1 Thessalonians

¹ Paul, Sailas te Timote nynh Paaw Pachia te Bawipaw Jesu Kri kya a um paw Thesalon khua e kriccawbu kha kae beihlang oh. Ah Paaw Pachia te Bawipaw Jesu Kri kya-e thawccinaw te daenaw tuh nae kya la um sah! ² Nanning balyn hanlan Pachia kalan lungtuabya pei kae ho, kae sawsangnaw kya nanning kha pei kae hobia oh. ³ Ah Paaw Pachia malang, nae zynnaw kya-e na cyisahnaw oh, te sungsakunaw kya-e na zuakunaw oh, te ah Bawipaw Jesu Kri kya ngaehoinaw kya-e ngaesangnaw kha tyty kae liathui. ⁴ Sungsahpaw uteno`ae, Pachia kya-e nanning ponaw kha kae ny. ⁵ Pawccecize kaening kya-e thehoypaw tuh nae kalan bya kyalya te yn thua khyh, thuasalama nanning hanlan kaening tuh pawtecihpaw ccungccaw`ae nynh kae thua cipaw kha na ny vae oh hawte, thungnaw te Thyaa Muisaw te phe ny ccaccingnaw ryte nynh yn thua. ⁶ Te nanning tuh vawsawnaw patae teingbiate, Thyaa Muisaw kya-e lungtuanaw ryte Pachia bya kha na lawkuh oh zah kaening thydokuh`ae paw te Bawipaw thydokuh`ae paw nynh na thua oh. ⁷ Tukeiccuze Mesidonia ram te Akhai ram kya a zyn`ae paw balyn hanlan nanning tuh dosuinku lan um`ae paw nynh na thua oh. ⁸ Pawccecize nanning kyate Bawipaw bya roi tuh Mesidonia ram te Akhai ram kya kyalya ccae khyh, thuasalama Pachia na zynnaw oh paw tuh ahmin takyh kya mah pung pazaekuh vae, tukeiccu kaening nynh pawpaw sanmah kae ho ho vae khyh. ⁹ Pawccecize kaening nynh nae kalan pawcihte nynh kae tee cipaw kaening konglang kha minmin nynh a ho`ae, te hiin zah ahmepaw Pachia ryalawpya khylan zohtuh`ae kyate Pachia kalan pawcihte nynh na paleihku oh cipaw, ¹⁰ yn thua lanpaw thinrianaw kyate aening kha yn luesatupaw Jesu, Pachia nynh a chih`ae paw kyate a thosah paw, vaawran kyate yn thua cih paw a Ccapaw ngaw lanpaw kha a ho`ae.

¹ Uteno`ae, nae kalan kaening nynh kae tee paw tuh accakaepaw thua khyh cipaw kha naemaw ccaccei nynh na ny oh. ² Nanning nynh na ny oh hawte kaening tuh Filipi khua kya langmaw kae teing zah maethya oun law`ae koute rawsenaw pataepi ryte Pachia kha doliakute, Pachia thehoypaw kha nanning kalan rawhoy te kae ho. ³ Pawccecize kae hynaw oh paw tuh lingkunaw, nungsikunaw te pheekunaw kyate thua khyh. ⁴ Thuasalama thehoypaw kha zyn lan um lante ho khylan Pachia nynh nawccawkhaepaw kae thua thyhte, ccungccaw`ae lungrythuasahpaw hawte thua leite, kae thinlung oun syntawtupaw Pachia lungry thyhte nynh kae ho. ⁵ Pawccecize nanning nynh na ny oh hawte, kaening nynh lunglebya ho paw kha vaekhakheit san kae mang boi khyh, a karangku nawlan cyiruhnaw thinlung mah kae hoi khyh, Pachia tuh kae ccaekia nynh thua. ⁶ Kri kya-e locceihtu`ae kae thua hawte, hoku lanpaw kae hoi zemah, ccungccaw`ae kya phu-enaw kha kae ccungkuh khyh, nanning kya mah, mingccang`ae kya mah kae ccungkuh khyh. ⁷ Thuasalama oihtunung nynh a ccaaw`ae kha a oihsah`ae hawte nanning laku kaening tuh kae nevyalya. ⁸ Nanning tuh kou sungsah lan na um oh keiccuze myarya kae ngae oh, Pachia thehoypaw kyalya kha thua leite, kae hiinnaw hei kha neethung lan kae lungrythua. ⁹ Pawccecize uteno`ae, kae ryalaw te thawbangte rya kae law paw kha na ny oh. Nanning lukhakheit hanlan sanmah phuripaw kae thua khyh nawlan, khuazi khuadae ryalawku biate Pachia thehoypaw kha nae kalan kae hopya oh. ¹⁰ A zyn`ae paw nanning laku kaemaw te kaemaw kha thyaararih lang, dingrarih lante ccaenaw um lei lante pawcihte nynh kae hiin cipaw nanning tuh ccaekia`ae nynh na thua oh, te Pachia mah ccaekia nynh thua. ¹¹ Paaw nynh a ccaaw`ae kya a cyi hawte, kaening nynh nanning milu raveih kha pawcihte nynh kae hy oh, thawzung kae pya oh zah bya kae tawsya oh cipaw kha na ny oh. ¹² Ou tuhte a peenaw lungkhu lang te a phu-enaw kalan ae ko oh paw Pachia te angaekuh lante nanning nynh na hiin nawlan oh nynh thua. ¹³ Kaening kyate na thae oh paw Pachia bya kha nanning nynh he na lawkuh oh te, ccungccaw`ae bya hawte na lawkuh khyh oh, thuasalama byaccing thua zah a zyn`ae paw nanning kya mah amawccih lante ryalah paw Pachia bya hawte na lawku oh keiccuze, hynh-e hanlan apaekuh lei lan Pachia kalan lungtuabya kae ho. ¹⁴ Pawccecize uteno`ae, nanning tuh Kri Jesu kya um paw, Judah pee e Pachia kriccawbu`ae thydokuh`ae paw lang na tang oh. Pawccecize minmin nynh Jew`ae kya-e a teing`ae hawte, nanning mah naemaw ccungccaw`ae kya-e khahtahawpaw uccaw`ae kha na teing bua oh. ¹⁵ Kha-e Jew`ae nynh Bawipaw Jesu te mih profeh`ae kha paryh a chia`ae, te kaening kha oun tua oun sah`ae; te minmin nynh Pachia kha lunghoysah khyh`ae, te ccungccaw balyn kha a rawse`ae. ¹⁶ Zenta`ae nynh khumnaw a muebua khyh ccaw`ae cite thehoypaw ho lan kaening kha oun khee`ae zah mih seinaw kha pei a biachihkuh`ae, tukeiccuze Pachia thinrianaw tuh minmin tungvaw khe khaleih accah. ¹⁷ Thuasalama uteno`ae, kaening tuh thinlung kyate thua leite, pyn lante nanning te sosoh ah phiakuh oh pawte nae mitmae muih khylan myarya kae peki zah thawmawte kae zuakuh. ¹⁸ Tukeiccu kaening tuh nae kalan thua lan kou kae ry. Kae, Paul mah atu te atu ka zuaku tua. Thuasalama Setan nynh kaening kha phe oun khee. ¹⁹ Kaening ngaehoinaw, tukhyhze lungtuanaw, tukhyhze lungpawnaw suilukhung tuh pawmou athua? Ah Bawipaw Jesu Kri yn thua te, amaw malang e nanning ccaccei kha na thua khyh oh tou? ²⁰ Pawccecize nanning tuh kae phu-enaw te lungtuanaw nynh na thua oh.

¹ Tukeiccu kaening nynh he kae ngaesang kho khyh tuh, Athen khua kya kae makhaete umhy lanpaw tuh ahoy cite kae tua. ² Te Kri thehoypaw kya rya kae lahkheihtu, Pachia rya a lahtupaw, kae neitaw Timote kha, nanning tynsathung khylan te nae zynnaw konglang te nanning kha thawzungpya khylan, ³ hynh-e vawsawnaw`ae keiccuze hung sanmah na pia khyh nawlan oh kae saw; pawccecize kaening tuh hynh-e`khylan khang paw nynh kae thua cipaw naemaw ccaccei nynh na ny oh. ⁴ Pawccecize kaening tuh nae kya kae um lyaze, vawsawnaw kae teing vae cih cite langmaw phe kae hopyaty vae oh. Ou tuhhawte acyikuh paw kha na ny oh. ⁵ Hynh-e keiccuze he ka ngaesang kho khyh tuh nae zynnaw kha ny khylan Timote kha kae saw. Tukhyh lanze tuhoutu nynh ccangkhakheit te nanning kha he ae tuh-ou oh tuh kae ryalaw kha alakaw lang a tangsei cih. ⁶ Thuasalama atu nae kyate kaening kalan Timote he yn thua tuh nae zynnaw te sungsakunaw thungpang hoypaw kha oun phupah zah, kaening tungvaw ahoypaw liathuinaw pei na hoi oh cipaw, te kaening nynh nanning kha kae muihry oh hawte kaening kha myarya muih nae ry oh cipaw oun hopya. ⁷ Tukeiccu uteno`ae, kae vawsawnaw balyn kya, te kae riathaenaw balyn kya nae zynnaw nynh kae ngae oun ngansah. ⁸ Pawccecize Bawipaw kya tynkaring na thadyn oh zetuh, atu kaening tuh kae hiin. ⁹ Ah Pachia malang nanning keiccuze kae lungtuanawpaw lungtuanaw balyn hanlan, nanning elan pawtahawpaw lungtuabya mou Pachia kalan bua kae ho kho ung cih? ¹⁰ Nae mae kha kae muih oh ccaw cite, te nae zynnaw kya aboupaw kha kae ccingsapya oh ccaw cite khuazi khuadae thawte saw kae sangpah oh. ¹¹ Atu ah Pachia, Paaw amaw te ah Bawipaw Jesu Kri nynh kae laanpi tuh nae kalan oun paccynpah vae sah. ¹² Te nae kya kae cyi hawte, Bawipaw nynh ae pungthungsah oh sah lah ccungccaw balyn kya te lukheit te lukheit kya sungsakunaw te phe ae biasah vae oh sah. ¹³ A mithyaa`ae balyn ryte ah Bawipaw Jesu Kri yn thua vae ze, ah Pachia te Paaw malang thyaanaw kya ccaenaw um lei lante nae thinlung kha amaw nynh ae tynsah vae oh sah.

¹ Tuhlaeze uteno`ae, nanning nynh pawcihte nynh hiin lan accan, Pachia kha pawcihte nynh a lungrythuasah lan accan cipaw kha kae kyate phe na mue vae oh hawte, houhouh na bia nawlan oh, Bawipaw Jesu liate kaening nynh kae ngia oh zah kae hy oh. ² Pawccecize pawtahawpaw kawpyapaw`ae kha nynh Bawipaw Jesu liate kaening nynh kae pya oh cipaw kha na ny oh. ³ Pawccecize nanning thyaasanaw Pachia rynaw tuh e hynh nynh thua: nanning nynh ohhuakunaw kha na sungku nawlan oh, ⁴ nanning milu raveih nynh amaw pyn kya-e kha thyaasanaw te sawtuanaw kya pawcihte nynh hoi lan cipaw na ny nawlan oh, ⁵ Pachia nyh leipaw Zenta`ae hawte myarya ohhuakurynaw kya um leite; ⁶ hynh-e kong kya hung nynh san ccyhhoypaw a lawku khyh nawlan, te unopaw kha a hyngpya khyh nawlan Pachia nynh a ry. Pawccemacize kaening nynh phe kae hopah tou vae oh zah ccaekia phe kae khang vae hawte, Bawipaw tuh khahtahawpaw a cyih`ae paw balyn kha ccaeliatu nynh thua. ⁷ Pawccecize Pachia nynh athyaa leipaw kalan aening kha oun ko khyh, thuasalama thyaanaw kalan nynh oun ko. ⁸ Tukeiccu hynh-e pawlangria leipaw ccungccaw tuh ccungccaw kha pawlangria khyh paw thua leite, a Thyaa Muisaw oun pyatu Pachia kha pawlangria khyh paw nynh thua. ⁹ Thuasalama uteno sungsakunaw konglang te kae nynh nae kalan zei ho vae khyh. Pawccecize nanning tuh lukheit te lukheit sungsaku lan Pachia nynh a ccangpya vae paw nynh na thua oh. ¹⁰ Te Mesidonia ram kya um`ae paw uteno`ae balyn tungvaw kya nanning nynh khahcihte na cyipya ccaccing oh. Thuasalama uteno`ae, nanning nynh houhouh na pungthung nawlan oh kaening nynh thawte kae ngia oh. ¹¹ Kaening nynh kaw kae pya vae oh hawte, daebabilan na umthya nawlan oh, te naemaw ryalaw kha nae kuih te na law nawlan oh kae ngia oh; ¹² atolang e ccungccaw`ae kya kou ngaekuh lante na hiin nawlan oh, te pawpaw sanmah na bou vae khyh nawlan oh kae ngia oh. ¹³ Thuasalama uteno`ae, ngaehoinaw a hoi leipaw mingccang`ae nynh mih ngaethya hawte nae ngaethya khyh nawlan a ih`ae paw konglang kha nanning nynh ny leite na um lan oh paw kha ka ry khyh. ¹⁴ Pawccecize Jesu tuh chih zah bua a thothui cite aening nynh ah zyn lan oh ze, tuhhawte Jesu kya a i`ae paw kha mah amaw ryte Pachia nynh a cciakhae cih`ae. ¹⁵ Bawipaw bya liate nanning kha e hynh kae hopya oh, Bawipaw yn thua cia, ah hiinhy oh paw aening nynh a ih vae`ae paw kha ah thoih lan khyh oh. ¹⁶ Pawccecize Bawipaw amaw tuh siaruanaw ryte lupi athua paw vaaw ccungccapaw roi ryte, Pachia mungkae roi ryte vaawran te yn rungbung cih zah Kri kya a chih`ae paw tuh masaty oun tho cih`ae. ¹⁷ Oute ah hiinhy oh paw aening tuh khivae kya Bawipaw te tungku khylan, minmin ryte pynkheihlan maeking kya hangthung ah thua cih oh, ou tuhte aening tuh Bawipaw ryte po umkheih lan vae. ¹⁸ Tukeiccu hynh-e bya`ae hynhte lukheit te lukheit thawzung pyakuh oh.

¹ Thuasalama uteno`ae accyh te kumvaelori kong tuh kae nynh nae kalan zei ho vae khyh. ² Pawccecize Bawipaw nin tuh khuazi kya miruh hawte nynh yn thua cih cipaw kha naemaw nynh ccaerarihlan na ny oh. ³ “ Daenaw te khynnaw a um,” a ci`ae lyakhe, ccaaw a poipaw nopinung tungvaw neitangia nynh a thuanua hawte, minmin tungvaw ronaw nynh vaekheihmawte a thuanua cih`ae zah minmin tuh lue lan khyh`ae. ⁴ Thuasalama uteno`ae, tuh-e nin nynh miruh hawte nanning tungvaw ae thuanua bua lan khyh oh, pawccecize nanning tuh mohnaw kya na um khyh oh. ⁵ Nanning balyn tuh awnaw ccaaw`ae te khuadae ccaaw`ae nynh na thua oh. Aening tuh khuazi ccaaw`ae ah thua khyh oh, mohnaw kya-e mah ah thua khyh oh. ⁶ Tukeiccu mingccang`ae nynh a i`ae hawte, aening ih nan oh sih, thuasalama aening tuh raeringku oh sih lah kyhrarihlan um oh sih. ⁷ Pawccecize a ih`ae paw tuh khuazi nynh a i`ae, te a rui`ae paw mah khuazi nynh a rui`ae. ⁸ Thuasalama khuadae ccaaw`ae ah thua oh paw aening tuh kyhrarihlan ung oh sih, zynnaw te sungsakunaw kya-e bykhaw saphua te khumnaw kya-e ngaehoinaw sivawlukhung khate ccaankuh oh sih. ⁹ Pawccecize Pachia thinrianaw kha teing khylan Pachia nynh aening kha yn khang khyh. Thuasalama ah Bawipaw Jesu Kri liate khumnaw mue khylan nynh yn khang. ¹⁰ Aening tuh ah thaeku oh zemah, ah i oh zemah, amaw ryte pynkheihlan um khylan, aening hanlan nynh Kri tuh a chi. ¹¹ Tukeiccu nanning nynh leih na cyi oh hawkhate, naemaw te naemaw kha thawzungpyakuh oh lah lukheit te lukheit tynsakuh oh. ¹² Uteno`ae, nanning laku ryalah`ae paw, Bawipaw kya nanning luki a um`ae paw, te nanning ae thuihei oh paw kha saw la tua oh cite kae ngia oh. ¹³ Te mih ryalawnaw liate minmin kha sungsakunaw kya myarya ahang lante la tua oh. Naemaw te naemaw laku la ccawkuh oh. ¹⁴ Uteno`ae, atu nanning kha kae ngia oh; mih ry thyhte a le`ae paw kha raeringnaw la pya oh, lungthawzya`ae paw kha thawzung la pya oh, thawzya`ae paw kha la bawng oh, ccungccaw balyn kya nae lung la sae sah. ¹⁵ Hunghung nynh sanmah lukhakheit kha ahoy leipaw hanlan ahoy leipaw te liaru nan sah, thuasalama naemaw laku te ccungccaw balyn kya ahoypaw kha pei la zui oh. ¹⁶ Pei lungtua oh. ¹⁷ Apaekuh lei lan sawsang oh. ¹⁸ Atyn-are balyn kya lungtuabya ho oh; pawccecize tuh-e tuh Kri Jesu kya nae hanlan Pachia rynaw nynh thua. ¹⁹ Muisaw kha daesah nan oh. ²⁰ Profehbya ho paw kha pawlangria leite um nan oh. ²¹ Pawpaw balyn kha syntaw oh, ahoypaw uccaw kha tynkaring lang kyngkuh oh. ²² Ahoy leipaw miakaw kha sibia oh. ²³ Te daenaw Pachia amaw ccaccei nynh nanning kha marya ae la thyaasah vae oh sah; te ah Bawipaw Jesu Kri yn thua te, nae muisaw, nae thinlung te nae pyn khaleih kha ccaenaw um lei lan ae la khynsah vae oh sah. ²⁴ Nanning ae kotu oh paw tuh zyn lan um paw nynh thua, kha-e kha mah a cyih cih. ²⁵ Uteno`ae, kaening hanlan saw oun sangpah oh. ²⁶ Athyaapaw myngkunaw khate uteno`ae balyn kha la beihlang oh. ²⁷ E ccaky hynh athyaapaw uteno`ae balyn kalan la riapah oh cite Bawipaw liate kae nynh nanning kha bya kae tawsya oh. ²⁸ Ah Bawipaw Jesu Kri thawccinaw tuh nae kya la um sah. Amen.