2 Timothy

¹ Kri Jesu kya a um paw hiinnaw kya-e byakinpyakupaw thyhte, Pachia rynaw liate Jesu Kri kya-e locceihtu athua paw Paul nynh, ² kou ka sungsahpaw ka ccapaw, Timote: Paaw Pachia te ah Bawipaw Jesu Kri kyate thawccinaw, ngaethya-umsanaw te daenaw tuh na kya la um sah. ³ Khuazi khuadae ka sawsangnaw kya nang kha apaekuh lei lang kae liathui hawte, ka minpaaw`ae ka tawpaw`ae nynh rya a la lawpya`ae hawte, athyaapaw mawtemaw nykunaw thinlung te rya ka lawpyapaw Pachia kalan lungtuabya ka ho. ⁴ Na mitphi kha ka tuathui tuh lungtuanaw te phe ka bia nawlan nang kha muih lan myarya kae ry. ⁵ Na minnung Lois te na nung Eunis kya masaty a la um paw zynnaw hawte, cyiruhnaw um leipaw na zynnaw kha ka liathui; te kha-e zynnaw tuh nang na kya mah a um cipaw ccaerarihlan ka ny. ⁶ Tukeiccu ka kuih khangnaw liate na kya um paw Pachia lasung kha houh na ruasah nawlan, nang kha kae nysah thui ry. ⁷ Pawccecize Pachia nynh rawthyanaw muisaw kha aening oun pya khyh, thuasalama thungnaw, sungsakunaw, te mawtemaw yhku khonaw muisaw kha nynh oun pya. ⁸ Tukeiccu ah Bawipaw kya-e ccaekia kha thuasah, amaw keiccu thung a ccah paw kamaw kha thuasah mae oun thyakhae nan; thuasalama Pachia thungnaw liate thehoypaw hanlan teingnaw kha la neethungkuh bua. ⁹ Tuh-e Pachia nynh aening kha phe oun khum vae zah athyaapaw konaw te phe oun ko vae. Tuh-e tuh aening ah ryalawnaw thyhte thua khyh, thuasalama amaw a eenaw te laephipi atho mawze Kri Jesu kya aening pya athua paw a thawccinaw thyhte nynh aening kha oun ko. ¹⁰ Tuh-e thawccinaw tuh aening oun Khumtu Jesu Kri yn langkunaw liate atu alangkuh vae. Tuh-e Jesu nynh chinaw kha phe zosah zah hiinnaw te chi kho leinaw kha thehoypaw liate awnaw kalan a thuakhae. ¹¹ Tuh-e thehoypaw phunghotu lang, locceihtu lang te Zenta`ae ccangpatu lang kae tuh khang ka thua. ¹² Kha-e keiccu nynh hynh-e vawsawnaw`ae hynh kae mah ka teing. Tuhzemah ka maethah khyh. Pawccecize hung nynh ka zyn cipaw kha ka ny. Te amaw kalan kae nynh ka ah paw uccaw kha tuh-e nin kyacia a khynsah kho cipaw ka ny. ¹³ Kri Jesu kya a um paw zynnaw te sungsakunaw te asekuhpaw, kamaw kyate phe na thae vae paw dosuinku lan um paw ahmepaw bya kha varyn la kyngkuh. ¹⁴ Nang na kalan ahpya athuapaw, ahoypaw uccaw kha, aening kya a um paw Thyaa Muisaw liate la khynsah. ¹⁵ Asia ram kya a um`ae paw balyn nynh kamaw kha phe oun cciataw vae`ae cipaw nang nynh phe na ny. Tuh-e`ae kya Fykelas te Hemokene a umbua`ae. ¹⁶ Onesiphoras innbyn kha Bawipaw nynh ngaethya-umsanaw la pya`ae sah. Pawccecize aning tuh kamaw kha thaw pei yn muinsah he paw nynh thua. Kamaw sivarui te yn khii`ae paw kha mah mae yn thyakhae khyh. ¹⁷ Thuasalama Rom khuapi kya a um lya kamaw kha thawmawte yn la ccung zah phe yn muih. ¹⁸ Tuh-e nin kya Bawipaw ngaethya-umsanaw kha aning nynh a mue nawlan Bawipaw nynh la pyabua vae sah. Efesa khua kya kamaw hanlan pawcih nynh yn cyipya cipaw kha nang nynh phe na ny ccaccing.

¹ Tukeiccu, ka ccapaw, nang tuh Kri Jesu kya a um paw thawccinaw kyakhe na thaw la sae sah. ² Te ccaekia`ae patae laku kamaw kyate phe na thae vae paw uccaw`ae kha, zyn lan um paw ccungccaw`ae te ming`ae kha mah bua a ccangpah kho cih`ae paw kalan khe kha-e kha la ahpah`ae. ³ Tukeiccuze Jesu Kri kya-e rhawkaw hoypaw hawkhate, nang tuh vawsawnaw kha la ngaesang. ⁴ Rhawkaw nynh tuh amaw kha rhawkaw lang a potupaw lungrythuasah khylan amaw te amaw kha hynh-e hiinnaw kya-e uccaw`ae khate khawsakuh boi khyh. ⁵ Lukhakheit nynh khungtaekunaw kya khungtaekuh bua zah aphung thyhte khungtaeku khyh ze, haetapaw lukhung kha mue khyh. ⁶ Thawte reihkuhpaw loophopaw tuh masaty looh a mue paw athua hahe cih. ⁷ Ka hopaw kha hoyte la tua, te Bawipaw nynh pawpaw balyn kya thaethyanaw kha ae pya vae sah. ⁸ David ciihan athua paw Jesu Kri tuh kae nynh ka hopaw thehoypaw thyhte a chih`ae paw kyate a thothui cipaw kha la liathui. ⁹ Kha-e thehoypaw hanlan kae tuh ahoy leipaw ryalahtu hawte sivarui te khiinaw hei kha vawsaw ka teing; thuasalama Pachia bya tuh khii kho thua khyh. ¹⁰ Tukeiccuze popaw ccungccaw`ae nynh mah Kri Jesu kya a um paw khumnaw kha zungzae phu-enaw ryte a muebua nawlan`ae, minmin hanlan pawpaw balyn kha ka ngaesang. ¹¹ Hynh-e tuh zyn lan um paw bya nynh thua: Pawccecize amaw ryte ah chi oh ze, amaw ryte ah hiinbua cih oh. ¹² Aening ah teing oh ze, amaw ryte ah uk bua cih oh; amaw kha ah vua oh ze, aning nynh mah aening kha yn vua cih. ¹³ Aening tuh zyn lan ah um khyh oh zemah, aning tuh zyn lan um paw nynh thua, amaw te amaw kha vuakuh kho khyh. ¹⁴ Hynh-e uccaw`ae kong hynh la tuasathui`ae. Athane leipaw te a thaetu`ae kha arosah paw bya kong kha minmin nynh a peku khyh nawlan`ae Bawipaw malang bya tawsya `ae. ¹⁵ Byaccing bya kha hmerarihlan phiathyate, maethya aho leipaw ryalahtu lukheit hawkhate, Pachia malang nawccawkhaepaw na thua nawlan, namaw te namaw kha langsaku khylan thawte zuakuh. ¹⁶ Thuasalama anungsikuhpaw, accakaepaw ccohkupaw kha la sungkuh. Pawccecize kha-e`ae nynh Pachia lante zuaku leinaw kalan houh ae kaethungsah cih. ¹⁷ Te mih bya tuh khensa ccinaw hawte apazaekuh cih. Tuh-e`ae laku Hymenaeas te Filetas a umbua`ae. ¹⁸ Minmin nynh thothuinaw tuh phe athang vae paw nynh thua a ci`ae keiccuze byaccing kyate phe a cceihsei vae`ae, te ccungccaw abang zynnaw kha phe a buleihpya`ae. ¹⁹ Tuhzemah Pachia kya-e atynpaw atungpi tuh a thadyn; hynh-e tazeihkhiapaw a hoi, “Bawipaw nynh amaw a ccungccaw`ae kha a ny,” te, “Kri min a phukuhpaw ccungccaw miakaw nynh tuh hoyleinaw kha poutaw sah,” acihkuh. ²⁰ Thuasalama inn lepipaw kya sui ang`ae te phua ang`ae kyalya um khyh. Thing ang`ae te lae ang`ae mah a umbua. Abang tuh sawtuanaw hanlan thua zah abang tuh sawtua leinaw hanlan nynh thua. ²¹ Tukeiccuze ccungccaw lukhakheit nynh anungsikuhpaw uccaw kyate amaw te amaw kha a ccikanku lanze, aning tuh sawtuanaw hanlan mang lan um paw ang, thyaasah athuapaw, Bawipaw nynh mang lan asypaw, ahoypaw ryalaw miakaw hanlan paccynpaw athua cih. ²² Ngawphue ryduanaw kha mah la ccuetaw, thuasalama athyaapaw thinlung hoi`ae paw, Bawipaw a ko`ae paw ryte dingnaw, zynnaw, sungsakunaw te daenaw kha la deesui. ²³ Thuasalama angaeepaw te pawsang ny leipaw byakhianaw kha la sibia. Kha-e nynh tuh peku maekunaw kha nynh a thuakhae cipaw kha na ny. ²⁴ Bawipaw ryalawpatu nynh tuh pekuh maekuh hahe lan khyh. Thuasalama ccungccaw balyn kya a nevyalya cih, a ccangpah kho cih zah a lungsae cih, ²⁵ amaw a rawse`ae paw kha lungnenaw te a thuihei cih`ae, byaccing kha a ny nawlan`ae ngaesikunaw kha Pachia nynh minmin kha a pya ze yn pya cih`ae, ²⁶ te minmin nynh tuathya nythyanaw kha a hoi ccaw`ae cite, te diabolos nynh a rynaw kha raesah khylan a kyngnaw`ae paw kaang kyate a lue cih`ae.

¹ Nyathyakou nin tuh vawsawrunaw ccyh yn thua cih cipaw kha la nyh. ² Pawccecize ccungccaw`ae tuh mimaw a sungsakuh`ae paw, phua a sungsah`ae paw, a pookuh`ae paw, a tansakuh`ae paw, Pachia thethyaho`ae paw, nung te paaw kawngae lei`ae paw, lungtuabya a hothya lei`ae paw, athyaa lei`ae paw, ³ sungsanaw hoi lei`ae paw, ccungccaw ngaethya lei`ae paw, milae thanho`ae paw, a syngkuh kho lei`ae paw, eih re kaesy`ae paw, ahoypaw a hua`ae paw, ⁴ lungzi lei`ae paw, paw peki lei`ae paw, alysakuh`ae paw, Pachia sungsahpaw laeze hoysanaw a ryhua`ae paw, ⁵ Pachia lante a cceih paw olante a umsaku`ae zemah kha-e thungnaw kha a vua`ae paw nynh thua`ae. Khahtahawpaw ccungccaw`ae kha la sibia`ae. ⁶ Pawccecize tuhtahawpaw ccungccaw`ae tuh inn`ae lungkhu lang tee`ae zah seinaw nynh phang ne`ae paw, zoikadeih lang ling kho um paw nopi`ae kha see lang kyng`ae zah duanaw aphuinphuin te a cciakhae`ae paw nynh thua`ae. ⁷ Tuh-e`ae tuh pei a ccangkuh`ae pite byaccing nynaw kya a phah kho lei`ae paw nynh thua`ae. ⁸ Jannes te Jambres nynh Mawsi kha a dou`ae hawte kha-e ccungccaw`ae nynh byaccing kha a dou`ae. Minmin tuh thinlung arohpaw ccungccaw`ae thua`ae zah zynnaw konglang te a nue`ae paw nynh thua`ae. ⁹ Thuasalama kha-e luning`ae a ngaeenaw`ae tuh phe alangku vae hawte hynh-e`ae mih ngaeenaw mah ccungccaw balyn malang a langkuh cih. Tukeiccu minmin tuh khalaeze lethung kho vae lan khyh`ae. ¹⁰ Thuasalama ka ccangpyanaw, ka hiinnaw ozia, ka eenaw, ka zynnaw, khaw ka teingnaw, sungsakunaw, ka ngaesangnaw, ¹¹ Antiok khua kya, Ikoniam khua kya, Lystra khua kya ka tungpaw yn tua yn sahnaw`ae, vawsawrunaw`ae tuh pawtahawpaw tuasakunaw`ae kha nynh ka teing cipaw marya na ny; thuasalama kha-e`ae balyn kyate Bawipaw nynh kamaw kha yn luesah. ¹² Athua, Kri Jesu kya Pachia rawrinaw te a hiinry`ae paw ccungccaw balyn nynh tuh tuasakunaw kha a teing cih`ae. ¹³ Thuasalama athahpaw ccungccaw`ae te ccungccaw pei a hyngpah`ae paw tuh houhouh athahpaw lang a tang cih`ae. Ming`ae kha a phee cih`ae zah mimaw mah phee athua cih`ae. ¹⁴ Thuasalama nang tuh phe na ccangku vae paw te phe na zyn ccaccing vae paw uccaw`ae kyakhe po la tyn, pawccecize hung kyate nynh na ccangku cipaw kha na ny. ¹⁵ Te na imua lya mawte nang tuh Ccathyaa kha phe na ny vae, kha-e Ccathyaa nynh Kri Jesu kya um paw zynnaw liate khumnaw mue lan nang kha ae hawsah kho. ¹⁶ Ccathyaa balyn tuh Pachia hysawnua paw nynh thua. Tuh-e Ccathyaa tuh ccangpyakunaw hanlan, seimuihsakunaw hanlan, raethuinaw hanlan, dingnaw kya thuiheikunaw hanlan athanepaw nynh thua. ¹⁷ Ou tuhte Pachia ccungccapaw tuh accing nawlan, ahoypaw ryalaw balyn hanlan khaleih paccynpaw athua nawlan nynh thua.

¹ Tukeiccu Pachia malang te Bawipaw Jesu Kri malang kae nynh bya kae tawsya. Tuh-e Bawipaw nynh amaw yn langkunaw kya, te a peenaw kya a hiin`ae paw te a chih`ae paw kha byapia vae cih. ² Pachia bya kha la ho! Accyh thua zemah, accyh thua khyh zemah la paccynkuh, lungsaenaw pipi ryte, thuiheinaw ryte mih seinaw kha la muihsakuh`ae, la pe`ae lah la hy`ae. ³ Pawccecize ccungccaw`ae nynh ahmepaw ccangpyakunaw kha a ngaery khyh`ae ccyh yn thua cih, thuasalama azeipaw nakaring`ae keiccuze mimaw rynaw thyhte mimaw te mimaw kha ccangpatu`ae lang oun sueluakuh cih`ae. ⁴ Te minmin nynh mih nakaring`ae kha byaccing kyate oun paleih cih`ae zah phungpaw huataw`ae kalan oun paleihkuh cih`ae. ⁵ Thuasalama nang tuh pawpaw balyn kya la raeringkuh, riathaenaw`ae kha la ngaesang, evangelist ryalaw kha la lah, na ryalawpaw kha la ccingsah. ⁶ Pawccecize kae tuh nia lan pyapaw-uccaw hawte atu phang paccyn ka thua vae, te ka pou nawlan paw accyh tuh anae vae. ⁷ Kae nynh ahoypaw rhawtukkunaw kha phe ka tuk vae. Ccuetaekunaw kha phe ka thangsah vae. Zynnaw kha phe ka tynsah vae. ⁸ Atu te vae tuh dingnaw suilukhung kha kamaw hanlan nungpya athua vae. Tuh-e kha adingpaw byapiatu, Bawipaw nynh tuh-e nin kya kamaw kha yn pya cih. Kamaw kyalya thua khyh, thuasalama amaw yn langku lanpaw a ngaehoi`ae paw balyn kha mah a pya cih`ae. ⁹ Kamaw kalan aro maw thua lan thawte yn zuakuh. ¹⁰ Pawccecize Demas nynh hynh-e atu she hynh sungsahte, kamaw kha phe oun vuasya vae, te aning tuh Thesalonika khua lang phe a pou vae. Kresen tuh Galati kalan, Titu tuh Dalmatia kalan phe pou vae`ae. ¹¹ Luka kyalya nynh kamaw ryte a um. Marka kha yn kobua lah namaw ryte oun cceih oh. Pawccecize aning tuh kamaw hanlan ryalawnaw kya accungkia. ¹² Te Tykhikas kha Efesa lang phe ka saw vae. ¹³ Troas khua um paw Karpus kya ka cciataw paw angkiccua kha he nae ccia vae ze yn phubia, te ccaleih`ae, abapi lante saving-ccaleih`ae kha yn phubia. ¹⁴ Sohinlaeetupaw, Alexanda nynh kamaw tungvaw athahpaw patae a cyi; Bawipaw nynh kha-e paw kha amaw a ryalaw thyhte amee pyaru vae sah. ¹⁵ Amaw kha nang nynh la raeringkuh, pawccecize aning nynh kae ccangpyanaw`ae kha thawmawte a rawse. ¹⁶ Masaty ka thungkhawkunaw kya hung sanmah kamaw yn pangkhae khyh, thuasalama mih balynte phe oun vuasya`ae; kha-e hanlan mih tungvaw seibe thua nan sah. ¹⁷ Tuhzemah ou tuhte kamaw liate phunghopaw tuh khaleih phy athua nawlan te Zenta`ae balyn nynh marya a thae ccaw`ae cite kamaw kha Bawipaw nynh yn pangkhae zah thawzung yn pya. Te kae tuh chindeih khalang kyate luesah ka thua. ¹⁸ Bawipaw nynh ahoy leipaw ryalaw miakaw kyate kamaw kha yn luesah cih zah a vaawran peenaw kalan khyndadyhlan yn nung cih. Amaw kya phu-enaw tuh zungzae te zungzae cia um sah. Amen. ¹⁹ Priska te Akuila, te Onesiphoras innbyn kha la beihlang`ae. ²⁰ Erastas tuh Korin khua kya nynh a um; thuasalama Trofimas tuh a cci keiccu Miletas kya nynh phe ka cciataw. ²¹ Khoccihsaw athua maw kamaw kalan thua lan thawte yn zuakuh. Eubulas, Puden, Linas, Klaudia te uteno`ae balyn nynh nang kha ae beihlang`ae. ²² Bawipaw Jesu Kri tuh na muisaw ryte la um sah. Thawccinaw tuh na kya la um sah. Amen.