1 Corinthians

¹ Pachia rynaw liate Jesu Kri kya-e locceihtu cite ko athua paw Paul te ka unopaw Sosthene nynh, ² Korin khuapi kya a um paw kriccawbu kalan te Kri Jesu kya thyaasah athua paw, mithyaa`ae cite ko athua`ae paw kalan te ahmin takyh kya Jesu Kri min a ko`ae paw balyn kalan ccaw kae ky oh. Jesu Kri tuh minmin Bawipaw te aening Bawipaw paryh athua. ³ Ah Paaw Pachia kyate, Bawipaw Jesu Kri kyate thawccinaw te daenaw tuh nae tungvaw la um vae sah! ⁴ Jesu Kri liate nanning pya athua paw Pachia thawccinaw hanlan, nanning liate ka Pachia kalan zungzae lungtuabya ka ho. ⁵ - ⁶ Kri kya-e ccaekia tuh nanning kya tynsah athua thyhhawte, nanning tuh amaw liate pawpaw kya balyn, ho khonaw kya balyn, nynaw kya balyn hoirungsah na thua oh. ⁷ Tukeiccu nanning tuh ah Bawipaw Jesu Kri yn thua lanpaw kha ngaehoite phang na ngaw lya oh lasung na shung oh paw um khyh. ⁸ Ah Bawipaw Jesu Kri nin kya nanning tuh ccaenaw na hoi khyh nawlan oh amaw nynh nanning kha athangnaw cia ae tynsah cih oh. ⁹ Pachia tuh zyn lan um paw nynh thua. Amaw liate nynh nanning tuh a Ccapaw, ah Bawipaw Jesu Kri kya-e vaeccawkunaw kalan ko na thua oh. ¹⁰ Uteno`ae, nanning laku phiakunaw a um khyh nawlan, nanning balyn nynh phe alokuhpaw bya na ho nawlan oh; thuasalama alokuhpaw thinlung kya, te alokuhpaw tuanaw kya pynkheihlan phe na ccing nawlan oh, ah Bawipaw Jesu Kri min liate nanning kha kae ngia oh. ¹¹ Pawccecize, ka uno`ae nanning laku eikunaw a um cite Khaloi innbyn`ae kyate nanning konglang kamaw kalan phe yn thaesah vae`ae. ¹² Atu nanning lu raveih nynh, “Kae tuh Paul zuitu nynh ka thua,” “Kae tuh Apollos zuitu nynh ka thua,” “Kae tuh Sefas zuitu nynh ka thua,” “Kae tuh Kri zuitu nynh ka thua,” na ci oh pawte nynh e hynh ka ho. ¹³ Kri tuh a phiakuh tou? Paul tuh nanning hanlan khiade`ae ta? Tukhyhze Paul min kya nanning baptisma na in oh tou? ¹⁴ Krispas te Kaias laelan nanning kyaze hung sanmah baptisma kae insah khyh oh pawte Pachia kalan lungtuabya ka ho. ¹⁵ Tukhyh lanze Paul nynh amaw min kya baptisma a insah cite a ho paw a um sei cih. ¹⁶ Te Stefanas innbyn`aekheih baptisma ka insah`ae, tuhlaelan mingccang`ae baptisma ka insah paw hung sanmah ka nyh khyh. ¹⁷ Pawccecize Kri nynh kae hynh baptisma-insah khylan yn saw khyh, thuasalama thehoypaw ho khylan nynh yn saw. Tuhzemah Kri a vaelantung tuh paw ccungkia leipaw athua khyh nawlan hawnaw bya`ae te yn hosah khyh. ¹⁸ Pawccecize vaelantung kong phunghopaw tuh aroh`ae paw hanlan ngaeenaw bya nynh thua, thuasalama khum athua`ae paw aening hanlan hynh-e tuh Pachia kya-e thungnaw nynh thua. ¹⁹ Pawccecize, “Ahaw`ae paw hawnaw kha ka roh cih zah a thaethya`ae paw thaethyanaw kha accakaepaw lang ka tangsah cih,” cite azeikuh. ²⁰ Ahawpaw tuh teisangmou a um? Kawbya ccangpatu tuh teisangmou a um? Hynh-e she kya-e bya a eikuh khopaw tuh teisangmou a um? Pachia nynh hynh-e laephipi kya-e hawnaw tuh ngaeenaw lang rae khyh tou? ²¹ Pawccecize tuhkoute Pachia kya-e hawnaw kya, laephi ccungccaw`ae nynh hawnaw liate Pachia kha nyh khyh`ae, phunghopaw kya-e ngaeenaw liate a zyn`ae paw ccungccaw`ae kha khum lan Pachia a lungrythua. ²² Pawccecize Jew`ae nynh muihsanaw a ngia`ae, te Greek`ae nynh hawnaw kha a ccung`ae. ²³ Thuasalama kaening tuh a khiade`ae paw Kri kha nynh kae ho, tuh-e tuh Jew`ae hanlan thykupawkunaw thua zah Zenta`ae hanlan ngaeenaw nynh thua. ²⁴ Thuasalama ko`ae paw Jew`ae te Greek`ae paryh hanlan Kri tuh Pachia kya-e thungnaw, te Pachia kya-e hawnaw nynh thua. ²⁵ Pawkeiccumacize Pachia kya-e ngaeenaw tuh ccungccaw`ae hawnaw laeze ahawhua, te Pachia kya-e nyaanaw tuh ccungccaw`ae thawsaenaw laeze a thawsaehua. ²⁶ Pawccecize uteno`ae, nanning konawpaw konglang hynh tuaku tua oh; pynsaw lante ahawpaw ccungccaw`ae patae, athungpaw ccungccaw`ae patae, sawtua`ae paw patae tuh ko thuabua khyh`ae. ²⁷ Thuasalama Pachia nynh ahawpaw maethyasah khylan laephipi kyaze angaeepaw uccaw`ae kha a po`ae, te Pachia nynh athungpaw maethyasah khylan laephipi kyaze anyaapaw uccaw`ae kha a po`ae. ²⁸ Te a um paw uccaw`ae hynh accakaepaw lang tangsah khylan, Pachia nynh laephipi kyaze pawlang um leipaw uccaw`ae, pawlangria lei`ae paw, te a um leipaw uccaw`ae kha a po`ae. ²⁹ Ou tuhte amaw malang hung ccungccaw nynh sanmah a pooku khyh nawlan. ³⁰ Thuasalama amaw liate nynh nanning tuh Kri Jesu kya na um oh. Kri amaw tuh aening hanlan hawnaw, dingnaw, thyaasahnaw te sawkhaw nawlan Pachia nynh phe a rae vae. ³¹ Ou tuhte, “A pookuh paw ccungccaw tuh BAWIPAW kyakhe pookuh sah,” cite azeiku hawte nynh thua.

¹ Te uteno`ae kae nynh nae kalan kae thua lya, Pachia kya-e ccaekia nanning kae hopya oh lyakha, myarya byahothyanaw te, hawnaw te, kae thua khyh. ² Pawccecize Jesu Kri te amaw tuh a khiade`ae cipaw laelan, nanning laku pawsang mah ny vae lei lante bya phe ka pae vae. ³ Te kae tuh nanning ryte ka um lyakha, nyaanaw te, rinaw te, myarya thyngkunaw te nynh ka um. ⁴ - ⁵ Te nae zynnaw tuh ccungccaw`ae hawnaw kya athua khyh nawlan, thuasalama Pachia kya-e thungnaw kya athua nawlan, ka byaho te ka phungho tuh ccungccaw hawnaw te asekuhpaw soihnawpaw bya`ae khate thua khyh, thuasalama Muisaw kya-e langsakunaw kya te thungnaw kya-e nynh thua. ⁶ Tuhzemah piccang athua vae`ae paw laku kaening nynh hawnaw bya kha nynh kae ho. Tuhzemah hynh-e she kya-e hawnaw kha thua khyh, accakaepaw lang a tang`ae paw hynh-e she kya-e bawi`ae hawnaw kha mah thua khyh. ⁷ Thuasalama byakhupaw kya-e Pachia hawnaw kha nynh kae ho, tuh-e tuh laephipi a um maw, aening phu-enaw hanlan Pachia nynh phe a paccynde vae paw thuru athua paw hawnaw kha nynh thua. ⁸ Tuh-e hawnaw tuh hynh-e she kya-e uktu`ae hung nynh sanmah nyh khyh`ae, phe a la ny`ae thua ze, phu-enaw Bawipaw kha minmin nynh a la khiade cih lei`ae paw. ⁹ Thuasalama, “Pachia nynh amaw a sungsah`ae paw hanlan a paccynpaw uccaw`ae kha mit nynh muih khyh, nakaring nynh thae khyh, ccungccaw thinlung lungkhu lang mah tee khyh,” cite azeiku hawte nynh thua. ¹⁰ Thuasalama Pachia nynh khae` ae kha amaw Muisaw liate aening kalan phe yn phypya vae. Pawccecize Muisaw nynh tuh pawpaw balyn kha marya a zaah, athua, Pachia kya-e byakhupaw kha mah phe a zaah. ¹¹ Pawccecize ccungccaw uccaw`ae kha ccungccaw kya a um paw ccungccaw muisaw laelan hung nynh mou a nyh? Tuhhawte Pachia uccaw`ae kha Pachia Muisaw laelan hung nynh san nyh khyh. ¹² Atu Pachia nynh alakaw te oun pya paw uccaw`ae kha ah ny nawlan oh aening nynh laephipi kya-e muisaw kha ah mue khyh oh, thuasalama Pachia kyate yn thua paw Muisaw kha nynh ah mue oh. ¹³ Tuh-e uccaw`ae tuh mah ccungccaw hawnaw nynh ccangpyapaw bya`ae te kae ho khyh, thuasalama Thyaa Muisaw nynh ccangpyapaw bya thyhte, muisaw uccaw`ae kha muisaw bya te khingkhia te nynh kae ho. ¹⁴ Thuasalama laephi ccungccaw nynh tuh Pachia kya-e Muisaw uccaw`ae kha mue khyh; pawccecize kha-e paw hanlan kha-e uccaw`ae tuh ngaeenaw nynh thua. Kha-e uccaw`ae kha ny mah nyh kho khyh, pawccemacize kha-e uccaw`ae tuh muisaw lante nynh phiathya athua. ¹⁵ Thuasalama muisaw ccungccaw nynh tuh pawpaw balyn kha akaw-aleih byakhia kho, tuhzemah amaw kha hung ccungccaw nynh san akawaleih byakhia kho khyh. ¹⁶ Pawccecize, “Bawipaw kha a thuihei nawlan, hung ccungccaw nynh mou BAWIPAW thinlung kha a nyh?” Thuasalama aening tuh Kri thinlung kha ah hoi oh.

¹ Te uteno`ae, kae nynh nanning kha muisaw ccungccaw`ae hawte kae hopah kho khyh oh, thuasalama pynsaw ccungccaw`ae hawte, Kri kya imua taraw`ae kalan hopya hawte nynh kae hopya oh. ² Nanning kha samatei te nynh kae kua oh, looh tangpaw kae dang khyh oh; pawccecize atu cia kha-e kha na ae kho khyh oh, atu mah na ae kho la khyh oh. ³ Pawccecize nanning tuh pynsaw ccungccaw`ae nynh na thua ung oh. Pawccecize nanning laku eiungkunaw, peku maekunaw, te phiakunaw`ae phang a um paw tuh pynsaw ccungccaw`ae na thua khyh oh tou? Laephi ccungccaw`ae hawte khaw na umbua oh? ⁴ Pawccecize lukheit nynh, “Kae tuh Paul zuitu nynh ka thua,” ci zah mingccangpaw nynh, “Kae tuh Apollos zuitu nynh ka thua,” a ci; tuhte na ci oh paw tuh pynsaw ccungccaw`ae na thua khyh oh tou te? ⁵ Paul tuh hungmou athua? Apollos tuh hungmou athua? Bawipaw nynh ccungccaw miakaw kha a pya thyhhawte, kaening tuh nanning kha zynnaw kalan ae thuakhae oh paw Pachia ryalahtu`ae nynh kae thua. ⁶ Kae nynh ka lin, Apollos nynh tuibu, thuasalama Pachia nynh a lesahthung. ⁷ Tukeiccu a lintupaw hynh pawsang thua khyh, tuibupaw mah pawsang thua khyh, thuasalama a lesathungtupaw Pachia rou nynh a cyih kho. ⁸ Atu a lintupaw te tuibupaw tuh pynkheihpaw nynh thua, te milu raveih nynh amaw a ryalawnaw thyhte a ryalaw mee kha a mue cih. ⁹ Pawccecize kaening tuh Pachia ryte pynkheihlan ryalahtu`ae nynh kae thua, nanning tuh Pachia loo nynh na thua oh, te Pachia kya-e sak paw inn nynh na thua oh. ¹⁰ Kamaw pya athua paw Pachia thawccinaw thyhte, ahawpaw innsakthya paw inn saktu lukheit hawte kae nynh innthonaw kha phe ka bing vae. Te mingccangpaw nynh kha-e vawlan a sak. Thuasalama kha-e vawlan pawcihte nynh ka sak cipaw ccungccaw miakaw nynh raeringkuh sah. ¹¹ Pawccecize Jesu Kri athua paw, phe abingkuh vae paw innthonaw laelan ccangpaw innthonaw kha hung ccungccaw nynh sanmah bing kho vae khyh. ¹² Atu lukhakheit nynh kha-e innthonaw vawlan khe sui te, phua te, aphutepaw lung`ae te, thing te, lonuaku te, ccatanphue te a sak lanze; ¹³ milu raveih ryalaw tuh ccaerarihlan alangkuh cih; pawccecize tuh-e Nin nynh kha-e kha pung a langsakuh cih. Pawkeiccumacize kha-e kha maee te langsaku athua cih; te milu raveih ryalaw kha pawtahawpaw ryalaw nynh thua cipaw maee nynh a syntaw cih. ¹⁴ Lukhakheit nynh kha-e innthonaw vawlan a sak paw a ryalaw tuh atyn lanze, aning tuh ryalaw mee a mue cih. ¹⁵ Lukhakheit ryalaw tuh maee nynh phe a u lanze, aning tuh phe a shung cih; thuasalama maee kyate lue hawte amaw te amaw tuh khum athua cih. ¹⁶ Nanning tuh Pachia kya-e tempal na thua oh paw te Pachia Muisaw nanning kya a um paw kha na nyh khyh oh tou? ¹⁷ Lukhakheit nynh Pachia kya-e tempal kha a nungsisaku lanze, khe-e paw kha Pachia nynh a roh cih. Pawccecize Pachia kya-e tempal tuh athyaa; tuh-e tempal tuh nanning nynh na thua oh. ¹⁸ Hung nynh sanmah amaw te amaw kha lingkuh nan sah. Nanning laku lukhakheit nynh hynh-e she kya ka haw cite a tuaku lanze, aning tuh ahaw ccaw, angaeepaw lang tangsah. ¹⁹ Pawccecize hynh-e laephipi kya-e hawnaw tuh Pachia malang ngaeenawpaw nynh thua. Pawccecize, “Pachia nynh ahaw`ae paw kha mimaw thyaruhnaw kyakhe a kyng`ae,” cite azeikuh. ²⁰ Te, “Ahaw`ae paw mih tuanaw tuh pawlang um khyh cipaw BAWIPAW nynh a ny,” cite bua azeikuh. ²¹ Tukeiccu hung nynh san ccungccaw`ae kya pookuh nan sah. Pawccecize pawpaw balyn tuh nae kya-e nynh thua. ²² Paul athua zemah, Apollos athua zemah, Sefas athua zemah, laephipi athua zemah, hiinnaw athua zemah, chinaw athua zemah, a um paw uccaw`ae athua zemah, oun thua vae cih paw uccaw`ae athua zemah, pawpaw balyn tuh nae kya-e nynh thua. ²³ Te nanning tuh Kri kya-e nynh na thua oh; te Kri tuh Pachia kya-e nynh thua.

¹ Tukeiccu Kri kya-e ryalawpatu`ae te Pachia byakhupaw`ae synriatu`ae hawte ccungccaw nynh kaening hynh yn tua sah. ² Tuhlaeze synriatu`ae kya e hynh aho, synriatu tuh zyn lan um paw athua cih. ³ Thuasalama nanning nynh bya nae pia lan oh paw, tukhyhze ccungccaw byapianaw nynh bya yn pia lanpaw tuh ka hanlan myarya adihpaw uccaw nynh thua. Thanccingte, kae nynh kamaw te kamaw hei bya ka piakuh khyh. ⁴ Pawccecize kamaw te kamaw arawsepaw pawsang ka nyh khyh, tuhzemah kae tuh tuh-e liate thyaa ka ccou khyh; thuasalama kae yn sihseitupaw tuh Bawipaw nynh thua. ⁵ Tukeiccu mohnaw kya-e thurupaw uccaw`ae kha awnaw kalan a thuakhae cih paw te thinlung kya-e tuakunaw`ae a langsakuh cih paw Bawipaw yn thua mawlaezung accyh azaw maw pawsang byapia nan oh. Oute ccungccaw miakaw nynh Pachia kyate thehoysanaw kha a ccou cih`ae. ⁶ Uteno`ae, azeikuh paw Ccathyaa kha alue lante tua khyh nawlan kaening kya na ccangku nawlan oh, nanning kyaze hung nynh sanmah mingccangpaw kha rawsete lukheit hanlan a pooku khyh nawlan, nanning hanlan nynh hynh-e uccaw`ae hynh kamaw kalan te Apollos kalan tousenaw lante ka paleih. ⁷ Pawccecize mingccangpaw te alokuh lei lante nang kha hung nynh mou ae rae? Te na mue leipaw na hoi paw pawmou a um? Te na mue lan thua ze, na mue leipaw olante pawccemou na poku? ⁸ Atu nanning tuh phe beih lang na hoi vae oh! Na hoirung vae oh! Kaening kae um khyh lya siapharan`ae hawte na uk oh; kaening mah nanning ryte kae uk bua nawlan, nanning nynh phe la uk ccaccing oh lah ci ka ry. ⁹ Pawccecize chia lan seibe`ae paw ccungccaw`ae hawte kaening locceihtu`ae hynh nyathyakou Pachia nynh phe oun langsaku vae cite nynh ka tua. Pawccecize kaening tuh laephipi kalan, vaaw ccungccaw`ae kalan te ccungccaw`ae kalan nuinthua lan um paw dopaw nynh kae thua. ¹⁰ Kaening tuh Kri keiccuze mingaee`ae nynh kae thua, thuasalama nanning tuh Kri kya ahawpaw nynh na thua oh. Kaening tuh anyaa`ae paw nynh kae thua, thuasalama nanning tuh nae thawsae. Nanning tuh sawtua lan um paw nynh na thua oh, thuasalama kaening tuh dothatheih paw nynh kae thua. ¹¹ Atu ccyh cia hei kaening tuh kae vuelaw, kae tuihaw, kae uccaw apue, oun zia oun bua`ae zah inn leite nynh kae um. ¹² Kaemaw kae kuih`ae te thawte rya kae lah. Oun sang oun ruin vae`ae ze hythua kae pya`ae; oun tua oun sah vae`ae ze phang kae ngaesang. ¹³ Thethya oun ccousah`ae ze kae soihbiaku`ae. Kaening tuh laephipi kya-e athu-anangpaw hawte thuasah, pawpaw balyn kya-e athupaw`ae hawte thuasah atu cia kae thua. ¹⁴ Hynh-e`ae hynh nanning maethyasah khylan ka zei khyh, thuasalama ka sungsahpaw ccaaw`ae hawte raeringkunaw nynh kae pya oh. ¹⁵ Pawccecize Kri kya ccangpatu`ae thung haw na hoi oh zemah paaw`ae patae na hoi khyh oh; pawccecize thehoypaw liate Kri Jesu kya nanning kha kae nynh phe kae saah vae oh. ¹⁶ Tukeiccu kamaw hynh oun dosuinkuh oh cite nanning kha kae ngia oh. ¹⁷ Hynh-e keiccu nynh Bawipaw kya zyn lan um paw, ka sungsahpaw ka ccapaw Timote kha nanning kalan kae saw. Teiteikya balyn kriccawbu takyh kya ka ccangpya hawte, Kri kya ka hiinzia kha aning nynh ae la liathuisah cih oh. ¹⁸ Kae tuh nanning kalan kae thua vae lei lanpaw olante abang nynh tua`ae zah a tansaku`ae. ¹⁹ Thuasalama Bawipaw nynh a ry ze nae kalan taloi kae thua cih. Te a tansakuh`ae paw bya kha ka nypah lan khyh`ae, thuasalama mih thungnaw kha nynh ka nyh cih. ²⁰ Pawccecize Pachia peenaw tuh bya kya um khyh, thuasalama thungnaw kya nynh a um. ²¹ Pawmou na ry oh? Nae kalan tungbang te tou kae thua cih? Tukhyhze sungsakunaw te, nebaleihpaw thinlung te tou kae thua cih?

¹ Nanning laku ohhuakunaw a um cite ccungccung athaan. Ccungccaw lukheit nynh a paaw zu a umkhae cipaw, tuhtahawpaw ohhuakunaw tuh Zenta`ae laku heize thae boi lan um khyh. ² Te nanning nynh na tansakuh oh zah khate a cyih paw ccungccaw kha nanning laku kyate dae dee athua nawlan, na rah na khui khyh oh. ³ Pawccecize kae tuh pynsaw lante nanning ryte ka um khyh zemah muisaw lante ka um, nanning ryte ka um paw hawte, kha-e cyisahnaw a cyih paw kha-e paw kha bya phe ka pia vae. ⁴ Ah Bawipaw Jesu Kri min kya nanning pynkheihlan he na sueluakuh vae oh ze, kae ka muisaw a umbua, ah Bawipaw Jesu Kri thungnaw liate, ⁵ kha-e paw a muisaw tuh Bawipaw Jesu nin kya khum athua nawlan, a pynsaw tuh ro athua ccaw amaw kha Setan kalan ah oh cite bya ka pia. ⁶ Nanning na pooku oh paw tuh hoy khyh. Ccapyhtaripaw ransi nynh vaepoi khaleih a thosah cipaw na nyh khyh oh tou? ⁷ Tukeiccu nanning tuh ransi py leipaw na thua oh hawte, athawpaw vaepoi na thua nawlan oh, arynpaw ransi kha marya cciccae oh. Pawccecize aening Kawtaw Poi athua paw Kri tuh aening hanlan silawnaw phe thua vae. ⁸ Tukeiccu arynpaw ransi ryte thua leite, athah-aruhpaw te ahoy leipaw ransi ryte thua leite, thuasalama thinlung thanccingte, byaccing te ransi py leipaw poi kha tua oh sih. ⁹ Ka ccaky kya a ohhuakuh`ae paw ryte na mungku khyh nawlan oh nae kalan phe ka zei vae. ¹⁰ Tuhzemah hynh-e laephipi kya-e a ohhuakuh`ae paw ry, akarangkuh`ae paw ry, ccungccaw a luade`ae paw ry, zohtuhbeik`ae paw ryte kharyh na umkheih ngaw khyh oh cite ka hory paw thua khyh. Tuhte ka ho lanze nanning tuh laephipi kyate na pou oh aho vae cih. ¹¹ Thuasalama atu uno cite ko athua paw lukhakheit tuh a ohhuakuhpaw, tukhyhze a karangkuhpaw, tukhyhze zohtuhbeikpaw, tukhyhze ccungccaw a sang a ruinpaw, tukhyhze aruipaw, tukhyhze ccungccaw a luadepaw athua ze, khahtahawpaw ccungccaw ryte na mungkuh lan khyh oh, ae mah na aekheih lan khyh oh cite kae nynh nae kalan phe ka zei vae. ¹² Atolang e ccungccaw`ae kha mah byapia lanpaw tuh kae nynh pawmou ka se? Alungkhu e ccungccaw`ae kha nanning nynh bya na pia khyh oh tou? ¹³ Thuasalama atolang-e ccungccaw`ae kha Pachia nynh byapia cih`ae. Tukeiccu kha-e ccungccahoy leipaw kha naemaw laku kyate dae dee oh.

¹ Nanning lukheit te lukheit byathan na hoi vae oh ze mithyaa`ae malang thuakhaeku leite ading lei`ae paw malang thuakhaeku lan hungmou a zynkuhpaw a um? ² Laephipi hynh mithyaa`ae nynh byapia cih`ae cipaw na nyh khyh oh tou? Te laephipi tuh nanning nynh bya na pia cih oh athua lanze, adih huapaw byathan`ae kha byapia lan na ccan khyh oh tou? ³ Vaaw ccungccaw`ae kha aening nynh byapia lan cipaw na nyh khyh oh tou? Hynh-e hiinnaw te asekuhpaw uccaw`ae kha pawcihmou byapia lan houh ah ccan oh? ⁴ Tuhte hynh-e hiinnaw te asekuhpaw uccaw`ae kha byapia lanpaw na hoi oh ze, kriccawbu kya pawlang um hua lei`ae paw kha byapia lan la khang oh. ⁵ Nae maethya ccaw cite nynh tuhte ka ho. Nanning laku ahawpaw ccungccaw lukheit san um khyh tou? A uteno`ae laku byapia kho lanpaw lukheit san um khyh tou? ⁶ Thuasalama uteno nynh uteno kha zyn leitu`ae malang a thuakhae ccarei! ⁷ Tukeiccu atu nanning nynh lukheit te lukheit byapiaku lan na cciakhaeku oh paw tuh phe na cyisei mawrou oh. Pawccemou cyiseinaw kha na ua paleih khyh oh? Pawccemou hyngpyakupaw kha nanning nynh na teing paleih khyh oh? ⁸ Thua khyh, naemaw mah na cyihsei oh zah ming`ae kha na hyngpya oh, te nae uno`ae kalan khate na cyi oh. ⁹ Ading leipaw ccungccaw`ae tuh Pachia peenaw kha rhoccou lan khyh`ae cipaw na nyh khyh oh tou? Lingsakuh nan oh. A ohhuakuh`ae paw, zohtuhbeik`ae paw, milae zu milae vawpaw a seikhae`ae paw, nopi lang raekute a sei`ae paw, pise te pise a sei`ae paw, ¹⁰ miruh`ae, a karangkuh`ae paw, a rui`ae paw, ccungccaw a sang a ruin`ae paw, ccungccaw a luade`ae paw mah Pachia peenaw rhoccou lan khyh`ae. ¹¹ Te nanning kyaze abang tuh khatahaw`ae paw nynh na la thua oh. Thuasalama atu Bawipaw Jesu min kya te ah Pachia kya-e Muisaw liate nanning tuh singpya na thua vae oh, thyaasah na thua vae oh zah thyaaccou na thua vae oh. ¹² Pawpaw balyn tuh ka hanlan cyi kho athua, thuasalama pawpaw balyn tuh marya athane paw thua khyh. Pawpaw balyn tuh ka hanlan cyi kho athua, thuasalama ccangkhakheit thungnaw zakaw ka um sae lan khyh. ¹³ Aepaw tuh vue hanlan thua zah vue tuh aepaw hanlan nynh thua. Thuasalama Pachia nynh kha-e`ae kha paryh mawte a roh cih. Atu pyn tuh ohhuakunaw hanlan thua khyh, thuasalama Bawipaw hanlan nynh thua, te Bawipaw tuh pyn hanlan nynh thua. ¹⁴ Te Pachia nynh Bawipaw kha a thosah, te aening kha mah amaw kya-e thungnaw liate oun thosah bua cih. ¹⁵ Nae pyn tuh Kri pyn kya-e`ae nynh thua cipaw na nyh khyh oh tou? Oute Kri pyn kya-e`ae kha ka laah cih zah ohhuanung pyn kya-e`ae lang ka rae cih tou? Tuhte ccei soh. ¹⁶ Pawte? Ohhuanung te a kyngkuh paw tuh tuh-e nung ryte pyn kheit nynh athua vae`ae cipaw na nyh khyh oh tou? Pawccecize Pachia nynh, “Minmin luning tuh ngesaw kheit lang a tang cih`ae,” a ci. ¹⁷ Thuasalama Bawipaw te a kyngkuh paw tuh amaw ryte muisaw ccangkheit nynh athua vae`ae. ¹⁸ Ohhuakunaw kha ccuetaw oh. Ccungccaw nynh a cyi paw seinaw miakaw tuh pyn atolang e nynh thua, thuasalama ohhuakunaw a rae paw tuh amaw a pyn kha rawsete a seipaw nynh thua. ¹⁹ Pawte? Nae pyn tuh Pachia kyate na mue oh paw nae kya a um paw Thyaa Muisaw tempal nynh thua cipaw, te nanning tuh naemaw kya-e na thua khyh oh cipaw hynh na nyh khyh oh tou? ²⁰ Pawccecize nanning tuh amee te re paw nynh na thua oh. Tukeiccu Pachia kya-e athua paw nae pyn kya thuasah, nae muisaw kya thuasah Pachia kha phu-esah oh.

¹ Atu nanning nynh kamaw kalan nae zei oh paw uccaw te asekuh lante: Pise nynh nopi tung leipaw tuh ahoypaw nynh thua. ² Tuhzemah, ohhuakunaw kha sibia khylan pise miakaw nynh amaw zuhoi sah lah nopi miakaw nynh amaw vawpaw hoi sah. ³ Vawpaw nynh a zu nynh accanpaw rynawpaw kha langsapah sah; tuhhawte zu nynh mah vawpaw kha cyipah sah. ⁴ Zu nynh amaw pyn kya kawhoinaw hoi khyh, thuasalama vawpaw nynh a hoi. Tuhhawte vawpaw nynh mah amaw pyn kya kawhoinaw hoi khyh, thuasalama zu nynh a hoi. ⁵ Nanning nynh naemaw te naemaw kha loohaesungnaw kalan te sawsangnaw kalan na pyaku nawlan oh, ccyh sosoh nawccawpaw kya laelan, lukheit te lukheit kangkuh nan oh; te nanning na sungku kho leinaw oh keiccu Setan nynh ae tuh-ou khyh nawlan oh pynkheihlan bua um oh. ⁶ Thuasalama hynh-e hynh kawpyapaw liate thua leite, akhue-ua paw liate nynh ka ho. ⁷ Pawccecize pise`ae balyn tuh kamaw hawte thua`ae sah ci ka ry. Thuasalama ccungccaw miakaw nynh, Pachia nynh pya paw, amaw lasung a hoi. Lukheit nynh hynhtahawpaw lasung hoi zah mingccangpaw nynh khahtahawpaw a hoi. ⁸ Tukeiccu zu vawpaw a hoi lei`ae paw kalan te numae`ae kalan kae nynh ka ho paw tuh: Kae hawte minmin nynh a um`ae zetuh mih hanlan ahoy. ⁹ Thuasalama minmin nynh a sungku kho khyh`ae ze, zu vawpaw hoi`ae sah; pawccecize sahpaw eih ry te phang um paw lae tuh zu vawpaw hoi paw ahoyhua. ¹⁰ Te zu vawpaw a hoi`ae paw kalan kae nynh kaw ka pya`ae, tuhzemah kae ka thua khyh, thuasalama Bawipaw nynh kawpya`ae: Zu nynh a vawpaw kha poutaw nan sah. ¹¹ Thuasalama aning nynh a poutaw lanze vawpaw hoi leite um sah, tukhyhze a vawpaw te bua ccawkuhthui`ae sah. Te vawpaw nynh a zu kha maah nan sah. ¹² Thuasalama mingccang`ae kalan, Bawipaw nynh thua leite, kae nynh ka hopaw tuh: Uno lukhakheit nynh a zyn leipaw zuhoi zah kha-e a zu nynh a vawpaw ryte umkheih lan a ry ze, aning nynh a zu kha maah nan sah. ¹³ Tuhhawte nopi lukheit nynh a zyn leipaw vawpaw hoi zah kha-e a vawpaw nynh a zu ryte umkheih lan a ry ze, aning nynh a vawpaw kha maah nan sah. ¹⁴ Pawccecize a zyn leipaw vawpaw tuh zu liate thyaasah thua zah a zyn leipaw zu tuh vawpaw liate thyaasah athua. Tukhyh lanze nae ccaaw`ae tuh thyaa lan khyh`ae, thuasalama atu minmin tuh athyaa`ae. ¹⁵ Thuasalama a zyn leipaw nynh a poutaw ze, pou ccaleih sah. Rae lukheit, khyh ze ccia lukheit tuh tuhtahawpaw kya seetangnaw zakaw um lanpaw thua khyh. Thuasalama Pachia nynh aening tuh daenaw kalan nynh yn ko. ¹⁶ Pawccecize, Pou zu, na vawpaw kha nang nynh na khum cih, na khum lan khyh cipaw pawtemou na ny? Tukhyhze, Pou vawpaw, na zu kha nang nynh na khum cih, na khum lan khyh cipaw pawtemou na ny? ¹⁷ Thuasalama Pachia nynh ccungccaw miakaw kha a neethung thyhhawte, Bawipaw nynh ccungccaw miakaw kha a ko thyhhawte, aning nynh tuhte um sah. Te kriccawbu`ae balyn kha kae nynh tuhte kaw ka pya. ¹⁸ Vindung awkuh paw kha ko paw a um zaw? Vindung awkuh leipaw lang tang nan sah. Vindung awkuh leipaw kha ko paw a um zaw? Vindung awkuh paw lang tang nan sah. ¹⁹ Vindung awkupaw paw ccungkia khyh zah vindung awku leipaw mah paw ccungkia khyh. Thuasalama Pachia kya-e kawpyapaw`ae zui paw nynh azici. ²⁰ Ccungccaw miakaw nynh amaw konaw kya, kha-e konaw kyakhe khamawte po tyn sah. ²¹ Nang tuh see phang na thua pite ko na thua tou? Kha-e hanlan na thinphang nan sah; thuasalama nang tuh luesah kho na thua ze, kha-e luenaw kha mangkuh. ²² Pawccecize, Bawipaw kya ko athua paw ccungccaw tuh see mang athua pite Bawipaw kya-e a luepaw ccungccaw nynh thua. Tuhhawte ko athua paw ccungccaw mah mang alue pite Kri kya-e see nynh thua. ²³ Nanning tuh amee te re vae paw nynh na thua oh; ccungccaw`ae see lang tang nan vae oh. ²⁴ Uteno`ae, ccungccaw miakaw nynh amaw konaw, kha-e kyakhe Pachia ryte po um sah. ²⁵ Atu zu, vawpaw a hoi lei`ae paw te asekuh lante Bawipaw kya-e kawpyapaw ka hoi khyh; tuhzemah kae tuh Bawipaw a ngaethya-umsanaw kya zyn lan um paw lukheit ka thua hawte tuanaw kae pya oh. ²⁶ Tuhte atu lya-e vawsawnaw keiccuze pise lukheit nynh tuhmawte po a um lanze, tuh-e tuh ahoypaw nynh thua cite ka tua. ²⁷ Nang tuh zu te hede na thua tou? Suku lan ccungkuh nan. Nang tuh zu kyate supya na thua tou? Zu kha ccungkuh nan vae. ²⁸ Thuasalama nang tuh zu na hoi lanze, na sei khyh; te liaccady nynh vawpaw a hoi ze, aning tuh sei khyh. Tuhzemah khate zu, vawpaw a hoi paw tuh pynsaw kya vawsawnaw a tung cih`ae, thuasalama nanning kha kae haang ry oh. ²⁹ Thuasalama uteno`ae, e hynh kae hopya oh, accyh tuh adyn vae; tukeiccu atu te vae tuh zu a hoi`ae paw nynh zu a hoi lei`ae paw hawte um`ae sah; ³⁰ a rah`ae paw nynh a rah lei`ae paw hawte, te lungtua`ae paw nynh lungtua lei`ae paw hawte, te uccaw a re`ae paw nynh a hoi lei`ae paw hawte; ³¹ te hynh-e laephipi a mang`ae paw nynh alue lan a mang lei`ae paw hawte um`ae sah; pawccecize hynh-e laephipi muinsan tuh azo avae cciamang. ³² Thuasalama nanning tuh lungriathae leite na um lan oh ka ry. Zuhoi leipaw nynh tuh Bawipaw hynh pawtemou a lungry ka tung cih cite Bawipaw te asekuhpaw uccaw`ae kha nynh a tua. ³³ Thuasalama zuhoi paw nynh tuh a zu kha pawtemou a lungry ka tung cih cite laephi uccaw`ae kong kha nynh a tua. ³⁴ Vawpaw a hoi paw te liaccady laku mah alaenaw a um. Vawpaw a hoi leipaw nopi nynh tuh a pyn kya te a muisaw kya athyaa nawlan Bawipaw kya-e uccaw`ae kha nynh a tua. Thuasalama vawpaw a hoi paw nopi nynh tuh pawtemou ka vawpaw a lungry ka tung cih cite laephi uccaw`ae kong kha nynh a tua. ³⁵ Te hynhte ka hopaw tuh nanning kha khia kya kae saw oh ccaw cite thua khyh, nae hanlan athane nawlan nynh ka ho. Te kou angaekuh lante na um nawlan oh te lungronaw um leite nanning nynh Bawipaw kha rya na lawpya nawlan oh nynh hynhte ka ho. ³⁶ Thuasalama pisepaw lukhakheit nynh a liaccanung tungvaw dohoy lei lante nynh ka um cite a tuaku ze, tuh-e nung a liaccawnaw kum tuh alia vae lanze, vawpaw hoi aho vae thua ze, a ry hawte cyih sah. Aning tuh sei khyh; minmin tuh zuvaw lang tang`ae sah. ³⁷ Tuhzemah a thinlung kya varyn atynpaw, zuhoi hosah leite, amaw rynaw tungvaw kaw hoi zah a ccangvaethuanaw kha tuhte po tynsah lan cite a thinlung kya phe a tuakuh paw ccungccaw tuh kou hoy lang nynh a cyi. ³⁸ Tukeiccu zuhoi paw ccungccaw tuh kou hoy lang nynh a cyi. Thuasalama zuhoi leipaw ccungccaw tuh houh hoy lang nynh a cyi. ³⁹ Zu tuh a vawpaw a hiin lungkhu balyn kawbya liate hede athua. Thuasalama a vawpaw tuh a chi lanze, amaw nynh a ry paw pise zu lang tang khylan, Bawipaw kya kyalya nynh aning tuh alue. ⁴⁰ Thuasalama aning tuh vawpaw hoi leite khamawte a um lanze a lungtua huapaw nynh thua cite nynh ka tua. Te kae mah Pachia kya-e Muisaw ka hoi cite ka tuakuh.

¹ Atu zohtuh`ae kalan pyapawuccaw` ae konglang te, aening balyn nynaw ah hoi oh cipaw ah ny oh. Nynaw tuh a tansakuh, thuasalama sungsakunaw nynh thawzung atynsah. ² Te lukhakheit nynh ccangkhakheit ka nyh cite a tuaku lanze, ny lan accan hawte pawsang nyh loh khyh. ³ Thuasalama lukhakheit nynh Pachia kha a sungsah lanze kha-e paw tuh Pachia nynh a ny paw nynh thua. ⁴ Tukeiccu zohtuh kalan silawnaw`ae paw uccaw`ae aenaw konglang te, laephipi kya zohtuh tuh pawsang thua khyh cipaw te Pachia ccangkheit laelan ccangpaw um lae vae khyh cipaw kha ah ny oh. ⁵ Pawccecize (pachia`ae patae te bawi`ae patae a um paw hawte), vaawran kya thuasah, laephi vawlan thuasah pachia`ae a ci`ae paw a la um heize mah, ⁶ aening hanlan tuh Paaw, Pachia ccangkheit rou nynh a um. Amaw kyate nynh pawpaw balyn tuh a um, te aening tuh amaw hanlan nynh thua. Te Bawipaw lukheit Jesu Kri rou nynh um. Amaw liate nynh pawpaw balyn tuh a um, aening mah amaw liate nynh ah um oh. ⁷ Tuhzemah tuh-e nynaw tuh ccungccaw miakaw kya um khyh. Abang ccungccaw nynh zohtuh nynawpaw thinlung te atu cia zohtuh kalan pyapaw kha a ae`ae. Te mimaw nykunawpaw thinlung tuh a thawzya keiccu a nungsisakuh`ae. ⁸ Thuasalama aepaw nynh aening hynh Pachia malang maehoy yn pya khyh. Pawccecize ah ae oh zemah houh ahoyhua lae khyh oh; ah ae khyh oh zemah houh athah-aruhhua lae khyh oh. ⁹ Thuasalama nanning kya-e hynh-e luenawpaw kha thawzya`ae paw hanlan thypawku nawlan a tang khyh nawlan la raeringkuh oh. ¹⁰ Pawccecize nynaw mang na hoi paw nang nynh zohtuh nungnaw kya aepaw na koih paw kha lukhakheit nynh ae muih lanze, amaw nykunawpaw thinlung thawzyapaw ccungccaw nynh zohtuh`ae kalan pyapawuccaw` ae kha ae lan a rawthung lan khyh tou? ¹¹ Te na nynaw keiccuze, Kri nynh a hanlan a chipya paw, thawzyapaw uno tuh arohhang cih tou? ¹² Thuasalama nanning nynh uteno`ae kha rawsete tuhte he na sei oh tuh, thawzyapaw mimaw nykunawpaw thinlung kha vaemaw na muesah oh, tetuh Kri rawsete na sei vae oh. ¹³ Tukeiccu, aepaw nynh ka uno kha a maeleihsaku lanze, ka uno kha ka maeleihsaku khyh nawlan saw kharyh ka ae boi vae lan khyh.

¹ Kae tuh locceihtu ka thua khyh tou? Kae tuh a luepaw ka thua khyh tou? Ah Bawipaw Jesu Kri kha kae nynh phe ka muih khyh tou? Nanning tuh Bawipaw kya ka ryalaw na thua khyh oh tou? ² Kae tuh mingccang`ae kalan locceihtu ka thua khyh zemah, lunghiinnaw um leite nanning kalan locceihtu ka thua. Pawccecize nanning tuh Bawipaw kya kae locceihtu ka thuanawpaw syntawnaw nynh na thua oh. ³ Kamaw hynh akaw-aleih bya oun khia`ae paw kalan ka khungnaw`ae paw bya tuh hynhte nynh thua: ⁴ Kaening tuh ae lan, nia lan kaw kae hoi khyh tou? ⁵ Ccangpaw locceihtu`ae hawte, Bawipaw a neitaw`ae te Sefas hawte, kaening so a zyn paw zu lukheit hoeiku bua lan kaw kae hoibua khyh tou? ⁶ Tukhyhze Barnabas te kae kyalya tou ryalaw law leite um lan kaw kae hoibua khyh? ⁷ Hungmou amaw kya-e thangkute rhawkaw rya a lah paw a um? Hungmou misu khokhu ccou zah kha-e athae ae leite a um? Tukhyhze hungmou tuuphu kha ring zah tuu matei kha nia leite a um? ⁸ Hynh-e uccaw`ae hynh ccungccaw huataw lukheit hawte tou kae nynh hung ka ho? Tukhyhze tuh-e hawte kawbya nynh soh ho bua khyh tou? ⁹ Pawccecize Mawsi Kawbya kya hynhte azeikuh, “Ccatan a tin paw tangnuapaw`ae mung kha na baccyh lan khyh,” acikuh. Pachia nynh tangnuapaw`ae kha tuapah tou? ¹⁰ Tukhyhze kha-e kha aening hanlan balyn so Pachia nynh ho ta? Lunghiinnaw hoi leite aening hanlan nynh aho. Leithue paw ccungccaw nynh ngaehoinaw te a thue nawlan, te ngaehoinaw te ccatan tin paw nynh a ngaehoinaw kha a muebua paw athua nawlan nynh hynh-e tuh azeiku. ¹¹ Kaening nynh muisaw uccaw`ae kha nanning kya phe kae ccou zah nae kya-e pynsaw uccaw`ae kha kae rue lanze, alepaw uccaw thua zaw? ¹² Mingccang`ae nynh nanning tungvaw kha-e kaw kha a muebua`ae ze, kaening tuh houh muebua lan kae ccan khyh tou? Tuhzemah kaening tuh kha-e kaw kha kae mang khyh; thuasalama Kri thehoypaw kha phang kae khaw sei khyh nawlan pawpaw balyn kha phang kae ngaesang. ¹³ Athyaapaw uccaw`ae hanlan ryalah`ae paw tuh tempal voidu kya-e kha nynh a ae`ae cipaw, te silawhang kya ryalah`ae paw tuh silawhang kya-e kha nynh a ccoubua`ae cipaw kha na nyh khyh oh tou? ¹⁴ Ou tuhhawte thehoypaw a ho`ae paw tuh thehoypaw honaw kyate nynh a hiin cih`ae cite Bawipaw nynh kaw phe a pya vae. ¹⁵ Thuasalama hynh-e`ae hynh kharyh ka mang khyh, kamaw hynh tuhte nae cyipya oh ccaw cite mah hynh-e`ae kong hynh ka zei khyh. Pawccecize ka pookunawpaw kha lukhakheit nynh accakaepaw lan a tangsah lae tuh ka chi lanze ka hanlan ahoyhua. ¹⁶ Pawccecize thehoypaw kha ka ho zemah pooku lanpaw pawsang ka hoi khyh. Pawccecize cyi lan ahopaw kha ka tungvaw kya khang athua. Athua, thehoypaw kha ka ho khyh lanze, kae tuh pawcih ngaethya lan um paw pei ka thua cih! ¹⁷ Pawccecize kae nynh e rya hynh lungthote ka law ze, ryalaw mee ka hoi; thuasalama ka rynaw kha rawsete ka law lanze, kae tuh yn zyn zah synriatu ryalaw yn ah paw nynh thua. ¹⁸ Tuhte lanze ka ryalaw mee tuh pawmou? Thehoypaw he ka ho vae ze, Kri thehoypaw kha amee ho leite ka ho nawlan, thehoypaw honaw kya ka kawhoinaw kha alue lante ka mang khyh nawlan ka law paw kha nynh thua. ¹⁹ Pawccecize kae tuh ccungccaw balyn kyate ka lue zemah ccungccaw`ae kha houh ka mue nawlan, ccungccaw balyn hanlan kamaw te kamaw kha see lang nynh ka raekuh. ²⁰ Te Jew`ae kha ka mue`ae ccaw cite Jew`ae kya kae tuh Jew paw lukheit hawte nynh ka thua; Kawbya zakaw um`ae paw kha ka mue`ae ccaw cite Kawbya zakaw um`ae paw kya kae tuh Kawbya zakaw um paw hawte nynh ka thua. ²¹ (Pachia malang kawbya leite a um leipaw, Kri malang kawbya zakaw um paw ka thua zemah), kawbya leite um`ae paw kha ka mue nawlan, kawbya leite um`ae paw kya kae tuh kawbya leite um paw hawte nynh ka um. ²² Thawzya`ae paw kha ka mue nawlan, thawzya`ae paw kya kae tuh thawzyapaw hawte nynh ka um. Ccungccaw abang kha aphuinphuin te ka khum ccaw cite ccungccaw balyn hanlan kae tuh atyn-are nynh ka thua. ²³ Nanning ryte thehoypaw a neethungkuh bua paw ka thua nawlan, thehoypaw khylan nynh tuhte kae nynh ka cyi. ²⁴ Ccuetaekunaw kya a ccue`ae paw tuh mih balynte nynh a ccue`ae, thuasalama lukheit nynh tae mee lasung kha a mue cipaw na nyh khyh oh tou? Na muebua nawlan oh ou tuhte ccuebua oh. ²⁵ Taekunaw kya a taekuh bua paw miakaw nynh tuh tynre balyn kya a sungkuh. Anaanarohthyapaw haetapaw lukhung mue khylan nynh khate a cyi`ae. Thuasalama aening tuh anaanarohthya leipaw lukhung mue khylan nynh thua. ²⁶ Tukeiccu kae ka ccuebua, hung ka ccue huataw khyh; kae ka thungkuh bua, khivae athungpaw hawte ka thung khyh. ²⁷ Thuasalama mingccang`ae kha ka hopah`ae koute, kamaw tuh dae a nue`ae paw ka thuasei khyh nawlan, ka pyn hynh ka reihkuh zah ka taekuh.

¹ Tuhlaeze uteno`ae, ah minpaaw`ae balyn tuh maeking kaw la um`ae zah mih balynte rili kha po la zua`ae, ² maeking kya te rili kya mih balynte Mawsi kya baptismain` ae, ³ mih balynte phinkheitpaw muisaw looh kha la ae`ae, ⁴ mih balynte phinkheitpaw muisaw tui kha a la neih`ae cipaw kha ny leite na um lan oh paw ka ry khyh. Pawccecize minmin nuhlang te azuikuh paw kha-e muisaw Lungpi kyate a pou paw muisaw tui kha nynh a nia`ae, te tuh-e Lungpi tuh Kri nynh thua. ⁵ Thuasalama minmin kyaze alunghua tungvaw kya Pachia a lungrythua khyh, tukeiccu mih rhua`ae tuh rangkaw kya phiariphiarae pung a um. ⁶ Minmin nynh ahoy leipaw uccaw`ae kha a dua`ae hawte aening nynh ah dua khyh nawlan oh, atu hynh-e`ae tuh aening hanlan dosuinku lanpaw nynh thua`ae. ⁷ “Ccungccaw`ae tuh ae lan te nia lan dahung`ae zah zue khylan bua a thokuh`ae,” cite azeikuh hawte; minmin abang tuh zohtuhbeik`ae paw athua`ae hawte nanning thuabua nan oh. ⁸ Minmin abang tuh ohhuakunaw rae`ae zah nin kheit lungkhu thungkuin thungthung phe khuliakuh`ae zah a chi`ae hawte, aening tuh ohhuakunaw rae nan oh sih. ⁹ Minmin abang nynh Pachia syntaw`ae zah fupaw nynh phe a ro`ae hawte, aening tuh Kri kha syntaw nan oh sih. ¹⁰ Minmin abang nynh ccae-ihccaethua-um`ae zah a rohtupaw nynh phe a ro`ae hawte, nanning tuh ccae-ihccaethua umbua nan oh. ¹¹ Aening dosuinku lanpaw lang nynh hynh-e`ae balyn tuh minmin kya acyikuh. She athangnaw nynh a thuanua paw aening thuiheinaw hanlan nynh kha-e`ae tuh zei athua. ¹² Tukeiccu ka thadyn cite a tuakuh paw nynh tuh a khuliaku sei khyh nawlan raeringkuh sah. ¹³ Ccungccaw nynh a tung he paw tuh-ounaw rou kha nynh na tungbua oh. Thuasalama Pachia tuh zyn lan um paw athua thyhhawte, na taening lei oh paw tuh-ounaw kha nae kya thuasah lan khyh. Thuasalama na teing kho nawlan oh tuh-ounaw ryte poutawnawpaw laanpi kha mah amaw nynh ae raepah cih oh. ¹⁴ Tukeiccu ka sungsah`ae, zohtuhbeik paw kha ccuetaw oh. ¹⁵ Ahawpaw ccungccaw`ae kalan ho hawte nynh kae hopya oh. Ka hopaw hynh nanning nynh la tuasekuh oh. ¹⁶ Hythua ah pya oh paw hythuanaw banang tuh Kri chii kya-e zerya mangnaw kha thua khyh tou? Ah ia oh paw sanlou tuh Kri pyn kya-e zerya mangnaw kha thua khyh tou? ¹⁷ Pawccecize aening tuh patae ah ci oh zemah sanlou phe kheit te pyn pynkheit nynh ah thua oh; pawccecize aening balyn tuh kha-e sanlou phe kheitpaw kha nynh ah mangkheih oh. ¹⁸ Pynsaw lante Israel athua`ae paw kha dotua oh; silawnaw`ae paw a ae`ae paw minmin tuh silawhang kya-e a neethungkuh bua`ae paw thua khyh`ae tou? ¹⁹ Tuhte lanze ka hory paw tuh pawmou? Zohtuh tuh ccangkhakheit nynh thua ka ci tou? Tukhyhze zohtuh kalan pyapaw tuh ccangkhakheit nynh thua ka ci tou? ²⁰ Thuasalama Zenta`ae nynh silawnaw`ae paw tuh Pachia kalan thua leite raerangsaro`ae kalan nynh silaw`ae cipaw kha nynh thua. Te raerangsaro`ae ryte vaeccawtangnaw na hoi lan oh paw kha ka ry khyh. ²¹ Bawipaw kya-e banang te raerangsaro`ae banang kha na neih kho khyh oh; Bawipaw kya-e ccaboi te raerangsaro`ae kya-e ccaboi kha na mangkheih kho khyh oh. ²² Bawipaw kha a thinriasah lan aening nynh ah hy ry oh tou? Aening tuh amaw laeze ah thawsaehua tou? ²³ Pawpaw balyn tuh ka hanlan cyi kho athua, thuasalama pawpaw balyn tuh marya athanepaw thua khyh; pawpaw balyn tuh ka hanlan cyi kho athua, thuasalama pawpaw balyn nynh tynsahthung khyh. ²⁴ Hung ccungccaw nynh sanmah amaw hanlan ccungkuh nan sah; thuasalama ccungccaw miakaw nynh mingccang`ae hoy nawlan ccung sah. ²⁵ Ahmaw nykunaw thinlung keiccu byakhia leite, saw zuanaw kya a zua`ae paw miakaw kha ae oh; ²⁶ pawccecize, “Laephi te kha-e kya um`ae paw balyn tuh BAWIPAW kya-e nynh thua.” ²⁷ A zyn lei`ae paw lukhakheit nynh nanning kha ae kobua oh zah ccia lan na ry oh ze, ahmaw nykunaw thinlung keiccu byakhia leite nae malang a nya`ae paw miakaw kha ae oh. ²⁸ Thuasalama lukhakheit nynh, “E tuh zohtuh`ae kalan pyapaw nynh thua,” cite ae hopya oh ze, khate ae hopah paw keiccu te ahmaw nykunaw thinlung keiccu kha-e kha ae nan oh; pawccecize, “Laephi te kha-e kya um`ae paw balyn tuh BAWIPAW kya-e nynh thua.” ²⁹ “Ahmaw nykunaw thinlung,” ka cipaw hynh namaw kya-e kha ka hory paw thua khyh, thuasalama mingccang`ae kya-e kha nynh ka hory. Pawccemou ccungccaw ccangpaw kya-e nykunaw thinlung nynh kamaw ka luenaw kha bya yn pia lanpaw tuh? ³⁰ Thuasalama lungtuabya hote ka ae lanze, lungtuabya hote ka mang paw kha-e keiccu pawccemou kae tuh thethya oun ho`ae? ³¹ Tukeiccu na ae oh zemah thuasah, na nia oh zemah thuasah, pawpaw na cyi oh zemah, pawpaw balyn tuh Pachia phu-e nawlan cyih oh. ³² Jew`ae kha thuasah, Greek`ae kha thuasah, Pachia kriccawbu kha thuasah lungrosanaw pya nan oh. ³³ Ccungccaw`ae nynh khumnaw a muebua`ae ccaw cite, kae nynh kamaw elan amia ccungku leite, ccungccaw patae elan amia ka ccung zah pawpaw kya balyn ccungccaw balyn lung ka hoysah hawte, cyih bua oh.

¹ Kae nynh Kri kha ka dosuinku hawte nanning mah kamaw hynh oun dosuinkuh oh. ² Uteno`ae, nanning nynh pawpaw kya balyn kamaw kha nae liathui oh zah nanning kalan kae ahpya oh paw thyhhawte phungzae`ae kha na zui oh pawte kae thehoysah oh. ³ Thuasalama pise miakaw lu tuh Kri thua zah nopi lu tuh pise nynh thua cipaw te Kri lu tuh Pachia nynh thua cipaw kha kae nysah ry oh. ⁴ Pise miakaw nynh a lu phang bongkute sawsang ze thuasah, profehbyaho ze thuasah, amaw a lu kha thethyasah paw nynh thua. ⁵ Thuasalama nopi miakaw nynh a lu bongku leite sawsang ze thuasah, profehbya ho ze thuasah, amaw a lu kha thethyasah paw nynh thua; pawccecize tuhte a cyi lanze aning tuh a lu phe naepaw te nynh aloku. ⁶ Pawccecize nopi nynh a lu kha a bongku khyh ze, a sang ngokuh sah; thuasalama nopi lukheit hanlan sang ngokupaw, lu naekupaw tuh maethya lan um ze, a lu kha bongkuh sah. ⁷ Pise tuh Pachia kya-e muinsan te a phuenaw athua keiccuze a lu bongku lan ccan ccaccing khyh. Thuasalama nopi tuh pise kya-e phu-enaw nynh thua. ⁸ Pawccecize pise tuh nopi kyate thua khyh; thuasalama nopi tuh pise kyate nynh thua. ⁹ Pise tuh nopi hanlan rae paw mah thua khyh; thuasalama nopi tuh pise hanlan rae paw nynh thua. ¹⁰ Tukeiccu vaaw ccungccaw`ae keiccuze nopi nynh amaw a lu vawlan kawhoinaw syntawnaw a hoi aho. ¹¹ Tuhzemah Bawipaw kya nopi leite pise um khyh, pise leite nopi mah um khyh. ¹² Pawccecize nopi tuh pise kyate athua hawte, pise mah nopi liate nynh a um; thuasalama pawpaw balyn tuh Pachia kyate nynh thua. ¹³ Nopi lukheit nynh lu bongku leite Pachia kalan sawsangpaw tuh angaekuh tou, ngaekuh khyh tou? Naemaw te naemaw va tuasekuh oh. ¹⁴ Pise lukheit nynh a sang a hangku ze, a hanlan maethyaum cipaw phung mawhei nynh nanning kha ae ccangpah khyh oh tou? ¹⁵ Thuasalama nopi lukheit nynh a sang a hangku ze, a hanlan phu-enaw nynh thua. Pawccecize nopi sang tuh amaw bongkunawpaw nynh thua. ¹⁶ Thuasalama lukhakheit nynh a ei ry ze, tuhtahawpaw phung ah hoi khyh oh, Pachia kya-e kriccawbu`ae mah hoi khyh`ae. ¹⁷ Nanning nynh ahoy huapaw hanlan thua leite, houh ahoy leipaw elan na sueluaku oh keiccu, atu hynh-e thuiheinaw pyanaw kya, nanning kha kae thehoysah khyh oh. ¹⁸ Pawccecize masaty lanze, nanning nynh kriccawbu kya na sueluaku vae oh ze, nae laku phiakunaw a um cite ka thae. Athua ze athua cih cite ka zyn. ¹⁹ Pawccecize nanning laku nawccawkhaepaw ccungccaw`ae kha langsaku khylan, nanning laku bu phiakunaw mah a um cih. ²⁰ Tukeiccu nanning nynh ahmin sang kheit kya he na sueluaku vae oh ze, tuh-e tuh Bawipaw zerya mang khylan na sueluaku oh paw thua khyh. ²¹ Pawccecize aenaw kya nanning lu raveih nynh naemaw aepaw kha na lawkuty oh; lukheit tuh a vuelaw zah mingccangpaw tuh a rui. ²² Pawmou na cyi oh? Aenaw lanpaw te nianaw lanpaw inn na hoi khyh oh tou? Tukhyhze Pachia kriccawbu kha pawlangria leite na um oh zah pawsang hoi lei`ae paw kha mae na thyasah oh tou? Nae kalan pawte ka ho cih? Hynh-e kya kae thehoysah cih oh tou? Kae thehoysah khyh oh. ²³ Pawccecize nanning kalan kae ahpya oh paw hynh Bawipaw kyate ka mue paw nynh thua: Bawipaw Jesu nynh amaw a phee lya`ae kha-e khuazi khe sanlou kha laah zah, ²⁴ lungtuabya a ho koute, sanlou kha eih zah, “Hynh-e sanlou tuh nanning hanlan ia athua paw ka pyn nynh thua, lawkuh oh lah ae oh; kamaw liathui nawlan e hynh ae oh,” a ci. ²⁵ Tuhhawte zerya a mang kou`ae te banang kha mah laah zah, “Hynh-e banang tuh ka chii kya athawpaw byakin nynh thua. E hynh na nia oh takyhte kamaw liathui nawlan neih oh,” a ci. ²⁶ Pawccecize nanning nynh hynh-e sanlou kha leih na ae oh zah hynh-e banang kha leih na nia vae oh ze, Bawipaw a chinaw kha amaw yn thua cia na phy oh paw nynh thua. ²⁷ Tukeiccu hunghung zemah Bawipaw sanlou te banang kha angaekuh lei lante ae zah a neih paw ccungccaw tuh Bawipaw a pyn te a chii kya seinaw a hoi paw nynh thua. ²⁸ Thuasalama ccungccaw miakaw nynh amaw te amaw kha phe tuakuhty sah, te sanlou kha ae sah lah banang kha mah neih sah. ²⁹ Pawccecize angaekuh lei lante ae zah a neih paw ccungccaw tuh Bawipaw pyn kha a nythya khyh keiccuze amaw tungvaw seibyapia nawlan ae zah a neih paw nynh thua. ³⁰ Hynh-e keiccu nanning laku ccungccaw patae tuh thawzya`ae zah dan khyh`ae. Te patae tuh a chih`ae. ³¹ Pawccecize aening nynh ahmaw te ahmaw kha bya ah piaku oh ze, aening tuh bya oun pia vae lan khyh`ae. ³² Thuasalama aening tuh bya oun pia vae`ae ze, laephi ccungccaw`ae ryte seibe ah thua khyh nawlan oh Bawipaw nynh aening kha phe oun thuihei vae. ³³ Tukeiccu ka uteno`ae ae lan pynkheihlan he na thua vae oh ze, lukheit te lukheit la ngawkuh bua oh. ³⁴ Te he na pumku vae oh ze byapianaw kalan ae thuakhae khyh nawlan oh, lukhakheit nynh a vuelaw ze, amaw inn kya la ae sah. Te tuhlaepaw tuh he kae thua te kou angaekuh lante kae khan cih.

¹ Uteno`ae nanning nynh muisaw lasung`ae konglang ny leite na um lan oh paw ka ry khyh. ² Nanning tuh Zenta`ae na la thua oh paw, ae la cciakhae oh zah byahothya leipaw e zohtuh`ae kalan ae la thuakhae oh paw kha na ny oh. ³ Tukeiccu Pachia Muisaw liate a ho paw ccungccaw hung nynh sanmah Jesu kha thyalaw kho khyh, te Thyaa Muisaw liate holeite hung nynh sanmah Jesu tuh Bawipaw nynh thua cite ho kho khyh cipaw kha kae nysah oh. ⁴ Lasung`ae aphuinphuin a um, thuasalama Muisaw ccangkheit nynh a um. ⁵ Pachia ryalawnaw aphuinphuin a um, thuasalama Bawipaw lukheit nynh a um. ⁶ Te ryalawpaw aphuinphuin a um, thuasalama pawpaw kya balyn marya ryalah paw Pachia ccangkheit rou nynh a um. ⁷ Thuasalama ccungccaw balyn thanenaw hanlan Muisaw kya-e langsapyakunaw kha milu raveih pya athua. ⁸ Pawccecize Muisaw liate lukheitpaw kha hawnaw bya pya athua; kha-e Muisaw liate mingccangpaw kha nynaw bya pya athua. ⁹ Kha-e Muisaw liate mingccangpaw kha zynnaw pya athua; kha-e Muisaw liate mingccangpaw kha dansanaw lasung`ae pya athua. ¹⁰ Mingccangpaw kha ngaeangnaw ryalaw khonaw a pya, mingccangpaw kha profehbya ho khonaw a pya, mingccangpaw kha muisaw`ae phiathyanaw a pya; mingccangpaw kha bya`ae aphuinphuin hothyanaw a pya, mingccangpaw kha bya`ae asuilan leihthyanaw a pya. ¹¹ Thuasalama hynh-e`ae balyn hynh kha-e Muisaw ccangkheit nynh ryalawpaw nynh thua, a ry hawte milu raveih kha lukheitcci te a neethung`ae. ¹² Pawccecize pyn tuh pynkheit thua zah pyn kya-e`ae patae a hoi, thuasalama tuh-e pyn pynkheit kya-e`ae balyn tuh patae mang ci`ae zemah pyn tuh pynkheit athua hawte, tuh-e hawte nynh Kri mah athua. ¹³ Pawccecize Jew`ae athua zemah, Greek`ae athua zemah, see`ae athua zemah, a luepaw athua zemah, Muisaw ccangkheit liate aening balyn tuh pyn pynkheit lungkhu lang baptisma-in sah ah thua oh; te ah balynte Muisaw ccangkheit lungkhu lang niasah lan rae athua oh. ¹⁴ Pawccecize pyn tuh pyn kya-e ccangkheit kyalya thua khyh, thuasalama patae a um. ¹⁵ Ccu nynh, “Kae tuh kuih ka thua khyh keiccu, kae tuh pyn kya-e ka thuabua khyh,” a ci lanze, tuhte a ci keiccu pyn kya-e thuabua khyh tou? ¹⁶ Te nakua nynh, “Kae tuh mit ka thua khyh keiccu, kae tuh pyn kya-e ka thuabua khyh,” a ci lanze, tuhte a ci keiccu pyn kya-e thuabua khyh tou? ¹⁷ Pyn khaleih tuh mit athua lanze pawkyamou thaenaw tuh a um vae cih? Pyn khaleih tuh nakua athua lanze paw kyate mou amyn tuh a sue vae cih? ¹⁸ Thuasalama atu Pachia nynh pyn kya miakaw kha amaw a lungry hawte mimaw thathyhte pung a nung. ¹⁹ Te minmin balyn tuh pyn kya-e ccangkheit kyalya athua lanze, pyn tuh pawkyamou a um vae cih? ²⁰ Atu pyn kyae` ae tuh patae um zemah pyn tuh pynkheit rou nynh a um. ²¹ Te mit nynh kuih kha, “Nang kae peki khyh,” ci kho lan khyh. Tuhhawte lu nynh ccu kha, “Nang kae peki khyh,” ci kho lan khyh. ²² Tuhlaeze, thawzya huapaw alopaw pyn kya-e`ae tuh houh ahoboupaw nynh thua`ae. ²³ Te pyn kyaze sawtua lan eih um khyh cite ah tua oh paw kha houh sawtuanaw ah pya oh; te ah pyn kyaze dohoy leipaw kha houh puithya lan ah ccaan oh. ²⁴ Thuasalama ah pyn kyaze dohoypaw kha tuh ccaan ho vae khyh. Thuasalama pyn kyaze sawtuanaw aboupaw kha sawtuanaw alehua pyate Pachia nynh pyn kha a rae; ²⁵ ou tuhte pyn kya laesakunaw kharyh a um khyh nawlan; thuasalama pyn kya-e`ae nynh alokuhpaw dooihkunaw a hoi`ae ccaw cite nynh tuhte a rae. ²⁶ Te pyn kya-e ccangkheit nynh a teing vae ze, pyn kya-e`ae balyn pung a teing bua`ae; pyn kya-e ccangkheit tuh sawtua athua ze, pyn kya-e`ae balyn pung mih lungtuabua. ²⁷ Atu nanning tuh Kri pyn nynh na thua oh; te lu raveihte a pyn kyae` ae nynh na thua oh. ²⁸ Te Pachia nynh hynh-e`ae kha kriccawbu kya a khang`ae; tuh-e`ae tuh: masaty locceihtu`ae, ccangningnaw profeh`ae, ccanthungnaw ccangpatu`ae, tuhkoute athungpaw ryalaw`ae, ou tuhkoute ngeccih dansanaw lasung`ae, ming`ae bawngnaw`ae, ukthyanaw`ae, bya aphuinphuin hothyanaw`ae kha a pya`ae. ²⁹ Mih balynte locceihtu`ae thua zaw? Mih balynte profeh`ae thua zaw? Mih balynte ccangpatu`ae thua zaw? Mih balynte athungpaw ryalaw lahtu`ae thua zaw? ³⁰ Mih balynte ngeccih dansanaw lasung`ae a hoi`ae zaw? Mih balynte bya aphuinphuin ho`ae zaw? Mih balynte byaleih`ae zaw? ³¹ Thuasalama ahoy huaccepaw lasung`ae kha myaryasangkae pekikuh oh. Te houh ahoy huaccepaw ccianaw kha kae muihsah ung cih oh.

¹ Ccungccaw`ae bya te vaaw ccungccaw`ae bya kha ka ho salamah sungsakunaw ka hoi khyh ze, kae tuh dawkhua roiccaepaw te langchi khuapaw hawte nynh ka thua. ² Te kae nynh profehbyaho khonaw lasung ka hoi zah byakhupaw`ae balyn te nynaw balyn kha ka thaethya zemah thuasah; te mua`ae phe ka nue kho lan cia zynnaw balyn ka hoi zemah, sungsakunaw ka hoi khyh ze kae tuh accakaepaw nynh ka thua. ³ Te ka hoi paw balyn kha ryachi`ae loohdang nawlan khaleih ka pya zemah thuasah, te ka pyn hynh maee te uku lan ka pyaku zemah, sungsakunaw ka hoi khyh ze, tuh-e nynh kae pawsang yn thanesah khyh. ⁴ Sungsakunaw tuh a lungsae zah thawccithya; sungsakunaw tuh eiung khyh; sungsakunaw tuh pookuh khyh, tansakuh khyh; ⁵ umtuzia dothah lante um khyh, amaw thanenaw hanlan ccungkuh khyh, zoikadeih lang a thinria khyh, ahoy leipaw kha tua khyh; ⁶ atazae leipaw kya a lungtua khyh, thuasalama byaccing kya nynh a lungtua; ⁷ pawpaw balyn kha a ngaesang kho, pawpaw balyn kha a zyn, pawpaw balyn kha a ngaehoi, pawpaw balyn kha phang a ngaesang. ⁸ Sungsakunaw tuh athang ci um boi khyh. Thuasalama profehbyaho khonaw`ae a um zemah azo cih; bya aphuinphuin hothyanaw a um zemah adae cih; nynaw a um zemah phe azo cih. ⁹ Pawccecize aening tuh abangasung nynh ah ny oh, abangasung nynh profehbya ah ho oh. ¹⁰ Thuasalama accingpaw he yn thua vae te tuh, abang-asung paw kha tuh phya zosah athua vae cih. ¹¹ Ka imua lya, imua hawte nynh bya ka ho, imua hawte nynh ka ny, imua hawte nynh ka tua; thuasalama piccang he ka thua vae tuh imua uccaw`ae kha phya ka vua kou vae. ¹² Pawccecize atu aening tuh muinsado kya valyvaly te nynh ah muih oh; thuasalama tuin vae tuh mitmae hawiliakute muih lan vae. Atu kae tuh abang-asung nynh ka ny, thuasalama tuin vae tuh kamaw hynh ny ka thua hawte kae mah ka nyh vae cih. ¹³ Te atu zynnaw, ngaehoinaw, sungsakunaw, hynh-e ccangthung hynh atyn; thuasalama hynh-e`ae kyaze abapi huaccepaw tuh sungsakunaw nynh thua.

¹ Sungsakunaw kha pei zui oh lah muisaw lasung`ae kha peki oh, abapi lante profehbya na ho nawlan oh peki oh. ² Pawccecize ccangpaw bya a ho paw ccungccaw tuh ccungccaw`ae kalan ho khyh, thuasalama Pachia kalan nynh a ho. Pawccecize a hopaw kha hung nynh sanmah thaethya khyh; tuhzemah byakhupaw`ae kha muisaw kya nynh a ho. ³ Thuasalama profehbya hopaw tuh thawzung tynsanaw, thawte hynawpaw te ngaengansanaw bya kha ccungccaw`ae kalan nynh a ho. ⁴ Ccangpaw bya a ho paw tuh amaw te amaw nynh thawzung tynsaku. Thuasalama profehbya hopaw tuh kriccawbu kha thawzung a tynsah. ⁵ Nanning balyn nynh ccangpaw bya`ae ho oh ci ka ry, thuasalama nanning nynh profehbya na ho nawlan oh houh ka ry. Pawccecize ccangpaw bya`ae a ho paw nynh kriccawbu thawzung tynsah nawlan asuilan aleih khyh ze aning laeze profehbya ho paw tuh aphutehua. ⁶ Uteno`ae, atu kae nynh ccangpaw bya hote nae kalan kae thua zemah, byaphy liate, khyhze nynaw liate, tukhyhze profehbyahonaw liate, tukhyhze ccangpyakunaw liate kae hopya khyh oh ze nae hanlan pawmou athane cih? ⁷ Te hiinnaw hoi leipaw uccaw`ae phyly khyhze tintang hei kha, roiccaesah vae`ae ze roiccaesah paw alaenaw um khyh ze, phyly tou a tu`ae, tukhyhze tintang tou a khua`ae cipaw kha pawtemou ny kho a um cih? ⁸ Pawccecize mungkae nynh akyh leipaw roi khate accae lanze, hung nynh mou rhawtuk lan a paccynkuh cih? ⁹ Tuhhawte nanning mah thaethya lan azoipaw bya`ae khate na ho khyh oh ze, na ho oh paw kha pawtemou a nyh cih`ae? Khivae kalan nynh hung na ho han cih oh. ¹⁰ Laephipi kya bya`ae aphin patae a um cih, te kha-e`ae kyaze ccangkheit sanmah asuilan hoi leite um khyh. ¹¹ Tukeiccu bya asuilan kha kae nynh ka ny khyh ze, kha-e bya a ho paw hanlan kae tuh ramccangpaw nynh ka thua vae cih, a hotupaw mah kae ka hanlan ramccangpaw nynh athua cih. ¹² Tuhhawte nanning mah muisaw lasung`ae myarya a peki paw na thua oh hawte, kriccawbu thawzung tynsanaw elan houh mue lan ccung oh. ¹³ Tukeiccu ccangpaw bya a ho paw nynh kha-e kha asuilan aleih kho nawlan sawsangkuh sah. ¹⁴ Pawccecize kae nynh ccangpaw bya te saw ka sang ze, ka muisaw nynh sawsang, thuasalama ka thaethyanaw tuh pawlang um khyh. ¹⁵ Tuhte lanze pawte? Kae tuh muisaw te saw ka sang cih zah thaethyanaw te mah saw ka sang cih; muisaw te law ka sah cih zah thaethyanaw te mah law ka sah cih. ¹⁶ Tukhyh lanze, nang nynh muisaw te hythua na pya ze, a nyhbua lei`ae paw phu kya a umbua paw ccungccaw nynh, nang nynh lungtuabya na ho paw kha paw nynh na ho cipaw a thaethya khyh ze pawcihtemou “Amen” a cithya cih? ¹⁷ Pawccecize nang nynh tuh ahoyte lungtuabya na ho ccaccing, thuasalama mingccangpaw tuh thawzung tynsah thuabua khyh. ¹⁸ Nanning balyn laeze kae tuh ccangpaw bya`ae ka ho keiccu ka Pachia kalan lungtuabya ka ho. ¹⁹ Tuhzemah kriccawbu kya ccangpaw bya te bya thung haw ka ho laeze, mingccang`ae kha mah ka ccangpya nawlan`ae, ka thaethyanaw te bya kaw pangaw ho ka ry hua. ²⁰ Uteno`ae, thaethyanaw kya imua`ae thua nan oh; tuhzemah athah-aruhpaw tuanaw kya imua taraw`ae thua oh, thuasalama thaethyanaw kya tuh piccang`ae thua oh. ²¹ Mawsi Kawbya kya hynhte azeikuh: “Ccangpaw bya te, ccangpaw mung te hynhe ccungccaw`ae kalan bya ka ho cih, tuhzemah minmin nynh ka hopaw hynh ngaelae lan khyh`ae,” cite Bawipaw nynh a ci. ²² Tukeiccu ccangpaw bya`ae tuh a zyn`ae paw hanlan thua khyh, a zyn lei`ae paw hanlan muihsanaw nynh thua; thuasalama profehbya hopaw tuh a zyn lei`ae paw hanlan thua khyh, a zyn`ae paw hanlan nynh thua. ²³ Tukeiccu kriccawbu khaleih nynh sang kheit kya pynkheihlan na thua oh zah nae balynte ccangpaw bya na ho oh ze, a thaethya lei`ae paw te a zyn lei`ae paw nynh oun teebua`ae ze, minmin nynh nanning kha na ngae vae oh ae ci lan khyh oh tou? ²⁴ Thuasalama nae balynte profehbya na ho oh ze, a zyn leipaw, tukhyhze a thaethya leipaw lukheit nynh yn teebua ze, nae balynte a seinaw na muihsakuh oh zah aning kha na zynsah bua oh. ²⁵ Ou tuhte a thinlung kya-e aphiru`ae kha langsapyaku athua vae cih; oute aning nynh bakhungte Pachia kha a beik vae cih zah Pachia tuh nae kya a um ccaccing cite a ho vae cih. ²⁶ Uteno`ae, tuhte lanze pawtemou? Nanning nynh pynkheihlan na thua he vae oh ze, Sam law a mue paw, ccangpyanaw a mue paw, ccangpaw bya a mue paw, byaphy a mue paw, asuilan leihthyanaw a mue paw lu raveih na um oh. Pawpaw balyn tuh thawzung tynsah nawlan cyi thua sah. ²⁷ Lukhakheit nynh ccangpaw bya a ho ze, luning, khyh ze alunghua luthung cih`ae sah, te lukheit koute lukheit ho`ae sah; te lukheit nynh asuilan leih sah. ²⁸ Thuasalama asuilan a leihtu a um khyh lanze tuh-e paw tuh kriccawbu kya daebabilan um sah lah amaw te amaw kalan te Pachia kalan palia ho sah. ²⁹ Profeh`ae luning khyh ze luthung nynh ho`ae sah lah mingccang`ae nynh hoyte tuase`ae sah. ³⁰ A pe dahung paw mingccangpaw kalan ccangkhakheit phypya athua ze, masaty a ho paw kha daebabilan umhin sah. ³¹ Pawccecize balynte ccangku kho athua nawlan, balynte thawzungpya athua nawlan, nanning balyn nynh lukheit koute lukheit profehbya na ho kho oh. ³² Te profeh`ae kya-e muisaw`ae tuh profeh`ae zakaw nynh a um. ³³ Pawccecize mithyaa`ae kya-e kriccawbu`ae balyn kya athua hawte, Pachia tuh nua-ihnua-aepaw a umsah paw thua khyh, thuasalama daenaw umsah paw nynh thua. ³⁴ Kriccawbu`ae kya nae nopi`ae tuh daetedae lang um`ae sah; pawccecize minmin tuh bya ho lan kaw ua thua khyh. Thuasalama Kawbya nynh mah a ho hawte zakawsangsakuh`ae sah. ³⁵ Te minmin nynh ccangkhakheit a ccangkury`ae ze, innvaw kya mih vawpaw`ae kha khiakuh`ae sah; pawccecize nopi`ae nynh kriccawbu kya bya ho lanpaw tuh maethya lan um paw nynh thua. ³⁶ Pachia bya tuh nanning kyate tou yn pou? Tukhyhze nanning kalan kyalya tou yn thua? ³⁷ Lukhakheit nynh amaw te amaw kha profeh lukheit nynh ka thua, tukhyhze muisaw ccungccaw nynh ka thua cite a tuaku lanze, nae kalan ka zei`ae paw hynh Bawipaw kya-e kawpyapaw`ae nynh thua cipaw kha la nyh sah. ³⁸ Thuasalama lukhakheit nynh a ny khyh lanze, ny lei mawte la um sah. ³⁹ Tukeiccu, uteno`ae, profehbyaho lanpaw hynh thawmawte peki oh lah ccangpaw bya`ae ho lanpaw kha la khee nan oh. ⁴⁰ Pawpaw balyn tuh ccipapya lante, kou angaekuhlante cyi thua sah.

¹ Tuhlaeze, uteno`ae, phe kae hopya vae oh paw thehoypaw kha nanning bua kae hopya oh; kha-e kha nanning nynh mah na lawkuh oh zah kha-e kya na thadyn oh; ² kae hopya oh paw bya kha nanning nynh accakae paw kya na zyn khyh oh zah varyn na kyngku oh thua ze, nanning tuh kha-e thehoypaw liate khum na thua oh. ³ Pawccecize kae nynh mah ka mue paw kha nanning kalan masaty kae hopyabua oh; tuh-e tuh: Ccathyaa thyhte Kri tuh aening seinaw hanlan a chih cipaw; ⁴ te aning tuh u thua zah Ccathyaa thyhte nin thungnaw kya bua a thothui cipaw; ⁵ te Sefas nynh amaw kha a muih koute luhaw laening nynh a muih`ae cipaw kha nynh thua. ⁶ Tuhkoute, uteno`ae zapangaw lae nynh amaw kha vaekheihte a muih`ae. Tuh-e`ae kyaze alunghua tuh atu cia a hiin ung`ae; thuasalama abang tuh phe ih vae`ae. ⁷ Tuhkoute James nynh amaw kha a muih; oute locceihtu`ae balyn nynh a muih`ae. ⁸ Te nyathyakou, accyh phe alue vae paw kya a pui paw hawte athua paw kae nynh mah amaw kha ka muih. ⁹ Pawccecize kae tuh Pachia kya-e kriccawbu kha a tua a sah paw ka thua keiccuze locceihtu cite ko lan angaekuh bua leipaw, locceihtu`ae lakuze anyaa huapaw nynh ka thua. ¹⁰ Thuasalama Pachia thawccinaw liate nynh kae tuh ka thua thyhte kae ka thua. Te kae yn pya paw a thawccinaw tuh alakaw thua khyh. Thuasalama locceihtu`ae balyn laeze kae tuh thawte rya ka lah hua, tuhzemah kae ka thua khyh, thuasalama kae ka kya a um paw Pachia thawccinaw nynh thawte ryalah. ¹¹ Tukeiccu kae thuasah, minmin thuasah, tuhte kaening nynh phung kae ho, te nanning nynh na zyn oh. ¹² Atu Kri tuh a chih`ae paw kyate a thothui cite Kri kong kha ho athua ze, a chih`ae paw thothuinaw um khyh cite nanning lakuze abang nynh pawccemou a ci`ae? ¹³ Thuasalama a chih`ae paw thothuinaw a um khyh lanze, Kri tuh thothui khyh cinawpaw nynh thua. ¹⁴ Te Kri tuh a thothui khyh lanze, kaening nynh phung kae ho paw tuh accakaepaw, te nanning zynnaw mah accakaepaw nynh thua vae. ¹⁵ Athua, kaening tuh Pachia kya-e ahme leipaw ccaekia`ae lang nynh oun muih vae`ae; pawccemacize, a chih`ae paw tuh a thothui khyh`ae ccaccing ze, Pachia nynh Kri kha thosah khyh cinawpaw, Pachia nynh Kri kha a thosah vae cite kaening nynh Pachia kong ccaekia kae khan. ¹⁶ Pawccecize a chih`ae paw tuh a thothui khyh`ae ze, te Kri tuh thothui vae khyh. ¹⁷ Te Kri tuh a thothui khyh ze, nanning zynnaw tuh accakaepaw nynh thua vae; nanning tuh nae seinaw`ae kya nynh phang na um ung oh. ¹⁸ Oute Kri kya a ih vae`ae paw mah arohhang vae`ae. ¹⁹ Atu e hiinnaw kya kyalya aening nynh Kri kya ngaehoinaw ah hoi oh lanze, ccungccaw`ae balyn kyaze aening tuh ngaethya-um huacce`ae paw nynh ah thua cih oh. ²⁰ Thuasalama atu Kri tuh a chih`ae paw kyate thothui zah a ih vae`ae paw kyaze masaty athae lang phe a tang vae. ²¹ Pawccecize ccungccaw liate chinaw tuh yn thua hawte, a chih`ae paw thothuinaw mah ccungccaw liate nynh yn thua. ²² Pawccecize Adam kya ccungccaw balyn a chi`ae hawte, Kri kya ccungccaw balyn hiinsah athua cih`ae. ²³ Thuasalama ccungccaw miakaw amaw ccyh kya a thua cih; Kri tuh masaty athae nynh thua, tuhkoute Kri he yn thua vae ze, Kri kya-e ccungccaw`ae a tho cih`ae. ²⁴ Oute Kri nynh uknaw balyn, te kawhoinaw balyn, te thungnaw kha marya he a tae koute, peenaw kha Paaw Pachia kalan he a ah koute laephi she athangnaw yn thua vae cih. ²⁵ Pawccecize rhaw`ae balyn kha a ccuphe kaw a nung kou cia, Kri nynh a uk hahe cih. ²⁶ Ro athua cih paw nyathyakou rhaw tuh chinaw nynh thua. ²⁷ Pawccecize, “Pachia nynh pawpaw balyn kha Kri ccuphe kaw marya a nung.” Thuasalama, “Pawpaw balyn kha amaw zakaw a nung,” cite a ho paw kya, pawpaw balyn amaw zakaw a nungtupaw tuh umbua khyh cipaw alangkuh. ²⁸ Te pawpaw balyn tuh Kri zakaw umsah he athua te, pawpaw balyn kha amaw zakaw a nungtupaw Pachia tuh tynre balyn kya tynre athua nawlan Ccapaw amaw mah Paaw a zakaw umsah athuabua cih. ²⁹ Tukhyh lanze, a chih`ae paw tuh kharyh a tho khyh`ae ze, a chih`ae paw hanlan baptisma-in`ae paw tuh pawte cyih vae cih`ae? A chih`ae paw hanlan pawccemou minmin nynh baptisma-in`ae te? ³⁰ Te pawccemou kaening so suimilan ccyh takyh vawsawrunaw kya kae thadyn? ³¹ Ah Bawipaw Kri Jesu kya ka hoi paw, nanning kya ka pookunaw liate kae tuh nin takyhte ka chih cite tyntetyn lang ka ho ngan. ³² Efesa khuapi kya ccungccaw cyisahnaw lante kae tuh sarepaw`ae ryte kae douku ze so, ka hanlan pawmou athane cih? A chih`ae paw tuh a thothui khyh`ae ze, “Aening ae oh sih lah neih oh sih, pawccecize awkhualan ah chih cih oh!” ci hawte nynh thua vae. ³³ La lingsakuh nan oh: “Ahoy leipaw ry mungkupaw nynh ahoypaw ziazae kha a rosah.” ³⁴ Dingnaw kalan tho ccavae oh lah sei nan vae oh; pawccecize abang nynh Pachia nynaw hoi khyh`ae. E hynh nae maethya ccaw cite nynh ka ho. ³⁵ Thuasalama, “A chih`ae paw nynh pawtemou a tho cih`ae? Pawtahawpaw pyn te mou minmin nynh oun langkuh cih`ae?” cite lukhakheit nynh a ci cih. ³⁶ Nang mingaeepaw, na ccou paw ccacii nynh a chi khyh lanze, hiin lan khyh. ³⁷ Te ccacii na tu vae ze, yn um lanpaw a pyn kha na tu khyh, thuasalama chanvui thuasah, ccangpaw ccacii thuasah ccacii maw kha nynh na tu. ³⁸ Thuasalama Pachia nynh a ry hawte pyn kha a pya, ccacii miakaw kha amaw aphin thyhte pyn kha a pya. ³⁹ Ngesaw balyn tuh alokuhpaw ngesaw cci thua khyh; thuasalama ccungccaw ngesaw phin kheit, rangsaw`ae ngesaw phin ccangpaw, ngasaw`ae ngesaw phin ccangpaw, te pavaw`ae ngesaw phin ccangpaw nynh thua. ⁴⁰ Vaawran te asekuhpaw pyn`ae um zah laephi te asekuhpaw pyn`ae mah a um. Thuasalama vaawran te asekuhpaw phu-enaw tuh phin kheit thua zah laephi te asekuhpaw phuenaw tuh phin ccangpaw nynh thua. ⁴¹ Khuanin phu-enaw phin kheit, sawpaw phu-enaw ccangpaw, te awsi`ae phu-enaw mah ccangpaw nynh thua; pawccecize awsi ccangkheit te ccangkheit phu-enaw kya alae. ⁴² Tuh-e hawte nynh a chih`ae paw thothuinaw mah athua. Pyn tuh aroh khopaw kya ccou thua zah aroh kho leipaw kya nynh thosathui athua. ⁴³ Sawtua leinaw kya ccou thua zah phu-enaw kya thosathui athua. Nyaanaw kya ccou thua zah thungnaw kya thosathui athua. ⁴⁴ Puikhaepaw pyn kha ccou athua, muisaw pyn kha thosathui athua; puikhaepaw pyn um zah muisaw pyn a um. ⁴⁵ Tukeiccu, “Masaty ccungccaw Adam tuh a hiinpaw ccungccaw lang yn tang,” cite azeikuh. Nyathyakou Adam tuh hiinnaw a pya paw muisaw nynh thua. ⁴⁶ Tuhzemah muisaw pyn hynh masaty thua khyh, thuasalama puikhaepaw pyn nynh a umty, tuhkoute nynh muisaw pyn tuh a um. ⁴⁷ Masaty ccungccaw tuh laephi kyate thua zah laenoi te rae paw nynh thua; luningnaw ccungccaw tuh vaawran kyate a um paw Bawipaw nynh thua. ⁴⁸ Laephi ccungccaw`ae tuh laephi ccungccapaw hawte nynh thua`ae. Vaawran e`ae mah vaawran kya-e paw hawte nynh thua`ae. ⁴⁹ Te aening tuh laephi muinsan ah ke oh hawte, vaawran ccungccapaw muinsan mah ah ke cih oh. ⁵⁰ Uteno`ae, chiisaw nynh tuh Pachia peenaw kha rhoccou kho lan khyh cite atu e hynh kae hopya oh; aroh khopaw nynh aroh kho leipaw kha rhoccou kho lan khyh. ⁵¹ Dotua oh, byakhupaw ccangkheit kae hopah oh: Aening ah balynte marya i lei lan, thuasalama aening balyn tuh ⁵² nyathyakou mungkae yn ccae te, sosohtari kya, mitsiphalah kya marya rulae ah thua cih oh. Pawccecize mungkae roi yn ccae cih zah a chih`ae paw kha aroh kho leipaw kya thosathui thua cih`ae zah aening tuh rulae ah thua cih oh. ⁵³ Pawccecize hynhe aroh khopaw nynh aroh kho leipaw khate a ccaanku hahe ho zah hynh-e a chih khopaw nynh a chih kho leipaw khate a ccaanku hahe aho. ⁵⁴ Tukeiccu hynh-e aroh khopaw nynh aroh kho leipaw khate he a ccaankuh te, hynh-e a chih khopaw nynh a chih kho leipaw khate he a ccaankuh vae te tuh, “Chinaw tuh taenaw nynh po a laang vae,” cite azeikuh paw Ccathyaa tuh accing vae cih. ⁵⁵ “Pou chinaw, na zunghe tuh teisangmou a um? Pou Hades, na taenaw tuh teisangmou a um?” ⁵⁶ Chinaw kya-e zunghe tuh seinaw nynh thua; te seinaw kya-e thawzung tuh kawbya nynh thua. ⁵⁷ Thuasalama ah Bawipaw Jesu Kri liate aening taenaw yn pyatupaw Pachia kalan lungtuabya ho thua sah. ⁵⁸ Tukeiccu ka sungsahpaw uteno`ae, Bawipaw kya nae ryalaw tuh alakaw thua khyh cipaw kha nyte, tynkaring lang, nue kho um lei lante um oh lah Bawipaw rya kha pei lah oh.

¹ Atu mithyaa`ae hanlan khoipyapaw kong lante, Galati ram e kriccawbu`ae kalan kaw ka pya vae`ae hawte nanning mah la cyih bua oh. ² He kae thua te khoi lanpaw a um vae khyh ccaw, lonaw kyaze masaty nin khe nanning milu raveih nynh hythua na ccou oh thyhte nae kya-e kha ccangte la nung oh lah la khoi oh. ³ Te he kae thua te hunghung zemah ccaw te naw na ccawkhae oh paw kha nae lasung cciakhae khylan Jerusalem lang ka saw cih`ae. ⁴ Te kae mah ccia lan accan ze, minmin tuh kamaw ryte a cceihbua cih`ae. ⁵ Atu Mesidonia ram po he ka khung koute nanning kalan kae thua cih (pawccecize Mesidonia ram kha po kae khung cih). ⁶ Te ka khuaccungnaw kya, teiteilang ka ccia zemah nanning nynh nae cciakhae ccaw oh, nae kya ka um ze ka um cih, tukhyhze khoccihsaw hei nanning ry po ka um kho. ⁷ Pawccecize laanpi kya atu nanning kha hung kae muih ry khyh oh; thuasalama Bawipaw nynh yn ua ze, nanning ryte khaw umkheih lan ka ngaehoi. ⁸ Thuasalama Pentikos poi kyacia Efesa khua kya kae um ung cih. ⁹ Pawccecize alepipaw te athanepaw thuakaw tuh kamaw elan hungpya athua, te rawsetu`ae mah patae a um. ¹⁰ Te Timote nae kalan yn thua ze rinaw um leite aning tuh nanning ry a umbua ccaw la raeringkuh oh; pawccecize aning tuh kae hawte Bawipaw ryalaw a lah paw nynh thua. ¹¹ Tukeiccu hung nynh sanmah amaw kha dothatheih nan sah. Thuasalama aning nynh kamaw kalan yn thua nawlan, a khuaccungnaw kya daebabilan amaw kha oun saw oh; pawccecize uteno`ae ryte yn thua lanpaw amaw kha phang ka ngaw. ¹² Te kae unopaw Apollos konglang tuh uteno`ae ryte nae kalan yn thuabua ccaw cite thawte amaw kha ka hopah, thuasalama atu ccyh lya tuh aning nynh thua lan kharyh ry khyh; tuhzemah accyh he yn ccanthya te yn thua cih. ¹³ Raeringkute ngawdo oh, zynnaw kya tynkaring lang thadyn oh, pise`ae hawte nae rawthung sah, nae thawsae sah. ¹⁴ Pawpaw balyn kha nanning nynh sungsakunaw te cyih oh. ¹⁵ Uteno`ae, Stefanas a innbyn`ae tuh Akhai ram kyaze masaty thae paw athae`ae thua zah minmin tuh mithyaa`ae kya-e ryalawnaw kalan mimaw te mimaw kha a pyakuh`ae cipaw na ny oh. ¹⁶ Khatahaw`ae paw kalan, te kaening ryte ryalaw thawte a lah`ae paw miakaw kalan nanning nynh naemaw te naemaw kha na pyaku nawlan oh thawte kae ngia oh. ¹⁷ Stefanas, Fortunatas te Akhaikus oun thua`ae paw kong ka lungtua. Pawccecize nanning kalan te na bou oh paw kha minmin nynh a pya`ae. ¹⁸ Pawccecize minmin nynh ka muisaw te nae muisaw kha bua thawmuinsah`ae. Tukeiccu khahtahawpaw ccungccaw`ae kha nanning nynh la luung oh. ¹⁹ Asia ram-e kriccawbu`ae nynh nanning kha ae beihlang oh. Akuila te Prisilla nynh mih innbyn kya um paw kriccawbu ryte Bawipaw kya nanning kha thinlung ccaccingte ae beihlang oh. ²⁰ Uteno`ae balyn nynh nanning kha ae beihlang oh. Athyaapaw myngkupaw te lukheit te lukheit beihlangkuh oh. ²¹ Kae Paul kya-e beihlangnaw tuh kamaw ka kuih te nynh ka zei. ²² Lukhakheit nynh Bawipaw Jesu Kri kha a sungsah khyh lanze, aning tuh thyalaw thua sah. Maranatha. ²³ Ah Bawipaw Jesu Kri kya-e thawccinaw tuh nae kya la um sah. ²⁴ Kri Jesu kya kae sungsanaw oh paw tuh nae balyn tungvaw la um sah. Amen.