Abhafiripi

Enyarubha ya Pauro ku

Abhafiripi

Obhukangati

Enyarubha inu yaangʼoorwa na Pauro, omugaya wa Kiristu Yeesu (1:1). Yaangʼoorera erikanisa rinú ryaringa mumugi gwa Firipi. Eramaahikana ega, Pauro yaangʼoora enyarubha inu, kumwaka gwa mirongo etaanu na etaanu (55) okurwa okwibhurwa kwa Yeesu Kiristu, eribhaga rinú yaaringa mukibhohe mumugi gwa Ruumi. Pauro yaabhangʼoorera Abhakiristu bhanú bhaamba okumwikirirya Yeesu Kiristu, kwibhaga rinú weeki yaaringa abhahikiiri na okubharaarikira Amangʼana Amajomu. Abhakiristu bhayo, mbo bhaamara bhakoorokya obhuhanje ku Pauro na okumubheera ganú yeendanga.

Ekisigo kya Pauro okubhangʼoorera enyarubha inu, kyaringa okubhakumya Abhafiripi kwa obhubheeri bhunú bhaamuruusirya okuhitira ku Epafurodito. Kweki yeendanga okubharagirirya amangʼana ga okukora na okubhahaana eginguru, naho bhabhenga bharagwata ekirengyo kya Yeesu Kiristu kwa okwigumirirya. Eringʼana erindi rinú yeendanga okubhakeerya, nkubhakaanʼya bhateekirirya ameehigiryo amabhiibhi ga Abhayahudi ganú gaabhakoranga bharaahukana na abheekirirya abharikyabho mwikanisa ryabho.

Enyarubha inu emanyikeeni ega, enyarubha ya obhujomerwa kwa okubha munsi waayo, amangʼana eguru ya obhujomerwa gareehindira mara kaaru. Obhujomerwa bhuyo, bhumanyikeeni kubheekirirya bha Yeesu Kiristu.

Pauro arakeeranʼya Abhafiripi

¹Enyarubha inu, erwiri kuoni Pauro, ndingi hamwi na Timoteo, omugaya omurikyani ku Kiristu Yeesu. Turabhangʼoorera bheenyu abheemiririri na abhabheeri bha erikanisa, na bheenyu abhantu bhonsego bha Waryubha bhanú mwagwatana na Kiristu Yeesu, Firipi eyo.

²Turabheendera eriruguto na omurembe okurwa ku Taata Waryubha na ku Mukuru Yeesu Kiristu, bhibhe hamwi na bheenyu.

Pauro arabhasabhira Abhafiripi

³Kira hanú ndabhahiituka bheenyu, ndamukumya Waryubha waani. ⁴Na kira hanú ndabhasabhira, ndabhasabhira bheenyu bhonsego kwa obhujomerwa, ⁵kwa okubha bheenyu mwagwatana na oni kubhuraariki bhwa Amangʼana Amajomu, okurwa orusiku runú mwageegwa na okugeekirirya okuhikira reero. ⁶Niina obhuheene ega, Waryubha unú yaamba emirimu emijomu mumitima gyenyu, arigigendererya okuhikira gikunaane kurusiku runú Kiristu Yeesu arihunjuka.

⁷M-bujomu niganirirye ego eguru yeenyu bhonsego, kwa okubha mbahanjiri bhukongʼu. Murasanga eriruguto rya Waryubha hamwi na oni, hanú ndingi mukibhohe na hanú neebhagiriranga na okukomererya Amangʼana Amajomu kubhurabhu. ⁸Waryubha amanyiri ega, ndagamba obhuheene hanú ndakomererya ega, ndeegomba bhukongʼu okubhamaaha bhonsego kweki. Mbahanjiri bheenyu kwa obhuhanje bhuryabhurya kya ego Kiristu Yeesu abhahanjiri bheenyu.

⁹Amasabho gaani ku Waryubha niiga, obhuhanje bhwenyu bhugendererye okwaruha bhukongʼu, mubhe na obhumanyi na obhungʼeeni bhonsego, ¹⁰naho muture okusora amajomu kwa egintungwa. Hayo nho muribha abha emitima gya heene, kweki muribha mutaana amasoro okuhikira orusiku runú Kiristu arihunjuka. ¹¹Obhwikari bhwenyu, bhuriijura amangʼana ga obhuheene ganú garatuuka kwa enjira ya okumwikirirya Yeesu Kiristu, naho gamutogoonʼye na okumugungya Waryubha.

Okwikara n-kumukorera emirimu Kiristu

¹²Mbe, abhahiiri bhaani kuimani, ndeenda mumanye ega, gonsego ganú gannyooreri, gambeereri bhukongʼu okunyaraganʼya Amangʼana Amajomu. ¹³Okurekana na gayo, emanyikeeni kubharindi bhonsego bha enyumba ya ekikama, na kubhandi bhonsego abha hanu ega, mboherwe kwa okubha ndamukorera emirimu Kiristu. ¹⁴Hamwi na gayo, mmanyiri ega, okubhohwa kwani kunu, kukoreri abheekirirya abharikyetu abhaaru, bhanagiri ku Mukuru Yeesu kurusumo rwa okuraarika eringʼana rya Waryubha kwa ekituunyo na obhuteremu bhukongʼu.

¹⁵M-buheene ega, bhariho abhandi bhanú bhararaarika amangʼana eguru ya Kiristu kwa orwango na kwa obhutindi. Nawe, abhandi bharagaraarika kwa omutima omujomu. ¹⁶Bhanu bharakora ego kwa obhuhanje, bhamanyiri bhujomu ega, nteerwe mukibhohe, naho nibhagirire Amangʼana Amajomu. ¹⁷Nawe, bharya abha obhutindi, bhararaarika amangʼana eguru ya Kiristu kwa orwango, kora etaringi kwa omutima gwa heene. Bhareenda okoongerya enyanko yaani mukibhohe.

¹⁸Nawe bhoono, ntatuniibhwe na gayo. Ebhe kwa omutima omubhiibhi kasi kwa omutima gwa heene, amangʼana eguru ya Kiristu gararaarikwa. Na oni ndajomerwa kwa ekisigo kya eringʼana riyo. Kweki ndigendererya okubha na obhujomerwa. ¹⁹Kinú mmanyiri niiga, ndituuribhwa okurwa kugonsego ganú ganyooreri, kwa okubha muransabhira ku Waryubha, kweki Omutima Omurabhu1:19 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. wa Yeesu Kiristu arambeera. ²⁰Ndaganyirira kwa enamba enene na kwa obhwisige ega, ntarisuukibhwa kwa enjira yoyonse irya. Nawe, kora bhoono ndagendererya okwikongʼererya kya ego ndakora eginsiku gyonsego, naho Kiristu agungibhwe kugonsego ganú ndakora, ebhe ntame omuhoru kasi nkwe.

²¹Ndagamba ego, kwa okubha oni ndaatame omuhoru, obhuhoru bhwani bhuribha obhwa okumukorera emirimu Kiristu. Kweki nkaakwa, okukwa kwani kuribha kwa obhwera obhunene, kwa okubha ndibha omuhoru hamwi na Kiristu. ²²Nawe, ndaagendererye okutama mukyaro, ndagendererya okurora emisumo gya emirimu ginú ndakora. Bhoono ntamanyiri nsore riiha! ²³Ndarutwa na amangʼana gabhiri. Ndeenda okurwa mukyaro hanu, ngye nikare hamwi na Kiristu, kwa okubha riyo ndyo eringʼana erijomu bhukongʼu kuoni. ²⁴Nawe kweki, ereenderwa bhukongʼu, oni ngendererye okwikara mukyaro kurusumo rwenyu. ²⁵Maheene niina obhuheene bhwa eringʼana riyo, kwa ego mmanyiri ega, ndigendererya okutama mukyaro. Kweki ndibha hamwi na bheenyu bhonsego, naho mbabheere munage na okujomerwa kuimani yeenyu. ²⁶Hanú ndibha hamwi na bheenyu, murijomerwa bhukongʼu kurusumo rwa Kiristu Yeesu, kwa okubha aribha yambeereri nhunjuke kubheenyu.

²⁷Mbe, eginteemo gyenyu giringʼaane na Amangʼana Amajomu eguru ya Kiristu. Nyoore ndiija okubharora kasi ntariija, niigwe ega, muragendererya okunaga na okubha na obhumwi, enu muranyankira kwa omutima gumwi, eimani inú erarekana na Amangʼana Amajomu. ²⁸Kweki niigwenga ega, mutakoobhoha abhasigu bheenyu kora hake. Okukora ego, kuribhoorokya ega, bheeki bharisikibhwa, nawe bheenyu, murituuribhwa. Gayo gonsego m-mirimu gya Waryubha. ²⁹Ndagamba ego, kwa okubha mutaahaanwa eriruguto rya okumwikirirya Kiristu okwenego, nawe mwahaanwa kora eriruguto rya okunyankibhwa kurusumo rwaye. ³⁰Murarwana eriihe riryarirya naarwana, kya ego mwarora. Kweki kora bhoono mureegwa ega, ndagendererya okurirwana.

Okwisuuhya kya Yeesu Kiristu

¹Okugwatana kwenyu na Kiristu, kurabhateremya emitima? Na obhuhanje bhwaye bhurabhahorisya? Muuna obhumwi na Omutima Omurabhu? Kweki, muhanjirwe na okumaahirwa ekyabhira na Kiristu? ²Mbe, mukunaanʼye obhujomerwa bhwani kwa okubha na ensonga eimwi na muhanjane bheenyu abheene kwa abheene. Kweki mubhe na obhumwi mumitima gyenyu na mubhe na ameetegeerero gamwi. ³Mutakora eringʼana ryoryonse kwa omutima gwa orwango kora kwa ameeheemo. Nawe, mwisuuhye na mubhare abhandi okubha abha obhwera bhukongʼu okukira bheenyu abheene. ⁴Kira omuntu ateeganirirya amangʼana gaaye omwenego, nawe yeeganirirye amangʼana ga abhandi gonse.

⁵Ensonga yeenyu ebhe iryairya yaaringa nayo Kiristu Yeesu.

⁶Onyoora weeki yaaringa kya ego Waryubha aringi,

ataarora m-bujomu atame agwatiriri riyo.

⁷Nawe yaatiga riyo,

akeesuuhya, akabha kya omugaya,

akeebhurwa atuubheeni na abhantu.

⁸Wonse hanú yaaringa atuubheeni na abhantu,

yeesuuhya,

akabha omwigwa ku Waryubha,

akeekirirya okukwa,

kora okukwa kumusarabha!

⁹Kwa ego, Waryubha akamwinura Yeesu eguru bhukongʼu, okukira ebhintu bhyonsego,

akamuhaana eriina erikuru okukira amariina gonsego,

¹⁰naho kwa obhusuuku bhwa eriina rya Yeesu,

ebhibhumbwa bhyonsego bhimutemere ebhiru,

ebhya murwire,

ebhya mukyaro kinu,

na ebhya mukyaro kya abhaku.

¹¹Kweki kira omuntu yeekirirye ega, Yeesu Kiristu m-Mukuru,

na kwa okukora ego, Waryubha Taata agungibhwe.

Abheekirirya bhabhe kya endingaasi mukyaro

¹²Mbe, abhahanje bhaani, eribhaga naaringa kubheenyu, mwaringa muramwigwa Waryubha eginsiku gyonsego. Egoego, kora bhoono eribhaga ndingi ahare na bheenyu, mutatiga okukora ganú gareenderwa kubhantu bhanú bhaatuuribhwa na Waryubha. Mukore gayo kwa okurigita kunú kurarekana na okumoobhoha Waryubha. ¹³Mbe, mukore ego, kwa okubha Waryubha ngʼo arakora emirimu munsi weenyu, naho muhanje na okukora amangʼana ganú ahanjiri gakoreke.

¹⁴Amangʼana gonsego ganú murakora, mugakore bira okwingʼeheerya kora okuhakaananʼya. ¹⁵Kwa ego, mubhe abhaana bha Waryubha bhanú bhataana amasoro, kweki bhataana obhubhiibhi. Kweki mubhe abhantu bhanú bhatakugambwa obhubhiibhi gatigati ya abhantu bha bhoonwego, bhanú bheejwiri obhubhiibhi bhukongʼu. Gatigati ya abhantu bhayo, bheenyu mumaahikane kya endingaasi inú eramirika mukyaro. ¹⁶Kweki mubharaarikire abhantu bheekirirye eringʼana rya Waryubha rinú rirabhahaana obhuhoru bhwa koko. Mukore ego, naho niheeme kurusiku runú Kiristu arihunjuka, kwa okubha emirimu ginú naakora kwa ekituunyo gatigati yeenyu, gitaaringa gya bhusa.

¹⁷Kora nyoore amanyinga gaani, gareetirwe kya ekimwenso,2:17a Ekimwenso. Maaha eringʼana rinu mu Moonjooro eguru ya Amangʼana Amakongʼu. hamwi na eimani yeenyu inú eraruusibhwa ekimwenso embere ya Waryubha,2:17b Maaha mukitabho kya Okuhuruka 29:38-41. oni ndajomerwa. Ndajomerwa hamwi na bheenyu bhonsego. ¹⁸Na bheenyu egoego mujomerwe, kweki mujomerwe hamwi na oni.

Okutumwa kwa Timoteo na Epafurodito

¹⁹Ndeesiga ega, Omukuru Yeesu akaahanja, ndamutuma Timoteo bhwangu hanu, yaaje kubheenyu, naho hanú arihunjuka enu, oni nonse nhorisibhwe eribhaga ndiigwa kya ego muragendererya. ²⁰Ndamutuma, kwa okubha ntaana omuntu oundi, unú maheene abhamanyiri kya Timoteo. ²¹Abhandi bhonsego bharanyankira amangʼana gaabho abheene, bhatakunyankira ganú Yeesu Kiristu areenda. ²²Nawe, mumanyiri kya ego Timoteo yeeyorokerye ega, m-mujomu. Akoreri emirimu gya okuraarika Amangʼana Amajomu hamwi na oni, kya omwana na esewaabho. ²³Kwa ego, ndeesiga okumutuma kubheenyu bhwangu, hanú ndimanya kya ego amangʼana gaani garigendererya hanu. ²⁴Kweki niina obhuheene ega, Omukuru Yeesu araambeere oni nonse, ndaaja eyo bhwangu hanu.

²⁵Nawe, bhoono nduuji ega, m-bujomu mmutume kubheenyu omwikirirya omurikyani Epafurodito, unú arakora emirimu gya Waryubha hamwi na oni. Weeki m-musirikare omurikyani kumirimu gya Waryubha. Kweki ngʼo mwatuma, naho yaaje okumbeera amangʼana ganú ndasuuhirwa. ²⁶Ndamutuma kwa okubha areegomba okumaahana na bheenyu bhonsego, na arasurumbara kwa okubha mweegwa ega, yaaringa omurweri. ²⁷Maheene yaaringa asingiri. Nawe, Waryubha yaamurorera ekyabhira akamuhwenʼya. Waryubha ataamurorera ekyabhira weeki omwenego, oni nonse yaandorera ekyabhira, naho ntasurumbara bhukongʼu, okukira kya ego ndasurumbara bhoonwego.

²⁸Kwa ego, ndakora ekituunyo bhukongʼu okumutuma yaaje kubheenyu, naho hanú murimurora kweki, mujomerwe, oni nonse omutima gwani gusimbiire. ²⁹Mbe bhoono, mumuturuungʼane kwa obhujomerwa obhunene, omuhiiri weenyu uyo ku Mukuru Yeesu. Mubharenga abhantu kya uyo, ega, m-bantu bha okusuukwa, ³⁰kwa okubha yaaringa haangʼi okukwa, kurusumo rwa emirimu gya Kiristu. Yaaringa ateeri obhuhoru bhwaye mungʼanga, naho amare ganú bheenyu mwatamwa okunkorera kwa okubha ndingi hare na bheenyu.

Pauro aramwisigira Kiristu omwenego

¹Mbe, abhahiiri bhaani kuimani, mujomerwe kwa okubha muringi abhantu bha Omukuru Yeesu. Oni ntakurosa okuhindira okubhangʼoorera amangʼana ganú naamara okubhangʼoorera, kwa okubha amangʼana gayo ni-ngubha yeenyu kuimani.

²Mwiyangararire na abheehigirya bhanú bharasohya amaragiriryo ga Ekiyahudi mwikanisa. Abheehigirya bhayo, n-kya eginsuuji, m-bakori bha amabhiibhi, bharakomererya okusaarwa. ³Bheetu mbo tuuna ensaaro ya maheene. Ensaaro ya maheene n-kubha abhantu bha Waryubha. Turabha ego, kwa okubha Omutima Omurabhu aratubheera okumusyengera Waryubha. Bheetu tureeheema na okwisigira Kiristu Yeesu, tutakwisigira amakorwa ga emibhiri gyetu, okunyoora obhutuurya, ⁴onyoora oni omwene niina ekisigo kya okwisigira amakorwa ga omubhiri. Nyoore ariho omuntu unú areerora ega, yaana ekisigo kya okwisigira amakorwa ga omubhiri, oni niina ekisigo ekinene bhukongʼu. ⁵Naasaarwa orusiku rwa munaane okurwa okwibhurwa, ndarwira mwikabhira rya Bhenjamini, mukyaro kya Isiraeri. Oni ndingi Omwibhurania eritinya. Eguru ya okugwata amaragiriryo ga Musa, oni naagagwata bhwaheene, kwa okubha naaringa Omufarisaayo.3:5 Omufarisaayo. Abhafarisaayo bhaaringa m-muganda gwa abhatungi bha edini ya Abhayahudi. Bhaaringa bharagwata bhukongʼu amaragiriryo ga Waryubha. Maaha Abhafarisaayo mu Moonjooro eguru ya Amangʼana Amakongʼu.⁶Ekituunyo kya okugwata amaragiriryo gayo, kyakora naanyankyanga erikanisa. Eguru ya obhuheene bhunú bhurarekana na okugwata amaragiriryo, ntaaringa na amasoro gogonse.

⁷Nawe bhoono, amangʼana gayo naaroranga ega, gaana obhwera, ndagarora ega, gataana obhwera kwa okubha ngwateeni na Kiristu. ⁸Na kora gataringi gayo ageenego, nawe ndabhara amangʼana gonsego ega, gataana obhwera, okuringʼaanʼya na obhwera obhunene bhwa okumumanya Kiristu Yeesu, Omukuru waani. Naatigiri agandi gonsego kurusumo rwaye. Ndagabhara ega, n-kya amabhi, naho mbe omuntu wa Kiristu, ⁹kweki ngwatane nawe. Ntakwisigira kweki obhuheene bhunú bhurarekana na okugwata amaragiriryo, nawe obhuheene bhunú bhurarekana na okumwikirirya Kiristu omwenego. Obhuheene bhuyo, bhuraruusibhwa na Waryubha kubhanú bharamwikirirya Kiristu.

¹⁰Ndeenda mmumanye bhukongʼu Kiristu, na eginguru ginú Kiristu yaaringa nagyo eribhaga rya okuhyuka kwaye. Ndeenda nnyanke kya ego weeki yaanyanka, kora okuhikira okukwa, ¹¹naho kwa enjira yoyonse irya, ndiija okuhyukibhwa okurwa mubhaku.

Okwigumirirya okuhikira kubhuteero bhwa emirimu

¹²Oni ntakugamba ega, mmariri okuhika kubhuteero, kasi ega, mmariri okukunaana, tiigo-ha, nawe ndagendererya okwigumirirya naho nnyoore, ganú Kiristu Yeesu yaambirikirira. ¹³Abhahiiri bhaani kuimani, ntakwibhara ega, naamara okugagwata. Nawe, ndakora eringʼana rimwi ego, ndarabhirwa gonsego ganú gaamara okuhita, ndeehemeerererya ganú garingi embere. ¹⁴Ndeegumirirya kurugendo, nhike kubhuteero naho nnyoore omutuho. Omutuho guyo, n-kubhirikirwa na Waryubha okusoha murwire kwa okuhitira ku Kiristu Yeesu.

¹⁵Kwa ego, bheetu bhonsego bhanú tunagiri kuimani, tureenderwa okwikiriranʼya kumangʼana gayo. Na nyoore mureeganiriryenga obhundi, Waryubha aribhatubhurira mumanye kya ego garingi. ¹⁶Ekintu kinú kireenderwa niiga, tugendererye okugwata ganú Waryubha yaamara okutoorokya.

Abheekirirya bhagwate enteemo ya Pauro

¹⁷Abhahiiri bhaani kuimani, mugwate enteemo yaani. Kweki mwihigire kubhantu bhanú bharagwata eginteemo gyetu. ¹⁸Naamara okubhakeerya mara kaaru, eguru ya eringʼana rinú ndeenda okubhakeerya, bhoono ndarigamba kweki, kora kwa ameesori, ega, abhantu abhaaru bhareekara kya abhasigu bha amangʼana ga obhutuurya bhwa Kiristu, bhunú bhuratuuka kwa okukwa kwaye kumusarabha. ¹⁹Abhantu bhayo, obhuteero bhwabho n-kusika kwa okubha orunamba rwabho ndo rwabheeri omutungi waabho. Bheeki bhareeheemera ebhikorwa bhyabho bhya eginsoni. Kweki bhareeganirirya amangʼana ga ekyaro ageenego.

²⁰Nawe bheetu, m-bamenyi bha murwire, na turaganyirira kwa enamba enene, Omutuurya na Omukuru Yeesu Kiristu, yaaje okurwa eyo. ²¹Weeki yaana eginguru gya okutuura ebhintu bhyonsego bhibhe insi ya obhutungi bhwaye. Kunjira ya eginguru giyo, arikyukya emibhiri gyetu gya obhunyooheeru, gibhe na obhukuru kya ego omubhiri gwaye guringi.

¹Kwa ego, abhahiiri bhaani abhahanje kuimani, munage okumwisigira Omukuru Yeesu. Mbahanjiri na ndeegomba okumaahana na bheenyu. Bheenyu m-bujomerwa bhwani kweki m-mutuho gwani gunú ngʼeerwe okurekana na emirimu ginú nkoreri.

Obhutongeri bhwa Pauro

²Ndabhakomererya bhukongʼu Euodia na Sintike bheekare hamwi kwa ensonga eimwi, kwa okubha bhonsego bharasoorana Omukuru Yeesu. ³Kora uuwe unú oringi omukori wa emirimu omurikyani omuheene, ndasabha obhabheere abhakari abhabhiri bhayo, bhabhe na ensonga eimwi. Abhabhiri bhayo bhonsego, bhaakora ekituunyo bhukongʼu hamwi na oni kukuraarika Amangʼana Amajomu kubhantu. Kweki abhakari bhayo, bhaaringa bharakora emirimu hamwi na Kirementi na abhakori bha emirimu abharikyani abhandi. Amariina ga abhantu bhayo bhonsego, garingi mukitabho kya obhuhoru bhwa koko ekya Waryubha.

⁴Mujomerwe eginsiku gyonsego kwa okubha muringi abhantu bha Omukuru Yeesu, kweki ndagamba ega, mujomerwe! ⁵Obhunyoohu bhwenyu bhumanyikane kubhantu bhonsego. Omukuru Yeesu aringi haangʼi. ⁶Muteenyankya kwa eringʼana ryoryonse, nawe kukira eringʼana, mubhenga murasabha na okumukumya Waryubha, naho ganú mureenda agamanye. ⁷Mbe, Waryubha aribhahaana omurembe okukira endengo ya obhumanyi. Omurembe guyo, guryangararira bhujomu emitima gyenyu na obhungʼeeni bhwenyu, kwa okubha bheenyu mwagwatana na Kiristu Yeesu.

⁸Mbe bhoono, abhahiiri bhaani kuimani, amangʼana gogonse aga maheene, amangʼana gogonse ganú gareenderwa okusuukwa, amangʼana gogonse ga obhuheene, amangʼana gogonse ganú gatareesanganʼya na obhusarya, amangʼana gogonse ganú garasambaarukya, amangʼana gogonse ganú garajomera, amangʼana gonsego amajomu, na amangʼana gonsego ganú garagungibhwa bhujomu, mugeeganiriryenga. ⁹Mugendererye okukora amangʼana ganú mweehigira na okugwata okurwa kuoni, ganú mweegwa na okurora ndakora. Muraakore gayo, nho Waryubha unú arabhahaana omurembe, arigendererya okubha hamwi na bheenyu.

Pauro arakumya Abhafiripi

¹⁰Mbe, njomeerwe bhukongʼu na okumukumya Omukuru Yeesu, kwa okubha bhoono mwambiri kweki okunganirya, kya ego mwaringa muranganirya, nawe, mukabha murabhura omweya gwa okumbeera. ¹¹Ntakugamba ego, kwa okubha ndeenda okunyoora ekintu, tiigo-ha. Oni nihigiiri okwikara kwa okwiswa na kinú niinakyo. ¹²Nihigiiri okwikara kitobhu, kweki nihigiiri okwikara kiniibhi. Nihigiiri okwikara okuringʼaana na amangʼana gogonse ganú garannyoora, ebhe n-kwibhaga rya ebhyakurya kasi n-kwibhaga rya enjara, ebhe n-kwibhaga rya okubha na ebhintu ebhyaru, kasi n-kwibhaga rya okusuuhirwa. ¹³Ndatura okukora gonsego gayo, kwa okubha Kiristu ngʼo arangʼaana eginguru.

¹⁴Kora ego, mwakora bhujomu hanú mwasanga na oni munyanko yaani. ¹⁵Bheenyu Abhafiripi, abheene mumanyiri ega, eribhaga rinú naamba okubharaarikira Amangʼana Amajomu, na eribhaga rinú naarwa mukyaro kya Makedonia, bheenyu abheenego, mbo mwaringa murambeera. Erikanisa ryenyu ndyo ryaringa na obhumwi na oni, kukuruusya na okunyoora ebhintu. ¹⁶Kora hanú naaringa mumugi gwa Tesaronike, mwandeeteranga ebhintu bhya okumbeera, na etaringi rumwigo. ¹⁷Ntakugamba ego, kwa okubha ndeenda okunyoora ebhintu okurwa kubheenyu, tiigo-ha. Nawe, kinú ndeenda niiga, Waryubha abhanonke okurekana na obhuserenʼya bhwenyu.

¹⁸Bhoono, ebhintu bhyonsego bhinú mwatuma Epafurodito yaandeetere, naabhinyooreri. Bhyakuneenʼye obhwendi bhwani bhonsego, kweki m-byaru okukira kya ego neendanga. Ebhintu bhiyo, n-kya ekimwenso kinú kirarangasira, esadaaka inú ereekiriribhwa na okumungʼarira Waryubha. ¹⁹Mbe, Waryubha waani, aribhahaana kira kinú mureenda okuringʼaana na obhuniibhi bhwaye obhukuru. Arikora ego, kwa enjira ya Kiristu Yeesu.

²⁰Waryubha, Taata weetu, agungibhwe koko na koko! Amina!

Okukeeranʼya kwa okuraga

²¹Munkeeranirye abhantu bha Waryubha bhonsego, bhanú bhaagwatana na Kiristu Yeesu. Abheekirirya bhanú bharingi hamwi na oni enu, bhonse bharabhakeeranʼya. ²²Kweki abhantu bha Waryubha bhonsego, ekinene bhanú bharingi owa Kaisari4:22 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. wa hanu, bhonse bharabhakeeranʼya.

²³Eriruguto rya Omukuru weetu Yeesu Kiristu ribhe hamwi na bheenyu bhonsego.