia thua khyh,’ cite ho zah Efesa khua kya kyalya thua leite Asia ram balyn mah ccungccaw patae kha soih`ae zah a paleihsaku`ae paw kha na muih oh zah na thae oh. ²⁷ Ou tuhte aening phualaeepaw thyanaw hynh ccakaepaw lang yn tang cih cipaw thinphang lan a um kyalya thualeite alesaepaw khozinung Artemis kya-e tempal mah pawlangria vae lan khyh`ae zah Asia ram balynte laephipi nynh a beik`ae paw amaw phu-e lesaenaw mah yn roh cih cipaw thinphang lan a um,” cite a hopya`ae. ²⁸ Minmin nynh tuh-e bya kha he a thae`ae tuh myarya mih bungpaw zah, “Efesa`ae kya-e Artemis tuh alesaepaw nynh thua!” cite a sia`ae. ²⁹ Te khualae balyn tuh byalungnaw te phe beih zah Paul ryte khuaccungkheih`ae paw Mesidonia ccungccaw`ae Kaias te Aristarkhas kha kyng`ae zah poidonaw inn lungkhu langkhe lungngingte po a teekhae`ae. ³⁰ Te Paul nynh ccungccaw`ae kalan teebua lan he a noukuh tuh zuitu`ae nynh ua khyh`ae. ³¹ Te Asia ram kyaze lupi athua`ae paw, Paul a ruiban`ae abang nynh poidonaw inn lungkhu lang amaw te amaw a phungkuh bua khyh nawlan a kalan ccungccaw saw`ae zah a soihbiasah`ae. ³² Ccungccaw sueluakuh`ae paw tuh keisukeilae pung a um keiccuze abang nynh ccangte sia`ae zah abang nynh phinccang lante a sia`ae, alunghua tuh pawkeiccu nynh pynkheihlan kae thua cipaw mah nyh khyh`ae. ³³ Te Jew`ae nynh Alexanda kha malang toisakuh`ae zah ccungccaw zapi kyate a poukhae`ae. Alexanda nynh a kuih kha dyngpah`ae zah ccungccaw`ae kalan amaw hanlan hokunaw rae lan a ry. ³⁴ Thuasalama minmin nynh aning tuh Jew paw cipaw he a nyh`ae tuh mih balyn mawte, “Efesa`ae kya-e Artemis tuh alesaepaw nynh thua!” cite suimilan ccangning loukaw cia roi kheit lante thawte a sia`ae. ³⁵ Te khua ccazipaw nynh ccungccaw`ae kha a daesah`ae koute, “Efesa ccungccaw`ae, Efesa khua tuh alesaepaw Artemis khozinung a tempal te Zeus pachia kyate yn ccah paw zohtuh a ringtu nynh thua cipaw hynh a nyh leipaw hungmou a um? ³⁶ Hynh-e uccaw`ae kong hynh ei kho leipaw athua keiccu, daetedae lang na um oh ho zah na rangsah lan oh ccan khyh. ³⁷ Pawccecize tempal uccaw mah a luade`ae paw thua khyh zah nae khozinung mah thethyaho`ae paw athua leipaw hynh-e ccungccaw`ae hynh nanning nynh hynhlang nae thuakhae oh. ³⁸ Tukeiccu Demetrias thuasah, amaw ryte um`ae paw phualaeetu`ae nynh thuasah lukhakheit tungvaw byalungnaw a hoi`ae ze byapia zung um zah vuethoh`ae mah a um; mimaw te mimaw thuakhaekuh`ae sah. ³⁹ Thuasalama nanning nynh ccangpaw akong hory paw na hoi oh ze, aphung thyhte khuapumkunaw kya nynh byapae lanpaw athua. ⁴⁰ Pawccecize atunin e byalungnaw keiccu aening hynh byakhianaw kya oun ko cih`ae cipaw ri lan a um, pawccecize hynh-e atazae leipaw sueluakunaw hanlan aening nynh ah hoku lan oh paw oun hoi lan khyh oh,” a ci. ⁴¹ Hynhte he a ho koute a pumkuh`ae paw kha phe a pousah`ae.

¹ Tuh-e byalungnaw adae koute Paul nynh zuitu`ae kha amaw kalan ko`ae zah a beihsya`ae koute Mesidonia ram lang ccia lan a thokuh. ² Te tuh-e pee kya po cceih zah zuitu`ae kha thawzung pyanaw bya patae a hopah`ae koute Greece ram lang a thua. ³ Te tuin kya sawpaw sathung a um. Te Siria ram lang sanphalung te ccia lan vae cite he a noukuh tuh Jew`ae nynh phee lan a nounuaku`ae keiccu Mesidonia ram langte ki lan a tuaku vae. ⁴ Te Beria khua paw Sopater, Thesalonika khua paw Aristarkhas te Sekundus, Derbe khua paw Kaias te Timote, te Asia ram kya-e Taichikas te Trofimas tuh Paul kya Asia ram lang a cceihbua`ae. ⁵ Hynh-e ccungccaw`ae tuh malang la cceihty`ae zah Troas khua kyakhe kaening kha oun la ngaw`ae. ⁶ Te Ransi phing leipaw Sanlou Poi he athang koute kaening tuh Filipi khua kyate sanphalung te kae cceih zah nin pangaw cihte minmin umnaw`ae Troas khua kae thua, tuin kya nin sari kae um. ⁷ Te lonaw kyaze masaty nin kya zuitu`ae nynh sanlou ia lan pynkheihlan he oun thua`ae tuh, Paul tuh awkhualan thoku lan phe a noukuh vae keiccuze minmin kha phung hopah`ae zah ziraccyng cia po a pia. ⁸ Te minmin nynh pynkheihlan a sueluakunaw`ae palung khaan kya maeekhua patae a aw`ae. ⁹ Te Utikhas cikuh paw ccangvaepaw tuh thanlang-aw kin kya dahung zah bubu a la ngawphukuh; Paul nynh khaw cia phung he ho tuh, tuh-e paw tuh a ngawphukuh lante khaan thungnaw kyate boh ccah zah phe chihpaw kha a khuin`ae. ¹⁰ Te Paul tuh rungbung zah kha-e paw tungvaw a bakhung thing, te varyng pum zah, “Nae lungvawsaw nan sah, pawccecize a hiinnaw tuh amaw kya phang a um,” a ci. ¹¹ Te Paul tuh bua kaethung zah sanlou kha eih zah a ae`ae, te khua phe dae lang cia, khaw cia bya a ho koute phe a pou. ¹² Te minmin nynh ccangvaepaw kha a hiin te cciakhae`ae zah myarya mih ngaengan. ¹³ Te kaening tuh sanphalung kalan kae cceihty zah Assos khua kalan sanphalung te kae cceih, tuin e Paul kha hoeibua lan vae cite kae noukuh; pawccecize aning tuh ccu te ccia lan cite phe a la noukuh vae keiccu khahcihte a paccynpaw athua. ¹⁴ Aning tuh kaening ryte Assos khua kya he kae tungkuh tuh amaw kha kae hoeibua zah Mitylen khua lang kae cceih. ¹⁵ Te tuin kyate sanphalung te kae cceih zah awkhualan tuh Khios tuikoih te adekunaw kya kae thua. Te ccangpaw nin kya Samos tuikoih kya kae thua zah Trokilliam tuikoih pe kae hae-ung. Te ccangpaw nin kya Miletas khua kae thua. ¹⁶ Paul nynh Pentikos Nin kya athua kho ze Jerusalem kya phe thua lante a rangsaku keiccuze Asia ram kya khaw aro ry khyh pawte Efesa khua kha po cciakhung lante phe a tuakuty vae. ¹⁷ Te Miletas khua kyate Paul nynh Efesa khua lang ccungccaw saw zah kriccawbu kya-e pastor`ae kha a ko`ae. ¹⁸ Te minmin nynh a kalan he oun thua`ae tuh Paul nynh, “Asia ram lungkhu lang kae thua takaw nin kyate nanning ryte ka um lungkhu balyn pawcihte nynh ka um cipaw nanning nynh na ny oh, ¹⁹ zakawsangsakunaw thinlung balyn te, mitphi patae lua te, Jew`ae kya-e pheenaw keiccu ka tungvaw thua paw syntawnaw`ae kha teingbiate Bawipaw rya ka law paw kha na ny oh. ²⁰ Nae hanlan athane paw, pawsang mah ka thuru bang khyh, ccungccaw zapi kya thuasah, inn kheit koute inn kheit thuasah nanning kha kae hopah oh zah kae ccangpya oh. ²¹ Pachia kalan ngaesikunaw kong te ah Bawipaw Jesu Kri kya zynnaw kong kha Jew`ae kalan te Greek`ae kalan mah ccaekia ka khan paw kha mah na ny oh. ²² Te atu, dotua, kae tuh Muisaw liate hede ka thua zah Jerusalem lang ka cceih, tuin kya ka tungvaw paw nynh yn thua cih cipaw ka nyh khyh. ²³ Heedenawpaw te vawsaw riathaenaw nynh kamaw kha phang yn ngaw cite Thyaa Muisaw nynh khua takyh kya kamaw kong ccaekiakhan paw rou nynh ka ny. ²⁴ Thuasalama Pachia thawccinaw te asekuhpaw thehoypaw kha ccaekiakhan khylan Bawipaw Jesu kyate ka mue paw ryalaw athua paw te ka ryalaw kha lungtuate ka thang kho nawlan kha-e vawsaw riathaenaw`ae kha pawlang ka ria vae khyh zah ka hiinnaw mah ka duakuh vae khyh. ²⁵ “Te atu, kae nynh ka cceih zah Pachia peenaw kong kae hopya oh paw nanning balyn nynh ka mae hynh nae muih vae lan khyh oh cipaw ka ny. ²⁶ Tukeiccu kae tuh ccungccaw balyn chii kyate ka thya cipaw atu nin nanning kalan ccaekia ka khan. ²⁷ Pawccecize Pachia khuakhannaw balyn kha nanning kalan phy lan ka syngkuh khyh. ²⁸ Tukeiccu naemaw te naemaw raeringkuh oh lah Pachia nynh amaw a chii te a re paw Pachia kriccawbu kha dooih khylan Thyaa Muisaw nynh nanning kha dooihtu`ae lang ae khangnua oh paw tuuphu`ae balyn kha mah la raering oh. ²⁹ Pawccecize kamaw phe ka pou koute rehahanpaw suizaw`ae nynh tuuphu`ae kha haangbang leite nanning laku lang oun tee cih`ae cipaw hynh ka ny. ³⁰ Zuitu`ae kha mih kalan soih khylan ahme leipaw bya a ho paw ccungccaw`ae kha naemaw ccaccei kyate mah oun pou cih`ae. ³¹ Tukeiccu raeringkuh oh lah kum thung lungkhu khuazi khuadae mitphi ryte ccungccaw miakaw kha raeringpya lan ka dae khyh paw kha la ning nan oh. ³² “Te uteno`ae, atu nanning kha Pachia kalan te amaw thawccinaw bya kalan kae ah oh; tuh-e nynh nanning kha ae lethungsah kho oh zah thyaasah athua vae`ae paw balyn ryte nanning kha rho uccaw ae pya kho oh. ³³ Kae tuh hung ccungccaw kya-e phua, sui, uccaw`ae mah ka dua bang khyh. ³⁴ Athua, hynh-e ka kuih`ae nynh kamaw elan ahoboupaw hanlan te kamaw ryte um`ae paw hanlan ryalawpya cipaw naemaw ccaccei nynh phe na ny oh. ³⁵ Hynh hawte ryalaw lawte thawzungzya`ae paw kha nanning nynh na bawng oh aho cipaw nanning kalan marya kae langsapya vae oh. Te, ‘Mue paw laeze pya paw nynh hythua a um hua,’ cite Bawipaw Jesu nynh a hopaw bya kha la liathui oh,” cite Paul nynh a hopya`ae. ³⁶ Te tuhte he a ho koute a ccukharutung zah minmin balyn ryte sawsang`ae. ³⁷ Te minmin balyn tuh thawmawte rah`ae zah Paul a nging kha pum`ae zah a myng`ae, ³⁸ amaw mae kha nae muih vae lan khyh oh cite a hopaw bya keiccu mih ngae houh athah. Te Paul kha sanphalung kyacia a dohaw`ae.

¹ Ou tuhcihte minmin ryte kae phiakuh koute sanphalung te kae cceih, dingrarihlan kae cceih zah Kos tuikoih kya kae thua, awkhualan tuh Rhodes tuikoih kya kae thua, te tuin kyate Patara khua kya kae thua. ² Te Finisia ram lang cceih paw sanphalung kha kae muih zah kae ccikuh bua zah kae cceihbua. ³ Saiparas tuikoih kha he kae muih tuh voilang khe kae cciataw zah Siria ram lang kae cceih zah Tai khua kya a hae-ung, pawccecize sanphalung nynh a phupaw uccaw kha tuin kya saw lan a cih. ⁴ Te zuitu`ae kha kae muih`ae zah tuin kya nin sari kae um. Jerusalem lang a cciathung khyh nawlan minmin nynh Paul kha Muisaw liate a hopya`ae. ⁵ Te nin sari he aro te kae pou zah he kae cceih tuh minmin balyn nynh mih zu mih ccaaw`ae ryte khua khunglang cia oun dohaw`ae. Te rili kin kya ccukharutungte saw kae sang. ⁶ Lukheit koute lukheit kae beihkuhsya zah kaening tuh sanphalung vawlan kae kae, te minmin tuh inn lang a ki`ae. ⁷ Te Tai khua kyate kae khuaccungpaw he kae thangsah tuh Tolemai khua kya kae thua, te uteno`ae kha kae beih`ae zah minmin ryte nin kheit kae umkheih. ⁸ Te awkhualan nin kya Paul ryte kae pou zah Sisaria khua kya kae thua, te evangelist lusari kyaze lukheit athua paw Filip inn lungkhu lang kae tee zah amaw ryte kae um. ⁹ Tuh-e paw nynh profehbya ho`ae paw liaccady ccanung lu pali a hoi. ¹⁰ Te tuin kya nin patae kae um tuh Akabus cikuh paw profeh lukheit Judah ram kyate yn thua. ¹¹ Te kaening kalan he yn thua tuh Paul kya-e taesung kha lawkuh zah a kuih te a ccu kha heekuh zah, “ ‘Hynh-e taesung a hoi paw ccungccapaw hynh Jerusalem kya Jew`ae nynh hynh hawte a khii cih`ae zah Zenta`ae kuih kalan a ah cih`ae,’ cite Thyaa Muisaw nynh a ho,” a ci. ¹² Te tuh-e bya tuh he kae thae tuh kaening ry tuh-e hmin kya um`ae paw ry, Jerusalem lang a ccia khyh nawlan Paul kha kae soihbia. ¹³ Oute Paul nynh tho zah, “Pawccemou na rah oh zah ka thinlung nae koisah oh? Bawipaw Jesu min hanlan Jerusalem kya khiiku lanpaw kyalya thua leite chi lan heize paccynkute ka um,” a ci. ¹⁴ Te hopya kho he a um khyh tuh kaening tuh zya kae dae zah, “Bawipaw rynaw thyhte thua vae sah,” kae ci. ¹⁵ Tuh-e koute kae uccaw`ae kha kae lawkuh zah Jerusalem lang kae cceihthung. ¹⁶ Sisaria khua e zuitu`ae abang mah kaening ryte a cceihbua`ae, te minmin nynh kaening kae thua cihnaw Mnason cikuh paw Saiparaspaw, a kum tang vae paw zuitu kha oun hoeibua`ae. ¹⁷ Te Jerusalem kya he kae thua tuh uteno`ae nynh lungtuate leh oun khan`ae. ¹⁸ Awkhualan Paul tuh kaening ryte James kalan cceihbua zah kriccaw piccang`ae balyn a la um`ae. ¹⁹ Te Paul nynh minmin kha beih`ae zah amaw a ryalawnaw liate Pachia nynh Zenta`ae laku a cyipaw kha marya a hopya`ae. ²⁰ Te minmin nynh tuh-e he a thae`ae tuh Bawipaw kha phu-esah`ae, te Paul kha, “Kae neitaw, a zyn paw Jew`ae milu athung asang hozeih nynh a um`ae cipaw kha na muih, te minmin balyn tuh Kawbya kalan a zuakuh`ae paw nynh thua`ae. ²¹ Te Zenta`ae laku um`ae paw Jew`ae balyn nynh mih ccaaw`ae vindung aw ho vae khyh, aphung thyhte mah zui ho vae khyh cite na cipah`ae zah Mawsi kawbya kha vua khylan na ccangpya`ae cipaw na kong kha minmin nynh phe a thae vae`ae. ²² Tukeiccu pawte cyi lan? Ccungccaw zapi tuh oun sueluakuh mamin cih`ae, pawccecize nang na thua cipaw kha phe a thae cih`ae. ²³ Tukeiccu hynh-e nang kae hopya paw hynh cyih. Byakinkunaw phe a rae vae`ae paw ccungccaw lupali kae hoi`ae. ²⁴ Minmin kha cciakhae`ae lah minmin ryte ccikankuh oh, mih sang a ngoku ccaw`ae amee kha la pyapah`ae; ou tuhte ccungccaw`ae balyn nynh na konglang a thae`ae paw kha accakaepaw nynh thua cipaw a ny ccaw`ae, te namaw mah kawbya na zui zah kawbya thyhte na um cipaw kha oun nyh cih`ae. ²⁵ Thuasalama a zyn paw Zenta`ae konglang tuh khahtahawpaw kha zui ho khyh, zohtuh kalan silawnaw`ae paw, chii, ngingmae te chia paw te ohhuakunaw kyate rou nynh mimaw te mimaw kha a sungku`ae aho cite ccaw kae zei zah bya phe kae pae vae`ae,” cite a hopya`ae. ²⁶ Oute Paul nynh kha-e ccungccaw`ae kha a cciakhae`ae, te awkhualan khe minmin ryte amaw kha a ccikankuh koute, ccikankunaw nin tuh phe accing vae cipaw kha thaesah khylan`ae tempal lungkhu lang a tee, tuh-e ccyh kya nynh minmin lu raveih hanlan silawkunaw tuh rae lanpaw athua. ²⁷ Te nin sari vyavya he acihte Asia ram kyate oun thua`ae paw Jew`ae nynh Paul kha tempal kya he muih`ae tuh ccungccaw`ae balyn kha hy`ae zah a kyng`ae, ²⁸ “Israel ccungccaw`ae oun bawng oh, hynh-e paw tuh ah ccungccaw`ae kha thuasah, Kawbya kha thuasah, te hynh-e hmin kha thuasah, rawsete ahmin takyh kya ccungccaw balyn kha a ccangpah paw nynh thua, te tuhlaeze Greek`ae kha mah tempal lungkhu lang teekhae`ae zah hynh-e athyaapaw hmin hynh phe a thusah vae,” cite a sia`ae. ²⁹ (Pawccecize langmaw lya khua lungkhu khe Paul ryte Efesa khuapaw Trofimas kha minmin nynh muih`ae zah kha-e paw kha tempal lungkhu lang Paul nynh a teekhae cite a tua`ae keiccu nynh thua). ³⁰ Khualae balyn ngaluinngaluin accae; te ccungccaw`ae nynh pynkheihlan oun ccue`ae zah Paul kha kyng`ae zah tempal voidu kyate po poukhae`ae, te vaekheihmawte thuakaw`ae kha phe a khaw`ae. ³¹ Te minmin nynh Paul kha chia lan cite a nounuaku`ae lyakhe Jerusalem khua balyn kya byalungnaw a um cipaw thungpang kha rhawkaw thungkheit uk paw rhawbawipaw nynh he a thae tuh, ³² rhawkaw`ae te rhawkaw zakheit uktupaw rhawbawi`ae kha arangte ko`ae zah minmin kalan a ccuenua bung`ae. Te minmin nynh rhawbawipaw te rhawkaw`ae kha he muih`ae tuh Paul kha bua vae khyh`ae. ³³ Oute rhawbawipaw nynh Paul pe langkhe cceih zah a kyng, sivarui ccangning te khii lan kawpya`ae; te aning tuh hungmou, pawmou a cyi cipaw kha a khia`ae. ³⁴ Te ccungccaw zapi laku abang nynh ccangte sia`ae zah abang nynh ccanglang te a sia`ae keiccu, rhawbawipaw nynh accaccingpaw kha a ny kho khyh keiccuze Paul kha rhawkaw inn lungkhu lang phang oh cite kawpya`ae. ³⁵ Te nawkui kya he a thua tuh ccungccaw`ae myarya so`ae keiccuze rhawkaw`ae nynh Paul kha hang`ae zah a cciakhae`ae. ³⁶ Pawccecize ccungccaw zapi nynh, “Theih oh!” cite sia`ae zah a zuibia`ae. ³⁷ Te rhawkaw inn lungkhu lang teedyn khe Paul nynh, “Nang kha bya kae hopya ze?” cite rhawbawipaw kha a khia. Rhawbawipaw nynh, “Greek bya na hothya tou? ³⁸ Nang hynh anuhlang lyaze ccungccaw na rawse zah damiah thung pali kha rangkaw lang a cciakhae paw Izip ccungccapaw kha na thua khyh tou?” cite a khia. ³⁹ Thuasalama Paul nynh, “Kae tuh Silisia ram, Tarsuh khua kya a pui paw Jew paw nynh ka thua, anyaa leipaw khuapi kya um paw nynh ka thua, e ccungccaw`ae kalan byahonaw kaw yn pyabua, kae ngiaku,” a cipya. ⁴⁰ Rhawbawipaw nynh kaw pya zah Paul tuh nawkui vawlan thadyn zah ccungccaw`ae kha a kuih te syntawnaw a pya`ae. Te khaw cia daebabilan he a um`ae te Paul nynh Hebru bya te hynhte a ho:

¹ “Uteno`ae te paaw`ae, nanning kalan atu ka thungkhawkunawpaw bya hynh la ngaetua oh,” a ci. ² Te Hebru bya te a ho paw kha minmin nynh he a thae`ae tuh houh daebabilan a um`ae. Te Paul nynh, ³ “Kae tuh Silisia ram Tarsuh khua kya a pui paw Jew ccungccaw nynh ka thua, tuhzemah hynh-e khua kya ka lethung zah Kamaliel ccu leihpaw kya paaw`ae kawbya phung thyhte phe ccing lan a ccangpya`ae paw te atunin nanning balyn hawte Pachia kalan myarya a zuakuhpaw nynh ka thua. ⁴ Pise mah nopi mah ka hee`ae zah thunginn lungkhu lang ka saw`ae; hynh-e Ccianaw kha chinaw phe phah lang cia ka tua ka sah. ⁵ Tuhte ranpibawi lupi te piccang`ae phu balyn mah kae ka ccaekia`ae nynh thua`ae, minmin kyate uteno`ae kalan a ky`ae paw ccaw kha kae mah ka ccyng zah Damaskas khua kya um`ae paw, kha-e beiknaw a beik`ae paw kha detah khylan sivarui te hee lan`ae zah Jerusalem lang ky lan`ae cite Damaskas lang ka cceih. ⁶ “Ou tuhte kae tuh khua ka ccung zah Damaskas khua lang vyavya ka thuadyn, ninthuccyng loukaw khe, vaawran kyate alepipaw awnaw tuh vaekheihmawte ka pepan khe phae yn aw. ⁷ Te kae tuh laephi kalan ka khuliakuh zah, ‘Saul, Saul, pawccemou nang nynh kamaw hynh nae tua nae sah?’ cite a hopaw roi kha ka thae. ⁸ Te kae nynh, ‘Bawipaw, nang tuh hungmou?’ cite ka khung. Te aning nynh, ‘Kae tuh nang nynh na tua na sah paw Nazareth paw Jesu nynh ka thua,’ yn cipya. ⁹ “Te kamaw ryte a cceihbua`ae paw nynh awnaw kha phe muih bua ccaccing`ae zah a rih`ae, thuasalama ka kalan bya ho paw kha-e paw roi kha minmin nynh thaebua khyh`ae. ¹⁰ Te kae nynh, ‘Bawipaw, pawmou ka cyih cih?’ ka ci. Te Bawipaw nynh, ‘Thokuh lah Damaskas khua lungkhu langkhe cceih, tuin kya na cyi lanpaw balyn kha ae hopah cih`ae,’ yn cipya. ¹¹ Te tuh-e awnaw phu-enaw keiccuze kae tuh ngaw he ka muih kho khyh tuh, kamaw ryte a cceihbua`ae paw nynh mih kuih te oun cciakhae`ae zah Damaskas khua lungkhu lang ka thua. ¹² “Te tuin kya um`ae paw Jew`ae balyn nynh thehoyccousah`ae paw, Kawbya thyhte kou a zuakuhpaw ccungccapaw Ananias nynh, ¹³ ka kalan yn thua zah ka pe thadyn zah, ‘Ka neitaw Saul, ngawmuih ccavae,’ yn cipya. Tuh-e suimilan ccyh kya amaw kha ka dothung zah ka muih. ¹⁴ Te aning nynh, ‘Nang nynh Pachia rynaw kha na ny nawlan, te Midingpaw kha na muih nawlan, te amaw khalang kya-e roi kha na thae nawlan cite ah minpaaw`ae Pachia nynh nang kha phe ae po vae. ¹⁵ Pawccecize na muih paw te na thae paw kha ccungccaw`ae balyn kalan ho lan nang tuh amaw ccaekia na thua cih. ¹⁶ Te atu pawccemou phang na ngaw? Thokuh lah baptismain, te Bawipaw min kha kote na seinaw`ae kha la singkuh,’ yn cipya. ¹⁷ “Ou tuhcihte Jerusalem lang bua ka ki zah tempal voidu lungkhu kya saw ka sang cciamang lyakhe, kae tuh phe ka la ngawphukuh zah, ¹⁸ kamaw kha, ‘Rangsakuh lah Jerusalem kyate arangte pou; pawccecize kamaw konglang nang nynh ccaekia na khan paw kha minmin nynh lehkhan lan khyh`ae,’ cite yn hopatupaw kha ka muih. ¹⁹ Te kae nynh, ‘Bawipaw, nang ae zyn`ae paw kha sinakok miakaw kya ka bua`ae zah thung ka saw`ae cipaw kha minmin nynh a ny`ae. ²⁰ Te namaw e sawlangchia athua paw Stifen a chii lua lyakha kae mah a pe ka thadynbua zah a chinaw kya ka nawccahbua, te amaw theih`ae paw mih uccaw`ae kha a ngawpah`ae paw nynh ka thua,’ ka ci. ²¹ Te aning nynh, ‘La cceih; pawccecize nang kha Zenta`ae kalan e kyate asawnaw lang kae saw cih,’ yn cipya,” cite Paul nynh a ci. ²² Te minmin nynh kha-e bya kha he a ho cia a ngaepya`ae, oute mih roi saw`ae zah, “Tuhtahawpaw ccungccaw tuh laephi kyate ccaring vua oh; pawccecize aning tuh hiin lan ngaekuh khyh!” a ci`ae. ²³ Ou tuhte minmin nynh a sia`ae, mih uccaw phaekuh`ae zah vuiping kha he a theithung`ae tuh, ²⁴ rhawbawi lupi nynh Paul kha pawccemou tuhte a sianua`ae cipaw ny khylan, rhawkaw-inn lungkhu lang phang oh lah ziabua te byakhia thuasah cite kaw a pya`ae. ²⁵ Te minmin nynh saphuarui te he a hee`ae tuh Paul nynh a pe a thadyn paw rhawbawipaw kha, “Rom ccungccaw athua paw te seibe lan um leipaw ccungccaw hynh nanning nynh ziabua lan accan tou?” a cipya. ²⁶ Tuh-e tuh rhawbawipaw nynh he a thae tuh cceih zah rhawbawi lupi kha, “Na cyi dyn khe raeringkuh vae lou; pawccecize hynh-e paw tuh Rom ccungccapaw nynh athua,” cite a hopya. ²⁷ Oute rhawbawi lupi nynh yn cceih zah Paul kha, “Nang hynh Rom ccungccapaw na thua tou? Oun hopah,” a cipya. Paul nynh, “Ka thua,” a ci. ²⁸ Te rhawbawi lupi nynh, “Phua patae pyate nynh kae tuh Rom ccungccawthuanaw hynh ka mue,” a ci. Te Paul nynh, “Thuasalama kae tuh puinaw kyate nynh ka mue,” a ci. ²⁹ Oute Paul kha byakhia lan acih`ae paw tuh a kyate vaekheihmawte phe pou`ae; te aning tuh Rom paw nynh athua cipaw kha thuasah, te amaw a khiidepaw kha thuasah rhawbawi lupi nynh he a nyh tuh a rih vae. ³⁰ Awkhualan, Jew`ae nynh pawkeiccumou Paul kha seibe`ae cipaw phe ria lan a ny ry keiccuze rhawbawi lupi nynh Paul kha supah zah alepaw ranpibawi`ae te kungsi`ae balyn kha tungku lan kawpya`ae, te Paul kha cciakhae bung zah mih malang khe a nung.

¹ Te Paul nynh kungsi`ae kha rirido`ae zah, “Uteno`ae kae tuh atunin cia Pachia malang mawtemaw nykunaw thinlung ahoypaw te nynh ka hiin,” a ci. ² Te ranpibawi lupi Ananias nynh Paul a mung kha bua oh cite a pe thadyn`ae paw kha kawpya`ae. ³ Oute Paul nynh, “Arawpaw sithuh`ae paw lungrua! Pachia nynh nang kha ae bua vae cih. Pawccecize nang tuh kae kha Kawbya thyhte byapia lan khaw na dahung, te Kawbya te arawsekuh lante kae kha bua lan kaw na pya`ae tou?” a ci. ⁴ Te a pe thadyn`ae paw nynh, “Nang nynh Pachia kya-e ranpibawi lupi kha na sang tou?” a ci`ae. ⁵ Oute Paul nynh, “Uteno`ae, aning tuh ranpibawi lupi cipaw ka nyh khyh; pawccecize, ‘Na ccungccaw`ae uktupaw kha a thethya na ho lan khyh,’ cite azeikuh,” a ci. ⁶ Thuasalama tuh-e`ae kya phu kheit tuh Sadusi`ae thua zah ccangpaw phu tuh Farasi`ae nynh thua cipaw kha Paul nynh he a nyh tuh, “Uteno`ae, kae tuh Farasipaw nynh ka thua, Farasipaw ccapaw nynh ka thua, a chih`ae paw thothuinaw te ngaehoinaw kong keiccu nynh kae tuh byapia ka thua,” cite kungsi`ae kyakhe thawte a sia. ⁷ Ou tuhte he a ho tuh Farasi`ae te Sadusi`ae laku byaeikunaw yn pou zah ccungccaw zapi tuh phe phiakuh`ae. ⁸ Pawccecize Sadusi`ae nynh tuh thothuinaw um khyh, vaaw ccungccaw um khyh, muisaw mah um khyh a ci`ae; thuasalama Farasi`ae nynh tuh paryh a um a ci`ae. ⁹ Te siaruanaw pipi yn pou. Te Farasi`ae kalan a pang`ae paw kawbya ccangpatu`ae nynh thokuh`ae zah thawte a ei`ae: “Hynh-e paw kya a seipaw kharyh kae muih khyh. Muisaw nynh thuasah, vaaw ccungccaw nynh thuasah a kalan byahopya lan thua ze, Pachia hynh rawsete dou nan oh sih,” a ci`ae. ¹⁰ Te thawmawte eikunaw he a um tuh, ccungccaw`ae nynh Paul kha oun sue cih`ae zah phe oun paethungku cih`ae cite rhawbawi lupi nynh a thinphang keiccuze rhawkaw`ae kha cciabung lan te minmin laku kyate Paul kha thawte poukhae lan zah rhawkawinn lungkhu lang teekhae lan kaw a pya`ae. ¹¹ Te awkhualan khuazi kya Bawipaw nynh Paul pe khe thadyn zah, “Paul, na thawmuin sah; pawccecize Jerusalem kya kamaw kong ccaekia na khan hawte Rom khuapi kya mah ccaekia na khan ung cih,” a cipya. ¹² Te khua he adae tuh Jew`ae abang nynh aphu te um`ae zah, “Aening nynh Paul kha ah chia mawlaezung oh ae lei lan zah tui mah nia lei lan,” cite mimaw te mimaw kha thyalawkute byakanku`ae. ¹³ Tuh-e pheenaw a rae`ae paw ccungccaw`ae tuh milu sungpali lae acih`ae. ¹⁴ Te minmin nynh alepaw ranpibawi`ae te piccang`ae kalan oun thua`ae zah, “Paul kae chia makhia pawsang mah kae ae lan khyh cite kaemaw te kaemaw thyalawkute bya phe kae kanku vae. ¹⁵ Tukeiccu awkhualan rhawbawi lupi nynh Paul kha nanning kalan yn cciakhae ccaw, amaw kha houh aria lan byakhia aho vae cih paw olante oun cih oh lah, nanning nynh kungsi`ae ryte rhawbawi lupi kha oun hopah oh; te Paul tuh nanning kalan yn thua maw khe kaening tuh amaw kha chia lan paccynkute kae um vae,” cite a hopya`ae. ¹⁶ Te Paul a ccianung ccapaw nynh kha-e minmin nynh a buih`ae paw kong kha he a thae tuh cceih zah rhawkaw-inn lungkhu lang tee zah Paul kha phe a hopya. ¹⁷ Oute Paul nynh rhawbawi lukheit kha ko zah, “Hynh-e ccangvaepaw taraw hynh rhawbawi lupi kalan la cciakhae, pawccecize amaw kha a hopya lanpaw uccaw a um,” a cipya. ¹⁸ Tukeiccu rhawbawipaw nynh kha-e ccangvaepaw kha rhawbawi lupi kalan cciakhae zah, “Thungccahpaw Paul nynh kae kha a kalan yn ko zah, nang na kalan ccangkheit hopya lanpaw a hoi paw e ccangvaepaw hynh na kalan beih la cciakhae cite yn naw,” a cipya. ¹⁹ Oute rhawbawi lupi nynh ccangvaepaw tuh a kuih te kyng zah a makhaete zya cciakhae zah, “Pawmou hopya lan nae ry paw tuh?” cite a khia. ²⁰ Te aning nynh, “Nang nynh awkhualan Paul kha kungsi`ae kalan nae cciakhae ccaw cite, Jew`ae nynh Paul kha houh aria lan byakhia aho ung paw olante namaw kha ngia lan cite mih naw phe accah vae`ae. ²¹ Thuasalama nang nynh minmin kha ngaepah nan`ae; pawccecize Paul kha kae chia mawlaezung ae paw kae ae lan khyh zah tui kae neih lan khyh cite mimaw te mimaw thyalawkute byakankuh`ae paw Jew`ae sungpali lae nynh Paul kha phang a buih vae`ae; te na kyate byakinpyakupaw kha ngaw`ae zah atu paccynkute a um vae`ae,” a cipya. ²² Tukeiccu rhawbawi lupi nynh ccangvaepaw kha pousah zah, “Hynh-e uccaw nae hopya cipaw hynh hung ccungccaw sanmah la hopah nan vae lou,” cite byatawsya. ²³ Te aning nynh rhawbawi`ae luning kha ko`ae zah, “Sisaria khua lang ccia lan rhawkaw zaning te marang ccikuhpaw sungsari te ccoi kyng`ae paw zaning kha atu awkhua suimilan ccangthungnaw kya pou lan paccyn oh. ²⁴ Te Paul a cciku lanpaw saring kha khangpah oh lah ram uktu Felik kalan khyndadyhlan cciakhae oh,” cite a hopya`ae. ²⁵ Te aning nynh hynhcihte ccaw ccangkheit a zei: ²⁶ “Klaudias Lysias nynh, ahoy huaccepaw ram uktu Felik, nang kha kae beihlang. ²⁷ Hynh-e ccungccapaw hynh Jew`ae nynh kyng`ae zah chia lan vae cite he a nouku`ae lyakhe; aning tuh Rom ccungccapaw nynh thua cipaw kae nynh ka ny pawte, rhawkaw`ae ryte kae cceih zah amaw hynh kae luesah. ²⁸ Te pawkeiccumou minmin nynh amaw hynh seibe`ae cipaw ka ny ry pawte, amaw hynh kungsi`ae kalan ka thuakhae. ²⁹ Chi lan accanpaw seinaw, thungsaw lan accanpaw seinaw keiccu seibe`ae paw thua leite, mimaw kawbya te asekuhpaw byakhianaw`ae keiccu nynh seibe`ae cipaw kha ka ny. ³⁰ Te Jew`ae nynh e paw hynh phang a buih`ae cipaw kha he oun hopah`ae tuh, na kalan palou kae ky zah amaw seibetu`ae kha mah paw kong nynh seibe`ae cipaw na malang a la ho ccaw`ae cite kaw kae pya`ae. Ngedan te,” cite ccaw a ky. ³¹ Oute rhawkaw`ae tuh kawpya athua hawte Paul kha thua`ae zah khuazi khe Antipatris khua lang a cciakhae`ae. ³² Awkhualan marang ccikuh paw ccungccaw`ae kha Paul ryte ccia lan cciataw`ae zah mimaw tuh rhawkaw-inn lang phe a ki`ae. ³³ Te marang ccikuh`ae paw nynh Sisaria khua kya he thua`ae tuh ram uktu kalan ccaky kha a pya`ae; Paul kha mah a malang khe a ah`ae. ³⁴ Te ram uktu nynh ccaky kha he a ria koute paw pee kya-e mou na thua cite Paul kha a khia. Te aning tuh Silisia pee kya-e paw cipaw he a nyh tuh, ³⁵ “Nang sei ae betu`ae paw he oun thua`ae te na kong tuh ka thae cih,” a cipya. Te Paul kha Herod Byapianaw Khaan kya ngaw lan kawpya`ae.

¹ Te nin pangaw acih koute ranpibawi lupi Ananias tuh piccang`ae ry, Tertullas cikuh paw byahothya paw ryte Sisaria khua lang a cceihbung`ae; minmin nynh Paul kha rawsete ram uktu kha a hopya`ae. ² - ³ Te Paul kha he a ko`ae te Tertullas nynh tho zah hynhte seibe: “Aphu-e huapaw Felik, namaw liate nynh kaening tuh alepipaw daenaw kha kae mue zah malang elan na muih khonaw liate nynh hynh-e minphuin tuh kaethungnaw a um cipaw kha muihte, ahmin takyh kya balyn lungtuabya hote kha-e kha kae ccou. ⁴ Tuhzemah na hanlan ngaemyng phe um paw ka thua khyh nawlan adynnaw te kae ho cih paw bya hynh lungsaenaw te nae la ngaepya nawlan kae ngiaku. ⁵ Pawccecize Nazareth`ae beiknaw phu kya cciakhaetu lang tang zah laephipi ahmin takyh kya Jew`ae balyn kha phiakunaw rae lan a hytupaw hynh-e ccungccahoy leipaw hynh kaening nynh kae muih. ⁶ Aning tuh tempal thethyasah lan a zuakuhpaw nynh thua, te kaening nynh kae kyng zah kaemaw kawbya thyhhawte byapia lan kae ry. ⁷ Thuasalama rhawbawi lupi Lysias nynh rhawkaw`ae ryte oun thua`ae zah kae kuih kyate po cciakhaede zah, ⁸ amaw seibetu`ae kha na kalan ccia lan kaw oun pya; te amaw hynh akaw-aleih bya nae khia cih zah kaening nynh sei kae benawpaw balyn tuh namaw marya phe nae nyh kho cih,” a cipya. ⁹ Te Jew`ae nynh mah tuh-e bya`ae tuh thanccingpaw nynh thua cite nawccawkhae`ae. ¹⁰ Oute ram uktu nynh Paul kha bya ho lan kuih te syntawnaw a langsapah koute Paul nynh, “Nang tuh hynh-e minphuin kya kum patae cia byapiatu na thua paw ka ny pawte kamaw hanlan lungpaw thawmuinte ka hokuh ngan, ¹¹ pawccemacize Pachia beik khylan Jerusalem lang ka cciathung paw hynh nin haw laening rou nynh aro ung cipaw phang na nyh mamin cih. ¹² Tempal voidu lungkhu hung ccungccaw te sanmah kae eikupaw minmin nynh oun muih boi khyh`ae, sinakok kya thuasah, khua lungkhu thuasah ccungccaw`ae keisukeilae um lan mah ka hy`ae paw oun muih boi khyh`ae. ¹³ Atu minmin nynh kamaw sei oun be`ae paw mah ccaekia langsakuh kho lan khyh`ae. ¹⁴ Thuasalama minmin nynh ahme leipaw ccangpyakunaw a ci`ae paw Ccianaw thyhte kae paaw`ae Pachia kha kae nynh ka beik cipaw na malang vuan ka khanku. Kawbya kya azeikuh paw te Profeh`ae ccauh kya azeikuh paw balyn kha ka zyn. ¹⁵ Te adingpaw te ading leipaw paryh chinaw kyate thothuinaw a um vae cih cite minmin nynh a ngaehoi`ae hawte kae mah Pachia kya ngaehoinaw a hoi paw nynh ka thua. ¹⁶ Hynh-e keiccu, Pachia malang thuasah, ccungccaw`ae malang thuasah aluepaw cyiseinaw um leite mawtemaw nykunaw thinlung ka hoi kho nawlan thawte pei ka zuakuh. ¹⁷ “Kum patae aro koute, atu ka minphuin`ae kalan ryachi`ae bawngnawpaw te Pachia kalan hlupaw ccyng khylan nynh kae tuh kae thua. ¹⁸ Khahlya tempal voidu lungkhu kya ka ccikankupaw kha Asia ram kyate oun thua`ae paw Jew`ae abang nynh phe oun muih`ae, ccungccaw zapi um khyh, keisukeilae um paw mah um khyh. ¹⁹ Minmin nynh kamaw kya seibe lanpaw a um lanze na malang ccaccei oun be lan`ae paw nynh thua. ²⁰ - ²¹ Tukhyhze, kae kungsi`ae malang ka thadyn lyakha, minmin laku ka thadyn zah, ‘A chih`ae paw thothuinaw konglang te nynh kae tuh atunin nanning nynh akaw-aleih bya nae khia oh paw athua,’ cite ka sia paw bya kawkheit laelan, ahoy leipaw ccangkhakheit ka cyipaw ka tungvaw a muih`ae lanze, atu hynh-e kya a um`ae paw nynh hotua`ae sah,” cite Paul nynh a ci. ²² Tuh-e bya`ae kha Felik nynh he a thae tuh, tuh-e Ccianaw kha houh a nyhthya paw athua thyhhawte, kha-e kha nungbia ung zah, “Rhawbawi lupi Lysias yn thua te nynh nae bya hynh kae pia ung cih oh,” a cipya`ae. ²³ Te Paul kha ring khylan te luenaw pya khylan, te a ruiban`ae nynh ccangkhakheit cyipya lanpaw khyh ze a kalan paebua lanpaw kha a khee khyh nawlan rhawbawipaw kha kaw a pya. ²⁴ Te nin sosoh aro koute, Felik tuh Jew nopinung athua paw a zu Drusilla ryte he oun thua`ae tuh Paul kha a kosah`ae, te Kri kya zynnaw konglang bya kha a ngae. ²⁵ Te Paul nynh dingnaw kong, mawtemaw sungkunaw kong te yn thua vae cih paw byapianaw kong kha he a hopah`ae tuh Felik tuh rih zah, “Atu tuh la ki hin, accanthyapaw ccyh he kae mue te bua kae ko cih,” cite Paul kha a cipya. ²⁶ Aning nynh yn luesah ccaw cite Paul nynh phua yn pya be mah cite a ngaehoi keiccuze Paul kha pei leih kosah`ae zah bya leih hokhae. ²⁷ Thuasalama kum ning acih koute Porsias Festas nynh Felik ryalaw kha a mue; te Felik nynh Jew`ae lunghoynaw a rae ry pawte Paul kha thungsawsya.

¹ Festas tuh tuh-e pee kalan he a thua te, nin thung acih koute Sisaria kyate Jerusalem lang a cceihthung. ² Oute ranpibawi lupi te Jew`ae kyaze piccang lupi`ae nynh Paul kha rawsete bya hopya`ae. ³ Minmin nynh Paul kha laanpi kya buih lan zah chia lan cite a paccynku`ae keiccuze Jerusalem lang bua yn sawpya ccaw cite thohkhannaw a ngiaku`ae. ⁴ Thuasalama Festas nynh, “Paul tuh Sisaria kya nynh thunginn kya a um, te kamaw mah aro mawze tuhlang ka cceih vae cih. ⁵ Tukeiccu nanning lakuze a cceihbua khopaw nynh kamaw ryte cceihbua oh lah Paul kya seinaw a um lanze sei na be cih oh,” cite a khung`ae. ⁶ Te minmin ryte nin haw lae he a um koute Sisaria khua lang a cceihbung. Te awkhualan tuh byapianaw tungkhung vawlan dahung zah Paul kha oun cciakhae`ae sah cite kawpya`ae. ⁷ Te Paul he yn thua tuh Jerusalem kyate oun thua`ae paw Jew`ae nynh a pe khate koihlu`ae zah ccaekia a langsaku kho lei`ae paw, alepaw seinaw patae kha Paul tungvaw a khang`ae. ⁸ Paul nynh a hanlan khungkuh zah, “Kae tuh Jew`ae kawbya kya mah ka sei khyh, tempal voidu lungkhu kya mah ka sei khyh, Sizar siapharan kya mah ka sei khyh, pawpaw kya sanmah ka sei khyh,” a ci. ⁹ Thuasalama Festas nynh Jew`ae lunghoynaw a rae ry pawte, Paul kha, “Jerusalem lang cciathung lan zah tuin kya hynh-e`ae kong ka malang byapiaku lan na ry tou?” cite a khia. ¹⁰ Oute Paul nynh, “Kae tuh Sizar kya-e byapianaw tungkhung malang nynh ka thadyn, tuin kya nynh byapia lan mah ka ccan; namaw nynh hoyte phe na ny thyhhawte Jew`ae kya pawsang ka seinaw um khyh. ¹¹ Kae tuh a seipaw ka thua ze, tukhyhze chi lan ccangpaw seinaw ka rae lanze, chi lan ka eikuh lan khyh; thuasalama hynh-e`ae nynh sei yn be`ae paw tuh kharyh akyh khyh lanze, hung nynh sanmah kae hynh minmin kalan yn ah kho khyh`ae. Sizar kalan azu ka khan,” a ci. ¹² Oute Festas nynh kungsi`ae ryte phe a hokuh`ae koute, “Nang tuh Sizar kalan ii azu na khan? Sizar kalan sou na la cceih cih,” a cipya. ¹³ Te nin sosoh aro koute, Siapharan Akrippa te a zu Bernis tuh Festas kha beih khylan Sisaria khua lang oun thua`ae. ¹⁴ Te minmin tuh tuin kya khaw um`ae koute Festas nynh Paul konglang kha siapharan kalan hynhte a hopya: “Felik nynh thungsawsya paw ccungccapaw lukheit a um. ¹⁵ Kae Jerusalem kya ka um lya alepaw ranpibawi`ae te Jew piccang`ae nynh kha-e paw kong kha oun hopah`ae zah amaw kha rawsete byapia lan oun ngia`ae. ¹⁶ Kae nynh, ‘Seibe`ae paw ccungccaw tuh seibetu`ae ryte hawiliakute a tungku`ae maw, te a tungvaw seibe`ae paw konglang a hoku maw tuh hunghung zemah ronaw kalan ah thua lan khyh cite Rom`ae phung a um,’ cite ka khung`ae. ¹⁷ Tukeiccu minmin nynh hynhlang he oun thua`ae te aro lei lante, awkhualan kya kae tuh byapianaw tungkhung vawlan ka dahung zah tuh-e paw kha thuakhae lan kaw ka pya`ae. ¹⁸ Amaw kha rawsete seibetu`ae nynh thadyn`ae zah kae nynh ka tua paw seibenaw kha ccangkheit san thuakhae khyh`ae. ¹⁹ Thuasalama mimaw beiknaw kong te Jesu cikuh paw, tuh-e paw tuh chih zah bua a hiinthui cite Paul nynh a ho paw kong kha byaeikunaw`ae a hoi`ae. ²⁰ Te tuh-e byaeikunaw kong kha kae nynh ka nythya khyh keiccuze, Jerusalem lang ccia lan zah hynh-e kong hynh byapiaku lan ry ngaw ta ry ngaw khyh ta cipaw Paul kha ka khia. ²¹ Thuasalama Aukastas nynh byapae ccaw cite Paul nynh azukhan keiccuze, Sizar kalan amaw kha ka ky mawlaezung balyn tuh thungsaw thuasah cite kaw ka pya`ae,” a cipya. ²² Oute Akrippa nynh Festas kha, “Kae kamaw mah tuh-e paw bya tuh thaebua lan ka ry,” a cipya. Felik nynh, “Awkhualan na thae cih,” a cipya. ²³ Te awkhualan Akrippa te Bernis tuh lyccaccu lante oun thua`ae zah rhawbawi lupi`ae ry, khua kya-e minthaanpaw ccungccaw`ae ryte Byapianaw Khaan lungkhu lang tee`ae zah Festas kaw te Paul kha oun teekhae`ae. ²⁴ Te Festas nynh, “Siapharanpaw Akrippa te e kya kaening ry na um oh paw ccungccaw`ae balyn, hynh-e ccungccapaw hynh na muih oh, Jerusalem kya thuasah, e khua kya thuasah Jew`ae zapi balyn nynh hynh-e paw kong kamaw hynh thawte oun ngia`ae zah aning tuh hiin lan kharyh ngaekuh khyh cite a sia`ae. ²⁵ Thuasalama kae nynh chi lan accanpaw seinaw a cyi paw kharyh um khyh cipaw he ka muih tuh amaw ccaccei nynh mah Aukastas kalan azu a khan pawte a kalan ky lan bya ka pae. ²⁶ Kha-e paw konglang phe riapaw kae nynh ka bawipaw kalan ka zei lanpaw um khyh. Tukeiccu nynh amaw hynh nanning malang kae poukhae, abapi lante Siapharanpaw Akrippa nang na malang, akaw-aleih bya phe na khia oh koute kae nynh zei lanpaw ka hoi ccaw cite nynh kae poukhae. ²⁷ Pawccecize thungccahpaw lukheit kha rawsete seibe`ae paw langsapya leite saw lanpaw tuh angaekuh cite ka tua khyh,” a ci.

¹ Oute Akrippa nynh Paul kha, “Namaw hanlan na hokuh kho vae,” a cipya. Oute Paul nynh a kuih kha dyng zah a hanlan hynhte a hoku: ² “Siapharanpaw Akrippa, Jew ccungccaw`ae nynh kae sei oun be`ae paw kong balynte asekuh lante atunin na malang kamaw hanlan hoku khonaw ka mue vae cih keiccu ka vehoy cite ka tuaku. ³ Abapi lante nang tuh Jew`ae phung te Jew`ae byakhianaw te asekuhpaw balyn kya myarya na thya cipaw ka ny keiccu ka vehoy cite ka tuaku. Tukeiccu lungsaete nae la ngaepya nawlan kae ngiaku. ⁴ “Atakaw lya mawte ka minphuin`ae laku Jerusalem kya ka um zah ka ngawphue lyate ka hiinnaw ozia kha Jew`ae balyn nynh pung a ny`ae paw nynh thua. ⁵ Kae beiknaw kyaze kae tuh asi-asah aru huapaw phu Farasi lukheit ka thua paw kha minmin nynh ccaekiakhanry`ae ze atakaw lya mawte phe oun ny`ae paw nynh thua. ⁶ Te kae minpaaw`ae kalan Pachia nynh a rae paw byakinpyakupaw ngaehoinaw keiccu nynh atu kae tuh ka thadyn zah bya oun pia`ae paw athua. ⁷ Tuh-e byakinpyakupaw kha mue lan cite ngaehoi`ae zah kae minphuin phin haw laening nynh Pachia rya kha khuazi khuadae a law`ae. Siapharanpaw Akrippa, tuh-e ngaehoinaw kong keiccu nynh kae tuh Jew`ae nynh sei oun be`ae. ⁸ Pachia nynh a chih`ae paw kha a thosah cipaw tuh pawccemou nanning nynh zyn kho um leipaw lante na tua oh? ⁹ “Nazarethpaw Jesu min te arawsekuh lante uccaw patae ka cyi aho cite kae mah ka la tuaku ccaccing. ¹⁰ Tuh-e kha Jerusalem kya ka la cyi, te alepaw ranpibawi`ae kyate kawhoinaw kha ka mue zah mithyaa`ae patae kha thunginn kya ka saw`ae; te minmin kha he a chia vae`ae ze minmin kha rawsete ka nawccahbua. ¹¹ Pachia alue lante bya ho ccaw`ae cite minmin kha ka suase`ae zah sinakok takyh kyakhe minmin kha pei de ka tah`ae; te minmin tungvaw myarya ka thinria zah ramccangpaw khua`ae kyacia minmin kha ka tua ka sah`ae. ¹² “Tuhte alepaw ranpibawi`ae kyate kawhoinaw te kawpyanaw ryte Damaskas khua lang he ka cceih tuh, ¹³ Pou siapharanpaw, ninthuccyng lya laanpi kyakhe vaawran kyate awnaw kha ka muih, tuh-e tuh khuanin a awpaw laeze awhua zah kae, te kae cceihkheih`ae paw kae pepan kya phaephae a aw. ¹⁴ Te kae balynte laephi kalan he kae khuliakuh tuh kamaw kalan a hopaw roi ccangkheit ka thae zah Hebru bya te, ‘Saul, Saul, pawccemou nang nynh kamaw hynh nae tua nae sah? Ccungzuing sy lanpaw tuh na hanlan arupaw nynh thua,’ cite yn hopya. ¹⁵ Te kae nynh, ‘Bawipaw, nang tuh hungmou?’ ka ci. Te aning nynh, ‘Kae tuh nang nynh na tua na sah paw Jesu nynh ka thua. ¹⁶ Thuasalama thokuh lah na ccu te thadyn tua; pawccecize nang kha ka ryalahtu lang rae khylan, te na muih paw hynh-e uccaw`ae kong te na kalan kae langsakuh cih paw uccaw`ae kong ccaekiakhantu lang rae khylan nynh kae tuh na kalan kae langku. ¹⁷ Nang kha Jew ccungccaw`ae kyate thuasah, Zenta`ae kyate thuasah kae luesah cih, minmin kalan atu nang kha kae saw; ¹⁸ mih mit awsah khylan, mohnaw kyate awnaw kalan paleihsaku khylan, Setan kawhoinaw kyate Pachia kalan paleihsaku khylan, mih seinaw`ae ngaethyanaw a muebua nawlan`ae, te kamaw kya zynnaw liate thyaasah athua`ae paw laku rho uccaw a muebua nawlan`ae nang kha kae saw,’ yn cipya. ¹⁹ “Tukeiccu Siapharanpaw Akrippa, vaawran kyate yn thua paw tuh-e vizin kya kae tuh kawngae leipaw ka thua khyh. ²⁰ Thuasalama Damaskas kya um`ae paw kalan masaty ka ho, te Jerusalem kya, oute Judah pee kya balyn, te Zenta`ae kalan balyn, minmin nynh a ngaesiku nawlan`ae te Pachia kalan paleihku khylan, ngaesikunaw te angaekuhpaw ryalaw law khylan ka hopya`ae. ²¹ Hynh-e`ae konglang keiccuze Jew`ae nynh kamaw kha tempal voidu kya oun kyng`ae zah chia lan oun nounuaku`ae. ²² - ²³ Tuhzemah Pachia kyate bawngnaw ka mue keiccu nynh atu nin cia ka hiinbua ung. Kri tuh a teing cih cite, aning tuh a chih`ae paw kyate masaty a tho paw athua cih cite, te Jew ccungccaw`ae kalan te Zenta`ae kalan awnaw bya kha a thaesah cih`ae cite profeh`ae te Mawsi nynh oun cyikuh lanpaw a ho`ae paw laelan ccangpaw kha ho leite, adihpaw te alepaw ccungccaw`ae kalan ccaekiakhante ka um,” a ci. ²⁴ Tuhte Paul nynh amaw hanlan bya he a hokuh tuh, Festas nynh roi accae lante, “Paul, nang tuh na lungccing vae khyh. Patae na ccangkupaw nynh phe ae ngaesah vae!” a cipya. ²⁵ Thuasalama Paul nynh, “Aphu-e huapaw Festas, kae tuh ka ngae khyh lahyn; thuasalama byaccing bya te lungkyhpaw bya`ae nynh ka ho. ²⁶ Pawccecize siapharanpaw nynh hynh-e`ae hynh phe a ny paw nynh thua, amaw malang khe kae nynh rawhoy te ka ho; pawccecize hynh-e uccaw tuh akin-akae kya cyi paw thua khyh keiccu hynh-e`ae tuh aning nynh a ny leipaw um khyh cipaw phe ka ny. ²⁷ Siapharanpaw Akrippa, profeh`ae bya kha na zyn tou? Na zyn cipaw ka ny,” a ci. ²⁸ Te Akrippa nynh Paul kha, “Kriccaw thua lan vyathy nae zynsah,” a cipya. ²⁹ Te Paul nynh, “Hynh-e sivarui`ae holeite, nang kyalya thua leite atunin ka bya a thae`ae paw balyn mah kamaw hawte vyathy kyalya thua leite kamaw hawte phe na thua ccaccing nawlan oh Pachia kalan saw ka sang,” a cipya. ³⁰ Te tuhte he a ho koute siapharanpaw, ram uktupaw te Bernis, te minmin ryte a dahungkheih`ae paw tuh thokuh`ae zah, ³¹ ccanglang he a pou`ae te, “Hynh-e ccungccapaw hynh chi lan accanpaw, tukhyhze thungccaw lan accanpaw pawsang a cyi paw um khyh,” cite mimaw te mimaw laku a hokuh`ae. ³² Oute Akrippa nynh Festas kha, “Hynh-e ccungccapaw hynh Sizar kalan azukhan khyh lanze phe luesah lanpaw,” cite a hopya.

¹ Oute kaening tuh Itali ram lang sanphalung te ccia lan cite bya he pae`ae tuh, minmin nynh Paul te ccangpaw thungccah`ae kha Aukastas rhawkawphu kyaze rhawbawipaw, Julias kalan khe a ah`ae. ² Te Adramyttium sanphalung lungkhu lang kae tee zah Asia ram rili kin lang po ccia lan vae cite eenaw te kae thokuh. Mesidoniapaw, Thesalonika khua-e paw Aristarkhas tuh kaening ryte a cceihbua. ³ Te awkhualan tuh Sidon khua kya kae thua. Te Julias nynh Paul kha thawccih zah a ban`ae kalan ccia lan te minmin dooihnaw mue lan luenaw a pya. ⁴ Te tuin kyate he kae thokuh tuh khivae nynh arawsekuh lante azaw keiccuze Saiparas tuikoih rekunaw kalan kae cceih. ⁵ Te Silisia ram te Pamfilia ram e rili vawlan po kae cceih zah Lysia ram e Myra khua kya kae thua. ⁶ Te tuin kya rhawbawipaw nynh Itali ram lang yn cceih paw Alexandria sanphalung kha muih zah tuh-e kya kaening kha oun teesah. ⁷ Te byabyate nin patae he kae cceih tuh vawsawte Kanidas khua pe kae thua, khivae nynh po ccia lanpaw oun ua khyh pawte, Salmone khua te arawsekuhpaw Krete tuikoih rekunaw kalan kae cceih. ⁸ Kha-e kha vawsawte kae lue koute, Lasia khuapi pe, ‘Puithya Hae-ungnaw’ cikuh paw ahmin kya kae thua. ⁹ Ccyh khaw he aro te, Looh-aesung nin tuh phe athang vae keiccuze atu sanphalung te khuaccungpaw tuh ri lan um paw athua pawte, Paul nynh ccungccaw`ae kha tuanaw pya`ae zah, ¹⁰ “Ccungccaw`ae, atu e khuaccungpaw tuh sanphalung te uccaw`ae kyalya thua leite, ah hiinnaw mah shungnaw te ronaw pipi oun tung vae cih oh cipaw ka ny,” a cipya`ae. ¹¹ Tuhzemah rhawbawipaw nynh Paul bya laeze sanphalung a mungtu te a hoitu bya kha a zynhua. ¹² Te tuh-e sanphalung hae-ungnaw tuh khoccihsaw hanlan accanthya khyh keiccu, Finisia lang phya kho ze phya lan, tuin kya khoccihsaw um lan cite ccungccaw alunghua nynh bua ccia lan tuanaw pya`ae. Finisia tuh Krete tuikoih kya um paw sanphalung hae-ungnaw thua zah niccaw-deilang te niccawthalang nynh a hawi. ¹³ Te deilang e khivae nynh byabyate he yn zaw tuh mih eenaw phe kae mue vae cite tuakuh`ae zah, sanphalung kha supah`ae zah Krete tuikoih pe lang a cciasah`ae. ¹⁴ Thuasalama khaw aro mawze Euroklydon cikuh paw myarya rupaw khise yn tho zah sanphalung kha yn mung vae. ¹⁵ Te sanphalung nynh khivae kha taening kho vae khyh zah khivae nynh po he a cciakhae tuh kaening mah khivae zawnaw lang yn mungbia vae. ¹⁶ Te Klauda cikuh paw tuikoih taraw pe a ccue lya, kohlung taraw kha myarya thawbang te kae khynsah. ¹⁷ Kohlung kha sanphalung kalan a khang`ae koute liarue`ae kha mang`ae zah sanphalung kha a khiide`ae; te Syrtis tuideinaw kya yn khangkuh sei cih cite a ri`ae pawte sanphalung boeidaw kha khah`ae zah khivae nynh hung mungbia vae. ¹⁸ Khise nynh myarya oun hebia pawte awkhualan tuh sanphalung kya-e phupaw`ae kha a vuabang`ae. ¹⁹ Te nin thungnaw kya sanphalung uccaw`ae kha kae kuih te kae vua vae. ²⁰ Te nin khaw cia khuanin te awsi`ae langkuh vae khyh`ae zah khise zawpaw po aru ung keiccu kae lue cih cite kae ngaehoi paw balyn tuh phya azo vae. ²¹ Thuasalama aepaw ae leite khaw kae um koute, Paul nynh minmin ngaelung te thadyn zah, “Ccungccaw`ae, nanning nynh ka bya kha na la ngae oh zah Krete kyate ah ccia khyh oh ze hynh-e sungnaw te ronaw pipi kyate phe ah lue cih oh paw. ²² Te atu zemah lungngaengante um oh; pawccecize sanphalung holeite hung ccungccaw sanmah a hiinnaw a shung paw um lan khyh. ²³ Pawccemacize kamaw yn hoitupaw te kae nynh ka beik paw Pachia kya-e vaaw ccungccapaw nynh atu khuazi kya ka pe yn thadyn zah, ²⁴ ‘Paul, rih nan, nang tuh Sizar malang thuakhae na thua cih. Te dotua, nang ryte sanphalung kya na cceihkheih oh paw balyn kha Pachia nynh phe ae pya vae,’ cite yn hopya. ²⁵ Tukeiccu, ccungccaw`ae ngaengante um oh; pawccecize kae yn hopya thyhhawte yn cyikuh cih cite Pachia kha ka zyn. ²⁶ Tuhzemah tuikoih ccangkhakheit vawlan aening kha oun lae mamin cih,” cite a hopya`ae. ²⁷ Thuasalama zi haw laepali he cih tuh kaening kha Adria rili kya oun khiakhaekuh bungthung lya, ziraccyng loukaw khe, laerou kalan kae naekuh vae cite sanphalung ryalahtu`ae nynh a tua`ae. ²⁸ Tui kha he a toutua`ae tuh lang kuin akhupaw kha a muih`ae; te rakyh asawnaw lang he a cceih`ae te bua toutua`ae zah lang haw laepangaw akhupaw kha a muih`ae. ²⁹ Oute lungpi kha phe kae diasei cih cite rih`ae zah sanphalung nuhlang te sivawhinpi ccangpali kha tui lungkhu lang a saw`ae, te khuadae ccaw vae cite sawsang`ae. ³⁰ Te sanphalung ryalahtu`ae nynh sanphalung kyate zya ccue lan noukuh`ae zah kohlung kha rili lungkhu lang he sahbung`ae tuh, sanphalung malang te sivawhinpi`ae a sah`ae paw olante a umsaku`ae. ³¹ Paul nynh rhawbawipaw te rhawkaw`ae kha, “Hynh-e sanphalung ryalahtu`ae nynh sanphalung kya a um khyh`ae ze, nanning na lue kho lan khyh oh,” cite a hopya`ae. ³² Oute rhawkaw`ae nynh kohlung rui`ae kha phya bae`ae zah phe a ccawsah`ae. ³³ Te khua vyavya yn dae tuh, Paul nynh ccungccaw`ae balyn kha looh ae lan thawte hopah`ae zah, “Nanning nynh phang na ngaw oh zah aepaw leite, pawsang ae leite na um oh paw atunin nin haw laepalinaw nynh thua vae. ³⁴ Tukeiccu aepaw ae ccavae oh cite kae ngia oh, pawccecize aepaw tuh nae ngedannaw hanlan nynh thua; pawccecize nanning laku hung sanmah a sangrua ccangkheit khuakuh lan khyh,” a cipya`ae. ³⁵ Tuhte he a ho koute Paul nynh sanlou kha lawkuh zah minmin balyn malang khe Pachia kalan lungtuabya hote sanlou kha eih zah a ae vae. ³⁶ Oute minmin balyn mah mih lungngaengan zah looh a ae bua vae`ae. ³⁷ Tuh-e sanphalung kya a um`ae paw kae balynte zaning sungsari lu taruh kae cih. ³⁸ Te minmin nynh phe byn lan a ae`ae koute chanvuiphaw kha rili lungkhu lang vua`ae zah sanphalung kha phupaw a zawsah pya`ae. ³⁹ Te khua he yn dae tuh kha-e lorang kha nyh khyh`ae; thuasalama akouleihnaw sang kheit kya sanphalung umnaw a um paw kha a muih`ae, athua kho ze tuhlang khe sanphalung kha cciasah lan cite a paccynku`ae. ⁴⁰ Te sivawhinpi`ae kha supah`ae zah rili kyakhe a cciataw`ae, te zawnawpaw khiidenawpaw liarue`ae kha phou`ae zah malang e boeidaw kha a dawpya`ae, oute varan langkhe khivae a mungsah bia`ae. ⁴¹ Te rili sanning te atungkunaw hmin kya mangthua`ae tuh minmin nynh sanphalung kha varan lang a khangsakuh`ae, te sanphalung malang tuh varan lang kha mohdia zah phang abingkuh tuh nuekuh kho vae khyh; thuasalama anuhlang tuh rili tuileih eih aru keiccuze phe a khya. ⁴² Te thungccah`ae nynh tui oun zeih cih`ae zah oun lue cih`ae cite mih thinphang paw te rhawkaw`ae nynh thungccah`ae kha chia lan cite a paccynku`ae. ⁴³ Thuasalama rhawbawipaw nynh Paul kha a luesah ry pawte minmin paccynkunaw kha khee zah tuizeih khopaw nynh masaty toikuh`ae sah lah varan lang zua`ae sah; ⁴⁴ te tuhlaepaw nynh thingphe`ae te sanphalung akhyanahpaw thing`ae te zua`ae sah cite kaw a pya`ae. Ou tuhte minmin balyn tuh khyndadyhlan laerou kalan pung a zua`ae.

¹ Tuhte he a zua`ae te tuh-e tuikoih tuh Malta tuikoih nynh thua cipaw minmin nynh a ny`ae. ² Te tuin kya-e ccungccaw`ae nynh kaening kha thawccinaw alepi oun langsapya`ae; pawccecize tuhlya khuarah zah eih akyaa keiccuze maee oun tuapah`ae zah kaening balyn kha oun thuasah`ae. ³ Te Paul nynh ccungparei`ae ccekheit khui zah maee vawlan he a phungbia tuh maee aso keiccuze fupaw sakheit yn pou zah Paul kuih kya phang vekuh. ⁴ Te tuin kya-e ccungccaw`ae nynh Paul kuih kya fupaw phang vekuh paw kha he a muih`ae tuh; “E ccungccapaw tuh ccungccaw theihtupaw nynh athua mamin cih, rili kyate a lue zemah hiin khylan Dingnaw nynh ua vae khyh,” cite mimaw te mimaw a hokuh`ae. ⁵ Tuhzemah Paul nynh fupaw kha maee lungkhu lang valah he zah ccapyh sanmah vaemaw mue khyh. ⁶ Tuhzemah aning tuh pung yn phin vae cih, tukhyhze vaekheihmawte yn khuliakuh cih zah phe yn chih cih cite minmin nynh phang a do`ae. Thuasalama khaw cia do`ae zah Paul tuh pawtua um khyh paw kha a muih`ae tuh mih lung paleih`ae zah, “Aning tuh khozipachia nynh thua,” a ci`ae. ⁷ Tuh-e lorang kya Publias acikuh paw, tuikoih kya khuabawi paw laephi a um; tuh-e khuabawi paw nynh kaening kha oun thuasah zah nin thung cia hoyte oun dooih. ⁸ Ou tuhlya, Publias a paaw tuh ngelingpaw te chii te toikupaw te a la ikhaekuh. Te Paul nynh a kalan tee zah a tungvaw a kuih khangte sawsangpah zah phe a dan. ⁹ Hynh-e he acyihkuh koute, tuh-e tuikoih kyaze ccinaw hoi`ae paw mingccang`ae mah oun thua`ae zah phe a dan`ae. ¹⁰ Tuh-e`ae nynh kaening kha sawtuanaw patae oun pya`ae, te kaening he kae thokuh tuh kae hanlan ahoboupaw miakaw kha oun phusaku`ae. ¹¹ Te sawpaw sathung acih koute, kha-e tuikoih kyakhe khoccihsaw phe a thangsah paw, Apheipaw Uno`ae pungsan akepaw Alexandria sanphalung khate kaening tuh bua kae thokuh. ¹² Te Sirakus khua kya kae thua zah tuin kya nin thung kae um. ¹³ Te tuin kyate po kae ve zah Rezium khua kya kae thua; nin kheit kae um koute deilang e khivae yn zaw zah nin ningnaw kya Puteoli khua kya kae thua. ¹⁴ Tuin kya uteno`ae kha kae muih`ae zah minmin nynh nin sari um lan oun ngia`ae thyhte kae um. Tuhkoute Rom khuapi lang kae cceih. ¹⁵ Te Rom khua e uteno`ae nynh kaening the kha he a thae`ae tuh kaening kha cciadue khylan Appias Kungkunaw khua te Balah-inn Innthung khua phe thua lang cia oun cceih`ae. Te Paul nynh minmin kha he a muih`ae tuh Pachia kha thehoysah zah a thawmuin. ¹⁶ Te Rom khuapi kya he kae thua tuh rhawbawipaw nynh thungccah`ae kha a ngawtupaw lupipaw kalan a ah`ae, thuasalama Paul tuh a makhaete amaw a ngawtupaw rhawkapaw ryte um lan a ua. ¹⁷ Ou tuhte nin thung acih koute Paul nynh Jew`ae piccang`ae kha pynkheihlan a ko`ae. Te minmin nynh pynkheihlan he oun thua`ae te, Paul nynh minmin kha, “Uteno`ae, ah ccungccaw te arawsekuh lante thuasah, ah paaw`ae phung te arawsekuh lante thuasah pawsang ka cyi paw a um lei pite nynh thung oun sah`ae zah Jerusalem kyate Rom ccungccaw`ae kuih kalan oun ah`ae. ¹⁸ Rom ccungccaw`ae nynh kamaw kha akaw-aleih bya he oun khia`ae tuh luesah oun ry`ae; pawccecize kamaw kya chinaw aphah paw seinaw um khyh. ¹⁹ Thuasalama Jew`ae nynh kha-e kha he a ei`ae tuh Sizar kalan azukhan lan ka umkhaekuh kho vae khyh, tuh-e tuh ka minphuin`ae kha seibe lanpaw ccangkhakheit ka hoi cipaw thua khyh. ²⁰ Hynh-e keiccu nynh nanning kha kae ko oh, nanning muih khylan te nanning ryte byahoku khylan nynh kae ko oh; Israel`ae ngaehoinaw keiccu nynh kae tuh hynh-e sivarui te oun khii`ae,” a ci. ²¹ Te minmin nynh, “Nang te asekuh lante Judah ram kyate ccaw`ae kae mue khyh, oun thua`ae paw uno`ae hung nynh sanmah na thethya a phy paw, a ho paw mah um khyh. ²² Thuasalama na tua paw kha paw nynh thua cipaw thaetua kae ry; pawccecize hynh-e beiknaw tuh ahmin takyh kya a rawse`ae paw beiknaw nynh thua cipaw kae ny,” cite a khung`ae. ²³ Te minmin nynh nin kheit kha khyapah`ae zah Paul a ryanaw kalan ccungccaw patae oun thua`ae. Paul nynh minmin kha Pachia peenaw kong ccaekiakhanpya`ae, Jesu konglang minmin kha zynsah khylan Mawsi Kawbya kya-e te Profeh`ae bya kha awkhua te zete cia a hopya`ae. ²⁴ Te abang nynh kha-e bya a hopaw kha zyn`ae zah abang tuh zyn khyh`ae. ²⁵ Tuhte mimaw te mimaw laku mih lung he lokuh khyh tuh phe a pou`ae; tuhlya Paul nynh bya kawkheit a hopya`ae paw tuh: “Thyaa Muisaw nynh ah minpaaw`ae kalan profeh Isaiah kyate hmerarihlan a hopaw tuh: ²⁶ ‘Hynh-e ccungccaw`ae kalan khe cceih lah, “Nanning nynh thae paw tuh mang na thae cih oh zah na thaethya lan khyh oh; muihpaw tuh mang na muih cih oh zah na nyhthya lan khyh oh. ²⁷ Pawccecize hynh-e ccungccaw`ae thinlung tuh marae moh, mih nakaring tuh karae rua zah mih mit phe masi`ae; tuhkhyh lanze mih mit te ngawmuih cih`ae zah mih nakaring te a thae cih`ae. Te mih thinlung te a thaethya cih`ae, te phe rulaekuh cih`ae zah kae nynh phe ka dansah cih`ae paw,” cite hopah`ae,’ a ci. ²⁸ “Tukeiccuze Pachia kya-e khumnaw tuh Zenta`ae kalan ky phe thua vae zah minmin nynh a thae vae cih`ae cipaw hynh nanning nyh ccavae oh!” cite Paul nynh a ci. ²⁹ Te hynh-e bya`ae kha he a ho koute, Jew`ae tuh pou`ae zah mimaw te mimaw laku thawte eikunaw a hoi`ae. ³⁰ Te Paul tuh amaw nynh a hohkupaw inn kya kum ning phe ccing lang um zah amaw kalan oun thua`ae paw balyn kha a thuasah`ae. ³¹ A kheetu um leite, rawhoy te Pachia peenaw kha hopyate, Bawipaw Jesu Kri kong kha ccangpyate nynh a um.