Abhaefeso

Enyarubha ya Pauro ku

Abhaefeso

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Enyarubha ku Bhaefeso yaangʼoorwa eribhaga rimwi na enyarubha ku Bhakorosai, kumwaka gwa mirongo esansabha (60) okurwa okwibhurwa kwa Yeesu Kiristu. Abhasomi abhaaru bhareekirirya ega, Pauro yaabhangʼoorera Abhakiristu bha mumugi gwa Efeso, onyoora enyarubha inu etakubhakeeranʼya kya enyarubha inú yaangʼoorera Abhakorosai. Kwa ekisigo kiyo, eratura okubha ega, enyarubha inu, yeenderwanga okuhirwa na mumakanisa agandi ganú gaaringa haangʼi na mwikanisa rya Efeso. Kweki Pauro aragamba ega, hanú yaangʼooranga enyarubha inu, yaaringa mwigereja (3:1, 4:1, 6:20). Pauro yaatuma enyarubha iyo, okuhitira ku Tukiko unú yaaringa kurugendo rwa okutaarira Abhakiristu bha Efeso (6:21-22).

Efeso gwaringa omugi omunene na ngo gwaringa emenyo enkuru ya obhutungi bhwa Ekiruumi, mukyaro kya Asia. Efeso gwaringa gumanyikeeni kwisyengerero ryaye rinú ryaringa riteerwe kumukuru waabho wa ekikari, owa Ekiyunani. Weeki yaabhirikirwanga ega, Artemi (maaha mukitabho kya Amakorwa ga Abhatumwa 19:23-31). Erikanisa rya Efeso ryaringa ryambiri kwa eginguru, nawe, rikamara rikeerabhirwa (maaha mukitabho kya Obhukundukuri 2:1-7).

Pauro aratonda mukiseku kya 1-3 kya ego Waryubha yaasora abhantu na okubhatuurya okurwa mubhusarya bhwabho kwa enjira ya Yeesu Kiristu. Arahunkanʼya erikanisa na omubhiri, na Kiristu kya omutwe gwaryo. Kweki arahunkanʼya erikanisa na erikindaasi, na Kiristu n-kya erigina erikuru rya obhurusa bhwa erikindaasi riyo. Mukiseku kya 4-6, Pauro aroorokererya kya ego abhantu bhareenderwa okwikara, obhwikari bhwa Ekikiristu.

Pauro arakeeranʼya Abhaefeso

¹Enyarubha inu, erwiri kuoni Pauro. Oni naabhirikirwa kwa obhwendi bhwa Waryubha, okubha omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu. Ndabhangʼoorera bheenyu abhantu bha Waryubha bhanú mureekara mumugi gwa Efeso, bhanú muramwikirirya Kiristu Yeesu.

²Ndabheendera eriruguto na omurembe okurwa ku Taata Waryubha na ku Mukuru Yeesu Kiristu bhibhe hamwi na bheenyu.

Enonkwe inú turahaanwa okuhitira ku Kiristu

³Agungibhwe Waryubha, Taata wa Omukuru weetu Yeesu Kiristu, kwa okubha kwa okugwatana kwetu na Kiristu, yaatunonka kwa eginonkwe gyonsego egya omutima okurwa murwire.

⁴Eribhaga Waryubha yaaringa atarabhumba ekyaro, yaatusora tubhe bhaaye kwa enjira ya okugwatana kwetu na Kiristu. Yaakora ego, naho tubhe abhantu abharabhu bha omutima bhanú bhataana amasoro embere yaaye. Na kwa okubha atuhanjiri, ⁵Waryubha yaaringa yaamwiri okurwa akare, okutukora okubha abhaana bhaaye kwa enjira ya Yeesu Kiristu. Yaamura okukora ego, kwa okubha niigo yaamujomera. ⁶Kwa ego, tumukumye Waryubha kwa eriruguto ryaye ya okuruguurya, rinú yaatuhaana bhusa, kwa enjira ya Omwana waaye1:6 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. omuhanje.

⁷Waryubha atutungwirye kwa enjira ya amanyinga ga Yeesu Kiristu, yaani atwabhiiri obhusarya bhwetu bhonsego, okurekana na obhwaru bhwa eriruguto ryaye. ⁸Weeki yaatwaruhirya eriruguto ryaye bhukongʼu, hamwi na okutuhaana egintungwa na obhungʼeeni bhonsego. ⁹Atukoreri tumanye ekinyerera kyaye kinú kyaringa kiibhisiri. Yaakora ego, kwa okubha niigo yaamujomera, na yeendanga okuikora okuhitira ku Yeesu Kiristu. ¹⁰Ensonga ya Waryubha niiga, hanú eribhaga ryaye rinú yaaseemya ririhika, arikumanʼya hamwi ebhibhumbwa bhyonsego, ebhya murwire na ebhya mukyaro, na okubhikora bhibhe insi ya obhutungi bhwa Kiristu.

¹¹Waryubha akoreri amangʼana gonsego okuringʼaana na obhwendi bhwaye. Weeki atusoreri bheetu, okunyoora obhutuurya kya ego yeendanga okurwa akare, kwa ekisigo kya okugwatana kwetu na Kiristu. ¹²Mbe, bheetu Abhayahudi bhanú twakangata okumwikirirya Kiristu, tureenderwa okugungya obhukuru bhwa Waryubha.

¹³Bheenyu bhonse abhantu bhanú mutaringi Abhayahudi, mweegwa amangʼana ga obhuheene, yaani Amangʼana Amajomu kya ego Waryubha arabhatuurya. Hanú mwamwikirirya Kiristu, Waryubha wonse akabhatema orubhaaso, kwa okubhahaana Omutima Omurabhu1:13 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. unú yaabharaga. Kwa okukora ego, yoorokya ega, bheenyu m-baaye. ¹⁴Omutima uyo, m-butungurya bhwa okunyoora gonsego ga Waryubha kya ego yaaraga abhantu bhaaye. Na eringʼana rinu riratukomererya ega, Waryubha aribhatuurya abhantu bhaaye bhonsego. Tugungye obhukuru bhwaye.

Pauro arasabhira Abhakiristu bha Efeso

¹⁵Ndamukumya Waryubha kwa ekisigo kya amangʼana gayo gonsego yaatukorera. Oni nonse okwambira hanú neegwa kya ego muramwikirirya Omukuru Yeesu, na kya ego murahanja abhantu bhonsego bha Waryubha, ¹⁶ntakutiga okumukumya Waryubha, kurusumo rwenyu. Ndabhahiituka mumasabho gaani. ¹⁷Ndamusabha Waryubha wa Omukuru weetu Yeesu Kiristu, Taata wa obhukuru, abhahaane omutima gwa egintungwa na okubhatubhurira, naho muture okumumanya weeki bhukongʼu. ¹⁸Ndamusabha Waryubha, atubhure emitima gyenyu, naho mumanye obhwisige bhunú murabha nabho okurekana na okubhirikirwa kwenyu ku Waryubha. Kweki ndamusabha ega, muture okumanya obhuniibhi obhunene bhwa engabho yaaye ya okuruguurya, bhunú yaaraga abhantu bhaaye. ¹⁹Ndamusabha muture okumanya kya ego obhuturo bhwaye obhukuru bhuringi, kurusumo rwetu bheetu abheekirirya. Obhuturo bhuyo, bhurakora emirimu munsi yeetu, n-kya eginguru gyaye eginene bhukongʼu ²⁰bhunú yaakora ku Kiristu hanú yaamuhyukya okurwa mubhaku, akamutuura orubhaara rwaye rwa obhuryo, murwire.1:20 Maaha mukitabho kya Egijabhuri 110:1.²¹Na eguru eyo, Kiristu aratunga eguru ya abhakuru na abhatungi bhonsego, yaana eginguru na obhukuru, na obhutungi, na kira eriina rinú riragambwa, kora etaringi mukyaro munu aheenego, na kora mukyaro kinú kiriija. ²²Waryubha aheeri Kiristu obhutungi bhwa ebhintu bhyonsego, akamukora abhe omukuru wa ebhintu bhiyo, kurusumo rwa erikanisa. ²³Erikanisa m-mubhiri gwa Kiristu, na riijwiri obhukunaani bhwaye. Weeki ngʼo arahikya ebhintu bhyonsego kira ahasi.1:23 Maaha mubhitabho bhya Abharuumi 12:5; Abhakorosai 1:19; 1 Abhakorinto 12:27; Abhaefeso 4:10.

Waryubha aratuurya kwa eriruguto ryaye

¹Bheenyu mwaringa mukwiri, kwa ekisigo kya ebhikorwa bhyenyu ebhibhiibhi na obhusarya bhwenyu. ²Eribhaga riyo, mwaringa murakora amangʼana amabhiibhi ga mukyaro kinu. Na mwaringa murariigwa Erisambwa,2:2 Erisambwa. Maaha eringʼana rinu mu Moonjooro eguru ya Amangʼana Amakongʼu. omukama wa ebhihwi bhya obhuturo bhwa orwire, unú bhoono arakora emirimu kubhanú bhatakumwigwa Waryubha. ³Bheetu bhonsego, twaringa kya bheeki, tweekaranga okuringʼaana na orunamba rwetu rwa ekyaro, na okukora amangʼana ganú gaajomeranga emibhiri gyetu na obhungʼeeni bhwetu ageenego. Tweebhurwa na obhusimuka bhwa obhusarya kya abhandi, kwa ego Waryubha yaaringa atujimiiri na tweenderwanga okujibhibhwa. ⁴Nawe, Waryubha kwa okubha ngʼ-wa ekyabhira ekyaru, atuhanjiri kwa obhuhanje bhwaye bhunú bhutaana obhuteero. ⁵Bheetu twaringa tukwiri kurusumo rwa obhusarya bhwetu, nawe, Waryubha kwa eriruguto ryaye, yaatutuurya akatukora okubha abhahoru kya ego yaamuhyukya Kiristu.2:5 Maaha mukitabho kya Abharuumi 6:4.⁶Kwa okugwatana kwetu na Kiristu, Waryubha yaatuhyukya okurwa mubhaku, hamwi na Kiristu Yeesu, akatwikarya hamwi nawe murwire, naho tutunge hamwi nawe. ⁷Yaakora ego, naho yoorokye kwibhaga rinú riraaja, obhuserenʼya bhwaye kubheetu okuhitira ku Kiristu Yeesu, na obhwaru bhwa eriruguto ryaye rinú ritaana obhuteero. ⁸Waryubha yaabhatuurya kwa eriruguto ryaye, kwa okubha mwamwikirirya Yeesu Kiristu. Obhutuurya bhuyo, bhutakurekana na ekituunyo kyenyu abheene, m-mutuho gwenyu okurwa ku Waryubha. ⁹Ataabhatuurya kwa okurekana na amakorwa geenyu, kwa ego, omuntu wowonse atariija okwigungya. ¹⁰Waryubha yaatubhumba kya ego turingi. Yaatubhumba bhuhya kwa okugwatana kwetu na Kiristu Yeesu, naho tukorenga amakorwa amajomu ganú yaatuseemerya tukore.

Okubha na obhumwi ku Kiristu

¹¹Mbe, muhiituke kya ego mwaringa akare. Obhusimuka bhwenyu m-bantu bha ebhyaro ebhindi, mutaringi abhantu bha Waryubha. Abhayahudi bharabhabhirikira ega, “abhantu bhanú mutakusaarwa,” nawe, bheeki bhareebhirikira ega, bhanú bharasaarwa, ensaaro inú erakoreka kumibhiri gyabho kwa amabhoko. ¹²Muhiituke ega, eribhaga rirya, mutaaringa mumanyiri eguru ya Kiristu. Mwaringa mwahukeeni na abhantu bha Isiraeri, bhanú mutaaringa munyooreri eriragano2:12 Eriragano. Maaha eringʼana rinu mu Moonjooro eguru ya Amangʼana Amakongʼu. ryoryonse okurwa kumaragano gaabho. Mutaaringa na obhwisige kya abhantu bhanú bhatamanyiri Waryubha mukyaro. ¹³Nawe bhoono, kwa okugwatana kwenyu na Kiristu Yeesu, bheenyu bhanú akare hayo, mwaringa hare, muteerwe haangʼi kwa enjira ya okwitika kwa amanyinga ga Kiristu. ¹⁴Na kwa okubha Kiristu omwene yaareeteri omurembe gati yeetu, Abhayahudi na abhantu bhanú bhataringi Abhayahudi, yaatukora bheetu bhanú twaringa twahukeeni okubha abhamwi. Yaaruusya-ho obhusigu bhunú bhwatwahukanʼyanga kya endigi. ¹⁵Hanú yaaruusya omubhiri gwaye, yaaruusya-ho amaragiriryo ga Musa2:15 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. hamwi na emigiro gyago, naho okurekana na abhantu bha emiganda ebhiri giyo, akore omuganda gumwi omuhya. Ego niigo yaareeta omurembe gati yeetu. ¹⁶Kiristu yaaruusya-ho obhusigu, kwa enjira ya okukwa kwaye kumusarabha, yaagwatanʼya emiganda ebhiri ginu, okubha ogumwi na okubhagwatanʼya ku Waryubha. ¹⁷Mbe, hanú Kiristu yaaja, akaraarika amangʼana amajomu eguru ya omurembe, kubheenyu bhanú mwaringa mutamumanyiri Waryubha, na ku Bhayahudi, bheeki bhaaringa bhamumanyiri Waryubha. ¹⁸Kwa ego, okuhitira kumwene, bheetu bhonsego twanyooreri omweya gwa okumusuntarira Taata kwa enjira eimwi, yaani kwa okuhitira Omutima oumwi.

¹⁹Mbe, okwambira bhoono, bheenyu mutaringi abhageni kora abhahiti, nawe, mwabheeri abhasimuka hamwi na abhantu bha Waryubha, abhantu abha omuganda gwa Waryubha. ²⁰Bheenyu mubheeri kya enyumba inú ehagaajirwe kubhurusa, na obhurusa bhuyo, m-batumwa na abharooti,2:20 Obhurusa bhuyo, m-batumwa na abharooti. Ensonga eindi eratura okubha ega, obhurusa bhuyo, bhwatuurwa na abhatumwa na abharooti. na Kiristu Yeesu omwene n-kya erigina erikuru rya obhurusa bhuyo. ²¹Weeki ngʼo aragwatanʼya erikindaasi ryonsego riragwatana bhujomu, na okurikora ribhe erinene kya erisyengerero erirabhu kurusumo rwa Omukuru. ²²Kwa okugwatana nawe, bheenyu bhonse muragwatanibhwa hamwi na abhandi bhonsego, okubha emenyo ya Waryubha kwa enjira ya Omutima waaye.

¹Okurekana na gayo, oni Pauro ndabhasabhira. Oni mboherwe kwa ekisigo kya emirimu ginú Kiristu Yeesu yaangʼaana, kurusumo rwenyu abhantu bhanú bhataringi Abhayahudi. ²Niina obhuheene ega, mwamara okwigwa eguru ya emirimu ginú Waryubha yaangʼaana kwa eriruguto ryaye, kurusumo rwenyu. ³Waryubha omwene yaantubhurira ekinyerera kyaye kinú kyaringa kiibhisiri, kya ego naamara okungʼoora kwa amangʼana amake. ⁴Hanú muraasomenga amangʼana gayo naangʼoora, muraature okumanya, kya ego mmanyiri ekinyerera kya Waryubha eguru ya Kiristu. ⁵Akare hayo, Waryubha ataatubhurira abhantu ekinyerera kyaye kiyo, nawe bhoono, abhatubhuriiri abhatumwa na abharooti bhaaye abharabhu bha omutima, kwa enjira ya Omutima Omurabhu. ⁶Ekinyerera kya Waryubha kinu, niiga, abhantu bha ebhyaro ebhindi, hamwi na Abhayahudi bhonsego bhanú bhareekirirya Amangʼana Amajomu, bhonsego bharagabha kiringʼaanʼya, amajomu ganú Waryubha yaaseemerya abhantu bhaaye. Bhonsego bhabheeri kya omubhiri gumwi, na bharaabhenga bharasanga hamwi, eriruguto rinú Waryubha yaaraga okuhitira ku Kiristu Yeesu.

⁷Waryubha yaankora okubha omukori wa emirimu gya okuraarika Amangʼana Amajomu ganu, okurekana na omutuho gwa eriruguto ryaye gunú yaangʼaana, kwa obhuturo bhwaye obhukuru. ⁸Onyoora oni ngʼ-wa insi okukira abhantu bha Waryubha bhonsego, nawe, Waryubha yaangʼaana eriruguto rinu, okuraarikira abhantu bhanú bhataringi Abhayahudi, obhuniibhi obhwaru bhunú bhuratuuka ku Kiristu. ⁹Waryubha, Omubhumbi wa ebhintu bhyonsego, yaangʼaana emirimu gya okutondera abhantu bhonsego, bhamanye bhujomu kya ego arahikya ekinyerera kyaye kinú kyaringa kiibhisiri eribhaga ryonsego. ¹⁰Yaakora ego, naho kwibhaga rinu, egintungwa gyaye gya amanga amaaru, gimanyikane kubhakuru na abhatungi bha murwire,3:10 Kubhakuru na abhatungi bha murwire. Ensonga yaaye niiga, kubhakuru na abhatungi abhajomu bhanú bharingi hamwi na Waryubha murwire, nawe kora kubhakuru na kubhatungi abhabhiibhi bhanú bhataringi hamwi na Waryubha. kwa enjira ya erikanisa. ¹¹Yaakora ego, okurekana na ensonga yaaye ya koko, inú yaahikya kwa enjira ya Kiristu Yeesu, Omukuru weetu. ¹²Bhoono, turatura okugya ku Waryubha bira obhoobha, kwa okubha turamwikirirya Kiristu na tugwateeni nawe. ¹³Kwa ego, ndabhasabha mutakwa omutima, kwa ekisigo kya eginyanko ginú ndanyoora kurusumo rwenyu, egyene girakora musuukwe.

Pauro arasabhira Abhakiristubhamanye obhuhanje bhwa Kiristu

¹⁴Mbe, kwa ekisigo kya amangʼana gayo gonsego, ndatemera Taata ebhiru. ¹⁵Weeki ngʼo obhusimuka bhwa ebhintu bhyonsego ebhya murwire na ebhya mukyaro. ¹⁶Ndamusabha Waryubha, okurekana na obhuniibhi bhwaye obhukuru, abhahaane eginguru kwa enjira ya Omutima waaye, munage, ¹⁷naho Kiristu amenye mumitima gyenyu, kwa okubha muramwikirirya. Kweki ndamusabha mugendererye okubha na obhuhanje. Obhuhanje n-kya emiri, gyeki girakora emiti giranaga, kasi n-kya enyumba inú ehagaajirwe kubhurusa. ¹⁸Ndasabha ega, bheenyu hamwi na abhantu bha Waryubha bhonsego, muture okumanya kya ego Kiristu atuhanjiri bhukongʼu, kwa obhuhanje bhunú bhutaana obhuteero. ¹⁹Na mumanye kya ego atuhanjiri bhukongʼu, onyoora etakuturika kubheetu okubhumanya bhonsego, okuringʼaana na obhwaru bhwaye. Hanú muraamanye obhuhanje bhwaye, enteemo yeenyu eraatuubhane na enteemo ya Waryubha.

²⁰Mbe, Waryubha agungibhwe, weeki aratura okukora amangʼana ga okuruguurya bhukongʼu, okukira ganú turamusabha, kasi kora ganú tureeganirirya ega, aratura okukora. Weeki arakora okuringʼaana na eginguru ginú girakora emirimu munsi weetu. ²¹Agungibhwe kwa obhukuru bhwaye kubhantu bhaaye na ku Kiristu Yeesu, kora eginyibhuro gyonsego, koko na koko. Amina.

Okwikara kwa obhumwi kya omubhiri gumwi

¹Mbe, oni omubhohwa kwa okubha ndamukorera emirimu Omukuru Yeesu, ndabhakomererya mwikare, okuringʼaana na okubhirikirwa kunú Waryubha yaabhabhirikirira. ²Mubhenga mureesuuhya, mubhe abhanyoohu, mwigumiriryenga, na mugegeranenga kwa obhuhanje. ³Mukore ekituunyo okwangararira obhumwi bhunú twagwatanibhwa na Omutima Omurabhu, kwa okwikara kwa omurembe. ⁴Bheetu bhonsego turingi kya omubhiri gumwi na twanyoora Omutima Omurabhu oumwi, kya bhurya twabhirikirwa na Waryubha tubhe na obhwisige obhumwi. ⁵Omukuru weetu ngʼ-umwi, eimani yeetu ngʼ-imwi na obhubhatiijo bhwetu m-bumwi. ⁶Turasyengera Waryubha umwi, weeki ngʼo Taata wa bhonsego, aringi eguru ya bhonsego, arakora emirimu kubhonsego na amenyeri mubhonsego.

⁷Kiristu yaahaana kira oumwi weetu eriruguto, okuringʼaana na kya ego omwene yeendanga. ⁸Nkyo kirakora Amangʼoore Amarabhu garagamba ega,

“Hanú yaagya eguru, yaahaana abhantu emituho,

ebhintu bhinú yaanyoora okurwa kubhabhisa bhanú yaatumbarira.”4:8 Maaha mukitabho kya Egijabhuri 68:18.

⁹Mbe, okugamba ega, “Hanú yaagya eguru,” ensonga yaaye niki? Ensonga yaaye niiga, Kiristu yeetuuma okuhikira hansi mukyaro. ¹⁰Weeki uyo yeetuuma okuhikira hansi mukyaro hanu, ngʼo uyo yaagya eguru ya orwire ronsego, naho ature okwijurya ebhintu kira ahasi. ¹¹Weeki ngʼo yaasora abhantu abhandi okubha abhatumwa, abhandi abharooti, abhandi abharaariki, abhandi abhariisya na abheehigirya. ¹²Yaakora ego, ature okuseemerya Waryubha abhantu, bha okumukorera emirimu, naho abheekirirya bhayo bhonsego bhanage kya omubhiri gwa Kiristu. ¹³Eringʼana riyo, riraagendererye okuhikira bheetu bhonsego hanú turibha abhaniibhi kuimani yeetu, na okumumanya Omwana wa Waryubha. Turibha abhantu bhanú tunagiri, kya Kiristu. ¹⁴Hayo tutarihumbibhwa enu na enu kya abhaana abharera, kwa emiyaga gya ameehigiryo ganú abhantu abhangʼeenererya bhareebhukya. Abhantu bhayo, oranyoora bhareenda bhabhahabhye kwa ameehigiryo gaabho aga obhubheehi. ¹⁵Nawe, hanú turaagambiranenga obhuheene kwa omutima gwa obhuhanje, turanaga kumangʼana gonsego, kora turingʼaane na Kiristu. Weeki ngʼo omutwe gwa abheekirirya.4:15 Maaha mukitabho kya Abhaefeso 1:22, 5:23.¹⁶Weeki aragwatanʼya abhantu bhaaye bhonsego bharabha bhamwi, kya ego emiki giragwatanʼya ebhiroobhero bhya omubhiri, gurabha gumwi. Nyoore kira ekiroobhero kiraakore emirimu kya ego ereenderwa, gurakiina na okunaga. Abheekirirya bhonse niigo, nyoore kira oumwi weetu araakore emirimu ginú Kiristu yaatuhaana kya ego ereenderwa, turanaga kwa okuhanjana.

Obhwikari obhuhya na obhwikari bhwa akare

¹⁷Mbe, kwa obhutungi bhunú Omukuru Yeesu yaangʼaana, ndabhakomererya ega, muteekara kweki, kya ego abhantu bhanú bhatamumanyiri Waryubha bhareekara. Bheeki ameetegeerero gaabho, gataana obhwera. ¹⁸Na obhungʼeeni bhwabho eguru ya obhuheene bhwa Waryubha, bhuribhirwe. Bharingi hare na obhuhoru obhujomu bhunú bhurarwa ku Waryubha. Bhaakorwa ego, kwa ekisigo kya obhukangi bhwabho, bhunú bhurarekana na obhukongʼu bhwa emitima gyabho. ¹⁹Bhatakurora eginsoni kora hake, bheesoherye kumangʼana ga eginsoni. Kweki bhaana orunamba rwa okugendererya okukora amangʼana amabhiibhi gayo.

²⁰Nawe bheenyu, muteehigiribhwa ego, eguru ya Kiristu. ²¹Niina obhuheene ega, mweegwa bhujomu amangʼana eguru yaaye, na mweehigiribhwa obhuheene kya ego bhuringi, eguru yaaye. ²²Mweehigiribhwa ega, mutigane na eginteemo gyenyu egya akare, ginú gyasaribhwa na orunamba rwa obhungʼeenererya, ²³naho mukorwe bhuhya emitima na ameetegeerero geenyu. ²⁴Kweki ega, mubhe na eginteemo eginhya, kya ego Waryubha yaatubhumba tutuubhane nawe. Na mubhe abhaheene bira amasoro.

²⁵Kwa ego, mutige obhubheehi. Kira omuntu akeeryenga abharikyaye obhuheene, kwa okubha bheetu bhonsego n-kya ebhiroobhero kumubhiri gwa Kiristu. ²⁶Hanú murajima, mutakora obhusarya, eryubha ritasikira mukyajimiri. ²⁷Okujima kurahaana Erisambwa omweya gwa okubhahiga. ²⁸Omwibhi, ateebha kweki, nawe, yaambe okukora kwa amabhoko gaaye omwene, emirimu ginú gireekiriribhwa, naho ature okubha na ekintu kya okugabhira-ko unú ataana ekintu. ²⁹Eminwa gyenyu gitagamba amangʼana amabhiibhi. Nawe, gigambe amangʼana amajomu ga okuhagaaja abhandi okurekana na obhwendi bhwabho. Gayo, garatura okubha na obhwera kubhanú bharageetegeerera. ³⁰Mutakora Omutima Omurabhu wa Waryubha asurumbare, kwa okubha weeki n-dubhaaso rwa Waryubha kubheenyu, runú ruroorokya ega, bheenyu m-bantu bhaaye, okuhikira orusiku runú Waryubha aritutungurya.4:30 Maaha mukitabho kya Abhaefeso 1:13.³¹Mbe, mutigane na obhururu, ekisorooro, enkoro, ekituri, amatuki na obhubhiibhi bhwa amanga gonsego. ³²Mubhenga abhaserenʼya, abha ekyabhira, na mwabhiranenga kya ego Waryubha yaabhaabhira bheenyu kwa enjira ya Kiristu.

¹Mbe, kwa okubha bheenyu m-baana bha Waryubha na abhahanjiri bhukongʼu, mugwate enteemo yaaye. ²Mwikarane kwa obhuhanje, kya ego Kiristu yaabhahanja bheenyu, akeeruusya okukwa kurusumo rwetu, akabha ekimwenso5:2 Ekimwenso. Maaha eringʼana rinu mu Moonjooro eguru ya Amangʼana Amakongʼu. na esadaaka inú erarangasira ku Waryubha.

Okwikara kya ego Waryubha areenda

³Bhoono bheenyu mutakora amangʼana ganú garaakore abhantu bhagambe ega, muringi abhasimbe, abhakonu na abha orunamba rwa ebhintu, kwa okubha ebhikorwa bhya ekabhira iyo, bhitakwenderwa mubharabhu bha omutima. ⁴Mutagamba amangʼana ga eginsoni, ga ekikangi kasi ga eginhaka, gayo gatakwenderwa. Nawe, amangʼana ganú gareenderwa n-ga okumukumya Waryubha.5:4 Maaha mubhitabho bhya Abhaefeso 5:20; Abhakorosai 3:15, 17.⁵Okubha na orunamba rwa ebhintu n-kya okusyengera ebhisusano okutiga Waryubha.5:5a Maaha mukitabho kya Abhakorosai 3:5. Mumanye obhuheene ega, abhakori bha obhusimbe, abhakonu na abhanamba bha ebhintu, bhatarigabha obhukama bhwa Kiristu na Waryubha.5:5b Obhukama bhwa Kiristu na Waryubha. Maaha Obhukama bhwa Waryubha mu Moonjooro eguru ya Amangʼana Amakongʼu. Kweki maaha mubhitabho bhya 1 Abhakorinto 6:9-10; Abhagaratia 5:20-21.⁶Amangʼana kya gayo, ngo garakora Waryubha arajimira abhantu bhanú bhatakumwigwa. Muteekirirya omuntu wowonse abhangʼeenererye kwa amangʼana ageenego, naho mukore gayo. ⁷Kwa ego, mutagwatana na abhantu kya bhayo, ⁸kwa okubha, akare hayo bheenyu mwaringa mukisunte, nawe bhoono, muringi mundingaasi kwa okuhitira ku Mukuru Yeesu. Mwikare kya abhantu bha endingaasi, ⁹kwa okubha obhwera bhwa okwikara mundingaasi n-kukora amangʼana amajomu na aga obhuheene. ¹⁰Mumanyiiriryenga ganú garamujomera Omukuru Yeesu, ngo mukore. ¹¹Mutabhanga muragwatana na amakorwa ga mukisunte ganú gataana obhwera, nawe, mubhenga muragakemera, ¹²kwa okubha amangʼana ganú garakorwa bhugunyi na abheene ni-ginsoni kora okugagamba. ¹³Nawe, amangʼana gayo gonsego hanú garaatuurwe mundingaasi, garamaahikana kya ego garingi. Hanú endingaasi eroorokya ekintu, kyonse kireehunjura okubha endingaasi. ¹⁴Nkyo kirakora eragambwa ega, “Bhuuka uuwe unú wihiriibhwe! Ohyuke okurwa mubhaku, Kiristu araaja okukumirikira.” ¹⁵Kwa ego, mwangararire kya ego mureekara. Mutabha kya abhantu bhanú bhataana egintungwa, nawe, mwikare kya abhantu bhanú muuna egintungwa. ¹⁶Mutumire bhwaheene eribhaga rinu, kwa okubha eginsiku ginu n-gya amabhiibhi. ¹⁷Kwa ego, mutabha abhakangi, nawe, musakye okumanya ganú Omukuru Yeesu areenda. ¹⁸Kweki mutarehwa,5:18 Mutarehwa. Ekiyunani kiragamba ega, mutarehwa edivai. Kwibhaga rya Pauro, amarwa amakuru gaaringa edivai. Maaha Edivai mu Moonjooro eguru ya Amangʼana Amakongʼu. kwa okubha kurareeta obhunyamuke. Nawe, mwijuribhwe na Omutima Omurabhu. ¹⁹Muhairenga kwa egijabhuri, ameembo na egitenji gya mumutima. Mumwimbirenga na okumwikirirya Omukuru Yeesu, kwa emitima gyenyu gyonsego. ²⁰Na mumukumyenga Taata Waryubha, kumangʼana gonsego, eginsiku gyonsego, okuhitira kuriina rya Omukuru weetu Yeesu Kiristu.

Ameehigiryo eguru ya abhakari na abhasaaja

²¹Mubhenga murasuukana bheenyu abheene kwa abheene, kwa okubha muramusuuka Kiristu.

²²Bheenyu abhakari, musuukenga abhasaaja bheenyu, kya okumusuuka Omukuru Yeesu, ²³kwa okubha omusaaja m-mutwe gwa omukari waaye. N-kya ego Kiristu wonse, m-mutwe gwa erikanisa, erikanisa ndyo omubhiri gwaye, na Kiristu ngʼo Omutuurya wa omubhiri guyo. ²⁴Mbe, kya ego erikanisa riramusuuka Kiristu, egoego abhakari bhonse bhareenderwa okwigwa abhasaaja bhaabho kwa kira eringʼana.

²⁵Na bheenyu abhasaaja, mubhahanje abhakari bheenyu, kya ego Kiristu yaahanja erikanisa, akeeruusya omwene kurusumo rwaryo. ²⁶Yaakora ego, naho araame erikanisa kwa eringʼana rya Waryubha, na okurirabhya kwa amanji ga obhubhatiijo.5:26 Maaha mukitabho kya Tiito 3:5.²⁷Yeendanga yeenyoorere erikanisa erirabhu, rinú ritaana akakorikori kora amasoro gogonse. ²⁸Egoego, abhasaaja bhareenderwa abhahanje abhakari bhaabho kya emibhiri gyabho abheene. Omusaaja unú arahanja omukari waaye, areehanja omwene. ²⁹Atariho omuntu wowonse unú arajimira omubhiri gwaye omwene, nawe, araguriisya na okugwangararira bhujomu. Ego niigo, Kiristu wonse arakorera erikanisa ryaye, ³⁰kwa okubha bheetu tugwataniibhwe kumubhiri gwaye. ³¹N-kya ego Amangʼoore Amarabhu garagamba ega, “Kwa ekisigo kiyo, omusaaja aribhatiga esewaabho na ngʼina waabho, aribha hamwi na omukari waaye, na bhabhiri bhayo, bharibha omubhiri gumwi.”5:31 Maaha mukitabho kya Obhwambiro 2:24.³²Amangʼana gayo gaana ekinyerera, na ekinyerera kiyo, n-kikongʼu bhukongʼu okukimanya, nawe oni ndarora ega, ekinyerera kiyo kirahairira eguru ya Kiristu na erikanisa ryaye.

³³Mbe, ndabhakeerya kweki ega, kira omuntu amuhanje omukari waaye kya omutima gwaye omwene, na omukari wonse, atarosa okumusuuka omusaaja waaye.

Ameehigiryo eguru ya abhaana na abheebhuri

¹Bheenyu abhaana, mubhasuukenga abheebhuri bheenyu, kwa okubha mugwateeni na Omukuru Yeesu. Okukora ego, ni-ngʼana ejomu. ²N-kya ego Amangʼoore Amarabhu garagamba ega, “Obhasuuke eseweenyu na ngʼina weenyu.” Rinu ndyo eriragiriryo erya mbere, rinú ryoongeribhwa endago ega, ³“Okorenga ego, naho onyoore enonkwe na wikare eginsiku eginjaru mukyaro.”6:2-3 Maaha mubhitabho bhya Okuhuruka 20:12; Obhuhiituki bhwa Amaragiriryo 5:26.

⁴Na bheenyu bhataata, mutabhatindira abhaana bheenyu. Nawe, mubharere kwa egintungwa na ameehigiryo ga Omukuru Yeesu.

Ameehigiryo eguru ya abhagaya na abhakuru bhaabho

⁵Bheenyu abhagaya, mwigwenga abhakuru bheenyu bha mukyaro hanu, kwa obhusuuku na okurigita na kwa omutima gumwi, kya ego muramwigwa Kiristu. ⁶Mukorenga ego, etabha kwibhaga rinú bharabhaangararira eryenego, naho mwikangatirirye kubheene. Nawe, mubheegwenga, kya abhagaya bha Kiristu, enu murakora kwa omutima gumwi, ganú garamujomera Waryubha. ⁷Mukorenga emirimu kwa omutima gumwi, kya muna muramukorera Omukuru Yeesu, etabha kya muna murakorera abhantu. ⁸Mumanyenga ega, kira omuntu unú arakora amajomu, abhe omugaya kasi unú ataringi omugaya, Omukuru Yeesu arimutuura okuringʼaana na amajomu gaaye.6:6-8 Maaha mukitabho kya Abhakorosai 3:22-25.

⁹Na bheenyu abhakuru, mukorerenga abhagaya bheenyu bhonse, amajomu. Mutabhakanga, mumanye ega, Omukuru waabho na oweenyu ngʼ-umwi, aringi murwire, kora weeki atakungʼahirya omuntu.6:9 Maaha mukitabho kya Abhakorosai 4:1.

Ebhigwato bhya Waryubha

¹⁰Mbe bhoono, munage kukugwatana na Omukuru Yeesu, kwa obhuturo bhwa eginguru gyaye. ¹¹Mwambare ebhigwato bhyonsego bhya Waryubha, naho muture okwanga eniku ya Erisambwa. ¹²Ndagamba ego, kwa okubha, eriihe ryetu ritaringi gati yeetu na abhantu, nawe, eriihe ryetu, riringi eguru ya abhasirikare bha ebhihwi ebhibhiibhi, bhya orwire rwa eginkoro. Turarwana na abhatungi, abhakuru na abha eginguru bha eguru bhanú bhagwatiriri orwire runu orwa ekisunte. ¹³Kwa ego, mwambare ebhigwato bhyonsego bhya Waryubha, naho orusiku rwa obhubhiibhi hanú rurihika, muture okwibhagirira. Na hanú eriihe ririhwa, mutame munagiri. ¹⁴Mbe mwiseemye, obhuheene bhubhe kya omuchipi mubhukende, na amakorwa geenyu ga heene gabhe kya engubha ya okuribha kukikubha, ¹⁵na ekituunyo kya okuraarika Amangʼana Amajomu ga omurembe, kibhe kya eginkeeto kumaguru geenyu. ¹⁶Okutiga gayo gonsego, eimani ebhe kya engubha mumabhoko geenyu, ebhabheere okuribhira emisimu gyonsego egya omururo gya omusarya urya Erisambwa. ¹⁷Obhutuurya, bhubhe kya engofiira ya ekyuma kumitwe gyenyu, na eringʼana rya Waryubha, ribhe kya omuhyu gunú murahaanwa na Omutima Omurabhu.

¹⁸Mubhenga murasabha eribhaga ryonsego, okuringʼaana kya ego Omutima Omurabhu arabhoorokererya. Na hanú muraasabhenga, mutumirenga amanga gonsego ga amasabho na egisaara. Mutengeejenga kurusumo rwa eringʼana riyo, na munage okubhasabhira abhantu bha Waryubha bhonsego. ¹⁹Munsabhirenga na oni, ega, Waryubha yangʼaanenga amangʼana ga okugamba, kira hanú ndahaira, naho ndaarikenga bira obhoobha obhuheene bhunú Waryubha yaatutubhurira mu Mangʼana Amajomu. ²⁰Oni m-muraariki wa Amangʼana Amajomu eguru ya Yeesu Kiristu, na gayo ngo garakora ndingi mukibhohe. Mbe, munsabhire naho nture okugaraarika bira obhoobha kya ego ndeenderwa.

Okukeeranʼya kwa okuraga

²¹Tukiko, omuhiiri weetu omuhanje kuimani, na omukori wa emirimu gya Omukuru Yeesu kwa obhuheene, aribhakeerya kira ekintu, naho mumanye kya ego ndagendererya na kinú ndakora.6:21 Maaha mubhitabho bhya 2 Timoteo 4:12; Abhakorosai 4:7.²²Ndamutuma kubheenyu, ekinene kwa ekisigo kiyo, muture okumanya kya ego turagendererya na okubhateremya.

²³Bheenyu abhahiiri bhaani kuimani, ndabheendera omurembe, obhuhanje na eimani okurwa ku Taata Waryubha na ku Mukuru weetu Yeesu Kiristu. ²⁴Eriruguto rya Waryubha, ribhe kubhantu bhonsego bhanú bhamuhanjiri Omukuru weetu Yeesu Kiristu, kwa obhuhanje bhunú bhutaana obhuteero. Amina.