Abharuumi

Enyarubha ya Pauro ku

Abharuumi

Obhukangati

Enyarubha inu yaangʼoorwa na Pauro, omugaya wa Kiristu Yeesu (1:1). Eramaahikana ega, yaaingʼoora omwaka gwa mirongo etaanu na esansabha (56) okurwa okwibhurwa kwa Yeesu Kiristu, eribhaga yaaringa atarataarira omugi gwa Ruumi. Abhakiristu bhanú bhaaringa Ruumi eyo, bhaaringa bheesangeenʼye, Abhayahudi na bhanú bhataringi Abhayahudi. Pauro yaangʼoora enyarubha inu, na okuituma Ruumi, naho abhakeerye Abhakiristu bha Ruumi, kya ego abheekirirya bha Yeesu Kiristu bhareenderwa okwikara mukyaro hanu. Eimani yaabho, ebhe ku Yeesu Kiristu omwenego. Yaaringa areenda bhamanye ega, bharatura okunyoora eginyanko okurekana na eimani yaabho iyo.

Munyarubha inu, Pauro areehigirya amangʼana ga obhutuurya. Areehigirya ega, obhutuurya bhuyo, turabhunyoora okuhitira ku Yeesu Kiristu omwenego. Eringʼana erinene rinú riringi munyarubha inu, n-dinú riragamba ega, “Oni ntakurora eginsoni okuraarika Amangʼana Amajomu gayo, kwa okubha mbo obhuturo bhwa Waryubha obhwa okutuurya abhantu bhonsego bhanú bharamwikirirya Yeesu, okwambira ku Bhayahudi okuhikira kubhantu bhanú bhataringi Abhayahudi. Amangʼana Amajomu gayo, garoorokya kubhurabhu kya ego Waryubha arabhara abhantu okubha abhaheene embere yaaye. Abhantu bharabharwa okubha abhaheene embere ya Waryubha, okurekana na eimani eyenego” (1:16-17). Hamwi na gayo, Pauro aroorokya ega, obhutuurya bhunú turanyoora okuhitira ku Yeesu Kiristu, bhuratubheera okumungʼarira Waryubha (ekiseku kya 12-15).

Enkeeranʼya

¹Enyarubha inu, erwiri kuoni Pauro, omugaya wa Kiristu Yeesu. Oni naabhirikirwa okubha omutumwa1:1a Omutumwa. Maaha Abhatumwa mu Moonjooro eguru ya Amangʼana Amakongʼu. waaye, nkasorwa mbenga ndaraarika Amangʼana Amajomu ga Waryubha.1:1b Maaha mubhitabho bhya Amakorwa ga Abhatumwa 9:15; Abhagaratia 1:1, 15.²Amangʼana Amajomu gayo, ngo Waryubha yaaraga okurwa akare, okuhitira kubharooti bhaaye mu Mangʼoore Amarabhu. ³Amangʼana Amajomu gayo, ngo amangʼana eguru ya Omwana waaye. Omwana uyo, yeebhurwa kya omuntu, muhamati ya omukama Daudi.1:3 Daudi. Maaha eringʼana rinu mu Moonjooro eguru ya Amangʼana Amakongʼu.⁴Nawe, kwa okuhitira Omutima Omurabhu,1:4a Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. Waryubha yaamusora abhe Omwana waaye,1:4b Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. owa obhuturo bhonsego, hanú yaamuhyukya okurwa mubhaku. Yeesu Kiristu uyo, ngʼo Omukuru weetu. ⁵N-kuhitira kumwene, Waryubha yaangʼaana eriruguto rya okubha omutumwa waaye, naho abhantu bhonsego bhanú bhataringi Abhayahudi, bhature okumwikirirya na okumwigwa Omukuru Yeesu, na eriina ryaye rigungibhwe. ⁶Bheenyu bhonse muringi gati yaabho, mubhirikiirwe okubha abhantu bha Yeesu Kiristu.

⁷Ndabhangʼoorera bheenyu abheekirirya bhonsego bhanú muringi Ruumi eyo. Waryubha abhahanjiri bhukongʼu, na abhabhirikiiri, naho mubhe abhantu bhaaye abharabhu bha omutima.

Ndabheendera eriruguto na omurembe okurwa ku Taata Waryubha, na ku Mukuru Yeesu Kiristu, bhibhe hamwi na bheenyu.

Pauro areegomba okubhataarira abheekirirya bha Ruumi

⁸Naambe kwa okugamba ega, ndamukumya Waryubha okuhitira ku Yeesu Kiristu, kurusumo rwenyu bhonsego, kwa okubha, eimani yeenyu, emanyikeeni mukyaro kyonsego. ⁹Waryubha unú ndamukorera emirimu kwa omutima gwani gonsego, kwa okuraarikira abhantu Amangʼana Amajomu eguru ya Omwana waaye, amanyiri kya ego ndabhasabhira eribhaga ryonsego. ¹⁰Ndamusabha kira eribhaga ega, akaahanja, hamwi bhoono yangʼaane omweya gwa okuuja kubheenyu eyo. ¹¹Ndasabha ego, kwa okubha ndeegomba bhukongʼu okumaahana na bheenyu, naho mbahaane ebhibharo bhya emitima ebhya okwimya eimani yeenyu. ¹²Nko okugamba ega, turiimanʼya, eimani yeenyu erinyimya oni, na eimani yaani eribheemya bheenyu.

¹³Abhahiiri bhaani kuimani, ndeenda mumanye ega, mara kaaru naaringa ndeenda okuhika kubheenyu eyo, nawe, nawanyareero nkyaribhiirwe. Ndeenda niije kubheenyu eyo, naho ndute abhantu gati yeenyu, bhamusoorane Omukuru Yeesu, kya ego naakora kubhantu abhandi bhanú bhataringi Abhayahudi. ¹⁴Waryubha yaandagirirya mbenga ndaraarika Amangʼana Amajomu kubhantu bhonsego, ku Bhayunani na kubhanú bhataringi Abhayunani,1:14 Ku Bhayunani na kubhanú bhataringi Abhayunani. Eribhaga rinú enyarubha inu yaangʼoorwa, ekigambo kya Abhayunani na obhusimuka bhwabho, bhyamanyikana mubhyaro ebhyaru. Abhantu bhanú bhaaringa bhamanyiri okuhaira Ekiyunani, bhaajeeranga bhanú bhataaringa bhamanyiri okuhaira ekigambo kiyo, na okukora amangʼana ganú gararingʼaana na obhusimuka bhwa ekigambo kiyo. kubhasomi na kubhanú bhataringi abhasomi. ¹⁵Kwa ego, ndeegomba bhukongʼu, niije okubharaarikira Amangʼana Amajomu kora kubheenyu Ruumi eyo.

Obhuturo bhwa Amangʼana Amajomu ga Waryubha

¹⁶Oni ntakurora eginsoni okuraarika Amangʼana Amajomu gayo, kwa okubha mbo obhuturo bhwa Waryubha obhwa okutuurya abhantu bhonsego bhanú bharamwikirirya Yeesu, okwambira ku Bhayahudi okuhikira kubhantu bhanú bhataringi Abhayahudi. ¹⁷Amangʼana Amajomu gayo, garoorokya kubhurabhu kya ego Waryubha arabhara abhantu okubha abhaheene embere yaaye. Abhantu bharabharwa okubha abhaheene embere ya Waryubha, okurekana na eimani eyenego. N-kya ego Amangʼoore Amarabhu garagamba ega, “Omuheene aribhanga areekara kwa okunyikirirya.”1:17 Maaha mukitabho kya Habhakuki 2:4.

Waryubha arajibhya abhantu kwa obhusarya bhwabho

¹⁸Waryubha omwene, aroorokya kubhurabhu okurwa murwire ega, arajibhya abhantu bhanú bharamwanga na okukora amabhiibhi. Abhantu bhayo, bharaanga obhuheene bhwaye, okurekana na obhubhiibhi bhwabho. ¹⁹Nawe, etaringi ega, bhatamanyiri amangʼana ga Waryubha. Waryubha omwene yoorokya kubhurabhu amangʼana gaaye, kwa ego gamanyikeeni kubhantu. ²⁰Okurwa obhusimuka, Waryubha yaabhumba ebhintu bhyonsego. Okurwa eribhaga riyo, abhantu bharatura okumanya kya ego Waryubha aringi, kora onyoora bhatakumurora. Ebhintu bhinú yaabhumba bhiroorokya ega, Waryubha yaana obhuturo bhonsego bhwa koko, kweki ega, weeki ngʼo Waryubha, atariho oundi. Kwa ego, abhantu bhataana enjira ya okwibhagirira ega, bhatamumanyiri Waryubha. ²¹Onyoora bhamumanyiri Waryubha kya ego aringi, nawe, bhatakumugungya kora okumukumya ega, ngʼo Waryubha waabho. Ameetegeerero gaabho gatiyeeni na obhungʼeeni bhwabho bhutaana ekintu, bhwijwiri ekisunte. ²²Bhareeheema ega, mbo abha egintungwa, nawe, m-bakangi. ²³Bhatigiri okumusyengera Waryubha Omurabhu wa koko na koko, bharasyengera ebhisusano, bhinú bhirahunkana na abhantu bhanú bharakwa kya abhantu abhandi, egintyenyi, ebhinyonyi na bhinú bhireengʼuurira enda.

²⁴Kwa ekisigo kiyo, Waryubha abhatigiri bhabhe bharagwata orunamba orubhiibhi rwa emitima gyabho, kwa okukorerana amangʼana ga eginsoni kumibhiri gyabho. ²⁵Bhatigiri okwikirirya obhuheene bhwa Waryubha, bhagwatiri obhubheehi. Bharasyengera ebhibhumbwa na okubhikorera emirimu, nawe, bhatigiri okukora gayo ku Waryubha Omubhumbi unú areenderwa okugungibhwa koko na koko. Amina.

²⁶Kwa ekisigo kiyo, Waryubha abhatigiri bhabhe bharakora amangʼana ga eginsoni kya ego bhareenda. Abhakari bhatigiri okutumira emibhiri gyabho kya ego gyabhumbwa gitumirwe, nawe bharagitumira bhundi.1:26 Abhakari bhatigiri okutumira emibhiri gyabho kya ego gyabhumbwa gitumirwe, nawe bharagitumira bhundi. Ensonga yaaye niiga, Abhakari bhatigiri okuraarana na abhasaaja bhaabho, bhararaarana na abhakari abharikyabho.²⁷Egoego abhasaaja bhonse, bhatigiri okutumira emibhiri gyabho kya ego gyabhumbwa okutumirwa, omusaaja na omukari. Abhasaaja bhareegombana abheene kwa abheene, bharakora amangʼana ga eginsoni. Kwa okukora ego, bheesoreeri abheene obhujibhu bhunú bhuraringʼaana na amakorwa gaabho amabhiibhi.

²⁸Mbe, kwa okubha bhaangiri okumumanya Waryubha, kwa ego Waryubha wonse abhatigiri bhabhe bharagwata ameetegeerero gaabho amabhiibhi ga okwihabhya. Bhoono abhantu bharakora amangʼana ganú gatakwenderwa okukorwa. ²⁹M-bakori bha obhusarya bhwa amanga gonsego, amabhiibhi amanga gonsego, kweki bhaana orunamba rwa ebhintu bhyonsego na bhaana orwango. Bhareenda eritoongʼana, obhwiti na obhugwatanʼya. M-babheehi, m-bantu bha ameetegeerero amabhiibhi na m-bagambi bha abhantu, ³⁰m-bahaamirirya, na bharamubhihirirwa Waryubha. M-bakana, bhaana ekisiraani, kweki m-bantu bha ameeheemo na okwigungya. Na kira eribhaga bharatuna eginjira egihya gya okukora amabhiibhi. Bhatakusuuka abheebhuri bhaabho, ³¹m-bakangi, bhatakukunaanʼya egindago gyabho, bhataana obhuhanje kora ekyabhira kubharikyabho. ³²Abhantu bhayo, bhamanyiri bhujomu ega, omuntu akaakora amakorwa amabhiibhi kya gayo, arabha areenderwa okusikibhwa na Waryubha. Kora ego, bharagendererya okukora amabhiibhi, kweki bhareekiriranʼya na abhakori bha amakorwa amabhiibhi kya gayo.

Waryubha aribhuturira ekiina abhantu bhonsegobira omungʼaho

¹Mbe, uuwe Omuyahudi omurikyani, orabhuturira ekiina abhantu abhandi bhanú bharakora amangʼana gayo. Nawe, kora uuwe omwene otakutura okwibhagirira embere ya Waryubha! Maaha, hanú orabhuturira ekiina abhandi, nho oreebhuturira ekiina uuwe omwene, kwa okubha amangʼana amabhiibhi ganú bharakora, ngo uuwe omwene wonse orakora. ²Bheetu tumanyiri ega, Waryubha arabhuturira ekiina kwa obhuheene abhantu bhanú bharakora amangʼana kya gayo. ³Nawe bhoono, uuwe orabhuturira ekiina abhandi enu uuwe omwene wonse, orakora amangʼana gayogayo. Oramanya ega, oringʼosa obhubhuturi bhwa ekiina bhwa Waryubha? ⁴Waryubha m-muheene bhukongʼu, arakumaahira ekyabhira bhukongʼu, na arakwigumirirya bhukongʼu. Nawe bhoono, uuwe oreenda okujeera gayo gonsego? Otamanyiri ega, arakoorokya obhujomu bhwaye, naho oture okumwihunjurira? ⁵Uuwe uuna ekisiraani, kweki oraanga okumwihunjurira Waryubha. Kwa ego, oreekumanirya obhujibhu kurusiku runú Waryubha aribhuturira ekiina abhantu, kwa obhuheene.

⁶Orusiku ruyo, Waryubha arimuriha kira omuntu okuringʼaana na amakorwa gaaye.2:6 Maaha mukitabho kya Egijabhuri 62:12.⁷Aribhahaana obhuhoru bhwa koko, abhantu bhanú bhareegumirirya okukora amajomu, kwa okubha bharatuna eginkuma, obhusuuku, na obhuhoru bhunú bhurarwa ku Waryubha. ⁸Nawe, aribhajimira na okubhajibhya abha omungʼaho, bhanú bharaanga obhuheene, na bharakora amabhiibhi. ⁹Abhantu bhonsego bhanú bharakora amabhiibhi, bharinyoora enyanko enduru bhukongʼu,2:9 Maaha mukitabho kya 2 Abhatesaronike 1:6. okwambira ku Bhayahudi, na kora kubhantu bhanú bhataringi Abhayahudi. ¹⁰Nawe, abhantu bhonsego bhanú bharakora amajomu, bharinyoora eginkuma, obhusuuku, na omurembe, okwambira ku Bhayahudi, na kora kubhantu bhanú bhataringi Abhayahudi. ¹¹Waryubha atakungʼahirya omuntu wowonse.

¹²Abhantu bhanú bhataringi Abhayahudi, bhanú bharakora obhusarya bharisikibhwa, kora nyoore bhatamanyiri amaragiriryo ga Musa.2:12 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. Abhayahudi bhamanyiri amaragiriryo gayo, nawe, nyoore bharaakore obhusarya, bharibhuturirwa ekiina okuringʼaana na amaragiriryo gayo. ¹³Bharibhuturirwa ekiina, kwa okubha Waryubha atakumubharira obhuheene omuntu unú areetegeerera amaragiriryo gayo okwenego, nawe unú arakora ganú amaragiriryo gareenda akore. ¹⁴Abhantu bhanú bhataringi Abhayahudi, bheeki bhatamanyiri amaragiriryo gayo. Kora ego, nyoore bharaakore amajomu okurekana na ameetegeerero gaabho, na amangʼana gayo n-kya ego amaragiriryo ga Musa garoorokya bhakore, hayo eroorokya ega, bhamanyiri okukora ganú gareenderwa. ¹⁵Abhantu bhayo bharoorokya kwa amakorwa gaabho ega, kinú kireenderwa mumaragiriryo, kingʼoorerwe mumitima gyabho. Kora ameetegeerero gaabho, gareemiririra eringʼana riyo, kwa okubha ahandi garabhajongera, na ahandi garabheebhagirira. ¹⁶Ego niigo eribha, orusiku rwa obhubhuturi bhwa ekiina. Waryubha aribhuturira ekiina abhantu okuhitira ku Kiristu Yeesu, kora kumeetegeerero gaabho ga ekinyerera. Amangʼana Amajomu ganú ndaraarika niigo garingi.

Abhayahudi na amaragiriryo ga okusaarwa

¹⁷Bhoono uuwe unú oreebhirikira ega, Omuyahudi eritinya, oreesigira okubha omuheene embere ya Waryubha kwa okugwata amaragiriryo ga Musa. Kweki oreegungya ega, uuwe m-muntu wa Waryubha. ¹⁸Oreerora ega, omanyiri gonsego ganú Waryubha ahanjiri, na ega, omanyiri amajomu gonsego, kwa okubha weehigiribhwa amaragiriryo gaaye. ¹⁹Oreerora ega, oreenderwa okoorokererya abhantu bhanú bhataringi Abhayahudi, kya omuntu unú aroorokererya abhahoku, kasi kya ekorobhoi inú eramirikira abhantu bhanú bharingi mukisunte.2:19 Maaha mukitabho kya Isaaya 42:6-7, 49:6, 60:3.²⁰Oreerora ega, uuwe m-mwihigirya wa abhantu bhanú bhatamanyiri obhuheene bhwa Waryubha, na abhaana abharera,2:20 Abhaana abharera. Bhanu m-bantu bhanú bhataraamba okwihigira eringʼana rya Waryubha, bhakyari abhakangi kya abhaana abharera. kwa okubha amaragiriryo garakukeerya egintungwa gyonsego na obhumanyi bhwa obhuheene. ²¹Uuwe oreehigirya abhantu abhandi, nawe, n-kwaki uuwe omwene otakukora ganú oreehigirya? Oreehigirya abhandi ega, bhateebha, nawe, n-kwaki uuwe omwene oreebha? ²²Uuwe oreehigirya abhantu ega, bhatakora ameega kibhara, nawe, n-kwaki uuwe omwene orakora ameega kibhara? Uuwe orabhihirirwa ebhisusano bhya abhakuru, nawe, n-kwaki uuwe omwene oreebha ebhintu mumasyengerero munú bhirasyengererwa-mo? ²³Uuwe oreegungya ega, omanyiri amaragiriryo ga Waryubha, nawe, enu orakora amangʼana ga okumujeera Waryubha kwa okusarya amaragiriryo gaaye. ²⁴N-kya ego Amangʼoore Amarabhu garagamba ega, “Eriina rya Waryubha riratukwa na abhantu bhanú bhataringi Abhayahudi, okurekana na amakorwa amabhiibhi ganú murakora.”2:24 Maaha mubhitabho bhya Isaaya 52:5; Ejekieri 36:20, 22.

²⁵Okusaarwa kwaho kurabha na obhwera, nyoore orakora kya ego amaragiriryo garoorokererya. Nawe, nyoore orasarya amaragiriryo, okusaarwa kwaho kutakubha na obhwera bhobhonse, kweki uuwe orabha kya omuntu unú atakusaarwa. ²⁶Kwa ego, nyoore omuntu unú atakusaarwa araakore kya ego amaragiriryo garoorokererya, Waryubha aramwikirirya kya omuntu unú arasaarwa. ²⁷Abhantu bhanú bhataringi Abhayahudi bhatakusaarwa, nawe, nyoore bharaakore kya ego amaragiriryo garoorokererya, amakorwa gaabho garoorokya ega, uuwe Omuyahudi m-mukori wa obhusarya. Eribha ego, kwa okubha uuwe Omuyahudi unú arasaarwa, kweki omanyiri amaragiriryo ga Waryubha, nawe, orasarya amaragiriryo gayo. ²⁸Mbe, mumanye ega, etaringi ega, kira unú yeebhurwa na Omuyahudi, aribha Omuyahudi eritinya. Omuntu atakutura okubha Omuyahudi eritinya, kwa okusaarwa omubhiri okwenego. ²⁹Tiigo-ha kora ahake! Omuyahudi eritinya ngʼ-unú aramwigwa Waryubha kwa omutima gwaye gonsego. Okusaarwa kwa heene, kurakorwa na Omutima Omurabhu, mumutima gwa omuntu, kutaringi kwa okugwata amaragiriryo ga Musa. Omuntu kya uyo, atakunyoora eginkuma okurwa kubhantu, nawe, aragungibhwa na Waryubha omwene.

Waryubha ngʼ-wa heene ku Bhayahudi

¹Bhoono mbe, kuuna obhwera-ki, okubha Omuyahudi? Na okusaarwa kuuna obhwera-ki? ²M-buheene ega, okubha Omuyahudi kuuna obhwera obhwaru. Ekintu kya okwamba niiga, Waryubha yaabhagwatya Abhayahudi amangʼana gaaye. ³Nawe, Abhayahudi abhandi bhataabha abhaheene kukukora amangʼana gaaye. Bhoono tugambe ega, kwa okubha abhantu bhayo bhataringi abhaheene ku Waryubha, bharamukora Waryubha wonse atige okubha omuheene kukukora amangʼana ganú yaabharaga? ⁴Tiigo-ha kora ahake! Abhantu bhonsego m-babheehi, nawe, Waryubha m-muheene, yoorokerye ega, arakora kinú aragamba. N-kya ego Amangʼoore Amarabhu garagamba eguru yaaye ega,

“Emanyikane kubhantu ega,

amangʼana gaaho n-ga obhuheene.

Na kubhubhuturi bhwa ekiina,

uuwe orahiga.”3:4 Maaha mukitabho kya Egijabhuri 51:4.

⁵Nawe, abhantu abhandi bharatura okugamba ega, “Obhusarya bhwetu Abhayahudi, mbo bhuroorokya ega, Waryubha ngʼ-wa obhuheene kubhubhuturi bhwa ekiina bhwaye. Nawe, nyoore Waryubha aratujibhya, bhoono tugambe ega, ataringi wa obhuheene?” ⁶Tiigo-ha kora ahake! Ekaabheeri ego, Waryubha akaabheeri egaki na obhuheene bhwa okubhuturira ekiina abhantu bha mukyaro? ⁷Kweki bharatura okugamba ega, “Bheetu tukaakora obhusarya, abhantu abhandi bharatura okurora kubhurabhu ega, Waryubha m-muheene, bhonse bharaagendererye okumugungya. Bhoono, kwaki tukyabhuturirwa ekiina ega, m-bakori bha obhusarya?” ⁸Ego, n-kya okugamba ega, “Tubhenga turakora obhusarya, naho Waryubha areete amajomu.” Abhantu abhaaru bharatuhaamirirya ega, tureehigirya ego! Bharijibhibhwa okuringʼaana na obhubhiibhi bhwabho.

Atariho omuntu omuheene embere ya Waryubha

⁹Bhoono, tugambe-ki? Tugambe ega, bheetu Abhayahudi tuuna obhwera okukira abhantu abhandi bhanú bhataringi Abhayahudi? Tiigo-ha kora ahake! N-kya ego naamara okubhakeerya ega, Abhayahudi na bhanú bhataringi Abhayahudi, bhonsego bharatungwa na obhubhiibhi. ¹⁰N-kya ego Amangʼoore Amarabhu garagamba ega,

“Atariho omuntu omuheene kora oumwi, embere ya Waryubha.

¹¹Atariho omuntu unú amanyiri amangʼana ga Waryubha,

kweki atariho unú aratuna okumumanya.

¹²Abhantu bhonsego bhaatigiri okumwigwa Waryubha,

bhonsego bhatakungʼarira kweki embere ya Waryubha.

Atariho omuntu unú arakora amajomu,

atariho kora oumwi.”3:10-12 Maaha mubhitabho bhya Egijabhuri 14:1-3, 53:1-3; Omuraariki 7:20.

¹³“Eminwa gyabho n-kya egimbihira ginú gyaasamiriiri,

egindimi gyabho giragamba obhubheehi.”3:13a Maaha mukitabho kya Egijabhuri 5:9.

“Okurwa muminwa gyabho,

gararwa-mo amangʼana amaruru kya obhusungu bhwa enjoka.”3:13b Maaha mukitabho kya Egijabhuri 140:3.

¹⁴“Eminwa gyabho giijwiri ameehiimo,

na amangʼana ganú garanyahaara.”3:14 Maaha mukitabho kya Egijabhuri 10:7.

¹⁵“Amaguru gaabho m-mangu okukenya okugya okwita.

¹⁶Hohonse hanú bharagya,

bharasarya na okusikya.

¹⁷Bhatamanyiri okwikarana na abhantu abhandi kwa omurembe.”3:15-17 Maaha mukitabho kya Isaaya 59:7-8.

¹⁸“Bharaanga okumwigwa Waryubha.”3:18 Maaha mukitabho kya Egijabhuri 36:1.

¹⁹Mbe, bheetu tumanyiri ega, hanú Amangʼoore Amarabhu gararagirirya ekintu kyokyonse, gararagirirya abhantu bhanú bhaahaanwa amaragiriryo ga Waryubha. Amaragiriryo gaatuurwa-ho, naho Abhayahudi bhatakaaja okubha na ekiihaamiriryo kya okwibhagirira hanú Waryubha aribhuturira ekiina ekyaro. Kwa ego, erimaahikana kubhurabhu ega, abhantu bhonsego bhareenderwa okubhuturirwa ekiina na Waryubha. ²⁰Atariho omuntu wowonse unú arabharwa okubha omuheene embere ya Waryubha, kwa okugwata amaragiriryo ga Musa. Emirimu gya amaragiriryo gayo, n-koorokya ega, abhantu bhonsego m-bakori bha obhusarya.

Omuntu arabharwa okubha omuheene kwa okumwikirirya Yeesu

²¹Nawe bhoono, Waryubha atoorokerye enjira yaaye, ya okubhara abhantu okubha abhaheene embere yaaye, na etaringi kwa enjira ya amaragiriryo. Kora amaragiriryo ga Musa na amangʼoore ga abharooti garagamba ego kubhurabhu. ²²Enjira iyo, nu-kumwikirirya Yeesu Kiristu. Abhantu bhonsego bhanú bharamwikirirya Yeesu Kiristu, Waryubha arabhabhara okubha abheene embere yaaye. Atakungʼahirya omuntu wowonse, ²³kwa okubha abhantu bhonsego bhaakora obhusarya, na okusuuhirwa na obhukuru bhwa Waryubha. ²⁴Nawe, kwa eriruguto rya Waryubha, bheekiririibhwe okubha abhaheene embere yaaye bhusa. Bhatunguriibhwe okurwa mubhusarya bhwabho, okuhitira ku Kiristu Yeesu.3:24 Maaha mubhitabho bhya Abhaefeso 1:7; Abhakorosai 1:14.²⁵Waryubha yaamukora Yeesu abhe ekimwenso3:25 Ekimwenso. Maaha eringʼana rinu mu Moonjooro eguru ya Amangʼana Amakongʼu. kya okwigwanʼya abhantu na Waryubha, naho abhantu bhaabhirwe obhusarya bhwabho, kwa okwikirirya ega, Yeesu yaakwa kurusumo rwabho. Waryubha yaakora ego, naho yoorokye ega, ngʼ-wa obhuheene, kwa okubha yeegumirirya, ataabhajibhya kwa amabhiibhi ganú bhaakora enyuma eyo. ²⁶Yaakora ego, naho yoorokye obhuheene bhwaye kwibhaga rinu, kwa okubhara abhantu bhonsego bhanú bharamwikirirya Yeesu, okubha abhaheene embere yaaye.

²⁷Kwa ego, eringʼana riyo, riraturibhira okwigungya, kwa okubha, kora bheetu tutakubharwa okubha abhaheene ku Waryubha, kwa okugwata amaragiriryo, nawe, kwa okumwikirirya Yeesu okwenego. ²⁸Turagamba ego, kwa okubha tumanyiri ega, Waryubha ngʼo arabhara omuntu okubha omuheene kwa okumwikirirya Yeesu okwenego, etaringi kwa okugwata amaragiriryo ga Musa. ²⁹Bhoono, Waryubha ngʼ-Waryubha wa Abhayahudi abheenego? Ataringi wa abhantu abhandi bhanú bhataringi Abhayahudi? Obhuheene niiga, Waryubha ngʼ-Waryubha wa abhantu bhonsego! ³⁰Ariho Waryubha umwi ego, kweki eriho enjira eimwi ego, ya okubhara abhantu okubha abhaheene embere yaaye. Abhayahudi na abhantu bhanú bhataringi Abhayahudi, bhonsego bharabharwa okubha abhaheene kwa okumwikirirya Yeesu okwenego. ³¹Bhoono mbe, hanú turakomererya okumwikirirya Yeesu, n-kugamba ega, amaragiriryo ga Musa gataana obhwera? Tiigo-ha kora ahake! Nawe, tukaamwikirirya Yeesu, nho turabha toorokerye kubhurabhu, gonsego ganú amaragiriryo ga Musa garoorokererya.

Abhurahamu yaaringa omuheene embere ya Waryubhakwa eimani yaaye

¹Bhoono, tugambe-ki eguru ya taata Abhurahamu?4:1 Abhurahamu. Maaha eringʼana rinu mu Moonjooro eguru ya Amangʼana Amakongʼu. Kwa egaki Waryubha yaamubhara okubha omuheene embere yaaye? ²Nyoore turaagambe ega, Abhurahamu yaabharwa okubha omuheene embere ya Waryubha, okurekana na amakorwa gaaye amajomu, nho akaabheeri na ekintu ekya okwiheemera. Nawe, obhuheene niiga, ataana kyokyonse kya okwiheemera embere ya Waryubha, ³kwa okubha Amangʼoore Amarabhu garagamba ega, “Abhurahamu yaamwikirirya Waryubha, kwa ego, Waryubha akamubhara okubha omuntu omuheene embere yaaye.”4:3 Maaha mukitabho kya Obhwambiro 15:6.

⁴Mbe, hanú omuntu araakore emirimu, amariho gaaye gatakubha omutuho, nawe ni-kintu kinú areenderwa arihwe. ⁵Nawe, omuntu unú atakwisigira amakorwa gaaye amajomu, araamwikirirye Waryubha unú aramubhara omuntu omusarya okubha omuntu omuheene, uyo, Waryubha aramubhara okubha omuheene, okurekana na eimani yaaye. ⁶N-kya ego omukama Daudi yaagamba, eguru ya enonkwe ya omuntu unú Waryubha aramubhara okubha omuheene, etaringi kwa amakorwa gaaye amajomu. Daudi yaagamba ega,

⁷“Nyakara abhantu bhanú Waryubha abhaabhiiri amabhiibhi gaabho,

na okubharuusirya-ho obhusarya bhwabho.

⁸Nyakara omuntu unú Omukuru Waryubha atakumubharira obhusarya bhwaye.”4:7-8 Maaha mukitabho kya Egijabhuri 32:1-2.

⁹Bhoono, enonkwe iyo n-kurusumo rwa abhantu bhanú bharasaarwa abheenego, kasi na kubhanú bhatakusaarwa? Ndabhahiitukya kya ego Amangʼoore Amarabhu garagamba ega, Waryubha yaamubhara Abhurahamu okubha omuntu omuheene okurekana na eimani yaaye.4:9 Maaha mukitabho kya Obhwambiro 15:6.¹⁰Nawe, riyo ryeebhuka ruuha? Waryubha yaamubharira Abhurahamu okubha omuntu wa obhuheene, hanú yaaringa amariri okusaarwa, kasi hanú yaaringa akyari omuriisya? N-hanú yaaringa akyari omuriisya! ¹¹Okusaarwa kwaye, kwaringa ekimanyiiriryo kinú kyoorokya ega, Waryubha yaamubharira okubha omuheene okurekana na eimani yaaye. Eimani iyo, yaaringa nayo hanú yaaringa akyari omuriisya. Kwa enjira iyo, Abhurahamu yaakorwa okubha taata owa bhonsego bhanú bhareekirirya, kora bhanú bhatakusaarwa, naho kora bheeki bhonse, bhabharwe okubha abhaheene ku Waryubha. ¹²Egoego, Abhurahamu yaakorwa okubha esewaabho bhanú bharasaarwa, nyoore bharamwikirirya Waryubha. Abhurahamu ni-sewaabho bhanú bharamwikirirya Waryubha, kya ego weeki yaamwikirirya Waryubha, eribhaga yaaringa akyari omuriisya.

¹³Waryubha yaamuraga Abhurahamu na orwibhuro rwaye ega, akaabhaheeri ekyaro kyonsego kibhe engabho yaabho.4:13 Maaha mukitabho kya Obhwambiro 22:17-18. Waryubha ataamuraga ego, kwa okubha Abhurahamu yaaringa arakunaanʼya amaragiriryo, nawe, kwa okubha yaaringa aramwikirirya Waryubha. Nho, Waryubha akamubhara okubha omuheene embere yaaye. ¹⁴Nyoore abhantu abha amaragiriryo mbo bhakaagabhiri ganú Waryubha yaaraga, kwa okubha bhakuneenʼye amaragiriryo, hayo nho eimani ku Waryubha, ekaabheeri m-busa. Na endago ya Waryubha yonse, ekaabheeri ya obhubheehi. ¹⁵Ndagamba ego, kwa okubha amaragiriryo, ngo garareeta obhujibhu. Nawe, nyoore amaragiriryo gatakaabheeri-ho, okusarya amaragiriryo konse kutakaabheeri-ho.

¹⁶Kwa ego, endago ya Waryubha ereesigira eimani. Iyo eroorokya ega, endago ni-riruguto rya Waryubha, na m-buheene kurwibhuro rwonsego rwa Abhurahamu. Etaringi ku Bhayahudi abheenego bhanú bharakunaanʼya amaragiriryo, nawe, kora kubhanú bharamwikirirya Waryubha, kya ego Abhurahamu yaakora. Weeki ngʼo taata weetu bheetu bhonsego. ¹⁷N-kya ego Waryubha yaamuraga Abhurahamu mu Mangʼoore Amarabhu ega, “Nkukoreri okubha esewaabho ebhyaro ebhyaru.”4:17 Maaha mukitabho kya Obhwambiro 17:5. Endago iyo ngʼ-ya heene embere ya Waryubha, unú Abhurahamu yaamwikirirya. Waryubha uyo, ngʼo arahaana abhaku obhuhoru, na araragirirya ebhintu bhinú bhitaaringa-ho, bhibhe-ho.

¹⁸Hanú Abhurahamu yaakeeribhwa amangʼana gayo, gakamukongʼera. Nawe, akagendererya okugeekirirya na okwisiga ega, Waryubha arimukora okubha esewaabho ebhyaro ebhyaru, kwa okubha Waryubha yaaringa amukeererye ega, “Abhantu bha orwibhuro rwaho, bharibha abhaaru bhukongʼu kya eginjota.”4:18 Maaha mukitabho kya Obhwambiro 15:5.¹⁹Eribhaga riyo, Abhurahamu yaaringa na emyaka muna egana rimwi. Yaaringa amanyiri ega, omubhiri gwaye gwaringa muna gukwiri, na Saara omukari waaye, yaaringa omugumba. Nawe, eimani ya Abhurahamu etaasuuha. ²⁰Kweki, ataabha na enkubhi yoyonse, eguru ya endago inú Waryubha yaaringa amuragiri. Nawe, akagendererya okunaga kuimani na okumugungya Waryubha, ²¹kwa okubha yaaringa amanyiri kwa obhuheene ega, Waryubha aratura okumukorera ganú yaaringa amuragiri. ²²Nu-kurekana na eimani iyo, Waryubha yaamubhara okubha omuntu omuheene embere yaaye.4:22 Maaha mukitabho kya Obhwambiro 15:6.

²³Bhoono, amangʼana ganú garagamba ega, “Waryubha yaamubhara okubha omuntu wa obhuheene embere yaaye,” gataangʼoorwa kurusumo rwa Abhurahamu omwenego, ²⁴nawe, gaangʼoorwa kora kurusumo rwetu bhonse. Amangʼana gayo garatukeerya ega, tukaamwikirirya Waryubha unú yaamuhyukya Omukuru Yeesu okurwa mubhaku, hayo nho bheetu turabharwa okubha abhaheene embere ya Waryubha. ²⁵Waryubha yaamuruusya Yeesu, naho akwe kurusumo rwa obhusarya bhwetu, akamuhyukya okurwa mubhaku, naho bheetu tubharwe okubha abhaheene embere yaaye.

Eginonkwe gya okumwikirirya Waryubha

¹Mbe, Waryubha atubhariri okubha abhaheene embere yaaye, okurekana na eimani yeetu. Kwa ego, tuuna omurembe na Waryubha kwa okuhitira ku Mukuru weetu Yeesu Kiristu. ²Kwa enjira ya okumwikirirya Yeesu, Waryubha atuheeri eriruguto ryaye, rinú turingi-mo. Turajomerwa bhukongʼu, kwa okubha tureesiga ega, turisanga hamwi na Waryubha mubhukuru bhwaye. ³Tutakujomerwa kwa gayo ageenego, nawe, turajomerwa kora kuginyanko gyonsego, kwa okubha tumanyiri ega, eginyanko girareeta obhwigumirirya. ⁴Obhwigumirirya bhurakora turanaga mumitima gyetu, na okunaga mumitima kurakora turabha na obhwisige. ⁵Obhwisige bhuyo, bhutakutura okukora turore eginsoni, kwa okubha Waryubha atuhumiriiri obhuhanje bhwaye mumitima gyetu, okuhitira Omutima waaye Omurabhu.

⁶Mbe, hanú bheetu twaringa tukyari abhanyooheeru, Kiristu yaaja akatukwira bheetu abhasarya, hanú ryahika eribhaga rinú Waryubha yaaringa aseemerye. ⁷Maheene m-bukongʼu kumuntu wowonse okwiruusya okukwa, kurusumo rwa omuntu omuheene. Nawe, hamwi omuntu ariko okwiruusya okukwa, kurusumo rwa omuntu omujomu. ⁸Nawe, Waryubha yaatoorokya ega, atuhanjiri bhukongʼu, kwa okubha hanú bheetu twaringa tukyari abhakori bha obhusarya, Kiristu yaakwa kurusumo rwetu.

⁹Mbe, nyoore tubharirwe okubha abhaheene embere ya Waryubha, kwa enjira ya okwitika kwa amanyinga ga Yeesu Kiristu, maheene turituuribhwa okurwa kubhujibhu bhwa Waryubha okuhitira ku Yeesu. ¹⁰Hanú bheetu twaringa tukyari abhasigu bhaaye, Waryubha yaatugwatanʼya nawe, okuhitira oruku rwa Omwana waaye. Kwa ego, ekinene niiga, kwa okubha twamara okugwatanibhwa nawe, okuhitira oruku rwa Omwana waaye, turituuribhwa okurwa kubhujibhu bhwa Waryubha okuhitira obhuhoru bhwa Omwana waaye. ¹¹Kora gataringi gayo ageenego, nawe, kora turatura okujomererwa obhumwi bhwetu obhuhya na Waryubha, kwa okubha nu-kuhitira ku Mukuru weetu Yeesu Kiristu, tugwataniibhwe na Waryubha.

Adamu yaatureetera oruku, nawe, Yeesu atuheeri obhuhoru

¹²Okuhitira kumuntu oumwi, obhusarya bhwasoha mukyaro, bhukareeta oruku. Okurekana na obhusarya bhuyo, abhantu bhonsego bharakwa, kwa okubha bhonsego m-bakori bha obhusarya. ¹³Obhusarya bhwakangata okusoha mukyaro, eribhaga amaragiriryo gatarabha-ho. Nawe, Waryubha ataabhara abhantu ega, m-basarya bha amaragiriryo, kwa okubha amaragiriryo gataaringa-ho. ¹⁴Mbe, okurwa kwibhaga rinú Adamu yaakora obhusarya, okuhikira kwibhaga rinú Musa yaahaanwa amaragiriryo, oruku rwaringa ruratunga abhantu, kora nyoore bhataakora obhusarya kya obhwa Adamu.

Mbe, Adamu yaaringa ekirengekanʼyo kya Yeesu Kiristu, unú akaajiri eribhaga erindi. ¹⁵Nawe, obhusarya bhwa Adamu, bhutakuringʼaana na eriruguto rya Waryubha. Obhusarya bhwa omuntu oumwi uyo, bhwakora abhantu bhonsego bhakwe okurekana na obhusarya bhwaye. Nawe, ariho oumwi oundi, Yeesu Kiristu, unú arabhahaana abhantu abhaaru omutuho gwa eriruguto rya Waryubha. Eriruguto rya Waryubha riyo, ritaana endengo, rirakira obhusarya bhwa Adamu bhukongʼu! ¹⁶Omutuho gwa eriruguto rya Waryubha riyo, gutakuringʼaana na ganú geebhuka okurekana na obhusarya bhunú Adamu yaakora. Okurekana na obhusarya bhwa omuntu oumwi uyo, Waryubha yaabhuturira ekiina abhantu. Nawe, hanú obhusarya obhwaru bhurakorwa na abhantu, Waryubha arabhara abhantu okubha abhaheene embere yaaye, okurekana na eriruguto ryaye. ¹⁷Obhusarya bhwa omuntu oumwi uyo Adamu, bhwakora oruku rutunge abhantu bhonsego. Nawe bhoono, abhantu bhonsego bhanú bharanyoora eriruguto rya Waryubha rinú ritaana endengo, bharabharwa okubha abhaheene embere yaaye. Bhayo bharitunga mubhuhoru bhwa koko, okuhitira kumuntu oumwi oundi, Yeesu Kiristu.

¹⁸Kwa ego, abhantu bhonsego bhaabhuturirwa ekiina okurekana na obhusarya bhwa omuntu oumwi, egoego abhantu bhonsego bharabharwa okubha abhaheene embere ya Waryubha na okuhaanwa obhuhoru bhwa koko, okurekana na obhuheene bhwa omuntu oumwi. ¹⁹Omuntu oumwi yaanga okumwigwa Waryubha, akakora abhantu bhonsego bhakabha abhakori bha obhusarya. Egoego, omuntu oumwi unú yaamwigwa Waryubha, arikora abhantu bhabhe abhaheene embere ya Waryubha.

²⁰Hanú amaragiriryo ga Musa gaaja, gakakora obhusarya bhwaruhe. Na hanú obhusarya bhwaaruha bhukongʼu, eriruguto rya Waryubha ryonse rikaaruha bhukongʼu. ²¹Mbe, obhusarya bhwaringa na eginguru gya okutunga abhantu, na okubhareetera oruku. Egoego, eriruguto riratunga abhantu na okubhabharira okubha abha obhuheene. Rirahaana abhantu obhuhoru bhwa koko, okuhitira ku Mukuru weetu Yeesu Kiristu.

Yeesu ngʼo yaahiga eginguru gya obhusarya

¹Bhoono tugambe-ki? Tugendererye okukora obhusarya, naho Waryubha agendererye okutuhaana eriruguto ryaye kwa obhwaru bhukongʼu? ²Tiigo-ha kora ahake! Bheetu tubheeri kya abhaku kwa amangʼana ga okukora obhusarya. Kwa ego, tutakutura okugendererya kweki okukora obhusarya. ³Mumanye ega, hanú twabhatiijwa, twagwatana na Kiristu Yeesu kuruku rwaye. ⁴Hanú twabhatiijwa, twaringa muna tukwiri na okubhiikwa hamwi nawe. Kiristu akamara akahyuka okurwa mubhaku kwa eginguru gya Taata Waryubha, na okurekana na riyo, kora bheetu turatura okwikara obhuhoru obhuhya. ⁵Kya ego twagwatana na Kiristu kuruku rwaye, egoego niigo turigwatana nawe kukuhyukibhwa kwaye, kya ego yaahyukibhwa. ⁶Tumanyiri ega, eginteemo gyetu egya kare, gyabhambwa hamwi na Kiristu kumusarabha, naho eginguru gya obhusarya munsi weetu gitatutunga kweki, na okutukora tubhe abhagaya bha obhusarya. ⁷Omuntu akaakwa kya ego, atakutungwa kweki na eginguru gya obhusarya, kwa okubha arabha omuntu unú yeeyagaariri. ⁸Mbe, kwa okubha tukwiri hamwi na Kiristu, tureekirirya ega, turiikara hamwi nawe. ⁹Tumanyiri ega, Kiristu yaahyuka okurwa mubhaku, na atarikwa kweki. Oruku rutaana obhutungi kweki eguru yaaye. ¹⁰Hanú yaakwa, yaakwa rumwigo6:10 Yaakwa rumwigo. Abhayahudi bhaaringa na obhusimuka bhwa okuruusya ekimwenso kya obhugwatani na Waryubha, rumwigo kumwaka. Bhaaringa bharahunjukira okukora ego, kira omwaka. Nawe, Yeesu yaaruusibhwa ekimwenso rumwigo. kurusumo rwa okuhiga obhusarya bhonsego. Bhoono, aringi omuhoru, na areekara kurusumo rwa okumungʼarira Waryubha. ¹¹Bheenyu bhonse, mwibhare ega, mwakwa hamwi nawe, na obhusarya bhutakutura okubhatunga kweki. Bhoono muringi abhahoru, na mureekara kurusumo rwa okumungʼarira Waryubha, kwa okugwatana na Kiristu Yeesu.

¹²Kwa ego, muteekirirya obhusarya bhutunge emibhiri gyenyu ginú girakwa. Muteekirirya okurutwa na orunamba orubhiibhi rwa emibhiri gyenyu. ¹³Muteekirirya ebhiroobhero bhya emibhiri gyenyu, bhitumirwe kya ebhirwaniro bhya okukorera obhusarya, nawe, mwiruusye ku Waryubha. Mwirore ega, mubheeri abhantu bhanú muhyukiibhwe okurwa mubhaku, na okusohibhwa mubhuhoru obhuhya. Mwiruusye ku Waryubha, na ebhiroobhero bhya emibhiri gyenyu, bhibhe bhirakora emirimu gya obhuheene. ¹⁴Obhusarya bhutakubhatunga kweki, kwa okubha mutakubha insi ya amaragiriryo, nawe, murabha insi ya eriruguto rya Waryubha.

Eriruguto rya Waryubha rirakora abheekirirya bhakore obhuheene

¹⁵Bhoono tugambe-ki? Tugendererye okukora obhusarya, kwa okubha tutaringi insi ya amaragiriryo, turingi insi ya eriruguto rya Waryubha? Tiigo-ha kora ahake! ¹⁶Mutamanyiri ega, hanú mureeruusye okumukorera omuntu ganú areenda, nho, murabha muramwigwa kya abhagaya bhaaye?6:16 Maaha mukitabho kya Yoana 8:34. Mbe, nyoore muraabhenga mureeruusya okukora obhusarya, murabha abhagaya bha obhusarya, na kinú muraanyoore-mo, n-duku. Nawe, mukaabha mureeruusya okumwigwa Waryubha, murabha abhagaya bha Waryubha, na kinú muraanyoore-mo, nu-kubharwa okubha abhaheene embere ya Waryubha. ¹⁷Akare, bheenyu mwaringa abhagaya bha obhusarya. Nawe, Waryubha akumibhwe, kwa okubha bhoono mwikiriirye kwa emitima gyenyu gyonsego okwigwa ameehigiryo ga Ekikiristu, ganú mweehigiribhwa. ¹⁸Bhoono, Waryubha yaamariri okubhahaana obhwiyagaari, naho mutabha abhagaya bha obhusarya. Yaabhakoreri mubhe abhagaya bhaaye, naho mubhe murakora amangʼana ga obhuheene. ¹⁹Nhairi na bheenyu kwa okutumira ekirengyo kya obhugaya kiyo, naho muture okumanya kinú ndagamba. Akare hayo, mwaringa muraruusya ebhiroobhero bhyonsego bhya emibhiri gyenyu okukora amabhiibhi, mwaringa abhagaya bha obhusarya, na obhusarya bhwenyu bhwaaruha bhukongʼu. Nawe bhoono, mubhenga mureeruusya ku Waryubha kwa ebhiroobhero bhyonsego bhya emibhiri gyenyu, mubhe abhagaya bha amangʼana ga obhuheene, naho muraamwe na Waryubha.

²⁰Akare hayo, hanú mwaringa abhagaya bha obhusarya, mwaringa na obhwiyagaari bhwa okwanga okukora amangʼana ga obhuheene. ²¹Nawe bhoono, mwanyoora obhwera-ki okurekana na amakorwa geenyu amabhiibhi, ganú bhoonwego garabhakora murore eginsoni? Amangʼana gayo garareeta oruku rwa koko. ²²Nawe bhoono, muheerwe na Waryubha obhwiyagaari, naho mutabha abhagaya bha obhusarya. Kweki, abhakoreri okubha abhagaya bhaaye, na okurekana na gayo, munyooreri obhwera. Obhwera bhuyo, nu-kuraamwa na weeki omwene, na obhuteero bhwa gayo nu-kunyoora obhuhoru bhwa koko. ²³Omuntu wowonse unú m-mugaya wa obhusarya, amariho gaaye, n-duku rwa koko. Nawe, bheetu Waryubha aratuhaana obhuhoru bhwa koko. Obhuhoru bhuyo bhutaringi amariho, nawe, m-mutuho gunú turanyoora okuhitira Kiristu Yeesu, Omukuru weetu.

Abheekirirya bhataringi insi ya amaragiriryo ga Musa

¹Abhahiiri bhaani kuimani, ndahaira na bheenyu abhantu bhanú mumanyiri bhujomu amaragiriryo ga Musa. Mumanyiri ega, omuntu areenderwa okugwata amaragiriryo eribhaga ryonsego hanú akyari omuhoru. ²Tiga noonjoore eringʼana riyo, kwa ekirengyo. Amaragiriryo garoorokererya ega, omukari atakwikiriribhwa okumutiga omusaaja waaye, nyoore omusaaja waaye akyari okukwa. Nawe, nyoore omusaaja waaye akwiri, nho arabha na obhwiyagaari okurwa kwiragiriryo riyo. ³Nawe, akaatetwa na omusaaja oundi, eribhaga omusaaja waaye atarakwa, hayo arabha arakora obhusimbe. Nawe, nyoore omusaaja waaye akwiri, eriragiriryo riyo, ritakumubhoha kweki. Hayo aratura okutetwa na omusaaja oundi, kora atakubha arakora obhusimbe.

⁴Abhahiiri bhaani kuimani, amangʼana gayo niigo garingi na kubheenyu bhonse. Kora bheenyu mutakubhohwa kweki na amaragiriryo ga Musa, kwa okubha mwakwa hamwi na Kiristu kumusarabha. Bhoono bheenyu m-bantu bhaaye, unú yaahyukibhwa okurwa mubhaku, naho obhuhoru bhwenyu bhubhe na emisumo emijomu kurusumo rwa okumukorera Waryubha emirimu. ⁵Eribhaga rinú obhusimuka bhwetu bhwa obhusarya bhwaringa bhuratutunga, amaragiriryo gaakora orunamba rwetu orubhiibhi rubhe na eginguru bhukongʼu kubheetu, tukeegomba okukora obhusarya, eribhaga ryonsego. Okurekana na riyo, oruku rukabha-ho. ⁶Twaringa tubhoherwe na amaragiriryo, nawe bhoono, tukwiri hamwi na Kiristu, kwa ego, tunyooreri obhwiyagaari okurwa kumaragiriryo. Bhoono tutakumukorera emirimu Waryubha kwa enjira ya akare, eya okugwata amaragiriryo ganú gaangʼoorwa, nawe, kwa enjira ehya ya okoorokereribhwa na Omutima Omurabhu.

Obhusarya bhuramanyikana kwa amaragiriryo

⁷Bhoono tugambe-ki? Tugambe ega, amaragiriryo m-busarya? Tiigo-ha kora ahake! Nawe, nyoore amaragiriryo gatakaabheeri-ho, ntakaamanyiri ega, obhusarya n-kintu-ki. Nyoore ritakaabheeri-ho eriragiriryo rinú riragamba ega, “Oteegomba ekintu kya omurikyaho,”7:7 Maaha mubhitabho bhya Okuhuruka 20:17; Obhuhiituki bhwa Amaragiriryo 5:21. ntakaamanyiri ega, okwigomba ekintu kya omurikyaho, n-kukora obhusarya. ⁸Nawe, obhusarya bhukeebhukya orunamba orubhiibhi rwa amanga amaaru munsi waani, kwa enjira ya eriragiriryo. Nyoore amaragiriryo gayo gatakaabheeri-ho, obhusarya bhutakaabheeri na eginguru. ⁹Eribhaga nyabhurebhe, naaringa omuhoru bira okumanya amaragiriryo. Nawe, hanú eriragiriryo riyo ryaaja, nkamanya eginguru gya obhusarya na bhukandeetera oruku. ¹⁰Nkarora ega, eriragiriryo rinú ryaringa kurusumo rwa okungʼaana obhuhoru, ryandeetera oruku. ¹¹Obhusarya bhukangʼeenererya kwa enjira ya eriragiriryo riyo, na okundeetera oruku. ¹²Kora ego, emanyikane ega, amaragiriryo m-marabhu, na emigiro gyago gyonse, m-mirabhu, n-gya obhuheene, na ni-njomu.

¹³Bhoono, nyoore niigo, ekintu ekijomu kinu nkyo kindeeteeri oruku? Tiigo-ha kora ahake! Obhusarya mbo bhundeeteeri oruku okuhitira kumaragiriryo amajomu gayo. Yaaringa ni-nsonga ya Waryubha ega, amaragiriryo gabhe garoorokya kubhurabhu ega, obhusarya n-kintu ekibhiibhi bhukongʼu.

¹⁴Tumanyiri ega, amaragiriryo gaarwa ku Waryubha, nawe, oni kwa obhusimuka bhwani bhwa obhusarya, ndingi omugaya wa obhusarya. ¹⁵Oni ntamanyiri ganú ndakora, kwa okubha ganú ndeenda nkore, ntakugakora. Nawe, ganú ntakwenda okukora, ngo ndakora. ¹⁶Nyoore ndakora amangʼana ganú ntakwenda nkore, hayo nho eroorokya ega, ndeekirirya ega, amaragiriryo m-majomu. ¹⁷Hayo oranyoora ntaringi oni unú ndakora obhusarya, nawe, nu-bhusarya bhunú bhuringi munsi waani, mbo bhurakora. ¹⁸Mmanyiri ega, munsi waani, mubhusimuka bhwani bhwa obhusarya, kitarimo ekintu ekijomu kyokyonse. Ndeenda okukora amajomu, nawe, ntaana obhuturo bhwa okugakora. ¹⁹Amangʼana amajomu ganú ndeenda okukora, ntakugakora. Nawe, amabhiibhi ganú ntakwenda okukora, ngo ndakora. ²⁰Bhoono, nyoore ndakora ganú ntakwenda nkore, hayo oranyoora ntaringi oni unú ndakora obhusarya, nawe, nu-bhusarya bhunú bhuringi munsi waani mbo bhurakora.

²¹Mbe, naamanyiri ega, hanú ndeenda okukora amangʼana amajomu, hayo nho oranyoora ndarutwa okukora amangʼana amabhiibhi. ²²Amaragiriryo ga Waryubha, ngahanjiri kwa omutima gwani gonsego. ²³Nawe, ndarora ega, ebhiroobhero bhya omubhiri gwani, oranyoora bhiratungwa na eginguru gya obhusarya bhunú bhurahigana na ameetegeerero gaani amajomu. Kiyo nkyo kirankora mbe omugaya wa obhusarya okuhitira ebhiroobhero bhya omubhiri gwani. ²⁴Ndikirora-ko oni! Niwi unú arintuurya okurwa mubhuhoru bhwani bhunú bhuratungwa na oruku? ²⁵Ndamukumya Waryubha, kwa okubha weeki ngʼo arantuurya, okuhitira ku Yeesu Kiristu, Omukuru weetu.

Kwa ego mbe, oni omwene ndakorera emirimu amaragiriryo ga Waryubha kwa ameetegeerero gaani, nawe, kwa obhusimuka bhwani bhwa obhusarya, oranyoora ndakorera emirimu eginguru gya obhusarya.

Abheekirirya bharoorokereribhwa na Omutima Omurabhu

¹Mbe bhoono, Waryubha ataribhajibhya abhantu bhanú bhagwateeni na Kiristu Yeesu. ²Kunjira ya okugwatana na Kiristu Yeesu, eginguru gya Omutima Omurabhu unú arareeta obhuhoru bhwa koko, ginkoreri mbe omwiyagaari, naho ntige okutungwa na eginguru gya obhusarya na oruku. ³Amaragiriryo gataaringa na eginguru gya okutukora twiyagaare, kwa ekisigo kya obhusimuka bhwetu bhwa obhusarya. Nawe, kinú amaragiriryo gayo gataatura okukora, Waryubha yaakora. Yaatuma Omwana waaye omumwemwe, yaaje kubheetu mukyaro, aringi omuntu kya bheetu abha obhusarya, naho abhe ekimwenso kurusumo rwa obhusarya bhwetu. Kwa okukora ego, Waryubha yaabhuturira ekiina eginguru gya obhusarya mubhuhoru bhwetu. ⁴Waryubha yaakora ego, naho amangʼana gonsego ga obhuheene ganú gareenderwa mumaragiriryo gakunaane bhujomu munsi weetu. Bheetu turoorokereribhwa na Omutima Omurabhu, na tutakoorokereribhwa kweki na obhusimuka bhwetu bhwa obhusarya. ⁵Abhantu bhanú bharoorokereribhwa na obhusimuka bhwabho bhwa obhusarya, obhungʼeeni bhwabho bhuhanjiri okukora obhusarya. Nawe, bhanú bharoorokereribhwa na Omutima Omurabhu, obhungʼeeni bhwabho bhuhanjiri okukora amakorwa ganú garangʼarira Omutima Omurabhu. ⁶Abhantu bhanú bharoorokereribhwa na ameetegeerero ga obhusimuka bhwa okukora obhusarya, bharanyoora oruku rwa koko. Nawe, abhantu bhanú bharoorokereribhwa na ameetegeerero ga Omutima Omurabhu, bharanyoora obhuhoru bhwa koko na omurembe. ⁷Abhantu bhanú bharoorokereribhwa na obhusimuka bhwabho bhwa obhusarya, bhayo m-basigu bha Waryubha. Bhatakwikirirya okugwata amaragiriryo gaaye, kweki bhatakutura okugagwata. ⁸Kwa ego, abhantu bhanú bharoorokereribhwa na obhusimuka bhwabho bhwa obhusarya, bhatakutura okumungʼarira Waryubha.

⁹Nawe, bheenyu mutakutungwa na obhusimuka bhwenyu bhwa obhusarya, muroorokereribhwa na Omutima wa Waryubha,8:9a Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. kwa okubha areekara munsi weenyu. Omuntu wowonse unú ataana Omutima wa Kiristu,8:9b Omutima wa Kiristu. Omutima wa Kiristu ngʼo Omutima wa Waryubha, kasi Omutima Omurabhu. uyo ataringi omwihigira wa heene wa Kiristu. ¹⁰Bhoono, Kiristu areekara munsi weenyu. Kwa ego, kora nyoore emibhiri gyenyu girakwa kwa ekisigo kya obhusarya, Omutima Omurabhu arabhahaana obhuhoru, kwa okubha Waryubha abhabhariri okubha abhaheene embere yaaye. ¹¹Omutima Omurabhu unú areekara munsi weenyu, ngʼo Omutima wa Waryubha unú yaamuhyukya Yeesu Kiristu okurwa mubhaku. Kwa ego, Waryubha arihyukya kora emibhiri gyenyu ginú girakwa, kwa enjira ya Omutima waaye Omurabhu unú areekara munsi weenyu.

¹²Kwa ego, abhahiiri bhaani kuimani, bheetu etakwenderwa twikare kwa okutungwa na obhusimuka bhwetu bhwa obhusarya. ¹³Nyoore mureekare kwa okoorokereribhwa na obhusimuka bhwenyu bhwa obhusarya, murikwa. Nawe, mukaanga kimwi kwa eginguru gya Omutima Omurabhu, okukora amangʼana ganú obhusimuka bhwenyu bhwa obhusarya bhureenda mukore, muriikara koko.8:13 Maaha mukitabho kya Abhagaratia 6:8.

¹⁴Bhonsego bhanú bharoorokereribhwa na Omutima wa Waryubha, bhayo mbo abhaana bha Waryubha. ¹⁵Waryubha ataabhahaana Omutima Omurabhu, naho mubhe kweki abhagaya bhanú bharoobhoha, nawe, yaabhahaana Omutima Omurabhu, naho mubhe abhaana bhaaye. Omutima uyo ngʼo aratubheera okumubhirikira Waryubha, “Aba,” ensonga yaaye niiga, “Taata!” ¹⁶Omutima uyo omwene arakomererya mumitima gyetu ega, bheetu m-baana bha Waryubha. ¹⁷Mbe, kwa okubha bheetu m-baana bha Waryubha, tubheeri abhagabhi bhaaye. Turinyoora engabho yeetu hamwi na Kiristu. Na kwa okubha turasanga munyanko hamwi na Kiristu, kweki turigungibhwa hamwi nawe.

Waryubha arituhaana obhukuru bheetu abhaana bhaaye

¹⁸Oni niina obhuheene ega, enyanko yeetu ya eribhaga rinu, etaringi ekintu, nkaairingʼaanʼya na obhukuru bhunú Waryubha arituhaana kwibhaga rinú riraaja. ¹⁹Ebhibhumbwa bhyonsego bhinú bhyabhumbwa, bhiraganyirira kwa enamba enene eribhaga rinú Waryubha aryorokya, kya ego bharingi abhaana bhaaye. ²⁰Ebhibhumbwa bhyonsego bhinú Waryubha yaabhumba bhyeehiimwa bhitabha na obhwera. Etaringi ega, ebhyene mbyo bhyeenda ego, nawe, n-kya ego Waryubha omwene yeenda.8:20 Maaha mukitabho kya Obhwambiro 3:17. Kora ego, bhireesigira eribhaga riyo, ²¹kwa okubha bhirituuribhwa okurwa mubhugaya bhwa obhusarya na oruku. Hayo nho, bhirihaanwa obhwiyagaari na obhukuru bhunú Waryubha arihaana abhaana bhaaye.

²²Tumanyiri ega, okuhikira bhoonwego, ebhibhumbwa bhyonsego bhirakuura bhukongʼu kwa obhururu, kya omukari unú ararumwa obhusungu kwibhaga rya okwibhura. ²³Nawe, etaringi ega, ebhintu bhiyo mbyo ebhyenego bhiranyahaarika, nawe, kora bheetu bhanú tuuna Omutima Omurabhu, unú twahaanwa kya enonkwe ya mbere, turanyahaarika mumitima gyetu. Turanyahaarika, kwa okubha turaganyirira bhukongʼu eribhaga rinú Waryubha aritukunaanʼya okubha abhaana bhaaye. Hayo nho, turitunguribhwa bhonsego na okuhaanwa emibhiri emihya. ²⁴Obhwisige bhuyo tuunabho okurwa hanú Waryubha yaatutuurya. Nawe, nyoore tureesiga ekintu kinú turatura okukirora, bhuyo bhutaringi obhwisige. Bhoono, niwi areesiga ekintu kinú ararora? ²⁵Nawe, tukeesiga okuhaanwa ekintu kinú tutakurora, hayo nho, turaganyirira kwa obhwigumirirya bira okurosa.

²⁶Hamwi na gayo, Omutima Omurabhu ngʼo aratubheera obhunyooheeru bhwetu. Bheetu tutamanyiri okumusabha Waryubha kya ego ereenderwa, nawe, Omutima Omurabhu omwenego, ngʼo aratusabhira ku Waryubha kwa ekiriro kya obhusurumbaru kinú kitakutura okugambwa. ²⁷Waryubha unú areekomya gonsego ganú garingi mumitima gya abhantu, ngʼo amanyiri ameetegeerero ga Omutima Omurabhu,8:27 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. kwa okubha Omutima uyo, arasabhira abhantu bha Waryubha kya ego Waryubha ahanjiri.

²⁸Tumanyiri ega, Waryubha arakora amangʼana gonsego okureeta amajomu, kubhantu bhonsego bhanú bhamuhanjiri,8:28 Waryubha arakora amangʼana gonsego okureeta amajomu, kubhantu bhonsego bhanú bhamuhanjiri. Ensonga eindi eratura okubha ega, amangʼana gonsego garareeta amajomu kubhantu bhonsego bhanú bhamuhanjiri Waryubha, kasi kumangʼana gonsego, Waryubha arakora emirimu hamwi na bhanú bhamuhanjiri, naho abhahaane amajomu. bhanú bhaabhirikirwa okurekana na obhwendi bhwaye. ²⁹Waryubha yaamanya abhantu bhaaye, okurwa ekyaro kitarabhumbwa. Bhayo mbo yaabhasora bhabhe kya ego Omwana waaye, Yeesu Kiristu aringi. Yaakora ego, naho Omwana waaye abhe omutangi gati ya abhahiiri abhaaru. ³⁰Mbe, bhayo yaaringa abhasoreri okurwa ekyaro kitarabhumbwa, mbo yaabhirikira akabhabhara okubha abhaheene embere yaaye, na mbo yaamura ega, aribhahaana obhukuru.

Abheekirirya bhatakutura okwahukanibhwa na obhuhanje bhwa Waryubha

³¹Mbe bhoono, tugambe-ki eguru ya amangʼana gayo? Nyoore Waryubha aringi orubhaara rwetu, niwi aratura okutuhiga? ³²Waryubha ataamumaahira ekyabhira Omwana waaye omumwemwe, nawe, yaamuruusya naho akwe kurusumo rwetu bhonsego. Nyoore yaakora ego, bhoono, atarituhaana amajomu agandi gonsego? ³³Bhoono, niwi aratura okubhajongera abhasorwa bha Waryubha? Atariho, kwa okubha Waryubha omwene ngʼo arabhabharira okubha abhaheene. ³⁴Kweki niwi unú aribhabhuturira ekiina? Atariho, kwa okubha Kiristu Yeesu, unú yaakwa na akahyuka okurwa mubhaku, unú areekara orubhaara rwa obhuryo rwa Waryubha, weeki ngʼo aratusabhira.

³⁵Bhoono n-kintu-ki kinú kiratura okutwahukanʼya na obhuhanje bhwa Kiristu? Kitariho! Kora nyoore ekaabha enyanko enduru, ekaabha entambara, ekaabha etaabhu, ekaabha enjara, ekaabha okubhurwa emyenda, ekaabha engʼanga ya oruku, kasi okwitwa. ³⁶N-kya ego Amangʼoore Amarabhu garagamba ega,

“Kira orusiku turingi muruku, kwa okubha turakukorera emirimu uuwe.

Turakorerwa kya amangʼondi ganú garahirwa okugoogwa.”8:36 Maaha mukitabho kya Egijabhuri 44:22.

³⁷Nawe, kora nyoore gayo gonsego garatuujira, bheetu turagendererya okuhiga bhukongʼu, kwa okubha turabheerwa na Kiristu unú atuhanjiri. ^38-39Mmanyiri kwa obhuheene ega, kitariho ekintu kinú kiratura okutwahukanʼya na obhuhanje bhwa Waryubha. Kora bhakaabha bhamaraika,8:38-39 Bhamaraika. Maaha eringʼana rinu mu Moonjooro eguru ya Amangʼana Amakongʼu. kasi abhatungi bhanú bharingi mumasaaru, kasi ebhibhumbwa bhya eginguru, kasi amangʼana ganú gareebhuka kwibhaga rinu kasi kwibhaga rinú riraaja, kasi kyokyonse kinú kiringi murwire, kasi mukyaro kya abhaku, kasi ekintu kyokyonse mukyaro munu. Waryubha arigendererya okutuhanja, nyoore turingi abhahoru, kasi tukwiri. Obhuhanje bhuyo, abhutubhwiri kubheetu okuhitira ku Kiristu Yeesu, Omukuru weetu.

Pauro areeyigwa obhururu kurusumo rwa abhantu bha Isiraeri

¹Kiristu amanyiri ega, ndagamba obhuheene ntakubheeha. Kora ameetegeerero gaani ganú garoorokereribhwa na Omutima Omurabhu garanyimiririra ega, ntakubheeha. ²Maheene, oni nsurumbeeri bhukongʼu na okunyahaarika kunú kutakuhwa mumutima gwani, ³kwa ekisigo kya abhantu bha ekyaro kyani. Nyoore ekaaturikeeni, nkeekiriirye okwihiimwa oni omwene na okwahurwa na Kiristu, nyoore kwa okukora ego, kukaabhabheereri abhahiiri bhaani bhayo, bhamwikirirye Kiristu. ⁴Abhahiiri bhaani bhayo, m-Baisiraeri, abhantu bhanú Waryubha yaasora bhabhe abhaana bhaaye, yaabhoorokya obhukuru bhwaye, na yaakora amaragano9:4 Amaragano. Maaha Eriragano mu Moonjooro eguru ya Amangʼana Amakongʼu. nabho. Kweki yaabhahaana amaragiriryo gaaye, hamwi na egindago gyaye, na yaabhoorokererya kya ego ereenderwa bhamusyengere. ⁵Abhaisiraeri bhayo, mbo bhaasimuka okurwa kubhajaaji waabho, bha Abhurahamu, Esaaka na Yakobho. Kiristu yaaringa Omwisiraeri okurekana na obhusimuka bhwaye bhwa okubha omuntu. Kiristu unú ngʼ-Waryubha, Omukuru wa bhyonsego, agungibhwe koko!9:5 Kiristu unú ngʼ-Waryubha, Omukuru wa bhyonsego, agungibhwe koko! Ensonga eindi eratura okubha ega, Waryubha, Omukuru wa bhyonsego, agungibhwe koko! Amina.

⁶Ntakugamba ega, Waryubha yaatamwa okukunaanʼya endago yaaye ku Bhaisiraeri. Tiigo-ha kora ahake! Kwa okubha etaringi ega, Abhaisiraeri bhonsego, m-Baisiraeri eritinya. ⁷Etaringi ega, abheebhurwa bhonsego bha Abhurahamu mbo abhaana bhaaye bha heene. Nawe, Waryubha yaamuraga Abhurahamu ega, “Abhaana bha ehamati yaaho bharirwa murwibhuro rwa Esaaka.”9:7 Maaha mukitabho kya Obhwambiro 21:12.⁸Ensonga ya amangʼana gayo niiga, etaringi ega, abhaana bha okwibhurwa kwa omubhiri bha Abhurahamu, mbo abhaana bha Waryubha. Nawe, m-banú bheebhurwa okurekana na endago ya Waryubha, bhayo mbo abhaana bha heene bha Waryubha. ⁹Endago ya Waryubha iyo, yaaringa ega, “Omwaka guyo guraaja kwibhaga kya rinu, ndihunjuka, na Saara aribha akwibhuriiri omwana wa ekisaaja.”9:9 Maaha mukitabho kya Obhwambiro 18:10, 14.

¹⁰Kweki ritaringi riyo eryenego, kora Rebheka wonse, yeebhurira jaaji weetu Esaaka, abhaana ebhisare. ^11-12Hanú ebhisare bhiyo, bhyaringa bhitareebhurwa, na hanú bhyaringa bhitarakora kyokyonse ekijomu kasi ekibhiibhi, Waryubha akamukeerya Rebheka ega, “Omukuru aribhanga aramukorera emirimu omuke.”9:11-12 Maaha mukitabho kya Obhwambiro 25:23. Eringʼana riyo, riroorokya ega, Waryubha arasora omuntu okurekana na obhwendi bhwaye, etaringi okurekana na amakorwa ga omuntu. ¹³N-kya ego Amangʼoore Amarabhu garagamba ega, “Yakobho mmwikiriirye, nawe, Esau mmwangiri.”9:13 Maaha mukitabho kya Maraki 1:2-3.

Waryubha arakora kya ego areenda

¹⁴Bhoono tugambe-ki? Tugambe ega, Waryubha ataringi omuheene? Tiigo-ha kora ahake! ¹⁵Kwa okubha yaamukeerya Musa ega, “Oni ndamumaahira ekyabhira, omuntu unú ndeenda okumumaahira ekyabhira, na ndabha omunyoohu kumuntu unú ndeenda okubha omunyoohu kumwene.”9:15 Maaha mukitabho kya Okuhuruka 33:19.¹⁶Kwa ego, Waryubha ngʼo araamura okukora gayo, okurekana na ekyabhira kyaye ekyenego, etaringi okurekana na ekituunyo kasi obhwendi bhwa omuntu. ¹⁷Maaha, mu Mangʼoore Amarabhu, Waryubha yaamukeerya Farao9:17a Farao. Kiyo n-kyeo kya omukama wa Misiri. ega, “Naakuhaana obhukama, naho noorokye abhantu obhuturo bhwani, okuhitira kuuwe, kweki eriina ryani ribhenga riraraarikwa mukyaro kyonsego.”9:17b Maaha mukitabho kya Okuhuruka 9:16.¹⁸Kwa ego, mbe, Waryubha aramumaahira ekyabhira omuntu unú areenda, na unú areenda abhe na omutwe omukongʼu, aramukora okubha na omutwe omukongʼu.

¹⁹Bhoono, hamwi omuntu aratura okubhuurya ega, “Nyoore niigo eringi, kwaki Waryubha arakora amasoro kumuntu wowonse? Niwi unú aratura okuribhira kinú Waryubha areenda?” ²⁰Nawe, uuwe omuntu, uuwe niwi kora ohakaananʼye na Waryubha? Mbe, ekintu kinú kyabhumbwa kwa obhutoto kiratura okuhakaananʼya na unú yaakibhumba na kimubhuurye ega, “Kwaki waambumba ego?”9:20 Maaha mukitabho kya Isaaya 29:16, 45:9.²¹Omubhumbi wa ebhibhiga ataana obhwamuri bhwa okutumira obhutoto kya ego areenda? Aratura okubhumba ebhibhiga ebhibhiri okurwa kubhutoto bhuyobhuyo, ekibhiga ekimwi, kibhe ekya abhageni, na ekindi kibhe ekya okukorera emirimu kira orusiku.

²²Niigo eringi ku Waryubha. Yeendanga okoorokya abhantu enkoro yaaye na obhuturo bhwaye, nawe, yaabheegumirirya bhukongʼu abhantu bhanú bheenderwanga okusikibhwa. ²³Yaakora ego, naho ature okoorokya obhukuru bhwaye kurusumo rwa abhantu bhanú yaaseemya ega, aribhamaahira ekyabhira. Yaaseemya okurwa akare ega, aribhahaana obhukuru bhwaye. ²⁴Gati ya abhantu bhanú yaabhirikira, na bheetu turimo. Ataabhirikira Abhayahudi abheenego, nawe, abhirikiiri kora bhanú bhataringi Abhayahudi. ²⁵Kiyo nkyo Waryubha yaagamba mukitabho kya omurooti Hosia ega,

“Abhantu bhanú bhataringi abhantu bhaani,

ndibhabhirikira ‘Abhantu bhaani.’

Abhantu bhanú ntabhahanjiri,

ndibhabhirikira ‘Abhahanje bhaani.’”9:25 Maaha mukitabho kya Hosia 2:23.

²⁶Kweki yaagamba ega,

“Hanú bhaakeeribhwa ega, ‘Bheenyu mutaringi abhantu bhaani,’

hayo nho, bharibhirikirwa ‘Abhaana bha Waryubha omuhoru.’”9:26 Maaha mukitabho kya Hosia 1:10.

²⁷Kweki, omurooti Isaaya yaagamba eguru ya Abhaisiraeri ega,

“Kora onyoora Abhaisiraeri m-baaru kya omusenyi gwa kumurambo gwa enyanja,

nawe, bhanú bharituuribhwa, m-bake.

²⁸Omukuru Waryubha aribhahaana abhantu bha ekyaro kyonsego obhujibhu bhunú bhukuneeni bira okutigita,

kya ego yaagamba.”9:27-28 Maaha mukitabho kya Isaaya 10:22-23.

²⁹N-kya ego omurooti Isaaya yaagamba akare ega,

“Nyoore Omukuru Waryubha wa obhuturo bhonsego atakaatamirye abheebhurwa abhake bha Abhaisiraeri,

tukaabheeri tusikiri bhonsego kya abhantu bha Sodoma na Gomora.”9:29 Maaha mubhitabho bhya Isaaya 1:9; Obhwambiro 19:24-25.

Abhaisiraeri abhaaru bhataringi abhaheeneembere ya Waryubha

³⁰Tugambe-ki bhoono, eguru ya amangʼana gayo? Abhantu bhanú bhataringi Abhaisiraeri bhataakora ekituunyo okubha abhaheene embere ya Waryubha, nawe, Waryubha yaabhabhara okubha abhaheene kwa enjira ya okumwikirirya Kiristu. ³¹Abhaisiraeri bhaaringa bharakora ekituunyo okugwata amaragiriryo ga Musa, naho bhabharwe okubha abhaheene embere ya Waryubha, nawe, bhataatura. ³²Kwaki bhataabharwa okubha abhaheene embere ya Waryubha? N-kwa okubha bheesigira amakorwa gaabho, na bhataamwikirirya Kiristu. Kiristu ngʼo erigina rirya bheekuujura-ko, ³³kya ego Waryubha yaagamba mu Mangʼoore Amarabhu ega,

“Maaha, ndatuura erigina Sayuni.9:33a Sayuni. Ni-riina erindi rya Yerusaremu, ahasi ha erisyengerero rya Waryubha. Maaha Yerusaremu mu Moonjooro eguru ya Amangʼana Amakongʼu.

Erigina riyo, ndyo abhantu bhariikuujura-ko,

na ririkora abhantu bhabhenga bharagwa.

Nawe, omuntu wowonse nyoore aramwikirirya unú ni-rigina riyo,

atarisuuka kora orusiku rumwi!”9:33b Maaha mukitabho kya Isaaya 8:14, 28:16.

¹Abhahiiri bhaani kuimani, ndeenda kwa omutima gwani gonsego ega, Abhaisiraeri bhonsego bhatuuribhwe. Kiyo nkyo ndabhasabhira bhukongʼu ku Waryubha. ²Ndabhakeerya bheenyu ega, abhantu bhayo, bhaana ekituunyo okumutuna Waryubha, kora ego bhatamanyiri kya ego Waryubha areenda bhamutune. ³Bheeki bhataagwata enjira inú Waryubha arabharira abhantu okubha abhaheene, kwa okubha bhataaringa bhaimanyiri, kweki bhaatunanga okunyoora obhuheene bhwabho abheene, kwa enjira ya okugwata amaragiriryo ga Musa. ⁴Kiristu yaakunaanʼya amaragiriryo gonsego ga Musa, naho abhantu bhonsego bhanú bharamwikirirya weeki, bhabharirwe okubha abhaheene embere ya Waryubha.

Abhantu bhonsego bharatura okutuuribhwa

⁵Musa yaangʼoora eguru ya okubharwa okubha omuheene embere ya Waryubha, kwa enjira ya okugwata amaragiriryo, ega, “Omuntu unú arigwata gonsego ganú garagambwa mumaragiriryo, aribhanga areekara kwa okugwata gayo.”10:5 Maaha mukitabho kya Abharaawi 18:5.⁶Nawe, eguru ya okubharwa okubha omuheene embere ya Waryubha, kwa enjira ya eimani, Musa yaagamba ega, “Muteebhuurya mumitima gyenyu ega, ‘Niwi aratura okuriina okuhikira murwire?’” Okugamba ego, n-kya okumusabha Kiristu yeetuume mukyaro hanu. ⁷“Kasi ega, ‘Niwi aratura okwituuma hansi okuhikira mukyaro kya abhaku?’” Okugamba ego, n-kya okwenda okumuhyukya Kiristu. ⁸Nawe, kinú kiragambwa mu Mangʼoore Amarabhu niiga, “Eringʼana rya Waryubha riringi haangʼi na uuwe, riringi mumunwa gwaho, na mumutima gwaho.”10:6-8 Maaha mukitabho kya Obhuhiituki bhwa Amaragiriryo 9:4, 30:12-14. Bhoono, eringʼana riyo, ndyo amangʼana ganú turaraarika eguru ya okumwikirirya Yeesu Kiristu. ⁹Amangʼana gayo niiga, hanú oraagambe kwa omunwa gwaho omwene ega, “Yeesu m-Mukuru,” na okwikirirya mumutima gwaho ega, Waryubha yaamuhyukya okurwa mubhaku, orituuribhwa na Waryubha. ¹⁰Omuntu akaamwikirirya Yeesu Kiristu kwa omutima gwaye gonsego, nho arabharwa okubha omuheene embere ya Waryubha. Akaagamba kwa omunwa gwaye ega, aramwikirirya, nho aratuuribhwa. ¹¹Amangʼoore Amarabhu garagamba ega, “Omuntu wowonse unú aramwikirirya, atarisuuka.”10:11 Maaha mukitabho kya Isaaya 28:16.¹²Amangʼana gayo, garoorokya ega, kitariho ekisorooro gati ya Abhayahudi na bhanú bhataringi Abhayahudi. Ariho Omukuru oumwi ego, kubhantu bhonsego. Weeki m-muserenʼya bhukongʼu, kubhantu bhonsego bhanú bharamusabha. ¹³N-kya ego Amangʼoore Amarabhu garagamba ega, “Kira omuntu unú arasabha kwa okwisigira eriina rya Omukuru, arituuribhwa.”10:13 Maaha mukitabho kya Joeri 2:32.

¹⁴Bhoono, abhantu bharatura egaki okumusabha unú bhataakamwikiriirye? Kweki bharatura egaki okumwikirirya, nyoore bhataakageegwiri amangʼana gaaye? Na bharatura egaki okwigwa amangʼana gaaye, nyoore bhataakaraarikiirwe? ¹⁵Kweki abhantu bharatura egaki, okugya okuraarika amangʼana gayo, nyoore bhataakatumirwe? N-kya ego Amangʼoore Amarabhu garagamba ega, “Okuhika kwa omuntu unú arareeta Amangʼana Amajomu, kuribha kurajomera abhantu!”10:15 Maaha mukitabho kya Isaaya 52:7.

¹⁶Kora ego, etaringi ega, Abhaisiraeri bhonsego bheekirirya Amangʼana Amajomu gayo, abhaaru bhaagaanga. Omurooti Isaaya yaagamba ega, “Omukuru Waryubha, niwi unú yeekirirya amangʼana geetu?”10:16 Maaha mukitabho kya Isaaya 53:1.¹⁷Kwa ego, abhantu bharatura okumwikirirya Kiristu nyoore bheegwiri amangʼana eguru yaaye. Nawe, bharatura okwigwa nyoore amangʼana gayo garaaraarikwe kubheene.

¹⁸Mbe, nyoore niigo, tiga mbuurye ega, Abhaisiraeri bhataakageegwiri amangʼana gayo? M-maheene ega, bheegwa, kwa okubha Amangʼoore Amarabhu garagamba ega,

“Amangʼana gaabho gaanyaragana mukyaro kyonsego,

na amangʼana gaabho gakahika kora kubhuteero bhwa ekyaro.”10:18 Maaha mukitabho kya Egijabhuri 19:4.

¹⁹Tiga mbuurye eribhuuryo erindi kweki, hanú Abhaisiraeri bheegwa amangʼana gayo, bhataagamanya? M-maheene ega, bhaagamanya, kwa okubha eribhaga rya Musa, Waryubha yaabhakeerya Abhaisiraeri ega,

“Ndibhakora mubhamaahire erihari

abhantu bhanú bhataringi abhantu bhaani.

Na abhantu bhanú bhatamanyiri kyokyonse,

ndibhakora mubhenga murabhajimira bhukongʼu.”10:19 Maaha mukitabho kya Obhuhiituki bhwa Amaragiriryo 32:21.

²⁰Kweki, omurooti Isaaya yaagamba amangʼana ga Waryubha kwa obhuhaari ega,

“Abhantu bhanú bhatakuntuna,

mbo bhanduuji.

Na abhantu bhanú bhatakubhuuririrya amangʼana gaani,

mbo niyorokerye kubheene.”10:20 Maaha mukitabho kya Isaaya 65:1.

²¹Nawe, eguru ya Abhaisiraeri, Waryubha yaagamba ega,

“Orusiku orugima, neendanga okugwatana na abhantu bhaani,

nawe, m-bantu bhanú bhataringi abheegwa,

kweki m-bantu bhanú bharanjeema.”10:21 Maaha mukitabho kya Isaaya 65:2.

Waryubha ataraanga Abhaisiraeri bhatabha abhantu bhaaye

¹Mbe, ndabhuurya ega, bhoono, Waryubha yaangiri abhantu bhaaye? Tiigo-ha kora ahake, kwa okubha oni nonse m-Mwisiraeri, okurwa kurwibhuro rwa Abhurahamu, okurwa kwikabhira rya Bhenjamini. ²Waryubha ataanga abhantu bhaaye, bhanú yaasora okurwa ekyaro kitarabhumbwa. Kasi mutamanyiri kinú Amangʼoore Amarabhu garagamba eguru ya omurooti Eriya, kya ego yaamwingʼeheererya Waryubha eguru ya Abhaisiraeri? Akagamba ega, ³“Omukuru, abhantu bhanu bheeta abharooti bhaaho, na bhahaanywiri ahasi ha okumwensera. Oni naatamiri omwenego, na kora oni nonse bhareenda okunyita!”11:3 Maaha mukitabho kya 1 Abhakama 19:10, 14.⁴Nawe, Waryubha yaamukyukya egaki? Yaamukyukya ega, “Nisagiirye abhantu ebhiku muhungati, bhanú bhatakumusyengera Bhaari.”11:4 Maaha mukitabho kya 1 Abhakama 19:18.

⁵Kora bhoonwego niigo eringi, bhatamiri abhantu abhake ego bhanú Waryubha yaabhasora kwa eriruguto ryaye. ⁶Bhaasorwa kwa eriruguto rya Waryubha, kwa ego bhatakutuuribhwa kwa ekisigo kya amakorwa gaabho. Nyoore bhakaatuuriibhwe kwa ekisigo kya amakorwa gaabho, mbe, eriruguto ritakaabheeri eriruguto kweki. ⁷Kwa ego, amangʼana garingi ega, Abhaisiraeri bhaatuna okubha abhaheene embere ya Waryubha, nawe, bhataanyoora. Bhanú bhaanyoora m-banú Waryubha yaasora abheenego. Abhandi bhonsego bhanú bhataanyoora, Waryubha akabhakora okubha na emitwe emikongʼu. ⁸N-kya ego Amangʼoore Amarabhu garagamba ega,

“Waryubha yaabhakora bhabhe na emitima emikongʼu,

yaabharibha ameeso, naho bhatarora,

kweki yaabharibha amatwi, naho bhateegwa.

Niigo bharingi nawanyareero.”11:8 Maaha mubhitabho bhya Obhuhiituki bhwa Amaragiriryo 29:4; Isaaya 29:10.

⁹Na omukama Daudi yaagamba ega,

“Hanú bharakora eginyangi gyabho,

Waryubha agikyukye gibhe omutego gwa okubhagwatya,

na omutego gwa okugwisya,

na gibhe obhujibhu kubheene.

¹⁰Ameeso gaabho geemwe endingaasi,

naho bhatarora kyokyonse kweki,

na emigongo gyabho gigendererye okwikumba,

okurekana na eginyanko gyabho.”

Okwanga kwa Abhaisiraeri kubheeri enonkwekubhanú bhataringi Abhaisiraeri

¹¹Bhoono, kweki ndabhabhuurya ega, Abhaisiraeri bheekuujura, naho bhagwe na okusika kimwi? Tiigo-ha kora ahake! Nawe, nu-kurekana na okwanga kwabho kwa Omutuurya, obhutuurya bhwangʼaanyira kubhantu bhanú bhataringi Abhayahudi, naho Abhaisiraeri bhabhe na erihari rya okutuuribhwa. ¹²Bhoono, nyoore abhantu bhanú bhataringi Abhaisiraeri, bhaanyoora eriruguto erinene kwa okubha Abhaisiraeri bhaamwanga Omutuurya, mbe, bharinyoora eriruguto erinene bhukongʼu, hanú Abhaisiraeri bhonsego bharibha bhatuurikiri.

¹³Bhoono, ndagamba na bheenyu, abhantu bhanú mutaringi Abhaisiraeri. Maheene Waryubha yaantuma mbe omutumwa kurusumo rwa abhantu bhanú bhataringi Abhaisiraeri. Ndeeruusya bhukongʼu kumirimu ginú ngʼeerwe. ¹⁴Ndeesiga ega, okuhitira emirimu gyani, Abhaisiraeri abharikyani bhabhe na erihari rya okunyoora obhutuurya bhunú bheenyu mwanyoora, naho gati yaabho bhonse bhatuuribhwe. ¹⁵Maaha, hanú Abhaisiraeri bhaamwanga Omutuurya, Waryubha wonse akabhaanga, akeekiriranʼya na abhantu bhanú bhataringi Abhaisiraeri. Kwa ego, hanú Waryubha aribheekirirya Abhaisiraeri kweki, eribha muna abhaku bhahyukiri!

¹⁶Nyoore omuntu aramuruusirya Waryubha ekimwenso kya omugeso gwa mbere gwa ebhyakurya bhyaye, mbe, ebhyakurya bhyaye bhyonsego, bhiribha n-kurusumo rwa Waryubha. Kweki, nyoore omuntu aramuruusirya Waryubha emiri gya emijeituni, mbe, kora amasagi gaagyo gonsego garibha n-kurusumo rwa Waryubha.11:16 Abhasomi abhaaru bharagamba ega, ekimwenso kya omugeso na emiri gya emijeituni m-bajaaji bha Abhaisiraeri, mbo Abhurahamu, Esaaka na Yakobho.¹⁷Bhoono, gati ya amasagi gaageejwa, na amasagi agandi ga omujeituni gwa mwisisi gaahambirirwa ahasi ha amasagi ganú gaageejwa. Amasagi gonsego garanyoora ebhyakurya okurwa kumiri giryagirya gya omujeituni. Bheenyu, mbo amasagi ga emijeituni gya mwisisi ganú gaahambwa gatigati ya amasagi ga mbere. ¹⁸Kwa ego, mutajeera amasagi ganú gaageejwa. Muteeheema, na muhiituke ega, emiri gitakubheesigira bheenyu, nawe, bheenyu mbo mureesigira emiri.

¹⁹Eribhaga erindi muratura okugamba ega, “Amasagi gayo gaageejwa, naho oni nhambirirwe ahasi haago.” ²⁰Riyo m-maheene. Amasagi gayo gaageejwa kwa okubha gateekirirya, na uuwe oringi kya ego oringi kwa okubha oreekirirya. Kwa ego, wiyangararire, oteeheema, nawe omoobhohe Waryubha. ²¹Waryubha yaajibhya Abhaisiraeri bhanú bharingi amasagi ga obhusimuka bhwa emijeituni. Kwa ego, kora uuwe wonse, aratura okukujibhya.

²²Mumaahe kya ego Waryubha arakorera obhujomu abhantu abhandi, na kya ego arajibhya abhantu abhandi kwa obhujibhu obhururu. Arajibhya bhanú bhaanga okumwikirirya, na arakukorera obhujomu uuwe, nyoore oragendererya okwikirirya obhujomu bhwaye. Nawe, nyoore oratiga okumwikirirya, uuwe wonse origeejwa. ²³Nyoore Abhaisiraeri bhayo bhariihunjura na okumwikirirya Waryubha, bharihambirirwa kweki kumujeituni gwabho, kwa okubha Waryubha yaana obhuturo bhwa okubhahambirira kweki. ²⁴Uuwe unú otaringi Omwisiraeri, uuwe n-kya erisagi rya omujeituni gwa mwisisi. Waageejwa na okuhambirirwa kumujeituni gunú gwahambwa na abhantu, onyoora kiyo n-kintu ekigeni okukoreka. Bhoono, omanye ega, gutaringi omurimu omukongʼu ku Waryubha okuhunjukira okuhambirira Abhaisiraeri bhanú bharingi kya amasagi ga emijeituni, kumuti gwabho guyo.

Waryubha araabhira abhantu bhonsego

²⁵Abhahiiri bhaani kuimani, ndeenda mumanye eguru ya ekinyerera kya Waryubha kinú akare kyaringa kiibhisiri, naho mutariija okwirora muuna obhungʼeeni bhukongʼu. Mumanye ega, m-Baisiraeri nyabhurebhe mbo bhaaringa na emitima emikongʼu, nawe, n-kuhikira eribhaga rinú Waryubha ariikirirya endengo yonsego ya abhantu bhanú bhataringi Abhaisiraeri okunyoora obhutuurya. ²⁶Kwa enjira iyo, ekyaro kyonsego kya Isiraeri kirituuribhwa. N-kya ego Waryubha yaagamba mu Mangʼoore Amarabhu ega,

“Omutuurya ariija okurwa Sayuni,

arikora abheebhurwa bha Yakobho bhatige okumwanga Waryubha.

²⁷Rinu ndyo eriragano rinú ndikora nabho,

hanú ndibhaabhira obhusarya bhwabho.”11:26-27 Maaha mubhitabho bhya Isaaya 27:9, 59:20-21; Jeremia 31:33-34.

²⁸Hanú Abhaisiraeri bhaaringa bharaanga Amangʼana Amajomu eguru ya Yeesu Kiristu, bheekora okubha abhasigu bha Waryubha. Nawe, eringʼana riyo, ribheeri kwa obhwera bhwenyu, bheenyu abhantu bhanú mutaringi Abhaisiraeri. Kora ego, Waryubha akyahanjiri Abhaisiraeri, kwa okubha yaaringa asoreri bhajaaji bhaabho, na okukora nabho eriragano. ²⁹Waryubha akaasora abhantu bhaaye na okubhanonka, atakutura okwihunjura.11:29 Maaha mukitabho kya Abharuumi 9:4-5.

³⁰Akare, bheenyu mutaaringa muramwigwa Waryubha, nawe bhoono, munyooreri ekyabhira kya Waryubha, kwa okubha Abhaisiraeri bhataaringa bharamwigwa Waryubha. ³¹Egoego bhonse bhaajeema, naho kwa okwabhirwa kwenyu bhonse bhaabhirwe. ³²Waryubha ngʼo yaatiga abhantu bhonsego bhagendererye okwanga okumwigwa na okubhohwa mubhusarya bhwabho, naho abhamaahire ekyabhira abhantu bhayo bhonsego.

Waryubha agungibhwe

³³Niwi unú aratura okumanya kya ego bhuringi obhuniibhi, egintungwa na obhumanyi bhwa Waryubha? Bhiragendererya okwanga okumanyikana kubheetu! Atariho omuntu unú aratura okumanya obhwamuri bhwaye, kasi okugigamba eginjira gyaye. ³⁴N-kya ego Amangʼoore Amarabhu garagamba ega,

“Niwi unú amanyiri ganú Omukuru Waryubha areeganirirya?

Niwi unú aramutongera?”11:34 Maaha mukitabho kya Isaaya 40:13.

³⁵“Niwi unú yaamukopesya Waryubha ekintu

kinú areenderwa okuhunjukya?”11:35 Maaha mukitabho kya Ayubhu 41:11.

³⁶Waryubha ngʼo yaabhumba ebhintu bhyonsego.

Nu-kuhitira kumwene ega, ebhintu bhyonsego bhiragendererya okubha-ho,

na ebhintu bhyonsego bhiriho kurusumo rwa obhukuru bhwaye.

Waryubha agungibhwe koko! Amina.

Mwiruusye obhuhoru bhwenyu mumukorere Waryubha emirimu

¹Bhoono, abhahiiri bhaani kuimani, mumanyiri kya ego Waryubha aratumaahira ekyabhira. Kwa ego mbe, ndabhakomererya ega, mwiruusye obhuhoru bhwenyu ku Waryubha. Mubhe kya ebhimwenso ebhihoru, ebhirabhu, ebhijomu, bhinú bhiramungʼarira Waryubha. Okukora ego, nko enjira ya heene ya okumusyengera Waryubha. ²Muteehigira obhusimuka bhwa abhantu bha ekyaro kinu, nawe, mutige Waryubha ahunjure emitima gyenyu, naho mubhe na ameetegeerero amahya. Hayo nho, mureehigire okumanya ganú Waryubha arabheendera. Na hayo nho muraamanye m-mangʼana-ki amajomu, ganú garamungʼarira, kweki ganú gakuneeni.

³Bhoono, Kiristu yangʼeeri eriruguto mbe omutumwa waaye. Kwa ego, ndakeerya kira oumwi weenyu ega, ateerora ega, yaana obhwera okukira kya ego aringi, nawe, abhe na egintungwa. Kira omuntu aheerwe endengo yaaye ya eimani na Waryubha.12:3 Kira omuntu aheerwe endengo yaaye ya eimani na Waryubha. Ensonga eindi eratura okubha ega, Kira omuntu yeerenge okuringʼaana na eimani yaaye.⁴Kya ego mumanyiri ega, omubhiri n-gumwi, nawe, guuna ebhiroobhero ebhyaru, na kira ekiroobhero kiina omurimu gwakyo. ⁵Ego niigo na bheetu. Bheetu turingi abhaaru, nawe, tubheeri omubhiri ogumwi kwa okugwatana kwetu na Kiristu. Kumubhiri gwaye, kira omuntu n-kiroobhero kumurikyaye, na yaana omurimu gwaye.

⁶Kwa ego, tuuna ebhibharo amanga amaaru, kya ego Waryubha yaatuhaana kwa eriruguto ryaye. Omuntu unú aheerwe ekibharo kya okuruusya obhurooti, atumire ekibharo kiyo okuringʼaana na eimani yaaye. ⁷Omuntu unú aheerwe ekibharo kya okukorera emirimu abharikyaye, abhakorere emirimu bhujomu. Na omuntu unú aheerwe ekibharo kya okwihigirya, yeehigirye bhujomu. ⁸Omuntu unú aheerwe ekibharo kya okuhorisya abharikyaye, akore ego bhujomu. Omuntu unú aheerwe ekibharo kya obhuserenʼya kubhantu, aserenʼye kwa omutima gonsego. Omuntu unú aheerwe ekibharo kya obhutungi, atunge kwa ekituunyo kyonsego. Na omuntu unú aheerwe ekibharo kya ekyabhira, yaabhire abhantu kwa obhujomerwa.

Muhanjane

⁹Obhuhanje bhwenyu bhutabha bhwa orwambe, mubhihirirwe amabhiibhi na mubhenga muragwata rinú riringi erijomu eribhaga ryonsego. ¹⁰Muhanjane bheenyu abheene kwa abheene kwa obhuhanje bhwa abhahiiri kuimani, na okwiganirirya mbere abhandi kwa obhusuuku. ¹¹Mutabha abharosu kukukora emirimu gya Waryubha, nawe, mubhe na ekituunyo mumitima gyenyu kukumukorera Omukuru emirimu.12:11 Mubhe na ekituunyo mumitima gyenyu kukumukorera Omukuru emirimu. Ensonga eindi eratura okubha ega, moorokereribhwe na Omutima Omurabhu, naho muture okumukorera Omukuru emirimu kwa ekituunyo.¹²Mujomerwe kuganú Waryubha yaabharaga, mubhenga mureegumirirya muginyanko, na mugume kumasabho. ¹³Mubhabheere abheekirirya abharikyenyu okuringʼaana na obhwendi bhwabho, na mubhenga muragenihya abhageni muginyumba gyenyu.

¹⁴Mumusabhe Waryubha abhanonke bhanú bharabhanyankya, kora mutabha murabhasabhira ega, bheehiimwe. ¹⁵Mujomerwenga hamwi na bhanú bharajomerwa, na mukuurenga hamwi na bhanú bharakuura. ¹⁶Mwikare hamwi kwa ensonga eimwi. Mutabha mureegungya, nawe, mwiyituumye, mubhe na obhugwatani na abhantu bha insi. Muteerora ega, bheenyu abheenego muuna obhungʼeeni.

¹⁷Hanú abhantu bharabhakorera obhubhiibhi, mutabhariha ekisiiyomba. Nawe, mukore ganú garamaahikana ega, m-majomu kubhantu bhonsego. ¹⁸Mukore ekituunyo kya okubha na omurembe na abhantu bhonsego. ¹⁹Abhahanje bhaani, mutariha ekisiiyomba, nawe, mutigire Waryubha yaamure kya okukora. Ndagamba ego, kwa okubha mu Mangʼoore Amarabhu, Omukuru Waryubha aragamba ega, “Oni nooni ndiriha ekisiiyomba.”12:19 Maaha mukitabho kya Obhuhiituki bhwa Amaragiriryo 32:35.²⁰Kweki mutariha ekisiiyomba, nawe, mukore kya ego Amangʼoore Amarabhu garagamba ega,

“Nyoore omusigu waaho yaana omweko, omuhaane ebhyakurya.

Na nyoore yaana enyonta, omuhaane amanji.

Okaakora ego, oribha muna okumeenʼye amakara ga omururo omutuuriiri kumutwe gwaye.”12:20 Okaakora ego, oribha muna okumeenʼye amakara ga omururo omutuuriiri kumutwe gwaye. Abhasomi abhaaru bharagamba ega, ensonga yaaye niiga, Okaakora ego, oribha omusuukirye eguru ya obhubhiibhi bhwaye kwa obhujomu bhwaho. Maaha mukitabho kya Egimesaari 25:21-22.

²¹Otahigwa na obhusarya bhunú abhantu bharakukorera, nawe, ohige obhusarya bhuyo, kwa okubhakorera amajomu.

Musuuke abhatungi bha ekyaro

¹Kira omuntu areenderwa okusuuka abhatungi bha ekyaro. Muhiituke ega, obhutungi bhwabho bhonsego, bhurarwa ku Waryubha, na weeki ngʼo yaabhatuura kubhutungi. ²Kwa ego, omuntu wowonse unú araanga obhutungi, araanga obhwamuri bhwa Waryubha. Na unú araanga obhwamuri bhwa Waryubha, aribhuturirwa ekiina. ³Abhatungi bhatakukanga bhanú bharakora amajomu, nawe, bhanú bharakora amabhiibhi. Kwa ego, nyoore otakwenda woobhohe abhatungi, obhenga orakora amajomu, nho bhonse bharaakugungye. ⁴Omutungi wa ekyaro, m-mukori wa emirimu wa Waryubha, na emirimu ginú arakora, giina obhwera kubheenyu. Nawe, oraakore amabhiibhi, oreenderwa omoobhohe! M-maheene ega, yaana obhuturo bhwa okujibhya. Kukukora ego, arabha omukori wa emirimu wa Waryubha, arakunaanʼya obhujibhu bhwa Waryubha kubhakori bha amabhiibhi. ⁵Kwa ego, mureenderwa okusuuka abhatungi bha ekyaro. Mutabhasuuka kwa ekisigo kya okoobhoha obhujibhu bhwa Waryubha okwenego, nawe, mubhasuuke kwa okubha mumanyiri bhujomu mumeetegeerero geenyu ega, Waryubha areenda mubhenga, murakora ego.

⁶Kweki, muratobha erigooti kwa ekisigo kiyo. Abhatungi bha ekyaro, hanú bharakora ekituunyo okukora emirimu gyabho, bharamukorera Waryubha omwene. ⁷Kwa ego, mubhenga murakora amangʼana ganú abhatungi bhayo, bhareenderwa okukorerwa. Nyoore muratongwa erigooti, mbe murihe erigooti. Na nyoore mureenderwa okusuuka omuntu, mumusuuke.

Obhuhanje mbo enjira ya okukunaanʼya amaragiriryo ga Waryubha

⁸Mutabha muratongwa ekintu kyokyonse na omuntu wowonse, nawe, okutongwa kwenyu, kubhe kwa okuhanjana okwenego. Unú aramuhanja omurikyaye, uyo ngʼo arakunaanʼya amaragiriryo ga Waryubha. ⁹Maaha, amaragiriryo garagamba ega, “Otakora ameega kibhara, oteeta, oteebha, na oteegomba ekintu kya omurikyaho.”13:9a Maaha mubhitabho bhya Okuhuruka 20:13-17; Obhuhiituki bhwa Amaragiriryo 5:17-21. Nawe, amaragiriryo gayo na agandi gonsego garagwatanibhwa na eriragiriryo rimwi, rinú riragamba ega, “Omuhanje omurikyaho kya ego oreehanja uuwe omwene.”13:9b Maaha mukitabho kya Abharaawi 19:18.¹⁰Omuntu unú amuhanjiri omurikyaye, atakumukorera amabhiibhi. Kwa ego, obhuhanje mbo enjira ya okukunaanʼya amaragiriryo ga Waryubha.

¹¹Mubhenga murakora gayo gonsego, kwa okubha mumanyiri ega, ensa ya okubhuuka okurwa muntiro ehikiri. Maaha, eribhaga rya obhutuurya bhwetu, riringi haangʼi bhukongʼu, okukira kubhwambiro hayo, hanú twaamba okumwikirirya Yeesu. ¹²Bhoono, obhutiku bhureenda okukya, na omubhasu guringi haangʼi okubhara. Kwa ego, tutige amakorwa amabhiibhi ganú garakorerwa mukisunte, na mubhanure ebhirwaniro bhya endingaasi. ¹³Tubhe na eginteemo eginjomu kya abhantu bhanú bhareekara mundingaasi ya orusiku oruhya. Tutabha abhantu bhanú bharakora eginyangi gya okunywa amarwa na abhareebhi. Tutakora eginteemo gyogyonse gya obhusimbe, kora amangʼana ga eginsoni. Tutabha abhatindi kora abha orwango. ¹⁴Nawe bhoono, kubhuhoru bhwenyu bhonsego, mubhenga muroorokereribhwa na Omukuru Yeesu Kiristu. Muteekirirya kora ahake, okoorokereribhwa na obhusimuka bhwenyu bhwa obhusarya, kasi okugwata orunamba rwenyu orubhiibhi.

Mutabhabhuturira ekiina abheekirirya abharikyenyu

¹Mumwikiririrye omwikirirya omurikyenyu unú eimani yaaye etaranaga. Mutahakaananʼya nawe eguru ya ameetegeerero gaaye, nyoore garaahabhane na ageenyu. ²Omuntu unú anagiri kuimani, ararya ebhintu bhyonsego, nawe, unú ataranaga kuimani, arakanya ega, areekiriribhwa okurya emikubhi egyenego. ³Omuntu unú ararya ekintu kyokyonse, atamujeera unú ararya emikubhi. Na unú ararya emikubhi, atamubhuturira ekiina unú ararya kyokyonse, kwa okubha Waryubha amwikiriirye kya ego aringi. ⁴Uuwe otaana obhutungi bhobhonse bhwa okubhuturira ekiina omugaya wa omuntu oundi. Omukuru waaye ngʼo amanyiri, nyoore omugaya waaye areegumirirya kuimani, kasi atakwigumirirya kuimani. Wonse areegumirirya kwa okubha Omukuru Yeesu, aratura okumukora yeegumirirye.

⁵Omuntu oundi ararora ega, orusiku nyabhurebhe ruuna obhwera okukira eginsiku egindi, nawe, oundi ararora ega, eginsiku gyonsego giringʼeeni. Mbe, kira oumwi abhe na obhuheene na ganú areekirirya. ⁶Omuntu unú ararora ega, orusiku nyabhurebhe n-dujomu okukira eginsiku egindi, arakora ego kwa okubha areenda okumungʼarira Omukuru. Na unú ararya ebhintu bhyonsego, arakora ego, kwa okubha areenda okumungʼarira Omukuru. Atakutura okurya kyokyonse bira okumukumya Waryubha. Na unú ararya omukubhi ogwenego, arakora ego, kwa okubha areenda okumungʼarira Omukuru. Uyo wonse aramukumya Waryubha. ⁷Ndagamba ego, kwa okubha atariho omuntu gati yeenyu unú areekara kurusumo rwaye omwene, kora unú arakwa kurusumo rwaye omwene. ⁸Eribhaga rinú turingi abhahoru, tureekara kurusumo rwa Omukuru Yeesu. Na eribhaga rinú turakwa, turakwa kurusumo rwa Omukuru Yeesu. Kwa ego, nyoore turingi abhahoru kasi turakwa, bheetu m-bantu bhaaye. ⁹Kiristu yaakwa na okuhyuka, naho abhe Omukuru wa abhantu bhonsego, abhaku na abhahoru.14:9 Maaha mukitabho kya 2 Abhakorinto 5:15.

¹⁰Bhoono, kwaki uuwe orabhuturira ekiina omwikirirya omurikyaho? Na kwaki uuwe wonse orajeera omwikirirya omurikyaho? Bheetu bhonsego turiimirira embere ya ekitumbi kya Waryubha, ekya okubhuturira ekiina. ¹¹N-kya ego Amangʼoore Amarabhu garagamba ega,

“Maheene Omukuru Waryubha aragamba ega,

kira omuntu aritema ebhiru embere yaani,

na kira omuntu aringungya kwa orurimi rwaye.”14:11 Maaha mukitabho kya Isaaya 45:23.

¹²Kwa ego, kira oumwi gati yeetu, ariigambira omwene embere ya Waryubha.

Unú anagiri kuimani atamujimya unú ataranaga kuimani

¹³Kwa ego, tutige okubhuturirana ekiina, nawe, twamure okutiga okukora kyokyonse kinú kiraamujimye omwikirirya omurikyetu, kasi okumugwisya akore obhusarya. ¹⁴Kukugwatana na Omukuru Yeesu, niina obhuheene ega, bhitariho ebhyakurya bhyobhyonse ebhikonu.14:14 Maaha mukitabho kya Mariko 7:18-20. Nawe, nyoore omuntu ararora ega, ebhyakurya nyabhurebhe m-bikonu, hayo nho ebhyakurya bhiyo, bhirabha ebhikonu kumwene. ¹⁵Kwa ego, nyoore uuwe oraamukore omwikirirya omurikyaho asurumbare bhukongʼu mumutima gwaye, hanú araarore orarya ebhyakurya nyabhurebhe, hayo orabha otakoorokereribhwa na obhuhanje kumurikyaho. Mbe, oteekirirya ega, kwa enjira ya ebhyakurya bhyaho, omuhabhye omuntu unú Kiristu yaakwa kurusumo rwaye! ¹⁶Otakora ekintu kinú uuwe orarora ega, n-kijomu, enu abhandi bharakirora ega, n-kibhiibhi. ¹⁷Amangʼana ga obhukama bhwa Waryubha,14:17 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. gataringi amangʼana eguru ya okurya kasi okunywa, nawe, m-mangʼana eguru ya okukora obhuheene, okubha na omurembe na okwikara kwa obhujomerwa. Gayo gonsego gararekana na Omutima Omurabhu. ¹⁸Omuntu wowonse unú aramukorera emirimu Kiristu ego, aramungʼarira Waryubha, kweki areekiriribhwa na abhantu.

¹⁹Kwa ego mbe, tukore ekituunyo okukora amangʼana ganú garareeta omurembe, na aga okunaganʼya kuimani. ²⁰Otasarya emirimu gya Waryubha kwa okurya ebhyakurya bhyobhyonse bhinú oreenda. M-buheene ega, ebhyakurya bhyonsego bhireekiriribhwa okuriibhwa, nawe, m-bubhiibhi okurya ebhyakurya bhyobhyonse bhinú bhiraakore omurikyaho akore obhusarya. ²¹Nyakara otige okurya enyama, kasi okunywa edivai,14:21 Edivai. Maaha eringʼana rinu mu Moonjooro eguru ya Amangʼana Amakongʼu. kasi okukora kyokyonse kinú kiratura okukora omurikyaho akore obhusarya. ²²Bhoono uuwe, kinú oreekirirya eguru ya eringʼana riyo, kibhe gati yaaho na Waryubha waaho. Nyakara omuntu unú atakwibhuturira ekiina, hanú arakora ekintu kinú areekirirya ega, n-kijomu. ²³Nawe, wowonse unú yaana enkubhi eguru ya ebhyakurya bhinú ararya, uyo aribhuturirwa ekiina na Waryubha, kwa okubha weeki areekirirya ega, kinú arakora n-kibhiibhi embere ya Waryubha. Hanú omuntu arakora kyokyonse kinú atakwikirirya ega, n-kijomu, hayo, arakora obhusarya.

¹Mbe, bheetu bhanú tunagiri kuimani, tureenderwa okwigumirirya abharikyetu, bhanú bhataranaga kuimani. Tubhabheere abhanyooheeru kuimani, tuteengʼahirya bheetu abheene. ²Kira oumwi weetu, akore ekituunyo okukora amangʼana ganú gaana obhwera kumwikirirya omurikyaye, naho wonse anage kuimani yaaye. ³Kora Kiristu omwene, ataakora amangʼana ganú gaaringa na obhwera kuweeki omwenego. Nawe, ganú yaakoranga, gaaringa kya ego Amangʼoore Amarabhu garagamba ega,

“Amatuki ganú bharakutuka uuwe Waryubha,

gaannyoora oni.”15:3 Maaha mukitabho kya Egijabhuri 69:9.

⁴Gonsego ganú gaangʼoorwa akare, mu Mangʼoore Amarabhu, gaangʼoorwa kurusumo rwa okutwihigirya bheetu. Amangʼoore gayo, garatubheera okwigumirirya muginyanko gyetu na garatuhorisya, naho tubhe na obhwisige.

⁵Waryubha ngʼo aratubheera okwigumirirya na aratuhorisya. Bhoono, ndasabha ega, abhakore mwikare hamwi kwa ensonga eimwi, kwa okubha muragwata ekirengyo kya Kiristu Yeesu. ⁶Hayo nho, bheenyu bhonsego, muraature okumugungya Waryubha, Taata wa Omukuru weetu Yeesu Kiristu, kwa ensonga eimwi na kwa eriisi erimwi.

Waryubha areekirirya Abhayahudina bhanú bhataringi Abhayahudi

⁷Bhoono, kira oumwi yeekirirye omurikyaye, kya ego Kiristu yaabheekirirya bheenyu, naho abhantu bhamugungye Waryubha. ⁸Muhiituke ega, Kiristu yaaja okubha omukori wa emirimu wa Abhayahudi. Yaaja naho abhoorokye ega, Waryubha m-muheene, na kwa enjira ya Kiristu, Waryubha akuneenʼye egindago gyonsego ginú yaaraga bhajaaji weetu. ⁹Kweki, yaaja naho abhantu bhanú bhataringi Abhayahudi, bhamugungye Waryubha kwa ekyabhira kyaye. N-kya ego Amangʼoore Amarabhu garagamba ega,

“Kwa ego, ndikugungya gati ya abhantu bha ebhyaro ebhindi,

ndikwimbira ameembo ga okukukumya uuwe.”15:9 Maaha mubhitabho bhya Egijabhuri 18:49; 2 Samweri 22:50.

¹⁰Kweki, Amangʼoore garagamba ega,

“Bheenyu abhantu bha ebhyaro ebhindi,

mujomerwe hamwi na abhantu bha Waryubha!”15:10 Maaha mukitabho kya Obhuhiituki bhwa Amaragiriryo 32:43.

¹¹Kweki, Amangʼoore garagamba ega,

“Bheenyu abhantu bha ebhyaro ebhindi,

mumugungye Omukuru Waryubha.

Bheenyu abhantu bha amakabhira gonsego mukyaro,

mumugungye bhukongʼu Waryubha!”15:11 Maaha mukitabho kya Egijabhuri 117:1.

¹²Kora omurooti Isaaya wonse yaagamba ega,

“Ariija omuntu oumwi okurwa kurwibhuro rwa Yeese,

weeki aritunga ebhyaro bhyonsego.

Na abhantu bha ebhyaro bhyonsego,

bharimwisigira ega, weeki aribhatuurya.”15:12 Maaha mukitabho kya Isaaya 11:10.

¹³Waryubha ngʼo tureesigira ega, arikora gonsego ganú yaaraga. Kwa ego, ndabhasabhira ega, abhahaane omurembe bhukongʼu na obhujomerwa obhwaru hanú muragendererya okumwikirirya. Hayo nho muraabhe na obhwisige obhunene, kwa obhuturo bhwa Omutima Omurabhu.

Ensonga ya Pauro ya okungʼoora enyarubha yaaye

¹⁴Abhahiiri bhaani kuimani, oni omwene niina obhuheene ega, bheenyu m-bantu abhaheene bhukongʼu, na mumanyiri bhujomu kya ego mureenderwa okukora, kweki muuna obhuturo bhwa okwihigiranʼya. ¹⁵Kora ego, mbangʼooreeri amangʼana agandi munyarubha inu kwa obhuhaari, naho mbahiitukye amangʼana gayo. Nkoreri ego, okurekana na eriruguto rinú Waryubha yangʼeeri, ¹⁶naho mbe omukori wa emirimu wa Kiristu Yeesu kubhantu bhanú bhataringi Abhayahudi. Ngʼeerwe emirimu gya omusyengeri wa okubharaarikira Amangʼana Amajomu okurwa ku Waryubha, naho bhabhe kya ekimwenso kinú kyaraamwa na Omutima Omurabhu.

¹⁷Bhoono, okurekana na okugwatana kwani na Kiristu Yeesu, ndatura okwigungirya emirimu ginú ndakora kurusumo rwa Waryubha. ¹⁸Oni ntakugamba eringʼana ryoryonse erindi, nawe, ganú Kiristu yaakora okuhitira kuoni. Yaakora abhantu bhanú bhataringi Abhayahudi, bhamwigwe Waryubha. Eringʼana riyo, ryakoreka okuhitira kumangʼana ganú naaringa ndagamba na emirimu ginú naaringa ndakora. ¹⁹Bhaarutwa okumwigwa, kwa okubha okuhitira kuoni, bhaarora eginguru gya Kiristu kubhimanyiiriryo na ebhiruguuryo. Naatura okugakora kwa eginguru gya Omutima wa Waryubha. Kwa enjira iyo, neenaara kira ahasi ndaraarika Amangʼana Amajomu eguru ya Yeesu Kiristu, okwambira mumugi gwa Yerusaremu okuhikira mukyaro kya Iruriko. ²⁰Kwa ego, ensonga yaani nu-kuraarika Amangʼana Amajomu, ahasi hanú abhantu bhataakaraarikiirwe amangʼana eguru ya Kiristu. Ndeenda okukora ego, naho ntahunjukira okukora emirimu ahasi hanú omuntu oundi yaamara okukora. ²¹Ndakora kya ego Amangʼoore Amarabhu garagamba ega,

“Abhantu bhanú bhataakaraarikiirwe amangʼana gaaye, mbo bharigarora,

na abhantu bhanú bhataakageegwiri, mbo bharigamanya.”15:21 Maaha mukitabho kya Isaaya 52:15.

Enamba ya Pauro ya okugya mumugi gwa Ruumi

²²Emirimu giyo, ngyo gyaringa girandibhira mara kaaru okuuja kubheenyu. ²³Nawe bhoono, mmariri emirimu gyani kumbaara ginu, na kwa emyaka emyaru naaringa ndeegomba okuuja kubheenyu eyo. ²⁴Kwa ego, ndeenda okubhataarira, na okujomererwa ekigwatani kyenyu kwa eribhaga ekego, hanú ndihita okugya mukyaro kya Isipania. Kwa ego, ndasabha ega, muriija okumbeera kurugendo rwani rwa okugya mukyaro muyo.

²⁵Bhoonwego, ndagya Yerusaremu kurusumo rwa okuhira omusororyo kubheekirirya abharikyetu.15:25 Maaha mukitabho kya 2 Abhakorinto 8:19-20.²⁶Abheekirirya bhanú bharingi Makedonia na Akaya, bhaarora m-bujomu okusororya, naho bhabheere abheekirirya abhatobhu gati ya abheekirirya bhanú bharingi Yerusaremu erya. ²⁷Bheeki abheene mbo bhaamura okukora ego, na m-maheene ega, bharatongwa okubhabheera. Bharatongwa, kwa okubha abheekirirya bhanú bhataringi Abhayahudi, bhagwateeni hamwi na Abhayahudi, kuginonkwe gya obhutuurya ginú girahitira ku Bhayahudi. Kwa ego, abheekirirya bhanú bhataringi Abhayahudi, bhareenderwa bhabheere Abhayahudi kwa ebhintu bhyabho. ²⁸Hanú ndibha mmariri emirimu giyo, egya okubhagwatya omusororyo guyo abheekirirya bha Yerusaremu, nho ndyamba orugendo rwani rwa okugya Isipania, na ndihitira kubheenyu eyo. ²⁹Mmanyiri ega, hanú ndibha nhikiri kubheenyu na okwikara hamwi na bheenyu, Kiristu aritunonka kwibhaga rinú ndibha hayo.

³⁰Abhahiiri bhaani kuimani, okurekana na okugwatana kwetu na Omukuru weetu Yeesu Kiristu, na okurekana na obhuhanje bhunú Omutima Omurabhu atuheeri, ndabhakomererya kwa omutima gwani gonsego ega, mwikongʼererye okugwatana na oni okunsabhira ku Waryubha. ³¹Munsabhire ega, abhantu bha mukyaro kya Yudea erya, bhanú bhataamwikirirya Yeesu Kiristu, bhatariija okunkorera amabhiibhi.15:31 Maaha mukitabho kya Amakorwa ga Abhatumwa 21:27-36. Kweki munsabhire, naho abheekirirya bha Yerusaremu erya, bheekirirye okugega omusororyo gunu. ³²Mbe, hanú Waryubha arihanja, ndiija kubheenyu hayo kwa obhujomerwa bhukongʼu, naho mbe na eribhaga rya okumuunya hamwi na bheenyu.

³³Waryubha unú arabhahaana omurembe, abhe hamwi na bheenyu bhonsego. Amina.

Pauro aratuma amangʼana bhamukeeranirye abhantu amanga amaaru

¹Ndeenda mumumanye omuhara weetu kuimani Fibhi. Weeki m-mubheeri wa erikanisa rinú riringi mumugi gwa Kenkirea. ²Ndasabha mumugenihye bhujomu, kya ego ereenderwa kubhantu bha Waryubha, kwa okubha wonse m-mwikirirya wa Omukuru Yeesu. Kweki ndasabha ega, mumubheere kyokyonse kinú areenda, kwa okubha wonse yaabheera abhantu abhaaru, kora oni.

³Munkeeranirye Pirisikira na Akira. Bhayo m-bakori bha emirimu abharikyani kumirimu gya Kiristu Yeesu, ⁴na bheenda okubhurya obhuhoru bhwabho, kurusumo rwani. Ntaringi oni omwenego unú ndabhakumya, nawe, kora abheekirirya bhanú bhataringi Abhayahudi mumakanisa gonsego, bharabhakumya bhukongʼu. ⁵Kweki munkeeranirye abheekirirya bhanú oranyoora bhareekumanʼya iika owaabho hayo, hamwi na omuhanje waani Epaineto. Weeki ngʼo owa mbere okumwikirirya Kiristu mukyaro kya Asia.16:5 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki.

⁶Munkeeranirye Mariamu unú yaakora ekituunyo bhukongʼu, okukora emirimu kurusumo rwenyu. ⁷Munkeeranirye Anduroniko na Yunia. Bhayo m-Bayahudi abharikyani, bhaabhohwa hamwi na oni mwigereja. Bheeki bhaankangatira okumwikirirya Kiristu, kweki bhamanyikeeni bhukongʼu gati ya abhatumwa.16:7 Bhamanyikeeni bhukongʼu gati ya abhatumwa. Ensonga eindi eratura okubha ega, bharasuukwa bhukongʼu na abhatumwa.

⁸Munkeeranirye omuhanje waani Amupuriato, omwikirirya wa Omukuru Yeesu Kiristu. ⁹Munkeeranirye Uribhano, omukori wa emirimu hamwi na oni ku Kiristu, na kora omuhanje waani Sitakisi.

¹⁰Munkeeranirye Apere. Weeki yeegumirirya amasakyo amaaru, akeekiriribhwa na Kiristu. Kweki munkeeranirye abhantu bha owa Arisitobhuro. ¹¹Munkeeranirye Herodioni, Omuyahudi omurikyani. Kweki munkeeranirye abhantu bha owa Narikiso bhanú bharamwikirirya Omukuru Yeesu Kiristu. ¹²Munkeeranirye Tirifaina na Tirifosa. Abhakari bhayo, bhaana ekituunyo bhukongʼu okukora emirimu gya Omukuru Yeesu Kiristu. Kweki, munkeeranirye na omuhanje waani Perisisi. Weeki wonse yaakora ekituunyo bhukongʼu okukora emirimu gya Omukuru Yeesu Kiristu.

¹³Munkeeranirye Rufo, omusorwa wa Omukuru Yeesu Kiristu, hamwi na ngʼina waabho. Weeki m-maayi kuoni nonse, kwa okubha yaambeera kya omwana waaye. ¹⁴Munkeeranirye Asinkirito, Furegoni, Herime, Paturobha, Herima, na abhahiiri bhaani kuimani, bhonsego bhanú bharingi hamwi nabho.

¹⁵Munkeeranirye Firorogo na Yuria, Nerea na omuhara waabho Orimpa, na abheekirirya bhonsego bhanú bharingi hamwi nabho. ¹⁶Mubhenga murakeeranʼya kwa obhuhanje bhwa Ekikiristu. Abheekirirya bha amakanisa gonsego ga Kiristu, bharabhakeeranʼya.

Pauro arakemera abheekirirya

¹⁷Bhoono, abhahiiri bhaani kuimani, ndabhakomererya ega, mwiyangararire na abhantu bhanú bhareehigirya ameehigiryo ga okwahukanʼya abhantu. Abhantu bhayo bhareenda okusarya eimani ya abhantu, na bharaanga ameehigiryo ganú mweehigiribhwa. Mwiyahure nabho! ¹⁸Abhantu bhayo, bhatakumukorera emirimu Kiristu, Omukuru weetu, nawe, kinú bhareenda, nu-kwigutya orunamba rwabho orubhiibhi. Bharagamba amangʼana amasambaaruku ga okwikangatirirya, naho bhangʼeene abheekirirya bhanú bhatakwisigira obhubhiibhi bhobhonse.

¹⁹Abhantu bhonsego bheegwiri ega, muringi abheegwa. Eringʼana riyo, riranjomera bhukongʼu. Ndeenda mubhe na egintungwa gya okukora amajomu, mutabha na amasoro gogonse eguru ya amabhiibhi.

²⁰Waryubha unú arabhahaana omurembe, araatajire hansi Erisambwa16:20a Erisambwa. Maaha eringʼana rinu mu Moonjooro eguru ya Amangʼana Amakongʼu. bhwangu hanu na okubhahaana obhuhigi eguru yaaryo. Eriruguto rya Omukuru weetu Yeesu Kiristu ribhe hamwi na bheenyu bhonsego. [Amina.]16:20b Amangʼana mumabhano ganu […] gataringi mumangʼoore agandi ga akare aga Ekiyunani.

²¹Timoteo, omukori wa emirimu omurikyani, arabhakeeranʼya. Na Abhayahudi abharikyani Rukio, Yasooni na Sosipatiro, bhonse bharabhakeeranʼya. ²²Kora oni Teritio, omungʼoori wa enyarubha ya Pauro inu, nonse ndabhakeeranʼya kuriina rya Omukuru Yeesu. ²³Gaayo, unú oni Pauro ndeekara owaaye, na owaaye nho abheekirirya bhonsego bha erikanisa rya hanu bhareekumanʼya, wonse arabhakeeranʼya. Erasito, omubhiiki wa egimbirya gya omugi gunu,16:23 Omugi gunu. Omugi guyo hamwi ngo omugi gwa Korinto. wonse arabhakeeranʼya. Na omuhiiri weetu kuimani Kwarito wonse, arabhakeeranʼya.

[²⁴Eriruguto rya Omukuru weetu Yeesu Kiristu ribhe hamwi na bheenyu bhonsego. Amina.]16:24 Amangʼana mumabhano ganu […] gataringi mumangʼoore agandi ga akare aga Ekiyunani.

Pauro aramugungya Waryubha

²⁵Bhoono, tumugungye Waryubha! Weeki aratura okubhakora mubhenga muranaga kuimani yeenyu, okuhitira ku Mangʼana Amajomu eguru ya Yeesu Kiristu ganú naaringa ndaraarika kubheenyu. Amangʼana gayo, akare gaaringa ekinyerera kya Waryubha kinú kyaringa kiibhisiri. ²⁶Nawe, bhoono gatubhwirwe, na okuhitira mu Mangʼoore Amarabhu ga abharooti, amangʼana gayo, gamanyikeeni mubhyaro bhyonsego. Waryubha owa koko, ngʼo aragiriirye ega, amangʼana gayo, garaarikwe kubhantu bhonsego, naho bhayo bhonse bhature okumwikirirya na okumwigwa Omukuru Yeesu.

²⁷Waryubha omwenego, ngʼo yaana egintungwa gyonsego. Weeki ngʼo abhenga aragungibhwa koko, okuhitira ku Yeesu Kiristu! Amina.