1 PIYEER

¹ Íñje Piyeer, apotor ite Yesu Kiris ikiñje fee bakan k’Atambatun ajifane ku, keeyisaloolee ku tu búsuk bite bu Pont, ni bite bu Galasi, ni Kapadoos, n’Asi, ni Bitini. Baabu t’áruuniit. ² Atambatun Faaf u ajifanuunjifan aliik naane t’afiye du asok. Búwejet boone bíhinuunhin áriiyemi bokoone ku kaanuku áriijeŋgin Yesu Kiris, abe halan hoone nu hukuuranuun. Atambatun aja ahaŋuun kásoniyan, abe n’awunuun yooŋ káasuumaay keefame-fam. ³ Úsokoroor Atambatun Faaf ite Anahaan ite úne Yesu Kiris! Ti kajaku koone kómbokun ku k’áwufoore ku úne, awunawun úne buroŋ bíyeni h’aritane hu Yesu Kiris t’eket i. Iyu u úbaje fu eyakar yéeketaariit, ⁴ abe úmoomi kaanuku úne kákini buroon beejake b’Atambatun anaŋe bu bija ti bakan koone. Buroon bondu biyinaat búbujo, biyinaat kabuubat, biyinaat yooŋ bútowuto. Atambatun anaŋanaŋ bo tu bufor bu bija t’aruun. ⁵ Naane aamo i áriyilenayilen te o, o kajukaruun ni sembe soone kaanuku eebin eefakanuun. Bondu kámeyiee tu hunak hiraanu hu. ⁶ Kikawuun kutoof tu bondu, hutoof hahiye ariwarawar kátaañian tu kunak keefamut iŋ’ite sílaam sánosan. ⁷ Sílaam sondu site kajuku man káyilen koonuun kite nu múniyo man yooŋ. Éwurus áyinooniee kábuju, bare ti sineemak t’af’ajukee man ejakajak. Iyu yooŋ i káyilen koonuun keehaŋe ku éwurus ifi kiŋesee ti sílaam sánosan, t’ajuk man kiyanayan. Náami hunak hi Yesu Kiris áŋaasin hu, Atambatun kasokorooruun, n’ánikanuun, abe n’asaluun. ⁸ Naane árimusut i kajuku Yesu fe, árimaŋiomaŋi; naane árijukaariito i hahiye fe, áriyilenayilen te o. Iŋ’ite ho hi kikawuun kutoofe fu dómbokun; kútumb kutoof kusooñen an ayinaat ko kasoku ni kirim. ⁹ Ábuki aruun bokondu ti kabaju hisiibanu hite káyilen koonuun: ho heemo fu kafaku kite siyaan soonuun. ¹⁰ Kóŋkeyin, eyiŋana yite Atambatun kaŋesaŋes, abe ni kanewenoor keejuk buŋ b’Atambatun aja fu kafakan ésuk i. Kasoŋka busok buŋ b’Atambatun aja fu káwufooruun kajaku koone. ¹¹ Búwejet bite bu Kiris búmoomi tu boko, abe busoŋka busok sílaam s’aware su kajuku, nu buroon béewarie-warie beeja bu káseina. Eyiŋana yendu ni kaŋes yooŋ kámeyi kaakaŋ, nu buŋ bu bondu bija fu kabaju. ¹² Atambatun n’áwufoor eyiŋana yeene aaniin hirim h’asaaniin hii bíjaiit tu boko, bare bija t’aruun. Hahiyu kiŋki kawaare Hirim Heetoofe hu kasokuunsok hirim hondu ti sembe site Búwejet Beenabe bu béeboñinee bu huta hu t’etiir. Abe humuum emalaka i kámaŋamaŋi kámeyi bondu. ¹³ Arifare ariwasan. Arijok kikawuun, abe n’arinaŋ eyakar yeenuun fe ti káasuumaay k’arija ku kawuniee kane Yesu Kiris áŋaasin. ¹⁴ Árijeŋgin Atambatun, abe atum’aribatikan siheluun tu wúfaŋi woonuun wute wu ti hítiyar hu t’árimeyioorut múniyo mu. ¹⁵ Bare áriyemi bakan keenabe ti máhinar moonuun, naane Atambatun eeruwuun u anabe i yooŋ. ¹⁶ Múniyo Atambatun aanaan ti Míkiñjin mu: «Áriyemi bakan keenabe, ábuki íñje inabanab.» ¹⁷ Aruun ti kalawu, aŋ’ariene Atambatun «Faafa». Bare aŋ’ajoonan kúŋgowulan ku fe aliik huruw tu doon d’aroke du, abe ásokumaariit. Iŋ’ite ho aamo fu tu kunak keeŋeñenuun ku t’etaam i, áriwufoor ti máhinar moonuun naane arijoko i nu sumoŋu súsuba. ¹⁸ Árimoomi bajaam beejaamee bu kaanuku ariifakanee tu buroŋ beebajut bii éñjeriŋ, bi sifaafuun kómbokun kátifenuun bu. Bijaamutee nu buroon béefiyaariit naane sírirem, man yooŋ éwurus. ¹⁹ Aaa, arifakaneefakan ti kaasarah kómbokun kite ku Kiris, éeyemie u naane ametek éewere kák, abe doon durkuto. ²⁰ T’etaam i éwuwanoorutee n’Atambatun ajifano fu, abe afeeñafeeñ uŋu hoonuun hu tu kunak konde keeemo ku kiraanu ku. ²¹ Te o t’af’ariŋaas áriiyilen t’Atambatun éeritanno u t’eket i, abe n’áhino éenik. Iyu a ariyite fu káyilen koonuun, n’eyakar yeenuun fe arinaŋ t’Atambatun. ²² Arikuuranoorakuuranooro aŋarkeyi naane árijeŋginajeŋgin múniyo mu. Iŋ’ite ho h’árimaŋie fu bakatuuun kéeyilene ku. Náami árimaŋioori dómbokun siheluun síhabanein. ²³ Aribukeebuk ti kátiyar; káanukiiit kúŋgowulan kite kaketu kubukuun, bare Atambatun éeketaariit u abukuun fu. Áhinahin bondu ni hirim hoone heeroŋe hu, abe híhabanaariit yooŋ. ²⁴ Ábuki Míkiñjin mu meenaan: «Kúŋgowulan ku fe kámoomi naane mahos, abe káwari kooniin naane éfuloor ite ti kitaaŋaat ku; mahos iŋi misay, éfuloor eŋ’eney, ²⁵ bare hirim hite Atemit hibaa káyemi.» Hirim hondu heemo fu Hirim Heetoofe h’arisokee hu.

¹ Náami hahiyu ariwas bánafut bu, ni haajuus hu, nu butuuko bu, ni baabet bu, nu husoku hu ti bakan. ² Áriyemi naane bilekej: naane ii kámaŋi miin mite síñaayiin, árimaŋi yooŋ ko kireyi fe míis meekuure mite Hirim hite Atambatun, man n’árijuw mo ariihaat, abe n’arifak. ³ Ábuki Míkiñjin mu meenaan: «Arijukajuk buŋ b’Atemit ajake fu ariike.» ⁴ Áritofin ariiloh Anahaan u, eeemo u ejuju yeeroŋe i. Kúŋgowulan ku káfiitenafiiten yo, bare Atambatun n’ajifan yo, ábuki te o ebajabaj éñjeriŋ. ⁵ Áritofin man aruun yooŋ n’ariyitee naane bujuju beeroŋe, bija tu kunut kite enuuf ite Búwejet Beenabe bu. Aruun káyemi toko eja yite esaraha keenabe, aŋ’aribin arisarah naane Búwejet bu busokuun i, abe Atambatun n’aŋ’asa wo iŋ’ite hu Yesu Kiris. ⁶ Ábuki Míkiñjin mu meenaan: «Arijam! Ijifanajifan elaaliñj yeebaje éñjeriŋ, abe iisiiŋan yo Siyoŋ yéeyemi meeyane mite enuuf i; an éeyilene u te yo at’afuño hikee.» ⁷ Elaaliñj yendu ebajabaj éñjeriŋ yómbokun t’aruun kéeyilene ku. Bare ti kéeyilenut ku, «Elaaliñj i y’enuta i káfiitene i yéeni, yo esooñe fu éyemi meeyane mite enuuf i.» ⁸ Nu busooñ busokee toko kaanuku: «Ejuju yendu ef’ékinineŋ ésuk i n’ébiŋan, elaaliñj yendu ef’ékinineŋ ésuk i n’eney.» Ésuk i kábiŋanabiŋan ábuki kateñekateñeko káyilen ti hirim hite Atambatun, abe bondu bifiye fu buwariin kabaju. ⁹ Bare aruun, aruun ariemo fu eheet yeejifanee i, aruun ariemo fu esaraha i bakate ku Atambatun Áyi u, aruun ariemo fu ésuk yeenabe i, aruun ariemo fu bakan kite Atambatun. Arijifaneejifan kaanuku aŋ’aribin arisok buroon béewarie bu b’Atambatun áhine bu, akina eeruwuun u kaanuku áriinuutin t’ébaani i, ariibin ti meejaaŋe moone méewarie-warie mu. ¹⁰ Hítiyar hu áriyemiit bakan bakate Atambatun, bare hahiyu áriyemia bakan koone; hítiyar hu Atambatun ayubiyenutuun yéeni, bare hahiye ayubiyenuun. ¹¹ Kújakuwe, aruun k’ímaŋie-maŋie ku, aruun keeemo ku emoosoora t’etaam ye abe yooŋ at’arifiyo, waasuun, ariwas wúfaŋi weejakut wu, ábuki uŋu wutiik n’aruun. ¹² Buroŋ boonuun t’etut kéemeyiit ku Atambatun bíyemi beejake. Hutoof yooŋ iŋi kasok t’aruun hahiye kite aruun aŋ’árihin beejakut, boko bare bibin kajuku buroon beejake bu bamb’árihin, abe boko kasokoroor Atambatun hunak h’abin hu. ¹³ Árijeŋgin saama náami aseef iŋ’ite Anahaan u, naane áyi ómbokun u, eeemo u hikaw hite eseef i fe, ¹⁴ n’éguwernoor i yooŋ kaŋk’aboñ keeja keejoŋooran kéenijaariit ku ajakee, man yooŋ keeja keesokoroor kiŋki kanij ajakee. ¹⁵ Ábuki fu Atambatun ámaŋamaŋi aŋ’árihin ajakee, ñutum ñite keesoŋotee ku kéemeyiit ku doon ñeekumbo. ¹⁶ Buroŋ boonuun bíyemi bite bakan keenuute tu húsukateenaate. Bare atum’ariyinoor n’ariene makamu ariroŋut búsukateen, áriyinooni kánuusu kunoŋk keejakut. Arinij naane eroka bakate Atambatun. ¹⁷ Árijeŋgin kúŋgowulan ku fe, árimaŋi bakatuuun kéeyilene ku, arijok Atambatun nu sumoŋu súsuba, abe n’árijeŋgin áyi ómbokun u. ¹⁸ Aruun eroka i, árijeŋgin bakan ku kaŋk’arirok tu boko, abe n’arijokiin nu sumoŋu súsuba. Káanukiiit keetoofe ku abe ni káneeni barebare, bare bija yooŋ keetoofut ku fe. ¹⁹ Múniyo af’arijuk sílaam seewarutuun kabaju, abe n’aŋ’árimuñ iŋ’ite h’Atambatun, bondu bijakajak faa. ²⁰ Af’aritin, abe n’árimuñ boko ti kámiñu koonuun, aañ ayakuun fu kasokoroor? Bare n’arifin árihin beejake, abe n’árimuñ boko ti kámiñu koonuun, bondu bijakajak faa t’Atambatun. ²¹ Iŋ’ite hu bondu h’Atambatun aruwuun fu, ábuki Kiris humuumo ajukajuk sílaam uŋu hoonuun hu, áwufooruunwufoor yooŋ bítim bu kaanuku man n’arisao ti hiñaawu. ²² Ámusut káhinu kaahoofoor, abe haajuus yooŋ húmusutee kajamu tu butumo. ²³ Hi kálafatino hu, anukanut; h’ajuke hu sílaam su, anuurut t’an, bare ásikasik eyakar yeene anaŋ t’Atambatun aa ajoonan ajoŋooree. ²⁴ Akina t’ekuruwa i, ayitayit t’enio wuhoofoor wute w’úne, kaanuku man n’úwasoor ni kaahoofoor ku núuyooso tu buroŋ beejoŋoore. Hee, iŋi busontaay bite bu Kiris h’aribaje fu káasuumaay. ²⁵ Ábuki fu árimoomi yéeni naane bíkarniina béetowutee, bare hahiye áribatikannee t’ahaawa u aa ajukaruun.

¹ Aruun yooŋ haare hu árijeŋgin bákayinuun. Af’árihin ii, bakaake tu boko, hutoof yooŋ káyilenut hirim hite Atambatun, ifi kajuk tu kunoŋk koonuun, n’iŋi káyilen. Abe bondu fe t’arisokutiin hirim, ² ábuki boko kajuku buŋ bu buroŋ boonuun bukuure fu, nu buŋ b’árijeŋginiin fu. ³ Káwari koonuun kuwarut káyemi kite tíyaŋ, naane birifaañu bite jísaŋg, man yooŋ jísaŋg jite ni kikaŋk ku, ajok bimeŋk bite éwurus i, ni bisiimo bite wañ weeseere wu. ⁴ Aaa, kuwarawar káyemi t’éhinda suhol soonuun, kite búwejet béeneenie abe ni bibeb. Káwari kondu kúbujaariit, abe kibajabaj t’Atambatun éñjeriŋ yómbokun. ⁵ Iyu i haare hu bakate ku kóŋkeyin kéeyilene ku, abe ni kayakar t’Atambatun ifi káwarianooro, ábuki kájeŋginajeŋgin bákayiniin. ⁶ Iyu i Saara af’áhinaani; ájeŋginajeŋgin Aburaham, abe kaanuku eeruwo, n’aŋ’aano «Anahaan úuma». Af’árihin meejake, abe afut’árikoleyi yooŋ doon fe, n’aŋ’áami hahiyu áriyemia naane akina. ⁷ Aruun yooŋ háyine hu, arijokoor haare hoonuun áwariee, abe n’áribaŋino kaanuku arireyit nu boko sembe. Arijokiin nu sumoŋu súsuba, ábuki kawarawar kabaju buroŋ béehabanaariit bu b’Atambatun ayak bu kawunu naane aruun. Af’árihin ii, doon utu dukolen kalawu koonuun. ⁸ Hirim húuma hiraanu hu honde: aribaj biyinoor bifeeneŋ, abe n’arijamoor yooŋ. Árimaŋioori naane bakati; áriyemi bakan kéeneenie, abe atum’ariyitooro hágila bakanuun kúŋgowulan. ⁹ An af’áhinuun beejakut, atum’arinukan; an af’álafatinuun, atum’arinukan yooŋ. Aruun árisoniyano kep, ábuki uŋu bondu h’Atambatun aruwuun fu, kaanuku eebin éesoniyanuun. ¹⁰ Bonde busokee fu ti Míkiñjin mu. Meenaan: «An af’ámaŋi kabaju buroŋ beejake, abe n’ajuk yooŋ kunak keetoofe, awarawar kawasu husoku ti bakan, ni haajuus. ¹¹ Awarawar kakamboor ni meejakut mu aŋ’áhin meejake mu, abe n’aŋ’áñiŋkaan eeŋes káasuumaay ku. ¹² Ábuki Atambatun aŋ’ajukar kéejube ku, aŋ’ajamatan yooŋ kalawu kooniin; bare aŋ’ásokum kiŋki káhin meejakut mu.» ¹³ Af’árihabanein ti siheluun kaanuku áriihin meejake, aañ aja fu káhinuuun meejakut? ¹⁴ Hutoof yooŋ ariwarawar kajuku sílaam aŋarkeyi naane aŋ’árihin meejake, kikawuun n’uŋu kutoof. Atum’árikoleyi an, abe atum’ariwas an eehohotanuun. ¹⁵ Bare arijok Kiris tu suhol soonuun naane Anahaan oonuun. Arifare ko kireyi fe kásafin an fe eeyakuun kákandijen iŋ’ite eyakar yeeemo i t’aruun. ¹⁶ Abe n’aribeben tíŋ, abe n’arisaaho yooŋ ti kásafin kooniin. Ñúwejet ñoonuun ñukuur but, kaanuku man bakan ifi kajuus kasaanuun, man yooŋ ni kasok bike tu buroŋ boonuun ni Kiris beejake bu, ni kafuño. ¹⁷ Ábuki t’Atambatun ámaŋie, ahaŋ kajaku an n’ajuk sílaam o ti káhinu meejake, bala ajuk so o ti káhinu meejakut. ¹⁸ Múniyo Kiris humuumo aketaket hifeeneŋ, abe hiraanu, bija tu wuhoofoor wute kúŋgowulan ku. Akina eeemo u an eejake n’aket bija t’énafuta, kaanuku éehinuun ariibukan n’Atambatun. Enio yi kayoole fu, bare n’ábatikannee buroŋ tu Búwejet Beenabe bu. ¹⁹ Tu Búwejet bondu t’aje fu eewaare ñúwejet ñite keekete ku keeemo ku t’ekulu i. ²⁰ Keekete ku bokondu kaamo fu bakate ku kóŋkeyin kéejeŋginut ku Atambatun o ti kanahan kooniin ni kámuñu, kóyin ki Nowe áyemie ku tu burok bite esahar i. Bakan keefamut, kaamo hutok ni bákahaaji barebare ni kayooso t’esahar i, abe ni kafakanee tu móhujo mu. ²¹ Móhujo mondu múmoomi naane kaboste ku kiŋki kifakanuun hahiye. Kaboste kondu, káanukiiit kite kañawu ñubub ñite eni. Aaa, ko kite kájeŋgin Atambatun nu búwejet beekuure. Kaboste ku iŋi kifakan úne aŋarkeyi naane Yesu Kiris aritaneeritan t’eket i. ²² Ajaja t’etiir bufor bu, abe ondu t’ariikee inde baatos Atambatun. Emalaka i iŋi kajam te o, n’ébuur i, ni baabu buroon fe beebaje bu sembe beeemo bu t’etiir bufor bu.

¹ Makamu Kiris ajukajuk sílaam t’enio, ariwarawar yooŋ bifare kajuku sílaam naane akina, ábuki an af’ajuk sílaam t’enio, awasoora ni kaahoofoor. ² Náami áfiitin ti hahiye, tu kunak keeŋeñenuun ku t’etaam ye, buroŋ boonuun buwarawar káyemi naane t’Atambatun ámaŋie du bo, abe n’ariwas wúfaŋi wute kúŋgowulan ku. ³ Múniyo kóŋkeyin arifiyafiyo aa ti káhinu kite buroon bi kéeyilenut ku bimbi kámaŋi káhinu. Árikinaanakinaani tu huŋotu hu ni bakan k’ariseñeit ku, nu wúfaŋi weejakut wu, n’éwusan i, ni kahahan ku tu buñoofo nu tu búhujo bu, nu wuwaasen wute ñájiim ñu, abe bonde búfuñinanafuñinani. ⁴ Abe hahiyu naane aŋkut i árihin buroon beejakut bu ni kéeyilenut ku, kajahalaa, abe bokondu ti kálafatinuun. ⁵ Bare boko bibin kakamu Atambatun bi káhine bu fe. Akina afaraa kajoonan keeroŋe ku ni keekete ku. ⁶ Iŋ’ite ho i Hirim Heetoofe hu husokee fu yooŋ keekete ku. Kajoonaneejoonan uŋu buroon bi káhine bu t’etaam ye boko buroŋ, bare hahiye Búwejet Beenabe bu nu búyokunaniin kaanuku man ni káyini karoŋu naane Atambatun. ⁷ Kamoosen kite etaam i kulohena. Náami buroŋ boonuun buwarawar kajoŋoor, abe n’arijok kikawuun man n’áriyini kalawu. ⁸ Beehaŋe bu fe beemo fu árimaŋioori dómbokun, ábuki kámaŋioori aŋ’ahok wuhoofoor weehooje. ⁹ Ariwananoor atoofee tu sunuuf soonuun, atum’aŋ’arifutanoor. ¹⁰ Atambatun awunuunwun arireyi fe bifehe bite káyokunan bakaaku, huruw fe aliik ti b’Atambatun awuno bu. Áriyemi naane eroka keejake keeemo ti káhinu bakaaku meejake mite m’Atambatun meewayoore mu. ¹¹ An eeemo ti kawaare awarawar kasoku kirim kite Atambatun. An eeemo ti káyokunan ake awarawar káhabanna sembe s’Atambatun awuno su, kaanuku man tu buroon bu fe Atambatun n’asokorooree iŋ’ite hu Yesu Kiris. Kániku ku kíyemi koone ku hiraanu, ni sembe su fe! Amiin. ¹² Kújakuwe, aruun k’ímaŋie-maŋie ku, atum’arijahale naane ariemo i ti sílaam sómbokun. Bondu bibajuunbaj kaanuku t’ajuk man múniyo áriyilenayilen t’Atambatun man yooŋ. Atum’ariyinoor n’ariene bondu buwarut kabaju. ¹³ Kikawuun kutoof kep aŋarkeyi naane aŋ’arimaat ti sílaam site Kiris, man hunak h’ésuk i eja hu kajuku kániku koone, n’aritoofan árihabanein. ¹⁴ Atoof t’aruun kane árilafatinee aŋarkeyi naane aruun eriboora yite Kiris, ábuki Búwejet béenike bu bite b’Atambatun bondu t’aruun. ¹⁵ An t’aruun af’ajuk sílaam, atum’áyemi am ayoole, man yooŋ am ákuwate, man yooŋ am áhine beejakut, man yooŋ am ayoosee ti báhamin bite ake. ¹⁶ Bare an af’ajuk sílaam aŋarkeyi naane akina Akarjen, atum’afuño. Aaa, aane kep Atambatun eyeehen naane ésuk i ii kaano akina an ite Kiris. ¹⁷ Hunak hite Kajoonan ku hireeŋa, abe t’ajab ti bakan kite Atambatun. Abe arko keejab t’úne, buŋ fíya bi bija fu búmuje ni keeteñekee ku káyilen Hirim Heetoofe hite h’Atambatun? ¹⁸ Naane Míkiñjin mu musoke i meene: «Arko kafaku kite kéejube ku kítaañataañi, buŋ fíya bi bija fu káyemi t’énafuta i n’ehoofoora i?» ¹⁹ Iŋ’ite ho aamo fu keeemo ku ti kajuku sílaam aŋarkeyi naane Atambatun ámaŋie bo, káhin beejake bu kep, abe ni kayit eyakar yeeniin fe kanaŋ te o éewuwaniin u, ábuki áwasaariit hirim h’asoke.

¹ Hahiye sifaaf soonuun k’ijonde fu. Íñje humuumam faaf naane aruun; ijukajuk ni ñíkinam Kiris o ti sílaam su, abe íñje kabaju yooŋ húrub ti kániku keeja ku káwufooree memee. Bonde b’ilaw fu n’aruun: ² arihaaw áwariee kaahaaw k’Atambatun ánihanuun ku. Atum’árihin kite bakan keenoŋkooranee, bare arinoŋk ariijukar ko naane t’Atambatun ámaŋie du. Atum’árihin burok bondu iŋi hiŋes ebaj, bare árihin bo aŋarkeyi naane ho hutoofuun n’áriyokunaniin. ³ Atum’ariŋes káhinu sembe ti bakan k’árinihanee ku, bare árihin man kaahaaw ku ni kiŋes kaliikool n’aruun. ⁴ Abe Kiris Aseef ite ehaawa i af’aja áŋaasin, n’aŋ’awunuun hisiibanu héenike, abe utu húbujo hikee. ⁵ Aruun yooŋ biñi bu, árijeŋgin sifaaf su. Abe aruun arireyi fe kéeyilene ku, atum’aŋ’ariyitooro tu búyokunanoor bu, ábuki Míkiñjin mu meenaan: «Atambatun aŋ’ásokum kiŋki kayitooro; kéeyitooraariit ku aŋ’áwufooriin kajaku koone.» ⁶ Náami áritetianooro hágila Atambatun eebaje u sembe, man n’abin ayituun t’etiir hunak h’áfiitene hu. ⁷ Abe n’ariwanan te o bakola boonuun fe, ábuki aŋ’ajokuun áwari aa. ⁸ Arijok kikawuun, abe n’áriwasiyoor! Ábuki anatoora oonuun Setani ondu ti kañaahoor naane éŋaŋ ti kanuuru kep, hiŋes aañ a aware fu kateŋu. ⁹ Arijok alitee ti káyilen ku, abe n’aŋ’aritandarisan te o, ábuki árimoomi kaanuku bakatuuun kéeyilene ku keeemo ku t’etaam i fe, sílaam sondu yooŋ s’ifi kajuk. ¹⁰ Sílaam soonuun iti sifiyo dómbokun. Atambatun eehaŋe u émaŋia úne, aruwuunruw bite kániku koone kéehabanaariit ku aŋarkeyi naane árihinahin ni Yesu Kiris t’afeeneŋ. O humuumo karitanuun ariisiiŋo, n’ayaŋgananuun yooŋ ti kawunuuun sembe, abe n’asiiŋanuun t’ayane. ¹¹ Sembe su síyemi soone su ko kireyi fe! Amiin. ¹² Silas áyokunanam fu íikiñjinuun eleetar yende yéetofie ee. T’íñje, akina ati ite bifeeneŋ. Ímaŋiuunmaŋi kayaŋganan kikaw, abe n’eenuun yooŋ káasuumaay kite Atambatun naane isokuun ee i keemo fu. Arijok te ko alitee. ¹³ Kéeyilene ku keeemo ku Babilon kasaafuun. Atambatun ajifaniin fu naane aruun. Añiam Mark asaafuun yooŋ. ¹⁴ Arisaafoor ti káfoonoor kite baatiaay. Aribaj káasuumaay arireyi fe, aruun ki Yesu Kiris akino ku.