2 Timoteo

Enyarubha ya kabhiri eya Pauro ku

Timoteo

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Yaamungʼoorera Timoteo unú yaaringa omubheeri waaye wa haangʼi (1:2-5, 2:1). Pauro yaangʼoora enyarubha inu, hanú yaaringa mwigereja mumugi gwa Ruumi (1:16-17). Yaabhohwa eribhaga rya obhutungi bhwa Kaisari Nero. Eribhaga riyo, Abhakiristu bhaaringa bharanyankibhwa bhukongʼu, kurusumo rwa eimani yaabho. Kweki, Pauro yaaringa areeganirirya ega, eribhaga ryaye rya okwitwa riringi haangʼi (4:6-8). Eribhaga riyo, Timoteo yaaringa mumugi gwa Efeso, gunú gwaringa mukyaro kya Asia (1:18, 4:12-13, 4:19). Eramaahikana ega, enyarubha inu, yaangʼoorwa kumyaka gya mirongo esansabha na ena okuhikira mirongo esansabha na muhungati (64-67) okurwa okwibhurwa kwa Kiristu.

Ensonga ya Pauro okungʼoora enyarubha inu, yaaringa okumwimya Timoteo, naho yeeseemye okuraarika Amangʼana Amajomu eguru ya Yeesu, akore ekituunyo na okwigumirirya kumakongʼu gonsego (1:6-8, 2:3-10, 2:24, 4:2-5). Pauro yaamuragirirya Timoteo ega, akeerye Abhakiristu bha Efeso eyo, bhabhe na egintungwa eginjomu. Bhagwate bhujomu ameehigiryo ganú bhareehigira (2:14). Kweki, aramukeerya Timoteo ega, yaange kwa eginguru gyonsego ameehigiryo ga obhubheehi, yeehigirye aga obhuheene (1:13, 4:2-5). Kweki, Pauro yaaringa areegomba bhukongʼu, okumurora Timoteo (1:3-4, 4:9, 4:21).

Pauro aramukeeranʼya Timoteo

¹Enyarubha inu, erwiri kuoni Pauro. Oni naatumwa kwa obhwendi bhwa Waryubha, okubha omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu, naho okuraarika amangʼana ga obhuhoru. Waryubha yaaturaga ega, obhuhoru bhuyo, bhuratuuka kwa okumwikirirya Kiristu Yeesu. ²Ndakungʼoorera uuwe Timoteo, omwana waani omuhanje.

Ndakwendera eriruguto, ekyabhira na omurembe okurwa ku Taata Waryubha, na ku Kiristu Yeesu Omukuru weetu, bhibhe hamwi na uuwe.

Pauro aramukumya Waryubha na okumwimya Timoteo

³Ndamukumya Waryubha unú ndakorera emirimu kwa ameetegeerero amajomu, kya ego bhajaaji weetu bhaamukoreranga. Eribhaga ryonsego ndakuhiituka mumasabho gaani obhutiku na omubhasu. ⁴Hanú ndahiituka ameesori gaaho, eribhaga rinú twaragananga, ndeegomba bhukongʼu okukurora kweki, naho mbe na obhujomerwa. ⁵Kweki, ndahiituka eimani yaaho ya obhuheene. Eimani kya iyo, yaaringa nayo kuuku weenyu Roisi na ngʼina weenyu Eunike. Nonse ndeekirirya ega, na uuwe uunayo. ⁶Kwa ego, ndakuhiitukya ega, okore ekituunyo okutumira ekibharo kinú Waryubha yaakuhaana, eribhaga rinú naakwimya kwa okukutuurira amabhoko. ⁷Okore ego, kwa okubha Waryubha ataatukora abhoobha, nawe, yaatuhaana eginguru, obhuhanje na obhuturo bhwa okwiribhira.

⁸Bhoono, otarora eginsoni okugamba amangʼana eguru ya Omukuru weetu, kasi okurora eginsoni kwa okubha ndingi mukibhohe kurusumo rwaye. Nawe, wikongʼererye enyanko hamwi na oni, kurusumo rwa okuraarika Amangʼana Amajomu eguru yaaye, okuringʼaana na eginguru ginú orahaanwa na Waryubha. ⁹Weeki yaatutuurya, akatubhirikira tubhe abhaana bhaaye. Ataakora ego, kwa ekisigo kya amakorwa geetu amajomu, nawe, kwa ekisigo kya obhwendi bhwaye na eriruguto ryaye. Weeki yaatuhaana eriruguto riyo kurusumo rwa Kiristu Yeesu, kora ekyaro kitarabhumbwa. ¹⁰Nawe bhoono, Waryubha yoorokerye eriruguto ryaye kubheetu, kwa okuuja Omutuurya weetu Kiristu Yeesu. Weeki yaahiga eginguru gya oruku, na yoorokya obhuhoru bhwa koko, kwa enjira ya Amangʼana Amajomu.

¹¹Kurusumo rwa Amangʼana Amajomu gayo, naakorwa okubha omuraariki, omutumwa, na omwihigirya. ¹²Oni ndanyanka kwa ekisigo kya gayo. Nawe, ntakurora eginsoni, kwa okubha mmumanyiri unú neekirirya, na okwikirirya ega, Amangʼana Amajomu ga obhuheene bhunú yaangʼaana,1:12 Amangʼana Amajomu ga obhuheene bhunú yaangʼaana. Ensonga eindi eratura okubha ega, kinú naamuhaana. aragaangararira bhujomu, okuhikira orusiku rwa okuhunjuka kwaye. ¹³Ogwate bhujomu ameehigiryo ga obhuheene ganú wigwiri kuoni. Wihigirye gayo, na okutigara kuimani na obhuhanje bhunú bhuratuuka ku Kiristu Yeesu. ¹⁴Amangʼana Amajomu ganú waahaanwa, ogaangararire kwa eginguru gya Omutima Omurabhu,1:14 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. unú aringi munsi weetu.

¹⁵Omanyiri ega, abhantu bhonsego bha mukyaro kya Asia1:15 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki. bhantigiri, gati yaabho bharimo Fugero na Herimogene. ¹⁶Ndamusabha Omukuru Yeesu yaabhire abhantu bha owa Onesiforo, kwa okubha mara kaaru yaaringa aransambaarukya. Kweki, ataandoreranga eginsoni kwa okubha ndingi mukibhohe. ¹⁷Nawe, eribhaga yaaja mumugi gwa Ruumi hanu, yaakora ekituunyo okuntuna okuhikira akannyoora. ¹⁸Uuwe omanyiri bhujomu, kya ego yaambeeranga amaaru, mumugi gwa Efeso eyo. Omukuru Yeesu amusabhire Onesiforo ekyabhira ku Mukuru Waryubha, orusiku rurya rwa okubhutura ekiina.1:18 Omukuru Yeesu amusabhire Onesiforo ekyabhira ku Mukuru Waryubha, orusiku rurya rwa okubhutura ekiina. Ensonga eindi eratura okubha ega, Omukuru Yeesu amwabhire Onesiforo orusiku rurya rwa okubhutura ekiina.

Okwigumirirya kumirimu gya Waryubha

¹Bhoono, omwana waani, obhe na eginguru kwiruguto rinú turanyoora kwa enjira ya okumwikirirya Kiristu Yeesu. ²Uuwe weegwiri ameehigiryo ganú neehigirya embere ya abheemiririri abhaaru. Bhoono, ogagwatye abhantu bhanú bhareekiriribhwa, na bharatura okwihigirya abhandi. ³Wikongʼererye munyanko hamwi na oni, kya omusirikare omujomu wa Kiristu Yeesu. ⁴Atariho omusirikare unú aratiga okukora emirimu gya ekisirikare, asohe kumirimu ginú gitaringi gya ekisirikare. Atakwisohya kugiyo, kwa okubha areenda okumungʼarira omukuru waaye. ⁵Egoego, na unú arasongana mumihooyo, atakutura okuhaanwa omutuho gwa obhuhigi, nyoore atagwatiri amaragiriryo ga emihooyo. ⁶Kweki, omurimi unú ararima kwa ekituunyo, uyo areenderwa okubha owa mbere okugega erigesa. ⁷Timoteo, witegeerere eguru ya amangʼana gayo ndakukeerya, kwa okubha Omukuru Waryubha arikuhaana obhuturo bhwa okumanya gonsego.

⁸Omuhiituke Yeesu Kiristu wa oruganda rwa omukama Daudi,2:8 Daudi. Maaha eringʼana rinu mu Moonjooro eguru ya Amangʼana Amakongʼu. unú yaahyukibhwa okurwa mubhaku. Gayo ngo Amangʼana Amajomu ganú ndaraarika. ⁹Gayo ngo garakora ndanyanka kwa okubhohwa na eminyororo kya omusarya. Nawe, eringʼana rya Waryubha ritakubhohwa. ¹⁰Kwa ego, ndeekongʼererya gonsego kurusumo rwa abhantu bhanú Waryubha yaasora, naho bhonse bhatuuribhwe kwa okumwikirirya Kiristu Yeesu na okubha na obhumwi kubhukuru bhwaye koko.

¹¹Eringʼana rinu ni-rya maheene, ega,

“Nyoore twakwa hamwi na Kiristu,

kweki turibha abhahoru hamwi nawe.

¹²Nyoore tureekongʼererya,

turitunga hamwi nawe.

Nyoore turamwanga weeki,

wonse aritwanga.

¹³Nyoore bheetu tutakubha abhaheene,

nawe weeki aragendererya okubha omuheene,

kwa okubha atakutura okwiyanga omwene.”

Omukori wa emirimu owa heene embere ya Waryubha

¹⁴Obhahiitukye abheekirirya amangʼana gayo, na okubhakomererya embere ya Waryubha, bhatige eginhaka eguru ya amangʼana ganú gataana obhwera. Eginhaka giyo, girasarya bhanú bharagiitegeerera. ¹⁵Wikongʼererye okwihigirya amangʼana ga obhuheene, kya ego ereenderwa ku Waryubha. Hayo oribha omukori wa emirimu unú otaana eginsoni kurusumo rwa emirimu gyaye. Okukora ego, nko Waryubha areekirirya.

¹⁶Oteesohya kumangʼana amabhiibhi ganú gataana obhwera bhobhonse, kwa okubha gayo garabhakora abhantu bharabha hare na Waryubha. ¹⁷Ameehigiryo gaabho n-kya ekironda kinú kitakuhwena. Gati ya bhayo, bharimo Himenayo na Fireto. ¹⁸Bhayo, bhabhuriri bhukongʼu, bhatigiri obhuheene. Bharagamba ega, obhuhyuki bhwa abhaku, bhwamara okubha-ho. Kwa okwihigirya ego, bharahabhya eimani ya abhantu abhandi. ¹⁹Nawe, abhantu bhanú bheemiri, n-kya obhurusa bhunú bhwatuurwa na Waryubha. Na kubhurusa kuyo rungʼoorerwe-ko orubhaaso runu,

“Omukuru Waryubha amanyiri abhaana bhaaye,”2:19 Maaha mukitabho kya Okubhara 16:5.

kweki,

“Omuntu wowonse unú areebhirikira ega, weeki ngʼ-wa Omukuru Waryubha, atige obhusarya.”

²⁰Munyumba enene, otakunyoora-mo ebhintu bhya ebhigera bhya egijahaabhu na egimbirya ebhyenego, nawe, bhirimo ebhya emiti na obhutoto. Ebhindi bhirasuukwa, ebhindi bhitakusuukwa. ²¹Mbe bhoono, nyoore omuntu areeraame kwa okutiga obhusarya bhonsego, arabha kya ekintu kinú kirasuukwa, aribha areenderwa ku Mukuru waaye, amukorere emirimu gyonsego emijomu.

²²Otige orunamba rwa obhumura, ogwate obhuheene, eimani, obhuhanje na omurembe. Ogwate gayo, hamwi na bhonsego bhanú bharamusabha Omukuru kwa omutima omujomu. ²³Nawe, oteesohya munhaka gya ekikangi ginú gitaana obhwera, kwa okubha omanyiri ega, giyo gireebhukya eriihe. ²⁴Kweki, etakwenderwa omugaya wa Omukuru, abhe ahanjiri eriihe. Nawe, abhe omwigumirirya, na omunyoohu kubhantu bhonsego, na unú amanyiri okwihigirya. ²⁵Areenderwa abhe aratongera abhantu kwa obhunyoohu bhanú bharahakaananʼya nawe, naho hamwi Waryubha abhahunjure bhamanye obhuheene. ²⁶Hayo, obhungʼeeni bhwabho bhurabhahindira kweki, na bharatuuribhwa okurwa mumutego gwa Erisambwa2:26 Erisambwa. Maaha eringʼana rinu mu Moonjooro eguru ya Amangʼana Amakongʼu. rinú ryaringa ribhagwatirye, naho bhakore obhwendi bhwaryo.

Obhusarya kuginsiku gya obhuteero

¹Bhoono, omanye bhujomu ega, eginsiku gya obhuteero, riribha eribhaga rya enyanko enene. ²Eribhaga riyo, abhantu bhariihanja abheene, bharibha na orunamba rwa egimbirya, bharibha bhareegungya, bharibha na emitwe emikongʼu, bharibha bharagamba amangʼana ga amatuki, bhatarisuuka abheebhuri bhaabho, bhataribhanga bharakumya kumangʼana gogonse, na bhatarimwigwa Waryubha. ³Kweki, bhatarihanja omuntu wowonse, bhataryenda okugambanibhwa na abhandi, bharibha abhabheehi, bhatariiribhira, bharibha abharuru, na bhatarihanja amajomu. ⁴Bharikoranga eniku, bharibha bharakora amangʼana kwa okwanguhiirirya, bharibha bhareeheema, bharihanja amangʼana ga ekyaro okukira okumuhanja Waryubha. ⁵Abhantu bhayo, bharibhanga bharamaahikana ega, m-bantu bha edini, nawe, mumitima gyabho, bharaanga eginguru gya Waryubha ginú giratura okubhahunjura. Wiyangararire na abhantu bha enteemo iyo.

⁶Gati ya bhayo, bharimo bhanú bharasoha mumigi gya abhantu, kwa orunamba orubhiibhi, na okungʼeenererya abhakari abhakangi bhanú bhaaruhirwa na orunamba rwa obhusarya, na okugwatwa na orunamba rwa amanga amaaru. ⁷Abhakari bhayo, bhareehigira kira orusiku, nawe bharatamwa okumanya obhuheene. ⁸Abhantu bharya bharasoha mumigi, bharaanga obhuheene kya Yaane na Yambure3:8a Yaane na Yambure. Eramaahikana ega, abhantu bhanu mbo bhaaringa abhakumu bha omukama wa ekyaro kya Misiri. Maaha mukitabho kya Okuhuruka 7:11-22. bhanú bhaahakaananʼya na Musa.3:8b Musa. Maaha eringʼana rinu mu Moonjooro eguru ya Amangʼana Amakongʼu. Abhantu bhayo, bhaadangana, bhatigiri okumwikirirya Waryubha. ⁹Nawe, bhataagendererye, kwa okubha obhukangi bhwabho bhurimanyikana kubhantu bhonsego, kya ego yaabha ku Yaane na Yambure.

Amaragiriryo ga Pauro ku Timoteo

¹⁰Nawe, uuwe ogwatiri ameehigiryo gaani, egintungwa gyani, obhwendi bhwani, eimani yaani, obhwigumirirya bhwani, ¹¹obhuhanje bhwani na obhwigumirirya bhwani. Omanyiri kya ego abhantu bhaanyankya, hanú naaringa mumigi gya Antiokia,3:11 Antiokia. Antiokia inu, ngʼ-ya mukyaro kya Pisidia. Ikonio na Rustira. Kweki, omanyiri ega, neekongʼererya amakongʼu gonsego, nawe Omukuru Yeesu akantuurya kugayo gonsego. ¹²Mbe bhoono, bhonsego bhanú bharamwikirirya Kiristu Yeesu, na bhareenda okwikara kwa okumwigwa Waryubha, bharaabhenga bharanyankibhwa. ¹³Nawe abhakori bha obhusarya na abhangʼeenererya, bharigendererya okubha abhakori bha obhusarya bhukongʼu, bharibhanga bharangʼeena na okungʼeenwa.

¹⁴Nawe uuwe, ogume kumangʼana ganú weehigiribhwa na okugeekirirya ega, n-ga maheene. Ogume kugayo, kwa okubha obhamanyiri bhanú bhaakwihigirya. ¹⁵Okurwa mubhwana, omanyiri Amangʼoore Amarabhu ganú garakuhaana egintungwa. Amangʼoore gayo, garareeta obhutuurya kwa enjira ya okumwikirirya Kiristu Yeesu. ¹⁶Amangʼoore Amarabhu gonsego, gangʼoorerwe kwa omwika gwa Waryubha. Gayo, gareenderwa okwihigirya obhuheene, na okukaanʼya abhantu, naho bhatige obhusarya bhwabho. Kweki, garoorokererya abhantu hanú bharasarya, na okoorokererya kira kinú kireenderwa embere ya Waryubha. ¹⁷Amangʼoore gayo, garamukora omuntu wa Waryubha abhe aseemiibhwe na abhe yeeseemerye okukora emirimu gyonsego emijomu.

¹Ndakukomererya ganu, embere ya Waryubha na embere ya Kiristu Yeesu, unú aribhuturira ekiina abhahoru na abhaku. Weeki ngʼo ariija okutunga kya omukama. ²Bhoono, obhenga oraraarika eringʼana rya Waryubha. Wiseemye okukora ego, kwibhaga rinú rireenderwa na rinú ritakwenderwa. Obhenga orakaanʼya, orakemera, orateremya abhantu. Okore ego, enu oreehigirya kwa obhwangarariri bhukongʼu. ³Eribhaga ririija, rinú abhantu bhatariitegeerera ameehigiryo ga obhuheene. Bharibhanga bhareenda okwitegeerera ganú garabhajomera ageenego, na okusora abheehigirya emiganda na emiganda bha okubheehigirya ganú bhahanjiri okwitegeerera. ⁴Bharitiga okwitegeerera obhuheene, na bharigwata amagano ga obhubheehi ganú gataana obhwera. ⁵Nawe uuwe, obhenga oreeswa kumangʼana gonsego, wikongʼererye enyanko, okore emirimu gya okuraarika Amangʼana Amajomu, na okore bhujomu emirimu gya Waryubha gyonsego.

⁶Ndakukeerya gayo, kwa okubha amanyinga gaani, garingi haangʼi okwitirwa kya ekimwenso4:6a Ekimwenso. Maaha eringʼana rinu mu Moonjooro eguru ya Amangʼana Amakongʼu. kya edivai ahasi ha okumwensera.4:6b Maaha mukitabho kya Okuhuruka 29:38-41. Eribhaga ryani rya okukwa riringi haangʼi. ⁷Ndwaniri eriihe bhujomu, naamariri orugendo, kweki naaguma kuimani. ⁸Bhoono, ndaganyirira okuhaanwa eritaaji, kwa okubha neekara kwa obhuheene embere ya Waryubha. Omukuru Yeesu Omubhuturi wa ekiina owa obhuheene, arintuha orusiku runú ariija. Ntaringi oni omwenego, na abhandi bhonsego bhanú bhareegomba, okuhunjuka kwaye.

Amasabho ga Pauro ku Timoteo

⁹Timoteo, okore ekituunyo okuuja enu bhwangu kwa okubha ¹⁰Dema yaantigiri. Weeki yaahanja amangʼana ga ekyaro, akaamura okugya mumugi gwa Tesaronike. Kiresike weeki, yaagiiri okumukorera emirimu Waryubha mukyaro kya Garatia, na Tiito yaagiiri mukyaro kya Darimatia. ¹¹Ruuka omwenego, ngʼo yaatigeeri hamwi na oni hanu. Hanú oraaje enu, uuje na Mariko, kwa okubha aratura okumbeera emirimu gya Waryubha. ¹²Naamutuma Tukiko, mumugi gwa Efeso eyo. ¹³Hanú oraaje, undeetanirye ekabhuuti yaani na ebhitabho, ekinene bhirya ebhya eriseero. Ekabhuuti naaitiga ku Karipo mumugi gwa Turoa erya.

¹⁴Arekisaanda omuturi wa ebhyuma, yaankoreeri amabhiibhi bhukongʼu. Omukuru Yeesu, arimurihya okuringʼaana na ebhikorwa bhyaye. ¹⁵Wiyangararire na omuntu uyo, kwa okubha yaahakaanʼya bhukongʼu, ameehigiryo geetu.

¹⁶Hanú neebhagirira mwibharaja orwa mbere, ataatuuka-ho kora omuntu oumwi unú yeemirira orubhaara rwani, bhonsego bhaantiga. Ndamusabha Waryubha atige okubhabharira obhusarya bhuyo. ¹⁷Nawe, Omukuru Yeesu yaaringa hamwi na oni, akangʼaana eginguru okuraarika Amangʼana Amajomu gonsego, naho abhantu bhonsego bhanú bhataringi Abhayahudi bheegwe. Nonse akantuurya okurwa mungʼanga ya oruku, kwa okubha naaringa muna mumunwa gwa endwi. ¹⁸Omukuru arintuurya okurwa kukira eringʼana eribhiibhi, na okunyangararira okuhikira nhike mubhukama bhwaye bhwa murwire. Omukuru agungibhwe koko na koko. Amina.

Okukeeranʼya kwa okuraga

¹⁹Unkeeranirye Akira na omukari waaye Pirisikira, na abha owa Onesiforo. ²⁰Erasito yaatigara mumugi gwa Korinto. Turofimo naamutiga mumugi gwa Mireto, yaaringa omurweri. ²¹Bhoono okore ekituunyo okuuja, eribhaga rya embeho ritarahika. Orakeeranibhwa na Eubhuro, Pude, Rino, Kiraudia, hamwi na abheekirirya abhandi bhonsego.

²²Ndamusabha Omukuru Yeesu, abhe hamwi na uuwe. Eriruguto ryaye, ribhe hamwi na bheenyu bhonsego.