2 Corinthians

¹ Pachia rynaw liate Jesu Kri locceihtu athua paw Paul, te kae unopaw Timote nynh Korin khuapi kya a um paw Pachia kya-e kriccawbu kya te Akhai ram balyn kya um paw mithyaa`ae balyn kya ry: ² Ah Paaw Pachia te Bawipaw Jesu Kri kyate thawccinaw te daenaw tuh nae kya la um sah! ³ Ngaethya-umsanaw Paaw te ngaengansanaw balyn Pachia athua paw, ah Bawipaw Jesu Kri a Paaw, Pachia tuh thehoy te um sah. ⁴ Pachia nynh aening ahmaw ngae oun ngansanawpaw, ngaengansahnaw khate vawsawnaw a tung`ae paw kha aening nynh ngae ah ngansah nawlan oh, ah vawsawnaw balyn kya aening kha ngae oun ngansah. ⁵ Pawccecize Kri kya-e teingnaw tuh aening kya myarya alung hawte, Kri liate aening kya-e ngaengannaw mah myarya alung. ⁶ Te kaening tuh vawsaw kae teing zemah, tuh-e tuh nae ngaengannaw hanlan te khumnaw hanlan nynh thua. Kaening nynh kae teingpaw, kha-e teingnaw`ae phang ngaesangnaw tuh accungkiapaw nynh thua. Tukhyhze kaening tuh ngaengansah kae thua ze, tuh-e tuh nae ngaengannaw hanlan te khumnaw hanlan nynh thua. ⁷ Te nanning hanlan kaening ngaehoinaw tuh tynkaring. Nanning tuh teingnaw a neethungkuh bua`ae paw nynh na thua oh cipaw kae ny hawte, ngaengannaw mah a neethungkuh bua`ae paw nynh na thua oh. ⁸ Pawccecize uteno`ae, Asia ram kya kaening kya yn thua paw vawsawnaw kha nanning ny leite na um lan oh paw kae ry khyh. Tou kho um lei lan, thawzung nynh taening lei lan, hiinnaw heize ngaehoi um vae lei lan kaening tuh phuripaw nynh oun ne. ⁹ Kaening nynh kaemaw te kaemaw kae doliaku khyh nawlan, thuasalama a chih`ae paw a thosah paw Pachia kha kae doliaku nawlan, kaemaw tuh chi lan byapae vae paw nynh kae thua. ¹⁰ Tuh-e Pachia nynh khacih alepaw chinaw kyate kaening kha oun luesah zah atu mah oun luesah. Amaw nynh bua oun luesah ung cih cite amaw kha kae doliakuh. ¹¹ Ccungccaw patae nynh kaening oun pya`ae paw lasung hanlan, ccungccaw patae nynh kaening ccelang lungtuabya a ho nawlan`ae nanning nynh mah sawsangnaw te pynkheihlan nae bawng oh. ¹² Pawccecize kaening kae pookunaw tuh e hynh nynh thua, pynsaw hawnaw te thua leite, thuasalama Pachia thawccinaw liate, lungthyaanaw te, te thanccingte Pachia rawrinaw te nynh laephipi kyahin kae um cipaw tuh kaemaw nykunawpaw thinlung nynh ccaekiakhan; nanning kya khate nynh houh kae um. ¹³ Pawccecize nanning nynh na ria oh zah phe na thaethya vae oh paw laelan, ccangpaw uccaw kha nanning kalan kae zei khyh; athangnaw cia hei nanning nynh khaleih na thaethya cih oh cite ka ngaehoi. ¹⁴ Nanning nynh kaening hynh abang te nae thaethya vae oh hawte, Bawipaw Jesu nin kya nanning tuh kaening kae pookunaw na thua oh hawte, kaening mah nanning na pookunaw oh paw nynh kae thua. ¹⁵ Te nanning nynh vaeningnaw thanenaw na hoi ccaw oh cite hynh-e zynkunaw kya, kae tuh nanning kalan thuaty lan ka tuakuh. ¹⁶ Te nanning kha po cciakhung lan zah Mesidonia ram lungkhu lang ccia lan, te Mesidonia ram kyate nanning kalan bua thua lan zah nanning nynh Judah ram lang ka khuaccungnaw kya nae cciakhae ccaw oh cite ka tuakuh. ¹⁷ Tukeiccu tuhte ka tuaku lyakha zawphalae lang tou ka cyi? Tukhyhze ka paccynkupaw uccaw kha kamaw kya Athua, Athua, ci lante Thua khyh, Thua khyh, hung ci lan cite ccungccaw lante tou ka paccynku? ¹⁸ Thuasalama Pachia tuh zyn lan um paw athua thyhte, nae kya kae hopaw bya tuh, Athua te Thua khyh cipaw thua khyh. ¹⁹ Pawccecize kaening, kamaw, Silvanas te Timote nynh kae hopaw Pachia Ccapaw Jesu Kri tuh Athua, Thua khyh, cipaw thua khyh, thuasalama amaw kya tuh Athua ci mawcci. ²⁰ Pawccecize amaw kya Pachia kya-e byakinkupaw balyn tuh Athua, ci thua zah aening liate Pachia phuenaw hanlan amaw kya tuh Amen, ci nynh thua. ²¹ Atu nanning ryte kaening kha Kri kya oun tynsah paw te aening satho oun thuh paw tuh Pachia nynh thua. ²² Tuh-e Pachia nynh aening kha tazeih phe oun khia vae pyatypaw lante Thyaa Muisaw kha ah thinlung kya phe yn pya vae. ²³ Tuhlaeze nanning kha vawsaw kae pya ry khyh oh pawte nynh kae tuh Korin khuapi kalan kae thua vae khyh cipaw ka hiinnaw-muisaw tungvaw ccaekia lang Pachia kha ka koku. ²⁴ Nae zynnaw vawlan uknaw kaw kae hoi paw thua khyh, thuasalama nae lungtuanaw elan ryalahkheihtu`ae nynh kae thua; pawccecize zynnaw liate nynh nanning tuh na thadyn oh.

¹ Thuasalama ngaethyanaw ryte nanning kalan bua kae thua lan khyh cite kamaw te kamaw bya phe ka paeku vae. ² Pawccecize kae nynh nanning kha ngae kae thyasah oh ze, kae nynh ngae ka thyasah paw nanning laelan hungmou kae lung yn tuasah paw tuh? ³ Te he kae thua vae ze, lungtuanaw hoi lan ka ccan paw ccungccaw`ae kyate ngaethyanaw ka hoi sei khyh nawlan nynh hynh-e ccaccei hynh nae kalan ka zei; ka lungtuanaw tuh nae balyn lungtuanaw nynh thua cipaw nae balyn kya zynkunaw ka hoi. ⁴ Pawccecize vawsawnaw pataepi kyate, lungriathaenaw kyate, mitphi patae ryte nynh nae kalan ka zei, nae thinlung cci ccaw cite ka zei khyh, thuasalama nanning kha pawcih nynh kae sungsah oh cipaw na ny oh ccaw cite nynh ka zei. ⁵ Thuasalama lukhakheit nynh thinlungccinaw a pousah lanze, kamaw hynh thinlung yn ccisah khyh, thuasalama nae balynte azawnaw thinlung ae ccisah oh; ou tuhte nae balyn tungvaw eih a reipaw ka thua khyh nawlan. ⁶ Ccungccaw lunghua nynh a pya`ae paw detahnaw tuh khahtahawpaw ccungccaw hanlan azaw. ⁷ Phin ccang lante, nanning nynh kha-e paw kha ngaethya paleih oh lah soihbia paleih oh; tukhyh lanze khahtahawpaw ccungccaw kha eih ngaethyanaw nynh phe a laangsei cih. ⁸ Tukeiccu kha-e paw na sungsanaw oh paw kha nanning nynh la langsapah oh cite kae ngia oh. ⁹ Pawccecize pawpaw balyn kya nanning tuh kaw na ngae oh ta cipaw ka ny ry keiccu nynh hynhte ka zei. ¹⁰ Nanning nynh ccangkhakheit na ngaethya oh paw ccungccaw kha kae nynh mah ka ngaethya; pawccecize kae nynh ccangkhakheit kha ka ngaethya ze, kha-e paw kha Kri malang nanning liate nynh ka ngaethya. ¹¹ Tukhyh lanze, Setan nynh aening kya ccyhhoypaw kha a lawkuh sei cih; pawccecize a thyaruhnaw kha ny leite ah um khyh oh. ¹² Tuhlaeze, Kri thehoypaw ho lan Troas khua lang he ka thua tuh Bawipaw nynh kae kha thuakaw yn hungpya. ¹³ Ka neitaw Titu kha ka muih khyh keiccuze ka lungdae khyh; te minmin kha akhue ka dyhkuh`ae zah tuin kyate Mesidonia lang ka cceih. ¹⁴ Atu Kri kya taenaw kalan aening kha pei yn cciakhae paw te ahmin takyh kya aening liate amaw nynaw mynkhuhpaw a langsakuh paw Pachia kalan lungtuabya ho thuasah. ¹⁵ Pawccecize kaening tuh khum athua`ae paw kya thuasah, aroh`ae paw kya thuasah, Pachia kalan Kri kya-e mynkhuhpaw nynh kae thua. ¹⁶ Lukheitpaw hanlan chinaw kyacia chinaw kya-e mynkhuhpaw nynh kae thua; mingccangpaw hanlan hiinnaw kyacia hiinnaw kya-e mynkhuhpaw nynh kae thua. E uccaw`ae hanlan hungmou a zaw paw a um? ¹⁷ Pawccecize kaening tuh ccungccaw patae hawte, Pachia bya kha amia lang a zuakuh`ae paw kae thua khyh; thuasalama Pachia kya-e`ae hawte thinlung thanccingte, Kri kya Pachia malang nynh kae ho.

¹ Kaening tuh kaemaw te kaemaw tou bua kae thehoysakuh? Tukhyhze nanning kalan thehoysanawpaw ccaw`ae khyh ze nanning kyate thehoysanawpaw ccaw`ae kha, mingccang`ae abang hawte kaening kae peki tou? ² Nanning tuh kae thinlung kya azeikuh paw ccaw, ccungccaw balyn nynh nyh`ae zah a ria`ae paw, kaening ccaw nynh na thua oh. ³ Ccatui te zei paw na thua khyh oh, thuasalama a hiinpaw Pachia Muisaw te zei paw nynh na thua oh; lung ccalung kya zei na thua khyh oh, thuasalama thinlung kya-e ngesaw ccalung kya zei paw na thua oh zah kaening ryalawnaw liate raerae alangkuh lan phy paw Kri kya-e ccaw nynh na thua oh. ⁴ Te kaening tuh Kri liate Pachia kalan tuhtahawpaw doliakunaw kae hoi. ⁵ Ccangkhakheit kha kaemaw kyate oun thua paw tuaku lan kaemaw te kaemaw phe kae ccing cipaw thua khyh, thuasalama kaening kya-e ccingnaw tuh Pachia kyate nynh thua. ⁶ Tuh-e Pachia nynh byakin thaw kya-e ryalahtu`ae olante kaening kha phe oun rae vae; ccaw kya-e thua khyh, thuasalama Muisaw kya-e nynh thua; pawccecize ccaw nynh tuh a chia, thuasalama Muisaw nynh tuh hiinnaw a pya. ⁷ Thuasalama azo avae paw Mawsi mitmae phu-enaw keiccuze, Israel ccungccaw`ae nynh a mae kha riri a do kho lei lan`ae cia, lungphe vawlan khiate zei paw, chinaw ryalawnaw tuh a phu-e lan thua ze, ⁸ Muisaw ryalawnaw tuh houh phu-esah thua lan khyh tou? ⁹ Pawccecize seibenaw rylawnaw nynh phuenaw a hoi lanze, dingnaw ryalawnaw tuh phu-enaw te houh abeih cih. ¹⁰ Pawccecize tuh-e phe beihpaw phu-enaw keiccu, langmaw phu-esah a la thua paw hei kha phu-enaw hoi vae khyh. ¹¹ Pawccecize azo avae paw nynh a phu-e lanze, po atynpaw tuh houh a phu-e. ¹² Tuhte khahtahawpaw ngaehoinaw kae hoi keiccuze kaening tuh rawhoy te nynh kae ho. ¹³ Te azo lyaccya paw uccaw athangnaw kha Israel`ae nynh riri a do kho khyh`ae ccaw cite a mae a khungkuhpaw Mawsi hawte kae thua khyh. ¹⁴ Thuasalama mih tuanaw-thinlung tuh phe amoh; pawccecize atunin cia Byakin Ryn rianaw kya tuh-e khungkupaw tuh lawpya leite phang a um ung; tuh-e khungkupaw tuh Kri kya nynh zosah athua. ¹⁵ Thuasalama atunin cia hei Mawsi kawbya kha he a ria vae `ae ze, mih thinlung kha khungkupaw nynh phang a bong ung. ¹⁶ Tuhzemah lukheit nynh Bawipaw kalan he a paleihkuh tuh khungkupaw kha lawpya athua vae. ¹⁷ Te Bawipaw tuh Muisaw nynh thua; te Bawipaw kya-e Muisaw a umnaw tuh luenaw a um. ¹⁸ Thuasalama aening balyn tuh lyngpyapaw mitmae lyngpya te muinsado kya do hawte, Bawipaw phu-enaw kha ah do oh; Bawipaw Muisaw liate rulaepaw hawte, aening tuh phu-enaw kyate phu-enaw kalan alokuhpaw muinsan lungkhu lang rulae ah thua cciamang oh.

¹ Tukeiccu kaening tuh ngaethya umsanaw kha kae ccou hawte, hynh-e ryalawnaw hynh kae hoi thyhte kae lungthang khyh. ² Thuasalama thyaruhnaw te hiin leite, Pachia bya kha ccungccaw ling nawlan mang leite, maethya lan um paw thuruh paw uccaw`ae kha phya kae vua vae. Thuasalama byaccing langsapyakunaw liate, Pachia malang ccungccaw miakaw mawtemaw nykunaw kalan kaemaw te kaemaw kha kae ahkuh. ³ Thuasalama kaening kya-e thehoypaw tuh phang khung athua heize, tuh-e tuh azo lya ccya`ae paw kalan nynh phang khungpya athua. ⁴ Pachia muinsan athua paw, Kri kya-e aphu-epaw thehoypaw awnaw nynh a zyn lei`ae paw kya a aw khyh nawlan, kha-e`ae tuanawthinlung kha atu she e pachia nynh phe amohsah. ⁵ Pawccecize kaening nynh kaemaw kong kha kae ho khyh, thuasalama Kri Jesu tuh Bawipaw nynh athua cipaw, te Jesu keiccuze kaening tuh nanning see`ae nynh kae thua cipaw kha kae ho. ⁶ Pawccecize mohnaw kyate awnaw awsah khylan, kawpyatupaw Pachia nynh Jesu Kri mae kya Pachia kya-e phuenaw nynawpaw awnaw kha pya khylan, ah thinlung kya phe a awsah vae. ⁷ Thuasalama thungnaw kya-e lesae huaccenaw tuh kaening kya-e thua leite, Pachia kya-e athua nawlan, laephi ang`ae kya hynh-e sisua hynh kaening nynh kae hoi. ⁸ Hawlang hawlang te vawsaw kae tung, tuhzemah phe miade kae thua khyh; kae lungvawsaw, thuasalama kae lungthang khyh; ⁹ oun tua oun sah`ae, thuasalama ccaring vuasya kae thua khyh; oun khulia`ae zemah ro kae thua khyh. ¹⁰ Jesu a hiinnaw kha mah kae pyn kya a langku ccaw cite Bawipaw Jesu a chinaw kha kae pyn kya pei kae phubia. ¹¹ Pawccecize Jesu a hiinnaw kha mah a chihthyapaw kae pynsaw kya a langku ccaw cite, Jesu keiccuze a hiin`ae paw kaening kha chinaw kalan pei oun thuakhae`ae. ¹² Tukeiccu kaening kya tuh chinaw nynh ryalah, thuasalama nanning kya tuh hiinnaw nynh ryalah. ¹³ Te, “Kae tuh ka zyn, tukeiccu nynh ka ho,” cite azeiku thyhte, alokuhpaw zynnaw muisaw kha kae hoi pawte, kaening mah kae zyn, tukeiccu nynh kae ho. ¹⁴ Bawipaw Jesu kha a thosatupaw nynh Jesu liate kaening kha mah oun thosabua cih zah nanning ryte amaw kalan oun umsah bua cih cite kae ny. ¹⁵ Pawccecize ccungccaw patae nynh lungtuabya honaw liate, Pachia phu-enaw hanlan, paepaeluipaw thawccinaw tuh phe abia ccaw cite, pawpaw balyn tuh nanning hanlan nynh thua. ¹⁶ Tukeiccu kae lungthang khyh. Atolang-e kae ccungccaw tuh rohsah lazemah, alungkhu lang-e ccungccaw tuh nin kheit koute nin kheit thawsah athua. ¹⁷ Pawccecize sosoh kyalya teing athua paw, zawbahaepaw kae kya-e vawsawnaw nynh myaryasangkae akhingccipaw zungzae phu-enaw kha kae hanlan houh oun raepya. ¹⁸ Tukeiccu muih paw uccaw`ae kha kae do khyh, thuasalama muih leipaw uccaw`ae kha nynh kae do; pawccecize muih paw uccaw`ae tuh sosoh nynh atyn, thuasalama muih leipaw uccaw`ae tuh zungzae atyn.

¹ Pawccecize a laephi inn, hynh-e bu hynh ro athua lanze, kuih te rae leipaw inn, Pachia nynh sak paw inn, zungzae atynpaw vaawran kya ah hoi oh cipaw ah ny oh. ² Pawccecize vaawran a um paw aening umnawpaw ryte ccaanku lanpaw kha myarya ah peki oh pawte, e laephi inn kya aening tuh ah hawkhaekuh oh. ³ Tuhte phe ah ccaanku vae oh ze, aening tuh ah sahse te oun muih vae lan khyh`ae. ⁴ Pawccecize e bu kya ah um oh paw aening tuh phupaw nynh phang oun ne pawte ah hawkhaekuh oh; uccaw te ah ccaankuh ry khyh oh keiccu thua khyh; thuasalama a chihthyapaw kha hiinnaw nynh po a laang ccaw cite, aening tuh houh ccaan ah thua oh. ⁵ Atu hynh-e uccaw ccaccei hanlan aening oun paccyntupaw tuh Pachia nynh thua. Tuh-e Pachia nynh Muisaw athua paw pyatypaw kha mah phe oun pya vae. ⁶ Tukeiccu aening tuh pyn inn kya ah um lya oh tuh, Bawipaw kya ah um khyh oh cipaw kha nybiate, pei ah zynku oh. ⁷ Pawccecize aening tuh zynnaw liate nynh ah hiin oh, muihnaw liate ah hiin khyh oh. ⁸ Pyn kya um vae leite, Bawipaw ryte umkheih lanpaw kha ah ry oh zah ah zynku oh. ⁹ Tukeiccu aening tuh ah um oh zemah, ah um vae khyh oh zemah, amaw lungrythuasah lanpaw kha nynh ah paccynku oh. ¹⁰ Pawccecize ahoypaw thuasah, athahpaw thuasah pynsaw kya a cyi paw thathyhte milu raveih nynh a cyi paw kha a mue nawlan, aening balyn tuh Kri byapianaw tungkhung malang marya ah langkuh hahe cih oh. ¹¹ Tukeiccu Bawipaw rawrinaw kha nybiate, ccungccaw`ae kha kae soih`ae; thuasalama kaening tuh Pachia nynh hoyte ny paw nynh kae thua, naemaw nykunaw thinlung kya ny paw mah kae thua cite ka zyn. ¹² Pawccecize nanning kalan kaemaw te kaemaw kha bua kae thehoysakuh khyh. Thuasalama thinlung kya thua leite mitmuihnaw kya a pookuh`ae paw kha na khung kho nawlan oh, kaening hanlan na pooku nawlan oh ccyhhoypaw kha kae pya oh. ¹³ Pawccecize kaening tuh lungkyh lei`ae paw kae thua ze, Pachia hanlan nynh thua, tukhyhze kaening tuh lungkyh`ae paw kae thua ze, nanning hanlan nynh thua. ¹⁴ Pawccecize, ccungccaw lukheit nynh ccungccaw balyn hanlan a chi lanze, ccungccaw balyn tuh a chih`ae cite; ¹⁵ te a hiin`ae paw nynh atu te mimaw hanlan hiin vae leite, mih hanlan chih zah bua a thothuipaw hanlan a hiin ccaw `ae cite nynh aning tuh ccungccaw balyn hanlan a chi cite kae tua pawte, Kri kya-e sungsakunaw nynh kaening kha umkhaeku kho lei lan rya oun naw. ¹⁶ Tukeiccu atu te vae tuh hung ccungccaw sanmah pynsaw lante kae nyh vae khyh; pynsaw lante Kri kha kae la ny zemah atu te vae tuh tuhte kae nyh vae khyh. ¹⁷ Tukeiccu lukhakheit tuh Kri kya a um lanze, aning tuh raethawpaw ccungccaw nynh thua; arynpaw uccaw`ae tuh marya azo vae; dotua, pawpaw balyn tuh athawpaw lang oun tang vae. ¹⁸ Te pawpaw balyn tuh Pachia kyate nynh thua; amaw kalan aening kha Jesu Kri liate bua oun ccawsakuthui zah bua ccawkuthuinawpaw ryalaw kha kaening oun pya; ¹⁹ tuhe tuh, Pachia tuh Kri kya um zah, laephi ccungccaw`ae mih cyiseinaw`ae kha ccuinpya vae leite, minmin kha amaw kalan bua a ccawsakuthui`ae cipaw kha nynh thua, te bua ccawsakuthuinawpaw bya kha kaening kalan phe oun ahpya vae. ²⁰ Oute atu kaening tuh Kri hanlan locceihtu`ae nynh kae thua; kaening liate Pachia nynh ae hy oh paw hawte, nanning tuh Pachia kalan bua ccawkuthui oh cite Kri ccelang kaening nynh nanning kha kae ngia oh. ²¹ Pawccecize aening tuh Kri kya Pachia dingnaw ah thua nawlan oh, seinaw a nyh leipaw amaw kha Pachia nynh aening hanlan a seipaw lang a rae.

¹ Te kaening, amaw ry pynkheihlan ryalahtu`ae nynh mah Pachia thawccinaw kha alakaw lang na ccou han khyh nawlan oh nanning kha kae ngia oh. ² Pawccecize Pachia nynh hynhte a ho: “Lehkhan lan accan ccyh kya nang kha phe kae thaepya vae, te khumnaw nin kya nang kha phe kae bawng vae,” a ci; dotua, atu hynh lehkhan lan accan ccyh nynh thua; dotua, atu hynh khumnaw nin nynh thua. ³ Kae ryalawnaw tuh ccae athua khyh nawlan, ming`ae khuliakunaw kha pawpaw kya sanmah kae rae khyh. ⁴ Thuasalama pawpaw kya balyn, kaening tuh Pachia ryalahtu`ae kae thuanawpaw kha kaemaw nynh kae langsaku: Pataepi phang ngaesangnaw kya, vawsawnaw`ae kya, ahobounaw`ae kya, lungvawsawnaw`ae kya; ⁵ ziabuanaw`ae kya, thungsawnaw`ae kya, keisukeilae umnaw`ae kya, arupaw ryalawnaw`ae kya, i leite umnaw kya, haedante umnaw kyakhe, ⁶ thinlung thyaanaw liate, nynaw liate, khaw teingnaw liate, thawccithyanaw liate, Thyaa Muisaw liate, thanccingpaw sungsakunaw liate, ⁷ byaccing kyae bya liate, Pachia kya-e thungnaw liate, ranglang kuih te voilang kuih kya dingnaw kya-e zunghe liate, ⁸ sawtuanaw te sawtua leinaw liate, ahoy leipaw te ahoypaw thaesanaw liate; hyngbya ho`ae paw hawte kae thua zemah, ahme`ae paw thua te; ⁹ a ny lei`ae paw hawte kae thua zemah, marya a ny`ae paw thua te; a chih`ae paw hawte kae thua zemah, dotua oh, kaening tuh kae hiin; detah`ae paw hawte kae thua zemah, a chia lei`ae paw; ¹⁰ ngaethah`ae paw hawte kae thua zemah pei lungtua`ae paw; ryachi`ae hawte kae thua zemah ccungccaw patae a hoirungsah`ae paw; pawsang a hoi lei`ae paw hawte kae thua zemah, pawpaw balyn a hoi`ae paw nynh kae thua. Hynh-e`ae kya Pachia ryalahtu`ae nynh kae thua cipaw kha kae langsaku. ¹¹ Pou Korin`ae! Kaening nynh nanning kha ccaerarihlan kae hopya vae oh, kae thinlung kha kobalae lang kae hungpya oh. ¹² Kaening nynh kae khawsung khyh oh, thuasalama naemaw rynaw te nynh na khawsungku oh. ¹³ Atu kha-e kha pyaru nawlan, nanning mah nae thinlung hung oh, tuh-e tuh ccaaw`ae hawte nynh kae hopya oh. ¹⁴ Zyn leitu`ae ryte anginkuh lei lante pynkheihlan taphu phukheih nan oh. Pawccecize dingnaw nynh kawbya einaw ryte paw vaeccawkunaw mou a hoi? Te awnaw nynh mohnaw ryte paw ccawkunaw mou a hoi? ¹⁵ Te Kri nynh Belial ryte paw nawccawnaw mou a hoi? Tukhyhze zyntu nynh zyn leitu ryte paw bawngku buanaw mou a hoi? ¹⁶ Te Pachia kya-e tempal nynh zohtuh`ae ryte paw nawccawnaw mou a hoi? Pawccecize Pachia nynh: “Minmin kya kae ka um cih zah minmin laku ka cceih cih. Kae tuh mih Pachia ka thua cih zah minmin tuh ka ccungccaw`ae a thua cih`ae,” a ci hawte, nanning tuh a hiinpaw Pachia kya-e tempal nynh na thua oh. ¹⁷ Tukeiccu, “Minmin laku kyate pou oh lah phiakuh oh; athyaa leipaw kha hae nan oh, te nanning kha kae ccou cih oh, Bawipaw nynh a ci.” ¹⁸ Te, “Kae tuh nae Paaw ka thua cih zah nanning tuh ka ccapaw`ae te ka ccanung`ae na thua cih oh, cite Tynre cyih khotu BAWIPAW nynh a ci.”

¹ Tukeiccu sungsah`ae, tuh-e byakinpyakupaw`ae ah hoi oh thyhte, Pachia rawrinaw kya thyaanaw kha ccingsah te, pynsaw te muisaw nungsikunaw balyn kyate ahmaw te ahmaw hynh ccikankuh oh sih. ² Kaening hynh thinlung oun hungpah oh; kaening tuh hung ccungccaw kya sanmah kae cyihsei khyh, hung sanmah kae rosah khyh, hung sanmah kae hyngpah khyh. ³ Hynhte ka hopaw tuh nanning kha seibe khylan ka ho khyh; pawccecize nanning ryte chikheih lan te hiinkheih lan, nanning tuh kae thinlung kya na um oh cite langmaw lya phe kae hopya vae oh. ⁴ Nae kalan bya hopaw ka rawhoinaw tuh ale raria, nanning keiccu myarya ka pookuh; ngaengannaw te phe ka beih. Vawsawrunaw kae teingnaw kya balyn kae tuh myarya ka lungtua. ⁵ Pawccecize Mesidonia ram lungkhu lang he kae thua te kae pynsaw hae-ungnaw hoi khyh, thuasalama hawlang hawlang te vawsaw kae tung; atolang tuh doukunaw a um, alungkhu lang tuh rawrinaw a um. ⁶ Tuhzemah lungthawthang`ae paw kha ngaengansah paw Pachia nynh Titu yn thuanaw liate kaening kha ngae oun ngansah; ⁷ te Titu yn thuanaw liate kyalya thua khyh, thuasalama nanning nynh myarya na pekinaw oh paw, na raw na khuinaw oh paw, kamaw hanlan myarya na zuakunaw oh paw kong kha aning nynh he oun hopah tuh, nae kya aning tuh ngaengansah athuanawpaw, thawzungpyanaw liate ngaengansah kae thua; tukeiccu kae tuh houh ka lungtua. ⁸ Pawccecize ka ccaky te nanning kha ngae kae la thyasah oh hei ze, ka la ngaesiku zemah, atu ka ngaesikuh vae khyh; pawccecize kha-e ccaky nynh nanning kha ngae ae thyasah oh zemah sosoh rou nynh ngae ae thyasah oh cipaw ka muihthya. ⁹ Atu ka lungtua paw tuh nanning kha ngaethyasah na thua oh keiccu thua khyh, thuasalama nae ngaethyanaw nynh ngaesikunaw kalan ae cciakhae oh paw te nynh ka lungtua. Pawccecize pawpaw kya sanmah kaening keiccu nanning nynh zonaw vaenaw na tung khyh nawlan oh, Pachia rynaw thyhte nynh nanning tuh ngaethyasah na thua oh. ¹⁰ Pawccecize Pachia rynaw thyhte athua paw ngaethyanaw nynh tuh bua ngaethyakhaeku aho vae leipaw, khumnaw kalan a thuakhae paw ngaesikunaw kha a pousah; thuasalama laephipi e ngaethyanaw nynh tuh chinaw kha nynh a pousah. ¹¹ Pawccecize hynh-e uccaw ccaccei hynh dotua oh, nanning tuh Pachia rynaw thyhte nae ngaethah cipaw tuh: taemyasawkunaw, naemaw te naemaw kya lungthyaanaw, atazae leipaw kya thinrianaw, rawrinaw, myarya pekinaw, thawte zuapyakunaw, seibe lan um leinaw`ae kha nae kya a pousah. Hynh-e uccaw kya nanning tuh na thyaa oh cipaw pawpaw balyn kya phe na langsaku vae oh. ¹² Tukeiccu nae kalan ccaw ka zei zemah a cyihseipaw hanlan ka zei khyh, cyiseinaw a teingpaw hanlan mah ka zei khyh, thuasalama Pachia malang kaening nynh kae dooihnaw oh paw nae kya alangku nawlan nynh ka zei. ¹³ Tukeiccu nae ngaengannaw kya kaening mah ngaengansah kae thua. Te nanning balyn liate Titu muisaw tuh bua thawmuinsah athua keiccuze, Titu kya-e lungtuanaw hanlan kaening tuh myaryamaw kae lungtua. ¹⁴ Pawccecize nanning konglang amaw kya ccangkhakheit phe ka pooku vae ze, ka maethah khyh; thuasalama byaccing kya nanning kalan pawpaw balyn kha nae kya phe ka ho vae hawte, tuhhawte Titu malang kae pokunaw tuh mah thanccingpaw nynh thua. ¹⁵ Te rawrinaw te thyngkute amaw na lawku oh paw, nae balyn kawngaenaw kha aning nynh he a liathui tuh, nanning ae sungsanaw oh paw tuh houh ale. ¹⁶ Tukeiccu pawpaw balyn kya nanning kya zynkunaw ka hoi pawte kae tuh ka lungtua.

¹ Tuhlaeze uteno`ae, Mesidonia ram e kriccawbu`ae kya pya athua paw Pachia thawccinaw kha kaening nynh nanning kae nysah bua oh; ² minmin tuh mih vawsawnaw kyaze alepipaw syntawnaw kya mih lungtuanaw phe abia paw, te myarya mih ryachiccih pite mih hysanaw kya-e hoirungnaw`ae kya phe abia paw kha kae nysah bua oh. ³ Pawccecize cyi khonaw thyhte, athua, cyi khonaw laelan hysah te pya rynaw a hoi`ae cite kae nynh ccaekia ka khan; ⁴ mih lasung kha kae lawku nawlan te mithyaa`ae ryalawpyanaw kya kaening bawngku bua nawlan, arangte kaening kha thawmawte oun ngia`ae. ⁵ Te kaening nynh kae la ngaehoi laelan, Pachia rynaw thyhte mimaw te mimaw kha Bawipaw kalan masaty pyakuh`ae zah kaening kalan mah a pyakuh`ae. ⁶ Tukeiccu Titu nynh nanning kya phe a tho vae hawte, kha-e thawccinaw kha nanning kya mah phe a thangsah nawlan, kaening nynh amaw kha thawte kae ngia. ⁷ Tuhte nanning tuh zynnaw kya, byahonaw kya, nynaw kya, thawte zuakunaw kya, te kaening nae sungsanaw oh kya, pawpaw kya miakaw na hoirung oh hawte, hynh-e thawccinaw kya mah hoirungbua oh. ⁸ Kawpyapaw liate ka ho khyh, thuasalama mingccang`ae nynh thawte zuakunaw liate, nanning kya-e sungsakunaw tuh thanccingpaw athua te thua khyh paw kha nynh kae syntaw ho. ⁹ Pawccecize, amaw ryachinaw liate nanning na hoirung nawlan oh, aning tuh a hoirung zemah nanning keiccuze a rya yn chi cite ah Bawipaw Jesu Kri kya-e thawccinaw kha na ny oh. ¹⁰ Te hynh-e kya tuanawroihnaw kae pya oh. Inkhawkum cyi lan na ry oh zah phe na tho vae oh paw rya kha po cyi lanpaw kyalya thua leite; ¹¹ kha-e na cyi oh paw kha atu phe na thangsah hahe lan oh paw tuh nae hanlan ahoypaw nynh thua; cyi ry lan paccynkunaw a um hawkhate, na hoi oh paw kyate phe thangsanaw mah a um cih. ¹² Pawccecize pya rynaw thinlung masaty a um lanze, ccungccaw nynh a hoi leipaw thyhte thua leite, a hoi paw thyhte a pya paw kha ccoupya athua. ¹³ Pawccecize mingccang`ae kha luesah lan zah nanning kha phurisah lan cite ka hory paw thua khyh; ¹⁴ thuasalama a nginkunaw liate, atu lya nanning paepaelui lan na hoi oh paw nynh minmin hobounaw kha a pyabua nawlan, te minmin paepaelui lan hoi paw nynh mah nanning hobounaw kha a pyabua nawlan, ou tuhte nginkunaw a um nawlan nynh ka hory. ¹⁵ Ccathyaa kya, “Pataepi a ccakhungkuh paw nynh alaepaw hoi lae khyh, pyhtari a ccakhungkuh paw nynh hobounaw hoi khyh,” cite azeiku hawte nynh thua. ¹⁶ Thuasalama nanning hanlan ka hoi paw te alokuhpaw thanccingte tuapyanaw kha Titu thinlung lungkhu lang a phangtupaw Pachia kalan lungtuabya ho thua sah. ¹⁷ Pawccecize kae hynawpaw kha nawccaw kyalya thua leite, houh a zuakuhpaw athua pawte amaw lungthote nae kalan a cceih. ¹⁸ Te thehoypaw honaw kya, kriccawbu`ae balyn kya thehoy po a ccou paw uno lukheit kha Titu ryte kaening nynh kae saw; ¹⁹ tuh kyalya thua khyh, thuasalama hynh-e lasung ry, kaening ryte khuaccungkheih lan kriccawbu`ae nynh a po`ae paw mah athua. Tuh-e lasung tuh Bawipaw amaw phu-e nawlan, te a paccynkuh paw nae thinlung kha langsaku khylan kaening nynh kae nee. ²⁰ Hynh-e myarya alungpaw lasung kae neethungnaw kyahin, hung ccungccaw nynh sanmah kaening hynh yn ccae khyh nawlan kae raeringkuh. ²¹ Bawipaw mitmuihnaw kya kyalya thua leite, ccungccaw`ae mitmuihnaw kya mah ahmepaw uccaw kha kae pyabua paw nynh thua. ²² Te minmin ryte kae unopaw kha kaening nynh kae saw. Aning tuh uccaw patae kya myarya a zuakuhpaw nynh thua cipaw pei kae langsaku he, thuasalama atu nae tungvaw zynkunaw alepi a hoi keiccuze houh a zuakuhpaw nynh thua. ²³ Titu kong kha lukhakheit nynh a khia ze, aning tuh kamaw ryte kae mungkuhpaw, te nanning te asekuh lante rya kae lahkheihpaw nynh thua. Tukhyhze kae uno`ae kong a khiapaw a um ze, minmin tuh kriccawbu`ae kya-e locceihtu`ae, Kri kya-e phu-enaw nynh thua`ae. ²⁴ Tukeiccu minmin kalan te kriccawbu`ae malang nae kya-e sungsakunaw ccaekia te nanning hanlan kae pookunawpaw kha langsapah oh.

¹ Mithyaa`ae hanlan ryalawpyanaw te asekuh lante nae kalan ccaw zei lanpaw tuh ka hanlan ccungkiapaw thua khyh. ² Pawccecize na bawngrynaw oh paw kha ka ny, kha-e hanlan inkhawkum te Akhai ram um`ae paw tuh paccynkute a um vae`ae cite Mesidonia`ae kalan nanning kong ka pookuh; te nae kya-e rynaw pipi nynh ccungccaw patae kha myarya lungthosah`ae. ³ Tuhzemah nanning kong kae pookunawpaw tuh e kya alakaw athua khyh nawlan, phe ka ho vae hawte nanning nynh na paccynku nawlan oh cite uno`ae kha nae kalan kae nynh kae saw`ae. ⁴ Tukhyh lanze, Mesidonia`ae nynh kamaw ryte mang oun thuabua`ae zah nanning paccynku leite na um oh paw kha oun muih`ae ze, nanning nae maethah cih cipaw thua leite, rawhoy te kae pookupaw kya kaening kae maethahsei cih. ⁵ Tukeiccu langmaw bya phe na kinku vae oh paw, hysah te lasung pya paw kha na la paccynty nawlan oh nae kalan cciaty lan, uno`ae kha hy aho cite ka tuaku. Tuhte kha-e lasung tuh pya lan hysah leipaw uccaw hawte thua leite, hysahnaw te paccynty paw athua nawlan nynh thua. ⁶ Thuasalama pyhtari ccacii a vua paw nynh tuh pyhtari nynh a rue cih, te pataepi ccacii a vua paw tuh pataepi a rue cih, cipaw hynh nyh oh. ⁷ Ccungccaw miakaw nynh a thinlung kya a tuaku hawte pya sah, hysah leinaw te pya nan sah, pya khyh ze hoy khyh cipaw thinlung te pya nan sah, pawccecize lungthote a pyatupaw kha Pachia nynh a sungsah. ⁸ Te pawpaw balyn kya nanning tuh ahobou lei lan khaleih pei na hoi oh zah, ahoypaw ryalaw miakaw hanlan paepaelui lan na hoi nawlan oh, thawccinaw balyn kha nae hanlan phe biasah lan Pachia tuh a cyih kho. ⁹ “Aning nynh phe apazaesaku vae; aning nynh ryachi`ae kha phe a pya vae`ae; a dingnaw tuh zungzae cia a tyn,” cite azeiku hawkhate nynh thua. ¹⁰ Atu ccaciivuatupaw hanlan ccacii kha pya zah looh hanlan sanlou a pyatupaw nynh ccacii na vua oh paw kha ae pungsathungpah oh sah lah nae dingnaw athae`ae kha ae lungsathungpah oh sah. ¹¹ Hysanaw te na pya nawlan oh nanning tuh pawpaw kya balyn hoirungsah na thua oh, tuh-e nynh kaening liate Pachia kalan lungtuabya a hosah cih`ae. ¹² Pawccecize hynh-e ryalaw neethungnaw nynh mithyaa`ae hobounaw kyalya kha a pyabua paw thua leite, Pachia kalan lungtuabya ho paw patae kha mah phe a biasah. ¹³ Hynh-e ryalawnaw langsakunaw liate, Kri thehoypaw na lawku oh paw kawngaenaw elan te ccungccaw balyn kha hysah te na neethung oh paw elan, minmin nynh Pachia kha phu-esah`ae. ¹⁴ Nae kya um paw myarya asungpaw Pachia thawccinaw keiccuze, nae hanlan saw a sang`ae tuh nanning kha myarya ae ngae oh. ¹⁵ Ho kho um leipaw a lasung hanlan Pachia kalan lungtuabya ho thua sah!

¹ Nanning na umnaw oh kya zakawsangsakuhpaw, thuasalama na um leinaw oh kya nanning kalan a rawthungpaw, kae, Paul kamaw nynh Kri kya-e nevyalyanaw te thawcci lungnenaw liate nanning kha kae ngia oh. ² Thuasalama kaening kha pynsaw rynaw thyhte a hiin`ae paw hawte kaening kha oun tua`ae paw ccungccaw abang kha rawse lan, zynkunaw te rawhoysaku lan ka tuakupaw kha he kae thua vae ze raw ka hoysaku vae khyh nawlan kae ngia oh. ³ Pawccecize kaening tuh pynsaw lante kae hiin zemah, pynsaw rynaw thyhte kaening nynh rhaw kae dou khyh. ⁴ Pawccecize kaening rhawdounawpaw zunghe`ae tuh pynsaw zunghe`ae thua khyh, thuasalama khuarhawhohung` ae kha tingsah bung nawlan Pachia kya-e a thawsaepaw zunghe`ae nynh thua. ⁵ Kha-e zunghe`ae tuh eikunaw`ae thuasah, te Pachia nynaw a rawsepaw amaw te amaw a tansakuhpaw, ahangpaw uccaw miakaw kha thuasah sawbung nawlan, tuanaw miakaw kha Kri kawngae sah khylan seetangnaw kalan a thuakhae paw nynh thua. ⁶ Te nanning kawngaenaw tuh he accing te kawngae lei`ae paw balyn kha detah khylan paccynkute kae um. ⁷ Nanning nynh atolang alangku thyhte tou uccaw`ae kha na do oh? Lukhakheit nynh Kri kya-e nynh ka thua cite amaw te amaw a zynku lanze, aning tuh Kri kya-e athua hawte kaening mah Kri kya-e nynh kae thua cipaw, hynh-e hynh aning nynh bua tuabia sah. ⁸ Pawccecize, nanning ro nawlan thua leite, nanning tynsathung nawlan Bawipaw nynh kaening oun pya paw kae kya-e kawhoinaw kong kha kae nynh houh ka pokhaeku zemah, ka maethyakhaekuh lan khyh. ⁹ Ccaky`ae khate nanning kha ae fu ae raw oh paw ka thuasei zya. ¹⁰ Pawccecize, minmin nynh, “A ccaky`ae tuh a khingcci zah a thung, thuasalama a pyn phang umnaw kya tuh a nyaa, te a byaho pawlang um khyh,” a ci`ae. ¹¹ Kaening tuh kaemaw kae um khyh lya ccaky kya um paw bya thyhte kae thua hawte, kaemaw kae umnaw zemah kae cyisahnaw kya khahawte nynh kae thua mamin, cipaw kha khahtahawpaw ccungccaw nynh tuabia sah. ¹² Pawccecize mimaw te mimaw thehoysakuh`ae paw ryte kaemaw hynh kae riakuh bua ngan khyh, kae khinkhiakuh ngan khyh. Thuasalama mimaw te mimaw kha toukuh`ae zah, mimaw te mimaw a khinkhiakuh`ae paw, minmin tuh haw khyh`ae. ¹³ Tuhzemah po alue lante kaening nynh kae pookuh lan khyh, thuasalama Pachia nynh kaening oun pya paw a loori lungkhu nynh kae pooku, tuh-e a loori nynh nanning kha phe ae khungbia oh. ¹⁴ Pawccecize nanning kalan kae phah leipaw olante hawte, kaemaw te kaemaw kha po alue lang kae dyngkuh khyh; pawccecize Kri thehoypaw ryte nynh nae kalan po kae thua. ¹⁵ Kaening nynh po alue lante, ccangpaw ccungccaw`ae ryalaw kya kae pookuh khyh; thuasalama nae zynnaw tuh a kaethung thyhte, nanning liate kaening tuh kae kya-e a loori kya myarya kosah kae thua cih cite ngaehoinaw kae hoi. ¹⁶ Ou tuhte nanning na umnaw oh khunglang kaening nynh thehoypaw kae ho nawlan te ccangpaw ccungccaw nynh phe a cyity vae paw a loori kya kae pooku khyh nawlan nynh thua. ¹⁷ Thuasalama, “A pookuhpaw ccungccaw tuh BAWIPAW kyakhe pookuh sah.” ¹⁸ Pawccecize amaw te amaw thehoysakuhpaw kha tuh Bawipaw nynh nawccawkhaepaw thua khyh, thuasalama Bawipaw nynh thehoysah paw rou kha nynh nawccawkhaepaw athua.

¹ Ka ngaeenaw kyahin nanning nynh sosoh oun ngaesangpah oh ci ka ry, te nae ngaesangpya ccaccing oh. ² Pawccecize kae tuh Pachia lante thawsianaw khate nae hanlan ka thawsia. Pawccecize kae nynh nanning kha athyaapaw liaccady hawte Kri kalan kae pya ccaw oh cite vawpaw lukheit kalan nanning kha phe kae chiapya vae oh. ³ Thuasalama fupaw nynh a thyaruhnaw liate Evi kha a ling hawte, phinkhakheit lante, nae thinlung-tuanaw`ae tuh Kri kya um paw thinlung thyaanaw kyate oun rohsei cih cipaw ka thinphang. ⁴ Pawccecize nae kalan yn thua paw nynh, kaening nynh kae ho leipaw ccangpaw Jesu kong kha a ho lanze, tukhyhze nanning nynh na ccou lei oh paw, phin ccangpaw muisaw kha na ccou oh ze, tukhyhze nanning nynh na lawku lei oh paw phin ccangpaw thehoypaw kha na lawku oh ze, kou hoy lang la ngaesang oh. ⁵ Pawccecize abapi huapaw locceihtu`ae laeze kae tuh kharyh ka nyaahua khyh cite ka tuaku. ⁶ Kae tuh byahonaw kya a thya leipaw ka thua zemah, nynaw kya tuh tuhte ka thua khyh. Thuasalama kaening tuh nanning laku pawpaw balyn kya khaleih kae langkuh. ⁷ Nanning hangthung na thua ccaw oh cite kamaw te kamaw zakawsangsaku te, Pachia thehoypaw nae kalan alakaw te kae hopya oh keiccu, kae tuh seinaw ka rae tou? ⁸ Nanning hanlan ryalawpya khylan ccangpaw kriccawbu`ae kya-e uccaw kha lawkute kae nynh ka lua`ae. ⁹ Kae tuh nanning ryte ka um lya, ka ho ka bou lyakha, hung sanmah ria ka thaesah khyh; pawccecize kae ka ho ka bou paw kha Mesidonia langte oun thua`ae paw uno`ae nynh phe oun pya`ae. Pawpaw balyn kya nanning kha phurisah paw ka thua khyh nawlan kamaw te kamaw ka raeringkuh, tuhte po ka raeringkuh cih. ¹⁰ Kri kya-e byaccing tuh kamaw kya a um thyhhawte, Akhai pee`ae lungkhu kya hung nynh sanmah hynh-e ka pookunawpaw hynh oun khee lan khyh. ¹¹ Pawccemou? Nanning kha kae sungsah khyh oh keiccu tou? Pachia a nyh. ¹² Thuasalama ccyhhoypaw a muery`ae paw nynh kaening hawte ming`ae nynh oun tuabua`ae sah cite a pookunaw`ae kya, minmin nynh ccyhhoypaw a mue khyh nawlan`ae, ka cyipaw kha po ka cyih ung cih. ¹³ Pawccecize khatahaw`ae paw tuh ahme leipaw locceihtu`ae, ccungccaw a phee`ae paw ryalahtu`ae, Kri kya-e locceihtu`ae lang mimaw te mimaw muinsan a rulaekuh `ae paw nynh thua`ae. ¹⁴ Te ngaeangthua lanpaw thua khyh! Pawccecize Setan nynh mah amaw te amaw kha awnaw kya-e vaaw ccungccaw olante a muinsan kha a rulaeku. ¹⁵ Tukeiccu a ryalahtu`ae nynh mah dingnaw ryalahtu`ae hawte mih muinsan rulaeku`ae paw tuh ngaeang lanpaw thua khyh; minmin athangnaw tuh mih ryalawnaw`ae thyhte nynh athua cih. ¹⁶ Hung nynh sanmah kamaw hynh mingaeepaw hawte yn tua nan sah cite bua ka ho. Tuhte yn tua paw a um ze, kae nynh ccapyh ka pooku nawlan, kamaw hynh mingaeepaw hawte oun ccou oh. ¹⁷ Ka hopaw hynh Bawipaw rynaw thyhte ka ho khyh, thuasalama hynh-e rawhoinawpaw pookunaw kya ngaeeccaccu lang nynh ka ho. ¹⁸ Ccungccaw patae nynh pynsaw lante a pooku`ae pawte kae mah ka pokuh bua cih. ¹⁹ Pawccecize naemaw tuh na haw oh pawte nanning nynh mingaee`ae kha lungtuate na ngaesangpya oh. ²⁰ Lukhakheit nynh nanning kha seetangnaw lungkhu lang ae cciakhae oh ze, lukhakheit nynh phe ae ae oh ze, lukhakheit nynh ae luade oh ze, lukhakheit nynh ae poonuaku oh ze, lukhakheit nynh nae mae kya ae bia oh ze, nanning nynh na ngaesang oh. ²¹ Kaening tuh myarya kae la nyaa cipaw kae maethyanaw kha nynh ka ho. Thuasalama lukhakheit nynh ccangkhakheit kya a zynku lanze, kae mah ka zynkuh bua cite ngaeeccaccu lang nynh ka ho. ²² Minmin tuh Hebru`ae thua tou? Kae mah ka thua. Minmin tuh Israel`ae thua tou? Kae mah ka thua. Minmin tuh Abraham ciihan`ae thua tou? Kae mah ka thua. ²³ Minmin tuh Kri kya-e ryalahtu`ae thua tou? Kae tuh houh ka thua cite mingaeepaw hawte nynh ka ho. Thawmawte houh ryalah paw, ziabuanaw riatae lei a tungpaw, atu te atu thung a ccah paw, chinaw rhaw`ae te atu te atu a tungkuh `ae paw nynh ka thua. ²⁴ Jew`ae nynh vae sungpali accing nawlan vaekheit ary lante oun bua`ae paw, vae pangaw ka tung. ²⁵ Ruising te oun bua`ae paw vaethung acih; lung te vaekheit oun deih`ae, sanphalung ronaw vaethung ka tung; zi kheit te nin kheit rili lungkhu ka um. ²⁶ Atu te atu khua ka ccung, tui kya-e vawsawrunaw, damiah`ae kya-e vawsawrunaw, ka ccungccaw`ae kya-e vawsawrunaw, Zenta`ae kya-e vawsawrunaw, khualipi kya vawsawrunaw, rangkaw kya vawsawrunaw, rili kya vawsawrunaw, ahme leipaw uno`ae laku vawsawrunaw kha ka tung. ²⁷ Bangnaw te kou arupaw ryalaw, atu te atu i leite um paw, vuelawnaw te tuihawnaw, atu te atu looh-ae leite um paw, akyaapaw kya te uccaw leite um paw kha ka tung. ²⁸ Kha-e atolang e uccaw`ae laelan, kriccawbu`ae balyn hanlan thawte ka thawsianawpaw nin takyh ka tungvaw a um. ²⁹ Kae ka nyaa khyh ze, hungmou anyaa? Kae ka lungkhu maee lang rua leite, hungmou a maeleihsakuh paw a um? ³⁰ Ka pooku lan accan lanze, kamaw ka nyaanaw`ae konglang kha nynh ka pookuh cih. ³¹ Kae tuh ka hyng khyh cipaw kha zungzae thehoysah athua paw, ah Bawipaw Jesu Kri a Paaw, Pachia nynh phe a ny. ³² Damaskas khuapi kya, Aretas siapharanpaw kuihkaw ram uktupaw nynh rhawkawphu ryte Damaskas khuapi a ngaw lyakhe, kamaw kha kyng lan yn ry. ³³ Te kae kha sua lungkhu oun phang`ae zah thanlang-aw kyate, khua lungrua kyate oun sahbung`ae zah ram uktupaw kuih kyate phe ka lue.

¹ Ka hanlan pooku lanpaw tuh athanepaw thua khyh. Bawipaw kya-e vizin te byaphy kong kha ka ho ung cih. ² Kum haw laepali lae aro vae lyakhe Kri kya um paw ccungccaw lukheit tuh vaawran khaan thungnaw kalan lawthung athua paw kha ka ny, pyn ryte ta, tukhyhze pyn umbia leite ta cipaw ka nyh khyh, Pachia nynh a nyh. ³ - ⁴ Te kha-e ccungccapaw tuh Paradis lungkhu lang lawthung thua zah ccungccaw lukheit hanlan ho lan accan leipaw te ho kho leipaw bya`ae kha aning nynh a thae. Ou khahtahawpaw ccungccaw kha ka ny. Pyn ryte ta, tukhyhze pyn umbia leite ta cipaw ka nyh khyh, Pachia nynh a nyh. ⁵ Khahtahawpaw ccungccaw kha ka pokhaekuh cih, tuhzemah kamaw ka nyaanaw kya laelan kamaw te kamaw tuh ka pookuh lan khyh. ⁶ Pawccecize pooku lan ka ry zemah kae tuh mingaeepaw ka thua lan khyh. Pawccecize kae tuh byaccing nynh ka ho cih. Thuasalama ccungccaw lukheit nynh kamaw yn muihpaw laelan, kamaw kong a thae paw laelan kamaw hynh yn tuasei khyh nawlan kae tuh ho leite ka sungkuh. ⁷ Te myarya alungpaw byaphy`ae liate tou kho lei lan cia ka tansaku sei khyh nawlan ka ngesaw kya hingpaw kha pya ka thua, tou kho lei lang cia ka tansaku sei khyh nawlan Setan kya-e locceihtupaw nynh kamaw kha vawsaw yn pya. ⁸ Hynh-e uccaw hynh kamaw kyate a pou ccaw cite Bawipaw kalan vaethung ka ngiakuh. ⁹ Te Bawipaw nynh kamaw kha, “Ka thawccinaw tuh na hanlan azaw; pawccecize ka thungnaw tuh nyaanaw kya phe ccingsah athua,” yn cipya. Tukeiccu Kri thungnaw tuh kamaw tungvaw atyn nawlan, ka nyaanaw`ae kya nynh lungtuate houh ka pookuh vae cih. ¹⁰ Tukeiccu Kri hanlan teingpaw nyaanaw`ae kya, sarisaryanaw`ae kya, ryachinaw`ae kya, yn tua yn sahnaw`ae kya, vawsawnaw`ae kya nynh ka lungrythua. Pawccecize kae he ka nyaa tuh, kae tuh ka thawsae. ¹¹ Pookunaw kya kae tuh mingaeepaw lang nynh ka tang; nanning nynh tuhte nae nangse oh. Pawccecize nanning nynh kae hynh thehoysah lan ka ccan, pawccecize kae tuh pawsang ka thua khyh zemah lupi huapaw locceihtu`ae laeze ka nyaahua khyh. ¹² Lungccuanaw te, muihsanaw kya, khuaruarunaw te athungpaw ryalaw`ae kya, locceihtu ka thuanawpaw muihsanaw tuh nanning laku langsapya athua ccaccing vae. ¹³ Kae tuh nae kya phuripaw ka thua khyh paw laelan, ccangpaw kriccawbu`ae laeze pawkyamou nanning tuh na nyaahua oh? Hynh-e ka menaw hanlan oun ngaethya oh! ¹⁴ Dotua oh, vaethungnaw nae kalan bua thua lan ka paccynkuh. Te nanning hanlan phuripaw ka thua lan khyh; pawccecize nae kya-e uccaw kha ka ccungkuh khyh, thuasalama naemaw kha nynh kae ccung oh. Pawccecize ccaaw`ae nynh nungpaaw`ae hanlan uccaw ccypya lan ccan khyh, thuasalama nungpaaw`ae nynh ccaaw`ae hanlan a ccypah`ae. ¹⁵ Te kae nynh nanning kha houhouh kae sungsah oh zah nanning nynh nae sungsahnaw oh tuh ryryh azyabung zemah, nae muisaw hanlan ka hoi paw kha myarya lungtuate ka thangkuh cih zah kamaw mah ka thangkuh ung cih. ¹⁶ Thuasalama tuhte athua ze la thuasah, nanning kha kae nynh phupaw kae risah khyh oh. Tuhzemah a pheethyapaw ka thua thyhte, pheenaw te nynh nanning kha kae kyng oh. ¹⁷ Nae kalan kae saw`ae paw lukhakheit liate, nae kya-e amia kae nynh ka lawkuh tou? ¹⁸ Titu kha nae kalan ccia lan ka ngia zah amaw ryte uno lukheit kae nynh kae saw. Titu nynh nae kya-e ae lawpakuh oh tou? Kaening tuh alokuhpaw thinlungtuanaw te kae cceih kheih khyh tou? Alokuhpaw laanpi kha kae zui kheih khyh tou? ¹⁹ Kaening nynh kaemaw te kaemaw hynh nae malang kae dangsaku cite tou bua nae tua oh? Kri kya Pachia malang nynh kaening bya kae ho. Thuasalama kou sungsah`ae paw, nanning tynsathungnaw hanlan nynh pawpaw balyn kha kae cyi. ²⁰ Pawccecize kae he kae thua vae ze, nanning kha ka ry hawte kae muih lan khyh oh paw te kae kha na ry oh hawte nae muih lan khyh oh paw ka thinphang; nae kya eikunaw, eiungkunaw, thinrianaw, peku maekunaw, thanhokunaw, milae thethyahonaw, tansakunaw, keisukeilae umnaw a um sei cih cipaw thuasah; ²¹ kae he bua kae thua vae ze nungsikunaw, ohhuakunaw, sahpaw eih rynaw te phe sei`ae zah a ngaesikuh lei`ae paw patae hanlan ka raw ka khui nawlan, ka Pachia nynh kamaw kha nanning laku zakaw yn sangsah cih cipaw thuasah ka thinphang.

¹ Hynh-e hynh nae kalan kae kae thua paw vaethungnaw nynh athua cih. “Ccaekia luning, tukhyhze luthung khalang liate bya miakaw tuh tynsah athua cih.” ² Kae nynh langmaw phe kae hopya vae oh, te vaeningnaw nae kya ka um paw hawte kae hopyaty vae oh; te atu nae kya ka um leite, kae bua kae thua lanze hung sanmah ka haang lan khyh cite langmaw a sei`ae paw te tuhlaepaw balyn kalan ccaw kae zei. ³ Nae kya a nyaa leipaw, thuasalama athungpaw Kri nynh kamaw kya bya ho ta cipaw ccaekia kha na ccung oh keiccu tuh kae haang lan khyh oh. ⁴ Pawccecize nyaanaw kya amaw tuh khiade athua zemah, Pachia thungnaw liate aning tuh bua a hiin. Te kaening mah amaw kya kae nyaa, thuasalama Pachia thungnaw liate kaening tuh amaw ryte nae kalan kae hiin cih. ⁵ Zynnaw kya na um oh ta, na um khyh oh ta cipaw naemaw te naemaw sihseikuh oh. Naemaw te naemaw syntawkuh oh. Ccing khyh cite nue paw na thua khyh oh ze, Jesu Kri tuh nae kya a um cipaw naemaw te naemaw na nyhkuh khyh oh tou? ⁶ Thuasalama kaening tuh ccing khyh cite nue paw kae thua khyh cipaw na nyh cih oh cite ka zyn. ⁷ Atu nanning nynh ahoy leipaw kha kharyh na cyi khyh oh ccaw cite Pachia kalan saw ka sang. Kaening tuh nawccawkhaepaw nynh kae thua cite langsaku ry paw thua khyh, thuasalama kaening tuh nawccawkhae lei`ae paw hawte kae la thua zemah nanning nynh ahoypaw uccaw kha na cyi ccaw oh cite nynh saw ka sang. ⁸ Pawccecize byaccing rawsete kaening tuh pawsang mah kae cyih kho khyh, thuasalama byaccing hanlan nynh kae cyi. ⁹ Pawccecize kaening he kae nyaa zah nanning nae thawsae vae ze, kae lungtua; te nanning na ccing nawlan oh hei saw kae sangpya oh. ¹⁰ Tukeiccu ka um khyh lya hynh e uccaw`ae hynh nae kalan ka zei. Ka um lanze ronaw hanlan thua leite, tynsathungnaw hanlan Bawipaw nynh kamaw yn pya paw kawhoinaw thyhte rehahannaw kha ka mangsei cih. ¹¹ Nyathyakou, uteno`ae ngedan te. Marya ccing oh. Ngaengante um oh, tuanaw-thinlung ccangkheit te um oh, daebabilan um oh; te sungsakunaw te daenaw Pachia tuh nanning ry a um cih. ¹² Athyaapaw myngkupaw khate lukheit te lukheit beihlangkuh oh. ¹³ Mithyaa`ae balyn nynh nanning kha ae beihlang oh. ¹⁴ Bawipaw Jesu Kri thawccinaw, Pachia sungsanaw, te Thyaa Muisaw vaeccawkunaw tuh nae balyn tungvaw kya la um sah. Amen.