1 Peter

¹ Jesu Kri kya-e locceihtu athua paw, Piter nynh Pontas, Galatia, Kapadosia, Asia, te Bithynia ram kya phiariphiarae um`ae paw khuaccung`ae paw kalan ccaw kae ky oh. ² Kawngaenaw hanlan te Jesu Kri kya-e chii theinaw ccou nawlan, Muisaw kya-e thyaasanaw liate, Paaw Pachia nytynaw thyhte po`ae paw: Thawccinaw nae kya la um sah lah daenaw la pungthung sah. ³ Pachia te ah Bawipaw Jesu Kri a Paaw tuh thehoysah thua sah. A chih`ae paw kyate Jesu Kri thothuinaw liate ahiinpaw ngaehoinaw hoi nawlan, paepaeluipaw a ngaethyaumsanaw thyhte aening kha bua oun saah vae. ⁴ Tuh-e tuh nanning hanlan vaawran kya ccypya athua paw arohthya leipaw, anungsikuh leipaw, te anaanthya leipaw rho uccaw kha mue khylan nynh thua. ⁵ Nyathyakou ccyh kya langsaku khylan paccynpaw, zynnaw liate khumnaw mue nawlan Pachia kya-e thungnaw liate nanning tuh ccy na thua oh. ⁶ Syntawnaw`ae aphuinphuin liate, aho lanze atu ccyh sosoh nae ngaethya zemah e kyahin myarya lungtua oh. ⁷ Ou tuhte thanccingpaw nae zynnaw tuh arohthyapaw sui laeze aphute huapaw athua thyhte, maee te syntaw athua zemah, Jesu Kri yn langkunaw kya amaw thehoysah nawlan, sawtua nawlan te phuesah nawlan muih athua nawlan nynh thua. ⁸ Amaw kha na muih lei oh pite na sungsah oh; atu amaw kha na muih khyh oh zemah na zyn oh; phe beihpaw phu-enaw te ho kho um leipaw lungtuanaw khate nae lungtua. ⁹ Pawccecize nae hiinnaw-muisaw khumnaw athua paw, nae zynnaw kya-e thanenaw kha na mue oh keiccu nynh thua. ¹⁰ Nae kalan yn thua lanpaw thawccinaw kong a la phyty`ae paw profeh`ae nynh hynh-e khumnaw kong kha la khia`ae zah thawte la ccung`ae. ¹¹ Kri teingnaw, te tuh-e yn zui lanpaw phu-enaw kha minmin kya um paw Kri Muisaw nynh he a langsapaty`ae tuh pawmou a hothery, tukhyhze paw ccyh mou a hothery cipaw kha thawte a ccung`ae. ¹² Mimaw hanlan thua leite, thuasalama nanning hanlan nynh rya ae lawpya oh cipaw tuh mih kalan phy athua, vaawran kyate saw athua paw Thyaa Muisaw liate nae kalan thehoypaw a ho`ae paw liate khae` ae kha atu nae kalan thaesah athua vae. Kha-e uccaw`ae kha vaaw ccungccaw`ae nynh rirido lan a ry`ae paw nynh thua. ¹³ Tukeiccu nae tuanawthinlung kha varyn cciakuh oh, kyhrarihlan um oh lah Jesu Kri langkunaw kya nae kalan thuakhae athua cih paw thawccinaw kha athangnaw cia ngaehoi oh. ¹⁴ Na la ny khyh lya oh, langmaw lya-e pynsaw ryduanaw`ae muinsan kha la ke nan vae oh, kawngaepaw ccaaw`ae hawkhate um ccavae oh. ¹⁵ Thuasalama nanning ae ko oh paw tuh athyaa thyhhawte, nae umtu ziazae balyn kya nanning mah thyaa oh. ¹⁶ Pawkeiccumacize, “Kae tuh ka thyaa keiccu, nanning mah thyaa oh,” cite azeikuh. ¹⁷ Ccungccaw`ae laesahnaw um leite, ccungccaw miakaw a ryalaw thyhte byapia paw, Paaw kha na ko na ngiaku oh ze, e kya na um lungkhu oh balyn amaw rawrinaw te la um oh. ¹⁸ Nae minpaaw`ae kyate na mue oh paw accakaepaw nae hiinnawzia kyate, phua te sui tahawpaw arohthyapaw uccaw`ae khate nanning tuh sawkhaw na thua khyh oh, ¹⁹ thuasalama ccaenaw um leipaw, athupaw um leipaw, tuutaw hawte athua paw, Kri kya-e aphutepaw chii te nynh sawkhaw na thua oh cipaw kha na ny oh. ²⁰ Tuh-e Kri tuh laephipi atho mawze laerui-awde ty vae paw ccaccing nynh a la thua, thuasalama hynh-e nyathyakou ccyh`ae kyahin nanning hanlan yn langkuh. ²¹ Nae zynnaw te ngaehoinaw tuh Pachia kya athua nawlan, amaw kha a chih`ae paw kyate thosah zah phu-enaw a pyatupaw Pachia kha Kri liate na zyn oh. ²² Muisaw liate byaccing kawngaenaw kya nae hiinnawmuisaw` ae kha phe na ccikanku vae oh thyhte, uteno`ae thanccingte sungsanaw kya, athyaapaw thinlung khate lukheit te lukheit thawmawte sungsakuh oh. ²³ Pawccecize arohthyapaw ccacii te thua leite, arohthya leipaw, ahiinpaw te zungzae atynpaw Pachia bya liate nynh na puithui oh. ²⁴ Pawccecize, “Ccungccaw balyn tuh lonua hawte nynh thua. Te ccungccaw phu-enaw balyn tuh lonuapaw hawte nynh thua. Lonua tuh anaan, te kha-e apaw tuh akhuakuh. ²⁵ Thuasalama BAWIPAW bya tuh zungzae atyn.” Te tuh-e tuh thehoypaw liate nanning kalan hopya paw bya kha nynh thua.

¹ Tukeiccu ahoy leipaw balyn, hyngpyakunaw balyn, thyaruhnaw, eiungnaw, te thanhokunawpaw`ae balyn kha ccaring vuate; ² apuithawpaw imua`ae hawte, Pachia bya accipaw samatei kha peki oh; ou tuhte kha-e liate nanning nynh na lethung nawlan oh, ³ Bawipaw tuh thawccithyapaw nynh athua cipaw kha phe na tangtua vae oh ccaccing lanze, peki oh. ⁴ Ccungccaw`ae nynh a nue`ae paw, thuasalama Pachia nynh a popaw, aphutepaw, ahiinpaw lung athua paw amaw kalan nae thua oh hawte, ⁵ nanning kha mah ahiinpaw lung`ae hawte muisaw lante sak paw inn nynh na thua oh, Jesu Kri liate Pachia kalan douccahpaw, muisaw lante silawkunaw`ae kha pya khylan, athyaapaw ranpibawi nynh na thua oh. ⁶ Tukeiccu Ccathyaa kya, “Dotua oh, popaw lung, aphutepaw, abapi huapaw aki lang-e lung kha Zion kya ka nung, te amaw kha a zyn paw ccungccaw tuh maethya ccou vae lan khyh,” cite a um. ⁷ Tukeiccu a zyn paw nanning hanlan aning tuh aphutepaw nynh thua. Thuasalama a zyn lei`ae paw hanlan, “Inn saktu`ae nynh a nue`ae paw lung tuh aki lang-e abapi huapaw lung lang yn tang,” ⁸ te, “Thykupawkunaw lung, khuliakunaw lungpi,” lang yn tang. Bya kha a ngae khyh`ae keiccu nynh athyapawkuh` ae; minmin tuh kha-e hanlan khang paw nynh thua`ae. ⁹ Thuasalama nanning tuh mohnaw kyate ngaeang lan um paw amaw kya-e awnaw lungkhu lang ae kotu oh paw a hoynaw kha siakhae khylan popaw ccungccaw, bawiphin ranpibawi ciihan, athyaapaw minphuin, amaw nynh a hoi paw ccungccaw nynh na thua oh. ¹⁰ Langmaw lya tuh Pachia ccungccaw na la thua khyh oh, thuasalama atu tuh Pachia ccungccaw nynh na thua vae oh. Langmaw lya ngaethyaumsanaw na la ccou khyh oh, thuasalama atu tuh ngaethyaumsanaw na ccou vae oh. ¹¹ Sungsah`ae paw, ramccang`ae te mikhia`ae na thua oh keiccu tuh hiinnawmuisaw rhawdou paw pynsaw ryduanaw`ae kha na sungku nawlan oh, nanning kha kae hy oh. ¹² Zenta`ae nynh nanning kha ahoy leipaw ryalahtu`ae hawte thethya he ae ho vae oh ze, minmin nynh a muih`ae paw ahoypaw nae ryalaw`ae liate Pachia paebuanaw nin kya Pachia kha phu-esah nawlan`ae, Zenta`ae laku ahoypaw ozia khate la hiin oh. ¹³ Tukeiccu kawhoitu lang ccungccaw nynh a khang`ae paw miakaw kalan Bawipaw keiccuze pyakuh oh; lupi huaccepaw hawte athua paw siapharan kalan thuasah, ¹⁴ tukhyhze ahoy leipaw ryalahtu`ae kha detah khylan te ahoypaw ryalahtu`ae kha thehoysah khylan, siapharan nynh a saw paw uktu`ae kalan thuasah pyakuh oh. ¹⁵ Pawccecize ahoyte cyinaw liate angaeepaw ccungccaw`ae ngaeenaw kha nanning nynh zya na daesah nawlan oh, tuhte cyi paw tuh Pachia rynaw nynh thua. ¹⁶ A luepaw hawte hiin oh, tuhzemah na luenaw oh paw kha ahoy leipaw khawsung nawlan mang leite, Pachia ryalawpatu`ae hawte um oh. ¹⁷ Ccungccaw balyn kha sawtua oh. Uno na thua oh paw kha sungsah oh. Pachia kha rawrih oh. Siapharan kha sawtua oh. ¹⁸ Ryalawpatu`ae, rinaw khaleihte nae bawizua`ae kalan pyakuh oh. Ahoypaw te nevyalyapaw bawizua kalan kyalya thua leite, are-aruapaw bawizua kalan mah pyakuh oh. ¹⁹ Pawccecize ccungccaw lukheit tuh Pachia nynaw keiccuze thinlungccinaw kha atazae lei lante ngaesangte teingsah athua lanze, tuh-e tuh thehoysah lan accanpaw nynh thua. ²⁰ Pawccecize na cyiseinaw oh keiccu ae zia ae bua oh paw kha lungsaete na ngaesang oh zeso phu-esah lanpaw pawmou a um? Thuasalama ahoypaw rya na lah oh zah kha-e hanlan lungsaete na ngaesang oh ze, tuh-e tuh Pachia malang thehoysah lan accanpaw nynh thua. ²¹ Pawccecize tuh-e khylan nynh nanning tuh ko na thua oh. Kri nynh mah aening hanlan a teing keiccuze a ccuhnoh kha na zui ccaw oh cite aening kha dosuinku lanpaw yn cciatawpyasya: ²² “Aning tuh seinaw rae khyh. A khalang kya hyngbya muih lan um khyh.” ²³ Aning tuh he a sarya vae`ae ze, bua sarya ru khyh; he a teing vae ze, aning nynh furaw khyh`ae, thuasalama hmerarihlan byapiatupaw kalan amaw kha a ahku. ²⁴ Ou tuhte seinaw`ae kya a chih`ae paw aening tuh dingnaw hanlan ah hiin nawlan oh aning nynh aening seinaw`ae kha amaw a pyn kya thing vawlan yn phupya. A vaemaw`ae liate nanning tuh na dan vae oh. ²⁵ Pawccecize nanning tuh laanpi phe a me paw tuu`ae hawte nynh na la thua oh; thuasalama atu tuh Tuuringtu te nae hiinnawmuisaw Dooihtu kalan phe na paleihkuh vae oh.

¹ Tuhhawte, zu`ae nanning, nae vawpaw`ae kalan pyakuh oh. Ou tuhte vawpaw lukhakheit nynh Pachia bya kha a ngae khyh zemah, bya hopya liate thua leite zu`ae ozia liate minmin kha bua mue athua nawlan, ² nae kya-e sawtuanaw te athyaapaw nae ozia kha minmin nynh he muih`ae te minmin kha bua mue athua nawlan nynh thua. ³ Na ccaankunaw oh paw tuh, atolang-e ccaankupaw, sangkhekupaw, sui lawkupaw, tukhyhze uccaw hoypaw lawkupaw kyalya thua leite, ⁴ thuasalama, nevyalyapaw te daebabipaw muisaw kya-e arohthya leipaw puithyanaw khate thinlung lungkhu e ccungccapaw kha la ccaan oh. Hynh-e tuh Pachia malang myarya aphutepaw nynh thua. ⁵ Pawccecize hynhcihte nynh langmaw lya Pachia doliakuh`ae paw, athyaapaw nopi`ae nynh mah mih vawpaw`ae kalan pyakute mimaw te, mimaw kha a ccaanku`ae. ⁶ Sarah nynh Abraham kawngae zah amaw kha ‘bawipaw’ cite a ko hawkhate, minmin mah kawngae`ae; nanning nynh ahoypaw kha na cyih oh zah rinaw hoi leite na um oh ze, nanning tuh Sarah ccanung`ae nynh na thua oh. ⁷ Tuhhawte vawpaw`ae nanning, nae sawsangnaw tuh akhawpaw a um khyh nawlan zu`ae tuh hiinnaw kya-e thawccinaw rhoccoutu`ae athuabua`ae thyhhawte, thawzya huapaw angphe hawkhate, zu kha sawtuanaw pyate thaekuthyanaw te pynkheihlan um oh. ⁸ Nyathyakou, lukheit te lukheit thawccikunaw hoite, nanning balyn tuanaw-thinlung lokuh oh, uteno hawte sungsakuh oh, ngaethya-umsakuh oh, tuapakuh thya oh. ⁹ Athahpaw hanlan athahpaw te liaru leite, saryanaw hanlan saryanaw te liaru leite, thuasalama hythuanaw te liaru oh. Pawccecize nanning tuh hythuanaw rhoccou khylan ko paw nynh na thua oh cipaw kha na ny oh. ¹⁰ Pawccecize, “Hiinnaw kha sungsah ry zah ahoypaw nin`ae muih lan a ry paw ccungccaw nynh tuh a lae kha athahpaw kyate syngkuh sah lah a mung kha hyngbya honaw kyate syngkuh sah. ¹¹ Athahpaw kha sibia sah lah ahoypaw kha cyih sah; daenaw kha ccung sah lah kha-e kha deesui sah. ¹² Pawccecize BAWIPAW mit tuh adingpaw ccungccaw tungvaw nynh a um. Te mih sawsangnaw`ae kha a nakaring`ae nynh a ngaepya. Thuasalama BAWIPAW mitmae nynh athahpaw ryalah`ae paw kha a dou.” ¹³ Nanning tuh ahoypaw uccaw thydokuh`ae paw na thua oh lanze, hung nynh mou nanning kha vawsaw ae pya cih oh? ¹⁴ Thuasalama dingnaw keiccuze na teing oh heize, hythuaccoupaw nynh na thua oh; “Te minmin furawnaw kha rih nan oh, lungvaw mah saw nan oh.” ¹⁵ Thuasalama nae thinlung kya Bawipaw Pachia kha sawtua rawrih oh. Nanning kya um paw ngaehoinaw konglang ae khia oh paw ccungccaw miakaw kha nevyalyanaw te, rinaw te nae zynnaw thungkhawku khylan pei paccynkuh oh. ¹⁶ Ahoy leipaw ryalahtu`ae hawte nanning thethya ae honaw oh kya, Kri kya ahoypaw nae ozia kha ahme lei lante nynh sei kae be cite mih maethya nawlan, ahoypaw mawtemaw nykunaw thinlung kha hoi oh. ¹⁷ Pawccecize Pachia rynaw athua lanze, athahpaw cyipaw hanlan laeze ahoypaw cyipaw hanlan teing lanpaw tuh ahoyhua. ¹⁸ Pawccecize Kri mah seinaw`ae keiccu vaekheit a teing, aening kha Pachia kalan thuakhae khylan adingpaw tuh ading lei`ae paw hanlan pynsaw kya chia athua zemah Muisaw liate hiinsah athua. ¹⁹ Tuh-e Muisaw liate Kri nynh mah cceih zah thunginn kya um paw muisaw`ae kha a thaesah`ae. ²⁰ Tuh-e muisaw`ae tuh langmaw Noah she lya, sanphalung sak athua lya, Pachia nynh lungsaenaw te phang a ngaw lya`ae kawngae lei`ae paw kha nynh thua`ae, khae sanphalung kya zyataripaw ccungccaw lutarya kha tui liate khum athua`ae. ²¹ Tuh-e tuh Jesu Kri thothuinaw liate atu aening yn khum paw baptisma muihsanaw nynh thua. Tuhe baptisma tuh pynsaw kyate athupaw singpaw kha thua khyh, thuasalama ahoypaw mawtemaw nykunaw thinlung kyate Pachia kalan byakinkupaw kha nynh thua. ²² Tuh-e Kri tuh vaaw ccungccaw`ae, kawhoinaw`ae te thungnaw`ae kha amaw kawngae lan a pyasakuh`ae koute vaawran lang cceih zah Pachia ranglang khe a um vae.

¹ Ou tuhte aening hanlan Kri nynh pynsaw kya a teing hawte, nanning mah tuhhawte alokuhpaw tuanaw-thinlung khate naemaw kha paccaankuh oh. Pawccecize pynsaw kya a teingpaw ccungccaw tuh seinaw kyate phe a lue vae. ² Ou tuhte a pynsaw kya a hoi ung paw ccyh kha ccungccaw ryduanaw hanlan a hiin vae khyh nawlan, thuasalama Pachia rynaw hanlan a hiin nawlan nynh thua. ³ Pawccecize Zenta`ae rynaw cyi paw athua paw sahpawrynaw, ohhuakurynaw, ruinaw, eih hoysakaesynaw, zuaete hoysanaw, luathua-ae-ui lang um paw zohtuhbeiknaw`ae kya ah la ciaku lya oh, alia vae paw ah ccyh tuh phe azaw vae. ⁴ Tuh-e kya nanning tuh minmin ryte alokuhpaw ozia roh paw hiinnaw kya na umbua khyh oh paw kha minmin mih ngaeangthua zah nanning kha thethya ae ho oh. ⁵ A hiin`ae paw te a chih`ae paw byapia lan a paccynkuh paw amaw kalan mimaw konglang kha a phykuh cih`ae. ⁶ Tuh-e keiccu pynsaw kya ccungccaw lante minmin tuh byapia athua nawlan`ae, thuasalama Pachia malang muisaw kya a hiin nawlan`ae, a chih`ae paw kalan mah thehoypaw tuh ho a la thua. ⁷ Thuasalama pawpaw balyn athangnaw tuh anae vae; tukeiccu kyhrararih lang um oh lah sawsangnaw elan ngawrando oh. ⁸ Pawpaw balyn laeze lukheit te lukheit thawte sungsakunaw hoi oh; pawccecize, “Sungsakunaw nynh tuh seinaw pataepi kha a khawpya.” ⁹ Ccohku leite, lukheit te lukheit mikhia thuasakuh oh. ¹⁰ Ccungccaw miakaw nynh lasung kha na mue oh hawte, Pachia thawccinaw aphuinphuin kya-e ahoypaw synriatu`ae hawte, lukheit te lukheit ryalawpakuh oh. ¹¹ Jesu Kri liate pawpaw balyn kya Pachia tuh phu-esah athua nawlan, lukhakheit nynh phungho lanze Pachia bya thathyhte ho sah, lukhakheit nynh ryalawpya lanze Pachia nynh a pya paw cyi khonaw thyhte lawpah sah. Phuenaw te uknawkaw tuh zungzae te zungzae cia amaw kya-e nynh thua. Amen. ¹² Sungsah`ae, ccangpaw mazi athua paw uccaw nanning kya acyikuh paw hawte, nanning syntaw khylan acyihkuh paw, maee lang ruapaw syntawnaw kha ngaeangthua lante tua nan oh. ¹³ Thuasalama a phu-enaw langkunaw he yn thua vae ze, myarya lungpawnaw ryte nae lungtuabua nawlan nanning tuh Kri teingnaw`ae a neethungkuh bua`ae paw na thua oh thyhhawte lungtua oh. ¹⁴ Kri min keiccuze sarya na thua oh ze, lungtua paw nynh na thua oh. Pawccecize phu-enaw kya-e Muisaw te Pachia kya-e Muisaw tuh nanning tungvaw a um; minmin kalan te aning tuh thethyaho athua, thuasalama nanning kalan te aning tuh phu-esah athua. ¹⁵ Thuasalama nanning kyaze hung sanmah ccungccatheihpaw hawte, tukhyhze miruhpaw hawte, tukhyhze ahoy leipaw ryalahtu hawte, tukhyhze ccangpaw ccungccaw`ae kong a ccukuh buapaw hawte la teing nan oh. ¹⁶ Tuhzemah lukhakheit nynh Kriccaw athua keiccu a teing lanze a maethah nan sah; thuasalama hynh-e hanlan Pachia kha phu-esah sah. ¹⁷ Pawccecize Pachia innbyn kya byapianaw tho lan accyh azaw vae. Te tuh-e tuh aening kya masaty a tho lanze, Pachia kya-e thehoypaw a ngae lei`ae paw kya-e athangnaw tuh pawcihte athua cih? ¹⁸ Te, “Adingpaw kha kou aru lante khum athua ze, Pachia pawlangria leipaw te miseipaw tuh paw kalan alangkuh cih`ae?” ¹⁹ Tukeiccu Pachia rynaw thyhte a teing`ae paw nynh tuh ahoypaw ryalawnaw kya mih hiinnaw-muisaw`ae kha zyn lan um paw Raetu kalan khe ahkuh`ae sah.

¹ Piccang athuabuapaw, Kri teingnaw`ae kong ccaekia athua paw, te yn langkuh vae cih paw phu-enaw a neethungkuh buapaw mah athua paw, kae nynh nanning laku-e piccang`ae kha thawte kae hy oh. ² Dooihtu`ae hawte nanning laku a um paw Pachia tuuphu`ae kha la dooih oh. Nangsepaw liate thua leite, thuasalama lungthote, anungsikuhpaw muenaw hanlan thua leite, thuasalama thawmuinte la dooih oh. ³ Dooih khylan nanning kalan pya athua`ae paw tungvaw kya bawisaku leite, thuasalama tuuphu`ae hanlan dosuinku lanpaw la thua oh. ⁴ Te Tuuringtu Lupi he yn langku vae ze, nanning tuh anaan kho leipaw phu-enaw suilukhung kha na mue cih oh. ⁵ Tuhhawte anohua`ae paw nanning, atawhua`ae paw kaw kha ngaepah oh. Athua, nae balynte lukheit te lukheit kawngaepahkuh oh, te zakawsangsakunaw khate ccaankuh oh; pawccecize, “Pachia nynh a tansakuhpaw kha a rawse, thuasalama zakawsangsakuhpaw kha thaw a cci.” ⁶ Tukeiccu accyh he yn zaw vae ze nanning kha Pachia nynh ae hangthung nawlan oh, Pachia kya-e a thawsaepaw kuihkaw khe naemaw te naemaw kha zakawsangsakuh oh. ⁷ Aning tuh nanning hanlan a tua paw athua keiccu, nae thinphangnaw balyn kha amaw tungvaw khaleih ah oh. ⁸ Kyhrarihlan um oh; raeringkute um oh; pawkeiccumacize nae rhawpaw diabolos tuh a sia a ruapaw chindeih hawte hung vema ka laang cih cite ccungte a khiakuh. ⁹ Laephipi kya a um paw nae uno`ae tuh khahtahawpaw riathaenaw`ae kha a teing`ae cipaw kha nybiate zynnaw kya varyn tynte diabolos kha la dou oh. ¹⁰ Thuasalama Kri Jesu liate zungzae tynpaw a phu-enaw kalan aening kha yn kotupaw, thawccinaw balyn a hoitupaw Pachia nynh sosoh na teing oh koute, nanning kha ae ccingsah cih oh, ae thadynsah cih oh, thaw ae saesah cih oh zah ae tynsah cih oh. ¹¹ Amaw kya phu-enaw te thungnaw tuh zungzae te zungzae cia um sah. Amen. ¹² Nanning kha hybiate, na thadynnaw oh paw hynhe tuh Pachia kya-e ahmepaw thawccinaw nynh thua cipaw kha ccaekia langsapyate, Silvanas liate nae kalan ccaw dyntari kae zei. Aning tuh nae hanlan zyn lan um paw unopaw nynh thua cite ka tua paw nynh thua. ¹³ Babilon khuapi kya um paw, nanning ryte pynkheihlan po athua paw kriccawbu nynh nanning kha ae beihlang oh; te ka ccapaw Marka nynh mah ae beihlang oh. ¹⁴ Sungsakunaw kya-e myngkunaw khate lukheit te lukheit beihlangkuh oh. Kri Jesu kya na um oh paw nanning balyn kya daenaw la um sah. Amen.