1 Timothy

¹ Aening oun Khumtu Pachia kawpyapaw liate, te aening ngaehoinaw athua paw Bawipaw Jesu Kri liate, Jesu Kri locceihtu athua paw kae, Paul nynh, ² zynnaw kya ka ccapaw ccaccing na thua paw Timote nang kha kae beihlang. Ah Paaw Pachia te ah Bawipaw Jesu Kri kyate thawccinaw, ngaethya-umsanaw te daenaw tuh na tungvaw la um sah. ³ - ⁴ Ccungccaw abang nynh ccangpaw doctrine`ae kha a ccangpya`ae. Minmin nynh phungpaw huataw`ae te athangthya leipaw thokeinaw phungpaw`ae kha a ngaery`ae. Kha-e uccaw`ae nynh eikunaw kha a thuakhae. Zynnaw te Pachia lante asekuhpaw tynsathungnaw kha thawpya khyh`ae. Tukeiccu ccungccaw abang nynh tuhhawte a cyibua khyh nawlan`ae kaw na pya kho nawlan, Mesidonia ram lang ka ccia lyaze, Efesa khua khe na umhy ccaw cite nang kha kae ngia. ⁵ Kawpyapaw kya-e athangnaw tuh, athyaapaw thinlung kyate, ahoypaw mawtemaw nykunaw kyate, te cyiruhnaw um leipaw zynnaw kyate yn thua paw sungsakunaw nynh thua. ⁶ Tuh-e kyate ccungccaw abang nynh phe cciataw`ae zah accakaepaw byahokupaw kalan phe paleihkuh vae`ae. ⁷ Minmin tuh mimaw nynh a ho`ae paw toulou kha nyh khyh`ae, paw kong nynh kae ho cipaw san a nyh lei`ae pite kawbya ccangpatu`ae lang tang a ry`ae. ⁸ Thuasalama ccungccaw lukheit nynh Kawbya kha angaekuh lante a mang lanze, Kawbya tuh ahoy cipaw aening nynh ah ny oh. ⁹ Kawbya tuh adingpaw ccungccaw hanlan rae paw thua khyh, thuasalama kawbya pawlangria lei`ae paw te kawngae lei`ae paw hanlan, Pachia pawlangria lei`ae paw te misei`ae hanlan, athyaa lei`ae paw te maethya nyh lei`ae paw hanlan, paaw`ae te nung`ae theihtu`ae hanlan, ccungccaw theihtu`ae hanlan, ¹⁰ a ohhuakuh`ae paw hanlan, pise te pise a sei`ae paw hanlan, ccungccaw ruh`ae paw hanlan, mihyng`ae hanlan, ahme leite ccaesakuh`ae paw hanlan, te akyhpaw ccangpyakunaw te arawsekuhpaw uccaw hanlan nynh kawbya tuh rae athua cipaw mah ah ny oh. ¹¹ Tuh-e akyhpaw ccangpyakunaw te nynh thehoyccoupaw Pachia kya-e aphuepaw thehoypaw tuh accawkuh. Tuh-e thehoypaw tuh kae ka kya pya athua. ¹² Kae hynh thawzung yn pyatupaw ah Bawipaw Jesu Kri kha ka thehoysah. Kae hynh zyn lan um paw lang yn riabua zah a ryalawnaw lungkhu lang yn nungbua. ¹³ Kae tuh langmaw lya Pachia alue lante byahotupaw, ccungccaw a tua a sahtupaw, ccungccaw saryatupaw nynh ka thua. Thuasalama kha-e kha zyn leinaw kya ny leite ka la cyi paw athua keiccuze, ngaethya-umsanaw kha ka mue. ¹⁴ Ah Bawipaw kya-e thawccinaw tuh Jesu Kri kya um paw zynnaw te sungsakunaw ryte myaryasangkae alung. ¹⁵ Kri Jesu tuh misei`ae khum khylan nynh laephipi kalan yn thua cipaw tuh zyn lan um paw bya thua zah khaleih lawku lan accanpaw nynh thua. Tuh-e misei`ae laku kae tuh a sei huaccepaw nynh ka thua. ¹⁶ Tuhzemah zungzae hiinnaw hanlan atu koute amaw a zyn vae cih paw ccungccaw`ae nynh dosuinkupaw thua khylan, Jesu Kri nynh kamaw kya khaw cia teingnaw balyn kha masaty a langsaku nawlan, kae tuh ngaethyaumsanaw kha ka mue. ¹⁷ Atu zungzae atynpaw, a chih kho leipaw, muih kho um leipaw Siapharan, a makhae kyalya ahawpaw Pachia tungvaw sawtuanaw te phu-enaw tuh zungzae te zungzae cia um sah. Amen. ¹⁸ Ka ccapaw Timote, nang na konglang te yn thua paw profehbya thyhte nang nynh ahoypaw rhaw kha na dou nawlan, hynh-e kawpyapaw hynh nang kha kae pya. ¹⁹ Zynnaw te ahoypaw mawtemaw nykunaw kha varyn la kyngkuh. Ccungccaw abang nynh kha-e zynnaw kha phe vuasya`ae zah minmin tuh arohpaw sanphalung hawte nynh thua`ae. ²⁰ Tuh-e`ae laku Hymenaeas te Alexanda a umbua`ae. Minmin nynh saryapawbyaho vae khyh nawlan`ae, a ccangku ccaw`ae cite minmin kha Setan kalan phe ka ah vae`ae.

¹ Tukeiccu, masaty lang ngiapyanaw, sawsangpyanaw, muisaw lante bohpyanaw te lungtuabya hopaw kha ccungccaw balyn hanlan la raepah`ae, ² aening nynh Pachia nyh paw hiinnaw kya te sawtua lan um paw hiinnaw kya daenaw te ah hiin kho nawlan oh, te daebabipaw hiinnaw ah hoi kho nawlan oh siapharan`ae te kawhoitu`ae paw balyn hanlan saw la sangpah oh cite kae ngia. ³ Pawccecize hynh-e cyisahnaw tuh aening oun Khumtu Pachia malang ahoypaw te angaekuhpaw nynh thua. ⁴ Ccungccaw balyn nynh khumnaw mue`ae sah lah byaccing kha nyh`ae sah cite Pachia nynh a ry. ⁵ Pawccecize Pachia ccangkheit nynh a um. Te Pachia te ccungccaw`ae laku Ccawkunaw Raetu Ccungccapaw Kri Jesu lukheit nynh a um. ⁶ Amaw nynh ccungccaw balyn sawkhaw nawlan amaw kha a pyaku. Accyh azaw paw kya ccaekia khan khylan, ⁷ tuh-e khylan kae tuh phunghotu lang, locceihtu lang, te zynnaw te byaccing kha Zenta`ae ccangpatu lang khang paw nynh ka thua. Kri kya byaccing nynh ka ho, ka hyng khyh. ⁸ Tukeiccu athyaapaw kuih`ae kha hangthung te, thinrianaw te lunghiinnaw hoi leite pise`ae nynh teitei balyn sawsang`ae sah cite ka ry. ⁹ Tuh-e hawte, nopi`ae nynh mah uccaw lawkunaw kya, maethyaum leipaw boeining lawku te, ahoypaw ozia te kou angaekuh lante mimaw te mimaw kha ccaankuh`ae sah ci ka ry. Akhekuhpaw sang, sui, te pale`ae, te amee rupaw uccaw te ccaankuh nan`ae sah. ¹⁰ Thuasalama Pachia rawrinaw a hoi paw nopi`ae hanlan ahoypaw cyisahnaw`ae khate ccaankuh`ae sah ci ka ry. ¹¹ Nopi nynh tuh kawngaenaw balynte daebabilan ccangkuh sah. ¹² Thuasalama nopi nynh ccangpya lan, pise tungvaw kaw hoi lan ka ua khyh, daebabilan zya um sah. ¹³ Pawccecize Adam kha nynh masaty rae athua, oute nynh Evi kha rae athua. ¹⁴ Te Adam kha hyngpya thua khyh; thuasalama nopinung kha tuh hyngpya thua zah phe a sei. ¹⁵ Tuhzemah nopi`ae nynh maeethyaum leipaw boeining lawkute zynnaw kya, sungsakunaw kya, te thyaanaw kya a tyn`ae lanze, ccaawpuinaw kya khum athua cih`ae.

¹ Ccungccaw lukheit nynh kriccawbu cciakhaetu lang a ry lanze ahoypaw ryalaw kha a ry paw nynh thua cipaw tuh akyhpaw bya nynh thua. ² Oute kriccawbu cciakhaetu tuh ccaenaw um leipaw athua hahe cih, zu lukheit vawpaw athua cih, a yhkuh khopaw athua cih, a lungccing paw athua cih, a ozia hoypaw athua cih, mikhia dooihthya paw athua cih, a ccangpah khopaw athua cih; ³ misutui a rang leipaw, peku maeku mang leipaw, phua elan a karangkuh leipaw, a lungnepaw, milae uccaw a dua leipaw athua cih; ⁴ amaw a innbyn kha kou hoy lang a uk paw, a ccaaw`ae nynh sawtua rawrinaw khaleihte kawngaepyanaw a hoi`ae paw athua cih; ⁵ (pawccecize ccungccaw lukheit nynh amaw a innbyn kha pawcihte nynh uk lan cipaw a ny khyh lanze, pawtemou Pachia kya-e kriccawbu kha a dooih kho cih?); ⁶ a zyn thawpaw thua lan khyh, tuhte athua ze, a tansakuh sei cih zah diabolos hawte detahnaw lungkhu lang a phungkuhsei cih. ⁷ Tuhlaeze, atolang e ccungccaw`ae laku thehoyccoupaw athua cih. Tukhyh lanze saryanaw lungkhu lang te diabolos kya-e kaang lungkhu lang a phungkuhsei cih. ⁸ Tuhhawte kriccaw piccang`ae mah sawtua lan um paw athua cih`ae, a lae phei paw thua lan khyh, misutui eih neih paw thua lan khyh, phua elan a karangkuhpaw thua lan khyh`ae. ⁹ Accipaw mawtemaw nykunaw kya zynnaw byakhupaw kha varyn a kyngkuh paw athua cih`ae. ¹⁰ Te minmin tuh masaty syntaw thua`ae sah. Oute ccaenaw um khyh`ae cipaw muih athua tetuh kriccaw piccang rya kha lah ccavae`ae sah. ¹¹ Tuhhawte mih zu`ae mah sawtua lan um paw athua cih`ae, ming`ae thethya ho`ae paw thua lan khyh`ae, a yhkuh khopaw, pawpaw balyn kya zyn lan um paw athua cih`ae. ¹² Kriccaw piccang`ae tuh zu lukheit vawpaw athua cih`ae. Mih ccaaw`ae te mih innbyn kha kou hoy lang a uk paw athua cih`ae. ¹³ Pawccecize kriccaw piccang ryalaw kha kou hoy lang a lah paw tuh mimaw elan ahoypaw thadynnaw kha a muekuh`ae paw te Kri Jesu kya um paw zynnaw kya rawhoynaw alepi a muekuh`ae paw nynh thua. ¹⁴ Aro mawze na kalan thua lan ngaehoite hynh-e uccaw`ae kong hynh kae nynh na kalan kae zei. ¹⁵ Thuasalama khaw kae ro lan thua ze, byaccing kya-e atungpi te abingkunaw athua paw, a hiinpaw Pachia kya-e kriccawbu athua paw, Pachia inn kya namaw te namaw kha pawcihte nynh ka um cih cipaw na nyku ccaw cite hynh-e`ae hynh na kalan kae zei. ¹⁶ Te ahmepaw beiknaw kya-e byakhupaw tuh alepaw uccaw nynh thua cipaw eiku lanpaw um khyh. Pachia tuh pynsaw lante phe yn langkuh vae. Muisaw liate thyaaccousah athua vae. Vaaw ccungccaw`ae nynh phe muih vae`ae. Zenta`ae kya ho athua vae. Laephipi kya amaw kha phe zyn vae`ae. Phu-enaw vaawran lang lawthung phe athua vae.

¹ Nyalang ccyh kya ccungccaw abang nynh zynnaw kha a poutaw cih`ae, lingthyapaw muihsaw`ae te raerangsaro`ae ccangpyanaw kha a ngae cih`ae cite atu Muisaw nynh raerae alangkuh lang a ho. ² Kha-e`ae nynh cyiruhnaw kya hyngbya kha a ho`ae, mimaw nykunaw thinlung kha alingpaw sivaw khate phe pinsakuh`ae. ³ Zu te vaw tangnaw kha oun khee cih`ae, byaccing kha nyh zah a zyn`ae paw nynh lungtuabya hote ae lan accanpaw, Pachia nynh a rae paw, aepaw phin`ae kha sung lan kaw oun pya cih`ae. ⁴ Pawccecize, Pachia nynh a rae paw miakaw tuh ahoypaw nynh thua. Lungtuabya hote lawku lanze pawpaw mah sung lan ccan khyh. ⁵ Pawccecize Pachia bya liate thuasah, sawsangnaw liate thuasah pawpaw balyn tuh thyaasah athua. ⁶ E uccaw`ae kong hynh nang nynh uteno`ae kha na hopya lan`ae athua ze, nang tuh Jesu Kri ryalahtu hoypaw na thua cih. Namaw nynh phe na zui vae paw, ahoypaw doctrine te zynnaw bya`ae khate nang tuh na kuakuh cih. ⁷ Thuasalama atawpaw nopi`ae nynh tuanawte a ho`ae paw phungpaw`ae kha la vua lah Pachia lante hiinnaw kya namaw te namaw la leihcinh. ⁸ Pawccecize pynsaw lante leihcinh paw tuh ccapyh nynh athane. Thuasalama Pachia lante hiinnaw tuh atu e hiinshe te yn thua vae cih paw hiinshe kya-e byakinkupaw kha a hoi paw thua keiccuze pawpaw balyn hanlan athanepaw nynh thua. ⁹ Hynh-e bya tuh zyn lan umpaw bya thua zah khaleih lawku lan accanpaw nynh thua. ¹⁰ Hynh-e keiccuze aening tuh rya ah lah oh zah saryanaw kha ah teing oh. Pawkeiccumacize aening tuh ccungccaw balyn Khumtu athua paw, abapi lante a zyn`ae paw Khumtu athua paw, a hiinpaw Pachia kha a doliakuh`ae paw nynh ah thua oh. ¹¹ Hynh-e uccaw`ae kong hynh kawpya`ae lah la ccangpah`ae. ¹² Na kum ano keiccu hung nynh san ae la dothatheih nan`ae sah. Thuasalama nang tuh bya kya, ozia kya, sungsakunaw kya, muisaw kya, zynnaw kya, thyaapapingnaw kya, zyntu`ae nynh dosuinkupaw la thua. ¹³ Kae kae thua makhia ccathyaa ria paw, ming`ae hybuanaw, te ccangpyanaw kha thawte la rae. ¹⁴ Pastor`ae nynh na tungvaw mih kuih he khan`ae te profehbyahonaw thyhte nang kha muisaw lasung pya na thua. Kha-e lasung kha mang lan la maah nan. ¹⁵ Na kaethungnaw kha ccungccaw balyn kya alangku nawlan, e uccaw`ae hynh pei la tua lah thawte la zuakuh. ¹⁶ Namaw te namaw thuasah, na ccangpyanaw thuasah la raeringkuh lah kha-e`ae kyakhe pei la tyn. Pawccecize khate na cyinaw liate namaw kha thuasah, na hopaw a thae`ae paw kha thuasah paryhte na khum cih`ae.

¹ Kum tang huapaw kha la pe nan, thuasalama paaw hawte thawte la soihbia. Kum nohua paw pise`ae kha u te neitaw hawte, ² kum tang huapaw nopi`ae kha nung`ae hawte, kum nohua paw nopi`ae kha ccia`ae hawte lungthyaanaw balynte la soihbia`ae. ³ Numae ccaccing athua paw numae`ae kha saw la tua`ae. ⁴ Thuasalama numae lukhakheit nynh ccaaw`ae, tukhyhze mintaw`ae a hoi lanze, innvaw kya Pachia sawtuanaw langsaku khylan, te mih nungpaaw`ae dooih ru khylan minmin tuh masaty innvaw khe ccangkuhty`ae sah. Pawccecize tuh-e tuh Pachia malang ahoypaw te nawccaw lan um paw nynh thua. ⁵ Numae ccaccing thua zah a makhaete a um paw nopi tuh Pachia kha doliakuh zah sawsangnaw te ngianaw kyakhe nynh khuazi khuadae po a tyn. ⁶ Thuasalama pynsaw hoysanaw kya a hiinpaw numaenung tuh phang a hiin pite a chihpaw nynh thua. ⁷ Minmin tuh ccaenaw a um khyh ccaw`ae, kha-e uccaw`ae kong kha kaw la pya`ae. ⁸ Thuasalama lukhakheit nynh amaw ccungccaw`ae kha a dooih khyh lanze, abapi lante amaw a innbyn`ae kha a dooih khyh lanze, zynnaw kha phe a vua paw nynh thua, zyn leitu laeze houh athah huapaw nynh thua. ⁹ Kum sungtaruh kaw e numae tuh numae ccazing kya teebua nan sah, pise lukheit zu po a la thua paw, ¹⁰ ahoypaw ryalaw`ae hanlan thehoyccousah`ae paw; imua`ae kha a kua ze, mikhia`ae kha a thuasah`ae ze, mithyaa`ae ccu kha a singpya ze, riathae`ae paw kha lunghoysah ze, ahoypaw ryalaw miakaw kha thawmawte a zui ze, ccazing kya la teebua sah. ¹¹ Thuasalama kum ano huapaw numae`ae kha tuh la nue`ae. Pawccecize ohhuakurynaw he a hoi`ae tuh Kri kha rawsete vawpaw bua a hoiry`ae, ¹² masaty-e mih zynnaw kha a vua vae`ae keiccuze minmin tuh seibenaw a mue`ae. ¹³ Tuhlaeze, inn kheit kyate inn kheit kalan pae`ae zah thawnawpaw kha a ccangku`ae. Mih thawnaw kyalya thua leite thanry`ae paw mah thua`ae zah ho lan accan leipaw a ho paw, a ccukuh bua paw nynh athua`ae. ¹⁴ Tukeiccuze a rhawtupaw nynh saryanaw lanpaw kha ccyhhoy a pya khyh nawlan, kum anohua`ae paw numae`ae tuh vawpaw la hoi`ae sah, ccaaw la saah`ae sah, innlo la dooih`ae sah cite ka ry. ¹⁵ Pawccecize abang tuh Setan nuhlang phe a paleihkuh vae`ae. ¹⁶ A zyn paw pise, tukhyhze a zyn paw nopi nynh numae`ae a hoi ze, mimaw nynh minmin kha dooih`ae sah lah kriccawbu kha tavuin pya thua nan sah. Ou tuhte numae ccaccing`ae kha kriccawbu nynh a dooih nawlan. ¹⁷ Ahoyte a uk`ae paw pastor`ae, abapi lante phunghonaw kya te ccangpyanaw kya ryalah`ae paw tuh sawtuanaw leih ning te ccou lan angaekuh`ae cite tua lanpaw nynh thua. ¹⁸ Pawccecize Ccathyaa nynh, “Ccatan a tin paw tangnuapaw a mung kha na bucceih lan khyh,” a ci. Te, “Ryalahtupaw tuh a ryalaw mee mue lan accan,” bua a ci. ¹⁹ Ccaekia luning, tukhyhze luthung a um khyh ze, pastor sei a benaw`ae kha nawccawpah nan`ae. ²⁰ Mingccang`ae nynh mah a ri ccaw`ae, a sei`ae paw kha ccungccaw balyn malang khe pe`ae. ²¹ Lukheit laeze lukheit maedo huanaw kharyh hoi leite, laesanaw te pawpaw sanmah na cyi khyh nawlan, Pachia te Bawipaw Jesu Kri malang thuasah, popaw vaaw ccungccaw`ae malang thuasah e uccaw`ae hynh nang nynh na zui nawlan, bya kae tawsya. ²² Hung ccungccaw tungvaw sanmah na kuih palou la khang nan. Milae seinaw kha mah la neethungkuh bua nan, namaw te namaw kha la thyaasakuh. ²³ Na vue elan te leih na ccinawpaw hanlan, tui kyalya kha la neih nan, thuasalama misutui beihtaraw kha la mangbia. ²⁴ Ccungccaw abang seinaw tuh raerae alangkuh, mih seinaw`ae tuh byapianaw kalan laanmawty vae. Ccungccaw abang seinaw tuh nyalang te nynh alangku. ²⁵ Tuhhawte ccungccaw abang kya-e ahoypaw ryalaw tuh raerae alangkuh, te alangkuh loh leipaw ahoypaw ryalaw`ae mah phisi kho thua lan khyh.

¹ Pachia a min te a ccangpyanaw kha thethyaccou khyh nawlan, taphu kaw um paw see`ae miakaw nynh tuh mih bawi`ae kha myarya sawtua lan accan cite tua`ae sah. ² Te zyntu bawi`ae a hoi paw see`ae nynh uteno athua`ae keiccuze pawlangria leite um nan`ae sah. Thuasalama thanenaw a ccou`ae paw tuh zyntu`ae te sungsah`ae paw athua`ae keiccu mih bawi`ae kha houh ryalawpah`ae sah. Hynh-e uccaw`ae hynh la ccangpah`ae lah la hy`ae. ³ Lukhakheit nynh ccanglangte a ccangpya lan thua ze, te ah Bawipaw Jesu Kri bya athua paw phe riapaw bya`ae kha a nawccaw khyh lan thua ze, te Pachia lante ccia paw te accawkuhpaw ccangpyakunaw kha a nawccaw khyh lan thua ze, ⁴ aning tuh pawsang ny leite a tansakuhpaw nynh thua. Thuasalama aning tuh byalungnaw te byaeikunaw kya a lungzua paw nynh thua. Tuh-e`ae kyate eiungnaw, peku maekunaw, thethyahonaw, ahoy leipaw lunghiinnaw, ⁵ ahoy leipaw tuanaw-thinlung kyate ccungccaw`ae ry thawte eikunaw kha a pou, te byaccing cipaw um khyh, Pachia lante ccia paw tuh muenawpaw nynh thua cite a tua`ae. Khahtahawpaw ccungccaw`ae kyate namaw kha la phiakuh. ⁶ Thuasalama lungryachikhaekunaw ryte Pachia lante ccia paw tuh alepipaw muenaw nynh thua. ⁷ Pawccecize laephipi lungkhu lang aening nynh pawsang mah ah thuakhae khyh oh; pawsang mah ah poukhae kho lan khyh oh cipaw phe aria. ⁸ Te aepaw te boeining-sungpue ah hoi oh paw khate ah lungryachikhaeku lanpaw nynh thua. ⁹ Thuasalama hoirung a ry`ae paw tuh tuh-ounaw lungkhu lang, kaang lungkhu lang, ngaeenaw patae te ronaw thuakhae paw ryduanaw lungkhu lang nynh a phungkuh cih`ae. Tuh-e`ae nynh ccungccaw`ae kha ronaw te zonaw kya a phungsaku`ae. ¹⁰ Pawccecize phua rynaw tuh ahoy leipaw phin balyn kyaze atharuipi nynh thua. Kha-e kha ccungccaw abang nynh he a dua`ae tuh zynnaw kyate phe a cceihsei vae`ae, te mimaw te mimaw kha ngaethyanaw pataepi khate a thuinkuh`ae. ¹¹ Thuasalama, pou Pachia ccungccapaw, nang tuh kha-e uccaw`ae kha ccuetaw lah dingnaw, Pachia lante ccia paw, zynnaw, sungsakunaw, ngaesangnaw, nevyalyanaw kha la zui. ¹² Zynnaw kya-e ahoypaw rhawtuknaw kha la tuk, zungzae hiinnaw kha varyn kyngkuh. Kha-e kalan nang tuh ko na thua zah ccaekia patae malang ahoypaw ccaekia phe na khang vae. ¹³ Pawpaw balyn hiinnaw a pyatupaw Pachia malang te Pontias Pilat malang ahoypaw ccaekia a khangtupaw Kri Jesu malang, nang kha bya kae tawsya paw tuh: ¹⁴ Ah Bawipaw Jesu Kri yn langkuh cia nang nynh athupaw beku leite, seibe lanpaw a um lei lante, kawpyapaw kha la zui cipaw nynh thua. ¹⁵ Tuh-e langkunaw kha Pachia nynh amaw accyh kya yn langsakuh cih. Aning tuh thehoyccoupaw, a makhae kyalya Athungpaw, siapharan`ae Siapharan te bawi`ae Bawipaw nynh thua. ¹⁶ Amaw rou nynh chi kho leinaw a hoi, hung ccungccaw nynh san a naeku kho leipaw awnaw kya a um paw nynh thua; amaw kha hung ccungccaw nynh san muih boi khyh zah muih kho khyh; sawtuanaw te zungzae thungnaw tuh amaw kya um sah. Amen. ¹⁷ Atu she kya a hoirung`ae paw kha a tansaku khyh nawlan`ae, atyn leipaw hoirungnaw kha a doliaku khyh nawlan`ae, thuasalama ah lungtua nawlan pawpaw balyn phe beih lang oun pyatupaw, a hiinpaw Pachia kha a doliaku nawlan`ae kawpya`ae. ¹⁸ Minmin nynh ahoypaw ryalaw kya a hoirung ccaw`ae, pyabua lan a paccynku ccaw`ae, neethungbua lan a ry ccaw`ae ahoypaw rya law lan kawpya`ae. ¹⁹ Zungzae hiinnaw kha a phyabua nawlan`ae, yn thua vae cih paw ccyh elan mimaw hanlan ahoypaw atungpi kha a ccakhungkuh cih`ae. ²⁰ Pou Timote, na kya ae ahsya`ae paw kha la ring. Anungsikuhpaw te accakaepaw byahokupaw, te akyh lei lante nynaw a ci`ae paw, arawsekuh`ae paw kha la sibia. ²¹ Kha-e akyh leipaw nynaw kha lawku bua te ccungccaw abang nynh zynnaw kha phe a poutaw vae`ae. Thawccinaw tuh na kya la um vae sah. Amen.