2 PIYEER

¹ Íñje Simoŋ Piyeer aroka ite Yesu Kiris, n’apotor oone toko yooŋ ikiñje fee bakan k’Atambatun awune ku káyilen keeree ni kite k’uni. Yesu Kiris eeemo u Atambatun ite úne, n’Afakana ite úne toko yooŋ awunawun úne káyilen kondu aŋarkeyi naane ájubajub. ² Atambatun aja ahaŋuun kásoniyan, abe n’awunuun yooŋ káasuumaay keefame-fam iŋi naane árimeyiiin i, akina n’Anahaan ite úne Yesu Kiris. ³ Atambatun awunawun úne ti sembe soone doon fe d’úsawulee du kaanuku núuroŋ naane ámaŋie i. Áhinahin úne bondu iŋi kámeyi k’úmeyio ku, akina eeruwe u úne kaanuku núujuk kániku koone ni kajaku koone. ⁴ Iyu a awune fu úne buroon bómbokun béewarie naane afiye i asok aane o kawunu úne bo. Áhinahin iyu kaanuku af’arijok bo, n’arifak tu wúfaŋi weejakut weeemo wu t’etaam ye wuwu wúbuj ésuk i, abe n’aribaj sihel naane yeene i. ⁵ Iŋ’ite ho aamo fu áriñiŋkaan áriiwutiyen manoŋkar meejake ti káyilen koonuun; ti manoŋkar meejake mu n’áriwutiyen toko kámeyi b’Atambatun ámaŋie bu; ⁶ ti kámeyi ku b’Atambatun ámaŋie bu n’áriwutiyen toko bújokumooro; tu bújokumooro bu n’áriwutiyen toko kajoku alitee ti káyilen ku; ti kajoku ku alitee ti káyilen ku n’áriwutiyen toko káhinu naane Atambatun ámaŋie i; ⁷ ti káhinu ku naane Atambatun ámaŋie i n’áriwutiyen toko kajokoor baatiaay; ti kajokoor ku baatiaay n’áriwutiyen toko kámaŋioori. ⁸ Ábuki af’aribaj síjiko sondu, abe nu sulooñ t’aruun, so kákinineŋ kámeyi k’árimeyie ku Anahaan ite úne Yesu Kiris ni kibaj éñjeriŋ, abe nu kubukoor meejake. ⁹ Bare an eebajut u so, ámoomi naane an éefuume; ájukaariit áwariee. Afiilafiil kaanuku Atambatun akuuranakuuran wuhoofoor woone wute wu kóŋkeyin. ¹⁰ Kújakuwe, iŋ’ite ho aamo fu áriñiŋkaan ariijok alitee áriiwufoor kaanuku Atambatun aruwuunruw, abe n’ajifanuun yooŋ. Ábuki af’árihin iyu, at’ariney hikee ti kaahoofoor. ¹¹ Iyu a Atambatun aja fu káfeŋginuun tay wuruŋ wute Jáyi jéehabanaariit ju. Jo jeemo fu jite ju Yesu Kiris Anahaan ite úne, n’Afakana ite úne yooŋ toko. ¹² Iŋ’ite ho aamo fu naane árimeyie i buroon bonde fe, abe yooŋ n’arijok alitee tu múniyo m’arijame mu, ibaa kábaŋinanuun bo ko kireyi fe. ¹³ Ijukerajuker n’eene naane eemo i buroŋ, íñje kábaŋinanuun bo kaanuku man n’áriniyo. ¹⁴ Ábuki ímoomi kaanuku memee n’iŋ’iket, naane t’Anahaan ite úne Yesu Kiris áwufooram du bo. ¹⁵ Íñje káhinu wáhowah kaanuku man kane ibin iket, n’aŋ’aŋ’áribaŋino ko kireyi fe buroon bondu. ¹⁶ H’iribine hu irisokuun kaanuku Anahaan ite úne Yesu Kiris bíbatikeina ni sembe, kúsuwanooriiit kéetuutee k’irisokuun. Bare irijukajuk kahahu koone ni ñíkin uni féet. ¹⁷ Írimoomi ne o ti hirij heenabe hu, kóyin k’Atambatun Faaf u ánikano ku, abe n’asalo yooŋ. Kóŋkeyin, kaaji kite Atambatun eehaŋe u énika kíhaminnahaminn ne o keene: «An onde aamo fu Añi úuma i ímaŋie u. Te o ti hikawam hutoofe fu.» Uni kumuum uni irijamajam kaaji kondu kéenuutina kii t’etiir bufor bu. ¹⁹ Iyu u úhaŋe fu káyilen báhamin b’eyiŋana yite Atambatun kasoke bu. Árihinahin áwari aa ariinaŋ te bo siheluun, ábuki búmoomi naane ejaaŋana yéetife t’ábaanie ayak abin áami hurabu hu hireeŋa, abe kaarabu ku ni kijaaŋan suhol soonuun. ²⁰ Arijab árimeyi jak bonde: an ayinaat káhandin akina humuumo báhamin bite eyiŋana yite Atambatun beeemo bu ti Míkiñjin mu. ²¹ Ábuki an ámusut bunoŋkooro eeyiŋan báhamin bite Atambatun. Bare Búwejet Beenabe bu bitiŋge fu kúŋgowulan ku keeyiŋan báhamin bite Atambatun.

¹ Kóŋkeyin, abajabaj Israyel bakan iŋi karito ni kajuus kaane boko kaamo eyiŋana yite Atambatun. Iyu yooŋ i bakaake kayak fu birito t’etutuun, abe n’iŋi kajuus kaane boko kaamo émuse, bare bi kaja fu kaliiken ésuk i bíteiit nu múniyo. Boko kaliikenuun bite haajuus bite kátowutan ésuk i, abe boko biteñeko yooŋ Ámuse u eejaame u wuhoofoor wooniin. Iŋ’ite ho aamo fu bútowuto booniin káfufu, abe n’aŋ’áami boko kaŋese bo. ² Keehooje kasayiiin ti kiñaawu ti manoŋkar mooniin meejakut mu, kéekinineŋ ésuk i ni kálafatin bítim bite múniyo mu. ³ Émuse yendu, káfaŋi kooniin kite sírirem su káhinu ni kasokuun báhamin bi kanoŋke kéetuut, kaanuku man ni kahoohuun. Bare afiyee naane kajoonan kooniin kisiiŋee i, abe at’ahul bútowuto booniin ni bireeŋ! ⁴ Múniyo Atambatun ayubiyenut emalaka i keehoofoore ku; áfiiteniinfiiten ti kaayeen kéesulie-sulie ku ti kafaakee du t’ébaani i túruk bija tu hunak hite Kajoonan ku. ⁵ Atambatun ayubiyenut yooŋ énafuta yendu bakate ku kóŋkeyin; áhinahin etiir yómbombokun yéenubin tu boko eyak eram etaam i. Bare afakanafakan Nowe aa awaare ésuk i beejake bu, ni bakan yooŋ kaamo hutok ni bákasuba. ⁶ Atambatun ajoonanajoonan yooŋ bakate ku Sodom nu Gomoor; ásufasuf búsuk bondu ni sineemak ayak abin aŋeñen hábumba. Diyu báaluwenum ti bakan keejakut ku, bite káwufooriin beenahan bu nu boko. ⁷ Bare afakanafakan Lot eeemo u ániine eejake. Lot aŋ’ajuk ti manoŋkar meejakut mu mite énafuta i bakate ti kikinu kondu, eholo fe eŋ’ehabano. ⁸ Ábuki hunak heenee hunak, ániine ondu eejake ii, abe n’akin yooŋ nu boko t’afeeneŋ aŋ’ajuk naane ii kanoŋk, aŋ’ajam yooŋ kirim kooniin keejakut ku, asooñen n’átaañian dómbokun ti manoŋkar mooniin. ⁹ Bondu búwufoorawufoor kaanuku Atemit áyinooni kafakan ti sílaam su kéejeŋgino ku, abe n’afin awas keejakut ku kaanuku eebin eenij tu boko hunak hite Kajoonan ku. ¹⁰ O kahaŋu kaniju ti kiŋki kanaban wúfaŋi weejakut wute siniiin, abe n’iŋi kahuuf hiseefaate hu. Bokondu kiŋki kaliiken ésuk i bite haajuus hu kákoleyiit Atambatun, abe yooŋ iŋi kayitooro. Kájeŋginaariit bakate ku t’etiir kéenike ku, bare iŋi kátumb kálafatiniin. ¹¹ Humuum emalaka i kásiiŋaariit tu buhooŋu Anahaan u iŋi kálafatiniin; abe bare kahaŋahaŋ kiŋki kaliiken ésuk i bite haajuus hu sembe fuf. ¹² Bare bokondu iŋi kanoŋkooro kéehin naane bíndakakureŋ béemuusut, bite bibin kajokiee abe nu buyoolee, ábuki iŋi kálafatin bi kámeyiit bu. Boko kayooliee naane bíndakakureŋ bu. ¹³ Kunoŋk keejakut ki káhine ku bakaaku, boko kabatikanee ko. Katoofu kooniin fe keemo fu ni káhin wúfaŋi wooniin weejakut wu mijiniŋga raŋgaw. Ifi káyemi tu buñoofo n’aruun t’afeeneŋ, iŋi kajuusuun kep kikawiin keetoof; abe bondu bútumbatumba búfuñinani t’aruun. ¹⁴ Kikawiin fe kondu ti haare hu, kaanuku man ni kaŋot nu boko. Kálaamaariit hikee ti káhinu kite wuhoofoor wu, abe iŋi kabuut bakan keejokut ku alitee ti bítim bite Kiris. Kabaju sírirem taŋ keemo fu ti kikawiin. Bokondu Atambatun áwuumiinwuum! ¹⁵ Kawasawas bítim beejoŋoore bu, abe ni kátowuto. Iŋi kasa ti hiñaawu Balam ayiŋana u, añi ite Bosoor, akina éemaŋie u ajaamee sírirem éehin meejakut. ¹⁶ Bare abinabina awatanee ti beejakut bondu: ambam eeyinaat u báhamin áhamino fu ni kaaji kite húŋgowulan, eefito ti beeñunut bondu b’ámaŋie bu yéeni káhinu. ¹⁷ Bokondu kiŋki kaliiken ésuk i bite haajuus hu kámoomi naane bísaabun beesaye; kámoomi yooŋ naane bufor b’eyam i eyisaloole. Atambatun afareiinfare báakinum t’ábaanie-baanie du. ¹⁸ Iŋi káhamin báhamin beeñunut bite jímak taŋ, abe n’iŋi kafurukato yooŋ kaanuku man ni kabuut bakan keeemo ku ti kánuutinaiin ti bakaaku keeroŋe ku t’ébaani. ¹⁹ Iŋi kaaniin karoŋut káyemi búsukateen bite eluwa i, abe bare boko kumuumiin búsukateen bite wúfaŋi wu wuwu wútowutaniin. Ábuki huruw-ruw fe ásukateen ite doon deehaŋo. ²⁰ Ésuk i kafakafak tu wúfaŋi weejakut weeemo wu t’etaam ye aŋarkeyi naane kámoomi Anahaan ite úne Yesu Kiris, n’Afakana u yooŋ toko. Bare ifi kasooñ kawas wo weehaŋiin sembe, bihabanooro booniin kahaŋu kajakaate naane kanokoore i hítiyar hu. ²¹ Ahaŋ yéeni kajaku tu boko itim kámeyi bítim beejoŋoore bu, bala kámeyi bo, abe ni káwuŋg kiñaawu eluwa yeenabe i yi kaliikenee i. ²² Beebajiin bu búwufoorawufoor kaanuku bonde beesokee bu bite nu múniyo: «Ékuruk aŋ’asooñ ateŋ doon d’asaje du»; nu bonde yooŋ: «Efuruka aŋ’añawee nu móhujo ahaban, n’aŋ’asooñ ahuruso ti hatef hu.»

¹ Kújakuwe, aruun k’ímaŋie-maŋie ku, eleetar yende ésooboriyan y’íkiñjin fee n’aruun. Tu súsuba su fe, iŋ’íbaŋinanuun b’ariliikenee bu kaanuku man n’arinaŋ tu ñúwejet ñoonuun biyinoor beejoŋoore. ² Áribaŋino báhamin b’eyiŋana yite Atambatun keenabe ku kabine bu kasok kóŋkeyin, n’eluwa yite Anahaan u n’Afakana u yooŋ toko, y’epotor i k’Atambatun áboñinuun ku kaliikenuun i. ³ Arijab árimeyi bonde: tu kunak kiraanu ku, bakan bibin, abe wúfaŋi wooniin weejakut wu taŋ wi kaja fu káhinu. Boko kásuwuuun, ⁴ abe n’iŋi kaane: «Yesu aanut kereŋ akina bíbatikeina? Náami ondu diin? Sifaaf úne kaketa, abe bare doon fe duwayeit huta h’etaam i eŋ’ebin éwuwanee!» ⁵ Bare bike bondu toko bi kanoŋke keefiil: kóŋkeyin, Atambatun asokasok hirim, bufor bu nu búwuwanee, n’etaam i. N’ánuutann etaam i tu móhujo mu, abe nu móhujo n’aroke fu yo. ⁶ Abe nu móhujo yooŋ mite kóyin etiir yómbombokun i n’ábuje fu etaam ite i kóŋkeyin. ⁷ Hirim hondu hoho hite h’Atambatun hujoke fu bufor bite bu hahiye n’etaam i, sineemak su seebin séesuf buroon bondu. Binaŋeenaŋ bija tu hunak h’énafuta i kaja hu kajoonanee te ho, abe ni kátowutanee hiraanu. ⁸ Kújakuwe, aruun k’ímaŋie-maŋie ku, abajeebaj bare bike b’ariwarut kafiilu: t’Anahaan u, hunak hifeeneŋ húmoomi naane simit éñjune, abe simit éñjune ni síyemi naane hunak hifeeneŋ. ⁹ Bakaake iŋi kaane Atemit ákurakuri ti káhinu b’asoke bu, bare tókoiit. Am aŋ’ámuñ n’aruun kep, ábuki ámaŋiit mayet afeeneŋ átowuto. Aaa, b’ámaŋie bu beemo fu huruw fe n’awatanooro wuhoofoor woone. ¹⁰ Hunak h’Anahaan u ábatikein hu te ho káfufu naane ákuw. Hunak hondu, karim kéekolinanie-kolinani kajamiee kane bufor bu bíyemi tu bútowuto, abe buroon beeemo bu te bo kásufiee. Etaam i nu doon fe deeemo te yo kajoonanee. ¹¹ Makamu buroon bu fe iyu i bija fu bútowuto, hahiyu arijuk jak buŋ bu buroŋ boonuun buware fu káyemi! Buwarawar kanabu, abe n’arijok yooŋ alitee t’Atambatun, ¹² aruun ti kanahan ku hunak hoone, aruun yooŋ ti káhinu wáhowah kaanuku heesoŋk heereeŋ. Hunak hondu, sineemak su kásufu bufor bu, abe buroon bite bu t’etiir fe butuuyo. ¹³ Bare Atambatun afiyafiya asok aane o káwuwan bufor bíyeni, n’eke etaam yooŋ, abe buroon béejube taŋ bija fu káyemi toko. Bondu b’únahan fu. ¹⁴ Kújakuwe, aruun k’ímaŋie-maŋie ku, iŋ’ite ho aamo fu makamu aruun bokondu ti kanahan hunak hondu, árihin wáhowah man n’áriyemi hágila Atambatun bakan keekuure, bakan keeyinaatee kawatan tu doon fe, ni bakan yooŋ keebaje káasuumaay ne o. ¹⁵ Abe n’arinaŋ bonde ti kikawuun: Anahaan u ondu ti kámuñu kep kaanuku man n’áriyini kafaku. Bondu b’ati úne Pool, nu búwesinato b’Atambatun awuno bu asokuun fu t’eleetar yeene. ¹⁶ Aŋ’asok bo yooŋ ti bileetar boone fe kane ajemen bonde. Abajeebaj ti bileetar boone bike béetaañie kajoku, abe bakan kéewesinateit, káyilen kooniin yooŋ kifamut, n’iŋi kajok bo kawetekanoor, naane ii káhin yooŋ nu waawu wuwiit wute Míkiñjin mu. Iyu ifi káhin kéetowutanooro. ¹⁷ Kújakuwe, aruun k’ímaŋie-maŋie ku, aruun bare, ariheeka áriimeyi bonde. Iŋ’ite ho aamo fu aritey énafuta i, itim kabin kahiilanuun ti kájuumu kooniin, kéehinuun atum’aŋk’arijok alitee. ¹⁸ Bare arihaŋ kajoku alitee t’Anahaan ite úne Yesu Kiris, n’Afakana ite úne yooŋ toko, man n’arihaŋo kámeyi, abe n’ahaŋuun yooŋ kásoniyan. Aja ákini kániku ku hahiye nu ko kireyi fe! Amiin.