1 Abhatesaronike

Enyarubha ya mbere eya Pauro ku

Abhatesaronike

Obhukangati

Enyarubha inu yaangʼoorwa na omutumwa Pauro (1:1). Yaangʼoora enyarubha inu aringi hamwi na Siriwano na Timoteo, haangʼi na omwaka gwa mirongo etaanu na gumwi (51) okurwa okwibhurwa kwa Yeesu Kiristu.

Pauro na abharikyaye hanú bhaahika mumugi gwa Tesaronike mukyaro kya Makedonia, eribhaga rya orugendo rwaye orwa kabhiri orwa okuraarika Amangʼana Amajomu eguru ya Yeesu, abhantu bha amanga amaaru okurwa mumugi guyo, bhakeekirirya amangʼana gaaye (maaha mukitabho kya Amakorwa ga Abhatumwa 17:1-10). Pauro hanú yeemya erikanisa rya Tesaronike hayo, enyanko enduru ekaamba okunyoora abheekirirya. Enyanko iyo, yaakorwanga na Abhayahudi. Pauro akaamura okwimuka rumwigo.

Hanú yaarwa eyo, na okutamwa okuhunjuka-yo kweki, akamutuma Timoteo agye okuteremya abheekirirya bha eyo. Pauro omwene ataagya-yo, akagendererya okuraarika ahasi ahandi. Eribhaga ekego hanú ryahita, Timoteo akahunjuka ku Pauro, akamureetera amangʼana eguru ya eimani na obhumenyi bhwa abheekirirya bha Tesaronike eyo.

Pauro hanú yeegwa amangʼana gayo, akajomerwa bhukongʼu, akabhangʼoorera enyarubha ya okubhagungya, na okubhoongerya ameehigiryo agandi. Yaabhateremya emitima, naho bhagendererye okwikara obhwikari bhunú bhuramujomera Waryubha. Yaangʼoora eguru ya okwikongʼererya munyanko, na eguru ya okubha na obhuheene ega, Yeesu arihunjuka na abheekirirya bhariikara hamwi nawe.

Pauro arakeeranʼya Abhatesaronike

¹Enyarubha inu erwiri kubheetu Pauro, Siriwano1:1 Siriwano. Mukitabho kya Amakorwa ga Abhatumwaarabhirikirwa Siira. na Timoteo. Turabhangʼoorera bheenyu bhanú muringi mwikanisa rya mumugi gwa Tesaronike, bheenyu omuganda gwa abhantu bhanú mwamwikirirya Taata Waryubha na Omukuru Yeesu Kiristu.

Turabheendera eriruguto na omurembe, bhibhe hamwi na bheenyu.

Omukumo kurusumo rwa eimani ya Abhatesaronike

²Turamukumya Waryubha eribhaga ryonsego kurusumo rwenyu bhonsego, enu turabhasabhira kumasabho geetu bira okurosa. ³Hanú turabhasabhira ku Taata Waryubha, turahiituka embere yaaye, emirimu gyenyu ginú murakora kwa eimani. Turahiituka ekituunyo kyenyu kinú kirarekana na obhuhanje bhwenyu, kweki kya ego mwimiriiri okurekana na obhwisige bhwenyu bhwa okuhunjuka kwa Omukuru weetu Yeesu Kiristu.

⁴Bheenyu abhahiiri bheetu kuimani, bhanú muhanjirwe na Waryubha, tumanyiri ega, Waryubha abhasoreri okubha abhantu bhaaye. ⁵Tumanyiri ego, kwa okubha eribhaga rinú twabharaarikira Amangʼana Amajomu eguru ya Yeesu, tutaaraarika kwa amangʼana ego. Nawe, twaraarika kwa eginguru, kwa Omutima Omurabhu,1:5 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. na kweki kwa obhuheene. Bheenyu mumanyiri kya ego twaringa hamwi na bheenyu, naho tubhabheere. ⁶Onyoora mwanyankibhwa bhukongʼu, kwa ekisigo kya eimani yeenyu, mwagwata amangʼana gayo kwa obhujomerwa bhunú bhurarwa ku Mutima Omurabhu. Kwa okukora ego, mwagwata ekirengyo kyetu na ekirengyo kya Omukuru Yeesu. ⁷Kora bheenyu mwabheeri ekirengyo ekijomu kubheekirirya bhonsego bha mukyaro kya Makedonia na ekya Akaya. ⁸Okurekana na bheenyu, abhantu bheegwiri amangʼana ga Omukuru. Etaringi kubhantu bha Makedonia na Akaya abheenego. Eimani yeenyu ku Waryubha emanyikeeni honsego. Kwa ekisigo kiyo tutakwinyankya okugamba kyokyonse eguru ya eimani yeenyu. ⁹Abhantu bhayo abheene, bharagamba eguru ya orugendo rwetu kubheenyu. Bharagamba kya ego mwatiga ebhisusano bhyenyu na okumwihunjurira Waryubha, naho okumukorera emirimu weeki omuhoru na owa obhuheene, ¹⁰na okumuganya omwana waaye1:10 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. Yeesu okurwa murwire. Uyo ngʼo, Waryubha yaahyukya okurwa mubhaku, na ngʼo aratutuurya okurwa kunkoro ya Waryubha inú eraaja.

Emirimu gya Pauro na abharikyaye Tesaronike

¹Bheenyu abhahiiri bheetu kuimani, mumanyiri ega, bheetu okuuja kubheenyu kutaaringa kwa bhusa. ²Kweki mumanyiri ega, eribhaga tutarahika kubheenyu, twanyakibhwa na okutukwa bhukongʼu mumugi gwa Firipi erya.2:2 Maaha mukitabho kya Amakorwa ga Abhatumwa 16:16-40. Onyoora kubheenyu twaribhirwanga bhukongʼu, Waryubha yaatuhaana eginguru gya okuraarika Amangʼana gaaye Amajomu.

³Amangʼana ganú turabhakomererya, gataringi ga okubhahabhya, ga omutima omubhiibhi, kora ga okubhangʼeena. ⁴Nawe, turaraarika kwa okubha Waryubha yaatwikiririrya, akatuhaana emirimu gya okuraarika Amangʼana Amajomu. Etaringi ega, tureenda okujomera abhantu, nawe tureenda okujomera Waryubha, unú areekomyanga emitima gyetu. ⁵Mumanyiri ega, tutaaringa turagamba amangʼana ga okwikomba, kora okugamba amangʼana ganú gataringi ga obhuheene, naho tunyoore obhwera. Waryubha ngʼo amanyiri ega, ganú turagamba n-ga maheene! ⁶Kweki tutaaringa tureenda ega, abhantu bhatugungye, kora bheenyu, kora abhandi bhonsego. Na kwa okubha bheetu m-batumwa2:6 M-batumwa. Maaha Abhatumwa mu Moonjooro eguru ya Amangʼana Amakongʼu. bha Kiristu, tukeenderi ebhintu nyabhurebhe okurwa kubheenyu, nawe tutaakora ego. ⁷Twaringa abhanyoohu kubheenyu kya ego omukari ararera abhaana bhaaye. ⁸Twabhahanja bhukongʼu. Kwa ego, tukajomerwa, etaringi kwa okubhakeerya Amangʼana Amajomu okurwa ku Waryubha ageenego, nawe na okwiruusya okukora gonsego ganú gareenderwa okubhabheera, kwa okubha mubheeri abhahanje bheetu.

⁹Abhahiiri bheetu kuimani, murahiituka ekituunyo kyetu na okunyanka kwetu, kya ego twakoranga emirimu obhutiku na omubhasu. Twakoranga ego, naho eribhaga turaraarika Amangʼana Amajomu okurwa ku Waryubha tutaaja okunyankya omuntu wowonse kubheenyu. ¹⁰Bheenyu mumanyiri, na Waryubha wonse amanyiri ega, egintungwa gyetu kubheenyu abheekirirya, gyaringa njomu kweki gya obhuheene na bira amasoro. ¹¹Kweki mumanyiri ega, eribhaga twaringa kubheenyu, twaringa turakorera kira oumwi weenyu kya ego taata arakorera abhaana bhaaye omwene. Twaringa turabhateremya emitima gyenyu, na okubhakomererya ¹²ega, mubhenga mureekara kya ego Waryubha ahanjiri. Waryubha ngʼo arabhabhirikira, naho mubhe insi ya obhukama bhwaye na okusanga obhukuru bhwaye.

¹³Kwa ego, turamukumya Waryubha bira okurosa, kwa okubha hanú mweegwa amangʼana gaaye okurwa kubheetu, mutaagagwata kya amangʼana ga abhantu. Nawe, mwagagwata kya amangʼana okurwa ku Waryubha, na maheene niigo eringi. Amangʼana gayo, ngo garakora emirimu mumitima gyenyu, bheenyu abheekirirya. ¹⁴Abhahiiri bheetu kuimani, amangʼana ganú gaanyoora abhantu bhanú bhamwikiriirye Kiristu Yeesu, mumakanisa ga Waryubha mukyaro kya Yudea, ngo gabhanyooreri na bheenyu. Abhantu bheenyu bhabhanyankirye kya ego bheeki Abhayahudi abharikyabho bharabhanyankya. ¹⁵Abhayahudi bhayo, mbo bhaamwita Omukuru Yeesu na abharooti bha akare. Kweki mbo bhaatunyankya bheetu. Abhantu bhayo, bharamujimya Waryubha. Kweki mbo abhasigu bha abhantu bhonsego, ¹⁶kwa okubha bhaaturibhiranga okuraarika Amangʼana Amajomu kubhantu bhanú bhataringi Abhayahudi, bhonse bhature okutuuribhwa. Ego niigo bharagendererya okuhikya obhusarya bhwabho bhunú bharakora kira orusiku. Nawe bhoono, enkoro ya Waryubha ebhahikiiri!

Pauro na abharikyaye bhareegomba okubhataarira Abhatesaronike

¹⁷Abhahiiri bheetu kuimani, okutigana kwetu na bheenyu, kwaringa kwa eribhaga ekego, kweki okutigana kuyo n-kwa ameeso, etaringi kwa emitima. Na kwibhaga riyo ryonsego, twaringa tureegomba bhukongʼu okubharora kweki. ¹⁸Tweendanga okuuja kubheenyu, kweki oni Pauro neendanga okuuja etaringi rumwigo, nawe Erisambwa2:18 Erisambwa. Maaha eringʼana rinu mu Moonjooro eguru ya Amangʼana Amakongʼu. rikaturibhira. ¹⁹Hanú Omukuru Yeesu ariija, bheenyu muribha obhwisige bhwetu, obhujomerwa bhwetu na eritaaji rya obhuhigi bhunú tureeheemera. ²⁰Maheene, bheenyu mbo muratukora twiheeme na okujomerwa.

Timoteo aratumwa Tesaronike

¹Kubhuteero, tukatamwa okugendererya okwigumirirya okwanga okumaahana na bheenyu. Nho tukarora ega, nyakara bheetu tutigare mumugi gwa Atene, ²tumutume Timoteo omuhiiri weetu kuimani, naho yaaje okubhateremya na okubhahorisya eguru ya eimani yeenyu. Weeki m-mukori wa emirimu omurikyetu wa Waryubha, kukuraarika Amangʼana Amajomu eguru ya Kiristu. ³Twakora ego, naho omuntu wowonse atakwa omutima, kwa ekisigo kya eginyanko ginu. Bheenyu abheene mumanyiri ega, tureenderwa okuhitira munyanko. ⁴Muramanya gayo, kwa okubha eribhaga twaringa na bheenyu, twaamba okubhakeerya ega, turinyankibhwa. Bhoono ngo gayo geebhuka.

⁵Kwa ego, hanú oni nonse naatamwa okugendererya okwikongʼererya, nkamutuma Timoteo kubheenyu, naho mmanye eguru ya eimani yeenyu. Naakora ego, kwa okubha neeganiriryanga ega, etariija okubha Omusakya urya yaabhasakya na okubhabhurya, emirimu gyonsego ginú twakora gibhe gitaana obhwera.

Amangʼana amajomu okurwa ku Bhatesaronike

⁶Nawe bhoono, Timoteo yaajiri okurwa kubheenyu, atukeererye amangʼana amajomu eguru ya eimani na obhuhanje bhwenyu. Na atukeererye ega, muratuhiituka bhukongʼu eribhaga ryonsego, na ega, mureegomba okuturora kya ego na bheetu tureegomba okubharora.

⁷Kwa ego, abhahiiri bheetu kuimani, amangʼana eguru ya eimani yeenyu, gaatuteremerye, okurwa muginyanko gyetu gyonsego. ⁸Bhoono tuheejeeri, kwa okubha bheenyu mwagumiri okwimirira ku Mukuru Yeesu. ⁹Bhoono turatura okumuriha-ki Waryubha, naho tumukumye kwa ekisigo kya eimani yeenyu? Kora kwa ekisigo kya obhujomerwa obhunene bhunú tuunabho embere yaaye kurusumo rwenyu? ¹⁰Obhutiku na omubhasu hanú turamusabha Waryubha, turamusabha kwa ekituunyo bhukongʼu ega, atubheere tumaahane na bheenyu, naho tubhabheere kinú murasuuhirwa eguru ya eimani yeenyu.

¹¹Mbe, Waryubha omwene, Taata weetu, na Omukuru weetu Yeesu, atuseemerye enjira ya okuuja kubheenyu. ¹²Omukuru abhoongerye obhuhanje, naho muhanjane bhukongʼu na muhanje abhantu bhonsego, kya ego bheetu tubhahanjiri bheenyu. ¹³Kweki abhateremye, naho mubhe abharabhu bha omutima, mutaana amasoro embere ya Waryubha Taata weetu, eribhaga rinú Omukuru weetu Yeesu ariija, hamwi na abharabhu bha omutima3:13 Abharabhu bha omutima. Ensonga yaaye eratura okubha bhamaraika kasi Abhakiristu bhanú bhaakwa. bhaaye bhonsego.

Mwikare kya ego Waryubha areenda

¹Bhoono, abhahiiri bheetu kuimani, twabheehigiirye kya ego mureenderwa okwikara, naho okumujomera Waryubha. Maheene niigo mureekara. Bhoono, turabhakomererya kwa obhutungi bhwa Omukuru Yeesu ega, mugendererye okukora ego okukira kya ego murakora bhoonwego, ²kwa okubha mumanyiri bhujomu, amaragiriryo ganú twabharagirirya kwa obhutungi bhwa Omukuru Yeesu.

³Waryubha areenda mubhe abharabhu bha omutima, mutige okukora obhusimbe. ⁴Kira oumwi weenyu ahige omubhiri gwaye,4:4 Kira oumwi weenyu ahige omubhiri gwaye. Ensonga eindi eratura okubha ega, Kira omusaaja areenderwa amanye kya ego areekara na omukari waaye. mubhurabhu na obhusuuku. ⁵Mutabha na orunamba kya abhantu bhanú bhatamanyiri Waryubha. ⁶Kwa gayo, omuntu wowonse atamusarirya omurikyaye, kora okumungʼeena. Kya ego twabhakeerya na okubhakaanʼya ega, Omukuru ngʼo arariha ekisiiyomba kubhonsego bhanú bharakora gayo. ⁷Waryubha ataatubhirikira okukora obhusimbe, nawe, yaatubhirikira twikare mubhurabhu. ⁸Kwa ego, omuntu wowonse unú araanga ameehigiryo ganu, atakwanga omuntu, nawe, aramwanga Waryubha unú arabhahaana bheenyu Omutima waaye Omurabhu.

⁹Bhoono, tutakurora nyoore ereenderwa okubhangʼoorera eguru ya okuhanjana, kwa okubha bheenyu abheene mweehigiriibhwe na Waryubha okuhanjana. ¹⁰Maheene mwabheeri murabhakorera ego, abharikyenyu bhonsego bha mukyaro kyonsego kya Makedonia. Kora ego, abhahiiri bheetu kuimani, turabhakomererya mugendererye okuhanjana okukira hayo. ¹¹Mwikongʼererye okubha na omutima gwa omurembe. Munyankire amangʼana geenyu abheene, na mukore emirimu kwa amabhoko geenyu abheene, kya ego twabharagirirya. ¹²Kwa okukora ego, muribha moorokerye egintungwa eginjomu kubhantu bhanú bhataringi abheekirirya. Kweki mutakubha abhantu bha okwisigira ebhya abhandi.

Mubhe na obhwisige ega, abhaku bharihyuka

¹³Nawe, abhahiiri bheetu kuimani, tureenda mumanye ganú gariibhuka kubheekirirya bhanú bhaakwa, naho mutige okusurumbara kya abhantu abhandi bhanú bhataana obhwisige bhwa okuhyuka. ¹⁴Bheetu, tureekirirya ega, Yeesu yaakwa na akahyuka. Kwa ego, tureekirirya ega, Waryubha arihyukya abhantu bhonsego bhanú bhaakwa bharamwikirirya Yeesu.4:14 Waryubha arihyukya abhantu bhonsego bhanú bhaakwa bharamwikirirya Yeesu. Ensonga eindi eratura okubha ega, Waryubha aribhareeta hamwi na Yeesu.

¹⁵Mbe, ganú turabhakeerya m-meehigiryo ga Omukuru Yeesu ega, bheetu bhanú orinyoora tukyari abhahoru kwibhaga rinú weeki arihunjuka, maheene tutaribhakangatira bhanú bhaakwa, okumuturuungʼana. ¹⁶Omukuru omwene ariituuma okurwa murwire. Arigamba kwa eriisi rya eginguru, hamwi na eriisi rya maraika4:16 Maraika. Maaha Bhamaraika mu Moonjooro eguru ya Amangʼana Amakongʼu. omukuru na enkombi ya Waryubha. Nho, bhanú bhaakwa bharamwikirirya Kiristu, bharihyukibhwa. ¹⁷Na bheetu bhanú orinyoora tukyari abhahoru, turisakwa hamwi nabho mumasaaru, naho tumuturuungʼane Omukuru eguru. Kwa ego, turiikara hamwi nawe koko. ¹⁸Mbe bhoono, muhorisanʼye kwa amangʼana gayo.

Mwiseemye kurusiku rwa okuuja Omukuru Yeesu

¹Abhahiiri bheetu kuimani, tutakurora nyoore ereenderwa, okubhangʼoorera eguru ya eribhaga na orusiku rwa okuuja kwa Omukuru Yeesu, ²kwa okubha bheenyu abheene mumanyiri ega, orusiku rwa okuuja kwa Omukuru, ruriija kya ego omwibhi araaja obhutiku. ³Kwibhaga rinú abhantu bharigambanga ega, “Tuuna omurembe, na turingi bhwaheene,” hayo nho, amangʼana garisarika. Obhusariku bhuyo, bhuribhatakya kya ego obhusungu bhuramuujira omukari unú aringi enda. Okurekana na gayo, maheene bhatarituuribhwa kora hake.

⁴Nawe, bheenyu abhahiiri bheetu kuimani, orusiku ruyo rutaribhatakya kya omwibhi, kwa okubha mutaringi mukisunte kya abhandi. ⁵Bheenyu bhonsego m-bantu bha endingaasi, na abha omubhasu. Bheetu bhonsego tutaringi bha obhutiku kasi bha mukisunte. ⁶Mbe bhoono, tutige okubha kya abhandi bhanú bhararaara egintiro, nawe, tutengeeje na okwiribhira. ⁷Abhantu bhanú bhararaara egintiro, bhararaara obhutiku, na abhareebhi bhararehwa obhutiku.

⁸Nawe bheetu, m-bantu bha omubhasu, tubhenga tureeribhira. Tubhe na eimani na obhuhanje, bhiyo mbyo bhirabha kya engubha kukikubha. Kweki twisigire Waryubha okututuurya, nho turabha kya muna twibhoheri engofiira ya ekyuma kumutwe. ⁹Waryubha ataatusora bheetu, naho atusikye kwa enkoro yaaye, nawe, yaatusora naho tunyoore obhutuurya okuhitira ku Mukuru weetu Yeesu Kiristu. ¹⁰Uyo ngʼo yaakwa kurusumo rwetu, naho tubhe tumenyeri hamwi nawe, eribhaga turingi abhahoru kasi eribhaga tukwiri. ¹¹Mbe bhoono, mwikongʼererye okuhorisanʼya na okuteremanʼya emitima kya ego murakora.

Egintungwa ginú gireenderwa kubheekirirya

¹²Bhoono, abhahiiri bheetu kuimani, turabhasabha mubhasuuke bhanú bharanyanka kurusumo rwenyu na okubhoorokererya kwa obhutungi bhwa Omukuru Yeesu, na okubhatongera. ¹³Mubhasuuke bhukongʼu na okubhahanja okuringʼaana na emirimu gyabho. Kweki mubhe mureekara kwa omurembe gati yeenyu.

¹⁴Abhahiiri bheetu kuimani, turabhakomererya, mubhenga murakemera abharosu na okubhateremya bhanú bharakwa emitima. Kweki mubhenga murabhateremya bhanú bhatarakongʼa kuimani na okubheegumirirya abhantu bhonsego. ¹⁵Mwangararire, omuntu wowonse atamuriha ekisiiyomba omurikyaye kwa obhusarya. Nawe, eribhaga ryonsego mubhenga murakorerana amajomu na kubhantu bhonsego. ¹⁶Mubhe na obhujomerwa eginsiku gyonsego, ¹⁷kweki mubhenga murasabha Waryubha bira okurosa. ¹⁸Mubhenga muramukumya Waryubha kukira ekintu, kwa okubha gayo ngo weeki areenda mubhenga murakora, kya ego Kiristu Yeesu yaatoorokererya.

¹⁹Mutaribhira Omutima Omurabhu. ²⁰Kweki mutajeera obhurooti, ²¹nawe, musakye amangʼana gonsego ga obhurooti na mugwate amajomu, ²²na mwiyangararire na amabhiibhi gonsego. ²³Waryubha omwene unú aratuhaana omurembe, abharaame bhukongʼu. Weeki yaangararire emitima gyenyu na obhuhoru bhwenyu na emibhiri gyenyu, naho mubhe mutaana amasoro kwibhaga rinú Omukuru weetu Yeesu Kiristu ariija. ²⁴Waryubha omwene unú arabhabhirikira, aribhakorera gayo, kwa okubha m-muheene.

Okukeeranʼya kwa okuraga

²⁵Abhahiiri bheetu kuimani, mutusabhire na bheetu bhonse ku Waryubha. ²⁶Mubhakeeranʼyenga abheekirirya bhonsego, kwa obhuhanje bhwa Ekikiristu. ²⁷Ndabhariisya emuuma kwa obhutungi bhwa Omukuru Yeesu ega, enyarubha inu mubhasomere abhahiiri bheetu bhonsego.

²⁸Eriruguto rya Omukuru weetu Yeesu Kiristu, ribhe hamwi na bheenyu bhonsego.