Firimoni

Enyarubha ya Pauro ku

Firimoni

Obhukangati

Enyarubha inu yaangʼoorwa na omutumwa Pauro, kumuntu unú yaabhirikirwanga Firimoni (1:1). Eramaahikana ega, Firimoni yaaringa areekara mumugi gwa Korosai (maaha mukitabho kya Abhakorosai 4:9). Yaaringa omuniibhi, kweki yaaringa na abhagaya, yaaringa Omukiristu, na munyumba yaaye mmo Abhakiristu bheekumanʼyanga. Pauro na Firimoni bhaaringa bhamanyeeni bhujomu.

Pauro yaangʼoora enyarubha inu, kwibhaga rinú yaaringa mwigereja, mumugi gwa Ruumi erya, omwaka gwa mirongo esansabha na ebhiri (62) okurwa okwibhurwa kwa Kiristu. Yaangʼoora enyarubha inu kurusumo rwa omugaya wa Firimoni umwi, unú yaabhirikirwanga Onesimo. Eramaahikana ega, omugaya uyo, yeebhisa okurwa owa Firimoni. Orusiku rumwi, akasikana na Pauro. Pauro akamwihigirya Amangʼana Amajomu eguru ya Yeesu Kiristu, Onesimo akeekirirya, kimwi akamwihunjurira Waryubha.

Kwibhaga riyo, omugaya unú yeebhisanga okurwa kumukuru waaye, hanú yaagwatwanga yaajibhibhwanga okukwa. Bhoono Pauro yaaringa aramutuma Onesimo kumukuru waaye Firimoni. Nho, Pauro akamuhaana Onesimo enyarubha amuhirire Firimoni. Munyarubha muyo, Pauro yaamwisasaama Firimoni amuserenʼye Onesimo kya omuntu waaye, kweki kya Omukiristu omurikyaye.

Pauro aramukeeranʼya Firimoni

¹Enyarubha inu, erwiri kuoni Pauro, omubhohwa kurusumo rwa okuraarika Amangʼana Amajomu eguru ya Kiristu Yeesu. Ndakungʼoorera uuwe Firimoni. Oni na omuhiiri weetu kuimani Timoteo, turakukeeranʼya uuwe omuhanje weetu, na omukori wa emirimu omurikyetu. ²Turamukeeranʼya na omuhara weetu kuimani Afia, na omusirikare omurikyetu Arikipo, hamwi na abheekirirya bhonsego bhanú oranyoora bhareekumanʼya iika owaaho.

³Turabheendera eriruguto na omurembe okurwa ku Taata Waryubha na ku Mukuru Yeesu Kiristu, bhibhe hamwi na bheenyu.

Omukumo na amasabho ga Pauro kurusumo rwa Firimoni

⁴Kira hanú ndakusabhira, ndamukumya Waryubha, ⁵kwa okubha ndeegwa ega, oragendererya okumwikirirya Omukuru Yeesu na okubhahanja abheekirirya bhonsego. ⁶Eimani yaaho yaakukoreri obhe na obhumwi na abheekirirya abhandi. Bhoono ndasabha ega, obhumwi bhuyo kuimani bhukubheere okumanya amajomu gonsego ganú tureenderwa okukora, kukugwatana kwetu na Yeesu Kiristu. ⁷Omuhiiri waani, obhuhanje bhwaho, bhungʼeeri obhujomerwa obhunene na okunteremya bhukongʼu, kwa okubha osambaarukirye emitima gya abheekirirya.

Pauro arasabha Firimoni amwabhire Onesimo

⁸Kwa ego, onyoora niina obhutungi okurwa ku Kiristu bhwa okukwamura rinú oreenderwa okukora, ntakukora ego. ⁹Nawe, kurusumo rwa obhuhanje, nduuji ega, m-bujomu nkusabhe, oni Pauro omugotu, kweki omubhohwa kurusumo rwa Kiristu Yeesu. ¹⁰Ndakusabha eringʼana rimwi, eguru ya Onesimo.1:10 Onesimo. Ensonga yaaye niiga, unú arakujomera. Weeki n-kya omwana waani, kwa okubha naamwibhura okumwikirirya Yeesu Kiristu, eribhaga ndingi mukibhohe. ¹¹Enyuma hayo, ataakujomeranga, nawe bhoono, arakujomera bhukongʼu, na oni nonse.

¹²Bhoono, ndamuhindya kuuwe, weeki unú nhanjiri kwa omutima gwani gonsego. ¹³Kweki, nkeenderi yeekare na oni, naho anyoore omweya gwa okumbeera emirimu ginú uuwe okaambeereri, eribhaga ndingi mukibhohe kurusumo rwa Amangʼana Amajomu. ¹⁴Nawe bhoono, nduuji ega, etaringi bhujomu okukora ryoryonse bira uuwe okwikirirya. Ntakwenda okukubhandirirya ega umbeere, nawe, ndeenda okore amajomu kwa okwenda kwaho omwene.

¹⁵Hamwi, Onesimo yaarwa owaaho kwa eribhaga ekego, naho obhe nawe kweki koko. ¹⁶Okwambira bhoono, weeki ataringi kya omugaya waaho, nawe, weeki yaana obhwera okukira omugaya. Weeki m-muhiiri weetu omuhanje kuimani. Ngʼ-waheene bhukongʼu kuoni, na kuuwe aribha owa heene bhukongʼu, kya omugaya wa iika kweki kya omuhiiri ku Mukuru Yeesu.

¹⁷Bhoono mbe, nyoore oraarore ega, oni niina obhumwi na uuwe, omuturuungʼane uyo kya ego okaanturuungʼeeni oni omwene. ¹⁸Na nyoore yaakuraarira ekintu kyokyonse, kasi oramutonga ekintu, untonge oni. ¹⁹Oni Pauro, nngʼooreri kwa okubhoko kwani omwene ega, ndikuriha. Ntakwenda okugamba ega, ndakutonga esiiri, kwa okubha uuwe waatunguribhwa okurekana na okuraarika kwani. ²⁰Bhoono omuhiiri waani, unyikiririrye eringʼana rinu, kurusumo rwa Omukuru Yeesu. Osambaarukye omutima gwani kya ego omuhiiri ku Kiristu akaakoreri.

²¹Ndakungʼoorera ganu, kwa okubha mmanyiri ega, oreekirirya. Kweki mmanyiri ega, orikora okukira ganú nkusabhiri.

²²Hamwi na gayo, unseemerye ahasi ha okwikara, kwa okubha ndeesiga ega, kwa amasabho geenyu, Waryubha arimbeera niije eyo.

Okukeeranʼya kwa okuraga

²³Epafura, unú aringi hamwi na oni mukibhohe, kurusumo rwa Kiristu Yeesu, arakukeeranʼya. ²⁴Na abhakori bha emirimu abharikyani, Mariko, Aristariko, Dema na Ruuka, bhonse bharakukeeranʼya. ²⁵Eriruguto rya Omukuru Yeesu Kiristu ribhe hamwi na bheenyu bhonsego.