Yakobho

Enyarubha ya

Yakobho

Obhukangati

Enyarubha inu yaangʼoorwa na Yakobho (1:1). Weeki yaaringa omumura waabho Yeesu. Yakobho yaaringa amanyikeeni bhukongʼu kubheehigira bha Yeesu, kwa okubha yaaringa omukangati wa erikanisa rya Yerusaremu. Enyarubha inu, Yakobho yaabhangʼoorera abheehigira bha Yeesu bha Ekiyahudi, bhanú bhaaringa bhanyarageeni mubhyaro ebhindi.

Munyarubha inu, Yakobho areehigirya abheekirirya ega, bhagwate egintungwa gya Waryubha. Kweki, bhaange egintungwa ginú girarwa ku Risambwa (3:13-18). Yakobho aroorokya ebhirengyo ebhyaru bhya egintungwa gya Waryubha na egintungwa ginú girarwa ku Risambwa. Areehigirya ega, eimani ya maheene etaringi eringʼana rya okuhaira okwenego, nawe ebhikorwa bhyonse bhireenderwa bhimaahikane. Okumwikirirya Yeesu okwenego bira okoorokya ebhikorwa ebhijomu, m-busa (2:14-26).

Okukeeranʼya

¹Enyarubha inu, erwiri kuoni Yakobho, omugaya wa Waryubha na Omukuru Yeesu Kiristu. Ndabhangʼoorera bheenyu, abheekirirya bha amakabhira ekumi na gabhiri,1:1 Amakabhira ekumi na gabhiri. Amangʼana ganu garatura okoorokya Abhakiristu bha Ekiyahudi, kasi Abhakiristu bhonsego, Abhayahudi na bhanú bhataringi Abhayahudi. ganú mwanyaragana mubhyaro ebhindi. Ndabhakeeranʼya!

Mubhenga na obhujomerwa hanú murasakibhwa

²Abhahiiri bhaani kuimani, mubhenga na obhujomerwa hanú muranyoorana na amasakyo amanga hagari hagari, ³kwa okubha, mumanyiri ega, okusakibhwa kwa eimani yeenyu, kurabhareetera okwigumirirya. ⁴Mureenderwa mugendererye okwigumirirya okuhikira kubhuteero, naho mubhe mukuneeni, mutariija okusuuhirwa ekintu kyokyonse.

⁵Nawe, hanú oumwi weenyu araasuuhirwe egintungwa, areenderwa amusabhe Waryubha, weeki araamuhaane. Waryubha arahaananga abhantu bhonsego kwa obhuserenʼya, kora atakukemera. ⁶Nawe, hanú araamusabhe Waryubha, asabhe kwa eimani, atabha na enkubhi. Omuntu unú arabha na enkubhi, n-kya amabhooka ga munyanja ganú garahumbibhwa na omuyaga na okweswa eyo na eyo. ⁷Omuntu kya uyo, ateeganirirya ega, arinyoora ekintu kyokyonse okurwa ku Mukuru Waryubha. ⁸Weeki, ngʼ-wa ameetegeerero amanga gabhiri, areekubhyakubhya kumangʼana gaaye gonsego.

⁹Omwikirirya omutobhu, areenderwa ajomerwe, kwa okubha Waryubha amwinwiri. ¹⁰Nawe, omwikirirya omuniibhi, areenderwa ajomerwe hanú yeetuumiibhwe na Waryubha1:10 Maaha mukitabho kya Jeremia 9:22-23. kwa okubha ariruusibhwa-ho kya amauwa ga mwisisi. ¹¹Hanú eryubha riratura, omubhasu gurabha omururu kee, guroomya ebhiimerya, amauwa gaabhyo garagwa, na obhujomu bhwago bhonsego bhurasarika. Egoego, omuniibhi wonse, arisika aringi kumirimu gyaye.

¹²Yaanonkwa omuntu unú areegumirirya hanú arasakibhwa, kwa okubha hanú aribha ahigiri amasakyo, Waryubha arimuhaana omutuho gwa obhuhoru bhwa koko, gunú yaaraga abhantu bhanú bhamuhanjiri.

¹³Omuntu hanú arasakibhwa okukora amabhiibhi, atagamba ega, “Ndasakibhwa na Waryubha,” kwa okubha Waryubha atakusakibhwa na amabhiibhi, kora weeki atakumusakya omuntu wowonse kya ego. ¹⁴Nawe, kira omuntu arasakibhwa kwa okurutwa na okungʼeenwa na orunamba rwaye orubhiibhi. ¹⁵Hanú orunamba rwaye rurakongʼa, rurareeta obhusarya, na hanú obhusarya bhurakongʼa, bhurareeta oruku.1:15 Maaha mubhitabho bhya 1 Abhakorinto 15:56; Abharuumi 5:12, 5:21.

Mutangʼeenwa eguru ya obhujomu bhwa Waryubha

¹⁶Abhahiiri bhaani abhahanje kuimani, mutangʼeenwa. ¹⁷Kira omutuho omujomu gunú turaruusya na kira ekintu ekijomu kinú turahaanwa, kirarwa murwire ku Waryubha, Omubhumbi wa obhurabhu bhwa eryubha, omweri na eginjota. Waryubha m-muheene eribhaga ryonsego, na atakwikyukyakyukya kya ekiiriiri kinú kirangʼaanyangʼaanya. ¹⁸Kya ego omwene yeenda, yaatukora tubhe abhaana bhaaye, kwa enjira ya amangʼana gaaye ga obhuheene, naho tubhe abha mbere kubhyonsego bhinú yaabhumba.

Mwitegeerere eringʼana rya Waryubha, na okuriigwa

¹⁹Abhahiiri bhaani abhahanje kuimani, munyitegeerere bhujomu! Kira omuntu abhe omwangu wa okwigwa, nawe, atabha omwangu wa okugamba kasi okujima, ²⁰kwa okubha, hanú omuntu ajimiri, atakukora amangʼana ga obhuheene embere ya Waryubha. ²¹Kwa ego, mutigane na amangʼana gonsego ga okubhakonʼya na obhubhiibhi bhonsego. Mugwate kwa okwisuuhya eringʼana rinú Waryubha yaatuura mumitima gyenyu, kwa okubha riyo ndyo riratura okubhatuurya.

²²Mutabha mureengʼeena kwa okwitegeerera eringʼana rya Waryubha okwenego, nawe mukorenga kya ego riragamba. ²³Omuntu unú areetegeerera eringʼana rya Waryubha okwenego, nawe, atakukora kya ego riragamba, uyo n-kya omuntu unú areemaaha mukirore. ²⁴Hanú aramara okwimaaha, aragya gyaye, rumwigo, ararabhirwa kya ego aringi. ²⁵Nawe, omuntu unú areekomya bhujomu amaragiriryo ganú gakuneeni, na okureetera abhantu obhwiyagaari bhwa okurwa mubhusarya, akaagendererya okukora gayo, enu arahiituka ganú yeegwa na okugakorera emirimu, uyo arinonkwa kwa okukora ego.

²⁶Nyoore omuntu areerora ega, yaana edini inú eramungʼarira Waryubha, nawe, atamanyiri okuribhira orurimi rwaye okugamba amabhiibhi, uyo areengʼeena omwene, na edini yaaye etaana obhwera. ²⁷Edini inú eramungʼarira Taata Waryubha, na inú ararora ega, etaana obhubhiibhi ngʼ-inu, okubheera abhataka na abhasino kuginyanko gyabho, hamwi na okwiyangararira na amabhiibhi ga mukyaro munu.

Mutabha na ekisorooro

¹Abhahiiri bhaani kuimani, kwa okubha mumwikirirye Omukuru weetu Yeesu Kiristu wa obhukuru, mutabha na ekisorooro kubhantu. ²Tugambe ega, omuntu unú yeebhoheri emyenda emijomu na epete ya ejahaabhu kukyara, asohe mwikanisa ryenyu. Na kwibhaga riyoriyo, asohe-mo omutobhu umwi, unú yeebhoheri emyenda emitaamuke. ³Kimwi, mumusuuke unú yeebhoheri emyenda emijomu, na okumukeerya ega, “Uuwe ikara ahasi ahajomu hanu.” Nawe, omutobhu weeki, mumukeerye ega, “Uuwe imirira harya,” kasi ega, “Ikara kumaguru gaani hansi hanu.”

⁴Bhoono, nyoore murakora ego, mutakurora ega, mukyakora ekisorooro kubhantu? Mutakurora ega, muraamura kwa ameetegeerero geenyu amabhiibhi?

⁵Abhahiiri bhaani abhahanje kuimani, munyitegeerere bhujomu. Waryubha abhasoreri abhatobhu bha mukyaro kinu, naho bhabhe abhaniibhi kuimani, na okugabha obhukama bhunú yaabharaga bhanú bhamuhanjiri. ⁶Nawe, bheenyu murabhajeera bhukongʼu abhatobhu! Bhoono, murabhiirwe ega, abhaniibhi mbo bharabhabhandirirya bheenyu na okubhahira mwibharaja? ⁷Bhoono, etaringi ega, abhaniibhi mbo bharatuka eriina erijomu rya Yeesu Kiristu, rinú murabhirikirirwa?

⁸Mu Mangʼoore Amarabhu, amaragiriryo ga obhukama bhwa Waryubha garagamba ega, “Omuhanje omurikyaho, kya ego oreehanja uuwe omwene.”2:8 Maaha mukitabho kya Abharaawi 19:18. Nyoore murakora ego, murakora bhujomu. ⁹Nawe, nyoore muraakorenga ekisorooro kubhantu, murabha murakora obhusarya, na amaragiriryo garabhajongera ega, bheenyu m-basarya.

¹⁰Omuntu akaagwata amaragiriryo gonsego, nawe, asarye eriragiriryo rimwi, arabharwa ega, asarirye gonsego. ¹¹Ndagamba ego, kwa okubha Waryubha unú yaatuura amaragiriryo ganú garagamba ega, “Otakora ameega kibhara,”2:11a Maaha mubhitabho bhya Okuhuruka 20:14; Obhuhiituki bhwa Amaragiriryo 5:18. ngʼo uyo yaagamba ega, “Oteeta.”2:11b Maaha mubhitabho bhya Okuhuruka 20:13; Obhuhiituki bhwa Amaragiriryo 5:17. Bhoono, nyoore otakukora ameega kibhara, nawe oreeta, orabharwa ega, osarirye amaragiriryo.

¹²Mbe, mubhenga muragamba na okukora amangʼana, enu murahiituka ega, Waryubha aribhabhuturira ekiina okurekana na amaragiriryo ganú garareetera abhantu obhwiyagaari bhwa okurwa mubhusarya. ¹³Waryubha ataribha na ekyabhira okumubhuturira ekiina, omuntu unú ataana ekyabhira. Nawe, nyoore omuntu yaabhira abhandi, Waryubha wonse arimwabhira kurusiku rwa okubhutura ekiina!

Eimani yeenyu egendanʼye na amakorwa amajomu

¹⁴Abhahiiri bhaani kuimani, haana obhwera-ki kumuntu unú aragamba ega, yaana eimani, nawe, ataana amakorwa amajomu? Maheene eimani iyo etakutura okumutuurya. ¹⁵Nyoore omuhiiri weenyu kuimani owa ekisaaja kasi owa ekikari ataana emyenda kora ebhyakurya, ¹⁶na oumwi weenyu amukeerye ega, “Genda na omurembe, wote omururo na okwiguta,” nawe, atamwibhoherye kasi okumwigutya, m-bwera-ki bhunú amukoreeri? ¹⁷Niigo eringi, nyoore muuna eimani eyenego, nawe, mutaana amakorwa amajomu. Eimani yeenyu, ekwiri.

¹⁸Nawe, omuntu aratura okugamba ega, “Uuwe uuna eimani, na oni niina amakorwa amajomu.”

Mbe, ndaamukeerye ega, “Unyorokye eimani yaaho, bira amakorwa amajomu. Nawe, oni ndaakoorokye eimani yaani kwa amakorwa gaani amajomu.” ¹⁹Uuwe oreekirirya ega, ariho Waryubha oumwi ego. Orakora bhujomu! Nawe, kora ebhihwi bhyonse, bhireekirirya ego na okurigita kwa obhoobha!

²⁰Uuwe m-mukangi! Okyenda okoorokibhwa ega, eimani inú etaana amakorwa amajomu, etaana obhwera? ²¹Jaaji weetu Abhurahamu2:21a Abhurahamu. Maaha eringʼana rinu mu Moonjooro eguru ya Amangʼana Amakongʼu. yaaruusya omwana waaye Esaaka, abhe ekimwenso2:21b Ekimwenso. Maaha eringʼana rinu mu Moonjooro eguru ya Amangʼana Amakongʼu. kya okwitwa ahasi ha okumwensera. Okurekana na ekikorwa kyaye ekijomu kiyo, Waryubha yaamubhara okubha owa obhuheene embere yaaye! ²²Bhoono, otakurora ega, eimani ya Abhurahamu, yaaringa eragendanʼya na amakorwa gaaye, na ega, eimani yaaye, yaakunaana kwa amakorwa gaaye? ²³Ego, gaakunaana ganú gaagambwa mu Mangʼoore Amarabhu ega, “Abhurahamu yaamwikirirya Waryubha, kwa ego, Waryubha akamubhara okubha omuntu omuheene embere yaaye.”2:23 Maaha mukitabho kya Obhwambiro 15:6. Kweki Abhurahamu, akabhirikirwa omusaani wa Waryubha.

²⁴Mbe, murarora ega, omuntu arabharwa okubha wa obhuheene, okurekana na amakorwa gaaye amajomu, nawe, etaringi kwa eimani eyenego.

²⁵Kora Rahabhu omusimbe urya, wonse yaabharwa okubha omuntu wa obhuheene embere ya Waryubha, okurekana na amakorwa amajomu, ganú yaakora. Yaabhagenihya abhabhuuririrya bha Isiraeri na okubhabheera bhagye gyabho, kwa okuhitira enjira eindi.2:25 Maaha mukitabho kya Yoshua 2:1-21, 6:22-25.

²⁶Bhoono, nyoore omubhiri gutaana enkoro munsi waago gukwiri, egoego omuntu unú yaana eimani, nawe, ataana amakorwa amajomu, eimani yaaye ekwiri.

Mwangararire orurimi rutagamba amabhiibhi

¹Abhahiiri bhaani kuimani, bhatabha-ho abheehigirya abhaaru gati yeenyu. Ndagamba ego, kwa okubha mumanyiri ega, bheetu abheehigirya turibhuturirwa ekiina bhururu okukira abhandi. ²M-maheene, abhantu bhonsego turakora obhusarya kwa amangʼana amaaru. Na nyoore ariho omuntu unú atakuhabha kubhugambi bhwaye, omuntu uyo akuneeni, na aratura okwiribhira omubhiri gwaye gonsego.

³Maaha, hanú omuntu aratuura ekyuma mumunwa gwa efaraasi, naho emwigwe. Kwa enjira iyo aratura okuikyukya, naho okubhata hohonse hanú areenda.⁴Kweki mumaahe obhwato bhwa eritanga bhonse, onyoora m-bunene bhukongʼu, na bhurasukumwa na omuyaga omuhaari, nawe, bhuratura okukyukibhwa na engobhero enke bhukongʼu, naho okubhata hohonse hanú omugobhi areenda bhugende. ⁵Egoego, orurimi ronse n-kiroobhero ekike bhukongʼu kumubhiri, nawe, kiina ameeheemo amanene bhukongʼu. Kweki mumaahe omururo omuke kya ego gurasamba na okusikya erisisi erinene! ⁶Na orurimi ronse n-kya omururo, rwijwiri obhusarya obhwaru, na ruringi mumibhiri gyetu. Ruranyaraganʼya obhusarya kumubhiri omugima, rurasikya obhuhoru bhwetu bhonsego okurwa kumururo gunú gutakusima.3:6 Kumururo gunú gutakusima. Ekiyunani kiragamba ega, Jehanamu. Mmo Waryubha arijibhirya abhasarya.

⁷Abhantu bharatura okutuga egintyenyi gya amanga gonsego, ebhinyonyi, egintyenyi ginú gireengʼuurira enda na ebhibhumbwa bhyonsego bhya munyanja. Abhantu bhaatura okubhituga ebhibhumbwa bhiyo bhyonsego. ⁸Nawe, atariho omuntu unú aratura okururibhira orurimi rwaye. Orurimi n-kintu ekibhiibhi, rutakuribhirwa na rwijwiri obhusungu bhwa okwita.

⁹Kwa orurimi turamugungya Omukuru Taata Waryubha weetu, na kwa orurimi ruyoruyo tureehiima abhantu bhanú bhaabhumbwa kwa entuubho ya Waryubha. ¹⁰Mumunwa muyomuyo mmo gararwa amangʼana ga okunonka, na aga okwihiima. Abhahiiri bhaani kuimani, amangʼana gayo gatakwenderwa okubha ego. ¹¹Bhoono, kiriho ekisekaani kinú kirarwa amanji amajomu, na amanji ga omuunyu? ¹²Bhoono, abhahiiri bhaani kuimani, omuti gwa omutini guratura okwama emisumo gya emijeituni? Kasi omujabhibhu guratura okwama emisumo gya omutini? Egoego ekisekaani kya amanji, kitakutura okurwa amanji ga omuunyu na amanji amajomu.

Mwihigire na okugwata egintungwa gya Waryubha

¹³Niwi gati yeenyu, unú yaana egintungwa na obhungʼeeni? Mbe, abhyorokye kwa enteemo yaaye enjomu, na kwa amakorwa gaaye amajomu ganú garakoreka kwa obhwisuuhya bhunú bhurarekana na egintungwa.

¹⁴Nawe, nyoore muuna orwango, obhubhihirirwa na obhutindi mumitima gyenyu, muteegungya ega, muuna egintungwa, kora mutagamba obhubheehi eguru ya obhuheene. ¹⁵Egintungwa kya giyo, gitakurwa eguru ku Waryubha, nawe, n-gya mukyaro hanu, n-gya abhantu, girarwa ku Risambwa.3:15 Risambwa. Maaha Erisambwa mu Moonjooro eguru ya Amangʼana Amakongʼu.¹⁶Kira ahasi hanú haana orwango na obhutindi, nho eriihe na amabhiibhi agandi gonsego garingi.

¹⁷Nawe, egintungwa ginú girarwa eguru ku Waryubha ni-ginjomu, na kweki n-gya omurembe, na n-gya obhunyoohu, gireetegeerera bhujomu amangʼana ga abhantu. Giijwiri ekyabhira na giraama emisumo emijomu, na gitaana ekisorooro kora orwambe. ¹⁸Abhantu bha omurembe, hanú bharaahambe egimbusuro gya omurembe, nho, bharigesa amakorwa ga obhuheene embere ya Waryubha.

Mubhenga mureesuuhya embere ya Waryubha

¹Bhoono, eriihe na eritoongʼana gati yeenyu bhirarwa-ha? Bhirarekana na orunamba rwenyu orubhiibhi runú rurahigana mumitima gyenyu. ²Mureegomba ebhintu nyabhurebhe, nawe, hanú mutakubhinyoora, mureeta. Na murabha na orwango rwa ebhintu nyabhurebhe, nawe hanú muratamwa okubhinyoora, murakora eriihe na eritoongʼana. Mutakunyoora ebhintu, kwa okubha mutakumusabha Waryubha. ³Kora hanú muramusabha mutakunyoora, kwa okubha muramusabha bhubhiibhi, naho mubhitumire kwa orunamba rwenyu.

⁴Bheenyu m-bantu bhanú mutaringi abhaheene ku Waryubha kya abhasimbe kubhutetani bhwabho. Bhoono, mutamanyiri ega, okukora amangʼana ganú gatakumungʼarira Waryubha nko okubha omusigu wa Waryubha? Kwa ego, kira unú areenda okubha omusaani wa amabhiibhi ga ekyaro, areekora okubha omusigu wa Waryubha. ⁵Mbe, muteeganirirya ega, engʼoorerwe bhusa mu Mangʼoore Amarabhu, hanú garagamba ega, Omutima unú Waryubha yaatuura munsi weetu, aratwigomba bhukongʼu okuhikira okurora orwango.4:5 Omutima unú Waryubha yaatuura munsi weetu, aratwigomba bhukongʼu okuhikira okurora orwango. Ensonga eindi eratura okubha ega, Waryubha ararora orwango bhukongʼu eguru ya omutima gunú yaatuura munsi weetu. Maaha mukitabho kya Okuhuruka 20:5.⁶Nawe, eriruguto rinú turahaanwa na Waryubha riina eginguru bhukongʼu, nkyo kirakora engʼoorerwe mu Mangʼoore Amarabhu ega,

“Waryubha arahakaanʼya bhanú bhareerora,

nawe, arahaana abheesuuhya eriruguto.”4:6 Maaha mukitabho kya Egimesaari 3:34.

⁷Mbe, mumwigwe Waryubha, na mwange Erisambwa, ryonse riraabhangʼose. ⁸Mumusuntarire Waryubha, nho wonse, araabhasuntarire bheenyu. Bheenyu abha obhusarya, abha ameetegeerero amanga gabhiri, mutige obhusarya bhwenyu, na ameetegeerero geenyu amabhiibhi, mukore amajomu.4:8 Maaha mukitabho kya Egijabhuri 24:3-4.⁹Mwigwe obhururu kwa ekisigo kya obhusarya bhwenyu, mufumbe na mukuure. Okuseka kwenyu, kukyukibhwe okubha okukuura, na obhujomerwa bhwenyu, bhukyukibhwe okubha okufumba. ¹⁰Mwiyituumye embere ya omukuru, wonse aribhariinʼya.

Mutabhanga murahaamiriranʼya

¹¹Abhahiiri bhaani kuimani, mutabhanga murahaamiriranʼya. Kira unú aramuhaamirirya omurikyaye, kasi okumubhuturira ekiina, uyo, arabha ajeereri amaragiriryo ga Waryubha na okugarora ega, m-mabhiibhi. Na hanú oragarora ega m-mabhiibhi, otakutura okugagwata kweki, nawe, orabha wikorerye omubhuturi wa ekiina. ¹²Waryubha omwene, ngʼo yaatuura amaragiriryo, na ngʼo Omubhuturi wa ekiina. Ngʼo aratura okututuurya na okutusikya. Bhoono, uuwe niwi, kora obhuturire ekiina omurikyaho?

Mutabha mureegungya kurusumo rwa ejo

¹³Bhoono mbe, mwitegeerere bhujomu, bhanú muragamba ega, “Reero kasi ejo, twakagye orugendo mumugi nyabhurebhe. Na twikare eyo omwaka omugima, turakora ebhyasara, na okunyoora obhwera.” ¹⁴Nawe, mutamanyiri kinú kyakeebhuke ejo! Obhuhoru bhwenyu niki? Bheenyu n-kya ekitu, kinú kiramaahikana kwa eribhaga ekego, na okubhura! ¹⁵Mureenderwa mugambenga ega, “Hanú Omukuru aryenda, turibha na obhuhoru na turikora kinu kasi kirya.” ¹⁶Nawe bhoono, bheenyu mureegungya na okwiheema ega, muuna obhuturo. Okwigungya kuyo n-kubhiibhi. ¹⁷Mbe, kira unú amanyiri okukora amajomu, nawe atakugakora, hayo arakora obhusarya.

Obhukemeri eguru ya abhaniibhi abhakana

¹Mbe bhoono, bheenyu abhaniibhi mwitegeerere bhujomu! Mukuure na okuhuhutya, kurusumo rwa enyanko enene inú eribhajira. ²Obhuniibhi bhwenyu bhugundiri, na emyenda gyenyu giriirwe na ebhibhungi. ³Egijahaabhu na egimbirya gyenyu, gikerebheeri, na okukerebhera kuyo, kuribha obhwimiririri eguru yeenyu kya ego muratumira bhubhiibhi obhuniibhi bhwenyu. Kuginsiku gya obhuteero ginu, mweekumaniirye obhuniibhi bhwenyu bhonsego, nawe, emibhiri gyenyu giririibhwa kya ego omururo gurasikya kira ekintu.

⁴Mwitegeerere kya ego abhakori bha emirimu bheenyu bhareengʼeheerya! Bheeki bhaamara okubhakorera emirimu gya obhugesi mumigunda gyenyu, nawe, mutaabhariha. Na ekiriro kyabho, Omukuru Waryubha wa obhuturo bhonsego, akigwiri kwa amatwi gaaye. ⁵Mweekara obhwikari bhwa obhujomererwa na obhwa obhuniibhi obhwaru mukyaro hanu. Mwamara okwinurya kurusumo rwa orusiku rwa okubhuturirwa ekiina kya entugo inú eseemiibhwe orusiku rwa okugoogwa. ⁶Mubhabhuturiiri ekiina na okubheeta abha obhuheene, kora bheeki bhataahakaananʼya na bheenyu.

Mwigumirirye okuhikira hanú Omukuru Yeesu arihunjuka

⁷Bhoono, abhahiiri bhaani kuimani, mubhenga mureegumirirya okuhikira eribhaga rinú Omukuru Yeesu arihunjuka. Mumaahe kya ego omurimi araganyirira ebhyakurya ebhijomu bhya obhwera bhya mukyaro munu. Areegumirirya na okuganyirira okuhikira hanú arinyoora embura ya omuubhu na eya omwaka.

⁸Mbe, na bheenyu bhonse mwigumirirye, na okuteremya emitima gyenyu, kwa okubha okuhunjuka kwa Omukuru Yeesu kuringi haangʼi. ⁹Abhahiiri bhaani kuimani, muteengʼeheereranʼya mutariija okubhuturirwa ekiina. Maaha! Omubhuturi wa ekiina Yeesu Kiristu, aringi haangʼi okuhunjuka.

¹⁰Abhahiiri bhaani kuimani, mwiganirirye eguru ya abharooti bhanú bhaaringa bharagamba kwa eriina rya Omukuru Waryubha. Bheeki bhabhe ekirengekanʼyo kya obhwigumirirya munyanko. ¹¹Na turabhabhirikira abha enonkwe bhanú bheegumirirya. Mweegwiri kya ego Ayubhu yeegumirirya, na mumanyiri kya ego Omukuru Waryubha yaamukorera amajomu kubhuteero.5:11 Maaha mukitabho kya Ayubhu 42:10-13. Yaamukorera amajomu gayo, kwa okubha yaana ekyabhira na obhuhanje.

¹²Okutiga gayo gonsego, abhahiiri bhaani kuimani, mutateena kurwire, kukyaro na kukintu kyokyonse kirya. Mugambe “maheene,” nyoore m-maheene, na mugambe “tiigo-ha,” nyoore tiigo-ha. Nyoore mutaakore ego, muribhuturirwa ekiina.5:12 Maaha mukitabho kya Mataayo 5:33-37.

Mumusabhenga Waryubha kwa eimani

¹³Bhoono, ariho omuntu gati yeenyu unú aranyanka? Mbe, areenderwa amusabhe Waryubha. Kasi ariho wowonse unú arajomerwa? Mbe, areenderwa yeembe ameembo ga okugungya.

¹⁴Bhoono, gati yeenyu ariho omurweri? Mbe, areenderwa abhabhirikire abhakangati bha erikanisa, naho bhaaje bhamusabhire na okumuhaka amaguta kwa eriina rya Omukuru Yeesu. ¹⁵Na hanú bharaamusabhire kwa eimani, arahona. Omukuru Yeesu arimwinura, na nyoore yaakora obhusarya, aryabhirwa. ¹⁶Mbe bhoono, mugambiranenga obhusarya bhwenyu na okusabhirana ku Waryubha, nho murahwenibhwa amarweri geenyu. Amasabho ga omuntu omuheene gaana obhuturo na garakora emirimu.

¹⁷Omurooti Eriya, yaaringa omuntu kya bheetu, akamusabha Waryubha kwa ekituunyo ega, embura etatwa mukyaro kya Isiraeri, na embura etaatwa mukyaro muyo kwa eribhaga rya emyaka esatu na emyeri esansabha.5:17 Maaha mukitabho kya 1 Abhakama 17:1.¹⁸Nho, akamusabha kweki ega, embura etwe mukyaro, yonse ekatwa, ebhyakurya bhikaama mukyaro.5:18 Maaha mukitabho kya 1 Abhakama 18:42-45.

¹⁹Mbe, abhahiiri bhaani kuimani, oumwi weenyu akaahabha eguru ya obhuheene, na oundi amuhunjukye kweki kubhuheene, ²⁰mumanye ega, unú aramuhunjukya omusarya, okurwa kunjira ya obhusarya bhwaye, arabha amutuurirye okurwa muruku. Na omusarya uyo, araabhirwa obhusarya bhwaye obhwaru.