12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

3 John

1

1 A kum tang vae paw kae, Johan nynh, byaccing kya ka sungsahpaw, kou sungsahpaw Kaias kalan ccaw kae ky. 2 Kou sungsahpaw, na hiinnawmuisaw a pungthung hawte, nang tuh pawpaw balyn kya na pungthung nawlan te na ngedan nawlan saw kae sangpah. 3 Pawccecize nang nynh byaccing kya na hiin thyhhawte, nang na kya um paw byaccing kong kha uteno`ae nynh oun thua`ae zah ccaekia he khan`ae tuh myarya ka lungtua. 4 Ka ccaaw`ae nynh byaccing kya a hiin`ae cipaw ka thae paw lungtuanaw laeze ale huapaw lungtuanaw ka hoi khyh. 5 Kou sungsahpaw, nang nynh uteno`ae kya te mikhia`ae kya na cyipya`ae paw miakaw tuh zyn lan um lante nynh na cyi. 6 Minmin nynh nang na kya-e sungsakunaw kong kha kriccawbu malang ccaekiakhan`ae. Nang nynh minmin kha mih khuaccungnaw kya Pachia ccaaw te angaekuh lante na saw`ae lanze, nang tuh kou hoy lang na cyih cih. 7 Pawccemacize minmin tuh amaw min hanlan cceih`ae zah Zenta`ae kyate pawsang mah lawkuh khyh`ae. 8 Tukeiccu aening tuh byaccing rya a lahbua`ae paw ah thua nawlan oh khahtahawpaw ccungccaw`ae kha aening nynh lehkhan lan accan. 9 Kriccawbu kalan ccaw phe ka zei vae; thuasalama minmin lakuze lupi huapaw lang tang a ry paw Diotrephes nynh kaening kha kaw yn ua khyh. 10 Tukeiccu kae thua vae ze amaw a cyisahnaw kha a liathui nawlan a cyipaw kha ka dianah cih. Aning nynh ahoy leipaw bya`ae te kaening kha sarisarya oun ci. Te tuh-e te a lungryachih khyh zah uteno`ae kha mah innccung ua khyh`ae apiaze innccung ua ry`ae paw kha mah phe khee`ae zah kriccawbu kyate minmin kha a dee`ae. 11 Kou sungsahpaw, ahoy leipaw kha kaheihlawkuh nan, thuasalama ahoypaw kha lawkuh. Ahoypaw rya a lah paw ccungccaw tuh Pachia kya-e nynh thua, thuasalama ahoy leipaw rya a lah paw ccungccaw tuh Pachia kha muih vae khyh. 12 Ccungccaw miakaw nynh Demetrias a hoynaw kong kha ccaekiakhan`ae, te byaccing nynh mah a kong ccaekiakhan. Te kaening nynh mah a kong ccaekia kae khan. Te ccaekia kae khan paw tuh akyh cipaw nanning nynh na ny oh. 13 Kae nynh zei lanpaw uccaw patae ka hoi ung. Thuasalama ccatui te ccaccung te na kalan ka zei ry vae khyh. 14 Thuasalama aro maw nang kha kae muih cih zah hawiliakute lukheit te lukheit byahoku lan cite ka ngaehoi. Daenaw na kya la um vae sah. Kae ruiban`ae nynh nang kha ae beihlang`ae. Ruiban`ae kha mih min te la beih`ae.