3 Yoana

Enyarubha ya kasatu eya

Yoana

Obhukangati

Munyarubha ya kasatu, Yoana aramungʼoorera omuntu unú yaaringa arabhirikirwa Gaayo. Gaayo uyo, yaaringa agwatiri eimani eguru ya Kiristu bhukongʼu. Yaaringa arabheera abheehigirya abhandi bhanú bhaaringa bhareenaara mukyaro kurusumo rwa okuraarika Amangʼana Amajomu ga obhuheene. Yoana aramungʼoorera okumuteremya omutima agendererye okubhabheera abheehigirya bhayo.

Kweki munyarubha inu, Yoana aragamba eguru ya omuntu oundi. Omuntu uyo, yaaringa arabhirikirwa Diotirife. Weeki yaaringa arasakya okuribhira abhantu bha erikanisa bhatagenihya abheehigirya bhanú bhaaringa bhareehigirya Amangʼana Amajomu ga obhuheene. Kweki Yoana aragamba bhujomu eguru ya omuntu oundi, unú yaabhirikirwanga Demetirio. Weeki yaaringa areekara kwa obhuheene.

Okukeeranʼya

¹Oni omukangati wa erikanisa, ndakungʼoorera uuwe Gaayo omuhanje waani. Nkuhanjiri kwa obhuheene.

²Bhoono, omuhanje waani, ndakwendera amajomu kumangʼana gaaho gonsego na obhuhoru. Mmanyiri ega, oringi omuhoru kumangʼana ga Waryubha. ³Naajomerwa bhukongʼu, hanú abheekirirya abharikyaho abhandi bhaaja na okunkeerya kya ego oragendererya okugwata obhuheene na okwikara kwa obhuheene. ⁴Ritariho eringʼana rinú riranjomera bhukongʼu okukira okwigwa ega, abhaana bhaani kuimani bhareekara kwa obhuheene.

Obhuheene bhwa Gaayo

⁵Omuhanje waani, uuwe orakora kya ego oranyoora oragiri kuganú orakorera abheekirirya abharikyetu, onyoora bheeki m-bageni kuuwe. ⁶Abheekirirya bhayo bhaaruusya obhwimiririri embere ya abhantu bha erikanisa rya hanu, eguru ya obhuhanje bhwaho. Ndakukomererya ega, ogendererye okubhabheera, okuringʼaana na kya ego eramungʼarira Waryubha, naho bhagendererye na orugendo rwabho. ⁷Bhoono, abhantu bhayo bhaamba orugendo rwabho rwa okumukorera emirimu Yeesu Kiristu, bira okubheerwa kyokyonse okurwa kubhantu bhanú bhataringi abheekirirya. ⁸Mbe, bheetu tureenderwa okubhagenihya abhantu kya bhayo, naho tubhe tusangiri hamwi nabho, kumirimu gya okuraarika obhuheene.

Diotirife

⁹Naangʼoorera erikanisa enyarubha ya amangʼana amakego, nawe, Diotirife unú ahanjiri okwikangatirirya okubha omukangati waabho, atakwenda okunyitegeerera. ¹⁰Kwa ego, hanú ndiija eyo, nditubhura gonsego ganú arakora, kya ego araruusya amangʼana amabhiibhi ga ekikangi kubheetu. Kora gataringi gayo ageenego, kweki araanga okubhagenihya abheekirirya abharikyetu bhanú bharingi kurugendo. Na araribhira abhantu abhandi bhanú bhareenda okubhagenihya na arabhakenyia mwikanisa.

¹¹Bhoono uuwe Gaayo, omuhanje waani, oteehigira amangʼana amabhiibhi, nawe, wihigire amangʼana amajomu. Wowonse unú arakora amajomu, uyo m-mwana wa Waryubha. Nawe, unú arakora amabhiibhi, uyo atamumanyiri Waryubha.

Demetirio

¹²Abhantu bhonsego bheemiririiri ega, Demetirio m-muntu unú arakora amangʼana amajomu, na obhuhoru bhwaye bhuraringʼaana na obhuheene. Kora na bheetu tureemiririra ego, na uuwe omanyiri ega, obhwimiririri bhwetu m-bwa obhuheene.

Okukeeranʼya kwa okuraga

¹³Niina amangʼana amaaru ga okuhaira, nawe, ntakwenda okugangʼoora kwitarataasi na obhwino. ¹⁴Ndeeganirirya okukutaarira bhwangu hanu na okuhaira hamwi na uuwe ameeso kwa ameeso.

¹⁵Omurembe gubhe hamwi na uuwe. Abhasaani bhaaho bha hanu bharakukeeranʼya. Na uuwe, obhakeeranʼye abhasaani bheetu bha eyo, kira oumwi oumwi kwa eriina ryaye.