2 Peter

¹ Jesu Kri kya-e locceihtu te seepaw athua paw Simon Piter nynh ah Pachia te Khumtu Jesu Kri kya-e dingnaw liate aening kya-e te alokuhpaw, aphutepaw zynnaw a hoi`ae paw kalan: ² Pachia nynaw te ah Bawipaw Jesu nynaw liate thawccinaw te daenaw tuh nanning kya la pungthung sah. ³ Phu-enaw te hoyhuanaw liate aening yn kotupaw amaw nynaw liate, hiinnaw te Pachia lante zuakunaw te asekuhpaw uccaw balyn kha Pachia a thungnaw nynh aening kha phe yn pya vae. ⁴ Tuh-e`ae liate nanning tuh Pachiathuanaw a neethungkuh bua`ae paw na thua nawlan oh, myaryamaw alesaepaw te aphutepaw byakinpyakupaw`ae kha aening pya ah thua oh. Ryduanaw liate laephipi kya a um paw ronaw kyate luesah athuakuh koute nynh pya ah thua oh. ⁵ Te hynh-e khylan thawte zuakute nae zynnaw kya hiinzia hoynaw kha biachih oh, hiinzia hoynaw kya nynaw kha biachih oh; ⁶ nynaw kya ahmaw sungku khonaw kha biachih oh, ahmaw sungku khonaw kya taemyasawkunaw kha biachih oh, taemyasawkunaw kya Pachia lante zuakunaw kha biachih oh; ⁷ Pachia lante zuakunaw kya uteno thawccikunaw kha biachih oh, te uteno thawccikunaw kya sungsakunaw kha biachih oh. ⁸ Pawccecize hynh-e uccaw`ae hynh nanning kya um zah apungthung lanze, ah Bawipaw Jesu Kri nynaw kya athae thaesah leite, thanesah leite ae nung lan khyh oh. ⁹ Thuasalama hynh-e uccaw`ae ahoboupaw ccungccaw tuh a mitmoh zah asaw lang muih kho khyh, te arynpaw a seinaw`ae kyate aning tuh thyaasapya athua vae cipaw kha phe a ning. ¹⁰ Tukeiccu uteno`ae, nanning konaw te ponaw kha phe riasaku khylan thawte zuakuh paleih oh; pawccecize tuhte na cyi oh lanze nanning tuh na khuliakuh boi lan khyh oh. ¹¹ Pawccecize hynhcihte nynh ah Bawipaw te oun Khumtu Jesu Kri kya-e zungzae atynpaw peenaw lungkhu lang teenaw kha nanning hanlan phe beih lang raepya athua cih. ¹² Tukeiccu kha-e uccaw`ae kha na nyh oh zah atu e byaccing kya tynsah na thua vae oh zemah, hynh-e uccaw`ae kong nanning kha pei liathuisah khylan kae tuh ka sawphahkuh lan khyh. ¹³ Athua, hynh-e bu kya kae ka um lungkhu balyn liathuisanaw te nanning kha lungthosah lanpaw tuh akyhpaw cite nynh ka tua. ¹⁴ Ah Bawipaw Jesu Kri nynh kamaw kha phe yn muihsah vae hawte, hynh-e ka bu tuh aro mawze ka cciataw hahe cih cipaw ka ny. ¹⁵ Tuhlaeze, kae ka chih koute nanning nynh hynh-e uccaw`ae hynh pei na liathui nawlan oh kae thawte ka zuakuh cih. ¹⁶ Pawccecize ah Bawipaw Jesu Kri kya-e thungnaw te yn thuanaw lanpaw kha nanning kalan kaening nynh he kae hopya vae oh ze cyiruh-ccaccu lang raenoihpaw phungpaw`ae kha kaening nynh kae mang khyh, thuasalama kaening tuh a lesaenaw kong mit te a muih`ae paw ccaekia`ae nynh kae thua. ¹⁷ Pawccecize, Paaw Pachia kyate sawtuanaw te phu-enaw kha aning nynh he a mue tuh, “E paw tuh ka sungsahpaw ka Ccapaw nynh thua, amaw kya ka lungrythua,” cite Alesae Huapaw Phu-enaw kyate amaw kalan roi yn thua. ¹⁸ Te vaawran kyate yn thua paw tuh-e roi kha athyaapaw mua vawlan amaw ryte kaening kae um lyakhe kae thae. ¹⁹ Te houh ariapaw profehbya kya-e bya kha mah aening ah hoi ung oh. Khua adae makhia nae thinlung kya nizy yn langkuh cia, mohnaw kya a awpaw awnaw hawkhate kha-e bya na ngae oh paw tuh nanning nynh kou hoy lang na cyi oh paw nynh thua. ²⁰ Ccathyaa kya-e profehbya tuh maw rynaw te asuilan leihkupaw kyate thua khyh cipaw hynh masaty nyh oh. ²¹ Pawccecize profehbya tuh ccungccaw rynaw thyhte yn thua boi khyh, thuasalama Pachia kya-e athyaapaw ccungccaw`ae tuh Thyaa Muisaw nynh a cciakhae`ae thyhte nynh a ho`ae.

¹ Thuasalama ccungccaw`ae laku ahme leipaw profeh`ae mah a la um`ae, tuhhawte ahme leipaw ccangpatu`ae nae laku yn langkuh cih`ae. Minmin nynh ccungccaw arosahthya paw ahme leipaw ccangpyakunaw kha aphiru lante yn teekhae cih`ae, te mimaw kha a retupaw Bawipaw hei kha a ei`ae keiccu mimaw tungvaw arangpaw ronaw kha a thuakhaekuh`ae. ² Te ccungccaw patae nynh mih kya-e ronawpaw kalan ccianaw kha a zui cih`ae zah minmin keiccuze byaccing kya-e ccianaw tuh thethyaho athua cih. ³ Duanaw liate hyngpaw bya`ae khate minmin nynh nanning kha amia ae ccungnawkuh cih oh. Langmaw lya mawte minmin byapianaw tuh amaw um lan hung um khyh, te minmin kya-e ronaw mah ih khyh. ⁴ Pawccecize aseipaw vaaw ccungccaw`ae kha Pachia nynh a haang khyh ze, thuasalama hell lungkhu lang boh sah`ae zah byapia khylan nungde zah mohnaw kya-e sivarui te phang a khii`ae ze; ⁵ te Pachia rawrih lei`ae paw umnaw laephipi vawlan tuipayn a ynsaku lyakha, arynpaw laephipi kha a haang khyh ze, thuasalama dingnaw phunghotu Noah ry ccungccaw lutarya kha a khum`ae ze; ⁶ te Sodom te Komorah khuapi`ae kha dae dawleih te buhaw lang tangsah zah ronaw kalan sei a be ze, Pachia rawri leite a hiin vae cih`ae paw hanlan dosuinku nawlan a rae ze; ⁷ te ccungccahoy lei`ae kya-e anungsikuhpaw ozia nynh lungvaw a sawsah paw adingpaw Lot kha a luesah ze, ⁸ (pawccecize tuh-e adingpaw ccungccapaw tuh minmin laku a um lya, mih kya-e kawbya pawlangria leipaw cyisahnaw`ae kha nin takyh muihte thaete, adingpaw a hiinnaw-muisaw tuh lungvawsawsah athua), ⁹ Oute Pachia rawrih`ae paw kha tuh-ounaw kyate pawcihte nynh luesah lan cipaw, te atazae lei`ae paw kha detah khylan byapianaw nin hanlan pawcihte nynh nungde lan cipaw Bawipaw nynh a ny. ¹⁰ Abapi lante athyaa leipaw kya-e ryduanaw kya pynsaw rynaw thyhte a hiin`ae paw te kawhoinaw pawlangria lei`ae paw kha pawcihte nynh detah lan cipaw Bawipaw nynh a ny. Minmin tuh apuaatho` ae paw, mih ry thyhte a um`ae paw, phu-e`ae paw kha thethya ho lan a rih lei`ae paw nynh thua`ae. ¹¹ Mimaw laeze thunghua`ae zah mih thawsae huapaw vaaw ccungccaw`ae nynh Bawipaw malang minmin tungvaw kya saryapaw seibenaw kha rae khyh`ae. ¹² Thuasalama minmin tuh kyng khylan te chia khylan rae athua paw, tuanaw hoi leipaw lorangsaw`ae hawte, mimaw nynh a ny lei`ae paw uccaw`ae kong kha thethyaho`ae zah mimaw ccouseikunaw kya khaleih aroh cih`ae. ¹³ Te dingleinaw kya-e cyinaw mee kha a mue cih`ae. Khuadae ccyh kya hoysapaw kha minmin nynh lungrythua nawlan a ria`ae. Nanning ryte poitua lya`ae ming`ae lingnaw te ahoysah`ae, minmin tuh akalyhkuhpaw te athupaw abekuhpaw nynh thua`ae. ¹⁴ Lungtyn leipaw ccungccaw`ae kha soih te milae zu milae vawpaw kya seinaw mit te phe beih`ae zah sei leite um kho khyh`ae. Mih thinlung nynh karangkunaw kha thya zah minmin tuh thyalawpaw ccaaw`ae nynh thua`ae. ¹⁵ Minmin nynh ahmepaw ccianaw kha vuasya`ae zah laanpi phe me vae`ae. Beor ccapaw, Balaam ccianaw kha nynh a zui`ae. Balaam tuh dingleinaw mee a ry paw nynh thua. ¹⁶ Thuasalama a cyiseimenaw hanlan aning tuh pe athua. Bya ho leipaw lann nynh ccungccaw roi lante bya ho zah kha-e profehpaw a ngaeenaw kha a khee. ¹⁷ Hynh-e`ae tuh tui a um leipaw tuikhua`ae, khisang nynh po cciakhae paw maeking`ae nynh thua`ae. Minmin hanlan karaezipaw mohnaw kha zungzae nungpya athua. ¹⁸ Pawccecize a cceihsei`ae paw kyate kou ru lante a lue`ae paw kha apokuh paw accakaepaw bya te thuasah, pynsaw ryduanaw`ae te thuasah, ohhuakunaw te thuasah minmin nynh a soih`ae. ¹⁹ Ming`ae kha luenaw kong byakinpyaku`ae lyakhe, mimaw te mimaw tuh ronaw see`ae nynh thua`ae. Pawccecize ccungccaw lukheit tuh ccangkhakheit nynh a tae lanze, aning tuh tuh-e see nynh athua. ²⁰ Pawccecize Bawipaw te Khumtu Jesu Kri nynaw liate minmin tuh laephipi kyae athu-anangpaw`ae kyate phe a lue`ae koute, kha-e`ae kya bua kaangkae`ae zah kha-e`ae nynh a tae`ae lanze, nyalang e minminthuanaw tuh atakaw laeze houh a seihua vae. ²¹ Pawccecize adingpaw laanpi kha phe a nyh kou`ae te, minmin kalan pya athua paw athyaapaw kawpyapaw kyate paleihku lae tuh kha-e adingpaw laanpi kha a la ny khyh`ae ze mih hanlan a la hoyhua cih paw. ²² Thuasalama, “Ui nynh tuh amaw a lua kha bua a kinua,” te, “A singkuh vae paw vohpinung nynh a ohkunaw ccingccua kha bua a kinua,” acikuh paw ahmepaw phungtangbya thyhte minmin tungvaw kya acyikuh.

¹ Sungsah`ae paw, hynh-e vaeningnaw ccaky hynh atu nae kalan ka zei. Ccaky paryh khate na liathui nawlan oh athyaapaw nae tuanaw-thinlung kha kae thosah oh. ² Langmaw lya athyaapaw profeh`ae nynh a ho`ae paw bya`ae te Bawipaw Khumtu a locceihtu`ae athua paw kaening kawpyapaw kha nanning nynh na liathui nawlan oh nynh kae zei. ³ Masaty ny lanpaw tuh, nyathyakou ccyh kya, mimaw ryduanaw thyhte a hiin`ae paw ccungccaw saryatu`ae oun langkuh cih`ae; ⁴ te minmin nynh, “Amaw yn thuanaw lanpaw byakinpyakupaw tuh teisangmou? Pawccecize minpaaw`ae a i`ae ccyh kyate tho zah pawpaw balyn tuh raenaw athonaw kya hawmawte nynh atu mah po acyiku,” a ci`ae. ⁵ Pawccecize langmaw lya vaawran`ae tuh Pachia bya liate nynh a la um, te tui akhung lang te tui kya nynh laephi hynh Pachia bya liate a um cipaw, ⁶ khaccyh lya a la um paw laephipi kha kha-e tui nynh khaleih vu zah phe aroh cipaw kha minmin nynh riarou nyhry khyh`ae. ⁷ Thuasalama atu a um paw vaawran`ae te laephi hynh, byapianaw nin te Pachia pawlangria leipaw ccungccaw`ae ronaw nin kyacia maee te rua khylan kha-e bya liate phang ccy athua. ⁸ Thuasalama sungsah`ae, Bawipaw hanlan nin kheit tuh kum thungkheit hawte, te kum thungkheit tuh nin kheit hawte athua paw hynh-e uccaw ccangkheit hynh ny leite um nan oh. ⁹ Ccungccaw abang nynh a khysungpaw lante a tua`ae hawte, Bawipaw tuh byakinpyakupaw kong lante a khysung khyh. Thuasalama ccungccaw balyn nynh a ngaesiku nawlan`ae, lukheit san aro lanpaw a ry khyh keiccu nynh aening kya a lungsae. ¹⁰ Thuasalama Bawipaw nin tuh khuazi kya miruh a thua hawte nynh yn thua cih. Tuh-e nin kya vaawran`ae tuh alepipaw siaruanaw khate azo cih, te laephipi raenawpaw uccaw`ae tuh myarya asopaw sonaw nynh palae tuisah cih, laephi mah, te laephi kya um paw ryalawnaw`ae mah maee nynh pung a u cih. ¹¹ Oute hynh-e uccaw`ae balyn tuh ro athua cih keiccuze, athyaapaw hiinnawzia te Pachia rawrinaw kya pawtahawpaw ccungccaw`ae lang mou thua lan na ccan oh? ¹² Pachia kya-e nin yn thua lanpaw kha ngaehoite na ngaw oh paw thua keiccu tuhte na hiin lan oh paw nynh thua. Tuh-e nin keiccu vaawran`ae tuh maee te ro athua cih, te myarya asopaw sonaw nynh laephipi raenawpaw uccaw`ae kha pung a tuisah cih. ¹³ Tuhzemah aening tuh a byakinpyakupaw thyhte dingnaw a umnaw athawpaw vaawran`ae te athawpaw laephi nynh ah ngaw oh. ¹⁴ Tukeiccu sungsah`ae, kha-e uccaw`ae kha na ngaw oh keiccu, nanning tuh athupaw um leite, ccaenaw hoi leite, daenaw kya amaw nynh ae muih nawlan oh thawte zuakuh oh. ¹⁵ Aening nynh ah sungsah oh paw, ah unopaw Paul nynh mah amaw kya pya athua paw hawnaw thyhte nanning kalan phe a zei vae hawkhate, ah Bawipaw ngaesangnaw tuh khumnaw nynh thua cipaw kha la tuathya oh. ¹⁶ Hynh hawte a ccaky`ae balyn kya mah hynh-e uccaw`ae kong hynh a la ho. A ccaky`ae kya thaethya lan arupaw uccaw`ae abang a um. A ccangkuh lei`ae paw te atyn lei`ae paw nynh ccangpaw Ccathyaa`ae kha mah phe a maeleih`ae hawte mimaw ronaw hanlan phe maeleih`ae. ¹⁷ Tukeiccu, sungsah`ae nanning, hynh-e uccaw`ae hynh na nyty vae oh hawte, ccungccahoy lei`ae kya-e cyiseinaw khate cciakhaesei na thua khyh nawlan oh, naemaw na tynnaw oh kyate na khuliaku khyh nawlan oh nanning mah la raeringkuh oh. ¹⁸ Thuasalama thawccinaw kya, te ah Bawipaw te Khumtu Jesu Kri nynaw kya lethung oh. Amaw kya atu te zungzae cia phu-enaw po um sah. Amen.