TIT

TIT

¹ Íñje Pool ikiñje fee, íñje aroka ite Atambatun, n’apotor yooŋ toko ite Yesu Kiris. Atambatun aboñamboñ kaanuku íihin bakan k’ajifane ku kéeyilen te o, abe n’íhiniin kéemeyi múniyo mu kaanuku man ni kabaj buroŋ beetoofo. ² Iyu, n’uŋu bukuuriin kaanuku boko kabaju buroŋ béehabanaariit bu. Huta hu t’etaam i éwuwanoorutee, Atambatun éejuusaariit u asokasok aane o kawunu úne buroŋ bondu. ³ H’aamo hu hífiiteniin hu hireeŋa, Atambatun Afakana ite úne n’áhin Hirim hoone héemeyiee. Hirim hondu, n’asaanam ho aane isok ho ésuk i. ⁴ Áñuumo Tit, íñj’endu ti kákiñjini eleetar yende. Awe a̱amo fu añiam nu múniyo, ábuki á̱yilenayilen ti Kiris naane íñje. Atambatun Faaf u, ni Yesu Kiris Afakana ite úne kaja kásoniyani, abe ni kawuni káasuumaay. ⁵ Iwasiwas Kiret kaanuku a̱ahabanoor beeŋeñene bu, abe ti hikinu-kinu fe ti kéeyilene kaamo, n’a̱siiŋan bakan kéeyemi sifaaf sooniin. Á̱baŋino kaanuku ibinabina eeni: ⁶ faaf ite kéeyilene awarut kabaju bike b’an ayino kawatano te bo; anaare afeeneŋ taŋ a aware fu kabaju; bakañio kawarawar kajoku bítim bu, abe kuruwu kooniin itim kúbujo iŋi kajakaate, man yooŋ iŋi kájeŋginaate an. ⁷ Hikaw hite kéeyilene ku af’atofotoor burok bite b’Atambatun; iŋ’ite ho aamo fu awarut kabaju bike b’an ayino kawatano te bo. Awarut biyitooro, awarut kahilu ti kayiŋat, awarut káwusan, awarut káyemi aloba, atum’aŋes yooŋ kabaju sírirem seekuurut. ⁸ Bare awarawar kajoku áwariee emoosoora i kiŋki kabin te o, abe n’ámaŋi meejake mu. Awarawar iŋi kayinoor ajakee, n’áyemi an éejube, an eenabe, abe n’aŋ’ájokumooro. ⁹ Awarawar kajoku alitee ti hirim hite hu nu múniyo, heeriibe hu ni b’aliikenee bu. Af’áhin bondu, n’aŋ’áyini kayaŋganan bakaaku kikaw ti bamb’aliikeniin beejoŋoore bu. N’aŋ’áyini yooŋ káwufoor kiŋki kateñeko hirim hu te naŋ ti katine fu. ¹⁰ Abajeebaj bakan keehooje kájeŋginaariit an, áhaŋum t’Esuwif i keeyoosee ku bítim bite Kiris. Iŋi kabuut ésuk i ni kirim kooniin keeñunut ku. ¹¹ Kawarawar kakumbiee ñutum, ábuki iŋi kayeeñooran kaanas ñeeba ti kaliiken kite ésuk i beejarut bu, kaanuku taŋ keebaj sírirem si kásuwatut. ¹² An ite Kiret humuumo, ake t’eyiŋana yeeniin anoŋke fu eeene: «Bakate ku Kiret kafiyaa ti haajuus, boko bíndakakureŋ béefetie, boko biñek, burokiin buñoofo taŋ.» ¹³ Abe b’asoke bu bite toko. Iŋ’ite ho aamo fu a̱kamoor tu boko ásuf man káyilen kooniin nu kujoŋoor. ¹⁴ Kawarut kajamatan kúsuwanooru kite Esuwif i abe n’aane báhamin. Kawarut yooŋ kájeŋgin buluwa bi háyine hu kéewuŋge ku múniyo mu kiñaawu kanoŋke bu keesiiŋan. ¹⁵ Bakan keekuure, doon fe dukuurakuur tu boko; bare bakan keekuurut, abe yooŋ káyilenut, doon fe dukuurut tu boko. Ábuki biyinoor booniin bubuubatabuubat, ni sihel sooniin fe. ¹⁶ Iŋi kaane kámoomi Atambatun, bare kinij kooniin kúwufoorawufoor kaanuku tókoiit. Káhuufunanahuufunani, kájeŋginaariit Atambatun, abe yooŋ kayinaat káhinu mayet bifeeneŋ beejake.

¹ Tit, awe bare a̱liiken ésuk i beeriibe bu ni beeliikenee bu beejoŋoore bu. ² A̱ane háyine hu keehaane ku itim’iŋi káwusan; káhin ajakee, kayinoor yooŋ ajakee, kajok alitee ti káyilen ku, ni kámaŋi ku, ni kámuñu ku. ³ A̱ane yooŋ haare hu keehaane ku kabaj buroŋ beetoofe Atambatun. Kawarut kasoku t’an, itim káyemi yooŋ búsukateen bite ehob. Kawarawar iŋi karimu ésuk i ajakee. ⁴ Ifi káhin ii, n’iŋi kaliiken toko yooŋ éfur i kámaŋi bákayiniin ni bakañiiin, ⁵ ni kayinoor ajakee, abe ni kakuur. Kawarawar kaliikeniin yooŋ kajokoor sunuuf sooniin ajakee, ni káyemi bakan keejake, abe ni kájeŋgin bákayiniin man an atum’abin asok beejakut ti hirim hite Atambatun. ⁶ A̱ane yooŋ húbaakiit hu iŋi kayinoor ajakee. ⁷ Awe humuumi a̱warawar iŋi káhinu ajakee tu buroon bu fe man ésuk i n’éhin naane awe. Af’á̱yemi ti kaliiken ésuk i, á̱habann eheli, abe n’a̱sok báhamin beeñune. ⁸ A̱sok kirim kéejube k’an ayinaat kawaaŋatoor. Af’á̱hin ii, enatoora íiwe n’iŋi kafuño, ábuki iti kabaj beejakut bite kasoku t’úne. ⁹ Búsukateen bu kawarawar kájeŋgin bakan kéekiniiin ku, abe ni kaŋes katoofiiin tu dóonodoon fe. Kawarut kajeeŋoor nu boko, ¹⁰ kawarutiin yooŋ kákuwat doon. Bare káyemi kep bakan keejake, abe doon fe di kasoke, ni káhin do. Ifi káhin iyu, ésuk i kasoku beejake tu bumb’úliiken bite b’Atambatun Afakana ite úne. ¹¹ Atambatun áwufoorawufoor ésuk i kajaku koone kéeyinie ku kafakaniin kareyi fe. ¹² Kajaku koone kiliikenaliiken úne kawasu buroŋ beejakut, nu wúfaŋi wute t’etaam ye, kaanuku man n’úyinoor ajakee hahiye, n’úbaj yooŋ buroŋ beejoŋoore, abe nu bújub t’Atambatun. ¹³ Iyu u úware fu kanahan hunak heetoofe hu h’úyakare hu. Hunak hondu, Yesu Kiris Afakana ite úne, eeemo u Atambatun eehahe u, bibin káanikin naane. ¹⁴ Awunawun buroŋ boone iŋ’ite h’úne, kaanuku eefakan úne ti meejakut fe, abe n’akuuran úne. Iyu, n’uŋ’útumb úyemi bakan koone kéeñiŋkaane ti káhinu buroon beejake taŋ. ¹⁵ Bonde b’a̱ware fu kaliiken ésuk i. A̱yaŋganan kikaw kiŋki kajamatani, abe kéejeŋginaariit ku, n’a̱kamoor tu boko. Á̱hin bondu ayan faŋ, abe atum’a̱was an tu boko eesooŋi.

¹ Aŋ’á̱baŋinan kéeyilene ku kaanuku kawarawar kajamu ti keeemo ku t’éŋguur i fe. Kawariinwar kájeŋgin, abe ni kafare káhinu buroon beejake bu fe. ² Itim kasok t’an beejakut, itim yooŋ káyemi eloba, bare káyemi bakan kéeneenie, abe ni káwufoor ésuk i fe kunoŋk keejake. ³ Ábuki hítiyar hu, úne yooŋ úbajut kikaw, újeŋginaariit an, abe úmoomi naane bakan keehiile. Úne yéeni búsukateen bite wúfaŋi weejakut wánowan, ni katoofu kánokan. Úkinaanakinaani ti bánafut ni bíhiñanoor. Uŋ’úhuuf bakaaku, ni kahuuf úne yooŋ. ⁴ Bare Atambatun Afakana ite úne n’áwufoor úne kajaku koone, nu buŋ b’ámaŋie fu húŋgowulan ariike. ⁵ N’afakan úne, káanukiiit man aŋarkeyi naane úne úhine ajakee, bare aŋarkeyi naane am ayubiyene úne. Ti sembe site Búwejet Beenabe bu t’añawe fu úne. Búwejet Beenabe bu ifi bíhin n’úbukee ti kátiyar, abe nu buwun úne buroŋ bíyeni. ⁶ Ábuki Atambatun awunawun úne Búwejet Beenabe bu ahahan, áŋaasann bo ti Yesu Kiris Afakana ite úne. ⁷ Náami makamu ti kajaku koone áhinahin úne núujub, úne káyini kabaju buroŋ béehabanaariit bu b’úyakare bu. ⁸ Hirim honde héewoore. Ímaŋamaŋi a̱sooñoor tu bonde b’isoke bee, man kéeyilene ku t’Atambatun ni kanaŋ toko kikawiin iŋi káhin buroon beejake. Bondu bijake fu tu húŋgowulan, abe ni bíñjeriŋo. ⁹ Bare a̱tey síjeeŋoor seeñunut su, ni báhamin bu uŋu kuruwu kite sifaaf site kóŋkeyin, ni síheñjeŋoor su, man yooŋ síñakoor su tu buroon bite Eluwa yite Moyis. Bondu fe bijarut, abe bibajut éñjeriŋ. ¹⁰ An aŋ’ayeeñooran kéeyilene ku, a̱jab á̱yeegalo hifeeneŋ, bija kúsuba, abe n’a̱tik a̱nuutano. ¹¹ Á̱moomi kaanuku an naane ondu awasawas bítim beejoŋoore bu, abe wuhoofoor woone wúwufoorawufoor kaanuku ondu t’ébaani. ¹² Íñje káboñini Artemas man yooŋ Tisik. An u af’áreeŋin, n’aŋ’á̱hin wáhowah a̱abin á̱ŋaabeinam Nikopolis, ábuki íhabaneino kaanuku iija íihin bo haajam hu. ¹³ Á̱hin wáhowah yooŋ á̱ayokunan Senas ite u ti kiŋki kákotin báhamin bu, n’Apolos, kaanuku man doon itim dijahaliin ti kátuki kooniin. ¹⁴ Bakan wane yooŋ kawarawar káñiŋkaan keeliiken káhinu buroon beejake, kaanuku man ni káyini káyokunan keebaje ku bisawula bómbokun. Ifi káhin iyu, n’iŋi káñjeriŋ ti dike doon. ¹⁵ Keeemo ku n’íñje fe kasaafi. A̱saaf bákawiy úne kéeyilene ku. Atambatun aja ásoniyanuun arireyi fe.