2 Abhatesaronike

Enyarubha ya kabhiri eya Pauro ku

Abhatesaronike

Obhukangati

Eribhaga ekego, okurwa Pauro atume enyarubha yaaye eya mbere, akanyoora amangʼana ega, abheekirirya bha Tesaronike, bhataamanya bhujomu ameehigiryo gaaye agandi. Abhandi bhaakanyanga ega, Yeesu yaaringa amariri okuhunjuka. Na abhandi bhaaringa bhatigiri okukora emirimu gyabho gyonsego, kwa okubha bheesiganga ega, Yeesu akaahunjukiri eribhaga ryoryonse. Abhandi bhateendanga okukora emirimu kwa ekisigo kya obhurosu. Kwa ego, Pauro akangʼoora enyarubha ya kabhiri, naho akyukye ameetegeerero kya gayo. Kunyarubha ya kabhiri yaakomererya ega, Yeesu yaaringa atarahunjuka mukyaro na yaabhakomererya okugendererya okukora emirimu kwa ekituunyo.

Pauro arakeeranʼya Abhatesaronike

¹Enyarubha inu erwiri kubheetu Pauro, Siriwano1:1 Siriwano. Mukitabho kya Amakorwa ga Abhatumwaarabhirikirwa Siira. na Timoteo. Turabhangʼoorera bheenyu bhanú muringi mwikanisa rya mumugi gwa Tesaronike, bheenyu omuganda gwa abhantu bhanú mwamwikirirya Taata Waryubha na Omukuru Yeesu Kiristu.

²Turabheendera eriruguto na omurembe okurwa ku Taata Waryubha na ku Mukuru Yeesu Kiristu bhibhe hamwi na bheenyu.

Okubhutura ekiina kwa Waryubha kwibhaga rya obhuteero

³Abhahiiri bheetu kuimani, tureenderwa okumukumya Waryubha eribhaga ryonsego kurusumo rwenyu, kwa okubha eimani yeenyu eragendererya okwaruha bhukongʼu, na obhuhanje bhwa kira omuntu kumurikyaye bhuragendererya okwaruha. ⁴Kwa ego, tureeheema mumakanisa ga Waryubha kwa ekisigo kya okwigumirirya na eimani yeenyu, muginyanko gyonsego ginú muranyoora.

⁵Gayo gonsego garoorokya ega, okubhutura ekiina kwa Waryubha n-kwa obhuheene. Na kwa ekisigo kiyo, bheenyu murabharwa ega, mureenderwa mubhukama bhwaye1:5 Mubhukama bhwaye. Maaha Obhukama bhwa Waryubha mu Moonjooro eguru ya Amangʼana Amakongʼu. bhunú muranyankira. ⁶Waryubha ngʼo wa obhuheene, weeki aribhariha enyanko bhanú bharabhanyankya bheenyu, ⁷na aribhamuunyia enyanko bheenyu hamwi na bheetu. Arikora gayo eribhaga rinú Omukuru Yeesu ariija, okurwa murwire na egindimi gya omururo, hamwi na bhamaraika1:7 Bhamaraika. Maaha eringʼana rinu mu Moonjooro eguru ya Amangʼana Amakongʼu. bhaaye bha eginguru. ⁸Yeesu ngʼo arijibhya bhonsego bhanú bharamwanga Waryubha na bhanú bhatakugwata Amangʼana Amajomu eguru ya Omukuru weetu. ⁹Obhujibhu bhwabho bhuribha bhwa okusikibhwa koko, na okwahurwa bhabhe hare na Omukuru na obhukuru bhwa eginguru gyaye. ¹⁰Obhujibhu bhuyo, bhuribha orusiku runú Omukuru ariija okugungibhwa na okusuukwa, na abhantu bhanú bhaamwikirirya. Bheenyu bhonse muribha gati ya bhayo, kwa okubha mwikiriirye amangʼana ganú twabhareetera.

¹¹Kwa ego, turabhasabhira bheenyu kira orusiku, naho Waryubha weetu abhabhare ega, mureenderwa obhumenyi bhunú yaabhabhirikirira. Kweki turabhasabhira ega, kwa obhuturo bhwaye ahikye amangʼana amajomu ganú mureenda okukora na ahikye emirimu gyenyu gyonsego gya eimani. ¹²Turasabha gayo, naho eriina rya Omukuru weetu Yeesu, ribhenga riragungibhwa kurusumo rwenyu. Kweki na bheenyu mubhenga muragungibhwa kurusumo rwaye. Ganu garaabhenga garakoreka okurekana na eriruguto rya Waryubha weetu, na erya Omukuru Yeesu Kiristu.

Okuuja kwa Omukuru Yeesu na okutubhuka kwa Omujeemi

¹Mbe bhoono, abhahiiri bheetu kuimani, turabhangʼoorera eguru ya okuuja kwa Omukuru weetu Yeesu Kiristu na kya ego turiikumanʼya kuweeki.2:1 Maaha mukitabho kya 1 Abhatesaronike 4:17. Turabhakomererya ega, ²mutige okubha na enkubhi bhwangu na okoobhoha ega, orusiku rwa okuuja kwa Omukuru rwahikiri. Hamwi mureegwa ego, okurekana na obhurooti nyabhurebhe, kasi obhuraariki, kasi enyarubha inú ereeganiriribhwa ega, erwiri kubheetu. ³Mutige okwikirirya omuntu wowonse abhangʼeene kwa ryoryonse rirya, kwa okubha orusiku ruyo rutarihika, okuhikira eginsiku ginú abhantu abhaaru bharimujeema Waryubha, na Omujeemi atubhuke. Uyo ngʼo, arisikibhwa chwe kubhuteero. ⁴Weeki ariribhira kira ekintu kinú abhantu bharabhirikira ega, m-mukuru waabho, kora kira kinú bharasyengera. Na weeki ariituura eguru ya bhyonsego. Kweki arisoha na okwikara mwisyengerero erikuru rya Waryubha2:4 Mwisyengerero erikuru rya Waryubha. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. na okwikorya ega, weeki ngʼo Waryubha.

⁵Mutakuhiituka ega, hanú naaringa hamwi na bheenyu, naabhakeerya gayo gonsego? ⁶Na mumanyiri kinú kiramuribhira bhoonwego, naho atubhuke kwibhaga rinú rireenderwa. ⁷Kora bhoono Omujeemi uyo, arakora emirimu bhwibhise. Nawe, ataritubhuka okuhikira hanú unú aramuribhira, ariija okuruusibhwa-ho. ⁸Hayo nho Omujeemi uyo aritubhuka. Nawe, Omukuru Yeesu hanú ariija, arimwita na omwika okurwa mumunwa gwaye, na arimusikya kwa obhukuru bhwa okuuja kwaye.

⁹Eribhaga rya okutubhurwa kwaye, Omujeemi uyo, ariija na eginguru gyonsego gya Erisambwa2:9 Erisambwa. Maaha eringʼana rinu mu Moonjooro eguru ya Amangʼana Amakongʼu. na okukora ebhimanyiiriryo na ebhiruguuryo bhya obhubheehi. ¹⁰Aritumira obhungʼeenererya bhobhonse bhurya, okubhangʼeena bhanú bharabhura, kwa okubha bhateekirirya okuhanja obhuheene, naho bhatuuribhwe. ¹¹Kwa ego, Waryubha arabheekiririrya bhatungwe na eginguru gya okubhura, naho bhagendererye okwikirirya obhubheehi. ¹²Hayo, bhonsego bhanú bhatakwikirirya obhuheene, nawe, bharajomererwa obhusarya, bharibhuturirwa ekiina.

Munage kuimani

¹³Nawe bheetu, tureenderwa okumukumya Waryubha eribhaga ryonsego kurusumo rwenyu, bheenyu abhahiiri bheetu kuimani bhanú mwahanjwa na Omukuru Yeesu. Tureenderwa okukora ego, kwa okubha Waryubha yaabhasora okurwa kubhwambiro bhwa obhubhumbi, naho mutuuribhwe. Mutuuriibhwe kwa okuraamwa na Omutima Omurabhu2:13 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. na kwa enjira ya okwikirirya obhuheene. ¹⁴Waryubha yaabhabhirikira, naho mutuuribhwe kwa enjira ya Amangʼana Amajomu ganú twabharaarikira. Yaabhabhirikira, naho munyoore obhukuru bhwa Omukuru weetu Yeesu Kiristu. ¹⁵Mbe bhoono, abhahiiri bheetu kuimani, munage kuimani na okugwata ameehigiryo ganú mweehigiribhwa kwa amangʼana geetu kasi kwa enyarubha yeetu.

¹⁶Taata Waryubha atuhanjiri, na kwa eriruguto ryaye aratuhorisya koko na yaatuhaana ekintu ekijomu kya okwisigira.2:16 Ekintu ekijomu kya okwisigira. Kumuchafwa gunu, erahairira amangʼana amajomu ganú Waryubha yaaturaga ega, aritukorera. Turamusabha weeki, hamwi na Omukuru weetu Yeesu Kiristu omwene ega, ¹⁷abhahorisye na okubhanagya, naho mubhenga muragamba na okukora amangʼana amajomu.

Mutusabhire ku Waryubha

¹Bhoono, abhahiiri bheetu kuimani, mutusabhire naho amangʼana eguru ya Omukuru Yeesu, gagendererye okunyaragana bhwangu, abhantu bhagagwate kwa obhusuuku, kya ego yaaringa kubheenyu. ²Mutusabhire, naho Waryubha atutuurye okurwa kubhantu abhabhiibhi na abhasarya, kwa okubha bhataringi bhonsego bhanú bhareekirirya amangʼana gayo. ³Nawe, Omukuru m-muheene, weeki aribhanagya bheenyu na okubhaangararira kumusarya urya Erisambwa. ⁴Weeki aratuhaana obhwisige obhunene ega, bhoono murakora kya ego oranyoora turabharagirirya na kweki murigendererya okugakora. ⁵Omukuru abhoorokererye okumanya bhukongʼu, obhuhanje bhwa Waryubha na obhwikongʼererya bhunú bhoorokibhwa na Kiristu.

Obhukemeri eguru ya obhurosu

⁶Abhahiiri bheetu kuimani, turabharagirirya kwa obhutungi bhwa Omukuru Yeesu Kiristu ega, mwiyahure okurwa kubharikyenyu abharosu bhonsego, bhanú bhatakugwata ameehigiryo ganú twabhahaana. ⁷Turagamba ego, kwa okubha bheenyu mumanyiri kya ego ereenderwa okugwata ekirengyo kyetu. Bheetu eribhaga twaringa na bheenyu, tutaaringa abharosu, ⁸kora tutaaryanga ebhyakurya kumuntu wowonse bhusa. Nawe, twaringa turakora emirimu kwa ekituunyo obhutiku na omubhasu, naho tutige okumunyankya omuntu wowonse kubheenyu. ⁹Twakora ego, etaringi ega, tuteenderwanga okwenda ekintu okurwa kubheenyu, nawe tweendanga tubhe ekirengyo, mutwihigire. ¹⁰Kweki kwibhaga rinú twaringa hamwi na bheenyu, twabharagirirya ega, “Omuntu wowonse unú atakwenda okukora emirimu, atarya.”

¹¹Turagamba amangʼana gayo, kwa okubha twigwiri ega, bhariho abhantu abhandi abharosu kubheenyu, bhatakukora kyokyonse, nawe, bhareesohya kumangʼana ga abhandi. ¹²Mbe bhoono, abhantu bhayo turabhakomererya na okubhakemera kwa obhutungi bhwa Omukuru Yeesu Kiristu ega, bhabhe bharakora emirimu kwa egintungwa, naho bhanyoore ebhyakurya bhyabho abheene. ¹³Nawe, bheenyu abhahiiri bheetu kuimani, mutakwa omutima okukora amajomu.

¹⁴Nyoore omuntu wowonse atakwenda okugwata amaragiriryo geetu, ganú garingi kunyarubha inu, mwiyangararire na omuntu uyo. Mutagwatana nawe, naho arore eginsoni. ¹⁵Nawe, mutamurora kya omusigu, mubhenga muramutongera kya omurikyenyu.

Okukeeranʼya kwa okuraga

¹⁶Bhoono, Omukuru Yeesu omwene, obhusimuka bhwa omurembe, abhenga arabhahaana omurembe eribhaga ryonsego, kwa eginjira gyonsego. Weeki abhe hamwi na bheenyu bhonsego. ¹⁷Oni Pauro mbangʼooreeri enkeeranʼya inu kwa okubhoko kwani omwene. Kinu nkyo ekimanyiiriryo kukira enyarubha yaani,3:17 Kinu nkyo ekimanyiiriryo kukira enyarubha yaani. Ekimanyiiriryo kya eginyarubha gya Pauro gyonsego, giraamba na okukeeranʼya na giramariisya na okukeeranʼya. bhuyo mbo obhungʼoori bhwani.

¹⁸Eriruguto rya Omukuru weetu Yeesu Kiristu, ribhe hamwi na bheenyu bhonsego.