1 Timoteo

Enyarubha ya mbere eya Pauro ku

Timoteo

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Yaamungʼoorera omuntu unú yaaringa arabhirikirwa Timoteo, ararwa mumugi gwa Rustira. Timoteo yaaringa omwana wa omukari Omuyahudi, na esewaabho yaaringa Omuyunani (maaha mukitabho kya Amakorwa ga Abhatumwa 16:1). Timoteo yaatuuribhwa kunjira ya emirimu gya Pauro, nkyo kirakora Pauro aramubhirikira ega, “omwana waani wa obhuheene kuimani” (1:2). Timoteo yaagenda na Pauro kumirimu gya okuraarika Amangʼana Amajomu eguru ya Yeesu Kiristu mara kaaru (maaha mukitabho kya Amakorwa ga Abhatumwa 17:14-15, 18:5). Eramaahikana ega, Pauro yaangʼoora enyarubha inu, omwaka gwa mirongo esansabha na etaanu (65) okurwa okwibhurwa kwa Kiristu. Eribhaga Pauro yaaringa atarangʼoora enyarubha inu, yaahaana Timoteo emirimu gya okwimiririra abheekirirya mumugi gwa Efeso (1:3).

Ensonga ya Pauro okungʼoora enyarubha inu, yaaringa okumukeerya Timoteo kya ego ereenderwa okusora na okwihigirya abhakangati bha erikanisa na abhabheeri. Pauro yeendanga ega, Timoteo na abhakangati bhayo bhabhe abhantu abhaheene, bheehigirye obhuheene na enteemo enjomu kubheekirirya. Kweki, yeendanga okumukeerya Timoteo ega, abhe ekirengyo ekijomu kubhantu bhonsego (4:12). Ensonga yaaye eindi, yaaringa ya okumoorokererya Timoteo okubhabheera abheekirirya mumakongʼu ganú gaaringa-ho. Kweki, Timoteo abhe na eginguru okwanga ameehigiryo gonsego ga obhubheehi (1:3-7, 4:1-5, 6:3-5).

Pauro aramukeeranʼya Timoteo

¹Enyarubha inu, erwiri kuoni Pauro, omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu, kwa eriragiriryo rya Waryubha Omutuurya weetu. Kiristu Yeesu ngʼo obhwisige bhwetu. ²Ndakungʼoorera uuwe Timoteo omwana waani wa obhuheene kuimani.

Ndakwendera eriruguto, ekyabhira na omurembe okurwa ku Taata Waryubha na ku Kiristu Yeesu Omukuru weetu, bhibhe hamwi na uuwe.

Obhutongeri eguru ya ameehigiryo ga obhubheehi

³Eribhaga rinú neemuka okugya mukyaro kya Makedonia, naakukomererya wikare mumugi gwa Efeso. Naakukomererya ego, naho okaanʼye abhantu bhanú bhareehigirya ameehigiryo ga obhubheehi. ⁴Obhakaanʼye bhatigane na amagano ganú gataana obhwera, na okwitonda amariina ga eginganda gya bhajaaji ginú gitaana obhuteero. Bhiyo mbyo bhirakora eginhaka, kora bhitakwimya abhantu okumwikirirya Waryubha, kya ego garingi ameetegeerero gaaye ga okutungurya abhantu. ⁵Ensonga ya amaragiriryo ganu, niiga, abheekirirya bhahanjane kwa omutima omujomu, ameetegeerero amajomu na eimani ya obhuheene. ⁶Nawe, abheehigirya abhandi bhatigiri gayo, bheehunjwiri, bharagamba amangʼana ganú gataana obhwera. ⁷Bhareenda okubha abheehigirya bha amaragiriryo,1:7 Abheehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. onyoora ganú bharagamba na okukomererya bhatagamanyiri.

⁸Nawe, tumanyiri ega, amaragiriryo ga Musa1:8 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. m-majomu, hanú omuntu araagagwate kya ego ereenderwa. ⁹Kweki, tureenderwa okumanya ega, amaragiriryo gataatuurwa-ho kurusumo rwa abhaheene, nawe gaatuurwa-ho kurusumo rwa abhajeemi na bhanú bhataana egintungwa, abhasarya, abhasarya bha amaragiriryo, bhanú bhatakumwigwa Waryubha kora ahake, bhanú bharatema esewaabho na ngʼina waabho, na abheeti bha abhantu. ¹⁰Kweki, gaatuurwa-ho kurusumo rwa abhasuunu na bhanú bharakora abhasaaja abharikyabho kya abhakari, bhanú bhareebha na okugurya abhantu, abhabheehi, na bhanú bharateena kwa obhubheehi, hamwi na bhanú bharakora kyokyonse kinú kitakuringʼaana na ameehigiryo ga obhuhoru. ¹¹Ameehigiryo gayo, garingi mu Mangʼana Amajomu, ganú garoorokya obhukuru bhwa Waryubha, wa eginonkwe gyonsego. Amangʼana gayo, ngo naagwatibhwa na Waryubha ndaarike.

Omukuru Yeesu yaamunonka Pauro

¹²Ndamukumya Omukuru weetu Kiristu Yeesu. Weeki yaangʼaana eginguru, kwa okubha yaandora ega, ndingi omuheene, akankora okubha omukori wa emirimu waaye. ¹³Na onyoora kubhwambiro hayo, naaringa ndamutuka na okunyankya abhantu bhaaye, na naaringa omukana, nawe weeki yaandorera ekyabhira. Yaakora ego, kwa okubha naaringa ndakora gayo kwa obhukangi na ntaaringa na eimani. ¹⁴Omukuru weetu Kiristu Yeesu, yaanhumirira eriruguto ryaye eryaru bhukongʼu, yaangʼaana eimani na obhuhanje, kukugwatana nawe.

¹⁵Eringʼana rinu ni-rya maheene, kweki abhantu bhareenderwa okurigwata ega, “Kiristu Yeesu yaaja mukyaro, naho atuurye abhasarya.” Na gati ya abhasarya bhayo, nooni omusarya okukira bhonsego. ¹⁶Nawe, yaandorera ekyabhira! Yaanyorokya obhwigumirirya bhwaye, naho mbe ekirengyo, kubhanú bharimwikirirya, na okunyoora obhuhoru bhwa koko. ¹⁷Waryubha ngʼo Omukama unú ataana obhuteero, atakukwa kora atakumaahikana, weeki m-mumwemwe. Weeki asuukwe na agungibhwe koko na koko. Amina.

Pauro arakeerya Timoteo agwate amaragiriryo

¹⁸Omwana waani Timoteo, ndakuhaana amaragiriryo ganu, okurekana na amangʼana ga obhurooti ganú gaakangata okugambwa eguru yaaho. Obhenga oragagwata na orwane eriihe bhujomu. ¹⁹Ogwate eimani na obhe wa ameetegeerero amajomu. Abhantu abhandi bhaatiga okukora ganú bhamanyiri ega m-maheene, riyo riraakore bhatige eimani yaabho. ²⁰Mubhantu bhayo, bharimo Himenayo,1:20a Maaha mukitabho kya 2 Timoteo 2:17-18. na Arekisaanda. Bhayo mbatigiri ku Risambwa,1:20b Risambwa. Maaha Erisambwa mu Moonjooro eguru ya Amangʼana Amakongʼu. naho bheehigiribhwe, bhatamutuka Waryubha.

Ameehigiryo eguru ya obhusyengeri bhwa mwikanisa

¹Mbe, ndabhasabha ega, musabhirenga abhantu bhonsego mbere, kwa amasabho ga amanga amaaru. Na mubhenga muramukumya Waryubha kurusumo rwa abhantu bhonsego. ²Mubhenga murasabhira abhakama na abhatungi abhandi bhonsego, naho twikare kwa omurembe, enu turamwigwa Waryubha na okukora ganú gareenderwa embere yaaye. ³Eringʼana rinu ni-rijomu, kweki riramungʼarira Waryubha Omutuurya weetu. ⁴Weeki areenda abhantu bhonsego bhatuuribhwe, na okumanya obhuheene. ⁵Waryubha ngʼ-umwi ego, na ariho omuntu oumwi ego, unú aragwatanʼya abhantu na Waryubha, uyo n-Kiristu Yeesu. ⁶Weeki yaaruusya obhuhoru bhwaye omwene, naho atungurye abhantu bhonsego. Hayo nho, Waryubha yoorokya obhuhanje bhwaye, kwibhaga rinú rireenderwa. ⁷Na kwa ekisigo kiyo, oni naatuurwa okubha omuraariki na omutumwa waaye. Ndagamba obhuheene, ntakugamba obhubheehi! Kweki naakorwa okubha omwihigirya wa okuraarika amangʼana ga eimani na obhuheene kubhantu bhanú bhataringi Abhayahudi.

⁸Mbe, kira ahasi hanú mureekumanʼya okusabha, ndeenda abhasaaja hanú bharasabha bheenure amabhoko eguru. Bhakore ego, kwa ameetegeerero amajomu, bhasabhe bira enkoro kasi eginhaka. ⁹Egoego, na abhakari bhonse ndeenda bheebhohe emyenda bhujomu kya ego ereenderwa, bhabhe na egintungwa eginjomu na bhabhe bhareeswa. Okwijomya kwabho, kutige okubha kwa okusuka egintuukya, kasi kwa okwibhoha ebhintu bhya ebhigera na bhinú bhirangʼesangʼesa, kasi emyenda gya obhuguri obhunene. ¹⁰Nawe, okwijomya kwabho, kubhe kwa ebhikorwa ebhijomu, kya ego ereenderwa kubhakari bhanú bheekirirya okumwigwa Waryubha. ¹¹Na kweki abhakari bhareenderwa okwihigira bhukiri na okubha abheegwa. ¹²Ntakuhaana abhakari omweya gwa okwihigirya kora okutunga abhasaaja. Nawe, bhabhe abheegwa, ¹³kwa okubha Adamu ngʼo yaakangata okubhumbwa, akaaja Haawa. ¹⁴Kweki Adamu ataangʼeenwa, nawe, omukari ngʼo yaangʼeenwa, akasarya amaragiriryo ga Waryubha.2:14 Maaha mukitabho kya Obhwambiro 3:1-6.¹⁵Nawe, omukari arituuribhwa kwa okuhitira orwibhuro rwaye, nyoore araagendererye okuguma kuimani, na obhuhanje, obhurabhu na okubha abheegwa.

Eginkuma gya abheemiririri bha erikanisa

¹Eringʼana rinu ni-rya maheene ega, “Abhantu bhanú bhareenda emirimu gya obhwimiririri bhwa erikanisa, bhayo bharabha bhahanjiri emirimu emijomu.” ²Mbe, omwimiririri wowonse wa erikanisa areenderwa abhe omuntu unú atakugambwa obhubhiibhi. Abhe na omukari umwi ego, abhe areeribhira, kweki, abhe na egintungwa, abhe arakora amangʼana gaaye bhujomu, abhe omuserenʼya na abhe amanyiri okwihigirya. ³Atakaabha omureebhi, kasi omukori wa eriihe, nawe, abhe omunyoohu unú ahanjiri omurembe. Kweki, atabha omunamba wa egimbirya. ⁴Abhe omuntu unú areemiririra bhujomu omugi gwaye, abhe amanyiri okwihigirya abhaana bhaaye egintungwa ginú gireenderwa, na obhusuuku. ⁵Nyoore omuntu atakutura okwangararira omugi gwaye omwene, aratura egaki, okwangararira erikanisa rya Waryubha? ⁶Na atige okubha unú yaamwihunjurira Waryubha bhwangu hanu, ataaja okwiheema. Okwiheema kuyo, kurimukora abhuturirwe ekiina, kya ego Erisambwa ryabhuturirwa ekiina. ⁷Kweki, areenderwa abhe aragungibhwa na abhantu bha kibhara, naho ataaja okunyoora amasoro na okugwatibhwa mumitego gya Erisambwa.

Eginkuma gya abhabheeri bha erikanisa

⁸Abhabheeri bhonse, bhabhe na egintungwa ginú gireenderwa, bhatige okubha bhararuma enu na enu, bhatige okubha abhareebhi, na bhatabha abhanamba bha egimbirya. ⁹Nawe, bhareenderwa bhabhe abhantu bhanú bharagwata kwa ameetegeerero amajomu, obhuheene bhwa eimani yeetu inú Waryubha yaatutubhurira. ¹⁰Bhayo bhonse bhasakibhwe mbere. Hanú bharaamanyikane ega, bhataana amasoro, nho bhakore emirimu giyo. ¹¹Egoego, abhakari bhaabho3:11 Abhakari bhaabho. Ensonga eindi eratura okubha ega, abhabheeri bha ekikari. bhonse bhabhe na egintungwa ginú gireenderwa, bhatige okubha abhabheehi, bhabhe bhareeribhira, bhabhe abhaheene kumangʼana gonsego. ¹²Abhabheeri bhayo bhonse, bhabhe na omukari umwi, na bhabhe bhareemiririra bhujomu abhaana bhaabho na emigi gyabho. ¹³Abhabheeri bhanú bharakora emirimu gyabho bhujomu, bharasuukwa na bharatura okugamba bira obhoobha eguru ya eimani yaabho ku Kiristu Yeesu.

Obhuheene bhwa eimani yeetu

¹⁴Nkungʼooreeri amangʼana gayo, onyoora ndingi haangʼi okuuja eyo. ¹⁵Ndatura okutigita, kwa ego, onyoore omanyiri ganú gareenderwa kubhantu bha Waryubha omuhoru, kwa okubha abhantu bhaaye mbo erikanisa ryaye. Riyo ndyo riragumya obhuheene kwa okubha ndyo entimu na obhurusa bhwaye. ¹⁶Obhuheene bhunú Waryubha yaatutubhurira m-bwa okuruguurya, bhunú tureekirirya m-bunu ega,

Kiristu yeeyorokya kwa enjira ya omubhiri,

akoorokibhwa na Omutima Omurabhu3:16a Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. ega, m-muheene,

bhamaraika3:16b Bhamaraika. Maaha eringʼana rinu mu Moonjooro eguru ya Amangʼana Amakongʼu. bhakamurora,

amangʼana eguru yaaye, gakaraarikwa kubhantu bha ebhyaro bhyonsego,

akeekiriribhwa na abhantu bha ebhyaro bhyonsego,

na akasakwa okugya eguru mubhukuru.

Abheehigirya bha obhubheehi

¹Bhoono, Omutima Omurabhu aragamba bira okubhisa ega, kuginsiku gya obhuteero, abhantu abhandi bharitiga eimani ya obhuheene, bhagwatane na ebhihwi ebhingʼeenererya, na kumeehigiryo ga amasambwa. ²Ameehigiryo gayo, gareehigiribhwa na abhantu abhabheehi, na abha orwambe, bhanú emitima gyabho gyakwa, muna gyasambwa na ekyuma kya omururo. ³Bhayo, bharakaanʼya abhantu ega, bhatatetana, kora bhatarya ebhyakurya ebhindi, bhinú Waryubha yaabhumba. Nawe, yaabhibhumba, naho bhanú bharamwikirirya, bhabhenga bharabhirya kwa omukumo, kwa okubha bhamanyiri obhuheene. ⁴Kira ekintu kinú Waryubha yaabhumba n-kijomu,4:4 Maaha mukitabho kya Obhwambiro 1:31. kora kitariho ekya okwangwa. Nawe, bhyonsego bhiriibhwe kwa omukumo, ⁵kwa okubha eringʼana rya Waryubha na amasabho geetu garabhikora, bhiikiriribhwe ku Waryubha.

Omukori wa emirimu wa heene owa Yeesu Kiristu

⁶Hanú oraahaane abhahiiri bheetu kuimani bhonsego ameehigiryo ganu, hayo nho orabha omukori wa emirimu wa heene wa Kiristu Yeesu. Kweki orabha orererwe bhujomu kubhuheene bhwa eimani yeetu na ameehigiryo amajomu ganú waagwata. ⁷Otigane na amagano ga abhantu bha akare, ganú gataringi ga edini na gataana obhwera. Nawe, winarye okwikara kya ego Waryubha areenda. ⁸Emanyikeeni ega, “Ekituunyo kya okunyoora eginguru gya omubhiri, kiina obhwera obhukego, nawe, okwinarya okwikara kya ego Waryubha areenda kuuna obhwera bhonsego. Ensonga yaaye niiga, oranyoora uuna endago ya obhuhoru bhwa bhoonwego na bhunú bhuriija.” ⁹Eringʼana riyo ni-rya maheene, kweki abhantu bhareenderwa okurigwata. ¹⁰Nkyo kirakora tureekongʼererya okukora emirimu kwa ekituunyo, kwa okubha tureesigira Waryubha omuhoru. Weeki ngʼo Omutuurya wa abhantu bhonsego, na ekinene bhanú bhareekirirya.

¹¹Amangʼana gayo, ogeehigirye na okugaragirirya. ¹²Omuntu wowonse atakujeera kwa okubha okyari omumura, nawe, wikare bhwaheene okuhikira abheekirirya bhabhenga bharakuruusirya ekirengyo kubhugambi bhwaho, ebhikorwa bhyaho, obhuhanje bhwaho, eimani yaaho na obhwigwa bhwaho. ¹³Okore ekituunyo okusomera abhantu Amangʼoore Amarabhu, okubharaarikira na okubheehigirya okuhikira hanú ndiija eyo. ¹⁴Otatiga okutumira omutuho gunú Waryubha yaakuhaana, kwa okuhitira obhurooti na kwa okutuurirwa amabhoko na abhakangati bha erikanisa. ¹⁵Ogwate bhukongʼu amangʼana gayo gonsego, naho amagendereryo gaaho, gamaahikane kubhonsego. ¹⁶Wiyangararire uuwe omwene, wangararire na ganú oreehigirya. Ogume kumangʼana gayo, kwa okubha kwa okukora ego, oriituurya uuwe omwene na bhanú bharakwitegeerera.

Amaragiriryo kubheekirirya

¹Otatoongʼanʼya abhakaruka, nawe, obhatongere kya ego oratongera eseweenyu. Abhamura obhatongere kya abhamura bheenyu, ²abhakungu kya ngʼina weenyu, kora abhahara obhakorere kwa omutima omujomu kya abhahara bheenyu.

³Osuuke abhasino, bhanú bhataana owa okubhabheera. ⁴Nyoore omusino wowonse yaana abhaana kasi abheejukuru, bhayo bheehigire okutuga abhahiiri bhaabho. Okukora ego, nko okuriha abheebhuri bhaabho kuganú bhonse bhaakorerwa. Ego niigo Waryubha ahanjiri. ⁵Omusino unú ataana omuntu wa okumubheera, uyo areesigira Waryubha, aramusabha na okumwisasaama obhutiku na omubhasu. ⁶Nawe, omusino unú atakwiribhira kumangʼana ga ekyaro, uyo yaakwa onyoora akyari omuhoru. ⁷Amangʼana gayo gonse, obharagirirye abheekirirya, naho bhatabha na amasoro. ⁸Omuntu wowonse unú atakutuga abhahiiri bhaaye, ekinene abha iika owaaye, uyo arabha atigiri eimani, kweki arabha omubhiibhi okukira unú atakwikirirya.

⁹Omusino areenderwa okungʼoorwa kwisaabhu rya abhasino, nyoore yaana emyaka okwambira mirongo esansabha, kweki abhe yaatetwa na omusaaja umwi ego.5:9 Kweki abhe yaatetwa na omusaaja umwi ego. Ensonga eindi eratura okubha ega, kweki atabha omusuunu.¹⁰Abhe yaana eginkuma eginjomu, abhe yaarera abhaana bhaaye bhwaheene, abhe yaaserenʼya abhageni, abhe yoogya abheekirirya amaguru, abhe yaabheera bhanú bharanyankibhwa, abhe yaakora amajomu kwa ekituunyo. ¹¹Nawe, abhasino abhasubhaati, otige okubhangʼoora kwisaabhu rya abhasino, kwa okubha enamba ya omubhiri erabhahiga okukira okwiruusya ku Kiristu, hayo bharyenda okutetwa. ¹²Kwa okukora ego, bharibhuturirwa ekiina kwa okubha bhatigiri endago yaabho kuweeki, eya okutigara bira okutetwa kweki. ¹³Abhasino kya bhayo, oranyoora m-booro. Oranyoora bharagendagenda mumigi, kweki oranyoora bharagamba abhantu, na okwisohya kumangʼana ga abhandi, enu bharagamba amangʼana ganú gatakubhatunʼya. ¹⁴Mbe bhoono, oni ndeenda ega, abhasino bhanú bhataringi abhagotu, bhabhenga bharatetwa bheebhure, bhabhenga bharaangararira emigi gyabho, bhatige okuhaana abhasigu omweya gwa okutugamba obhubhiibhi. ¹⁵Maaha ega, abhandi bhamariri okwihunjura, bhoono bharasoorana Erisambwa.

¹⁶Nyoore omukari omwikirirya yaana abhahiiri bhaaye abhasino, abhabheere, naho erikanisa ritakirwa, rigendererye okubheera abhasino bhanú bhataana owa okubhabheera.

¹⁷Abhakangati bhanú bhareemiririra erikanisa bhujomu, bhasuukwe na okukorerwa amajomu,5:17 Bhasuukwe na okukorerwa amajomu. Ekiyunani kiragamba ega, bhasuukwe mara kabhiri. ekinene bhanú bharakora ekituunyo okuraarika na okwihigirya. ¹⁸Ndagamba ego, kwa okubha engʼoorerwe mu Mangʼoore Amarabhu ega, “Hanú engʼombe erahuura obhuro, otaibhoha omunwa.”5:18a Maaha mukitabho kya Obhuhiituki bhwa Amaragiriryo 25:4. Kweki ega, “Omukori wa emirimu areenderwa okurihwa amariho gaaye.”5:18b Maaha mukitabho kya Ruuka 10:7.

¹⁹Otige okwikirirya obhujongeri eguru ya omukangati wa erikanisa, okuhikira onyoore abhantu abhabhiri kasi bhasatu bhanú bharatura okwimiririra ega, eringʼana riyo ni-rya maheene.5:19 Maaha mukitabho kya Obhuhiituki bhwa Amaragiriryo 17:6, 19:15.²⁰Nawe, bhanú bharagendererya okukora obhusarya, obhakaanʼye embere ya bhonsego, naho abhandi bhonse bhoobhohe.

Obhukemeri ku Timoteo

²¹Ndakukomererya embere ya Waryubha, na embere ya Kiristu Yeesu na bhamaraika abhasorwa ega, ogakore amaragiriryo gayo, otige okubhutura ekiina bhwangu, otakaakora eringʼana ryoryonse kwa okungʼahirya omuntu. ²²Otatuurira omuntu amabhoko bhwangu kumirimu gya Omukuru, kwa okubha oraatuure omusarya kumirimu, na uuwe orabha ogwateeni nawe kubhusarya bhwaye. Wiyangararire, naho obhe wa heene.

²³Okwambira bhoono, otanywa amanji ageenego, nawe obhenga oranywa-ko na edivai5:23 Edivai. Maaha eringʼana rinu mu Moonjooro eguru ya Amangʼana Amakongʼu. enkego, kurusumo rwa obhurweri bhwaho bhwa enda na amarweri agandi ganú garakunyankya.

²⁴Abhantu abhandi, obhusarya bhwabho bhuramaahikana, kora bhutarabhuturirwa ekiina. Nawe, abhantu abhandi, obhusarya bhwabho bhwibhisiri, bhurimaahikana eribhaga erindi. ²⁵Egoego, ebhikorwa ebhijomu bhiramaahikana aharabhu. Na bhinú bhiibhisiri, bhiritubhuka.

Amaragiriryo kubhagaya abheekirirya

¹Abhagaya bhonsego abheekirirya, bhasuuke abhakuru bhaabho, naho eriina rya Waryubha na ameehigiryo geetu eguru yaaye gatajeerwa. ²Na abhagaya bhanú abhakuru bhaabho m-beekirirya, bhatabhajeera kwa okubha ega, m-bahiiri ku Kiristu. Nawe, bhagendererye okubhakorera emirimu bhujomu bhukongʼu, kwa okubha bhanú bharanyoora obhwera bhwa emirimu gyabho, m-beekirirya abharikyabho na abhahanje bhaabho. Amangʼana gayo, ogeehigirye na okukaanʼya.

Ameehigiryo ga obhubheehi na obhuniibhi bhwa obhuheene

³Omuntu wowonse unú areehigirye ameehigiryo ga obhubheehi, na atakwikirirya amangʼana ga obhuhoru ga Omukuru weetu Yeesu Kiristu, kora ameehigiryo ganú gararingʼaana na aga okumwigwa Waryubha, ⁴uyo, areeheema bhukongʼu, enu atamanyiri ekintu. Weeki m-muntu wa okuhanja eginhaka, na okutoongʼana eguru ya amangʼana ageenego. Na gayo, gareebhukya orwango, eritoongʼana, amatuki, obhuhaamirirya, ⁵na eriihe gati ya abhantu bhanú gyadangana, kora bhatamanyiri obhuheene. Bhayo mbo bharya bharakanya ega, okumwigwa Waryubha ngʼyo enjira ya okunyoora obhuniibhi.

⁶Maheene ega, okumwigwa Waryubha, kuramukora omuntu abhe omuniibhi, nyoore areeswe na ebhintu bhinú yaanabhyo, ⁷kwa okubha, mukyaro hanu tutaaja-ho na ekintu kyokyonse, kweki tutarigya na kyokyonse. ⁸Mbe, nyoore tuuna ebhyakurya na emyenda, twiswe na bhiyo. ⁹Abhantu bhanú bhareenda obhuniibhi, bharasoha mumasakyo, na okugwatibhwa mumutego gwa orunamba orwaru rwa ekikangi. Orunamba ruyo, rurakora bharasarika na okusika. ¹⁰Okuhanja egimbirya, nko obhwambiro bhwa amabhiibhi amaaru. Abhantu abhandi bhaahanja bhukongʼu egimbirya, bhangʼeenerwe, bhahatiiri eimani, bhoono bhareenyahaara emitima gyabho kwa okwikorera obhururu obhwaru.

Amaragiriryo ku Timoteo

¹¹Nawe, uuwe omuntu wa Waryubha, otigane na amangʼana gayo. Ogwate obhuheene, obhwigwa ku Waryubha, eimani, obhuhanje, obhwikongʼererya na obhunyoohu. ¹²Orwane bhujomu eriihe, eguru ya eimani, naho onyoore omutuho gwa obhuhoru bhwa koko. Obhuhoru bhuyo, mbo waabhirikirirwa harya weekirirya eimani yaaho embere ya abheemiririri abhaaru. ¹³Ndakukomererya embere ya Waryubha unú arahaana obhuhoru ebhintu bhyonsego, na embere ya Kiristu Yeesu unú yaagamba obhwimiririri bhwa obhuheene embere ya Ponsio Pirato6:13 Maaha mubhitabho bhya Ruuka 23:3; Yoana 18:37. ega, ¹⁴ogumye amaragiriryo gayo gonsego bhwaheene na bira okugasarya, okuhikira hanú Omukuru weetu Yeesu Kiristu ariija. ¹⁵Okuuja kwaye, kuribha eribhaga rinú Waryubha yaamura. Waryubha ngʼo aragungibhwa, owa eginguru, weeki ngʼo omwene obhutungi, ngʼo Omukama wa abhakama bhonsego na Omukuru wa abhakuru bhonsego. ¹⁶Weeki omwene ngʼo atarikwa, yeekeeri mundingaasi inú omuntu atakutura okuisuntarira. Kweki, atariho omuntu unú yaamurora kora unú aratura okumurora. Yaana obhusuuku na eginguru koko! Amina.

¹⁷Oragirirye abhaniibhi bha bhoonwego, bhatige okwiheema. Kora bhatige okwisigira obhuniibhi bhwa mukyaro hanu. Bhuyo m-bwa eribhaga ekego. Nawe, bheesigire Waryubha unú aratuhaana ebhintu bhyonsego kwa obhwaru, naho tubhitumire kwa obhujomerwa. ¹⁸Kweki, obhakeerye bhakore amajomu, naho bhabhe abhaniibhi kwa okukora amajomu, bhabhe abhaserenʼya na bheeseemye okugwatana na abharikyabho kubhintu bhyabho. ¹⁹Okukora amajomu kuyo, n-kwibhiikira ekibhumbiko kya obhurusa bhunú bhunagiri kurusumo rwa eginsiku ginú giraaja, naho bhanyoore obhuhoru bhwa obhuheene.

²⁰Ee Timoteo, wangararire bhujomu amangʼana ga obhuheene ganú oheerwe. Oteesohya kumangʼana amabhiibhi ganú gataana obhwera bhobhonse. Kweki oteesohya munhaka gya ekikangi, ginú abhandi bharabhirikira kwa obhubheehi ega, m-busomi. ²¹Abhantu abhandi bhanú bhaagwata gayo, bhaatiga eimani yaabho.

Eriruguto ribhe hamwi na bheenyu bhonsego.