Abhakorosai

Enyarubha ya Pauro ku

Abhakorosai

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Korosai gwaringa omugi omuke mukyaro kya Asia. Eginsiku ginu Korosai n-hasi ha mukyaro kya Bhuturuki. Korosai gwaringa na obhuhare bhwa egikirometa muna egana rimwi na mirongo esansabha (160) okurwa mumugi gwa Efeso, enú Pauro yaaringa araraarika Amangʼana Amajomu eguru ya Yeesu (maaha mukitabho kya Amakorwa ga Abhatumwa 19). Nawe, Pauro omwene ateehigirya Korosai eyo, nawe omuganda gwa abheekirirya bha Korosai gwaambisibhwa na omuntu unú yaabhirikirwanga ega, Epafura.

Eribhaga Pauro yaaringa mwigereja, Epafura yaaja, akamaahana nawe, akamukeerya eguru ya abheehigirya bha obhubheehi bhanú bhaaringa bharanyankya Abhakiristu. Gati ya Abhakiristu bha Korosai bhaaringa-mo Abhayunani na Abhayahudi. Mbe, abhantu nyabhurebhe gati ya emiganda ebhiri giyo, bheenda okusanganʼya ameehigiryo ga Yeesu na aga edini yaabho ya kare.

Abhayahudi bhanú bhaaringa bhareehigirya ameehigiryo ga obhubheehi, bhaaringa bhareekirirya ega, bheeki m-bantu bhanú bhaasorwa na Waryubha. Bhaaringa bhareehigirya ega, Omukiristu atareekiriribhwa na Waryubha, nyoore atarasaarwa na okugwata egimiira gya Ekiyahudi. Abhayunani bhanú bhaaringa bhareehigirya ameehigiryo ga obhubheehi, bhaaringa bhareekirirya ega, kwa okubha Waryubha ataana obhusarya, atakaaturiri okubhumba ekyaro kinú bhaarora ega, kiina obhusarya. Kweki bhaaringa bhareekirirya ega, etakaaturikeeni ega, Yeesu abhe Waryubha na kweki yeekare mukyaro, kya omuntu. Bhaagamba ego, kwa okubha omubhiri gwa omuntu guuna obhusarya.

Pauro arakyukya ameehigiryo ga obhubheehi gayo, kwa okugamba obhuheene eguru ya Yeesu. Yeesu Kiristu ngʼ-Waryubha, ngʼo yaabhumba ekyaro na ngʼo Omukuru wa ebhibhumbwa bhyonsego. Yeekara mukyaro na yaaringa omuntu, na akakwa kurusumo rwa obhusarya bhwetu, naho twabhirwe. Ganú Yeesu yaakora gareesa. Nyoore omuntu araamwikirirye Yeesu, Waryubha wonse araamwikirirye omuntu uyo. Okusaarwa kutakubhandiriribhwa, kora obhugwati bhwa amaragiriryo kasi egimiira gyogyonse.

Pauro arabhakeerya abheekirirya ega, bhareenderwa bhatige eginteemo egimbiibhi gya akare, naho bheekare obhwikari obhuhya bhunú bhuramungʼarira Waryubha. Arabhakeerya gayo, kwa okwihigirya kya ego ereenderwa bhakoreranenga abhakari na abhasaaja, abheebhuri na abhaana, na abhagaya na abhakuru bhaabho.

Pauro arakeeranʼya Abhakorosai

¹Enyarubha inu, erwiri kuoni Pauro. Oni naabhirikirwa kwa obhwendi bhwa Waryubha, okubha omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu, ndingi hamwi na Timoteo, omuhiiri weetu kuimani. ²Turabhangʼoorera bheenyu abhantu bha Waryubha bhanú mureekara mumugi gwa Korosai, bheenyu abhahiiri bheetu abhaheene kukugwatana na Kiristu.

Turabheendera eriruguto na omurembe okurwa ku Taata Waryubha bhibhe hamwi na bheenyu.

Amasabho na omukumo ku Waryubha

³Kira hanú turabhasabhira bheenyu, turamukumya Waryubha, Taata wa Omukuru weetu Yeesu Kiristu. ⁴Turakora ego, kwa okubha tweegwiri kya ego muramwikirirya Kiristu Yeesu, na kya ego murahanja abhantu bhonsego bha Waryubha. ⁵Eimani yeenyu na obhuhanje bhwenyu, bhirarekana na obhwisige bhwenyu ega, murihaanwa eginonkwe ginú Waryubha abhatuuriiri murwire. Mwamara okwigwa eguru ya obhwisige bhuyo, eribhaga rinú mweehigiribhwa amangʼana ga obhuheene, na gayo ngo Amangʼana Amajomu. ⁶Amangʼana Amajomu gayo gaahika kubheenyu, garanyaragana mukyaro kyonsego. Garagendererya okukora abhantu okumwihunjurira Waryubha, kya ego gaakoreka kubheenyu bhonse, okwambira orusiku runú mwageegwa na okumanya bhujomu eriruguto rya Waryubha kya ego riringi. ⁷Mweehigiribhwa Amangʼana Amajomu gayo na Epafura. Weeki m-mukori wa emirimu omurikyetu omuhanje, aramukorera emirimu Kiristu kwa obhuheene kurusumo rwenyu. ⁸Weeki ngʼo yaatukeerya eguru ya obhuhanje bhwenyu bhunú bhurarekana na Omutima Omurabhu.1:8 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu.

⁹Kwa ekisigo kiyo, tutaratiga okubhasabhira, okurwa orusiku runú tweegwa amangʼana eguru yeenyu. Turamusabha Waryubha abhahaane okumanya gonsego ganú weeki omwene areenda. Abhahaane egintungwa gyonsego na obhumanyi bhinú bhirarekana na Omutima Omurabhu.1:9 Abhahaane egintungwa gyonsego na obhumanyi bhinú bhirarekana na Omutima Omurabhu. Ensonga eindi eratura okubha ega, Abhahaane egintungwa gyonsego na obhumanyi bhwa omutima.¹⁰Nho, muraature okwikara kya ego Omukuru Yeesu areenda, na okumungʼarira kumangʼana gonsego. Obhuhoru bhwenyu bhuraaruusyenga emisumo emyaru okurekana na emirimu gyenyu emijomu. Kweki muraagendererye okumumanya Waryubha bhukongʼu. ¹¹Turasabha ega, Waryubha agendererye okubhabheera kwa eginguru gyaye ginú gitaana obhuteero, naho muture okwigumirirya kugonsego bira okurosa. Bhoono, kwa obhujomerwa, ¹²mumukumyenga Taata Waryubha, kwa okubha abhakoreri musange engabho ya abhantu bhaaye, mubhukama bhwa endingaasi. ¹³Weeki yaatutuurya okurwa muginguru gya ekisunte, akatungʼaanyia na okutusohya mubhukama bhwa Omwana waaye1:13 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. omuhanje. ¹⁴Kwa okuhitira ku Mwana waaye uyo, tutunguriibhwe na obhusarya bhwetu bhwabhiirwe.

Obhukuru bhwa Kiristu na emirimu gyaye

¹⁵Kiristu n-kirengekanʼyo kya Waryubha unú atakumaahikana.

Weeki ngʼo omutangi wa ebhibhumbwa bhyonsego,

¹⁶kwa okubha, okuhitira kumwene, ebhintu bhyonsego bhyabhumbwa,

ebhya murwire na ebhya mukyaro,

bhinú bhiramaahikana na bhinú bhitakumaahikana,

abha obhutungi kasi abhakama, abhakuru kasi abha eginguru.

Ebhintu bhyonsego, bhyabhumbwa okuhitira kumwene na kurusumo rwaye.

¹⁷Weeki yaaringa-ho ebhintu bhyonsego bhitarabhumbwa,

na okuhitira kumwene, ebhintu bhyonsego bhiragwatana.

¹⁸Weeki ngʼo omutwe gwa omubhiri,

ensonga yaaye niiga, ngʼo omukangati wa erikanisa.

Weeki ngʼo obhwambiro bhwa erikanisa,

kwa okubha yaabha owa mbere okuhyukibhwa okurwa mubhaku,

naho abhe omukuru eguru ya ebhintu bhyonsego.

¹⁹Niigo, kwa okubha yaamungʼarira Waryubha ega,

obhukunaani bhwaye bhonsego bhumaahikane okuhitira ku Kiristu.1:19 Maaha mukitabho kya Abhakorosai 2:9.

²⁰Kwa enjira ya Kiristu, ebhintu bhyonsego bhyagwatanibhwa na Waryubha.

Na kwa okwitika kwa amanyinga ga Kiristu kumusarabha,

Waryubha yaakora omurembe na ebhintu bhyonsego bhya mukyaro na ebhya murwire.

²¹Enyuma hayo, na bheenyu mwaringa ahare na Waryubha. Kweki mwaringa abhasigu bhaaye, kwa ekisigo kya ameetegeerero na eginteemo gyenyu egimbiibhi. Nawe bhoono, Waryubha abhagwateenʼye hamwi nawe. ²²Kwa enjira ya omubhiri gwa Kiristu, kwa okukwa kwaye, yaabhagwatanʼya naho abhareete embere yaaye mubheeri abharabhu bha omutima, mutaana akakorikori kora amasoro. ²³Nawe, mureenderwa okugendererya okubha na eimani, munage na mubhe na eginguru. Mutakyukibhwa mutige obhwisige bhunú mwanyoora hanú mweegwa Amangʼana Amajomu. Amangʼana Amajomu gayo, gaaraarikwa kubhantu bhonsego bha mukyaro hanu, na oni Pauro, naabha omukori wa emirimu waago.

Emirimu gya Pauro mumakanisa

²⁴Bhoono, ndajomererwa enyanko inú ndanyoora kurusumo rwenyu. Kwa enjira ya okunyanka kumubhiri gwani, ndasanga enyanko ya Kiristu inú eragendererya kurusumo rwa omubhiri gwaye. Omubhiri guyo, ngo erikanisa.1:24 Maaha mubhitabho bhya Abhafiripi 3:10-11; 2 Abhakorinto 4:10-12.²⁵Erikanisa riyo, ndyo Waryubha yaankoreri oni okubha omukori wa emirimu waaryo, naho mbaraarikire eringʼana ryaye kya ego riringi. ²⁶Eringʼana riyo, ndyo ekinyerera kyaye kinú kyaringa kiibhisiri okurwa akare kunyibhuro gyonsego. Nawe bhoono, Waryubha akitubhwiri kubhantu bhaaye.1:26 Maaha mukitabho kya Abhaefeso 3:3-5.²⁷Waryubha yaahanja okubhatubhurira abhantu bhaaye, obhuniibhi na obhukuru bhwa ekinyerera kiyo, kora kurusumo rwa abhantu bhanú bhataringi Abhayahudi. Ekinyerera kiyo, ensonga yaaye niiga, Kiristu aringi munsi weenyu, kweki weeki ngʼo arabhahaana obhwisige ega, murisanga obhukuru bhwa Waryubha.

²⁸Kiristu ngʼo turaraarika amangʼana eguru yaaye, enu turakemera na okwihigirya kira omuntu kwa egintungwa gyonsego. Turamuraarika weeki, naho tubhareete abhantu bhonsego embere ya Waryubha, bhabhe bhanagiri okurekana na okugwatana kwabho na Kiristu. ²⁹Eringʼana riyo, ndyo rirakora ndeekongʼererya okukora emirimu kwa ekituunyo, okuringʼaana na eginguru eginene gya Kiristu ginú girakora emirimu munsi waani.

¹Ndeenda mumanye kya ego ndakora emirimu kwa ekituunyo kurusumo rwenyu, na kurusumo rwa abheekirirya bha mumugi gwa Raodikia, na kurusumo rwa abheekirirya abhandi bhonsego bhanú bhataakanduuji. ²Ndakora ego, naho emitima gyenyu giteremibhwe, na okuhanjana kwenyu kubhagwatanʼye. Ndeenda munyoore obhumanyi bhonsego bhunú bhurabhahaana obhuheene. Nho, muraamanye ekinyerera kya Waryubha kinú akare kyaringa kiibhisiri, kiyo nkyo Kiristu omwene. ³Munsi waaye, mmo ebhibhumbiko bhyonsego bhya egintungwa na obhumanyi bhiibhisiri.

⁴Mbe, ndabhakeerya gayo, naho muteekirirya omuntu wowonse abhangʼeene kwa amangʼana ga obhubheehi, na kora gakaabha aga okungʼeenererya. ⁵Onyoora oni omwene ntaringi hamwi na bheenyu, nawe omutima gwani guringi hamwi na bheenyu. Ndajomerwa kwa okubha ndeegwa eguru ya obhumwi bhwenyu, na okunaga kwa eimani yeenyu ku Kiristu.

Obhuhoru obhuhya ku Kiristu

⁶Mbe bhoono, kya ego mwamwikirirya Kiristu Yeesu ega, m-Mukuru, mugendererye okwikara kwa okugwatana nawe. ⁷Mugendererye okunaga, na okukiina kubhumwi bhwenyu na Kiristu. Mugume kuimani kya ego mweehigiribhwa. Kweki mubhenga muramukumya Waryubha bhukongʼu.

⁸Mwiyangararire, omuntu wowonse atabhahabhya kwa ameehigiryo ganú gataana obhwera na aga obhubheehi. Ameehigiryo gayo, gararekana na egimiira gya abhantu na eginkoro egimbiibhi ginú giratunga ekyaro kinu.2:8 Eginkoro egimbiibhi ginú giratunga ekyaro kinu. Ensonga eindi eratura okubha ega, m-meehigiryo eguru ya ekyaro kinu. Maaha mukitabho kya Abhakorosai 2:20. Kweki gataringi ga Kiristu, ⁹kwa okubha obhukunaani bhonsego bhwa Waryubha bhuramaahikana okuhitira ku Kiristu mumubhiri gwaye. ¹⁰Na bheenyu muheerwe obhuhoru bhunú bhukuneeni kwa okugwatana kwenyu na Kiristu. Weeki ngʼo omutwe eguru ya abhakuru na abhatungi bhonsego bha orwire rwa eginkoro. ¹¹Kwa okugwatana nawe, weeki yaabhasaara kwa ensaaro inú etakukorwa kwa amabhoko ga abhantu, nawe ensaaro ya omutima inú erakorwa na weeki omwene. Ensonga yaaye niiga, mwatiga obhusimuka bhwenyu bhwa obhusarya. ¹²Hanú mwabhatiijwa, obhusimuka bhwenyu bhwa obhusarya, bhwabhiikwa hamwi na Kiristu. Kimwi mukahyuka hamwi nawe, kwa okubha mweekirirya eginguru gya Waryubha unú yaamuhyukya okurwa mubhaku. ¹³Bheenyu mwaringa mukwiri kwa ekisigo kya obhusarya bhwenyu, kweki mwaringa mukyari okusaarwa obhusimuka bhwenyu bhwa obhusarya. Nawe, Waryubha abhakoreri okubha abhahoru kya ego yaamuhyukya Kiristu na atwabhiiri obhusarya bhwetu bhonsego. ¹⁴Waryubha aturihiiri esiiri ya obhusarya bhwetu kwa enjira ya Yeesu okutukwira kumusarabha. Yaaruusya-ho amangʼoore ga esiiri ganú gaatujongeranga, akagaruusya-ho kimwi kwa okugabhamba kumusarabha. ¹⁵Kwa enjira ya omusarabha, Waryubha yaaruusya-ho eginguru gya abhakuru na abhatungi bhonsego bha orwire rwa eginkoro, akabhahiga kwa obhujomerwa, akabhasuukya kubhurabhu.

¹⁶Mbe, omuntu wowonse atabhabhuturira ekiina eguru ya ebhyakurya, ebhya okunywa, kasi enyangi ya edini, kasi enyangi ya okutaajwa kwa omweri, kasi orusiku rwa Esabhato.2:16 Esabhato. Maaha eringʼana rinu mu Moonjooro eguru ya Amangʼana Amakongʼu.¹⁷Amangʼana gayo gonsego n-kiiriiri kya amangʼana ganú gariija. Nawe, obhuheene bhuringi ku Kiristu omwenego. ¹⁸Mutamwitegeerera omuntu wowonse unú areeyorokya ega, areesuuhya kwa kibhara na okusyengera bhamaraika.2:18 Bhamaraika. Maaha eringʼana rinu mu Moonjooro eguru ya Amangʼana Amakongʼu. Omuntu kya uyo, atabharuusya omutuho gwenyu gwa koko. Weeki areeheemera obhurori bhwaye. Nawe maheene, akangiheeri kwa ameetegeerero gaaye amabhiibhi ga mukyaro. ¹⁹Kweki omuntu kya uyo, yeeyahwiri okurwa ku Kiristu unú aroorokererya erikanisa kya ego omutwe guroorokererya omubhiri. Kiristu ngʼo arariisya na okugwatanʼya hamwi omubhiri gwaye gonsego kwa emiki gyago. Kwa ego, omubhiri gwaye gonsego, gurakiina bhwaheene kya ego Waryubha areenda.

²⁰Bheenyu, eginteemo gyenyu gya obhusarya, gyakwa hamwi na Kiristu,2:20 Maaha mubhitabho bhya Abhakorosai 2:12; Abharuumi 6:1-11; Abhagaratia 5:19-20. kwa okubha yaabhatuurya okurwa kuginkoro egimbiibhi ginú giratunga ekyaro kinu. Bhoono kwaki mukyagendererya okwikara kya abhantu bha mukyaro munu? Muteekirirya okugwata ameehigiryo kya ganu, ega, ²¹“Mutagwata kinu! Mutarabha kiyo! Mutakuunʼya kirya!” ²²Gayo gonsego, m-maragiriryo na ameehigiryo ga abhantu abheenego, eguru ya ebhintu bhinú bhirasarika hanú bhimariri okutumirwa. ²³M-maheene, bhanú bharagwata ameehigiryo gayo, bharamaahikana ega, bhaana egintungwa. Bharagwata obhusyengeri bhunú bhareekorera abheene, okwisuuhya kwa kibhara na okutunga emibhiri gyabho kwa obhuhaari. Nawe amaragiriryo gayo, gatakutura okuribhira orunamba orubhiibhi rwa omubhiri.

¹Bhoono, kwa okubha eginteemo gyenyu eginhya gihyukiri hamwi na Kiristu, mutune amangʼana ga murwire, enú Kiristu aringi, yeekeeri orubhaara rwa obhuryo rwa Waryubha. ²Mwiganirirye ganú garingi murwire, muteeganirirya ga mukyaro munu, ³kwa okubha eginteemo gyenyu gya obhusarya gyakwa. Obhuhoru bhwenyu, bhoono bhuringi hamwi na Kiristu embere ya Waryubha. Nawe, bhutakumaahikana kubhantu abhandi. ⁴Obhuhoru bhwetu bhurarekana na Kiristu. Eribhaga rinú arimaahikana, nho na bheenyu murisanga hamwi nawe mubhukuru bhwaye.

⁵Mbe bhoono, mutige kimwi amangʼana gonsego ga mukyaro kinu ganú garingi munsi weenyu, kya obhusimbe, obhukonu, orunamba orubhiibhi, ameetegeerero amabhiibhi, na orunamba rwa ebhintu. Okubha na orunamba rwa ebhintu n-kya okusyengera ebhisusano okutiga Waryubha.3:5 Maaha mukitabho kya Abhaefeso 5:5.⁶Amangʼana kya gayo, ngo garakora Waryubha arajimira abhantu bhanú bhatakumwigwa.3:6 Abhantu bhanú bhatakumwigwa. Amangʼoore agandi ga akare aga Ekiyunani gataana amangʼana ganu. Maaha mukitabho kya Abhaefeso 5:6.⁷Akare hayo, bheenyu abheene mwaringa murakora gayo, hanú mwaringa muratungwa nago. ⁸Nawe bhoono, mutige kimwi okujima, enkoro, obhubhiibhi, amatuki, na amangʼana amabhiibhi ganú gatakwenderwa okugambwa muminwa gyenyu. ⁹Mutabheeherana, kwa okubha kya omuntu unú aruusirye emyenda emikonu, mutigiri kimwi eginteemo gyenyu gya kare, hamwi na ebhikorwa bhyagyo. ¹⁰Bhoono, mwibhoheri eginteemo eginhya. Waryubha omwene ngʼo yaabhumba eginteemo eginhya giyo, kweki aragendererya okubhakora mutuubhane nawe bhukongʼu, naho mumumanye bhujomu. ¹¹Kwa ego, hatakubha-ho na obhwahukani, gati ya Omuyahudi na omuntu unú ataringi Omuyahudi, unú asaarirwe na omuriisya, omusomi na unú ataringi omusomi, omugaya na omwiyagaari.3:11 Maaha mubhitabho bhya Abhagaratia 3:27-28, 6:15; Abharuumi 10:12. Nawe, Kiristu omwenego ngʼo Omukuru wa gonsego na weeki ngʼo aringi munsi wa gonsego.

¹²Bhoono, kwa okubha bheenyu m-basorwa bha Waryubha, abharabhu bha omitima bhanú abhahanjiri, mubhe na omutima gwa ekyabhira, kweki mubhe abhaheene, abheesuuhya, abhanyoohu na abheegumirirya. ¹³Mwigumiriranʼyenga na okwabhirana. Nyoore oumwi weenyu yaana eringʼana kumurikyaye, mureenderwa okwabhirana kya ego Omukuru yaabhaabhira bheenyu. ¹⁴Eringʼana erinene okukira gonsego, n-kuhanjana, kwa okubha obhuhanje, mbo bhurabhagwatanʼya bhonsego kubhumwi bhunú bhukuneeni. ¹⁵Omurembe okurwa ku Kiristu gutunge mumitima gyenyu. Bheenyu mubheeri omubhiri gumwi, kwa ego, mubhirikiirwe okwikara kwa omurembe. Kweki mubhe abhantu bha omukumo. ¹⁶Eringʼana rya Kiristu riikare kwa obhwaru munsi weenyu. Mwihigiranʼye, na okukemerana kwa egintungwa gyonsego. Mubhenga muramwimbira Waryubha kwa emitima gyenyu, kwa egijabhuri, ameembo na egitenji gya mumutima, hamwi na okumukumya.

¹⁷Gonsego ganú murakora, ebhe kwa okugamba, kasi kwa ebhikorwa, mugakore kuriina rya Omukuru Yeesu, enu muramukumya Taata Waryubha okuhitira ku Yeesu.

Obhwikari bhunú bhureenderwa mumigi gya Abhakiristu

¹⁸Bheenyu abhakari, musuukenga abhasaaja bheenyu, kya ego ereenderwa ku Mukuru Yeesu.3:18 Maaha mubhitabho bhya Abhaefeso 5:22; Tiito 2:5.¹⁹Na bheenyu abhasaaja, mubhahanje abhakari bheenyu, mutabha abharuru kubheene. ²⁰Bheenyu abhaana, mubhasuukenga abheebhuri bheenyu kumangʼana gonsego, kwa okubha okukora ego, kuramungʼarira Omukuru Yeesu.3:20 Maaha mukitabho kya Abhaefeso 6:1.²¹Bheenyu bhataata, mutabhatindira abhaana bheenyu, naho bhatariija okukwa omutima.3:21 Maaha mukitabho kya Abhaefeso 6:4.²²Bheenyu abhagaya, mubheegwenga abhakuru bheenyu bha mukyaro hanu, kumangʼana gonsego. Mukorenga ego, etabha kwibhaga rinú bharabhaangararira eryenego, naho okwikangatirirya kubheene. Nawe, mubheegwe eribhaga ryonsego kwa omutima gumwi, kurusumo rwa okumusuuka Omukuru Yeesu. ²³Ryoryonse rinú murakora, murikore kwa omutima gumwi, kya muna muramukorera Omukuru Yeesu, etabha kya muna murakorera abhantu. ²⁴Ndagamba ego, kwa okubha mumanyiri ega, Omukuru aribhahaana omutuho gunú yaabharaga abhantu bhaaye, kwa okubha Kiristu unú murakorera emirimu ngʼo Omukuru wa heene. ²⁵Nawe, wowonse unú arakora amabhiibhi, aririhwa okurekana na amabhiibhi gaaye, kwa okubha Waryubha ataana omungʼaho.3:22-25 Maaha mukitabho kya Abhaefeso 6:5-8.

¹Bheenyu abhakuru, mubhenga murabhakorera abhagaya bheenyu aga obhuheene na ganú geemiri, enu mumanyiri ega, bheenyu bhonse muuna Omukuru murwire.

Amaragiriryo na amasabho ga Pauro

²Mugume bhukongʼu kumasabho, na mutengeejenga kumasabho gayo, na enu muramukumya Waryubha. ³Mubhenga muratusabhira na bheetu bhonse, naho Waryubha atusiikurire ekiseku kya okuraarika eringʼana ryaye. Eringʼana riyo, ndyo amangʼana eguru ya Kiristu, ganú gaaringa geebhisiri. Na kurusumo rwa okuraarika amangʼana gayo, oni ndingi mukibhohe. ⁴Mubhenga muransabhira naho ngaraarike kubhurabhu kya ego ndeenderwa okugamba.

⁵Mubhe na egintungwa kukumanyana na abhantu bhanú bhataramwikirirya Yeesu. Mutumire bhwaheene eribhaga ryenyu okubharaarikira eringʼana rya Waryubha.4:5 Maaha mukitabho kya Abhaefeso 5:15-16.⁶Amahairo geenyu, gabhe amajomu eginsiku gyonsego na ganú gaana omuta, naho mumanye okumukyukya kira omuntu bhujomu.

Okukeeranʼya kwa okuraga

⁷Tukiko, omuhiiri weetu omuhanje kuimani, aribhakeerya amangʼana gonsego eguru yaani. Weeki m-mukori wa emirimu omuheene. Turakora nawe hamwi emirimu gya Omukuru Yeesu. ⁸Ndamutuma kubheenyu, ekinene kwa ekisigo kinu, muture okumanya kya ego turagendererya na okubhateremya. ⁹Ariija hamwi na Onesimo, omuhiiri weetu omuhanje na omuheene kuimani. Weeki ngʼ-wa oweenyu eyo. Bhayo, bharibhakeerya amangʼana gonsego ga oweetu hanu.

¹⁰Aristariko, unú aringi hamwi na oni mukibhohe, arabhakeeranʼya. Mariko wonse, omubhyara wa Bharinabha arabhakeeranʼya. Mwamariri okunyoora amaragiriryo eguru yaaye. Hanú arihika kubheenyu eyo, mumuturuungʼane bhujomu. ¹¹Yeesu wonse unú arabhirikirwa Yusito, arabhakeeranʼya. Gati ya Abhayahudi bhanú bhaagwata eimani, abhasatu bhayo abheenego, mbo bhakyakora emirimu gya obhukama bhwa Waryubha4:11 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. hamwi na oni. Bheeki bhanteremerye bhukongʼu. ¹²Epafura, omuntu wa oweenyu eyo, omugaya wa Kiristu Yeesu, arabhakeeranʼya. Arakora ekituunyo okubhasabhira bheenyu eginsiku gyonsego, ega, munage na mubhe mwimiri, na mubhe abhateremu kugonsego ganú Waryubha areenda. ¹³Ndamwimiririra ega, arakora emirimu bhukongʼu kwa ekituunyo kurusumo rwenyu na kubhantu bha mumigi gya Raodikia na Hierapori. ¹⁴Ruuka, omureri weetu omuhanje, na Dema bharabhakeeranʼya. ¹⁵Bheenyu bhonse, mutukeeranirye abhahiiri bheetu kuimani abha mumugi gwa Raodikia. Kweki mutukeeranirye Nimufa, omuhara weetu kuimani, na abheekirirya bhonsego bhanú oranyoora bhareekumanʼya iika owaaye.

¹⁶Hanú muraamare okusoma enyarubha inu, muihikye kubheekirirya bha erikanisa rya Raodikia, naho bhonse bhaisome. Na bheenyu mutune enjira ya okuinyoora na okusoma enyarubha inú naabhatumira bheeki. ¹⁷Mumukeerye Arikipo ega, yaangararire bhujomu emirimu ginú yaahaanwa na Omukuru, naho agikunaanʼye. ¹⁸Oni Pauro, ndangʼoora enkeeranʼya inu kwa okubhoko kwani omwene. Muhiituke ega, ndingi mukibhohe. Eriruguto rya Waryubha ribhe hamwi na bheenyu.