Enyarubha ya kabhiri eya
Petero
Obhukangati
Enyarubha inu omutumwa Petero yaabhangʼoorera Abhakiristu bhonsego (1:1). Ensonga yaaye yaaringa okwanga ameehigiryo ga abhantu nyabhurebhe ganú gaaringa garahabhana na obhuheene bhwa Amangʼana Amajomu eguru ya Yeesu Kiristu. Enjira ya okubhakaanʼya abhantu bhayo ngʼ-inu, Abhakiristu bhareenderwa okugwata ameehigiryo ga maheene ganú garabheera okumumanya Waryubha na Omwana waaye Yeesu Kiristu. Ameehigiryo gayo n-ga abhatumwa, bhanú bhaamurora Yeesu Kiristu kwa ameeso gaabho abheene na okwitegeerera ganú yaaringa areehigirya (1:16-18).
Petero arakomererya ganú gareenderwa ku Bhakiristu, na kweki eguru ya obhuheene kumirimu gya Waryubha. Arakemera kwa obhuhaari emirimu na eginteemo gya abhantu bhanú bhaaringa bharanyaraganʼya ameehigiryo ga obhubheehi.
Kweki aroonjoora ega, abhantu bhayo, bharakora eginsoni kubhanú bhaaringa bharaganyirira okuhunjuka kwa Kiristu orwa kabhiri, na bhaaringa bharabhakeerya ega, riyo ritariibhuka. Petero arabhakomererya Abhakiristu ega, Yeesu atarahunjuka okurekana na obhwigumirirya bhwa Waryubha. Waryubha ahanjiri okwigumirirya bhukongʼu, naho abhantu abhaaru bhamwikirirye na okutuuribhwa.
1Okukeeranʼya
1Enyarubha inu, erwiri kuoni Simoni Petero, omugaya na omutumwa1:1a Omutumwa. Maaha Abhatumwa mu Moonjooro eguru ya Amangʼana Amakongʼu. wa Yeesu Kiristu. Ndabhangʼoorera bheenyu bhanú muheerwe eimani ya obhwera inú bheetu bhonse tuheerwe. Muheerwe eimani iyo, kwa okubha Waryubha, Omutuurya weetu Yeesu Kiristu,1:1b Waryubha, Omutuurya weetu Yeesu Kiristu. Ensonga eindi eratura okubha ega, Waryubha weetu na Omutuurya Yeesu Kiristu. yaakora ganú gareenderwa.
2Ndabhasabhira ku Waryubha abhoongerye eriruguto na omurembe, kukumumanya weeki na Yeesu Omukuru weetu.
Mwabhirikirwa na okusorwa na Waryubha
3Waryubha kwa obhuturo bhwaye, yaatuheeri gonsego ganú tureenda, naho twikare obhwikari bhunú bhuramujomera. Weeki yaatuheeri gayo, kwa enjira ya okumumanya. Omwene atubhirikiiri okurekana na obhukuru na obhujomu bhwaye. 4Kwa enjira ya gayo, yaaturaga amangʼana amanene na aga obhwera. Na kwa amangʼana gayo yaaturaga, turatura okutiga amabhiibhi ga mukyaro hanu ganú garareetwa na orunamba orubhiibhi, naho tugwatane na enteemo ya Waryubha.
5Kwa ekisigo kiyo, mukorenga ekituunyo bhukongʼu, naho eimani yeenyu ebhe na amajomu na amajomu geenyu, gabhe ga okumanya ganú Waryubha areenda. 6Kweki hamwi na okumanya kwenyu kwa amangʼana gayo, mubhenga mureeribhira okukora amabhiibhi. Okwiribhira kwenyu, kubhe kwa okwigumirirya, na okwigumirirya kwenyu, kubhe kwa okumwigwa Waryubha. 7Hamwi na okumwigwa Waryubha, muhanjanenga bheenyu abheene kwa abheene, na hanú murahanjana abheene kwa abheene, muhanjenga na abhantu abhandi bhonsego. 8Nyoore muraabhe na eginkuma giyo, na nyoore giraagendererye okwaruha, giribhakora okubha abha ekituunyo na abha okuruusya emisumo gya okumumanya Omukuru weetu Yeesu Kiristu. 9Nawe, omuntu unú ataana eginkuma giyo, n-kya omuhoku, unú atakurora ahare, kwa okubha arabhiirwe ega, Waryubha ngʼo amuraamiri obhusarya bhwaye bhunú yaaringa nabho akare.
10Mbe bhoono, abhahiiri bhaani kuimani, mukore ekituunyo bhukongʼu okoorokya ega, Waryubha abhabhirikiiri na okubhasora. Nyoore mureekarenga ego, mutarihabha kora rumwi, 11na Waryubha aribhaturuungʼana bhujomu, mubhukama bhwa koko obhwa Omukuru na Omutuurya weetu Yeesu Kiristu.
12Kwa ego, ndaagendereryenga okubhahiitukya amangʼana gayo eginsiku gyonsego, onyoora mwamara okugamanya na okunaga kubhuheene bhunú mweehigira. 13Oni ndarora ega, ni-ringʼana erijomu okubheemukya, kwa okubhahiitukya eguru ya amangʼana gayo, kwibhaga ryonsego rinú ndingi mukyaro munu. 14Ndagamba ego, kwa okubha mmanyiri ega, ndingi haangʼi okurwa mukyaro munu, kya ego Omukuru weetu Yeesu Kiristu yanyorokerye. 15Nkyo kirakora ndakora ekituunyo okubhangʼoorera gayo, naho hanú ndibha nkwiri, mugahiitukenga eribhaga ryonsego.
Abheemiririri bha obhukuru bhwa Kiristu
16Eribhaga twaringa turabheehigirya eguru ya eginguru na okuhunjuka kwa Omukuru weetu Yeesu Kiristu, tutaaringa turabhakeerya amagano ga obhubheehi ganú gaangʼoorwa kwa obhungʼeeni. Nawe bheetu twarora obhukuru bhwaye kwa ameeso geetu abheene. 17-18Bheetu twaringa hamwi na Yeesu munkuku irya eya Waryubha, hanú Taata Waryubha yaamuhaananga obhusuuku na obhukuru. Eribhaga riyo, bheetu abheene tweegwa eriisi erya obhukuru obhunene, rirarwa murwire ku Waryubha omwene, riragamba ega, “Unu ngʼo Omwana waani1:17-18a Omwana waani. Maaha Omwana wa Waryubha mu Moonjooro eguru ya Amangʼana Amakongʼu. omuhanje, nngʼariirwe nawe.”1:17-18b Maaha mubhitabho bhya Mataayo 17:5; Mariko 9:7.
19Kweki bheetu tuuna amangʼana ga abharooti ganú garatuhaana obhuheene bhunú bhunagiri. Nyoore muragagwata, murakora bhujomu, kwa okubha amangʼana gayo, garingi kya ekorobhoi inú eramirika hanú haana ekisunte, okuhikira mumakyere, na Kiristu abhamirikire mumitima gyenyu, kya enjota nyamananga.1:19 Maaha mukitabho kya Okubhara 24:17.20Okutiga gayo, mumanye eringʼana rinu mbere ega, bhutariho obhurooti mu Mangʼoore Amarabhu, bhunú omurooti yaaruusya okurekana na ameetegeerero gaaye omwene.1:20 Bhunú omurooti yaaruusya okurekana na ameetegeerero gaaye omwene. Ensonga eindi eratura okubha ega, bhunú omuntu aratura okoonjoora, okurekana na ameetegeerero gaaye omwene.21Ndagamba ego, kwa okubha bhutariho obhurooti bhunú bhurarekana na obhwendi bhwa omuntu. Nawe abhantu bhaagamba amangʼana ganú gaarwa ku Waryubha, enu bharoorokereribhwa na Omutima Omurabhu.1:21 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu.
2Abheehigirya bha obhubheehi
1Nawe, kwibhaga rya abharooti, bheebhuka abharooti bha obhubheehi gati ya Abhaisiraeri. Ego niigo abheehigirya bha obhubheehi bhariibhuka gati yeenyu. Abhantu bhayo, bharibhasoherya bhugunyi ameehigiryo amabhiibhi ga okuhabhya, kora ga okumwanga Omukuru Yeesu unú yaabhatungurya. Kwa okukora ego, bhariikorera okusika kwabho abheene bhwangu. 2Abhantu abhaaru bharigwata eginjira gyabho egimbiibhi. Na kwa ekisigo kya abheehigirya bha obhubheehi bhayo, abhantu abhandi bharibhanga bharatuka enjira ya obhuheene. 3Kwa orunamba rwabho rwa ebhintu, bharibhanga bharabhakeerya amagano ga obhubheehi, naho bheenyoorere ebhintu okurwa kubheenyu. Nawe, okurwa akare, Waryubha yaakemera ega, aribhabhuturira ekiina, na kweki yeeseemerye okubhasikya!
4Na bhamaraika2:4 Bhamaraika. Maaha eringʼana rinu mu Moonjooro eguru ya Amangʼana Amakongʼu. bhanú bhaasarya, Waryubha ataabhaabhira, nawe yaabheesa mwituko rya ekisunte kinú kikurirye, muyo bhabhoherwe na eminyororo, bharaganyirira orusiku rwa okubhuturirwa ekiina. 5Kweki eribhaga rirya erya Nuhu, Waryubha ataabhira abhantu bhanú bhataaringa bharamwigwa, nawe, yaareeta obhusiki bhwa amanji eguru ya ekyaro kirya, abhantu bhakakwa. Nawe, yaamutuurya Nuhu hamwi na abhantu abhandi muhungati. Nuhu ngʼo yaaringa araarikiiri abhantu ega, bhakore ganú gareenderwa embere ya Waryubha.2:5 Maaha mukitabho kya Obhwambiro 7.6Kweki Waryubha akajibhya emigi gya Sodoma na Gomora, akagisikya kwa omururo gikabha eriibhu. Akakora emigi giyo, okubha ekirengekanʼyo kubhantu bhonsego bhanú bhataribhanga bharamwigwa. 7Nawe, Waryubha yaamutuurya Ruutu, omuntu omuheene, unú yeetwa omutima bhukongʼu, kwa eginteemo egimbiibhi egya abhantu abhasarya bharya.2:7 Maaha mukitabho kya Obhwambiro 19:1-29.8Omuntu omuheene uyo, yaaringa amenyeri hamwi na abhantu bhayo, na kwa kira orusiku omutima gwaye omuheene gwaringa gukwiri, hanú yeegwa na okurora eginteemo gyabho egimbiibhi. 9Bhoono, amangʼana gonsego gayo garatoorokya-ki? Garoorokya ega, Omukuru Waryubha amanyiri kya ego aratuurya abhantu bhanú bharamwigwa, okurwa mumasakyo. Kweki amanyiri kya ego aratuura abhasarya munyanko,2:9 Kweki amanyiri kya ego aratuura abhasarya munyanko. Ensonga eindi eratura okubha ega, Kweki amanyiri kya ego aribhajibhya abhakori bha obhusarya orusiku rwa okubhajibhya. okuhikira orusiku rwa okubhabhuturira ekiina, 10ekinene bhanú bharagwata orunamba rwa amangʼana amabhiibhi ga omubhiri na okujeera obhutungi bhwa Waryubha.
Abheehigirya bha obhubheehi bhayo, bharahakaana na bhareerora, bhatakoobhoha okutuka ebhibhumbwa bhya obhukuru bhinú bhiringi murwire. 11Nawe, onyoora bhamaraika bhaana obhutungi na eginguru okukira abheehigirya bha obhubheehi bhayo, kora bheeki bhatakutuka ebhibhumbwa bhya obhukuru bhiyo, na okubhijongera ku Mukuru Waryubha. 12Abhantu bhayo, bharatuka amangʼana ganú bhatamanyiri. Bheeki n-kya egintyenyi ginú gitaana obhungʼeeni, gyeki gireebhurwa, giramara giragwatwa, na okwitwa! Ego niigo Waryubha aribhasikya abheehigirya bha obhubheehi bhayo. 13Bharirihwa eginyanko kwa eginyanko ginú bhaakorera abhantu abhandi. Obhujomerwa bhwabho, n-kukora amangʼana ga orunamba rwabho orubhiibhi rwa omubhiri, kubhurabhu. Kora, bharakora amabhiibhi gayo, hanú bhararya hamwi na bheenyu muginyangi gyenyu ginú murasanga kwa obhuhanje,2:13 Muginyangi gyenyu ginú murasanga kwa obhuhanje. Eginyangi giyo gyaringa m-miryo ginú Abhakiristu bhaakora kya erikanisa kurusumo rwa okubha na obhumwi, na okuhanjana. Eribhaga rya omuryo guyo oranyoora kora bhaarya ebhyakurya bhya Omukuru. na ego bharabhangʼeena. Kwa enjira iyo, bharabhakora mubhe na eginsoni kya ebhikoorikoori kumyenda emirabhu. 14Ameeso gaabho geejwiri obhusuunu, na orunamba rwabho rwa okukora obhusarya, rutaana obhuteero. Bharabharuta abhantu bhanú bhatanagiri kuimani kwa amangʼana na amakorwa, bhagwate amakorwa gaabho amabhiibhi. Emitima gyabho gyanara okubha na orunamba rwa ebhintu. Abhantu bhayo, Waryubha yaabheehiima! 15Bhatigiri enjira inú iimiri, bhaahabhiri na okugwata enjira inú Bharamu, omwana wa Bheori yaagwata. Weeki yaahanja okunyoora obhuniibhi kwa enjira ya okukora obhusarya. 16Nawe, yaakemerwa kwa obhusarya bhwaye omwene. Kora onyoora entikiri etakuhaira, yaahaira kwa eriisi rya omuntu, naho okuribhira okudangana kwa omurooti uyo.2:16 Maaha mukitabho kya Okubhara 22–24, 31:16.
17Abhantu bhayo, n-kya ebhisima bhinú bhyoma, na n-kya amasaaru ganú gareerurwa na ekiibhumbe. Waryubha yaabhaseemerya omweya mukisunte kinú kikurirye naho bhariija okwikara muyo. 18Kwa okugamba amangʼana ga okwirora na ganú gataana obhwera, bharabharuta abhantu bhonse bhagwate orunamba rwabho orubhiibhi rwa omubhiri. Abhantu bhayo bhataana eribhaga eritambi, okurwa kya ego bheeyahura okurwa kubhakori bha amabhiibhi. 19Abheehigirya bha obhubheehi bhayo, bhararaga abhantu bhayo ega, hanú bharaabheekiririrye, bhareeyagaara, enu bheeki abheene m-bagaya bha amabhiibhi, kwa okubha, omuntu arabha omugaya wa ekintu kyokyonse kinú kiramutama okwiribhira. 20Nyoore abhantu bhamariri okwiyahura okurwa kumabhiibhi ga mukyaro, kwa enjira ya okumumanya Omukuru na Omutuurya weetu Yeesu Kiristu, bhamare bheekirirye kweki okugwatwa na okuhigwa na amabhiibhi gayo, eginteemo gyabho girabha egimbiibhi bhukongʼu okukira egya mbere girya. 21Ekaabheeri bhujomu kubheeki, nyoore bhatakaamanyiri kora hake, enjira ya obhuheene iyo, okukira okuimanya, bhamare bhatige amaragiriryo amarabhu ganú bhaahaanwa. 22Okukora ego, kuroorokya engamba ya obhuheene inu ega, “Embwa ehunjukiiri amahongoro gaaye,” eindi ega, “Embiiji inú yoogiibhwe, ehunjukiri okwibhurubhunga mumatoto!”
3Orusiku rwa okuuja Omukuru Yeesu
1Abhahanje bhaani, enyarubha inu ngʼ-ya kabhiri inú ndabhangʼoorera. Muginyarubha ebhiri giyo, ndasakya okwimukya ameetegeerero geenyu amajomu, kwa okubhahiitukya. 2Ndeenda muhiituke amangʼana ganú abharooti bha Waryubha bhaaroota akare hayo, na amaragiriryo ga Omukuru na Omutuurya ganú abhatumwa bheenyu bhaabhareetera.
3Ereenderwa mumanye mbere ega, eginsiku gya obhuteero bhariibhuka abhantu bha okujeera, bhanú bharibhanga bharagwata orunamba rwabho orubhiibhi. 4Bharibhajeera kwa okugamba ega, “Kiristu yaaraga ega, ariija! Bhoono aringi-ha? Amangʼana ngo ganuganu okwambira bhajaaji weetu bhakwe, amangʼana garingi bhuryabhurya kya ego gaaringa okurwa kubhwambiro bhwa ekyaro!” 5Abhantu bhayo, bhariikorya muna bharabhiirwe ega, akare hayo, Waryubha yaagamba eringʼana eryenego, orwire na ekyaro bhikabhumbwa. Yaabhumba ekyaro okurwa mumanji na kwa enjira ya amanji. 6Na kwa amanji gayo, amanji ga obhusiki, ekyaro kya eribhaga rirya, kikasikibhwa. 7Nawe, kwa eringʼana riryarirya, Waryubha yaamura ega, orwire na ekyaro ekya bhoonwego, bhirisambwa na omururo. Bhiriho bhiraangararirwa okuhikira orusiku runú aribhabhuturira ekiina na okubhasikya abhantu bhanú bhatakumwigwa weeki.
8Nawe, abhahanje bhaani, mutarabhirwa eringʼana rinu ega, ku Mukuru Waryubha, orusiku rumwi n-kya emyaka ekiku kimwi, na emyaka ekiku kimwi, n-kya orusiku rumwi.3:8 Maaha mukitabho kya Egijabhuri 90:4.9Abhantu abhandi bharamanya ega, Omukuru Waryubha aratigita okukora ganú yaaraga, nawe, atakutigita okugakora. Weeki areegumirirya kurusumo rwenyu, kwa okubha atakwenda ega, omuntu wowonse abhure, nawe areenda ega, bhonsego bhatige obhusarya bhwabho, bhamwihunjurire weeki. 10Nawe, orusiku rwa Omukuru ruriija kya omwibhi. Orusiku ruyo, orwire rurirwa-ho kwa omukindo omunene, na ebhintu bhyonsego bhinú bhirimo bhirisambwa kwa omururo, ekyaro kyonse kirisikibhwa hamwi na ebhintu bhyonsego bhinú bhirimo.
11Mbe, kwa okubha ego niigo ebhintu bhyonsego bhirisikibhwa, bhoono bheenyu mureenderwa okubha abhantu bha egaki? Mureenderwa okubha na eginteemo gya heene na okumwigwa Waryubha, 12enu muraganyirira orusiku rwa Waryubha ruyo, na okukomererya ega, ruuje bhwangu. Orusiku ruyo, ndo Waryubha arisamba orwire kwa omururo na okurusikya, na ebhintu bhinú bhirimo, bhirirungura chwe! 13Nawe, bheetu turaganyirira orwire oruhya na ekyaro ekihya kinú kiijwiri obhuheene eginsiku gyonsego, kya ego yaaturaga.
14Kwa ego, abhahanje bhaani, eribhaga muraganyirira amangʼana gayo, mukorenga ekituunyo, mutabha na obhusarya kora amasoro hanú muriija embere ya Waryubha, na mubhenga na omurembe hamwi nawe. 15Mumanye ega, Omukuru arabheegumirirya, naho munyoore omweya gwa okutuuribhwa. Ego niigo omuhiiri weetu omuhanje kuimani, Pauro yaabhangʼoorera kwa egintungwa ginú yaahaanwa na Waryubha. 16Muginyarubha gyaye gyonsego, arahairira eguru ya amangʼana gayo. Muginyarubha gyaye giyo, garimo amangʼana agandi amakongʼu okugamanya. Abhantu bhanú bhateehigiribhwa eguru yaago, na bhataranaga kuimani, bharagahabhya kya ego bharahabhya Amangʼoore Amarabhu agandi. Kwa okukora ego, bhareesikya abheene.
Amangʼana ga obhuteero
17Mbe, bheenyu abhahanje bhaani, kwa okubha mumariri okumanya eguru ya abheehigirya bha obhubheehi, bhoono mwiyangararire na abhasarya bhayo, bhatariija okubhahabhya kwa obhubheehi bhwabho naho mutige okunaga kubhuheene. 18Nawe, mugendererye okunaga kwiruguto na okumumanya Omukuru na Omutuurya weetu Yeesu Kiristu. Weeki agungibhwe, bhoonwego na kora koko!