2 Thessalonians

¹ Paul, Sailas te Timote nynh ah Paaw Pachia te Bawipaw Jesu Kri kya um`ae paw Thesalon kriccawbu kalan kae beihlang oh. ² Ah Paaw Pachia te Bawipaw Jesu Kri kyate thawccinaw te daenaw tuh nae kya la um vae sah. ³ Uteno`ae, nae zynnaw tuh myarya lethung zah nanning kyaze milu raveih nynh lukheit te lukheit na sungsakunaw oh tuh paepae alui keiccuze kaening nynh cyi lan accan hawte nanning hanlan Pachia kalan lungtuabya pei kae ho. ⁴ Ou tuhte nanning ae tua ae sahnaw oh kya te nae vawsawnaw kya na ngaesang oh zah nae lungsaenawpaw te nae zynnawpaw elan Pachia kya-e kriccawbu`ae kya nanning hanlan kae pookuh. ⁵ Tuh-e tuh Pachia peenaw te angaekuh`ae paw cite nanning kha ria na thua nawlan oh, Pachia kya-e adingpaw byapianaw kha a langsakuh paw nynh thua. Tuh-e peenaw hanlan nynh nanning mah na teing oh. ⁶ Nanning vawsaw ae pya oh paw ccungccaw`ae kha vawsawnaw pyaru lanpaw tuh Pachia hanlan atazaepaw nynh thua. ⁷ Te Bawipaw Jesu nynh athungpaw a vaaw ccungccaw`ae ryte vaawran kyate he yn langku vae ze, vawsaw na teing oh paw nanning kha kaening ryte hae-ungnaw pya khylan, ⁸ Pachia a nyh lei`ae paw tungvaw te ah Bawipaw Jesu Kri thehoypaw kha a ngae lei`ae paw tungvaw kya aruapaw maee khate ccaeliaru paw tuh a hanlan atazaepaw nynh thua. ⁹ Tuh-e ccungccaw`ae tuh Bawipaw a umnaw kyate, te a thungnaw kya-e phu-enaw kyate phiate zungzae ronaw khate detah athua cih`ae, ¹⁰ nanning laku kae ccaekia kha na zyn oh keiccuze, a mithyaa`ae kya phu-esah athua nawlan te a zyn`ae paw balyn laku ngaeang thehoysah athua nawlan, tuh-e nin kya Kri he yn thua te tuhte detah athua cih`ae. ¹¹ Tukeiccu hynh-e konaw te angaekuh lante ah Pachia nynh nanning kha ae riabua nawlan oh, te a hoynaw kya-e ahoypaw lungrythuanaw balyn kha a ccingsah nawlan, te zynnaw kya-e ryalaw kha thungnaw khate a ccingsah nawlan kaening mah nanning hanlan saw pei kae sang. ¹² Ou tuhte ah Pachia te Bawipaw Jesu Kri thawccinaw thyhte, ah Bawipaw Jesu Kri min tuh nanning kya phu-esah athua nawlan, te nanning kha amaw kya phu-esah na thuabua nawlan oh.

¹ Atu uteno`ae, ah Bawipaw Jesu Kri yn thuanaw lanpaw te asekuh lante thuasah, te amaw kalan aening pynkheihlan ah sueluaku oh paw konglang te thuasah, ² Kri kya-e nin tuh phe a thua vae paw lante, kaening kyate oun thua paw olante, muisaw te thuasah, tukhyhze bya te thuasah, tukhyhze ccaky te thuasah, taloi nae bungzou khyh nawlan, tukhyhze nae lungvawsaw khyh nawlan nanning kha kae ngia oh. ³ Hung ccungccaw nynh zemah pawpawte sanmah ae la ling nan oh sah. Tuh-e nin a thua maw, zynnaw kyate khuliakunaw masaty a umty cih, te seinaw ccungccapaw athua paw ronaw ccapaw kha yn langkuh cih. ⁴ Tuh-e paw nynh Pachia cite ko athua paw, tukhyhze beik athua paw kha rawse zah amaw te amaw kha kha-e balyn laelan a hangthungku, Pachia nynh ka thua cite amaw te amaw kha langku te, Pachia tempal kyakhe Pachia hawte nynh a dahung. ⁵ Nae kya ka um lyaze kha-e kong tuh phe kae hopya vae oh cipaw kha na syntaw vae khyh oh tou? ⁶ Te aning tuh amaw ccyh kya yn langku nawlan, atu paw nynh a khee ung cipaw na ny oh. ⁷ Pawccecize kawbya pawlangria leinaw kya-e byakhupaw tuh rya a lah cciamang vae. Tuhzemah atu a kheetupaw kha dae law athua makhia, kha-e kha po a khee ung cih. ⁸ Oute tuh mihoy leipaw tuh yn langkuh vae cih. Kha-e paw kha Bawipaw nynh a khalang kya-e hyte phe a maemih cih zah amaw yn thuanaw kya-e phaephae ahpaw khate phe a roh cih. ⁹ Tuh-e mihoy leipaw yn thuanaw lanpaw tuh Setan ryalawnaw te asekuhpaw thungnaw balyn ryte, muihsanaw`ae ryte, te ahyngpaw khuararunaw`ae ryte, ¹⁰ te ading leipaw lingnaw balyn ryte aroh cih`ae paw kya nynh yn thua cih. Pawkeiccumacize minmin nynh khumnaw mue khylan byaccing kya-e sungsakunaw kha a lawku khyh`ae keiccu nynh thua. ¹¹ Hynh-e keiccu minmin nynh hyngbya kha a zyn ccaw`ae cite Pachia nynh mih tungvaw khe tynkaringpaw zynseinaw kha a sawnua cih`ae. ¹² Ou tuhte byaccing kha zyn leite, dingleinaw kya a lungrythua paw balyn tuh seibe athua nawlan`ae nynh thua. ¹³ Thuasalama Bawipaw nynh a sungsah`ae paw uteno`ae, Muisaw nynh thyaasanaw liate, te byaccing kha zynnaw liate nanning tuh khumnaw mue khylan Pachia nynh atakaw lya mawte phe ae po vae oh keiccuze, nanning hanlan Pachia kalan lungtuabya pei kae ho lanpaw nynh thua. ¹⁴ Nanning nynh ah Bawipaw Jesu Kri kya-e phu-enaw kha na ccoubua nawlan oh, kaening kya-e thehoypaw liate, kha-e khumnaw kalan nanning kha Pachia nynh ae ko oh. ¹⁵ Tukeiccuze uteno`ae, tynkaring lang thadyn oh lah kae bya te thuasah, kae ccaw te thuasah kae ccangpya oh paw kha varyn kyngkuh oh. ¹⁶ Aening kha oun sungsah zah thawccinaw liate zungzae ngaengannaw te ahoypaw ngaehoinaw oun pyatupaw, ah Paaw Pachia te ah Bawipaw Jesu Kri amaw ccaccei nynh, ¹⁷ nae thinlung kha ngae ae ngansah oh sah lah ahoypaw bya te ahoypaw ryalaw miakaw kya ae la tynsah vae oh sah.

¹ Nyathyakou uteno`ae, Bawipaw bya tuh nanning kya phu-esah athua hawte, teitei balyn pung pazaekuh kanmaw zah phu-esah athua nawlan kaening hanlan saw oun la sangpah oh. ² Acyih rarou paw, ahoy leipaw ccungccaw`ae kyate kaening hynh yn luesah nawlan saw oun la sangpah bua oh; pawccecize ccungccaw balyn nynh zynnaw hoi khyh`ae. ³ Thuasalama Bawipaw tuh zyn lan um paw nynh thua. Amaw nynh nanning kha ae tynsah cih oh zah mihoy leipaw kyate ae thungkhaw cih oh. ⁴ Te nanning kaw kae pya oh paw kha atu na cyih oh zah bua na la cyih ung cih oh cite nanning konglang te Bawipaw kya zynkunaw kae hoi. ⁵ Te Pachia sungsanaw lungkhu lang te Kri kya-e lungsaenaw lungkhu lang Bawipaw nynh nae thinlung kha ae la cciakhae oh sah. ⁶ Uteno`ae kaening kyate a mue`ae paw phung thyhte hiin leite angae-aduakuh lei lante a hiin`ae paw uteno miakaw kyate la phiakuh oh cite ah Bawipaw Jesu Kri min te nanning kha kaw kae pya oh. ⁷ Pawccecize naemaw ccaccei nynh kaening kha pawcihte nynh dosuinku lan`ae cipaw na ny oh. Pawccecize kaening tuh nanning kyakhe angae-aduakuh lei lante kae um khyh. ⁸ Ccungccaw lukhakheit kya-e looh kha mah alakaw te kae aepah khyh; thuasalama nanning lukhakheit kya san phuripaw kae thua khyh nawlan, phe kae bang lang khuazi khuadae thawte rya kae lawkuh. ⁹ Tuhte rya kae lawku paw tuh nanning kya-e lawku lan kaw kae hoi khyh keiccu cipaw thua khyh, thuasalama nanning nynh kaening hynh dosuinku khylan nae zui oh ccaw cite nynh thua. ¹⁰ Pawccecize nanning ryte ah umkheih oh lyakha, lukhakheit nynh rya a law khyh lanze, aepaw mah ae nan sah cite kaw phe kae pya vae oh. ¹¹ Pawccecize angae-aduakuh lei lante hiin zah ryalaw kharyh law leite, pei a ccukuh bua`ae paw ccungccaw abang nanning laku a um cite kae thae. ¹² Khatahaw`ae paw tuh daebabilan ryalawkuh`ae sah lah mimaw looh kha ae`ae sah cite ah Bawipaw Jesu Kri liate kaw kae pya`ae zah thawte kae hy`ae. ¹³ Thuasalama uteno`ae, nanning tuh ahoypaw ryalawpaw kya nae lungthawthang nan sah. ¹⁴ Hynh-e ccaky kya-e kae bya hynh lukhakheit nynh a ngae khyh lanze, kha-e paw kha la syntaw oh lah a maethya nawlan la mungkuh nan oh. ¹⁵ Tuhzemah rhaw lukheit hawte tuh la tua nan oh, uno lukheit hawte raeringnaw la pya oh. ¹⁶ Atu daenaw Bawipaw amaw ccaccei nynh ccianaw miakaw kya nanning kha daenaw pei ae la pya vae oh sah. Bawipaw tuh nae balyn kya la um sah. ¹⁷ Kae beihlangnaw oh paw hynh Paul kamaw kuit ccaccei te nynh ka zei; tuh-e tuh ka ccaky takyh kya muihsanaw nynh thua. ¹⁸ Ah Bawipaw Jesu Kri thawccinaw tuh nae balyn kya la um vae sah. Amen.