Yoana

Amangʼana Amajomu ga Yeesu Kiristu

kya ego gaangʼoorwa na

Yoana

Obhukangati

Ekitabho kinu kyangʼoorwa na Yoana. Yoana yaaringa oumwi gati ya abheehigira ekumi na bhabhiri bha Yeesu bharya. Yaangʼoora ekitabho kinu, naho abheere abheekirirya bhonsego, Abhayahudi na bhanú bhataringi Abhayahudi, bhakamwikirirya Yeesu, kwa okubha bhaarora ebhimanyiiriryo bhinú yaaringa arakora. Ataangʼoora amangʼana ga obhuhoru bhwa Yeesu obhwenego, nawe, aragana kora na amangʼana ga ebhimanyiiriryo ebhyaru bhinú Yeesu yaakora, na ameehigiryo ganú yeehigirya. Amangʼana gayo gonsego garoorokya ega, Yeesu ataaringa omuntu ego, nawe, yaaringa Waryubha.

Kubhwambiro bhwa ekitabho kinu Yoana arakomererya ega, Yeesu ngʼo Engʼana ya Waryubha. Kweki aragamba ega, oruku rwaye n-kimwenso kinú kiratuurya abhantu okurwa mubhusarya bhwabho, na kweki ega, Yeesu ngʼo Masiha unú abharooti bha Eriragano rya Akare bhaaroota. Mukiseku kya 13-17 arahairira obhuhanje bhwa Yeesu kubheehigira bhaaye na amangʼana ganú yaabhakeerya, naho abhateremye omutima mugoroobha hanú yaagwatwa. Ekitabho kiramariisirirya kwa okugana kya ego Yeesu yaabhuturirwa ekiina na okubhambwa kumusarabha, na kya ego yaahyuka okurwa mubhaku, na okwibhukira abheehigira bhaaye mara kaaru.

Engʼana yaaja mukyaro okubha omuntu

¹Kubhusimuka hayo, Engʼana yaaringa-ho. Engʼana uyo, yaaringa hamwi na Waryubha, Engʼana uyo, yaaringa Waryubha. ²Okurwa obhusimuka, Engʼana uyo, yaaringa hamwi na Waryubha. ³Ebhintu bhyonsego bhyabhumbwa okuhitira ku Engʼana uyo. Kitariho kora ekintu ekimwi kinú kyabhumbwa bira weeki. ⁴Engʼana uyo, ngʼo obhusimuka bhwa obhuhoru, na obhuhoru bhuyo, mbo bhurareeta endingaasi kubhantu bhonsego. ⁵Endingaasi iyo, erangʼarabha mukisunte, kora ekisunte kitaatura okuihiga.

⁶Yeebhuka omuntu oumwi, unú yaatumwa na Waryubha. Omuntu uyo, yaabhirikirwanga ega, Yoana.1:6 Yoana. Yoana unu yaaringa Yoana Omubhatiiji.⁷Yoana uyo, yaaja okwimiririra endingaasi iyo, naho abhantu bhonsego, bhature okuyiikirirya kwa okuhitira obhwimiririri bhwaye. ⁸Weeki ataaringa endingaasi iyo, nawe, yaaja naho ayiimiririre. ⁹Endingaasi eritinya iyo erangʼarabhira abhantu bhonsego, yaaringa eraaja mukyaro kinu.

¹⁰Uyo ngʼo yaaringa mukyaro munu, kweki ekyaro kyonsego kyabhumbwa okuhitira kuweeki. Nawe, abhantu bha mukyaro bhataamumanya. ¹¹Yaaja kubhantu bhaaye, nawe, bheeki bhataamwikirirya. ¹²Nawe, bhonsego bhanú bhaamuturuungʼana na okumwikirirya, akabhahaana obhuturo bhwa okubha abhaana bha Waryubha. ¹³Bhayo bhataringi abhaana bha Waryubha, kwa okwibhurwa kwa enjira ya abhantu, kasi kwa orunamba rwa omubhiri, kora kwa obhwendi bhwa omuntu, nawe, n-kwa obhwendi bhwa Waryubha.

¹⁴Mbe, Engʼana uyo, akabha omuntu, akeekara gati yeetu. Na bheetu tukarora obhukuru bhwaye, obhukuru bhwa Omwana omumwemwe wa Taata Waryubha. Yaaringa na eriruguto erinene na obhuheene bhonsego.

¹⁵Yoana yaamwimiririra, akagamba kwa eriisi erinene ega, “Uyo ngʼo naaringa ndabhakeerya eguru yaaye ega, ‘Araaja omuntu oumwi enyuma yaani, omukuru okunkira oni, kwa okubha yaaringa-ho oni ntareebhurwa.’”

¹⁶Okurekana na obhukunaani bhwaye, Waryubha atuheeri bheetu bhonsego eriruguto ryaye, kweki aragendererya okutoongerya eriruguto erindi. ¹⁷Okurwa akare, Waryubha yaaruusya amaragiriryo gaaye, okuhitira ku Musa,1:17 Musa. Maaha eringʼana rinu mu Moonjooro eguru ya Amangʼana Amakongʼu. na bhoono aruusirye eriruguto ryaye na obhuheene bhwaye, okuhitira ku Yeesu Kiristu. ¹⁸Atariho omuntu unú yaakamuruuji Waryubha. Nawe, nu-Mwana waaye omumwemwe omwenego, weeki wonse ngʼ-Waryubha, aringi hamwi na Taata Waryubha, uyo ngʼo yaakora tukamumanya Waryubha.

Obhwimiririri bhwa Yoana Omubhatiiji

(Mataayo 3:1-12; Mariko 1:1-8; Ruuka 3:1-18)

¹⁹Bhunu mbo obhwimiririri bhunú Yoana yaaruusya hanú abhatungi bha Abhayahudi bhaatuma abhasyengeri1:19a Abhasyengeri. Maaha eringʼana rinu mu Moonjooro eguru ya Amangʼana Amakongʼu. na Abharaawi1:19b Abharaawi. Abharaawi bhaaringa erikabhira rimwi mukyaro kya Isiraeri, bhaabheeranga abhasyengeri bha Waryubha, mwisyengerero erikuru rya Waryubha. Maaha mukitabho kya Okubhara 3:1-13. okurwa Yerusaremu,1:19c Yerusaremu. Maaha eringʼana rinu mu Moonjooro eguru ya Amangʼana Amakongʼu. bhagye ku Yoana bhamubhuurye ega, “Uuwe niwi?” ²⁰Akabhakyukya bira okubhisa obhuheene ega, “Oni ntaringi Kiristu Omutuurya.”1:20 Kiristu Omutuurya. Ekiyunani kiragamba ega, Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu.²¹Bhakamubhuurya kweki ega, “Bhoono uuwe niwi? Uuwe nuuwe omurooti Eriya?” Yoana akabhakyukya ega, “Oni ntaringi Eriya.” Bhakamubhuurya kweki ega, “Uuwe nuuwe omurooti unú turaganyirira okurwa ku Waryubha?”1:21 Maaha mukitabho kya Obhuhiituki bhwa Amaragiriryo 18:15-22. Yoana akabhakyukya ega, “Ntaringi oni.” ²²Bhakamubhuurya kweki ega, “Bhoono uuwe niwi? Tukeerye, naho tugende tubhakeerye bhanú bhatutumiri. Uuwe oragamba egaki eguru yaaho uuwe omwene?” ²³Yoana akabhakyukya okurekana na amangʼana ganú omurooti Isaaya yaagamba, ega,

“Oni ngʼ-urya ‘omuntu unú aribhanga kukibhara araraarika kwa eriisi erinene ega,

Mwimye enjira inú Omukuru Waryubha arihita!’ 1:23 Maaha mukitabho kya Isaaya 40:3.”

²⁴Gati ya abhantu bhanú bhaaringa bhatumirwe ku Yoana, bhaaringa-mo na Abhafarisaayo.1:24 Abhafarisaayo. M-muganda gwa abhatungi bha edini ya Abhayahudi. Maaha Abhafarisaayo mu Moonjooro eguru ya Amangʼana Amakongʼu.²⁵Bhakamubhuurya ega, “Nyoore uuwe otaringi Kiristu Omutuurya, kora omurooti Eriya, kora omurooti unú turaganyirira okurwa ku Waryubha, kwaki orabhatiija abhantu?” ²⁶Yoana akabhakyukya ega, “Oni ndabhatiija abhantu kwa amanji, nawe, gati yeenyu ariho omuntu unú bheenyu mutamumanyiri. ²⁷Uyo ngʼo araaja enyuma yaani. Ntakwenderwa kora okubha omugaya waaye, wa okusibhura egingoye gya eginkeeto gyaye.”1:27 Ntakwenderwa kora okubha omugaya waaye, wa okusibhura egingoye gya eginkeeto gyaye. Kuginsiku girya, nyoore omugeni arasoha munyumba, omugaya wa insi bhukongʼu yaaringa aramusibhura eginkeeto na okoogya amaguru gaaye.

²⁸Amangʼana gayo, gaakoreka mumugi gunú gurabhirikirwa ega, Bhetania, orubhaara rwa bhuturira-ryubha rwa oruuji rwa Yorodani, ahasi hanú Yoana yaaringa arabhatiija abhantu.

Yeesu m-Mwana wa Eringʼondi wa Waryubha

²⁹Ejo wendeko, Yoana akamurora Yeesu aramuuja-ko. Akabhakeerya abhantu bhanú bhaaringa hayo ega, “Mumaahe, uyo ngʼo Omwana wa Eringʼondi1:29a Omwana wa Eringʼondi. Maaha eringʼana rinu mu Moonjooro eguru ya Amangʼana Amakongʼu. wa Waryubha, unú aragega obhusarya bhwa abhantu bhonsego bha mukyaro munu!1:29b Maaha mukitabho kya Okuhuruka 12:21-28.³⁰Uyo ngʼo naaringa ndabhakeerya eguru yaaye ega, ‘Araaja omuntu oumwi enyuma yaani, omukuru okunkira, kwa okubha yaaringa-ho oni ntareebhurwa.’ ³¹Kora oni ntaaringa mmanyiri ega, weeki niwi, nawe, niijiri okubhatiija abhantu kwa amanji, naho atubhurwe kubhantu bha Isiraeri.” ³²Nho, Yoana akeemiririra ganú yaaringa aruuji, akagamba ega, “Naarora Omutima Omurabhu,1:32 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. areetuuma okurwa murwire kya enguuti, na okwikara eguru yaaye. ³³Nawe, oni ntaaringa mmanyiri ega, weeki niwi, nawe, Waryubha unú yaantuma okubhatiija kwa amanji, ngʼo yaankeerya ega, ‘Omuntu unú orirora, Omutima Omurabhu areetuuma na okwikara eguru yaaye, uyo ngʼo aribhatiija abhantu kwa Omutima Omurabhu.’ ” ³⁴Hayo, Yoana akagamba ega, “Oni nduuji gayo gonsego, na bhoono ndeemiririra ega, uyo ngʼo Omwana wa Waryubha.1:34 Omwana wa Waryubha. Maaha eringʼana rinu mu Moonjooro eguru ya Amangʼana Amakongʼu.”

Yeesu arasora abheehigira bhaaye bha okwamba

³⁵Ejo wendeko, Yoana yaaringa yeemiriiri hayo kweki, hamwi na abhabhiri gati ya abheehigira bhaaye. ³⁶Nho, akamurora Yeesu aragenda haangʼi nabho, akabhakeerya abheehigira bhaaye ega, “Mumaahe, uyo ngʼo Omwana wa Eringʼondi wa Waryubha!” ³⁷Hanú abheehigira bhabhiri bhayo bheegwa ego, bhakamuseeta Yeesu. ³⁸Yeesu akeekyukya, akabharora bharamuseeta. Akabhabhuurya ega, “Muratuna-ki?” Bheeki bhakamukyukya ega, “Ee Rabhi, oreekara-ha?” Ensonga ya eringʼana “Rabhi” niiga, “Omwihigirya”. ³⁹Yeesu akabhakeerya ega, “Muuje muharore.” Nho, bhakagya bhakarora hanú yaaringa areekara. Hanú bhaahika hayo, yaaringa ensa ekumi gya mugoroobha, bhakeekara nawe kwa orusiku ruyo.

⁴⁰Omwihigira oumwi gati ya abheehigira bhabhiri bhanú bheegwa amangʼana ga Yoana, bhakamara bhakamuseeta Yeesu, yaaringa arabhirikirwa Andurea, omumura waabho Simoni Petero enda eimwi. ⁴¹Rumwigo, akagya okumutuna omumura waabho unú yaabhirikirwanga ega, Simoni. Hanú yaamunyoora, akamukeerya ega, “Tumuruuji Masiha!” Ensonga ya eringʼana “Masiha” niiga, “Kiristu Omutuurya.” ⁴²Kimwi Andurea akamuhira Simoni ku Yeesu. Yeesu akamumaahirira Simoni, akamara akamukeerya ega, “Uuwe n-Simoni, omwana wa Yoana. Nawe bhoono, oraabhirikirwenga ega, Kefa.” Eriina riyo, mu Kiyunani, n-Petero, ensonga yaaryo niiga, “Eritare”.

Yeesu arasora abheehigira abhandi bhabhiri

⁴³Ejo wendeko, Yeesu akaamura ega, agye mukyaro kya Gariraaya. Nho, akamurora Firipo, akamukeerya ega, “Njo, unsoorane.” ⁴⁴Firipo yaaringa omuntu wa mumugi gwa Bhetisaida, omugi gunú Andurea na Petero bhonse bhaaringa bhararwira.

⁴⁵Mbe, Firipo akamurora Natanaeri, akamukeerya ega, “Tumuruuji omuntu unú Musa yaangʼoora amangʼana eguru yaaye, mubhitabho bhya amaragiriryo, na uyo ngʼo abharooti bhonse bhaangʼoora amangʼana eguru yaaye. Eriina ryaye arabhirikirwa Yeesu wa Najareeti, omwana wa Yusufu.” ⁴⁶Nawe, Natanaeri akamubhuurya Firipo ega, “Ekintu kyokyonse ekijomu, kiratura okurwa mumugi gwa Najareeti?” Firipo akamukyukya ega, “Njo, orore.”

⁴⁷Hanú Yeesu yaamurora Natanaeri aramuuja-ko, akagamba eguru yaaye ega, “Mumaahe, omuntu uyo m-Mwisiraeri eritinya, ataana obhungʼeeningʼeeni.” ⁴⁸Natanaeri akamubhuurya Yeesu ega, “Ummanyiri egaki?” Yeesu akamukyukya ega, “Kora hanú Firipo yaari atarakubhirikira, oni naari nkuruuji wikeeri hansi mumuti gwa omutini.” ⁴⁹Natanaeri akamukyukya ega, “Rabhi,1:49 Rabhi. Ensonga ya eringʼana rinu niiga, Omwihigirya. Rabhi kyaringa n-kyeo kya omwihigirya wa edini ya Ekiyahudi. uuwe m-Mwana wa Waryubha! Nuuwe Omukama wa Isiraeri!” ⁵⁰Yeesu akamubhuurya ega, “Oreekirirya kwa okubha nkukeererye ega, nkuruuji wikeeri hansi mumuti gwa omutini? Orirora amangʼana agandi amarito okukira ganu!” ⁵¹Kimwi akamukeerya ega, “Ndabhakeerya obhuheene ega, murirora orwire rusiikukiri, na murirora bhamaraika1:51a Bhamaraika. Maaha eringʼana rinu mu Moonjooro eguru ya Amangʼana Amakongʼu. bha Waryubha bharariina na okwituuma kwa Omwana wa Adamu.”1:51b Omwana wa Adamu. Kwa okutumira eriina riyo, Yeesu yaaringa areegamba omwene. Ensonga ya eriina riyo niiga, omuntu unú yaahaanwa obhuturo okurwa ku Waryubha. Maaha mukitabho kya Danyeri 7:13-14, kasi maaha Omwana wa Adamu mu Moonjooro eguru ya Amangʼana Amakongʼu.

Enyangi ya obhwenga mumugi gwa Kana

¹Mbe, hanú gyahita eginsiku ebhiri, yaakoreka enyangi eya obhwenga mumugi gwa Kana, mukyaro kya Gariraaya. Mubhwenga bhuyo, ngʼina waabho Yeesu, yaaringa-mo. ²Yeesu wonse hamwi na abheehigira bhaaye, bhaaringa bharaarikirwe mubhwenga bhuyo. ³Hanú edivai2:3a Edivai. Maaha eringʼana rinu mu Moonjooro eguru ya Amangʼana Amakongʼu. yonsego yaahwa, ngʼina waabho Yeesu akamukeerya Yeesu ega, “Edivai ebhahwereeri.”2:3b Edivai ebhahwereeri. Kuginsiku giyo, yaaringa ni-nsoni bhukongʼu kubheenga okuhwerwa edivai bhwangu ego munyangi.⁴Yeesu akamukyukya ngʼina waabho ega, “Maayi, kwaki orankeerya ego? Eribhaga rya okukora emirimu gyani ritarahika.” ⁵Nho, ngʼina waabho akakeerya abhakori bha emirimu ega, “Ryoryonse rinú araabhakeerye, mukore.”

⁶Mbe, gyaringa-ho eginyungu esansabha gya amanji, ginú gyaringa gikorerwe na amagina. Abhayahudi bhaaringa bharatuura amanji muyo, ga okukorera obhusimuka bhwa okwiraama. Kira enyungu yaaringa ereejuribhwa na amadebhe gataanu kasi gasansabha. ⁷Kimwi Yeesu akabhakeerya abhakori bha emirimu bhayo ega, “Mwijurye amanji muginyungu muyo.” Bhonse bhakagiijurya amanji jabhi. ⁸Akamara akabhakeerya ega, “Bhoono, mutahe amanji mumuhirire omwimiririri wa enyangi.” Bhonse, bhakamuhirira. ⁹Omwimiririri wa enyangi akarabha amanji ganú Yeesu yaaringa ahunjwiri, gabheeri edivai. Weeki ataamanya enú edivai iyo, yaaringa erwiri, nawe, abhakori bha emirimu bhanú bhaaringa bhatahiri amanji muginyungu, bheeki bhaamanya enú edivai erwiri. Nho, omwimiririri wa obhwenga uyo, akamubhirikira omuteti. ¹⁰Akamukeerya ega, “Kira omukori wa enyangi, araamba okubhahaana abhageni edivai enjomu mbere. Hanú oranyoora abhageni bhamariri okunywa na okwiswa, nho, arareeta inú etaringi enjomu. Nawe, uuwe oreeteri edivai enjomu bhukongʼu kubhuteero!”

¹¹Yeesu yaakora ekimanyiiriryo kiyo, mumugi gwa Kana mukyaro kya Gariraaya. Ekimanyiiriryo kiyo kyaringa kya okwamba okoorokya obhukuru bhwaye, na abheehigira bhaaye bhakamwikirirya. ¹²Hanú obhwenga bhwahwa, Yeesu akagya mumugi gwa Kaperinaumu, hamwi na ngʼina waabho, abhake bhaaye, na abheehigira bhaaye. Bhakeekara eyo eginsiku nkego.

Yeesu arakenyia abhakori bha ebhyasarabharwe mwisyengerero rya Waryubha

(Mataayo 21:12-13; Mariko 11:15-17; Ruuka 19:45-46)

¹³Enyangi ya Epasaka2:13 Enyangi ya Epasaka. Ni-nyangi ya Abhaisiraeri eya okuhiituka kya ego Waryubha yaatungurya bhajaaji waabho okurwa mubhugaya, mukyaro kya Misiri. Obhutungurya bhuyo, bhwakoreka kwibhaga rya Musa. Maaha mukitabho kya Okuhuruka 12. Kweki maaha Epasaka mu Moonjooro eguru ya Amangʼana Amakongʼu. ya Abhayahudi yaaringa haangʼi, kwa ego, Yeesu akariina okugya Yerusaremu. ¹⁴Mbe, hanú yaahika, akasoha murubhanja rwa erisyengerero erikuru rya Waryubha.2:14a Erisyengerero erikuru rya Waryubha. Maaha eringʼana rinu mu Moonjooro eguru ya Amangʼana Amakongʼu. Akanyoora abhantu, bharagurirya abhantu egingʼombe, amangʼondi, na eginguuti kurusumo rwa okuruusya ekimwenso,2:14b Ekimwenso. Maaha eringʼana rinu mu Moonjooro eguru ya Amangʼana Amakongʼu. na abhaswenʼya bha egimbirya bhaaringa bheekeeri kugimeja gyabho, bharaswenʼya egimbirya gya okutumira mwisyengerero.2:14c Bharaswenʼya egimbirya gya okutumira mwisyengerero. Etaaringa kira egimbirya gyeenderwanga okutumira mwisyengerero, nawe, ginú gyatumirwanga, ni-gimbirya gya Ekiyahudi egyenego.¹⁵Hanú Yeesu yaarora gayo, akabhasya omujariti gwa orugoye, akakenyia bhonsego bhanú bhaaringa bharagurya murubhanja rwa erisyengerero muyo, hamwi na amangʼondi na egingʼombe. Kweki, akahenura egimeja gya bhanú bhaaringa bharaswenʼya egimbirya, na okunyaraganʼya egimbirya gyabho. ¹⁶Nho, akabhakeerya bhanú bhaaringa bharagurya eginguuti ega, “Muruusye munu ebhintu bhyenyu! Mutakora enyumba ya Taata, okubha omudiira!” ¹⁷Hanú abheehigira bhaaye bheegwa gayo, bhakahiituka amangʼana ganú gaangʼoorwa mu Mangʼoore Amarabhu ega, “Obhuhanje bhwani eguru ya enyumba yaaho bhookeri munsi waani na bhurimmara.”2:17 Maaha mukitabho kya Egijabhuri 69:9.

¹⁸Mbe, hanú abhatungi bha Abhayahudi bhaarora ganú Yeesu akoreri, bhakamubhuurya ega, “Oraakore ekimanyiiriryo-ki okoorokya ega, uuna obhutungi bhwa okukora amangʼana gayo?” ¹⁹Yeesu akabhakyukya ega, “Muhaanyure erisyengerero rinu, na oni ndaarihagaaje kwa eginsiku esatu.” ²⁰Nho, bhakamukeerya ega, “Erisyengerero rinu ryahagaajwa kwa emyaka mirongo ena na esansabha (46)! Uuwe oratura egaki okurihagaaja kwa eginsiku esatu?” ²¹Yeesu ataahairanga eguru ya erisyengerero eryene, nawe, yaaringa arahaira eguru ya omubhiri gwaye. ²²Hanú Yeesu yaahyuka okurwa mubhaku, abheehigira bhaaye bhakahiituka amangʼana ganú yaagamba. Kwa enjira iyo, bhakeekirirya Amangʼoore Amarabhu, na amangʼana ganú Yeesu yaagamba.

Yeesu amanyiri ganú garingi mumitima gya abhantu bhonsego

²³Hanú Yeesu yaaringa Yerusaremu munyangi ya Epasaka, abhantu abhaaru bhakamwikirirya, kwa okubha bhaarora ebhimanyiiriryo bhinú yaaringa arakora. ²⁴Nawe, Yeesu ataabha na eimani nabho, kwa okubha yaaringa abhamanyiri bhonsego, ganú bhareeganirirya mumitima gyabho. ²⁵Ateenda omuntu wowonse amukeerye ganú abhantu bhareeganirirya, kwa okubha yaaringa amanyiri gonsego ganú garingi mumutima gwa kira omuntu.

Nikodemasi aramutaarira Yeesu

¹Yaaringa-ho omutungi oumwi wa Abhayahudi wa omuganda gwa Abhafarisaayo, eriina ryaye yaabhirikirwanga ega, Nikodemasi. ²Orusiku rumwi, obhutiku, akagya ku Yeesu akamukeerya ega, “Rabhi, tumanyiri ega, uuwe m-mwihigirya unú waatumwa na Waryubha, kwa okubha atariho omuntu unú aratura okukora ebhimanyiiriryo bhinú uuwe orakora, nyoore Waryubha ataringi hamwi nawe.” ³Yeesu akamukyukya ega, “Ndakukeerya obhuheene ega, atariho omuntu unú aratura okusoha mubhukama bhwa Waryubha3:3a Mubhukama bhwa Waryubha. Maaha Obhukama bhwa Waryubha mu Moonjooro eguru ya Amangʼana Amakongʼu. nyoore ateebhurwe orwa kabhiri.”3:3b Maaha mukitabho kya Yoana 1:13.⁴Nikodemasi akamubhuurya Yeesu ega, “Omuntu aratura egaki okwibhurwa orwa kabhiri enu agoteri? Bhoono, aratura okuhunjuka munda ya ngʼina waabho yeebhurwe kweki?” ⁵Yeesu akamukyukya ega, “Ndakukeerya obhuheene ega, atariho omuntu unú aratura okusoha mubhukama bhwa Waryubha, nyoore ateebhurwe kwa amanji na kwa Omutima Omurabhu. ⁶Omuntu areebhurwa na abheebhuri bhaaye kwa enjira ya omubhiri, nawe, kwa omutima, areebhurwa na Omutima Omurabhu. ⁷Otaruguura kwa okubha nkukeererye ega, ‘Oreenderwa wibhurwe orwa kabhiri.’ ⁸Omuyaga gurahuuta okubhata enú gureenda. Omuntu areegwa, nawe, atakumanya ahasi enú gurarwa na enú guragya. Niigo eringi kumuntu wowonse unú yeebhurwa na Omutima Omurabhu wa Waryubha.” ⁹Nikodemasi akamubhuurya Yeesu ega, “Bhoono, omuntu aratura egaki okwibhurwa na Omutima Omurabhu wa Waryubha?” ¹⁰Yeesu akamukyukya ega, “Uuwe m-mwihigirya unú orasuukwa bhukongʼu mukyaro kya Isiraeri, na uuwe otamanyiri amangʼana gayo? ¹¹Ndabhakeerya obhuheene ega, bheetu turagamba ganú tumanyiri, na tureemiririra ganú twarora. Nawe, bheenyu mutakwikirirya obhwimiririri bhwetu. ¹²Mbakeererye eguru ya amangʼana ga mukyaro hanu, nawe, bheenyu mutakunyikirirya. Bhoono muratura egaki okunyikirirya nyoore ndaabhakeerye eguru ya amangʼana ga murwire? ¹³Atariho omuntu wowonse unú yaakagiiri murwire. Nawe, Omwana wa Adamu, ngʼo yaaja okurwa murwire.

¹⁴“Hanú Abhaisiraeri bhaaringa kukibhara, Musa yaakora ekisusano kya enjoka ya eshabha na okukiriinʼya kumuti.3:14 Maaha mukitabho kya Okubhara 21:4-9. Egoego Omwana wa Adamu areenderwa ariinibhwe, ¹⁵naho kira omuntu unú aramwikirirya abhe na obhuhoru bhwa koko.”

¹⁶Waryubha yaahanja bhukongʼu abhantu bhonsego bha mukyaro. Kiyo nkyo kyakora akatuma Omwana waaye omumwemwe yaaje mukyaro, naho, kira omuntu unú aramwikirirya atabhura, nawe, abhe na obhuhoru bhwa koko. ¹⁷Waryubha ataamutuma Omwana waaye mukyaro, naho abhuturire ekiina abhantu, nawe, abhatuurye okuhitira kuweeki. ¹⁸Waryubha atakubhuturira ekiina omuntu unú aramwikirirya Omwana waaye. Nawe, omuntu unú atakumwikirirya, amariri okubhuturirwa ekiina, kwa okubha ataramwikirirya Omwana waaye omumwemwe. ¹⁹Okubhutura ekiina kuringi ega, endingaasi yaaja mukyaro munu,3:19 Maaha mukitabho kya Yoana 1:4-5. nawe, abhantu bhakahanja ekisunte okukira endingaasi, kwa okubha amakorwa gaabho m-mabhiibhi. ²⁰Abhantu bhonsego bhanú bharakora amakorwa amabhiibhi, bheeki bharaiibhihirirwa endingaasi. Bhatakwenda okuuja mundingaasi, naho amakorwa gaabho amabhiibhi gatariija okumanyikana. ²¹Nawe, abhantu bhonsego bhanú bharakora amakorwa ga heene, bheeki bharatuna okubha mundingaasi, naho emanyikane ega, ngʼ-Waryubha unú arabhahaana obhuturo bhwa okugakora.

Yoana Omubhatiiji areemiririra Yeesu

²²Mbe, hanú gayo gaahwa, Yeesu na abheehigira bhaaye bhakarwa mumugi gwa Yerusaremu bhakagya mukyaro kya Yudea. Akeekara eyo kwa eribhaga nyabhurebhe, akabhanga arabhatiija abhantu. ²³Yoana wonse yaaringa arabhatiija abhantu ahasi hanú haabhirikirwanga ega, Ainoni, haangʼi na ekijiji kya Saremu. Eyo ngʼyo gaaringa-yo amanji amaaru, na abhantu bhakagya ku Yoana, naho abhabhatiije. ²⁴Kwibhaga riyo, Yoana yaaringa ataragwatwa na okutuurwa mwigereja.

²⁵Mbe orusiku rumwi, abheehigira bha Yoana bhakaamba okuhakaananʼya na Omuyahudi oumwi eguru ya egimiira gya okwiraama. ²⁶Nho, abheehigira bhakagya ku Yoana, bhakamukeerya ega, “Rabhi, orahiituka omuntu unú waaringa nawe ngʼambu ya oruuji rwa Yorodani, na uuwe weemiririra amangʼana gaaye. Bhoono weeki wonse arabhatiija, na abhantu bhonsego bharamugya-ko!” ²⁷Yoana akabhakyukya ega, “Omuntu atakutura okunyoora ekintu kyokyonse, nyoore Waryubha ataramuhaana. ²⁸Bheenyu m-beemiririri bhaani, kuganú naagamba ega, ‘Oni ntaringi Kiristu Omutuurya, nawe, Waryubha yaantuma, naho mmukangatire Kiristu Omutuurya.’ ²⁹Omwenga ngʼ-wa omuteti. Nawe, omusaani wa omuteti, unú areemirira haangʼi na omuteti, na okwitegeerera kya ego aragamba, arajomerwa bhukongʼu hanú areegwa eriisi rya omuteti. Kwa ego, kuyo nko okujomerwa kwani, kunú kukuneeni. ³⁰Weeki areenderwa abhe omukuru okukira oni, nawe, oni mbe omuke bhukongʼu.”

Amangʼana ga unú arwiri murwire

³¹Unú arwiri eguru murwire, yaana obhutungi okukira ebhintu bhyonsego bhinú bhiringi mukyaro. Wowonse unú ararwa mukyaro aragamba amangʼana ga mukyaro munu. Nawe, unú arwiri murwire, yaana obhutungi okukira ebhintu bhyonsego. ³²Weeki areemiririra ganú yaarora na okwigwa, nawe, atariho omuntu wowonse unú areekirirya amangʼana gaaye. ³³Omuntu wowonse unú areekirirya obhwimiririri bhwaye, areemiririra ega, Waryubha ngʼ-wa obhuheene, ³⁴kwa okubha Waryubha yaamutuma Yeesu, naho agambe amangʼana gaaye. Waryubha amuheeri Omutima Omurabhu bira endengo. ³⁵Taata Waryubha amuhanjiri Omwana waaye, kweki amuheeri obhutungi eguru ya ebhintu bhyonsego. ³⁶Omuntu wowonse unú aramwikirirya Omwana wa Waryubha, uyo yaana obhuhoru bhwa koko. Nawe, omuntu wowonse unú aramwanga, uyo ataana obhuhoru bhwa koko, kwa okubha enkoro ya Waryubha eragendererya okubha eguru yaaye.

Yeesu arahaira na omukari Omusamaria

¹Mbe, Yeesu akeegwa ega, Abhafarisaayo bhakeeriibhwe ega, arabhatiija na okunyoora abheehigira abhaaru okukira Yoana. ²Nawe, obhuheene niiga, Yeesu omwene ataabhatiijanga, nawe, abheehigira bhaaye mbo bhaaringa bharabhatiija. ³Kwa ego, akeemuka okurwa mukyaro kya Yudea hayo, hamwi na abheehigira bhaaye, akahunjuka mukyaro kya Gariraaya. ⁴Mbe, bhoono yaaringa ereenderwa ega, ahite mukyaro kya Samaria. ⁵Mbe, bhakahika mumugi gwa Samaria gunú gwabhirikirwanga ega, Sikaari. Omugi guyo, gwaringa haangʼi na omugunda gunú Yakobho yaamuhaana engabho omwana waaye Yusufu.4:5 Maaha mukitabho kya Obhwambiro 48:21-22.⁶Hayo nho, kyaringa-ho ekisima kya Yakobho. Mbe, Yeesu akeekara embarika wa ekisima kiyo, naho amuunye, kwa okubha yaaringa aroseri na orugendo. Yaaringa muna ensa esansabha gya omubhasu.

⁷Kimwi, omukari oumwi Omusamaria akaaja okutaha amanji mukisima hayo. Yeesu akamukeerya ega, “Maayi, ngʼaana amanji nnywe.” ⁸Eribhaga riyo, abheehigira bhaaye bhaaringa bhagiiri mumugi okugura ebhyakurya. ⁹Mbe, omukari uyo, akamukyukya ega, “Uuwe m-Muyahudi, na oni m-mukari Omusamaria. Kwaki oransabha nkuhaane amanji ga okunywa?” Yaagamba ego, kwa okubha Abhayahudi bhataasanganga na Abhasamaria. ¹⁰Yeesu akamukyukya ega, “Nyoore okaamanyiri omutuho gwa Waryubha, na ega, niwi arakusabha amanji, okaamusabhiri, na wonse akaaturiri okukuhaana amanji ga obhuhoru.” ¹¹Omukari uyo akamukyukya Yeesu ega, “Omukuru, uuwe otaana kora ekintu kya okutahaira amanji, na ekisima kinu n-kitambi. Bhoono nunyoora-ha amanji ga obhuhoru gayo? ¹²Jaaji weetu Yakobho omwene yaatuhaana ekisima kinu, wonse yaaringa aranywa amanji gaakyo hamwi na abhaana bhaaye na egintugo gyaye. Bhoono mbe, oreerora ega, uuwe m-mukuru okumukira weeki?” ¹³Nho, Yeesu akamukyukya ega, “Omuntu wowonse unú aranywa amanji ganú gararwa mukisima kinu, ariigwa enyonta kweki. ¹⁴Nawe, omuntu unú arinywa amanji ganú oni ndimuhaana, atariigwa enyonta koko. Amanji ganú ndimuhaana, garibha muna ekisekaani kya amanji munsi waaye, na garibha gararuusya obhuhoru bhwa koko.”4:14 Maaha mukitabho kya Isaaya 58:11.¹⁵Nho, omukari uyo akamukeerya Yeesu ega, “Omukuru, ngʼaana amanji gayo, naho nteegwa enyonta kweki, na ntabhanga ndaaja okutaha amanji hanu.” ¹⁶Yeesu akamukyukya ega, “Genda obhirikire omusaaja waaho, uuje nawe hanu.” ¹⁷Omukari uyo, akamukyukya Yeesu ega, “Oni ntaana omusaaja.” Yeesu akamukeerya ega, “Ogambiri obhuheene ega, otaana omusaaja, ¹⁸kwa okubha waamara okubha na abhasaaja bhataanu, na omusaaja unú oreekara nawe bhoonwego, ataringi omusaaja waaho. Ogambiri obhuheene.” ¹⁹Omukari uyo, akamukyukya ega, “Omukuru, ndarora bhoono uuwe m-murooti. ²⁰Bhajaaji weetu bhaaringa bharamusyengera Waryubha munkuku inu, nawe, bheenyu Abhayahudi muragamba ega, ahasi ha okumusyengera Waryubha n-Yerusaremu.”4:20 Maaha mubhitabho bhya Obhuhiituki bhwa Amaragiriryo 11:29; 2 Amangʼana ga Eribhaga 6:6.²¹Yeesu akamukyukya ega, “Maayi, unyikirirye, eribhaga ririija rinú abhantu bhatarimusyengera Taata Waryubha munkuku inu, kasi Yerusaremu erya. ²²Bheenyu Abhasamaria murasyengera kinú mutamanyiri. Nawe, bheetu Abhayahudi turasyengera kinú tumanyiri, kwa okubha Waryubha arituurya abhantu kwa okuhitira ku Bhayahudi.4:22 Maaha mukitabho kya Obhwambiro 12:3.²³Eribhaga riraaja, kweki rimariri okuhika, rinú abhantu bhanú bharamusyengera Taata Waryubha kwa obhuheene, bharibha bharamusyengera kwa Omutima na kwa obhuheene. Taata Waryubha aratuna abhantu bhanú bharamusyengera kwa enjira iyo. ²⁴Waryubha m-Mutima. Abhantu bhanú bharamusyengera, bhareenderwa bhabhe bharamusyengera kwa Omutima na kwa obhuheene.” ²⁵Omukari uyo, akamukeerya Yeesu ega, “Mmanyiri ega, Masiha araaja, unú arabhirikirwa Kiristu Omutuurya. Kweki mmanyiri ega, hanú ariija, aritukeerya amangʼana gonsego.” ²⁶Kimwi, Yeesu akamukyukya ega, “Oni unú ndahaira na uuwe, nooni Masiha.”

²⁷Mbe, eribhaga riyo, abheehigira bhaaye bhakahunjuka. Bhakaruguura bhukongʼu, kwa okubha Yeesu yaaringa arahaira na omukari.4:27 Bhakaruguura bhukongʼu, kwa okubha Yeesu yaaringa arahaira na omukari. Abheehigirya bha Abhayahudi bhataahairanga na abhakari eribhaga bharingi abheenego, ekinene na abhakari bhanú bhataringi Abhayahudi. Nawe, atariho kora oumwi unú yaabhuurya Yeesu ega, “Oreenda-ki kumwene?” kasi ega, “Kwaki orahaira nawe?”

²⁸Mbe, omukari uyo akatiga ensengo yaaye ya amanji hayo, akagya mumugi. Hanú yaahika, akakeerya abhantu ega, ²⁹“Tugende, murore omuntu unú yaankeererye amangʼana gonsego ganú naamara okugakora! Mbe, eratura okubha ega, uyo ngʼo Kiristu Omutuurya?” ³⁰Hanú abhantu bheegwa gayo, bhakarwa mumugi muyo, bhakagya ku Yeesu.

³¹Hanú abhantu bhayo bhaaringa bhatarahika ku Yeesu, abheehigira bhaaye bhakamusabha ega, “Rabhi, nuurye ebhyakurya.” ³²Nawe, akabhakyukya ega, “Oni niina ebhyakurya bhinú bheenyu mutamanyiri.” ³³Nho, abheehigira bhaaye bhakabhuuranʼya ega, “Mbe, kuuna omuntu unú amureeteeri ebhyakurya?” ³⁴Yeesu akabhakyukya ega, “Ebhyakurya bhyani, n-kukora ganú areenda unú yaantuma, na okukunaanʼya emirimu gyaye. ³⁵Bheenyu mwanara okugamba ega, ‘Gitamiri emyeri ena ego okuhika omugeso.’ Nawe, oni ndabhakeerya ega, mumaahe emigunda kya ego giringi, omugeso gumariri okukongʼa, gureenderwa gugeswe. ³⁶Omugesi aranyoora amariho gaaye, wonse arakumanʼya omugeso kurusumo rwa obhuhoru bhwa koko. Kwa ego, omuhambi na omugesi, bhonsego bharanyoora obhujomerwa hamwi. ³⁷Bhuriho obhugambi bhunú bhuragamba obhuheene ega, ‘Omuntu oumwi arahamba, na oundi aragesa.’ ³⁸Oni naabhatuma bheenyu okugesa bhinú mutaahamba. Abhantu abhandi bhaakora emirimu emikongʼu, na bheenyu munyooreri obhwera bhwa emirimu gyabho.”

³⁹Mbe, Abhasamaria abhaaru bha mumugi guyo, bhakamwikirirya Yeesu, kwa okubha bheegwa obhwimiririri bhwa omukari uyo ega, “Omuntu uyo yaankeererye amangʼana gonsego ganú naamara okugakora.” ⁴⁰Hanú Abhasamaria bhaahika ku Yeesu, bhakamwisasaama yeekare hamwi nabho. Nho, akeekara mumugi guyo kwa eginsiku ebhiri. ⁴¹Abhantu abhaaru bhukongʼu bhakamwikirirya Yeesu, okurekana na amangʼana ganú yaaringa aragamba. ⁴²Bhakamukeerya omukari uyo ega, “Obhwa mbere tumwikiriirye omuntu unu, kwa ekisigo kya amangʼana ganú otukeererye uuwe. Nawe bhoono, turamwikirirya kwa okubha twigwiri bheetu abheene ganú aragamba, na tumanyiri ega, heene unu ngʼo Omutuurya wa ekyaro.”

Yeesu arahwenʼya omwana wa omutungi

(Mataayo 8:5-13; Ruuka 7:1-10)

⁴³Hanú gyahita eginsiku ebhiri, Yeesu na abheehigira bhaaye bhakarwa eyo, bhakagendererya na orugendo rwa okugya mukyaro kya Gariraaya. ⁴⁴Yeesu yaaringa agambiri ega, “Omurooti atakusuukwa na abhantu bha mumugi gwa owaabho.” ⁴⁵Mbe, hanú yaahika Gariraaya eyo, abhantu bhakamugenihya, kwa okubha, bhonse bhaaringa bharuuji gonsego ganú Yeesu yaakora munyangi ya Epasaka, Yerusaremu eyo.

⁴⁶Yeesu akagya kweki mumugi gwa Kana ya Gariraaya, hanú yaaringa ahunjwiri amanji okubha edivai. Mbe, yaaringa-ho omukuru oumwi wa ekikama okurwa mumugi gwa Kaperinaumu. Omukuru uyo, yaaringa na omwana wa ekimura omurweri. ⁴⁷Omukuru uyo akeegwa ega, Yeesu ahindiri okurwa Yudea, na aringi Gariraaya. Akagya ku Yeesu na akamusabha ega, yaaje Kaperinaumu, amuhwenʼye omumura waaye, kwa okubha yaaringa omurweri omusingu. ⁴⁸Yeesu akamukyukya ega, “Bheenyu, nyoore mutaarore ebhimanyiiriryo na ebhiruguuryo, muteekirirye kora ahake!” ⁴⁹Omukuru uyo, akamukyukya ega, “Omukuru, ndakwisasaama, tugende omuhwenʼye omumura waani, akyari okukwa.” ⁵⁰Nawe, Yeesu akamukyukya ega, “Genda, omumura waaho, ahweneri.” Omukuru uyo, akeekirirya amangʼana ganú Yeesu amukeererye, kimwi akeemuka okugya iika.

⁵¹Ejo wendeko, hanú yaaringa akyari kunjira, akasikana na abhakori bha emirimu bhaaye, bhakamukeerya ega, omumura waaye ahweneri. ⁵²Nho, akabhabhuurya ensa inú yaamba okukankamuka. Bhakamukyukya ega, “Ehooma yamwamukiri okwambira ejo, ensa muhungati gya omubhasu.” ⁵³Mbe, esewaabho akamanya ega, yaahweneri kwibhaga riryarirya Yeesu yaamukeerya ega, “Omumura waaho ahweneri.” Hayo, omukuru uyo, hamwi na abhantu bhonsego bha iika owaaye, bhakamwikirirya Yeesu. ⁵⁴Kinu kyaringa ekimanyiiriryo kya kabhiri kinú Yeesu yaakora mukyaro kya Gariraaya, hanú yaarwa mukyaro kya Yudea.4:54 Maaha mukitabho kya Yoana 2:11.

Yeesu arahwenʼya omubheeru

¹Mbe, hanú gayo gaahwa, Yeesu na abheehigira bhaaye bhakagya mumugi gwa Yerusaremu, kunyangi nyabhurebhe eya Abhayahudi. ²Yerusaremu hayo, kyaringa-ho ekiita ekinene kinú kyabhirikirwanga ega, “Ekiita kya Amangʼondi.”5:2 Yerusaremu hayo, kyaringa-ho ekiita ekinene kinú kyabhirikirwanga ega, “Ekiita kya Amangʼondi.” Omugi gwa Yerusaremu gwaringa gwinaarirwe na orubhago rwa amagina, rweenaara omugi gonsego. Orubhago ruyo rwaringa na ebhiita ebhyaru. Kira ekiita kyaringa na eriina ryaye. Ekiita ekimwi kyabhirikirwanga “Ekiita kya Amangʼondi” kwa okubha kyaringa haangʼi na omudiira gunú bhaaringa bharagurirya-mo amangʼondi na egintugo egindi. Maaha mukitabho kya Nehemia 3:1, 12:39. Haangʼi na ekiita kiyo, haaringa na erirambo rinú mu Kiebhurania ryabhirikirwanga ega, Bhetejata. Erirambo riyo, ryaringa riinaarirwe na amabhuru gataanu ganú gaaringa na egintimu. ³Mumabhuru muyo, bhaaringa bhararaara-mo abharweri abhaaru, abhahoku, abhabheeru, na bhanú bhaana omujimu. [Bhaaganyiriranga amanji gabhurungurwe, ⁴kwa okubha maraika wa Waryubha, yaajanga okubhurungura amanji mwirambo muyo. Omurweri unú yaakangatanga okusoha mumanji muyo, yaahwenanga obhurweri bhunú yaaringa nabho.]5:3-4 Amangʼana mumabhano ganu […] gataringi mumangʼoore agandi ga akare aga Ekiyunani.⁵Mbe, gati ya abharweri bhayo, yaaringa-mo omusaaja oumwi unú yaaringa omurweri kwa eribhaga rya emyaka mirongo esatu na munaane (38). ⁶Kimwi, Yeesu akamurora areeri hayo. Akamanya ega, omuntu uyo, yaarwara kwa eribhaga eritambi, akamubhuurya ega, “Oreenda okuhwena?” ⁷Wonse akamukyukya ega, “Omukuru, eribhaga amanji gaabhurungurwanga, ntaaringa na omuntu wa okunsohya mwirambo. Kira hanú ndasakya okusoha, omuntu oundi arankangatira okusoha-mo.” ⁸Kimwi, Yeesu akamukeerya ega, “Imirira, ogege ekirago kyaho, ogende.” ⁹Hayohayo, omuntu uyo akahwena, akagega ekirago kyaye akeemuka.

Nawe, eringʼana rinu ryakoreka orusiku rwa Esabhato. ¹⁰Kwa ego, abhatungi bha Abhayahudi bhakamukeerya omuntu unú yaahwenibhwa ega, “Reero n-dusiku rwa Esabhato.5:10 Esabhato. Rwaringa n-dusiku rwa okumuunya na okumusyengera Waryubha. Eteekiriribhwa okukora emirimu gyogyonse. Maaha mubhitabho bhya Okuhuruka 20:8-11, 34:21; Obhuhiituki bhwa Amaragiriryo 5:12-15, 23:25, kasi maaha Esabhato mu Moonjooro eguru ya Amangʼana Amakongʼu. Amaragiriryo geetu gatakukwikiririrya okugega ekirago.” ¹¹Nawe, akabhakyukya ega, “Omuntu unú yaanhwenerye, ngʼo yaankeererye ega, ‘Gega ekirago kyaho, ogende.’” ¹²Abhatungi bhayo, bhakamubhuurya ega, “Niwi unú akukeererye ega, ‘Gega ekirago kyaho, ogende’?” ¹³Nawe, ataamumanya unú amuhwenerye, kwa okubha Yeesu yaaringa amariri okurwa hayo, na abhantu bhaaringa abhaaru bhukongʼu.

¹⁴Mbe, hanú gayo gaahwa, Yeesu akamunyoora omuntu uyo, murubhanja rwa erisyengerero erikuru, akamukeerya ega, “Itegeerera, bhoono ohweneri. Otakora kweki obhusarya, ritariija okukunyoora eringʼana eribhiibhi bhukongʼu.” ¹⁵Rumwigo, omuntu uyo akagya kubhatungi bha Abhayahudi, akabhakeerya ega, Yeesu ngʼo yaamuhwenʼya. ¹⁶Kimwi, abhatungi bha Abhayahudi bhakaamba okumunyankya Yeesu, kwa okubha yaaringa arahwenʼya abhantu kora orusiku rwa Esabhato. ¹⁷Nawe, Yeesu akabhakeerya ega, “Taata arakora emirimu eginsiku gyonsego, na oni ndakora egoego.” ¹⁸Mbe, okurekana na amangʼana gayo, abhatungi bha Abhayahudi bhakagendererya okutuna enjira ya okumwita Yeesu. Etaringi kwa okusarya orusiku rwa Esabhato okwenego, nawe, na kwa okubha Yeesu yaaringa aragamba ega, Waryubha ni-Sewaabho. Kwa okugamba ego, yaaringa areekorya ega, aringi kya Waryubha.5:18 Maaha mukitabho kya Abhafiripi 2:6.

Obhutungi bhwa Omwana wa Waryubha

¹⁹Yeesu akakeerya abhatungi bhayo ega, “Ndabhakeerya obhuheene ega, Omwana wa Waryubha atakutura okukora ryoryonse kwa obhuturo bhwaye. Arakora ganú ararora Esewaabho arakora. Gonsego ganú Esewaabho arakora, ngo na Omwana wonse arakora. ²⁰Mbe, kwa okubha Taata amuhanjiri Omwana waaye, kiyo nkyo kirakora aramoorokya emirimu gyonsego ginú arakora. Kora na emirimu eminene okukira giyo, arimoorokya, na bheenyu muriruguura bhukongʼu. ²¹Kya ego Taata arahyukya abhaku na okubhahaana obhuhoru, egoego Omwana wonse arabhahaana obhuhoru bhwa koko, abhantu bhanú areenda okubhahaana. ²²Taata atakubhuturira ekiina omuntu wowonse, nawe, amuheeri Omwana waaye obhutungi bhonsego bhwa okubhuturira ekiina abhantu. ²³Yaakora ego, naho abhantu bhonsego bhamusuuke Omwana kya ego bharamusuuka Esewaabho. Omuntu wowonse unú atakumusuuka Omwana, uyo atakumusuuka Esewaabho unú yaamutuma. ²⁴Ndabhakeerya obhuheene ega, omuntu wowonse unú areegwa amangʼana gaani na okumwikirirya Waryubha unú yaantuma, uyo yaana obhuhoru bhwa koko. Omuntu uyo ataribhuturirwa ekiina, nawe, yaamara okuhita okurwa muruku na okusoha mubhuhoru. ²⁵Ndabhakeerya obhuheene ega, eribhaga riraaja, bhoono eribhaga riyo rihikiri, rinú abhaku bhariigwa eriisi rya Omwana wa Waryubha. Na bhanú bhaririigwa, bharibha na obhuhoru. ²⁶Kya ego Taata nu-bhusimuka bhwa obhuhoru bhwa koko, egoego amuheeri Omwana waaye wonse, okubha obhusimuka bhwa obhuhoru bhuyo. ²⁷Kweki, amuheeri Omwana waaye obhutungi bhwa okubhuturira ekiina abhantu, kwa okubha weeki ngʼo Omwana wa Adamu. ²⁸Mutaruguura amangʼana gayo! Ririija eribhaga rinú abhaku bhonsego bhariigwa eriisi rya Omwana uyo, ²⁹bhonse bharihyuka na okurwa mugimbihira gyabho. Abhantu bhanú bhaaringa bharakora amajomu, bharihaanwa obhuhoru bhwa koko, nawe, bhanú bhaaringa bharakora amabhiibhi, bharibhuturirwa ekiina.

³⁰“Kitariho ekintu kyokyonse kinú ndatura okukora kwa obhutungi bhwani omwene. Ndabhuturira ekiina abhantu okurekana na kya ego Taata arankeerya. Obhubhuturi bhwani bhwa ekiina m-bwa heene, kwa okubha ntakukora kya ego oni omwene ndeenda, nawe, ndakora kya ego Taata unú yaantuma areenda. ³¹Nyoore ndeeyimiririre oni omwene, obhwimiririri bhwani bhutakubha bhwa obhuheene. ³²Nawe, ariho oundi unú areemiririra obhwimiririri bhwani kubheenyu, uyo ngʼ-Waryubha. Na oni mmanyiri ega, obhwimiririri bhwaye m-bwa obhuheene. ³³Bheenyu mwatuma abhachaama ku Yoana Omubhatiiji, wonse akeemiririra obhuheene eguru yaani. ³⁴Oni ntakwisigira obhwimiririri bhwa abhantu, nawe, ndabhakeerya gonsego gayo, naho muture okutuuribhwa. ³⁵Yoana Omubhatiiji yaaringa kya ekorobhoi inú erooka na okumurika mukisunte, na bheenyu mukajomererwa endingaasi iyo kwa eribhaga ekego. ³⁶Nawe, oni niina obhwimiririri obhunene okukira obhwa Yoana bhurya. Giyo ngyo emirimu ginú Taata yaangʼaana okukunaanʼya. Na emirimu giyo ngyo giroorokya ega, Taata ngʼo yaantuma. ³⁷Taata unú yaantuma, weeki omwene yanyimiririiri kubheenyu. Bheenyu mutaakeegwiri eriisi ryaye, kora mutaakamuruuji ekisusa kyaye kya ego kiringi. ³⁸Amangʼana gaaye, mutaanago mumitima gyenyu, kwa okubha mutakunyikirirya oni unú naatumwa kubheenyu.

³⁹“Murageekomya Amangʼoore Amarabhu, kwa okubha murakanya ega, muratura okunyoora muyo obhuhoru bhwa koko. Mbe bhoono, Amangʼoore gayo ngo garanyimiririra oni! ⁴⁰Kweki, muraanga okuuja kuoni, naho munyoore obhuhoru bhwa koko. ⁴¹Oni ntakwisigira eginkuma okurwa kubhantu. ⁴²Nawe, mmanyiri kya ego bheenyu muringi, mutaana obhuhanje bhwa Waryubha mumitima gyenyu. ⁴³Oni niijiri kwa obhutungi bhwa Taata, nawe, bheenyu muraanga okunturuungʼana. Nawe, hanú araaje omuntu oundi kwa obhutungi bhwaye omwene, muraamuturuungʼane. ⁴⁴Bheenyu muhanjiri okugungibhwa na abharikyenyu, nawe, mutakutuna eginkuma ginú girarwa ku Waryubha omumwemwe. Bhoono, muratura egaki okunyikirirya oni? ⁴⁵Muteeganirirya ega, oni ndibhajongera ku Taata. Omujongeri weenyu m-Musa, kwa okubha uyo ngʼo mureesiga. ⁴⁶Nyoore heene mukeekiriirye amangʼana ga Musa, mbe oni wonse mukaanyikiriirye, kwa okubha Musa yaangʼoora amangʼana eguru yaani. ⁴⁷Nawe, nyoore mutakwikirirya amangʼana ganú Musa yaangʼoora, muratura egaki okwikirirya amangʼana gaani?”

Yeesu arariisya abhantu okwambuka ebhiku bhitaanu

(Mataayo 14:13-21; Mariko 6:30-44; Ruuka 9:10-17)

¹Mbe, hanú gayo gaahwa, Yeesu akaambuka enyanja ya Gariraaya, inú eriina erindi yaabhirikirwanga ega, enyanja ya Tibheria. ²Omuganda omunene gwa abhantu bhaaringa bharamusoorana, kwa okubha bhaaringa bhararora ebhimanyiiriryo bhinú yaaringa arakora kubharweri. ³Nho, Yeesu akariina munkuku nyabhurebhe na abheehigira bhaaye, akeekara eyo hamwi nabho. ⁴Eribhaga riyo, enyangi ya Abhayahudi, eya Epasaka yaaringa haangʼi.

⁵Yeesu akarekera ameeso, akarora omuganda omunene gwa abhantu guramuuja-ko. Kimwi, akabhuurya Firipo ega, “Ntugura-ha emikaate gya okwisa abhantu bhanu bhonsego?” ⁶Yeesu yaamubhuurya Firipo ego, naho okumusakya, kwa okubha omwene yaaringa amanyiri kinú akaakoreri. ⁷Firipo akamukyukya ega, “Kora nyoore tukaaguriri emikaate emike gya egidinari magana gabhiri,6:7 Egidinari magana gabhiri. Egimbirya giyo gyaringa m-mariho ga omuntu oumwi kwa emyeri munaane. Maaha Edinari mu Moonjooro eguru ya Amangʼana Amakongʼu. naho kira omuntu agabhirwe kabhaara kakekake, gitakeesiri.” ⁸Nho, Andurea, omwihigira oundi wa Yeesu, unú yaaringa omumura waabho Simoni Petero, akamukeerya Yeesu ega, ⁹“Aringi hanu omumura oumwi, unú yaana emikaate etaanu gya egishayiri na eginswi ebhiri. Nawe bhoono, ebhyakurya bhinu mbitura okwisa omuganda gunu gonsego?” ¹⁰Mbe, Yeesu akabharagirirya abheehigira bhaaye ega, “Mubhakeerye abhantu bheekare hansi.” Ahasi hayo, haaringa na obhunyanki obhwaru. Nho abhantu bhonsego bhakeekara hansi. Gati yaabho, bhaaringa-mo abhasaaja ebhiku ebhitaanu. ¹¹Kimwi, Yeesu akagega emikaate etaanu giyo, akamukumya Waryubha, akagabhira abhantu bhonsego bhanú bhaaringa bheekeeri hayo. Akakora egoego na eginswi ebhiri girya gyonse, akabhagabhira. Abhantu bhonsego bhakarya kya ego bheendanga.

¹²Hanú bheeguta, Yeesu akakeerya abheehigira bhaaye ega, “Mukumanʼye amasaagyo gonsego, naho gataaja okusarika.” ¹³Mbe, bhakakumanʼya amasaagyo gonsego, bhakeejurya ebhikapo ekumi na bhibhiri bhya amasaagyo ga emikaate gya egishayiri.

¹⁴Hanú abhantu bhayo bhaarora ekimanyiiriryo kinú Yeesu akoreri, bhakagamba ega, “M-maheene omuntu unu ngʼo omurooti wa Waryubha, unú twaganyiriranga yaaje mukyaro kinu.”6:14 Maaha mukitabho kya Obhuhiituki bhwa Amaragiriryo 18:15-19.¹⁵Kimwi Yeesu akamanya ega, abhantu bhayo bheendanga okumubhandirirya kwa eginguru, naho bhamukore okubha omukama waabho. Nawe, Yeesu akeemuka hayo, akagya kweki munkuku omwenego.

Yeesu aragenda eguru ya amanji

(Mataayo 14:22-33; Mariko 6:45-52)

¹⁶Hanú yaahika mugoroobha, abheehigira bha Yeesu bhakahiringita okugya kunyanja ya Gariraaya. ¹⁷Bhakasoha mubhwato, naho bhaambuke enyanja okugya mumugi gwa Kaperinaumu. Eribhaga riyo, ekisunte kyaringa kyambiri okusoha, nawe, Yeesu yaaringa ataraaja.

¹⁸Mbe, enyanja ekasarika, kwa okubha omuyaga omuhaari gwaringa gurahuuta. ¹⁹Hanú abheehigira bha Yeesu bhaahika muna egikirometa etaanu kasi esansabha, bhakamurora Yeesu aragenda eguru ya amanji na aringi haangʼi okuhikira obhwato bhwabho. Bhakoobhoha bhukongʼu. ²⁰Nho, Yeesu akabhakeerya ega, “Mutoobhoha! Nooni!” ²¹Mbe, bheeki bhakeenda ega, ariine mubhwato. Hayohayo, obhwato bhukahika ngʼambu enú bhaaringa bharagya.

Yeesu ngʼo ebhyakuryabhinú bhirabhahaana abhantu obhuhoru

²²Ejo wendeko, omuganda omunene gwa abhantu bhanú bhaaringa bhatamiri ngʼambu harya, bhakarora obhwato bhumwi ego hayo. Kweki bhakamanya ega, Yeesu ataagiiri mubhwato hamwi na abheehigira bhaaye. Nawe, abheehigira bhaaye bhaagiiri abheenego. ²³Kimwi, abhantu abhandi bhakaaja na amaato okurwa mumugi gwa Tibheria, bhakahika hanú omuganda gwa abhantu bhaarya emikaate, hanú Omukuru Yeesu yaamara okumukumya Waryubha. ²⁴Hanú omuganda guyo bhaarora ega, Yeesu na abheehigira bhaaye bhataringi hayo, bhakasoha mumaato gayo, bhakagya Kaperinaumu okumutuna Yeesu.

²⁵Hanú abhantu bhayo bhaahika ngʼambu ya enyanja, bhakamunyoora Yeesu, bhakamubhuurya ega, “Rabhi, waahikiri enu ruuha?” ²⁶Yeesu akabhakyukya ega, “Ndabhakeerya obhuheene ega, murantuna kwa okubha naabhaheeri emikaate, mukarya mukeeguta, etaringi kwa okurora ekimanyiiriryo kinú naakoreri. ²⁷Mutakora emirimu kurusumo rwa okunyoora ebhyakurya bhinú bhirasarika, nawe, mukore emirimu kurusumo rwa okunyoora ebhyakurya bhinú bhitakusarika, bhinú bhirabhahaana obhuhoru bhwa koko. Omwana wa Adamu, arabhahaana ebhyakurya bhiyo, kwa okubha Taata Waryubha amuheeri obhutungi bhwa okukora ego.” ²⁸Kimwi, bheeki bhakamubhuurya ega, “Mbe, tukore-ki, naho tuture okukora amangʼana ganú Waryubha areenda?” ²⁹Yeesu akabhakyukya ega, “Amangʼana ganú Waryubha areenda mukore, nu-kwikirirya unú yaatuma.”

³⁰Hayo bhakamubhuurya ega, “N-kimanyiiriryo-ki orikora, naho turore na okukwikirirya? Ni-ngʼana-ki oraakore? ³¹Bhajaaji weetu, hanú bhaaringa kukibhara, bhaarya ebhyakurya bhinú bhirabhirikirwa ega, mana.6:31a Maaha mukitabho kya Okuhuruka 16:4-36. Engʼoorerwe mu Mangʼoore Amarabhu ega, ‘Yaabhahaana ebhyakurya bhiyo okurwa murwire, naho bharye.’ ”6:31b Maaha mukitabho kya Egijabhuri 78:24.³²Mbe, Yeesu akabhakeerya ega, “Ndabhakeerya obhuheene ega, etaringi ega, Musa ngʼo yaabhahaana bhajaaji weenyu ebhyakurya okurwa murwire, nawe, n-Taata. Weeki ngʼo arabhahaana bheenyu ebhyakurya bhya heene okurwa murwire. ³³Ebhyakurya bhya Waryubha ngʼ-unú areetuuma okurwa murwire, naho abhahaane abhantu bhonsego bha ekyaro kinu obhuhoru bhwa koko.” ³⁴Kimwi bhakamukeerya Yeesu ega, “Omukuru, otuhaanenga ebhyakurya bhiyo eginsiku gyonsego.” ³⁵Yeesu akabhakyukya ega, “Oni nooni ebhyakurya bhinú bhirabhahaana abhantu obhuhoru bhwa koko. Omuntu wowonse unú araaja kuoni, atariigwa omweko kweki! Na unú arinyikirirya maheene atariigwa enyonta kweki.

³⁶“Nawe, oni naabhakeerya ega, munduuji, nawe, mutakunyikirirya. ³⁷Abhantu bhonsego bhanú Taata arangʼaana, bhariija kuoni. Oni ntaryanga kora oumwi unú araaja kuoni. ³⁸Oni ntaaja okurwa murwire, naho mbe ndakora kya ego oni ndeenda, nawe, mbe ndakora kya ego Taata unú yaantuma areenda. ³⁹Taata unú yaantuma areenda ega, ntabhurya kora omuntu oumwi, kubhanú yaangʼaana, nawe, mbahyukye bhonsego kurusiku rwa obhuteero. ⁴⁰Kinú Taata areenda niiga, kira omuntu unú amanyiri ega, oni m-Mwana waaye na okunyikirirya, abhe na obhuhoru bhwa koko. Oni ndimuhyukya kurusiku rwa obhuteero.”

⁴¹Mbe, Abhayahudi bha hayo, bhakaamba okwingʼeheerya, kwa okubha Yeesu yaagamba ega, “Oni nooni ebhyakurya bhinú bhyeetuuma okurwa murwire.” ⁴²Bhakabhuuranʼya ega, “Mbe, omuntu unu ti-Yeesu, omwana wa Yusufu? Kora abheebhuri bhaaye tubhamanyiri. Bhoono aratura egaki okugamba ega, yeetuuma okurwa murwire?” ⁴³Yeesu akabhakyukya ega, “Mutige okwingʼeheerya bheenyu abheene kwa abheene. ⁴⁴Atariho omuntu unú aratura okuuja kuoni, nyoore ataroorokereribhwa na Taata unú yaantuma. Na oni ndimuhyukya kurusiku rwa obhuteero. ⁴⁵Engʼoorerwe mu Mangʼoore Amarabhu mubhitabho bhya abharooti ega, ‘Abhantu bhonsego bhariihigiribhwa na Waryubha.’6:45 Maaha mukitabho kya Isaaya 54:13. Mbe, omuntu wowonse unú areetegeerera na okwihigira okurwa ku Taata, araaja kuoni. ⁴⁶Atariho omuntu unú yaamurora Taata Waryubha, nawe oni omwene, kwa okubha naarwa kuweeki.

⁴⁷“Ndabhakeerya obhuheene ega, omuntu wowonse unú aranyikirirya, uyo yaana obhuhoru bhwa koko. ⁴⁸Oni nooni ebhyakurya bhinú bhirabhahaana abhantu obhuhoru bhuyo. ⁴⁹Onyoora bhajaaji weenyu bhaarya kukibhara ebhyakurya bhinú bhirabhirikirwa ega, mana, nawe, bhaakwa. ⁵⁰Nawe, hanu bhiriho ebhyakurya bhinú bhiituumiri okurwa murwire. Kwa ego, omuntu wowonse unú ararya ebhyakurya bhiyo, atarikwa. ⁵¹Oni nooni ebhyakurya bhinú bhiituumiri okurwa murwire, bhinú bhirahaana abhantu obhuhoru bhwa koko. Omuntu wowonse unú ararya ebhyakurya bhiyo, aribha na obhuhoru bhuyo. Ebhyakurya bhiyo m-mubhiri gwani gunú ndaruusya kurusumo rwa abhantu bhonsego bha ekyaro kinu, naho bhabhe na obhuhoru bhwa koko bhuyo.”

⁵²Mbe, Abhayahudi bhayo bhakaamba okuhakaananʼya bhukongʼu, bharabhuuranʼya ega, “Omuntu unu aratura egaki okutuhaana omubhiri gwaye, naho turye?” ⁵³Kimwi, Yeesu akabhakeerya ega, “Ndabhakeerya obhuheene ega, nyoore mutaarye omubhiri gwa Omwana wa Adamu, na okunywa amanyinga gaaye, mutaribha na obhuhoru bhwa koko. ⁵⁴Omuntu wowonse unú ararya omubhiri gwani na okunywa amanyinga gaani, uyo yaana obhuhoru bhwa koko, na oni ndimuhyukya kurusiku rwa obhuteero. ⁵⁵Omubhiri gwani ngo ebhyakurya bhya heene, na amanyinga gaani ngo ebhyokunywa bhya heene. ⁵⁶Omuntu wowonse unú ararya omubhiri gwani na okunywa amanyinga gaani, uyo arabha munsi waani, na oni nonse ndabha munsi waaye. ⁵⁷Kya ego Taata omuhoru yaantuma, na oni niina obhuhoru okurwa kuweeki. Egoego, omuntu wowonse unú arandya, aranyoora obhuhoru okurwa kuoni.6:57 Maaha mukitabho kya Yoana 5:21.⁵⁸Mbe, oni nooni ebhyakurya bhinú bhiituumiri okurwa murwire. Ebhyakurya bhiyo bhitakuhunkana na ebhyakurya bhinú bhajaaji weenyu bhaarya, nawe bhakakwa. Nawe, omuntu wowonse unú ararya ebhyakurya bhinu, aribha na obhuhoru bhwa koko.” ⁵⁹Yeesu yaagamba amangʼana gayo, hanú yaaringa areehigirya mumasinagogi6:59 Mumasinagogi. Erisinagogi ryaringa enyumba ya Abhayahudi ya okusyengera Waryubha orusiku rwa Esabhato. Maaha Erisinagogi mu Moonjooro eguru ya Amangʼana Amakongʼu. ga Kaperinaumu eyo.

Abheehigira abhaaru bhakamutiga Yeesu

⁶⁰Abhaaru gati ya abheehigira bhaaye hanú bheegwa amangʼana gayo, bhakagamba ega, “Ameehigiryo ganu n-ga okujimya bhukongʼu! Niwi aratura okugeekirirya?” ⁶¹Yeesu akamanya ega, abheehigira bhaaye bhareengʼeheererya amangʼana ganú yaaringa agambiri, kwa ego akabhabhuurya ega, “Mbe, eringʼana rinu ribhajimirye? ⁶²Bhoono, eribha egaki hanú murimurora Omwana wa Adamu arariina okugya murwire, enú yaaringa kubhwambiro? ⁶³Omutima wa Waryubha6:63 Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu ngʼo arabhahaana abhantu obhuhoru. Omuntu atakutura okukora kyokyonse kwa eginguru gyaye omwene. Amangʼana ganú mbakeererye n-ga Omutima wa Waryubha, na garareeta obhuhoru bhwa koko. ⁶⁴Nawe, bhariho abhandi gati yeenyu bhanú bhatakumwikirirya.” Yeesu yaagamba ego, kwa okubha yaaringa amanyiri okurwa kubhwambiro ega, m-bawi bhanú bhatakumwikirirya, na ega, niwi arimuriira eniku. ⁶⁵Mbe, akagendererya okubhakeerya ega, “Kiyo nkyo kikoreri mbakeererye ega, atariho omuntu unú aratura okuuja kuoni, nyoore ataroorokereribhwa na Taata.”

⁶⁶Okwambira hanú bheegwa amangʼana gayo, abhaaru gati ya abheehigira bhaaye, bhakamutiga, bhataamusoorana kweki. ⁶⁷Kimwi, Yeesu akabhuurya abheehigira bhaaye ekumi na bhabhiri ega, “Mbe, na bheenyu bhonse mureenda okuntiga?” ⁶⁸Simoni Petero akamukyukya ega, “Omukuru, tugende kuwi? Uuwe omwene uuna amangʼana ganú garatuhaana obhuhoru bhwa koko. ⁶⁹Bheetu tureekirirya na tumanyiri ega, uuwe nuuwe Omurabhu wa Waryubha.” ⁷⁰Nho, Yeesu akabhakeerya ega, “Naabhasora bheenyu ekumi na bhabhiri okubha abheehigira bhaani, nawe, oumwi gati yeenyu aroorokereribhwa na Erisambwa.6:70 Erisambwa. Maaha eringʼana rinu mu Moonjooro eguru ya Amangʼana Amakongʼu.” ⁷¹Hayo Yeesu yaaringa arahairira Yuda, omwana wa Simoni Esikariote. Kwa okubha Yuda uyo, ngʼo yaamuriira eniku Yeesu, onyoora yaaringa oumwi gati ya abheehigira bhaaye ekumi na bhabhiri.

Yeesu aragya Yerusaremu munyangi ya Ebhihuuna

¹Mbe, hanú gayo gaahwa, Yeesu akeenaara mukyaro kya Gariraaya. Ateenda okwinaara mukyaro kya Yudea, kwa okubha abhatungi bha Abhayahudi bhaaringa bhareenda okumwita. ²Eribhaga riyo, enyangi ya Abhayahudi ya Ebhihuuna7:2 Enyangi ya Abhayahudi ya Ebhihuuna. Yaaringa enyangi inú Abhayahudi bharajomererwa omugeso gwa emijabhibhu na emijeituni, na okusabha bhanyoore embura ya omwaka gunú guraaja. Hanú bhaaringa bharajomererwa enyangi iyo, bhaaringa bhareekara mubhihuuna bhinú bhaahagaajira amasya ga emiti. Kwa okukora ego, bhaahiituka kya ego bhajaaji bhwabho bhaagenda na okwikara kukibhara emyaka mirongo ena. Maaha mubhitabho bhya Abharaawi 23:33-36, 39-43; Obhuhiituki bhwa Amaragiriryo 16:13-16. Abhantu abhaaru bhaaringa bharagenda orugendo okugya Yerusaremu okujomererwa enyangi iyo hamwi. yaaringa haangʼi. ³Nho, abhaana bhaabho Yeesu bhakamukeerya ega, “Nuurwe hanu, ogende Yudea, naho abheehigira bhaaho bharore ebhika bhinú orakora. ⁴Nyoore omuntu areenda okumanyikana kubhantu, atakukora emirimu gyaye kwa obhwibhise. Mbe, nyoore uuwe oratura okukora amangʼana gayo, genda wiyorokye kubhantu bhonsego, naho bhakumanye.” ⁵Abhaana bhaabho bhayo, bhaagamba ego, kwa okubha kora bheeki abheene bhataamwikirirya Yeesu. ⁶Nho, Yeesu akabhakeerya ega, “Eribhaga ryani rya okugya eyo, ritarahika, nawe, bheenyu muratura okugya eribhaga ryoryonse. ⁷Abhantu bha mukyaro kinu, bhataana ekisigo kya okubhajimira bheenyu. Nawe, bharanjimira oni, kwa okubha ndabhakeerya ega, amakorwa gaabho m-mabhiibhi. ⁸Bheenyu mugende Yerusaremu okujomererwa enyangi. Oni ntakugya eyo, kwa okubha eribhaga ryani ritarahika.” ⁹Hanú Yeesu yaamara okugamba amangʼana gayo, akatigara mukyaro kya Gariraaya.

¹⁰Nawe, hanú abhaana bhaabho abhake bha ekimura bhaagya Yerusaremu okujomererwa enyangi iyo, Yeesu wonse akagya eyo, nawe, kwa obhwibhise, bira okwiyorokya kubhurabhu. ¹¹Mbe, abhatungi bha Abhayahudi bhanú bhaaringa munyangi iyo, bhaamutunanga Yeesu. Bhakabhuurya abhantu ega, “Omuntu urya aringi-ha?” ¹²Abhantu abhaaru bhakabha bharahakaananʼya eguru ya Yeesu. Abhandi bhaagambanga ega, “Yeesu m-muntu wa heene,” nawe, abhandi bhaagambanga ega, “Tiigo-ha, arangʼeena abhantu.” ¹³Nawe, ataaringa-ho omuntu unú yaaringa aramugamba Yeesu kubhurabhu, kwa okubha bhoobhohanga abhatungi bha Abhayahudi.

Yeesu areehigirya abhantu mwisyengerero

¹⁴Hanú eginsiku gya enyangi gyahika gatigati, Yeesu akagya, akasoha murubhanja rwa erisyengerero erikuru, akaamba okwihigirya abhantu. ¹⁵Nho, abhatungi bha Abhayahudi bhakaruguura kwa ameehigiryo gaaye, bhakagamba ega, “Mbe, omuntu unu aratura egaki okumanya gonsego ganu, enu ataasoma?” ¹⁶Mbe, Yeesu akabhakeerya ega, “Ameehigiryo ganú ndeehigirya, gataringi gaani, nawe, garwiri ku Waryubha unú yaantuma. ¹⁷Omuntu wowonse unú areenda okukora ganú Waryubha areenda, uyo araamanye ega, ameehigiryo gaani garwiri ku Waryubha, na ega, ntakugamba kwa obhutungi bhwani. ¹⁸Omuntu wowonse unú aragamba kwa obhutungi bhwaye omwene, uyo areetunira obhusuuku bhwaye omwene. Nawe, unú aratuna obhusuuku bhwa unú yaamutuma, uyo aragamba obhuheene, atakugamba obhubheehi.”

¹⁹Yeesu akagendererya okugamba ega, “Mumanyiri ega, Musa yaabhahaana amaragiriryo ga Waryubha. Nawe, atariho omuntu gati yeenyu unú aragwata amaragiriryo gayo. Bhoono, kwaki mureenda okunyita?” ²⁰Omuganda guyo gukamukyukya ega, “Uuwe uuna ekihwi ekibhiibhi! Niwi unú areenda okukwita?” ²¹Yeesu akabhakyukya ega, “Naakora hanu ekika ekimwi kurusiku rwa Esabhato, na bheenyu bhonsego mukaruguura.7:21 Maaha mukitabho kya Yoana 5:1-15.²²Maaha, Musa yaabhakeerya okusaara abhaana bheenyu bha ekimura. Etaringi ega, eriragiriryo riyo ryarwa ku Musa, nawe, ryarwa kubhajaaji weenyu bha okwamba. Bhoono, bheenyu mutakusaara abhaana bheenyu kora kurusiku rwa Esabhato? ²³Murakora ekituunyo okugwata amaragiriryo ga Musa, kwa okusaara abhaana bheenyu bha ekimura, kora kurusiku rwa Esabhato. Bhoono, kwaki mwanjimira kwa okubha naahwenʼya omuntu kurusiku rwa Esabhato? ²⁴Mutabhuturira ekiina omuntu okurekana na amangʼana ganú garamaahikana kwa kibhara, nawe, mumubhuturire ekiina kwa heene.”

Abhantu bharabhuuranʼya nyoore Yeesu ngʼoKiristu Omutuurya

²⁵Mbe, abhantu abhandi bha Yerusaremu hayo, bhakabha bharabhuuranʼya ega, “Bhoono, omuntu unu ti-unú abhatungi bheetu bhareenda okumwita? ²⁶Maaha, bhoono aragamba kubhurabhu, nawe, bheeki bhatakumukeerya kyokyonse! Mbe, eraturikana ega, abhatungi bheetu bhonse bhamanyiri kwa obhuheene ega, uyo ngʼo Kiristu Omutuurya? ²⁷Omuntu unu, tumanyiri enú arwiri. Nawe, hanú Kiristu Omutuurya omwene ariija, atariho omuntu unú arimanya enú arwiri.” ²⁸Hanú Yeesu yaaringa areehigirya murubhanja rwa erisyengerero erikuru, akagamba kwa eriisi erinene ega, “Maheene mummanyiri, na mumanyiri enú naarwa. Oni ntaaja kwa obhutungi bhwani, nawe, Waryubha unú aringi omuheene, ngʼo yaantuma. Bheenyu mutamumanyiri. ²⁹Oni mmumanyiri, kwa okubha naarwa kumwene. Weeki ngʼo yaantuma.” ³⁰Nho, abhantu bhakeenda okumugwata, nawe, ataaringa-ho omuntu unú yaamugwata, kwa okubha eribhaga ryaye ryaringa ritarahika.

³¹Nawe, gati ya abhantu bhanú bhaaringa hayo, abhaaru bhakamwikirirya Yeesu. Abhantu bhayo bhakagamba ega, “Bhoono, hanú Kiristu Omutuurya ariija, heene arikora ebhimanyiiriryo ebhyaru okukira bhinú omuntu unu akoreri?”

Abhasirikare bharatumwa okumugwata Yeesu

³²Mbe, Abhafarisaayo bhakeegwa kya ego omuganda gwa abhantu gwaringa gurajujuuma eguru ya Yeesu. Kwa ego, Abhafarisaayo bhayo, hamwi na abhasyengeri abhakuru,7:32 Abhasyengeri abhakuru. Maaha Abhasyengeri mu Moonjooro eguru ya Amangʼana Amakongʼu. bhakatuma abhasirikare, naho bhamugwate Yeesu. ³³Nho, Yeesu akakeerya abhantu bhayo ega, “Ndaabhe na bheenyu kwa eribhaga ekego. Kimwi ndihunjuka kuunú yaantuma. ³⁴Murintuna, nawe, mutarinnyoora. Kweki, enú oni ndibha, bheenyu mutakunagya okuuja eyo.” ³⁵Nho, Abhayahudi bhakabhuuranʼya ega, “Mbe, omuntu unu arigya-ha enú bheetu tutaritura okumunyoora? Bhoono, areenda okugya ku Bhayahudi bhanú bhanyarageeni mubhyaro ebhindi, na okwihigirya abhantu bhanú bhataringi Abhayahudi? ³⁶Mbe, ensonga yaaye niki hanú aragamba ega, ‘Murintuna, nawe, mutarinnyoora.’ Kweki, ‘Enú oni ndibha, bheenyu mutakunagya okuuja’?”

Yeesu arahaira eguru ya okuuja kwa Omutima Omurabhu

³⁷Orusiku rwa okumariisirya enyangi ya Ebhihuuna, rwaringa orusiku orunene. Mbe, Yeesu akeemirira murubhanja rwa erisyengerero erikuru, akagamba kwa eriisi erinene ega, “Omuntu akeegwa enyonta, yaaje kuoni, anywe amanji! ³⁸Amangʼoore Amarabhu garagamba ega, omuntu wowonse unú aranyikirirya, ‘eginyuji gya amanji ga obhuhoru bhirigera okurwa munsi yaaye.’7:38 Maaha mukitabho kya Isaaya 44:3, 55:1, 58:11.” ³⁹Yeesu yaaringa arahairira Omutima Omurabhu, unú bharahaanwa abhantu bhanú bharamwikirirya. Eribhaga riyo, Waryubha yaaringa ataratuma Omutima Omurabhu kubheene, kwa okubha Yeesu yaaringa atarasoha mubhukuru bhwaye.

Abhantu bharaahukana kwa ekisigo kya Yeesu

⁴⁰Hanú abhantu abhandi bha mumuganda guyo bheegwa amangʼana gayo, bhakagamba ega, “Heene, omuntu unu ngʼo omurooti unú turaganyirira okurwa ku Waryubha.”7:40 Maaha mukitabho kya Obhuhiituki bhwa Amaragiriryo 18:15-22.⁴¹Abhantu abhandi bhakagamba ega, “Omuntu unu ngʼo Kiristu Omutuurya.” Nawe, abhandi bhakagamba ega, “Tiigo-ha, Kiristu Omutuurya atakutura okurwa mukyaro kya Gariraaya. ⁴²Mbe, Amangʼoore Amarabhu gatakugamba ega, Kiristu Omutuurya arirwa murwibhuro rwa omukama Daudi?7:42a Daudi. Maaha eringʼana rinu mu Moonjooro eguru ya Amangʼana Amakongʼu. Kweki ega, ariibhurirwa Bhetereheemu, mumugi gunú Daudi yeebhurirwa?”7:42b Maaha mubhitabho bhya 2 Samweri 7:12-16; Mika 5:2; Mataayo 2:5-6.⁴³Kwa ego, abhantu bhakaahukana kwa ekisigo kya Yeesu. ⁴⁴Abhandi bhakeenda ega, bhamugwate, nawe, ataaringa-ho omuntu unú yaamugwata.

Abhatungi bha Abhayahudi bhatakumwikirirya Yeesu

⁴⁵Mbe, abhasirikare bhayo, bhakahunjuka kubhasyengeri abhakuru na Abhafarisaayo. Abhatungi bhayo bhakabhabhuurya ega, “Kwaki mutamugwatiri Yeesu na okumureeta hanu?” ⁴⁶Abhasirikare bhayo bhakakyukya ega, “Tutaakeegwiri omuntu oundi unú aratura okugamba kya ego weeki aragamba.” ⁴⁷Kimwi Abhafarisaayo bhakabhabhuurya ega, “Mbe, kora na bheenyu bhonse mumariri okungʼeenwa? ⁴⁸Bhoono, ariho omutungi wowonse urya kasi Omufarisaayo kora oumwi unú aramwikirirya? ⁴⁹Nawe, omuganda gwa abhantu bhanú bharamwikirirya, bhatamanyiri amaragiriryo ga Musa. Bhayo bheehiimwa na Waryubha!”

⁵⁰Nho, Nikodemasi, oumwi wa abhatungi bha Abhafarisaayo unú yaagya ku Yeesu orusiku orumwi obhutiku, akabhuurya abharikyaye ega, ⁵¹“Mbe, amaragiriryo geetu gareekirirya okumubhuturira ekiina omuntu enu tutaramwitegeerera na okumanya ganú akoreri?” ⁵²Bheeki bhakamukyukya Nikodemasi ega, “Bhoono, na uuwe wonse orarwira Gariraaya? Genda wikomye bhujomu Amangʼoore Amarabhu, na oraamanye ega, atariho omurooti unú ararwira Gariraaya.”

¹[Nho, bhayo bhonsego bhakeemuka eyo, bhakahunjuka iika. Yeesu wonse akeemuka murubhanja rwa erisyengerero erikuru, akagya munkuku ya Emijeituni.

Omukari unú yaagwatwa arakora obhusimbe

²Hanú bhwakya, Yeesu akagya kweki akasoha murubhanja rwa erisyengerero erikuru. Abhantu bhonsego bhakamugya-ko, kimwi akeekara, akaamba okubheehigirya. ³Abheehigirya bha amaragiriryo8:3 Abheehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. na Abhafarisaayo bhakamuhirira omukari oumwi unú yaagwatwa arakora obhusimbe, bhakamutuura gatigati ya omuganda gwa abhantu. ⁴Bhakamukeerya Yeesu ega, “Omwihigirya, omukari unu, yaagwatwa arakora obhusimbe. ⁵Mbe, mumaragiriryo gaaye, Musa yaatwamura okwita omukari kya unu, kwa okumutema amagina.8:5 Maaha mubhitabho bhya Abharaawi 20:10; Obhuhiituki bhwa Amaragiriryo 22:22-24. Mbe, uuwe oragamba egaki?” ⁶Bhaamubhuurya ego, kwa okumusakya Yeesu, naho bhanyoore engʼana ya okumujongera. Nawe, Yeesu akeehiinya, akaamba okungʼoora hansi kwa ekyara kyaye. ⁷Hanú bhaagendererya okumubhuurya, Yeesu akeemirira, akabhakyukya ega, “Nyoore ariho oumwi gati yeenyu unú ataana obhusarya, abhe owa okwamba okumutema omukari unu na erigina.” ⁸Mbe, Yeesu akeehiinya kweki hansi, akagendererya okungʼoora. ⁹Hanú bheegwa gayo, bhakajongerwa na ameetegeerero gaabho,8:9 Bhakajongerwa na ameetegeerero gaabho. Amangʼoore agandi ga akare aga Ekiyunani gataana amangʼana ganu. bhakaamba okwimuka kiumwiumwi, okwambira abhakaruka, okuhikira abhamura. Kubhuteero, Yeesu akatigara omwene na omukari uyo yeemiriiri embere yaaye. ¹⁰Kimwi, Yeesu akeemirira, akamubhuurya ega, “Maayi, bharingi-ha bhanú bhaari bharakujongera? Bhoono, atariho kora oumwi unú atamiri, naho akubhuturire ekiina?” ¹¹Akamukyukya ega, “Omukuru, atariho kora oumwi.” Mbe, Yeesu akamukeerya ega, “Kora oni ntakukubhuturira ekiina. Genda, nawe, okwambira reero, otakora kweki obhusarya.”]8:1-11 Amangʼana mumabhano ganu […] gataringi mumangʼoore agandi ga akare aga Ekiyunani.

Yeesu ngʼo endingaasi ya ekyaro

¹²Mbe, Yeesu akagendererya okugamba ega, “Oni nooni endingaasi ya ekyaro. Omuntu wowonse unú aranseeta oni, atakugenda mukisunte kora orusiku orumwi, nawe, aribha na endingaasi inú eramoorokererya mubhuhoru bhwa koko.” ¹³Abhafarisaayo bhakamukeerya Yeesu ega, “Uuwe oreeyimiririra omwene. Obhwimiririri bhwaho bhutaringi bhwa obhuheene!” ¹⁴Yeesu akabhakyukya ega, “Kora nyoore ndeeyimiririra omwene, obhwimiririri bhwani m-bwa obhuheene. Oni mmanyiri enú naarwa, na enú ndagya. Nawe, bheenyu mutamanyiri enú naarwa na enú ndagya. ¹⁵Bheenyu murambuturira ekiina okurekana na amangʼana ga abhantu, nawe, oni ntakubhuturira ekiina omuntu wowonse. ¹⁶Nawe, nyoore ndabhuturira ekiina omuntu, ndamubhuturira ekiina kwa obhuheene, kwa okubha oni ntaringi oni omwene, nawe, ndingi hamwi na Taata unú yaantuma. ¹⁷Mumaragiriryo geenyu engʼoorerwe ega, obhwimiririri bhwa abhantu abhabhiri bhuratura okwisigirwa ega, m-bwa obhuheene.8:17 Maaha mukitabho kya Obhuhiituki bhwa Amaragiriryo 17:6, 19:15.¹⁸Mbe, oni ndeeyimiririra omwene, na Taata unú yaantuma wonse aranyimiririra.”

¹⁹Nho, Abhafarisaayo bhakamubhuurya Yeesu ega, “Bhoono, Eseweenyu aringi-ha?” Yeesu akabhakyukya ega, “Bheenyu mutammanyiri oni, na kora Taata mutamumanyiri. Nyoore mukaamanyiri oni, mukaamumanyiri Taata wonse.”

²⁰Yeesu yaagamba gayo gonsego, hanú yaaringa areehigirya mwisyengerero erikuru, ahasi hanú bhaaringa bharatuura amasandiko ga egisadaaka. Nawe, ataaringa-ho omuntu unú yaamugwata, kwa okubha eribhaga ryaye ryaringa ritarahika.

Yeesu arahaira eguru ya oruku rwaye

²¹Mbe, Yeesu akakeerya Abhafarisaayo bhayo kweki ega, “Oni ndagya, murintuna, na murikwa kurusumo rwa obhusarya bhwenyu. Enú oni ndagya, bheenyu mutakunagya okuuja-yo.” ²²Nho, abhatungi bha Abhayahudi bhakaamba okubhuuranʼya ega, “Kwaki aragamba ega, ‘Enú oni ndagya bheenyu mutarinagya okuuja-yo’? Bhoono, aratura okwiyita?” ²³Yeesu akagendererya okubhakeerya ega, “Bheenyu murwiriri mukyaro kinu, nawe, oni naarwa eguru murwire. Bheenyu m-ba mukyaro kinu, nawe, oni ntaringi wa mukyaro kinu. ²⁴Kiyo nkyo kyakora nkabhakeerya ega, murikwa kwa ekisigo kya obhusarya bhwenyu. Mbe, nyoore mutakwikirirya ega, ‘Oni Nooni,’8:24 Oni Nooni. Hanu Yeesu areegamba kya ego Waryubha areegamba ku Riragano rya Akare. Maaha mubhitabho bhya Okuhuruka 3:14; Isaaya 43:10-11. murikwa kwa ekisigo kya obhusarya bhwenyu.” ²⁵Bhonse bhakamubhuurya ega, “Tukeerye, nuuwe-wi?” Yeesu akabhakyukya ega, “Naabhakeerya okurwa hanú naamba okwihigirya ega, oni niwi! ²⁶Niina amangʼana amaaru ganú nkaaturiri okugamba eguru yeenyu, na okubhabhuturira ekiina. Nawe, ntaakore ego, kwa okubha oni ndabhakeerya abhantu bhonsego amangʼana ganú ndeegwa okurwa kuweeki unú yaantuma. Weeki ngʼ-wa obhuheene.”

²⁷Hanú bheegwa gayo, bhataamanya ega, yaaringa aragamba nabho eguru ya Esewaabho owa murwire. ²⁸Mbe, Yeesu akabhakeerya ega, “Hanú murimuriinʼya kumusarabha Omwana wa Adamu, hayo nho murimanya ega, oni nooni. Kweki murimanya ega, gonsego ganú ndakora, ntakukora kwa obhutungi bhwani omwene, nawe, ndagamba kya ego Taata yaanyihigirya. ²⁹Unú yaantuma aringi hamwi na oni. Atakuntiga oni omwene, kwa okubha eribhaga ryonsego ndakora ganú garamungʼarira.”

³⁰Hanú Yeesu yaaringa aragamba amangʼana gayo, abhantu abhaaru bhakamwikirirya.

Waryubha arahaana abhantu obhwiyagaari

³¹Mbe, Yeesu akakeerya Abhayahudi bhanú bhaamwikirirya ega, “Nyoore muragendererya okugwata ameehigiryo gaani, hayo nho muraabhe abheehigira bhaani bha heene. ³²Kweki muraamanye obhuheene, na obhuheene bhuyo, bhuribhatuura mubhwiyagaari.” ³³Bheeki bhakamukyukya ega, “Bheetu n-dwibhuro rwa Abhurahamu.8:33 Abhurahamu. Maaha eringʼana rinu mu Moonjooro eguru ya Amangʼana Amakongʼu. Tutaakabheeri abhagaya bha omuntu wowonse. Kwaki oragamba ega, bheetu turaabhe abheeyagaari?” ³⁴Yeesu akabhakyukya ega, “Ndabhakeerya obhuheene ega, omuntu wowonse unú aragendererya okukora obhusarya, uyo m-mugaya wa obhusarya.8:34 Maaha mukitabho kya Abharuumi 6:12-23.³⁵Omugaya atakwikara munyumba ya omukuru waaye eginsiku gyonsego, nawe, omwana ngʼo aratama munyumba eginsiku gyonsego. ³⁶Mbe, nyoore Omwana wa Waryubha aribhasibhura murwe mubhusarya bhwenyu, mutaribha abhagaya kweki, nawe, muribha abheeyagaari heene. ³⁷Mmanyiri ega, bheenyu n-dwibhuro rwa Abhurahamu. Nawe, mureenda okunyita, kwa okubha muraanga okwikirirya ganú ndabheehigirya. ³⁸Oni ndabhakeerya ganú naarora ku Taata, nawe, bheenyu murakora ganú eseweenyu yaabheehigirya.” ³⁹Bheeki bhakamukyukya ega, “Abhurahamu ngʼo taata!” Yeesu akabhakeerya ega, “Nyoore heene mukaabheeri abheebhurwa bha Abhurahamu, mukaakoreri ganú Abhurahamu yaaringa arakora. ⁴⁰Nawe, bhoono muratuna enjira ya okunyita, onyoora mbakeererye obhuheene bhunú neegwa okurwa ku Waryubha. Abhurahamu ataakora kya ego bheenyu mureenda okukora. ⁴¹Amakorwa ganú bheenyu murakora, gararwa kwiseweenyu oundi.” Nho, bhakamukyukya ega, “Bheetu m-baana bhaaye bha heene. Waryubha omwenego ngʼo Taata!” ⁴²Yeesu akabhakyukya ega, “Nyoore Waryubha akaabheeri Eseweenyu, mukaanhanjiri, kwa okubha naarwa ku Waryubha, na bhoono ndingi hanu. Oni ntaaja kwa obhutungi bhwani, nawe, Waryubha ngʼo yaantuma. ⁴³Kwaki mutakumanya ganú ndabhakeerya? N-kwa okubha mutakwenda okwitegeerera amangʼana ganú ndabhakeerya. ⁴⁴Bheenyu m-ba Erisambwa, riyo ndyo eseweenyu! Kwa ego, mureenda okukora ganú eseweenyu areegomba. Erisambwa ni-riiti okwambira obhusimuka. Ritahanjiri obhuheene, kwa okubha obhuheene bhuyo, bhutarimo mumutima gwaryo. Ryeki riragamba obhubheehi, ngʼyo enteemo yaaryo, kwa okubha eryene ni-bheehi, kweki ndyo esewaabho obhubheehi bhonsego. ⁴⁵Nawe, kwa okubha oni ndabhakeerya obhuheene, kiyo nkyo kirakora mutakunyikirirya. ⁴⁶Niwi gati yeenyu unú aratura okwimiririra ega, oni m-mukori wa obhusarya? Nyoore ndabhakeerya obhuheene, kwaki mutakunyikirirya? ⁴⁷Omuntu wowonse unú aringi wa Waryubha, uyo areegwa amangʼana gaaye. Bheenyu mutakwigwa ganú Waryubha aragamba, kwa okubha mutaringi abhantu bhaaye.”

Yeesu m-mukuru okukira Abhurahamu

⁴⁸Abhayahudi bhakamubhuurya Yeesu ega, “Mbe, tutakugamba obhuheene, hanú turagamba ega, uuwe m-Musamaria, na ega, uuna ekihwi ekibhiibhi?” ⁴⁹Yeesu akabhakyukya ega, “Oni ntaana ekihwi ekibhiibhi. Oni ndamusuuka Taata, nawe, bheenyu muranjeera. ⁵⁰Oni ntakwenda okwigungya, nawe, ariho unú aratuna okungungya, kweki ngʼo aribha omubhuturi wa ekiina owa heene. ⁵¹Ndabhakeerya obhuheene ega, omuntu wowonse unú aragwata ameehigiryo gaani, atarikwa kora orusiku rumwi.” ⁵²Mbe, Abhayahudi bhayo bhakamukeerya Yeesu ega, “Bhoono tumanyiri ega, uuwe uuna ekihwi ekibhiibhi! Abhurahamu yaakwa, na abharooti bhonse bhaakwa. Nawe, uuwe oragamba ega, ‘Omuntu wowonse unú aragwata ameehigiryo gaani, atarikwa kora orusiku rumwi.’ ⁵³Bhoono, oreekorya ega, uuwe m-mukuru okukira jaaji weetu Abhurahamu? Weeki yaakwa, na abharooti bhonse bhaakwa. Bhoono, uuwe oreekorya ega, niwi?” ⁵⁴Yeesu akabhakyukya ega, “Nyoore ndeegungye oni omwene, okwigungya kwani kutakubha na ensonga yoyonse. Nawe, Taata unú bheenyu muragamba ega, ngʼ-Waryubha weenyu, ngʼo arangungya. ⁵⁵Bheenyu mutamumanyiri, nawe, oni mmumanyiri. Nyoore nkaagambiri ega, ntamumanyiri, nkaabheeri omubheehi kya bheenyu. Nawe, oni mmumanyiri, kweki ndagwata ganú aragamba. ⁵⁶Eseweenyu Abhurahamu, yaajomerwa bhukongʼu okurora orusiku rwa okuuja kwani. Hanú yaarurora, akajomerwa bhukongʼu.”

⁵⁷Mbe, Abhayahudi bhakamubhuurya Yeesu ega, “Uuwe otarahikya emyaka mirongo etaanu. Wonse waarora Abhurahamu?” ⁵⁸Yeesu akabhakyukya ega, “Ndabhakeerya obhuheene ega, kora hanú Abhurahamu yaaringa atareebhurwa, oni ndiho.”8:58 Oni ndiho. Hanu Yeesu aratumira eriina rya Waryubha kya ego ringʼoorerwe mubhitabho bhya Okuhuruka 3:14 na Isaaya 43:10.⁵⁹Hanú Abhayahudi bheegwa gayo, bhakabhooja amagina, naho bhamuteme nago na okumwita.8:59 Bhakabhooja amagina, naho bhamuteme nago na okumwita. Abhayahudi bheendanga okumwita Yeesu, kwa okubha bhaamanyanga ega, aramutuka Waryubha kurusumo rwa okutumira eriina ryaye. Nawe, Yeesu akeebhisa, akeemuka murubhanja rwa erisyengerero erikuru.

Yeesu arahwenʼya omuhoku

¹Orusiku orumwi, hanú Yeesu yaaringa aragenda, akamurora omuntu oumwi unú yeebhurwa omuhoku. ²Abheehigira bhaaye bhakamubhuurya ega, “Rabhi, omuntu unu yeebhurwa omuhoku kwa ekisigo kya obhusarya bhwawi? M-bwa omuntu unu omwene, kasi m-bwa abheebhuri bhaaye?” ³Yeesu akabhakyukya ega, “Unu ataabha omuhoku okurekana na obhusarya bhwaye, kasi obhusarya bhwa abheebhuri bhaaye. Nawe, yeebhurwa omuhoku, naho obhuturo bhwa Waryubha bhumaahikane kubhantu okuhitira obhuhoru bhwa omuntu unu. ⁴Tureenderwa okukora emirimu gya Waryubha unú yaantuma, eribhaga rikyari omubhasu. Obhutiku bhuraaja, bhunú tutaritura okukora emirimu giyo. ⁵Eribhaga rinú nkyari mukyaro munu, oni ni-ndingaasi kubhantu bhonsego.”

⁶Hanú Yeesu yaamara okugamba amangʼana gayo, akatuuja amate hansi, akakonya obhutoto kwa amate, akahaka obhutoto kumeeso ga omuhoku uyo. ⁷Kimwi akamukeerya omuhoku uyo ega, “Genda woogye obhusu bhwaho mwirambo rya Siroamu.” Siroamu, ensonga yaaye niiga, “Unú atumirwe.” Nho, omuhoku uyo akagya, akoogya obhusu, akahunjuka iika owaaye enu ararora bhujomu.

⁸Mbe, abhamenyani bhaaye na abhandi bhanú bhaamuroranga arasabhiirirya, bhakabhuuranʼya ega, “Omuntu unu ti-unú yaaringa areekara arasabhiirirya?” ⁹Abhandi bhakagamba ega, “Ngʼo.” Abhandi bhakagamba ega, “Ataringi weeki, nawe, arahunkana nawe bhukongʼu.” Nawe, weeki omwene akabhakeerya ega, “M-maheene, nooni.” ¹⁰Nho, bhakamubhuurya ega, “Nyoore heene nuuwe, ameeso gaaho gaturiri egaki okurora?” ¹¹Wonse akabhakyukya ega, “Omuntu oumwi unú arabhirikirwa ega, Yeesu, atuujiri amate hansi, akonyeri obhutoto, amariri ahakiri kumeeso gaani. Kimwi yaankeerya ega, ‘Genda woogye obhusu bhwaho mwirambo rya Siroamu.’ Mbe, nkagya nkeeyogya obhusu, nkaamba okurora.” ¹²Bheeki bhakamubhuurya ega, “Bhoono, omuntu uyo aringi-ha?” Wonse akabhakyukya ega, “Oni ntakumanya.”

Abhafarisaayo bharamubhuuririrya unú yaaringa omuhoku

¹³Kimwi, bhakamuhira omuhoku uyo ku Bhafarisaayo. ¹⁴Orusiku runú Yeesu yaakonya obhutoto kwa amate, na okumuhwenʼya omuhoku uyo, rwaringa orusiku rwa Esabhato. ¹⁵Mbe, Abhafarisaayo bhonse bhakamubhuurya omuntu uyo kya ego yaatura okurora. Wonse akabhakyukya ega, “Omuntu oumwi yanhakiri obhutoto kumeeso gaani, neeyogya, na bhoono ndarora.” ¹⁶Nho, Abhafarisaayo abhandi bhakagamba ega, “Omuntu unú yaakora ego, atakurwa ku Waryubha, kwa okubha atakugwata Esabhato.” Nawe, abhandi bhakagamba ega, “Bhoono, omukori wa obhusarya aratura okukora egaki ebhimanyiiriryo kya bhiyo?” Ego, bhakahabhana abheene kwa abheene. ¹⁷Nho, Abhafarisaayo bhakamubhuurya kweki ega, “Omuntu unú akuhwenerye ameeso gaaho, oragamba-ki eguru yaaye?” Wonse akabhakyukya ega, “Oni ndarora ega, omuntu uyo, m-murooti wa Waryubha.”

¹⁸Nawe, abhatungi bha Abhayahudi bhayo, bhateekirirya ega, omuntu unú ararora bhoonwego, yeebhurwa omuhoku. Kwa ego, bhakabhirikira abheebhuri bhaaye. ¹⁹Bhakabhabhuurya ega, “Omuntu unu m-mwana weenyu? Na m-maheene ega, yeebhurwa omuhoku? Nyoore niigo, bhoono akoreri egaki aruuji?” ²⁰Nho, abheebhuri bhaaye, bhakabhakyukya ega, “Bheetu tumanyiri obhuheene ega, omwana unu ngʼ-weetu, yeebhurwa omuhoku. ²¹Nawe, tutamanyiri kya ego yaatura okurora, kweki tutamumanyiri omuntu unú yaamuhwenʼya ameeso gaaye. Mumubhuurye omwene, kwa okubha m-muntu omukuru, aratura okugamba omwene.” ²²Abheebhuri bhaaye bhaagamba ego, kwa okubha bhaaringa bharoobhoha abhatungi bhayo. Abhatungi bha Abhayahudi bhayo, bhaaringa bheekirireenʼye ega, omuntu wowonse unú areekirirya ega, Yeesu ngʼo Kiristu Omutuurya, aryahurwa okurwa mumasinagogi gaabho. ²³Kiyo nkyo kyakora abheebhuri bhakagamba ega, “Mumubhuurye omwene, kwa okubha m-muntu omukuru.”

²⁴Mbe, abhatungi bha Abhayahudi bhakamubhirikira kweki omuntu unú yaaringa omuhoku, bhakamukeerya ega, “Orye emuuma ku Waryubha ega, oragamba obhuheene! Bheetu turamanya ega, omuntu unú yaakuhwenʼya, m-mukori wa obhusarya.” ²⁵Wonse akabhakyukya ega, “Oni ntakumanya nyoore omuntu uyo m-mukori wa obhusarya, nawe, mmanyiri ekintu ekimwi ego. Naaringa omuhoku, nawe bhoono, ndarora.” ²⁶Kimwi bhakamubhuurya ega, “Bhoono, omuntu uyo yaakukorera-ki? Yaahwenʼya egaki ameeso gaaho?” ²⁷Wonse akabhakyukya ega, “Mmariri okubhakeerya amangʼana gayo, nawe, muteegwiri. Kwaki mureenda mbakeerye kweki? Bhoono, na bheenyu mureenda okubha abheehigira bhaaye?” ²⁸Mbe, bheeki bhakamutuka ega, “Uuwe nuuwe omwihigira waaye! Nawe, bheetu turingi abheehigira bha Musa.9:28 Musa. Maaha eringʼana rinu mu Moonjooro eguru ya Amangʼana Amakongʼu.²⁹Tumanyiri ega, Waryubha yaagamba na Musa, nawe, omuntu uyo, tutamanyiri enú yaarwira.” ³⁰Wonse akabhakyukya ega, “Oni ndaruguura bhukongʼu! Mutamanyiri enú yaarwira, nawe, uyo ngʼo yaahwenerye ameeso gaani! ³¹Tumanyiri ega, Waryubha atakwigwa amasabho ga abhakori bha obhusarya, nawe, areegwa omuntu wowonse unú aramwigwa na okukora ganú Waryubha areenda.9:31 Maaha mubhitabho bhya Egijabhuri 34:15-16; Egimesaari 15:29.³²Okwambira obhusimuka, tutaakeegwiri kora rumwi ega, omuntu ahwenerye omuntu unú yeebhurwa omuhoku. ³³Nyoore omuntu uyo ataarwa ku Waryubha, atakaaturiri okukora gayo.” ³⁴Bheeki bhakamukyukya ega, “Uuwe weebhurwa na okurerwa kya omukori wa obhusarya. Bhoono, uuwe uuna obhutungi-ki bhwa okutwihigirya bheetu?” Mbe, bhakamukenyia muyo.

Obhuhoku bhwa mumutima

³⁵Hanú Yeesu yeegwa ega, omuntu uyo akenyiibhwe, akagya okumutuna. Hanú yaamunyoora, akamubhuurya ega, “Bhoono, oramwikirirya Omwana wa Adamu?” ³⁶Omuntu uyo akamukyukya ega, “Omukuru, unkeerye Omwana wa Adamu niwi, naho mbenga ndamwikirirya.” ³⁷Yeesu akamukeerya ega, “Uuwe waamara okumurora, kweki ngʼo unú arahaira na uuwe.” ³⁸Omuntu uyo akagamba ega, “Ndakwikirirya, Omukuru.” Kimwi, akamusyengera.

³⁹Mbe, Yeesu akagamba ega, “Oni naaja mukyaro munu okubhutura ekiina, naho abhahoku bharore, na bhanú bhararora, bhahoke.” ⁴⁰Nho, Abhafarisaayo abhandi bhanú bhaaringa hayo, hanú bheegwa amangʼana gayo, bhakamubhuurya ega, “Bhoono, oragamba ega, kora bheetu turingi abhahoku?” ⁴¹Yeesu akabhakyukya ega, “Nyoore mukaabheeri abhahoku, mutakaabheeri abhakori bha obhusarya. Nawe, kwa okubha muragamba ega, murarora, kiyo nkyo kirakora muratama na obhusarya bhwenyu.”

Ekirengyo kya omuriisya wa heene

¹Yeesu akagendererya okugamba ega, “Ndabhakeerya obhuheene ega, omuntu wowonse unú atakusohera mukiita kya ekikooro kya amangʼondi, nawe, arasohera ahandi, uyo m-mwibhi. ²Nawe, unú arasohera mukiita kya ekikooro, uyo m-muriisya wa amangʼondi. ³Omwangarariri wa ekikooro aramusiikurira ekiita, na amangʼondi gareegwa eriisi ryaye. Omuriisya arabhirikira kira eringʼondi kwa eriina ryaryo na okugoorokerererya okugya kibhara. ⁴Hanú aramara okuhurukya amangʼondi gaaye kibhara, arakangata embere, gonse garamuseeta, kwa okubha gamanyiri eriisi ryaye. ⁵Amangʼondi gatakutura okumuseeta omugeni, nawe, garamungʼosa, kwa okubha gatamanyiri eriisi ryaye.” ⁶Yeesu yaabhakeerya Abhafarisaayo ekirengyo kinu, nawe, bheeki bhataamanya ganú yaaringa arabhakeerya.

⁷Mbe, Yeesu akabhakeerya kweki ega, “Ndabhakeerya obhuheene ega, oni nooni ekiita kinú amangʼondi garahita-mo okusoha mukikooro. ⁸Bhonsego bhanú bhaankangatira, bhaaringa abheebhi, nawe, amangʼondi gataabheetegeerera. ⁹Oni nooni ekiita kiyo. Wowonse unú arasoha mukikooro okuhitira kuoni arituuribhwa, kweki aribha arasoha na okuhuruka, okugya okuriisya mukiriisyo ekijomu. ¹⁰Omwibhi araaja mukikooro, naho yeebhe amangʼondi, na yeete na okusarya. Nawe, oni niijiri naho bhabhe na obhuhoru, kweki bhabhe nabho deke.

¹¹“Oni nooni omuriisya wa heene. Omuriisya wa heene, araruusya obhuhoru bhwaye, kurusumo rwa amangʼondi gaaye. ¹²Omukori wa emirimu unú ataringi omuriisya wa amangʼondi na amangʼondi gataringi gaaye, hanú ararora ensuuji eraaja, arakenya na okutiga amangʼondi ageenego. Ensuuji eragagwata na okuganyaraganʼya. ¹³Omukori wa emirimu uyo, arakenya, kwa okubha ataana obhururu na amangʼondi gayo.

¹⁴“Oni nooni omuriisya wa heene. Mmanyiri bhujomu amangʼondi gaani, gonse gammanyiri, ¹⁵kya ego Taata yaammanyiri oni, na oni nonse mmumanyiri. Oni ndaruusya obhuhoru bhwani kurusumo rwa amangʼondi gaani. ¹⁶Oni niina amangʼondi agandi ganú gataringi ga mukikooro kinu, gayo gonse ndeenderwa ngareete. Geeki gariigwa eriisi ryani. Kimwi riribha erihijo rimwi, na omuriisya oumwi.

¹⁷“Taata yaanhanjiri, kwa okubha ndaruusya obhuhoru bhwani, naho mbugege kweki. ¹⁸Atariho omuntu unú aratura okunduusya obhuhoru bhwani. Nooni omwene ndaruusya obhuhoru bhwani. Niina obhutungi bhwa okuruusya obhuhoru bhwani, kweki niina obhutungi bhwa okugega obhuhoru bhwani. Taata omwene ngʼo yaantuma okukora ego.”

¹⁹Hanú Abhayahudi bheegwa amangʼana gayo, bhakahabhana abheene kwa abheene. ²⁰Abhaaru gati yaabho, bhakagamba ega, “Unu yaana ekihwi ekibhiibhi! Kweki m-mujuuru! Kwaki muramwitegeerera?” ²¹Nawe, abhandi bhakagamba ega, “Amangʼana gayo gatakurwa kumuntu unú yaana ekihwi ekibhiibhi. Bhoono, ekihwi ekibhiibhi kiratura okumukora omuhoku arore?”

Abhantu abhaaru bharamwanga Yeesu

²²Mbe, rikahika eribhaga rya enyangi ya Abhayahudi ya okuhiituka okuraamwa kwa erisyengerero rya Waryubha rya Yerusaremu.10:22 Erisyengerero rya Waryubha rya Yerusaremu. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. Eribhaga riyo, ryaringa rya embeho. ²³Yeesu yaaringa aragenda murubhanja rwa erisyengerero, ahasi hanú harabhirikirwa ega, Eribharaja rya Soromoni.²⁴Kimwi Abhayahudi abhandi bhakamwinaara, bhakamubhuurya ega, “Bhoono, oritunyankyanyankya mumitima gyetu okuhikira ruuha? Nyoore uuwe nuuwe Kiristu Omutuurya, otukeerye kubhurabhu.” ²⁵Nawe, Yeesu akabhakyukya ega, “Oni naamariri okubhakeerya ego, nawe, bheenyu mutakwikirirya. Ebhika bhinú ndakora, ndabhikora kwa obhutungi bhwa Taata, ngʼo aranyimiririra ega, oni niwi. ²⁶Nawe, mutakwenda okunyikirirya, kwa okubha bheenyu mutaringi amangʼondi gaani. ²⁷Amangʼondi gaani gareegwa eriisi ryani. Oni ngamanyiri, gonse garansoorana. ²⁸Oni ndagahaana obhuhoru bhwa koko, na gataribhura kora orusiku rumwi. Kora atariho omuntu unú aratura okugasaka okurwa mumabhoko gaani. ²⁹Taata yangʼeeri amangʼondi gayo, na weeki ngʼo omukuru okukira bhonsego. Kora atariho omuntu unú aratura okugasaka mumabhoko gaaye. ³⁰Oni na Taata turingi n-kintu kimwi.”

³¹Hayo nho, Abhayahudi bhakabhooja amagina kweki, naho bhamuteme nago na okumwita. ³²Nawe, Yeesu akabhakeerya ega, “Mboorokeerye ebhika ebhyaru ebhijomu bhinú naakora kwa eginguru gya Taata. Ni-ringʼana-ki rinú rirabhakora bheenyu mureenda okuntema na amagina?” ³³Abhayahudi bhakakyukya ega, “Tutakwenda okukutema na amagina kwa ekisigo kya okukora amangʼana amajomu, nawe, kwa okubha oramutuka Waryubha. Kweki uuwe oreekorya ega, ngʼ-Waryubha, enú uuwe m-muntu kya abhantu abhandi!” ³⁴Yeesu akabhabhuurya ega, “Bhoono, etaangʼoorwa mumangʼoore geenyu ga amaragiriryo ega, Waryubha yaagamba ega, ‘Bheenyu n-kya Waryubha’?10:34 Maaha mukitabho kya Egijabhuri 82:6.³⁵Engʼoorerwe mu Mangʼoore Amarabhu ega, abhantu bhanú bhaanyoora amangʼana ga Waryubha, Waryubha yaabhagamba ega, n-kya Waryubha. Na bheetu tumanyiri ega, ganú gaangʼoorwa mu Mangʼoore Amarabhu m-buheene. ³⁶Taata ngʼo yaansora na okuntuma mukyaro munu. Mbe bhoono, kwaki muragamba ega, oni ndamutuka Waryubha, hanú ndagamba ega, ‘Oni m-Mwana wa Waryubha’?10:36 Oni m-Mwana wa Waryubha. Maaha Omwana wa Waryubha mu Moonjooro eguru ya Amangʼana Amakongʼu.³⁷Nyoore ntakukora emirimu gya Taata, mbe mutanyikirirya. ³⁸Nawe, nyoore ndakora emirimu gya Taata, kora nyoore mutakunyikirirya oni, mbe mwikirirye emirimu giyo. Nho, murimanya ega, Taata aringi munsi waani na oni ndingi munsi wa Taata.” ³⁹Hanú Abhayahudi bheegwa amangʼana gayo, bhakeenda okumugwata kweki, nawe, Yeesu akasurutuka mumabhoko gaabho.

⁴⁰Kimwi, Yeesu akagya kweki ngʼambu ya oruuji rwa Yorodani, akahika hanú Yoana yaabhatiijiranga abhantu kubhwambiro, akeekara eyo eginsiku nkego. ⁴¹Abhantu abhaaru bhakamuseeta, bhakagamba ega, “Kora nyoore Yoana ataakora ekimanyiiriryo kora ekimwi, nawe, amangʼana gonsego ganú yaaringa aragamba eguru ya Yeesu, gaaringa ga obhuheene.” ⁴²Na abhantu abhaaru bhanú bhaaringa hayo, bhakamwikirirya Yeesu.

Oruku rwa Rajaaro

¹Yaaringa-ho omuntu oumwi unú yaabhirikirwanga ega, Rajaaro, yaaringa omurweri. Yaaringa areekara mukijiji kya Bhetania hamwi na abhahara bhaabho, Mariamu na Maarita. ²Mariamu uyo, ngʼo yaamuhaka Omukuru Yeesu amaguta ganú gaabhirikirwanga ega, manemane na okumweya amaguru kwa egintuukya gyaye.11:2 Maaha mukitabho kya Yoana 12:1-8.³Mbe, Mariamu na Maarita bhakatuma amangʼana ku Yeesu ega, “Omukuru, omusaani waaho Rajaaro m-murweri.” ⁴Hanú Yeesu yeegwa amangʼana gayo, akagamba ega, “Obhurweri bhuyo, bhutaringi bhwa okumwita, nawe m-bwa okoorokya obhukuru bhwa Waryubha, naho Omwana wa Waryubha agungibhwe okuhitira obhurweri bhuyo.” ⁵Yeesu yaaringa abhahanjiri bhukongʼu Maarita, Mariamu na Rajaaro. ⁶Mbe, hanú Yeesu yeegwa ega, Rajaaro m-murweri, akagendererya okwikara ahasi hayo yaaringa eginsiku ebhiri.

⁷Hanú eginsiku giyo gyahwa, Yeesu akabhakeerya abheehigira bhaaye ega, “Tuhunjuke mukyaro kya Yudea.” ⁸Abheehigira bhaaye bhakamukyukya ega, “Rabhi, m-bwangu hanu Abhayahudi bheendanga okukutema na amagina, naho bhakwite. Bhoono n-kwaki oreenda okugya eyo kweki?” ⁹Yeesu akabhakyukya ega, “Bhoono, omubhasu gutaana amasaa ekumi na gabhiri? Nyoore omuntu aragenda omubhasu, atakutura okwikuujura okuguru kwaye kwa okubha endingaasi erangʼarabhira bhyonsego. ¹⁰Nawe, unú aragenda obhutiku, areekuujura kwa okubha endingaasi ya okumungʼarabhira etariho.”11:9-10 Maaha mukitabho kya Yoana 8:12.

¹¹Hanú Yeesu yaamara okugamba gayo, akagendererya okubhakeerya abheehigira bhaaye ega, “Omusaani weetu Rajaaro areeri, nawe, ndagya okumubhuukya.” ¹²Mbe, abheehigira bhaaye bhakamukyukya ega, “Ee Omukuru, nyoore naareeri, arahwena.” ¹³Hanu Yeesu yaaringa aragamba ega, Rajaaro akwiri, nawe, abheehigira bhaaye bhakeeganirirya ega, aragamba ega, areeri egintiro. ¹⁴Kimwi, Yeesu akabhakeerya kubhurabhu ega, “Rajaaro akwiri. ¹⁵Nawe, oni ndajomerwa ega, hanú Rajaaro yaakwiri ntaaringa-ho, naho bheenyu muture okunyikirirya. Mbe, tugende kumwene.” ¹⁶Mbe, omwihigira oumwi eriina ryaye Tomaso unú yaabhirikirwanga ega, Ekisare, akabhakeerya abheehigira abharikyaye ega, “Na bheetu tugende, naho tukwe hamwi nawe.”

Yeesu yaana eginguru gya okuhyukya abhaku

¹⁷Mbe, hanú Yeesu yaahika mukyaro kya Yudea mukijiji kya Bhetania, akanyoora Rajaaro amariri eginsiku ena mumbihira. ¹⁸Omugi gwa Bhetania gwaringa muna egikirometa esatu ego okurwa Yerusaremu. ¹⁹Abhayahudi abhaaru okurwa Yudea bhaaringa bhaajiri Bhetania okubhahorisya Maarita na Mariamu, kwa ekisigo kya oruku rwa Rajaaro omumura waabho.

²⁰Mbe, Maarita akeegwa ega, Yeesu araaja, akahuruka kibhara na okugya okumuturuungʼana, nawe, Mariamu akatigara munyumba. ²¹Maarita hanú yaamunyoora Yeesu, akamukeerya ega, “Ee Omukuru, nyoore okaabheeri-ho, omumura weetu atakaakwiri. ²²Nawe, kora bhoono mmanyiri ega, kyokyonse kinú oraamusabhe Waryubha, arakuhaana.” ²³Kimwi, Yeesu akamukyukya ega, “Omumura weenyu araahyuke.” ²⁴Maarita akagamba ega, “Ee Omukuru, mmanyiri ega, Waryubha hanú aribhahyukya abhantu bhonsego kurusiku rwa okubhuturirwa ekiina, wonse arihyuka.” ²⁵Yeesu akamukyukya ega, “Oni nooni obhuhyuki bhuyo, kweki oni nooni obhuhoru. Omuntu wowonse unú aranyikirirya oni, kora nyoore akaakwa, aribha omuhoru. ²⁶Na wowonse unú aringi omuhoru na aranyikirirya oni, atarikwa kora orusiku rumwi. Bhoono, oreekirirya gayo?” ²⁷Maarita akamukyukya ega, “Maheene Omukuru, ndeekirirya ega, uuwe n-Kiristu Omutuurya,11:27 Kiristu Omutuurya. Maaha Kiristu mu Moonjooro eguru ya Amangʼana Amakongʼu. Omwana wa Waryubha, unú yeenderwa okuuja mukyaro.”

Yeesu arakuura

²⁸Hanú Maarita yaamara okugamba gayo, akagya okumubhirikira Mariamu. Mbe, akamukeerya kabhejyo ega, “Omwihigirya aringi hanu, arakubhirikira.” ²⁹Hanú Mariamu yeegwa gayo, akeemuka bhwangu, akagya ku Yeesu. ³⁰Yeesu yaaringa akyari okusoha mukijiji kiyo, yaaringa hanú Maarita yaagya okumuturuungʼana. ³¹Abhayahudi bhanú bhaamuhorisyanga Mariamu, hanú bhaarora areemuka bhwangu na okuhuruka kibhara, bhakamuseeta, kwa okubha bhaamanyanga ega, Mariamu aragya kumbihira, naho akuurire eyo.

³²Mbe, hanú Mariamu yaahika hanú Yeesu yaaringa, akamurora, akamutemera ebhiru, akamukeerya ega, “Ee Omukuru, nyoore okaabheeri-ho hanu, omumura weetu atakaakwiri.” ³³Hanú Yeesu yaamurora Mariamu arakuura na Abhayahudi bhanú yaajiri nabho bhonse bharakuura, akabhihirirwa bhukongʼu mumutima gwaye. ³⁴Mbe, akabhabhuurya ega, “Mumutuuriri-ha?” Bhakamukyukya ega, “Ee Omukuru, tugende tukoorokye.” ³⁵Yeesu akakuura. ³⁶Mbe, Abhayahudi bhanú bhaaringa bhaajiri muruku bhakagamba ega, “Maaha kya ego yaaringa amuhanjiri Rajaaro!” ³⁷Nawe, abhandi bhakagamba ega, “Omuntu unu ngʼo yaamuhwenʼya omuhoku, mbe kwaki ataakora ryoryonse ku Rajaaro, naho atakwa?”

Yeesu aramuhyukya Rajaaro

³⁸Hanú Yeesu yaaringa akyabhihiriirwe mumutima gwaye, akahika kumbihira. Embihira iyo, ryaringa erisana rinú bhaakundikirya na erigina erinene kumunwa. ³⁹Yeesu akabhakeerya abhantu bhanú bhaaringa-ho harya ega, “Muruusye-ho erigina riyo kumunwa.” Mbe, Maarita, unú yaaringa omuhara waabho Rajaaro, akamukyukya ega, “Ee Omukuru, bhoono aranyunka, kwa okubha gyahitiri eginsiku ena aringi mumbihira.” ⁴⁰Mbe, Yeesu akamukeerya ega, “Bhoono, ntaakukeerya ega, nyoore oreekirirya, oribhurora obhukuru bhwa Waryubha?”

⁴¹Mbe, bhakariruusya-ho erigina rirya. Yeesu akamaaha murwire, akasabha ku Waryubha ega, “Ee Taata, ndakukumya kwa okubha wigwiri amasabho gaani. ⁴²Mmanyiri ega, oranyigwa eribhaga ryonsego, nawe, ndagamba ganu kwa ekisigo kya omuganda gwa abhantu bhanu, naho bheekirirye ega, nuuwe waantuma.” ⁴³Hanú Yeesu yaamara okugamba gayo, akagamba kwa eriisi erinene ega, “Rajaaro, njo kibhara enu!” ⁴⁴Mbe, unú yaaringa akwiri, akahuruka kibhara. Amaguru na amabhoko gaaye garingisiririibhwe ensanda, kweki yaaringa na ekitambaara kinú bhaamubhoha mubhusu. Mbe, Yeesu akabhakeerya abhantu bharya ega, “Mumusibhure ekitambaara kiyo, mumutige agende.”

Abhatungi bha Abhayahudi bharatunaenjira ya okumwita Yeesu

(Mataayo 26:1-5; Mariko 14:1-2; Ruuka 22:1-2)

⁴⁵Mbe, Abhayahudi abhaaru bhanú bhaaja okumurora Mariamu, hanú bhaarora ganú Yeesu yaakora, bhakamwikirirya. ⁴⁶Nawe, Abhayahudi abhandi bhakagya ku Bhafarisaayo na okubhakeerya ganú Yeesu yaakora. ⁴⁷Mbe, abhasyengeri abhakuru na Abhafarisaayo bhakabhirikira eribharaja erikuru ryabho11:47 Eribharaja erikuru ryabho. Maaha Eribharaja erikuru rya Abhayahudi mu Moonjooro eguru ya Amangʼana Amakongʼu. bhakabhuuranʼya ega, “Tukore egaki? Kwa okubha omuntu unu arakora ebhimanyiiriryo ebhyaru. ⁴⁸Nyoore turaamutige, naho akore ebhimanyiiriryo bhiyo, abhantu bhonsego bharaamwikirirye. Abharuumi bhariija na okusarya ekyaro kyetu na erisyengerero ryetu.”

⁴⁹Mbe, oumwi kubhakuru bharya eriina ryaye Kayafa, unú yaaringa omusyengeri omukuru11:49 Omusyengeri omukuru. Maaha Abhasyengeri mu Moonjooro eguru ya Amangʼana Amakongʼu. wa omwaka guyo, akabhakeerya ega, “Bheenyu mutamanyiri engʼana yoyonse! ⁵⁰Bhoono, mutamanyiri ega, nyakara kubheenyu omuntu oumwi akwe kurusumo rwa abhantu bhonsego, okukira ekyaro kyonsego kisikibhwe?” ⁵¹Kayafa ataagamba gayo kwa obhwendi bhwaye omwene. Nawe, kwa okubha yaaringa omusyengeri omukuru omwaka guyo, yaaroota ega, Yeesu arikwa kurusumo rwa ekyaro kya Abhayahudi. ⁵²Etaringi kurusumo rwa ekyaro kiyo ekyenego, nawe, abhakumanʼye abhaana bha Waryubha bhanú bhanyarageeni, bhabhe hamwi.

⁵³Mbe, okurwa orusiku ruyo, abhatungi bha Abhayahudi bhakaamba okutuna enjira ya okumwita Yeesu. ⁵⁴Kwa ekisigo kiyo, Yeesu akatiga okugenda aharabhu gati ya Abhayahudi. Nawe, akeemuka na okugya haangʼi na kukibhara, mumugi gunú gwabhirikirwanga ega, Efurahimu, akeekara eyo hamwi na abheehigira bhaaye.

⁵⁵Enyangi ya Epasaka11:55a Epasaka. Maaha eringʼana rinu mu Moonjooro eguru ya Amangʼana Amakongʼu. ya Abhayahudi yaaringa haangʼi. Mbe, abhantu abhaaru bhakeemuka okurwa mumigi gyabho okugya Yerusaremu, enyangi ya Epasaka yaaringa etarahika, naho bheeraame.11:55b Maaha mubhitabho bhya 2 Amangʼana ga Eribhaga 30:17-19; Okubhara 9:10.⁵⁶Mbe, bhakagendererya okumutuna Yeesu. Hanú bhaaringa bheemiriiri murubhanja rwa erisyengerero erikuru bhakabhuuranʼya ega, “Bheenyu muramaaha egaki? Bhoono, omuntu uyo atakuuja munyangi?” ⁵⁷Abhasyengeri abhakuru na Abhafarisaayo bhaaringa bhaamwiri ega, omuntu wowonse unú amanyiri enú Yeesu aringi, areete amangʼana, naho bhamugwate.

Mariamu aramuhaka Yeesu amaguta

(Mariko 14:3-9; Mataayo 26:6-13; Ruuka 7:36-50)

¹Hanú gyatama eginsiku esansabha okuhika enyangi ya Epasaka, Yeesu akahika kweki Bhetania, mumugi gunú yaamuhyukya Rajaaro okurwa mubhaku. ²Mbe, abhantu bha eyo bhakamutekera ebhyakurya bhya mugoroobha. Maarita akamukorera Yeesu ebhyakurya, na Rajaaro yaaringa oumwi gati ya abhageni bhanú bheekara kumeja hamwi na Yeesu. ³Mbe, Mariamu akagega enchupa ya amaguta ga obhurange aga obhuguri obhunene bhukongʼu, ganú gaabhirikirwanga ega, narido. Akamuhaka Yeesu kumaguru, akamweya kwa egintuukya gyaye. Enyumba yonsego ekeejura ekarangasira obhurange obhujomu.

⁴Nawe, oumwi wa abheehigira bhaaye eriina ryaye Yuda Esikariote, unú eribhaga erindi yaamuriira eniku Yeesu, akagamba ega, ⁵“Kwaki amaguta gayo gataaguribhwa kwa egidinari magana gasatu,12:5 Egidinari magana gasatu. Egimbirya giyo gyaringa m-mariho ga omuntu oumwi kwa omwaka omugima. Maaha Edinari mu Moonjooro eguru ya Amangʼana Amakongʼu. na egimbirya giyo bhakaaheerwe abhatobhu?” ⁶Yuda ataagamba ego kwa ekisigo kya okubhaabhira abhatobhu, nawe, kwa okubha yaaringa omwibhi. Weeki ngʼo yaaringa arabhiika ensaho ya egimbirya. Yaaringa areebha bhinú bhyaringa munsaho muyo. ⁷Mbe, Yeesu akamukyukya Yuda ega, “Otamunyankya omukari unu, omutige, yanhakiri amaguta kurusumo rwa orusiku runú bharimbiika. ⁸Abhatobhu bharingi hamwi na bheenyu eginsiku gyonsego, nawe, oni ntaribha hamwi na bheenyu eginsiku gyonsego.”

Abhatungi bha Abhayahudi bhareenda okumwita Rajaaro

⁹Mbe, abhantu abhaaru bhakeegwa ega, Yeesu aringi Bhetania, bhakagya etaringi kwa okumurora weeki omwenego, nawe, na okumumaaha Rajaaro wonse, unú Yeesu yaamuhyukya okurwa mubhaku. ¹⁰Nho, abhasyengeri abhakuru, bhakatuna enjira ya okumwita Rajaaro wonse, ¹¹kwa okubha okurekana na okuhyukibhwa kwaye, Abhayahudi abhaaru bhaatiga abhatungi bhaabho, bhakamwikirirya Yeesu.

Abhantu bharamuturuungʼana Yeesukwa obhujomerwa Yerusaremu

(Mataayo 21:1-11; Mariko 11:1-11; Ruuka 19:28-40)

¹²Ejo wendeko, omuganda omunene gwa abhantu bhanú bhaaringa bhaajiri okurya enyangi ya Epasaka, bhakeegwa ega, Yeesu aringi kunjira araaja Yerusaremu.12:12 Yerusaremu. Maaha eringʼana rinu mu Moonjooro eguru ya Amangʼana Amakongʼu.¹³Mbe, bhakagega amasagi ga emitende, bhakagya okumuturuungʼana Yeesu. Bhakagamba kwa eriisi erinene ega,

“Hosana!12:13a Hosana. Ensonga yaaye niiga, Ee Omukuru otutuurye.

Anonkerwe unú araaja kwa eriina rya Omukuru Waryubha!

Anonkerwe Omukama wa Abhaisiraeri.”12:13b Maaha mukitabho kya Egijabhuri 118:25-26.

¹⁴Mbe, Yeesu akanyoora ekimoori kya entikiri, akariina12:14 Yeesu akanyoora ekimoori kya entikiri, akariina. Abhakama bha eribhaga riyo, bhaagenderanga kugifaraasi gya eriihe. Kwa ego, Yeesu okugendera kukimoori kya entikiri hanú yaaringa arasoha Yerusaremu, yaaringa aroorokya ega, weeki araaja kwa obhunyoohu. kya ego yaangʼoorwa mu Mangʼoore Amarabhu ega,

¹⁵“Bheenyu abhantu bha Sayuni,12:15a Sayuni. Ni-riina erindi rya Yerusaremu. mutoobhoha!

Maaha, omukama weenyu araaja,

ariiniri kukimoori kya entikiri!”12:15b Maaha mukitabho kya Jakaria 9:9.

¹⁶Eribhaga riyo, abheehigira bha Yeesu bhataamanya gayo. Nawe, hanú Yeesu yaahyuka, mbe bhakahiituka ega, gayo gaaringa gangʼoorerwe eguru yaaye, na niigo bhaamukorera.

¹⁷Abhantu bhanú bhaaringa na Yeesu, hanú yaamubhirikira Rajaaro okurwa mumbihira na okumuhyukya okurwa mubhaku, bhakanyaraganʼya amangʼana gayo. ¹⁸Mbe, abhantu abhaaru bhakeegwa amangʼana ga ekika kinú yaakora, nkyo kyakora bhakarwa Yerusaremu bhakagya okumuturuungʼana Yeesu. ¹⁹Nawe, Abhafarisaayo bhakabhuuranʼya ega, “Murarora? Tutakutura okukora kyokyonse! Maaha, abhantu bhonsego bharamuseeta.”

Yeesu arahaira eguru ya oruku rwaye

²⁰Bhaaringa-ho abhantu bhanú bhataaringa Abhayahudi gati ya abhantu bhanú bhaagya Yerusaremu okumusyengera Waryubha kunyangi ya Epasaka. ²¹Mbe, abhantu bhayo bhakagya ku Firipo unú yaarwa Bhetisaida mukyaro kya Gariraaya, bhakamukeerya ega, “Omusuukwa, turasabha tumaahane na Yeesu.” ²²Firipo akagya akakeerya Andurea amangʼana gayo, kimwi bhabhiri bhonsego bhakagya ku Yeesu, bhakamukeerya. ²³Yeesu akabhakyukya ega, “Eribhaga rihikiri rya obhukuru bhwa Omwana wa Adamu12:23 Omwana wa Adamu. Maaha eringʼana rinu mu Moonjooro eguru ya Amangʼana Amakongʼu. okumaahikana aharabhu. ²⁴Ndabhakeerya obhuheene ega, nyoore embusuro ya engano etarasiikiriribhwa mwirobha kya omuntu unú yaakwa, etakutura okumera, nawe, nyoore esiikiririibhwe, eramera na okwama emisumo emyaru. ²⁵Omuntu wowonse unú areenda okwangararira obhuhoru bhwaye, aribhurwa obhuhoru bhwa koko, nawe, omuntu wowonse unú atakubhwangararira obhuhoru bhwa mukyaro kinu, uyo araangararira obhuhoru bhwaye, koko. ²⁶Omuntu wowonse unú arankorera emirimu, ereenderwa yansoorane. Kweki hohonse hanú ndingi, hayo nho, omukori wa emirimu waani aribha. Taata arimusuuka omuntu wowonse unú arankorera emirimu.

²⁷“Bhoono, naambiri okubhaabhahira bhukongʼu mumutima gwani. Bhoono, ngambe-ki? Bhoono, ngambe ega, ‘Ee Taata, ndakusabha untuurye kwibhaga rya enyanko inu?’ Tiigo-ha kora ahake, ntakutura okusabha ego, kwa okubha niijiri okunyanka mukyaro hanu. ²⁸Ee Taata Waryubha, otubhure obhukuru bhwa eriina ryaho.”

Mbe, eriisi rikagamba okurwa murwire ega, “Mbutubhwiri, kweki ndagendererya okubhutubhura.” ²⁹Omuganda gwa abhantu bhanú bhaaringa harya, hanú bheegwa eriisi okurwa murwire, abhandi bhakagamba ega, “Orukubha rubharukiri,” na abhandi bhakagamba ega, “Maraika12:29 Maraika. Maaha Bhamaraika mu Moonjooro eguru ya Amangʼana Amakongʼu. wa Waryubha arahaira nawe.” ³⁰Nawe, Yeesu akabhakeerya abhantu bhayo ega, “Eringʼana rinú mwaringa mureegwa ritaringi kurusumo rwani, nawe, ryaringa kurusumo rwenyu. ³¹Bhoono, rihikiri eribhaga rya Waryubha okubhabhuturira ekiina abhantu bha mukyaro kinu. Na rihikiri eribhaga rya Waryubha rya okukenyia Erisambwa12:31 Erisambwa. Maaha eringʼana rinu mu Moonjooro eguru ya Amangʼana Amakongʼu. rinú riratunga mukyaro hanu. ³²Oni hanú ndiriinibhwa, ndibharuta bhonsego, naho bhaaje kuoni.” ³³Yeesu yaagamba ego, okoorokya kya ego arikwa.

³⁴Mbe, omuganda gwa abhantu bhakamukyukya Yeesu ega, “Tureegwa mu Mangʼoore Amarabhu ega, Kiristu Omutuurya aribha omuhoru koko.12:34 Maaha mukitabho kya Egijabhuri 110:4. Bhoono, kwaki oragamba ega, abhantu bharimuriinʼya Omwana wa Adamu? Mbe, Omwana wa Adamu niwi?” ³⁵Yeesu akabhakeerya ega, “Endingaasi erabha hamwi na bheenyu kwa eribhaga ekego. Mugendererye okugenda mundingaasi inu eribhaga ekyari-ho, naho ekisunte kitariija okubhahiga, kwa okubha omuntu unú aragenda mukisunte, atakumanya enú aragya. ³⁶Mwisigire endingaasi iyo, eribhaga mukyari nayo, naho mubhe abhaana bha endingaasi.” Hanú Yeesu yaagamba gayo, akatiga omuganda gurya, akagya okwibhisa.

Abhayahudi abhaaru bharaanga okumwikirirya Yeesu

³⁷Onyoora Yeesu yaakora ebhika ebhyaru embere yaabho, kora ego abhantu abhaaru bhataamwikirirya. ³⁸Yaabha ego, naho gakunaane amangʼana ganú omurooti Isaaya yaagamba ega,

“Omukuru Waryubha, niwi unú yeekirirya amangʼana geetu?

Kweki, Omukuru amoorokerye owi eginguru gyaye?”12:38 Maaha mukitabho kya Isaaya 53:1.

³⁹Bhataatura okwikirirya, kwa okubha Waryubha yaagamba okuhitira kumurooti Isaaya ega,

⁴⁰“Ahokerye ameeso gaabho,

na okugikora emitima gyabho gibhe emikongʼu,

naho bhatarora kwa ameeso gaabho,

bhatamanya kwa emitima gyabho,

bhataaja bhanyihunjurire,

naho mbatuurye.”12:40 Maaha mukitabho kya Isaaya 6:10.

⁴¹Isaaya yaagamba gayo, kwa okubha yaarora obhukuru bhwa Yeesu na okugamba amangʼana eguru yaaye.

⁴²Kora ego, abhatungi abhaaru bha Abhayahudi bhakamwikirirya Yeesu, nawe, kwa ekisigo kya Abhafarisaayo12:42 Abhafarisaayo. Maaha eringʼana rinu mu Moonjooro eguru ya Amangʼana Amakongʼu. bhataagamba kubhurabhu ega, bhamwikiriirye, kwa okubha bhaaringa bharoobhoha okukenyibhwa mwisinagogi. ⁴³Abhatungi bhayo, bhaaringa bhahanjiri bhukongʼu okusuukwa na abhantu, okukira okusuukwa na Waryubha.

Abhantu bharibhuturirwa ekiinakwa amangʼana ganú Yeesu agambiri

⁴⁴Mbe, Yeesu akagamba kwa eriisi erinene ega, “Omuntu unú aranyikirirya oni, atakunyikirirya oni omwene, nawe, aramwikirirya na unú yantumiri. ⁴⁵Hanú arandora oni, aramurora na unú yantumiri. ⁴⁶Oni niijiri mukyaro munu kya endingaasi, naho kira omuntu unú aranyikirirya atige okubha mukisunte.

⁴⁷“Omuntu wowonse unú areetegeerera amangʼana gaani, nawe, atakugagwata, oni ntakumubhuturira ekiina. Ndagamba ego, kwa okubha ntaaja mukyaro munu okubhabhuturira abhantu ekiina, nawe, naaja okubhatuurya. ⁴⁸Omuntu wowonse unú aranyanga oni hamwi na amangʼana gaani, aribhuturirwa ekiina. Amangʼana ganú ndagamba, ngo garimubhuturira ekiina kurusiku rwa obhuteero. ⁴⁹Ntakugamba kwa obhutungi bhwani omwene, nawe, Taata unú yantumiri, ngʼo yantumiri okugamba, kya ego ndagamba. ⁵⁰Kweki, mmanyiri ega, eriragiriryo ryani rirabhahaana abhantu obhuhoru bhwa koko. Mbe, oni ndagamba ganú Taata yaantuma okugamba.”

Yeesu arabhoogya amaguru abheehigira bhaaye

¹Mbe, hanú enyangi ya Epasaka yaaringa ekyari okuhika, Yeesu akamanya ega, eribhaga ryaye rihikiri rya okwimuka mukyaro munu okugya kwi Esewaabho. Yeesu yaaringa abhahanjiri abhantu bhaaye bhanú bhaaringa mukyaro, kweki yaabhahanja okuhikira kubhuteero.

²Yeesu na abheehigira bhaaye bhakeekara okurya ebhyakurya bhya mugoroobha. Eribhaga riyo, Erisambwa ryaringa rimungʼeenereerye Yuda, omwana wa Simoni Esikariote, naho amuriire eniku Yeesu. ³Yeesu yaaringa amanyiri ega, Taata yaamuhaana obhutungi bhwa okubhitunga ebhintu bhyonsego. Kweki yaaringa amanyiri ega, yaarwa ku Waryubha, na ega, arihunjuka ku Waryubha. ⁴Mbe, hanú bhaaringa bhararya, Yeesu akeemirira, akaruusya enkanju yaaye, akagega etaahuro, akeesibhika mubhukende. ⁵Kimwi akahuma amanji mwibhakuri, akaamba okubhoogya abheehigira bhaaye amaguru, na okubheeya na etaahuro inú yaaringa yeesibhikiri.

⁶Hanú Yeesu yaamuhikiira Simoni Petero, Petero akamubhuurya ega, “Omukuru, bhoono oreenda okunyogya amaguru?” ⁷Yeesu akamukyukya ega, “Uuwe otakumanya ganú ndakora bhoonwego, nawe, origamanya eribhaga erindi.” ⁸Petero akamukyukya ega, “Otakutura kora orusiku rumwi, okunyogya amaguru gaani!” Yeesu akamukyukya ega, “Nyoore ntaakoogye uuwe, otakutura okubha hamwi na oni kweki.” ⁹Simoni Petero akamukyukya ega, “Omukuru, nyoore niigo, otanyogya amaguru ageenego, nawe, kora na amabhoko gaani hamwi na omutwe gwani.” ¹⁰Yeesu akamukyukya ega, “Omuntu unú yoogeri, atakwenderwa okooga kweki, nawe, okoogya amaguru okwenego. Uyo m-mungʼaru bhukongʼu. Na bheenyu m-bangʼaru, nawe, etaringi ega, m-bonsego.” ¹¹Yeesu yaaringa amumanyiri unú arimuriira eniku, nkyo kyakora akagamba ega, “Nawe, etaringi ega, m-bonsego.”

¹²Hanú Yeesu yaamara okubhoogya abheehigira bhaaye amaguru, akeebhoha enkanju yaaye, akeekara kweki okurya ebhyakurya, akabhabhuurya ega, “Bhoono, mumanyiri ganú mbakoreeri bheenyu? ¹³Bheenyu murambirikira oni ega, ‘Omwihigirya,’ kweki murambirikira ega, ‘Omukuru’. Muragamba obhuheene, kwa okubha oni m-Mwihigirya, na kweki m-Mukuru. ¹⁴Mbe, nyoore oni unú m-Mukuru na Omwihigirya weenyu, mboogerye amaguru geenyu, bheenyu bhonse mureenderwa mooganʼye amaguru. ¹⁵Mboorokeerye ekirengyo, naho na bheenyu bhonse mukorerane kya ego oni mbakoreeri. ¹⁶Ndabhakeerya obhuheene ega, omugaya ataringi omukuru okukira omukuru waaye, kweki unú aratumwa ataringi omukuru okukira unú aramutuma. ¹⁷Nyoore mugamanyiri gayo, mbe, Waryubha aribhanonka nyoore muragwata ekirengyo kinu.

¹⁸“Ntakugamba ganu kurusumo rwenyu bhonsego. Mbamanyiri abhantu bhanú nsoreri okubha abheehigira bhaani. Nawe, ngambiri ganu, naho gakunaane ganú gaangʼoorwa mu Mangʼoore Amarabhu ega, ‘Omuntu unú yaaringa ararya ebhyakurya hamwi na oni, yeehunjwiri okubha omusigu waani.’13:18 Maaha mukitabho kya Egijabhuri 41:9.¹⁹Ndabhakeerya ganu gonsego eribhaga gatareebhuka, naho hanú gariibhuka, muriikirirya ega, ‘Oni Nooni.’13:19 Oni Nooni. Hanu Yeesu areegamba kya ego Waryubha areegamba ku Riragano rya Akare. Maaha mubhitabho bhya Okuhuruka 3:14; Isaaya 43:10-11.²⁰Ndabhakeerya obhuheene ega, omuntu wowonse unú aramuturuungʼana unú mmutumiri, aranturuungʼana oni. Egoego, unú aranturuungʼana oni, aramuturuungʼana Taata unú yantumiri.”

Yeesu aragamba eguru ya unú arimuriira eniku

(Mataayo 26:20-25; Mariko 14:17-21; Ruuka 22:21-23)

²¹Hanú Yeesu yaamara okugamba gayo, akasurumbara bhukongʼu mumutima gwaye, akagamba aharabhu ega, “Ndabhakeerya obhuheene ega, oumwi gati yeenyu, yaakandiire eniku.” ²²Mbe, abheehigira bhaaye bhakaamba okumaahirirana, bhakaruguura, kwa okubha bhataamanya niwi unú Yeesu yaaringa aragamba. ²³Yaaringa-ho omwihigira oumwi, unú Yeesu yaaringa ahanjiri bhukongʼu. Weeki yaaringa yeekeeri haangʼi nawe. ²⁴Mbe, Simoni Petero akamusima omwihigira uyo, akamukeerya ega, “Mubhuurye Yeesu ega, aragamba eguru yawi gati yeetu.” ²⁵Mbe, omwihigira urya akeehegeka ku Yeesu, akamubhuurya ega, “Ee Omukuru, tukeerye niwi?” ²⁶Yeesu akamukyukya ega, “Ngʼ-unú nakahaane ekibhaara kya omukaate kinú nakatongye mukibhakuri.” Mbe, akagega ekibhaara kya omukaate akatongya mukibhakuri, akamuhaana Yuda, omwana wa Simoni Esikariote. ²⁷Yuda hanú yaamara okugega ekibhaara kiyo, Erisambwa rikamusoha. Kimwi, Yeesu akamukeerya ega, “Ganú oreenda okukora, gakore bhwangu!” ²⁸Nawe, atariho kora oumwi gati ya bhanú bhaaringa bhararya unú yaamanya ega, kwaki Yeesu amukeererye ego. ²⁹Kwa okubha Yuda ngʼo yaaringa arabhiika ensaho ya egimbirya, abhandi bhakeeganirirya ega, Yeesu amukeererye ega, agure bhinú bhireenderwa munyangi, kasi ega, abhahaane abhatobhu egimbirya. ³⁰Mbe, hanú Yuda yaagega ekibhaara kirya, rumwigo akahuruka kibhara. Eribhaga riyo, yaaringa obhutiku.

Yeesu arabhahaana abheehigira bhaaye eriragiriryo erihya

³¹Mbe, hanú Yuda yaahuruka kibhara, Yeesu akabhakeerya abheehigira bhaaye ega, “Bhoono obhukuru bhwa Omwana wa Adamu bhuringi haangʼi okumaahikana kubhurabhu. Kweki bhurimaahikana kubhurabhu obhukuru bhwa Waryubha okuhitira kumakorwa ga Omwana wa Adamu. ³²Kya ego obhukuru bhwa Waryubha bhuramaahikana okuhitira kumakorwa ga Omwana wa Adamu, mbe Waryubha wonse aribhoorokya abhantu obhukuru bhwa Omwana wa Adamu, na arikora ego bhwangu.

³³“Bheenyu abhaana bhaani abhahanje, ndibha na bheenyu kwa eribhaga ekego. Murintuna, nawe, kya ego naaringa mbakeererye abhatungi bha Abhayahudi, egoego ndabhakeerya na bheenyu bhoono ega, ahasi enú ndagya oni, bheenyu mutakunagya okuuja-yo. ³⁴Ndabhahaana eriragiriryo erihya, ‘Muhanjane. Kya ego oni mbahanjiri bheenyu, egoego na bheenyu muhanjane.’ ³⁵Nyoore muraahanjane, mbe abhantu bhonsego bharimanya ega, bheenyu m-beehigira bhaani.”

Yeesu araruusya obhurooti ega, Petero yaakamwange

(Mataayo 26:31-35; Mariko 14:27-31; Ruuka 22:31-34)

³⁶Mbe, Simoni Petero akamubhuurya Yeesu ega, “Omukuru, oragya-ha?” Yeesu akamukyukya ega, “Ndagya enú uuwe otakutura okunseeta bhoonwego, nawe, orinseeta eribhaga erindi.” ³⁷Petero akamubhuurya ega, “Ee Omukuru, kwa ekisigo-ki ntakutura okukuseeta bhoonwego? Oni ndikwa kurusumo rwaho!” ³⁸Yeesu akamukyukya ega, “Petero, m-maheene wiseemerye okukwa kurusumo rwani? Ndakukeerya obhuheene ega, eribhaga ensarigoko ekyari okuragura, wakabhe unyangiri mara kasatu.”

Enjira ya okugya ku Waryubha

¹Yeesu akagendererya okubheehigirya ega, “Mutakaasurumbara mumitima gyenyu, mumwikirirye Waryubha, kweki munyikirirye na oni. ²Muuna emenyo owa Taata. Nyoore etakaabheeri ego, nkaabhakeererye. Kwa okubha ndagya okubhaseemerya emenyo. ³Hanú ndimara okubhaseemerya emenyo, ndihunjuka kweki okubhagega, naho hanú ndingi, na bheenyu mubhe hayo. ⁴Bheenyu, mumanyiri enjira ya okuhika enú ndagya.”

⁵Kimwi, Tomaso akamubhuurya Yeesu ega, “Ee Omukuru, bheetu tutamanyiri enú oragya. Bhoono, turatura egaki okumanya enjira?” ⁶Yeesu akamukyukya ega, “Oni nooni enjira, na obhuheene, na obhuhoru. Atariho omuntu wowonse unú aratura okuuja ku Taata nyoore atarahitira kuoni. ⁷Nyoore mukaamanyiri oni, mbe mukaabheeri mumumanyiri na Taata. Okwambira bhoonwego, mumumanyiri, kweki mumuruuji.”

⁸Firipo akamukeerya ega, “Ee Omukuru, turakusabha otoorokye Taata, na riyo eryenego rireesa.” ⁹Yeesu akamukyukya ega, “Firipo, neekara hamwi na bheenyu eribhaga eritambi, kora mukyari okumanya oni? Omuntu wowonse unú yaanduuji oni, amuruuji Taata. Bhoono, kwaki orambuurya ega, ‘Toorokye Taata?’ ¹⁰Bhoono, otakwikirirya ega, oni ndingi munsi wa Taata, na Taata aringi munsi yaani? Amangʼana ganú ndabhakeerya gatakurwa mumeetegeerero gaani, nawe, Taata, unú aringi munsi waani, ngʼo arakora emirimu gyaye. ¹¹Mwikirirye ganú ndabhakeerya ega, oni ndingi munsi ya Taata, na Taata aringi munsi waani. Nawe, nyoore bheenyu mutakwikirirya gayo, mbe, mwikirirye kwa ekisigo kya emirimu ginú ndakora. ¹²Ndabhakeerya obhuheene ega, omuntu wowonse unú aranyikirirya, emirimu ginú ndakora wonse arigikora. Kweki arikora emirito okukira ginú oni ndakora, kwa okubha ndagya ku Taata. ¹³Nyoore murasabha ekintu kyokyonse kwa eriina ryani, ndikikora kya ego murasabha, naho obhukuru bhwa Taata bhumaahikane okuhitira ku Mwana waaye. ¹⁴Nyoore muransabha ekintu kyokyonse kwa eriina ryani, ndikora kya ego murasabha.

Yeesu arahaira kweki eguru ya okuuja kwa Omutima Omurabhu

¹⁵“Nyoore muraanhanje, muraagwate emigiro gyani. ¹⁶Mbe, na oni ndimusabha Taata, wonse aribhahaana Omubheeri oundi,14:16 Omubheeri oundi. Rinu ni-riina erindi rya Omutima Omurabhu. Kwa obhoonjoori obhundi bhwa Omutima Omurabhu, maaha eringʼana rinu mu Moonjooro eguru ya Amangʼana Amakongʼu. naho abhe hamwi na bheenyu, eginsiku gyonsego. ¹⁷Uyo ngʼo Omutima unú aribhatubhurira abhantu obhuheene. Abhantu bhanú bharamwanga Waryubha, bhatakutura okunyoora Omutima uyo, kwa okubha bhatakumurora, kweki bhatamumanyiri. Nawe, bheenyu mumanyiri Omutima uyo, kwa okubha areekara hamwi na bheenyu, kweki aribha munsi yeenyu.

¹⁸“Ntaribhatiga bheenyu abheene kya abhataka, nawe ndiija kweki kubheenyu. ¹⁹Rikyari eribhaga ekego ntarimaahikana kweki mukyaro kinu. Nawe, bheenyu murindora. Kwa okubha oni m-muhoru, na bheenyu muribha abhahoru. ²⁰Orusiku ruyo, murimanya ega, oni ndingi munsi wa Taata, na bheenyu muringi munsi waani, na oni ndingi munsi weenyu. ²¹Omuntu wowonse unú aragwata emigiro gyani, uyo ngʼo yaanhanjiri. Na unú yaanhanjiri, Taata wonse aramuhanja. Na oni ndimuhanja na okwiyorokya kumwene.”

²²Mbe, omwihigira oumwi eriina ryaye Yuda, ataringi Yuda Esikariote, akamubhuurya Yeesu ega, “Ee Omukuru, eraturikana egaki okwiyorokya kubheetu, nawe, otakwiyorokya kubhantu abhandi bhonsego?” ²³Yeesu akamukyukya ega, “Omuntu wowonse akaanhanja, arigakora ganú naamukeerya. Taata arimuhanja, kweki oni na Taata turiija kumwene na okwikara hamwi nawe. ²⁴Nawe, omuntu wowonse unú atanhanjiri, atakukora ganú naamukeerya. Kweki, ganú ndabharagirirya gataringi gaani, nawe, gararwa ku Taata unú yaantuma kubheenyu.

²⁵“Mbakeererye gonsego gayo eribhaga nkyari hamwi na bheenyu. ²⁶Nawe, Omubheeri uyo, Omutima Omurabhu, unú Taata arituma kubheenyu kwa eriina ryani, aribheehigirya na okubhahiitukya gonsego ganú naaringa mbakeererye. ²⁷Hanú ndiimuka, ndibhatigira omurembe, omurembe gwani gunu ndabhahaana. Omurembe guyo gutaringi kya gunú gurarwa kubhantu bhanú bharamwanga Waryubha. Mutasurumbara mumitima gyenyu, kweki mutoobhoha kyokyonse. ²⁸Mwigwiri ganú ndabhakeerya ega, ‘Ndagya, nawe, ndiija kweki kubheenyu.’ Nyoore heene munhanjiri, mukaabheeri murajomerwa okwigwa ega, ndagya ku Taata, kwa okubha Taata m-mukuru okunkira oni.

²⁹“Mbakeererye gonsego gayo bhoonwego, eribhaga amangʼana gayo gakyari okumaahikana, naho hanú gariibhuka munyikirirye. ³⁰Ntakutura okugamba na bheenyu eribhaga eritambi, kwa okubha Erisambwa rinú riratunga mukyaro hanu riraaja. Nawe, ritaana obhuturo eguru yaani. ³¹Ganú Taata yaandagirirya okukora, ngo ndakora, naho abhantu bhonsego bhamanye ega, nhanjiri Taata.

“Bhoono, mwimuke, turwe hanu.”

Yeesu m-mujabhibhu gwa heene

¹Yeesu akagendererya okubheehigirya ega, “Oni nooni omujabhibhu gwa heene, na Taata ngʼo omurimi. ²Kira erisagi munsi yaani rinú ritakwama emisumo, Taata arariruusya-ho. Nawe, kira rinú riraama emisumo, Taata arariharurirya, naho ryame bhukongʼu. ³Bheenyu mwamariri okubha abhajomu, kwa okubha mweekirirya ameehigiryo gaani. ⁴Mwikare munsi yaani, na oni nikare munsi yeenyu. Kya ego erisagi ritakutura okwama emisumo eryenego bira okubha kumujabhibhu, egoego na bheenyu mutakutura okwibhura emisumo bira okwikara munsi yaani.

⁵“Oni m-mujabhibhu, na bheenyu m-masagi. Omuntu unú areekara munsi yaani, na oni nikare munsi yaaye, uyo aribha areebhura emisumo emyaru, kwa okubha bira oni, mutakunagya okukora ryoryonse. ⁶Omuntu wowonse unú atakwikara munsi yaani, areeswa kibhara kya erisagi rinú rireeswa kibhara na okooma. Mbe, abhantu bhararibhooja na okuryesa mumururo, rirarungura. ⁷Nyoore mureekare munsi yaani na amangʼana gaani geekare munsi weenyu, mbe kyokyonse kinú mureenda, musabhe Taata arabhahaana. ⁸Nyoore mureebhura emisumo emyaru na okubha abheehigira bhaani bha heene, hayo muribha muroorokya harabhu obhukuru bhwa Taata. ⁹Kya ego Taata yaanhanjiri oni, niigo na oni mbahanjiri bheenyu. Mbe mwikare mubhuhanje bhwani. ¹⁰Mukaagwata amaragiriryo gaani, mureekare mubhuhanje bhwani, kya ego oni naagwata amaragiriryo ga Taata na okwikara mubhuhanje bhwaye.

¹¹“Mbakeererye ganu, naho obhujomerwa bhwani bhubhe munsi weenyu, na obhujomerwa bhwenyu bhukunaane. ¹²Eriragiriryo ryani n-dinu, muhanjane kya ego oni mbahanjiri bheenyu. ¹³Atariho omuntu unú yaana obhuhanje okukira bhunu, obhwa omuntu okuruusya obhuhoru bhwaye kurusumo rwa abhasaani bhaaye. ¹⁴Nyoore murakora ganú ndabharagirirya, bheenyu murabha abhasaani bhaani. ¹⁵Ntakubhabhirikira kweki abhagaya, kwa okubha omugaya atamanyiri kinú omukuru waaye arakora. Nawe, bheenyu mbatubhuriiri gonsego ganú neegwa okurwa ku Taata, kwa ego ndaabhabhirikirenga ega, abhasaani bhaani. ¹⁶Etaringi ega, bheenyu mbo mwansora oni, nawe, nooni naabhasora bheenyu. Naabhasora, naho mwibhure emisumo ginú gitakuhwa. Mukaakora ego, gonsego ganú murasabha kwa eriina ryani, Taata arabhahaana. ¹⁷Mbe, ndabharagirirya bheenyu ega, muhanjane.”

Abhantu bha mukyaro munu bharabhabhihirirwabhanú bharamwikirirya Yeesu

¹⁸Yeesu akagendererya okubheehigirya ega, “Nyoore abhantu bha mukyaro munu bharabhabhihirirwa bheenyu, mumanye ega, bhaakangata okumbihirirwa oni. ¹⁹Nyoore mukaabheeri abhantu bha mukyaro munu, mbe abhantu bhayo, bhakaabhahanjiri, kya ego bhabhahanjiri abhantu bhaabho. Bheenyu mutaringi bha mukyaro munu, nawe, mbasoreri okurwa mukyaro munu. Nkyo kirakora abhantu bha mukyaro munu bharabhabhihirirwa. ²⁰Muhiituke eringʼana rinú naabhakeerya ega, ‘Omugaya ataringi omukuru okukira omukuru waaye.’ Mbe, nyoore bhaannyankya oni, mbaribhanyankya na bheenyu bhonse. Nawe, nyoore bhareekirirya ameehigiryo gaani, bhariikirirya na ageenyu gonse. ²¹Nawe, bharibhakorera gonsego gayo, kurusumo rwa okunsoorana oni, kwa okubha bhatamanyiri unú yaantuma. ²²Nyoore ntakaajiri na okuhaira nabho, mbe bhatakaabheeri na obhusarya. Nawe, bhoono, bhatakutura okwibhagirira ega, bhataana obhusarya. ²³Omuntu wowonse unú arambihirirwa oni, aramubhihirirwa na Taata wonse. ²⁴Naakora ebhika ebhinene bhinú ataakakoreri omuntu wowonse. Nyoore bhatakaabhiruuji, bhatakaabheeri na obhusarya. Nawe bhoono, bharuuji gonsego ganú naakora, kora ego bhakyambihiriirwe, na bhamubhihiriirwe Taata wonse. ²⁵Gayo gakorekeri, naho gakunaane ganú gaangʼoorwa mu Mangʼoore Amarabhu ega, ‘Bhaamubhihirirwa bhusa.’15:25 Maaha mukitabho kya Egijabhuri 35:19, 69:4.

²⁶“Ndamutuma kubheenyu Omubheeri, unú m-Mutima Omurabhu, wa okubhatubhurira abhantu bhonsego obhuheene. Ararwa ku Taata, na hanú arihika kubheenyu, aribhatubhurira obhuheene eguru yaani. ²⁷Kweki na bheenyu bhonse muriimiririra amangʼana gaani, kwa okubha mwaringa hamwi na oni okurwa kubhwambiro.

¹“Mbakeererye amangʼana gonsego gayo, naho mutatiga okunyikirirya. ²Abhantu bharibha bharabhaahura bheenyu mumasinagogi. Ririija eribhaga rinú kira omuntu unú aribheeta, ariiganirirya ega, arakora emirimu gya Waryubha. ³Bharibhakorera ego, kwa okubha bhatamumanyiri Taata, na kora oni nonse bhataammanyiri. ⁴Mbakeererye gayo, naho eribhaga ryabho rya okukora gayo hanú ririhika, muhiituke ega, naabhakeerya.

Emirimu gya Omutima Omurabhu

“Ntaabhakeerya gayo gonsego kubhwambiro, kwa okubha naaringa hamwi na bheenyu. ⁵Mbe bhoono, ndagya ku Taata, uyo ngʼo yaantuma kubheenyu. Nawe, atariho wowonse gati yeenyu owa okumbuurya ega, ‘Bhoono, oragya-ha?’ ⁶Musurumbeeri bhukongʼu mumitima gyenyu, kwa okubha mbakeererye ega, ndagya ku Taata.

⁷“Ndabhakeerya obhuheene ega, m-bujomu kubheenyu oni ngye ku Taata. Nyoore ntaagye, Omubheeri urya atakutura okuuja kubheenyu. Nawe, hanú oni ndigya, ndimutuma kubheenyu. ⁸Hanú ariija, aribha arabhoorokya abhantu bhonsego ega, m-bakori bha obhusarya, na ega, oni m-muheene, kweki ega, Waryubha ariija okubhabhuturira ekiina. ⁹Aribha arabhoorokya ega, bheeki m-bakori bha obhusarya, kwa okubha bhatakunyikirirya oni. ¹⁰Aryorokya ega, oni m-muheene, kwa okubha ndagya ku Taata na mutarindora kweki. ¹¹Aribha arabhoorokya aharabhu ega, Waryubha aribhabhuturira ekiina, kwa okubha abhuturiiri ekiina Erisambwa rinú riratunga mukyaro hanu.

¹²“Nkyari na amangʼana amaaru ga okubhakeerya, nawe, kwibhaga rinu mutakutura okugeegumirirya. ¹³Hanú ariija Omutima Omurabhu, aribhoorokererya obhuheene bhonsego. Atarigamba kwa obhutungi bhwaye omwene, nawe, arigamba ganú yeegwa na okubhakeerya ganú garimaahikana. ¹⁴Omutima Omurabhu uyo aribha arabhoorokya obhukuru bhwani, kwa okubha aribhakeerya gonsego ganú ariigwa okurwa kuoni. ¹⁵Ebhintu bhyonsego bhinú Taata yaanabhyo, m-byani. Nkyo kirakora ndagamba ega, Omutima uyo, aribhakeerya gonsego ganú aribha areegwa okurwa kuoni.

Okusurumbara kurihunjurwa kubhe okujomerwa

¹⁶“Rikyari eribhaga ekego na bheenyu mutarindora, kweki hanú eribhaga ekego ririhwa, murindora.” ¹⁷Mbe, abheehigira bhaaye abhandi bhakabhuuranʼya ega, “Bhoono, ensonga yaaye niki hanú aragamba ega, ‘Rikyari eribhaga ekego na bheenyu mutarindora, kweki eribhaga ekego murindora,’ na ega, ‘Ndagya ku Taata’?” ¹⁸Kweki, bhakagendererya okubhuuranʼya ega, “Ensonga ya ‘Eribhaga ekego’ niki? Bheetu tutakumanya ganú aragamba.” ¹⁹Yeesu akamanya ega, bheendanga okumubhuurya ganú agambiri, kimwi akabhabhuurya ega, “Bhoono, murabhuuranʼya ganú ngambiri ega, ‘Rikyari eribhaga ekego na bheenyu mutarindora, na hanú ririhwa eribhaga ekego murindora kweki?’ ²⁰Ndabhakeerya obhuheene ega, bheenyu murikuura na okusurumbara, nawe, abhantu bha mukyaro munu bharijomerwa. Murisurumbara, nawe, obhusurumbaru bhwenyu bhurihunjura okubha obhujomerwa. ²¹Omukari hanú aratuna okwibhura arasurumbara, kwa okubha eribhaga rya enyanko yaaye rihikiri. Nawe, hanú aramara okwibhura, atakuhiituka kweki enyanko iyo, kwa ekisigo kya obhujomerwa bhwa okwibhurwa omwana mukyaro. ²²Bheenyu bhonse musurumbeeri kwa eribhaga rinu. Nawe, ndiija kweki kubheenyu, mbe, murijomerwa mumitima gyenyu. Atariho omuntu unú ariruusya-ho obhujomerwa bhuyo mumitima gyenyu. ²³Kweki hanú eribhaga riyo rihikiri, mutarimbuurya eringʼana ryoryonse.

“Ndabhakeerya obhuheene ega, gonsego ganú murasabha kwa eriina ryani, Taata aribhahaana. ²⁴Okuhikira bhoonwego, mutarasabha kyokyonse ku Waryubha okutumira eriina ryani. Musabhe Waryubha, na bheenyu murinyoora. Kwa enjira iyo, murigendererya okubha na obhujomerwa bhukongʼu mumitima gyenyu.

Yeesu ahigiri eginguru egimbiibhi gya mukyaro

²⁵“Mbakeererye amangʼana gayo gonsego kwa enjira ya ebhirengyo. Eribhaga riraaja rinú ntarihaira na bheenyu kwa enjira ya ebhirengyo, nawe, ndibhakeerya aharabhu eguru ya Taata. ²⁶Kwibhaga riyo, muritumira eriina ryani okumusabha Waryubha. Ntakugamba ega, oni ndibhasabhira ku Taata. ²⁷Taata omwene abhahanjiri bheenyu, kwa okubha bheenyu munhanjiri oni, kweki mureekirirya ega, naarwa ku Taata. ²⁸Naaja mukyaro munu okurwa ku Taata, nawe, bhoono, ndarwa mukyaro munu, ndahunjuka ku Taata.” ²⁹Mbe, abheehigira bhaaye bhakamukeerya ega, “Bhoono wambiri okugamba na bheetu harabhu bira okutumira ebhirengyo! ³⁰Bhoono mbe, tumanyiri ega, omanyiri amangʼana gonsego, kweki otakwenda omuntu akubhuurye ryoryonse. Gayo ngo gatukoreri okwikirirya ega, waarwa ku Waryubha.” ³¹Yeesu akabhabhuurya ega, “Bhoono mwambiri okwikirirya? ³²Eribhaga riringi haangʼi, kweki riringi haangʼi bhukongʼu, hanú bhonsego murinyaragana. Bhonsego murigya oweenyu, na okuntiga oni omwene. Nawe, ntaribha oni omwene, kwa okubha Taata aringi hamwi na oni. ³³Ndabhakeerya amangʼana gayo gonsego, naho mubhe na omurembe mumitima gyenyu, kwa okubha muringi munsi waani. Mukyaro munu murinyoora enyanko enjaru, nawe, mutoobhoha, kwa okubha oni nkihigiri ekyaro.”

Yeesu aramusabha Waryubha

¹Hanú Yeesu yaamara okugamba gayo gonsego, akamaahirira murwire, akasabha ega,

“Ee Taata, eribhaga rihikiri. Obhoorokye abhantu obhukuru bhwa Omwana waaho, naho Omwana wonse abhoorokye obhukuru bhwaho kya ego bhuringi. ²Ungʼeeri obhutungi eguru ya abhantu bhonsego, naho mbahaane obhuhoru bhwa koko bhonsego bhanú waangʼaana. ³Obhuhoru bhwa koko mbo bhunu, abhantu bhakumanye uuwe, unú ngʼ-Waryubha owa heene omwenego, kweki bhamanye oni Yeesu Kiristu, unú waantuma kubheene. ⁴Oni noorokerye obhukuru bhwaho kubhantu bhonsego mukyaro hanu, kwa okukunaanʼya emirimu ginú waantuma okugikora. ⁵Ee Taata, ndasabha ungʼaane obhukuru haangʼi na uuwe, obhukuru bhunú naaringa nabho eribhaga rinú twaringa hamwi, kora ekyaro kitarabhumbwa.

Yeesu arabhasabhira abheehigira bhaaye

⁶“Ee Taata, nkutubhwiri kya ego oringi uuwe kubhantu bhanú ungʼeeri mukyaro hanu. Bheeki bhaaringa bhaaho, uuwe okangʼaana oni, bhonse bhagwatiri eringʼana ryaho. ⁷Bhoono mbe, bhamanyiri ega, ebhintu bhyonsego bhinú waangʼaana, bhyarwa kuuwe, ⁸kwa okubha mbakeererye gonsego ganú waankeerya, bhonse bhageekiriirye. Bhamanyiri obhuheene ega, naarwa kuuwe, kweki bheekiriirye ega, nuuwe waantuma. ⁹Ndabhasabhira bhayo, ntakusabhira ekyaro, nawe, ndabhasabhira abhantu bhanú waangʼaana kwa okubha m-baaho. ¹⁰Abhantu bhaani bhonsego, m-baaho, kweki abhantu bhaaho bhonsego, m-baani. Obhukuru bhwani bhumaahikeeni kubhantu, okuhitira kubhanú waangʼaana. ¹¹Oni ntaribha kweki mukyaro munu, nawe, bhoono ndaaja kuuwe. Nawe, bheeki bharigendererya okubha mukyaro hanu. Taata Omurabhu, ndakusabha obhaangararire kwa obhuturo bhwa eriina ryaho rinú ungʼeeri, naho bhabhe ekintu kimwi, kya ego oni na uuwe turingi ekintu kimwi. ¹²Hanú naaringa hamwi nabho naabhaangararira kwa obhuturo bhwa eriina ryaho, rinú waangʼaana. Naabhaangararira bhujomu, naho ntabhurya kora oumwi gati yaabho, okutiga unú areenderwa okusikibhwa, naho gakunaane ganú gaangʼoorwa mu Mangʼoore Amarabhu.17:12 Maaha mukitabho kya Egijabhuri 41:9.

¹³“Taata, bhoono ndaaja kuuwe. Oni ndabhakeerya abheehigira bhaani gonsego gayo, eribhaga nkyari mukyaro kinu, naho bhabhe na obhujomerwa bhwani bhonsego mumitima gyabho. ¹⁴Mbakeererye abheehigira bhaani amangʼana ganú waangʼaana. Nawe, abhantu bha mukyaro munu bharabhabhihirirwa, kwa okubha bheeki bhataringi bha mukyaro hanu, kya ego oni ntaringi wa mukyaro hanu.

¹⁵“Taata, ntakusabha ega, obharuusye mukyaro hanu, nawe ega, obhatuurye na omusarya urya Erisambwa. ¹⁶Bheeki bhataringi bha mukyaro munu, kya ego oni ntaringi wa mukyaro munu. ¹⁷Taata, ndakusabha obhakore okubha abhantu bhaaho kimwi, kubhuheene bhwaho, kwa okubha eringʼana ryaho ndyo obhuheene. ¹⁸Kya ego waantuma oni mukyaro, egoego na oni mbatumiri bheeki mukyaro. ¹⁹Niruusirye oni omwene kuuwe, kurusumo rwabho, naho bheeruusye kubhuheene bhwaho.

Yeesu arabhasabhira bhanú bharamwikirirya

²⁰“Ntakubhasabhira bhayo abheenego, nawe, ndabhasabhira kora bhonsego bhanú bharinyikirirya kwa ekisigo kya ganú abheehigira bhaani bhareehigirya. ²¹Ndasabha ega, bhayo bhabhe ekintu kimwi. Taata, ndasabha bhabhe munsi weetu, kya ego uuwe oringi munsi waani, na oni ndingi munsi yaaho. Ndasabha ega, bhabhe ekintu kimwi, naho abhantu bha ekyaro bheekirirye ega, nuuwe waantuma. ²²Obhukuru bhunú waangʼaana oni, mbaheeri abheehigira bhaani, naho bhabhe ekintu kimwi, kya ego oni na uuwe turingi ekintu kimwi. ²³Oni mbe munsi waabho, kya ego uuwe oringi munsi yaani. Kwa ego, ndasabha ega, bhakunaane kubhumwi bhwabho, naho abhantu bhonsego bha mukyaro bhamanye ega, nuuwe waantuma, kweki bhamanye ega, obhahanjiri kya ego unhanjiri oni.

²⁴“Taata, ndeegomba ega, bhanú ungʼeeri bhabhe hamwi na oni hanú ndibha, naho bhabhurore obhukuru bhwani bhunú waangʼaana, kwa okubha waanhanja kora ekyaro kitarabhumbwa. ²⁵Taata wa heene, abhantu bha mukyaro munu bhatakumanyiri. Nawe, oni nkumanyiri, kweki abheehigira bhaani bhamanyiri ega, nuuwe waantuma. ²⁶Oni mbeehigiirye kya ego uuwe oringi, kweki ndagendererya okukora ego, naho bhahanjane kya ego unhanjiri oni, na oni mbe munsi waabho.”

Abhatungi bha Abhayahudi bharamugwata Yeesu

(Mataayo 26:47-56; Mariko 14:43-50; Ruuka 22:47-53)

¹Hanú Yeesu yaamara okusabha, akeemuka na abheehigira bhaaye, akaambuka eriteka rya Keduroni, akahika hanú gwaringa omugunda gwa emijeituni, bhakasoha muyo.

²Mbe, Yuda unú yaaringa areenda okumuriira eniku Yeesu, yaaringa agumanyiri omugunda guyo, kwa okubha Yeesu yaaringa anariri okugya muyo mara kaaru hamwi na abheehigira bhaaye. ³Kwa ego, akoorokererya omuganda gwa abhasirikare bha Ekiruumi, hamwi na abhakori bha emirimu okurwa kubhasyengeri abhakuru na ku Bhafarisaayo. Bhakagya mumugunda guyo, bhagwatiriri egikorobhoi, emyenge na ebhigwato.

⁴Yeesu yaaringa amanyiri gonsego ganú gaaringa gareendwa okukoreka kumwene. Mbe, akeemuka akabhabhuurya abhantu bhanú bhaaringa bhaajiri ega, “Bhoono, niwi muratuna?” ⁵Bheeki bhakamukyukya ega, “Turamutuna Yeesu wa Najareeti.” Yeesu akabhakyukya ega, “Oni Nooni.”18:5 Oni Nooni. Hanu Yeesu aratumira eriina rya Waryubha kya ego ringʼoorerwe mubhitabho bhya Okuhuruka 3:14 na Isaaya 43:10-11.

Yuda unú yaamuriira Yeesu eniku yaaringa yeemiriiri na abhasirikare bhayo. ⁶Mbe, hanú Yeesu yaabhakeerya ega, “Oni nooni,” abhasirikare bharya bhakahunjuka enyuma na okugwa hansi. ⁷Yeesu akabhabhuurya kweki ega, “Niwi muratuna?” Bheeki bhakamukyukya ega, “Turatuna Yeesu wa Najareeti.” ⁸Yeesu akabhakeerya ega, “Mbakeererye ega, nooni. Nyoore nooni muratuna, mbe mubhatige abhantu bhanú bharingi hamwi na oni bhagende.” ⁹Yeesu yaagamba ego, naho gakunaane ganú yaagamba kubhwambiro ega, “Naaringa ndabhaangararira bhujomu, naho ntabhurya kora oumwi kubhanú waangʼaana.”18:9 Maaha mukitabho kya Yoana 6:39, 17:12.

¹⁰Simoni Petero, yaaringa na omuhyu, mbe akagusomora, akamukebha okutwi kwa obhuryo omukori wa emirimu wa omusyengeri omukuru. Omukori wa emirimu uyo, eriina yaaye yaabhirikirwanga Mariko. ¹¹Nawe, Yeesu akaamura Petero ega, “Petero, hunjukya omuhyu gwaho mukyubhu. Bhoono, otamanyiri ega, ndeenderwa okunyankibhwa kya ego Taata yaaseemya, naho nnyankibhwe?”18:11 Bhoono, otamanyiri ega, ndeenderwa okunyankibhwa kya ego Taata yaaseemya, naho nnyankibhwe? Ekiyunani kiragamba ega, Ntariija okunywera ekikombe kinú Taata yangʼeeri, naho nnywe?

Abhatungi bha Abhayahudi bharamuhira Yeesu embere ya Anasi

(Mataayo 26:57-58; Mariko 14:53-54; Ruuka 22:54)

¹²Mbe, omukuru wa abhasirikare, hamwi na omuganda gwaye, na abhakori bha emirimu bha abhatungi bha Abhayahudi, bhakamugwata Yeesu, bhakamubhoha. ¹³Mbe, bhakamuhira mbere ku Anasi, unú yaaringa esebhyara waabho Kayafa. Kayafa uyo, ngʼo yaaringa omusyengeri omukuru kwibhaga riyo. ¹⁴Kuginsiku gya enyuma, Kayafa ngʼo yaabhatongera abhatungi bha Abhayahudi ega, nyakara omuntu oumwi akwe kurusumo rwa abhantu bhonsego.18:14 Maaha mukitabho kya Yoana 11:50.

Petero aramwanga Yeesu

(Mataayo 26:58, 26:69-70; Mariko 14:54, 14:66-68; Ruuka 22:55-57)

¹⁵Simoni Petero na omwihigira oundi, bhaaringa bharamusoorana Yeesu. Omwihigira oundi uyo, omusyengeri omukuru yaaringa amumanyiri. Kwa ego, akasoha na Yeesu murubhanja rwa enyumba ya omusyengeri omukuru. ¹⁶Nawe, Petero akeemirira kibhara kukiseku. Nho, omwihigira oundi unú omusyengeri omukuru yaaringa amumanyiri, akahuruka kibhara. Akahaira na omuhara oumwi unú yaaringa ararinda mukiita, akamwikiririrya Petero asohe murubhanja.

¹⁷Mbe, omwangarariri urya, akamubhuurya Petero ega, “Bhoono, na uuwe wonse otari oumwi wa abheehigira bha omuntu uyo?” Petero akamukyukya ega, “Tiigo-ha kora ahake, ntari oni.”

¹⁸Kwa okubha haaringa na embeho, abhagaya na abhakori bha emirimu bharya bhaaringa bhagwatirye omururo gwa amakara, bhakabha bharoota omururo. Petero wonse yaaringa yeemiriiri hamwi nabho, aroota omururo.

Omusyengeri omukuru arabhuurya Yeesu amabhuuryo

(Mataayo 26:59-66; Mariko 14:55-64; Ruuka 22:66-71)

¹⁹Mbe, omusyengeri omukuru uyo, eriina ryaye yaabhirikirwanga Anasi, akamubhuurya Yeesu eguru ya abheehigira bhaaye na ameehigiryo gaaye. ²⁰Yeesu akamukyukya ega, “Eribhaga ryonsego naaringa ndagamba kubhantu bhonsego aharabhu, naaringa ndeehigirya abhantu mumasinagogi18:20 Mumasinagogi. Maaha Erisinagogi mu Moonjooro eguru ya Amangʼana Amakongʼu. geenyu na murubhanja rwa erisyengerero munú Abhayahudi abhaaru bharasanga hamwi. Neehigirya ameehigiryo gaani gonsego aharabhu. ²¹Bhoono kwaki murambuurya oni? Mbe, kwaki mutakubhuurya abhantu bhanú bhaaringa bharanyitegeerera hanú naaringa ndeehigirya? Bheeki bhagamanyiri ganú naaringa ndagamba na okwihigirya.” ²²Hanú Yeesu yaagamba gayo, omusirikare oumwi unú yaaringa yeemiriiri haangʼi nawe, akamutema erikoofi, akamubhuurya ega, “Kwaki oramukyukya ego omusyengeri omukuru?” ²³Yeesu akamukyukya ega, “Nyoore ngambiri bhubhiibhi, yoorokya obhubhiibhi bhwani. Nawe, nyoore ngambiri obhuheene, bhoono, kwaki orantema?” ²⁴Mbe, hanú Yeesu yaaringa akyabhoherwe, Anasi akaamura ega, bhamuhire kumusyengeri omukuru, Kayafa.

Petero aramwanga Yeesu kweki

(Mataayo 26:71-75; Mariko 14:69-72; Ruuka 22:58-62)

²⁵Mbe, hanú Simoni Petero yaaringa yeemiriiri akyoota omururo, abhantu nyabhurebhe bhakamubhuurya ega, “Bhoono, na uuwe tu-umwi wa abheehigira bha omuntu urya?” Petero akaanga ega, “Tiigo-ha kora ahake, ntari oni.” ²⁶Nawe, oumwi wa abhakori bha emirimu bha omusyengeri omukuru unú yaaringa omuhiiri wa omuntu urya Petero yaakebha okutwi, akamubhuurya ega, “Bhoono, oni ntaakurora hanú waaringa hamwi na Yeesu mumugunda?” ²⁷Petero akaanga kweki ega, “Ntari oni.” Rumwigo, ensarigoko ekaragura.

Abhatungi bha Abhayahudi bharamuhira Yeesu ku Pirato

(Mataayo 27:1-2, 27:11-14; Mariko 15:1-5; Ruuka 23:1-5)

²⁸Mbe, hanú bhwakya, abhatungi bha Abhayahudi bhakamugega Yeesu okurwa ku Kayafa. Bhakagya nawe, mumenyo enkuru ya omwanangwa wa Ekiruumi. Nawe, bheeki bhataasoha munyumba, naho bhateekonʼya na okutiga okurya ebhyakurya bhya enyangi ya Epasaka.18:28 Okurekana na egimiira gya Abhayahudi, nyoore Omuyahudi asoheri munyumba ya omuntu unú ataringi Omuyahudi arabha omukonu, atakaaturiri okurya ebhyakurya bhya enyangi ya Epasaka.²⁹Mbe, omwanangwa wa Ekiruumi, eriina ryaye Pirato, akahuruka kibhara na okugya hanú bhaaringa, akabhabhuurya ega, “Bhoono, omuntu unu akoreri obhusarya-ki bhunú muramujongera?” ³⁰Bheeki bhakamukyukya ega, “Nyoore omuntu unu atakaabheeri na obhusarya, tutakaamureeteri kuuwe.” ³¹Pirato akabhakeerya ega, “Mbe, bheenyu mumugege mumubhuturire ekiina okurekana na amaragiriryo geenyu.” Nawe, Abhayahudi bhakamukyukya ega, “Tutaana obhutungi bhwa okumubhuturira ekiina omuntu wowonse ega, akwe.” ³²Gayo gaakoreka ego, naho amangʼana ganú Yeesu yaagamba gakunaane okoorokya kya ego arikwa.

Pirato arabhuurya Yeesu amabhuuryo

³³Mbe, Pirato akasoha kweki munyumba, akaamura ega, bhamuhire Yeesu kumwene, akamubhuurya ega, “Bhoono, uuwe m-Mukama wa Abhayahudi?” ³⁴Yeesu akamukyukya ega, “Bhoono, ganú orambuurya gararwa mumeetegeerero gaaho kasi abhantu abhandi bhakukeererye amangʼana eguru yaani?” ³⁵Pirato akamukyukya ega, “Mbe, oni m-Muyahudi? Abhantu bha mukyaro kyaho hamwi na abhasyengeri abhakuru mbo bhakureeteri kuoni, naho nkubhuturire ekiina. Bhoono, m-busarya-ki okoreri?” ³⁶Yeesu akamukyukya ega, “Obhukama bhwani18:36 Obhukama bhwani. Maaha Obhukama bhwa Waryubha mu Moonjooro eguru ya Amangʼana Amakongʼu. bhutaringi bhwa mukyaro munu. Nyoore bhukaabheeri bhwa mukyaro munu, mbe abheehigira bhaani bhakaandwaniiri, naho ntagwatwa na Abhayahudi. Nawe, obhukama bhwani bhutaringi bhwa mukyaro munu.”

³⁷Mbe, Pirato akamubhuurya ega, “Bhoono mbe, m-maheene ega, uuwe m-mukama?” Yeesu akamukyukya ega, “Nuuwe ogambiri ega, oni m-mukama. Oni neebhurwa na okuuja mukyaro munu, naho mbeehigirye abhantu obhuheene. Omuntu wowonse unú arakora obhuheene, arageegwa amangʼana gaani.” ³⁸Pirato akamubhuurya ega, “Obhuheene niki?”

Hanú Pirato yaagamba gayo, akahuruka kweki kibhara, akabhakeerya abhatungi bha Abhayahudi ega, “Oni ntararora obhusarya bhobhonse bhwa okujongera omuntu unu. ³⁹Nawe, muuna emiira ya okunsabha okubhahaatirira omubhohwa oumwi, eribhaga rya enyangi ya Epasaka. Bhoono, mureenda mbahaatirire Omukama wa Abhayahudi?” ⁴⁰Nho, abhantu bhonsego bhakatema ekituri bharagamba ega, “Tiigo-ha kora ahake! Otatuhaatirira omuntu uyo, nawe, otuhaatirire Bharaabha.” Bharaabha yaaringa abhoherwe mwigereja kwa ekisigo kya okwanga eserikari ya Abharuumi.

Pirato arabhuturira ekiina Yeesu yeetwe

(Mataayo 27:15-31; Mariko 15:6-20; Ruuka 23:13-25)

¹Mbe, Pirato akaamura abhasirikare bhaaye ega, bhamugege Yeesu, bhamuteme na emijariti. ²Abhasirikare bhakakora eritaaji rya amahwa, bhakamwibhohya kumutwe. Kweki bhakamwibhohya enkanju ya jambaraawe. ³Bhakabha bharagya ku Yeesu, bharamukeeranʼya ega, “Turakukeeranʼya, Omukama wa Abhayahudi!” Bhakamutema amakoofi.

⁴Pirato akahuruka kweki kibhara, akakeerya omuganda gwa abhantu bharya ega, “Mwitegeerere, ndamureeta kibhara kubheenyu omuntu unu, naho mumanye ega, ntararora obhusarya bhobhonse kumwene.” ⁵Mbe, Yeesu akahuruka kibhara, enu yeebhoheri eritaaji rya amahwa na enkanju ya jambaraawe. Mbe, Pirato akabhakeerya abhantu bharya ega, “Maaha, omuntu omwene ngʼ-uyo.”

⁶Hanú abhasyengeri abhakuru na abharindi bha mwisyengerero erikuru bhaamurora Yeesu, bhakatema ekituri ega, “Mubhambe kumusarabha, mubhambe kumusarabha!” Mbe, Pirato akabhakeerya ega, “Mumugege bheenyu abheene mumubhambe kumusarabha, kwa okubha oni ntararora obhusarya bhobhonse bhwa okujongera omuntu unu.” ⁷Abhayahudi bhakamukyukya ega, “Bheetu tuuna eriragiriryo. Okurekana na eriragiriryo riyo, areenderwa okwitwa, kwa okubha areegamba ega, m-Mwana wa Waryubha.”19:7 Maaha mukitabho kya Abharaawi 24:16.

⁸Hanú Pirato yeegwa amangʼana gayo, akoobhoha bhukongʼu. ⁹Mbe, akasoha kweki munyumba, akamubhuurya Yeesu ega, “Uuwe orwiri-ha?” Nawe, Yeesu ataamukyukya ryoryonse. ¹⁰Mbe, Pirato akamukeerya ega, “Kwaki otakunkyukya? Bhoono, otamanyiri ega, niina obhutungi bhwa okukuhaatira, na obhwa okukubhamba kumusarabha?” ¹¹Yeesu akamukyukya Pirato ega, “Otakaabheeri na obhutungi bhobhonse nyoore otakaaheerwe na Waryubha. Kwa ego, omuntu unú yantuuriri mumabhoko gaaho, yaana obhusarya obhunene bhukongʼu.”

¹²Mbe, hanú Pirato yeegwa gayo, akasakya okutuna enjira ya okumuhaatira Yeesu, nawe, Abhayahudi bhakatema kweki ekituri ega, “Nyoore oraamuhaatire omuntu uyo, mbe, uuwe otaringi omusaani wa Kaisari.19:12 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. Omuntu wowonse unú areekorya ega, m-mukama, aramwanga Kaisari.” ¹³Hanú Pirato yeegwa amangʼana gayo, akamuhurukya Yeesu kibhara, akagya okwikara kukitumbi kya okubhuturira ekiina, ahasi hanú bhaahabhirikiranga ega, Ekibhuga kya Amagina. Mu Kiebhurania bharagamba ega, Gabhata. ¹⁴Gyaringa muna ensa esansabha kurusiku rwa okwiseemya kurusumo rwa enyangi ya Epasaka.

Pirato akakeerya Abhayahudi ega, “Maaha, omukama weenyu ngʼ-unu!” ¹⁵Bheeki bhakatema ekituri bharagamba ega, “Mwite, mwite! Mubhambe kumusarabha!” Pirato akabhabhuurya ega, “Bhoono, mureenda mmubhambe kumusarabha omukama weenyu?” Abhasyengeri abhakuru bhakamukyukya ega, “Bheetu tutaana omukama oundi, nawe Kaisari omwenego!” ¹⁶Mbe, nho Pirato akamutuura Yeesu mumabhoko gaabho, naho abhambwe kumusarabha.

Yeesu arabhambwa kumusarabha

(Mataayo 27:32-44; Mariko 15:21-32; Ruuka 23:26-43)

Mbe, abhasirikare bhakamugega Yeesu bhakagya nawe. ¹⁷Akagega omusarabha gwaye, akeemuka mumugi, akagya ahasi hanú mu Kiebhurania, bhaahabhirikiranga ega, Gorigota, ensonga yaaye niiga, Ekihuuri kya Omuntu. ¹⁸Hanú bhaahika hayo, bhakamubhamba Yeesu kumusarabha. Ahasi hayo bhaaringa-ho abhantu abhandi bhabhiri bhanú bhabhambirwe kumusarabha hamwi nawe, oumwi orubhaara rwa obhuryo, na oundi orubhaara rwa obhumosi.

¹⁹Pirato akaamura ega, gangʼoorwe amangʼana na gatuurwe kumusarabha gwa Yeesu, ganú garagamba ega, “unu n-yeesu wa najareeti, omukama wa abhayahudi.”²⁰Amangʼoore gayo, gaangʼoorwa mukigambo kya Ekiebhurania, Ekiruumi, na Ekiyunani. Abhayahudi abhaaru bhaaringa bharasoma amangʼoore gayo, kwa okubha ahasi hanú bhaamubhamba kumusarabha, haaringa haangʼi na Yerusaremu.

²¹Mbe, abhasyengeri abhakuru bhakamukeerya Pirato ega, “Otangʼoora ega, ‘Unu m-Mukama wa Abhayahudi,’ nawe, ongʼoore ega, ‘Omuntu unu yaagamba ega, weeki m-Mukama wa Abhayahudi.’ ” ²²Pirato akabhakyukya ega, “Tiigo-ha kora ahake, amangʼoore gatame egoego kya ego naamura.”

²³Hanú abhasirikare bhaamubhamba Yeesu kumusarabha, bhakagega emyenda gyaye, bhakagabha amasemunta gane. Kira omusirikare akagega ogusemunta gwaye. Kweki, bhakagega enkanju yaaye. Enkanju iyo etaaringa etumirwe, yaaringa erukirwe yonsego. ²⁴Mbe, bhakabhuuranʼya ega, “Tutataamura enkanju inu, nawe tuteme ekuura,19:24a Tuteme ekuura. Bhaatuuranga mukintu, ebhiti bhinú bhiina ebhimanyiiriryo kasi amagina ga amariina, naho kira oumwi agege omwenda gunú guraagwire kukimanyiiriryo kyaye. turore ega, eraabhe yawi.” Gayo gaakoreka ego, naho gakunaane ganú gaangʼoorwa mu Mangʼoore Amarabhu ega, “Bhaagabhana emyenda gyani, na okuitemera ekuura enkanju yaani.”19:24b Maaha mukitabho kya Egijabhuri 22:18. Mbe, niigo abhasirikare bhayo bhaakora.

²⁵Mbe, bhaaringa-ho abhakari bhane bhanú bhaaringa bheemiriiri haangʼi na omusarabha gwa Yeesu. Gati ya abhakari bhayo, yaaringa-ho ngʼina waabho Yeesu, ngʼina muke waabho Yeesu, Mariamu omukari wa Kiriopa, na Mariamu Magidarena. ²⁶Hanú Yeesu yaamurora ngʼina waabho na omwihigira unú yaaringa amuhanjiri bhukongʼu yeemiriiri haangʼi na ngʼina waabho, akagamba ega, “Ee maayi, maaha! Uyo ngʼo omwana waaho.” ²⁷Kweki akamukeerya omwihigira urya ega, “Maaha, unu ngʼo ngʼina weenyu.” Mbe, okurwa eribhaga riyo omwihigira uyo akamugega ngʼina waabho Yeesu, akagya okwikara nawe, mumugi gwaye.

Yeesu arakwa

(Mataayo 27:45-56; Mariko 15:33-41; Ruuka 23:44-49)

²⁸Kimwi, Yeesu akamanya ega, yaaringa amariri okukora emirimu gyaye gyonsego. Mbe, akagamba ega, “Ndeegwa enyonta.” Kwa ego, gakakunaana ganú gaangʼoorwa mu Mangʼoore Amarabhu.19:28 Maaha mukitabho kya Egijabhuri 69:21.²⁹Ahasi hayo haaringa na ekintu kinú bheejurya-mo omusuka gwa edivai. Kimwi, bhakagega amakaafu, bhakatobheka mumusuka muyo, bhakatuura kumwanji, bhakamutuurira Yeesu mumunwa. ³⁰Yeesu hanú yaarabha omusuka guyo, akagamba ega, “Emirimu gyani gihweri!” Mbe, akahiinya omutwe gwaye, gukahwa-mo.

Abhasirikare bharamubhita Yeesu na eritimu

³¹Rwaringa orusiku rwa okwiseemya kwa Esabhato, kweki Esabhato iyo yaaringa orusiku orukuru okukira egindi.19:31a Esabhato iyo yaaringa orusiku orukuru okukira egindi. Yaabha ego, kwa okubha yaaringa kurusiku rwa enyangi ya Epasaka. Abhatungi bha Abhayahudi bhateenda omubhiri gutame eguru ya omusarabha kurusiku rwa Esabhato.19:31b Esabhato. Orusiku rwa Esabhato rwaambanga eribhaga eryubha rirasikira orusiku rwa kasansabha, okwimukira orusiku rwa muhungati. Amaragiriryo ga Abhayahudi gateekiriryanga okubhiika omuntu orusiku rwa Esabhato. Maaha Esabhato mu Moonjooro eguru ya Amangʼana Amakongʼu. Kwa ego, bhakagya ku Pirato, bhakamusabha ega, abhasirikare bhagye bhabhabhune amaguru19:31c Bhabhabhune amaguru. Bhaakora ego, naho bhakwe rumwigo. abhantu bhanú bhaabhambwa kumisarabha, na okuruusya-ko emibhiri gyabho. ³²Mbe, bhakagya, bhakabhuna amaguru owa okwamba na owa kabhiri kubhanú bhatemereerwa hamwi na Yeesu. ³³Nawe, hanú bhaahika ku Yeesu, bhakanyoora amariri okukwa, kwa ego bhataamubhuna amaguru. ³⁴Nawe, omusirikare oumwi, akamubhita Yeesu na eritimu murubharu. Kimwi, amanyinga na amanji gakarwa. ³⁵Amangʼana ganu, gangʼoorerwe na omuntu unú yaaringa aragarora ganú gaaringa garakoreka. Ganú aragamba n-ga heene, wonse amanyiri ega, ganú aragamba n-ga heene. Mbe, kwa ego na bheenyu mwikirirye. ³⁶Gayo gaakoreka naho gakunaane ganú gaangʼoorwa mu Mangʼoore Amarabhu ega, “Ritariho eriguha ryaye kora erimwi rinú riribhunwa.”19:36 Maaha mukitabho kya Egijabhuri 34:20.³⁷Kweki Amangʼoore Amarabhu garagamba ega, “Bhariija okumumaaha unú bhaabhita na eritimu.”19:37 Maaha mukitabho kya Jakaria 12:10.

Yeesu arabhiikwa

(Mataayo 27:57-61; Mariko 15:42-47; Ruuka 23:50-56)

³⁸Hanú gayo gaahwa, akaaja omuntu oumwi eriina ryaye Yusufu, unú yaarwa mumugi gwa Arimataya. Omuntu uyo, yaaringa omwihigira wa Yeesu, nawe, kwa obhwibhise, kwa okubha yaaringa arabhoobhoha abhatungi bha Abhayahudi. Mbe, omuntu uyo akagya ku Pirato, akamusabha ega, agege omubhiri gwa Yeesu, agubhiike. Pirato akamwikiririrya. Kimwi, Yusufu akagya, akaruusya-ho omubhiri gwa Yeesu.

³⁹Nho, Nikodemasi unú yaagenda ku Yeesu obhutiku,19:39 Maaha mukitabho kya Yoana 3:1-2. akaaja na amaguta ga obhurange obhujomu gasangeenʼye na manemane, gaaringa egikiro mirongo esatu. ⁴⁰Mbe, abhabhiri bhayo, bhakagega omubhiri gwa Yeesu, bhakaguhaka amaguta ga obhurange obhujomu, bhakagukundikirya ensanda endabhu, okurekana na kya ego gyaringa egimiira gya Abhayahudi gya okubhiika abhantu. ⁴¹Ahasi hanú bhaamubhamba Yeesu kumusarabha, gwaringa-ho omugunda. Mumugunda muyo, yaaringa-mo embihira ehya inú bhataakabhiikiri-mo omuntu wowonse.19:41 Mumugunda muyo, yaaringa-mo embihira ehya inú bhataakabhiikiri-mo omuntu wowonse. Egimiira gya Abhayahudi gya okubhiika abhantu niiga, bhaaringa bharatuura abhaku mumasana na okutuura erigina kumunwa. Embihira ya Yeesu yaaringa mwisana.⁴²Orusiku ruyo, rwaringa orusiku rwa Abhayahudi okwiseemya kwa Esabhato. Kwa ekisigo kiyo, bhakamubhiika Yeesu mumbihira irya, kwa okubha yaaringa haangʼi.

Yeesu arahyuka

(Mataayo 28:1-8; Mariko 16:1-8; Ruuka 24:1-12)

¹Kurusiku rwa okwamba rwa obhutuuro, nyenkyo juri, Mariamu Magidarena akagya kumbihira ya Yeesu. Akanyoora erigina rinú ryaringa riteerwe kumunwa gwa embihira, rihiringitiibhwe. ²Mbe, akarwa-ho hayo nkenyo, akagya ku Simoni Petero na kumwihigira unú Yeesu yaaringa ahanjiri. Akabhakeerya ega, “Abhantu bharuusirye omubhiri gwa Omukuru weetu mumbihira, kora tutamanyiri enú bhaguteeri!”

³Mbe, Petero na omwihigira oundi uyo, bhakeemuka, bhakagya kumbihira. ⁴Bhonsego bhabhiri bhaaringa bharakenya, nawe, omwihigira oundi uyo akakenya okukira Petero na akamukangatira okuhika kumbihira. ⁵Akeehiinya, akasoomererya mumbihira, akarora ensanda endabhu inú bhaamubhiikira Yeesu, nawe, ataasoha munsi.

⁶Mbe, Simoni Petero akamurwa enyuma, akahika harya, akasoha mumbihira na akamaaha ensanda endabhu inú bhaamubhiikira Yeesu. ⁷Kweki akamaaha ekitambaara kinú bhaamubhoha Yeesu kumutwe. Kitaaringa hamwi na emyenda egindi, nawe, kyaringa kikunyirwe na okutuurwa embarika. ⁸Kimwi, omwihigira oundi uyo, unú yaakangata okuhika hayo, wonse akasoha mumbihira. Akamaaha, akeekirirya, ⁹onyoora bhaaringa bhakyari okumanya Amangʼoore Amarabhu ganú garagamba ega, Yeesu areenderwa ahyuke okurwa mubhaku. ¹⁰Mbe, abheehigira bharya bhakagya iika owaabho.

Yeesu aramwibhukira Mariamu Magidarena

(Mataayo 28:9-10; Mariko 16:9-11)

¹¹Nawe, Mariamu Magidarena yaaringa yeemiriiri haangʼi na embihira enu arakuura. Hanú yaaringa arakuura, akeehiinya akasoomererya mumbihira, ¹²akabharora bhamaraika20:12 Bhamaraika. Maaha eringʼana rinu mu Moonjooro eguru ya Amangʼana Amakongʼu. bhabhiri, bheebhoheri emyenda emirabhu. Bheekeeri hanú bhaaringa bhareerye omubhiri gwa Yeesu. Maraika oumwi yaaringa yeekeeri orubhaara rwa kumutwe, oundi yaaringa yeekeeri orubhaara rwa kumaguru. ¹³Bhamaraika bharya bhakamubhuurya ega, “Ee maayi, kwaki orakuura?” Wonse akabhakyukya ega, “Abhantu bhagegeri omubhiri gwa Omukuru waani, kweki ntakumanya enú bhaguteeri!” ¹⁴Hanú Mariamu yaagamba amangʼana gayo, akeekyukya, akamurora Yeesu yeemiriiri haryaharya, nawe, Mariamu ataamumanya.

¹⁵Yeesu akamubhuurya ega, “Ee maayi, kwaki orakuura? Bhoono, oratuna-wi?” Mariamu akeeganirirya ega, omuntu urya yaaringa omukori wa emirimu mumugunda, akamukyukya ega, “Ee taata, nyoore nuuwe ogugegeri-mo omubhiri gwaye, nkeerya enú oguteeri, oni ngende okugugega.” ¹⁶Yeesu akamubhirikira eriina yaaye ega, “Uuwe Mariamu!” Mariamu akeekyukya, akamurora Yeesu, akagamba mukigambo kya Ekiebhurania ega, “Rabhoni!” Rabhoni, ensonga yaaye niiga “Omwihigirya.” ¹⁷Yeesu akamukeerya ega, “Otangwata, nkyari okugya murwire ku Taata. Mbe, genda obhakeerye abheehigira bhaani ega, ndagya murwire ku Taata, unú ni-Seweenyu, ku Waryubha waani, unú ngʼ-Waryubha weenyu.” ¹⁸Mbe, Mariamu Magidarena akagya kubheehigira bha Yeesu, akabhakeerya amangʼana ganu, ega, “Maaha, oni mmuruuji Omukuru!” Kimwi, akabhatondera gonsego ganú Yeesu yaamuragirirya.

Yeesu arabheebhukira abheehigira bhaaye

(Mataayo 28:16-20; Mariko 16:14-18; Ruuka 24:36-49)

¹⁹Ekabha mugoroobha orusiku ruryarurya rwa okwamba rwa obhutuuro. Abheehigira bha Yeesu bhaaringa bheekumeenʼye munyumba eimwi na okusiika ebhiseku, kwa okubha bhaaringa bharabhoobhoha abhatungi bha Abhayahudi. Kora onyoora ebhiseku bhyaringa bhisiikirwe, rumwigo Yeesu akamaahikana kubhurabhu, na okwimirira gati waabho, akabhakeerya ega, “Omurembe gubhe na bheenyu!” ²⁰Yeesu hanú yaamara okubhakeerya gayo, akabhoorokya amabhoko gaaye na orubharu rwaye. Hanú abheehigira bhaamurora Omukuru, bhakajomerwa bhukongʼu. ²¹Yeesu akabhakeeranʼya kweki ega, “Omurembe gubhe na bheenyu. Kya ego Taata Waryubha yaantuma oni, egoego na oni ndabhatuma bheenyu mukyaro hanu.” ²²Mbe, hanú yaamara okugamba gayo, akabhahuutira omwika, akabhakeerya ega, “Munyoore Omutima Omurabhu.20:22 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu.²³Nyoore muraabhira abhantu obhusarya bhwabho, Waryubha wonse aribhaabhira obhusarya bhwabho. Nyoore mutakubhaabhira, Waryubha wonse ataribhaabhira.”

Yeesu aramwibhukira Tomaso

²⁴Omwihigira oumwi wa abheehigira bha Yeesu ekumi na bhabhiri bharya, eriina ryaye Tomaso, unú bhaamubhirikira ega, Ekisare, ataaringa hamwi na abheehigira abhandi hanú Yeesu yaabheebhukira. ²⁵Mbe, abheehigira abhandi bharya bhakamukeerya ega, “Bheetu tumuruuji Omukuru.” Nawe, weeki akabhakyukya ega, “Oni nyoore ntaarore ebhimoa bhya emisumaari mumabhoko gaaye, na okumukuunʼya ebhimoa bhiyo na ebhyara bhyani na okutuura okubhoko kwani kurubharu harya, ntakwikirirya kora ahake.”

²⁶Hanú gyahwa eginsiku munaane, abheehigira bha Yeesu bhakeekumanʼya hamwi kweki munyumba. Orusiku ruyo Tomaso wonse yaaringa hamwi nabho. Ebhiseku bhyaringa bhisiikirwe, rumwigo, Yeesu akamaahikana kubhurabhu, akeemirira gatigati waabho, akabhakeeranʼya ega, “Ndabhakeeranʼya. Omurembe gubhe na bheenyu!” ²⁷Mbe, Yeesu akamukeerya Tomaso ega, “Nuuje unkuunʼye na ekyara kyaho mumabhoko gaani. Kweki, unkuunʼye na okubhoko kwaho kurubharu rwani. Otagendererya okwanga okwikirirya, nawe wikirirye.” ²⁸Tomaso akamukyukya ega, “Omukuru waani na Waryubha waani!” ²⁹Yeesu akamukyukya ega, “Wikiriirye kwa okubha unduuji. Bhanonkerwe bhanú bhaanyikiriirye, kora nyoore bhatarandora.”

Ensonga ya ekitabho kinu

³⁰Yeesu yaakora ebhika ebhindi ebhyaru, bhinú abheehigira bhyaye bhaabhirora, bhinú bhitaangʼoorwa mukitabho kinu. ³¹Nawe, ebhimanyiiriryo bhinú bhiringi mukitabho kinu, bhyangʼoorwa, naho mwikirirye ega, Yeesu ngʼo Kiristu Omutuurya,20:31a Kiristu Omutuurya. Maaha Kiristu mu Moonjooro eguru ya Amangʼana Amakongʼu. Omwana wa Waryubha,20:31b Omwana wa Waryubha. Maaha eringʼana rinu mu Moonjooro eguru ya Amangʼana Amakongʼu. naho kwa okumwikirirya, munyoore obhuhoru kwa eriina ryaye.

Yeesu arabheebhukira abheehigira bhaaye Gariraaya

¹Hanú gayo gaahwa, Yeesu akabheebhukira kweki abheehigira bhaaye embarika wa enyanja ya Tibheria. Weeki yaabheebhukira kwa enjira inu. ²Bhaaringa-ho Simoni Petero, Tomaso unú eriina erindi arabhirikirwa Ekisare, Natanaeri unú yaarwa Kana ya Gariraaya, abhaana bhabhiri bha Jebhedayo,21:2 Abhaana bhabhiri bha Jebhedayo. Amariina gaabho bhaaringa Yakobho na Yoana. Maaha mukitabho kya Mataayo 10:2. na abheehigira abhandi bhabhiri. ³Simoni Petero akabhakeerya abharikyaye ega, “Mbere ngende okutega eginswi.” Bhonse bhakamukyukya ega, “Na bheetu tiga tugende hamwi na uuwe.” Mbe bhakagya, bhakariina mubhwato, bhakatega obhutiku kyo, nawe, bhataagwatya kora enswi yoyonse.

⁴Nyenkyo juri, Yeesu akeemirira embarika wa enyanja, nawe, abheehigira bhaaye bhataamanya ega, n-Yeesu. ⁵Mbe, Yeesu akabhabhirikira ega, “Bheenyu abhasaani bhaani, bhoono, mugwatirye enswi yoyonse?” Bheeki bhakamukyukya ega, “Tiigo-ha.” ⁶Yeesu akabhakeerya ega, “Mwese emitego orubhaara rwa obhuryo rwa obhwato, muraagwatye eginswi.”

Mbe, bhakeesa emitego, nawe, bhakatamwa okuguruta kwa okubha bhaagwatya eginswi eginjaru bhukongʼu. ⁷Omwihigira unú Yeesu yaamuhanja bhukongʼu, akamukeerya Petero ega, “M-Mukuru!” Hanú Simoni Petero yeegwa ega, m-Mukuru, akeebhoha omwenda gwaye gunú yaaruusya hanú yaamba okutega, akeeyesa munyanja. ⁸Abheehigira abhandi bhakagya embarika wa enyanja na obhwato, enu bhararuta omutego gunú gwaringa gwijwiri eginswi. Bhataaringa ahare, nawe, bhaaringa muna amatambuka egana rimwi ego.

⁹Hanú bhaahika kumurambo, bhakanyoora omururo. Omururo guyo, gwaringa gukoreri amakara, na eguru ya amakara gayo, gyaringa-ko eginswi na omukaate. ¹⁰Yeesu akabhakeerya abheehigira bhaaye ega, “Mureete hanu eginswi nkego kuginú mugwatirye.”

¹¹Mbe, Simoni Petero akasoha mubhwato, akaruta embarika omutego gunú gwaringa gwijwiri eginswi. Omutego guyo gyaringa-mo eginswi eginene egana rimwi mirongo etaanu na esatu (153). Onyoora gyaringa-mo eginswi eginjaru bhukongʼu, omutego gutaataamuka.

¹²Yeesu akabhakeerya abheehigira bhaaye ega, “Muuje murye ebhyakurya.” Ataabha-ho omwihigira kora oumwi unú yaasakya okumubhuurya ega, “Uuwe niwi?” kwa okubha bhaamanya ega, m-Mukuru. ¹³Mbe, Yeesu akaaja, akagega omukaate, akabhahaana abheehigira bhaaye. Kweki, akagega na enswi yonse, akakora egoego. ¹⁴Ruyo rwaringa orwa kasatu Yeesu okubheebhukira abheehigira bhaaye, hanú yaamara okuhyuka okurwa mubhaku.

Yeesu arahaira na Petero

¹⁵Hanú bhaamara okurya, Yeesu akamubhuurya Petero ega, “Simoni, omwana wa Yoana, bhoono, unhanjiri bhukongʼu okukira kya ego bhanhanjiri abharikyaho?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya ebhimaanwa bhya amangʼondi bhyani.” ¹⁶Yeesu akamubhuurya Petero orwa kabhiri ega, “Simoni, omwana wa Yoana, bhoono unhanjiri?” Petero akamukyukya ega, “Niigo, Omukuru, omanyiri ega, nkuhanjiri.” Yeesu akamukeerya ega, “Riisya amangʼondi gaani.” ¹⁷Akamubhuurya orwa kasatu ega, “Simoni, omwana wa Yoana, bhoono unhanjiri?” Mbe, Petero akasurumbara kwa okubha yaamubhuurya orwa kasatu ega, “Bhoono, unhanjiri?” Akamukyukya ega, “Ee Omukuru, omanyiri gonsego. Omanyiri ega, nkuhanjiri.” Yeesu akamukeerya ega, “Riisya amangʼondi gaani. ¹⁸Ndakukeerya obhuheene ega, hanú waaringa omumura, weebhohanga emyenda gyaho omwene, na okugya hohonse enú weendanga okugya. Nawe, hanú origota, oriinura amabhoko gaaho na omuntu oundi arikwibhohya emyenda gyaho, na okukuhira enú otakwenda okugya.” ¹⁹Yeesu yaagamba ego, okoorokya enjira inú Petero arikwa na okumugungya Waryubha. Mbe, Yeesu akamukeerya Petero ega, “Nsoorana.”

²⁰Mbe, Petero akeekyukya, akamurora omwihigira unú Yeesu yaamuhanja, yaaringa arabhasoorana. Omwihigira uyo ngʼ-unú yeekara haangʼi na Yeesu hanú bhaaryanga ebhyakurya, na okumubhuurya ega, “Ee Omukuru, niwi arikuriira eniku?” ²¹Mbe, hanú Petero yaamurora omwihigira urya, akamubhuurya Yeesu ega, “Ee Omukuru, bhoono, n-kintu-ki kirimaahikana kumwihigira uyo?” ²²Yeesu akamukyukya ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya? Uuwe unsoorane.” ²³Mbe, amangʼana gayo gakanyaragana gati ya abharikyaye ega, omwihigira uyo atarikwa. Nawe, Yeesu ataamukeerya omwihigira uyo ega, atarikwa, nawe, yaagamba ega, “Nyoore ndeenda abhe omuhoru okuhikira hanú ndihunjuka, kwaki gayo garakutunʼya?” ²⁴Omwihigira uyo ngʼo areemiririra ganu na okugangʼoora. Bheetu tumanyiri ega, ganú aragamba n-ga heene.

Yeesu yaakora amangʼana agandi amaaru

²⁵Gariho amangʼana agandi amaaru ganú Yeesu yaaringa arakora. Nyoore gonsego gayo gakaangʼoorerwe, ekyaro kyonsego kitakeesiri okutuura-mo ebhitabho bhinú bhikaangʼoorerwe.