Ruuka

Amangʼana Amajomu ga Yeesu Kiristu

kya ego gaangʼoorwa na

Ruuka

Obhukangati

Ekitabho kinu kyangʼoorwa na Ruuka. Ruuka yeendanga omuntu nyabhurebhe, unú yaabhirikirwanga Teofiro, amanye obhuheene eguru ya obhuhoru, emirimu na ebhika bhya Yeesu. Kiyo nkyo kyakora angʼoore ekitabho kyaye. Kweki, yaangʼoora ekitabho ekindi, kinú kirabhirikirwa ega, Amakorwa ga Abhatumwa bha Yeesu.

Tutaana amangʼana amaaru eguru ya Ruuka. Weeki yaaringa omureri, na eribhaga erindi yaagendanʼyanga hamwi na omutumwa Pauro, kumirimu gya okuraarika Amangʼana Amajomu eguru ya Omukuru Yeesu Kiristu (maaha mubhitabho bhya Abhakorosai 4:14; 2 Timoteo 4:11; Firimoni 1:24).

Ekitabho kinu kiina amangʼana amaaru ganú gataringi mubhitabho ebhindi bhya Eriragano Erihya, kya okwibhurwa na okuraarika kwa Yoana Omubhatiiji, okwibhurwa kwa Yeesu na amangʼana ga mubhwana bhwaye. Kweki Ruuka aroorokya obhuhanje bhwa Waryubha kya ego bhuringi kubhantu bha amanga amaaru. Yeesu aroorokya obhuhanje bhuyo kwa enjira ya okwihigirya abhantu kwa ebhirengyo, kya ekirengyo kya Omusamaria owa heene (ekiseku kya 10) na ekirengyo kya omwana unú yaabhura (ekiseku kya 15).

Obhukangati

¹Omusuukwa Teofiro, abhantu abhaaru bhakoreri ekituunyo kya okugangʼoora amangʼana garya gaakoreka gati yeetu. ²Bhaangʼoora amangʼana ganú twakeeribhwa na bhanú bheerorera amangʼana gayo kwa ameeso gaabho, okurwa kubhwambiro bhwa emirimu gya Yeesu. Bhayo mbo, bhaaringa bharanyaraganʼya amangʼana gayo eguru ya Yeesu. ³Oni nonse, neekomerye bhwaheene kya ego gaakoreka okurwa kubhwambiro. Naaruuji m-bujomu nkungʼoorere, naho ⁴uuwe wonse, obhe na obhuheene bhwa amangʼana ganú weehigiribhwa.

Obhurooti bhwa okwibhurwa kwa Yoana Omubhatiiji

⁵Eribhaga rinú Herode1:5a Herode. Maaha Herode Omukuru mu Moonjooro eguru ya Amangʼana Amakongʼu. yaaringa omukama wa ekyaro kya Yudea, yaaringa-ho omusyengeri1:5b Omusyengeri. Maaha Abhasyengeri mu Moonjooro eguru ya Amangʼana Amakongʼu. umwi, eriina ryaye yaabhirikirwanga Jakaria, wa omuganda gwa omusyengeri Abhia. Omukari waaye wonse, yaaringa wa oruganda ruyo rwa omusyengeri Harooni, eriina ryaye yaabhirikirwanga Jabheti. ⁶Bhabhiri bhayo bhaaringa abhaheene embere ya Omukuru Waryubha. Bhaaringa bharagwata amaragiriryo gaaye gonsego, bira amasoro. ⁷Bhataaringa bheebhwiri, kwa okubha omukari yaaringa omugumba, na bhaaringa bhariiri omuunyu mwaru.

⁸Orusiku rumwi, rwaringa orwiru rwa omuganda gwa Jakaria okusyengera embere ya Waryubha. ⁹Okuringʼaana na egimiira gya obhusyengeri, Jakaria akasorwa okusoha munyumba enkuru ya mwisyengerero rya Omukuru Waryubha,1:9 Munyumba enkuru ya mwisyengerero rya Omukuru Waryubha. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. amutuutire-mo ekurusu. ¹⁰Jakaria hanú yaasoha okutuuta ekurusu, abhantu abhaaru bhaaringa bheekumeenʼye kibhara, bharasabha Waryubha.

¹¹Rumwigo, Jakaria akeebhukirwa na maraika1:11 Maraika. Maaha Bhamaraika mu Moonjooro eguru ya Amangʼana Amakongʼu. wa Omukuru Waryubha. Maraika uyo, akeemirira orubhaara rwa obhuryo rwa ahasi ha okutuutira ekurusu. ¹²Jakaria hanú yaamurora, akeetakya, ee. Akoobhoha bhukongʼu.

¹³Nawe, maraika uyo, akamukeerya ega, “Uuwe Jakaria, tiga okoobhoha! Ganú waasabhanga Waryubha, yeegwiri. Mukaaho Jabheti arikwibhurira omwana wa ekisaaja, orimutoga Yoana. ¹⁴Omwana uyo, ngʼo arikora mubhe na obhujomerwa bhukongʼu na abhantu abhaaru bharijomererwa okwibhurwa kwaye. ¹⁵Aribha omukuru, embere ya Omukuru Waryubha. Atarinywa edivai1:15a Edivai. Maaha eringʼana rinu mu Moonjooro eguru ya Amangʼana Amakongʼu. kora amarwa agandi gogonse garya. Ariijuribhwa na Omutima Omurabhu,1:15b Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. kora akyari munda ya ngʼina waabho. ¹⁶Arihindya abhantu abhaaru bha Isiraeri ku Mukuru Waryubha waabho. ¹⁷Arimukangatira Omukuru, aseemye abhantu bhanú bhariija okumuturuungʼana, aryorokereribhwa na omutima na eginguru, kya egya Eriya.1:17 Eriya. M-murooti wa akare. Maaha mukitabho kya 1 Abhakama 17 okuhikira 2 Abhakama 2. Abhayahudi bhaaringa bhareesiga ega, omurooti Eriya ariija kweki, okuseemya okuuja kwa Kiristu. Maaha mukitabho kya Maraki 4:5-6. Aribheegwanʼya bhesewaabho na abhaana, na bhanú bhataana egintungwa ku Mukuru Waryubha, aribhakora bhabhe nagyo bhwaheene.”

¹⁸Jakaria akamubhuurya, “Ndeegwa, oni na mukaani turingi abhagotu! Eribha egaki twibhure omwana?”

¹⁹Maraika akagamba ega, “Nooni Gabhurieri, unú ndeemirira embere ya Waryubha. Yantumiri enú oringi, niije okukukeerya amangʼana amajomu gayo. ²⁰Nawe, kwa okubha otakwikirirya amangʼana gaani, okwambira bhoono, orabha erimuumu. Okuhikira kwibhaga rinú amangʼana gayo garikoreka, otakutura okuhaira. M-buheene, garikoreka.”

²¹Mbe, abhantu bhanú bhaaringa bharaganyirira Jakaria ahuruke kibhara, bhakaruguura kwa okurora kya ego yaatigita muyo. ²²Yaaja okurwa-mo, ataanagya kweki okugamba nabho, akaamba okubhoorokya na amabhoko. Rumwigo, bhakamanya aruuji obhurori munyumba enkuru ya mwisyengerero rya Waryubha. Wonse akagendererya okubha erimuumu.

²³Na eribhaga yaaringa amariri eginsiku gyaye gya okusyengera munyumba enkuru ya mwisyengerero rya Waryubha, akagya iika. ²⁴Eribhaga erindi, omukari waaye Jabheti akagega enda. Akamara emyeri etaanu yeebhisiri, akagamba ega, ²⁵“Omukuru Waryubha ngʼo yankoreeri ego! Nonse yanhiitukiri, yanduusirye eginsoni kubhantu.”

Obhurooti bhwa okwibhurwa kwa Yeesu

²⁶Enda iyo, hanú yaahikya emyeri esansabha, Waryubha akatuma maraika Gabhurieri kumugi gwa Najareeti mukyaro kya Gariraaya, ²⁷ahike kumuhara umwi unú yaaringa atarataara na omusaaja, eriina ryaye yaabhirikirwanga Mariamu. Omuhara uyo yaaringa arombeerwe obhuko na omusaaja umwi, eriina ryaye yaabhirikirwanga Yusufu, wa oruganda rwa omukama Daudi.1:27 Daudi. Maaha eringʼana rinu mu Moonjooro eguru ya Amangʼana Amakongʼu.²⁸Maraika uyo, akagya owa Mariamu, akamukeerya ega, “Ndakukeeranʼya, uuwe waanonkwa bhukongʼu! Omukuru Waryubha aringi hamwi na uuwe.” ²⁹Hanú Mariamu yeegwa amangʼana ga maraika uyo, enkoro yaaye ekeetanduka bhukongʼu, akeebhuurya, “Ni-nkeeranʼya-ki inu?”

³⁰Nawe, maraika uyo, akamukeerya ega, “Uuwe Mariamu, tiga okoobhoha, waanonkwa ku Waryubha. ³¹Bhoono, oragega enda, wibhure omwana wa ekisaaja, omutoge Yeesu. ³²Aribha omukuru, aribhirikirwa Omwana wa Waryubha1:32 Omwana wa Waryubha. Maaha eringʼana rinu mu Moonjooro eguru ya Amangʼana Amakongʼu. wa eguru ya bhyonsego. Omukuru Waryubha arimuhaana kweki obhutungi bhwa omukama Daudi, jaaji waabho. ³³Na aribha Omukuru wa abhantu bhonsego bha Isiraeri, koko. Obhukama bhwaye, bhutarihwa kweki.”

³⁴Mariamu akamubhuurya maraika ega, “Eringʼana rinu riribha egaki, enu oni ntamanyiri omusaaja?” ³⁵Maraika akakyukya ega, “Omutima Omurabhu arikuujira, na obhuturo bhwa Waryubha wa eguru ya bhyonsego, bhurikukundikirya. Kwa ego, omwana unú oriibhura, aribha omwahurwa na aribhirikirwa Omwana wa Waryubha. ³⁶Na omuhiiri waaho Jabheti, unú bhaabhirikiranga omugumba, mubhugotu bhwaye bhuyo, yaagegeri enda, na omweri gunu n-gwa kasansabha. ³⁷Yaagegeri enda, kwa okubha ku Waryubha, ritariho rinú ritakuturika.” ³⁸Mariamu akakyukya, “Ndingi omugaya wa Omukuru Waryubha. Ebhe kuoni kya ego ogambiri.” Rumwigo, maraika uyo akagya.

Mariamu aragya okukeeranʼya Jabheti

³⁹Kuginsiku giyogiyo, Mariamu akaseemya orugendo, akagya bhwangu owa Jabheti, kumugi gumwi gwa kuginkuku gya Yudea. ⁴⁰Hanú yaasoha munyumba ya Jakaria, akakeeranʼya Jabheti. ⁴¹Jabheti hanú yeegwa okukeeranʼya kwa Mariamu, omwana unú yaaringa munda yaaye, akahooya. Hayohayo, Jabheti akeejuribhwa na Omutima Omurabhu. ⁴²Akagamba kwa eriisi erinene ega, “Kubhakari bhonsego, uuwe nuuwe waanonkwa! Na omwana unú oriibhura, wonse yaanonkwa. ⁴³Oni niwi, kora ngʼina waabho Omukuru weetu uujiri okunkeeranʼya? ⁴⁴Hanú nigwiri okukeeranʼya kwaho, hayohayo omwana unú aringi munda yaani, yaahooya kwa obhujomerwa. ⁴⁵Uuwe waanonkwa, kwa okubha wikiriirye amangʼana ganú Omukuru Waryubha yaakukeerya garikoreka!”

Eriimbo rya Mariamu

⁴⁶Mariamu akagamba ega,

“Enkoro yaani, eramugungya Omukuru Waryubha,

⁴⁷erajomererwa Waryubha, Omutuurya waani,

⁴⁸kwa okubha, yanhiitukiri oni, omugaya waaye,

kora onyoora ndingi omuntu wa insi.

Okwambira bhoono, abhantu bha eginganda na eginganda,

bharaabhenga bharambirikira ega, owa enonkwe.

⁴⁹Waryubha wa Obhuturo, yankoreeri ekika,

na eriina ryaye ritakuhunkanibhwa na eriina erindi.

⁵⁰Aragendererya okwabhira abhantu bha eginganda na eginganda bhanú bharamwigwa.

⁵¹Akoreri amangʼana amakuru kwa eginguru gyaye,

anyarageenʼye abha emitwe emikongʼu.

⁵²Yeetuumirye abhakuru kubhitumbi bhyabho bhya obhutungi,

abheesuuhya abheemukirye.

⁵³Abha omweko abheegutirye bhujomu,

nawe, abhaniibhi abhakenyerye amabhoko masa.

⁵⁴Abhabheereri Abhaisiraeri, abhagaya bhaaye,

kwa okuhiituka okubhaabhira.

⁵⁵Yaakoreri gayo kya ego yaaringa arageeni na Abhurahamu na bhajaaji weetu,

kora kubhantu bhonsego bha oruganda rwaye, koko.”

⁵⁶Bhoono, Mariamu akeekara owa Jabheti emyeri esatu, akamara akahunjuka owaaye.

Okwibhurwa kwa Yoana Omubhatiiji

⁵⁷Orusiku rwa okwibhura kwa Jabheti rukahika, akeebhura omwana wa ekisaaja. ⁵⁸Abhamenyani bhaaye na abhahiiri bhaaye, hanú bheegwa kya ego Omukuru Waryubha amwabhiiri, bhakajomerwa hamwi nawe.

⁵⁹Omwana uyo, hanú yaahikya orusiku rwa munaane, bhakaaja okumusaara. Bhakeenda bhamuhaane eriina rya esewaabho, Jakaria. ⁶⁰Kora ego ngʼina waabho akaanga, akagamba ega, “Tiigo-ha! Abhirikirwe Yoana.” ⁶¹Bhakakyukya ega, “Ndeegwa, atariho omuhiiri weenyu, unú arabhirikirwa eriina riyo!”

⁶²Bhakabhuurya esewaabho, kwa okumoorokya na amabhoko, naho abhakeerye eriina rinú areenda okutoga omwana waaye. ⁶³Akabhasabha ekibhaau, akakingʼoora ega, “Eriina ryaye ngʼo Yoana.” Bhonsego bhakaruguura.

⁶⁴Rumwigo, omunwa gwaye na orurimi rwaye bhikanyoora obhuturo bhwa okuhaira kweki, akamukumya Waryubha. ⁶⁵Abhamenyani bhonsego bhakaruguura bhukongʼu. Eringʼana riyo rikamanyikana bhukongʼu kumigi gyonsego ginú giringi kuginkuku gya Yudea. ⁶⁶Bhonsego bhanú bheegwa, bhakabha bhareebhuurya, “Omwana uyo aribha omuntu wa egaki?” Bhaagamba ego, kwa okubha heene, Omukuru Waryubha yaaringa hamwi nawe.

Eriimbo rya Jakaria

⁶⁷Jakaria esewaabho omwana uyo, akeejuribhwa na Omutima Omurabhu. Akaruusya obhurooti ega,

⁶⁸“Omukuru Waryubha weetu wa Isiraeri agungibhwe,

kwa okubha yaajiri okututuurya bheetu, abhantu bhaaye.

⁶⁹Atuheeri Omutuurya owa eginguru okurwa kuruganda rwa omugaya waaye Daudi,

⁷⁰kya ego yaaringa amariri okugamba akare hayo, kwa enjira ya abharooti bhaaye abharabhu bha omutima.

⁷¹Yaatukeerya ega, akaatutuurirye okurwa kubhasigu bheetu

na mumabhoko ga bhanú bharatubhihirirwa.

⁷²Akagamba ega, arihiituka eriragano1:72 Eriragano. Maaha eringʼana rinu mu Moonjooro eguru ya Amangʼana Amakongʼu. ryaye erirabhu rinú yaakora na bhajaaji weetu,

na aribhaserenʼya.

⁷³Eriragano riyo, ndyo rirya yaateena kujaaji weetu Abhurahamu ega,

⁷⁴atutuurye okurwa mumabhoko ga abhasigu bheetu,

naho tubhe turamusabha bira obhoobha.

⁷⁵Kweki, tubhe abha egintungwa na abhaheene embere waaye, eginsiku gyetu gyonsego.

⁷⁶Uuwe omwana waani, oribhanga orabhirikirwa omurooti wa Waryubha wa eguru ya bhyonsego.

Orimukangatira Omukuru Waryubha, anyoore omuseemeerye enjira.

⁷⁷Orikeerya abhantu bhaaye ega, bharituuribhwa

kwa okwabhirwa obhusarya bhwabho,

⁷⁸okuringʼaana na ekyabhira ekinene kya Waryubha weetu.

Obhutuurya bhuyo bhurituujira okurwa murwire kya endingaasi,

⁷⁹na bhurimirikira bhanú bharingi mukisunte,1:79 Maaha mukitabho kya Isaaya 9:1-2.

bhanú bharingi munyanko na mungʼanga ya oruku.

Aritoorokererya, naho tugendenga kunjira ya omurembe.”

⁸⁰Bhoono, omwana uyo Yoana, akakiina, akanyoora eginguru munkoro yaaye. Akagya okwikara kukibhara, okuhikira eribhaga rinú yeeyorokya ku Bhaisiraeri.

Okwibhurwa kwa Yeesu

(Mataayo 1:18-25)

¹Kuginsiku giyo, Kaisari2:1 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. Agosto, yaaragirirya ega, abhantu bhonsego bhanú bharingi mubhyaro bhya kubhutungi bhwaye, bhagye okungʼoorwa. ²Okungʼoorwa kuyo kwaringa kwa okwamba, kwaakoreka eribhaga rinú Kurenio yaaringa omutungi wa ekyaro kya Siria. ³Ego, abhantu bhonsego bhakagya, kira omuntu mumugi gwa oruganda rwabho.

⁴Yusufu wonse, akarwa mumugi gwa Najareeti, mukyaro kya Gariraaya. Akariina okugya mumugi gwa Bhetereheemu, mukyaro kya Yudea. Bhetereheemu ngo gwaringa omugi gwa omukama Daudi, na Yusufu yaaringa wa oruganda rwa Daudi. ⁵Yusufu akagya okwingʼoora hamwi na Mariamu, unú yaaringa arombeeri obhuko. Eribhaga riyo, Mariamu yaaringa na enda. ⁶Hanú bhaahika eyo, okwibhura kwaye kukahika. ⁷Akeebhura omwana wa ekisaaja omutangi, muriigo rya egintugo. Akamukundikirya emyenda gya ekyana, akamuraarya mwitubha rya okuriisya-mo egintugo. Yeebhurira muyo, kwa okubha bhataanyoora omweya gwa okuraara, muginyumba gya abhageni.

Abhariisya bhareebhukirwa na bhamaraika

⁸Bhaaringa-ho abhariisya bharaangararira egintugo gyabho kukibhara obhutiku. ⁹Rumwigo, bhakeebhukirwa na maraika wa Omukuru Waryubha, na endingaasi ya Omukuru Waryubha ekabhamirikira mbaara gyonsego, bhakabha na enkubhi enene bhukongʼu. ¹⁰Maraika uyo akabhakeerya ega, “Mutige okoobhoha, mbareeteeri eringʼana erijomu rinú rirajomera abhantu bhonsego. ¹¹Reero inu, mumugi gwa Daudi, yeebhwirwe Omutuurya weenyu. Omutuurya uyo ngʼo Omukuru, kweki ngʼo Kiristu2:11 Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu. omwene. ¹²Ekimanyiiriryo kya okoorokya gayo niiga, mwakanyoore omwana ekijaare araariibhwe mwitubha rya okuriisirya egintugo, akundikiriibhwe emyenda gya ekyana.”

¹³Rumwigo, bhakaaja ebhiku na ebhiku bhya bhamaraika okurwa murwire, bhakabha bharamugungya Waryubha ega,

¹⁴“Waryubha wa murwire agungibhwe!

Na mukyaro, omurembe gubhe kubhantu bhanú arajomererwa nabho.”

¹⁵Bhamaraika bhayo hanú bhaamara, bhakahinda murwire. Mbe, abhariisya bhakagambana ega, “Tugende mumugi gwa Bhetereheemu, turore ganú geebhukiri eyo, kya ego Omukuru Waryubha atukeererye.” ¹⁶Bhakagya bhwangubhwangu. Hanú bhaahika, bhakanyoora Mariamu na Yusufu, na omwana ekijaare areeri mwitubha. ¹⁷Hanú bhaamara okumurora omwana uyo, bhakaraarika kubhantu amangʼana gonsego ganú maraika abhakeererye eguru yaaye. ¹⁸Bhonsego bhanú bheegwa amangʼana ganú bhaakeeribhwa na abhariisya, bhakaruguura bhukongʼu. ¹⁹Mariamu akabhiikanga gayo gonsego mumutima gwaye, akabha arageeganirirya.

²⁰Abhariisya bhayo bhakahunjuka, enu bharamugungya Waryubha, kugonsego ganú bheegwa na okugarora. Kya ego bhaakeeribhwa na maraika, niigo gonsego gaakoreka.

²¹Omwana uyo, hanú yaahikya orusiku rwa munaane, bhakamusaara, bhakamutoga Yeesu. Riyo ndyo eriina rinú maraika yaaringa amariri okumuhaana, eribhaga ngʼina waabho yaaringa akyari okugega enda.

Yeesu aratuurwa embere ya Waryubha

²²Yusufu na Mariamu bhakamara eginsiku gya okuraamwa kwabho, kya ego yeenderwanga mumaragiriryo ga Musa.2:22a Mumaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. Kweki maaha mukitabho kya Abharaawi 12:2-8 amaragiriryo ga okuraamwa eguru ya okwibhura. Nho, bhakahira Yeesu mumugi gwa Yerusaremu,2:22b Yerusaremu. Maaha eringʼana rinu mu Moonjooro eguru ya Amangʼana Amakongʼu. naho bhamutuure embere ya Omukuru Waryubha. ²³Bhaakora ego, kya ego yaangʼoorwa mumaragiriryo ga Omukuru Waryubha ega, “Omwana omutangi wa ekisaaja, yaahurwe okubha embere ya Omukuru Waryubha.”2:23 Maaha mukitabho kya Okuhuruka 13:2, 13:12, 13:15.²⁴Hamwi na gayo, bheendanga bhamuruusirye ekimwenso,2:24a Ekimwenso. Maaha eringʼana rinu mu Moonjooro eguru ya Amangʼana Amakongʼu. kya ego yaangʼoorwa mumaragiriryo ga Omukuru Waryubha ega, “Yeenderwanga bharuusye eginguuti ebhiri kasi amaana gabhiri ga enguuti.”2:24b Maaha mukitabho kya Abharaawi 12:6-8.

²⁵Yaaringa-ho omuntu umwi Yerusaremu hayo, eriina ryaye Simeoni. Yaaringa omuntu wa obhuheene, omwigwa ku Waryubha. Yaaganyiriranga okurora okutuuribhwa kwa Isiraeri, kweki Omutima Omurabhu yaaringa hamwi nawe. ²⁶Omutima Omurabhu yaaringa amukeererye ega, atarikwa akyari okurora Kiristu Omutuurya okurwa ku Mukuru Waryubha. ²⁷Abheebhuri bha Yeesu hanú bhaamuhira mwisyengerero erikuru rya Waryubha, bhakakora kya ego bhaaragiriribhwa na amaragiriryo ga Waryubha. Simeoni wonse, Omutima Omurabhu akamoorokererya ega, asohe muyo. ²⁸Akamutuura Mariamu omwana enu aramugungya Waryubha ega,

²⁹“Omukuru, ndasabha unyikiririrye nkwe na omurembe,

kwa okubha nduuji endago yaaho,

kya ego waandaga oni omugaya waaho.

³⁰Kweki, niroreeri obhutuurya bhunú oreeteri,

³¹bhunú waaseemerye, naho bhutuuke kubhantu bhonsego.

³²Obhutuurya bhuyo ni-ndingaasi ya okoorokya enjira yaaho,

kubhantu bhanú bhataringi Abhayahudi.

Kora abhantu bhaaho bha Isiraeri bhonsego bharitogoonibhwa.”

³³Amangʼana ganú Simeoni yaagamba eguru ya omwana uyo, gaabharuguuryanga abheebhuri bhaaye. ³⁴Hayo, Simeoni akabhanonka, akamukeerya Mariamu, ngʼina waabho omwana uyo ega, “Omwana unu, asorerwe na Waryubha okusikya Abhaisiraeri abhaaru na okutuurya abhandi abhaaru. Aribha ekimanyiiriryo kya Waryubha, kinú kiryangwa na abhantu. ³⁵Abhantu bhayo, amangʼana ganú geebhisanga muginkoro gyabho, garitubhuka kubhurabhu. Uuwe wonse oriigwa obhururu bhukongʼu, oribha kya unú obhitirwe na omuhyu omoogi.”

³⁶Yaaringa-ho omurooti umwi omukungu bhukongʼu, eriina ryaye yaabhirikirwanga Ana, omuhara wa Fanueri, wa erikabhira rya Asheri. Yeekara emyaka muhungati egyenego na omusaaja waaye, okurwa hanú yaatetwa, omusaaja waaye akakwa. ³⁷Akatigara omusino, akabha arasabha mwisyengerero erikuru rya Waryubha, omubhasu na obhutiku. Kwibhaga rya okusabha yeeyimanga ebhyakurya. Hanú Yeesu yaareetwa mwisyengerero erikuru rya Waryubha, Ana uyo yaaringa ahikirye emyaka mirongo munaane na ena (84). ³⁸Eribhaga riyoriyo, Ana akeeyorokya, akaamba okumugungya Waryubha, akaraarika amangʼana ga omwana uyo, kubhantu bhonsego bhanú bhaaganyiriranga Waryubha atuurye omugi gwa Yerusaremu.

³⁹Yusufu na Mariamu, hanú bhaamara okukora gonsego ganú amaragiriryo ga Omukuru Waryubha geendanga, bhakahunjuka owaabho mumugi gwa Najareeti, mukyaro kya Gariraaya. ⁴⁰Omwana akakiina, akabha na eginguru, akeejuribhwa egintungwa, na yaaringa aranonkwa na Waryubha.

Omwana Yeesu mwisyengerero erikuru rya Waryubha

⁴¹Abheebhuri bhaaye, bhaariinanga okugya mumugi gwa Yerusaremu kira omwaka, munyangi ya Epasaka.2:41 Munyangi ya Epasaka. Ni-nyangi ya Abhaisiraeri eya okuhiituka kya ego Waryubha yaatungurya bhajaaji waabho okurwa mubhugaya, mukyaro kya Misiri. Obhutungurya bhuyo, bhwakoreka kwibhaga rya Musa. Maaha mukitabho kya Okuhuruka 12. Kweki maaha Epasaka mu Moonjooro eguru ya Amangʼana Amakongʼu.⁴²Hanú Yeesu yaahikya emyaka ekumi na ebhiri, bhakagya nawe munyangi, okuringʼaana na egimiira gyabho. ⁴³Eginsiku gya enyangi hanú gyahwa, abheebhuri bhaaye bhakahunjuka iika. Nawe, weeki akatama Yerusaremu. Abheebhuri bhaaye bhataamanya ego, ⁴⁴kwa okubha bhaamanyanga ega, aringi hamwi na abharikyabho bhanú bhaahindanga iika hamwi. Hanú orusiku rumwi rwahwa bira okumurora, abheebhuri bhaaye bhakaamba okumutuna kubhahiiri bhaabho na abhasaani bhaabho. ⁴⁵Hanú yaabhabhura, bhakahunjuka Yerusaremu, naho bhamutune eyo.

⁴⁶Orusiku rwa kasatu, bhakamunyoora murubhanja rwa erisyengerero erikuru rya Waryubha, yeekeeri gati ya abheehigirya, arabheetegeerera na arabhabhuurya amangʼana. ⁴⁷Abhantu bhonsego bhanú bheegwa kya ego yaaringa aragamba, bhakaruguura bhukongʼu eguru ya obhumanyi bhwaye, na kya ego yaaringa arakyukya.

⁴⁸Abheebhuri bhaaye, hanú bhaamurora, bhakaruguura bhukongʼu, haa! Ngʼina waabho akamubhuurya ega, “Uuwe omwana waani, kwaki otukoreeri ego? Oni na eseweenyu twaringa na obhoobha, twakutuniri bhukongʼu!” ⁴⁹Akakyukya ega, “Kwaki mwaringa murantuna? Maheene mutamanyiri ega, ndeenderwa nikare munyumba ya Taata?” ⁵⁰Nawe erikyukya riyo, abheebhuri bhaaye bhataarimanya.

⁵¹Amahairo gayo gaaja okuhwa, bhakahiringita nawe okugya iika owaabho mumugi gwa Najareeti, akabha arabheegwa. Gayo gonsego gaakoreka ngʼina waabho, akagabhiika mumutima gwaye. ⁵²Yeesu akagendererya okukiina, akabha na egintungwa, akabha angʼariiri Waryubha na abhantu.

Emirimu gya Yoana Omubhatiiji

(Mataayo 3:1-12; Mariko 1:1-8; Yoana 1:19-28)

¹Gwaringa omwaka gwa ekumi na etaanu, gunú Kaisari Tibherio yaaringa aratunga ekyaro kyonsego kya Abharuumi. Ponsio Pirato yaaringa omwanangwa wa ekyaro kya Yudea. Herode Antipa3:1 Herode Antipa. Maaha eringʼana rinu mu Moonjooro eguru ya Amangʼana Amakongʼu. yaaringa omukama wa ekyaro kya Gariraaya. Firipo, omumura waabho Herode, yaaringa omukama wa ebhyaro bhya Iturea na Tarakoniti. Risania weeki yaaringa omukama wa ekyaro kya Abhireene. ²Eribhaga riyo, Anasi na Kayafa mbo bhaaringa abhasyengeri abhakuru.3:2 Abhasyengeri abhakuru. Maaha Abhasyengeri mu Moonjooro eguru ya Amangʼana Amakongʼu.

Mbe, kwibhaga riyo, Yoana omwana wa Jakaria, yaaringa kukibhara. Hanú yaaringa eyo, akakeeribhwa eringʼana okurwa ku Waryubha. ³Akagya kukyaro kyonsego kinú kiringi embarika ya oruuji rwa Yorodani. Akabha araraarikira abhantu eringʼana riyo ega, “Mutige obhusarya bhwenyu, mumwihunjurire Waryubha, mubhatiijwe, naho abhaabhire obhusarya bhwenyu!” ⁴Amangʼana gayo gahikiibhwe, kya ego yaangʼoorwa mukitabho kya omurooti Isaaya ega,

“Omuntu aribhanga kukibhara araraarika kwa eriisi erinene ega,

‘Museemerye Omukuru Waryubha enjira,

mwimye kira ahasi hanú arihita!

⁵Amaruuma gonsego garibhwe,

eginkuku na ebhiswa bhinyaraganibhwe.

Eginjira ginú giikoonyeri giimibhwe,

na hanú haana amaruuma amake amake hanyaraganibhwe.

⁶Hayo nho, abhantu bhonsego bharirora kya ego Waryubha arituurya abhantu.’ ”3:4-6 Maaha mukitabho kya Isaaya 40:3-5.

⁷Mbe, emiganda gya abhantu gyamuujiranga Yoana, naho abhabhatiije. Akabha arabhakeerya ega, “Bheenyu orwibhuro rwa eginjoka! Mumanyiri ega, obhujibhu bhwa Waryubha bhuriija. Niwi yaabhakeerya ega, muriheenerya obhujibhu bhuyo, kwa okubhatiijwa okwenego? ⁸Mbe, moorokye kuginteemo gyenyu ega, mweehunjuriiri Waryubha okurwa mubhusarya bhwenyu! Muteeganirirya ega, muryabhirwa kwa okubha bheenyu m-beebhurwa bha ehamati ya Abhurahamu.3:8 Abhurahamu. Maaha eringʼana rinu mu Moonjooro eguru ya Amangʼana Amakongʼu. Ndabhakeerya ega, Waryubha aratura okuhunjura amagina ganu, okubha abhaana bha Abhurahamu! ⁹Bhoono, Waryubha yeeseemerye okubhabhuturira ekiina, kya ekisiri kiringi kumiri gya omuti, kireenda okugugeeja! Na bhanú bhatakukora amangʼana ga obhuheene, bharibha kya emiti ginú gitaana emisumo ginú girageejwa na okweswa mumururo.”

¹⁰Omuganda gwa abhantu bhakabha bharamubhuurya ega, “Bhoono, tukore egaki?” ¹¹Akabhakyukya ega, “Unú yaana emyenda ebhiri, ogumwi agabhire unú ataanago. Unú yaana ebhyakurya, agabhire unú yaana enjara.”

¹²Abhatobhya bha erigooti3:12 Abhatobhya bha erigooti. Maaha eringʼana rinu mu Moonjooro eguru ya Amangʼana Amakongʼu. bhonse bhakaaja, naho abhabhatiije. Bhakamubhuurya ega, “Omwihigirya, na bheetu tukore egaki?” ¹³Wonse akabhakyukya ega, “Hanú muraatobhyenga, mutoongerya-ko okukira kya ego mwaragiriribhwa.”

¹⁴Abhasirikare bhonse bhakamubhuurya ega, “Na bheetu tukore egaki?” Wonse, akabhakyukya ega, “Mutaruusya omuntu ebhintu bhyaye kwa amanaga, kweki mutajongera omuntu kwa okumuhaamirirya amangʼana ga obhubheehi. Amariho ganú murahaanwa, mwiswe nago.”

¹⁵Mbe, abhantu hanú bhaaringa bharaganyirira kinú kiraakoreke, bhakabha bhareebhuurya ega, hamwi Yoana ngʼo Kiristu Omutuurya. ¹⁶Nawe Yoana, akabhakeerya bhonsego ega, “Oni ndabhabhatiija kwa amanji, nawe oundi ariija, omukuru okukira oni. Ntakwenderwa kora okubha omugaya waaye, wa okusibhura egingoye gya eginkeeto gyaye!3:16a Okusibhura egingoye gya eginkeeto gyaye. Kuginsiku girya, nyoore omugeni arasoha munyumba, omugaya wa insi bhukongʼu yaaringa aramusibhura eginkeeto na okoogya amaguru gaaye. Weeki aribhabhatiija kwa Omutima Omurabhu, na arisikya obhusarya bhwenyu kya ego omururo gurasikya ebhintu.3:16b Weeki aribhabhatiija kwa Omutima Omurabhu, na arisikya obhusarya bhwenyu kya ego omururo gurasikya ebhintu. Ekiyunani kiragamba ega, Weeki aribhabhatiija Omutima Omurabhu na kwa omururo.¹⁷Bhoono, weeki n-kya omuntu unú agwatiriri oruhungo mumabhoko gaaye. Ariirura eginkuunyu okurwa mubhuro. Nho, arigega obhuro na okubhutuura mukitara, na arisamba eginkuunyu mumururo gunú gutakusima.”

¹⁸Mbe, kwa amangʼana amaaru gayo, na agandi, Yoana yaaringa arabhakaanʼya abhantu bhayo, enu arabharaarikira Amangʼana Amajomu okurwa ku Waryubha.

¹⁹Eribhaga erindi, Yoana akamutoongʼanʼya omukama Herode Antipa ega, “Kwaki ogegeri Herodia, omukari wa omumura weenyu, omukoreri mukaaho?” Kweki, Yoana akamukaanʼya na obhusarya bhwaye obhundi. ²⁰Nawe, Herode akoongerya obhusarya obhundi kweki, kwa okumubhoha Yoana mwigereja.

Yeesu arabhatiijwa

(Mataayo 3:13-17; Mariko 1:9-11)

²¹Eribhaga rinú Yoana yaaringa atarabhohwa mwigereja, abhantu abhaaru bhaaringa bharabhatiijwa, Yeesu wonse akaaja okubhatiijwa. Na hanú Yeesu yaaringa arasabha, orwire rukasiikuka, ²²Omutima Omurabhu akeetuuma kya enguuti na okwikara eguru yaaye. Nho, eriisi rikarwa murwire riragamba ega, “Uuwe m-Mwana waani3:22 M-Mwana waani. Maaha Omwana wa Waryubha mu Moonjooro eguru ya Amangʼana Amakongʼu. omuhanje, nngʼariirwe na uuwe!”

Ehamati ya Yeesu Kiristu

(Mataayo 1:1-17)

²³Eribhaga rinú Yeesu yaamba emirimu gyaye gya okuraarika eringʼana rya Waryubha, yaaringa na emyaka muna mirongo esatu. Abhantu bhaakanyanga ega, yaaringa omwana wa Yusufu.

Yusufu uyo, yeebhurwa na Heri.

²⁴Heri yeebhurwa na Matati.

Matati yeebhurwa na Raawi.

Raawi yeebhurwa na Meriki.

Meriki yeebhurwa na Yaana.

Yaana yeebhurwa na Yusufu.

²⁵Yusufu yeebhurwa na Matatia.

Matatia yeebhurwa na Amosi.

Amosi yeebhurwa na Nahumu.

Nahumu yeebhurwa na Esiri.

Esiri yeebhurwa na Nagai.

²⁶Nagai yeebhurwa na Mati.

Mati yeebhurwa na Matatia.

Matatia yeebhurwa na Semei.

Semei yeebhurwa na Yoseki.

Yoseki yeebhurwa na Yoda.

²⁷Yoda yeebhurwa na Yoana.

Yoana yeebhurwa na Resa.

Resa yeebhurwa na Jerubhabheri.

Jerubhabheri yeebhurwa na Sherateri.

Sherateri yeebhurwa na Neri.

²⁸Neri yeebhurwa na Meriki.

Meriki yeebhurwa na Adi.

Adi yeebhurwa na Kosamu.

Kosamu yeebhurwa na Erimadamu.

Erimadamu yeebhurwa na Eri.

²⁹Eri yeebhurwa na Yoshua.

Yoshua yeebhurwa na Eriejeri.

Eriejeri yeebhurwa na Yorimu.

Yorimu yeebhurwa na Matati.

Matati yeebhurwa na Raawi.

³⁰Raawi yeebhurwa na Simeoni.

Simeoni yeebhurwa na Yuda.

Yuda yeebhurwa na Yusufu.

Yusufu yeebhurwa na Yonamu.

Yonamu yeebhurwa na Eriakimu.

³¹Eriakimu yeebhurwa na Merea.

Merea yeebhurwa na Mena.

Mena yeebhurwa na Matata.

Matata yeebhurwa na Natani.

Natani yeebhurwa na Daudi.

³²Daudi yeebhurwa na Yeese.

Yeese yeebhurwa na Obhedi.

Obhedi yeebhurwa na Bhoaji.

Bhoaji yeebhurwa na Sarumoni.

Sarumoni yeebhurwa na Nashoni.

³³Nashoni yeebhurwa na Aminadabhu.

Aminadabhu yeebhurwa na Adimini.3:33a Adimini. Amangʼoore agandi ga akare aga Ekiyunani garagamba ega, Aramu.

Adimini yeebhurwa na Arini.3:33b Arini. Amangʼoore agandi ga akare aga Ekiyunani gataana eringʼana rinu.

Arini yeebhurwa na Hejironi.

Hejironi yeebhurwa na Peresi.

Peresi yeebhurwa na Yuda.

³⁴Yuda yeebhurwa na Yakobho.

Yakobho yeebhurwa na Esaaka.

Esaaka yeebhurwa na Abhurahamu.

Abhurahamu yeebhurwa na Teera.

Teera yeebhurwa na Nahoori.

³⁵Nahoori yeebhurwa na Serugi.

Serugi yeebhurwa na Rehu.

Rehu yeebhurwa na Peregi.

Peregi yeebhurwa na Ebheri.

Ebheri yeebhurwa na Shera.

³⁶Shera, yeebhurwa na Kainani.

Kainani yeebhurwa na Arufakisadi.

Arufakisadi yeebhurwa na Shemu.

Shemu yeebhurwa na Nuhu.

Nuhu yeebhurwa na Rameki.

³⁷Rameki yeebhurwa na Metuseera.

Metuseera yeebhurwa na Enoki.

Enoki yeebhurwa na Yaredi.

Yaredi yeebhurwa na Maharareri.

Maharareri yeebhurwa na Kainani.

³⁸Kainani yeebhurwa na Enoshi.

Enoshi yeebhurwa na Seeti.

Seeti yeebhurwa na Adamu.

Na Adamu yaabhumbwa na Waryubha.

Yeesu arasakibhwa na Erisambwa

(Mataayo 4:1-11; Mariko 1:12-13)

¹Yeesu akarwa ahasi ha oruuji rwa Yorodani, enu yeejwiri Omutima Omurabhu. Omutima uyo akabhanga aramugendya kukibhara, eginsiku mirongo ena. ²Nho, Erisambwa4:2 Erisambwa. Maaha eringʼana rinu mu Moonjooro eguru ya Amangʼana Amakongʼu. rikabhanga riramusakya eyo. Na eribhaga riyo ryonsego, ataaryanga ekintu kyokyonse. Hanú yaamara eginsiku giyo, akeegwa omweko bhukongʼu.

³Nho, Erisambwa rikamukeerya ega, “Nyoore maheene uuwe m-Mwana wa Waryubha, hunjura erigina rinu ribhe omukaate.” ⁴Yeesu akarikyukya ega, “Yaangʼoorwa mu Mangʼoore Amarabhu ega, ‘Omuntu atakubha na obhuhoru kwa okurya omukaate okwenego.’4:4 Maaha mukitabho kya Obhuhiituki bhwa Amaragiriryo 8:3. ”

⁵Mbe, Erisambwa rikamuriinʼya kunkuku entambi bhukongʼu, rikamoorokya obhutungi bhwa ebhyaro bhyonsego kwa eribhaga erimwi. ⁶Rikamukeerya ega, “Ndakuhaana obhutungi bhwa bhinu bhyonsego, hamwi na eginkuma gyaye eginjomu, kwa okubha giringi mumabhoko gaani. Nooni naahaanwa na Waryubha, na ndatura okuhaana omuntu wowonse unú ndeenda. ⁷Kwa ego, uuwe hanú oraansyengere, ndakuhaana obhutungi bhwa gayo gonsego.” ⁸Yeesu akarikyukya ega, “Engʼoorerwe mu Mangʼoore Amarabhu ega, ‘Omusyengere Omukuru Waryubha waaho. Omukorere emirimu weeki omwenego.’ 4:8 Maaha mukitabho kya Obhuhiituki bhwa Amaragiriryo 6:13.”

⁹Mbe, Erisambwa rikamuhira mumugi gwa Yerusaremu, rikamwimirirya eguru kukinsongyo kya erisyengerero erikuru rya Waryubha, rikamukeerya ega, “Nyoore maheene uuwe m-Mwana wa Waryubha, irekera hansi! ¹⁰Otakutura okunyahaarika, kwa okubha yaangʼoorwa mu Mangʼoore Amarabhu ega,

‘Waryubha arikutumira bhamaraika bhaaye, naho bhakwangararire.’

¹¹Kweki ega,

‘Bharaakutuumire kwa amabhoko gaabho,

otaaja okwikuujura kwigina, onyahaarike amaguru gaaho.’4:10-11 Maaha mukitabho kya Egijabhuri 91:11-12.”

¹²Yeesu akarikyukya ega, “Engʼoorerwe ega, ‘Otakaamusakya Omukuru, Waryubha waaho.’4:12 Maaha mukitabho kya Obhuhiituki bhwa Amaragiriryo 6:16. ”

¹³Erisambwa hanú ryamara okumusakya Yeesu, rikamutiga, rikagya gyaye okuhikira eribhaga erindi.

Yeesu araangwa mumugi gwa Najareeti

(Mataayo 4:12-17, 13:53-58; Mariko 1:14-15, 6:1-6)

¹⁴Mbe, Yeesu akahunjuka mukyaro kya Gariraaya, enu yeejwiri eginguru gya Omutima Omurabhu. Amangʼana eguru ya Yeesu, gakanyaragana bhukongʼu mukyaro kiyo kyonsego. ¹⁵Akabha areehigirya abhantu kira ahasi mumasinagogi4:15 Mumasinagogi. Erisinagogi ryaringa enyumba ya Abhayahudi ya okusyengera Waryubha orusiku rwa Esabhato. Maaha Erisinagogi mu Moonjooro eguru ya Amangʼana Amakongʼu. gaabho. Abhantu bhonsego bhakabha bharamugungya.

¹⁶Eribhaga erindi, akahunjuka Najareeti mumugi gunú yaarererwa-mo. Orusiku rwa Esabhato,4:16 Orusiku rwa Esabhato. Ku Bhayahudi n-dusiku rwa okumusyengera Waryubha na okumuunya. Maaha Esabhato mu Moonjooro eguru ya Amangʼana Amakongʼu. akasoha mwisinagogi kya ego yaaringa anariri, akeemirira naho okusoma eringʼana rya Waryubha. ¹⁷Akahaanwa ekitabho kya omurooti Isaaya, akakiramburura, akasikana ahasi hangʼoorerwe ega,

¹⁸“Omutima wa Omukuru Waryubha aringi hamwi na oni.

Yansoreri okubharaarikira abhatobhu amangʼana amajomu.

Yantumiri okuraarikira abhabhohwa ega, bharisiikurirwa,

na okukeerya abhahoku ega, bhariribhurwa ameeso,

na bhanú bharanyankibhwa, mbatuurye.

¹⁹Yantumiri okubharaarikira abhantu, omwaka gwa obhutuurya,

gunú Omukuru Waryubha aryorokya eriruguto ryaye.”4:18-19 Maaha mukitabho kya Isaaya 61:1-2.

²⁰Mbe, Yeesu hanú yaamara okusoma amangʼana gayo, akakundikirya ekitabho, akamuhunjukirya omukangatya wa obhusyengeri. Akeekara naho yeehigirye. Abhantu bhonsego bhanú bhaaringa mwisinagogi, bhakamumaahirira, bharaganyirira kinú areehigirye. ²¹Akaamba okubhakeerya ega, “Eringʼoore rinú mwigwiri reero, oni ndikuneenʼye embere yeenyu.” ²²Hanú yaamara okwihigirya, bhonsego bhakagamba ega, “Agambiri obhugambi bhujomu!” Bhakaruguura amangʼana gaaye, ganú yaagamba eguru ya eriruguto. Kimwi, bhakabhuuranʼya ega, “Unu tu-mwana wa Yusufu?”

²³Yeesu akabhakeerya ega, “Mmanyiri muraankeerye ekirengyo kinu, ‘Omuraguri, ihwenʼya uuwe omwene!’ Na muraankeerye ega, ‘Ganú twigwiri okoreri mumugi gwa Kaperinaumu, ogakore na mumugi gwaho hanu!’ ” ²⁴Yeesu akagendererya okugamba ega, “Ndabhakeerya obhuheene ega, atariho omurooti unú areekiriribhwa mumugi gwa owaabho.

²⁵“Nawe, mwitegeerere! M-maheene ega, kwibhaga rya omurooti Eriya, bhaaringa-ho abhasino abhaaru mukyaro kya Isiraeri. Eribhaga riyo embura etaatwa kwa eribhaga rya emyaka esatu na emyeri esansabha. Kwa ego, mukyaro kyonsego kya Isiraeri hakabha na enjara enduru. ²⁶Kora ego, Eriya ataatumwa kora kuumwi waabho. Nawe, yaatumwa kumusino umwi wa mumugi gwa Serepita, mukyaro kya Sidoni, embarika ya Isiraeri!4:26 Maaha mukitabho kya 1 Abhakama 17:1-24.

²⁷“Na kwibhaga rya omurooti Erisha, bhaaringa-ho abhagenge abhaaru mukyaro kya Isiraeri. Kora ego, ataahwenʼya kora oumwi waabho. Nawe, akahwenʼya Naamani omwenego, omuntu okurwa mukyaro kya Siria!”4:27 Maaha mukitabho kya 2 Abhakama 5:1-14.

²⁸Abhantu bhonsego bhanú bhaaringa bheekumeenʼye mwisinagogi riyo, hanú bheegwa amangʼana ga Yeesu, bhakajima bhukongʼu. ²⁹Bhakeemirira kwa enkoro, bhakagya, bhakamuruusya mumugi gwabho gunú gwaringa guhagaajirwe munkuku. Bhakamuhira okuhikira ahasi ha omuhiringito omuhaari kunkuku iyo, naho bhamurekere hansi. ³⁰Nawe, akeekyukya, akahita gati yaabho, akagya gyaye.

Yeesu arakenyia ekihwi ekibhiibhi okurwa kumuntu

(Mariko 1:21-28)

³¹Eribhaga erindi, Yeesu akagya mumugi gwa Kaperinaumu, mukyaro kya Gariraaya. Orusiku rwa Esabhato, akasoha mwisinagogi, akaamba okwihigirya abhantu. ³²Abhantu bhayo bhakaruguura bhukongʼu eguru ya ameehigiryo gaaye, kwa okubha yaaringa areehigirya kwa obhutungi.

³³Na mwisinagogi muyo, yaaringa-mo omuntu umwi unú ajuuriibhwe na ekihwi ekibhiibhi. Ekihwi kiyo, kikakuura na okujiirira kwa eriisi rya okuribhya amatwi, ega, ³⁴“Uuwe, Yeesu wa Najareeti, otige okutunyankya bheetu! Bhoono, uujiri okutusikya? Nkumanyiri! Uuwe m-Murabhu wa Waryubha!”

³⁵Yeesu akakikemera ekihwi kiyo ega, “Kira! Nuurwe kumuntu unu!” Rumwigo, ekihwi kiyo kikamugwisya hansi, embere ya abhantu bhayo bhonsego. Kimwi, kikamurwa-ko bira okumunyahaara kora ahake.

³⁶Abhantu bhonsego bhakaruguura bhukongʼu, bhakabhuuranʼya ega, “M-mangʼana-ki ganu? Kwa okubha kwa obhutungi na obhuturo, arakenyia ebhihwi ebhibhiibhi bhirwe kubhantu, na bhirabharwa-ko!” ³⁷Kwa ego, amangʼana eguru ya Yeesu, gakabha ganyarageeni bhukongʼu, mukyaro kyonsego.

Yeesu arahwenʼya abharweri abhaaru

(Mataayo 8:14-17; Mariko 1:29-34)

³⁸Mbe, Yeesu akarwa mwisinagogi, akasoha munyumba ya omuntu umwi unú yaabhirikirwanga Simoni.4:38 Simoni. Simoni uyo eriina erindi yaabhirikirwanga Petero. Ngʼinabhyara waabho Simoni, yaaringa na ehooma enduru. Abhantu bhanú bhaaringa munyumba muyo, bhakamusabha Yeesu amuhwenʼye. ³⁹Yeesu akasuntara akeemirira haangʼi nawe, akaikaanʼya ehooma iyo, rumwigo, omukari uyo akahwena. Nho, akeemuka, akaamba okubhakorera ebhyakurya.

⁴⁰Eribhaga eryubha ryaringa rirasikira, orusiku rwa Esabhato rwaringa rurahwa. Abhantu bhakareetera Yeesu abharweri bhaabho bhonsego bha amarweri amanga amaaru. Yeesu akabhatuurira amabhoko gaaye kira oumwi, akabha arabhahwenʼya. ⁴¹Hamwi na gayo, Yeesu akakenyia ebhihwi ebhibhiibhi okurwa kubhantu abhandi abhaaru, bhyajiiriranga bhiragamba ega, “Uuwe m-Mwana wa Waryubha!” Nawe, Yeesu akabhikaanʼya na ataabhiikiririrya okugendererya okugamba ego, kwa okubha bhyaringa bhimanyiri ega, ngʼo Kiristu Omutuurya.

Yeesu araraarika mukyaro kya Yudea

(Mariko 1:35-39)

⁴²Hanú bhwakya, Yeesu akeemuka hayo, akagya kabhejyo okusabha. Omuganda gwa abhantu gukabha guramutuna. Hanú bhaamunyoora, bhakeenda okumukaanʼya atabhatiga. ⁴³Nawe, Yeesu akabhakeerya ega, “Ndeenderwa ngye mumigi egindi kweki, mbenga ndaraarika amangʼana amajomu eguru ya obhukama bhwa Waryubha,4:43 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. kwa okubha, gayo ngo gaakora nkatumwa.”

⁴⁴Nho, Yeesu akagendererya okuhitira mukyaro kya Yudea,4:44 Mukyaro kya Yudea. Amangʼoore agandi ga akare aga Ekiyunani garagamba ega, mukyaro kya Gariraaya. araraarikira abhantu amangʼana amajomu gayo mumasinagogi gaabho.

Yeesu araamba okusora abheehigira bhaaye

(Mataayo 4:18-22; Mariko 1:16-20)

¹Orusiku rumwi, Yeesu yaaringa yeemiriiri kumurambo gwa enyanja ya Genejareeti,5:1 Enyanja ya Genejareeti. Kwa eriina erindi erabhirikirwa enyanja ya Gariraaya. areehigirya omuganda gwa abhantu, eringʼana rya Waryubha. Abhantu bhayo bhakabha bharamwikumirira, okuhikira bhakamuhiga, naho bhamwitegeerere. ²Yeesu akarora amaato gabhiri, kumurambo gwa enyanja iyo. Abhategi bheekiri-mo, kwa okubha bhoogyanga emitego gyabho. ³Akariina mubhwato obhumwi, obhwa Simoni, akamukeerya ega, “Bhusuntarye hake munyanja.” Mbe, akeekara muyo, akagendererya okwihigirya abhantu.

⁴Hanú yaamara okubheehigirya, akakeerya Simoni, “Ruga obhwato tugende bhuribha, mwituumye emitego gyenyu, mutege, naho munyoore eginswi.” ⁵Simoni akamukyukya ega, “Uuwe Omukuru weetu, twakoreri emirimu kwa ekituunyo obhutiku okukya, bira okunyoora ekintu! Nawe, kwa okubha nuuwe ogambiri, ndagiituumya emitego mumanji.” ⁶Mbe, Simoni na abharikyaye bhakeetuumya emitego gyabho mumanji, bhakatega, bhakagwatya eginswi eginjaru bhukongʼu, okuhikira emitego gyabho gikaamba okutaamuka. ⁷Bhakanungira amabhoko abharikyabho bha obhwato obhundi, bhaaje okubhabheera. Hanú bhaaja, bhakeejurya amaato gonsego gabhiri eginswi, okuhikira gakeenda okusika.

⁸Simoni Petero hanú yaarora ego, akatema hansi ebhiru embere ya Yeesu, akamukeerya ega, “Omukuru, ntakwenderwa okubha hamwi na uuwe, ogende, kwa okubha oni m-muntu owa obhusarya!” ⁹Simoni yaagamba amangʼana gayo, kwa okubha weeki, hamwi na abharikyaye bhanú yaaringa nabho, bhaaringa bharuguuriri, eguru ya obhwaru bhwa eginswi ginú bhaaringa bhagwatirye. ¹⁰Mubhwato obhundi bhaaringa-mo Yakobho na Yoana, abhaana bha Jebhedayo, bhanú bhaaringa bhagwateeni na Simoni okukora ebhyasara. Bhonse bhakaruguura kuganú geebhuka. Yeesu akamukeerya Simoni, “Tiga okoobhoha! Okwambira bhoono, oraabhe omutegi wa abhantu.”5:10 Omutegi wa abhantu. Ensonga yaaye niiga, aruusye abhantu okurwa mubhusarya bhwabho na okubhakumanʼya hamwi mumuganda gwa abhantu bha Waryubha.¹¹Mbe, Simoni na abharikyaye bhakahindya amaato kumurambo, bhakatiga obhuniibhi bhwabho bhonsego, bhakamusoorana Yeesu.

Yeesu arahwenʼya omugenge

(Mataayo 8:1-4; Mariko 1:40-45)

¹²Yeesu hanú yaaringa mumugi gumwi, rumwigo, akaaja-ho omuntu umwi. Omuntu uyo, yaaringa omugenge omubhiri omugima. Hanú yaarora Yeesu, akatema hansi ebhiru embere yaaye, akahiinya obhusu bhukahika hansi, akamukomererya ega, “Ee Omukuru, nyoore oreenda okunkuunʼya, oratura okunhwenʼya!” ¹³Yeesu akeenura okubhoko kwaye, akamukuunʼya, akamukeerya ega, “Ndeenda ohwene, iraama!” Hayohayo, akahwena obhugenge bhwaye.

¹⁴Yeesu akamukaanʼya ega, “Otamukeerya omuntu wowonse amangʼana ganu! Nawe, genda wiyorokye kumusyengeri,5:14 Kumusyengeri. Okuringʼaana na amaragiriryo ga Waryubha, omusyengeri ngʼo yaaringa areemiririra omuntu yeeraame obhugenge. Maaha mukitabho kya Abharaawi 14:1-32. oruusye ekimwenso kya ego amaragiriryo ga Musa garagamba, naho worokye abhantu ega, wiraamiri.”

¹⁵Kora ego, eringʼana eguru ya Yeesu, rikagendererya okunyaragana bhukongʼu. Abhantu abhaaru bhakabha bhareekumanʼya, naho bheetegeerere ameehigiryo gaaye, na okuhwenibhwa amarweri gaabho. ¹⁶Kora ego, Yeesu yaaringa arabhatiga, aragya kabhejyo, akabha arasabha Waryubha.

Yeesu arahwenʼya omurweri wa omujimu

(Mataayo 9:1-8; Mariko 2:1-12)

¹⁷Orusiku rumwi, Yeesu hanú yaaringa areehigirya abhantu munyumba, Abhafarisaayo5:17a Abhafarisaayo. Bhaaringa m-muganda gwa abhatungi bha edini ya Abhayahudi. Bhaaringa bharagwata bhukongʼu amaragiriryo ga Waryubha. Maaha Abhafarisaayo mu Moonjooro eguru ya Amangʼana Amakongʼu. hamwi na abheehigirya bha amaragiriryo5:17b Abheehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. bhaaringa-mo bheekeeri. Bhaaringa bhaajiri okurwa kira ekijiji kya mubhyaro bhya Gariraaya na Yudea, na kora okurwa mumugi gwa Yerusaremu. Yeesu yaaringa na obhuturo okurwa ku Mukuru Waryubha, naho ahwenʼye abhantu.

¹⁸Mbe, bhakaaja-ho abhasaaja, bhagegeri omurweri wa omujimu kwisayenge. Bhakasakya okumusohya munyumba, bhamutuure embere ya Yeesu. ¹⁹Nawe bhataanagya, kwa ekisigo kya omuganda omunene gwa abhantu bhanú bhaaringa bheekumeenʼye mukiseku harya. Nho bhakariina engaji okugya eguru kurusara rwa enyumba, bhamugegeri omurweri uyo kwisayenge ryaye.5:19 Bhakariina engaji okugya eguru kurusara rwa enyumba, bhamugegeri omurweri uyo kwisayenge ryaye. Kwibhaga rya Yeesu abhantu bhaahagaajanga eginyumba gyabho, bhararaarya egimbaau kwikindaasi kurusumo rwa okumuunyira-ko, bhaakoranga na egingaji gya okuriina-ko. Bhakahaanyura ahasi hakego kurusara, bhakamwituumya embere ya Yeesu, enu areeri kwisayenge ryaye, gati ya omuganda gwa abhantu. ²⁰Hanú Yeesu yaarora ekikorwa kya abhantu bhayo, akamanya ega, bhaaringa na eimani, akamukeerya omurweri uyo ega, “Musaani, wabhiirwe obhusarya bhwaho!”

²¹Mbe, abheehigirya bha amaragiriryo na Abhafarisaayo bhayo, bhakaamba okubhuuranʼya ega, “Niwi unu? Ndeegwa aragamba amangʼana ga okumujabhura Waryubha? Atariho omuntu unú aratura okwabhira obhusarya, nawe Waryubha omwenego!”

²²Yeesu akamanya ganú bhaaringa bhareeganirirya, akabhabhuurya ega, “Kwaki mureeganirirya ego, mumitima gyenyu? ²³Erinyoohu n-diiha? Okumukeerya omurweri ega, ‘Wabhiirwe obhusarya bhwaho,’ kasi okumukeerya ega, ‘Imirira ogende’? ²⁴Nawe, ndeenda mumanye ega, Omwana wa Adamu,5:24 Omwana wa Adamu. Kwa okutumira eriina riyo, Yeesu yaaringa areegamba omwene. Ensonga ya eriina riyo niiga, omuntu unú yaahaanwa obhuturo okurwa ku Waryubha. Maaha mukitabho kya Danyeri 7:13-14, kasi maaha Omwana wa Adamu mu Moonjooro eguru ya Amangʼana Amakongʼu. weeki yaana obhuturo bhwa okwabhira obhusarya mukyaro hanu.” Hanú yaamara okugamba gayo, akamukeerya omurweri uyo ega, “Ndakukeerya ega, imuka! Witiike erisayenge ryaho, ogende iika owaaho.”

²⁵Hayohayo, omuntu uyo akeemirira embere ya abhantu, akeetiika erisayenge ryaye, akagya iika enu aramugungya Waryubha. ²⁶Abhantu bhonsego, bhakaruguura bhukongʼu na okugwatwa na obhoobha. Hamwi na gayo, bhakamugungya Waryubha, bharagamba ega, “Bhamure! Reero, turuuji ekika!”

Yeesu aramubhirikira Raawi amusoorane

(Mataayo 9:9-13; Mariko 2:13-17)

²⁷Hanú gayo gaahwa, Yeesu akarwa munyumba, akarora omutobhya umwi wa erigooti, eriina ryaye Raawi, yeekeeri mukihuuna kyaye kya okutobherya erigooti. Hayo, Yeesu akamukeerya, “Nsoorana!” ²⁸Rumwigo, Raawi akeemuka, akatiga kira ekintu, akabha aramusoorana Yeesu.

²⁹Eribhaga erindi, Raawi akakorera Yeesu enyangi enene iika owaaye. Munyumba munu bhaaringa bheekumeenʼye-mo abhatobhya bha erigooti abhaaru, na abhantu abhandi bhakabha bhararya hamwi kumeja. ³⁰Ekakora Abhafarisaayo, na abheehigirya bhaabho bha amaragiriryo, bhagye okwingʼeheerya kubheehigira bha Yeesu ega, “Ndeegwa, murarya na okunywa hamwi na abhatobhya bha erigooti5:30a Abhatobhya bha erigooti. Abhayahudi abhaaru bhaaringa bharabhajeera bhukongʼu abhatobhya bha erigooti, kwa okubha bhaabhandiriryanga abhantu okuriha erigooti okukira kya ego yeenderwanga. Kiyo nkyo kyakora abhantu bhakamaaha abhatobhya bha erigooti ega, m-basarya. Maaha Abhatobhya bha erigooti mu Moonjooro eguru ya Amangʼana Amakongʼu. na abhakori bha obhusarya5:30b Abhakori bha obhusarya. Abhafarisaayo bhaaringa bharagwata bhukongʼu amaragiriryo ga Waryubha. Bhanú bhataaringa bharagagwata amaragiriryo na egimiira gyabho ginú bhoongerya, bhaabhabhirikiranga ega, abhakori bha obhusarya.?”

³¹Yeesu akabhakyukya ega, “Abhantu bhanú bhataringi abharweri bhatakwenda omureri, nawe abharweri mbo bharamwenda! ³²Egoego, oni nonse ntaajiri okubhirikira abhantu bhanú bhareerora ega, m-baheene, nawe, niijiri okubhirikira abhasarya bhamwihunjurire Waryubha.”

Yeesu araringʼaanʼya ameehigiryo ga akare na amahya

(Mataayo 9:14-17; Mariko 2:18-22)

³³Abhantu bhayo, bhakamukeerya Yeesu ega, “Abheehigira bha Yoana Omubhatiiji bhareeyima ebhyakurya kaaru, eribhaga oranyoora bharamusabha Waryubha. Kora abheehigira bha Abhafarisaayo bhonse, bharakoranga egoego. Nawe abhaaho, ndeegwa bhatakwiyima, bharagendererya okurya na okunywa!”

³⁴Yeesu akabhakyukya ega, “Muratura egaki okubhakora abhageni bhanú bharaarikirwe mubhwenga bheeyime ebhyakurya hanú bharingi hamwi na omuteti? ³⁵Nawe, eginsiku giriija, ginú omuteti ariruusibhwa gati ya abhageni bhaaye. Hayo nho, bhariiyima okurya ebhyakurya.”

³⁶Yeesu akabhakeerya ekirengyo ekindi, ega, “Atariho omuntu unú arabhutura ekiraka okurwa kumwenda omuhya, naho akitumire kumwenda omugotu. Nyoore araakore ego, arabha ataamwiri omwenda gwaye omuhya. Hamwi na gayo, ekiraka kya omwenda omuhya kiyo, kitaahunkane na omwenda omugotu.

³⁷“Na atariho omuntu unú aratuura edivai enhya muginsaho gya amaseero amagotu. Nyoore araakore ego, edivai enhya eraagibhimbye okuhikira gibhaaruke, edivai iitike, na eginsaho giyo ngiraasarike. ³⁸Nawe edivai enhya, ereenderwa etuurwe muginsaho eginhya!

³⁹“Omuntu unú anariri ebhintu bhya akare, oranyoora atakwenda ebhintu ebhihya. Aragamba ega, ‘Ebhya akare mbyo ebhijomu!’”5:39 Ensonga ya Yeesu niiga, abhantu abhandi bharyanga amangʼana gaaye amahya, kora bhakyari okumanya ensonga yaago. Bhariibhamba eimani yaabho eya akare na bhataryenda ekintu ekindi.

Yeesu ngʼo Omukuru wa orusiku rwa Esabhato

(Mataayo 12:1-8; Mariko 2:23-28)

¹Orusiku orumwi rwa Esabhato, Yeesu hamwi na abheehigira bhaaye, bhaaringa bharahita mumigunda gya egingano. Abheehigira bhaaye, bhaabhunanga ebhigara bhya egingano bhakakuuta kwa amabhoko bhakarya eginheke.

²Mbe, Abhafarisaayo abhandi bhakabhabhuurya ega, “Ndeegwa, murakora ganú gatakwikiriribhwa okukoreka orusiku rwa Esabhato!”6:2 Orusiku rwa Esabhato. Rwaringa n-dusiku rwa okumuunya na okumusyengera Waryubha. Eteekiriribhwa okukora emirimu gyogyonse. Maaha mubhitabho bhya Okuhuruka 20:8-11, 34:21; Obhuhiituki bhwa Amaragiriryo 5:12-15, 23:25, kasi maaha Esabhato mu Moonjooro eguru ya Amangʼana Amakongʼu.

³Yeesu akabhakyukya ega, “Bhoono, bheenyu mutarasoma mu Mangʼoore Amarabhu kya ego Daudi yaakora, hanú weeki na abharikyaye bheegwa omweko.6:3 Maaha mukitabho kya 1 Samweri 21:1-6.⁴Weeki yaasoha munyumba ya Waryubha, akagega emikaate ginú gyaringa giteerwe embere ya Waryubha, akarya! Na akahaana-ko abharikyaye. Kora ego, yaangʼoorwa mumaragiriryo ganú Musa yaahaanwa okurwa ku Waryubha ega, abhantu bhanú bheekiririibhwe okurya emikaate gya ekabhira inu m-basyengeri abheenego.” ⁵Yeesu akoongerya okugamba ega, “Omwana wa Adamu ngʼo Omukuru wa Esabhato.”

Yeesu aramuhwenʼya omuntu orusiku rwa Esabhato

(Mataayo 12:9-14; Mariko 3:1-6)

⁶Orusiku orundi rwa Esabhato, Yeesu akasoha mwisinagogi, akaamba okwihigirya abhantu. Mwisinagogi muyo, yaaringa-mo omuntu umwi, unú okubhoko kwaye kwa obhuryo kwaringa na omujimu. ⁷Kweki, bhaaringa-mo abheehigirya bha amaragiriryo na Abhafarisaayo, bhaaringa bharamaahirira Yeesu, bharore nyoore Yeesu araamuhwenʼye omuntu, orusiku rwa Esabhato, naho bhanyoore omweya gwa okumujongera.

⁸Nawe, Yeesu akabha amanyiri ganú bhaaringa bhareeganirirya. Kwa ego, akamukeerya omuntu wa okubhoko kwa omujimu, “Njo, wimirire gatigati hanu.” Omuntu uyo akaaja, akeemirira gati yaabho.

⁹Nho, Yeesu akabhabhuurya abhantu bhayo, “Ndabhabhuurya bheenyu, okuringʼaana na amaragiriryo ga Waryubha, n-diiha erijomu orusiku rwa Esabhato, okukora amajomu kasi amabhiibhi? Okutuurya obhuhoru kasi okusikya?” ¹⁰Akabhamaahirira abhantu bhonsego egimbaara gyonsego. Hanú yaamara, akamukeerya omuntu uyo ega, “Imya okubhoko kwaho.” Omuntu uyo hanú yeemya okubhoko kwaye, rumwigo, kukahwena. ¹¹Abhafarisaayo bhayo, bhakajima bhukongʼu. Bhakabhuuranʼya kya ego bharaamukorere Yeesu amabhiibhi.

Yeesu arasora abhatumwa ekumi na bhabhiri

(Mataayo 10:1-4; Mariko 3:13-19)

¹²Kuginsiku giyo, Yeesu akariina munkuku, okusabha Waryubha, akasabha obhutiku kyo. ¹³Na hanú bhwakya, akabhirikira abheehigira bhaaye. Gati yaabho akasora-mo ekumi na bhabhiri, akabhatoga abhatumwa.6:13 Abhatumwa. Maaha eringʼana rinu mu Moonjooro eguru ya Amangʼana Amakongʼu. Abhatumwa bhayo, m-banu,

¹⁴Simoni unú Yeesu yaamutoga Petero, Andurea omumura waabho Simoni, Yakobho, Yoana, Firipo, Bhatoromayo, ¹⁵Mataayo, Tomaso, Yakobho omumura wa Arifayo, Simoni oumwi wa ekyama kya Abhajeroote,6:15 Simoni oumwi wa ekyama kya Abhajeroote. Abhajeroote ni-riina rya Abhayahudi rinú bhaabhirikiranga omuntu unú yaaringa arwaniri eriihe rya okwiyagaara kwa ekyaro kyaye okurwa mubhutungi bhwa Abharuumi.¹⁶Yuda omumura wa Yakobho, na Yuda Esikariote unú yaamara akamuriira eniku Yeesu.

Yeesu arabhahwenʼya abharweri abhaaru

(Mataayo 4:23-25)

¹⁷Yeesu akeeka okurwa munkuku, hamwi na abheehigira bhaaye. Na hanú yaahika ahasi ha orwanjaare, akeemirira. Ahasi hayo bhaaringa bheekumeenʼye-ho abheehigira bhaaye abhaaru na omuganda gwa abhantu abhandi okurwa egimbaara gyonsego gya ekyaro kya Yudea na mumugi gwa Yerusaremu, na okurwa kumurambo gwa kumigi gya Tiro na Sidoni. Abhantu bhayo bhaaja hayo, okumwitegeerera Yeesu na okuhwenibhwa amarweri gaabho. ¹⁸Kora bhanú bhaaringa bharanyankibhwa na ebhihwi ebhibhiibhi, akabha arabhahwenʼya. ¹⁹Abhantu bhayo bhonsego, bhaaringa bhareenda okumukuunʼya, kwa okubha yaaringa na eginguru gya okubhahwenʼya.

Ameehigiryo eguru ya enonkwe na enyanko

(Mataayo 5:1-12)

²⁰Yeesu akabhamaahirira abheehigira bhaaye bhayo, akabhakeerya ega,

“Nyakara bheenyu abhatobhu,

kwa okubha obhukama bhwa Waryubha m-bwenyu.

²¹Nyakara bheenyu, bhanú muuna enjara bhoonwego,

kwa okubha Waryubha aribheegutya.

Nyakara bheenyu, bhanú murakuura bhoonwego,

kwa okubha muriseka.

²²Nyakara bheenyu, nyoore abhantu bharibhajimira, na okubhaahura,

nyoore bharibhatuka na okubhakeerya ega, bheenyu m-basarya,

kurusumo rwa Omwana wa Adamu.

²³Hanú gayo garikoreka, orusiku ruyo, mujomerwe,

kya ego muratema engʼoma okubhina,

kwa okubha omutuho gwenyu murwire m-munene.

Kweki, bhajaaji bha abhantu bhayo, bhaaringa bharabhanyankya abharooti bha Waryubha egoego.

²⁴Nawe, murikirora-ko bheenyu abhaniibhi,

kwa okubha mumariri okunyoora obhuniibhi bhwenyu.

²⁵Murikirora-ko, bheenyu bhanú mureeguta bhoonwego,

kwa okubha muribhanga mureegwa omweko.

Murikirora-ko, bheenyu bhanú muraseka kwa okujomerwa bhoonwego,

kwa okubha murikuura na okufumba.

²⁶Murikirora-ko, bheenyu nyoore abhantu bharabhagungya,

kwa okubha kora bhajaaji weenyu, niigo bhaaringa bharakorera abharooti bha obhubheehi.

Ameehigiryo eguru ya okuhanja abhasigu

(Mataayo 5:38-48, 7:12)

²⁷“Ndabhakeerya bheenyu bhanú muranyitegeerera ega, muhanje abhasigu bheenyu. Na abhantu bhanú bharabhajimira, bheenyu mubhaserenʼye. ²⁸Na bhanú bharabheehiima na okubhanyankya, bheenyu mubhasabhire ku Waryubha, abhanonke.

²⁹“Hanú omuntu araakuteme kumboto eimwi, omukyukirye na eindi. Na hanú omuntu araakuruusye ekabhuuti yaaho, omutigire agege na esyati. ³⁰Wowonse unú araakusabhe ekintu, omuhaane. Na hanú omuntu araakuruusye ebhintu bhyaho, otamusabha akuhunjukirye. ³¹Mubhenga murakorera abhantu abhandi kya ego bheenyu bhonse mureenda bhabhakorere.

³²“Nyoore muraahanje bhanú bhabhahanjiri bheenyu, murinyoora obhwera-ki? Kora abhasarya bharahanja bhanú bhabhahanjiri! ³³Kweki, nyoore muraserenʼya bhanú bharabhaserenʼya abheenego, murinyoora obhwera-ki? Kora abhasarya bharakora ego! ³⁴Kweki, hanú muraabhahaane esiiri bhanú mureeganirirya ega, bharibhahindirya abheenego, murinyoora obhwera-ki? Kora abhasarya bharahaana esiiri abharikyabho. Oranyoora bhareeganirirya ega, bhayo bharibhahindirya ebhintu bhyabho bhyonsego!

³⁵“Nawe bheenyu, muhanje abhasigu bheenyu, na mubhaserenʼye. Mubhahaane esiiri, mutige okwiganirirya okuhindiribhwa. Waryubha aribhahaana omutuho omunene, na muribha abhaana bha heene kuweeki, Omukuru wa bhyonsego. Kwa okubha, Waryubha araserenʼya kora bhanú bhatakumugungya, na abhakori bha obhusarya.

³⁶“Mubhe abhantu bhanú bharaabhira abhandi, kya ego Eseweenyu araabhira abhantu.

Ameehigiryo eguru ya okubhuturira ekiina abhandi

(Mataayo 7:1-5)

³⁷“Mutabha murabhabhuturira ekiina abhandi, naho Waryubha atariija okubhabhuturira ekiina na bheenyu. Mutagamba ega, abhandi bhabhuturirwe ekiina, nho na bheenyu mutaribhuturirwa ekiina. Mwabhire abhantu bhanú bhabhasariirye, nho na bheenyu muryabhirwa. ³⁸Muhaane abhantu kinú bhareenda, nho murihaanwa omutuho omunene, kya omuntu unú arahaanwa endengo inú iijwiri na okwigatirwa, esingisiibhwe ereetikirira. Kwa okubha, endengo iryairya murarengera abhandi, ngʼyo Waryubha aribharengera bheenyu.”

³⁹Yeesu akabhakeerya ekirengyo ega, “Omuhoku aratura okoorokererya omuhoku omurikyaye? Ndamanya bhonsego bhabhiri bharaagwe mwituko!

⁴⁰“Omwihigira atakumukira omwihigirya waaye. Nawe, omwihigira hanú arimara okwihigiribhwa, nho arihunkana na omwihigirya waaye.

⁴¹“Kwaki oramaaha ekingʼeningʼeni kinú kiringi muriiso rya omurikyaho, nawe, otakurora ensonko inú eringi muriiso ryaho? ⁴²Kasi, oratura egaki okumukeerya omuhiiri waaho ega, ‘Omuhiiri waani, tiga nkuruusye ekingʼeningʼeni kinú kiringi muriiso ryaho,’ enu uuwe omwene otakurora ensonko inú eringi muriiso ryaho? Uuwe nyarwambe! Iruusya mbere ensonko inú eringi muriiso ryaho. Nho, oraature okurora bhujomu, na okuruusya ekingʼeningʼeni kinú kiringi muriiso rya omuhiiri waaho.

Abhantu bharamanyikana kwa amangʼana gaabho

(Mataayo 7:16-20, 12:33-35)

⁴³“Gutariho omuti omujomu gunú guraama emisumo emibhiibhi. Gutariho omuti omubhiibhi, gunú guraama emisumo emijomu. ⁴⁴Abhantu bhatakugesa emisumo gya emitini kumiti gya amahwa, kasi bhatakugesa egijabhibhu kumiti gya emichongoma. Nawe kira omuti, guramanyikana kwa emisumo gyago.

⁴⁵“Egoego, omuntu wa enkoro enjomu aragamba amangʼana amajomu, okurwa kumajomu ganú geejwiri mumutima gwaye. Nawe, omuntu omusarya aragamba amangʼana amabhiibhi, okurwa kumabhiibhi ganú geejwiri mumutima gwaye. Kira omuntu arahaira amangʼana ganú geejwiri mumutima gwaye.

Ekirengyo kya abhahagaaji bhabhiri

(Mataayo 7:24-27)

⁴⁶“Kwaki murambirikira, ‘Omukuru, Omukuru,’ nawe, amangʼana ganú ndabhakeerya, mutakugakora? ⁴⁷Omuntu wowonse unú araaja kuoni, areetegeerere amangʼana gaani na okugakora arahunkana na ekirengyo kinu. ⁴⁸Arahunkana na omuhagaaji wa enyumba, unú yaasimba hansi akahika kwitare, akahagaaja obhurusa eguru ya eritare. Mbe, oruuji hanú rweejura, amanji gakaitematema enyumba. Kora ego, gataaisingisya, kwa okubha yaaringa ehagaajirwe bhujomu.

⁴⁹“Nawe, wowonse unú areegwa amangʼana gaani, enu atakugagwata, uyo arahunkana na omuntu unú yaahagaaja enyumba yaaye eguru ya obhutoto obhwenego, bira obhurusa. Mbe, oruuji hanú rweejura, amanji gakatematema enyumba iyo, eribhaga ekego, ekabhaaruka, yonsego ekagwa hansi.”

Eimani ya omukuru wa abhasirikare

(Mataayo 8:5-13)

¹Yeesu, hanú yaamara okukeerya omuganda gwa abhantu amangʼana gayo gonsego, akasoha mumugi gwa Kaperinaumu. ²Mumugi guyo, yaaringa-mo omukuru wa abhasirikare bha Ekiruumi. Omukuru uyo, yaaringa na omukori wa emirimu waaye, na yaaringa amuhanjiri bhukongʼu. Nawe, omukori wa emirimu uyo, yaaringa omurweri omusingu.

³Mbe, omukuru uyo, hanú yeegwa amangʼana eguru ya Yeesu, akatuma abhakaruka bha Ekiyahudi ku Yeesu ega, “Mugende mumusabhe yaaje okuhwenʼya omukori wa emirimu waani.” ⁴Abhakaruka bhayo, hanú bhaahika ku Yeesu, bhakamukomererya bhukongʼu ega, “Omukuru uyo, areenderwa omutuurirye, ⁵kwa okubha ahanjiri ekyaro kyetu, na ngʼo yaatuhagaajira erisinagogi.”

⁶Mbe Yeesu, akeemuka hamwi na abhakaruka bhayo, okugya iika owa omukuru uyo. Hanú bhaahika haangʼi na enyumba yaaye, omukuru uyo akatuma abhasaani bhaaye ku Yeesu, bhamukeerye ega, “Uuwe Omukuru Yeesu, tiga okwinyankya. Ntakwenderwa uuwe osohe iika owaani. ⁷Na nkyo nduuji ega, ntaana obhwera kora niije kuuwe. Nawe, ogambe eringʼana rimwi ego, omukori wa emirimu waani ahwene. ⁸Kora oni ndingi insi ya abhakuru bhaani, na niina abhasirikare bhanú bharingi insi waani. Hanú ndaakeerye oumwi ega, ‘Genda,’ rumwigo aragya. Na hanú ndaakeerye oundi, ‘Njo,’ rumwigo araaja. Na omukori wa emirimu waani, ndaamukeerye ega, ‘Kora ekintu nyabhurebhe,’ niigo arakora.” ⁹Yeesu hanú yeegwa gayo, akaruguura bhukongʼu. Akeekyukirya omuganda gwa abhantu bhanú bhaaringa bharamuseeta, akagamba ega, “Ndabhakeerya ega, kora gati ya Abhaisiraeri bhonsego, nkyari okurora omuntu wowonse owa eimani enene kya unu!” ¹⁰Mbe, abhasaani bhayo, hanú bhaahinda iika owa omukuru uyo, bhakanyoora omukori wa emirimu ahweneri.

Yeesu arahyukya omumura unú akwiri

¹¹Eribhaga erindi ekego, Yeesu akagya mumugi gwa Naini, aringi hamwi na abheehigira bhaaye, na abhantu abhandi abhaaru. ¹²Na hanú yaahika haangʼi mukiita kya omugi, akasikana na abhantu bhagegeri omuku wa ekisaaja. Omusaaja uyo, yaaringa omumwemwe, na ngʼina waabho, yaaringa omusino. Omukari uyo, hamwi na abhantu abhaaru bha mumugi guyo, bhaagyanga okumubhiika.

¹³Omukuru Yeesu, hanú yaamurora omusino uyo, akagwatwa ekyabhira, akamukeerya ega, “Tiga okukuura.” ¹⁴Akasuntarira erisayenge rinú omuku yaaringa-ko, akarikuunʼya. Na abhantu bhanú bhaaringa bharigegeri, bhakeemirira. Yeesu akagamba ega, “Mura, ndakukeerya ega, hyuka!” ¹⁵Rumwigo, omusaaja uyo, akahyuka akeekara, akaamba okuhaira kweki. Nho, Yeesu akamugwatya kungʼina waabho.

¹⁶Abhantu bhayo bhonsego, bhakaruguura bhukongʼu, bhakaamba okumugungya Waryubha, bharagamba, “Omurooti omukuru arwiriri gati yeetu!” Bhakagamba kweki ega, “Waryubha yaajiri okutuurya abhantu bhaaye!” ¹⁷Amangʼana gayo, gakamanyikana bhukongʼu kukyaro kya Yudea kyonsego, na kubhyaro ebhindi bhya haangʼi.

Yoana Omubhatiiji aratuma abheehigira bhaaye ku Yeesu

(Mataayo 11:2-19)

¹⁸Eribhaga Yeesu yaaringa arakora gonsego gayo, abheehigira bha Yoana Omubhatiiji, bhakareetera Yoana amangʼana gayo gonsego. ¹⁹Yoana wonse akabhabhirikira abhabhiri gati yaabho, akabhatuma bhagye okumubhuurya Omukuru Yeesu, ega, “Uuwe nuuwe unú ariija,7:19 Uuwe nuuwe unú ariija. Amangʼana ganu garamuhairira Masiha. Ni-ringʼana rya Ekiebhurania ensonga yaaye niiga, Kiristu. Maaha Kiristu mu Moonjooro eguru ya Amangʼana Amakongʼu. kasi tuganyirire oundi?”

²⁰Ego, hanú abhabhiri bhayo bhaamuhikiira, bhakamukeerya ega, “Yoana Omubhatiiji atutumiri kuuwe, tukubhuurye ega, ‘Uuwe nuuwe unú ariija, kasi tuganyirire oundi?’”

²¹Eribhaga riyoriyo, Yeesu yaaringa arahwenʼya abhantu abhaaru amarweri gaabho. Yaahwenʼyanga abhantu bhanú bhajuuriibhwe na ebhihwi ebhibhiibhi. Na akabha arabhabheera abhahoku abhaaru bharore.

²²Nho, Yeesu akabhakyukya abheehigira bhayo ega, “Mugende mukeerye Yoana, gonsego ganú muruuji, na ganú mwigwiri. Abhahoku bhararora, abhabheeru bharagenda, abhagenge bharahwenibhwa, abharibhu bhareegwa, abhaku bharahyukibhwa, na abhatobhu bhararaarikirwa Amangʼana Amajomu ga Waryubha.7:22 Omurooti Isaaya yaaroota ega, Kiristu Omutuurya arakora emirimu giyo gyonsego. Maaha mukitabho kya Isaaya 35:5-6, 61:1.²³Nyakara omuntu unú atakubhurya eimani yaaye kuoni.”

²⁴Abhabhiri bhayo hanú bhaagya, Yeesu akaamba okubhuurya omuganda gwa abhantu eguru ya Yoana, ega, “Mwaringa muragya okumaaha-ki kukibhara? Obhunyanki bhunú bhurahuutwa na omuyaga? Tiigo-ha! ²⁵Mbe, mwaringa muragya okumaaha-ki? Omuntu unú yeebhoheri emyenda emijomu gya obhuguri? Abhantu bhanú bhareebhoha emyenda emijomu gya obhuguri, na okwijomya kwa obhwaru bhwa ebhintu bhinú bhaanabhyo, oranyoora bhareekara muginyumba eginene gya ekikama.

²⁶“Bhoono, mwagya okumaaha-ki? Mwagya okumumaaha omurooti? Obhuheene! Nawe, ndabhakeerya ega, Yoana m-mukuru okukira omurooti wowonse. ²⁷Weeki ngʼo amangʼana eguru yaaye gaangʼoorwa mu Mangʼoore Amarabhu ega, ‘Maaha, ndamutuma omuchaama waani akukangatire, naho akuseemerye enjira.’7:27 Maaha mukitabho kya Maraki 3:1.”

²⁸Yeesu akagamba kweki ega, “Oni ndabhakeerya ega, gati ya abhantu bhonsego, atariho omukuru okukira Yoana. Nawe, omuke okukira bhonsego mubhukama bhwa Waryubha, ngʼo omukuru okumukira Yoana Omubhatiiji.”

²⁹Mbe, abhantu bhayo bhonsego, hamwi na abhatobhya bha erigooti, hanú bheegwa amangʼana gayo, bhakeekirirya ega, ekiina kya Waryubha kubheene kyaringa ekijomu. Abhantu bhayo mbo bhanú Yoana abhatiijiri. ³⁰Nawe, Abhafarisaayo na abheehigirya bha amaragiriryo, bheeki, bhakaanga ganú Waryubha yeendanga, kwa okubha bhaangiri okubhatiijwa na Yoana.

³¹Yeesu akagamba kweki ega, “Bhoono, abhantu bha orwibhuro runu, mbahunkanʼye naki? M-bantu bha egaki? ³²Bharahunkana na abhaana bhanú bhareekara mumudiira, bharabhirikira abharikyabho na okubhakeerya ega, ‘Twabhatemera ekironge, nawe, mutaabhina! Twabheembira ameembo ga okufumba, nawe, mutafumbiri!’

³³“Ndagamba ego, kwa okubha, hanú Yoana Omubhatiiji yaaja, ataaringa ararya emikaate, kora okunywa edivai.7:33 Ataaringa ararya emikaate, kora okunywa edivai. Omukaate na edivai mbyo bhyaringa ebhyakurya bhya kira orusiku. Bheenyu muragamba ega, ‘Unu yaana ekihwi ekibhiibhi!’ ³⁴Na hanú Omwana wa Adamu yaajiri, weeki ararya emikaate na okunywa edivai. Bhoono bheenyu muragamba ega, ‘Mumaahe! M-muhubhaaru, kweki m-mureebhi! Na m-musaani wa abhatobhya bha erigooti na abha obhusarya!’

³⁵“Nawe, egintungwa gya Waryubha giroorokereribhwa ega, n-gya maheene kwa enjira ya amakorwa ga abhantu bhanú bharagigwata.”

Yeesu aramwabhira owa obhusarya

³⁶Yaaringa-ho Omufarisaayo umwi, unú yaabhirikirwanga Simoni. Akaraarika Yeesu yaaje okurya iika owaaye. Nho, Yeesu akasoha munyumba ya omuntu uyo, akeekara okurya ebhyakurya kumeja.³⁷Mumugi guyo, yaaringa-mo omukari umwi, unú yaaringa amanyikeeni ega, m-muntu omusarya.

Mbe, omukari uyo hanú yeegwa ega, Yeesu ararya owa Omufarisaayo, akasoha muyo na enchupa inú yaaringa na amaguta ga obhurange, aga obhuguri obhunene bhukongʼu. ³⁸Akeemirira haangʼi na amaguru ga Yeesu. Akaamba okukuura, ameesori gaaye gaatoonyanga kumaguru ga Yeesu. Akabha arageehya na egintuukya gyaye, arabhusu amaguru ga Yeesu, na okugahaka obhurange.7:38 Omukari uyo, kinú yaaringa arakora kiroorokya kya ego yaaringa aramutogoonʼya Yeesu na okumusuuka. Ekimanyiiriryo kiyo, kweki kyaringa kiroorokya obhuhanje bhunú omukari uyo, yaaringa nabho ku Yeesu. Kubhutamaduni bhwa Abhayahudi, eringʼana rinú omukari uyo yaakoranga, ryaringa rya okuruguurya.

³⁹Omufarisaayo uyo, hanú yaarora gayo, akeetegeerera munkoro yaaye ega, “Omuntu unu, akaabheeri omurooti, akaamanyiri ega, omukari unú aramukuunʼya m-muntu wa egaki. Akaamanyiri ega, weeki m-muntu omusarya!”

⁴⁰Yeesu akamukeerya, “Simoni, niina eringʼana ndeenda okukukeerya.” Wonse akamukyukya ega, “Omwihigirya, nkeerya.” Yeesu akagamba ega, ⁴¹“Bhaaringa-ho abhantu abhabhiri, bhonsego bhaaringa bharatongwa egimbirya na unú yaaringa abhaheeri esiiri. Oumwi waabho, yaaringa aheerwe esiiri ya edinari magana gataanu.7:41 Edinari magana gataanu. Egimbirya giyo gyaringa m-mariho ga omuntu oumwi kwa omwaka omugima na emyeri munaane. Maaha Edinari mu Moonjooro eguru ya Amangʼana Amakongʼu. Omurikyaye wonse, akahaanwa esiiri ya edinari mirongo etaanu. ⁴²Abhabhiri bhayo, hanú bhaabhurwa egimbirya gya okuriha egisiiri gyabho, unú yaabhahaana esiiri akabhaabhira, bhatige okumuriha. Mbe, gati ya abhabhiri bhayo, ngʼ-uuha yaamuhanja bhukongʼu okukira omurikyaye?” ⁴³Simoni akamukyukya ega, “Ndamanya, ngʼo unú yaabhirwa esiiri enene.” Yeesu akagamba ega, “Okyukirye bhwaheene.”

⁴⁴Yeesu akamwikyukirya omukari uyo, akamukeerya Simoni ega, “Orarora omukari unu? Hanú nsoheri munyumba yaaho, otaangenihirye kwa okungʼaana amanji ga okoogya amaguru gaani.7:44 Okungʼaana amanji ga okoogya amaguru gaani. Ku Bhayahudi, yaaringa egimiira okumuhaana omugeni amanji, yoogye amaguru gaaye. Nawe weeki, yoogerye amaguru gaani na ameesori gaaye, na okugeehya na egintuukya gyaye. ⁴⁵Uuwe otankeereenʼye kwa okumbusu,7:45 Otankeereenʼye kwa okumbusu. Kugimiira gya Ekiyahudi okubhusu yaaringa ekintu kinú bhaaringa bhanariri kubhasaaja hanú bhakeeranʼyanga. nawe okwambira hanú nsoheri munu, weeki akyari okurosa okumbusu amaguru gaani. ⁴⁶Otansuukiri kwa okuhaka omutwe gwani amaguta. Nawe weeki, ahakiri amaguru gaani amaguta ga obhurange! ⁴⁷Kwa ego, ndakukeerya ega, obhuhanje bhwa omukari unu m-bwaru, kwa okubha obhusarya bhwaye obhwaru bhwabhiirwe. Nawe, wowonse unú yaabhiirwe obhusarya obhuke, uyo oranyoora yaana obhuhanje obhukego.” ⁴⁸Yeesu akamukeerya omukari uyo ega, “Obhusarya bhwaho bhwabhiirwe.”

⁴⁹Abhageni bhanú bhaaringa kumeja hamwi nawe, bhakaamba okwibhuurya ega, “Unu niwi araabhira kora obhusarya?”

⁵⁰Hayo, Yeesu akamukeerya omukari uyo ega, “Eimani yaaho ekuhwenerye! Genda na omurembe.”

Abhakari bhanú bhaagendanʼyanga na Yeesu

¹Hanú gayo gaahwa, Yeesu akeemuka, akabha arahita mumigi na mubhijiji. Yaaringa araraarikira abhantu Amangʼana Amajomu eguru ya obhukama bhwa Waryubha mbaara gyonsego. Yaaringa arasoorana na abhatumwa bhaaye ekumi na bhabhiri. ²Kweki, yaagyanga na abhakari abhandi. Gati yaabho, Yeesu yaaringa abharuusirye ebhihwi ebhibhiibhi, abhandi yaaringa abhahwenerye amarweri. Gati ya abhakari bhayo, yaaringa-mo Mariamu Magidarena, unú Yeesu yaaringa aruusirye ebhihwi ebhibhiibhi muhungati. ³Kweki yaaringa-mo Yoana, muka Kuja. Kuja uyo, ngʼo yaaringa omwimiririri omukuru wa emirimu gya omukama Herode Antipa. Kweki, yaaringa-mo Susana, na abhakari abhandi abhaaru, bhanú bhaaringa bharabhabheera Yeesu na abheehigira bhaaye, kwa okuruusya ebhintu bhyabho abheene.

Ekirengyo kya omubhusuri wa egimbusuro

(Mataayo 13:1-9; Mariko 4:1-9)

⁴Orusiku rumwi, abhantu abhaaru okurwa mumigi emyaru bhakamuujira Yeesu, bhakeekumanʼya omuganda omunene. Kimwi, Yeesu akabhakeerya ekirengyo ega, ⁵“Yaaringa-ho omubhusuri umwi. Omubhusuri uyo, yaagya okubhusura egimbusuro mumugunda gwaye. Hanú yaabhusuranga, egimbusuro egindi gikagwa kunjira. Abhahiti bhakagitaja, na ebhinyonyi bhikaaja bhikagirya. ⁶Egindi gikagwa mumagina. Hanú gyamera, gikabhurwa amanji, gikooma. ⁷Egindi gikagwa gati ya emiti gya amahwa. Hanú amahwa gayo gaakiina, gakagihiga egimbusuro giyo, gikakwa. ⁸Egindi gikagwa kwirobha erijomu, gikamera na gikaama emisumo egana rimwi.”

Yeesu hanú yaamara okugamba gayo, akagamba kwa eriisi erinene ega, “Unú yaana amatwi, yeegwe!”

Yeesu aroonjoora ekirengyo kya omubhusuri wa egimbusuro

(Mataayo 13:10-23; Mariko 4:10-20)

⁹Abheehigira bha Yeesu, bhakamubhuurya ega, “Ekirengyo kiyo ensonga yaakyo niki?” ¹⁰Wonse akabhakyukya ega, “Waryubha abhatubhuriiri bheenyu okumanya ekinyerera kya obhukama bhwaye. Nawe, abhandi oranyoora ndabhakeerya kwa ebhirengyo, kya ego omurooti Isaaya yaangʼoora ega,

‘Bharaamaahe bhatarora,

na bhareegwe bhatamanya.’8:10 Maaha mukitabho kya Isaaya 6:9.

¹¹“Mbe, ensonga ya ekirengyo kiyo niiga, egimbusuro ni-ringʼana rya Waryubha. ¹²Na egimbusuro ginú gyagwira kunjira, girahunkana kya abhantu bhanú bhareegwa eringʼana rya Waryubha. Hayohayo, Erisambwa riraaja rirariruusya mumitima gyabho, bhataaja okuriikirirya, naho bhatuuribhwe.

¹³“Na egimbusuro ginú gyagwira mumagina, girahunkana kya abhantu bhanú bhareegwa eringʼana rya Waryubha, bharariikirirya kwa obhujomerwa. Nawe, kwa okubha bharahunkana na ekiimerya kinú kitaana emiri, bhareekara na eringʼana riyo, kwa eribhaga ekego. Hanú bharasakibhwa eguru ya eringʼana riyo, rumwigo bhararitiga.

¹⁴“Na egimbusuro ginú gyagwira mumahwa, girahunkana kya abhantu bhanú bhareegwa eringʼana rya Waryubha, nawe, bharanyankira obhuhoru bhwabho, na orunamba rwa obhuniibhi, na okwijomya kubhuhoru bhwabho. Gayo ngo garahiga eringʼana rya Waryubha, ryonse ritakwibhura emisumo gyogyonse emijomu.

¹⁵“Na egimbusuro ginú gyagwira mwirobha erijomu, girahunkana kya abhantu bhanú bhareegwa eringʼana rya Waryubha, bhararigwata kwa omutima gwa heene, na kwa egintungwa eribhaga ryonsego na bhararuusya emisumo kwa obhwikongʼererya.

Ekirengyo kya ekorobhoi

(Mariko 4:21-25)

¹⁶“Atariho omuntu unú aragwatya ekorobhoi, kimwi aikundikirye na eridebhe, kasi aituure mwirungu rya obhuriri. Araituura kukisunga, naho abhantu bhanú bharasoha munyumba, bharore obhurabhu.

¹⁷“Egoego, ryoryonse rinú ribhisirwe, ribhisirwe naho ritubhurwe, kweki ryoryonse rinú rikundikiriibhwe, rikundikiriibhwe naho ritubhurwe. ¹⁸Ego, ganú mureegwa, mugeetegeerere bhujomu! Omuntu wowonse unú areetegeerera eringʼana rya Waryubha na okurimanya, Waryubha aramubheera na okumoongerya okurimanya bhukongʼu. Nawe, nyoore omuntu atakwitegeerera eringʼana rya Waryubha, kora amake ganú areeganirirya ega, amanyiri, Waryubha arimuruusya.”

Ngʼina waabho na abhaana bhaabho Yeesu

(Mataayo 12:46-50; Mariko 3:31-35)

¹⁹Eribhaga erindi, ngʼina waabho Yeesu na abhaana bhaabho, bhakaaja okumurora. Nawe bhataamuhikiira, kwa okubha abhantu abhaaru bhaaringa bhamwihundiriri. ²⁰Abhantu abhandi bhakamukeerya Yeesu ega, “Ngʼina weenyu na abhaana bheenyu, bharingi kibhara, bhareenda okukurora.”

²¹Yeesu akabhakyukya ega, “Maayi na abhaana bheetu m-bonsego bhanú bhareegwa eringʼana rya Waryubha na okurigwata.”

Yeesu aratendya omuyaga omuhaari munyanja

(Mataayo 8:23-27; Mariko 4:35-41)

²²Orusiku rumwi, Yeesu akariina mubhwato, hamwi na abheehigira bhaaye. Akabhakeerya ega, “Twambuke enyanja tugye ngʼambu.” Mbe, bhakeemuka.

²³Hanú bhaambukanga, Yeesu akaraara akeehiribhwa. Omuyaga omuhaari gukahuuta kunyanja, obhwato bhwabho bhukaamba okwijura amanji, bhakabha mungʼanga ya okusika.

²⁴Abheehigira bhayo, bhakagya bhwangu okumubhuukya enu bharakora ekituri ega, “Omusuukwa weetu! Omusuukwa weetu! Turasika!” Kimwi, akabhuuka, akagukemera omuyaga na amabhooka, rumwigo, bhikatenda.

²⁵Mbe, akabhabhuurya ega, “Eimani yeenyu eringi-ha?” Bhakaruguura na okoobhoha bhukongʼu. Bhakabhuuranʼya ega, “Omuntu unu ngʼ-wa egaki? Arakemera kora omuyaga omuhaari na amabhooka, bhiramwigwa!”

Yeesu arahwenʼya omuntu owa ebhihwi

(Mataayo 8:28-34; Mariko 5:1-20)

²⁶Yeesu na abheehigira bhaaye, hanú bhaambuka enyanja ya Gariraaya, bhakahikirira mukyaro kya Abhagerasi, ngʼambu ya kabhiri ya ekyaro kya Gariraaya. ²⁷Yeesu hanú yeetuuma okurwa mubhwato, akasikana na omuntu umwi wa mumugi gurya, unú yaaringa na ebhihwi ebhibhiibhi. Kwa eribhaga eritambi, omuntu uyo, ateebhohanga emyenda, kweki ateekaranga iika, nawe yeekaranga mugimbihira.8:27 Mugimbihira. Yaaringa emiira ya Abhayahudi okubhiika abhantu mumasana ganú gaaringa munkuku, agandi bhaaringa bharabhaaja abheene.

^28-29Ebhihwi ebhibhiibhi bhiyo, bhyamusoheereranga kaaru. Abhantu bhaasakyanga okumwangararira, kwa okumubhoha na eminyororo na ebhirangʼani. Nawe, yaaringa arabhutura eminyororo arakenya okugya kukibhara.

Mbe, Yeesu akabhikemera ebhihwi bhiyo ega, “Mumuhaatire omuntu uyo!” Hanú yaatangirirenʼya na Yeesu, akakuura kwa eriisi. Akeeyesa bhwibhumbike embere ya Yeesu, akamukeerya kwa eriisi ega, “Uuwe Yeesu, Omwana wa Waryubha wa eguru ya bhyonsego, uuna enyanko-ki na oni? Ndakusabha ega, otannyankya!” ³⁰Yeesu akamubhuurya ega, “Eriina ryaho nuuwe-wi?” Akagamba ega, “Eriina ryani, nooni Jeshi.” Yaagamba ego, kwa okubha yaaringa asoheererwe na ebhihwi ebhyaru bhukongʼu. ³¹Ebhihwi bhiyo, bhikaamba okumwisasaama Yeesu ega, atabhikenyia bhigye okusoha mukibhohe kya amasambwa.

³²Haangʼi na embarika ya enkuku hayo, ryaringa-ho erihijo rya egimbiiji girariisya. Mbe, ebhihwi bhiyo bhikamwisasaama Yeesu ega, “Twikiririrye tugende okusoheerera egimbiiji giyo.” Yeesu akeekirirya. ³³Mbe, ebhihwi ebhibhiibhi bhiyo bhikamurwa-ko omuntu urya, bhikasoha mugimbiiji. Kimwi erihijo ryonsego rikaharamuka kumuhiringito omuhaari okurwa kunkuku, rikasoha munyanja, rikakwa chwe.

³⁴Mbe, abhariisya bha egimbiiji giyo, hanú bhaarora ganú gatuukiri, bhakakenya, bhakagya mumugi na mubhijiji, okuraarika ganú bharuuji. ³⁵Abhantu bhakagya okwimaahira abheene, amangʼana ganú gatuukiri, bhakamuhikiira Yeesu.

Hanú bhaamuhikiira, bhakarora omuntu unú ebhihwi ebhibhiibhi bhyaringa bhimurwiri-ko, yeekeeri haangʼi na Yeesu, yeebhoheri emyenda, yaana obhungʼeeni bhonsego. Kimwi abhantu bhayo, bhakoobhoha. ³⁶Abhantu bhanú bhaarora amangʼana ganú geebhuka, bhakatondera abhandi kya ego omuntu owa ebhihwi ebhibhiibhi uyo ahweniibhwe.

³⁷Abhantu bhonsego mukyaro kya Abhagerasi bhanú bhaaringa bheekumeenʼye hayo, bhakamusabha Yeesu arwe mukyaro kyabho, kwa okubha bhaaringa bhoobhoheri bhukongʼu. Kwa ego, akariina mubhwato, naho yeemuke okurwa hayo.

³⁸Omuntu unú yaaringa aruusiibhwe ebhihwi, akakomererya Yeesu ega, agye hamwi nawe. Nawe, Yeesu akaanga, akamukeerya ega, ³⁹“Genda iika owaaho, obhakeerye abhantu amangʼana amarito ganú Waryubha akukoreeri.” Nho, omuntu uyo akarwa hayo, akagenda araraarika mbaara gyonsego gya mumugi, ganú Yeesu amukoreeri.

Yeesu arahwenʼya omukari na okuhyukya omuhara

(Mataayo 9:18-26; Mariko 5:21-43)

⁴⁰Yeesu hanú yaahinda, akagenihibhwa na omuganda gwa abhantu bhanú bhaaringa bharamuganyirira.

⁴¹Hayo, akaaja-ho omuntu umwi, yaabhirikirwanga Yairo. Yairo uyo, ngʼo yaaringa omukuru wa erisinagogi. Akatema ebhiru embere ya Yeesu, akamwisasaama ega, yaaje iika owaaye, ⁴²kwa okubha omuhara waaye omumwemwe wa emyaka ekumi na ebhiri, yaaringa asingiri.

Yeesu hanú yaaringa aragya iika owaaye, omuganda gwa abhantu gukagya hamwi nawe, bhakabha bharamwihundirira bhukongʼu. ⁴³Mumuganda guyo, yaaringa-mo omukari unú yaaringa na obhurweri bhwa obhureegu, kwa eribhaga rya emyaka ekumi na ebhiri. [Yaaringa amariri ebhintu bhyaye bhyonsego kubhakumu,]8:43 Amangʼana mumabhano ganu […] gataringi mumangʼoore agandi ga akare aga Ekiyunani. nawe ataaringa-ho kora oumwi unú yaatura okumuhwenʼya.

⁴⁴Mbe, omukari uyo, akaaja enyuma ya Yeesu, akakuunʼya eripindo rya omwenda gwaye. Rumwigo, akahwena.

⁴⁵Yeesu akabhuurya omuganda guyo ega, “Niwi yankuunirye?” Abhantu bhonsego hanú bhaahakaana, Petero akamukeerya ega, “Omusuukwa weetu, m-bantu abhaaru bhanú bhakwisinguuriri na okukwihundirira.” ⁴⁶Nawe, Yeesu akagamba ega, “Mmanyiri ariho omuntu unú yankuunirye, kwa okubha ndeeyigwa nhwenerye omuntu kwa eginguru gyani.”

⁴⁷Omukari uyo, hanú yaarora ega, atakutura okwibhisa akamuujira Yeesu, ararigita.8:47 Omukari uyo, hanú yaarora ega, atakutura okwibhisa akamuujira Yeesu, ararigita. Abhayahudi bhaahura omukari unú yaarwanga amanyinga ega, m-mukonu. Ateekiriribhwa na amaragiriryo okusanga hamwi na abhandi. Omuntu akaamukuunirye, wonse akaabheeri m-mukonu. Maaha mukitabho kya Abharaawi 15:25-33. Akatema ebhiru, akamukeerya embere ya abhantu bhayo bhonsego, ekisigo kya okumukuunʼya na kya ego yaahwenibhwa. ⁴⁸Yeesu akamukeerya ega, “Omuhara, eimani yaaho ekuhwenerye. Genda na omurembe!”

⁴⁹Hanú Yeesu yaaringa akyahaira, akaaja omuntu umwi okurwa iika owa Yairo omukuru uyo wa erisinagogi. Akamukeerya ega, “Omuhara waaho, guhweri-mo. Otamunyankya kweki omwihigirya.” ⁵⁰Yeesu hanú yeegwa amangʼana gayo, akakeerya Yairo ega, “Otoobhoha! Obhe na eimani, na omuhara waaho arahwena.”

⁵¹Yeesu hanú yaahika iika owa Yairo, akakaanʼya abhantu abhandi okusoha hamwi nawe munyumba, akabheekiririrya Petero, Yoana, Yakobho, esewaabho na ngʼina waabho omuhara uyo.

⁵²Abhantu bhonsego iika hayo, bhaaringa bharakuura na okufumba oruku rwa omuhara uyo. Nawe, Yeesu akabhakeerya ega, “Mutige okukuura! Unu atakwiri, yeehiriibhwe!” ⁵³Nawe abhantu bhayo, bhakaamba okumuseka, kwa okubha bhaaringa bhamanyiri ega, yaaringa amariri okukwa.

⁵⁴Yeesu akamugwata okubhoko, akamubhirikira, “Muhara, hyuka!” ⁵⁵Rumwigo, omooyo gukaaja-mo, akeemirira. Yeesu akabhakeerya ega, “Mumuhaane ebhyakurya!”

⁵⁶Abheebhuri bhaaye hanú bhaarora gayo, bhakaruguura bhukongʼu. Yeesu akabhakaanʼya ega, bhatakaakeerya omuntu wowonse ganú gatuukiri.

Yeesu aratuma abheehigira bhaaye ekumi na bhabhiri

(Mataayo 10:5-15; Mariko 6:7-13)

¹Yeesu akabhirikira abhatumwa bhaaye ekumi na bhabhiri. Akabhahaana obhutungi na obhuturo bhwa okukenyia ebhihwi ebhibhiibhi bhyonsego okurwa kubhantu, na obhuturo bhwa okuhwenʼya amarweri. ²Kimwi, akabhatuma bhagye okuraarikira abhantu amangʼana amajomu eguru ya obhukama bhwa Waryubha, na okuhwenʼya abharweri.

³Akabhakeerya ega, “Mutakaagega ekintu kurugendo rwenyu, mutakaagega egingʼimbo, kasi eginsakwa, ebhyakurya, kasi egimbirya, kora emyenda gya okuswenʼya.

⁴“Ahasi hohonse hanú mwakasohe mumugi bhabhagenihye, mwikare muyomuyo, okuhikira hanú muriimuka ahasi hayo. ⁵Na nyoore abhantu hayo bhataribhagenihya, murwe hayo, murakungʼunta oruteeri kumaguru geenyu, naho okoorokya ega, Waryubha abhaangiri.”

⁶Mbe, bhakagya, bhakeenaara mubhijiji, bhararaarikira abhantu Amangʼana Amajomu ga Waryubha, na okuhwenʼya abharweri bha kira ahasi.

Herode Antipa aroobhoha

(Mataayo 14:1-12; Mariko 6:14-29)

⁷Omukama Herode Antipa akeegwa amangʼana gonsego ganú Yeesu yaaringa arakora. Akoobhoha bhukongʼu, kwa okubha, abhantu abhandi bhaaringa bharagamba ega, Yeesu ngʼo Yoana Omubhatiiji, ahyukiri okurwa mubhaku. ⁸Abhandi bhaaringa bharagamba ega, ngʼo omurooti Eriya yaajiri kweki. Na abhandi, bhaaringa bharagamba ega, oumwi wa abharooti bha Waryubha bha kare ngʼo ahyukiri. ⁹Nawe, Herode akagamba ega, “Yoana, naamubhutura omutwe! Bhoono, niwi unú ndeegwa amangʼana ga ebhika bhyaye?” Herode yaaringa na enamba ya okumurora Yeesu.

Yeesu arariisya abhantu okwambuka ebhiku bhitaanu

(Mataayo 14:13-21; Mariko 6:30-44; Yoana 6:1-14)

¹⁰Abhatumwa bha Yeesu bhayo, hanú bhaahinda ku Yeesu, bhakamukeerya amangʼana gonsego ganú bhaakora. Akabhagega abhatumwa bhayo, bhakeemuka okugya mumugi gunú gwabhirikirwanga Bhetisaida. ¹¹Nawe, abhantu hanú bhaamanya enú agiiri, bhakamuseeta. Akabhagenihya, akaamba okubheehigirya amangʼana eguru ya obhukama bhwa Waryubha. Akabha arahwenʼya abharweri gati ya abhantu bhayo.

¹²Na hanú yaahika kumugoroobha, eryubha rireenda okusikira, abhatumwa bhayo ekumi na bhabhiri bhakamugya-ko, bhakamukeerya ega, “Hanu turingi mwisisi. Mbe, obharage abhantu bhanu, bhagye mubhijiji bhinú bhiringi haangʼi na hanu, naho bhanyoore ahasi ha okuraara na aha okurya.”

¹³Nawe, Yeesu akabhakeerya ega, “Bheenyu mubhahaane ebhyakurya!” Bhakamukyukya ega, “Bheetu tutaana ebhyakurya bhya okubheesa! Tuuna emikaate etaanu, na eginswi ebhiri egyenego. Oreenda tugende tubhagurire abhantu bhanu bhonsego ebhyakurya?” ¹⁴Na abhantu bhanú bhaaringa hayo, abhasaaja abheenego, bhaaringa muna ebhiku bhitaanu.

Mbe, Yeesu akabhakeerya abheehigira bhaaye ega, “Mubhakeerye abhantu bheekare kumagari, kira erigari ribhe na abhantu mirongo etaanu.” ¹⁵Bhakakora kya ego yaabharagirirya, bhakeekara bhonsego.

¹⁶Yeesu akagega emikaate etaanu giyo, na eginswi ebhiri. Akamaahirira eguru murwire, akakumya Waryubha, akagisuunura, akahaana abheehigira bhaaye, naho bheeki bhahaane abhantu. ¹⁷Bhonsego bhakarya, bhakeeguta. Hanú bhaamara okurya, abhatumwa bhakakumanʼya amasaagyo, gakeejurya ebhikapo ekumi na bhibhiri.

Petero areekirirya ega, Yeesu ngʼo Kiristu Omutuurya

(Mataayo 16:13-20; Mariko 8:27-30)

¹⁸Orusiku rumwi, Yeesu na abheehigira bhaaye, bhaaringa hamwi, kabhejyo. Yeesu yaaringa aramusabha Waryubha. Hanú yaamara, akabhabhuurya ega, “Abhantu bharagamba ega, nooni-wi?” ¹⁹Bhakamukyukya ega, “Abhandi bharagamba ega, uuwe nuuwe Yoana Omubhatiiji. Abhandi bharagamba ega, uuwe nuuwe omurooti Eriya. Na abhandi bharagamba ega, uuwe ngʼ-umwi wa abharooti abhandi bha akare bha Waryubha unú waahyukiri.”

²⁰Yeesu akabhabhuurya ega, “Bhoono bheenyu, muragamba ega, nooni-wi?” Petero akamukyukya ega, “Uuwe nuuwe Kiristu Omutuurya.9:20 Kiristu Omutuurya. Ekiyunani kiragamba ega, Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu. Uuwe waatumwa na Waryubha!”

Yeesu arahaira eguru ya okukwa na okuhyuka kwaye

(Mataayo 16:21-28; Mariko 8:31–9:1)

²¹Yeesu akabhakemera bhatakaakeerya omuntu wowonse eringʼana riyo. ²²Akabhakeerya ega, “Omwana wa Adamu areenderwa anyankibhwe bhukongʼu. Yaangwe na abhakaruka bha Ekiyahudi, abhasyengeri abhakuru na abheehigirya bha amaragiriryo. Kubhuteero yeetwe, orusiku rwa kasatu okurwa okukwa kwaye, ahyuke.”

²³Hanú yaamara, akakeerya bhonsego ega, “Omuntu wowonse unú areenda okunsoorana oni, areenderwa yeeyange omwene,9:23a Yeeyange omwene. Ensonga yaaye niiga, ateehanja omwene, nawe, amukorere Waryubha na okubhakorera abhandi amajomu. Maaha mukitabho kya Mariko 12:30-31. na okugega omusarabha gwaye9:23b Okugega omusarabha gwaye. Ensonga yaaye niiga, okumwikirirya Waryubha kwa omutima gonsego na okwiseemya kwa enyanko yonsego, kora onyoora n-kukwa kurusumo rwa Yeesu. kira orusiku, nho yansoorane. ²⁴Omuntu wowonse unú areenda okuhonʼya obhuhoru bhwaye bhwa mukyaro munu, aribhubhurya obhuhoru bhwa koko. Nawe, omuntu unú araruusya obhuhoru bhwaye kurusumo rwani, arinyoora obhuhoru bhwa koko. ²⁵Omuntu arinyoora obhwera-ki, nyoore araanyoore ebhintu bhyonsego bhya ekyaro kinu, nawe, abhurirye obhuhoru bhwa koko?

²⁶“Wowonse unú arandorera eginsoni oni, na ameehigiryo gaani, uyo ngʼo oni Omwana wa Adamu wonse ndimurorera eginsoni, runú ndihunjuka okurwa murwire, na bhamaraika abharabhu, ndingi mubhukuru bhwani na mubhukuru bhwa Taata.

²⁷“Ndabhakeerya obhuheene ega, gatigati yeenyu bhanú mwimiriiri hanu, bhariho bhanú bhatarikwa, okuhikira hanú bharirora obhukama bhwa Waryubha!”

Obhukuru bhwa Yeesu bhuramaahikana kunkuku

(Mataayo 17:1-8; Mariko 9:2-8)

²⁸Eribhaga rya eginsiku munaane, Yeesu hanú yaamara okugamba amangʼana gayo, akabhagega Petero, Yoana, na Yakobho, akagya akariina munkuku hamwi nabho, naho asabhe Waryubha.

²⁹Hanú yaahika munkuku, akaamba okumusabha Waryubha. Hanú yaasabhanga, obhusu bhwaye bhukeehunjura. Emyenda gyaye, gikabha emirabhu pee, gikangʼesangʼesa bhukongʼu.

^30-31Hayohayo, bhakamwibhukira abhasaaja bhabhiri bharangʼesangʼesa kya endingaasi. Bhayo bhaaringa abharooti bha akare Musa9:30-31 Musa. Maaha eringʼana rinu mu Moonjooro eguru ya Amangʼana Amakongʼu. na Eriya, bhaaringa bharahaira na Yeesu. Bhakahairira kya ego arimara emirimu gyaye mukyaro, kwa okukwira mumugi gwa Yerusaremu.

³²Eribhaga riyo, Petero na abharikyaye, bhaaringa bheehiriibhwe bhukongʼu. Hanú bhaabhuuka, bhakamurora Yeesu arangʼesangʼesa kwa endingaasi yaaye. Bhakarora na abhasaaja abhabhiri bharya, bheemiriiri haangʼi nawe.

³³Musa na Eriya hanú bhaaringa bharagya, Petero akamukeerya Yeesu ega, “Uuwe, Omusuukwa weetu! M-bujomu bheetu tubhe hanu. Tuhagaaje hanu ebhihuuna bhisatu, ekimwi ekyaho, ekindi ekya Musa, na ekindi ekya Eriya.” Nawe, Petero ataaringa amanyiri kinú aragamba.

³⁴Petero hanú yaaringa akyagamba gayo, rikaaja erisaaru, rikabhakundikirya, bhakabha mukisunte. Abheehigira bhayo, hanú bhaakundikiribhwa na erisaaru riyo, bhakoobhoha bhukongʼu. ³⁵Bhakeegwa eriisi okurwa mwisaaru riyo, riragamba ega, “Unu ngʼo Omwana waani omumwemwe, unú naasora! Mumwigwenga weeki!”

³⁶Amangʼana gayo hanú gaahwa, abheehigira bhayo bhakarora Yeesu aringi omwenego. Gayo gonsego bhaarora hayo, bhataakeerya omuntu wowonse kuginsiku giyo.

Yeesu arahwenʼya omwana unú yaana ekihwi

(Mataayo 17:14-18; Mariko 9:14-27)

³⁷Hanú bhwakya, Yeesu na abheehigira bhasatu bhayo, bhakeetuuma okurwa munkuku, bhakasikana na omuganda omunene gwa abhantu.

³⁸Rumwigo, omuntu umwi gati ya abhantu bhayo, akagamba kwa eriisi erinene, ega, “Uuwe Omwihigirya, ndakusabha, unhwenerye omwana waani, kwa okubha weeki m-mwana waani omumwemwe. ³⁹Ekihwi ekibhiibhi oranyoora kiramusoheerera, kiramukora arajiirira. Kweki, oranyoora kiramukora aragwa ekitwe, erihuro rirafukura mumunwa. Oranyoora kiramunyankya bhukongʼu, na kitakumutiga bhwangu. ⁴⁰Naabhakomereerye abheehigira bhaaho bhakikenyie, nawe bhataanagirye.”

⁴¹Yeesu akagamba ega, “Bheenyu orwibhuro runú rutaana eimani, runú ruhabhiri! Ndiikara na bheenyu na okubheegumirirya okuhikira ruuha? Reeta omwana waaho hanu.”

⁴²Omwana uyo, hanú yaaringa araaja ku Yeesu, rumwigo ekihwi kiyo ekibhiibhi kikamugwisya hansi, kikamwimukya ekitwe. Nawe Yeesu akakikemera, akamuhwenʼya omwana uyo, akamuhindya kwisewaabho.

⁴³Abhantu bhonsego, hanú bhaarora obhuturo obhukuru bhwa Waryubha kya ego bhuringi, bhakaruguura bhukongʼu.

Yeesu arahaira kweki eguru ya okukwa kwaye

(Mataayo 17:22-23; Mariko 9:30-32)

Abhantu bhayo bhonsego, bhaaringa bhararuguura ebhika bhyonsego bhya Yeesu. Yeesu akakeerya abheehigira bhaaye ega, ⁴⁴“Amangʼana ganú ndabhakeerya bhoonwego, mugeetegeerere bhujomu. Omwana wa Adamu aragya okutuurwa mumabhoko ga abhasarya.”

⁴⁵Nawe, amangʼana ganú Yeesu yaabhakeerya, bhataagamanya, kwa okubha amangʼana gayo gaaringa geebhisiri kubheene, bhatakaaturiri okumanya ensonga yaaye. Na bhakoobhoha okumubhuurya eguru ya amangʼana gaaye.

Niwi omukuru okukira bhonsego?

(Mataayo 18:1-5; Mariko 9:33-37)

⁴⁶Gati ya abheehigira bha Yeesu, gikabha-ho eginhaka ega, niwi omukuru okukira abharikyaye.

⁴⁷Yeesu akamanya ameetegeerero gaabho. Kwa ego, akagega omwana omuke, akamwimirirya haangʼi nawe, ⁴⁸akabhakeerya ega, “Omuntu unú araamugenihye omwana kya unu, kwa eriina ryani, arangenihya oni. Na omuntu wowonse unú arangenihya oni, aramugenihya Waryubha unú yaantuma. Kwa okubha, omuke gati yeenyu bhonsego, uyo ngʼo omukuru okukira bhonsego.”

Omuntu unú atakumwanga Yeesu aringi obhumwi nawe

(Mariko 9:38-40)

⁴⁹Yoana akakeerya Yeesu ega, “Uuwe Omusuukwa weetu, tumuruuji omuntu araruusya ebhihwi ebhibhiibhi kwa eriina ryaho. Tukamukaanʼya, kwa okubha weeki atakusoorana na bheetu.” ⁵⁰Yeesu akamukyukya ega, “Mutige okumukaanʼya kweki, kwa okubha omuntu unú atakubhaanga bheenyu, aringi obhumwi na bheenyu.”

Yeesu araangwa Samaria

⁵¹Eribhaga rya Yeesu rya okuhinda murwire, ryaringa rihikiri haangʼi. Nho, yaamura okugya mumugi gwa Yerusaremu. ⁵²Mbe, akatuma abhachaama bhaaye bhamukangatire. Bhakagya, bhakasoha mukijiji kimwi kya Abhasamaria, naho bhamuseemerye obhuraaro na ebhintu ebhindi. ⁵³Nawe, abhantu bha hayo bhakaanga okumugenihya, kwa okubha yaaringa aragya Yerusaremu.9:53 Abhayahudi na Abhasamaria bhaaringa bharabhihirirana, kwa okubha bhaaringa bhatakwikiriranʼya eguru ya amangʼana amaaru ga edini. Abhasamaria bheekiriryanga ega, Waryubha areenderwa okusyengerwa munkuku ya Gerijimu na etaringi Yerusaremu. Maaha mukitabho kya Yoana 4:20.

⁵⁴Abheehigira bhaaye, Yakobho na Yoana, hanú bhaarora gayo, bhakamubhuurya ega, “Uuwe Omukuru weetu, oreenda tusabhe omururo gwike okurwa murwire gubhasikye [kya ego omurooti Eriya wonse yaakora]9:54a Amangʼana mumabhano ganu […] gataringi mumangʼoore agandi ga akare aga Ekiyunani.?”9:54b Maaha mukitabho kya 2 Abhakama 1:10-14.

⁵⁵Nawe Yeesu, akabheekyukirya, akabhakaanʼya [ega, “Bheenyu mutamanyiri muringi abhantu bha egaki. ⁵⁶Kwa okubha, Omwana wa Adamu ataajiri okusikya abhantu, nawe, okubhatuurya.”]9:55-56 Amangʼana mumabhano ganu […] gataringi mumangʼoore agandi ga akare aga Ekiyunani. Bhakagya mukijiji ekindi.

Yeesu arahairira bhanú bhareenda okumusoorana

(Mataayo 8:19-22)

⁵⁷Eribhaga rinú Yeesu na abheehigira bhaaye, bhaaringa bharagenda kunjira, omuntu umwi akamukeerya ega, “Hohonse hanú oraagye, ndakusoorana!”

⁵⁸Yeesu wonse akamukyukya ega, “Ebhibhwe bhiina amasana na ebhinyonyi bhiina amasu, nawe, Omwana wa Adamu, ataana kora aha okuraarya omutwe gwaye!”

⁵⁹Yeesu akakeerya omuntu oundi ega, “Nsoorana!” Omuntu uyo akamukyukya ega, “Ee Omukuru, unyikiririrye ngende mbere okumubhiika taata.”

⁶⁰Nawe Yeesu akamukyukya ega, “Tiga abhaku bhabhiike abhaku bhaabho.9:60 Maaha mukitabho kya Abhaefeso 2:1. Nawe uuwe, genda oraarike eringʼana eguru ya obhukama bhwa Waryubha.”

⁶¹Na omuntu oundi akakeerya Yeesu ega, “Uuwe Omukuru, ndakusoorana. Nawe mbere, unyikiririrye ngende ndage abhantu bha iika.”

⁶²Yeesu akamukeerya ega, “Omuntu wowonse araabhe kya omuntu unú yaambiri okugoomya, amare yeekyukye amaahirire enyuma, uyo atakwenderwa okubha omugaya kubhukama bhwa Waryubha.”

Yeesu aratuma abheehigira mirongo muhungati na bhabhiri

¹Mbe, hanú gayo gaahwa, Omukuru Yeesu akasora abheehigira abhandi mirongo muhungati na bhabhiri (72).10:1 Mirongo muhungati na bhabhiri. Amangʼoore agandi ga akare aga Ekiyunani garagamba ega, mirongo muhungati. Akabhatuma bhabhiri bhabhiri, bhamukangatire mumigi na kira ahasi, hanú yeendanga okuhika omwene.

²Akabhakeerya ega, “Omugeso m-mwaru, nawe, abhagesi m-bake.10:2 Omugeso m-mwaru, nawe, abhagesi m-bake. Ensonga yaaye niiga, abhantu abhaaru bhareenda okumwikirirya Yeesu, nawe m-bantu abhakego bhanú bharatura okubharaarikira amangʼana amajomu eguru yaaye. Kwa ego, mumusabhe Waryubha, omwene omugunda, atume abhagesi abhandi mumugunda gwaye, bhagese. ³Bheenyu mugende, nawe, mumanye ega, mbatumiri kya ebhimaanwa bhya amangʼondi bhinú bhiragya gati ya eginsuuji! ⁴Mutagega ensaho ya egimbirya, ensakwa, kora eginkeeto egindi. Mutabhurya eribhaga kunjira, kwa okukeeranʼya omuntu.

⁵“Hanú mwakasohe munyumba, mukeeranʼye abhantu bha muyo ega, ‘Bhaamunu, mubhe na omurembe!’ ⁶Na hanú araabhe-mo omuntu wa omurembe, enonkwe yeenyu ya omurembe inú mumunonkeri, eratigara kumwene. Nawe, araabhe atarimo omuntu wa omurembe muyo, enonkwe yeenyu ya omurembe iyo, etakubhanonka. ⁷Hanú muraagenihibhwe munyumba eimwi, mutige okungʼaanyira muginyumba egindi, nawe, mwikare muyomuyo musoheri. Murye ebhyakurya bhinú bharaabhahaane, kwa okubha omukori wa emirimu areenderwa okurihwa amariho gaaye.

⁸“Hanú mwakasohe mumugi gogonse, abheene omugi bhabhagenihye, murye ebhyakurya bhinú bharaabhenga bharabhahaana. ⁹Na abharweri bhanú bharingi mumugi guyo, mubhahwenʼye. Mubhakeerye abhantu bhonsego ega, ‘Obhukama bhwa Waryubha bhuringi haangʼi!’10:9 Bhuringi haangʼi. Kumuchafwa gunu na gwa 11 ensonga eindi eratura okubha ega, bhumariri okubhahikiira.

¹⁰“Nawe, hanú mwakasohe mumugi gogonse, na abheene omugi bhaange okubhagenihya, murwe-mo, mugende mubhitongoji bhyabho, muragamba ega, ¹¹‘Kora oruteeri rwa omugi gwenyu runú ruringi kumaguru geetu turarukungʼunta, rubhe ekimanyiiriryo kya obhusarya bhwenyu. Kora ego, mumanye bhujomu ega, obhukama bhwa Waryubha bhuringi haangʼi!’ ¹²Ndabhakeerya ega, orusiku rwa okubhuturira ekiina, Waryubha arijibhya abhantu bha omugi guyo obhururu kora okukira kya ego arijibhya abhantu bha mumugi gwa Sodoma!10:12 Sodoma. M-mugi gunú Waryubha yaasikya kwa ekisigo kya obhusarya bhwa abhantu bhaago. Maaha mukitabho kya Obhwambiro 19:1-29.

Yeesu arakemera abhantu mumigi ginú bhamwangiri

(Mataayo 11:20-24)

¹³“Murikirora-ko bheenyu, abhantu bha mumugi gwa Korajini! Na bheenyu murikirora-ko, abhantu bha mumugi gwa Bhetisaida! Nyoore ebhika bhinú bhyakoreka kubheenyu hanu, bhikaakorekeri mumigi gya Tiro na Sidoni,10:13 Tiro na Sidoni. Abhantu bha mumigi gya Tiro na Sidoni bhataaringa Abhayahudi, bhaaringa abhapagaani. Kweki, Abhayahudi bhaaringa bhabhamanyiri ega, m-bantu bha obhusarya bhukongʼu. Maaha mubhitabho bhya Amosi 1:9-10; Joeri 3:4. singa bhaamara akare okumwihunjurira Waryubha okurwa mubhusarya bhwabho, kwa okwibhoha amagunira na okwihaka eriibhu. ¹⁴Kwa ego, orusiku rwa okubhuturira ekiina, Waryubha aribhajibhya bheenyu obhururu bhukongʼu, kora okukira kya ego arijibhya abhantu bha mumigi gya Tiro na Sidoni!

¹⁵“Na bheenyu, abhantu bha mumugi gwa Kaperinaumu, bhoono mureeganirirya ega, Waryubha aribhariinʼya okuhikira murwire? Muriituumibhwa okuhikira mumururo gunú gutakusima!”10:15 Mumururo gunú gutakusima. Ekiyunani kiragamba ega, kujimu.

¹⁶Nho, Yeesu akabhakeerya abheehigira bhaaye ega, “Omuntu unú arabheetegeerera bheenyu, aranyitegeerera oni. Na omuntu unú arabhaanga bheenyu, kora oni aranyanga. Na unú aranyanga oni, araanga kora unú yaantuma.”

Abheehigira bha Yeesu bharahinda

¹⁷Eribhaga erindi, abheehigira bhayo mirongo muhungati na bhabhiri (72)10:17 Mirongo muhungati na bhabhiri. Amangʼoore agandi ga akare aga Ekiyunani garagamba ega, mirongo muhungati. bhakahinda, bhajomeerwe. Bhakamukeerya ega, “Omukuru weetu, kora ebhihwi ebhibhiibhi, hanú turabhikenyia kwa eriina ryaho, bhiratwigwa!”

¹⁸Yeesu akabhakeerya ega, “Nkarora Erisambwa riragwa hansi okurwa murwire kya orukubha. ¹⁹Mbe, mumanye ega, mmariri okubhahaana obhuturo bhwa okuhiga eginguru gyonsego gya omusigu uyo. Kwa obhuturo bhuyo, muraatajenga eginjoka na ebhitoromooni, na kitariho ekintu kyokyonse kinú kiribhanyahaara.

²⁰“Kora ego, mutajomerwa kwa okubha ebhihwi ebhibhiibhi bhirabheegwa. Nawe, mujomererwe eringʼana rinu, ega, amariina geenyu gamariri okungʼoorwa murwire koko.”

Yeesu arajomerwa

(Mataayo 11:25-27, 13:16-17)

²¹Eribhaga riyoriyo, Yeesu akajomerwa bhukongʼu, kwa obhuturo bhwa Omutima Omurabhu. Akagamba ega, “Ee Taata, Omukuru wa orwire na ekyaro, ndakukumya kwa okubha amangʼana ganú obhabhisiri abhangʼeeni na abhasomi, obhatubhuriiri abhantu bhanú bhaana eimani kya abhaana abhake. M-bwaheene, Taata, kwa okubha ego niigo yaakujomera.” ²²Nawe, akagendererya okubhakeerya abhantu ega, “Taata amariri okungʼaana amangʼana gonsego. Na atariho unú amanyiri Omwana waaye, nawe Taata omwenego. Kora atariho unú amanyiri Taata, nawe, Omwana waaye omwenego, na omuntu wowonse unú Omwana areende okumutubhurira.”

²³Rumwigo, Yeesu akabhamaahirira abheehigira bhaaye, akabhakeerya abheenego ega, “Bheenyu mwanonkwa, kwa okubha murarora amangʼana gayo na ameeso geenyu! ²⁴Ndabhakeerya ega, abharooti na abhakama abhaaru, bheegombanga okurora ganú murarora, nawe bhataagarora. Kweki, bheegombanga okwigwa ganú bheenyu mureegwa, nawe bhataageegwa.”

Ekirengyo kya omuntu wa heene

²⁵Orusiku rumwi, omwihigirya umwi wa amaragiriryo akeemirira, akamubhuurya Yeesu eringʼana kwa okumutega ega, “Omwihigirya, nkore egaki, naho nnyoore obhuhoru bhwa koko?”

²⁶Yeesu akamukyukya ega, “Mumaragiriryo ga Waryubha yaangʼoorwa egaki? Ogamanyiri egaki?” ²⁷Akamukyukya ega, “Gaangʼoorwa ega, ‘Omuhanje Omukuru Waryubha waaho, kwa omutima gwaho gonsego, kwa enkoro yaaho yonsego, kwa eginguru gyaho gyonsego, na kwa obhungʼeeni bhwaho bhonsego.’10:27a Maaha mukitabho kya Obhuhiituki bhwa Amaragiriryo 6:5. Kweki, ‘Omuhanje omurikyaho, kya ego oreehanja uuwe omwene.’10:27b Maaha mukitabho kya Abharaawi 19:18.” ²⁸Yeesu akamukeerya ega, “Okyukirye bhujomu! Kora ego, naho onyoore obhuhoru.”

²⁹Nawe, omwihigirya uyo, yaaringa areenda okoorokya ega, m-muheene embere ya Waryubha. Nkyo kikakora akabhuurya Yeesu, “Omurikyani, niwi?”

³⁰Yeesu akamukyukya kwa ekirengyo ega, “Yaaringa-ho omuntu umwi, unú yaarekanga Yerusaremu, aragya mumugi gwa Yeriko. Hanú yaaringa kunjira, akatumbarirwa na abheebhi. Abheebhi bhayo, bhakamuruusya emyenda, bhakamutema okuhikira bhakamwatya oruguma, bhakamutiga asingiri, bhakagya.

³¹“Mbe, obhujomu kunjira iyo, yaahitanga-ko omusyengeri umwi. Nawe omusyengeri uyo, hanú yaamurora omuntu uyo, akahita orubhaara orundi rwa enjira, akagya. ³²Eribhaga erindi, Omuraawi10:32 Omuraawi. Abharaawi bhaaringa erikabhira rimwi mukyaro kya Isiraeri, bhaabheeranga abhasyengeri bha Waryubha, mwisyengerero erikuru rya Waryubha. Maaha mukitabho kya Okubhara 3:1-13. oumwi akahita hayo, wonse akakora egoego. Hanú yaamurora omuntu uyo, akahita orubhaara orundi rwa enjira.

³³“Eribhaga erindi, akaaja Omusamaria10:33 Omusamaria. Abhayahudi bhaaringa bharabhajeera Abhasamaria, kwa okubha bhaarora ega, Abhasamaria bhaamusyengeranga Waryubha kwa enjira inú etaringi bhwaheene. Kwa ego, abhantu bha ebhyaro bhibhiri bhiyo, bhaaringa bharabhihirirana. oumwi, unú yaaringa kurugendo. Hanú yaamurora omuntu uyo, akamwabhira. ³⁴Akamusuntarira, akamuragura ebhironda bhyaye kwa okubhihaka edivai na amaguta, akabhibhoha. Akamara, akamuriinʼya eguru ya entikiri yaaye, akamuhira munyumba ya okuraara abhageni, akamutuga.

³⁵“Ejo wendeko, akaruusya egidinari ebhiri,10:35 Egidinari ebhiri. Edinari eimwi yaaringa eraringʼaana na amariho ga orusiku rumwi kwa omuntu oumwi. Maaha Edinari mu Moonjooro eguru ya Amangʼana Amakongʼu. akahaana omwene enyumba ya abhageni, akamukeerya ega, ‘Tuga omuntu unu. Nyoore oryongerya egimbirya egindi kwa okumutuga, hanú ndihinda ndihitira hanu, nkurihe.’”

³⁶Nho, Yeesu akamubhuurya omwihigirya uyo wa amaragiriryo ega, “Mbe, kubhwitegeereri bhwaho, ngʼ-uuha gati ya abhantu abhasatu bhayo, unú yaaringa omuhiiri waaye kwa okumukorera aga heene?” ³⁷Wonse akamukyukya ega, “Ngʼo unú yaamumaahira ekyabhira.” Yeesu akamukeerya ega, “Genda, uuwe wonse obhe na enteemo iyoiyo!”

Yeesu munyumba ya Maarita na Mariamu

³⁸Eribhaga erindi, Yeesu na abheehigira bhaaye, hanú bhaaringa kunjira, bhakasoha mukijiji kimwi. Na omukari umwi, eriina ryaye Maarita, akabhagenihya iika owaaye. ³⁹Maarita uyo, yaaringa na omuhara waabho, eriina ryaye Mariamu. Eribhaga riyo, Mariamu akeekara haangʼi na amaguru ga Omukuru Yeesu, akabha aramwitegeerera.

⁴⁰Nawe Maarita, yaaringa aranyanka na emirimu emyaru. Mbe, akagya akamukeerya Yeesu ega, “Omukuru weetu, otakurora ega, omuhara weetu yantigiiri emirimu gyonsego? Mukeerye yambeere emirimu!”

⁴¹Omukuru Yeesu akamukyukya ega, “Maarita, Maarita! Oranyanka eguru ya amangʼana amaaru. ⁴²Nawe, ririho eringʼana rimwi ego erijomu, okukira gonsego. Eringʼana riyo n-kunyitegeerera. Mariamu ngʼo arisoreri. Tiigo-ha omuntu wowonse unú aratura okumuruusya eringʼana riyo.”

Ameehigiryo eguru ya okumusabha Waryubha

(Mataayo 6:9-13, 7:7-11)

¹Orusiku rumwi, Yeesu yaaringa ahasi nyabhurebhe, aramusabha Waryubha. Hanú yaamara okusabha, oumwi wa abheehigira bhaaye akamukeerya ega, “Omukuru, otwihigirye kya ego turaabhenga turasabha Waryubha, kya ego Yoana Omubhatiiji yaabheehigirya abheehigira bhaaye.”

²Yeesu akabhakeerya ega, “Hanú muraabhenga murasabha Waryubha, mugambe ega,

‘Taata [weetu owa murwire],

eriina ryaho rigungibhwe,

obhukama bhwaho bhuuje,

[obhwendi bhwaho bhukoreke, mukyaro hanu,

kya ego murwire eyo].

³Otuhaane ebhyakurya bhya kira orusiku.

⁴Otwabhire obhusarya bhwetu,

kya ego na bheetu turabhaabhira bhanú bharatusarirya.

Otakaatutiga tusohe mumasakyo,

[nawe, otutuurye na omusarya urya Erisambwa].11:2-4 Amangʼana mumabhano ganu […] gataringi mumangʼoore agandi ga akare aga Ekiyunani.’”

⁵Mbe, hanú yaamara okubheehigirya, akabhakeerya ekirengyo ega, “Tugambe ega, oumwi weenyu nyoore akaagiiri kumusaani waaye obhutiku gati, amukeerye ega, ‘Musaani waani! Ndasabha emikaate esatu, ⁶kwa okubha omusaani waani ahikiri owaani okurwa murugendo, na ntaana ebhyakurya bhya okumuhaana.’ ⁷Nawe, omusaani uyo amukyukye ega, ‘Otannyankya! Mmariri okusiika ekiseku, ndeeri na abhaana bhaani. Ntakutura okubhuuka okukuhaana ekintu kyokyonse.’

⁸“Bhoono, ndabhakeerya ega, kora onyoora weeki m-musaani waaye ataabhuuke okumuhaana omukaate, nawe, kwa okubha omusaani uyo, aragendererya okusabha bira okukwa omutima, araabhuuke amuhaane kyokyonse kinú areenda.

⁹“Kwa ego, oni ndabhakeerya ega, mumusabhe Waryubha, bheenyu murihaanwa. Mutune, bheenyu murinyoora. Musiikurye, bheenyu murisiikurirwa. ¹⁰Kira omuntu unú aramusabha, arahaanwa. Na kira omuntu unú aratuna, aranyoora. Na kira omuntu unú arasiikurya ekiseku, arasiikurirwa.

¹¹“Niwi kubheenyu bhataata, unú omwana waaye araasabhe omukaate, amuhaane erigina? Kasi araamusabhe enswi, amuhaane enjoka? ¹²Kasi araamusabhe eriigi, amuhaane ekitoromooni? ¹³Mbe, onyoora bheenyu m-basarya, nawe, mumanyiri okuhaana abhaana bheenyu ebhintu ebhijomu. Kwa ego, Eseweenyu owa murwire aribhakorera amajomu bhukongʼu, na aribhahaana Omutima Omurabhu11:13 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. bhanú bharamusabha!”

Yeesu aragambwa ega, obhuturo bhwayebhurarwa ku Bherijebhuri

(Mataayo 12:22-30; Mariko 3:22-27)

¹⁴Orusiku rumwi, Yeesu yaaringa arakenyia ekihwi ekibhiibhi kumuntu unú yaaringa abheeri erimuumu. Ekihwi kiyo hanú kyamuhaatira, akahaira kweki. Omuganda gwa abhantu bhakaruguura.

¹⁵Nawe, abhandi bhakagamba ega, “Arakenyia ebhihwi kwa obhuturo bhwa Bherijebhuri,11:15 Bherijebhuri. Ni-riina erindi rya Erisambwa. omukuru wa ebhihwi ebhibhiibhi!” ¹⁶Abhandi bheendanga okumusakya Yeesu, bhaaringa bharamusabha akore ekika kya okoorokya ega, arwiri ku Waryubha.

¹⁷Nawe, akamanya ameetegeerero gaabho, akabhakeerya ega, “Obhukama bhobhonse bhunú bhwahukeeni kumiganda na okuhakaananʼya, bhutakutura okuguma. Na abhantu bha enda eimwi hanú bharaarwane, bhatakuguma okwahukana. ¹⁸Egoego na Erisambwa nyoore rireehakaanʼye eryenego, obhukama bhwaryo mbuguma egaki?

“Ndagamba ego, kwa okubha bheenyu muragamba ega, ndakenyia ebhihwi kwa obhuturo bhwa Bherijebhuri. ¹⁹Mbe, nyoore m-buheene ega, oni ndakenyia ebhihwi kwa obhutungi bhwa Bherijebhuri, bhoono abheehigira bheenyu11:19 Abheehigira bheenyu. Ensonga eindi eratura okubha ega, Abhayahudi abharikyenyu. bharakenyia kwa obhutungi bhwawi? Kwa ekisigo kiyo, bheeki mbo bharibhabhuturira ekiina bheenyu. ²⁰Nawe, nyoore oni ndakenyia ebhihwi kwa obhuturo bhwa Waryubha, mbe mumanye ega, obhukama bhwa Waryubha bhumariri okubhahikiira.

²¹“Mwitegeerere ekirengyo kinu! Omuntu unú yaana eginguru na araangararira ebhintu bhyaye kwa ebhigwato iika owaaye, ebhintu bhyaye bhyonsego bhitakukuunibhwa. ²²Nawe, omuntu oundi unú yaana eginguru okumukira, hanú araaje amurwanʼye, amuhige, araamuruusye ebhigwato bhyaye bhyonsego bhinú yeesigiranga, kimwi agege ebhintu bhyonsego na okubhigabhanʼya kubhandi.

²³“Omuntu wowonse unú ataringi hamwi na oni, aranyanga. Kweki, wowonse unú atakukumanʼya abhantu bha Waryubha hamwi na oni, arabhanyaraganʼya.”

Ameehigiryo eguru ya ebhihwi

(Mataayo 12:43-45)

²⁴Yeesu akagendererya okugamba ega, “Hanú ekihwi ekibhiibhi kirarwa kumuntu, kiragya kukibhara na okutuna ahasi ha okumuunyira. Nawe, hanú kiraabhurwe, nho kiragamba ega, ²⁵‘Ndahunjuka kumuntu waani unú naarwa-mo.’ ²⁶Hanú kiraahunjuke kinyoore omuntu uyo aringi kya enyumba inú yeyereerwe erabhiri, na eseemiibhwe bhujomu, kweki, eringi bhusa. Hayo nho kiragya okureeta ebhihwi ebhindi muhungati ebhibhiibhi bhukongʼu okukikira. Bhyonsego bhirasoha na okwikara munsi ya omuntu uyo. Nho, obhuhoru bhwa omuntu uyo bhurabha obhubhiibhi okukira kya ego yaaringa obhwa mbere.”

Enonkwe ya obhuheene

²⁷Yeesu hanú yaaringa aragamba gayo, omukari umwi akamukeerya kwa eriisi erinene ega, “Yaanonkwa omukari unú yaakwibhura na okukuneenʼya!”

²⁸Nawe, Yeesu akagamba ega, “M-maheene! Nawe bhaanonkwa bhukongʼu bhanú bhareegwa eringʼana rya Waryubha, na okurigwata!”

Abhantu bharasabha Yeesu ekimanyiiriryo

(Mataayo 12:38-42; Mariko 8:12)

²⁹Eribhaga rinú abhantu bhaaringa bharagendererya okwikumanʼya ku Yeesu, akabhakeerya ega, “Orwibhuro orubhiibhi, rureenda ekimanyiiriryo, kora ntaribhoorokya ekimanyiiriryo kyokyonse, nawe, kirya ekya omurooti Yoona ekyenego. ³⁰Yoona yaaringa ekimanyiiriryo kya abhantu bha mumugi gwa Ninaawi, ego niigo Omwana wa Adamu, aribha ekimanyiiriryo kubhantu bha orwibhuro runu.

³¹“Kweki, kurusiku rwa okubhutura ekiina, omukama omukari wa ekyaro kya Sheebha ariimirira embere ya Waryubha na okubhabhuturira ekiina abhantu bha orwibhuro runu ega, m-basarya. Weeki yaarwa mubhyaro bhya ahare, naho yeetegeerere amangʼana ga egintungwa aga omukama Soromoni,11:31 Maaha mubhitabho bhya 1 Abhakama 10:1-10; 2 Amangʼana ga Eribhaga 9:1-12. nawe, hanu ariho oumwi unú aringi omukuru okukira Soromoni, nawe, mutakumwigwa.

³²“Orusiku rwa okubhutura ekiina, abhantu bha mumugi gwa Ninaawi, bhariimirira embere ya Waryubha, na bharibhabhuturira ekiina abhantu bha orwibhuro runu ega, m-basarya. Eribha ego, kwa okubha bheeki bheehunjura obhusarya bhwabho, okurekana na obhuraariki bhwa Yoona,11:32 Maaha mukitabho kya Yoona 3. na hanu ariho omukuru okukira Yoona, nawe, mutakumwigwa.

Okumenya mubhurabhu kasi mukisunte

(Mataayo 5:15, 6:22-23)

³³“Atariho omuntu unú aragwatya ekorobhoi, kimwi araikundikirya kwa okwibhisa.11:33 Araikundikirya kwa okwibhisa. Amangʼoore agandi ga akare aga Ekiyunani garagamba ega, araikundikirya kwa okwibhisa kasi okuikundikirya mundoohu. Araituura eguru kukisunga, naho abhantu bhanú bharasoha munyumba bharore obhurabhu.

³⁴“Ameeso ngo kya ekorobhoi kumubhiri. Nyoore m-mahoru, omubhiri gwaho gonse gurabha na obhurabhu. Nawe, ameeso gaaho garaabhe amasariku, omubhiri gwaho gonse gurabha na ekisunte. ³⁵Kwa ego, wangararire obhurabhu bhunú bhuringi mumubhiri gwaho, gutariija okubha ekisunte. ³⁶Kwa okubha, nyoore omubhiri gwaho gonsego guuna endingaasi bira ekisunte kyokyonse, guringʼara, kya ego ekorobhoi erakumirikira kwa obhurabhu bhwaye.”

Yeesu arabhakemera Abhafarisaayona abheehigirya bha amaragiriryo

(Mataayo 23:1-36; Mariko 12:38-40)

³⁷Yeesu hanú yaamara okugamba gayo, Omufarisaayo umwi akamugenihya, agende iika owaaye okurya ebhyakurya. Akagya, akasoha munyumba, akeekara okurya ebhyakurya. ³⁸Omufarisaayo uyo, akaruguura bhukongʼu hanú yaarora Yeesu ararya bira okwisaabha kya ego egimiira gyabho gyagambanga.11:38 Yeesu ararya bira okwisaabha kya ego egimiira gyabho gyagambanga. Kugimiira gya Ekiyahudi omuntu akaarya ebhyakurya bira okwisaabha na okusabha, ebhyakurya bhirakona na bhiramukora abhe omukonu na abhandi bhanú bhararya bhonse bharakona.

³⁹Nawe, Omukuru Yeesu akamukeerya ega, “Bheenyu Abhafarisaayo, muroogya ekikombe na ekitubha kwa kibhara, enu mumitima gyenyu, mwijwiri obhwibhi na obhusarya. ⁴⁰Bheenyu abhatengʼo! Unú yaabhumba omubhiri ngʼo yaabhumba omutima. ⁴¹Mubheerenga abhatobhu kwa emitima gyenyu gyonsego, nho bhyonsego bhiraabhe bhyogiibhwe kurusumo rwenyu.

⁴²“Murikirora-ko, bheenyu Abhafarisaayo! Kwa okubha muragwata amaragiriryo ga okuruusya ejaaka kora kwa ebhintu bhya obhwera obhuke bhukongʼu, kya egimbusuro gya emyungu, ebhitunguru, omuchicha, na emikubhi egindi enu muratiga okukorera abhandi amangʼana ga obhuheene na okumuhanja Waryubha. Gayo mureenderwa okugakora, hamwi na okumuruusirya egijaaka giyo.

⁴³“Murikirora-ko, bheenyu Abhafarisaayo! Kwa okubha muhanjiri okwikara kubhitumbi ebhya embere ebhya abhasuukwa mumasinagogi, muhanjiri okukeeranibhwa kwa obhusuuku mumidiira. ⁴⁴Murikirora-ko! Kwa okubha bheenyu n-kya abhaku bhanú bhaagunda mugimbihira ginú gitakumaahwa, na abhantu bharahita bharagitaja bira okumanya ega, m-mugiro.”

⁴⁵Rumwigo, omwihigirya umwi wa amaragiriryo akamukeerya Yeesu ega, “Omwihigirya, hanú oragamba amangʼana gayo, oratujabhura na bheetu abheehigirya bha amaragiriryo.”

⁴⁶Yeesu akamukyukya ega, “Na bheenyu abheehigirya bha amaragiriryo, murikirora-ko! Kwa okubha mureetiikya abhantu omujigo omurito gwa amaragiriryo, gunú bhatakutura okugukora. Nawe, bheenyu abheene mutakwenda okwinura kora ekyara, naho bhagugege. ⁴⁷Murikirora-ko! Kwa okubha murahagaaja egimbihira eginjomu gya abharooti bha Waryubha, nawe abhantu bhanú bheeta abharooti bhayo, m-bajaaji weenyu! ⁴⁸Kwa ego, muroorokya ega, mureekirirya ganú bhajaaji weenyu bhaakora, kwa okubha murahagaaja egimbihira gya abharooti bhayo, enu murajeera amangʼana gaabho.

⁴⁹“Nkyo kyakora Waryubha yaagamba kwa egintungwa gyaye ega, ‘Ndabhatumira abharooti na abhatumwa. Nawe, abhandi gati yaabho bharibheeta, na abhandi bharibhanyankya.’ ⁵⁰Kwa ego, Waryubha aribhabhuturira ekiina abhantu bha orwibhuro runu, kwa ekisigo kya okwita abharooti bhonsego, okurwa kubhwambiro bhwa ekyaro, ⁵¹hanú Abheri yeetwa, okuhikira Jakaria, unú yeetirwa mwisyengerero erikuru rya Waryubha, gati ya ahasi ha okumwensera na enyumba enkuru ya okusyengerera.11:51 Maaha mubhitabho bhya Obhwambiro 4:8; 2 Amangʼana ga Eribhaga 24:20-22. Kweki maaha Erisyengerero erikuru rya Waryubha mu Moonjooro eguru ya Amangʼana Amakongʼu. Ndabhakeerya obhuheene ega, abhantu bha orwibhuro runu bharibhuturirwa ekiina kugayo gonsego.

⁵²“Murikirora-ko, bheenyu abheehigirya bha amaragiriryo! Kwa okubha mubhisiri orufunguro rwa okusiikurira ekiseku kinú abhantu bhakaahitiiri bhamumanye Waryubha. Bheenyu abheene mutaasoha, na bhanú bhaaringa bhareenda okusoha, mukabhakaanʼya.”

⁵³Eribhaga rinú Yeesu yaarwa hayo, Abhafarisaayo na abheehigirya bha amaragiriryo, bhakaamba okubha abharuru bhukongʼu kuweeki. Bhaaringa bharamubhuuririrya amangʼana amaaru, ⁵⁴naho bhamugwatye kwa amangʼana gaaye.

Yeesu arakaanʼya abhantu kwa orwambe rwa Abhafarisaayo

¹Eribhaga riyo, abhantu abhaaru bhaaringa bhareekumanʼya, okuhikira bhakabha bharatajana.

Yeesu akaamba okubhakeerya abheehigira bhaaye ega, “Mwiyangararire na orwambe rwa Abhafarisaayo, kwa okubha orwambe ruyo ruranyaragana kya ekimera. ²Kira kinú kikundikiriibhwe, kirikundukurwa, na kira kinú kibhisirwe, kirimaahikana. ³Amangʼana ganú muragambanga kwa ekinyerera, abhantu bharigeegwa. Na kira kinú mwaringa murajamirirana, muringi mubhinyumba bhya munsi, kiriraarikwa kibhara wa eginyumba.

Moobhohe Waryubha omwenego

(Mataayo 10:28-31)

⁴“Ndabhakeerya bheenyu abhasaani bhaani, mutige okoobhoha abhantu bhanú bharabheeta omubhiri. Kwa okubha hanú bharamara okubheeta, bhataana ekintu ekindi kweki kinú bharakora. ⁵Nawe, ndabhoorokya unú mureenderwa okumoobhoha. Moobhohe Waryubha, kwa okubha araamare okwita omuntu, yaana obhuturo bhwa okumwesa mumururo gunú gutakusima.12:5 Mumururo gunú gutakusima. Ekiyunani kiragamba ega, Jehanamu. Mmo Waryubha arijibhirya abhasarya. Mbe, mumoobhohe weeki omwenego!

⁶“Ebhisanje bhitaanu bhiraguribhwa kwa obhuguri obhuke bhukongʼu. Kora ego, Waryubha atakurabhirwa kora kimwi kyabhyo. ⁷Nawe bheenyu, Waryubha amanyiri kora erisaabhu rya egintuukya gya emitwe gyenyu. Kwa ego, mutoobhoha, kwa okubha bheenyu muuna obhwera okukira erihijo rya ebhisanje ebhyaru.

Moorokye eimani yeenyu embere ya abhantu

(Mataayo 10:32-33, 12:32, 10:19-20)

⁸“Ndabhakeerya ega, kira omuntu unú aranyikirirya embere ya abhantu, oni nonse, Omwana wa Adamu, ndimwikirirya embere ya bhamaraika12:8 Bhamaraika. Maaha eringʼana rinu mu Moonjooro eguru ya Amangʼana Amakongʼu. bha Waryubha. ⁹Nawe, kira omuntu unú aranyanga embere ya abhantu, oni nonse ndimwanga embere ya bhamaraika bha Waryubha. ¹⁰Kira omuntu unú aragamba amangʼana amabhiibhi ga okuhakaanʼya Omwana wa Adamu, Waryubha arimwabhira. Nawe, kira omuntu unú aragamba amangʼana ga okujabhura Omutima Omurabhu, uyo Waryubha atarimwabhira.

¹¹“Hanú murihirwa mumasinagogi, na embere ya abhakuru, na embere ya abhatungi, mutariija okubha na enkubhi eguru ya amangʼana ganú murigamba, kasi kya ego murikyukya. ¹²Kwa okubha, eribhaga riyo, Omutima Omurabhu aribheehigirya amangʼana ganú murigamba.”

Ekirengyo kya omuniibhi omukangi

¹³Mbe, omuntu umwi wa mumuganda guyo, akamukeerya Yeesu ega, “Omwihigirya, okeerye omuhiiri waani, yangabhire-ko engabho inú taata yaatutigira.”

¹⁴Yeesu akamukyukya ega, “Niwi yaantuura mbe omubhuturi wa ekiina gati yeenyu?” ¹⁵Kweki, akabhakeerya abhantu bhayo ega, “Mwiyangararire na orunamba rwa ebhintu, kwa okubha, obhuhoru bhwa omuntu bhutakurekana na obhwaru bhwa ebhintu bhyaye.”

¹⁶Kimwi, Yeesu akabhakeerya ekirengyo ega, “Yaaringa-ho omuniibhi umwi, unú omugunda gwaye gwaringa gwibhwiri ebhyakurya ebhyaru. ¹⁷Omuniibhi uyo, akeebhuurya ega, ‘Bhoono, nkore egaki? Ntaana ahasi hanú ndaatuure ebhyakurya bhyani!’ ¹⁸Kimwi, akagamba ega, ‘Ndahaanyura ebhitara bhyani, na okuhagaaja ebhindi ebhinene bhukongʼu. Ndatuura muyo obhuro bhwani bhonsego, na ebhintu bhyani ebhindi. ¹⁹Nho, ndaature okugamba ega, “Bhoono, nituuriiri ekibhumbiko kya ebhintu ebhyaru ebhijomu. Bhiranyisa kwa emyaka emyaru! Mbe, mmuunye, ndye na okunywa, njomerwe!”’

²⁰“Nawe, Waryubha akamukeerya ega, ‘Uuwe omukangi! Obhutiku bhunu orakwa! Na ebhintu bhyonsego bhinú wikumiiri, bhiribha bhyawi?’”

²¹Yeesu, akamariisya kwa okugamba ega, “Ego niigo eribha, kumuntu unú areekumira ebhintu ebhyaru kurusumo rwaye omwene, nawe, obhuniibhi bhwaye bhutaana obhwera embere ya Waryubha.”

Ameehigiryo eguru ya okwinyankira

(Mataayo 6:25-34)

²²Kweki, Yeesu akabhakeerya abheehigira bhaaye ega, “Kwa ego, mutanyankira obhuhoru bhwenyu ega, murirya-ki, kora mutanyankira emibhiri gyenyu ega, muriibhoha-ki. ²³Kwa okubha, obhuhoru bhurakira ebhyakurya, na omubhiri gurakira emyenda!

²⁴“Mwitegeerere ekirengyo kinu. Nyamuko gitakuhamba, gitakugesa, kora gitaana ebhitara, nawe Waryubha aragiriisya. Mbe, bheenyu m-ba obhwera obhunene okukira ebhinyonyi bhiyo! ²⁵Kwa okwinyankira, niwi gati yeenyu, aratura okwiyongerererya obhuhoru bhwaye kora kwa ensa eimwi?12:25 Okwiyongerererya obhuhoru bhwaye kora kwa ensa eimwi. Ensonga eindi eratura okubha ega, okwiyongerererya omubhiri gwaye kora okubhoko okumwi.²⁶Mbe! Nyoore mutakutura okukora kora eringʼana eriike riyo, kwaki muranyanka eguru ya agandi?

²⁷“Mumaahe amauwa, kya ego garamera. Gatakukora emirimu na gatakutuma emyenda. Nawe, oni ndabhakeerya ega, kora omukama Soromoni kwa obhuniibhi bhwaye bhonsego, ataajomibhwa bhwaheene kya eriuwa erimwi gati ya gayo! ²⁸Bhoono, nyoore Waryubha areebhohya ego obhunyanki bhwa mwisisi, bhunú reero bhuriho na ejo bhureeswa mumururo, mbe bhoono, Waryubha ataritura okubheebhohya bheenyu abhantu bha eimani enke!

²⁹“Mbe, bheenyu mutige okunyanka ega, murarya-ki, kasi muranywa-ki. Mutige okoobhoha! ³⁰Abhantu bhanú bhatamanyiri Waryubha, mbo bharanyankira ebhintu bhiyo. Nawe bheenyu, Eseweenyu wa murwire amanyiri bhujomu ega, murabhyenda! ³¹Kwa ego, mutune embere obhukama bhwa Waryubha. Hayo nho, muryongeribhwa agandi gayo gonsego.

Obhuniibhi bhwa murwire

(Mataayo 6:19-21)

³²“Bheenyu omuganda omuke, mutige okoobhoha, kwa okubha Eseweenyu ahanjiri okubhahaana obhukama bhwaye. ³³Mugurye ebhintu bhyenyu, muhaane abhatobhu egimbirya gya ebhintu bhiyo. Mwikorere eginsaho ginú gitakugota, na okwituurira ekibhumbiko murwire enú kitarisuuha. Eyo, omwibhi atakwibha, kora ebhibhungi bhitarikisarya. ³⁴Mukore ego, kwa okubha hanú ekibhumbiko kyenyu kiringi, nho na omutima gwenyu gonse guribha.

Abhantu bheeseemye okuuja kwa Omukuru Yeesu

³⁵“Mubhe mwiseemerye okunkorera emirimu, na egikorobhoi gyenyu, gibhe girooka. ³⁶Mubhe kya abhakori bha emirimu bhanú bharaganyirira omukuru waabho ahinde okurwa mubhwenga. Hanú araaje asiikurye, bhamusiikurire ekiseku bhwangu. ³⁷Bhaanonkwa abhakori bha emirimu bhanú omukuru waabho ariija anyoore bharamuganyirira. Ndabhakeerya obhuheene ega, ariiseemya, na aribheekarya kubhyakurya na okubhakorera emirimu! ³⁸Kora nyoore omukuru waabho arihinda obhutiku gati, kasi nyenkyo juri, na okubhanyoora bheeseemerye, abhakori bha emirimu bhayo bhaanonkwa!

³⁹“Bhoono, mumanye bhujomu eringʼana rinu ega, nyoore omwene enyumba akaamanyiri eribhaga rinú omwibhi araaja, akeeseemerye, na omwibhi atakaasoheri munyumba yaaye. ⁴⁰Kwa ego, na bheenyu mwiseemye eribhaga ryonsego, kwa okubha Omwana wa Adamu ariija kwibhaga rinú mutakwiganirirya.”

Ekirengyo kya omukori wa emirimu omuheene

(Mataayo 24:45-51)

⁴¹Mbe, Petero akamubhuurya Yeesu ega, “Omukuru, ekirengyo kiyo otukeererye, n-kurusumo rwetu abheenego, kasi n-kurusumo rwa abhantu bhonsego?”

⁴²Omukuru Yeesu akamukyukya ega, “Omukori wa emirimu omuheene na wa egintungwa, ngʼ-unú omukuru waaye amuteeri okubha omwimiririri wa abhakori bha emirimu abhandi munyumba yaaye, naho abhe arabhahaana ebhyakurya kwibhaga rinú rireenderwa. ⁴³Arinonkwa omukori wa emirimu unú omukuru waaye, hanú arihunjuka okurwa kurugendo, amunyoore arakora kya ego yaamuragirirya. ⁴⁴Ndabhakeerya obhuheene ega, omukuru waaye arimukora okubha omwimiririri wa ebhintu bhyaye bhyonsego!

⁴⁵“Nawe, nyoore omukori wa emirimu uyo, areeganirirye mumutima gwaye ega, ‘Omukuru waani araatigite bhukongʼu okuhinda,’ nho yaambe okutema abhakori bha emirimu abharikyaye, abhasaaja kwa abhakari, yaambe okurya na okunywa, okuhikira ararehwa. ⁴⁶Mbe, omukuru waaye arihunjuka okurwa kurugendo, orusiku runú omukori wa emirimu uyo atakwiganirirya okumuturuungʼana, na ensa inú atamanyiri. Nho, omukuru waaye arimujibhya bhururu, na okumutuura ahasi hamwi na abhantu bhanú bhataringi abhaheene.12:46 Abhantu bhanú bhataringi abhaheene. Ensonga eindi eratura okubha ega, abhantu bhanú bhatakwikirirya Waryubha.

⁴⁷“Omukori wa emirimu unú yaamanya obhwendi bhwa omukuru waaye, nawe ateeseemya okumuturuungʼana, kora ataagwata amaragiriryo gaaye, aritemwa ebhisaamuri ebhyaru. ⁴⁸Nawe, omukori wa emirimu unú atamanyiri obhwendi bhwa omukuru waaye, araakore eringʼana rinú rireenderwa obhujibhu bira okumanya, uyo arijibhibhwa hakego. Omuntu unú yaahaanwa ebhyaru, aririhibhwa ebhyaru, na omuntu unú aheerwe okukora emirimu emyaru bhukongʼu, omukuru waaye arimutonga ebhyaru.

Yeesu araahukanʼya abhantu

(Mataayo 10:34-36)

⁴⁹“Oni, naaja mukyaro hanu, naho nkoome omururo gwa okwahukanʼya abhantu. Na ndeenda ndore omururo guyo gukoomerwe! ⁵⁰Kora oni omwene, niina enyanko inú ndeenderwa okunyoora, na ndagendererya okunyanka mumutima gwani, okuhikira gakoreke. ⁵¹Muramanya ega, niijiri mukyaro okureeta omurembe? Ndabhakeerya ega, etari ego! Niijiri okwahukanʼya abhantu. ⁵²Okwambira bhoono, munyumba ya abhantu bhataanu, abhasatu bharyahukana na abhabhiri. Abhabhiri bhonse, bharyahukana na abhasatu bhayo. ⁵³Taata aryahukana na omumura waaye, na omumura wonse, aryahukana na esewaabho. Maayi aryahukana na omuhara waaye, na omuhara wonse aryahukana na ngʼina waabho. Mabhyara, aryahukana na omukamwana waaye, na omukamwana uyo wonse, aryahukana na ngʼinabhyara waabho.”

Okumanya eribhaga rya Yeesu

(Mataayo 16:2-3)

⁵⁴Kweki, Yeesu akakeerya omuganda gwa abhantu bhayo ega, “Hanú murarora amasaaru gararwa orubhaara rwa bhusikirira-ryubha, muragamba ega, ‘Embura eringi haangʼi okutwa,’ heene eratwa. ⁵⁵Na hanú murarora omuyaga gurahuuta okurwa orubhaara rwa taragweta, muragamba ega, ‘Kuraabhe na eribhiriira,’ na niigo erabha. ⁵⁶Bheenyu bhanyarwambe! Mumanyiri bhujomu ebhimanyiiriryo bhya mukyaro na ebhya murwire. Bhoono, erabha egaki muratamwa okumanya ensonga ya amangʼana ganú garatuuka kuginsiku ginu?

Ameehigiryo eguru ya okubhutura ekiina kunú kuraaja

(Mataayo 5:25-26)

⁵⁷“Ndeegwa bheenyu abheene, kwa emitima gyenyu, mutakwamura okukora ganú gareenderwa? ⁵⁸Hanú oraagende hamwi na omuntu unú arakujongera mwibharaja, kora ekituunyo okwikiririnʼya nawe, mukyari kunjira. Nyoore otaakore ego, araakuhikye embere ya omubhuturi wa ekiina. Na omubhuturi wa ekiina araakuhire kumukuru wa abhasirikare, naho omukuru uyo, akusohye mwigereja kwa eginguru. ⁵⁹Ndakukeerya obhuheene ega, otarirwa muyo, okuhikira hanú orimara okuriha esiiri yonsego!”

Yeesu arakomererya abhantu bhamwihunjurire Waryubha

¹Eribhaga riyoriyo, abhantu abhandi bhakaaja bhakamukeerya Yeesu ega, “Omwanangwa Pirato yeeta Abhagariraaya abhandi, hanú bhaaringa bharagooga egintugo gya ekimwenso. Amanyinga gaabho gakeesanganʼya na amanyinga ga ekimwenso kinú bhaaringa bharamuruusirya Waryubha.”

²Yeesu akabhakeerya ega, “Muramanya ega, Abhagariraaya bhayo, bhaakwa oruku ruyo kwa okubha bheeki bhaaringa na obhusarya obhwaru okukira Abhagariraaya abhandi bhonsego? ³Ndabhakeerya ega, tiigo-ha! Nawe, hanú muraange okumwihunjurira Waryubha okurwa mubhusarya bhwenyu, bheenyu bhonsego, murisika egoego! ⁴Kasi muhiituke abhantu bharya ekumi na munaane, bhanú bhaagwirwa na ekinsongyo Siroamu eyo, kikabheeta. Muramanya ega, bheeki bhaaringa na obhusarya obhwaru okukira abhantu bhonsego bhanú bhamenyeri Yerusaremu?13:4 Yerusaremu. Maaha eringʼana rinu mu Moonjooro eguru ya Amangʼana Amakongʼu.⁵Ndabhakeerya ega, tiigo-ha! Nawe, hanú muraange okumwihunjurira Waryubha, bheenyu bhonsego, murisika egoego!”

Ekirengyo kya omuti gunú gutakwama emisumo

⁶Kimwi, Yeesu akakeerya abhantu bhayo, ekirengyo ega, “Yaaringa-ho omuntu umwi unú yaahamba omuti gunú gurabhirikirwa omutini, mumugunda gwaye gwa emijabhibhu. Eribhaga erindi, akagya okutuna-ko emisumo, nawe ataanyoora ekintu. ⁷Mbe, akakeerya omukori wa emirimu waaye wa mumugunda guyo ega, ‘Rora! Kwa eribhaga rya emyaka esatu bhoono, naabheeri ndaaja okutuna emisumo kumuti gunu, nawe ntakunyoora-ko ekintu! Ngugeeje, naho gutige okugendererya okusarya erirobha rinu bhusa!’

⁸“Nawe, omukori wa emirimu uyo, akamukyukya ega, ‘Omukuru, gutige omwaka gunu, nguseejere na ngutuurire emborea. ⁹Nyoore guryama emisumo, m-bwaheene. Nawe nyoore gutaryama, ogugeeje.’”

Yeesu aramuhwenʼya omukari orusiku rwa Esabhato

¹⁰Orusiku rumwi rwa Esabhato, Yeesu yaaringa mwisinagogi13:10 Mwisinagogi. Maaha Erisinagogi mu Moonjooro eguru ya Amangʼana Amakongʼu. areehigirya abhantu. ¹¹Mwisinagogi muyo, yaaringa-mo omukari umwi, unú yaaringa agwatirwe na ekihwi ekibhiibhi kwa eribhaga rya emyaka ekumi na munaane. Ekihwi kiyo, kyaringa kimukumbiri omugongo, ataaringa aratura okwinamuka.

¹²Yeesu hanú yaamurora, akamubhirikira. Akamukeerya ega, “Maayi, ohweneri, bhoono oreeyagaara!” ¹³Yeesu akamutuurira amabhoko, rumwigo, akeenamuka, akaamba okumugungya Waryubha.

¹⁴Omukuru wa erisinagogi riyo, akajima bhukongʼu, kwa okubha orusiku runú Yeesu yaahwenʼya omuntu uyo, rwaringa orusiku rwa Esabhato. Akakeerya abhantu ega, “Kira obhutuuro, eginsiku gya okukora emirimu ni-sansabha. Mbe, muuje muhwenibhwe kuginsiku giyo, nawe, mutige okuuja okuhwenibhwa orusiku rwa Esabhato!”

¹⁵Nawe, Omukuru Yeesu akamukyukya ega, “Bheenyu bhanyarwambe! Niwi gati yeenyu atakusiikurira engʼombe yaaye kasi entikiri yaaye okurwa muriigo aihire okuinywensya, orusiku rwa Esabhato? ¹⁶Ndeegwa, omukari unu, ngʼo wa oruganda rwa Abhurahamu, amariri emyaka ekumi na munaane, abhoherwe na Erisambwa.13:16 Erisambwa. Maaha eringʼana rinu mu Moonjooro eguru ya Amangʼana Amakongʼu. Mbe, uyo wonse, atakwenderwa ahwenibhwe obhurweri, orusiku rwa Esabhato?”

¹⁷Yeesu hanú yaagamba gayo, bhonsego bhanú bhaaringa bharahakaananʼya nawe, bhakasuuka. Nawe, abhandi bhonsego, bhakajomerwa bhukongʼu, kwa ekisigo kya amangʼana ga ebhika ganú yaaringa arakora.

Ekirengyo kya akabhusuro akatuuya

(Mataayo 13:31-32; Mariko 4:30-32)

¹⁸Kimwi, Yeesu akabhuurya abhantu bhonsego ega, “Obhukama bhwa Waryubha13:18 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. bhuhunkeeni egaki? Mbuhunkanʼye naki? ¹⁹Bhurahunkana na akabhusuro akatuuya aka eharadari, kanú omuntu yaagega akahamba mumugunda gwaye. Akabhusuro kakamera, gukabha omuti omunene, ebhinyonyi bhikaaja, bhikahagaaja amasu gaabhyo kumasagi ga omuti guyo.”

Ekirengyo kya ekimera

(Mataayo 13:33)

²⁰Yeesu akabhuurya kweki orwa kabhiri, ega, “Obhukama bhwa Waryubha, mbuhunkanʼye naki? ²¹Bhurahunkana na ekimera kinú omukari yaagega, akasanganʼya mumadebhe gasatu ga obhusye bhwa engano, kikabhimbya obhusye bhuyo bhonsego.”

Yeesu atariikirirya abhasarya bhasohemubhukama bhwa Waryubha

(Mataayo 7:13-14, 7:21-23)

²²Yeesu hanú yaaringa kurugendo rwa okugya Yerusaremu, yaaringa areehigirya abhantu mumigi na mubhijiji bhinú yaahitanga-mo. ²³Orusiku rumwi, omuntu umwi yaamubhuurya ega, “Omukuru, abhantu bhanú bharituuribhwa, bharibha abhakego?”

Yeesu akabhakeerya ega, ²⁴“Okusoha mubhukama bhwa Waryubha, n-kya ego orasoha mukiseku ekinyintu. Ndabhakeerya ega, m-baaru bhanú bharyenda okusoha, nawe bhatarinagya. Mbe bheenyu, mukore ekituunyo okusoha-mo! ²⁵Omwene enyumba hanú arisiika-ho ekiseku, bheenyu muriimirira kibhara, muratema ekiseku, muribhanga muragamba ega, ‘Omukuru, tusiikurire!’ Nawe, aribhakyukya ega, ‘Ntabhamanyiri, na ntamanyiri enú murwiriri!’

²⁶“Bheenyu murimukeerya ega, ‘Bheetu m-banú twaryanga na okunywa hamwi na uuwe! Na uuwe weehigiryanga mubhitongoji bhyetu!’ ²⁷Nawe, weeki aribhakyukya ega, ‘Mmariri okubhakeerya ega, “Ntabhamanyiri, na ntamanyiri enú murwiriri! Murwe owaani hanu, bheenyu abhakori bha obhusarya!”’

²⁸“Nho, murikuura na okusya ameeno, kwa okubha murimurora Abhurahamu, Esaaka, na Yakobho, na abharooti bhonsego bharingi mubhukama bhwa Waryubha, nawe bheenyu muribha mutigirwe kibhara! ²⁹Abhantu bhariija okurwa mbaara gyonsego gya ekyaro. Bhariikara okurya ebhyakurya munyangi ya obhukama bhwa Waryubha.

³⁰“Mwitegeerere! Abhantu abhandi bhanú bharamaahikana ega, m-ba eguru bhoonwego, bharibha abha insi. Na abhandi bhanú bharamaahikana ega, m-ba insi bhoonwego, mbo bharibha abha eguru.”

Yeesu arasurumbara eguru ya Yerusaremu

(Mataayo 23:37-39)

³¹Eribhaga riyoriyo, Abhafarisaayo abhandi bhakaaja ku Yeesu, bhakamukeerya ega, “Reka hanu, ogende ahasi ahandi, kwa okubha omukama Herode Antipa13:31 Herode Antipa. Maaha eringʼana rinu mu Moonjooro eguru ya Amangʼana Amakongʼu. areenda okukwita.”

³²Yeesu akabhakyukya ega, “Mugende, mukeerye nyamubhwe omuhaari uyo ega, ‘Ndakenyia ebhihwi okurwa kubhantu, na okuhwenʼya abharweri, reero na ejo, orusiku rwa kasatu, ndamara emirimu gyani.’ ³³Kora ego, ndeenderwa ngendererye na orugendo rwani rwa okugya Yerusaremu reero, ejo na bhasiirya, kwa okubha ereenderwa kira omurooti akwire Yerusaremu, etari ahasi ahandi.

³⁴“Bheenyu abhantu bha Yerusaremu! Abhantu bha Yerusaremu! Mureeta abharooti na okubhatema na amagina abhantu bhanú Waryubha yaabhatuma kubheenyu. Mara kaaru naatuna okubhakumanʼya bheenyu kya ego enkoko erakumanʼya ebhijuuju bhyayo mumabhabha, nawe, muteenda! ³⁵Maaha, Waryubha aritiga omugi gwenyu gubhe eritongo. Oni ndabhakeerya ega, mutarindora kweki, okuhikira eribhaga rinú murigamba ega, ‘Anonkerwe unú araaja kwa eriina rya Omukuru Waryubha.’13:35 Maaha mukitabho kya Egijabhuri 118:26.”

Yeesu aramuhwenʼya omurweri orusiku rwa Esabhato

¹Orusiku rumwi rwa Esabhato, Yeesu akagya akasoha munyumba ya omukuru umwi wa Abhafarisaayo okurya ebhyakurya. Na hanú yaaringa muyo, Abhafarisaayo na abhantu abhandi, bhakabha bharamwikomya bhukongʼu.

²Embere waaye, yaaringa-ho omuntu umwi, unú yaaringa na obhurweri bhwa okubhimba omubhiri. ³Yeesu akabhabhuurya Abhafarisaayo na abheehigirya bha amaragiriryo ega, “Amaragiriryo ga Waryubha garatwikiririrya okuhwenʼya abhantu orusiku rwa Esabhato,14:3 Esabhato. Maaha eringʼana rinu mu Moonjooro eguru ya Amangʼana Amakongʼu. kasi-ha?” ⁴Nawe, bhonsego bhakakira. Mbe, Yeesu akamukuunʼya omurweri uyo, akamuhwenʼya, akamutiga agye gyaye.

⁵Nho, Yeesu akabhabhuurya ega, “Niwi gati yeenyu unú, engʼombe yaaye kasi entikiri yaaye14:5 Entikiri yaaye. Amangʼoore agandi ga akare aga Ekiyunani garagamba ega, omwana waaye wa ekimura. hanú eraagwe mukisima orusiku rwa Esabhato, atakuiruusya-mo?” ⁶Abhantu bhayo, bhataanagya okumukyukya eringʼana riyo.

Ameehigiryo eguru ya okwikorya abhakuru

⁷Yeesu yaaringa ararora abhageni bhanú bhaaringa bharaarikirwe munyangi iyo, kya ego bhaaringa bhareesorera ebhitumbi bhya abhageni abhakuru. Nho, akabhakeerya ekirengyo ega, ⁸“Hanú oraaraarikwe mubhwenga, otige okwikangatirirya okwikara ahasi ha abhageni abhakuru, kwa okubha oriko okunyoora araarikirwe oundi omukuru okukira uuwe. ⁹Na unú yaabharaarika bheenyu bhabhiri, araaje akukeerye ega, ‘Ndasabha omuteere unu ekitumbi kiyo.’ Hayo, orisuuka bhukongʼu, kwa okubha origya okwikara enyuma kukitumbi kya omuntu wa insi bhukongʼu. ¹⁰Nawe, hanú oraaraarikwe munyangi, ogende wikare kumweya gwa enyuma, naho hanú araaje unú yaakuraarika, akukeerye ega, ‘Musaani waani, njo embere hanu! Nho ahajomu bhukongʼu.’ Ego oraabhe oheerwe obhukuru embere ya abhageni bhonsego. ¹¹Kwa okubha kira omuntu unú areeriinʼya omwene, Waryubha arimwituumya. Na unú areeyituumya omwene, Waryubha arimuriinʼya.”

¹²Hayo, Yeesu akamukeerya omuntu unú yaaringa amuraarikiri ega, “Hanú oraaseemerye abhantu enyangi ya ebhyakurya bhya mubhasu kasi mugoroobha, otaraarika abhasaani bhaaho, abhahiiri bhaaho, abhamenyani bhaaho na abhaniibhi. Hanú oraakore ego, bheeki bhonse bharikuraarika owaabho. Ego, orinyoora orihirwe kwa okubha waabharaarika. ¹³Nawe, hanú oraaseemye enyangi, oraarike abhatobhu, abharema, abhabheeru, na abhahoku. ¹⁴Nho orinonkwa, kwa okubha bhayo bhataana obhuturo bhwa okukuriha. Kwa ego, Waryubha arikuriha eribhaga rinú arihyukya abhantu abhaheene.”

Ekirengyo kya enyangi enene

(Mataayo 22:1-10)

¹⁵Mbe, omugeni umwi unú yaaringa yeekeeri hamwi na Yeesu kubhyakurya, hanú yeegwa amangʼana gayo, akagamba ega, “Yaanonkwa omuntu unú arirya enyangi, mubhukama bhwa Waryubha!”

¹⁶Yeesu akamukyukya kwa ekirengyo ega, “Yaaringa-ho omuntu umwi, unú yaaseemya enyangi enene, akaraarika abhantu abhaaru. ¹⁷Ensa ya okurya yaaja okuhika, akamutuma omukori wa emirimu waaye kubhonsego bhanú yaaringa araarikiri, abhakeerye ega, ‘Muuje! Ebhintu bhyonsego bhibheeri!’

¹⁸“Nawe, bhonsego bhanú yaaringa araarikiri, umwi umwi bhakabha bharamusabha abhaabhire. Wa okwamba, akagamba ega, ‘Nguriri omugunda, ndeenderwa ngende ngumaahe. Ndakusabha unyabhire.’ ¹⁹Oundi akagamba ega, ‘Nguriri egingʼombe ekumi gya okurimira, bhoonwego ndagya okugisakya. Ndakusabha unyabhire.’ ²⁰Na oundi akagamba ega, ‘Naateteri omukari bhwangu hanu, kwa ego, ntaaje.’

²¹“Omukori wa emirimu uyo, hanú yaahunjuka, akamukeerya omukuru waaye gayo gonsego. Mbe, omukuru uyo, akajima, akamukeerya ega, ‘Genda bhwangu kunjira ya nyamansaana na mubhinyerero bhya omugi gunu, obhareete hanu abhatobhu, abhahoku, abharema, na abhabheeru.’

²²“Eribhaga erindi, omukori wa emirimu hanú yaahunjuka, akamukeerya ega, ‘Omukuru, ganú waari untumiri, gabheeri. Kora ego, omweya gukyari-ho kubhantu abhandi.’

²³“Omukuru akamukeerya ega, ‘Mbe, genda kwibharabhara erikuru na kugintunga gya omugi gunu. Obhangʼeenererye abhantu bhasohe munyumba yaani okuhikira iijure. ²⁴Nawe, ndabhakeerya ega, bhonsego bhanú naaringa ndaarikiri kubhwambiro, atariho kora umwi waabho, unú arirabha enyangi yaani!’”

Ganú gareenderwa okubha omwihigira wa Yeesu

(Mataayo 5:13, 10:37-38; Mariko 9:50)

²⁵Yeesu yaaringa aragenda na omuganda omunene gwa abhantu. Mbe, akeekyukya, akabhakeerya ega, ²⁶“Omuntu wowonse unú aransoorana arabha omwihigira waani heene hanú araanhanje oni, okukira esewaabho, ngʼina waabho, omukari waaye na abhaana bhaaye, abhahiiri bhaaye bha ekisaaja na bha ekikari, na obhuhoru bhwaye omwene. ²⁷Omuntu wowonse unú atakugega omusarabha gwaye,14:27 Atakugega omusarabha gwaye. Ensonga ya okugega omusarabha niiga, okwikirirya enyanko yoyonse irya kasi kora okukwa okurekana na okugwatana na Yeesu. kurusumo rwani, uyo atakutura okubha omwihigira waani.

²⁸“Tiga mbaragirirye. Niwi gati yeenyu areende okuhagaaja ekinsongyo, ateekare okwamba akore amasaabhu ga obhuhagaaji, arore nyoore yaana egimbirya gya okumarira obhuhagaaji. ²⁹Bira okukora ego, aratura okuhagaaja obhurusa, amare atamwe okugendererya okuhagaaja ekinsongyo. Abhahiti bha kunjira bharaabhenga bharamujeera. ³⁰Bharaagambenga ega, ‘Rora omuntu unu! Yaamba okuhagaaja, nawe ataana obhuturo bhwa okurimariisya erikindaasi rinu!’

³¹“Kasi ekirengyo ekindi ega, m-mukama-ki, unú areende okugya okurwana eriihe na omukama oundi, ateekare okwamba yeetegeerere nyoore weeki na abhasirikare bhaaye ebhiku ekumi, aratura okurwana na omurikyaye wa abhasirikare ebhiku mirongo ebhiri. ³²Nyoore araarore ega, atakutura okuhiga, rumwigo, aratuma amangʼana ga okusabha, bheekiriranʼye kwa omurembe akyari hare.

³³“Egoego na bheenyu, unú atakutiga bhyonsego bhinú yaanabhyo, atakutura okubha omwihigira waani.

³⁴“Omuunyu n-kintu ekijomu. Nawe guraabhe gusarikiri, gutakutura okubha na omuta gwa omuunyu kweki.14:34 Nawe guraabhe gusarikiri, gutakutura okubha na omuta gwa omuunyu kweki. Omuunyu gunú gutaana obhwera, gureemiririra omwihigira unú atakwenda okutiga bhyonsego bhinú yaanabhyo kurusumo rwa Yeesu.³⁵Omuunyu gwa ekabhira inu, gutakujoma okutuura mwirobha, kora okuikora emborea, abhantu bharagwesa. Unú yaana amatwi, yeegwe!”

Ekirengyo kya eringʼondi rinú ryabhura

(Mataayo 18:12-14)

¹Eribhaga riyo, abhatobhya bha erigooti15:1 Abhatobhya bha erigooti. Maaha eringʼana rinu mu Moonjooro eguru ya Amangʼana Amakongʼu. na abhasarya abhandi, bhaaringa bharamuujira Yeesu, naho bhamwitegeerere. ²Mbe, ekakora Abhafarisaayo15:2a Abhafarisaayo. Maaha eringʼana rinu mu Moonjooro eguru ya Amangʼana Amakongʼu. na abheehigirya bha amaragiriryo,15:2b Abheehigirya bha amaragiriryo. Maaha eringʼana rinu mu Moonjooro eguru ya Amangʼana Amakongʼu. bheengʼeheerye ega, “Omuntu unu, ndeegwa arabhagenihya abhantu abha obhusarya! Kweki ararya nabho!”

³Hayo, Yeesu akabhakeerya ekirengyo, ega, ⁴“Tugambe oumwi weenyu yaana amangʼondi egana rimwi. Hanú araamanye ega, erimwi ryago ribhuriri, araakore egaki? Araagatige garya mirongo kenda na kenda (99) mukiriisyo, agye okutuna rinú ribhuriri okuhikira arinyoore. ⁵Na hanú araarinyoore, araarigegere kwiriko kwa obhujomerwa. ⁶Hanú araahike iika, araabhirikire abhasaani na abhamenyani bhaaye, abhakeerye ega, ‘Tujomerwe hamwi, kwa okubha eringʼondi ryani, rinú ryaringa ribhuriri, ndinyooreri!’

⁷“Ndabhakeerya ega, egoego, haribha na obhujomerwa obhwaru murwire, nyoore omusarya umwi arimwihunjurira Waryubha okurwa mubhusarya bhwaye. Obhujomerwa eguru ya omuntu umwi unú yaaringa abhuriri na akamwihunjurira Waryubha, bhuribha obhunene okukira obhwa eguru ya abhantu mirongo kenda na kenda abhaheene, bhanú bhataabhura.”

Ekirengyo kya egimbirya gya obhwera ginú gyabhura

⁸Yeesu kweki, akabhakeerya ekirengyo ekindi ega, “Tugambe omukari umwi yaana egimbirya ekumi.15:8 Egimbirya ekumi. Ekiyunani kiragamba ega, darakima ekumi. Darakima eimwi yaaringa amariho ga omukori wa emirimu kwa orusiku rumwi. Nyoore eimwi eraabhure, ataagwatye ekorobhoi, na okweyerera enyumba yonsego, aitune okuhikira ainyoore? ⁹Hanú araainyoore, araabhabhirikire abhasaani na abhamenyani bhaaye, abhakeerye ega, ‘Tujomerwe hamwi, kwa okubha embirya inú yaaringa ebhuriri, ngʼinyooreri!’

¹⁰“Ndabhakeerya ega, egoego niigo Waryubha arajomerwa embere ya bhamaraika,15:10 Waryubha arajomerwa embere ya bhamaraika. Ensonga eindi eratura okubha ega, bhuriho obhujomerwa embere ya bhamaraika bha Waryubha. hanú omusarya umwi araamwihunjurire okurwa mubhusarya bhwaye.”

Ekirengyo kya omwana unú yaabhura

¹¹Yeesu akagendererya okubhakeerya ekirengyo ekindi ega, “Yaaringa-ho omuntu umwi. Omuntu uyo, yaaringa na abhaana bhabhiri bha ekimura. ¹²Omuke, akamukeerya esewaabho ega, ‘Taata, ngʼaana engabho yaani!’ Mbe, esewaabho uyo, akabhagabhanʼya ebhintu bhyaye.

¹³“Eribhaga rya eginsiku nkego, omwana uyo, akakumanʼya ebhintu bhyaye bhyonsego, bhinú esewaabho yaaringa amuheeri, akabhigurya, akagya mukyaro kya hare. Hanú yaahika eyo, akarya egimbirya bhuyagayaga, akamara chwe. ¹⁴Hanú yaamara egimbirya gyonsego, mukyaro kiyo ekabha-mo enjara enduru bhukongʼu. Kwa okubha ataaringa na ekintu kyokyonse kya okurya, ¹⁵akagya kumuntu umwi wa mukyaro kiyo, akamusabha emirimu. Omuntu uyo, akamutuma mumigunda okumuriisirya egimbiiji15:15 Egimbiiji. Abhayahudi bhaajeeranga bhukongʼu egimbiiji. gyaye. ¹⁶Omwana uyo, akeegwa omweko, okuhikira akagwatwa na enamba ya okurya amakanda ganú egimbiiji gyaringa girarya! Nawe, ataatuuka omuntu unú yaamuhaana ekintu kyokyonse kya okurya.

¹⁷“Kubhuteero, obhungʼeeni bhwaye bhukaamba okumuhindira, akeegambira omwene ega, ‘Abhakori bha emirimu bha taata, bhaana ebhyakurya ebhyaru, bhararya bhiratama! Nawe oni hanu, ndaraambuka. ¹⁸Ndaahunjuke kutaata, mmukeerye ega, “Taata, mmusariirye Waryubha, na nkusariirye uuwe wonse. ¹⁹Ntakwenderwa kweki okubhirikirwa omwana waaho. Kwa ego, ndakusabha unkore kya oumwi wa abhakori bha emirimu bhaaho.”’

²⁰“Mbe, akaamba orugendo, okuhunjuka kwisewaabho. Hanú yaaringa akyari hare, esewaabho akamurora, akagwatwa na ekyabhira. Akamukenyerera omwana waaye, akamuhumbata. ²¹Omwana uyo, akamukeerya esewaabho ega, ‘Taata, mmusariirye Waryubha, na nkusariirye uuwe wonse. Ego, ntakwenderwa kweki okubhirikirwa omwana waaho.’

²²“Nawe, esewaabho akakeerya abhakori bha emirimu bhaaye ega, ‘Mureete omwenda omujomu bhwangu, mumwibhohye. Mumwibhohye epete kukyara kyaye, mumwibhohye na eginkeeto kumaguru. ²³Hanú muraamare, mugiire engʼombe enure inú twaringa tuseemerye kurusumo rwa enyangi. Muigooge, museemye enyangi enene, turye, tujomerwe, ²⁴kwa okubha, omwana waani yaaringa muna akwiri, bhoonwego, ahyukiri. Yaaringa arobheeri, bhoonwego, atuukiri kweki!’ Mbe, bhonsego bhakaamba okujomerwa hamwi.

²⁵“Eribhaga riyo, omumura omutangi wa omuntu uyo, yaaringa agiiri kumugunda. Hanú yaahika haangʼi na iika owaabho, eribhaga yaahunjukanga okurwa kumugunda, akeegwa omubhari gurareetya na abhantu bharabhina. ²⁶Akabhirikira omukori wa emirimu umwi, akamubhuurya ega, ‘Niki kituukiri iika hayo?’ ²⁷Omukori wa emirimu uyo, akamukyukya ega, ‘Omuke waaho yaajiri, na eseweenyu amugoogeeri engʼombe enure irya, kwa okubha ahunjukiri omuhoru kweki.’ ²⁸Omumura omutangi uyo, akajima bhukongʼu, akaanga kora okusoha munyumba. Kimwi, esewaabho akahuruka kibhara, akamukomererya asohe. ²⁹Omumura waaye uyo, akamukeerya ega, ‘Itegeerera! M-myaka eringa ginú naabha ndakukorera emirimu, ntaakatigiri okugwata amaragiriryo gaaho! Nawe, otaakangʼeeri kora ekimaanwa kya emburi, nkore enyangi hamwi na abhasaani bhaani. ³⁰Nawe, omwana waaho unú yaarya ebhintu bhyaho na abhasimbe bhuyagayaga, weeki ahikiri ego, oramugoogera engʼombe enure!’

³¹“Esewaabho akamukeerya ega, ‘Omwana waani, uuwe weekara hamwi na oni eginsiku gyonsego, na ebhintu bhyani bhyonsego, m-byaho. ³²Nawe omuke waaho, yeendeerwe tumukorere enyangi na okujomerwa hamwi. Kwa okubha yaaringa muna akwiri, bhoonwego, ahyukiri. Yaaringa arobheeri, bhoonwego, atuukiri kweki!’”

Ekirengyo kya omwimiririri wa ebhintu

¹Kweki, Yeesu akabhakeerya abheehigira bhaaye ekirengyo ega, “Yaaringa-ho omuniibhi umwi. Omuniibhi uyo, yaaringa na omwimiririri wa ebhintu bhyaye. Omwimiririri uyo, yaajongerwa ega, yaaringa arasarya bhuyagayaga ebhintu bhya omukuru waaye. ²Mbe, omuniibhi uyo, akamubhirikira omwimiririri waaye, akamubhuurya ega, ‘Neegwiri amangʼana amabhiibhi eguru yaaho, m-mangʼana-ki? Nyorokya amasaabhu ga ebhintu bhyani, kwa okubha otakutura okugendererya na emirimu kweki!’

³“Omwimiririri uyo, akeebhuurya ega, ‘Omukuru waani areenda okunkenyia emirimu. Bhoono, nkore egaki? Ntaana eginguru gya okurima, na okusabhiirirya ndasuuka. ⁴Bhoono, mmanyiri kya ego ndaakore, naho hanú ndaakenyibhwe emirimu, abhantu bhabhenga bharangenihya iika owaabho.’

⁵“Mbe, omwimiririri uyo, akabhabhirikira umwi umwi, abhantu bhanú bhaaringa na egisiiri kumukuru waaye. Akamubhuurya wa okwamba ega, ‘Esiiri yaaho kumukuru waani ni-ringa?’ ⁶Wonse akamukyukya ega, ‘Esiiri yaani, m-maduramu egana rimwi ga amaguta ga emijeituni.’ Kimwi, omwimiririri uyo, akamukeerya ega, ‘Gega eritarataasi rya esiiri yaaho inu, ikara, oikyukye bhwangu, ongʼoore mirongo etaanu.’ ⁷Hanú yaamara, akabhuurya owa kabhiri ega, ‘Na uuwe, esiiri yaaho ni eringa?’ Wonse akamukyukya ega, ‘Esiiri yaani m-magunira egana rimwi ga egingano.’ Omwimiririri uyo, akamukeerya ega, ‘Gega eritarataasi rya esiiri yaaho inu, ongʼoore mirongo munaane.’

⁸“Mbe, omuniibhi uyo, hanú yaamanya amangʼana gayo, akamugungya omwimiririri uyo, kwa obhungʼeeni bhwaye bhunú yaakora.

“Mbakeererye ekirengyo kiyo, kwa okubha, abhantu bhanú bharanyankira ekyaro kinu, bhaana obhungʼeeni bhukongʼu hanú bharabheerana na abharikyabho, okukira abhantu bhanú bharagwata amangʼana ga Waryubha. ⁹Kweki, ndabhakeerya ega, obhuniibhi bhwa ekyaro kinu, bhurihwa. Bhoono, mutumire obhuniibhi bhuyo, kwa okubheera abhandi, nho murinyoora abhasaani. Hanú muraakore ego, Waryubha aribhagenihya mubhumenyi bhwa koko.

¹⁰“Omuntu wa heene kumangʼana amake, ngʼo wa heene kora kumangʼana amanene. Egoego, omuntu unú ataringi wa heene kumangʼana amake, atakubha wa heene kora kumangʼana amanene. ¹¹Nyoore mutabheeri abhaheene kubhuniibhi bhwa mukyaro hanu, niwi aribheekirirya mubhuniibhi bhwa obhuheene bhwa murwire? ¹²Nyoore mutaabha abhaheene kubhintu bhya abhandi, niwi aribhahaana obhuniibhi bhunú bhuribha bhwenyu abheene?

¹³“Atariho omugaya unú aratura okukorera emirimu abhakuru bhabhiri kwa eribhaga rimwi, kwa okubha araamujimire oumwi na okumuhanja oundi. Kasi okugwatana na oumwi na okumujeera oundi. Ego na bheenyu, mutakunagya okumukorera Waryubha na ebhintu kwa eribhaga rimwi!”

¹⁴Mbe, Abhafarisaayo, hanú bheegwa amangʼana ga Yeesu gayo, bhakamujeera, kwa okubha bhaaringa bhahanjiri egimbirya bhukongʼu. ¹⁵Kwa ego, Yeesu akabhakeerya ega, “Bheenyu, mureekorya m-baheene embere ya abhantu. Nawe, Waryubha amanyiri amangʼana ganú garingi mumitima gyenyu. Kwa okubha, amangʼana ganú abhantu bhararora m-majomu bhukongʼu, gayo garamujimya Waryubha bhukongʼu!

Amaragiriryo na obhukama bhwa Waryubha

(Mataayo 11:12-13, 5:31-32; Mariko 10:11-12)

¹⁶“Amaragiriryo ga Musa, na amangʼoore ga abharooti, gaaringa garagwatwa na abhantu okuhikira eribhaga rya Yoana Omubhatiiji. Okurwa kwibhaga riyo, amangʼana amajomu eguru ya obhukama bhwa Waryubha, gaabha gararaarikwa, na abhantu bhonsego bhaabha bharakomereribhwa okugagwata.16:16 Abhantu bhonsego bhaabha bharakomereribhwa okugagwata. Ensonga eindi eratura okubha ega, abhantu bhonsego bhareenderwa bhasohe kwa eginguru.¹⁷M-bunyoohu bhukongʼu, orwire na ekyaro okurwa-ho, okukira enyuguta eimwi enke ya amaragiriryo ga Waryubha okubhura obhwera.

¹⁸“Hanú omusaaja araatigane na omukari waaye, amare atete omukari oundi, oranyoora omusaaja uyo, akoreri obhusarya bhwa okukora ameega kibhara. Na hanú omusaaja araatete omukari unú atigeeni na omusaaja waaye, oranyoora omukari uyo, akoreri obhusarya bhwa okukora ameega kibhara.”

Ekirengyo kya omuniibhi na omutobhu

¹⁹Yeesu akagendererya okubhakeerya ekirengyo ega, “Yaaringa-ho omuniibhi umwi. Omuniibhi uyo, yeebhohanga emyenda emijomu gya obhuguri obhunene gya erangi ya jambaraawe. Kira orusiku, yaaryanga bhuyagayaga. ²⁰Kweki, yaaringa-ho omutobhu umwi, eriina ryaye Rajaaro. Rajaaro uyo, yaaringa na ebhironda omubhiri omugima. Kira orusiku, yaaraaribhwanga mukiita kya omuniibhi urya. ²¹Rajaaro akabha aragwatwa na enamba ya okurya kora amasaagyo ga ebhyakurya, ganú gaaringa garagwa okurwa kumeja ya omuniibhi urya. Kora egimbwa gikabha giraaja giramumeena ebhironda bhyaye.

²²“Mbe, omutobhu Rajaaro hanú yaakwa, bhamaraika bhakamugega bhakamuhira murwire, haangʼi na Abhurahamu. Omuniibhi urya, wonse akakwa, akabhiikwa. ²³Mbe, omuniibhi uyo, hanú yaaringa aranyanka bhukongʼu mumururo gunú gutakusima,16:23 Mumururo gunú gutakusima. Ekiyunani kiragamba ega, kujimu. akatiirura ameeso gaaye eguru, akamurora Abhurahamu kwa hare, na Rajaaro aringi haangʼi nawe. ²⁴Akabhirikira Abhurahamu kwa eriisi ega, ‘Taata Abhurahamu, unyabhire! Ndanyanka bhukongʼu mumururo gunu. Omutume Rajaaro yaaje hanu, atobheke kora orusonga rwa ekyara kyaye mumanji, atoonyie kururimi rwani, arumititye.’

²⁵“Abhurahamu akamukyukya ega, ‘Omwana waani, hiituka ega, hanú waaringa mukyaro, uuwe waanyoora amangʼana amajomu, nawe Rajaaro, yaanyoora enyanko. Bhoonwego, weeki wonse arahorisibhwa, enu uuwe wonse oranyanka. ²⁶Hamwi na gayo, gati yeetu bheetu enu na bheenyu eyo, rituurirwe-ho eriruuma erinene bhukongʼu. Ensonga ya eriruuma riyo niiga, hanú omuntu areende okurwa enu okuuja kubheenyu eyo, atanagya okuryambuka. Na unú areenda okurwa eyo okuuja kubheetu enu, atanagya okuryambuka.’

^27-28“Omuniibhi uyo, akamukeerya ega, ‘Mbe, taata Abhurahamu, ndakusabha omutume Rajaaro agende iika oweetu kutaata, abhakaanʼye abhahiiri bhaani bhataanu, bheeyangararire na obhusarya. Akore ego, naho bhonse hanú bharikwa, bhatariija okureetwa munyanko enduru inu.’ ²⁹Abhurahamu akamukyukya ega, ‘Abhahiiri bhaaho, bhaana amangʼoore ganú gaangʼoorwa na Musa na abharooti. Bheetegeerere gayo!’

³⁰“Omuniibhi uyo akamukyukya ega, ‘Tiigo-ha! Taata Abhurahamu, hanú omuntu okurwa mubhaku araagye, bharimwihunjurira Waryubha okurwa mubhusarya bhwabho.’ ³¹Abhurahamu akamukyukya ega, ‘Nyoore abhahiiri bhaaho bhayo, bhatakwigwa ganú gaangʼoorwa na Musa na abharooti, bhatarimwigwa omuntu kora akaahyuka okurwa mubhaku.’”

Ameehigiryo eguru ya amasakyo na okwabhirana

(Mataayo 18:6-7, 18:21-22; Mariko 9:42)

¹Mbe, Yeesu akabhakeerya abheehigira bhaaye ega, “Amasakyo ganú garakora abhantu bhajeeme na okukora obhusarya, garaabhe-ho koko. Nawe, omuntu unú araakore amasakyo gayo gabhe-ho, arikirora-ko. ²Nyakara omuntu uyo, akaabhoheerwe ensyo mwigoti na okweswa gatigati wa enyanja, okukira okukora oumwi wa abhake bhanú bharanyikirirya, ajeeme na okukora obhusarya! ³Kwa ego, mwiyangararirenga mutariija okukora obhusarya!17:3 Mwiyangararirenga mutariija okukora obhusarya. Ensonga eindi eratura okubha ega, mwiyangararirenga mutariija okukora omuntu akore obhusarya.

“Nyoore omuhiiri waaho araakusarirye, omukaanʼye. Hanú araakusabhe okumwabhira, mwabhire. ⁴Nyoore kira eribhaga araabhe arahunjuka kuuwe, arakukeerya ega, ‘Unyabhire,’ mwabhire! Kora nyoore araakusarirye mara muhungati kurusiku rumwi, mwabhire!”

Eginguru gya eimani

⁵Nho, abhatumwa17:5 Abhatumwa. Maaha eringʼana rinu mu Moonjooro eguru ya Amangʼana Amakongʼu. bha Yeesu bhakamukeerya ega, “Omukuru, otukongʼye eimani!” ⁶Wonse akabhakyukya ega, “Kora mukaabheeri na eimani enke, kya akabhusuro ka eharadari, mukaagukeererye omuti omunene gwa omukuyu ega, ‘Ihika hanu, ogende, wihambe munyanja!’ gukaabheegwiri.

Ameehigiryo eguru ya obhukori bhwa emirimu

⁷“Tugambe oumwi gati yeenyu yaana omukori wa emirimu, unú aragoomya kasi arariisya amangʼondi. Omukori wa emirimu uyo, hanú araahinde iika okurwa eyo, omukuru waaye aratura okumukeerya rumwigo, ‘Ikara, orye ebhyakurya’? ⁸Tiigo-ha. Oraamukeerye ega, ‘Nseemerya ebhyakurya, wiseemye okunkorera emirimu, hanú nakabhe ndarya na okunywa. Hanú nakamare, nho uuwe wonse wakarye na okunywa.’ ⁹Kora otakumugungya omukori wa emirimu uyo, kwa okubha akoreri ganú akeeriibhwe okukora.

¹⁰“Egoego na bheenyu, hanú murimara okukora gonsego ganú mwakeeribhwa na Waryubha, mugambe ega, ‘Bheetu m-bakori bha emirimu ego. Tukoreri ganú tureenderwa okukora.’”

Yeesu arahwenʼya abhagenge ekumi

¹¹Yeesu, hanú yaaringa aragya mumugi gwa Yerusaremu, akahitira kurutunga rwa ekyaro kya Samaria na Gariraaya. ¹²Hanú yaasoha mukijiji kimwi, akasikana na abhagenge ekumi. Abhagenge bhayo, bhakeemirira hare nawe, ¹³bhakagamba kwa eriisi erinene ega, “Omusuukwa Yeesu, otwabhire!”

¹⁴Yeesu hanú yaabharora, akabhakeerya ega, “Mugende mwiyorokye kubhasyengeri ega, muhweneri.”17:14 Maaha mukitabho kya Abharaawi 14:1-32. Hanú bhaaringa bharagya, bhakeeraama.

¹⁵Oumwi waabho, hanú yaarora ega, amariri okuhwenibhwa, akahunjuka ku Yeesu, aramutogoonʼya Waryubha kwa eriisi erinene. ¹⁶Hanú yaahika, akatema hansi ebhiru embere yaaye, akahiinya obhusu bhukahika hansi, enu aramugungya. Omuntu uyo, yaaringa Omusamaria.

¹⁷Yeesu akagamba ega, “M-bantu ekumi bhanú bharaamirwe. Bhoono, abhandi kenda bharingi-ha? ¹⁸Atahunjukiri kora omuntu oundi okumutogoonʼya Waryubha, m-mugeni unu omwenego?” ¹⁹Nawe, Yeesu akamukeerya ega, “Imirira, ogende gyaho! Eimani yaaho ekuhwenerye.”

Ganú garituuka hanú Omwana wa Adamu ariija

(Mataayo 24:23-28, 24:37-41)

²⁰Mbe, Abhafarisaayo bhakamubhuurya Yeesu ega, “Obhukama bhwa Waryubha, bhuriija ruuha?” Yeesu akabhakyukya ega, “Okuuja kwa obhukama bhwa Waryubha, kutaringi kya ekimanyiiriryo kinú kiratura okumaahikana. ²¹Abhantu bhataritura okugamba ega, ‘M-bunu hanu!’ kasi ‘M-burya harya!’ Mwitegeerere mwigwe! Obhukama bhwa Waryubha muunabho.”

²²Kimwi, Yeesu akabhakeerya abheehigira bhaaye ega, “Kuginsiku ginú giriija, muribha na enamba ya okurora kora orusiku rumwi runú Omwana wa Adamu17:22 Omwana wa Adamu. Maaha eringʼana rinu mu Moonjooro eguru ya Amangʼana Amakongʼu. aritunga ekyaro, nawe mutarirurora. ²³Abhantu bharibhakeerya ega, ‘Mumaahe! Ngʼ-urya harya!’ kasi ‘Mumaahe! Ngʼ-unu hanu!’ Nawe, abhantu bhayo, mutabhakenyerera. ²⁴Mumanye ega, Omwana wa Adamu hanú arihunjuka, ariija kya ego orukubha ruramesya, rumwigo na okungʼarabha egimbaara gyonsego gya orwire. ²⁵Nawe okwamba, Omwana wa Adamu, ereenderwa anyoore enyanko enene, yaangwe na abhantu bha orwibhuro runu.

²⁶“Kya ego yaaringa kwibhaga rya Nuhu,17:26 Maaha mukitabho kya Obhwambiro 6–7. niigo eribha eginsiku gya okuhunjuka kwa Omwana wa Adamu. ²⁷Eribhaga rya Nuhu, abhantu bhaaringa bhararya na okunywa, bhaaringa bharateta na okutetwa, okuhikira orusiku runú Nuhu na abhantu bhaaye, bhaasoha muryato erinene. Hanú bhaamara okusoha ego, embura enjaru ya obhusiki ekatwa, amanji gakeejura mukyaro kyonsego, gakabhasikya abhandi bhonsego.

²⁸“Kora kwibhaga rya Ruutu,17:28 Maaha mukitabho kya Obhwambiro 18–19. amangʼana gaaringa egoego. Abhantu bhaaringa bhararya na okunywa, bhaaringa bharagura na okugurya, bhaaringa bharagoomya na okuhamba egimbusuro, na bhaaringa bharahagaaja. ²⁹Nawe, runú Ruutu na abhaana bhaaye bhaarwa mumugi gwa Sodoma, omururo omuhaari gukeeka okurwa murwire kya embura, gukabhasikya abhandi bhonsego.

³⁰“Ego niigo eribha, orusiku runú Omwana wa Adamu arihunjuka mukyaro hanu, Waryubha arimukundukura. ³¹Orusiku ruyo, omuntu unú orinyoora atiriiri kurusara, ateetuuma okugega ebhintu bhyaye munyumba, weeki angʼose.17:31 Omuntu unú orinyoora atiriiri kurusara, ateetuuma okugega ebhintu bhyaye munyumba, weeki angʼose. Kwibhaga rya Yeesu abhantu bhaahagaajanga eginyumba gyabho, bhararaarya egimbaau kwikindaasi kurusumo rwa okumuunyira-ko, bhaakoranga na egingaji gya okuriina-ko. Egoego, na omuntu unú orinyoora aringi mumugunda, atahunjuka iika okugega kyokyonse, weeki angʼose. ³²Muhiituke kinú kyamunyoora omukari wa Ruutu!17:32 Omukari wa Ruutu. Waryubha yaamujibhya omukari wa Ruutu obhururu, kwa okubha omukari uyo, yaagwatwa na orunamba rwa okuhunjuka Sodoma, mumugi gunú Waryubha yaaringa ajibhirye na okusikya. Maaha mukitabho kya Obhwambiro 19:26.³³Omuntu wowonse unú areenda okuhonʼya obhuhoru bhwaye bhwa mukyaro munu, aribhubhurya obhuhoru bhwaye koko. Nawe, omuntu unú ariruusya obhuhoru bhwaye kurusumo rwani, arinyoora obhuhoru bhwa koko.

³⁴“Ndabhakeerya ega, obhutiku bhwa ruyo, abhantu abhabhiri bhanú orinyoora bhareeri kubhuriri bhumwi, oumwi arigegwa, oundi aritigwa. ³⁵Nyoore abhakari abhabhiri bharibha bharasya hamwi, oumwi arigegwa, oundi aritigwa. ³⁶[Abhasaaja abhabhiri, bharaabhe bharakora emirimu mumugunda, oumwi arigegwa, oundi aritigwa.]17:36 Amangʼana mumabhano ganu […] gataringi mumangʼoore agandi ga akare aga Ekiyunani.”

³⁷Abheehigira bhakamubhuurya ega, “Omukuru, amangʼana gayo garikoreka-ha?” Akabhakyukya ega, “Hanú haana ekigundo, nho amatoonyi gareekumanʼya. Kwa ego, amangʼana gayo garyorokya ega, obhuteero bhwa ekyaro bhuringi haangʼi.”

Ekirengyo kya okumusabha Waryubha

¹Mbe, Yeesu akabhakeerya abheehigira bhaaye ekirengyo, naho okubhoorokya ega, bhareenderwa okugendererya okusabha eribhaga ryonsego, bhatakwa omutima. ²Akagamba ega, “Yaaringa-ho omubhuturi wa ekiina umwi, mumugi nyabhurebhe. Omubhuturi wa ekiina uyo, ataamwigwanga Waryubha, kora ataamanyanga omuntu wowonse. ³Mbe, mumugi guyo, yaaringa-mo omusino umwi. Uyo, akabha aramusyembera omubhuturi wa ekiina uyo, aramukomererya ega, ‘Ndasabha unyimiririre, naho nnyoore obhuheene bhwani, gati yaani na omusigu waani.’

⁴“Kwa eribhaga eritambi, omubhuturi wa ekiina uyo, yaaringa araanga okumwimiririra omusino uyo. Nawe kubhuteero, akeebhuurya ega, ‘Onyoora oni ntakumwigwa Waryubha, kora ntakumanya omuntu wowonse, ⁵ndaamwimiririre omusino unu, naho anyoore obhuheene bhwaye bhwangu. Nyoore tiigo, araagendererye okunseeta, kubhuteero araanjimye.’”

⁶Mbe, Omukuru Yeesu, akagendererya okugamba ega, “Mwitegeerere amangʼana ganú omubhuturi wa ekiina wa obhusarya uyo, yaagamba! ⁷Nko okugamba ega, Waryubha atakwimiririra abhasorwa bhaaye? Hanú bharimukuurira obhutiku na omubhasu, aritigita okubheetegeerera? ⁸Ndabhakeerya ega, aribhareetera obhuheene bhwabho bhwangu. Nawe oni, Omwana wa Adamu, hanú ndihunjuka mukyaro, ndinyoora abhantu bhakyanyikirirya?”

Ekirengyo kya Omufarisaayo na omutobhya wa erigooti

⁹Kweki, Yeesu akabhakeerya ekirengyo ekindi, kurusumo rwa abhantu bhanú bhareerora ega, mbo abhaheene embere ya Waryubha, enu bharajeera abhantu abhandi. Akagamba ega, ¹⁰“Orusiku rumwi, abhantu bhabhiri bhaariina okugya mwisyengerero erikuru okumusabha Waryubha. Oumwi yaaringa Omufarisaayo, na oundi yaaringa omutobhya wa erigooti.

¹¹“Hanú bhaahika, Omufarisaayo akeemirira omwene hagari, akasabha ega, ‘Ndakugungya Waryubha, kwa okubha oni ntaringi omusarya kya abhantu abhandi, abheebhi, abha obhusarya, abhasuunu, kora ntaringi kya omutobhya wa erigooti uyo. ¹²Ndeeyimanga ebhyakurya kabhiri kubhutuuro, na kya ego ndanyoora ebhintu, niigo ndakuruusiryanga ejaaka.’

¹³“Nawe, omutobhya wa erigooti weeki, yaaringa yeemiriiri kwa hare, kora ataasakya okwinura ameeso gaaye murwire,18:13 Okwinura ameeso gaaye murwire. Abhayahudi hanú bhaamusabhanga Waryubha, bheemiriranga bharamaahirira eguru. Nawe, omutobhya wa erigooti yaaringa m-munyoohu. Kwa ekisigo, yaasuukanga na okusurumbara kwa obhusarya bhunú yaakoranga, ataarora yaana obhwera bhobhonse okumaahirira eguru. akabha areetematema kukikubha kwa okusurumbara, aragamba ega, ‘Waryubha, unyabhire, oni m-mukori wa obhusarya!’”

¹⁴Kweki, Yeesu akoongerya okugamba ega, “Ndabhakeerya ega, omutobhya wa erigooti uyo, hanú yaahiringita okuhunjuka iika, yaaringa abheeri omuheene embere ya Waryubha. Nawe, omurikyaye ataabhiirwa. Kwa okubha, unú areeriinʼya omwene, Waryubha arimwituumya. Na unú areeyituumya omwene, Waryubha arimuriinʼya.”

Yeesu aranonka abhaana abhake

(Mataayo 19:13-15; Mariko 10:13-16)

¹⁵Eribhaga erindi, abhantu bhakareetera Yeesu abhaana kora ebhijaare, naho abhatuurire amabhoko gaaye abhanonke. Nawe, abheehigira bhaaye hanú bhaarora ego, bhakakemera abhantu bhayo. ¹⁶Nawe, Yeesu akabhirikira abhaana bhayo, akabhakeerya ega, “Mutige abhaana abhake bhaaje kuoni, mutabhakaanʼya, kwa okubha, obhukama bhwa Waryubha m-bwa abhantu kya abhaana bhanu. ¹⁷Ndabhakeerya obhuheene ega, omuntu wowonse unú atakwikirirya obhukama bhwa Waryubha, kya omwana omuke,18:17 Omuntu wowonse unú atakwikirirya obhukama bhwa Waryubha, kya omwana omuke. Ensonga yaaye eratura okubha ega, omuntu wowonse unú atakumuhanja Waryubha, kya ego omwana omuke arahanja abheebhuri bhaaye. uyo atakutura okusoha mubhukama bhuyo.”

M-bukongʼu kumuniibhi okusoha mubhukama bhwa Waryubha

(Mataayo 19:16-30; Mariko 10:17-31)

¹⁸Yaaringa-ho omutungi umwi. Omutungi uyo, akamubhuurya Yeesu ega, “Omwihigirya owa heene, nkore egaki, naho nnyoore obhuhoru bhwa koko?”

¹⁹Yeesu akamukyukya ega, “Kwaki orambirikira owa heene? Atariho owa heene, nawe, Waryubha omwenego.18:19 Kwaki orambirikira owa heene? Atariho owa heene, nawe, Waryubha omwenego. Hanu, Yeesu atakugamba ega, weeki ataringi omuheene, nawe areenda abhantu bheeganirirye ega, weeki niwi.²⁰Omanyiri emigiro gya Waryubha ginú giragamba ega, ‘Otakora ameega kibhara, oteeta, oteebha, otagamba obhwimiririri bhwa obhubheehi, obhasuuke eseweenyu na ngʼina weenyu.’18:20 Maaha mubhitabho bhya Okuhuruka 20:12-16; Obhuhiituki bhwa Amaragiriryo 5:16-20.” ²¹Kimwi, omutungi uyo, akamukyukya ega, “Emigiro giyo gyonsego, naagigwata okurwa mubhwana bhwani.” ²²Yeesu hanú yeegwa ego, akamukeerya ega, “Okyasuuhirwa na eringʼana rimwi ego. Genda ogurye ebhintu bhyaho bhyonsego. Egimbirya ginú oraanyoore, ogabhire abhatobhu. Nyoore oraakore ego, orabha wituuriiri ekibhumbiko murwire. Hanú orimara, uuje unsoorane.” ²³Omutungi uyo, hanú yeegwa gayo, akasurumbara bhukongʼu, kwa okubha yaaringa omuniibhi bhukongʼu.

²⁴Yeesu, hanú yaamurora kya ego asurumbeeri bhukongʼu, akagamba ega, “M-bukongʼu kubhaniibhi, okusoha mubhukama bhwa Waryubha! ²⁵M-bunyoohu kungamia okuhita muryoobho rya esindani okukira abhaniibhi okusoha mubhukama bhwa Waryubha!”

²⁶Abhantu bhanú bheegwa gayo, bhakagamba ega, “Bhoono niwi aratura okutuuribhwa?” ²⁷Yeesu akabhakeerya ega, “Amangʼana ganú gatakuturikana kubhantu, ku Waryubha garaturikana.”

²⁸Kimwi Petero akamukyukya ega, “Maaha! Bheetu twatiga ebhintu bhyetu bhyonsego, tukakusoorana!” ²⁹Yeesu akagamba ega, “Ndabhakeerya obhuheene ega, omuntu wowonse unú yaatiga enyumba yaaye, kasi omukari waaye, abhamura bhaabho, abheebhuri bhaaye, kasi abhaana bhaaye, kurusumo rwa obhukama bhwa Waryubha, ³⁰uyo arinyoora ebhintu ebhyaru bhukongʼu akyari mukyaro hanu, okukira bhinú yaatiga. Kweki, eribhaga rinú ririija, arinyoora obhuhoru bhwa koko.”

Yeesu arahaira orwa kasatu eguru ya okukwana okuhyuka kwaye

(Mataayo 20:17-19; Mariko 10:32-34)

³¹Yeesu akabhabhirikira abhatumwa bhaaye ekumi na bhabhiri kabhejyo, akabhakeerya ega, “Mwitegeerere! Turagya mumugi gwa Yerusaremu. Na eyo gonsego ganú gaangʼoorwa na abharooti eguru ya Omwana wa Adamu, garikunaana. ³²Arituurwa mumabhoko ga abhantu bhanú bhataringi Abhayahudi. Bheeki bharimujabhura, bharimutuka, na bharimutuujira amate. ³³Kweki, bharimutema emijariti na bharimwita. Nawe, orusiku rwa kasatu okurwa okukwa kwaye, arihyuka.”

³⁴Amangʼana ganú Yeesu yaabhakeerya, bhataagangʼamura, kwa okubha bhaaringa bhabhisirwe ensonga yaago. Bhataamanya arahairira-ki.

Yeesu aramuhwenʼya omuhoku

(Mataayo 20:29-34; Mariko 10:46-52)

³⁵Yeesu yaaringa ahikiri haangʼi na mumugi gwa Yeriko. Embarika wa enjira yaaringa-ho omuhoku umwi, yeekeeri arasabhiirirya. ³⁶Hanú yeegwa omuganda gwa abhantu bharahita hayo, akabhabhuurya ega, “Niki kiringi eyo?” ³⁷Bhakamukyukya ega, “Yeesu wa Najareeti arahita.”

³⁸Rumwigo, omuhoku uyo, akajiirira bhukongʼu ega, “Yeesu, Omuhiiri Daudi,18:38 Omuhiiri Daudi. Abhayahudi bhaaringa bhareesiga ega, Masiha arirwa muhamati ya omukama Daudi. Maaha mubhitabho bhya Egijabhuri 89:3-37; Jeremia 23:5-6; Ejekieri 34:23-24. Maaha Daudi na Kiristu mu Moonjooro eguru ya Amangʼana Amakongʼu. ndakwisasaama ummaahire ekyabhira!” ³⁹Nawe, abhantu bhanú bhaaringa kurugendo ruyo, bhakabha bharamukemera ega, “Kira!” Nawe, weeki akagendererya okukunga kwa eriisi erinene ega, “Omuhiiri Daudi, ndakwisasaama ummaahire ekyabhira!” ⁴⁰Yeesu akeemirira, akabhakeerya bhamureete omuhoku uyo embere yaaye. Mbe, omuhoku uyo, hanú yaahika haangʼi na Yeesu, Yeesu akamubhuurya ega, ⁴¹“Oreenda nkukorere egaki?” Wonse akakyukya ega, “Omukuru, ndeenda ndore kweki.” ⁴²Yeesu akamukeerya ega, “Rora kweki! Eimani yaaho ekuhwenerye.” ⁴³Rumwigo, akarora kweki, akabha aramusoorana Yeesu, enu aramugungya Waryubha. Abhantu bhonsego bhanú bhaarora gayo, bhakabha bharamugungya Waryubha.

Yeesu aragya owa omusarya Jakaayo

¹Yeesu hanú yaasoha mumugi gwa Yeriko, akabha arahita gati wa omugi guyo. ²Mumugi guyo, yaaringa-mo omuniibhi umwi, eriina ryaye yaabhirikirwanga Jakaayo. Jakaayo uyo, ngʼo yaaringa omukuru wa abhatobhya bha erigooti. ³Weeki yaaringa areenda okumurora Yeesu, ega, m-muntu wa egaki. Nawe, ataatura kwa ekisigo kya omuganda omunene gwa abhantu, na kwa okubha yaaringa omwengʼi bhukongʼu. ⁴Kwa ego, akakenya, akakangata embere, akariina kumukuyu, naho amurore Yeesu, arahita kunjira iyo.

⁵Mbe, Yeesu hanú yaahika kumukuyu harya, akamaaha eguru kumukuyu, akagamba ega, “Jakaayo, ituuma bhwangu! Reero ndeenderwa okubha omugeni iika owaaho.” ⁶Rumwigo, Jakaayo akeetuuma bhwangu, akamugenihya Yeesu iika owaaye kwa obhujomerwa.

⁷Abhantu bhonsego, hanú bhaarora gayo, bhakaamba okujujuuma ega, “Agiiri okugeniha owa obhusarya!”19:7 Agiiri okugeniha owa obhusarya! Abhayahudi bhaaringa bhamanyiri ega, abhatobhya bha erigooti m-basarya bhukongʼu. Maaha Abhatobhya bha erigooti mu Moonjooro eguru ya Amangʼana Amakongʼu.⁸Nawe, Jakaayo akeemirira, akamukeerya Omukuru Yeesu ega, “Omukuru, itegeerera! Bhoono, etuugati rya ebhintu bhyani, ndabhagabhira abhatobhu. Na nyoore naaruusya omuntu wowonse ekintu kwa okumwihonera, ndamuhunjukirya mara kane ya kinú naamuruusya.”

⁹Yeesu akamukeerya ega, “Reero inu, obhutuurya bhubhahikiiri abhantu bha enyumba inu, kwa okubha omuntu unu wonse yeeyorokerye omwene ega, m-mwana wa oruganda rwa Abhurahamu.19:9 Abhurahamu. Maaha eringʼana rinu mu Moonjooro eguru ya Amangʼana Amakongʼu.¹⁰Kwa okubha, Omwana wa Adamu yaajiri okutuna na okutuurya abhantu bhanú bhaabhura.”

Abhakori bha emirimu abhaheene nabhanú bhataringi abhaheene

(Mataayo 25:14-30)

¹¹Abhantu hanú bhaaringa bhakyeetegeerera amangʼana gayo, Yeesu akoongerya okubhakeerya ekirengyo ekimwi. Abhantu bhayo bhaakanyanga ega, eginsiku gya obhukama bhwa Waryubha girahika kwibhaga riyoriyo, kwa okubha Yeesu yaaringa ahikiri haangʼi mumugi gwa Yerusaremu.19:11 Abhayahudi bhaamanyanga ega, Kiristu Omutuurya obhukama bhwaye bhuryambira mumugi gwa Yerusaremu, gunú gwaringa omugi gwa omukama Daudi.¹²Ego, akagamba ega, “Yaaringa-ho omuntu umwi wa obhutungi obhukuru. Omuntu uyo, akeemuka okugya orugendo mukyaro kya hare, naho anyoore obhukama, amare ahinde okutunga ekyaro kyaye.

¹³“Hanú yaaringa ataraamba orugendo, akabhabhirikira abhakori bha emirimu bhaaye ekumi, akabhahaana egimbirya eginjaru19:13 Akabhahaana egimbirya eginjaru. Ekiyunani kiragamba ega, akabhahaana kira oumwi mina. Mina eimwi yaaringa amariho ga emyeri esatu kumukori wa emirimu umwi. kira oumwi, akabhakeerya ega, ‘Mukore ebhyasara okuhikira hanú ndihunjuka.’ ¹⁴Nawe omuntu uyo, abhantu bha ekyaro kyaye, bhaaringa bhamusokeri bhukongʼu. Ego, bhakatuma abhachaama bhamuseete, bhagambe ega, ‘Tutakwenda omuntu unu, abhe omukama weetu!’ ¹⁵Nawe omuntu uyo, akahaanwa obhukama, akahunjuka mukyaro kyaye. Hanú yaahunjuka, akabhirikira abhakori bha emirimu bhaaye bhanú yaaringa atigiiri egimbirya eginjaru, naho amanye obhwera bhunú kira oumwi yaanyoora.

¹⁶“Omukori wa emirimu wa mbere akaaja, akagamba ega, ‘Omukuru, naanyoora obhwera bhwa egimbirya ekumi okurwa kuirya waaringa untigiiri.’ ¹⁷Omukama uyo, akamukeerya ega, ‘Okoreri bhwaheene, omukori wa emirimu wa heene! Kwa okubha obheeri wa heene kuringʼana eriike, oraabhenga oratunga emigi ekumi.’

¹⁸“Omukori wa emirimu wa kabhiri wonse akaaja, akagamba ega, ‘Omukuru, naanyoora obhwera bhwa egimbirya etaanu okurwa kuirya waaringa untigiiri.’ ¹⁹Omukama uyo, akamukeerya ega, ‘Na uuwe, oraabhenga oratunga emigi etaanu.’

²⁰“Omukori wa emirimu oundi akaaja, akagamba ega, ‘Omukuru, embirya yaaho n-ginu hanu. Naaringa ngʼibhisiri mukitambaara, naho etabhura. ²¹Naakora ego, kwa okubha naakoobhoha. Uuwe m-mururu, oragega hanú otaatuura ekintu, na oragesa hanú otaahamba.’ ²²Omukama uyo, akamukeerya ega, ‘Uuwe omukori wa emirimu omubhiibhi. Bhoono ndakubhuturira ekiina okuringʼaana na obhugambi bhwaho omwene. Ogambiri ega, omanyiri oni m-mururu, ndagega hanú ntaatuura ekintu, na ndagesa hanú ntaahamba ekintu. ²³Nyoore niigo ndingi, kwaki otaatuura embirya yaani mubhenki, naho, hanú nkaahunjukiri, ngʼigege hamwi na obhwera?’

²⁴“Kimwi omukama uyo, akabhakeerya abhantu bhanú bhaaringa bheemiriiri haangʼi hayo ega, ‘Mumuruusye egimbirya giyo, muhaane unú yaanyoora obhwera mara ekumi.’ ²⁵Bhakamukeerya ega, ‘Nawe omukuru, unu amariri okunyoora obhwera bhwa ekumi egindi.’

²⁶“Wonse akabhakeerya ega, ‘Omuntu wowonse unú aratumira bhujomu enonkwe inú Waryubha amuheeri, arigendererya okunonkwa bhukongʼu. Nawe, omuntu unú atakutumira enonkwe inú Waryubha amuheeri, kora inú yaanayo yonse ariruusibhwa. ²⁷Bhoono, abhasigu bhaani bhanú bhateendanga oni mbe omukama waabho, mubhareete embere waani hanu, mubheete!’”

Abhantu bharamuturuungʼana Yeesukwa obhujomerwa Yerusaremu

(Mataayo 21:1-11; Mariko 11:1-11; Yoana 12:12-19)

²⁸Yeesu hanú yaamara okugamba gayo, akagendererya na orugendo rwaye rwa okuriina okugya mumugi gwa Yerusaremu. ²⁹Mbe, hanú yaaringa ahikiri haangʼi na ebhijiji bhya Bhetifage na Bhetania, munkuku ya Emijeituni, akabhatuma bhabhiri gati ya abheehigira bhaaye, ³⁰akabhakeerya ega, “Mugende mukijiji kinú kiringi embere yeenyu. Hanú mwakasohe muyo, mwakanyoore ekimoori kya entikiri, kinú kitareekarwa-ko na omuntu wowonse kibhoherwe, mukisibhure mukindeetere. ³¹Nyoore omuntu yaakabhabhuurye ega, ‘Kwaki murakisibhura?’ mumukeerye ega, ‘Omukuru weetu arakyenda.’”

³²Mbe, abheehigira bhayo bhakagya, bhakanyoora ekimoori kya entikiri kya ego Yeesu yaabhakeerya. ³³Hanú bhaaringa bharakisibhura, abheene ekimoori kiyo, bhakabhabhuurya ega, “Kwaki murasibhura ekimoori kiyo?” ³⁴Bhakabhakyukya ega, “Omukuru weetu arakyenda.” ³⁵Kimwi, bhakakireeta ekimoori kiyo ku Yeesu, bhakabharya-ko emyenda gyabho, bhakamara, bhakamuriinʼya-ko Yeesu.19:35 Bhakamuriinʼya-ko Yeesu. Abhakama bha eribhaga riyo, bhaagenderanga kugifaraasi gya eriihe. Kwa ego, Yeesu okugendera kukimoori kya entikiri hanú yaaringa arasoha Yerusaremu, yaaringa aroorokya ega, weeki araaja kwa obhunyoohu.

³⁶Hanú Yeesu yaaringa aragya, abheehigira bhaaye, bhaabharyanga emyenda gyabho kunjira. ³⁷Hanú yaahika haangʼi kumuhiringito gwa enkuku ya Emijeituni, omuganda gonsego gwa abheehigira bhaaye, bhakaamba okukiririrya kwa obhujomerwa, bharamutogoonʼya Waryubha kurusumo rwa ebhika bhyonsego bhinú bhaarora. ³⁸Bhakagamba ega,

“Anonkerwe omukama unú araaja kwa eriina rya Omukuru Waryubha.19:38 Maaha mukitabho kya Egijabhuri 118:26.

Habhe na omurembe gati ya Waryubha na abhantu bhaaye.

Na agungibhwe Waryubha wa eguru ya bhyonsego.”

³⁹Mumuganda guyo, bhaaringa-mo Abhafarisaayo. Mbe, bhakamukeerya Yeesu ega, “Omwihigirya, obhakaanʼye abheehigira bhaaho, bhatige okugamba ego!” ⁴⁰Yeesu akabhakyukya ega, “Ndabhakeerya ega, nyoore bhayo bharaakire, kora amagina garaajiirire!”

Yeesu aragukuurira omugi gwa Yerusaremu

⁴¹Yeesu hanú yaarora omugi gwa Yerusaremu, akaamba okugukuurira. ⁴²Akagamba eguru ya abhantu bha mumugi guyo, ega, “Naari ndeenda kora reero inu, mutune enjira ya omurembe. Nawe bhoono, mumariri okutigita, omurembe gwibhisiri, mutakutura okugurora. ⁴³M-buheene ega, kuginsiku ginú giraaja, abhasigu bheenyu bharihagaaja ekintu kya okubharwanirya-ko, bharibheenarya omugi omugima na bharibharwanʼya mbaara gyonsego. ⁴⁴Bharihaanyurira hansi omugi gonsego na bharisikya abhantu bhonsego. Abhasigu bhayo, bhataritiga kora erigina rimwi riikarireeni na erindi kugingito gya omugi, kwa ekisigo mutaamanya eribhaga rinú Waryubha yaaja okubhatuurya.”

Yeesu arakenyia abhakori bha ebhyasarabharwe mwisyengerero rya Waryubha

(Mataayo 21:12-17; Mariko 11:15-19; Yoana 2:13-22)

⁴⁵Kimwi, Yeesu akasoha murubhanja rwa erisyengerero erikuru rya Waryubha, akaamba okukenyia abhantu bhanú bhaaringa bharagurya ebhintu muyo.19:45 Abhantu bhanú bhaaringa bharagurya ebhintu muyo. Abhantu bhaaringa bharagurirya abhantu ebhintu murubhanja rwa erisyengerero kurusumo rwa okuruusya ekimwenso.⁴⁶Akabhakeerya ega, “Engʼoorerwe mu Mangʼoore Amarabhu ega, ‘Erisyengerero ryani erikuru riribha enyumba ya amasabho.’19:46a Maaha mukitabho kya Isaaya 56:7. Nawe bheenyu, muikoreri okubha erisana rya abheebhi!”19:46b Maaha mukitabho kya Jeremia 7:11.

⁴⁷Yeesu yaaringa areehigirya abhantu murubhanja rwa erisyengerero erikuru rya Waryubha, kira orusiku. Abhasyengeri abhakuru, hamwi na abheehigirya bha amaragiriryo na abhakuru bha abhayahudi, bhakabha bharatuna omweya gwa okumwita. ⁴⁸Nawe, bhataanyoora omweya, kwa okubha abhantu bhonsego bhaaringa bharamwitegeerera bhujomu bhukongʼu.

Obhutungi bhwa Yeesu bhureekomibhwa

(Mataayo 21:23-27; Mariko 11:27-33)

¹Orusiku rumwi, Yeesu yaaringa murubhanja rwa erisyengerero erikuru rya Waryubha areehigirya abhantu, na okubharaarikira Amangʼana Amajomu ga Waryubha. Abhasyengeri abhakuru, abheehigirya bha amaragiriryo hamwi na abhakaruka bha Ekiyahudi bhakamuujira. ²Bhakamubhuurya ega, “Tukeerye! Amangʼana ganú orakora, oragakora kwa obhutungi bhwawi? Niwi unú akuheeri obhutungi bhuyo?”

³Yeesu akabhakeerya ega, “Oni nonse ndabhabhuurya eringʼana rimwi ego. ⁴Bhoono, obhutungi bhwa Yoana obhwa okubhatiija abhantu, bhwarwa-ha? Bhwarwa ku Waryubha kasi kubhantu?” ⁵Hayo, bhakaamba okubhuuranʼya abheene ega, “Turaagambe ega, bhwarwa ku Waryubha, araagambe ega, ‘Bhoono ndeegwa, mutaamwikirirya?’ ⁶Na turaagambe ega, bhwarwa kubhantu, abhantu bhonsego bhanú bharingi hanu, bhaakatuteme na amagina, kwa okubha bhareekirirya ega, Yoana yaaringa omurooti wa Waryubha.” ⁷Ego, bhakamukeerya ega, “Tutamanyiri.” ⁸Mbe, Yeesu akabhakyukya ega, “Kora oni nonse, ntaabhakeerye ndakora ganu kwa obhutungi bhwawi.”

Yeesu arahunkanʼya abhatungi na abharimi abhasarya

(Mataayo 21:33-46; Mariko 12:1-12)

⁹Nho, Yeesu akagendererya okukeerya abhantu ekirengyo ekindi ega, “Yaaringa-ho omuntu umwi. Omuntu uyo, yaahamba emijabhibhu mumugunda gwaye, akagukodisya kubharimi abhandi. Kimwi, akagya orugendo mukyaro kya hare, akamara-yo eribhaga eritambi. ¹⁰Eribhaga rya okugesa hanú ryahika, akamutuma omukori wa emirimu waaye kubharimi bhayo, naho bhamugabhire-ko omugabho gwaye gwa egijabhibhu. Nawe, abharimi bhayo, bhakamutema omukori wa emirimu uyo, kimwi bhakamukenyia amabhoko masa.

¹¹“Kweki, omwene omugunda uyo, akamutuma omukori wa emirimu waaye oundi. Wonse bhakamutema na okumusuukya, kimwi bhakamukenyia amabhoko masa. ¹²Kweki, akamutuma omukori wa emirimu wa kasatu. Uyo wonse bhakamutema, bhakamunyahaara bhukongʼu, bhakamurekera kibhara wa omugunda.

¹³“Mbe, omwene omugunda uyo, akeeganirirya ega, ‘Bhoono nkore egaki? Tiga mmutume omwana waani omuhanje! Ndamanya ega, bharaamusuuke.’ ¹⁴Nawe, abharimi bhayo, hanú bhaamurora, bhakabhuuranʼya ega, ‘Unu ngʼo arigabha omugunda gunu. Tumwite, engabho yaaye inu ebhe yeetu.’ ¹⁵Mbe, bhakamuruusya mumugunda, bhakamwita.”

Kimwi, Yeesu akabhabhuurya ega, “Bhoono, omwene omugunda uyo, hanú ariija, aribhakora egaki abharimi bhayo? ¹⁶Ariija abheete bhonsego, amare agukodisye kubharimi abhandi!” Abhantu bhanú bheegwa amangʼana gayo, bhakagamba ega, “Gayo gatatuuka koko!” ¹⁷Kimwi, Yeesu akabhamaahirira, akabhabhuurya ega, “Mbe, ensonga ya amangʼoore ganu niki?

‘Erigina rinú abhahagaaji bhaangiri,

ndyo ryabheeri erigina erikuru rya obhurusa.’20:17 Maaha mukitabho kya Egijabhuri 118:22.

¹⁸Omuntu wowonse unú arigwa kwigina riyo, aribhunikabhunika, na omuntu wowonse unú erigina riyo ririmugwira, ririmubhondorabhondora.”20:18 Maaha mubhitabho bhya Isaaya 8:14-15; Danyeri 2:31-45.

¹⁹Abheehigirya bha amaragiriryo na abhasyengeri abhakuru, bhakamanya ega, ekirengyo kiyo kirabhatunʼya bheeki. Ego, bhakeenda okumugwata hayohayo, nawe bhakoobhoha abhantu.

Abhantu bharamuteganʼya Yeesueguru ya obhurihi bhwa erigooti

(Mataayo 22:15-22; Mariko 12:13-17)

²⁰Kwa ego, abhakuru bhayo, bhakabha bharamuteganʼya Yeesu bhamugwate. Mbe, bhakatuma abhantu bhagye okumwinogorya. Abhantu bhayo, bhakeekorya ega, m-bantu abhaheene. Nawe, bheendanga omweya gwa okumugwata Yeesu kwa amangʼana gaaye, naho bhagye okumujongera kumwanangwa wa Ekiruumi.

²¹Mbe, abhantu bhayo bhakamubhuurya ega, “Omwihigirya, tumanyiri ega, oragamba na okwihigirya amangʼana ga obhuheene. Uuwe otakwahura abhantu, oreehigirya obhuheene eguru ya amangʼana ga Waryubha. ²²Bhoono tukeerye, okuringʼaana na amaragiriryo ga Waryubha, tureekiriribhwa okumuruusirya Kaisari20:22 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. erigooti, kasi-ha?” ²³Nawe, Yeesu akamanya ekiina kyabho, akabhakeerya ega, ²⁴“Munyorokye edinari.20:24 Edinari. Gyaringa ni-gimbirya gya Ekiruumi, ginú abhantu bhaarihanga erigooti. Maaha Edinari mu Moonjooro eguru ya Amangʼana Amakongʼu. Epicha inu na amangʼoore ganú gangʼoorerwe kudinari inu, m-byawi?” Bhakamukyukya ega, “M-bya Kaisari.” ²⁵Kimwi Yeesu akabhakeerya ega, “Mumuhaane Kaisari ebhya Kaisari, na mumuhaane Waryubha ebhya Waryubha.”

²⁶Erikyukya rya Yeesu riyo, rikabharuguurya bhukongʼu, bhakakira kiri. Bhataanyoora eringʼana ryoryonse rinú rikaakoreri bhamugwate okurwa kumangʼana ganú yaagamba embere ya abhantu.

Yeesu arakyukya amabhuuryo eguru ya obhuhyuki

(Mataayo 22:23-33; Mariko 12:18-27)

²⁷Mbe, bhaaringa-ho abhantu abhandi bhanú bhaabhirikirwanga Abhasadukaayo.20:27 Abhasadukaayo. Maaha eringʼana rinu mu Moonjooro eguru ya Amangʼana Amakongʼu. Bhayo bhaagambanga ega, obhuhyuki bhwa abhaku bhutariho. Bhakamuujira Yeesu, bhakamubhuurya ega, ²⁸“Omwihigirya, Musa20:28a Musa. Maaha eringʼana rinu mu Moonjooro eguru ya Amangʼana Amakongʼu. yaatungʼoorera mumaragiriryo ega, nyoore omuntu araakwe, akyari okwibhura na omukari waaye, omumura waabho omuke amugabhe omusino uyo, amwibhurire abhaana.20:28b Maaha mukitabho kya Obhuhiituki bhwa Amaragiriryo 25:5-6.²⁹Bhoono tugambe ega, bhaaringa-ho abhamura muhungati bha enda eimwi. Mbe, omutangi akateta omukari, kimwi omutangi uyo, akakwa ateebhwiri nawe. ³⁰Omumura waabho wa kabhiri, [akamugabha omusino uyo, wonse akakwa ateebhwiri nawe.]20:30 Amangʼana mumabhano ganu […] gataringi mumangʼoore agandi ga akare aga Ekiyunani.³¹Eribhaga erindi, wa kasatu akamugabha, wonse akakwa ateebhwiri. Ekabha egoego kubhonsego muhungati, bhakamugabha omukari uyo, bhakakwa bhonsego bhateebhwiri nawe. ³²Kubhuteero, omukari uyo, wonse akakwa. ³³Mbe bhoono, nyoore obhuhyuki bhuriho, orusiku runú abhaku bharihyukibhwa, omukari uyo aribha mukaawi? Kwa okubha yaaringa omukari wa bharya muhungati bhonsego, tiigo!”

³⁴Yeesu akabhakeerya ega, “Abhantu bha eribhaga rinu bharateta na okutetwa. ³⁵Nawe, bhanú Waryubha aruuji bhareenderwa okuhyukibhwa okurwa mubhaku na okumenya mukyaro ekihya, bhayo bhatariteta kora okutetwa ³⁶na bhatarikwa kweki. Bharibha abhahoru kya bhamaraika,20:36 Bhamaraika. Maaha eringʼana rinu mu Moonjooro eguru ya Amangʼana Amakongʼu. na bharibha m-baana bha Waryubha, kwa okubha bharihyukibhwa okurwa mubhaku.

³⁷“Kora Musa yaangʼoora ega, abhaku bharihyuka. Hanú yaahairanga na Waryubha, kukisaka kinú kyookanga omururo, yaagamba ega, Omukuru Waryubha ‘ngʼo Waryubha wa Abhurahamu, Esaaka, na Yakobho.’20:37 Maaha mukitabho kya Okuhuruka 3:6.³⁸Ku Waryubha bhonsego abhaku na abhahoru, m-bahoru. Kwa ego, weeki ataringi Waryubha wa abhaku, ngʼo wa abhahoru.”

³⁹Mbe, abheehigirya bha amaragiriryo abhandi bhakagamba ega, “Omwihigirya, okyukirye bhwaheene!” ⁴⁰Okwambira eribhaga riyo, bhataasakya kweki okumubhuurya amangʼana agandi.

Kiristu Omutuurya ngʼo omuhiiri Daudina Omukuru wa bhonsego

(Mataayo 22:41-46; Mariko 12:35-37)

⁴¹Kimwi, Yeesu akabhabhuurya abhantu bhanú bhaaringa hayo ega, “Kwaki abhantu bharagamba ega, Kiristu Omutuurya m-muhiiri Daudi? ⁴²Nawe, Daudi omwene, yaangʼoora mukitabho kya Egijabhuri ega,

‘Omukuru Waryubha yaamukeerya Omukuru waani20:42 Omukuru waani. Hanu erahairira Masiha, yaani Kiristu Omutuurya. Maaha Kiristu mu Moonjooro eguru ya Amangʼana Amakongʼu. ega,

“Ikara orubhaara rwani rwa obhuryo,

⁴³okuhikira hanú ndituura abhasigu bhaaho hansi ya amaguru gaaho,

bhabhe kya ekitumbi kyaho kya okutaja-ko amaguru.”’20:43 Maaha mukitabho kya Egijabhuri 110:1.

⁴⁴Bhoono, nyoore Daudi aramubhirikira Kiristu ega, ‘Omukuru,’ Kiristu aratura egaki kweki okubha omuhiiri waaye?”20:44 Omuhiiri waaye. Yeesu yeebhurwa okurwa muruganda rwa Daudi, nkyo kyakora bhaamubhirikiranga Omuhiiri Daudi. Nawe, yaaringa murwire okwambira akare. Omukama Daudi yaamubhirikiranga Omukuru, kwa okubha Kiristu yaaringa Waryubha. Maaha mukitabho kya Egijabhuri 110. Kweki, maaha Daudi na Kiristu mu Moonjooro eguru ya Amangʼana Amakongʼu.

Yeesu arakaanʼya abheehigira bhaaye

(Mataayo 23:1-36; Mariko 12:38-40; Ruuka 11:37-54)

⁴⁵Eribhaga omuganda gwa abhantu bhaaringa bharamwitegeerera, Yeesu akakeerya abheehigira bhaaye ega, ⁴⁶“Mwiyangararire na abheehigirya bha amaragiriryo. Bheeki bhahanjiri okugenda bheebhoheri eginkanju egintambi. Bhahanjiri okukeeranibhwa kwa okusuukwa mumidiira, bhahanjiri okwikara kubhitumbi bhya embere mumasinagogi, na muginyangi bhahanjiri okwikara kubhitumbi ebhya embere ebhya abhasuukwa. ⁴⁷Bharabharuusya abhasino eginyumba gyabho. Kweki bhareekorya ega, m-bantu bhanú bhataana amasoro kwa okusabha amasabho amatambi embere ya abhantu. Kurusiku rwa okubhuturirwa ekiina, abhantu bhayo bharijibhibhwa bhururu bhukongʼu.”

Egisadaaka gya abhaniibhi na omusino omutobhu

(Mariko 12:41-44)

¹Yeesu hanú yaaringa akyari murubhanja rwa erisyengerero erikuru rya Waryubha, akarora abhaniibhi bharatuura emituho gyabho mwisandiko rya okuruusirya-mo egisadaaka. ²Akarora na omusino umwi omutobhu, aratuura-mo egimbirya ebhiri egyenego.21:2 Egimbirya ebhiri egyenego. Ekiyunani kiragamba ega, eminyaraga ebhiri. Egimbirya giyo, gyaringa na obhwera obhukego.

³Mbe, Yeesu akagamba ega, “Ndabhakeerya obhuheene ega, omusino omutobhu unu, ngʼo ateeri egimbirya eginjaru mwisandiko, okukira abhandi bhayo bhonsego. ⁴Ndagamba ego, kwa okubha abhandi bhayo bhonsego, bharuusirye amasaagyo okurwa kubhintu ebhyaru bhinú bhaanabhyo. Nawe, omusino omutobhu unu, aruusirye ebhintu bhyaye bhyonsego!”

Yeesu arahairira eguru ya enyanko enduru inú eraaja

(Mataayo 24:1-14; Mariko 13:1-13)

⁵Abheehigira abhandi bha Yeesu, bhaaringa bharahairira erisyengerero erikuru rya Waryubha,21:5 Erisyengerero erikuru rya Waryubha. Maaha eringʼana rinu mu Moonjooro eguru ya Amangʼana Amakongʼu. kya ego ryaringa rikonerwe kwa amagina amajomu, hamwi na emituho ginú abhantu bhaaruusiryanga Waryubha. Kimwi, Yeesu akagamba ega, ⁶“Eribhaga ririija, rinú amangʼana gonsego ganú murarora bhoonwego, garihaanyurirwa hansi, kora erigina rimwi ritaritama eguru ya erindi!”

⁷Mbe, abheehigira bhayo, bhakamubhuurya ega, “Omwihigirya, amangʼana gayo gariibhuka ruuha? Na n-kimanyiiriryo-ki, kinú kiryorokya ega, garingi haangʼi okwibhuka?”

⁸Yeesu akabhakyukya ega, “Mwiyangararire, mutariija okungʼeenereribhwa. Abhantu abhaaru bhariija kwa eriina ryani, bharigamba ega, ‘Oni nooni Kiristu!’ Kweki, bharigamba ega, ‘Obhuteero bhwa ekyaro bhuringi haangʼi!’ Abhantu bhayo, mutabhasoorana. ⁹Kweki, hanú muriigwa amangʼana ga eriihe, na eritoongʼana, mutoobhoha! Gayo gareenderwa geebhuke mbere, nawe, obhuteero bhwa ekyaro bhuribha bhukyari okuhika.”

¹⁰Yeesu akagendererya okubhakeerya ega, “Ekyaro ekimwi, kirirwana na ekindi, na obhukama obhumwi, bhurirwana na obhukama obhundi. ¹¹Kira ahasi haribha na ebhirigiti bhya erirobha ebhinene, enjara enduru, na amarweri amabhiibhi bhukongʼu. Na okurwa murwire, kuribha-ho ebhimanyiiriryo ebhinene. Abhantu bharirora amangʼana amarito ganú garibhakanga bhukongʼu.

¹²“Nawe, eribhaga gayo gonsego gataratuuka, abhantu bharibhahira kubhakuru bha amasinagogi, naho mubhohwe mwigereja enu muranyankibhwa. Na abhandi murihirwa okubhuturirwa ekiina kubhakama na abhaanangwa kurusumo rwani. ¹³Hayo nho, murinyoora omweya gwa okubha abheemiririri bhaani embere yaabho.

¹⁴“Kwa ego, mwamure mumitima gyenyu ega, mutige okuseemya ganú murigamba, okwibhagirira mukiina. ¹⁵Oni omwene, ndibhahaana egintungwa, na amangʼana ganú murigamba, abhasigu bheenyu bhatarigaanga kora bhatarigahakaana.

¹⁶“Murikorerwa eniku kora na abheebhuri bheenyu, abhamura bheenyu, abhahiiri bheenyu na abhasaani bheenyu. Gati yeenyu, abhandi muriitwa. ¹⁷Abhantu bhonsego bharibhajimira kurusumo rwa eriina ryani. ¹⁸Nawe, amangʼana gayo, gataribhanyahaara, kora orutuukya orumwi kumitwe gyenyu rutaribhura. ¹⁹Obhuhoru bhwenyu bhurituuribhwa, hanú muriikongʼererya.

Waryubha aribhuturira ekiinaabhantu bha ekyaro kya Isiraeri

(Mataayo 24:15-21; Mariko 13:14-19)

²⁰“Nawe, hanú murirora ega, omugi gwa Yerusaremu21:20 Yerusaremu. Maaha eringʼana rinu mu Moonjooro eguru ya Amangʼana Amakongʼu. gwinaarirwe na abhasirikare, mbe mumanye ega, eribhaga rya okugusarya rihikiri. ²¹Hayo, bhanú orinyoora bharingi mukyaro kya Yudea, bhakenyere muginkuku. Bhanú orinyoora bharingi Yerusaremu muyo, bharwe-mo bhwangu. Na bhanú orinyoora bharingi mumigunda, bhatahunjuka mumugi muyo. ²²Ndagamba ego, kwa okubha, eginsiku giyo, ngyo gya okuriha ekisiiyomba, naho amangʼana gonsego ganú gaangʼoorwa, gahikire obhuteero bhwago. ²³Kuginsiku giyo, ndabhamaahira ekyabhira abhakari bha eginda na bhanú orinyoora bharaneenʼya! Ndabhamaahira ekyabhira, kwa okubha kuribha na enyanko enene bhukongʼu mukyaro kya Isiraeri. Kweki, Waryubha arijibhya bhururu abhantu bha mukyaro kiyo. ²⁴Abhantu abhandi bhariitwa kwa amapanga. Abhandi bharigwatwa na okuhirwa mubhyaro ebhindi. Omugi gwa Yerusaremu guritungwa na abhantu okurwa kubhyaro ebhindi, bhanú bhataringi Abhayahudi. Gayo garikoreka okuhikira eribhaga ryabho rya okutunga hanú ririhwa.

Yeesu arahairira okuhunjuka kwaye

(Mataayo 24:29-31; Mariko 13:24-27)

²⁵“Kuribha na ebhimanyiiriryo kuryubha, omweri, na eginjota. Na mukyaro hanu, eginyanja giribha na amabhooka amaaru garahirira. Abhantu bhanú bhataringi Abhayahudi, bharibha na enyanko na obhoobha. ²⁶Mbe, gayo gonsego hanú garituuka mukyaro, abhantu bharyobhoha bhukongʼu. Bharigwa erihiku kwa ekisigo kya okukangwa, enu bharaganyirira amangʼana amabhiibhi bhukongʼu, ganú garaatuuke mukyaro. Na eginguru gya kurwire gyonsego girisingisibhwa.21:26 Maaha mubhitabho bhya Isaaya 13:10, 34:4; Joeri 2:10.

²⁷“Hayo nho, abhantu bhonsego bharimurora Omwana wa Adamu araaja kumasaaru kwa eginguru na obhukuru obhwaru. ²⁸Mbe, amangʼana gayo, hanú garyamba okukoreka, mwikongʼererye, okuterema kwa okubha eribhaga rya okutuuribhwa kwenyu, orinyoora riringi haangʼi!”

Ekirengyo kya omuti gwa omutini

(Mataayo 24:32-35; Mariko 13:28-31)

²⁹Kweki, Yeesu akabhakeerya abheehigira bhaaye ekirengyo ega, “Mumaahe omutini, na emiti egindi gyonsego. ³⁰Hanú murarora ega, omuti gwambiri okusebhuka, rumwigo muramanya ega, eribhaga rya embura riringi haangʼi.

³¹“Egoego, na bheenyu hanú murirora amangʼana ganu garakoreka, mumanye ega, obhukama bhwa Waryubha bhuringi haangʼi. ³²Ndabhakeerya obhuheene ega, abhantu bha orwibhuro runu, bhatarihita, gayo gonsego gakyari okwibhuka. ³³Ekyaro na orwire bhirihita, nawe amangʼana gaani gariguma koko!

Orusiku rwa obhuteero ruriija rumwigo

³⁴“Mwiyangararire! Emitima gyenyu gitariija okugwatwa na orunamba rwa okukora amangʼana ga mukyaro bhuyagayaga, okurehwa, na obhoobha bhwa obhuhoru. Nyoore tiigo, orusiku rwa okuhunjuka Omwana wa Adamu, ruribhaajira mutamanyiri. ³⁵Orusiku ruyo ruribhaajira rumwigo abhantu bhonsego bha mukyaro. ³⁶Kwa ego, mubhe mwiseemerye eribhaga ryonsego! Mugendererye okumusabha Waryubha, naho abhabheere okwambuka gonsego ganú garituuka, na okwimirira embere ya Omwana wa Adamu.”

³⁷Mbe, kuginsiku giyo, Yeesu yaaringa areehigirya abhantu murubhanja rwa erisyengerero erikuru rya Waryubha. Obhutiku, yaagyanga okuraara munkuku ya Emijeituni. ³⁸Abhantu abhaaru bhaamwenjanga nyenkyo juri, okugya murubhanja rwa erisyengerero, naho bhamwitegeerere.

Yuda Esikariote areekirirya okumuriira Yeesu eniku

(Mataayo 26:1-5, 26:14-16; Mariko 14:1-2, 14:10-11; Yoana 11:45-53)

¹Enyangi ya emikaate ginú gitakutuurwa-mo ekimera22:1a Enyangi ya emikaate ginú gitakutuurwa-mo ekimera. Maaha Epasaka mu Moonjooro eguru ya Amangʼana Amakongʼu. yaaringa ehikiri haangʼi. Enyangi iyo yaabhirikirwanga Epasaka.22:1b Enyangi iyo yaabhirikirwanga Epasaka. Maaha Epasaka mu Moonjooro eguru ya Amangʼana Amakongʼu.²Abhasyengeri abhakuru hamwi na abheehigirya bha amaragiriryo, bhaaringa bharatuna omweya gwa okwita Yeesu. Nawe, bhoobhohanga abhantu bhataaja okukora eriihe.22:2 Maaha mukitabho kya Ruuka 19:47-48.

³Mbe, Erisambwa22:3 Erisambwa. Maaha eringʼana rinu mu Moonjooro eguru ya Amangʼana Amakongʼu. rikamusoheerera Yuda Esikariote, unú yaaringa oumwi wa abheehigira bha Yeesu ekumi na bhabhiri. ⁴Nho, Yuda akagya kubhasyengeri abhakuru na abhakuru bha abharindi bha mwisyengerero erikuru rya Waryubha. Hanú yaahika, akeekiriranʼya nabho kya ego yaakamuriire Yeesu eniku kubheeki. ⁵Bhakajomerwa bhukongʼu, bhakeekiriranʼya okumuhaana egimbirya. ⁶Yuda akeekirirya, akaamba okutuna omweya gwa okumukorera Yeesu eniku, eribhaga rinú abhantu abhaaru bhatariho.

Yeesu ararya ebhyakurya bhya Epasakahamwi na abheehigira bhaaye

(Mataayo 26:17-30; Mariko 14:12-26; Yoana 13:21-30)

⁷Orusiku rwa enyangi ya emikaate ginú gitakutuurwa-mo ekimera rukahika. Ruyo ndo rwaringa orusiku rwa okugooga omwana wa eringʼondi wa Epasaka.22:7 Maaha mukitabho kya Okuhuruka 12:3-6.⁸Yeesu akatuma Petero hamwi na Yoana, akabhakeerya ega, “Mugende mutuseemerye ebhyakurya bhya enyangi ya Epasaka, naho tuuje turye hamwi.” ⁹Bhakamubhuurya ega, “Oreenda tuseemerye-ha?” ¹⁰Akabhakyukya ega, “Hanú muraasohe mumugi gwa Yerusaremu, muraasikane na omusaaja umwi agegeri ensengo ya amanji, mumuseete okuhikira munyumba inú araasohe. ¹¹Mubhuurye omwene enyumba iyo ega, ‘Omwihigirya weetu arabhuurya ega, “Kiringi-ha ekinyumba kya abhageni kinú nakariire-mo ebhyakurya bhya Epasaka, hamwi na abheehigira bhaani?”’ ¹²Wonse araabhoorokye ekinyumba ekinene munyumba ginú giikarireeni, muraanyoore-mo kira ekintu. Museemerye muyo.”

¹³Mbe, abheehigira bhayo, bhakagya, bhakanyoora gonsego garingi kya ego Yeesu yaaringa abhakeererye, bhakaseemya ebhyakurya bhya enyangi ya Epasaka.

¹⁴Eribhaga rya okurya hanú ryahika, Yeesu akeekara okurya ebhyakurya hamwi na abhatumwa bhaaye. ¹⁵Akabhakeerya ega, “Naaringa nhanjiri bhukongʼu okurya ebhyakurya bhya Epasaka hamwi na bheenyu, nkyari okunyankibhwa! ¹⁶Bhoono, ndabhakeerya ega, ntakyarya kweki ebhyakurya bhya Epasaka okuhikira ensonga ya Epasaka hanú orinyoora ebheeri mubhukama bhwa Waryubha.”

¹⁷Akagega ekikombe kya edivai,22:17 Edivai. Maaha eringʼana rinu mu Moonjooro eguru ya Amangʼana Amakongʼu. akamukumya Waryubha, akamara akabhakeerya ega, “Mugege, muguse bhonsego! ¹⁸Ndabhakeerya ega, ndaamare okurya hanu, ntakyanywa kweki edivai, okuhikira obhukama bhwa Waryubha hanú bhuriija.”

¹⁹Akamara akagega omukaate, akamukumya Waryubha, akagusuunura, akabhahaana abhatumwa bhaaye, akabhakeerya ega, [“Gunu ngo omubhiri gwani gunú gwakaruusibhwe kurusumo rwenyu. Mukorenga ego, kwa okunhiituka oni!”

²⁰Egoego, hanú bhaamara okurya ebhyakurya, akagega ekikombe kya edivai, akagamba ega, “Ekikombe kinu kireemiririra eriragano22:20 Eriragano. Maaha eringʼana rinu mu Moonjooro eguru ya Amangʼana Amakongʼu. erihya rinú rirakoreka okuhitira amanyinga gaani. Amanyinga ganu gakeetike kurusumo rwenyu.]22:19-20 Amangʼana mumabhano ganu […] gataringi mumangʼoore agandi ga akare aga Ekiyunani.

²¹“Nawe mumanye ega, unú yaakankorere eniku, nikeeri nawe hamwi kumeja. ²²Omwana wa Adamu aragya okwitwa kya ego yaaringa eseemiibhwe. Nawe, arikirora-ko omuntu unú arimuriira eniku!”

²³Mbe, abhatumwa bhaaye bhakaamba okubhuuranʼya ega, niwi gati yaabho yaakakore eringʼana riyo.

Ameehigiryo eguru ya obhukuru

²⁴Gikabha-ho eginhaka gati ya abhatumwa bha Yeesu, ega, niwi gati yaabho arabharwa ega, ngʼo omukuru okukira abharikyaye. ²⁵Eginhaka giyo, gikakora Yeesu abhakeerye ega, “Abhakama bha ebhyaro, bharabhandirirya abhantu bhaabho, enu bhareegungya ega, m-baserenʼya. ²⁶Nawe bheenyu, mutige okubha ego. Gati yeenyu omukuru okukira abhandi, ngʼo abhe omuke kubhonsego. Na kya ego aratunga, abhe muna ngʼo omukori wa emirimu. ²⁷Mbe! Niwi omukuru? Unú areekara kumeja okurya ebhyakurya, kasi unú arareeta ebhyakurya? Ndamanya ngʼo unú areekara okurya ebhyakurya. Nawe, oni ndingi gati weenyu hanu kya omukori wa emirimu weenyu.22:27 Maaha mukitabho kya Yoana 13:1-20.

²⁸“Bheenyu mbo mwasanga hamwi na oni munyanko yaani. ²⁹Kya ego Taata yaangabhya obhukama, oni nonse ndabhagabhya obhukama. ³⁰Murirya na okunywa kunyangi ya obhukama bhwani, na okwikara kubhitumbi bhya ekikama, enu muribhuturira ekiina amakabhira ekumi na gabhiri ga Isiraeri.”22:30 Amakabhira ekumi na gabhiri ga Isiraeri. Maaha eringʼana rinu mu Moonjooro eguru ya Amangʼana Amakongʼu.

Yeesu araruusya obhurooti ega, Simoni Petero yaakamwange

(Mataayo 26:31-35; Mariko 14:27-31; Yoana 13:36-38)

³¹Yeesu akagamba ega, “Simoni, Simoni, itegeerera! Omanye ega, Erisambwa ryeendanga okubhaahura kya omuntu unú areerura obhuro. ³²Nawe nkusabhiiri ku Waryubha, naho eimani yaaho etasuuha. Na hanú orinhindira, wimye abharikyaho.” ³³Simoni akamukyukya ega, “Omukuru weetu, hanú oranyoora ndingi hamwi na uuwe, ndatura okugya okubhohwa mwigereja, kora okukwa hamwi na uuwe!” ³⁴Yeesu akakyukya ega, “Uuwe Simoni Petero! Ndakukeerya ega, reero eribhaga ensarigoko ekyari okuragura, wakabhe unyangiri mara kasatu ega, otammanyiri.”

Okwiseemya eribhaga rya engʼanga

³⁵Yeesu akabhuurya abheehigira bhaaye ega, “Hanú naabhatuma bira ensaho ya egimbirya kora ensakwa, na bira eginkeeto, mwasuuhirwa ekintu kyokyonse?” Bhakakyukya ega, “Tutaasuuhirwa.”22:35 Maaha mukitabho kya Ruuka 9:3, 10:4.

³⁶Akabhakeerya ega, “Nawe okwambira bhoono, omuntu unú yaana ensaho ya egimbirya kasi ensakwa, abhigege. Na unú ataana empanga, agurye ekabhuuti yaaye, agure empanga. ³⁷Kwa okubha yaangʼoorwa ega, ‘Yaabharwa hamwi na abha obhusarya.’22:37 Maaha mukitabho kya Isaaya 53:12. Amangʼana ganu gaangʼoorwa eguru yaani. Ndabhakeerya ega, ereenderwa nkorerwe.”

³⁸Bhonse bhakamukeerya ega, “Omukuru weetu, rora! Hanú giriho egimpanga ebhiri.” Wonse akabhakyukya ega, “Tutige gayo!”

Yeesu arasabha Waryubha munkuku ya Emijeituni

(Mataayo 26:36-46; Mariko 14:32-42)

³⁹Nho, Yeesu akarwa hayo, akagya munkuku ya Emijeituni, kya ego yaaringa anariri. Abheehigira bhaaye bhakamuseeta. ⁴⁰Hanú yaahika munkuku, akabhakeerya ega, “Musabhe Waryubha, naho mutaaja okusoha mumasakyo.”

⁴¹Omwene akeeyahura hayo, akasuntara embere hake. Akeegama hansi, akasabha Waryubha ega, ⁴²“Taata, nyoore oreenda unduusirye-ho ekikombe kya enyanko kinu. Nawe, otakora kya ego oni ndeenda, okore kya ego uuwe oreenda.” ⁴³[Rumwigo, maraika okurwa murwire akamuujira, akamwijurya eginguru. ⁴⁴Wonse akagendererya okusabha Waryubha, kwa okubha yaaringa na obhururu obhwaru. Ebhigeri bhyaye bhikabha bhiratoonya hansi kya amatoonyekera ga amanyinga.]22:43-44 Amangʼana mumabhano ganu […] gataringi mumangʼoore agandi ga akare aga Ekiyunani.

⁴⁵Hanú yaamara okusabha Waryubha, akeemirira, akabhahindira abheehigira bhaaye, akanyoora bheehiriibhwe, kwa okubha bhaaringa bhasurumbeeri. ⁴⁶Akabhabhuurya ega, “Ndeegwa mureeri? Mubhuuke! Musabhe Waryubha, mutaaja okusoha mumasakyo.”

Yeesu aragwatwa

(Mataayo 26:47-56; Mariko 14:43-50; Yoana 18:3-11)

⁴⁷Mbe, hanú Yeesu yaaringa akyagamba gayo, akaajirwa na omuganda gwa abhantu abhaaru. Na urya yaabhirikirwanga Yuda, oumwi wa abheehigira bhaaye ekumi na bhabhiri, yaaringa embere ya abhantu bhayo. Yuda akamusuntarira, akamuhumbata. ⁴⁸Yeesu akamubhuurya ega, “Uuwe Yuda! Oramukorera eniku Omwana wa Adamu kwa okumuhumbata?” ⁴⁹Abheehigira bhaaye, hanú bhaarora ganú garaakoreke, bhakamubhuurya ega, “Omukuru weetu, tubhageeje na egimpanga?” ⁵⁰Rumwigo, oumwi waabho akamutema omukori wa emirimu wa omusyengeri omukuru, akamungʼasura okutwi kwa obhuryo. ⁵¹Yeesu akagamba ega, “Mutige! Eringʼana rinu rireesa!” Akakuunʼya okutwi kwa omuntu uyo, akamuhwenʼya.

⁵²Gati ya bhanú bhaaja okumugwata, bhaaringa-mo abhasyengeri abhakuru, na abhakuru bha abharindi bha mwisyengerero erikuru rya Waryubha, hamwi na abhakaruka bha Ekiyahudi. Yeesu akabhakeerya ega, “Bheenyu! Kwaki munseeteri na emihyu na egimuga, muna mooherye omwibhi? ⁵³Ndeegwa, eginsiku gyonsego twagosoryanga hamwi murubhanja rwa erisyengerero erikuru rya Waryubha, mutaankuunʼya! Nawe bhoono, eribhaga ryenyu rya obhutungi bhwa abhasarya, ndyo rinu.”

Petero aramwanga Yeesu

(Mataayo 26:57-58, 26:69-75; Mariko 14:53-54, 14:66-72; Yoana 18:12-18, 18:25-27)

⁵⁴Rumwigo, abhantu bhayo bhakamuhurumukira, bhakamugwata, bhakamuhira okuhikira iika owa omusyengeri omukuru.22:54 Omusyengeri omukuru. Maaha Abhasyengeri mu Moonjooro eguru ya Amangʼana Amakongʼu. Petero akabharwa enyuma kwa hare. ⁵⁵Hanú bhaahika kubhoori bhwa enyumba, bhakaamba okukooma ekyoto, bhakeekara hamwi. Petero wonse, akeekara hamwi nabho. ⁵⁶Omukori wa emirimu oumwi wa ekikari, akamurora yeekeeri kubhurabhu bhwa omururo, akamwikomya, akagamba ega, “Omuntu unu, yaaringa hamwi na Yeesu!” ⁵⁷Nawe Petero akaanga, “Uuwe omukari, oni ntamumanyiri!” ⁵⁸Hakego, omuntu oundi akamurora Petero, akamubhuurya ega, “Uuwe wonse ngʼ-umwi waabho!” Nawe Petero akakyukya ega, “Mura uuwe! Ntaringi oni!” ⁵⁹Eribhaga rikahita muna ensa eimwi, omuntu oundi akakomererya ega, “M-maheene, omuntu unu yaaringa hamwi nawe, kwa okubha wonse m-Mugariraaya!” ⁶⁰Nawe Petero akakyukya ega, “Mura uuwe! Gayo oragamba, oni ntagamanyiri!” Atarahikya omunwa guyo ego, ensarigoko ekaragura. ⁶¹Omukuru Yeesu akamwikyukirya, akamumaahirira Petero mumeeso. Rumwigo, Petero akahiituka amangʼana ganú Omukuru Yeesu yaaringa amariri okumukeerya ega, “Ensarigoko etaakaragure reero, okyari okunyanga mara kasatu ega, otamanyiri.” ⁶²Kimwi, Petero akahuruka kibhara, akakuura kwa obhururu bhukongʼu.

Abharindi bharamujabhura Yeesu

(Mataayo 26:67-68; Mariko 14:65)

⁶³Abhasaaja bhanú bhaaringa bharaangararira Yeesu, bhakabha bharamujabhura na okumutema. ⁶⁴Bhakamuribha ameeso bhakamukeerya ega, “Rengererya niwi unú akutemeri? ” ⁶⁵Bhakagendererya okumutuka amatuki amaaru.

Yeesu arajongerwa embere ya eribharaja rya Abhayahudi

(Mataayo 26:59-66; Mariko 14:55-64; Yoana 18:19-24)

⁶⁶Hanú bhwakya, ekiikaro kya abhakaruka bha Ekiyahudi, hamwi na abhasyengeri abhakuru na abheehigirya bha amaragiriryo, kikeekumanʼya hamwi. Bhakamuhira Yeesu mwibharaja ryabho erikuru,22:66 Mwibharaja ryabho erikuru. Maaha Eribharaja erikuru rya Abhayahudi mu Moonjooro eguru ya Amangʼana Amakongʼu. bhakamubhuurya ega, ⁶⁷“Nyoore uuwe nuuwe Kiristu Omutuurya,22:67 Kiristu Omutuurya. Maaha Kiristu mu Moonjooro eguru ya Amangʼana Amakongʼu. otukeerye!” Yeesu akakyukya ega, “Kora nkaabhakeerya, muteekirirye. ⁶⁸Na ndaabhabhuurye eringʼana, mutaakyukye. ⁶⁹Nawe okurwa bhoono, Omwana wa Adamu aribha yeekeeri orubhaara rwa obhuryo rwa Waryubha owa eginguru gyonsego.”22:69 Maaha mukitabho kya Egijabhuri 110:1.⁷⁰Bhonsego, bhakamubhuurya Yeesu kweki ega, “Nko okugamba uuwe m-Mwana wa Waryubha?”22:70 M-Mwana wa Waryubha. Maaha Omwana wa Waryubha mu Moonjooro eguru ya Amangʼana Amakongʼu. Yeesu akakyukya ega, “M-beenyu muragamba ega, nooni.” ⁷¹Bhakagamba ega, “M-bwimiririri-ki bhunú turatuna kweki? Ndeegwa twigwiri bheetu abheene okurwa mumunwa gwaye.”

Yeesu arajongerwa embere ya Pirato

(Mataayo 27:1-2, 27:11-14; Mariko 15:1-5; Yoana 18:28-38)

¹Nho, abhakuru bhayo bhonsego bhakeemirira, bhakamuhira Yeesu ku Pirato, omwanangwa wa ekyaro kya Yudea. ²Bhakaamba okumujongera kwa obhuhaari, bharagamba ega, “Omuntu unu tumunyooreri arahabhya abhantu bha ekyaro kyetu, kwa okubha arabhakaanʼya bhatatobha erigooti ku Kaisari,23:2 Kaisari. Maaha eringʼana rinu mu Moonjooro eguru ya Amangʼana Amakongʼu. na aragamba ega, weeki ngʼo Kiristu Omutuurya, Omukama weetu.”

³Nho, Pirato akamubhuurya ega, “Uuwe nuuwe Omukama wa Abhayahudi?” Yeesu akamukyukya ega, “Nuuwe ogambiri.”

⁴Pirato akabhakeerya abhasyengeri abhakuru, hamwi na omuganda gwa abhantu ega, “Omuntu unu ataana obhusarya bhobhonse.”

⁵Nawe abhantu bhayo, bhakakomererya ega, “Arasiigirirya abhantu, kwa obhwihigirya bhwaye kukyaro kyonsego kya Abhayahudi, yaambira Gariraaya, na bhoono yaahikiri Yudea.”

⁶Pirato hanú yeegwa gayo, akabhabhuurya nyoore Yeesu m-Mugariraaya. ⁷Hanú yaamanya ega, m-Mugariraaya wa obhutungi bhwa Herode Antipa,23:7 Maaha mukitabho kya Ruuka 3:1. Kweki, maaha Herode Antipa mu Moonjooro eguru ya Amangʼana Amakongʼu. akamuhira kuweeki, kwa okubha eginsiku giyo, Herode yaaringa Yerusaremu hayo.

Yeesu arahirwa ku Herode Antipa

⁸Herode Antipa hanú yaamurora Yeesu, akajomerwa bhukongʼu, kwa okubha yaaringa yeegwiri amangʼana gaaye. Yeegombanga okumurora kwa eribhaga eritambi, naho omwene arore ebhika bhinú arakora. ⁹Herode akamubhuuririrya amangʼana amaaru, nawe, Yeesu ataakyukya eringʼana. ¹⁰Abhasyengeri abhakuru na abheehigirya bha amaragiriryo bhaaringa-ho, bharamujongera kwa obhuhaari bhukongʼu. ¹¹Herode wonse, na abhasirikare bhaaye, bhakaamba okumujeera, bhakamusekerera, bhakamwibhohya omwenda gwa ekikama. Nho, Herode akamuhindya ku Pirato. ¹²Herode na Pirato bhaaringa abhasigu, okwambira hayo, bhakabha abhasaani.

Pirato arabhuturira ekiina Yeesu yeetwe

(Mataayo 27:15-26; Mariko 15:6-15; Yoana 18:38–19:16)

¹³Eribhaga erindi, Pirato akakumanʼya abhasyengeri abhakuru, na abhatungi bha Abhayahudi, hamwi na abhantu bha mumugi. ¹⁴Akagamba ega, “Mundeeteeri omuntu unu, muragamba ega, yaaringa arahabhya abhantu. Bhoono mwitegeerere mwigwe. Neekomerye bhwaheene okujongera kwenyu kwonsego, bhutariho obhusarya bhobhonse bhunú naaruuji. ¹⁵Kora Herode wonse, ataruuji obhusarya bhobhonse bhurya, nkyo kikoreri amuhunjukirye kuoni. Mumanye ega, omuntu unu ataakora eringʼana eribhiibhi rinú riraakore yeetwe! ¹⁶Kwa ego, ndamutema ebhibhoko, ndamara ndamuhaatira.” ¹⁷[Kira hanú enyangi ya Epasaka yaahikanga, yeenderwanga Pirato okumuhaatira omubhohwa oumwi.]23:17 Amangʼana mumabhano ganu […] gataringi mumangʼoore agandi ga akare aga Ekiyunani.

¹⁸Nawe, abhantu bhayo bhonsego bhakajiirira kwa hamwi ega, “Muruusye-ho omuntu uyo! Otusiikurire Bharaabha!” ¹⁹Bharaabha uyo, yaaringa abhoherwe mwigereja, kwa okubha yaaringa akoreri ekisiiyomba mumugi, na yaaringa yeetiri omuntu. ²⁰Pirato akeenda okuhaatira Yeesu. Ego, akagamba nabho kweki. ²¹Nawe, bheeki bhakagendererya okutema ekituri, “Mubhambe kumusarabha! Mubhambe kumusarabha!”

²²Akabhakeerya kweki orwa kasatu ega, “Akoreri obhusarya-ki? Ndeegwa, ntakurora obhusarya bhobhonse bhunú bhuraakore yeetwe. Kwa ego, ndamutema ebhibhoko, ndamara ndamuhaatira.” ²³Nawe, abhantu bhayo bhakagendererya okutema ekituri bhukongʼu ega, Yeesu abhambwe kumusarabha. Kubhuteero, ekituri kyabho kikamuhiga.

²⁴Mbe, Pirato akabhahaatirirya Abhayahudi bhayo, okukora kya ego bhareenda. ²⁵Akabhasiikurira Bharaabha okurwa mwigereja, yaaringa abhoherwe kwa okukora ekisiiyomba na obhwiti. Akabhahaana Yeesu, naho bhamukore kya ego bhareenda.

Yeesu arabhambwa kumusarabha

(Mataayo 27:32-44; Mariko 15:21-32; Yoana 19:17-27)

²⁶Hanú abhasirikare bhaaringa bharamuhira Yeesu okumubhamba kumusarabha, bhakasikana na omuntu umwi, eriina ryaye Simoni wa mumugi gwa Kirene. Eribhaga riyo, yaasohanga mumugi gwa Yerusaremu. Bhakamugwata, bhakamwitiikya omusarabha gunú Yeesu yaaringa yeetiikiri, akabha aragenda enyuma ya Yeesu.

²⁷Abhantu emiganda na emiganda, bhakamuseeta Yeesu. Gati yaabho bhaaringa-mo abhakari bhanú bhaamukuuriranga na okuruguura. ²⁸Yeesu akabheekyukirya, akabhakeerya ega, “Bheenyu, abhakari bha Yerusaremu! Mutige okunkuurira oni! Mwikuurire bheenyu abheene, na mukuurire abhaana bheenyu! ²⁹Mumanye bhujomu ega, eginsiku giriija, ginú abhantu bharigamba ega, nyakara abhagumba bhanú bhataakeebhwiri na egimbeere gyabho gitaakaneenerye abhaana. ³⁰Eribhaga riyo, abhantu bharikeerya eginkuku ega, ‘Mutugwire!’ na ebhiswa ega, ‘Mutukundikirirye!’23:30 Maaha mukitabho kya Hosia 10:8.³¹Ndagamba ego, kwa okubha nyoore bharankora ego oni, omuti omubhisi, eribha enyanko bhukongʼu kubheenyu, omuti omomu.”23:31 Ensonga ya omuchafwa gunu niiga, nyoore bharamunyankya Yeesu unú ataana obhusarya, abhasarya bharinyankibhwa okukira Yeesu.

³²Abhasirikare bhakamuhira Yeesu hamwi na abhasarya bhabhiri, naho bheetwe hamwi. ³³Hanú bhaahika ahasi hanú harabhirikirwa Ekihuuri kya Omuntu, nho bhakamubhamba kumusarabha. Bhakamubhamba hamwi na abhasarya bhabhiri bhayo, oumwi orubhaara rwaye rwa obhuryo, na oundi orubhaara rwaye rwa obhumosi.

³⁴Yeesu akagamba ega, “Taata! Obhaabhire, kwa okubha bhatamanyiri kinú bharakora.”

Abhasirikare bhayo hanú bhaamara, bhakagabhana emyenda gyaye kwa okugitemera ekuura.23:34 Kwa okugitemera ekuura. Bhaatuuranga mukintu, ebhiti bhinú bhiina ebhimanyiiriryo kasi amagina ga amariina, naho kira oumwi agege omwenda gunú guraagwire kukimanyiiriryo kyaye. Maaha mukitabho kya Egijabhuri 22:18.³⁵Abhantu bhaaringa bheemiriiri hayo, bharamaahirira ganú garakoreka. Abhakuru bha Abhayahudi, bhakamujeera bharagamba ega, “Ndeegwa yaatuuryanga abhandi! Mbe, bhoono yeetuurye omwene, nyoore ngʼo Kiristu Omutuurya, omusorwa wa Waryubha.” ³⁶Abhasirikare bhonse bhakamujeera, bhakamusuntarira, bhakamuhaana omusuka gwa edivai. ³⁷Bhakamukeerya ega, “Nyoore heene uuwe m-Mukama wa Abhayahudi, ituurya uuwe omwene!”

³⁸Eguru kumusarabha gunú yaaringa abhambirwe-ko, bhaatuura-ko amangʼoore ganu, “unu ngʼo omukama wa abhayahudi.”

³⁹Oumwi gati ya bha obhusarya abhabhiri bhanú bhaaringa bhabhambirwe kumusarabha hamwi, akamutuka Yeesu ega, “M-buheene ega, uuwe nuuwe Kiristu Omutuurya? Mbe, ituurya uuwe omwene! Otutuurye na bheetu bhonse!”

⁴⁰Nawe, owa obhusarya oundi akamukemera omurikyaye ega, “Uuwe otakoobhoha Waryubha? Uuwe wonse onyooreri obhubhuturi bhwa ekiina bhuyobhuyo. ⁴¹Bheetu tubhuturiirwe ekiina kwa obhuheene, ganu ngo endihi ya ganú twakora. Nawe omuntu unu, ataakora obhusarya bhobhonse.”

⁴²Hanú yaamara okukemera omurikyaye, akagamba ega, “Yeesu, unhiituke oni, hanú wakasohe mubhukama bhwaho.” ⁴³Yeesu akakyukya ega, “Ndakukeerya obhuheene ega, reero wakabhe hamwi na oni murwire.”

Yeesu arakwa

(Mataayo 27:45-56; Mariko 15:33-41; Yoana 19:28-30)

^44-45Hanú gyahika ensa esansabha gya omubhasu, eryubha rikasima, ekisunte kikakurya mukyaro kyonsego, okuhikira ensa kenda. Eshuuka enene inú yaaringa eturungajiibhwe munyumba enkuru ya mwisyengerero erikuru rya Waryubha,23:44-45 Eshuuka enene inú yaaringa eturungajiibhwe munyumba enkuru ya mwisyengerero erikuru rya Waryubha. Yaaringa eraahukanʼya abhantu bhatasoha Aharabhu ha Aharabhu, hanú obhukuru bhwa Waryubha bhwaringa. Eshuuka iyo yaaringa kya eshuuka ya eribhuru erijomu rinú riroorokya okubha-ho kwa Waryubha mukitabho kya Okuhuruka 26:31-33. Kweki, maaha mukitabho kya Abhaebhurania 6:19, 9:3, 10:19-22. ekabhaaruka amabhaara gabhiri.

⁴⁶Yeesu akakuura kwa eriisi erinene ega, “Taata! Omutima gwani ndagutuura mumabhoko gaaho!” Hanú yaamara okugamba gayo, gukahwa-mo.

⁴⁷Omukuru wa abhasirikare hanú yaarora ganú gakorekeri, akamugungya Waryubha aragamba ega, “M-buheene ega, omuntu unu yaaringa wa heene!”

⁴⁸Abhantu bhonsego bhanú bhaaringa bheekumeenʼye okumaaha amangʼana gayo, hanú bhaarora ganú gakorekeri, bhakahunjuka iika owaabho, bhareetematema kubhikubha bhyabho kwa okusurumbara. ⁴⁹Nawe, bhanú bhaaringa bhamumanyiri bhakeemirira hare, bharamaahirira ganú garakoreka. Gati yaabho, bhaaringa-ho abhakari bhanú bhaamusoorananga okurwa mukyaro kya Gariraaya.

Yeesu arabhiikwa

(Mataayo 27:57-61; Mariko 15:42-47; Yoana 19:38-42)

^50-51Yaaringa-ho omuntu umwi, eriina ryaye Yusufu, wa mumugi gwa Arimataya, gunú gwaringa mukyaro kya Yudea. Yaaringa omuntu wa heene embere ya Waryubha, na yaaganyiriranga obhukama bhwa Waryubha23:50-51 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. bhuuje. Onyoora yaaringa umwi wa eribharaja erikuru rya Abhayahudi, ateekiriranʼya na abharikyaye kuringʼana riyo rya okwita Yeesu. ⁵²Mbe, akagya ku Pirato, akasabha omubhiri gwa Yeesu. ⁵³Pirato hanú yeekirirya, Yusufu akagwikya okurwa kumusarabha, akagukundikirya ensanda. Akagutuura mumbihira inú yaaringa ebhaajirwe kwitare, inú yaaringa ekyari okubhiikwa-mo omuku oundi. ⁵⁴Orusiku ruyo rwaringa orwa kataanu, na ndo rwaringa orusiku rwa okwiseemya kwa Esabhato. Orusiku rwa Esabhato rwaringa rwambiri.23:54 Orusiku rwa Esabhato rwaringa rwambiri. Orusiku rwa Esabhato rwaambanga eribhaga eryubha rirasikira orusiku rwa kasansabha, okwimukira orusiku rwa muhungati. Amaragiriryo ga Abhayahudi gateekiriryanga okubhiika omuntu orusiku rwa Esabhato. Maaha Esabhato mu Moonjooro eguru ya Amangʼana Amakongʼu.

⁵⁵Mbe, abhakari bhanú bhaaja hamwi na Yeesu okurwa Gariraaya, bhakamuseeta Yusufu mumbihira, bhakamaaha kya ego omubhiri gwa Yeesu guteerwe-mo. ⁵⁶Nho, bhakahunjuka iika, bhakaseemya amaguta na obhurange bhwa okuhaka omubhiri gwa Yeesu. Bhakamuunya orusiku rwa Esabhato, kya ego yaaringa eragiririibhwe na amaragiriryo ga Waryubha.23:56 Maaha mubhitabho bhya Okuhuruka 20:8-11; Obhuhiituki bhwa Amaragiriryo 5:12-15.

Yeesu arahyuka

(Mataayo 28:1-10; Mariko 16:1-8; Yoana 20:1-10)

¹Orusiku rwa okwamba rwa obhutuuro nyenkyo juri, abhakari bhayo bhakagya kumbihira bhagegeri obhurange bhunú bhaaringa bhaseemerye. ²Hanú bhaahika, bhakanyoora erigina rinú ryaringa riteerwe kumunwa gwa embihira, rihiringitiibhwe. ³Bhakasoha munsi, nawe bhataagurora omubhiri gwa Omukuru Yeesu.

⁴Hanú bhaaringa bhakyaruguura eguru ya eringʼana riyo, rumwigo bhamaraika bhabhiri, bhanú bhaaringa bheebhoheri emyenda ginú girangʼesangʼesa egindabhu pee, bhakeemirira haangʼi nabho. ⁵Kimwi, abhakari bhayo bhakagwatwa na enkubhi, bhakahiinya obhusu bhwabho bhukahika hansi. Nho, abhantu bhayo bhakabhakeerya ega, “Kwaki muratuna omuhoru gati ya abhaku? ⁶Atariho hanu, ahyukiri! Muhiituke ganú yaabhakeerya bheenyu hanú mwaringa mukyaro kya Gariraaya, ⁷ega, ‘Omwana wa Adamu yeenderwanga atuurwe mumabhoko ga abhasarya, abhambwe kumusarabha, yeetwe, na orusiku rwa kasatu okurwa okukwa kwaye, ahyuke!’24:7 Maaha mukitabho kya Ruuka 9:22.” ⁸Nho, abhakari bhayo bhakagahiituka amangʼana ga Yeesu.

⁹Kwa ego, bhakahinda okurwa mumbihira, bhakaraarika amangʼana gayo gonsego kubhatumwa bha Yeesu ekumi na umwi, hamwi na abhandi bhonsego. ¹⁰Bhanú bhaagamba amangʼana gayo kubhatumwa bha Yeesu, m-ba Mariamu Magidarena, Yoana na Mariamu ngʼina waabho Yakobho, hamwi na abhakari abhandi bhanú bhaaringa hamwi nabho.

¹¹Nawe, abhatumwa bha Yeesu hanú bheegwa amangʼana gayo, bhakabheehya abhakari bhayo, bhataabheekirirya.

¹²Nawe Petero akeemuka, akakenya okugya kumbihira. Hanú yeehiinya okusoomererya munsi, akarora emyenda egyene ginú Yeesu yaaringa abhiikiirwe, akahinda enu araruguura eguru ya gayo gatuukiri.

Yeesu kurugendo rwa okugya mukijiji kya Emau

(Mariko 16:12-13)

¹³Orusiku ruyoruyo rwa obhooyo, abheehigira bhabhiri bha Yeesu bhaaringa kurugendo rwa okugya mukijiji kinú kyabhirikirwanga Emau. Ekijiji kiyo kyaringa muna egikirometa ekumi na eimwi okurwa Yerusaremu. ¹⁴Bhaagendanga bharahairira eguru ya amangʼana ganú gatuukiri. ¹⁵Hanú bhaaringa bhakyahaira na okubhuuranʼya, Yeesu omwene akabhaajira, akagenda hamwi nabho. ¹⁶Bhakamurora kwa ameeso gaabho, nawe Waryubha akakora bhatige okumumanya.

¹⁷Akabhabhuurya ega, “Murahairira-ki enu muragenda kunjira?” Bhakeemirira bhukiri, obhusu bhwabho bhukoorokya okusurumbara. ¹⁸Oumwi waabho, eriina ryaye Kiriopa, akakyukya ega, “Uuwe omwene nuuwe omugeni Yerusaremu hanu, unú otamanyiri ganú gatuukiri eginsiku ginu?” ¹⁹Wonse akabhabhuurya ega, “M-mangʼana-ki gayo?” Bhakakyukya ega, “Bheetu turahairira amangʼana ganú gaakoreka eguru ya Yeesu wa Najareeti. Abhantu bhonsego, kora Waryubha, bhaarora ega, weeki m-murooti wa obhuturo, kwa okubha amangʼana gaaye na obhwihigirya bhwaye bhwaringa na eginguru bhukongʼu. ²⁰Abhasyengeri abhakuru na abhatungi bheetu, bhakeekirirya abhuturirwe ekiina okukwa. Akabhambwa kumusarabha. ²¹Nawe bheetu, tweesiganga ega, weeki ngʼo akaatuurirye Isiraeri. Na okurwa amangʼana gayo gakoreke, reero n-dusiku rwa kasatu. ²²Kweki, abhakari bha mumuganda gwetu, bhanú bhagiiri kumbihira nyenkyo juri, bhatutakirye kwa okutukeerya ega, ²³bhatanyooreri omubhiri gwaye mumbihira, na ega, bheebhukirwa na bhamaraika. Bhamaraika bhayo, bhabhakeererye ega, Yeesu m-muhoru. ²⁴Hanú bhamariri okutukeerya ego, abharikyetu bhagiiri kumbihira, bhanyooreri gonsego kya ego abhakari bhayo bhatukeererye. Nawe Yeesu omwene bhatamuruuji.”

²⁵Yeesu akabhakeerya ega, “Bheenyu abhakangi! Kwaki muringi abhakongʼu okwikirirya amangʼana ganú gaagambwa na abharooti? ²⁶Kasi eteenderwanga Kiristu Omutuurya ahitire enyanko iyo, na asohe ahasi hanú aritogoonibhwa?” ²⁷Nho, Yeesu akabhatubhurira amangʼana gonsego ganú gaangʼoorwa eguru yaaye, okwambira amangʼoore ga Musa, na amangʼoore ga abharooti bhonsego.

²⁸Bhaaringa haangʼi okuhika mukijiji kinú bhaagyanga-mo, Yeesu akeekorya muna arahitiranʼya. ²⁹Nawe, bhakamwisasaama bhukongʼu, bhakamukeerya ega, “Wikare hamwi na bheetu hanu! Kwa okubha bhoonwego, m-mugoroobha na ekisunte kireenda okusoha.”

Nho, Yeesu akasoha munyumba okubha nabho hamwi. ³⁰Na hanú bheekara hamwi kumeja okurya ebhyakurya, Yeesu akagega omukaate, akakumya Waryubha, akagusuunura, akabhahaana. ³¹Rumwigo, ameeso gaabho gakarimburirwa na bhakamumanya ega, unu n-Yeesu. Hayohayo, akabhabhura-ko. ³²Mbe, bhakabhuuranʼya ega, “Hanú yaahaira na bheetu kunjira, enu araturagirirya Amangʼoore Amarabhu ga Waryubha, emitima gyetu gyajomerwa bhukongʼu, tiigo?”

³³Eribhaga riyoriyo, bhakeemuka, bhakahunjuka Yerusaremu. Bhakanyoora abheehigira ekumi na umwi, na abhandi bheekumeenʼye hamwi. ³⁴Bhanú bhaaringa bheekumeenʼye, bhakabhakeerya ega, “M-buheene, Omukuru weetu ahyukiri! Amwibhukiiri Simoni!” ³⁵Nho, abheehigira abhabhiri bhayo, bhakabhakeerya abharikyabho ganú gaabharwira kunjira, na kya ego bhaamumanya Yeesu hanú yaasuunura omukaate.

Yeesu arabheebhukira abheehigira bhaaye

(Mataayo 28:16-20; Mariko 16:14-18; Yoana 20:19-23; Amakorwa ga Abhatumwa 1:6-8)

³⁶Hanú bhaaringa bhakyahairira amangʼana gayo, rumwigo, Yeesu omwene akeemirira gati yaabho, akabhakeerya ega, “Omurembe gubhe na bheenyu!” ³⁷Bhakeetakya na bhakoobhoha bhukongʼu, kwa okubha bhaamanyanga ega, bharuuji ekihwi. ³⁸Nawe, Yeesu akabhabhuurya ega, “Ndeegwa, muuna enkubhi mumitima gyenyu? ³⁹Mumaahe amabhoko gaani na amaguru gaani, naho mumanye ega, nooni omwene! Mumbabhaate! Murore, kwa okubha ekihwi kitaana eminoku na amaguha kya ego murandora oni niinabhyo.” ⁴⁰Hanú Yeesu yaamara okubhakeerya gayo, akabhoorokya amabhoko na amaguru gaaye. ⁴¹Mbe, abheehigira bhaaye bhateekirirya obhuheene bhuyo, kwa okubha bhaajomerwa bhukongʼu na bhaaringa bhararuguura. Nho, Yeesu akabhabhuurya ega, “Muuna ebhyakurya bhyobhyonse hanu?” ⁴²Bhakamuhaana orubhaara rwa enswi inú ekarirwe, ⁴³akagega, akarya embere yaabho.

⁴⁴Hanú yaamara, akabhakeerya ega, “Ganu ngo naabhakeeryanga hanú naaringa hamwi na bheenyu. Naagamba ega, gonsego ganú gaangʼoorwa eguru yaani, gareenderwa gakoreke, ganú garingi mumaragiriryo ga Musa na mumangʼoore ga abharooti na mumangʼoore ga Egijabhuri.”

⁴⁵Nho, akabharibhurira obhungʼeeni bhwabho, naho bhamanye Amangʼoore Amarabhu ga Waryubha. ⁴⁶Kweki, akabhakeerya, “Yaangʼoorwa ega, Kiristu Omutuurya ariitwa, na orusiku rwa kasatu okurwa okukwa kwaye, arihyuka okurwa mubhaku. ⁴⁷Na abhantu bha ebhyaro bhyonsego, okwambira Yerusaremu, bhariraarikirwa kwa eriina ryaye ega, nyoore bharimwihunjurira Waryubha, bharyabhirwa obhusarya bhwabho. ⁴⁸Na bheenyu mbo abheemiririri bha amangʼana gayo.

⁴⁹“Bhoono, ndibhatumira Omutima Omurabhu,24:49 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. kya ego Taata yaaringa abharagiri. Nawe, mwikare mumugi gwa Yerusaremu, okuhikira muhaanwe obhuturo okurwa murwire.”

Yeesu areenurwa okugya murwire

(Mariko 16:19-20; Amakorwa ga Abhatumwa 1:9-11)

⁵⁰Hanú yaamara, akabhahira haangʼi na ekijiji kya Bhetania. Hanú bhaahika, akeenura amabhoko gaaye eguru, akabhanonka. ⁵¹Na hanú yaaringa akyabhanonka, rumwigo, akabhatiga, akeenurwa okugya murwire.

⁵²Bhakamusyengera, bhakamara bhakahunjuka Yerusaremu, bhajomeerwe bhukongʼu. ⁵³Mbe, bhakabha bhareekara mwisyengerero erikuru rya Waryubha, enu bharamugungya.