Yuda

Enyarubha ya

Yuda

Obhukangati

Enyarubha inu yaangʼoorwa na Yuda, omumura waabho Yakobho (1:1) na omumura waabho Omukuru Yeesu omwene (Mataayo 13:55; Mariko 6:3). Yuda yaangʼoora enyarubha inu kurusumo rwa abhantu bhonsego. Abhasomi abhandi bharagamba ega, Yuda yaangʼoora enyarubha inu kumwaka gwa mirongo esansabha na etaanu (65) okurwa okwibhurwa kwa Yeesu.

Yuda yaangʼoorera Abhakiristu nyabhurebhe enyarubha inu. Yeendanga okubhangʼoorera amangʼana eguru ya obhutuurya. Nawe, yaakyukya ameetegeerero gaaye, akabhangʼoorera ega, bhabhenga bharasongana na abheehigirya bha obhubheehi, bhanú bhaasoha bhugunyi gati ya abheekirirya bhayo. Abheehigirya bhayo, bhaaringa bhareehigirya ega, Abhakiristu bhagendererye okukora obhusarya, kwa okubha obhutuurya bhuratuuka kwa eriruguto rya Waryubha. Kweki bhaaringa bharamwanga omukangatya omumwemwe Yeesu Kiristu. Omungʼoori arabhakomererya Abhakiristu ega, bhabhenga bharagendererya okunaga kuimani.

Okukeeranʼya

¹Enyarubha inu, erwiri kuoni Yuda, omugaya wa Yeesu Kiristu na omumura waabho Yakobho. Ndabhangʼoorera bheenyu bhanú mwabhirikirwa na Taata Waryubha, bheenyu bhanú mureekara mubhuhanje bhwaye, na okwangararirwa bhwaheene na Yeesu Kiristu.

²Ndabhasabhira ku Waryubha abhoongerye ekyabhira, omurembe na obhuhanje.

Okubhutura ekiina kubheehigirya bha obhubheehi

³Abhahanje bhaani, naaringa ndeegomba bhukongʼu okubhangʼoorera eguru ya obhutuurya bhunú turasanga bhonsego hamwi. Nawe bhoono, naaruuji ega, ndeenderwa mbangʼoorere, naho mbakomererye ega, mwibhagirire obhuheene bhwa eimani bhunú Waryubha yaagwatya abharabhu bha omutima rumwigo kwibhaga ryonsego. ⁴Ndabhangʼoorera enyarubha inu, kwa okubha, abhantu nyabhurebhe bhanú bhatakumwigwa Waryubha, bheesoherye gati yeenyu bhugunyi na okwisanganʼya na bheenyu. Abhantu bhayo, bharagamba ega, eriruguto rya Waryubha weetu rirabheekiririrya okugwata orunamba rwabho orubhiibhi rwa omubhiri. Na bharamwanga Yeesu Kiristu, Omukangatya na Omukuru weetu omumwemwe. Nawe, okwambira akare yaangʼoorwa ega, abhantu bhayo, bharibhuturirwa ekiina kya ego abhandi bhaamara okubhuturirwa ekiina.

⁵Kweki ndeenda okubhahiitukya, onyoora mwamara okumanya amangʼana ganu gonsego, ega, Omukuru yaatungurya Abhaisiraeri okurwa mubhugaya, mukyaro kya Misiri, nawe, yaamara akasikya bhanú bhataaringa bharamwikirirya.1:5 Maaha mukitabho kya Okubhara 14:26-35, 26:64-65.⁶Kweki muhiituke bhamaraika1:6 Bhamaraika. Maaha eringʼana rinu mu Moonjooro eguru ya Amangʼana Amakongʼu. bhanú bhateeswanga na obhutungi bhunú bhaaringa nabho, bhakatiga egimenyo gyabho, Waryubha yaabhabhoha mukisunte kwa eminyororo gya koko. Eyo bharaganyirira orusiku orukuru rurya rwa okubhuturirwa ekiina. ⁷Kweki muhiituke abhantu bha mumigi gya Sodoma na Gomora, na bharya abha mumigi gya haangʼi. Abhamenyi bha muyo bharahunkana kya bhamaraika bhayo. Bhaaringa bharakora obhusimbe na okugwata orunamba rwa omubhiri runú rutakutuubhana na kya ego bhaabhumbwa bheekare. Waryubha akabhajibhya kwa okusambwa mumururo gwa koko, naho okukemera abhantu bhonsego.1:7 Maaha mukitabho kya Obhwambiro 19:1-29.

⁸Kora ego, abhantu bhanú bhatakumwigwa Waryubha bharya, bhahunkeeni kya bhayo. Bhararoota ebhirooto, bhinú bhirakonʼya emibhiri gyabho, kweki bhirabhakora bhaange obhutungi bhwa Waryubha na okutuka ebhibhumbwa bhya obhukuru bhinú bhiringi murwire. ⁹Nawe, kora Mikaeri maraika omukuru, hanú yaaringa arabhuuriranʼya na okuhakaananʼya na Erisambwa1:9 Erisambwa. Maaha eringʼana rinu mu Moonjooro eguru ya Amangʼana Amakongʼu. eguru ya omubhiri gwa Musa, ataasakya okurihaamirirya kwa obhubheehi. Nawe, yaagamba ega, “Omukuru Waryubha omwene akukemere!” ¹⁰Nawe, abhantu bhayo bharatuka amangʼana gogonse ganú bhatagamanyiri. Bharisikibhwa kwa amangʼana ganú bhagamanyiri, na bharagakora kya egintyenyi ginú gitaana obhungʼeeni.

¹¹Bharikirora-ko, kwa okubha bhaagwata enjira ya Kaini, eya okukora obhusarya.1:11a Maaha mukitabho kya Obhwambiro 4:1-16. Bharikirora-ko, kwa okubha bheesohya mubhusarya kya bhunú Bharamu yaakora, kurusumo rwa okunyoora obhuniibhi.1:11b Maaha mukitabho kya Okubhara 22–24, 31:16. Bharikirora-ko, kwa okubha bharasika kwa ekisigo bhaajeema kya ego Koora yaajeema, akasika.1:11c Maaha mukitabho kya Okubhara 16:1-35.¹²Hanú abhantu bhayo, bhararya hamwi na bheenyu muginyangi gyenyu ginú murasanga kwa obhuhanje,1:12 Muginyangi gyenyu ginú murasanga kwa obhuhanje. Eginyangi giyo gyaringa m-miryo ginú Abhakiristu bhaakora kya erikanisa kurusumo rwa okubha na obhumwi, na okuhanjana. Eribhaga rya omuryo guyo oranyoora kora bhaarya ebhyakurya bhya Omukuru. n-kya amatare ga munyanja ganú gatakumaahikana, na garareeta engʼanga. Bhareemanya abheenego, kwa okwiriisya bira eginsoni. Kweki abhantu bhayo, bhataana obhwera kya amasaaru ganú gataana embura, ganú garahumbibhwa na omuyaga. Na bharingi kya emiti ginú gyaharuruka amasya, gitaana emisumo eribhaga rya omugeso, giihirwe gikwiri kimwi. ¹³Bharatamwa okwiribhira kya amabhooka amanene ga munyanja, na amakorwa gaabho ga eginsoni garanyaragana kya erihuro rya amabhooka. Bharingi kya eginjota ginú girayengayenga ginú gitakutura okoorokererya enjira. Waryubha yaabhaseemerya omweya mukisunte kinú kikurirye, naho bhariija okwikara muyo koko.

¹⁴Enoki, omuntu wa orwibhuro rwa muhungati okureka ku Adamu,1:14 Maaha mukitabho kya Obhwambiro 5:21-24. yaaruusya obhurooti eguru ya abhantu bhayo ega, “Maaha, Omukuru Waryubha araaja hamwi na ebhiku bhya bhamaraika bhaaye abharabhu, ¹⁵naho abhuturire ekiina abhantu bhonsego na okujibhya bhonsego bhanú bhatakumwigwa. Aribhajibhya kwa amakorwa gaabho amabhiibhi gonsego, ganú bharakora kwa okwanga okumwigwa weeki, hamwi na amangʼana gonsego amabhiibhi ganú abhakori bha obhusarya bhayo, bharagamba eguru yaaye.” ¹⁶Abhantu bhayo, m-beengʼeheerya na abha okutonda amasoro, bharagwata orunamba rwabho orubhiibhi. Bhareegungya bhukongʼu enu bharagungya abhantu, naho bhanyoore obhwera.

Obhutongeri

¹⁷Nawe, bheenyu abhahanje bhaani, muhiituke amangʼana ganú gaagambwa akare hayo, na abhatumwa1:17 Abhatumwa. Maaha eringʼana rinu mu Moonjooro eguru ya Amangʼana Amakongʼu. bha Omukuru weetu Yeesu Kiristu. ¹⁸Bhaabhakeerya ega, “Eribhaga rya obhuteero bhariibhuka abhantu bha okujeera, bhanú bharibhanga bharagwata orunamba rwabho orubhiibhi rwa okubhahabhya abhandi.” ¹⁹Abhantu bhayo, mbo bharakora mutakwigwana, bhareeganirirya amangʼana ga mukyaro ageenego, bhataana Omutima Omurabhu1:19 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. wa Waryubha.

²⁰Nawe, bheenyu abhahanje bhaani, munage kuimani yeenyu, inú erarwa ku Waryubha, na mubhenga murasabha okuringʼaana na kya ego Omutima Omurabhu arabhoorokererya. ²¹Mwiyangararire okunaga kubhuhanje bhwa Waryubha, enu muraganyirira Omukuru weetu Yeesu Kiristu, abhamaahire ekyabhira naho okubhasohya mubhuhoru bhwa koko. ²²Mwabhirenga abhantu abhandi bhanú bhaana enkubhi, ²³abhandi mubhatuurye kwa okubhasaka okurwa mubhujibhu bhwa omururo gwa koko. Na abhandi mubhamaahirenga ekyabhira, nawe, mwiyangararirenga na okubha ahare na obhubhiibhi bhwabho.

Amasabho ga okugungya

²⁴Waryubha ngʼo yaana obhuturo bhwa okubhaangararira mutabhura, na okubhareeta bheenyu bira amasoro embere ya obhukuru bhwaye, enu murajomerwa bhukongʼu. ²⁵Weeki ngʼo Waryubha omumwemwe, Omutuurya weetu kwa okuhitira ku Yeesu Kiristu Omukuru weetu. Waryubha agungibhwe. Weeki yaana obhukuru, eginguru, na obhutungi, okurwa akare, bhoonwego, na kora koko. Amina.