1 TIMOTE

¹ Íñje Pool ikiñje fee, íñje apotor ite Yesu Kiris naane t’Atambatun Afakana ite úne, ni Yesu Kiris eeemo u eyakar ite úne kasoke du. ² Íñje íkiñjini fee awe Timote i ijoke u naane añiam ite nu múniyo ti káyilen ku. Atambatun Faaf u, ni Yesu Kiris Anahaan ite úne kaja kásoniyani, ni kayubiyeni yooŋ, abe ni kawuni káasuumaay. ³ A̱riiko Efees naane ibine i isoki íñje ti bija bu Maseduwan. Bakaake bokondu baabu iŋi kaliiken ésuk i beenooto bite nu múniyo. Á̱haminiin ayanee man ni karaan. ⁴ A̱aniin kawas kúsuwanooru kondu, ni kájatinanoor kite kuruwu kite sifaaf su kéehabanaariit kii. Bondu fe iŋi bíyitin síjeeŋoor. Búyokunanaariit an éehin burok bite Atambatun, beeemo bu iŋi bíhinee ni káyilen. ⁵ Káyeegal kondu kite káhinu kéeyilene ku kéemaŋioori kámaŋi kéenuutina t’ehol yeekuure, nu búwejet beejake, ni káyilen keeyane. ⁶ Bakaake káwuŋgawuŋg bondu kiñaawu, abe iŋi kayiil ti báhamin beeñunut. ⁷ Iŋi kaane boko kaamo eliikena ésuk i eluwa yite Atambatun, bare naane káwoolue i kikawiin fe, kájokaariit naŋ n’ifi kasok, kámeyiaariit yooŋ bimbi kaliiken ésuk i. ⁸ Úmoomi kaanuku eluwa yite Atambatun ejakajak t’ésuk i káhine yo ajoŋooree. ⁹ Bonde b’úware fu kámeyi: eluwa áhinaariitee bija ti kéejube ku. Aŋ’áhinee bija ti ñatuuk ñu ni kéejamaariit ku, kéenafute ku n’ehoofoora i, keeteñekee ku Atambatun nu doon fe deenabe, ni kiŋki kayool sifaafiin man yooŋ síñaayiin, ni kiŋki kayool an. ¹⁰ Aŋ’áhinee yooŋ bija ti kiŋki kaŋot ni bakan ki kaseñeit, ni kiŋki kaŋot ániine n’ániine naane ániine aa aŋot n’anaare, ni kiŋki kajoohen búsukateen bu, n’ejuusa i, ni kiŋki kaseede bite haajuus hu, ni kiŋki káhin baabu buroon fe beewayee bu ni b’ariliikene bu bite bu nu múniyo. ¹¹ Beeliikenee bondu, bondu ti Hirim Heetoofe hu h’isaanee hu, heesoke hu bite b’Atambatun éenike u, abe n’ajak. ¹² Íñj’endu ti kaanu Yesu Kiris Anahaan ite úne eyeehen, akina eewunam u sembe íihin burok boone. Íñj’endu ti kaanio eyeehen naane ajokam i an éejube, abe n’ajifanam iirok bija te o. ¹³ Hítiyar hu, iŋ’isok te o beejakut, iŋ’ílafatino yooŋ, abe n’iŋ’íhihinoor bakan koone. Bare Atambatun ayubiyenamyubiyen, ábuki ámoomi kaanuku bimb’íhinaani fe, ti kámeyiaate, abe íyilenut yéeni ti Kiris. ¹⁴ Atemit ite úne ásoniyanamsoniyan dómbokun iyak ibaj káyilen, abe n’ímaŋi yooŋ húŋgowulan ni kámaŋi kéenuutina ti Yesu Kiris. ¹⁵ Hirim h’ija hee kasokii héewoore, abe huruw fe awarawar ho kanaŋu ti hikawo: Yesu Kiris abinabin t’etaam ye kaanuku eefakan ehoofoora i. Íñje ihaŋiin fu kajakaate fe, ¹⁶ bare Atambatun ayubiyenamyubiyen. Ámaŋamaŋi kaanuku Yesu Kiris éewufoor t’íñje, íñje eeemo u átiyar ite ehoofoora i, buŋ b’af’ámuñ ariike. Áhinamhin bondu kaanuku man bakaaku ni kabin káyilen te o, abe ni kabaj buroŋ béehabanaariit bu. ¹⁷ Úsokoroor Áyi ite u hiraanu, abe n’únikano bija bandoor, akina Atambatun afeeneŋ u taŋ, éeketaariit u, éejukaariitee u yooŋ! Amiin. ¹⁸ Áñuumo Timote, bonde b’isejani fu. Bo bifeeneŋ bu ni b’eyiŋana yite Atambatun kabine bu kasok kóŋkeyin t’awe. A̱jok te bo man n’á̱yini kátuumu étuum yeejake i ¹⁹ ni káyilen, n’ehel yooŋ yeekuure. Bakaake kateñekateñeko káhinu naane siheliin susokiin i ayak abin áami káyilen kooniin kúbujaa. ²⁰ Eraab ite Himeneiin n’Aleksandur k’ísike ku isaan Setani. Iyu, n’iŋi kaliiken kawasu kálafatin kite Atambatun.

¹ B’ija bu kajabu isok beemo fu ímaŋamaŋi aŋ’áriwasiyan Atambatun bija tu kúŋgowulan ku kareyi fe, n’arilawo yooŋ, abe n’arieno eyeehen bija tu boko. ² Aŋ’arilawo bija ti bákayi ku, ni keeemo ku t’éŋguur i fe, man buroŋ bite b’úne ni bibeb, abe nu butoof. Iyu, n’uŋ’úyini káwufoor kaanuku újeŋginajeŋgin Atambatun, abe yooŋ manoŋkar mite m’úne fe meejake. ³ Bondu bijake fu, abe nu butoof yooŋ Atambatun Afakana ite úne. ⁴ Ámaŋamaŋi kaanuku ésuk i fe keefak, abe ni kámeyi múniyo mu. ⁵ Ábuki Atambatun afeeneŋ taŋ abaje fu, abe afeeneŋ taŋ asiiŋee fu t’etuto nu kúŋgowulan ku éehiniin keebukan: o aamo fu Yesu Kiris húŋgowulan hu. ⁶ Ásikasik buroŋ boone awun, eejaam kaanuku ésuk i fe yeefak. Bondu biseedee fu h’aamo hu tireeŋa toko. ⁷ Bondu bíkinineŋe fu Atambatun n’áhinam íiyemi apotor. Aanamyen iwaare abe n’iliiken keenooto ku Esuwif bite káyilen ku, ni bite múniyo mu. Íñjeiit ijuuse, bifeeneŋ taŋ b’if’isok. ⁸ Ímaŋamaŋi kaanuku tánotan fe, háyine hu n’iŋi kalaw, boko ti kayitu sumoŋiiin nu suhol seekuure but, itim kayiŋat, itim yooŋ kañakoor. ⁹ Ímaŋamaŋi yooŋ haare hu iŋi kasiimo áwariee, itim kaŋes bujukano, itim’iŋi kahahan yooŋ. Itim’iŋi karifaaño birifaañu bite jísaŋg, itim kasol buroon bite éwurus i, nu ñukuur ñu, nu wañ weeseere wu. ¹⁰ Bare káwari kooniin kuwarawar káyemi kanoŋku ajakee; bondu bijake fu ti haare keeene kájeŋginajeŋgin Atambatun. ¹¹ Ániine af’áyemi ti kaliiken kéeyilene ku bite b’Atambatun, haare hu kakoowan kem, abe ni kajamatan jak. ¹² Anaare awarut kaliiken ániine, man yooŋ n’áhino aŋ’ajam te o. Iwunuto bondu. Awarawar iŋi kakoowan. ¹³ Ábuki Adam ajabe fu áwuwanee, ahaban, Eef n’atik áwuwanee. ¹⁴ Abe Ádamiit abuutee fu, anaare u abuutee fu. Náami anaare u ahoofoore fu. ¹⁵ Bare kaabukoor ku kákinineŋ haare hu ni kafak, ti kajoke alitee kéeyilen, ni kámaŋi ésuk i, abe ni kanab. Itim kaŋes yooŋ bujukano.

¹ Hirim h’ija hee kasoku héewoore: ake af’ámaŋi káyemi hikaw hite bakan kéeyilene, burok beejake b’ámaŋie fii. ² Hikaw hite bakan kéeyilene awarawar káyemi an eeyinaatee kawatan tu doon. Anaare afeeneŋ taŋ a aware fu kabaju, abaj hikaw, ájokumooro, abe buroŋ boone nu bújub. Awarawar kajoku áwariee kiŋki kaja te o, abe n’áyini kaliiken ésuk i bite b’Atambatun. ³ Awarut káyemi áhujaa ómbokun, awarut yooŋ káyemi aloba, bare awarawar káneeni, abe n’áyemi an ite káasuumaay. Awarut kanaŋu hikawo ti sírirem. ⁴ Awarawar káyini káyeki butoŋ boone, abe n’áhin yooŋ bakañio kéejeŋgino káhabanein. ⁵ Ábuki an afut’áyini káyeki butoŋo, buŋ b’aja fu káyini káyeki bakate ku Atambatun kéeyilene ku? ⁶ Hikaw hite bakan kéeyilene awarut káyemi an eefiyeit ti bítim bite Kiris; n’aŋ’ajendan biyitooro, abe Atambatun n’aŋ’ajoonano naane ajoonane i Setani. ⁷ Awarawar kabaju huruwu heejake ti kéeyilenut ku, kaanuku man itim kabin kasok te o beejakut, abe Setani n’ajoko t’éfiir yeene. ⁸ Ejokoora yite kikaw kite sijaŋgu su kawarawar yooŋ káyemi bakan keejoŋoore, ni káyemi yooŋ bakate bifeeneŋ. Kawarut uŋu búhujo kahahan, kawarut yooŋ kaŋesu kabaju sírirem si kásuwatut. ⁹ Kawarawar kajoku nu suhol seekuure but múniyo m’Atambatun áwufoore mu. ¹⁰ Kajab kajukeree tu boko jak, abe af’arko kayinaatee kawatan tu doon, n’iŋi káyini káyemi ejokoora t’ejaŋgu i. ¹¹ Haare hu yooŋ kiŋki kajokoor kikaw kite sijaŋgu su kawarawar káyemi keejoŋoore, abe kawarut yooŋ kasoku t’an. Kájokumooro, abe kájub tu buroon bu fe. ¹² Háyine hu kiŋki kajokoor kikaw kite sijaŋgu su, huruw fe anaare afeeneŋ taŋ a aware fu kabaju. Kawarawar kajoŋooran bakañiiin jak, ni bakate ku t’enuuf tu boko fe. ¹³ Kiŋki kajokoor kikaw kite sijaŋgu su, abe n’iŋi káhin burok beejake, boko kasokorooree, abe boko kawaare bite bu káyilen kooniin ti Yesu Kiris ni kikaw keeyaŋge piŋ. ¹⁴ Iyakarayakar bibin kajukii memee. Bare íñj’endu ti kákiñjini bonde kaanuku ¹⁵ bibin búuma ufu búkuri, n’á̱meyi buŋ bu buroŋ bite an buware fu káyemi tu butoŋ bite Atambatun. Butoŋ bondu beemo fu bakate ku Atambatun eeemo u buroŋ kéeyilene ku, keeemo ku naane hiñaan hítiyar hite enuuf tu múniyo mu miyaajee du. ¹⁶ Béekoofaanie bu bite bítim bite b’úne bihahahah, abe an ayinaat kajeeŋan bo. Bo beemo fu bonde: Abinabin éehinooro naane húŋgowulan, Búwejet Beenabe bu nu búwufoor kaanuku ájubajub. Emalaka i kajukojuk, abe ésuk i ni kawaare uŋu hoone hu ti keenooto ku Esuwif. Bakate ku t’etaam i ni káyilen te o, abe Atambatun n’ayito t’etiir t’ánike du.

¹ Búwejet Beenabe bu busokasok bonde bukuur but. Beenaan: tu kunak kiraanu ku, bakaake kawasu káyilen ku. Boko kajoku tu ñúwejet ñuññu ñubuut, ni bi birab bu bimbi biliikeniin. ² Boko kawasu ñatuuk ñu ñeeemo ñu ejuusa ñeebuutiin; ñatuuk ñondu, siheliin siketaket kite so súsufee ni mañ méesufanee miyak milaañ jif. ³ Iŋi kaane an awarut kasayi, bike buroon yooŋ buwarutee kateŋu. Bare Atambatun áwuwane fu buroon bondu. Náami kéeyilene ku kéemeyie ku múniyo mu káyinooni kateŋu bo, ti kaanio eyeehen. ⁴ Doon d’Atambatun áwuwane fe dijakajak; doon fe dunooto toko dite káfiiten, saama núusik do ti kaanio eyeehen. ⁵ Ábuki hirim hite Atambatun ni kalawu ku, bondu iŋi bíhin buroon bu beetoof t’Atambatun. ⁶ Af’a̱liiken bondu kéeyilene ku, n’aŋ’á̱yemi aroka eejake ite Yesu Kiris. N’aŋ’á̱wufoor kaanuku kirim kite múniyo m’Atambatun áwufoore mu kúkuumani fu, ni bi kaliikeni bu yooŋ béewoore bu. Bondu fe a̱naŋanaŋ bo ti hikawi. ⁷ Bare a̱teñeko kúsuwanooru keeñunut ku, keeriibut ku nu múniyo m’Atambatun áwufoore mu úne. Á̱ñiŋkaan kep á̱ajeŋgin Atambatun. ⁸ Bímiñooro tu burok ajakajak, bare tu doon diŋgilis. Kájeŋgin Atambatun ajakajak tu doon areyi fe, ábuki eyakar yendu toko yite buroŋ bite hahiye, ni bite bu kóyinokoyin. ⁹ Hirim h’isoki hee héewoore, abe ajakeejak huruw fe n’anaŋ ho ti hikawo. ¹⁰ Bondu bíkinineŋe fu n’uŋ’úrok, abe n’uŋ’útuum yooŋ, ábuki úsikasik eyakar ite úne únaŋ t’Atambatun eeemo u buroŋ. Akina aamo fu Afakana ite kúŋgowulan ku kareyi fe, áhaŋum kéeyilene ku. ¹¹ Á̱hamin ésuk i bondu ayan faŋ, abe n’a̱liikeniin bo yooŋ. ¹² Atum’a̱was an fe eeheebi aŋarkeyi naane á̱moomi añi. Bare á̱hin man kéeyilene ku ni kaliikool n’awe ti máhaminar múuwe, ti manoŋkar múuwe, ti naane á̱maŋie i an, ti káyilen kúuwe, ni kakuuru kúuwe. ¹³ Á̱ñiŋkaan aŋ’a̱jaŋga Míkiñjin mu tu buhooŋu kéeyilene ku, n’á̱handiniin mo, abe n’a̱liikeniin yooŋ bija kóyin k’ibin ku. ¹⁴ Atum’a̱wiinen beeemo bu t’awe, bu Búwejet Beenabe bu buwuni bu h’eyiŋana i káhamine hu, abe sifaaf su ni kásit sumoŋiiin t’awe. ¹⁵ Bondu a̱warawar kanaŋu bo ti hikawi, abe n’a̱jok bo á̱habanein, man ésuk i fe ni kajuk kaanuku aw’ondu ti kahaŋu bija hágila. ¹⁶ A̱naŋ toko hikawi tu buroŋ búuwe, ni ti bamb’a̱liiken ésuk i. A̱jok tu bondu alitee. Af’á̱hin iyu, n’aŋ’a̱fak, kiŋki kajamatani yooŋ n’iŋi kafak.

¹ Atum’aŋ’a̱futanoor ti híhaaniin, bare a̱saaho á̱ahamin ne o naane aa á̱hamin ni faafi. A̱jok yooŋ ehaawa i naane bakatii. ² A̱jok haare hu keehaane ku naane síñaayi, abe búsuŋgute bu, n’a̱jokiin naane bákaniini, n’ehol yeekuure but. ³ A̱tofotoor haare hu ki bákayiniin kakete ku, k’á̱meyie ku kaanuku kabajut an. ⁴ Arko bakaake tu boko kákooki biñi, man yooŋ bakañiiin kákooki biñi, bi biñi bu kaware bu kajabu te bo beemo fu katofotoor sifaafiin ni síñaayiin, keefin kéegaliniin naane ii katofotooriin yéeni. Bondu butoofe fu Atambatun. Ti katofotoor kite butoŋ booniin ti kayak fu káwufoor kaanuku káhinahin bi bítim bite Kiris bíkandijene bu. ⁵ Anaare eeemo áyino aketaket abe abajut an ite káyokunano, aŋ’ásik eyakar yeene anaŋ t’Atambatun, abe aŋ’aboo kalawio kaajiŋgan ni káajiim kaanuku man n’áyokunano. ⁶ Bare anaare eeemo áyino aketaket, abe beetoofo bu taŋ b’af’áhin, naane aamo i buroŋ fe, akina an eekete. ⁷ Bondu b’a̱wariin fu kábaŋinan, kaanuku man itim kabin kawatanee tu doon. ⁸ An afut’aŋ’atofotoor ebuke yeene, áhaŋum butoŋ booniin, an ondu awasa káyilen ku, abe an éeyilenut ákoyiokoyi. ⁹ Bala anaare akiñjee ti kaawiit kéeyekie ku kuruwu kite haare hu ki bákayiniin kakete ku bija ti káyokunan kooniin, anaare ondu awarawar kabaju áfiitin ti simit bakan bákahaaji. Awarawar káyemi t’ániine afeeneŋ taŋ t’aseñee fu. ¹⁰ Awarawar káyemi an éemeyiee tu burok boone beejake bu: an eejoŋoorane bakañio, aŋ’ajok áwariee kiŋki kaja te o, abe yooŋ n’aŋ’añaw wuwot wute kéeyilene ku. Awarawar káyemi an aŋ’áyokunan yéeni keeemo ku ti sílaam su, abe n’aŋ’áhin yooŋ buroon bánoban beejake. ¹¹ Keereeŋanoorut ku simit bakan bákahaaji ki bákayiniin kakete ku, atum’a̱kiñj kuruwu kooniin ti kaawiit ku. Ábuki siheliin ufu susooñan ti biseño, n’iŋi káwuŋg Kiris kiñaawu. ¹² Abe ifi káhin iyu, n’iŋi katin, ábuki kajokut ti hirim hi kajabe hu kasoko. ¹³ Hutoof yooŋ kaseñeit, kuruwu kooniin ifi kikiñjee ti kaawiit ku, it’iŋki karok doon fe. Kabaa buyoosorooro sunuuf su kep, abe iti karaan t’eñeke i. Báhamin beejose taŋ, abe iti káyini kajoku ñutumiin. Bi kakolut bu ne bo, boko kasoku bo. ¹⁴ Iŋ’ite ho h’ímaŋie fu haare hu keereeŋanoorut ku simit bakan bákahaaji ki bákayiniin kakete ku ni kasooñ kaseño, keebaj biñi, abe ni kajokoor sunuuf sooniin, kaanuku man enatoora yite y’úne itim kabaj húkuuseima keesok t’úne bike. ¹⁵ Ábuki bakaake ti haare hondu ki bákayiniin kakete ku kaheeka keewas bítim bu keesa Setani ti hiñaawu. ¹⁶ Anaare éeyilene af’abaj t’ebuke yeene bakaake ki bákayiniin kakete, awariinwar káyokunan. Atum’asejan bondu kéeyilene ku. Af’áhin iyu, kéeyilene ku n’iŋi káyini káyokunan ki bákayiniin kakete ku abe kabajut an. ¹⁷ Sifaaf ifi kajoŋooran áwariee kéeyilene ku, bajaam booniin buwareewar káwutiyen tu kúsuba, áhaŋum ti kiŋki káñiŋkaan ti kawaare ku, ni kaliiken kite ésuk i. ¹⁸ Ábuki Míkiñjin mu meenaan: «Atum’a̱kob butum bite húyond heeemo t’eyotok.» Nu musooñ meene: «Aroka awareewar kajaamu.» ¹⁹ An af’akalame faaf ite kéeyilene, atum’a̱jamatano, kane arko taŋ bákasuba man yooŋ bákahaaji kakalamoo fu. ²⁰ Kiŋki káhin wuhoofoor wu, a̱kamoor tu boko tu buhooŋu ésuk i, man bakaaku yooŋ ni kákoleyi. ²¹ Íñj’endu ti káwasiyani bonde hágila Atambatun, ni Yesu Kiris, n’emalaka i keenabe ku: á̱hin bonde b’isoki bee, a̱jok ésuk i fe kare, atum’aŋ’a̱reeŋo yooŋ an. ²² Atum’aŋ’a̱moken ti kásitu sumoŋii t’an kaanuku a̱asejano burok ti kéeyilene ku. Atum’a̱yooso tu wuhoofoor wute bakaaku; a̱riiko akuur but. ²³ Atum’a̱raan tu búhujo bite móhujo mu barebare, aŋ’á̱hujo yooŋ ébiñ diŋgilis iŋ’ite hu hari, naane uu huboo káseñji ku. ²⁴ Wuhoofoor wute bakaake wúmeyiee akuur but ti kátumboorut kajoonanee. Bakaaku iŋi kajoonanee ahaban, wooniin wu nu wutik wúmeyiee. ²⁵ Burok beejake yooŋ iŋi bímeyiee akuur but. Abe beesoŋkut bu bujukano biyinaatee yooŋ kánuusu hiraanu.

¹ Keeemo ku tu húsukateenaate hu fe kawarawar kajoku kéekiniiin ku naane bakan keewaree kájeŋgin, kaanuku man an atum’abin asok beejakut tu huruwu hite Atambatun, nu tu bumb’úliiken ésuk i. ² Búsukateen bu keeemo ku kéekiniiin ku káyilenayilen ti Kiris, kawarutiin kaheebu, ábuki boko bakatiiin ti bítim bu. Bare kawarawar karoku bija tu boko ahaŋee, ábuki kiŋki káñjeriŋ ii n’ésuwa yeeniin, bokondu bakan kéeyilene, abe kámaŋieemaŋi. Bonde b’a̱waare fu kaliiken ésuk i, abe n’á̱haminiin bo ayanee. ³ An af’aliiken ake bike beewayee, abe n’ateñeko kirim kite ku nu múniyo kite k’Anahaan ite úne Yesu Kiris, nu bumb’úliiken ésuk i beeriibe bu nu múniyo m’Atambatun áwufoore mu úne, ⁴ an ondu an eeyitooree, abe ámeyiit doon. Kámaŋi kite sulob su, ni síjeeŋoor su iŋ’ite kirim ku kúmoomi te o naane kásomut. Toko ti bíhiñanoor bu t’ufu búnuutin, ni síñakoor su, ni bílafatinool bu, ni biyinoor beejakut bu ti bakaaku, ⁵ ni síjeeŋoor séehabanaariit su. Kiŋki káhin iyu, ñúwejet ñooniin ñíbaanabaani, abe iŋkut kámeyi yooŋ múniyo mu. Iŋi kaane man káyilen ku t’Atambatun efehe yite bisaanumato. ⁶ Múniyo káyilen ku t’Atambatun ebaj yómbokun tu húŋgowulan, kane arko hikawo hutoofatoof tu doon d’abaje du. ⁷ Úbinut nu doon fe t’etaam ye, abe úyinaat yooŋ bija nu doon fe. ⁸ Náami uf’úbaj doon dite búkuumanooro, nu wañ wute bisiimo, afameefam. ⁹ Bare kéemaŋie ku ebaj yeeniin ehah, Setani abuutiin. Kajokee t’éfiir ite wúfaŋi úkaan weeñunut, abe yooŋ wujakut. Uŋu wúbuj ésuk i, abe yooŋ uŋu wútowutaniin hiraanu. ¹⁰ Ábuki káfaŋi kite sírirem abuke fu beejakut bánoban. Bakaake kahaŋahaŋ bimero so kasooñen ni kawas káyilen ku, keesejanooro wúseñji weehooje. ¹¹ Bare awe eeemo u an ite Atambatun, a̱tey buroon beejakut bondu. A̱ŋes káyemi an éejube, a̱jok t’Atambatun, a̱baj káyilen, á̱maŋi an, á̱muñ, abe n’á̱neeni. ¹² Á̱tuum étuum yeejake i yey’ebin ni káyilen ku. A̱jok buroŋ béehabanaariit bu, ábuki Atambatun aruwiruw kaanuku a̱abaj bo. Abe a̱binabina á̱hamin atoof aa ti káyilen kúuwe tu buhooŋu bakan keehooje. ¹³ Íñj’endu ti kasokii bonde hágila Atambatun aa awun dóonodoon fe buroŋ, ni Yesu Kiris éehamine u atoof iya ti káyilen koone hágila Poons Pilat: ¹⁴ á̱hin naane ibine i isoki, abe n’a̱kuur, an yooŋ atum’awatani tu doon bija hunak h’Anahaan ite úne Yesu Kiris ábatikein hu. ¹⁵ Atambatun káhinio éebatikein hunak h’ajoke hu te ho. Akina abaje fu sembe sánosan. Akina aamo fu Atambatun unoono, Faaf ite meejake mu, Áyi ite bákayi ku, n’Anahaan ite kunahaan ku. ¹⁶ O taŋ áketaariit fu. Akinakin ti meejaaŋe m’an ayinaat kalohu. An ámusuto kajuku, abe an yooŋ ayinaato kajuku. Aja ákini hiraanu kániku ku, ni sembe su! Amiin. ¹⁷ A̱ane kusaanum kite t’etaam ye itim kayitooro, itim kanaŋ yooŋ eyakar yeeniin t’ebaj yéefiyaariit. A̱aniin kanaŋ yo t’Atambatun aa awun úne areyi fe ahahan kaanuku núutoofan. ¹⁸ A̱sokiin a̱aniin iŋi kanoŋk ajakee, abe ni káyemi kusaanum ti kinij keejake; káyemi bakan keewune, abe n’iŋi káruboor buroon booniin ni bakaaku. ¹⁹ Káhinu iyu, n’iŋi kakuukan ebaj yeejake abe n’eyan bija tu kuwaatu, abe n’iŋi káyini kabaju buroŋ bite bu nu múniyo. ²⁰ Óom Timote, a̱jok áwariee doon d’Atambatun ánihani du. A̱tey báhamin beeñunut, beeriibut nu múniyo m’Atambatun áwufoore mu úne. A̱tey síjeeŋoor su tu buroon bite bíhaŋoor búwesinato, abe yooŋ bíteiit nu múniyo. ²¹ Bakaake kaanaan boko kúwesina, abe ni kawas káyilen ku. Atambatun aja ásoniyanuun.