Abhagaratia

Enyarubha ya Pauro ku

Abhagaratia

Obhukangati

Enyarubha inu yaangʼoorwa na Pauro, omutumwa wa Yeesu Kiristu (1:1). Garatia n-kyaro kinú kyaringa gatigati ya ekyaro kinú eginsiku ginu, kirabhirikirwa ega, Bhuturuki. Pauro na Bharinabha bhaaraarika Amangʼana Amajomu eguru ya Yeesu, mumigi nyabhurebhe ginú gyaringa mukyaro kya Garatia. Abhantu abhaaru bheekirirya Amangʼana Amajomu ga Yeesu, bhakabha Abhakiristu. Nawe, hanú eribhaga ryahita, abhantu abhandi bhakeehigirya Abhakiristu ega, bhabhenga bharagwata amaragiriryo na egimiira gya Ekiyahudi, na ega, bhabhenga bharasaarwa.

Kunyarubha inu, Pauro arahiitukya Abhakiristu bha Garatia ega, Waryubha aratuurya abhantu bhonsego bhanú bharamwikirirya Kiristu, bhataringi bhanú bharagwata amaragiriryo kasi egimiira nyabhurebhe. Pauro aragamba bhujomu ega, tutakutura okubha abhantu abhaheene embere ya Waryubha kwa okugwata amaragiriryo, nawe, kwa okubha na eimani ku Kiristu. Pauro aragamba ega, obhuhoru bhwetu Abhakiristu bhuroorokereribhwa na Omutima Omurabhu, naho tugwate eriragiriryo erikuru rya Waryubha erya okuhanjana.

Pauro arakeeranʼya Abhagaratia

¹Enyarubha inu erwiri kuoni Pauro. Oni omutumwa,1:1 Omutumwa. Maaha Abhatumwa mu Moonjooro eguru ya Amangʼana Amakongʼu. ntaatumwa na abhantu kasi okuragiriribhwa na omuntu wowonse, nawe, naatumwa na Yeesu Kiristu, na Taata Waryubha unú yaamuhyukya Yeesu okurwa mubhaku. ²Oni na abhahiiri bheetu kuimani bhonsego bhanú bharingi hamwi na oni, turabhakeeranʼya bheenyu bhanú muringi mumakanisa ga Waryubha mukyaro kya Garatia.

³Ndabheendera eriruguto na omurembe okurwa ku Taata Waryubha, na ku Mukuru Yeesu Kiristu, bhibhe hamwi na bheenyu. ⁴Kiristu yeeruusya obhuhoru bhwaye, kurusumo rwa obhusarya bhwetu, naho atutuurye okurwa mumabhiibhi gonsego ga mukyaro kinu. Yaakora ego, okurekana na obhwendi bhwa Taata Waryubha. ⁵Taata Waryubha agungibhwe koko na koko. Amina.

Gatariho Amangʼana Amajomu agandi aga maheene

⁶Oni ndaruguura bhukongʼu, kwa okubha ni-ribhaga ekego rinú ryahitiri, bheenyu mwamujeemeri Waryubha unú yaabhabhirikira kwa eriruguto rya Kiristu. Mweehunjuriiri ameehigiryo agandi ganú abhandi bharagabhirikira ega, m-Mangʼana Amajomu. ⁷Obhuheene niiga, gatariho Amangʼana Amajomu agandi. Nawe, bhariho abhantu bhanú bharabhahabhya na okwenda okukyukya Amangʼana Amajomu eguru ya Kiristu. ⁸Kora nyoore omuntu wowonse gati yeetu kasi maraika1:8 Maraika. Maaha Bhamaraika mu Moonjooro eguru ya Amangʼana Amakongʼu. okurwa murwire, araabharaarikire amangʼana gogonse ganú gatahunkeeni na ganú bheetu twabharaarikira, omuntu uyo yeehiimwe na Waryubha! ⁹Kweki ndahunjukira okugamba kya ego twagamba kwibhaga rirya, ega, nyoore omuntu araabharaarikire amangʼana gogonse ganú gatahunkeeni na ganú bheenyu mweekirirya, omuntu uyo yeehiimwe na Waryubha!

¹⁰Bhoono, muramanya ega, ndeenda okwikiriribhwa na abhantu? Tiigo-ha, kora ahake, oni ndeenda okwikiriribhwa na Waryubha omwenego. Kasi muramanya ega, ndeenda okujomera abhantu? Nyoore kora bhoono, nkeenderi okujomera abhantu, ntakaabheeri omugaya wa Kiristu.

Ameehigiryo ga Pauro gararwa ku Yeesu Kiristu

¹¹Abhahiiri bhaani kuimani, ndeenda mumanye ega, Amangʼana Amajomu ganú oni naabharaarikira, gataringi ga abhantu, ¹²kwa okubha ntaahaanwa na omuntu kora nteehigiribhwa na omuntu wowonse. Nawe, Yeesu Kiristu omwene, ngʼo yaagantubhurira.

¹³Bheenyu mweegwa enteemo yaani kya ego yaaringa, kwibhaga rinú naaringa ndarwanira egimiira gya Ekiyahudi. Mumanyiri kya ego naanyankyanga erikanisa rya Waryubha okuhikira ekahitiranʼya, neendanga okurisikya chwe. ¹⁴Oni naaringa nkiriri abharikyani abhaaru abha embaasi yaani, kwa okurwanira egimiira gya Ekiyahudi. Naakoranga ekituunyo bhukongʼu, okugwata amaragiriryo ganú bhajaaji weetu bhaaringa bharagwata. ¹⁵Nawe, Waryubha kwa eriruguto ryaye, yaaringa yansoreri nkyari munda ya maayi, akambirikira mmukorere emirimu gyaye, akaamura ¹⁶okuntubhurira kya ego Omwana waaye1:16 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. aringi. Yaakora ego, naho ndaarike Amangʼana Amajomu eguru ya Omwana waaye uyo, kubhantu bhanú bhataringi Abhayahudi. Oni ntaatuna omuntu owa okuntongera kinú ndaakore. ¹⁷Kora ntaagya Yerusaremu,1:17 Yerusaremu. Maaha eringʼana rinu mu Moonjooro eguru ya Amangʼana Amakongʼu. kubhanú bhaankangatira okubha abhatumwa. Nawe, kinú naakora n-kugya kimwikimwi mukyaro kya Arabhia. Kimwi, kwa eribhaga nyabhurebhe, nkahunjuka kweki mumugi gwa Damasikasi.

¹⁸Hanú emyaka esatu gyahwa, nkagya Yerusaremu, naho mmaahane na Kefa1:18 Kefa. Rinu ni-riina erindi rya Petero. Eriina Petero, ni-rya ekigambo kya Ekiyunani, na eriina Kefa, ni-rya ekigambo kya Ekiaramu. Mubhigambo bhiyo, ensonga ya amariina gayo niiga, eritare. Maaha mukitabho kya Mataayo 16:18. eyo. Nkeekara owaaye eginsiku ekumi na etaanu egyenego. ¹⁹Nawe, ntaarora abhatumwa abhandi, nawe naamurora Yakobho, omumura waabho omuke na Omukuru Yeesu. ²⁰Waryubha amanyiri ega, amangʼana ganú ndabhangʼoorera n-ga maheene, gataringi ga obhubheehi!

²¹Mbe, hanú naarwa owa Kefa, nkagya mubhyaro bhya Siria na Kirikia. ²²Kwibhaga riyo, abheekirirya bha mukyaro kya Yudea bhaaringa bhatarandora kwa ameeso. ²³Nawe, bhaaringa bhareegwa ega, “Omuntu unú yaaringa aratunyankya kubhwambiro hayo, bhoono araraarika eguru ya eimani inú yaasakyanga okuisikya!” ²⁴Kimwi bhakamugungya Waryubha kurusumo rwa ganú yaankorera.

Abhatungi bha erikanisa rya Yerusaremubhareekirirya ameehigiryo ga Pauro

¹Hanú gyahita emyaka ekumi na ena, nkariina kweki okugya Yerusaremu. Nkagega Bharinabha, nkagega na Tiito wonse, tukagya nawe. ²Naariina okugya Yerusaremu kwibhaga riyo, kwa okubha Waryubha yaaringa yaantubhuriiri ega, ngende. Hanú naahika, nkamaahana kabhejyo na abhatungi bha erikanisa bhanú bharasuukwa bhukongʼu na abhantu. Kimwi nkabhakeerya Amangʼana Amajomu ganú naaringa ndaraarikira abhantu bhanú bhataringi Abhayahudi. Naamura okukora ego, naho emirimu ginú naaringa nkoreri na ginú ndagendererya okukora gitariija okubha gya bhusa. ³Bhakeekiriranʼya na oni. Na kora omurikyani Tiito unú ataringi Omuyahudi, ataasingʼiiriribhwa okugwata amaragiriryo ga Musa2:3 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. kwa okusaarwa. ⁴Eringʼana rya okusaarwa riyo, ryabhuribhwa na abhantu bhanú bhaaringa bhareekorya ega, m-bahiiri bheetu kuimani, nawe, bheesohya bhugunyi okwikomya obhwiyagaari bhwetu bhunú twahaanwa na Kiristu Yeesu. Ensonga yaabho, yaaringa nu-kutukora tubhe abhagaya bha amaragiriryo ga Musa. ⁵Bheetu tuteekiriranʼya nabho kora ahake, naho obhuheene bhwa Amangʼana Amajomu bhutame kubheenyu kya ego bhuringi.

⁶Nawe, abhatungi bha erikanisa bharya, bhataaringa na eringʼana ryoryonse erihya rya okunkeerya. M-maheene bhaasuukwanga bhukongʼu, nawe, kuoni riyo ritaana ensonga yoyonse, kwa okubha Waryubha atakumaaha obhutungi bhwa omuntu. ⁷Hamwi na gayo, abhatungi bhayo, bhakamanya ega, Waryubha yaantuma oni ndaarike Amangʼana Amajomu eguru ya Yeesu, kubhantu bhanú bhataringi Abhayahudi, bheeki bhataasaarwanga, kya ego yaamutuma Petero araarike ku Bhayahudi, bheeki bhaasaarwanga. ⁸Ndagamba ego, kwa okubha Waryubha unú yaamukora Petero okubha omutumwa waaye, ku Bhayahudi, ngʼo yaankora oni nonse okubha omutumwa waaye, kubhantu bhanú bhataringi Abhayahudi. ⁹Mbe, hanú Yakobho, Kefa na Yoana, bhanú bhaaringa abhatungi abhakuru, bhaarora eriruguto rinú naahaanwa na Waryubha, bhakatugwata okubhoko oni na Bharinabha, naho okoorokya ekimanyiiriryo kya obhugwatani bhwetu. Tukeekiriranʼya ega, bheetu tugende okukora emirimu kubhantu bhanú bhataringi Abhayahudi, na bheeki bhakore emirimu ku Bhayahudi. ¹⁰Kimwi bhakatusabha eringʼana rimwi ega, tubhenga turahiituka abhatobhu gati ya abheekirirya bha Yerusaremu eyo. Na oni naabha na ekituunyo bhukongʼu kya okukora ego.

Pauro aramukemera Kefa

¹¹Mbe, hanú Kefa yaahika Antiokia, orusiku rumwi nkamukemera ameeso kwa ameeso, kwa okubha yaaringa ahabhiri. ¹²Weeki hanú yaahika Antiokia kubhwambiro, yaaringa ararya ebhyakurya hamwi na abheekirirya bhanú bhataringi Abhayahudi bira enyanko. Nawe, hanú abhantu nyabhurebhe okurwa owa Yakobho bhaahika, akeeyahura kubheekirirya bhanú bhataringi Abhayahudi, akatiga okugendererya okurya nabho ebhyakurya. Yaakora ego, kwa okubha yoobhoha abhantu bhayo, bhaaringa bharakomererya ega, abheekirirya bhonsego bhabhenga bharasaarwa. ¹³Mbe, kora abheekirirya abhandi bha Ekiyahudi bhonse, bhakeeyahura okubha bhumwi na weeki. Kora Bharinabha wonse akahabhibhwa akasoha murwambe rwabho.

¹⁴Nawe, hanú naarora ega, enjira yaabho iyo eteemiri, kya ego obhuheene bhwa Amangʼana Amajomu bhuringi, nkamubhuurya Kefa embere ya bhonsego ega, “Onyoora uuwe m-Muyahudi, nawe, oragwata obhusimuka bhwa abhantu bhanú bhataringi Abhayahudi. Bhoono, kwaki orabhandirirya abhantu bhanú bhataringi Abhayahudi, okugwata obhusimuka bhwa Abhayahudi?”

Abhantu bhonsego bharatuuribhwakwa okumwikirirya Yeesu Kiristu

¹⁵M-maheene ega, bheetu obhusimuka bhwetu m-Bayahudi, tutaringi abhantu bha amakabhira agandi, bhanú turabhabhirikira ega, “abhakori bha obhusarya.” ¹⁶Nawe, bheetu tumanyiri ega, omuntu atakutura okubharwa okubha omuheene embere ya Waryubha, kwa okugwata amaragiriryo ga Musa. Nawe, arabharwa okubha omuheene kwa okumwikirirya Yeesu Kiristu okwenego. Na bheetu bhonse, twamwikirirya Kiristu Yeesu, naho tubharwe ega, turingi abhaheene embere ya Waryubha, kwa okumwikirirya Kiristu, etaringi kwa okugwata amaragiriryo ageenego. M-buheene ega, atariho omuntu unú aratura okubharwa ega, m-muheene embere ya Waryubha kwa okugwata amaragiriryo ga Musa ageenego.2:16 Maaha mubhitabho bhya Egijabhuri 143:2; Abharuumi 3:20.¹⁷Mbe, hanú bheetu turatuna okubharwa ega, turingi abhaheene embere ya Waryubha kwa okugwatana na Kiristu, turamaahikana ega, turingi abhakori bha obhusarya. Bhoono, m-maheene ega, Kiristu aratukora tubhe abhakori bha obhusarya? Tiigo-ha kora ahake! ¹⁸Nawe, nyoore ndaahunjukire okwikirirya enteemo ya akare ya okugwata amaragiriryo, enteemo inú naanga, hayo bhoono ndabha omusarya. ¹⁹Eribhaga rinú naaringa ndagwata amaragiriryo ga Musa, amaragiriryo gaambuturiranga ekiina. Nawe bhoono, ntakwenda kweki okwikara kwa okugwata amaragiriryo, naho nture okwikara kya ego Waryubha areenda. ²⁰Obhuhoru bhwani bhwa akare, bhwakwa hamwi na Kiristu hanú yaabhambwa kumusarabha. Bhoono ndingi omuhoru, nawe, etaringi kya ego naaringa akare, kwa okubha n-Kiristu areekara munsi waani. Obhuhoru bhunú niinabho bhoonwego, ndeekara kwa okumwikirirya Omwana wa Waryubha. Weeki yaanhanja na yaaruusya obhuhoru bhwaye, kurusumo rwani, naho yantuurye. ²¹Ntakutura okwanga eriruguto rya Waryubha. Nyoore omuntu aratura okubharwa ega, m-muheene embere ya Waryubha kwa okugwata amaragiriryo ga Musa, mbe, Kiristu yaakwa bhusa!

Abheekirirya bhaanyoora Omutima Omurabhu kwa okumwikirirya Kiristu

¹Bheenyu Abhagaratiya, abhakangi! Niwi yaabharoga? Amangʼana eguru ya okubhambwa kumusarabha kwa Yeesu Kiristu, gaatuurwa kubhurabhu embere ya ameeso geenyu. ²Ndeenda okumanya eringʼana erimwi rinu, okurwa kubheenyu. Bhoono, mwanyoora Omutima Omurabhu3:2 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. okurekana na okugwata amaragiriryo, kasi okurekana na okwikirirya Amangʼana Amajomu eguru ya Yeesu? ³Bhoono n-kwaki mwabheeri abhakangi ego? Bheenyu mwaamba obhuhoru bhwenyu obhuhya kwa eginguru gya Omutima Omurabhu, nawe bhoono, mureenda okumariisya kwa eginguru gyenyu abheene? ⁴Bhoono, enyanko yonsego inú yaabhanyoora, ebheeri ya bhusa? Maheene etaringi ya bhusa! ⁵Waryubha unú arabhahaana Omutima Omurabhu na okukora ebhika gati yeenyu, bhoono, arakora ego okurekana na obhugwati bhwenyu bhwa amaragiriryo? Kasi bhoono, arabhahaana Omutima Omurabhu kwa okwigwa na okwikirirya Amangʼana Amajomu eguru ya Yeesu?

⁶Mwiganirirye eguru ya Abhurahamu.3:6a Abhurahamu. Maaha eringʼana rinu mu Moonjooro eguru ya Amangʼana Amakongʼu. Amangʼoore Amarabhu garagamba ega, “Yaamwikirirya Waryubha, kwa ego, Waryubha akamubhara okubha omuntu omuheene embere yaaye.”3:6b Maaha mukitabho kya Obhwambiro 15:6.⁷Bhoono mbe, mumanye ega, abhantu bhanú bharamwikirirya Waryubha, bhayo mbo abhaana bha Abhurahamu. ⁸Amangʼoore Amarabhu gaaruusya obhurooti okurwa akare ega, Waryubha akaabhabhariri abhantu bhanú bhataringi Abhayahudi, okubha abhaheene embere yaaye, kwa enjira ya okumwikirirya. Waryubha yaakangata okumuraarikira Abhurahamu Amangʼana Amajomu gayo ega, “Kwa okuhitira kuuwe, ndinonka abhantu bha amakabhira gonsego ga mukyaro.”3:8 Maaha mukitabho kya Obhwambiro 12:3.⁹Mbe, abhantu bhanú bharamwikirirya Waryubha, bharanonkwa, kya ego Abhurahamu yaanonkwa kwa okubha yeekirirya.

Abheekirirya bhatuuriibhweokurwa mumeehiimo ga amaragiriryo

¹⁰Nawe, bhanú bhareesiga okutuuribhwa kwa okukora ganú amaragiriryo gareenda, bhayo bheehiimwa. Kwa okubha yaangʼoorwa mu Mangʼoore Amarabhu ega, “Wowonse unú atakugwata na okukora ganú gaangʼoorwa mukitabho kya amaragiriryo, yeehiimirwe.”3:10 Maaha mukitabho kya Obhuhiituki bhwa Amaragiriryo 27:26.¹¹M-buheene ega, atariho omuntu wowonse unú arabharwa okubha omuheene embere ya Waryubha, kwa okugwata amaragiriryo, kwa okubha Amangʼoore Amarabhu garagamba ega, “Omuheene aribhanga areekara kwa okunyikirirya.”3:11 Maaha mukitabho kya Habhakuki 2:4.¹²Amaragiriryo gareesigira amakorwa ga abhantu na gatakwisigira abhantu okumwikirirya Waryubha, kiyo nkyo kirakora Amangʼoore Amarabhu garagamba ega, “Omuntu unú arigwata gonsego ganú garagambwa mumaragiriryo, aribhanga areekara kwa okugwata gayo.”3:12 Maaha mukitabho kya Abharaawi 18:5.

¹³Kiristu yaatutungurya okurwa mumeehiimo ga amaragiriryo, kwa okugega ameehiimo gayo, kurusumo rwetu. Yaabha ego, kwa okubha Amangʼoore Amarabhu garagamba ega, “Wowonse unú arabhambwa kumusarabha, yeehiimirwe.”3:13 Maaha mukitabho kya Obhuhiituki bhwa Amaragiriryo 21:23.¹⁴Yaatutungurya, naho enonkwe inú Abhurahamu yaahaanwa, ebhahikiire abhantu bha ebhyaro bhyonsego, okuhitira ku Kiristu Yeesu. Na kwa enjira ya okumwikirirya Kiristu, bheetu bhonsego tunyoore Omutima Omurabhu unú Waryubha yaaturaga.

Endago ya Waryubha ku Abhurahamu na amaragiriryo gaaye ku Musa

¹⁵Abhahiiri bhaani kuimani, ndabhahaana ekirengyo okurekana na obhwikari bhwetu bhwa kira orusiku. Tugambe ega, abhantu bhabhiri bharireeni emuuma, eguru ya eringʼana nyabhurebhe. Na oraanyoore emuuma iyo, emariri okukoreka, ataabhe-ho omuntu wa okuikyukya kora okoongerya-ko kyokyonse. ¹⁶Mbe, Waryubha yaamuraga Abhurahamu hamwi na omwibhurwa waaye. Amangʼoore Amarabhu gatakugamba ega, “Na abheebhurwa bhaaye,” muna ega, m-baaru, nawe, garagamba ega, “Na omwibhurwa waaye,”3:16 Maaha mukitabho kya Obhwambiro 12:7. yaani oumwi, ngʼo Kiristu. ¹⁷Kinú ndagamba niiga, Waryubha yaakora eriragano3:17 Eriragano. Maaha eringʼana rinu mu Moonjooro eguru ya Amangʼana Amakongʼu. ryaye emyaka magana gane na mirongo esatu (430), eribhaga amaragiriryo gatarabha-ho. Kwa ego, amaragiriryo gayo, gatakutura okuruusya-ho eriragano riyo, kora egindago gyaryo. ¹⁸Ndagamba ego, kwa okubha nyoore abhantu bharagabha okurwa ku Waryubha kwa okugwata amaragiriryo, mbe, engabho iyo etakaaturiri kweki okubhurwa endago ya Waryubha. Nawe, Waryubha kwa eriruguto ryaye, yaamuhaana Abhurahamu engabho ya eriragano kwa okubha niigo yaaringa amuragiri.

¹⁹Bhoono, kwaki Waryubha yoongerya amaragiriryo kwiragano riyo? Amaragiriryo goongeribhwa okurekana na obhusarya bhwa abhantu, okuhikira hanú ariija omwibhurwa wa Abhurahamu, unú Waryubha yaabharaga ega, ariija. Amaragiriryo gayo, Waryubha yaamuhaana Musa okuhitira kubhamaraika, na Musa akabha omuchaama gati ya Waryubha na abhantu bhaaye. ²⁰Omuchaama ataringi wa umwi. Waryubha omwene yaakora eriragano na Abhurahamu, bira omuchaama okubha-ho.

²¹Bhoono, amaragiriryo garahabhana na egindago gya Waryubha? Tiigo-ha kora ahake! Nyoore amaragiriryo gakaabheeri na obhuturo bhwa okuhaana abhantu obhuhoru, omuntu akaabhariirwe obhuheene embere ya Waryubha kwa okugagwata. ²²Nawe, Amangʼoore Amarabhu garagamba ega, abhantu bhonsego bharingi mubhutungi bhwa obhusarya. Kwa ekisigo kiyo, Waryubha yaaraga okubhahaana kinú yaaraga3:22 Maaha mukitabho kya Abhagaratia 3:14. bhonsego bhanú bharamwikirirya Yeesu Kiristu.

²³Eribhaga rinú abhantu bhataaringa bharamwikirirya Yeesu Kiristu, twaringa turatungwa na okubhohwa na amaragiriryo ga Musa, enu turaganya eribhaga rinú Kiristu akaatubhwirwe, naho tumwikirirye. ²⁴Amaragiriryo ga Musa ngo gaaringa garatoorokererya kya omureri weetu, okuhikira hanú Kiristu yaaja. Kwa ego bhoono, n-kwa okumwikirirya Kiristu, turatura okubharwa ega, turingi abhaheene embere ya Waryubha. ²⁵Nawe bhoono, kwa okubha eimani ku Yeesu Kiristu emariri okuuja, tutaringi kweki insi ya omureri weetu. ²⁶Bhoono, bheenyu bhonsego mubheeri abhaana bha Waryubha kwa okumwikirirya Kiristu Yeesu, na okugwatana nawe. ²⁷Bheenyu bhonsego bhanú mwabhatiijwa, mugwateeni na Kiristu, mubheeri muna mumwibhoheri Kiristu. ²⁸Kwa ego, bhutariho kweki obhwahukani gati ya Omuyahudi na unú ataringi Omuyahudi, kasi omugaya na omwiyagaari, kasi omusaaja na omukari, kwa okubha bheenyu bhonsego mubheeri bhamwi kwa okugwatana na Kiristu Yeesu. ²⁹Na nyoore bheenyu m-ba Kiristu, mbe mubheeri orwibhuro rwa Abhurahamu, na murinyoora engabho inú Waryubha yaaraga.3:29 Maaha mukitabho kya Abhagaratia 4:1-7.

¹Mbe, ndabhakeerya ega, wowonse unú aragabha ebhintu bhya esewaabho akyari omwana, arabha kya omugaya, onyoora ebhintu bhyonsego m-byaye. ²Eribhaga riyo ryonsego oranyoora akyari omwana, oranyoora aringi insi ya abheemiririri na abhaangarariri, okuhikira kwibhaga rinú esewaabho yaaseemya ega, aratura okubhiimiririra. ³Na bheetu bhonsego niigo ego. Hanú Kiristu yaaringa ataraaja, twaringa kya abhaana, twaringa abhagaya bha eginkoro egimbiibhi ginú giratunga ekyaro kinu.4:3 Abhagaya bha eginkoro egimbiibhi ginú giratunga ekyaro kinu. Ensonga eindi eratura okubha ega, abhagaya bha obhusimuka bhwa ekyaro kinu. ⁴Nawe, eribhaga rinú ryaringa riseemiibhwe hanú ryahika, Waryubha akamutuma Omwana waaye mukyaro munu. Omwana uyo, yeebhurwa na omukari kya ego na bheetu tweebhurwa, akabha insi wa amaragiriryo. ⁵Yaatumwa, naho atutungurye bheetu bhanú twaringa abhagaya insi wa amaragiriryo. Yaakora ego, naho bheetu bhonsego tubhe abhaana bha Waryubha.

⁶Na kwa okubha bheenyu mubheeri abhaana bha Waryubha, Waryubha yaatuma Omutima wa Omwana waaye, mumitima gyetu. Omutima uyo, ngʼo aratukora tumubhirikire Waryubha “Aba,” ensonga yaaye niiga, “Taata.” ⁷Bhoono, bheenyu mutaringi abhagaya kweki, nawe, muringi abhaana bha Waryubha. Kwa ego, murihaanwa engabho ya obhuhoru bhwa koko, inú Waryubha yaabhiikira abhaana bhaaye.

Pauro arabhakemera Abhagaratia

⁸Akare hayo, bheenyu mutaaringa mumumanyiri Waryubha. Eribhaga riyo, mwaringa abhagaya bha abhakuru bhanú bhataringi Waryubha. ⁹Nawe bhoono, mumumanyiri Waryubha, na omwene wonse abhamanyiri bhukongʼu. Bhoono n-kwaki, kweki mureenda okusyengera eginkoro egimbiibhi ginú giratunga ekyaro kinu? Eginkoro giyo gitaana obhuturo kasi obhwera bhobhonse. Kasi kweki mureenda okubha abhagaya bhaagyo? ¹⁰Kwaki mukyagwatanga eginyangi gyenyu gya Ekiyahudi? Murasuuka orusiku nyabhurebhe kubhutuuro, kumweri na kumwaka, ega, ni-ginyangi gya okumusuuka Waryubha. ¹¹Niina enkubhi eguru yeenyu ega, hamwi emirimu gyani gyonsego ginú naakora kubheenyu, gyahita bhusa. ¹²Abhahiiri bhaani kuimani, ndabheesasaama mwiyagaare kya ego oni niyagaariri, kwa okubha oni n-kya bheenyu.

Hanú naaringa hamwi na bheenyu, mutaankorera obhubhiibhi bhobhonse. ¹³Mumanyiri ega, obhurweri bhwani, mbo bhwakora nkanyoora omweya gwa okubharaarikira Amangʼana Amajomu, orwa mbere. ¹⁴Onyoora obhurweri bhwani bhwabhareetera amasakyo, mutaanjeera kasi okunyanga. Nawe, mwanyikirirya kya maraika wa Waryubha, kasi kya Kiristu Yeesu. ¹⁵Obhujomerwa bhwenyu bhunú mwaringa nabho kwibhaga rirya bhwagiiri-ha? M-maheene ega, kwibhaga rirya, mukaaturiri kora okwiha ameeso geenyu mungʼaane. ¹⁶Bhoono, naabheeri omusigu weenyu kwa okubha ndabhakeerya obhuheene?

¹⁷Abheehigirya bha obhubheehi bhayo, bhareegomba okubhanyankira, nawe, etaringi kwa obhujomu. Bhareenda okubhaahukanʼya na oni, naho bheenyu mwigombe okubhakorera emirimu bheeki. ¹⁸M-bujomu okukora ekituunyo, nawe, ebhe kwa okukora amajomu. Mukorenga ego, eribhaga ryonsego, kora kwa eribhaga rinú ntaringi hamwi na bheenyu. ¹⁹Abhaana bhaani abhahanje kuimani, rinu ni-ribhaga erindi kweki kuoni, okubheegwira obhururu, kya ego omukari wa enda, ararumwa obhusungu hanú areenda okwibhura. Oni ndeeyigwenga egoego, okuhikira hanú Kiristu arimaahikana gati yeenyu. ²⁰Ndeegomba nkaabheeri hamwi na bheenyu kwibhaga rinu, nkaahairi na bheenyu kwa obhunyoohu. Niina enkubhi eguru yeenyu!

Ekirengyo kya Hajiri na Saara

²¹Munkeerye, bheenyu bhanú mureenda okubha abhagaya insi wa amaragiriryo ga Musa, bhoono, mumanyiri kya ego amaragiriryo garagamba? ²²Engʼoorerwe mu Mangʼoore Amarabhu ega, Abhurahamu yaaringa na abhaana bhabhiri. Oumwi yaamwibhura na Hajiri unú yaaringa omugaya waaye, na oundi yaamwibhura na omukari waaye Saara unú ataaringa omugaya. ²³Omwana waaye unú yeebhura na omugaya waaye, yaamwibhura kwa enjira ya omubhiri ogwenego. Nawe, omwana waaye unú yeebhura na omukari waaye Saara, weeki yeebhurwa kwa endago ya Waryubha. ²⁴Abhakari abhabhiri bhayo, bharatura okubha ekirengyo kya okwimiririra amaragano gabhiri. Hajiri areemiririra eriragano rya akare, rinú ryakorekera munkuku ya Sinai. Abhaana bhaaye, bheebhurwa kya abhagaya insi ya amaragiriryo. ²⁵Hajiri areemiririra enkuku ya Sinai mukyaro kya Arabhia, kweki areemiririra omugi gwa Yerusaremu ya bhoonwego, kwa okubha abhaana bhaaye bharingi mubhugaya bhwa amaragiriryo ganú bhaahaanwa munkuku ya Sinai. ²⁶Nawe, Saara areemiririra omugi gwa Yerusaremu ya murwire, inú iiyagaariri, iyo ngʼyo maayi. ²⁷Mu Mangʼoore Amarabhu, engʼoorerwe ega,

“Ojomerwe uuwe omugumba unú otakwibhura,

kuura kwa eriisi erinene kwa obhujomerwa, uuwe unú otaakeegwiri obhusungu,

kwa okubha abhaana bha unú yaatigwa na omusaaja m-baaru,

okukira abha unú yaana omusaaja.”4:27 Maaha mukitabho kya Isaaya 54:1.

²⁸Mbe bhoono, abhahiiri bhaani kuimani, bheenyu m-baana bha Waryubha okurekana na endago yaaye, kya ego Esaaka yaaringa. ²⁹Nawe, kuginsiku girya, omwana unú yeebhurwa kwa enjira ya omubhiri, yaamunyankya omwana unú yeebhurwa kwa enjira ya Omutima Omurabhu. Niigo ego na kuginsiku ginu, abhantu bhanú bharingi insi wa amaragiriryo, bharabhanyankya bheenyu bhanú mureeyagaara. ³⁰Nawe, Amangʼoore Amarabhu garagamba-ki? Garagamba ega, “Okenyie omukari omugaya unu, hamwi na omwana waaye, kwa okubha omwana wa omugaya unu, atakutura okugabha engabho hamwi na omwana wa omukari unú ataringi omugaya.”4:30 Maaha mukitabho kya Obhwambiro 21:10.³¹Kwa ego, abhahiiri bhaani kuimani, bheetu tutaringi abhaana bha omukari omugaya, turingi abhaana bha omukari omutetwa.

Obhwiyagaari bhwa Omukiristu

¹Kiristu atutungwirye okurwa mubhugaya bhwa amaragiriryo, naho twiyagaare. Mbe, munage kuimani, kora kweki muteekirirya okuhunjuka mubhugaya bhwa amaragiriryo. ²Mwitegeerere, oni Pauro ndabhakeerya ega, nyoore mureekirirya okusaarwa kurusumo rwa okugwata amaragiriryo, hayo Kiristu atakubha na obhwera bhobhonse kubheenyu. ³Ndabhakeerya kweki kubhurabhu ega, omusaaja wowonse unú areekirirya okusaarwa, areenderwa okugwata amaragiriryo gonsego. ⁴Nyoore mureesiga okubharwa ega, muringi abhaheene embere ya Waryubha, kwa okugwata amaragiriryo, mbe, mwiyahwiri okurwa ku Kiristu, na mwibhuriirye eriruguto rya Waryubha. ⁵Nawe, Omutima Omurabhu aratubheera bheetu okwisiga ega, Waryubha aritubhara okubha abhantu abhaheene, kwa okubha turamwikirirya Yeesu. ⁶Mbe, nyoore twikiriirye okugwatana na Kiristu Yeesu, okusaarwa kasi okutiga okusaarwa kutaana obhwera bhobhonse. Ekintu ekinene kya obhwera, ngʼ-imani yeetu inú erakora emirimu kwa obhuhanje.

⁷Kubhwambiro, mwaringa murakora bhujomu! Bhoono, niwi yaabhangʼeenererye mutagwata ameehigiryo ga obhuheene? ⁸Obhungʼeenererya bhuyo, bhutakurwa ku Waryubha unú abhabhirikiiri. ⁹Nawe, mumanye ega, “Ekimera ekikego, kirabhimbya eriguma erigima!”5:9 Ekimera ekikego, kirabhimbya eriguma erigima. Ensonga yaaye niiga, ameehigiryo amake ga obhubheehi, garatura okusarya bhubhiibhi abhantu abhaaru.¹⁰Mmanyiri obhuheene ega, mureekiriranʼye na oni, kwa okubha bheenyu mugwateeni na Omukuru Yeesu. Nawe, omuntu wowonse unú aribhanyankya, kora akaabha owi, aribhuturirwa ekiina.

¹¹Abhahiiri bhaani kuimani, abhantu abhandi bharagamba ega, oni ndaraarika ega, kira omusaaja niiga, asaarwe. Nyoore maheene niigo ndaraarika, kwaki Abhayahudi bharannyankya? Na nyoore niigo ndaraarika, obhuraariki bhwani eguru ya okukwa kwa Yeesu Kiristu kumusarabha, kutakukora Abhayahudi bhambihirirwe. ¹²Ndeegomba ega, abhantu bhanú bharabhanyankya kwa amangʼana ga ensaaro, nyakara bhakeeyihiri bheeki abheene!

Okwikara kwa obhuturo bhwa Omutima Omurabhu

¹³Abhahiiri bhaani kuimani, Waryubha abhabhirikiiri, naho mwiyagaare. Nawe, obhwiyagaari bhwenyu, bhutabhakora mubhe na omweya gwa okugwata orunamba orubhiibhi rwa omubhiri, nawe, mubheeranenga kwa obhuhanje. ¹⁴Ndagamba ego, kwa okubha amaragiriryo gonsego garakunaanibhwa na eriragiriryo rimwi ega, “Omuhanje omurikyaho kya ego oreehanja uuwe omwene.”5:14 Maaha mukitabho kya Abharaawi 19:18.¹⁵Nawe, nyoore murarumana na okwirya kya egintyenyi, mwiyangararire, naho mutariija okwisikya bheenyu abheene.

¹⁶Mbe, kinú ndabhakeerya niiga, enteemo yeenyu ebhe eroorokereribhwa na Omutima Omurabhu. Mukaakora ego, mutarigwata orunamba orubhiibhi rwa omubhiri. ¹⁷Ndagamba ego, kwa okubha bhyonsego bhinú orunamba orubhiibhi rwa omubhiri rureegomba, bhitaringi kya bhinú Omutima Omurabhu areegomba. Na bhinú Omutima Omurabhu areegomba, bhitaringi kya bhinú orunamba orubhiibhi rwa omubhiri rureegomba. Omutima Omurabhu na orunamba orubhiibhi rwa omubhiri, bhirasongana. Okurekana na riyo, mutakwiyagaara okukora kyokyonse kinú mureenda. ¹⁸Nyoore muroorokereribhwe na Omutima Omurabhu, mutakubha insi wa amaragiriryo.

¹⁹Mbe, amangʼana ganú garakoreka kwa orunamba orubhiibhi rwa omubhiri, gamanyikeeni kubhurabhu, na n-ganu, obhusimbe, obhusuunu, okukora amangʼana ga eginsoni, ²⁰okusyengera ebhisusano, obhuturutumbi, obhusigu, eritoongʼana, orwango, enkoro, eginhaka, erigamba, ²¹orungʼeera, obhureebhi, enamba na amangʼana agandi gonsego ganú garahunkana kya gayo. Ndabhakeerya kweki kya ego naaringa mbakeererye, ega, abhantu bhanú bharakora amangʼana gayo, bhatarigabha kyokyonse mubhukama bhwa Waryubha.5:21 Mubhukama bhwa Waryubha. Maaha Obhukama bhwa Waryubha mu Moonjooro eguru ya Amangʼana Amakongʼu.²²Nawe, emisumo gya Omutima Omurabhu, m-buhanje, obhujomerwa, omurembe, obhwigumirirya, obhuserenʼya, obhusambaaruku na eimani, ²³obhunyoohu na obhwiribhiri. Ritariho eriragiriryo rinú rirakaanʼya omuntu okukora amangʼana gayo. ²⁴Abhantu bhanú bhagwateeni na Kiristu Yeesu, bhatakutungwa na orunamba orubhiibhi rwa omubhiri, hamwi na ameetegeerero gaabho amabhiibhi. N-kya muna bhaabhamba eginteemo gyabho gya akare, kumusarabha gwa Yeesu. ²⁵Omutima Omurabhu atuheeri obhuhoru obhuhya, mbe twikare kwa obhutungi bhwaye. ²⁶Tuteegungya bhusa, tutatindirana kora okumaahirana orungʼeera.

Okubheerana na okukora amajomu

¹Abhahiiri bhaani kuimani, mukaamanya ega, omurikyenyu akoreri obhusarya bhobhonse, bheenyu bhanú muroorokereribhwa na Omutima Omurabhu, mumukemere na mumuhindye kwa obhunyoohu. Nawe, mwiyangararire mutaaja okusakibhwa okubha na enteemo kya yaaye. ²Mubhenga murabheerana emijigo emirito. Kwa okukora ego, nho, murakunaanʼya amaragiriryo ga Kiristu.6:2 Maaha mukitabho kya Yoana 13:34.³Mbe, omuntu wowonse unú areerora ega, yaana obhwera okukira abharikyaye, enu ataana obhwera bhobhonse, uyo areengʼeena omwene! ⁴Kira omuntu yeeyikomye enteemo yaaye omwene. Nyoore omuntu arakora amajomu, hayo aratura okwigungya eguru ya amajomu ganú omwene akoreri. Nawe, ateeringʼaanʼya na amangʼana ganú omuntu oundi akoreri, ⁵kwa okubha kira omuntu arigega omujigo gwaye omwene.

⁶Omwihigira wa eringʼana rya Waryubha, abhenga aramugabhira-ko omwihigirya waaye, ebhintu ebhijomu bhinú aranyoora. ⁷Muteengʼeena, Waryubha atakujabhurwa. Ekintu kinú omuntu arahamba, nkyo arigesa. ⁸Mbe, omuntu unú aroorokereribhwa na orunamba orubhiibhi rwa omubhiri, arigesa engʼanga okurekana na orunamba ruyo. Nawe, unú aroorokereribhwa na Omutima Omurabhu, arigesa obhuhoru bhwa koko, okurwa ku Mutima Omurabhu. ⁹Kwa ego, tutarosa okukora amajomu! Nyoore tureegumirirye kukukora amajomu, turinyoora omugeso omujomu hanú eribhaga rya okugesa ririhika. ¹⁰Mbe, eribhaga ryoryonse hanú turanyoora omweya, tukorere abhantu bhonsego amajomu, nawe, ekinene kubheekirirya abharikyetu.

Amangʼana ga obhuteero

¹¹Mumaahe amangʼoore gaani ga eginyuguta eginene gayo, bhoono, ndaamba okubhangʼoorera kwa okubhoko kwani omwene. ¹²Abhantu bhanú bharabhabhandirirya bheenyu musaarwe, bhareenda ego, naho bhasuukwe. Bhareenda bhatariija okunyankibhwa kurusumo rwa okuraarika eguru ya oruku rwa Kiristu kumusarabha. ¹³Na kora bhanú bhaasaarwa, abheene bhonse bhatakugwata amaragiriryo gonsego. Nawe, bhareenda ega, bheenyu musaarwe, naho bheegungye eguru ya okusaarwa kwenyu.

¹⁴Oni ntaana eringʼana ryoryonse rya okwigungirya, nawe, ndeegungya eguru ya oruku rwa Omukuru weetu Yeesu Kiristu kumusarabha. Okurekana na oruku rwaye, amangʼana gonsego ga ekyaro kinu, gataana obhwera kuoni. Obhuhoru bhwani bhwa akare, bhwakwa nawe kumusarabha. ¹⁵Okusaarwa kasi okutiga okusaarwa, kutaana obhwera bhobhonse. Ekintu ekinene kya obhwera, nu-kukorwa na Waryubha okubha omuhya.6:15 Maaha mukitabho kya 2 Abhakorinto 5:17.¹⁶Omurembe na ekyabhira bhinú bhirarwa ku Waryubha, bhibhe na abhantu bhonsego bhanú bharagwata obhuheene bhuyo, bhayo mbo abhantu bha Waryubha.6:16 Bhayo mbo abhantu bha Waryubha. Ensonga eindi eratura okubha ega, na bhibhe na Isiraeri, abhantu bha Waryubha.

¹⁷Mbe, okurwa bhoonwego, omuntu wowonse atannyankya kweki, eguru ya eringʼana riyo, kwa okubha oni niina ebhimoa kumubhiri gwani, kurusumo rwa okumukorera emirimu Yeesu.

¹⁸Abhahiiri bhaani kuimani, eriruguto rya Omukuru weetu Yeesu Kiristu, ribhe hamwi na bheenyu bhonsego. Amina.