Obhukundukuri bhwa Yoana

Obhukundukuri bhwa Yoana

Obhukangati

Ekitabho kinu kyangʼoorwa na Yoana, omugaya wa Waryubha (1:1). Abhasomi abhaaru bharamanya ega, Yoana uyo yaaringa omwihigira wa Yeesu (Mataayo 10:2; Mariko 3:17). Yaangʼoora Amangʼana Amajomu ga Yeesu ganú garabhirikirwa kwa eriina ryaye hamwi na eginyarubha esatu gya Yoana.

Ekitabho kiyo kyangʼoorwa muna emyaka mirongo etaanu, okurwa okukwa na okuhyukibhwa kwa Yeesu. Eribhaga riyo, Kaisari oumwi unú yaaringa arabhirikirwa Domitiani yaaringa aratunga ekyaro kyonsego kya Abharuumi. Yaaringa omururu na yaaringa aranyankya Abhakiristu obhubhiibhi bhukongʼu.

Yoana yaabhangʼoorera ekitabho kinu Abhakiristu bha mumakanisa muhungati, mukyaro kya Asia, kinú eribhaga rinu kirabhirikirwa ega, Bhuturuki. Abhakiristu bhayo, bhaaringa na enyanko enene bhukongʼu inú yaasimurwa na Domitiani uyo. Bhaanyanka, kwa okubha bhaariikirirya eringʼana rya Waryubha na kurusumo rwa okumwikirirya Yeesu Kiristu.

Yoana yaabhangʼoorera bhayo, naho abhahorisye. Yaagamba ega, bheekongʼererye munyanko okuhikira obhuteero (2:7, 2:11, 2:17, 2:26, 3:5, 3:12, 3:21). Akabhakeerya ega, bheekongʼererye kwa okubha enyanko iyo ngʼ-ya eribhaga ekego. Kweki kubhuteero Waryubha aribhajibhya abhasigu bhaabho bhonsego (22:10-15). Okwikongʼererya kurareeta enonkwe enene.

Yoana yaarora amangʼana ganu mubhurori. Amangʼana amaaru munsi ya ekitabho kiyo garagambwa kwa ebhimanyiiriryo. Kwa ekirengyo, mukiseku kya mbere (1:12) Yoana ararora ebhisunga muhungati bhya egijahaabhu bhya okwikarya-ko egikorobhoi. Kweki turakeeribhwa ega, ensonga ya ebhisunga bhiyo niiga, kira ekimwi kireemiririra erikanisa rimwi.

Yoana arahairira eguru ya ekitabho

¹Ganu ngo amangʼana ganú gaatubhurwa na Yeesu Kiristu. Kiristu yaatubhurirwa na Waryubha naho yoorokye abhagaya bhaaye, amangʼana ganú gareenderwa geebhuke bhwangu hanu. Yeesu wonse akatuma maraika1:1 Maraika. Maaha Bhamaraika mu Moonjooro eguru ya Amangʼana Amakongʼu. waaye yaantubhurire amangʼana gayo, oni Yoana omugaya waaye. ²Oni nkeemiririra amangʼana gonsego ganú naarora. Amangʼana gayo, m-buheene bhunú bhwatubhurwa na Yeesu Kiristu. Obhuheene bhuyo, mbo eringʼana rya Waryubha.

³Nyakara abhantu bhonsego bhanú bharasomera abharikyabho amangʼana ga obhurooti bhuyo. Kweki nyakara abhantu bhonsego bhanú bhareetegeerera na okugwata ganú gaangʼoorwa mukitabho munu, kwa okubha eribhaga rya okwibhuka kwa amangʼana gayo riringi haangʼi.

Okukeeranʼya

⁴Enyarubha inu, erwiri kuoni Yoana. Ndabhangʼoorera bheenyu abheehigira bha Yeesu bha mumakanisa muhungati ganú garingi mukyaro kya Asia.1:4a Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki.

Ndabheendera eriruguto na omurembe okurwa ku Waryubha unú ariho, unú yaaringa-ho okurwa obhusimuka na unú aribha-ho, na okurwa kumitima muhungati1:4b Kumitima muhungati. Ni-njira eindi ya okugamba Omutima Omurabhu. Muhungati, n-kimanyiiriryo kya obhukunaani mu Mangʼoore Amarabhu. Ensonga yaaye niiga, Omutima Omurabhu yaana eginguru gyonsego. ginú giringi embere ya ekitumbi kya ekikama, ⁵na okurwa ku Yeesu Kiristu, omwimiririri omuheene. Weeki yaabha owa mbere okuhyukibhwa, naho abhe omukama wa abhakama bhonsego mukyaro.

Yeesu atuhanjiri na yaatusibhura okurwa mubhusarya bhwetu, kwa enjira ya okwitira amanyinga gaaye. ⁶Yaatukora okubha obhukama bhwa abhasyengeri, naho tumukorere emirimu Waryubha, Esewaabho. Yeesu agungibhwe! Weeki yaana eginguru koko na koko! Amina.

⁷Maaha! Yeesu ariijira gatigati ya amasaaru!1:7a Maaha mukitabho kya Danyeri 7:13.

Abhantu bhonsego bharimurora,

kora bhanú bhaamubhita na eritimu.1:7b Maaha mukitabho kya Jakaria 12:10.

Amakabhira gonsego mukyaro, garifumba oruku, kurusumo rwaye.

Maheene, niigo eribha. Amina.

⁸Omukuru Waryubha aragamba ega, “Oni nooni Arifa na Omega, Obhusimuka na Obhuteero. Oni ndiho, naaringa-ho na ndibha-ho. Oni ngʼ-Waryubha wa obhuturo bhonsego.”

Yoana aramurora Kiristu mubhurori

⁹Oni Yoana omuhiiri weenyu kuimani, ndagwatana na bheenyu kukunyanka na okwigumirirya kurusumo rwa Yeesu na obhukama bhwaye. Naajibhibhwa kwa okutuurwa kwiginga rinú rirabhirikirwa ega, Patimo, kwa okubha naaringa ndaraarika eringʼana rya Waryubha na okuruusya obhwimiririri eguru ya Yeesu. ¹⁰Mbe, orusiku rumwi rwa Omukuru Yeesu, Omutima Omurabhu1:10 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. akanyituumira. Rumwigo, nkeegwa enyuma waani, eriisi erinene kya rya enkombi. ¹¹Eriisi riyo rikankeerya ega, “Ngʼoora mukitabho amangʼana gonsego ganú orarora. Omare okihire mumakanisa muhungati ganú garingi mumigi gya, Efeso, Simurina, Perigamo, Tiatira, Saridi, Firaderifia, na Raodikia.”

¹²Mbe, nkeekyukya naho ndore unú yaahairanga na oni, hanú neekyukya ego, nkarora ebhisunga muhungati bhya egijahaabhu ebhya okwikarya-ko egikorobhoi. ¹³Na gatigati ya ebhisunga bhiyo, nkarora omuntu unú atuubheeni na Omwana wa Adamu,1:13 Omwana wa Adamu. Uyo ngʼo Yeesu. Maaha Omwana wa Adamu mu Moonjooro eguru ya Amangʼana Amakongʼu. yeebhoheri enkanju entambi okuhikira mubhirenge, na omuchipi omugari gwa egijahaabhu kukikubha. ¹⁴Egintuukya gyaye gyaringa egindabhu pee, kya amakaafu, kweki kya omusoke. Na ameeso gaaye gaangʼesangʼesanga kya egindimi gya omururo. ¹⁵Amaguru gaaye, gaangʼesangʼesanga kya eshabha inú yoogiibhwe mwitanuuru rya omururo. Na eriisi ryaye ryaringa kya eriisi rya amanji amaaru ganú garagera. ¹⁶Kukubhoko kwaye kwa obhuryo, yaaringa na eginjota muhungati. Na omuhyu omoogi gwarwanga mumunwa gwaye. Obhusu bhwaye, bhwangʼesangʼesanga kya endingaasi ya omubhasu omururu.

¹⁷Hanú naamurora, nkoobhoha bhukongʼu nkagwa mumaguru gaaye nkabha kya omuntu unú akwiri. Nawe, akantuurira okubhoko kwaye kwa obhuryo, akagamba ega, “Otoobhoha! Oni nooni owa mbere na owa obhuteero. ¹⁸Oni nooni omuhoru! Naaringa nkwiri, nawe bhoono maaha, ndingi omuhoru koko na koko! Na niina eginfunguro gya oruku na egya mukyaro kya abhaku.1:18 Mukyaro kya abhaku. Ekiyunani kiragamba ega, kujimu.

¹⁹“Bhoono, ngʼoora amangʼana ganú oruuji, ganú gareebhuka bhoonwego, na ganú gariibhuka embere eyo. ²⁰Waarora eginjota muhungati kukubhoko kwani kwa obhuryo. Kweki, waarora ebhisunga muhungati bhya egijahaabhu bhya okwikarya-ko egikorobhoi. Bhoono tiga nkoorokye ensonga ya ekinyerera kiyo. Ebhisunga muhungati bhiyo m-makanisa muhungati, na eginjota muhungati giyo m-bamaraika bha amakanisa gayo.”

Enyarubha kwikanisa rya Efeso

¹Omuntu uyo, akagendererya okunkeerya ega, “Omungʼoorere maraika wa erikanisa rinú riringi mumugi gwa Efeso, omukeerye ega,

“Oni niina eginjota muhungati giyo kukubhoko kwani kwa obhuryo, na kweki ndagenda gatigati ya ebhisunga muhungati bhya egijahaabhu bhiyo. Mwitegeerere ganú ndabhakeerya.

²“Mmanyiri ebhikorwa bhyenyu, ekituunyo kyenyu na obhwigumirirya bhwenyu. Kweki mmanyiri ega, mutakugwatana na abhantu abhabhiibhi. Mwabheekomya bhanú bhareebhirikira ega, abhatumwa2:2 Abhatumwa. Maaha eringʼana rinu mu Moonjooro eguru ya Amangʼana Amakongʼu. enu bhataringi abhatumwa, na mukangʼamura ega, bhaaringa abhabheehi. ³Bheenyu muringi abheegumirirya, mwanyankibhwa kurusumo rwa eriina ryani, nawe okuhikira bhoono mutararosa.

⁴“Nawe, niina eringʼana erimwi rinú rirannyankya, mwatigiri obhuhanje bhwenyu obhwa mbere. ⁵Muhiituke ganú mwakoranga eribhaga rinú mwaamba okunyikirirya na ganú murakora bhoonwego. Kimwi munyihunjurire, mukore kya ego mwakoranga eribhaga rirya. Nawe muraange okukora ego, ndaaja okuruusya ekisunga kyenyu ahasi haaye. ⁶Nawe, ririho eringʼana erindi, rinú murakora bhujomu. Murajimira ebhikorwa ebhibhiibhi bhinú Abhanikorai2:6 Abhanikorai. Bhaaringa m-muganda gwa edini gunú gwaringa na egimiira egimbiibhi na ameehigiryo ga obhubheehi. bharakora. Oni nonse ndabhijimira bhukongʼu.

⁷“Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, ndimwikiririrya okurya emisumo gya omuti gunú gurahaana abhantu obhuhoru bhwa koko, gunú guringi mumugunda gwa Waryubha murwire.”2:7 Maaha mukitabho kya Obhwambiro 2:9.

Enyarubha kwikanisa rya Simurina

⁸Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Simurina, omukeerye ega,

“Oni ngʼ-wa mbere na owa obhuteero. Naakwa, nkahyuka! Mwitegeerere ganú ndabhakeerya.

⁹“Mmanyiri enyanko yeenyu na obhutobhu bhwenyu. Nawe maheene, muringi abhaniibhi, kwa okubha muringi abhantu bha Waryubha! Mmanyiri amatuki ganú muratukwa na bhanú bhareebhirikira ega, m-bantu bha Waryubha, nawe, bhataringi abhantu bha Waryubha. Bhayo m-bantu bha Erisambwa.2:9 Erisambwa. Maaha eringʼana rinu mu Moonjooro eguru ya Amangʼana Amakongʼu.¹⁰Mutoobhoha enyanko inú eribhanyoora. Maaha! Erisambwa riribhasakya kwa okubhatuura abhandi gati yeenyu mwigereja. Na bheenyu murinyoora enyanko eginsiku ekumi. Nawe, mubhe abhaheene kuoni kora okuhikira okukwa, na oni ndibhahaana omutuho gwa obhuhoru bhwa koko.

¹¹“Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, atarinyoorwa na oruku rwa kabhiri. Oruku ruyo, m-mururo gwa koko.”2:11 Maaha mukitabho kya Obhukundukuri 20:14.

Enyarubha kwikanisa rya Perigamo

¹²Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Perigamo, omukeerye ega,

“Oni niina omuhyu omoogi. Mwitegeerere ganú ndabhakeerya.

¹³“Mmanyiri hanú mureekara, m-mubhutungi bhwa Erisambwa. Nawe muragendererya okwikirirya eriina ryani. Kora kwibhaga rirya omwimiririri waani omuheene Antipa yeetwa, mumugi gwenyu gunú Erisambwa rireekara, mutaanyanga.

¹⁴“Nawe, niina amangʼana amake ganú garannyankya. Gati yeenyu bhariho abhandi, bhanú bharagwata ameehigiryo ga Bharamu. Bharamu uyo, ngʼo yeehigirya Bharaki angʼeenererye Abhaisiraeri naho bhakore obhusarya kwa okurya ebhyakurya bhinú bhimwenseerwe ebhisusano, na okukora obhusimbe.2:14 Maaha mukitabho kya Okubhara 22:1–25:3, 31:16.¹⁵Egoego, gati yeenyu bhariho abhantu abhandi bhanú bharagwata ameehigiryo ga Abhanikorai.2:15 Maaha mukitabho kya Obhukundukuri 2:6.¹⁶Mbe bhoono, mwihunjure obhusarya bhwenyu! Muraange okwihunjura, ndaaja bhwangu, naho ndwane na abhantu bhayo, kwa omuhyu gunú gurarwa mumunwa gwani.

¹⁷“Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, ndimuhaana-ko ebhyakurya bhinú bhirabhirikirwanga ega, mana2:17 Mana. Bhyaringa ebhyakurya bhinú Abhaisiraeri bhaaryanga kukibhara eribhaga rya okurwa Misiri. Maaha mukitabho kya Okuhuruka 16:31-34. inú ebhisirwe. Kweki ndimuhaana erigina erirabhu. Erigina riyo, ringʼoorerwe-ko eriina erihya, rinú atariho omuntu wowonse unú ararimanya, nawe ngʼ-unú arahaanwa erigina riyo omwenego ngʼo ararimanya.”

Enyarubha kwikanisa rya Tiatira

¹⁸Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Tiatira, omukeerye ega,

“Oni nooni Omwana wa Waryubha.2:18 Omwana wa Waryubha. Maaha eringʼana rinu mu Moonjooro eguru ya Amangʼana Amakongʼu. Niina ameeso kya egindimi gya omururo, na amaguru ganú garangʼesangʼesa kya eshabha. Mwitegeerere ganú ndabhakeerya.

¹⁹“Mmanyiri ebhikorwa bhyenyu, obhuhanje bhwenyu, eimani yeenyu, emirimu gyenyu, na obhwigumirirya bhwenyu. Kweki ebhikorwa bhyenyu bhya eginsiku ginu m-bijomu okukira ebhya mbere harya. ²⁰Nawe, niina eringʼana erimwi rinú rirannyankya, muramwikiririrya omukari urya Yejebheri unú areebhirikira ega, omurooti, nawe, ataringi omurooti. Muramwikiririrya abhahabhye abhagaya bhaani, kwa okubheehigirya bhakore obhusimbe, na okurya ebhyakurya bhinú bhimwenseerwe ebhisusano. ²¹Oni naamuhaana omweya naho yeehunjure obhusarya bhwaye, nawe, atakwenda okutigana na obhusimbe bhwaye. ²²Maaha! Kwa ekisigo kiyo, ndimuhaana enyanko ya obhurweri bhunú bhurikora atamwe okwimuka kubhuriri. Na bhanú bharakora nawe obhusimbe, ndibhahaana enyanko enene nyoore bhataatige ebhikorwa bhyabho bhiyo. ²³Kweki, ndibheeta abheehigira bhaaye. Nho abhantu bha amakanisa gonsego bharimanya ega, oni nooni ndeekomya ameetegeerero na omutima gwa kira omuntu. Na ndimuriha kira oumwi weenyu okuringʼaana na ebhikorwa bhyaye.

²⁴“Bhoono bheenyu bha Tiatira eyo, gati yeenyu bhariho abhandi bhanú bhatakugwata ameehigiryo ga Yejebheri. Abhantu bhayo bhateehigira kinú abhandi bharabhirikira ega, ekibhisire kya Erisambwa. Abhantu bhayo ndabhakeerya ega, ntakubhahaana bheenyu omujigo ogundi, ²⁵nawe, mugumye bhujomu amajomu ganú muunago okuhikira hanú ndiija.

²⁶“Omuntu unú arihiga, na okugendererya okukora kya ego ndeenda okuhikira kubhuteero,

‘Ndimuhaana obhutungi eguru ya abhantu bha ebhyaro bhyonsego.

²⁷Aribhatunga kwa engʼimbo ya ekyuma,

aribhabhondora kya ego ebhintu bhya obhutoto bhirabhondorwa.’2:27 Maaha mukitabho kya Egijabhuri 2:9.

“Ndimuhaana obhutungi kya ego oni nonse naahaanwa obhutungi na Taata. ²⁸Kweki ndimuhaana enjota nyamananga.2:28 Ndimuhaana enjota nyamananga. Ensonga yaaye niiga, ndimuhaana ekimanyiiriryo kya okoorokya ega, ahigiri.

²⁹“Unú yaana amatwi yeegwe, amangʼana ganú Omutima Omurabhu arakeerya amakanisa.”

Enyarubha kwikanisa rya Saridi

¹Omuntu kya Omwana wa Adamu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Saridi, omukeerye ega,

“Oni ndatunga emitima muhungati gya Waryubha, na eginjota muhungati girya. Mwitegeerere ganú ndabhakeerya.

“Mmanyiri ebhikorwa bhyenyu. Muramaahikana ega, muringi abhahoru, nawe mukwiri. ²Mutengeeje! Munagye amake amajomu ganú gakyatamiri, onyoora garingi haangʼi okuhwa chwe, kwa okubha ebhikorwa bhyenyu bhikyari okuhikiira kya ego Waryubha waani areenda. ³Muhiituke ganú mweehigiribhwa na okwigwa. Bhoono mugagwate bhujomu na mumwihunjurire Waryubha okurwa mubhusarya bhwenyu. Nawe nyoore mutaatengeeje, ndiija kya omwibhi na mutarimanya eribhaga rinú ndiija.

⁴“Nawe, gati yeenyu bhariho abheekirirya abhakego, Saridi eyo, bhanú bhatarakonʼya emyenda gyabho kwa obhusarya. Mbe, bhayo mbo bharibha hamwi na oni, enu bheebhohiibhwe emyenda emirabhu, kwa okubha mbo bhareenderwa okukorerwa ego. ⁵Omuntu unú arihiga, ariibhohibhwa emyenda emirabhu kya bhayo. Ntaririruusya eriina ryaye mukitabho kya obhuhoru bhwa koko,3:5 Mukitabho kya obhuhoru bhwa koko. N-kitabho kinú amariina ga abhantu bha Waryubha gaangʼoorwa muyo. Maaha mukitabho kya Obhukundukuri 20:12. nawe ndimwikirirya embere ya Taata na bhamaraika bhaaye ega, unu ngʼ-wani.

⁶“Unú yaana amatwi yeegwe, amangʼana ganú Omutima Omurabhu arakeerya amakanisa.”

Enyarubha kwikanisa rya Firaderifia

⁷Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Firaderifia, omukeerye ega,

“Oni nooni omurabhu na owa obhuheene. Kweki oni niina orufunguro rwa omukama Daudi.3:7a Orufunguro rwa omukama Daudi. Ensonga yaaye niiga, ekimanyiiriryo kya obhutungi. Kwa obhoonjoori obhundi bhwa Daudi, maaha eringʼana rinu mu Moonjooro eguru ya Amangʼana Amakongʼu.

‘Oni nkaasiika-ho ekiseku, atariho oundi unú aranagya okukisiikura-ho.

Oni nkaasiikura-ho ekiseku, atariho oundi unú aranagya okukisiika-ho.’3:7b Maaha mukitabho kya Isaaya 22:22.

“Mwitegeerere ganú ndabhakeerya. ⁸Mmanyiri ebhikorwa bhyenyu. Maaha! Oni mbasiikuriiri ekiseku, kora atariho omuntu unú aranagya okukisiika. Onyoora muuna eginguru nkego, nawe mugwatiri ameehigiryo gaani, kora mutaanyanga. ⁹Maaha! Ndibhareetera abhantu bha Erisambwa, bhanú bhareebhirikira ega, m-bantu bha Waryubha, nawe, bhataringi abhantu bha Waryubha, m-babheehi. Bhoono, ndibhakora bhaaje bhateme ebhiru embere yeenyu bhahiinye obhusu bhuhike hansi. Nho bharimanya ega, mbahanjiri bheenyu.

¹⁰“Bhoono, kwa okubha mweegumirirya kya ego naabhatongera, ndibhaangararira kwibhaga rya enyanko inú erireetwa okusakya abhantu bhonsego mukyaro. ¹¹Ndaaja bhwangu! Mugwatirire bhujomu amajomu ganú muunago, naho omuntu atariija okubharuusya omutuho gwenyu.

¹²“Omuntu unú arihiga, ndimukora abhe kya entimu ya mwisyengerero erikuru rya Waryubha3:12a Mwisyengerero erikuru rya Waryubha. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. waani, na atarirwa muyo kweki. Oni ndingʼoora eguru yaaye eriina rya Waryubha waani, na eriina rya omugi gwa Waryubha waani. Omugi guyo, n-Yerusaremu enhya,3:12b Yerusaremu enhya. Maaha Yerusaremu mu Moonjooro eguru ya Amangʼana Amakongʼu. gunú guriituuma okurwa murwire ku Waryubha waani. Kweki ndingʼoora eguru yaaye eriina ryani erihya.

¹³“Unú yaana amatwi yeegwe, amangʼana ganú Omutima Omurabhu arakeerya amakanisa.”

Enyarubha kwikanisa rya Raodikia

¹⁴Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Raodikia, omukeerye ega,

“Oni nooni ndabhirikirwa Amina, kwa okubha oni m-mwimiririri omuheene owa obhuheene eguru ya Waryubha. Oni nooni obhusimuka bhwa ebhibhumbwa bhyonsego bhinú bhyabhumbwa na Waryubha. Mwitegeerere ganú ndabhakeerya.

¹⁵“Mmanyiri ega, ebhikorwa bhyenyu bhitaringi bhya omururo kasi ebhimititu. Nyakara bhibhe ebhimititu kasi bhya omururo! ¹⁶Nawe, kwa okubha ebhikorwa bhyenyu bhitaringi bhya omururo kasi ebhimititu, ndibhahongora murwe mumunwa gwani. ¹⁷Muragamba ega, ‘Bheetu m-baniibhi, twiniibhirye bhukongʼu. Tutaana ekintu kinú turasuuhirwa!’ Nawe, mutamanyiri ega, bheenyu m-banyooheeru, mureenderwa okumaahirwa ekyabhira, muringi abhatobhu, abhahoku, kweki muringi kinaabhi. ¹⁸Kwa ego, ndabhatongera mugure kuoni ejahaabhu inú yoogiibhwe kwa omururo, naho mubhe abhaniibhi. Na mugure emyenda emirabhu mwibhohe, mukundikirye ekinaabhi kyenyu, naho mutarora eginsoni. Kweki mugure eryogo rya okuhaka kumeeso geenyu, naho muture okurora bhwaheene.

¹⁹“Abhantu bhonsego bhanú nhanjiri, ndabhakemera na okubhajibhya. Kwa ego, mubhenga na ekituunyo na mumwihunjurire Waryubha okurwa mubhusarya bhwenyu. ²⁰Maaha! Ndeemirira mukiseku ndasiikurya. Nyoore omuntu areegwe eriisi ryani na okusiikura ekiseku, ndasoha munyumba yaaye, na turarya hamwi.

²¹“Omuntu unú arihiga, ndimwikiririrya okwikara hamwi na oni kukitumbi kyani kya ekikama. Eribha kya ego oni naahiga, nkeekara hamwi na Taata kukitumbi kyaye kya ekikama.

²²“Unú yaana amatwi yeegwe, amangʼana ganú Omutima Omurabhu arakeerya amakanisa.”

Waryubha arasyengerwa murwire

¹Hanú gayo gaahwa, nkarora ekiseku kisiikwirwe murwire! Kweki eriisi kya erya enkombi rinú neegwa obhwa mbere, rikagamba kweki na oni ega, “Njo, oriine eguru enu, naho nkoorokye amangʼana ganú gareenderwa geebhuke embere eyo.”

²Rumwigo Omutima Omurabhu akanyituumira, nkarora ekitumbi kya ekikama murwire, kiikariirwe na oumwi, ³unú yaaringa yeekeeri-ko, yaaringa arangʼesangʼesa bhukongʼu, kya amagina ga obhwera obhunene ga erangi enjomu enkangaaru. Ekitumbi kiyo, kyaringa kiinaarirwe na eritaabhasi rinú ryangʼesangʼesanga bhukongʼu kya erigina rya obhwera obhunene. ⁴Na kweki kyaringa kiinaarirwe na ebhitumbi bhya ekikama mirongo ebhiri na ebhina (24) ebhindi. Na kubhitumbi bhiyo, bhaaringa bheekeeri-ko abhakaruka mirongo ebhiri na bhane. Bhaaringa bheebhoheri emyenda emirabhu na amataaji ga egijahaabhu kumitwe. ⁵Ekitumbi kya ekikama kirya, kyaruusyanga egimesyo na eriisi rya okubharuka. Na egikorobhoi muhungati gya omururo gyookanga embere ya ekitumbi kiyo. Egikorobhoi giyo, m-mitima muhungati gya Waryubha.4:5 Maaha mukitabho kya Obhukundukuri 1:4.⁶Kweki embere ya ekitumbi kya ekikama hayo, haaringa na ekintu muna enyanja ya ekirore. Ekintu kiyo, kyahunkananga na erigina rinú rirangʼesangʼesa bhukongʼu.

Ekitumbi kya ekikama kirya kyaringa kiinaarirwe mbaara gyonsego, na ebhibhumbwa ebhina bhya obhuhoru. Ebhibhumbwa bhiyo, bhyaringa na ameeso mbaara gyonsego. ⁷Ekibhumbwa kya mbere kyahunkananga na endwi, ekya kabhiri kyahunkananga na ekigeeni kya engʼombe, ekya kasatu, kyaringa na obhusu kya bhwa omuntu, na ekya kane kyahunkananga na ekikoona kinú kireebhururuka. ⁸Kira ekibhumbwa kyaringa na amabhabha gasansabha. Ebhibhumbwa bhyonsego bhyaringa bhiina ameeso mbaara gyonsego kora mumabhabha munsi. Bhyeembanga omubhasu na obhutiku bira okumuunya, ega,

“Omurabhu, Omurabhu, Omurabhu,

m-Mukuru Waryubha wa obhuturo bhonsego,

weeki yaaringa-ho okurwa obhusimuka, ariho, na aribha-ho.”

⁹Ebhibhumbwa ebhina bhiyo, bhyamugungyanga, bhyamusuukanga na okumukumya unú yeekeeri kukitumbi kya ekikama, unú aringi omuhoru koko na koko. ¹⁰Eribhaga ryonsego rinú ebhibhumbwa bhiyo, bhyakoranga ego, abhakaruka mirongo ebhiri na bhane (24), bhaagwanga mumaguru, embere wa unú yeekeeri kukitumbi kya ekikama, na okumusyengera weeki omuhoru koko na koko. Bhaaringa bharamutuha amataaji gaabho bharagatuura embere ya ekitumbi kya ekikama, enu bharagamba ega,

¹¹“Omukuru na Waryubha weetu, oreenderwa okugungibhwa,

okusuukwa na okubha na obhuturo bhonsego,

kwa okubha uuwe nuuwe waabhumba ebhintu bhyonsego,

kwa obhwendi bhwaho bhyabhumbwa, na bhiriho.”

Ekitabho na Omwana wa Eringʼondi

¹Kimwi nkarora ekitabho mukubhoko kwa obhuryo, kwa unú yaaringa yeekeeri kukitumbi kya ekikama. Ekitabho kiyo, kyaringa kingʼoorerwe munsi na kibhara, kweki kyaringa kibhoherwe na egimbaaso muhungati gya obhurimbo. ²Kweki nkarora maraika wa obhuturo araraarika kwa eriisi erinene ega, “Niwi areenderwa okubhutura egimbaaso gya obhurimbo giyo, na okukisibhura ekitabho kiyo?” ³Nawe, ataaringa-ho omuntu murwire, mukyaro, kora mukyaro kya abhaku unú yaaringa na obhuturo bhwa okukisibhura na okumaaha munsi waakyo.

⁴Mbe, oni nkakuura bhukongʼu, kwa okubha ataatuuka-ho omuntu wowonse unú yeenderwa okusibhura ekitabho kiyo, kora okumaaha munsi waakyo. ⁵Nho, oumwi wa abhakaruka bharya, akankeerya ega, “Tiga okukuura! Maaha! Endwi ya erikabhira rya Yuda,5:5 Endwi ya erikabhira rya Yuda. Mukitabho kya Obhwambiro 49:9 erikabhira rya Yuda rirabhirikirwa ega, endwi. Omukama Daudi na Yeesu, bhaarwira mwikabhira riyo. orwibhuro rwa omukama Daudi, ahigiri. Weeki ngʼo areenderwa okubhutura egimbaaso muhungati gya obhurimbo kukitabho kiyo, na okukisibhura.”

⁶Kimwi nkarora Omwana wa Eringʼondi5:6 Omwana wa Eringʼondi. Maaha eringʼana rinu mu Moonjooro eguru ya Amangʼana Amakongʼu. yeemiriiri haangʼi na ekitumbi kya ekikama kirya. Yaaringa yeenaarirwe na ebhibhumbwa ebhina bhirya, na abhakaruka mirongo ebhiri na bhane bharya. Hanú bhaamumaahanga, yaamaahikananga ega, muna agoogerwe. Na yaaringa na amatira muhungati na ameeso muhungati. Ameeso gaaye, m-mitima muhungati gya Waryubha, ginú gyaringa gitumirwe kira ahasi mukyaro kyonsego. ⁷Omwana wa Eringʼondi uyo, akagya akagega ekitabho kirya, okurwa mukubhoko kwa obhuryo, kwa urya, yaaringa yeekeeri kukitumbi kya ekikama. ⁸Hanú yaamara okugega ekitabho kiyo, ebhibhumbwa ebhina bhirya, na abhakaruka bharya, bhakamugwira mumaguru. Kira oumwi yaaringa na eritungu na amabhakuri ga egijahaabhu geejwiri ekurusu. Ekurusu iyo, ngʼyo amasabho ga abhantu bha Waryubha. ⁹Kimwi bhakamwimbira eriimbo erihya, rinú ryagambanga ega,

“Uuwe nuuwe oreenderwa okugega ekitabho kiyo,

na okusibhura-ko egimbaaso gya obhurimbo gyakyo,

kwa okubha uuwe waagoogwa,

na kwa amanyinga gaaho okamugurira Waryubha abhantu,

bha amakabhira gonsego, abha ebhigambo bhyonsego,

abha egihamati gyonsego, na abha ebhyaro bhyonsego.

¹⁰Uuwe waakora abhantu bhayo, bhabhe obhukama bhwa Waryubha weetu,

na bhabhe abhasyengeri bha okumukorera emirimu,

bhonse bharitunga ekyaro.”

¹¹Kimwi, nkarora na okwigwa eriisi rya bhamaraika abhaaru bhukongʼu, ebhiku na ebhiku, kora bhataaturikanga okubharwa. Bhamaraika bhayo, bhaaringa bheenaariri ekitumbi kya ekikama kirya, na ebhibhumbwa ebhina bhirya, na abhakaruka bharya, ¹²enu bhareemba kwa eriisi erinene ega,

“Omwana wa Eringʼondi unú yaagoogwa,

areenderwa okunyoora obhuturo, obhuniibhi na egintungwa.

Eginguru, obhusuuku, obhukuru na eginkuma, n-gyaye!”

¹³Kimwi nkeegwa ebhibhumbwa bhyonsego murwire, mukyaro, mukyaro kya abhaku, na munyanja, bhireemba kwa hamwi ega,

“Weeki unú yeekeeri kukitumbi kya ekikama,

na Omwana wa Eringʼondi,

bhagungibhwe, bhasuukwe,

bhahaanwe obhukuru na eginguru, koko na koko!”

¹⁴Na ebhibhumbwa ebhina bhirya bhyeki, bhikabhanga bhireekirirya ega, “Amina!” Na abhakaruka bharya, bhakamugwira mumaguru, bhakamusyengera Waryubha na Omwana wa Eringʼondi.

Omwana wa Eringʼondi arasibhura egimbaaso gya obhurimbo kukitabho

¹Kimwi nkarora Omwana wa Eringʼondi, arasibhura orubhaaso rwa mbere gati ya egimbaaso gya obhurimbo muhungati girya. Rumwigo, nkeegwa ekibhumbwa ekimwi gati ya ebhina bhirya, kiragamba kwa eriisi kya erya omuhiriro ega, “Njo!” ²Niigo kyamara okugamba ego, nkarora efaraasi endabhu pee, na omuntu ariiniri-ko. Omuntu uyo, yaaringa na obhuta, akahaanwa omutuho gwa obhuhigi. Akarwa murwire aringi omuhigi, naho agendererye okuhiga kweki.

³Kweki Omwana wa Eringʼondi, akasibhura orubhaaso rwa obhurimbo orwa kabhiri. Rumwigo, nkeegwa ekibhumbwa kya kabhiri kiragamba ega, “Njo!” ⁴Niigo kyamara okugamba ego, ekeebhuka efaraasi eindi enkangaaru ka, kya omururo. Omuntu unú yaaringa ariiniri-ko, akahaanwa omuhyu omunene na obhuturo bhwa okuruusya omurembe mukyaro, naho abhantu bheetane.

⁵Kweki Omwana wa Eringʼondi, akasibhura orubhaaso rwa obhurimbo orwa kasatu. Rumwigo, nkeegwa ekibhumbwa kya kasatu kiragamba ega, “Njo!” Niigo kyamara okugamba ego, nkarora efaraasi eindi emwamu ti. Omuntu unú yaaringa ariiniri-ko, yaaringa na ebhirengero mukubhoko kwaye. ⁶Nkeegwa eriisi kya erya omuntu okurwa gatigati ya harya ebhibhumbwa ebhina bhirya bhyaringa, riragamba ega, “Amariho ga orusiku rumwi, garagura endengo eimwi ego ya obhusye bhwa egingano na egindengo esatu ego gya obhusye bhwa egishayiri.6:6 Egishayiri. M-manga agandi ga obhuro inú yaaguribhwanga kwa obhuguri obhuke. Nawe, otasarya amaguta kora edivai.”

⁷Mbe, Omwana wa Eringʼondi, akasibhura orubhaaso rwa obhurimbo orwa kane. Rumwigo, nkeegwa ekibhumbwa kya kane kiragamba ega, “Njo!” ⁸Niigo kyamara okugamba ego, nkarora efaraasi eindi ya eribhuukwe. Omuntu unú yaaringa ariiniri-ko yaabhirikirwanga ega, Oruku, na Ekyaro kya abhaku kyaringa kiramuseeterera enyuma waaye kwa haangʼi. Bheeki, bhakahaanwa obhuturo bhwa okwita abhantu eimwi ya ena mukyaro kyonsego, kwa eriihe, enjara, amarweri na kwa egintyenyi eginhaari gya mukyaro.

⁹Mbe, Omwana wa Eringʼondi, akasibhura orubhaaso rwa obhurimbo orwa kataanu. Rumwigo, nkarora hansi wa ahasi ha okumwensera, abhantu bhanú bheetwa kurusumo rwa okuraarika eringʼana rya Waryubha, na okuriimiririra. ¹⁰Nho abhantu bhayo, bhakatema ekituri bharagamba ega, “Ee Waryubha, Omukuru unú oringi omurabhu na owa obhuheene, ndeegwa oratigita! N-duuha oribhutura ekiina kubhantu bha mukyaro, naho okuriha ekisiiyomba kwa okwitira amanyinga geetu?” ¹¹Mbe, kira oumwi wa bhanú bhaaringa bheetirwe, akahaanwa enkanju endabhu. Bhakakeeribhwa ega, bhaganye eribhaga ekego, okuhikira abhakori bha emirimu abharikyabho na abhahiiri bhaabho kuimani abhaaru bhareetwe, kya ego bheeki bheetwa. Nho erisaabhu ryabho riraakunaane.

¹²Kweki nkarora Omwana wa Eringʼondi, arasibhura orubhaaso rwa obhurimbo orwa kasansabha. Rumwigo, ekirigiti ekinene bhukongʼu kya erirobha kikeebhuka. Eryubha rikeehunjura, rikabha emwamu ti kya amakara, na omweri gukabha omukangaaru ka, kya amanyinga. ¹³Eginjota gikagwa mukyaro bhuyagayaga, kya ego emisumo emirere giraharuruka, hanú omuti gurasingisibhwa na omuyaga omuhaari. ¹⁴Orwire rukaruusibhwa-ho kya ego eritarataasi rirakunywakunywa. Eginkuku na amaginga, bhyonsego bhikangʼaanyibhwa okurwa ahasi haabho ha obhusimuka.

¹⁵Nho, abhakama bha ekyaro, abhatungi, abhakuru bha abhasirikare, abhaniibhi, abhantu bha eginguru, hamwi na abhantu bhonsego abhandi, abhagaya na bhanú bhareeyagaara, bhakeebhisa mumasana na mumagina ga muginkuku. ¹⁶Kimwi bhakakeerya eginkuku na amagina ega, “Mutugwire! Mutubhise turwe mumeeso ga unú yeekeeri kukitumbi kya ekikama, na tutaaja okurora okujima kwa Omwana wa Eringʼondi. ¹⁷Orusiku orukuru rurya rwa okujima bhukongʼu kwa Waryubha na Omwana wa Eringʼondi ruhikiri! Niwi aratura okurwigumirirya?”

Abhantu bha Waryubha bharatemwa orubhaaso

¹Hanú gayo gaahwa, nkarora bhamaraika bhane bheemiriiri kumbaara ena gya ekyaro, bhararibhira omuyaga okurwa mbaara ena gya ekyaro, naho gutahuuta okusoha mukyaro ekyomu, munyanja, na kora kumuti gogonse. ²Bhamaraika bhayo, bhaaringa bhaheerwe obhuturo bhwa okusarya ekyaro ekyomu na enyanja. Kweki nkarora maraika oundi arariina okurwa bhuturira-ryubha, agegeri orubhaaso rwa Waryubha omuhoru. Akatemera bhamaraika abhane bhayo ekituri, ³aragamba ega, “Mutasarya mbere ekyaro ekyomu, enyanja, kora emiti, okuhikira hanú turaamare okubhatema orubhaaso kukisyusu, abhagaya bhonsego bha Waryubha weetu.”

⁴Nkamara nkeegwa ega, erisaabhu rya bhanú bhaaringa bhatemerwe orubhaaso rwa Waryubha, ehikiri eraaki eimwi, ebhiku mirongo ena na ebhina (144,000), okurwa mumakabhira gonsego ekumi na gabhiri aga Abhaisiraeri.7:4 Mumakabhira gonsego ekumi na gabhiri aga Abhaisiraeri. Maaha Amakabhira ekumi na gabhiri ga Isiraeri mu Moonjooro eguru ya Amangʼana Amakongʼu.⁵Abhantu ebhiku ekumi na bhabhiri (12,000), ekumi na bhabhiri bhatemerwe orubhaaso, okurwa kukira erikabhira. Abhantu ebhiku ekumi na bhabhiri, ekumi na bhabhiri, okurwa mumakabhira ga Yuda, Rubheni na Gadi. ⁶Abhantu ebhiku ekumi na bhabhiri, ekumi na bhabhiri, okurwa mumakabhira ga Asheri, Nafutari na Manase. ⁷Abhantu ebhiku ekumi na bhabhiri, ekumi na bhabhiri, okurwa mumakabhira ga Simeoni, Raawi na Isakari. ⁸Abhantu ebhiku ekumi na bhabhiri, ekumi na bhabhiri, okurwa mumakabhira ga Jabhuroni, Yusufu na Bhenjamini.

Omuganda omunene gwa abhantu bha amakabhira agandi

⁹Hanú gayo gaahwa, nkarora omuganda omunene bhukongʼu gwa abhantu bhanú omuntu wowonse ataanagyanga okubhabhara, bheemiriiri embere ya ekitumbi kya ekikama na embere ya Omwana wa Eringʼondi. Abhantu bhayo, bhaaringa bharwiri mubhyaro bhyonsego, mumakabhira gonsego, mugihamati gyonsego, na mubhigambo bhyonsego. Bhaaringa bheebhoheri eginkanju egindabhu enu bhagwatiriri amasagi ga emitende mumabhoko gaabho. ¹⁰Bhakabha bharagamba kwa eriisi erinene ega,

“Obhutuurya bhurarwa ku Waryubha weetu,

unú yeekeeri kukitumbi kya ekikama,

na bhurarwa ku Mwana wa Eringʼondi.”

¹¹Bhamaraika bhonsego bhaaringa bheenaariri ekitumbi kya ekikama kirya, abhakaruka bharya, na ebhibhumbwa ebhina bhirya. Bhakagwa mumaguru embere ya ekitumbi kiyo, bhakamusyengera Waryubha, ¹²enu bharagamba ega,

“Amina!

Waryubha weetu yaana obhukuru,

yaana egintungwa,

kweki yaana obhuturo na eginguru gyonsego,

tumugungye, tumukumye na tumusuuke,

koko na koko.

Amina!”

¹³Hanú bhaamara, oumwi wa abhakaruka bharya, akambuurya ega, “Omanyiri abhantu bhanú bheebhoheri eginkanju egindabhu m-bawi? Na bharwiri-ha?”

¹⁴Nkamukyukya ega, “Ee omukuru waani, uuwe nuuwe omanyiri.”

Wonse akankeerya ega, “Bhayo, mbo bhaahiga enyanko enduru irya. Bhafuriri eginkanju gyabho kwa amanyinga ga Omwana wa Eringʼondi, gibheeri egindabhu pee. ¹⁵Kwa ego, bharingi embere ya ekitumbi kya Waryubha ekya ekikama. Bharamukorera emirimu omubhasu na obhutiku munyumba enkuru ya mwisyengerero ryaye. Na Waryubha unú yeekeeri kukitumbi kiyo, aribha hamwi nabho na okubhaangararira. ¹⁶Bheeki bhataribha kweki na enjara kora enyonta, omubhasu na eribhiriira bhitaribhasamba kweki. ¹⁷Eribha ego, kwa okubha Omwana wa Eringʼondi unú aringi haangʼi na ekitumbi kya ekikama, aribha omuriisya waabho. Aribhoorokererya mubhisekaani bhya amanji ganú garahaana abhantu obhuhoru bhwa koko. Na Waryubha aribheehya ameesori gonsego mumeeso gaabho.”

Omwana wa Eringʼondi arasibhura orubhaaso rwa muhungati

¹Mbe, kweki nkarora Omwana wa Eringʼondi, arasibhura orubhaaso rwa obhurimbo orwa muhungati. Rumwigo, murwire eyo hakakira kiri, kwa eribhaga rya muna etuugati rya ensa eimwi. ²Nkamara nkarora bhamaraika muhungati, bhanú bhareemirira embere ya Waryubha, kira oumwi akahaanwa enkombi.

³Maraika oundi akaaja, yaana akabhakuri ka egijahaabhu aka okutuutira-mo ekurusu, akeemirira embere ya ahasi ha okumwensera. Akahaanwa ekurusu enjaru airuusye hamwi na amasabho ga abhantu bhonsego bha Waryubha, eguru ya ahasi ha okumwensera aha ejahaabhu, embere ya ekitumbi kya ekikama. ⁴Engesi ya ekurusu hamwi na amasabho ga abhantu bha Waryubha, bhikariina eguru embere ya Waryubha, okurwa mukubhoko kwa maraika uyo.

⁵Nho, maraika uyo, akagega akabhakuri akeejurya-mo omururo okurwa ahasi ha okumwensera, akagwesa mukyaro. Eriisi rya orukubha rikabharuka mukyaro, hakabha na egimesyo, na ekirigiti kya erirobha kikeebhuka mukyaro.

Bhamaraika bhane bharatema eginkombi gyabho

⁶Kimwi bhamaraika bharya muhungati bhanú bhaaringa na eginkombi, bhakeeseemya okutema eginkombi gyabho.

⁷Maraika wa mbere akatema enkombi yaaye. Rumwigo, embura ya omusoke, na omururo gunú gwisangeenʼye na amanyinga, bhikeeswa mukyaro. Omururo guyo, gukasikya eimwi ya esatu eya ekyaro, gukasikya eimwi ya esatu eya emiti na obhunyanki obhubhisi bhonsego.

⁸Maraika wa kabhiri wonse, akatema enkombi yaaye. Rumwigo, ekintu kya enkuku enene bhukongʼu inú yookanga omururo, kikeeswa munyanja. Niigo kyeeswa munyanja ego, eimwi ya esatu eya enyanja, ekabha amanyinga. ⁹Ebhibhumbwa ebhihoru eimwi ya esatu bhikakwa munyanja, na eimwi ya esatu eya amaato gakanyamuka.

¹⁰Maraika wa kasatu wonse, akatema enkombi yaaye. Rumwigo, enjota enene bhukongʼu, inú yookanga kya ekorobhoi, ekagwa okurwa murwire. Yaagwira eimwi ya esatu eya eginyuji na ebhisekaani bhya amanji. ¹¹Enjota iyo, yaabhirikirwanga ega, Obhusungu. Ekakora eimwi ya esatu eya amanji, ekabha obhusungu. Mbe, abhantu abhaaru bhakakwa okurekana na amanji gayo, kwa okubha gaaringa ga obhusungu.

¹²Maraika wa kane wonse akatema enkombi yaaye. Rumwigo, eimwi ya esatu eya eryubha, eimwi ya esatu eya omweri, na eimwi ya esatu eya eginjota bhikatemwa, bhikabha ekisunte. Kwa ego, eimwi ya esatu eya omubhasu ekabhura obhurabhu, na eimwi ya esatu eya obhutiku yonse, ekabhura obhurabhu.

¹³Kimwi nkarora na okwigwa ekikoona ekinene kireebhururuka gatigati ya orwire, enu kirakuura kwa eriisi erinene ega, “Murikirora-ko! Murikirora-ko! Murikirora-ko, bheenyu bhanú mumenyeri mukyaro, hanú eginkombi esatu ginú gitamiri giritemwa! Bhamaraika bhasatu bhanú bhatamiri, bheeseemerye okugitema!”

Maraika wa kataanu aratema enkombi yaaye

¹Kimwi, maraika wa kataanu wonse, akatema enkombi yaaye. Rumwigo, nkarora enjota inú yaaringa egwiri eguru wa ekyaro okurwa murwire. Ekahaanwa orufunguro rwa okusiikurira erituko rya ekibhohe kya amasambwa.9:1 Erituko rya ekibhohe kya amasambwa. Ensonga eindi eratura okubha ega, erituko rya mukyaro kya abhaku.²Ekasiikura erituko riyo. Niigo yaamara okurisiikura ego, engesi enjaru bhukongʼu, kya eya eritanuuru erinene, ekeegunda okurwa mwituko muyo. Eryubha na amasaaru bhitaamaahikana okurekana na obhwaru bhwa engesi iyo. ³Mbe, egingige gikarwa mungesi muyo, na okunyaragana mukyaro. Gikahaanwa obhuturo bhwa okuruma kya ebhitoromooni. ⁴Egingige giyo, gikakeeribhwa ega, gitasarya obhunyanki, ebhiimerya bhyobhyonse kora emiti gyogyonse. Nawe, ginyahaare abhantu bhanú bhataana orubhaaso rwa Waryubha kukisyusu.9:4 Maaha mukitabho kya Obhukundukuri 7:2-3.⁵Kweki, gikeekiriribhwa ega, gibhanyankye kwa eribhaga rya emyeri etaanu nawe gitabheeta. Obhururu bhunú bheegwanga, bhwaringa kya hanú omuntu arumirwe na ekitoromooni. ⁶Kuginsiku giyo, abhantu bhariigombanga okukwa, nawe bhatarikwa. Bhariigombanga okukwa, nawe oruku ruribhangʼosa.

⁷Ensusumi ya egingige giyo, yaaringa kya egifaraasi ginú giseemiibhwe okugya mwiihe. Emitwe gyagyo, gyaringa na ebhintu kya amataaji ga egijahaabhu, na obhusu bhwagyo bhwaringa bhuratuubhana na bhwa abhantu. ⁸Egingige giyo, gyaringa na egintuukya egintambi, kya egya abhakari. Na ameeno gaagyo gaaringa kya aga endwi. ⁹Gyaringa na egingubha kya egya ekyuma kubhikubha, na omuhiriro gwa amabhabha gaagyo, gwaringa kya omuhiriro gwa emikokoteeni gya okurutwa na egifaraasi emyaru, ginú girakenya okugya mwiihe. ¹⁰Emikira gyagyo, gyaringa na amahwa ga okurumira kya egya ekitoromooni, eginguru gyagyo gya okunyahaara abhantu kwa eribhaga rya emyeri etaanu, gyaringa kumikira. ¹¹Egingige giyo, gyaringa na omukama waagyo. Omukama uyo, yaaringa m-maraika omukuru wa erituko rya ekibhohe rirya. Eriina ryaye mu Kiebhurania yaabhirikirwanga ega, Abhadoni, na mu Kiyunani arabhirikirwa ega, Aporioni, ensonga yaaye niiga, “Omusikya.”

¹²Mbe bhoono, engʼanga ya mbere emariri okuhita, nawe mumanye ega, egingʼanga ebhiri gikyaaja.

Maraika wa kasansabha aratema enkombi yaaye

¹³Kimwi, maraika wa kasansabha wonse, akatema enkombi yaaye. Rumwigo, nkeegwa eriisi riragamba okurwa kumbaara ena gya ahasi ha okumwensera aha egijahaabhu, hanú haaringa embere ya Waryubha. ¹⁴Eriisi riyo, rikakeerya maraika wa kasansabha unú yaaringa na enkombi, ega, “Sibhura bhamaraika bhane bhanú bhabhoherwe muruuji orunene orwa Efurate.” ¹⁵Mbe, bhamaraika bhane bhayo bhakasibhurwa, naho bheete eimwi ya esatu eya abhantu bhonsego mukyaro. Bheeki bhaaringa bhaseemiibhwe kurusumo rwa eribhaga riyo, orusiku ruyo, omweri guyo, na omwaka guyo. ¹⁶Kweki nkeegwa ega, erisaabhu rya emiganda gyabho egya abhasirikare bha egifaraasi, bharahika egimirioni magana gabhiri (200,000,000). ¹⁷Mubhurori bhwani, naarora egifaraasi giyo, na bhanú bhaaringa bhariiniri-ko eguru. Bheeki bhaaringa bheebhoheri egingubha kubhikubha bhyabho. Egingubha giyo, gyaringa eginkangaaru kya omururo, egya obhururu, na egya mayaayi. Emitwe gya egifaraasi, gyaringa kya emitwe gya egindwi. Eminwa gyagyo, gyaruusyanga egindimi gya omururo, engesi na omururo omuhaari. ¹⁸Bhakeeta eimwi ya esatu eya abhantu, kwa egingʼanga esatu giyo. Egingʼanga esatu giyo, n-gindimi gya omururo, engesi na omururo omuhaari, bhyonsego bhiyo bhyarwanga muminwa gyagyo. ¹⁹Obhuturo bhwa egifaraasi giyo, bhwaringa muminwa na kumikira gyagyo, kwa okubha emikira gyagyo gyaringa kya eginjoka ginú giina emitwe gya okunyahaarira abhantu.

²⁰Abhantu bhanú bhataakwa okurekana na egingʼanga giyo, bhataamwihunjurira Waryubha okurwa kumakorwa gaabho amabhiibhi. Bhaagendererya okusyengera ebhihwi na ebhisusano, bhinú bheekoreranga abheene kwa egijahaabhu, ebhigera bhya egimbirya, eshabha, amagina na emiti. Ebhisusano bhiyo, bhitakurora, bhitakwigwa, kora bhitakugenda. ²¹Abhantu bhayo bhataamwihunjurira Waryubha, na okutiga amakorwa gaabho ga obhwiti, obhuturutumbi, obhusimbe na obhwibhi.

Maraika na ekitabho ekike

¹Kimwi, nkarora maraika oundi wa obhuturo, areetuuma okurwa murwire. Maraika uyo, yaaringa akundikiriibhwe na amasaaru, na omutwe gwaye, gwaringa gwinaarirwe na eritaabhasi. Obhusu bhwaye bhwaringa bhurangʼesangʼesa kya eryubha, amaguru gaaye gaaringa kya egintimu ginú girooka omururo. ²Mukubhoko kwaye, yaaringa na ekitabho ekike kinú kikundukwirwe. Maraika uyo, akeemirira okuguru kwa obhuryo kutajiri munyanja, okwa obhumosi kutajiri kukyaro ekyomu. ³Akakunga kwa eriisi erinene, kya ekirumo kya endwi. Hanú yaakunganga, orukubha rukabharuka mara muhungati. ⁴Hanú orukubha rwabharukanga, nkeenda okungʼoora ganú egimbaruko giyo gyagambanga, nawe nkeegwa eriisi okurwa murwire riragamba ega, “Otangʼoora amangʼana ganú gagambirwe na egimbaruko giyo! N-kibhisire!”

⁵Kimwi maraika unú yaaringa yeemiriiri okuguru okumwi kutajiri munyanja, okundi kukyaro ekyomu, akeenura okubhoko kwaye kwa obhuryo eguru, okubhata murwire. ⁶Akateena kwa eriina rya Waryubha unú aringi omuhoru koko na koko, unú yaabhumba orwire na ebhintu bhinú bhirimo, ekyaro na ebhintu bhinú bhirimo, na enyanja na ebhintu bhinú bhirimo. Maraika uyo, akagamba ega, “Eribhaga erindi rya okuganyirira ritariho. ⁷Hanú maraika wa muhungati yaakateme enkombi yaaye, nho Waryubha yaakakunaanʼye ekinyerera kyaye, kya ego yaaraarikira abhagaya bhaaye, abharooti.”

⁸Nho, eriisi rirya naaringa nigwiri okurwa murwire, rikankeerya kweki ega, “Genda kumaraika unú yeemiriiri okuguru kwa obhuryo kutajiri munyanja, na okundi kukyaro ekyomu, ogege mukubhoko kwaye ekitabho ekike kinú kikundukwirwe.”

⁹Mbe, nkagya nkamukeerya yangʼaane ekitabho kiyo, wonse akagamba ega, “Gega n-kinu hanu! Okirye. Kiraabhe ekijomeereru kya obhuuki, mumunwa gwaho, nawe kiraabhe ekiruru munda yaaho.” ¹⁰Mbe, nkakigega okurwa mukubhoko kwa maraika uyo, nkakirya. Kikabha ekijomeereru kya obhuuki, mumunwa gwani, nawe hanú naakimira, nkeegwa obhururu munda yaani.

¹¹Nkakeeribhwa ega, “Oreenderwa okuruusya obhurooti kweki, kugihamati eginjaru, mubhyaro ebhyaru, kubhigambo ebhyaru na kubhakama abhaaru.”

Abheemiririri bhabhiri bha Waryubha

¹Mbe, nkahaanwa omwanji gunú gwaringa kya engʼimbo ya okurengera. Nkakeeribhwa ega, “Genda orenge erisyengerero erikuru rya Waryubha, na ahasi ha okumwensera. Omare obhare abhantu bhonsego bhanú bharasyengera muyo. ²Nawe, otarenga orubhanja rwa erisyengerero erikuru rya Waryubha,11:2a Erisyengerero erikuru rya Waryubha. Maaha eringʼana rinu mu Moonjooro eguru ya Amangʼana Amakongʼu. kwa okubha ruheerwe abhantu bhanú bhatamumanyiri Waryubha. Abhantu bhayo, bharitaja Yerusaremu,11:2b Yerusaremu. Maaha eringʼana rinu mu Moonjooro eguru ya Amangʼana Amakongʼu. omugi gwa Waryubha, kwa eribhaga rya emyeri mirongo ena na ebhiri (42). ³Ndibhatuma abheemiririri bhaani bhabhiri, ndibhahaana obhuturo bhwa okuruusya obhurooti, kwa emyeri giyo ngyo eginsiku ekiku kimwi, magana gabhiri na mirongo esansabha (1,260), enu bheebhoheri emyenda gya amagunira egya okoorokya okusurumbara kwabho.”

⁴Abheemiririri bhabhiri bhayo, m-mijeituni ebhiri na ebhisunga ebhibhiri bhya okwikarya-ko egikorobhoi, bhinú bhireemirira embere ya Omukuru Waryubha wa ekyaro.11:4 Maaha mukitabho kya Jakaria 4:1-14.⁵Nyoore omuntu wowonse areende okubhanyahaara, areetwe kwa omururo okurwa muminwa gyabho. Ego niigo omuntu wowonse unú areende okubhanyahaara, arikwa. ⁶Abheemiririri bhabhiri bhayo, bhaana obhuturo bhwa okuribhira embura, yaange okutwa, eribhaga bhararuusya obhurooti. Na bhaana obhuturo bhwa okuhunjura amanji gabhe amanyinga, na okureeta engʼanga yoyonse mukyaro kya ego bhareenda.

⁷Nawe, hanú bharimara okuruusya obhwimiririri bhwabho, ogutyenyi ogunene gunú gwariina okurwa mwituko rya ekibhohe kya amasambwa, gurirwana nabho. Na guribhahiga na okubheeta. ⁸Emibhiri gya abheemiririri bhayo, giritama gireeri kunjira ya omugi omunene. Okurekana na eginteemo egimbiibhi gya omugi guyo, gurabhirikirwa ega, Sodoma11:8 Sodoma. M-mugi gunú Waryubha yaasikya kwa ekisigo kya obhusarya bhwa abhantu bhaago. Maaha mukitabho kya Obhwambiro 19:1-29. na Misiri. Na mumugi guyo, ngo Omukuru wa abheemiririri bhayo, yaabhambirwa-mo kumusarabha. ⁹Abhantu okurwa mugihamati gyonsego, mumakabhira gonsego, mubhigambo bhyonsego, na mubhyaro bhyonsego, bharibhanga bharagimaahirira emibhiri giyo, kwa eribhaga rya eginsiku esatu na etuugati. Na bhatariikirirya gibhiikwe. ¹⁰Oruku rwa abheemiririri bhabhiri bhayo, rurikora abhantu bha mukyaro, bhajomerwe, bhakore eginyangi na okuhaanana emituho. Bharikora ego, kwa okubha, abheemiririri bhayo, bhaabhanyankya bhukongʼu.

¹¹Nawe, mubhurori bhwani naarora ega, eginsiku esatu na etuugati giyo hanú gyahwa, Waryubha akabhahuutira omwika gwa obhuhoru, bhakeemirira kwa amaguru gaabho. Na bhonsego bhanú bhaabharora, bhakoobhoha bhukongʼu. ¹²Kimwi abheemiririri bhabhiri bhayo, bhakeegwa eriisi erinene okurwa murwire rirabhakeerya ega, “Muuje, muriine eguru enu!” Nho, erisaaru rikabheemukya okugya murwire, enu abhasigu bhaabho bharabhamaahirira. ¹³Eribhaga riyoriyo, ekirigiti kya erirobha, kikeebhuka mukyaro, eimwi ya ekumi ya omugi gukahaanyuka. Ekirigiti kiyo, kikakora abhantu ebhiku muhungati, bhakakwa, na abhandi bhonsego bhanú bhaatama, bhoobhoha bhukongʼu, bhakamugungya Waryubha wa murwire.

¹⁴Mbe bhoono, engʼanga ya kabhiri emariri okuhita, nawe mumanye ega, engʼanga ya kasatu eringi haangʼi okuuja.

Maraika wa muhungati aratema enkombi yaaye

¹⁵Kimwi, maraika wa muhungati akatema enkombi yaaye. Rumwigo, nkeegwa eriisi erinene rya bhamaraika abhaaru murwire, riragamba ega,

“Obhukama bhwa ekyaro bhumariri okubha bhwa Omukuru Waryubha weetu11:15 Obhukama bhwa ekyaro bhumariri okubha bhwa Omukuru Waryubha weetu. Maaha Obhukama bhwa Waryubha mu Moonjooro eguru ya Amangʼana Amakongʼu.

na obhwa Kiristu omusorwa waaye.

Waryubha aritunga koko na koko.”

¹⁶Nho, abhakaruka mirongo ebhiri na bhane (24) bhanú bhaaringa bheekeeri kubhitumbi bhyabho bhya ekikama, embere ya Waryubha, bhakagwa mumaguru, okumusyengera Waryubha, ¹⁷bharagamba ega,

“Turakukumya Omukuru Waryubha wa obhuturo bhonsego.

Uuwe waaringa-ho okurwa obhusimuka na oriho okuhikira bhoono.

Ogegeri obhuturo bhwaho obhukuru, wambiri okutunga ekyaro kyonsego.

¹⁸Abhantu bhanú bhatakukwikirirya, bhaakujimira,

nawe, eribhaga ryaho rya okubhajimira rihikiri.

Bhoono ni-ribhaga ryaho rya okubhuturira ekiina abhantu bhanú bhaakwa.

Na ndyo eribhaga rya okutuha abhagaya bhaaho, abharooti,

na abhantu bhaaho bhonsego bhanú bharakwigwa,

abhakuru na abhake.

Rinu ndyo eribhaga rya okusikya abhantu,

bhanú bharasikya ekyaro.”

¹⁹Kimwi, ekiseku kya okusohera mwisyengerero erikuru rya Waryubha, rinú riringi murwire kikasiikurwa. Erisandiko rya eriragano rya Waryubha,11:19 Maaha mubhitabho bhya Okuhuruka 25:10-22; Abhaebhurania 9:4-5. rikamaahikana mwisyengerero muyo. Nkarora egimesyo na nkeegwa orukubha rurabharuka. Ekirigiti kya erirobha kikeebhuka na embura enjaru bhukongʼu eya omusoke ekatwa.

Omukari na erijoka

¹Kimwi, ekimanyiiriryo ekinene kya okuruguurya kikamaahikana kurwire eyo. Yaaringa-ho omukari unú akundikiriibhwe na eryubha, na omweri gwaringa insi wa amaguru gaaye. Na kumutwe gwaye, yaaringa yeebhoheri eritaaji rya ekikama, erya eginjota ekumi na ebhiri. ²Omukari uyo, yaaringa na enda, na yaaringa haangʼi okwibhura, hanú yaarumwa obhusungu akakuura.

³Kweki, ekimanyiiriryo ekindi kya okuruguurya kikamaahikana kurwire eyo. Maaha! Erijoka erinene erikangaaru ka rikeebhuka. Erijoka riyo ryaringa na emitwe muhungati na amatira ekumi, na kira omutwe gwaringa na eritaaji. ⁴Erijoka riyo, rikeenaarya omukira gwaryo, gukangʼuura eimwi ya esatu eya eginjota gya kurwire, na okugyesa mukyaro. Kimwi erijoka riyo, rikeemirira embere ya omukari uyo yaaringa haangʼi okwibhura, naho hanú areebhure rimire omwana. ⁵Mbe, omukari uyo, akeebhura omwana wa ekisaaja. Omwana uyo, aritunga ebhyaro bhyonsego kwa engʼimbo ya ekyuma. Omwana uyo akasakurwa, akahirwa ku Waryubha, kukitumbi kyaye kya ekikama. ⁶Omukari uyo weeki, akangʼosera kukibhara, ahasi hanú Waryubha yaaringa amuseemeerye, naho amutuge eyo, kwa eginsiku ekiku kimwi, magana gabhiri na mirongo esansabha (1,260).

⁷Nho, eriihe rikeebhuka murwire. Maraika12:7 Maraika. Maaha Bhamaraika mu Moonjooro eguru ya Amangʼana Amakongʼu. omukuru, unú arabhirikirwa Mikaeri, hamwi na bhamaraika bhaaye, bhakarwana na erijoka riyo na bhamaraika bhaaryo. ⁸Nawe, erijoka riyo, na bhamaraika bhaaryo, bhakahigwa na bhakakenyibhwa okurwa murwire. ⁹Erijoka riyo, rikeeswa mukyaro. Riyo ndyo enjoka ya akare inú erabhirikirwa ega, Omusarya kasi Erisambwa.12:9 Erisambwa. Maaha eringʼana rinu mu Moonjooro eguru ya Amangʼana Amakongʼu. Ryeki ndyo rirangʼeena abhantu bhonsego mukyaro, naho bhamwange Waryubha na bhakore obhusarya. Maheene ryeeswa mukyaro hamwi na bhamaraika bhaaryo.

¹⁰Mbe, nkeegwa eriisi erinene okurwa murwire riragamba ega,

“Bhoono, Waryubha weetu atuurirye abhantu bhaaye.

Atumiiri obhuturo bhwaye okwamba obhukama bhwaye!

Wonse yoorokerye obhutungi bhwa Kiristu omusorwa waaye,

kwa okubha omujongeri wa abheekirirya abharikyetu yeeserwe hansi,

weeki yaaringa embere ya Waryubha, arabhajongera obhutiku na omubhasu.

¹¹Abheekirirya abharikyetu bhamuhigiri kwa amanyinga ga Omwana wa Eringʼondi,

na kwa obhwimiririri bhunú bhaaruusya.

Bhataarora obhwera bhwa obhuhoru bhwabho,

bhaaringa bheeseemerye okukwa kurusumo rwa okwikirirya Omwana wa Eringʼondi.

¹²Kwa ego, mujomerwe,

bheenyu bhonsego bhanú mumenyeri eguru murwire eyo!

Nawe, murikirora-ko bheenyu bhanú mumenyeri mukyaro kyonsego,

kwa okubha Erisambwa riituumiri hansi gati yeenyu.

Rijimiri bhukongʼu, kwa okubha rimanyiri ega, eginsiku gyaryo ni-nkego.”

¹³Mbe, erijoka riyo hanú ryarora ega, ryeserwe mukyaro, rikamuseeta omukari unú yaaringa yeebhwiri omwana wa ekisaaja. ¹⁴Nawe, Waryubha akamuhaana omukari uyo amabhabha gabhiri ga ekikoona ekinene, naho yeebhururuke okugya kukibhara eyo, ahasi enú Waryubha yaaringa amuseemeerye, abhe ahare na erijoka riyo. Kukibhara eyo, atugwe kwa eginsiku ekiku kimwi magana gabhiri na mirongo esansabha (1,260).

¹⁵Kimwi, erijoka riyo, rikahongora amanji amaaru okurwa mumunwa gwaryo, gakagera kya oruuji enyuma ya omukari uyo, naho agegwe na amanji gayo. ¹⁶Nawe, erirobha rikamubheera omukari uyo. Erirobha rikasiikuka kya omunwa, rikamira amanji gonsego okurwa mumunwa gwa erijoka. ¹⁷Erijoka riyo, rikamujimira bhukongʼu omukari uyo, rikagya okurwana na abhaana bhaaye abhandi bhanú bhaatama. Abhaana bhayo, mbo bhareegwa emigiro gya Waryubha na okugwata obhwimiririri bhunú Yeesu yaaruusya. Mbe, erijoka riyo ryonse, rikeemirira embarika wa enyanja.

Ogutyenyi ogunene gwa mbere

¹Kimwi, nkarora ogutyenyi ogunene gurarwa munyanja. Ogutyenyi guyo, gwaringa na emitwe muhungati na amatira ekumi. Kira eritira ryaringa na eritaaji, na kira omutwe gwaringa gungʼoorerwe-ko eriina rya okumujabhura Waryubha. ²Ogutyenyi ogunene gunú naarora, gwaringa guhunkeeni kya engwe, na amaguru gaago gaaringa kya aga entyenyi inú erabhirikirwa edubhu na omunwa gwago gwaringa kya ogwa endwi. Erijoka rirya, rikaguhaana eginguru gyaryo, ekitumbi kyaryo kya ekikama na obhutungi obhwaru. ³Omutwe ogumwi gwa ogutyenyi guyo, gwaringa na ekironda ekibhiibhi ekya okwita. Nawe, ekironda kya okwita kiyo, kyaringa kihweneri! Eringʼana riyo, rikaruguurya abhantu bhonsego mukyaro, bhakaguseeta. ⁴Abhantu bhonsego, bhakasyengera erijoka rirya, kwa okubha ryaringa riheeri ogutyenyi guyo, obhuturo bhwaryo bhwa obhutungi. Bhakasyengera na ogutyenyi guyo gonse, enu bharagamba ega, “Niwi arahunkana kya ogutyenyi guyo? Niwi aratura okukora eriihe nago?”

⁵Mbe, ogutyenyi guyo, gukeekiririibhwa okwigungya na okugamba amangʼana ga okumujabhura Waryubha. Kweki gukahaanwa obhuturo bhwa okutunga kwa eribhaga rya emyeri mirongo ena na ebhiri (42). ⁶Ogutyenyi guyo, gukaamba okumujabhura Waryubha, na okurituka eriina ryaye, na emenyo yaaye na bhonsego bhanú bhareekara murwire. ⁷Gukeekiririibhwa okurwana na abhantu bha Waryubha gukabhahiga. Kweki gukahaanwa obhuturo bhwa okutunga abhantu bha mumakabhira gonsego, mugihamati gyonsego, mubhigambo bhyonsego, na mubhyaro bhyonsego. ⁸Abhantu bhonsego bhanú bhamenyeri mukyaro, bharisyengera ogutyenyi guyo. M-bantu bhonsego bhanú amariina gaabho gataangʼoorwa mukitabho kya obhuhoru bhwa koko eribhaga rinú ekyaro kyabhumbwa. Ekitabho kiyo n-kya Omwana wa Eringʼondi unú yaagoogwa.

⁹Unú yaana amatwi, yeegwe.

¹⁰Omuntu unú yaaseemibhwa okutumbarirwa mwiihe,

aritumbarirwa.

Omuntu unú yaaseemibhwa okwitwa kwa omuhyu,

ariitwa kwa omuhyu.

Bhoono, abhantu bha Waryubha bhareenderwa bheegumirirye na bhagendererye okubha na eimani.

Ogutyenyi ogunene gwa kabhiri

¹¹Kimwi, nkarora ogutyenyi ogunene ogundi gurariina okurwa mwirobha. Ogutyenyi guyo, gwaringa na amatira gabhiri kya aga ekimaanwa kya eringʼondi, gukahaira kya erijoka. ¹²Gukatumira obhuturo bhonsego bhwa ogutyenyi ogunene gwa mbere gurya, na gwabhutumira kurusumo rwa ogutyenyi gwa mbere gurya. Ogutyenyi ogunene gwa kabhiri guyo, gukabhandirirya abhantu bhonsego bha mukyaro, bhasyengere ogutyenyi ogunene gwa mbere gurya, gwaringa na ekironda kya okwita kinú kyaringa kihweneri. ¹³Ogutyenyi gwa kabhiri guyo, gukakora ebhimanyiiriryo ebhikuru bhya okuruguurya, kora gukakora omururo gukeetuuma okurwa kurwire okuuja mukyaro, enu abhantu bhararora. ¹⁴Gonse gukabhahabhya abhantu bhanú bhamenyeri mukyaro kwa ebhimanyiiriryo bhinú gwahaanwa okukora, kurusumo rwa ogutyenyi gwa mbere gurya. Gukabhakeerya abhantu bhabhaaje ekisusano kya okusuuka ogutyenyi gwa mbere gurya, gwaringa na ekironda kya omuhyu, nawe, gukahwena gukagendererya okubha oguhoru.

¹⁵Ogutyenyi gwa kabhiri guyo, gukahaanwa obhuturo bhwa okuhuuta omwika gwa obhuhoru, mukisusano kya ogutyenyi gwa mbere gurya, naho kiture okugamba na okukora abhantu bhonsego bhanú bhaanga okukisyengera, bheetwe. ¹⁶Ogutyenyi gwa kabhiri guyo, gukabhandirirya abhantu bhonsego, abhakuru na abhake, abhaniibhi na abhatobhu, abheeyagaari na abhagaya, bhatemwe orubhaaso kumabhoko ga obhuryo kasi kubhisyusu. ¹⁷Kweki, gukaanga ega, omuntu unú ataana orubhaaso, atakwenderwa okugura kasi okugurya ekintu kyokyonse. Orubhaaso ruyo ni-riina rya ogutyenyi gwa mbere gurya, kasi erisaabhu rya eginyuguta gyonsego gya eriina ryago.13:17 Erisaabhu rya eginyuguta gyonsego gya eriina ryago. Mu Kiyunani kira enyuguta yaaringa na erisaabhu ryayo. Kwa ego, kira eriina ryaringa na erisaabhu ryaryo, okurekana na erisaabhu rya eginyuguta gyonsego gya eriina riyo.

¹⁸Eringʼana rinu rireenda egintungwa. Weeki unú yaana egintungwa, abhare erisaabhu rya ogutyenyi ogunene gwa mbere gurya, kwa okubha erisaabhu riyo rirahairira omuntu nyabhurebhe. Erisaabhu ryaye ryonsego, m-magana gasansabha na mirongo esansabha na esansabha (666).

Omwana wa Eringʼondi na abhantu bhaaye 144,000

¹Kimwi, nkamaaha kweki mbere. Hayo nkarora Omwana wa Eringʼondi yeemiriiri eguru kunkuku ya Sayuni, hamwi na abhantu eraaki eimwi na ebhiku mirongo ena na bhane (144,000). Abhantu bhayo, bhaaringa bhangʼoorerwe kubhisyusu bhyabho, eriina rya Omwana wa Eringʼondi na erya Esewaabho. ²Nkeegwa eriisi okurwa murwire kya erya amanji amaaru ganú garagera, na kya eriisi rya orukubha orunene. Kweki eriisi riyo neegwa, ryaringa kya eriisi rya abhatemi bha amatungu abhaaru, bhanú bharatema amatungu gaabho kwa hamwi.

³Abhantu eraaki eimwi na ebhiku mirongo ena na bhane (144,000) bhayo, bhaaringa bheemiriiri embere ya ekitumbi kya ekikama kirya, na embere ya ebhibhumbwa ebhina bhya obhuhoru bhirya, na abhakaruka mirongo ebhiri na bhane bharya. Bhaaringa bhareemba eriimbo erihya, na atariho oundi unú yaatura okwihigira eriimbo riyo, okutigana na abhantu eraaki eimwi na ebhiku mirongo ena na bhane (144,000) bhanú bhaaringa bhatunguriibhwe okurwa mukyaro abheenego. ⁴Abhantu bhayo, bhaaringa bhatareekonʼya kwa okubha bhaaringa bhatarataara na abhakari. Bhayo mbo bharasoorana Omwana wa Eringʼondi hohonse enú aragya. Bhaatunguribhwa okurwa gati ya abhantu kya ego omugeso gwa mbere okukongʼa, guraruusibhwa ku Waryubha na ku Mwana wa Eringʼondi. ⁵Bheeki bhataakagambiri obhubheehi, kora bhataaringa na amasoro gogonse.

Maraika bhasatu bharagamba amangʼana ga Waryubha

⁶Kimwi, nkarora maraika oundi areebhururuka eguru kurwire. Maraika uyo, yaaringa yaana Amangʼana Amajomu ga koko, okuraarikira abhantu bhanú bhareekara mukyaro, abhantu bha ebhyaro bhyonsego, amakabhira gonsego, ebhigambo bhyonsego na egihamati gyonsego. ⁷Mbe, maraika uyo, akagamba kwa eriisi erinene ega, “Mumwigwe Waryubha na okumugungya, kwa okubha eribhaga ryaye rya okubhuturira ekiina abhantu rihikiri. Mumusyengere unú yaabhumba orwire, ekyaro, enyanja, na ebhisekaani bhya amanji.”

⁸Kimwi, maraika oundi wonse akarumya-ko, akagamba ega, “Guhaanyukiri! Omugi omukuru gwa Bhabheri, guhaanyukiri chwe! Omugi guyo, gwakora abhantu bha ebhyaro bhyonsego bhanywe amarwa gaago bharehwe. Amarwa gayo gaakora orunamba orubhiibhi rwa okukora obhusimbe nawe.”

⁹Kimwi, maraika oundi owa kasatu wonse, akarumya-ko, akagamba kwa eriisi erinene ega, “Nyoore omuntu arasyengera ogutyenyi ogunene gurya, na ekisusano kyago, na okutemwa orubhaaso kukisyusu kyaye, kasi kukubhoko kwaye, ¹⁰omuntu uyo, arinywa amarwa. Gayo ngo enkoro ya Waryubha. Waryubha omwene arimusukira omuntu uyo, amarwa amaruru gayo, mukikombe kya enkoro yaaye, naho anywe. Omuntu uyo, arinyanka mumururo omuhaari, embere ya bhamaraika abharabhu na embere ya Omwana wa Eringʼondi. ¹¹Engesi ya omururo gunú guribhanga gurabhanyankya, eririina eguru koko na koko. Abhantu bhayo, bhatarinyoora obhujomerwa obhutiku na omubhasu, kwa okubha bhaasyengera ogutyenyi ogunene na ekisusano kyago na okutemwa orubhaaso rwa eriina ryago.”

¹²Bhoono, abhantu bha Waryubha bhareenderwa bheegumirirye. Bhayo mbo bharagwata emigiro gya Waryubha na okumwikirirya Yeesu.

¹³Nkeegwa eriisi okurwa murwire, riragamba ega, “Ngʼoora ega, ‘Okurwa bhoono, nyakara abhantu bhonsego bhanú bharakwa enu bharamwikirirya Omukuru Yeesu.’”

Kimwi Omutima wa Waryubha14:13 Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. akagamba ega, “Ee, bharinonkwa bhukongʼu. Bharimuunya okurwa kumirimu gyabho emikongʼu, kwa okubha amakorwa gaabho amajomu garibha hamwi nabho.”

Erigesa rya ekyaro

¹⁴Kimwi, nkarora erisaaru erirabhu. Eguru ya erisaaru riyo yaaringa yeekeeri-ko omuntu unú atuubheeni na Omwana wa Adamu.14:14 Omwana wa Adamu. Maaha eringʼana rinu mu Moonjooro eguru ya Amangʼana Amakongʼu. Omuntu uyo, yaaringa yeebhoheri eritaaji rya ekikama rya egijahaabhu kumutwe gwaye. Mukubhoko kwaye yaaringa agwatiri omooro omoogi.

¹⁵Nho, maraika oundi akahuruka mwisyengerero erikuru rya Waryubha rinú riringi murwire eyo, akamukeerya kwa eriisi erinene omuntu unú yaaringa yeekeeri eguru ya erisaaru ega, “Gega omooro gwaho ogese, kwa okubha omugeso gwa ekyaro gukongʼeri na eribhaga rya okugesa rihikiri.” ¹⁶Nho, unú yaaringa yeekeeri eguru ya erisaaru akeesa omooro gwaye mukyaro, akagesa omugeso guyo gwa ekyaro kyonsego.

¹⁷Kweki, maraika oundi akahuruka mwisyengerero rya Waryubha rinú riringi murwire eyo. Weeki wonse yaaringa agwatiri omooro omoogi. ¹⁸Nho, akaaja maraika oundi. Maraika uyo akarwa ahasi ha okumwensera, weeki yaaringa areemiririra omururo. Akamukeerya kwa eriisi erinene, maraika wa omooro omoogi ega, “Gega omooro gwaho omoogi, obhuture eginsero gya emijabhibhu gya ekyaro, kwa okubha emisumo gitobheri.” ¹⁹Nho, maraika urya yaahuruka mwisyengerero akeesa omooro gwaye mukyaro, akagesa egijabhibhu gya ekyaro, akagituura mukintu ekinene kya okugimitira-mo. Ekintu kiyo kiroorokya enkoro ya Waryubha. ²⁰Egijabhibhu giyo gikamitirwa mukintu kiyo, kibhara wa omugi omukuru. Gikaruusya amanyinga, na amanyinga gayo, gakabha oruuji orutambi. Obhutambi bhwago bhwaringa egikirometa magana gasatu na obhutambi bhwa ekiyunga kyaye ekubha rimwi na etuugati.

Eriimbo rya Omwana wa Eringʼondi na Musa

¹Kimwi, nkarora ekimanyiiriryo ekindi murwire. Ekimanyiiriryo kiyo kyaringa ekinene na kya okuruguurya. Naarora bhamaraika muhungati, bharareeta egingʼanga muhungati gya obhuteero. Egingʼanga giyo, gyaringa gya okukunaanʼya enkoro ya Waryubha. ²Kweki, nkarora ekintu kinú kyaringa kya enyanja ya ekirore kinú kisanganiibhwe na omururo. Na embarika hayo, abhantu bhaaringa bheemiriiri bhanú bhaaringa bhahigiri ogutyenyi ogunene gurya, ekisusano kyago, hamwi na erisaabhu rya eriina ryago.15:2 Maaha mukitabho kya Obhukundukuri 13:17-18. Abhantu bhayo bhaaringa bharagwata amatungu mumabhoko gaabho ganú bhaaringa bhaheerwe na Waryubha, naho bhamusyengere. ³Bhaaringa bhareemba eriimbo rya Musa omugaya wa Waryubha, erya Omwana wa Eringʼondi, bharagamba ega,

“Omukuru Waryubha wa obhuturo bhonsego,

amakorwa gaaho m-marito na ga okuruguurya.

Uuwe nuuwe Omukama wa ebhyaro bhyonsego,

na eginjira gyaho n-gya heene na n-gya obhuheene.

⁴Ee Omukuru, abhantu bhonsego bharikwigwa,

na okugungya eriina ryaho,

kwa okubha uuwe omwenego nuuwe omurabhu.

Abhantu bha ebhyaro bhyonsego bhariija na okukusyengera,

kwa okubha amakorwa gaaho ga heene gabheeri kubhurabhu.”

Bhamaraika muhungati bha egingʼanga

⁵Hanú gayo gaahwa, nkarora erisyengerero erikuru risiikwirwe murwire, riyo ndyo eribhuru rinú riroorokya okubha-ho kwa Waryubha.15:5 Eribhuru rinú riroorokya okubha-ho kwa Waryubha. Maaha Eribhuru rya okoorokya okubha-ho kwa Waryubha mu Moonjooro eguru ya Amangʼana Amakongʼu.⁶Bhamaraika muhungati abha egingʼanga muhungati bharya bhaarwa mwisyengerero muyo. Bhaaringa bheebhoheri emyenda emirabhu gya obhuguri obhunene ginú girangʼesangʼesa, na emichipi emigari gya egijahaabhu mubhikubha bhyabho. ⁷Oumwi wa ebhibhumbwa ebhina bhya obhuhoru bhirya, akabhahaana bhamaraika muhungati bharya kira oumwi eribhakuri rya egijahaabhu rinú riijwiri enkoro ya Waryubha unú aringi omuhoru koko na koko. ⁸Mwisyengerero muyo, hakeejura-mo engesi okurekana na obhukuru bhwa Waryubha na obhuturo bhwaye. Na atariho unú yaatura okusoha mwisyengerero erikuru rya Waryubha, okuhikira egingʼanga muhungati gya bhamaraika bharya gikunaane.

¹Kimwi, nkeegwa eriisi erinene okurwa mwisyengerero erikuru rya Waryubha muyo, rirabhakeerya bhamaraika muhungati bharya ega, “Mugende muhumirire mukyaro amabhakuri muhungati garya ga enkoro ya Waryubha.” ²Nho, maraika wa okwamba akagya, akahumirira mukyaro eribhakuri ryaye rya enkoro ya Waryubha. Hayohayo, abhantu bhonsego bhanú bhaaringa bhatemerwe orubhaaso rwa ogutyenyi ogunene na okusyengera ekisusano kyago, bhakarwara amahute amabhiibhi ga okwatya bhukongʼu.

³Maraika wa kabhiri wonse akahumirira eribhakuri ryaye munyanja. Na amanji gakakyuka gakabha amanyinga kya aga omuku na ebhibhumbwa bhyonsego bhya obhuhoru munyanja bhikakwa.

⁴Kweki, maraika wa kasatu wonse akahumirira eribhakuri ryaye muginyuji na ebhisekaani bhya amanji, na amanji gayo gonse gakakyuka gakabha amanyinga. ⁵Nho, nkeegwa maraika omwimiririri wa amanji aragamba ega,

“Ee Waryubha Omurabhu,

uuwe unú oriho, unú waaringa-ho okurwa obhusimuka,

uuwe nuuwe omuheene,

na obhubhuturi bhwa ekiina bhwaho bhuyo, m-bwa heene.

⁶Abhantu abhasarya bheetira amanyinga ga abhantu bha emitima emirabhu na abharooti bhaaho,

uuwe Omukuru obhaheeri amanyinga, bhanywe.

Na obhujibhu bhuyo mbo bhareenderwa!”

⁷Nho, nkeegwa eriisi okurwa ahasi ha okumwensera riragamba ega, “Ee, Omukuru Waryubha wa obhuturo bhonsego, obhubhuturi bhwa ekiina bhwaho m-bwa heene na bhwa obhuheene.”

⁸Nho, maraika wa kane akahumirira eribhakuri ryaye kuryubha. Eryubha rikeekiriribhwa okusamba abhantu kwa omururo gwaye. ⁹Abhantu bhakasambwa na eribhiriira bhukongʼu. Bhakatuka eriina rya Waryubha owa obhutungi eguru ya egingʼanga giyo, nawe, bhataamwihunjurira okurwa mubhusarya bhwabho kora bhataamugungya.

¹⁰Na maraika wa kataanu akahumirira eribhakuri ryaye, kukitumbi kya ekikama, kya ogutyenyi ogunene gurya. Rumwigo, ekisunte kikakundikirya obhukama bhwago, na abhantu bhakeerumaruma egindimi gyabho, kwa obhururu. ¹¹Bhakamujabhura Waryubha wa murwire kwa ekisigo kya obhururu obhuhaari bhunú bhaaringa bhareegwa, na amahute amabhiibhi gaabho. Kora bhataamwihunjurira Waryubha okurwa kumakorwa gaabho amabhiibhi.

¹²Maraika wa kasansabha wonse akahumirira eribhakuri ryaye muruuji orukuru rwa Efurate. Oruuji ruyo rukooma, naho enjira erosibhwe kubhakama bhwa okurwa bhuturira-ryubha.

¹³Nho, nkarora ebhihwi ebhibhiibhi bhisatu bhinú bhihunkeeni kya ebhikere. Ekihwi ekimwi kyarwanga mumunwa gwa erijoka rirya, ekihwi ekindi kyarwanga mumunwa gwa ogutyenyi ogunene gurya, na ekindi kyarwanga mumunwa gwa omurooti urya wa obhubheehi.16:13 Omurooti urya wa obhubheehi. Eragambira ogutyenyi ogunene gurya gwa kabhiri. Gunu gweebhuka okurwa mwirobha na emirimu gyago gyaringa okuhabhya abhantu kwa amangʼana gaago. Maaha mukitabho kya Obhukundukuri 13:11-15.¹⁴Ebhihwi ebhibhiibhi bhiyo bhyaringa na obhuturo bhwa okukora ebhimanyiiriryo, na emirimu gyabhyo n-kugya kubhakama bhonsego mukyaro, okubhakumanʼya bhakore eriihe orusiku orukuru rwa Waryubha wa obhuturo bhonsego.

¹⁵Omukuru Yeesu aragamba ega, “Maaha! Ndiija kya omwibhi. Anonkerwe unú aratengeeja na okwibhoha emyenda gyaye, naho atariija okugenda kinaabhi na okusuuka.”

¹⁶Mbe, ebhihwi bhiyo bhikakumanʼya abhakama bhonsego na abhasirikare bhaabho, ahasi hanú harabhirikirwa Harimagedoni mu Kiebhurania.

¹⁷Nho, maraika wa muhungati akahumirira eribhakuri ryaye kurwire. Na oni nkeegwa eriisi erinene okurwa kukitumbi kya ekikama kya mwisyengerero erikuru rya Waryubha, riragamba ega, “Gonsego gahweri!” ¹⁸Hakabha na egimesyo, eriisi rya orukubha, na ekirigiti kya erirobha. Ekirigiti kiyo kyaringa na eginguru bhukongʼu, okukira ebhirigiti bhyonsego okwambira okubhumbwa kwa abhantu. ¹⁹Nho, omugi omukuru gwa Bhabheri gukaahukana mbaara esatu, na emigi emikuru gya ebhyaro gikahaanyuka gyonsego. Waryubha wonse ataarabhirwa amakorwa amabhiibhi ga omugi omukuru gwa Bhabheri. Akagubhandirirya gunywere mukikombe kya amarwa ga enkoro yaaye. ²⁰Ekirigiti kya erirobha kirya, kikakora amaginga gonsego gakatubhira, na eginkuku gyonsego gitaamaahikana kweki. ²¹Embura ya omusoke ekatwa. Amagina amanene ga omusoke ganú gaaringa na egikiro muna mirongo etaanu kira erimwi, gakagwira abhantu okurwa murwire. Abhantu bhakamujabhura Waryubha kwa ekisigo kya engʼanga iyo, ya embura ya omusoke, kwa okubha yaaringa engʼanga embiibhi bhukongʼu.

Omusimbe omukuru na ogutyenyi ogukangaaru

¹Kimwi, oumwi wa bhamaraika muhungati bhanú bhaaringa na amabhakuri ga enkoro ya Waryubha garya, akaaja akankeerya ega, “Nuuje, nkoorokye obhujibhu bhunú arihaanwa omusimbe omukuru unú yeekeeri kumanji amaaru. ²Abhakama bha ekyaro bhaakora nawe obhusimbe, na abhantu bhanú bhareekara mukyaro, bhonse bhaarehwa amarwa gaaye, ngo gaakora bhakore obhusimbe nawe.”

³Mbe, Omutima Omurabhu akanyituumira. Maraika akanyorokererya okuhikira kukibhara. Nkarora eyo omukari, yeekeeri eguru ya ogutyenyi ogunene ogukangaaru. Ogutyenyi guyo gwaringa na emitwe muhungati na amatira ekumi. Omubhiri gwago gwaringa gungʼoorerwe-ko amariina amaaru ga okumujabhura Waryubha. ⁴Omukari uyo yaaringa yeebhoheri emyenda emijomu gya erangi ya jambaraawe na enkangaaru. Na yaaringa yeejomerye kwa egijahaabhu, amagina ga obhwera obhunene na egiruru. Mukubhoko kwaye, yaaringa agwatiri ekikombe kya egijahaabhu, kinú kyaringa kiijwiri amangʼana ga okumujimya Waryubha, na ebhintu ebhinyanku bhya obhusimbe bhwaye. ⁵Kukisyusu kyaye, bhwaringa bhungʼoorerwe-ko eriina rinú ensonga yaaryo yaaringa ibhisiri. Eriina eryene n-dinu,

omugi omukuru gwa bhabheri,

ngʼina waabho abhasimbe

na ngʼina waabho obhujimya bhwa ekyaro.

⁶Nkarora omukari uyo, areherwe kwa okunywa amanyinga ga abhantu bha Waryubha, bhanú bheetwa kwa okubha bhaaringa abheemiririri bha Yeesu.

Hanú naamurora, nkaruguura bhukongʼu, ⁷nawe, maraika urya akambuurya ega, “Kwaki oruguuriri? Tiga nkukeerye ensonga ya ekinyerera kya omukari uyo na ogutyenyi gwa emitwe muhungati na amatira ekumi, gunú gwaringa gumugegeri. ⁸Ogutyenyi ogunene gunú waarora, gwaringa oguhoru, nawe, bhoono gukwiri. Bhoono, guringi haangʼi okurwa mwituko rya ekibhohe kya amasambwa, nawe, Waryubha arigusikya. Na abhantu bhonsego bha mukyaro bhanú amariina gaabho gataangʼoorwa mukitabho kya obhuhoru bhwa koko eribhaga rinú ekyaro kyabhumbwa, bhariruguura okurora ogutyenyi guyo, kwa okubha akare gwaringa-ho, kimwi gukakwa na bhoonwego guramaahikana kweki.”

⁹Maraika uyo akagendererya okugamba ega, “Eringʼana rinu rireenda egintungwa. Waarora emitwe muhungati. Emitwe giyo, gireemiririra eginkuku muhungati ginú omukari urya yaaringa yeekariiri. ¹⁰Kweki emitwe muhungati giyo, gireemiririra abhakama muhungati. Gati ya abhakama muhungati bhayo, abhataanu bhamariri okukwa, oumwi akyatunga. Omukama oundi aritunga eribhaga erindi na hanú ariija, aritunga kwa eribhaga ekego. ¹¹Na ogutyenyi ogunene gunú gwaringa oguhoru kimwi gukakwa, m-mukama wa munaane. Uyo, ngʼ-umwi wa abhakama muhungati bharya, nawe, Waryubha arimusikya.

¹²“Na amatira ekumi ganú waarora gareemiririra abhakama ekumi bhanú bhakyari okutunga. Bhayo bhonsego bharihaanwa obhuturo bhwa okutunga hamwi na ogutyenyi ogunene guyo, nawe, kwa eribhaga rya ensa eimwi ego. ¹³Abhakama ekumi bhayo bharibha na ensonga eimwi, bhonse bhariguhaana ogutyenyi ogunene guyo, obhutungi bhwabho na obhuturo bhwabho bhonsego. ¹⁴Bharigwatana nago okukora eriihe na Omwana wa Eringʼondi. Nawe, Omwana wa Eringʼondi hamwi na abhantu bhaaye, aribhahiga, kwa okubha weeki m-Mukuru wa abhakuru bhonsego na Omukama wa abhakama bhonsego. Abhantu bhaaye bhayo, m-banú bhaabhirikirwa na okusorwa na Waryubha, bhonse m-baheene.”

¹⁵Maraika akagendererya okugamba ega, “Amanji ganú omusimbe urya yeekeeri-ko, gareemiririra abhantu bha amakabhira gonsego, abha egihamati gyonsego, abha ebhyaro bhyonsego na abha ebhigambo bhyonsego. ¹⁶Amatira ekumi ganú waarora na ogutyenyi ogunene guyo, bharimubhihirirwa omusimbe urya. Bharigega ebhintu bhyaye bhyonsego na okumutiga kinaabhi. Bharirya enyama yaaye, na amasaagyo, bharigeesa mumururo. ¹⁷Waryubha omwene abhakoreri bhakunaanʼye ensonga yaaye. Abhakoreri okuhaana ogutyenyi ogunene guyo, obhuturo bhwabho bhwa okutunga. Bheeki bharikora ego, okuhikira hanú amangʼana ga Waryubha garikunaana. ¹⁸Omukari urya waarora ngʼo omugi omukuru gunú guuna obhutungi eguru ya abhakama bhonsego bha mukyaro.”

Omugi gwa Bhabheri gurahaanyuka

¹Hanú gayo gaahwa, nkarora maraika oundi, areetuuma okurwa murwire. Yaaringa na obhuturo obhunene, na ekyaro kikangʼarabha kwa obhukuru bhwaye. ²Wonse akagamba kwa eriisi erinene bhukongʼu ega,

“Guhaanyukiri!

Omugi omukuru gwa Bhabheri guhaanyukiri chwe!

Bhoono, gubheeri ahasi ha okwibhisa

kwa amasambwa na ebhihwi ebhibhiibhi.

Gubheeri gwa okwikara-ko kira ekinyonyi ekibhiibhi kya okujimya.

³Guhaanyukiri kwa okubha abhantu bha ebhyaro bhyonsego

bhaanywa bhakarehwa amarwa gaago.

Amarwa gayo, gaakora orunamba orubhiibhi rwa okukora obhusimbe nawe.

Abhakama bha ekyaro bhaakora nawe obhusimbe.

Abhakori bha ebhyasara bha ekyaro,

bhakaniibha kwa orunamba rwaye runú rutaana endengo.”

⁴Kweki, nkeegwa eriisi erindi okurwa murwire, riragamba ega,

“Abhantu bhaani, murwe mumugi guyo,

naho mutagwatana nawe okukora obhusarya bhwaye,

naho mutajibhibhwa hamwi nawe.

⁵Obhusarya bhwaye bhwabheeri obhwaru,

kora bhuhikiri murwire.

Waryubha aringi haangʼi okumujibhya kwa amakorwa gaaye amabhiibhi.

⁶Kya ego yaabhakorera abhandi, na bheenyu mumukorere egoego.

Kweki mumukorere mara kabhiri ya obhusarya bhunú yaakorera abhandi.

Mugege ekikombe kyaye,

mumutuurire mara kabhiri ya obhururu bhunú yaabhasanganirya abhandi.

⁷Mumujibhye obhujibhu na okumunyankya endengo inú yaatumira okwinyoorera eginkuma na obhuniibhi.

Weeki areerora mumutima gwaye, aragamba ega,

‘Nikeeri okutunga kya omukama omukari,

oni ntarisurumbara kwa okukwirwa kora orusiku rumwi, kwa okubha ntaatetwa!’

⁸Kwa ego arinyoora egingʼanga gyonsego kwa orusiku rumwigo,

egingʼanga gya oruku, okusurumbara na enjara.

Wonse arirungura kwa omururo,

kwa okubha Omukuru Waryubha unú aramubhuturira ekiina ngʼ-wa obhuturo.”

⁹Abhakama bha ekyaro bhanú bhaakora nawe obhusimbe, na okusanga obhuniibhi bhwaye, bharimukuurira na okumufumbira, hanú bharirora engesi ya okurungura kwa omugi guyo. ¹⁰Abhakama bhayo, bhariimirira ahare na omugi guyo, kwa okoobhoha obhusikya bhwago. Bharikuura bharagamba ega, “Orikirora-ko, orikirora-ko, omugi omunene gwa Bhabheri, omugi gwa obhuturo! Obhubhuturirwa bhwa ekiina bhwaho, bhukuhikiiri rumwigo.”

¹¹Abhakori bha ebhyasara bha mukyaro, bharimukuurira na okufumba, kwa okubha atariho omuntu unú arigura ebhintu bhyabho. ¹²Kweki, atariho omuntu wa okugura ebhintu bhyabho bhya egijahaabhu, egimbirya, egiruru kora amagina ga obhwera obhunene. Atariho omuntu wa okugura ekitambaara kya obhuguri obhunene kya ekitani, emyenda emijomu gya jambaraawe, emyenda gya amabhuri na emyenda emikangaaru. Atariho omuntu wa okugura ebhintu bhya egimbaau eginjomu, kora ebhintu bhinú bhikorerwe kwa amatira ga enjogu, ebhya egimbaau gya obhuguri obhunene, kora bhya eshabha, ebhya ekyuma, kasi ebhya marumaru. ¹³Atariho omuntu wa okugura omudarasini, eiriki, ekurusu, amaguta ga obhurange, edivai, amaguta ga okurya, obhusye obhujomu, na egingano. Kweki atariho omuntu wa okugura egingʼombe, amangʼondi, egifaraasi, egimatoka gya okurutwa na egifaraasi, abhagaya na kora obhuhoru bhwa abhantu.18:13 Kora obhuhoru bhwa abhantu. Ensonga eindi eratura okubha ega, abhantu bhanú bhaatumbarirwa mwiihe.

¹⁴Mbe, abhakori bha ebhyasara bharimukeerya ega, “Ebhintu bhinú waaringa ohanjiri bhihweri. Obhuniibhi bhonsego na ebhintu bhyonsego ebhijomu bhikuhwereri. Kora uuwe otakutura okubhinyoora kweki koko.” ¹⁵Abhakori bha ebhyasara bhanú bhaaniibha kwa okukora ebhyasara mumugi muyo, bhariimirira ahare kwa okoobhoha enyanko iyo, enu bharakuura na okufumba. ¹⁶Bharigamba ega, “Orikirora-ko, orikirora-ko, omugi omukuru, gunú gwaringa gureebhoha ekitambaara kya obhuguri obhunene kya ekitani, ekya jambaraawe, na ekikangaaru. Gwaringa gureejomya kwa egijahaabhu, amagina ga obhwera obhunene na eruru. ¹⁷Nawe, obhuniibhi bhonsego bhuyo bhusikiibhwe rumwigo.”

Abhakuru bhonsego bha amaato, abhagendi bhonsego bha kunyanja, abhagobhi, na abhakori bha emirimu bhonsego bha mumaato, bhariimirira ahare. ¹⁸Hanú bharirora engesi ya okurungura kwago, bharikuura kwa eriisi bharagamba ega, “Gutariho omugi omukuru kya gunu!” ¹⁹Abhantu bhayo bhariyitirira oruteeri kumitwe gyabho, okoorokya ega, bhasurumbeeri. Bharikuura bharagamba ega, “Orikirora-ko, orikirora-ko, omugi omukuru, gunú gwatukora bheetu bhonsego abha amaato, tubhe abhaniibhi okurekana na obhuniibhi bhwago. Nawe, omugi guyo, gusikiibhwe rumwigo.”

²⁰Mujomerwe bheenyu bhanú mumenyeri murwire. Mujomerwe abhantu bha Waryubha, abhatumwa na abharooti, kwa okubha Waryubha abhuturiiri ekiina omugi guyo, kuganú gwabhakorera bheenyu.

²¹Mbe, maraika wa eginguru, akeenura erigina, kya ensyo enene ya okusyera, akaryesa munyanja, akagamba ega,

“Kwa eginguru eginjaru kya ginu,

omugi omukuru gwa Bhabheri guryeswa na okubhura kimwi.

²²Na mumugi guyo, mutariigwa kweki eriisi rya abhantu bhareemba,

bharatema eritungu, ekironge na enkombi.

Ataribha-ho omukonji wa amanga gogonse,

kora mutariigwa kweki eriisi rya ensyo erasya!

²³Muyo hataribha-mo na obhurabhu bhwa ekorobhoi kweki.

Kora hataribha-mo na enyangi ya obhwenga,

kwa okubha abhakori bha ebhyasara bhaago,

bhaaringa abhakuru bha ekyaro.

Kwa obhuturutumbi bhwa omugi guyo, ebhyaro bhyonsego bhyangʼeenwa.

²⁴Mumugi muyo gaamaahikana amanyinga ga abharooti na amanyinga ga abhantu abhandi bha Waryubha,

hamwi na amanyinga ga abhantu bhonsego bhanú bheetwa mukyaro munu.”

Waryubha aragungibhwa

¹Hanú gayo gaahwa, nkeegwa eriisi erinene muna erya omuganda omunene murwire eyo, riragamba ega,

“Agungibhwe Waryubha!

Obhutuurya, obhukuru na obhuturo m-bya Waryubha weetu,

²kwa okubha obhubhuturi bhwaye bhwa ekiina m-bwa heene na bhwa obhuheene.

Amubhuturiri ekiina omusimbe omukuru

unú yaasarya ekyaro kwa obhusimbe bhwaye.

Waryubha amurihirye

kurusumo rwa amanyinga ga abhagaya bhaaye.”

³Eriisi riyo, rikagamba rwa kabhiri ega,

“Agungibhwe Waryubha!

Engesi okurwa mumugi gurya

eragya eguru koko na koko.”

⁴Abhakaruka mirongo ebhiri na bhane (24) bharya, hamwi na ebhibhumbwa ebhina bhirya bhya obhuhoru, bhakamugwira mumaguru, bhakamusyengera Waryubha unú yeekeeri kukitumbi kya ekikama, bharagamba ega, “Amina! Agungibhwe Waryubha!”

⁵Kimwi, nkeegwa eriisi erindi okurwa kukitumbi kya ekikama riragamba ega,

“Mumugungye Waryubha weetu, bheenyu abhagaya bhaaye bhonsego.

Mumugungye bheenyu bhanú muramwigwa,

abhakuru na abhake!”

⁶Kimwi, nkeegwa eriisi muna eriisi rya omuganda omunene. Eriisi riyo, ryaringa kya erya amanji amaaru ganú garagera, na kya eriisi rya orukubha orunene. Ryagamba ega,

“Agungibhwe Omukuru Waryubha weetu wa obhuturo bhonsego kwa okubha weeki ngʼo aratunga.

⁷Na bheetu, tujomerwe,

tumukiririrye na okumugungya,

kwa okubha obhwenga bhwa Omwana wa Eringʼondi bhuhikiri,

na omwenga amariri okwiseemya.

⁸Omwenga yaahaanwa ekitambaara kya obhuguri obhunene kya ekitani,

ekirabhu pee kya okungʼesangʼesa.”

Emyenda emijomu giyo ensonga yaagyo niiga, amakorwa ga heene ga abhantu bha Waryubha.

⁹Maraika urya akankeerya ega, “Ngʼoora ega, nyakara bhanú bharaarikirwe kunyangi ya obhwenga bhwa Omwana wa Eringʼondi.” Kweki akankeerya ega, “Amangʼana ganú ngambiri n-ga obhuheene bhwa Waryubha.”

¹⁰Nho, nkagwa bhwibhumbike mumaguru ga maraika uyo, naho mmusyengere. Nawe, akankeerya ega, “Tiga! Oni nonse m-mukori wa emirimu omurikyaho, hamwi na abhahiiri bhaaho bhanú bharamwimiririra Yeesu. Omusyengere Waryubha omwenego, kwa okubha obhwimiririri eguru ya Yeesu, mbo obhwambiro bhwa obhurooti.”

Unú aragendesya efaraasi endabhu

¹¹Kimwi nkarora orwire rusiikukiri. Nkarora efaraasi endabhu na unú yeekeeri eguru yaayo. Uyo yaabhirikirwanga “Omuheene” na “Owa heene.” Wonse arabhutura ekiina na okurwana eriihe kwa obhuheene. ¹²Ameeso gaaye, gaaringa kya egindimi gya omururo, na yaaringa yeebhoheri amataaji amaaru ga ekikama kumutwe gwaye. Eriina rinú yaaringa angʼoorerwe atariho omuntu unú yaarimanya, nawe, weeki omwene. ¹³Yaaringa yeebhoheri enkanju inú etobhekerwe mumanyinga. Eriina ryaye, yaabhirikirwanga ega, “Eringʼana rya Waryubha.” ¹⁴Abhasirikare bha murwire bhaaringa bharamuseeta kwa enyuma. Bhaaringa bheebhoheri ebhitambaara ebhirabhu pee bhya ekitani bhya okungʼesangʼesa, bhonse bhaaringa bheekeeri eguru kugifaraasi egindabhu. ¹⁵Omuhyu omoogi gurarwa mumunwa gwaye, naho ahige ebhyaro. Aribhitunga kwa engʼimbo ya ekyuma. Wonse arataja egijabhibhu mukintu ekinene kya okumitira-mo, kinú kiroorokya enkoro ya Waryubha wa obhuturo bhonsego. ¹⁶Kunkanju yaaye ahasi ha kukiimo, haaringa hangʼoorerwe eriina rinu,

Omukama wa abhakama bhonsego na Omukuru wa abhakuru bhonsego.

¹⁷Mbe, nkarora maraika oumwi yeemiriiri kuryubha. Maraika uyo, akagamba kwa eriisi erinene, arabhirikira ebhinyonyi bhyonsego bhinú bhyaringa bhireebhururuka eguru, akagamba ega, “Muuje, mwikumanʼye munyangi enene ya Waryubha. ¹⁸Muuje murye enyama ya abhakama, ya abhakuru bha abhasirikare, na ya abhantu abha eginguru. Murye enyama ya egifaraasi na abhariini bha egifaraasi, enyama ya abhantu bhonsego, abhagaya na bhanú bhareeyagaara, abhakuru na abhake.”

¹⁹Kimwi, nkarora ogutyenyi ogunene gurya na abhakama bha ekyaro na abhasirikare bhaabho bheekumeenʼye hamwi, naho bharwane na unú yeekeeri kufaraasi endabhu hamwi na abhasirikare bhaaye. ²⁰Nawe, ogutyenyi ogunene guyo, hamwi na omurooti wa obhubheehi unú yaakora ebhimanyiiriryo kurusumo rwago, bhakagwatwa. Kwa okukora ebhimanyiiriryo bhyaye bhiyo, omurooti uyo yaaringa abhangʼeeneri abhantu bhanú bhaatemwa orubhaaso rwa ogutyenyi ogunene guyo na okusyengera ekisusano kyago. Bhabhiri bhayo, bhakeeswa bhakyari abhahoru munyanja ya omururo omuhaari. ²¹Omuntu uyo yaaringa yeekeeri eguru ya efaraasi endabhu, akatumira omuhyu gunú gwarwa mumunwa gwaye, okwita abhasirikare bhaabho bhonsego. Na ebhinyonyi bhyonsego bhikarya eginyama gyabho bhikeeguta bhukongʼu.

Erisambwa rirabhohwa emyaka ekiku kimwi

¹Kimwi, nkarora maraika areetuuma okurwa murwire. Wonse yaaringa na orufunguro rwa ekibhohe kya amasambwa, na omunyororo omunene mukubhoko kwaye. ^2-3Akarigwata erijoka, riyo ndyo enjoka ya akare inú erabhirikirwa Omusarya kasi Erisambwa. Akaribhoha omunyororo na akaryesa mukibhohe kya amasambwa. Akasiika ekiseku, akatuurira orubhaaso rwa obhurimbo naho ritariija okungʼeena kweki abhantu bha ebhyaro. Erisambwa rikabhohwa muyo emyaka ekiku kimwi. Hanú eribhaga riyo ririhwa, riryenderwa risiikurirwe kwa eribhaga ekego.

⁴Nho, nkarora ebhitumbi bhya ekikama, bhiikariirwe na bhanú bhaaringa bhaheerwe obhuturo bhwa okubhutura ekiina. Kweki nkarora abhantu bhanú bhaaringa bhabhutwirwe emitwe, kurusumo rwa okuraarika eguru ya Yeesu na okuriimiririra eringʼana rya Waryubha. Bhataasyengera ogutyenyi ogunene gurya, kora ekisusano kyago. Bhateekirirya okutemwa orubhaaso rwa ogutyenyi ogunene guyo, kubhisyusu bhyabho kora kumabhoko gaabho. Abhantu bhanu bhaahyuka, bhakatunga hamwi na Kiristu emyaka ekiku kimwi. ⁵Abhaku abhandi bhatarihyuka okuhikira hanú emyaka ekiku kimwi girihwa. ⁶Obhuhyuki bhwa abhaana bha Waryubha bhuyo, mbo bhwabha obhuhyuki bhwa mbere. Bheeki bhaanonkwa na m-bantu abharabhu bha omutima. Oruku rwa kabhiri rutaribha na eginguru kubheene. Bhonse bharibha abhasyengeri bha Waryubha na Kiristu, na bharitunga nawe kwa eribhaga rya emyaka ekiku kimwi.

Erisambwa rirasikibhwa

⁷Hanú emyaka ekiku kimwi giyo girihwa, Erisambwa ririhaatirwa okurwa mwigereja ryaryo. ⁸Mbe, hanú ririhaatirwa, ririija ringʼeene abhantu kumbaara gyonsego gya ekyaro, ginú girabhirikirwa Gogu na Magogu. Erisambwa riribhakumanʼya bharwane eriihe, bhonse bharibha abhaaru kya omusenyi gwa kumurambo gwa enyanja. ⁹Bhonse bharigenda mbaara gyonsego gya ekyaro na okwinaara omugi gunú Waryubha ahanjiri, gunú abhantu bhaaye bhareekara-mo. Nawe, hanú bharikora ego, omururo guriituuma okurwa murwire gubhasikye. ¹⁰Na Erisambwa rinú ryabhangʼeena, riryeswa munyanja ya omururo omuhaari. Muyo mmo ogutyenyi ogunene gurya na omurooti wa obhubheehi urya bheeswa. Bhonse bharinyankibhwa eyo obhutiku na omubhasu, koko na koko.

Obhubhuturi bhwa ekiina bhwa obhuteero

¹¹Kimwi, nkarora Waryubha yeekeeri kukitumbi ekirabhu ekikuru kya ekikama. Orwire na ekyaro bhikabhura embere yaaye na bhitaamaahikana kweki. ¹²Nkarora abhaku bhonsego, abhakuru na abhake, bheemiriiri embere ya ekitumbi kya ekikama kirya. Nho, ebhitabho bhinú bhyangʼoorwa-mo amakorwa ga abhantu bhonsego bhikakundukurwa. Na kikakundukurwa ekitabho ekindi, na kiyo kyaringa ekitabho kya obhuhoru bhwa koko. Abhaku bhayo bhakabhuturirwa ekiina, okurekana na amakorwa gaabho ganú gaangʼoorwa mubhitabho muyo. ¹³Enyanja ekaruusya abhaku bhanú bhaaringa-mo. Oruku na ekyaro kya abhaku bhyonse, bhikaruusya abhaku bhanú bhaaringa muyo. Kira oumwi akabhuturirwa ekiina okurekana na amakorwa gaaye. ¹⁴Hanú gayo gaahwa, oruku na ekyaro kya abhaku bhikeeswa munyanja ya omururo. Enyanja ya omururo iyo ngʼyo oruku rwa kabhiri. ¹⁵Na omuntu wowonse unú eriina ryaye ritaangʼoorwa mukitabho kya obhuhoru bhwa koko, yeeswa munyanja ya omururo.

Orwire oruhya na ekyaro ekihya

¹Kimwi, nkarora orwire oruhya na ekyaro ekihya, kwa okubha orwire rwa mbere na ekyaro kya mbere bhyaringa bhiruusiibhwe-ho, na enyanja yonse etaaringa-ho kweki. ²Kimwi nkarora omugi omurabhu gurya, Yerusaremu enhya, gureetuuma okurwa murwire ku Waryubha. Omugi guyo gwaringa guseemiibhwe kya omwenga unú agooderwe okugya kumusaaja waaye. ³Nkeegwa eriisi erinene okurwa kukitumbi kya ekikama, riragamba ega, “Maaha! Emenyo ya Waryubha n-hamwi na abhantu, arimenya hamwi na abhantu. Bhonse bharibha abhantu bhaaye, weeki aribha Waryubha waabho. ⁴Weeki aribheehya ameesori gonsego mumeeso gaabho. Kora oruku rutaribha-ho kweki, kora okufumba kora ekiriro kora obhururu. Bhitaribha-ho kweki, kwa okubha amangʼana ga akare gayo gamariri okuhita.”

⁵Na unú yaaringa yeekeeri kukitumbi kya ekikama kirya, akagamba ega, “Maaha! Ndagakora gonsego okubha amahya!” Akankeerya ega, “Ngʼoora ega, amangʼana gayo, n-ga obhuheene na aga heene.” ⁶Akankeerya kweki ega, “Gakuneeni! Oni nooni Arifa na Omega, Obhusimuka na Obhuteero. Kira omuntu unú yaana enyonta, ndimuhaana amanji ga bhusa, okurwa mukisekaani kya amanji ganú garahaana abhantu obhuhoru bhwa koko. ⁷Omuntu unú arihiga, ndimuhaana gayo gonsego. Oni ndibha Waryubha waaye, na weeki aribha omwana waani. ⁸Nawe, abhantu abhoobha, bhanú bhatakumwikirirya Waryubha, bhanú bharamujimya Waryubha, abheeti, abhasimbe, abhaturutumbi, bhanú bharasyengera ebhisusano, na abhabheehi, bhayo bhonsego bharyeswa munyanja ya omururo omuhaari. Na enyanja ya omururo omuhaari iyo, ngʼyo oruku rwa kabhiri.”

Yerusaremu enhya

⁹Kimwi, maraika oumwi gati ya bhamaraika muhungati bharya, bhaaringa na amabhakuri muhungati ga egingʼanga muhungati gya obhuteero, akaaja akankeerya ega, “Njo enu, nkoorokye omwenga, omukari wa Omwana wa Eringʼondi.” ¹⁰Nho, Omutima Omurabhu akanyituumira, maraika akanhira eguru ya enkuku enene entambi bhukongʼu. Akanyorokya omugi omurabhu gwa Yerusaremu gureetuuma okurwa murwire ku Waryubha. ¹¹Omugi guyo, gwaringa guuna obhukuru bhwa Waryubha, gwaringa gurangʼesangʼesa kya erigina rya obhwera obhunene, erya erangi enjomu enkangaaru, eringʼaru kya ekirore. ¹²Gwaringa na erikindaasi erinene na eritambi. Erikindaasi riyo, ryaringa na ebhiseku ekumi na bhibhiri. Kira ekiseku kyaangararirwanga na maraika, kweki kira ekiseku kyaringa kingʼoorerwe-ko eriina rya erikabhira rimwi, gati ya amakabhira ekumi na gabhiri ga Isiraeri. ¹³Kira orubhaara rwaringa na ebhiseku ebhisatu, bhuturira-ryubha, bhusikirira-ryubha, goosi na taragweta. ¹⁴Erikindaasi rya omugi guyo, ryaringa rihagaajirwe eguru ya amagina ekumi na gabhiri ga obhurusa. Na kira erigina ryaringa ringʼoorerwe-ko eriina rya oumwi wa abhatumwa ekumi na bhabhiri bha Omwana wa Eringʼondi.

¹⁵Mbe, maraika unú yaaringa arahaira na oni, yaaringa na engʼimbo ya ejahaabhu ya okurengera. Yaaringa nayo, naho arengere omugi guyo, ebhiseku bhyago na erikindaasi ryago. ¹⁶Mbe, akarenga omugi kwa engʼimbo ya ejahaabhu irya, obhutambi na obhugari bhyaringa bhiringʼeeni. Akanyoora egikirometa ebhiku bhibhiri na magana gane (2,400).21:16 Egikirometa ebhiku bhibhiri na magana gane (2,400). Kwa endengo ya Ekiyunani m-biku ekumi na bhibhiri. Enamba ya ekumi na ebhiri yaaringa eroorokya okukunaana. ¹⁷Akarenga obhugari bhwa erikindaasi riyo, bhonse bhukabha endengo egana rimwi mirongo ena na ena (144),21:17 Endengo egana rimwi mirongo ena na ena (144). Endengo iyo eraringʼaana na etuugati rya erikubha rimwi. kwa endengo ya abhantu inú maraika yaatumira.

¹⁸Erikindaasi ryaringa rihagaajirwe kwa amagina ga obhwera obhunene aga erangi enjomu enkangaaru. Omugi gonsego gwaringa guhagaajirwe kwa egijahaabhu eginjomu ginú gyaringa girangʼesangʼesa kya ekirore. ¹⁹Obhurusa bhwa erikindaasi rya omugi guyo, bhwaringa bhugooderwe kwa amagina ga obhwera obhunene ga amanga amaaru. Erigina rya okwamba ryaringa yasipi, erya kabhiri ryaringa yakuti obhururu, erya kasatu ryaringa karikedoni, erya kane ryaringa jumaridi, ²⁰erya kataanu ryaringa saridoniki, erya kasansabha ryaringa akiki, erya muhungati ryaringa kirisorito, erya munaane ryaringa jabharajadi, erya kenda ryaringa yakuti erya mayaayi, erya ekumi ryaringa kirisopiraso, erya ekumi na rimwi ryaringa hiakinito na erya ekumi na ebhiri ryaringa ametisito. ²¹Ebhiseku ekumi na bhibhiri bhyonsego bhyaringa bhikorerwe kwa egiruru. Kira ekiseku kyaringa kikorerwe kwa eruru eimwi ego. Eribharabhara erinene rya omugi guyo, ryaringa rihagaajirwe kwa egijahaabhu eginjomu, ginú gyaringa girangʼesangʼesa kya ekirore.

²²Oni ntaarora erisyengerero erikuru rya Waryubha mumugi muyo, kwa okubha Omukuru Waryubha wa obhuturo bhonsego, hamwi na Omwana wa Eringʼondi mbo erisyengerero erikuru rya omugi guyo. ²³Omugi guyo, gutakwenda obhurabhu bhwa eryubha kasi omweri, kwa okubha obhukuru bhwa Waryubha bhuragumirikira, na Omwana wa Eringʼondi ngʼo ekorobhoi yaago. ²⁴Abhantu bha ebhyaro bhyonsego bharimenya mubhurabhu bhwa omugi guyo, na abhakama bha ekyaro bharisoha-mo okuhira ebhintu bhyabho bhya obhwera. ²⁵Ebhiseku bhya omugi guyo, bhitarisiikwa koko, kwa okubha obhutiku bhutaribha-mo. ²⁶Abhantu bha ebhyaro bhyonsego, bharireeta-mo obhuniibhi bhwabho na ebhintu bhyabho bhya obhwera. ²⁷Na kitarisoha-mo ekintu kyokyonse ekikonu, kora omuntu wowonse unú arakora amangʼana ga okujimya kasi ga obhubheehi. Nawe, abhantu bhanú bharisoha-mo, m-banú amariina gaabho gangʼoorerwe mukitabho kya obhuhoru bhwa koko, ekya Omwana wa Eringʼondi.

Oruuji rwa amanji ga obhuhoru

¹Kimwi maraika akanyorokya oruuji rwa amanji ganú garahaana abhantu obhuhoru bhwa koko. Oruuji ruyo rwaringa rurangʼesangʼesa kya ekirore, na rwaringa ruragera okurwa kukitumbi kya ekikama ekya Waryubha na Omwana wa Eringʼondi. ²Oruuji ruyo rwaringa ruragera gatigati ya eribharabhara erinene rya omugi guyo. Haaringa-ho na omuti gunú gurahaana abhantu obhuhoru bhwa koko gunú gwaringa mbaara gyonsego gya oruuji. Omuti guyo gwamanga emisumo mara ekumi na ebhiri kumwaka, okuringʼaana na emyeri. Amasya ga omuti guyo ni-dyogo rya okuhwenʼya ebhyaro.

³Omugi guyo, gutaribha-mo na ekintu kyokyonse kinú kiihiimirwe na Waryubha. Ekitumbi kya ekikama kirya ekya Waryubha na Omwana wa Eringʼondi kiribha mumugi muyo, na abhagaya bha Waryubha, bharimusyengera. ⁴Bharimurora obhusu bhwaye, na eriina ryaye riringʼoorwa kubhisyusu bhyabho. ⁵Omugi guyo, gutaribha na obhutiku kweki, kora abhantu bhataryenda ekorobhoi kora obhurabhu bhwa eryubha, kwa okubha Omukuru Waryubha aribha obhurabhu bhwabho. Abhantu bhayo bharitunga koko na koko.

Okuuja kwa Yeesu

⁶Kimwi maraika uyo akankeerya ega, “Amangʼana ganu n-ga obhuheene na aga heene. Omukuru Waryubha unú arabhahaana abharooti Omutima waaye, wonse yaatuma maraika waaye okoorokya abhagaya bhaaye amangʼana ganú gareenderwa geebhuke bhwangu hanu.”

⁷Yeesu aragamba ega, “Maaha! Ndaaja bhwangu. Waryubha aribhanonka bhanú bharagwata amangʼana ga obhurooti bhwa ekitabho kinu.”

⁸Oni Yoana nooni naarora na okwigwa amangʼana gayo omwene. Na hanú naamara okugarora na okugeegwa, nkagwa bhwibhumbike mumaguru gaaye, naho mmusyengere maraika unú yanyorokerye amangʼana gayo. ⁹Nawe, akankeerya ega, “Tiga! Oni nonse m-mukori wa emirimu omurikyaho. N-kya abhahiiri bhaaho abharooti, na abhandi bhonsego bhanú bharagwata amangʼana ga ekitabho kinu. Mbe, omusyengere Waryubha omwenego!”

¹⁰Kimwi maraika uyo akankeerya ega, “Otagakora kya ekinyerera amangʼana ga obhurooti bhwa ekitabho kinu, kwa okubha eribhaga rya okukunaanibhwa kwa amangʼana gayo riringi haangʼi. ¹¹Mbe, omuntu unú arakora amabhiibhi, agendererye okukora amabhiibhi, na unú arakora obhunyanku, agendererye okukora obhunyanku. Omuntu unú arakora obhuheene, agendererye okukora obhuheene, na omurabhu wa omutima, agendererye okubha omurabhu wa omutima.”

¹²Yeesu aragamba ega, “Maaha! Ndaaja bhwangu. Ndaaja mmurihe kira omuntu okuringʼaana na amakorwa gaaye. ¹³Oni nooni Arifa na Omega, owa mbere na owa obhuteero, Obhusimuka na Obhuteero.”

¹⁴Bharinonkwa abhantu bhanú bharafura eginkanju gyabho mumanyinga ga Omwana wa Eringʼondi,22:14 Maaha mukitabho kya Obhukundukuri 7:14. naho bhanyoore omweya gwa okusoha mumugi omuhya guyo, okuhitira ebhiseku bhyago na okurya emisumo gya omuti gunú gurahaana abhantu obhuhoru bhwa koko. ¹⁵Nawe, abhaturutumbi, abhasimbe, abheeti, bhanú bharasyengera ebhisusano na abhandi bhonsego bhanú bharahanja okugamba obhubheehi, bharibha kibhara ya omugi guyo kya egimbwa.

¹⁶“Oni Yeesu, nooni omwibhurwa omukuru kurwibhuro rwa omukama Daudi,22:16 Daudi. Maaha eringʼana rinu mu Moonjooro eguru ya Amangʼana Amakongʼu. na nooni ndangʼarabha kya enjota nyamananga. Oni nooni naatuma maraika waani yaaje abhakeerye bheenyu abheehigira bhaani amangʼana gonsego gayo kurusumo rwa amakanisa.”

¹⁷Omutima wa Waryubha na omwenga wa Omwana wa Eringʼondi bharamubhirikira Omukuru Yeesu ega, “Nuuje!” Na abhantu bhonsego bhanú bhariigwa amangʼana ga ekitabho kiyo bhagambe ega, “Nuuje!” Wowonse unú yaana enyonta, na unú areenda amanji, yaaje anywe bhusa amanji ga obhuhoru bhwa koko.

Amangʼana ga obhuteero

¹⁸Mbe, omuntu wowonse unú areegwa amangʼana ga obhurooti ganú garingi mukitabho kinu, ndamukemera ega, omuntu wowonse akoongerya-mo amangʼana, Waryubha wonse arimoongerya egingʼanga ginú gyagambwa mukitabho kinu. ¹⁹Omuntu wowonse akaaruusya-ho eringʼana ryoryonse okurwa mumangʼana ga obhurooti bhwa ekitabho kinu, Waryubha wonse arimuruusirya-ho omweya gwaye gwa okurya emisumo gya omuti gunú gurahaana abhantu obhuhoru bhwa koko, na omweya gwaye gwa okwikara mumugi omurabhu, ganú garagambwa mukitabho kinu.

²⁰Na unú araruusya obhwimiririri eguru ya amangʼana ganu, aragamba ega, “Maheene, ndaaja bhwangu.”

Amina. Njo Omukuru Yeesu!

²¹Eriruguto rya Omukuru Yeesu ribhe hamwi na bheenyu bhonsego. Amina.