1 John

¹ Athotakaw kyate a um vae paw, tuh-e tuh kaening nynh phe kae thae, kae mit te phe kae muih, hoyte phe kae do zah kae kuih te phe kae haetua paw hiinnaw Bya te asekuhpaw uccaw kha nanning kae hopya oh. ² Pawccecize hiinnaw tuh yn langkuh zah kaening nynh phe kae muih vae. Kha-e zungzae hiinnaw kong kha ccaekia kae khan zah nanning kalan kae langsapya oh. Kha-e zungzae hiinnaw tuh Paaw ryte la um`ae zah kaening kalan yn langkuh. ³ Nanning mah kaening ryte vaeccawkunaw na hoibua ccaw oh cite kaening nynh phe kae muih vae paw te kae thae vae paw kha nanning kalan kae hopya oh. Te thanccingte kae kya-e vaeccawkunaw tuh Paaw te a Ccapaw Jesu Kri ryte nynh thua. ⁴ Te nae lungtuanaw phe accing nawlan nynh e uccaw`ae hynh nanning kalan kaening nynh kae zei. ⁵ Hynh-e tuh amaw kyate kae thae paw bya thua zah nanning kalan kae hopya oh. Tuh-e bya tuh: Pachia tuh awnaw thua zah amaw kya mohnaw kharyh um khyh. ⁶ Aening tuh amaw ryte vaeccawkunaw ah hoi oh cite aening nynh mang ah ho oh zemah mohnaw kya ah um oh ze ah hyng oh paw nynh thua, byaccing kya ah zui khyh oh. ⁷ Thuasalama Pachia tuh awnaw kya a um hawte, aening nynh awnaw kya ah um oh ze aening tuh lukheit te lukheit vaeccawkunaw ah hoi oh, te a Ccapaw Jesu Kri chii nynh seinaw balyn kyate aening kha phe oun thyaasah. ⁸ Seinaw ah hoi khyh oh cite aening nynh ah ho oh ze ahmaw te ahmaw ah lingkuh oh paw nynh thua. Byaccing tuh aening kya um khyh. ⁹ Ahmaw seinaw`ae kha aening nynh ah phykuh oh ze seinaw`ae kha ngaethya lan te dingleinaw balyn kyate aening kha thyaasah lan Pachia tuh zyn lan um zah adingpaw nynh thua. ¹⁰ Aening nynh ah sei khyh oh cite ah ho oh lanze Pachia kha hyngbya ah be oh paw thua zah amaw bya tuh aening kya um khyh.

¹ Ka ccaaw taraw`ae, nanning nynh na sei khyh ccaw oh cite hynh-e uccaw`ae hynh nae kalan kae nynh kae zei. Te lukhakheit nynh a sei lanze, aening oun hokhawtupaw ah hoi oh; amaw tuh Paaw ryte a um`ae paw adingpaw Jesu Kri nynh thua. ² Te amaw tuh aening seinaw`ae hanlan lungdaesanawpaw nynh thua. Te aening seinaw`ae hanlan kyalya thua khyh, thuasalama laephi ccungccaw`ae balyn seinaw`ae hanlan mah athua. ³ Te aening nynh amaw kha ah ny oh cipaw ah ny nawlan oh paw tuh amaw kawpyapaw`ae kha aening nynh ah zui oh ze ah nyh oh. ⁴ “Amaw kha ka nyh,” ci zah amaw kawpyapaw`ae a zui leipaw ccungccaw tuh mihyngpaw nynh thua. Byaccing kha kha-e paw kya um khyh. ⁵ Thuasalama hunghung zemah amaw bya a zui paw tuh Pachia sungsanaw kha a kya accing ccaccing. Hynhcihte nynh aening tuh amaw kya ah um oh cipaw ah nyh oh. ⁶ Amaw kya ka um cite a ho paw nynh tuh Jesu nynh a hiin hawte aning mah a umbua aho. ⁷ Uteno`ae, nanning kalan athawpaw kawpyapaw kha ka zei khyh. Thuasalama nanning nynh atakaw kyate na hoi vae oh paw arynpaw kawpyapaw kha nynh ka zei. Arynpaw kawpyapaw tuh atakaw kyate nanning nynh phe na thae vae oh paw bya kha nynh thua. ⁸ Athawpaw kawpyapaw ccangkheit nae kalan bua ka zei. Tuh-e tuh amaw kya, te nanning kya akyhpaw uccaw nynh thua. Pawkeiccumacize mohnaw tuh zo cciamang zah ahmepaw awnaw tuh atu phe a aw vae. ⁹ Awnaw kya nynh ka um ci zah a uno kha a hua lanze, aning tuh mohnaw kya nynh atu cia phang a um ung. ¹⁰ A uno a sungsahpaw ccungccaw tuh awnaw kya tyn zah thysaku-pawsakunaw lanpaw tuh-e paw kya um khyh. ¹¹ Thuasalama a uno a hua paw ccungccaw tuh mohnaw kya um zah mohnaw kya nynh a ccia. Kha-e mohnaw nynh a mit phe mohsah keiccuze teilang nynh ka ccia cipaw nyhkuh khyh. ¹² Ccaaw taraw`ae, Bawipaw min liate Pachia nynh nae seinaw`ae kha ae ngaethya vae oh. Tukeiccu nynh nanning kalan kae nynh ccaw kae zei. ¹³ Paaw`ae, atakaw kyate a um vae paw amaw kha nanning nynh phe na ny vae oh. Tukeiccu nynh nanning kalan ccaw ka zei. Ccangvae`ae, nanning nynh mihoy leipaw kha phe na tae vae oh. Tukeiccu nynh nanning kalan ccaw ka zei. Ccaaw taraw`ae, nanning nynh Paaw kha phe na ny vae oh. Tukeiccu nanning kalan ccaw ka zei. ¹⁴ Paaw`ae, atakaw kyate a um vae paw amaw kha nanning nynh phe na ny vae oh. Tukeiccu nanning kalan ccaw phe ka zei vae. Ccangvae`ae, nanning tuh nae thawsae zah Pachia bya nae kya atyn keiccuze mihoy leipaw kha phe na tae vae oh. Tukeiccu nanning kalan ccaw phe ka zei vae. ¹⁵ Laephipi hynh sungsah nan oh. Laephipi kya a um paw uccaw`ae mah sungsah nan oh. Ccungccaw lukhakheit nynh laephipi kha a sungsah lanze Paaw sungsanaw tuh kha-e paw kya um khyh. ¹⁶ Pawccecize laephipi kya a um paw uccaw`ae; pynsaw duanaw, mit duanaw, te hiinnaw kya-e tansakunaw tuh Paaw kya-e thua khyh`ae, thuasalama laephipi kya-e nynh thua`ae. ¹⁷ Laephipi te laephipi uccaw`ae duanaw tuh azo avae he. Thuasalama Pachia rynaw hawte a hiinpaw ccungccaw tuh zungzae atyn. ¹⁸ Ccaaw taraw`ae, atu ccyh tuh nyathyakou ccyh nynh thua. Antikri yn thua cih cite nanning nynh phe na thae vae oh hawte, atu ccacceimaw antikri patae um vae`ae. Tukeiccu atu ccyh tuh nyathyakou ccyh nynh thua cipaw aening nynh ah ny oh. ¹⁹ Minmin tuh aening kyate a pou`ae, thuasalama minmin tuh aening te sekuh bua khyh`ae. Pawccecize minmin tuh aening te asekuh bua`ae lanze, aening ryte po a um cih`ae paw. Thuasalama minmin nynh a pou`ae paw tuh minmin balyn tuh aening te sekuh bua khyh`ae cipaw a langsaku`ae paw nynh thua. ²⁰ Thuasalama Athyaapaw Lukheit nynh nanning kha satho phe ae thuh vae oh, te nanning nynh pawpaw balyn kha na ny oh. ²¹ Nanning nynh byaccing kha na ny khyh oh keiccu nynh nanning kalan ccaw ka zei cipaw thua khyh. Thuasalama nanning nynh byaccing kha na nyh oh zah hyngbya tuh byaccing te kharyh sekuh khyh cipaw na ny oh keiccu nynh nae kalan ccaw ka zei. ²² Hungmou mihyngpaw tuh? Jesu tuh Kri thua khyh cite a ei paw ccungccaw tuh mihyngpaw nynh thua. Paaw te Ccapaw kha a ei paw ccungccaw tuh antikri nynh thua. ²³ Hunghung zemah Ccapaw a ei paw ccungccaw tuh Paaw kha hoi khyh. Ccapaw kha ccaekia a khan paw nynh Paaw kha mah a hoi. ²⁴ Tukeiccu nanning nynh atakaw kyate phe na thae vae oh paw bya kha nae kya la tynsah oh. Atakaw kyate nanning nynh phe na thae vae oh paw bya nynh nae kya a tyn lanze, nanning mah Ccapaw kya te Paaw kya na tyn cih oh. ²⁵ Pachia nynh aening oun kinpyakupaw byakinpyakunaw tuh zungzae hiinnaw nynh thua. ²⁶ Nanning ling lan ae ry oh paw ccungccaw`ae kong lante asekuhpaw hynh-e uccaw`ae kong kha nae kalan ka zei vae. ²⁷ Thuasalama Pachia kyate na mue oh paw sathothuhnaw tuh nae kya atynpaw zah nanning tuh lukhakheit nynh ccangpyaku na ho vae khyh oh. Tuh-e sathothuhpaw nynh pawpaw balyn kha nanning ae ccangpya oh, tuh-e tuh akyhpaw thua zah hyngpaw thua khyh. Te tuh-e nynh nanning ae ccangpya oh thyhhawte nanning tuh amaw kya na tyn cih oh. ²⁸ Te ccaaw taraw`ae, atu Ccapaw kya la tyn oh. Ou khate amaw he yn langku vae ze aening nynh zynkunaw ah hoi ccaw oh, te he yn thua vae ze amaw malang maethyanaw ah ccou khyh ccaw oh, amaw kya tyn oh. ²⁹ Pachia tuh ading cipaw na ny oh lanze, dingnaw a rae paw ccungccaw miakaw tuh Pachia kyate a pui paw nynh thua cipaw na ny oh.

¹ Dotua oh, Pachia ccaaw`ae cite ko ah thua nawlan oh, pawtahawpaw sungsanaw babang mou Paaw nynh aening kha oun pya! Tukeiccu laephi ccungccaw`ae nynh amaw kha a ny khyh`ae keiccuze, aening kha mah oun nyh khyh`ae. ² Sungsah`ae, atu aening tuh Pachia ccaaw`ae nynh ah thua oh. Nyalang aening tuh pawte nynh ah thua cih oh cipaw langkuh lah khyh. Thuasalama Ccapaw he yn langkuh te aening tuh amaw te loku bua lan cipaw ah ny oh. Pawccecize aening nynh amaw kha athua thathyhte ah muih vae cih oh. ³ Te amaw tuh a ccikankuh hawte, amaw kya ngaehoinaw a hoi paw ccungccaw miakaw nynh tuh amaw te amaw kha a ccikankuh. ⁴ Hunghung zemah a seipaw tuh Kawbya po aluepaw nynh thua. Pawccecize seinaw tuh Kawbya po luepaw nynh thua. ⁵ Te aening seinaw`ae kha cciakhae khylan Ccapaw tuh yn langkuh cipaw na ny oh. Amaw kya tuh seinaw kharyh um khyh. ⁶ Hunghung zemah amaw kya atynpaw tuh sei khyh. Hunghung zemah pei a seipaw tuh amaw kha muih khyh zah ny mah nyh khyh. ⁷ Ccaaw taraw`ae, hung ccungccaw nynh san ae la ling nan oh sah. Kri tuh ading hawte dingnaw ryalah paw ccungccaw tuh adingpaw nynh thua. ⁸ Aseipaw ccungccaw tuh diabolos kya-e nynh thua, pawccecize diabolos tuh atakaw kyate pei a seipaw nynh thua. Diabolos ryalaw`ae kha ro khylan eenaw te nynh Pachia Ccapaw tuh yn langku. ⁹ Pachia nynh a saah paw ccungccaw miakaw nynh tuh seinaw kha rae khyh. Pawccecize Pachia kya-e ccacii kha khae paw kya atyn. Te aning tuh Pachia nynh saah paw athua keiccuze sei kho khyh. ¹⁰ Pachia ccaaw`ae te diabolos ccaaw`ae tuh hynhcihte alangkuh: Hunghung zemah dingnaw ryalah leipaw tuh Pachia kya-e thua khyh. A uno a sungsah leipaw ccungccaw mah Pachia kya-e thua khyh. ¹¹ Pawccecize atakaw kyate nanning nynh na thae vae oh paw phungbya tuh hynhte nynh thua: Aening lukheit te lukheit sungsaku lanpaw nynh thua. ¹² Kain hawte thua nan oh sih, aning tuh mihoy leipaw kya-e thua zah amaw a neitaw kha phe a chia. Pawccemou a neitaw kha a chia? Pawccemacize amaw ryalaw`ae tuh hoy khyh zah a neitapaw ryalaw`ae tuh ading keiccu nynh thua. ¹³ Ka uno`ae, laephi ccungccaw`ae nynh ae hua oh ze nae ngaeangthua nan sah. ¹⁴ Aening nynh uteno`ae kha ah sungsah oh keiccuze, aening tuh chinaw kyate hiinnaw kalan ah khung vae oh cipaw ah ny oh. A uno a sungsah leipaw ccungccaw tuh chinaw kya nynh atyn. ¹⁵ Hunghung zemah a uno a hua paw tuh ccungccaw theihtu nynh thua. Te ccungccaw theihtu miakaw tuh atynpaw zungzae hiinnaw a kya hoi khyh cipaw na ny oh. ¹⁶ Kri nynh amaw hiinnaw kha aening hanlan a pyaku. Ou hynhcihte aening nynh Pachia sungsanaw kha ah nythya oh. Te aening mah uteno`ae hanlan ah hiinnaw kha ah pyaku lan oh accan. ¹⁷ Thuasalama ccungccaw lukheit nynh e laephi uccaw`ae kha mang a hoi pite a uno a ryachi kha muih zah ngaethyaumsanaw a hoi khyh lanze, pawtemou Pachia sungsanaw tuh kha-e paw kya a um kho cih? ¹⁸ Ka ccaaw taraw`ae, aening nynh ah bya te kyalya, khalang te kyalya sungsaku lan ccan khyh. Thuasalama cyisahnaw te thanccingte sungsaku lan accan. ¹⁹ Ou tuhte ze nynh aening tuh byaccing kya-e nynh ah thua oh cipaw ah nyh oh zah Pachia malang ah thinlung zynkunaw ah hoi cih oh. ²⁰ Pawccecize ah thinlung nynh ahmaw kha sei oun be lanze, Pachia tuh aening thinlung laeze lesaehua zah pawpaw balyn pung a nyh paw nynh thua. ²¹ Sungsah`ae, ah thinlung nynh ahmaw hynh sei oun be khyh ze, Pachia malang aening zynkunaw ah hoi oh. ²² Te amaw kawpyapaw`ae kha aening nynh ah zui oh zah amaw lungrythua paw ryalaw`ae kha ah law oh keiccuze, ah ngiaku oh paw miakaw kha amaw kyate aening nynh ah mue oh. ²³ A kawpyapaw tuh e hynh nynh thua: A Ccapaw Jesu Kri min kha aening nynh ah zyn lan oh paw te Ccapaw nynh kaw yn pya thyhhawte lukheit te lukheit ah sungsaku lan oh paw nynh thua. ²⁴ Te Pachia kawpyapaw a zui paw ccungccaw tuh Pachia kya tyn zah Pachia mah kha-e paw kya atyn. Te aening oun pya paw Muisaw liate nynh Pachia tuh aening kya atyn cipaw ah ny oh.

¹ Sungsah`ae, muisaw miakaw kha la zyn nan oh. Thuasalama muisaw`ae kha Pachia kya-e thua ta, thua khyh ta cipaw la syntaw oh. Pawkeiccumacize ahme leipaw profeh patae tuh laephipi lungkhu lang phe cceih vae`ae. ² Pachia kya-e Muisaw tuh hynhte na nyh cih oh: Jesu Kri tuh pynsaw lante nynh yn thua cite ccaekiakhan paw muisaw miakaw tuh Pachia kya-e nynh thua. ³ Te Jesu Kri tuh pynsaw lante nynh yn thua cite ccaekiakhan leipaw muisaw miakaw tuh Pachia kya-e thua khyh. Tuh-e muisaw tuh antikri kya-e nynh thua. Antikri tuh yn thua cih cite nanning nynh phe na thae vae oh. Te atu ccacceimaw tuh-e antikri muisaw tuh laephipi kya phe um vae. ⁴ Ccaaw taraw`ae, nanning tuh Pachia kya-e nynh na thua oh. Te minmin kha phe na tae vae oh. Pawkeiccumacize nanning kya a um paw aning tuh laephipi kya a um paw aning laeze alehua keiccu nynh thua. ⁵ Minmin tuh laephipi kya-e nynh thua`ae. Tukeiccu minmin nynh laephi te asekuhpaw uccaw`ae kong kha a hothya`ae. Te laephi ccungccaw`ae nynh minmin bya kha a ngaepya`ae. ⁶ Aening tuh Pachia kya-e nynh ah thua oh. Pachia a nyh paw ccungccaw nynh ah bya kha a ngae. Pachia kya-e a thua leipaw ccungccaw nynh tuh aening bya kha ngae khyh. Ou hynhcihte ahmepaw muisaw te ahyngpaw muisaw kha aening nynh ah ny oh. ⁷ Sungsah`ae, aening lukheit te lukheit sungsakuh oh sih, pawccecize sungsakunaw tuh Pachia kya-e nynh thua. Te ming`ae a sungsahpaw miakaw tuh Pachia nynh saah paw thua zah Pachia kha a nyh. ⁸ Ming`ae a sungsah leipaw ccungccaw tuh Pachia kha nyh khyh. Pawccecize Pachia tuh sungsakunaw nynh thua. ⁹ Hynhcihte nynh Pachia kya-e sungsakunaw tuh aening kalan a langku. Ccapaw liate aening ah hiinbua ccaw oh cite Pachia nynh a hoithypaw a Ccapaw kha laephipi kalan phe oun saw vae. ¹⁰ Sungsakunaw tuh hynh-e nynh thua: Aening nynh Pachia ah sungsah oh cipaw thua khyh. Thuasalama Pachia nynh aening kha oun sungsah zah a Ccapaw kha aening seinaw`ae hanlan lungdaesanawpaw lang cite oun saw. ¹¹ Sungsah`ae, Pachia nynh aening hynh myarya oun sungsah lanze, aening mah lukheit te lukheit sungsaku lan accan. ¹² Pachia kha hung ccungccaw nynh san vaekheit san muih boi khyh. Aening nynh lukheit te lukheit ah sungsaku oh ze, Pachia tuh aening kya um zah a sungsanaw kha aening kya a ccingsah. ¹³ Pachia nynh a Muisaw kha aening phe oun pya vae keiccuze, khahcihte aening tuh Pachia kya ah um oh zah Pachia tuh aening kya a um cipaw ah ny oh. ¹⁴ Laephi ccungccaw`ae Khumtu lang cite Paaw nynh Ccapaw kha yn saw cipaw kaening nynh phe kae muih zah kha-e kha ccaekia kae khan. ¹⁵ Hunghung zemah Jesu tuh Pachia Ccapaw nynh thua cite ccaekiakhan paw tuh a kya Pachia um zah aning mah Pachia kya a um. ¹⁶ Te Pachia nynh aening hanlan a hoi paw sungsahnaw kha aening nynh phe ah nyh vae oh zah phe ah zyn vae oh. Pachia tuh sungsakunaw nynh thua, te sungsakunaw kya atynpaw ccungccaw tuh Pachia kya atyn. Pachia mah kha-e paw kya atyn. ¹⁷ Byapianaw nin kya aening nynh rawhoynaw ah hoibua nawlan oh, aening laku kya sungsakunaw tuh hynhcihte ccingsah athua. Pawkeiccumacize amaw athua hawte aening mah e laephipi kya ah thuabua oh. ¹⁸ Sungsakunaw kya tuh rinaw um khyh. Accingpaw sungsakunaw nynh tuh rinaw kha ccaring a dee. Pawccecize rinaw nynh tuh riathaenaw kha a thuasah. Rinaw a hoi paw ccungccaw tuh sungsakunaw kya ccingsah thua loh khyh. ¹⁹ Pachia nynh aening kha masaty oun sungsah keiccuze, aening nynh amaw kha ah sungsah oh. ²⁰ Ccungccaw lukheit nynh, “Pachia tuh ka sungsah,” ci zah amaw a uno kha a hua lanze, aning tuh mihyngpaw nynh thua. Pawccecize phang a muih paw amaw a uno kha a sungsah leipaw ccungccaw nynh a muih leipaw Pachia kha pawtemou a sungsah kho cih? ²¹ Te Pachia a sungsahpaw nynh tuh amaw a uno kha mah a sungsah hahe cih, acikuh paw hynh-e kawpyapaw kha amaw kyate aening ah hoi oh.

¹ Hunghung zemah Jesu tuh Kri nynh thua cite a zyn paw miakaw tuh Pachia nynh a saah paw nynh thua. A saahtupaw Paaw kha a sungsahpaw miakaw nynh tuh Paaw nynh a saah paw ccaaw kha mah a sungsah. ² Aening nynh Pachia kha ah sungsah oh zah a kawpyapaw`ae kha ah zui oh pawte Pachia ccaaw`ae kha ah sungsah oh cipaw aening ah ny oh. ³ Pawccecize Pachia sungsah cipaw tuh a kawpyapaw`ae kha aening nynh ah zui oh paw hynh nynh thua. Te a kawpyapaw`ae tuh phuripaw thua khyh. ⁴ Pawccecize Pachia nynh a saah paw miakaw nynh tuh laephipi kha phe a tae. Te laephipi a tae paw taenaw tuh aening ah zynnaw oh hynh nynh thua. ⁵ Laephipi a tae paw tuh hungmou? Jesu tuh Pachia Ccapaw nynh thua cite a zyn paw ccungccaw kha thua khyh tou? ⁶ Tui lante thuasah, chii lante thuasah yn thua paw aning tuh Jesu Kri hynh nynh thua. Tui lante kyalya thua khyh, thuasalama tui lante, chii lante nynh yn thua. Te ccaekia a khantupaw tuh Muisaw nynh thua, pawccemacize Muisaw tuh byaccing nynh thua. ⁷ Pawccecize vaawran kya ccaekiakhan paw luthung a um`ae: Paaw lukheit, Bya lukheit, te Thyaa Muisaw lukheit nynh thua`ae. Te hynhe luthung`ae tuh ccangkheit nynh thua. ⁸ Te laephi vawlan ccaekiakhan paw ccangthung a um. Tuh-e`ae tuh Muisaw, tui te chii nynh thua`ae. Te hynh-e ccangthung`ae tuh ccangkheit kya mih lungnging. ⁹ Ccungccaw`ae ccaekia kha aening nynh ah lawkuh oh ze, Pachia ccaekia tuh houh alesaepaw nynh thua. Pawccecize hynh-e tuh Pachia nynh a Ccapaw kong ccaekiakhan paw Pachia ccaekia nynh thua. ¹⁰ Pachia Ccapaw a zyn paw nynh tuh amaw te amaw kya ccaekia a hoi. Pachia a zyn leipaw ccungccaw nynh tuh Pachia kha hyngbya a hosah. Pawkeiccumacize Pachia nynh a Ccapaw kong ccaekiakhan paw kha aning nynh a zyn khyh keiccu nynh thua. ¹¹ Ccaekia tuh e hynh nynh thua: Pachia nynh aening kha zungzae hiinnaw phe oun pya vae. Tuh-e hiinnaw tuh a Ccapaw kya nynh a um. ¹² Ccapaw a hoi paw nynh hiinnaw kha a hoi. Pachia Ccapaw kha a hoi leipaw tuh hiinnaw kha hoi khyh. ¹³ Zungzae hiinnaw na hoi oh paw kha na nyku nawlan oh, te Pachia Ccapaw min kha na zyn nawlan oh, Pachia Ccapaw min a zyn`ae paw nanning kalan e uccaw`ae kong hynh kae zei. ¹⁴ Te Pachia kya aening rawhoynaw ah hoi oh paw tuh e hynh nynh thua: Aening nynh amaw rynaw thyhte ccangkhakheit kha ah ngiaku oh ze, Pachia nynh yn thaepya. ¹⁵ Te aening nynh ah ngiaku oh paw miakaw aning nynh yn thaepya cipaw ah ny oh lanze amaw kyate ah ngiaku oh paw kha ah mue oh cipaw ah ny oh. ¹⁶ A uno nynh chinaw kalan a phyasah leipaw seinaw a sei paw kha lukhakheit nynh a muih lanze, a hanlan sawsangpah cih. Te chinaw a phyasah leipaw seinaw a rae`ae paw kha Pachia nynh hiinnaw a pya cih`ae. Chinaw kalan a phyasah paw seinaw a um. Kha-e seinaw hanlan sawsangpah sah cite ka ho khyh. ¹⁷ Dingleinaw balyn tuh seinaw nynh thua. Te chinaw kalan a phyasah leipaw seinaw a um. ¹⁸ Hunghung zemah Pachia nynh a saah paw tuh sei khyh cipaw aening ah ny oh. Pachia nynh a saah paw nynh tuh amaw te amaw kha a ringkuh. Te mihoy leipaw nynh amaw kha tung kho khyh. ¹⁹ Aening tuh Pachia kya-e nynh ah thua oh cipaw te laephipi khaleih tuh mihoy leipaw kuih kya nynh a um cipaw ah ny oh. ²⁰ Te ahmepaw amaw kha ah ny nawlan oh, Pachia Ccapaw tuh phe yn thua vae zah aening kha thaethyanaw phe yn pya vae cipaw ah ny oh; te aening tuh ahmepaw amaw kya te a Ccapaw Jesu Kri kya nynh ah um oh. Aning tuh ahmepaw Pachia thua zah zungzae hiinnaw mah athua. ²¹ Ccaaw taraw`ae, zohtuh`ae kha la sibia oh. Amen.