Tiito

Enyarubha ya Pauro ku

Tiito

Obhukangati

Enyarubha inu yaangʼoorwa na omutumwa Pauro (1:1). Hanú yaaringa atarangʼoora enyarubha inu, Pauro yaakoranga emirimu gya Waryubha hamwi na Tiito, kwiginga rinú ryabhirikirwanga ega, Kirete. Hanú Pauro yaarwa eyo, akangʼoorera Tiito enyarubha inu, eya amaragiriryo eguru ya okwimiririra abheekirirya Kirete eyo. Yaahaana Tiito emirimu gya okusora abhakangati bha erikanisa. Kweki yaamutongera okwimya abheekirirya bha Kirete, kwa okubha bhaaringa-ho abheehigirya bha obhubheehi.

Amangʼana amaaru kunyarubha inu, garahunkana na aga munyarubha ya mbere eya Pauro ku Timoteo. Eramaahikana ega, eginyarubha ebhiri ginu, gyangʼoorwa kwibhaga rimwi. Hanú oreende okumanyiirirya eguru ya eringʼana nyabhurebhe rinú riringi kunyarubha inu, turakukomererya omaahe muginyarubha gya Pauro ku Timoteo.

Pauro aramukeeranʼya Tiito

¹Enyarubha inu, erwiri kuoni Pauro, omugaya wa Waryubha, na omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Yeesu Kiristu. Naatumwa naho okoorokererya abhantu bhanú bhaasorwa na Waryubha, bhature okumwikirirya na okumanya obhuheene eguru ya Yeesu Kiristu. Obhuheene bhuyo, bhurabhoorokererya okumwigwa Waryubha, ²na bhurabhahaana obhwisige bhwa obhuhoru bhwa koko. Waryubha yaabharaga obhuhoru bhuyo, kora ekyaro kitarabhumbwa, na weeki atakugamba obhubheehi. ³Mbe bhoono, eribhaga rinu ndyo Waryubha yaamwiri okutubhura Amangʼana gaaye Amajomu. Waryubha Omutuurya weetu yaamura ega, yangʼaane emirimu gya okuraarika amangʼana gayo.

⁴Ndakungʼoorera uuwe Tiito, omwana waani wa heene kuimani inú turasanga hamwi.

Ndakwendera eriruguto na omurembe okurwa ku Taata Waryubha na ku Kiristu Yeesu Omutuurya weetu, bhibhe hamwi na uuwe.

Emirimu gya Tiito kwiginga rya Kirete

⁵Hanú naarwa Kirete eyo, naakusabha uuwe otigare, naho otuure bhwaheene amangʼana agandi ganú gaatama, hamwi na okusora abhakangati bha erikanisa mumigi gyonsego, kya ego naakoorokererya.

⁶Omukangati wowonse wa erikanisa, areenderwa abhe omuntu unú atakugambwa obhubhiibhi kuryoryonse rirya. Abhe na omukari umwi ego, abhaana bhaaye, bhabhe abheekirirya, bhatabha abhakabhankanu kasi bhanú bhatakwigwa. ⁷Omukangati wa erikanisa, m-mwimiririri unú yaahaanwa emirimu gya Waryubha. Weeki areenderwa abhe omuntu unú atakugambwa obhubhiibhi. Atabha omuntu wa omutwe omukongʼu, atabha na enkoro, atabha omureebhi, atabha omutindi, kweki atabha na orunamba orubhiibhi rwa egimbirya. ⁸Nawe, abhe omuserenʼya, unú ahanjiri amajomu, owa okwiswa, omuheene, omurabhu wa omutima, na abhe owa okwiribhira. ⁹Abhe aragwata bhujomu amangʼana ga obhuheene eguru ya Yeesu Kiristu, kya ego yeehigiribhwa. Hayo nho, aratura okwimya abhantu kwa ameehigiryo ga obhuheene, na okubhahiga bhanú bharahakaana ameehigiryo gayo.

¹⁰Ndakukeerya ego, kwa okubha Kirete hayo, bhariho abhantu abhaaru bhanú bhataringi abheegwa, abheene bharagamba amangʼana ganú gataana obhwera, kweki m-babheehi, ekinene m-barya bharakomererya amangʼana ga egimiira gyabho gya Ekiyahudi. Abhantu bhayo, bhakaanibhwe okwihigirya, ¹¹kwa okubha bharahabhya abhantu mumigi emyaru. Bhareehigirya amangʼana ganú gatakwenderwa, naho bhanyoore egimbirya kwa eginjira egimbiibhi. ¹²Akare hayo, yaaringa-ho omurooti umwi, Omukirete owa ewaabho abheene, weeki yaagamba ega, “Abhakirete m-babheehi eginsiku gyonsego, bharingi kya egintyenyi eginhaari, m-banamba, kweki m-booro!” ¹³Amangʼana gayo n-ga maheene. Kwa ego, abhantu kya bhayo, obhenga orabhakemera kwa obhuhaari, naho obhabheere okunaga kumeehigiryo ga obhuheene. ¹⁴Bhatige okwitegeerera kweki amagano ga Ekiyahudi ganú gataana obhwera, na amaragiriryo ga abhantu bhanú bhaatiga obhuheene.

¹⁵Abhantu bhayo, bhareehigirya ega, bhiriho ebhintu ebhindi ebhya omugiro. Nawe, oni ndagamba ega, kubhantu bha emitima emijomu mumeeso ga Waryubha, ebhintu bhyonsego bhyaraamwa. Nawe, kubhantu abhakonu na bhanú bhatakumwikirirya Waryubha, ebhintu bhyonsego m-bya omugiro, kwa okubha ameetegeerero na emitima gyabho bhyahabha. ¹⁶Abheene bharagamba ega, bhamumanyiri Waryubha, nawe, amakorwa gaabho, garoorokya ega, bharamwanga. Abhantu bhayo, bharajimya, m-bajeemi, bhatakutura okukora eringʼana ryoryonse erijomu.

Ameehigiryo ga obhuheene

¹Bhoono uuwe Tiito, obhenga oreehigirya abhantu okuringʼaana na ameehigiryo ga obhuheene. ²Wihigiryenga abhakaruka, bhabhenga bhareeswa, abhasuuku, abha okwiribhira, bhabhenga abhaheene kuimani, kubhuhanje na kukwigumirirya.

³Egoego, abhakungu bhonse, obheehigirye bhabhe na egintungwa ginú giramugungya Waryubha. Bhatabha abhabheehi, abhareebhi, nawe, bhabhenga bhareehigirya amajomu, ⁴naho bhature okwihigirya abhakari abhahara, okuhanja abhasaaja bhaabho na abhaana bhaabho. ⁵Kweki, abhahara, bhabhenga abhantu bha okwiribhira, bhabhe na emitima gya heene, bhakorenga bhujomu emirimu mumigi gyabho, bhabhe abhantu bha heene, na bhasuukenga abhasaaja bhaabho. Obheehigirye bhakorenga ego, naho bhatakora eringʼana rya Waryubha rijeerwe.

⁶Egoego, abhamura bhonse, obhakomererye bhabhenga bhareeribhira. ⁷Na uuwe, oreenderwa okorenga amajomu, naho obhe ekirengekanʼyo kya okwihigirira-ko. Na kumeehigiryo gaaho, worokyenga obhuheene na obhusuuku. ⁸Ameehigiryo gaaho, gabhe ga obhuheene ganú gatakuhakaanibhwa na abhantu. Okorenga ego, naho nyoore omuntu areenda okugahakaanʼya, arore eginsoni, kwa okubha ataanyoore eringʼana rya okutugamba obhubhiibhi.

⁹Abhagaya bhonse, obheehigirye okwigwa abhakuru bhaabho, bhabhenga bharakora bhujomu kumangʼana gonsego, bhatahakaananʼya na abhakuru bhaabho. ¹⁰Bhatabheebhira, nawe, bhoorokye obhuheene bhwabho bhonsego, naho emirimu gyabho gikore abhantu abhandi bhajomererwe na ameehigiryo ga Waryubha Omutuurya weetu.

¹¹Obhenga oreehigirya amangʼana gayo, kwa okubha eriruguto rya Waryubha rinú riratuurya abhantu bhonsego, ritubhwirwe. ¹²Eriruguto riyo, riratwihigirya okwanga amabhiibhi na orunamba rwa ekyaro. Ego, eribhaga tukyari mukyaro munu, tubhenga tureeribhira, tubhenga abhaheene, na tubhenga turamwigwa Waryubha. ¹³Tubhenga ego, eribhaga turaganyirira orusiku rwa enonkwe, rurya rwa okuhunjuka kwa Yeesu Kiristu. Orusiku ruyo, arimaahikana mubhukuru bhwaye. Weeki ngʼo Waryubha weetu omukuru, na ngʼo Omutuurya weetu. ¹⁴Yeeruusya omwene okukwa kurusumo rwetu, naho atutuurye okurwa mubhusarya bhonsego. Yeendanga okuturaama, naho maheene tubhe abhantu bhaaye, bhanú twiruusirye okukora amajomu.

¹⁵Mbe bhoono, otumire obhutungi bhwaho, okwihigirya gayo gonsego, na wimye na okukemera abhantu. Na omuntu wowonse atakujeera.

Okukora amakorwa amajomu

¹Obhenga orahiitukya abhantu ega, bhasuukenga na okwigwa abha obhuturo na abhatungi bha ekyaro. Na bhabhenga bheeseemerye okukora kira eringʼana erijomu. ²Kweki obhakeerye ega, bhatatuka omuntu wowonse, bhatabha abhatindi, bhabhe abha eginkoro eginjomu, na bhabhenga abhanyoohu kubhantu bhonsego.

³Akare hayo, bheetu abheene bhonse, eribhaga twaringa tutaramwikirirya Yeesu, twaringa abhakangi, abhajeemi, kweki twaringa tungʼeenerwe. Twaringa abhagaya bha orunamba orubhiibhi rwa amanga amaaru ga ekyaro. Okwikara kwetu kwaringa kwa okukora amabhiibhi na orwango. Abhantu bhaaringa bharatubhihirirwa, na bheetu twaringa turabhabhihirirwa. ⁴Nawe, Waryubha Omutuurya weetu, akatoorokya ega, weeki m-muserenʼya na atuhanjiri bhukongʼu, akatutuurya. ⁵Yaatutuurya, etaringi kwa okubha, bheetu twakora eringʼana ryoryonse erya heene, nawe, n-kwa ekyabhira kyaye. Yaaturaama obhusarya bhwetu, kuyo nko okwibhurwa orwa kabhiri. Kweki yaatuhaana obhuhoru obhuhya kwa enjira ya Omutima Omurabhu.3:5 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu.⁶Waryubha yaatuhumirira Omutima Omurabhu kwa obhwaru, okuhitira ku Yeesu Kiristu, Omutuurya weetu, ⁷naho kwa eriruguto ryaye, tuture okubharwa okubha abhaheene na okunyoora obhuhoru bhwa koko bhunú tureesigira.

⁸Amangʼana gayo, n-ga maheene. Ndeenda ogakomererye bhukongʼu, naho bhanú bharamwikirirya Waryubha, bhatatiga okubha na ekituunyo kya okukora amajomu. Amangʼana gayo m-majomu, kweki gaana obhwera kubhantu bhonsego. ⁹Nawe, oteesohya muginhaka gya ekikangi, na okwitonda amariina ga eginganda gya bhajaaji, eriihe na eginhaka eguru ya amaragiriryo ga Musa.3:9 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. Gayo gonsego gataana obhwera bhobhonse. ¹⁰Omuntu unú aragwatanʼya abhantu, omukemere orwa mbere, omare omukemere orwa kabhiri. Nyoore ataribha omwigwa, otigane nawe kimwi. ¹¹Omanye ega, omuntu kya uyo, amariri okutiga obhuheene, m-muntu unú aragendererya okukora obhusarya. Weeki areebhuturira ekiina omwene.

Okukeeranʼya kwa okuraga

¹²Naamwiri okugya okwikara mumugi gwa Nikopori erya, kwibhaga rya embeho. Nawe, ndimutuma Aritema kasi Tukiko, kuuwe eyo. Hanú arihika, uuwe wanguhe okuuja Nikopori tumaahane. ¹³Okore ekituunyo okubheera Jeena, omoonjoori wa amaragiriryo urya, na Apooro. Obhahaane ebhintu bhyonsego bhya okubhabheera, naho bhatasuuhirwa ekintu kyokyonse kurugendo rwabho. ¹⁴Abheekirirya abharikyetu bhonse bheehigire okukora amajomu kwa ekituunyo, naho bhature okubheera abhantu bhanú bhataana ekintu. Hanú bharaakorenga ego, obhumenyi bhwabho bhurabha na obhwera.

¹⁵Abhantu bhonsego bhanú bharingi hamwi na oni hanu, bharakukeeranʼya. Mbe uuwe wonse, otukeeranirye abheekirirya abhahanje bhonsego. Eriruguto rya Waryubha ribhe hamwi na bheenyu bhonsego.