2 TESALONIK

¹ Íñje Pool, ni Silas, ni Timote, írikiñjinuun fee, aruun bakate ku Tesalonik kéeyilene ku, aruun k’Atambatun Faaf úne, n’Anahaan u Yesu Kiris kakino ku. ² Atambatun Faaf u n’Anahaan u Yesu Kiris kaja kásoniyanuun, abe ni kawunuun káasuumaay. ³ Kújakuwe, iriwarawar kaanu Atambatun ko kireyi fe eyeehen uŋu hoonuun hu. Abe ajakeejak naane ii írihin iyu, ábuki káyilen koonuun kihaŋa bija hágila, abe kámaŋioori k’árimaŋioorie ku kondu ti kahaŋu kayanu. ⁴ Iŋ’ite ho h’if’irisaŋgoor uŋu hoonuun hu ti bakaaku kéeyilene ku. Ábuki naane aa arijuk sílaam bija yooŋ kúnuur fe, arijokajok alitee ti káyilen koonuun. ⁵ Bare sílaam sondu káwufoor kaanuku Atambatun aŋ’ajoonan ésuk i ajoŋooree. Ábuki fu naane aamo i aŋ’arijuk sílaam, Atambatun káhinuuun áriiyemi bakan bakate nu múniyo, buroŋ boonuun beeriib ni jáyi joone. H’arijoke hu te jo híkinineŋe fu n’aŋ’arijuk sílaam. ⁶ Múniyo Atambatun káhinu beejoŋoore: o káhihinoor kiŋki káhihinooruun. ⁷ Abe o káyihinanuun, aruun kaŋk’arijuk sílaam su, n’uni yooŋ fe. O káhinu bo kane Anahaan u Yesu áŋaasin tu bufor bu, akina n’emalaka yeene bakate sembe su. ⁸ O bibin ti kaañen kómbokun kaanuku eenij ásuf ti kéemaŋiit ku kámeyi Atambatun, abe n’iŋi kateñeko káhinu naane Hirim Heetoofe hite h’Anahaan ite úne Yesu Kiris husoke i. ⁹ Kúnuur ki kaja ku kajuku keemo fu konde: boko bútowuto hiraanu, keekamboor sat n’Anahaan u, ni sembe soone séenike su. ¹⁰ Bondu kabaju hunak h’Anahaan u abin hu te ho. Hunak hondu, o bíbatikeina kaanuku bakan k’akino ku fe kéenikano; aamo fu kéeyilene ku fe kasokorooro. Aruun yooŋ káyemi nu boko, ábuki áriyilenayilen hirim h’irisokuun hu. ¹¹ Iŋ’ite ho h’if’irilaw ko kireyi fe bija t’aruun. Iŋ’irilaw Atambatun ite úne kaanuku man n’áhinuun áriiyemi bakan bakate nu múniyo, buroŋ boonuun beeriib ni naane ámaŋie i h’aruwuun hu. Áyokunanuun yooŋ ni sembe soone áriiyini káhinu meejake m’árimaŋie mu, nu burok b’ariemo bu te bo aŋarkeyi naane áriyilenayilen te o. ¹² Iŋ’irilaw bondu kaanuku man ésuk i fe n’esokoroor huruwu hite Anahaan ite úne Yesu uŋu hoonuun hu, abe ni kasokorooruun yooŋ uŋu hoone hu. Bondu kabaju aŋarkeyi naane Atambatun ite úne, n’Anahaan u Yesu Kiris kásoniyanuun.

¹ Kújakuwe, ti bite bíbatikeina bite Anahaan ite úne Yesu Kiris, nu bukuukanooro bite b’úne ne o, iriilawuun bonde: ² bakaake ifi kaanuun hunak h’Anahaan u ábatikein hu te ho hireeŋa, siheluun sija sibeb, atum’áriyileniin. Hutoof yooŋ ake ayiŋanuun bo tu huruwu hite Atambatun, man yooŋ n’awaareuun bo, man yooŋ ni kaanuun irikiñjakiñj bo t’eleetar, atum’árikoleyi. ³ Atum’ariwas an eebuutuun t’efehe yánoyan. Ábuki bala hunak hondu hireeŋ, bakan keehooje kajabu kárahan t’Atambatun, abe Ánafuta u eeware u bútowuto hiraanu n’atik áŋaasin. ⁴ O kajeeŋan doon fe deenabe, nu doon fe déesukaayee. O kaanu ahaŋahaŋ bokondu fe. O bija ayak ayooso t’Enuuf ite Atambatun eeriiko toko, abe n’aŋ’aane akina humuumo aamo fu Atambatun. ⁵ Isokuunsok bondu h’íyemie hu t’aruun, áribaŋineit? ⁶ Abe bare árimoomi beekoleno bu béekinineŋe bu h’ata h’abin kane arko taŋ ewahatu yeene ereeŋe. ⁷ Sembe séenuusee site Ánafuta u sondu tu burok kep. An eekolene u Ánafuta u af’aja ayak abin áami anuutanee, ⁸ Ánafuta u n’aŋ’áŋaasin, abe Anahaan u Yesu n’aŋ’áwuur te o eeyoolo. O kátumbu ábujarooroo ni meejaaŋe meeyak mu káriboorina ne o kane ábatikein. ⁹ Ánafuta u bibin ni sembe site Setani, abe o káhinu buroon bómbokun beehaŋe ésuk i kikaw kaanuku eebuutiin. ¹⁰ O káhinu buroon bánoban beejakut kaanuku eebuut keeemo ku tu bútowuto. Abe bokondu tu bútowuto ábuki múniyo meewariin mu yéeni kafakan, káfeŋginut mo ñúwejet ñooniin. ¹¹ Bondu bíkinineŋe fu Atambatun n’áboñiniin búwejet bite kahiilaniin kayak iŋi káyilen haajuus hu. ¹² Náami kéeyilenut ku fe tu múniyo mu, abe n’iŋi kabaj katoofu kooniin ti meejakut mu kajoonanee. ¹³ Kújakuwe, iriwarawar kaanu ko kireyi fe Atambatun eyeehen uŋu hoonuun hu, aruun k’Anahaan u ámaŋie ku. Múniyo Atambatun ajifanuunjifan kaanuku áriiyemi étiyar i ti kafaku ku. ¹⁴ Bondu bibajabaj aŋarkeyi naane áriyilenayilen tu múniyo mu; bibajabaj yooŋ ti sembe site Búwejet Beenabe bu, béehinuun bu áriiyemi bakan kite Atambatun. ¹⁵ Náami kújakuwe, arijok alitee, abe n’arinaŋ ti kikawuun b’irijoŋoore bu n’aruun iriiliikenuun, man yooŋ b’írikiñjinuun bu. ¹⁶ Atambatun Faaf úne ámaŋamaŋi úne, abe ti kajaku koone n’ayaŋganan úne kikaw ko kireyi fe n’eyakar yeeyane. Uni bokondu ti kalawu Anahaan ite úne Yesu Kiris humuumo, n’Atambatun Faaf úne ¹⁷ man ni káyokunanuun ariijok alitee, abe ni kawunuun sembe aŋ’árihin ko kireyi fe meejake, abe n’aŋ’arisok yooŋ beejake.

¹ Hahiyu kújakuwe, arilaw bija t’uni man hirim hite Anahaan u ni hijamo ahilee, abe tánotan fe nu hujokee, naane aa árihin t’aruun. ² Arilaw yooŋ man Atambatun n’ajukar uni ti bakan keejakut ku abe ni kánafut. Ábuki ésukiit ereyi éyilene fu t’Atambatun. ³ Anahaan u áwasaariit hirim h’asoke; o kawunuuun sembe, abe n’ajukaruun ti Setani. ⁴ Anahaan u áhinahin kikaw uni keeyaŋg uŋu hoonuun hu. Bukuurakuur uni kaanuku aŋ’árihin naane ii irisokuun, abe aribaa yooŋ káhinu bo. ⁵ Anahaan u Yesu Kiris aja ajoŋooran siheluun, éehinuun aŋ’árimuñ naane akina, abe n’áhinuun áriimaŋi yooŋ Atambatun. ⁶ Kújakuwe, uni bokondu ti kasokuuun bonde tu huruwu hite Anahaan u Yesu Kiris: arikamb kéeyilene ku keeemo ku biñek, abe n’iŋi kateñeko yooŋ káhinu b’iriliikeniin bu. ⁷ Aruun kumuumuun árimoomi akuur but buŋ b’ariware fu káhinu ariiliikool n’uni. H’íriyemie hu t’aruun íriñekiaariit. ⁸ Iriñoofeit t’an fuufu. Aaa, iŋ’irirok burok beeniŋe kaajiŋgan ni káajiim kaanuku an t’aruun atum’álaam t’uni. ⁹ Hih’írihin iyu, káanukiiit man uni iriwarut kabaju t’aruun doon, bare uni írimaŋiuun káwuforoor bija tu kuwaatu. ¹⁰ Múniyo h’íriyemie hu t’aruun, irisokuunsok bonde: «An afut’ámaŋi burok, awarut yooŋ buñoofo.» ¹¹ Irisokuunsok bonde ábuki irijamajam kaanuku bakaake t’aruun biñek, károkaariit doon fe, tiŋkan buyooso ti bi kakolut bu ne bo. ¹² Bakan kondu, bonde b’irisok fu nu boko tu huruwu hite Anahaan u Yesu Kiris: karok ti káasuumaay keenoŋk kéekuumanooro. ¹³ Kújakuwe, aruun bare, atum’ariene árilaamalaam káhinu kite meejake mu. ¹⁴ Ake t’aruun afut’áhin naane irisokuun ee t’eleetar yende, arirejoor bo, abe n’ariteyo man n’afuño. ¹⁵ Atum bare arijoko naane anatoorauun, bare aririmo naane atuuun. ¹⁶ Yala Anahaan u aa awun káasuumaay ku n’awunuun akina humuumo káasuumaay ko kireyi fe, nu tu doon areyi. Yala Anahaan u n’áyemi n’aruun arireyi fe. ¹⁷ Kasaafu konde, íñje Pool inoŋke fu iikiñj ko n’emoŋiam. Iye if’ihabanoor bileetar búuma bireyi fe. Diye makiñjar múuma. ¹⁸ Anahaan ite úne Yesu Kiris aja ásoniyanuun arireyi fe.