2 Abhakorinto

Enyarubha ya kabhiri eya Pauro ku

Abhakorinto

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Enyarubha inu ngʼ-ya kabhiri ku Pauro okubhangʼoorera Abhakorinto. Pauro ngʼo yaaringa yaambisirye erikanisa rya Korinto. Eramaahikana ega, enyarubha inu yaangʼoorwa kumyaka gya mirongo etaanu na etaanu na mirongo etaanu na esansabha (55-56) okurwa okwibhurwa kwa Yeesu Kiristu. Pauro yaangʼoora enyarubha inu, eribhaga yaaringa mukyaro kya Makedonia.

Pauro aratonda munyarubha munu, kinú kyakora akakubhya orugendo rwaye rwa okugya okutaarira Korinto. Kweki aratonda kinú kyakora akabhangʼoorera Abhakorinto enyarubha endito (2:3-4). Enyarubha iyo kuginsiku ginu etariho. Hamwi na gayo, Pauro aroorokya ega, ajomeerwe okurekana na amangʼana ganú yeegwa okurwa ku Tiito, ega, Abhakiristu bha Korinto eyo, bhaatigiri obhusarya bhwabho, bhaamwihunjuriiri Waryubha.

Ensonga ya Pauro okungʼoora enyarubha inu, yaaringa okubharagirirya abheekirirya bha Korinto, kinú bhareenderwa okukora kuimani yaabho. Arabhakeerya munyarubha munu ega, bheeyangararire eguru ya abheehigirya bha obhubheehi, bhanú bheesoherye mwikanisa kwa ekinyerera, na bhoono bhareehigirya amangʼana ga obhubheehi. Abheehigirya bhayo, bhaaringa bharagamba ega, Pauro ataringi omutumwa wa maheene wa Kiristu. Bheeki mbo bheekoryanga ega, mbo abhatumwa abhakuru abha Yeesu Kiristu. Pauro areemiririra engʼana iyo, ega, weeki ngʼo omutumwa wa maheene, kweki ega, yaana obhutungi okurwa ku Yeesu Kiristu. Arakeerya Abhakorinto ega, eginguru gya Waryubha giramaahikana kuganú abhantu bhararora ega, m-manyooheeru. Kweki arabharagirirya Abhakorinto ega, bhabheere-ko abheekirirya bha Yerusaremu.

Pauro arakeeranʼya Abhakorinto

¹Enyarubha inu, erwiri kuoni Pauro, unú Waryubha yaambirikira kwa obhwendi bhwaye, naho mbe omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu. Oni na omuhiiri weetu kuimani Timoteo, turabhangʼoorera bheenyu bhanú muringi mwikanisa rya Waryubha, erya mumugi gwa Korinto eyo. Turabhangʼoorera bheenyu hamwi na abhantu bhonsego bha Waryubha bhanú bharingi mukyaro kya Akaya.

²Turabheendera eriruguto na omurembe okurwa ku Taata Waryubha, na ku Mukuru Yeesu Kiristu bhibhe hamwi na bheenyu.

Waryubha arahorisya munyanko

³Agungibhwe Waryubha, Taata wa Omukuru weetu Yeesu Kiristu, Taata wa ekyabhira, kweki ngʼo Waryubha unú aratuhorisya kugonsego. ⁴Weeki ngʼo aratuhorisya muginyanko gyetu gyonsego, naho na bheetu bhonse tuture okubhahorisya abhandi bhanú bharingi muginyanko amanga hagari hagari. Turabhahorisya kya ego Waryubha aratuhorisya bheetu. ⁵Kya ego turagendererya okunyoora eginyanko kurusumo rwa Kiristu, egoego Waryubha aragendererya okutuhorisya bhukongʼu, okuhitira ku Kiristu. ⁶Hanú turanyanka, turanyanka kurusumo rwa obhuhorisya bhwenyu na obhutuurya bhwenyu. Kweki, hanú bheetu turahorisibhwa, nho na bheenyu bhonse muranyoora obhuhorisya. Obhuhorisya bhuyo bhurakora bheenyu mwigumirirye eginyanko ginú na bheetu bhonse turanyanka. ⁷Obhwisige bhwetu kubheenyu m-bunene, kwa okubha tumanyiri kya ego muranyanka kya bheetu, niigo murahorisibhwa kya bheetu.

⁸Abhahiiri bheetu kuimani, tureenda mumanye kya ego twanyanka mukyaro kya Asia.1:8 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki. Eginyanko ginú gyatunyoora, gyaturitohera bhukongʼu okukira eginguru gyetu, kora tukeeganirirya ega, tukaakwiri. ⁹M-buheene ega, tweeganirirya muna ega, tubhuturiirwe ekiina kya okwitwa. Riyo ryeebhuka, naho tuteesigira eginguru gyetu abheene, nawe, tumwisigire Waryubha unú arahyukya abhaku. ¹⁰Weeki ngʼo yaatutuurya hanú twaringa mungʼanga enene ya okukwa, kweki arigendererya okututuurya. Bheetu turamwisigira weeki ega, aribhanga arakora ego eribhaga ryonsego. ¹¹Na bheenyu bhonse murabheerana na bheetu okumusabha Waryubha kurusumo rwetu. Hayo nho weeki ariigwa amasabho geenyu na aritunonka bheetu. Kwa ego, abhantu abhaaru bharimukumya Waryubha kurusumo rwetu.

Pauro arakubhya orugendo rwaye orwa okugya Korinto

¹²Mbe, ekisigo kinú kirakora tureegungya niiga, ameetegeerero geetu garatwimiririra ega, eginteemo gyetu ni-njomu mukyaro hanu, ekinene n-kubhugwatani bhwetu na bheenyu. Twikeeri kwa omutima omujomu na obhuheene bhunú bhurarwa ku Waryubha. Tutaakora ego, kwa egintungwa gyetu abheenego, nawe, eriruguto rya Waryubha, ndyo ryakora tukakora gayo. ¹³Tutakubhangʼoorera amangʼana amakongʼu, nawe ganú muratura okusoma na okugamanya bhujomu. Ndeesiga ega, muritumanya bhujomu, ¹⁴onyoora bhoonwego mutumanyiri hakego. Nawe, orusiku runú Omukuru weetu Yeesu arihunjuka, murimanya bhujomu ega, bheetu mbo ekisigo kya okwigungya kwenyu, kya ego bheenyu muringi ekisigo kya okwigungya kwetu.

¹⁵Oni naaringa na obhwisige bhuyo, na kiyo nkyo kyakora neendanga okuhika kubheenyu eyo mbere, naho munyoore obhwera mara kabhiri. ¹⁶Naaringa ndeenda okuhita kubheenyu hayo, eribhaga rya okugya mukyaro kya Makedonia, na kweki kwibhaga rya okuhunjuka okurwa Makedonia, naho munsororerye kurugendo rwani rwa okugya Yudea. ¹⁷Bhoono, hanú naakubhya orugendo rwani rwa okuhunjuka kubheenyu eyo, mweeganirirya ega, ntaaringa niimiri? Kasi gayo ndaamura mureeganirirya ega, ndagaamura kwa ameetegeerero gaani omwene, ega ngambe, “Yee,” mmare kweki ngambe, “Tiigo-ha”?

¹⁸Nawe bhoono, kya ego Waryubha aringi omuheene, amangʼana ganú twabhakeerya bheenyu, gataaringa ga omuntu, ega, agambe, “Yee,” amare kweki agambe, “Tiigo-ha.” ¹⁹Ndagamba ego, kwa okubha Yeesu Kiristu, Omwana wa Waryubha,1:19a Omwana wa Waryubha. Maaha eringʼana rinu mu Moonjooro eguru ya Amangʼana Amakongʼu. unú oni, Siriwano1:19b Siriwano. Mukitabho kya Amakorwa ga Abhatumwaarabhirikirwa Siira. na Timoteo twabharaarikira bheenyu, ataaringa omuntu wa okusanganʼya amangʼana agambe ega, “Yee,” na amare agambe ega, “Tiigo-ha.” Nawe, kuweeki amangʼana gonsego n-ga maheene, “Yee.” ²⁰Niigo eringi, kwa okubha gonsego ganú Waryubha yaaturaga ega, arituhaana kwa enjira ya Kiristu, n-ga maheene. Kiyo nkyo kirakora turagamba ku Kiristu ega, “Amina,” kurusumo rwa okumugungya Waryubha. ²¹Mbe, Waryubha ngʼo aratukora bheetu hamwi na bheenyu, turanaga kukugwatana kwetu na Kiristu. Atusoreri ²²na okututema orubhaaso rwaye, kwa okutuhaana Omutima Omurabhu1:22a Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. mumitima gyetu, naho abhe obhutungurya kugonsego ganú Waryubha arituhaana.1:22b Maaha mubhitabho bhya 2 Abhakorinto 5:5; Abhaefeso 1:14.

²³Ntaahunjuka Korinto eyo, kwa okubha nteenda munyahaarike mumitima gyenyu. Ganú ndagamba n-ga maheene, kora Waryubha wonse amanyiri ego! ²⁴Etaringi ega, turatunga eimani yeenyu, nawe, bheetu m-bakori bha emirimu hamwi na bheenyu, kurusumo rwa obhujomerwa bhwenyu, kwa okubha eimani yeenyu enagiri.

¹Kwa ego naamura ega, m-bujomu ntaaja kubheenyu, naho ntakora musurumbare kweki. ²Naamura ego, kwa okubha nyoore oni nkaabhakoreri bheenyu musurumbare, atariho unú arinkora oni njomerwe, nawe m-beenyu bhanú oni naabhakora musurumbare! ³Kiyo nkyo kyakora nkabhangʼoorera munyarubha irya ega, ntariija kubheenyu, naho ntariija okusurumbaribhwa na abhantu bhanú bheenderwanga okunkora njomerwe. Niina obhuheene ega, hanú oni ndaabhe na obhujomerwa, na bheenyu bhonsego murabha na obhujomerwa. ⁴Naabhangʼoorera enyarubha irya nsurumbeeri bhukongʼu, kwa enyanko enduru na kwa ameesori amaaru. Ensonga yaani etaaringa okubhasurumbarya, nawe, naaringa ndeenda mumanye kya ego mbahanjiri bhukongʼu.

Okwabhirwa kwa omusarya

⁵Bhoono, omuntu unú akoreri omurikyaye asurumbeeri, atansurumbeerye oni omwenego, abhasurumbeerye na bheenyu bhonsego. Nawe bhoono, ntakwenda nkore eringʼana riyo ribhe erikongʼu bhukongʼu. ⁶Obhujibhu bhunú omuntu uyo yaajibhibhwa okurwa kubhantu abhaaru gati yeenyu, bhumwisiri. ⁷Mbe bhoono, mureenderwa okumwabhira na okumuhorisya omuntu uyo, naho atariija okusurumbara bhukongʼu, okuhikira okukwa omutima. ⁸Kwa ego, ndabhakomererya ega, mumoorokye ega, mumuhanjiri. ⁹Ensonga yaani eindi inú yaakora nkabhangʼoorera enyarubha irya, yaaringa nu-kubheekomya, nyoore mukaabheeri abheegwa kumangʼana gonsego. ¹⁰Omuntu wowonse unú muraabhire, oni nonse ndamwabhira. Na nyoore ririho eringʼana rinú ndeenderwa okwabhira, ndaryabhira embere ya Kiristu kurusumo rwenyu, ¹¹naho Erisambwa2:11 Erisambwa. Maaha eringʼana rinu mu Moonjooro eguru ya Amangʼana Amakongʼu. ritariija okutuhiga, kwa okubha tumanyiri obhungʼeenererya bhwaryo.

Pauro mumugi gwa Turoa

¹²Mbe, hanú naahika mumugi gwa Turoa, okuraarika Amangʼana Amajomu eguru ya Kiristu, nkanyoora Omukuru amariri okunsiikurira ekiseku kya okukora emirimu gyaye muyo. ¹³Nawe, nteeyigwa bhwaheene mumutima gwani, kwa okubha ntaamunyoora eyo Tiito, omuhiiri waani kuimani. Kwa ego, nkaraga abhantu nkagya Makedonia.

Okuraarika obhuhigi bhwa Kiristu

¹⁴Nawe, turamukumya Waryubha, kwa okubha aratoorokererya eribhaga ryonsego okukiririrya obhuhigi bhwa Kiristu, eguru ya abhasigu bhaaye. Kweki aratukora bheetu okunyaraganʼya obhumanyi bhwa amangʼana eguru ya Kiristu, kira ahasi, kya ego obhurangasiru obhujomu bhuranyaragana kira ahasi. ¹⁵Niigo eringi, kwa okubha bheetu n-kya obhurange obhujomu bhunú Kiristu aramuruusirya Waryubha. Obhurange bhuyo, bhurahikiira abhantu bhonsego, bhanú bharatuuribhwa na bhanú bharabhura. ¹⁶Kubhanú bharabhura, obhurange bhuyo, m-bubhiibhi bhurareeta oruku, nawe, kubhanú bharatuuribhwa, obhurange bhuyo, m-bujomu bhurareeta obhuhoru. Bhoono, niwi aratura okukora emirimu giyo? ¹⁷Bheetu tutaringi kya abhantu abhandi abhaaru, bhanú bharakora eringʼana rya Waryubha, kya ekintu kya okugurya, naho bhanyoore obhwera. Nawe, bheetu kwa eginguru gya Kiristu, turaraarika eringʼana rya Waryubha kwa obhuheene bhonsego embere ya Waryubha, kwa okubha weeki ngʼo yaatutuma.

Abhakori bha emirimu bha eriragano erihya

¹Bhoono, mureeganirirya ega, turaamba kweki okwikomba kubheenyu? Bheetu tutaringi kya abhantu abhandi bhanú bharabhareetera eginyarubha gya okwitonda kubheenyu, kasi okusabha eginyarubha kubheenyu egya okwitonda kubhantu abhandi. ²Bheenyu mbo enyarubha yeetu, inú engʼoorerwe mumitima gyetu, na abhantu bhonsego bharatura okuisoma na okuimanya. ³Muroorokya kubhurabhu ega, bheenyu mbo enyarubha ya Kiristu, inú eroorokya emirimu ginú twakora kubheenyu. Enyarubha iyo, etaangʼoorwa kwa obhwino, nawe, yaangʼoorwa na Omutima wa Waryubha3:3a Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. omuhoru. Kweki etaangʼoorwa kubhibhaara bhya amagina, nawe, yaangʼoorwa mumitima gya abhantu.3:3b Maaha mubhitabho bhya Okuhuruka 24:12, 31:18; Jeremia 31:33.

⁴Turagamba gayo, kwa okubha riyo ndyo obhwisige bhwetu ku Waryubha, okuhitira ku Kiristu. ⁵Etaringi ega, turamanya ega, ekintu kyokyonse kinú turakora, turatura okukikora kwa eginguru gyetu bheetu abheene, nawe, obhuturo bhwetu bhurarwa ku Waryubha. ⁶Weeki ngʼo yaatuhaana obhuturo bhwa okubha abhakori bha emirimu bha eriragano3:6a Eriragano. Maaha eringʼana rinu mu Moonjooro eguru ya Amangʼana Amakongʼu. erihya,3:6b Maaha mukitabho kya Jeremia 31:31-34. rinú rirarwa ku Mutima Omurabhu. Eriragano riyo, ritaringi amaragiriryo ganú gaangʼoorwa, kwa okubha amaragiriryo ganú gaangʼoorwa garareeta oruku, nawe, Omutima Omurabhu arareeta obhuhoru.

Obhukuru bhwa eriragano erihya

⁷Amaragiriryo ganú gaangʼoorwa kumagina, ganú garareeta oruku, gaaja kwa obhukuru bhunú bhurangʼesangʼesa, okuhikira Abhaisiraeri bhakatamwa okumumaaha Musa3:7a Musa. Maaha eringʼana rinu mu Moonjooro eguru ya Amangʼana Amakongʼu. mubhusu, onyoora obhukuru bhuyo, bhwangʼesangʼesa kwa eribhaga ekego.3:7b Maaha mukitabho kya Okuhuruka 34:29-30. Nyoore emirimu gya amaragiriryo gayo, gyaaja kwa obhukuru kya bhuyo, ⁸bhoono, emirimu gya Omutima Omurabhu, gitaribha na obhukuru obhwaru bhukongʼu? ⁹Nyoore emirimu ginú girakora abhantu okubhuturirwa ekiina, giina obhukuru, maheene emirimu ginú girakora abhantu okubha abhaheene embere ya Waryubha, giribha na obhukuru obhwaru bhukongʼu. ¹⁰Bhoono, obhukuru bhwa eriragano rya akare rirya, bhutaaringa kya obhukuru bhunu bhwa eriragano erihya, kwa okubha obhukuru bhwa eriragano erihya, m-bunene bhukongʼu. ¹¹Nyoore ekintu kya eribhaga ekego, kyaringa na obhukuru, ekya eribhaga ryonsego kiina obhukuru obhwaru bhukongʼu.

¹²Mbe, kwa okubha tuuna obhwisige bhuyo, turagamba kwa obhuhaari. ¹³Bheetu tutaringi kya Musa, unú yeeribha obhusu kwa ekitambaara, naho Abhaisiraeri bhatarora obhuteero bhwa obhungʼesingʼesi bhunú bhwaringa bhurakwirirana.3:13 Maaha mukitabho kya Okuhuruka 34:33-35. ¹⁴Nawe, obhungʼeeni bhwabho bhwaringa bhuribhirwe. Nawanyareero, hanú eriragano rya akare rirasomwa, bharatamwa okumanya obhuheene, bharabha muna bharibhirwe ekitambaara kirya. Ekitambaara kirya kitararuusibhwa-ho, kiraruusibhwa-ho kwa enjira ya okumwikirirya Kiristu okwenego. ¹⁵M-maheene, nawanyareero, hanú bharasoma ebhitabho bhya amaragiriryo ga Musa,3:15 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. emitima gyabho giraribhwa na ekitambaara kirya, bharatamwa okumanya obhuheene. ¹⁶Nawe, omuntu wowonse unú aramwihunjurira Omukuru, Omukuru aramuruusya ekitambaara kiyo. ¹⁷Mbe, Omukuru ngʼo Omutima, hanú Omutima wa Omukuru aringi, hayo nho haana obhwiyagaari. ¹⁸Bhoono, bheetu bhonsego bhanú tutakwiribha obhusu na ekitambaara, turoorokya obhukuru bhwa Omukuru, kya ego ekirore kiroorokya ekisusa. Na bheetu turahunjurwa, naho tutuubhane nawe, kwa obhukuru obhwaru bhukongʼu. Obhukuru bhuyo bhurarwa ku Mukuru, unú weeki ngʼo Omutima.

Eginguru gya Waryubha kubhintu bhya obhutoto

¹Mbe, kwa okubha Waryubha atuheeri emirimu ginu kwa ekyabhira kyaye, tutakukwa omutima. ²Bheetu twangiri, tutakukora amangʼana ga ekinyerera na aga eginsoni. Tutakungʼeena abhantu, kora okusanganʼya eringʼana rya Waryubha na obhubheehi. Nawe, tureekomba kwa okugamba obhuheene kubhurabhu, naho abhantu bhonsego bhamanye mumeetegeerero gaabho ega, turingi abhaheene embere ya Waryubha. ³Nawe, nyoore Amangʼana Amajomu ganú turaraarika, garibhiirwe gatamanyikana, garabha garibhiirwe kubhanú bharabhura. ⁴Abhantu bhayo bhatakumwikirirya Yeesu, kwa okubha Erisambwa, rinú riratunga ekyaro kinu, rikundikiirye obhungʼeeni bhwabho. Kiyo nkyo kirakora bhatamwe okurora endingaasi ya Amangʼana Amajomu ga obhukuru bhwa Kiristu. Kiristu ngʼo ekirengekanʼyo kya Waryubha. ⁵Bheetu tutakuraarika amangʼana eguru yeetu abheene, nawe, turaraarika ega, Kiristu Yeesu ngʼo Omukuru, na kweki turaraarika ega, bheetu turingi abhagaya bheenyu kwa enjira ya okumukorera emirimu Yeesu. ⁶Waryubha yaagamba ega, “Obhurabhu bhumirike mukisunte.”4:6 Maaha mukitabho kya Obhwambiro 1:3. Na weeki ngʼo yaamirika emitima gyetu, na okutukora tumanye obhukuru bhwaye, bhunú bhurangʼesangʼesa mubhusu bhwa Yeesu Kiristu.

⁷Mbe, tuheerwe ekibhumbiko kiyo, bheetu bhanú turingi kya eginsengo gya obhutoto. Nawe, emanyikane ega, eginguru eginjaru gya okuruguurya, egya okukora emirimu giyo, gitaringi gyetu, girarwa ku Waryubha. ⁸Turanyoora eginyanko amanga amaaru, nawe, tutakuhigwa. Kora hanú oranyoora tutamanyiri kinú turaakore, nawe, tutakukwa omutima. ⁹Abhantu bharatunyankya, nawe, Waryubha atakututiga bheetu abheene. Na onyoora bharatugwisya hansi, nawe, tutakusikibhwa. ¹⁰Eginsiku gyonsego emibhiri gyetu giringi mungʼanga ya okukwa, kya Yeesu, naho obhuhoru bhwa Yeesu, bhumaahikane kumibhiri gyetu. ¹¹Kwa ego, bheetu bhanú turingi abhahoru, turagenda na oruku eribhaga ryonsego, kurusumo rwa Yeesu, naho obhuhoru bhwaye, bhumaahikane kumibhiri gyetu ginú girakwa. ¹²Mbe, bheetu turingi mungʼanga ya okukwa okurekana na emirimu gyetu, nawe, emirimu gyetu ngyo girakora bheenyu muranyoora obhuhoru.

¹³Amangʼoore Amarabhu garagamba ega, “Naamwikirirya Waryubha, nkyo kyakora nkagamba.”4:13 Maaha mukitabho kya Egijabhuri 116:10. Na bheetu tuuna eimani ya ekabhira iyo, nkyo kirakora turagamba. ¹⁴Tumanyiri ega, Waryubha unú yaamuhyukya Omukuru Yeesu, arituhyukya na bheetu, na aritutuura embere yaaye hamwi na bheenyu. ¹⁵Amangʼana gonsego ganú garatunyoora, garatunyoora kurusumo rwenyu, naho eriruguto rya Waryubha rihikiire abhantu abhaaru bhukongʼu, bhamukumye bhukongʼu Waryubha. Okurekana na riyo, Waryubha arigendererya okugungibhwa.

Obhukuru bhwa koko

¹⁶Ego, tutakukwa omutima, onyoora emibhiri gyetu kwa kibhara giragunda, nawe, munsi weetu, Waryubha aratukora abhahya eginsiku gyonsego. ¹⁷Ndagamba ego, kwa okubha eginyanko gyetu ni-nhuhu na n-gya eribhaga ekego. Kweki, giratuseemerya obhukuru bhwa koko. Obhukuru bhuyo, m-bunene bhukongʼu, bhuratukora okurora ega, eginyanko giyo, ni-nkego. ¹⁸Tutakwiganirirya eguru ya ebhintu bhinú bhiramaahikana, kwa okubha bhyeki m-bya eribhaga ekego. Nawe, tureeganirirya eguru ya ebhintu bhinú bhitakumaahikana, kwa okubha bhyeki, m-bya koko.

¹Emibhiri gyetu n-kya amabhuru mukyaro munu. Nawe, tumanyiri ega, hanú garihaanyuka, Waryubha arituhaana eginyumba murwire, gya koko, ginú gitakuhagaajwa kwa amabhoko ga abhantu. ²Kumibhiri gyetu gya bhoonwego turanyahaarika enu tureegomba bhukongʼu okuhaanwa eginyumba eginhya, na okwibhohibhwa emibhiri gyetu emihya ginú giringi murwire. ³Hanú turiibhohibhwa emibhiri emihya, tutaribha kinaabhi. ⁴Kwa ego niiga, eribhaga rinú tukyari na amabhuru geetu, turanyahaarika mumitima gyetu, kwa okubha amangʼana amaaru garaturitohera. Etaringi ega, bhoono tureenda okuruusibhwa emibhiri ginú girakwa, nawe, kinú tureenda n-kwibhohibhwa emibhiri ginú gitakukwa, naho emibhiri ginú girakwa gimirwe na ginú gitakukwa. ⁵Waryubha ngʼo yaatuseemya kurusumo rwa amangʼana gayo, na atuheeri Omutima waaye, naho abhe obhutungurya bhwa amangʼana gayo.

⁶Kwa ego, eribhaga ryonsego tuuna obhwisige, onyoora tumanyiri ega, hanú tuuna emibhiri ginu, turingi ahare na Omukuru. ⁷Tureekara okurekana na eimani, etaringi kwa enjira ya bhinú bhiramaahikana. ⁸Maheene tuuna obhwisige, kweki turamaaha nyakara tukaagitigiri emibhiri ginu, na okugya okwikara na Omukuru. ⁹Mbe, tubhe mumibhiri munu, kasi tutige okubha-mo, ensonga yeetu nu-kumukora ajomerwe. ¹⁰Niigo, kwa okubha bheetu bhonsego turiimirira embere ya ekitumbi kya Kiristu, ekya okubhuturira ekiina, naho kira oumwi ahaanwe amariho okuringʼaana na ganú yaakora kwa omubhiri gunu, gabhe amajomu kasi gabhe amabhiibhi.

Emirimu gya okwigwanʼya

¹¹Mbe, tumanyiri ega, tureenderwa okumusuuka Omukuru. Kwa ego, turakora ekituunyo okuruta abhantu abhandi, naho bhamwikirirye. Waryubha atumanyiri bhujomu kya ego turingi, na oni ndeesiga ega, na bheenyu mutumanyiri bhujomu mumeetegeerero geenyu. ¹²Tutakwenda okwikomba kweki kubheenyu, nawe, tureenda okubhahaana omweya gwa okwigungya kurusumo rwetu. Okurekana na riyo, muribha na amangʼana ga okubhakyukya bhanú bhareegungya embere ya abhantu kwa amangʼana ga kibhara, kora bhatakwigungya kwa amangʼana ga mumitima gyabho. ¹³Nyoore turamaahikana ega, twadangana, turingi ego, kurusumo rwa Waryubha, nawe, nyoore turamaahikana ega, tuuna obhungʼeeni, riyo n-kurusumo rwa obhwera bhwenyu. ¹⁴Obhuhanje bhwa Kiristu bhuratoorokererya bheetu, kwa okubha tumanyiri ega, oumwi yaakwa kurusumo rwa abhantu bhonsego, ensonga yaaye niiga, abhantu bhonsego bhaakwa. ¹⁵Wonse yaakwa kurusumo rwa bhonsego, naho bhanú bharingi abhahoru bhatabha abhahoru kweki kurusumo rwa omweya gwabho abheene, nawe, kurusumo rwa unú yaakwa na okuhyuka kurusumo rwabho.

¹⁶Kwa ego, okwambira bhoono, tutakumumaaha omuntu wowonse kya ego abhantu bhanú bhatakumwikirirya Kiristu, bharamumaaha. Onyoora eribhaga nyabhurebhe twamumaaha Kiristu kya ego abhantu bhanú bhatakumwikirirya bharamumaaha. Nawe, bhoono tutakukora ego kweki. ¹⁷Omuntu wowonse unú araagwatane na Kiristu, arabha omuntu omuhya,5:17 Maaha mukitabho kya Abhagaratia 6:15. aga akare gahitiri, bhoono gabheeri amahya! ¹⁸Nawe, gayo gonsego gararwa ku Waryubha unú yaamutuma Kiristu atwigwanʼye bheetu na weeki.5:18 Maaha mukitabho kya Abharuumi 5:10. Na bheetu atuheeri emirimu gya okubhoorokya abhantu enjira ya okwigwanibhwa na Waryubha. ¹⁹Nko okugamba ega, okuhitira ku Kiristu, Waryubha yaaringa areegwanʼya abhantu mukyaro kyonsego na weeki, bira okubhabharira obhusarya bhwabho. Na bheetu atuheeri emirimu gya okubharaarikira abhantu amangʼana ga okwigwanibhwa na Waryubha.

²⁰Mbe, Kiristu atutumiri okukora emirimu gyaye, na okuhitira kubheetu, Waryubha arabhakomererya ega, mwigwanibhwe na weeki. Nkyo kirakora turasabha ku Kiristu ega, mwigwanibhwe na Waryubha. ²¹Kiristu ataaringa na obhusarya, nawe, Waryubha yaamubharira obhusarya bhwetu bhonsego, naho bheetu tubharwe okubha abhaheene embere ya Waryubha okuhitira kuweeki.

¹Bhoono, kwa okubha turakora emirimu hamwi na Waryubha, turabhakomererya ega, eriruguto rya Waryubha rinú munyooreri, mutaritiga ribhure bhusa. ²Ndabhakeerya ego, kwa okubha Waryubha aragamba mu Mangʼoore Amarabhu ega,

“Eribhaga rinú ryeenderwanga, naakwigwa,

orusiku rwa obhutuurya, naakubheera.”6:2 Maaha mukitabho kya Isaaya 49:8.

Itegeerera, eribhaga rinú rireenderwa n-dinu, orusiku rwa obhutuurya n-dunu!

Okwigumirirya kumirimu gya Waryubha

³Tutakumukorera omuntu wowonse, eringʼana ryoryonse rinú riraakore abhihirwe, naho obhukori bhwa emirimu bhwetu bhutagambwa bhubhiibhi. ⁴Nawe, turoorokya kumangʼana gonsego ega, turingi abhakori bha emirimu bha Waryubha, kwa okubha tureegumirirya bhukongʼu eginyanko, egitaabhu na egintambara. ⁵Eribhaga erindi turatemwa, turabhohwa mwigereja, turajiiririrwa na emiganda gya abhantu, turakora emirimu emikongʼu, turabhurwa omweya gwa okuraara na turabhurwa ebhyakurya. ⁶Kweki turoorokya ega, bheetu m-bakori bha emirimu bha Waryubha kwa omutima omujomu, kwa obhumanyi, kwa obhwigumirirya, kwa obhuserenʼya, kwa enjira ya okoorokereribhwa na Omutima Omurabhu, kwa obhuhanje bhunú bhutaana orwambe, ⁷kweki kwa enjira ya okuraarika amangʼana ga obhuheene. Turakora gayo gonsego, kwa eginguru gya Waryubha. Obhuheene mbo ekirwaniro kyetu, orubhaara rwa obhuryo na orwa obhumosi.6:7 Orubhaara rwa obhuryo na orwa obhumosi. Amangʼana ganu, ensonga yaago niiga, okubhoko kwa obhuryo nko kuragwata ekirwaniro, okwa obhumosi kuragwata engubha.⁸Bheetu twiruusirye, abhantu bhatusuuke kasi bhatujeere, bhatugungye kasi bhatugambe bhubhiibhi. Turamaahikana ega, turingi abhabheehi, nawe, turagamba aga maheene. ⁹Turamaahikana ega, tutamanyikeeni, bhoono mbe, tumanyikeeni bhujomu. Turamaahikana ega, turakwa, bhoono mbe, turingi abhahoru. Tutemerwe bhukongʼu, nawe, tutareetwa. ¹⁰Kweki turamaahikana ega, tusurumbeeri, nawe, eribhaga ryonsego tuuna obhujomerwa. Turamaahikana ega, turingi abhatobhu, nawe, abhaaru tubhaniibhirye. Turamaahikana ega, tutaana ekintu kyokyonse, nawe, tuuna ebhintu bhyonsego.

¹¹Bheenyu Abhakorinto, twahaiiri na bheenyu kubhurabhu, kweki kwa obhuhanje obhwaru. ¹²Bheetu tutaratiga okubhahanja bheenyu, nawe, bheenyu mbo mwatigiri okutuhanja bheetu. ¹³Bhoono, ndagamba na bheenyu muna ega, ndagamba na abhaana ega, mubhe na obhuhanje obhwaru kubheetu, kya bhunú bheetu tuunabho kubheenyu.

Obhugwatani na abhantu bhanú bhataringi abheekirirya

¹⁴Mutagwatana na abhantu bhanú bhataringi abheekirirya. Bhoono, obhuheene na obhusarya bhiratura okubha hamwi kwa egaki? Kasi obhurabhu na ekisunte bhiratura okubha hamwi? ¹⁵Kweki m-bwigwirani-ki bhuriho gati ya Kiristu na Erisambwa?6:15 Erisambwa. Ekiyunani kiragamba ega, Bheriari. Ni-riina erindi rya Erisambwa. Kasi m-bugwatani-ki bhuriho gati ya omwikirirya na unú ataringi omwikirirya? ¹⁶M-meekiriranʼyo-ki gariho gati ya erisyengerero rya Waryubha na ebhisusano? Bheetu ni-risyengerero rya Waryubha omuhoru!6:16a Maaha mubhitabho bhya 1 Abhakorinto 3:16; Abhaefeso 2:20-21. N-kya ego Waryubha omwene yaagamba ega,

“Ndiikara gati yaabho na okugenda hamwi nabho.

Ndibha Waryubha waabho, bhonse bharibha abhantu bhaani.”6:16b Maaha mubhitabho bhya Abharaawi 26:12; Jeremia 32:38; Ejekieri 37:27.

¹⁷Kwa ego, Omukuru yaagamba kweki ega,

“Murwe gatigati waabho, mwiyahure nabho.

Mutakuunʼya ekintu ekikonu,

na oni, nho, ndibhaturuungʼana.6:17 Maaha mukitabho kya Isaaya 52:11.

¹⁸Ndibha Eseweenyu,

na bheenyu muribha abhaana bhaani bha ekimura na abha ekihara.

Omukuru Waryubha wa obhuturo bhonsego, aragamba!”6:18 Maaha mubhitabho bhya 2 Samweri 7:14; 1 Amangʼana ga Eribhaga 17:13.

¹Bhoono, abhahanje bhaani, kwa okubha Waryubha yaaraga gayo gonsego, kwa ego mbe twiraame, tutigane na obhukonu bhonsego, bhwa emibhiri na emitima gyetu. Tubhe abha emitima emirabhu kumangʼana gonsego, kwa enjira ya okumusuuka Waryubha.

Obhujomerwa bhwa Pauro

²Mutuhaane omweya mumitima gyenyu, kwa okubha tutaamusarirya omuntu wowonse urya. Tutaamunyahaara omuntu wowonse, kora tutaamuhabhya omuntu wowonse. ³Ntakugamba amangʼana gayo, okubhabhuturira ekiina ega, muringi abhabhiibhi, kwa okubha mmariri okugamba ega, bheenyu muringi mumitima gyetu, kora ekaabha kwa okukwa hamwi kasi okubha abhahoru hamwi. ⁴Ndahaira na bheenyu kwa obhuhaari bhukongʼu, kweki ndeegungya bhukongʼu kurusumo rwenyu. Munhorisirye bhukongʼu na mukoreri mbeeri na obhujomerwa bhukongʼu, onyoora turanyanka bhukongʼu.

⁵Kora hanú twahika mukyaro kya Makedonia, tutaanyoora omweya gwa okumuunya, kwa okubha twanyoora eginyanko mbaara gyonsego. Abhantu bhaatuhakaanʼya na mumitima gyetu haaringa na enkubhi. ⁶Nawe, Waryubha unú arahorisya bhanú bharasurumbara, yaatuhorisya kwa okuuja kwa Tiito. ⁷Tutaahorisibhwa kwa okuuja kwa Tiito okwenego, nawe, na kya ego bheenyu mwamuhorisya weeki. Yaatukeerya kya ego mureegomba okundora oni, na kya ego murasurumbara na okunnyankira. Gayo gankoreri njomerwe bhukongʼu.

⁸Onyoora enyarubha irya naabhangʼoorera, yaabhakora musurumbare, ntakwirora ega, naakora obhubhiibhi. Onyoora orwa mbere neerora ega, nkoreri obhubhiibhi, kwa okubha enyarubha irya yaabhakora musurumbare kwa eribhaga ekego. ⁹Nawe, bhoono ndajomerwa, etaringi ega, kwa okubha bheenyu mwasurumbara, nawe, kwa okubha okusurumbara kwenyu, kwabhakora mumwihunjurire Waryubha. Mwasurumbara okurekana na kya ego Waryubha omwene yeendanga, kwa ego tutaabhanyahaara kwa enjira yoyonse. ¹⁰Obhusurumbaru bhunú bhurarekana na kya ego Waryubha areenda, bhurareeta obhwihunjuri mumutima. Obhwihunjuri bhuyo, mbo bhurareeta obhutuurya. Kweki omuntu akeehunjura ego, ararora ega, akoreri bhujomu. Nawe, obhusurumbaru bhunú bhurareetwa na amangʼana ga ekyaro, bhurareeta oruku. ¹¹Maaha! Obhusurumbaru bhunú bhurarekana na kya ego Waryubha areenda, bhubhareeteeri obhwera obhunene. Obhusurumbaru bhuyo, bhubhakoreri okubha na enamba enene ya okukora ganú gareenderwa, bhubhakoreri okwibhagirira ega, ganú murakora n-ga maheene. Kweki bhubhakoreri okubhihirirwa obhusarya, okumusuuka Waryubha, okubha na enamba ya okummaaha, na okumaaha ega, unú asarirye, anyooreri amariho gaaye. Kugayo gonsego, muroorokya ega, mutaana amasoro kumangʼana ganu.

¹²Ego, onyoora naabhangʼoorera enyarubha irya, ntaangʼoora kurusumo rwa omuntu unú akoreeri oundi amabhiibhi, kasi kurusumo rwa unú akoreerwe amabhiibhi. Nawe, naaringa ndeenda mbatubhurire murore bheenyu abheene embere ya Waryubha, kya ego mureeruusya kurusumo rwetu. ¹³Kuriyo, mutuhorisirye. Hamwi na riyo, twajomerwa bhukongʼu hanú twamurora Tiito kya ego yaaringa na obhujomerwa, kwa okubha bheenyu bhonsego mwamusambaarukya omutima gwaye. ¹⁴Oni naabhagungya bhukongʼu embere yaaye, na bheenyu mutaankora ndore eginsoni. Gonsego ganú twaringa turabhakeerya, gaaringa ga maheene. Na ganú twabhagungya bheenyu embere ya Tiito, gonse gaamaahikana ega, gaaringa ga maheene. ¹⁵Obhuhanje bhwa Tiito kubheenyu bhuragendererya okwaruha, hanú arahiituka obhwigwa bhwenyu bhonsego, na kya ego mwamuturuungʼana kwa obhusuuku na okurigita. ¹⁶Ndajomerwa bhukongʼu kurusumo rwenyu, kwa okubha bhoono ndatura okubheesigira kimwi.

Omutima gwa okubheera abhandi

¹Bhoono, abhahiiri bheetu kuimani, tureenda tubhakeerye kya ego eriruguto rya Waryubha ryakora emirimu kubhantu bha amakanisa ga mukyaro kya Makedonia.8:1 Amakanisa ga mukyaro kya Makedonia. Hanu Pauro arahairira amakanisa ganú yaambisya mumigi gya Tesaronike, Firipi na Bheroya.²Abhantu bhayo m-batobhu bhukongʼu, kweki bhaanyoora amasakyo amaaru, na eginyanko, nawe, bhaaringa na obhujomerwa obhwaru, bhunú bhwabhakora bhakabha abhaserenʼya bhukongʼu bha okuruusya ebhintu bhyabho. ³Ndabheemiririra ega, bhaaruusya ebhintu ebhyaru, kora okukira obhuturo bhwabho. Na bhaaruusya kwa obhwendi bhwabho abheene. ⁴Bhaatukomereryanga ega, bhonse bhanyoore omweya gwa okugwatana kumirimu giyo gya okubheera abheekirirya bha Yerusaremu.8:4 Yerusaremu. Maaha eringʼana rinu mu Moonjooro eguru ya Amangʼana Amakongʼu.⁵Bhaakora ego, okukira kya ego twaringa turakanya ega, bharikora. Bheeruusya ku Mukuru mbere, bhakamara bhakeeruusya na kubheetu bhonse, okurekana na obhwendi bhwa Waryubha. ⁶Kwa ego, tukamukomererya Tiito ega, yaaje abhabheere bheenyu okumara emirimu gya eriruguto giyo, kwa okubha ngʼo yaagyambisya kubheenyu. ⁷Mbe, muringi na obhwaru bhwa ebhintu bhyonsego. Muuna eimani, obhuturo bhwa okugamba bhujomu, obhumanyi, ekituunyo kya amajomu gonsego na obhuhanje bhwenyu kubheetu.8:7 Obhuhanje bhwenyu kubheetu. Amangʼoore agandi ga akare aga Ekiyunani garagamba ega, obhuhanje bhwenyu bhunú bhurwiri kubheetu. Egoego mubhe na obhwaru bhwa ekibharo kya okuruusya.

⁸Ntakugamba gayo, naho mbabhandirirye, nawe, ndeenda okurora nyoore obhuhanje bhwenyu m-bwa maheene, kwa okubhoorokya kya ego abhantu abhandi bhaaruusya kwa ekituunyo. ⁹Bheenyu mumanyiri eriruguto rya Omukuru weetu Yeesu Kiristu ega, yeekora omutobhu kurusumo rwenyu, onyoora yaaringa omuniibhi, naho okuhitira kubhutobhu bhwaye, bheenyu mubhe abhaniibhi. ¹⁰Bhoono, eguru ya omusororyo guyo ndabhatongera rinú rireenderwa kubheenyu. Omwaka gunú gwahweri8:10 Maaha mukitabho kya 1 Abhakorinto 16:1-4. mwabha abha mbere okoorokya enamba ya okusororya, na abha mbere okusororya. ¹¹Bhoono, mukunaanʼye ganú mwambisya kya ego mwaringa mwigomberi, mukore ekituunyo kya okuruusya ebhintu okuringʼaana na obhuturo bhwenyu. ¹²Nyoore omuntu yaana omutima gwa okuruusya, Waryubha areekirirya kyokyonse kinú araruusya okuringʼaana na kinú yaanakyo. Waryubha atakutonga omuntu kinú ataanakyo. ¹³Ntakugamba ego, naho abhandi bhanyoore obhujomerwa, bheenyu munyoore enyanko, tiigo-ha! ¹⁴Kinú ndeenda niiga, bhonsego muringʼaane. Eribhaga rinu bheenyu muuna ebhintu ebhyaru, kwa ego mubhabheere-ko bhanú bhataanabhyo, naho bhonse hanú orinyoora bhanyooreri ebhintu ebhyaru, bhariija okubhahaana-ko na bheenyu bhonse hanú orinyoora musuuhiirwe. Kwa okukora ego, murabha muringʼeeni, ¹⁵kya ego yaangʼoorwa mu Mangʼoore Amarabhu ega, “Unú yaakumanʼya ebhyaru, ataabha na ebhya okutama, na unú yaakumanʼya ebhike, ataasuuhirwa.”8:15 Maaha mukitabho kya Okuhuruka 16:18.

Tiito na abharikyaye bharatumwa Korinto

¹⁶Ndamukumya Waryubha unú amuheeri Tiito omutima gunú oni niinago ogwa okubhabheera bheenyu. ¹⁷Ndagamba ego, kwa okubha hanú twamusabha yaaje kubheenyu eyo, akeekirirya. Kweki omwene areegomba bhukongʼu, okuuja eyo okubhabheera. ¹⁸Hamwi na weeki turamutuma na omuhiiri weetu oundi kuimani, unú eginkuma gyaye ku Mangʼana Amajomu ga Waryubha, ginyarageeni mumakanisa gonsego. ¹⁹Kweki ritaringi riyo eryenego eguru yaaye, weeki yaasorwa na amakanisa agyenga hamwi na bheetu hanú turahira omusororyo kubheekirirya bha Yerusaremu. Emirimu gya eriruguto giyo, girakora Omukuru agungibhwe, kweki giroorokya kya ego tuuna omutima gwa okubheera abhandi.

²⁰Tutakwenda amasoro okurwa kumuntu wowonse, eguru ya obhwimiririri bhwetu bhwa okuhira ebhintu bhinú abhantu bharuusirye, kwa obhuserenʼya bhwabho. ²¹Ensonga yeetu, etaringi okukora amajomu embere ya Omukuru omwenego, nawe, ensonga yeetu nu-kukora amajomu na kubhantu.

²²Turamutuma omuhiiri weetu kuimani oundi, abhe hamwi na bha Tiito. Omuhiiri weetu uyo, yeeyorokerye kubheetu mara kaaru kwa eginjira hagari hagari ega, yaana enamba okukora emirimu, na bhoono yaana enamba bhukongʼu okukira obhwa mbere, kwa okubha arabheesigira bheenyu bhukongʼu. ²³Bhoono, nyoore omuntu areenda okumanya amangʼana eguru ya Tiito, weeki m-mukori wa emirimu hamwi na oni kwa enjira ya okubhabheera bheenyu. Na nyoore omuntu areenda okumanya eguru ya abhandi bhanú bharaaja hamwi nawe, bhayo m-bahiiri bheetu kuimani, bhatumirwe na amakanisa, bhonse bharamugungya Kiristu. ²⁴Kwa ego, mubhoorokye obhuhanje bhwenyu, naho amakanisa bhamanye ega, tuuna ekisigo kya okwigungya kurusumo rwenyu.

Obhubheeri kubheekirirya bha Yerusaremu

¹Ntakwenderwa mbangʼoorere mara kaaru eguru ya okubhabheera abheekirirya bha Yerusaremu, ²kwa okubha mmanyiri ega, muuna omutima gwa okubhabheera abhandi. Kweki, oni ndeegungya eguru yeenyu kubhantu bha Makedonia, ndabhakeerya ega, bheenyu abhantu bha erikanisa rya mukyaro kya Akaya, mweeseemya okuruusya okurwa omwaka guyo gwahita. Ekituunyo kyenyu kiyo, kyabhakora abhaaru gati yaabho, okubha na omutima gwa okuruusya. ³Mbe, ndabhatuma abhahiiri bheetu bhanu, naho muture okoorokya ega, heene mweeseemya, kya ego naabhakeerya abhantu bha Makedonia. Ntakwenda ega, amangʼana ganú neegungya kurusumo rwenyu, gamaahikane ega, gataana obhwera. ⁴Ndabhakomererya ego, kwa okubha nkaaja eyo na Abhamakedonia, tunyoore ega, mutareeseemya, hayo orinyoora mutusuukirye eguru ya obhwisige bhwetu kubheenyu. Kora na bheenyu bhonse muribha musuukiri muriiri ebhiraasi. ⁵Kwa ego, nduuji ega, m-bujomu mbakomererye abhahiiri bheetu bhanu, bhatukangatire okuuja eyo, naho bhaseemye ebhintu bhinú mwaraga. Kwa enjira iyo muribha muruusirye kwa okwiyigwa, etaringi kwa okubhandiriribhwa.

Okuruusya kwa omutima gwa obhujomerwa

⁶Ndabhahiitukya eringʼana rinu ega, “Omuntu unú arahamba ebhike, aragesa ebhike, na unú arahamba ebhyaru, aragesa ebhyaru.” ⁷Kira omuntu aruusye okuringʼaana na kya ego areeyigwa mumutima gwaye. Ataruusya kwa okusurumbara kasi kwa okubhandiriribhwa, kwa okubha Waryubha amuhanjiri omuntu unú araruusya kwa omutima gumwi. ⁸Waryubha aratura okubhanonka okukira kya ego mureenda, naho eribhaga ryonsego mubhe na ebhintu bhyonsego bhinú mureenda, naho mubhe abhantu bha okukora amajomu amaaru ga okubheera abhandi. ⁹N-kya ego yaangʼoorwa mu Mangʼoore Amarabhu ega,

“Aruusirye kwa omutima gumwi, okuhaana abhatobhu,

obhuheene bhwaye, m-bwa koko.”9:9 Maaha mukitabho kya Egijabhuri 112:9.

¹⁰Waryubha ngʼo arahaana omuntu egimbusuro gya okuhamba na ebhyakurya. Egoego aribhahaana bheenyu egimbusuro gya okuhamba na okugyongerya. Niiga, aribhahaana na okubhoongerya omutima gwa obhuserenʼya. ¹¹Aribhanga arabhahaana obhuniibhi kugonsego, naho mubhe abhaserenʼya eginsiku gyonsego. Hayo nho, abhantu bharibhanga bharamukumya Waryubha kurusumo rwa ebhintu bhinú turabhahirira okurwa kubheenyu. ¹²Eribha ego, kwa okubha emirimu ginú murakora, gitakubheera abheekirirya bha Yerusaremu bhanú bharasuuhirwa abheenego, nawe girakora abhantu abhaaru, bhamukumye Waryubha bhukongʼu. ¹³Bharimugungya Waryubha, kwa okubha emirimu gyenyu, giroorokya ega, bheenyu m-bakori bha emirimu abhajomu. Kweki bharimugungya kurusumo rwa obhwigwa bhwenyu obhwa okwikirirya Amangʼana Amajomu eguru ya Kiristu embere ya abhantu, na kurusumo rwa obhuserenʼya bhwenyu bhwa okubhabheera bheeki na abhandi bhonsego. ¹⁴Na bharibhasabhira ku Waryubha kwa obhuhanje, okurekana na eriruguto eryaru rinú Waryubha abhaheeri bheenyu. ¹⁵Tubhenga turamukumya Waryubha kwa ekibharo kyaye, kinú tutakutura okukigungya okurekana na obhukuru bhwakyo!

Pauro arabhakyukya bhanú bharamujeera

¹Mbe, abhandi bharagamba ega, oni m-munyoohu hanú ndingi hamwi na bheenyu, na ega, m-mururu hanú ndingi ahare na bheenyu. Nawe, oni omwene Pauro, ndabhakomererya kwa obhwisuuhya na obhunyoohu bhwa Kiristu. ²Ndabhasabha ega, hanú ndibha niijiri kubheenyu, mutankora okubha omururu. Ndagamba ego, kwa okubha mmanyiri ega, ndatura okubha omururu kubhantu bhonsego bhanú bhareeganirirya ega, bheetu tureekara kya abhantu abhandi mukyaro kinu. ³Onyoora tureekara mukyaro munu, tutakurwana eriihe kya abhantu bha mukyaro kinu. ⁴Ebhigwato bhya eriihe ryetu bhitaringi bhya mukyaro kinu, nawe, bhiina eginguru okurwa ku Waryubha gya okugwisya eginkambi gya abhasigu bheetu. ⁵Na turasarya amangʼana gonsego ga obhubheehi, na amangʼana ga okwigungya ganú gararibhira abhantu bhatamumanya Waryubha. Kweki turahunjura ameetegeerero gonsego ga abhantu, naho gamwigwe Kiristu. ⁶Na hanú muribha muramwigwa kimwi, bheetu turibha tumariri okwiseemya okujibhya amangʼana gonsego ganú gataringi ga obhwigwa.

⁷Bheenyu muramaaha kya ego ebhintu bhiramaahikana kwa kibhara ego. Omuntu wowonse unú areerora ega, weeki ngʼ-wa Kiristu, amanye ega, na bheetu turingi abhantu bha Kiristu, kya weeki. ⁸Ntakurora eginsoni kora nkeegungya bhukongʼu eguru ya obhutungi bhunú Omukuru atuheeri, kwa okubha obhutungi bhuyo bhutakubhasarya, nawe, bhurabhakora munage kuimani. ⁹Ntakwenda mmaahikane kubheenyu ega, ndeenda okubhakangirirya kuginyarubha ginú ndabhangʼoorera. ¹⁰Ndagamba ego, kwa okubha abhandi bharagamba ega, “Eginyarubha gya Pauro giina amangʼana amahaari, kweki giina amangʼana amakongʼu. Nawe, hanú aringi hamwi na bheetu arabha ataana eginguru, kweki amangʼana gaaye garabha gataana ensonga.” ¹¹Omuntu unú aragamba amangʼana gayo, amanye ega, amangʼana ganú turabhangʼoorera hanú turingi ahare, ngo gayogayo turikora hanú turibha hamwi na bheenyu.

¹²Bheetu tutakusakya okwibhara kora na okwiringʼaanʼya na abhantu bhanú bhareekomba abheene. Bheeki m-bakangi, bhareerenga abheene kwa abheene na okwiringʼaanʼya abheene kwa abheene. ¹³Nawe, bheetu tutariigungya okukira endengo. Okwigungya kwetu kuritama kundengo ya emirimu ginú Waryubha yaatuhaana. Emirimu giyo, ngyo turakora kora kubheenyu. ¹⁴Okwigungya kwetu kutaaringa kuraambuka endengo, kya ego ekaabheeri nyoore tutaakaajiri kubheenyu. Nawe, bheetu mbo twabha abha mbere okubhareetera Amangʼana Amajomu eguru ya Kiristu. ¹⁵Kweki tutakwigungya eguru ya emirimu gya abhantu abhandi, emirimu ginú bheetu tutaahaanwa. Nawe, tureesigira ega, kya ego eimani yeenyu eragendererya okwaruha, niigo emirimu gyetu gatigati yeenyu girabha giraaruha. ¹⁶Hayo nho, turitura okuraarika Amangʼana Amajomu mubhyaro ebhindi bhinú amangʼana gayo gataakaraarikirwe. Na tutariigungya eguru ya emirimu ginú abhantu abhandi bhaakora ahasi nyabhurebhe. ¹⁷Amangʼoore Amarabhu garagamba ega, “Omuntu wowonse unú areegungya, yeegungye kurusumo rwa Omukuru.”10:17 Maaha mukitabho kya Jeremia 9:24.¹⁸Kwa ego, omuntu wowonse unú areegungya omwene atakwikiriribhwa, nawe, unú aragungibhwa na Omukuru, ngʼo areekiriribhwa.

Pauro na abhatumwa bha obhubheehi

¹Kora nyoore ndagamba kya omukangi, ndasabha munyitegeerere. Mbe, munyitegeerere! ²Oni niina erihari na bheenyu, erihari rinú rirarwa ku Waryubha, kwa okubha muringi kya omuhara unú atamanyiri omusaaja, unú naamurombera obhuko na omusaaja oumwi, unú n-Kiristu. ³Nawe bhoono, ndoobhoha ega, kya ego Haawa yaangʼeenwa na enjoka engʼeeni irya, na bheenyu mutakaaja okungʼeenwa, mutige okumuhanja Kiristu kwa obhuheene na kwa omutima omujomu. ⁴Ndagamba ego, kwa okubha bheenyu m-bangu okuturuungʼana omuntu, unú araaja okuraarika amangʼana eguru ya Yeesu ganú bheetu tutaabharaarikira. Kweki, mureekirirya bhwangu omutima ogundi kasi amangʼana agandi, ganú bheetu tutaabharaarikira.

⁵Oni ntakwirora ega, ndingi omutumwa omuke okukira bhanú muragamba ega, mbo abhatumwa abhakuru. ⁶Onyoora ndamaahikana ega, ntakugamba bhujomu, nawe, niina obhumanyi. Eringʼana riyo turyorokerye harabhu kubheenyu, kira ahasi eribhaga ryonsego.

⁷Bhoono, naakora obhusarya okwisuuhya, naho mbeenure kwa okubharaarikira Amangʼana Amajomu ga Waryubha, bira amariho? ⁸Hanú naakoranga emirimu kubheenyu, naaringa ndanyoora obhubheeri okurwa mumakanisa agandi. N-kya muna naaringa ndabharuusya ebhintu bhyabho, naho mbabheere bheenyu bira bheenyu okuruusya ekintu kyenyu kyokyonse. ⁹Hanú naaringa hamwi na bheenyu, ntaaringa omujigo kumuntu wowonse, kubhusuuhirwa bhwani. Ndagamba ego, kwa okubha abheekirirya bhanú bhaarwa mukyaro kya Makedonia bhaangʼaana bhinú naaringa ndasuuhirwa. Naaringa ndeeyangararira, naho ntabha omujigo kubheenyu kora ahake, kweki ndagendererya okwiyangararira. ¹⁰Kya ego obhuheene bhwa Kiristu bhuringi munsi waani, atariho omuntu kora oumwi mukyaro kyenyu kya Akaya kyonsego, unú arindibha omunwa kukwigungya eguru ya amangʼana gayo. ¹¹Ntakugamba ego, kwa okubha ntabhahanjiri. Waryubha amanyiri ega, mbahanjiri.

¹²Nawe, rinú ndakora ndagendererya okurikora, naho ntabhahaana omweya bhayo bharagamba ega, mbo abhatumwa abhakuru, bhatige okwigungya ega, bharakora emirimu kya bheetu. ¹³Abhantu kya bhayo m-batumwa bha obhubheehi, bharakora emirimu kwa okungʼeena abhantu, bhareekorya ega, m-batumwa bha Kiristu. ¹⁴Eringʼana riyo ritaringi rya okuruguurya, kwa okubha Erisambwa ryonse, rireehunjura na okubha kya maraika11:14 Maraika. Maaha Bhamaraika mu Moonjooro eguru ya Amangʼana Amakongʼu. wa obhurabhu. ¹⁵Kwa ego, ritaringi eringʼana rya okuruguurya, hanú abhakori bha emirimu bhaaryo bhonse, bhareekorya kya abhakori bha emirimu bha heene. Nawe, kubhuteero bhwabho, bheeki bharinyoora ganú gararingʼaana na amakorwa gaabho.

Pauro areegungya eguru ya eginyanko gyaye

¹⁶Kweki ndabhakeerya ega, omuntu wowonse ateeganirirya ega, oni m-mukangi! Nawe, kora nyoore muramanya ega, oni m-mukangi, ndabhasabha munyitegeerere na obhukangi bhwani bhunu, naho oni nonse nigungye nyakara hakego. ¹⁷Amangʼana ga okwigungya ganú ndagamba bhoonwego, gataarwa ku Mukuru, nawe, ndagamba kya omuntu omukangi. ¹⁸Abhaaru bhareegungya kurusumo rwa amangʼana ga mukyaro kinu, kwa ego mbe, na oni nonse tiga nigungye. ¹⁹Mbe, tiga nigungye, kwa okubha bheenyu muuna obhungʼeeni, na mureegumirirya abhakangi kwa obhujomerwa. ²⁰Mureegumirirya kora omuntu unú arabhatuura mubhugaya, unú arabheebhira na okubharuusya ebhintu bhyenyu, kweki unú areerora ega, m-munene okukira bheenyu na omuntu unú arabhatema mubhusu. ²¹Bheetu tutaabhakorera amangʼana gayo, kwa okubha bheetu m-banyoohu bhukongʼu. Kuriyo, tutakurora eginsoni kwa okwanga okubha kya abhantu abharuru!

Bhoono ndagamba kya omukangi ega, nyoore ariho omuntu wowonse unú arasakya okwigungya eguru ya eringʼana ryoryonse, na oni nonse ndasakya okwigungirya eringʼana riyo. ²²Nyoore bheeki m-Baebhurania, na oni nonse m-Mwibhurania. Nyoore bheeki m-Baisiraeri, na oni nonse m-Mwisiraeri. Nyoore bheeki m-bahiiri Abhurahamu,11:22 Abhurahamu. Maaha eringʼana rinu mu Moonjooro eguru ya Amangʼana Amakongʼu. na oni nonse m-muhiiri Abhurahamu. ²³Bhoono tiga ngambe muna ndangeeni, ega, nyoore bheeki m-bakori bha emirimu bha Kiristu, oni m-mukori wa emirimu wa Kiristu okubhakira bheeki. Naakora emirimu emikongʼu bhukongʼu, naabhohwa mara kaaru mwigereja, naatemwa bhukongʼu na mara kaaru naaringa mungʼanga ya oruku. ²⁴Abhayahudi bhaantandika ebhibhoko mirongo esatu na kenda (39), mara kataanu. ²⁵Abharuumi bhaantema egingʼimbo, mara kasatu, naatemwa na amagina rumwigo, eryato ryansarikira mara kasatu munyanja, eribhaga erindi neekara munyanja, obhutiku na omubhasu. ²⁶Mara kaaru kurugendo rwani, naaringa mungʼanga ya okungʼuurwa na eginyuji, mungʼanga ya okutumbarirwa, mungʼanga ya okurwa ku Bhayahudi abharikyani na kubhanú bhataringi Abhayahudi. Naaringa mungʼanga mumigi, mwisisi, na munyanja. Naaringa mungʼanga ya okunyankibhwa na bhanú bhareekorya ega, m-beekirirya abharikyetu. ²⁷Naakora emirimu emikongʼu na okunyanka, mara kaaru naaringa ndabhurwa omweya gwa okuraara, naaringa na omweko na enyonta. Na mara kaaru naabhurwanga ebhyakurya, na okwikara mumbeho bira emyenda gya okwisa okungʼaana eribhiriira. ²⁸Hamwi na gayo gonsego, kira orusiku ndeeganirirya eguru ya emirimu ginú ndeenderwa okukora kurusumo rwa amakanisa gonsego. ²⁹Nyoore oumwi m-munyooheeru, na oni nonse ndeeyigwa m-munyooheeru. Nyoore oumwi bhamuhabhirye, ajeeme na okukora obhusarya, na oni nonse ndabhihirirwa.

³⁰Nyoore ndeenderwa okwigungya, ndeegungirye amangʼana ga obhunyooheeru bhwani. ³¹Waryubha, Taata wa Omukuru Yeesu, unú areenderwa okugungibhwa koko na koko, amanyiri ega, ntakugamba obhubheehi. ³²Hanú naaringa mumugi gwa Damasikasi, omutungi wa omugi guyo unú yaaringa insi ya omukama Areta, yaaringa ateeri abhaangarariri mumugi guyo, naho bhangwate. ³³Nawe, abhantu nyabhurebhe bhakantuura mugukapo gunú gwaringa gubhoherwe kwa egingoye. Kimwi bhakanyituumirya mugukapo muyo okuhitira mukisyeri kya orugito runú rwaringa rwinaariri omugi guyo, nkahona okugwatwa.11:32-33 Maaha mukitabho kya Amakorwa ga Abhatumwa 9:23-25.

Obhurori bhwa Pauro na obhunyooheeru bhwaye

¹Ndeenderwa okwigungya, onyoora kutaana obhwera bhobhonse. Nawe, ndeenda okwigungya eguru ya obhurori na amangʼana agandi ganú Omukuru yanyorokerye. ²Mmumanyiri omuntu oumwi Omukiristu,12:2a Mmumanyiri omuntu oumwi Omukiristu. Hanu Pauro areehairira omwene. Atakwigamba kubhurabhu, kwa okubha ateendanga okumanyikana kya omuntu wa okwigungya bhukongʼu, kya ego abhantu abhandi bhaaringa bharakora bhanú bhaaringa bharamuhakaanʼya Korinto eyo. unú emyaka ekumi na ena ginú gyahita, yaagegwa okugya murwire rwa eguru bhukongʼu.12:2b Murwire rwa eguru bhukongʼu. Ekiyunani kiragamba ega, murwire rwa kasatu. Ntakumanya nyoore yaagegwa okugya eyo na omubhiri gwaye, kasi bira omubhiri gwaye. Waryubha omwene ngʼo amanyiri. ³Kweki, oni ntamanyiri nyoore omuntu uyo yaagegwa na omubhiri gwaye, kasi nyoore ataaringa na omubhiri hanú yaagegwa. Waryubha ngʼo amanyiri. Nawe, kinú mmanyiri niiga, omuntu uyo, ⁴yaagegwa okuhikira Paradiso.12:4 Paradiso. Ahasi hanu nho, abhantu abharabhu bha omutima bhanú bhakwiri bharamuunya, kweki n-hasi hanú Waryubha aringi. Eyo akeegwa amangʼana ga okuruguurya bhukongʼu, ganú omuntu atakutura okugamba, kweki atakwenderwa agagambe. ⁵Bhoono, ndeegungya eguru ya omuntu kya uyo, nawe, ntariigungya kya ego ndingi. Nawe, ndiigungya eguru ya obhunyooheeru bhwani obhwenego. ⁶Kora nkaabheeri ndeenda okwigungya, ntakaabheeri omukangi, kwa okubha nkaabheeri ndagamba ga heene. Nawe, ndeeribhira okwigungya, naho omuntu wowonse atige okummaaha ega, oni ndeenderwa bhukongʼu okukira ganú bharamaaha na okugeegwa okurwa kuoni.

⁷Nawe, naanyoora enyanko enduru kumubhiri gwani, inú eringi kya amahwa. Omuchaama wa Erisambwa yaatumwa, naho yaannyankye, naho ntaaja okwigungya bhukongʼu, eguru ya amaaru ga okuruguurya ganú Omukuru yanyorokerye. ⁸Naamwisasaama Omukuru mara kasatu yantuurye okurwa munyanko iyo. ⁹Nawe, weeki akankeerya ega, “Eriruguto ryani rirakwisa, kwa okubha mubhunyooheeru mmo eginguru gyani giramaahikana.” Kwa ego, ndabhanga ndeegungya kwa obhujomerwa obhwaru eguru ya obhunyooheeru bhwani, naho eginguru gya Kiristu gibhe hamwi na oni. ¹⁰Kwa ego, niina obhujomerwa eguru ya obhunyooheeru bhwani, kweki eguru ya okutukwa, etaabhu, enyanko, na amakongʼu eguru ya Kiristu. Niina obhujomerwa, kwa okubha hanú ndabha omunyooheeru, nho ndabha na eginguru.

Enkubhi ya Pauro eguru ya Abhakorinto

¹¹Ngambiri kya omukangi, kwa okubha bheenyu mbo mukoreri ngambe ego. Bheenyu mwaringa mureenderwa okungungya. Onyoora ndamaahikana ega, ntakwenderwa, oni ntaringi omutumwa omuke okukira bhanú muragamba ega, mbo abhatumwa abhakuru. ¹²M-maheene ega, ganú garoorokya omuntu ega, oni m-mutumwa, gaakoreka kubheenyu. Naakora ebhimanyiiriryo, ebhiruguuryo na ebhika kwa obhwigumirirya obhunene. ¹³Ritariho eringʼana ryoryonse rinú naakora mumakanisa agandi, rinú ntarakora kubheenyu. Ririho eringʼana rimwi ego, rinú ntaakora kubheenyu, ntaabha omujigo kubheenyu. Ndeegwa muragamba ega, riyo ndyo obhubhiibhi bhwani! Bhoono, heene mureenda mbasabhe munyabhire?

¹⁴Bhoono, ndeeseemya okuuja kubheenyu rwa kasatu, nawe, ntaribha omujigo kubheenyu. Ndagamba ego, kwa okubha ntakwenda ebhintu bhyenyu, nawe, ndabheenda bheenyu. Ndagamba riyo, kwa okubha abhaana bhatakwenderwa okubhiika ebhintu kurusumo rwa abheebhuri bhaabho, nawe, abheebhuri mbo bhareenderwa okubhiika ebhintu, kurusumo rwa abhaana bhaabho. ¹⁵Oni ndijomerwa okuruusya ebhintu bhyani, na okwiruusya oni omwene, naho mbabheere. Nawe, bhoono eramaahikana ega, hanú oni ndagendererya okubhahanja bhukongʼu, nho bheenyu murasuuhya obhuhanje bhwenyu kuoni.

¹⁶Mureekirirya ega, ntaaringa omujigo kubheenyu, nawe, abhandi gati yeenyu bharagamba ega, oni m-mungʼeeni, mbanyooreri kwa okubhangʼeenererya. ¹⁷Bhoono, naabharuusya kyokyonse okuhitira kubhantu bhanú naatuma kubheenyu? ¹⁸Naamukomererya Tiito yaaje kubheenyu, hamwi na omuhiiri weetu oundi kuimani. Bhoono, Tiito yaabharuusya ekintu kyokyonse? Bhoono, mutakurora ega, oni na weeki n-kintu kimwi kumirimu? Na kweki ega, enteemo yeetu ngʼ-imwi?

¹⁹Hamwi murakanya ega, eribhaga rinu ryonsego, twiyibhagiriiri. Nawe, tugambiri ganu, embere ya Waryubha, enu tugwateeni na Kiristu. Abhahanje bhaani, ganu gonsego turakora kurusumo rwa okubhabheera bheenyu, munage kuimani. ²⁰Ndoobhoha ega, eribhaga rinú ndiija kubheenyu, ndibhanyoora muuna eginteemo ginú gitakunjomera. Riyo ririkora nkore ganú gatakubhajomera bheenyu. Ndoobhoha ega, ndatura okubhanyoora muuna eritoongʼana, orwango, enkoro, eginhaka, obhugambani, obhubheehi, ameeheemo na eriihe. ²¹Kweki ndoobhoha ega, hanú ndiija kubheenyu, Waryubha waani arikora ndore eginsoni embere yeenyu. Ndisurumbara okurora abhantu abhaaru gati yeenyu bhanú bhaakora obhusarya bhatareehunjura obhusarya bhwabho. Bhakyakoranga amangʼana ga obhusimbe, obhusuunu na amangʼana agandi ga eginsoni ganú bhaaringa nago.

Obhukemeri bhwa obhuteero

¹Inu eraabhe mara yaani ya kasatu okuuja kubheenyu. Amangʼoore Amarabhu garagamba ega, “Kira ekiina kibhuturwe kwa obhwimiririri bhwa abhantu bhabhiri kasi bhasatu.”13:1 Maaha mukitabho kya Obhuhiituki bhwa Amaragiriryo 19:15.²Hanú naaja kubheenyu orwa kabhiri, naabhakeerya bhanú bhaakora obhusarya ega, hanú ndiija kubheenyu kweki, ntaribhaabhira bheeki. Bhoono, ndabhakeerya riyo kweki ega, ntaribhaabhira abhantu bhayo na abhandi bhonsego bhanú bharakora obhusarya. ³Ndikora riyo, kwa okubha mureenda ekimanyiiriryo kya okumanya ega, Kiristu aragamba okuhitira kuoni. Kiristu ataringi omunyooheeru kubheenyu, nawe yaana eginguru gya okukora emirimu gati weenyu. ⁴Ndagamba ego, kwa okubha Kiristu yaabhambwa kumusarabha kwa obhunyooheeru bhwaye, nawe, bhoono m-muhoru kwa eginguru gya Waryubha. Egoego, bheetu bhonse turingi abhanyooheeru, kya ego Kiristu yaaringa omunyooheeru, nawe, kwa okubhakorera emirimu bheenyu, bheetu turibha abhahoru hamwi na weeki kwa eginguru gya Waryubha.

⁵Bhoono, mwirenge bheenyu abheene, naho mumanye ega, muuna eimani. Mwiyikomye bheenyu abheene. Mutamanyiri ega, Yeesu Kiristu aringi munsi weenyu? Nyoore mutamanyiri, hayo murabha mutamirwe okuhikira endengo. ⁶Nawe, ndeesiga ega, bheenyu mumanyiri ega, bheetu tutaatamwa okoorokya obhutungi bhwetu. ⁷Turamusabha Waryubha ega, mutakora eringʼana ryoryonse eribhiibhi. Etaringi ega, bheetu tureenda tumaahikane ega, tuhikiiri endengo iyo. Nawe, kinú tureenda niiga, mukore amangʼana amajomu, kora nyoore bheetu turamaahikana ega, tutamirwe okoorokya obhutungi bhwetu. ⁸Ndagamba ego, kwa okubha tutaana eginguru gya okuribhira obhuheene, nawe, tuuna eginguru gya okubhwibhagirira egyenego. ⁹Turajomerwa, kwa okubha bheetu turingi abhanyooheeru, nawe, bheenyu muuna eginguru. Turamusabha Waryubha abhabheere mubhe mukuneeni kunteemo yeenyu. ¹⁰Ndabhangʼoorera amangʼana ganu eribhaga nkyari okuuja kubheenyu, naho hanú ndibha kubheenyu, ntariija okubha omururu eguru ya obhutungi bhunú Omukuru yangʼeeri. Ndagamba ego, kwa okubha Omukuru ataangʼaana obhutungi bhwa okubhasarya, nawe, bhwa okubhabheera munage kuimani.

Okukeeranʼya kwa okuraga

¹¹Bhoono, abhahiiri bhaani kuimani, turimaahana!13:11 Bhoono, abhahiiri bhaani kuimani, turimaahana! Ensonga eindi eratura okubha ega, Bhoono, abhahiiri bhaani kuimani, mujomerwe. Mubhe mukuneeni kunteemo yeenyu, muhorisanʼye, mubhe na obhumwi, mubhe na omurembe. Na Waryubha wa obhuhanje na omurembe aribha hamwi na bheenyu. ¹²Mukeeranʼyenga kwa obhuhanje bhwa Ekikiristu. Abheekirirya bhonsego bhanú bharingi hanu bharabhakeeranʼya. ¹³Eriruguto rya Omukuru Yeesu Kiristu, na obhuhanje bhwa Waryubha, na obhugwatani bhwa Omutima Omurabhu, bhibhe hamwi na bheenyu bhonsego.