1 Petero

Enyarubha ya mbere eya

Petero

Obhukangati

Enyarubha inu yaangʼoorwa na Petero, omutumwa wa Yeesu Kiristu (1:1). Petero yaangʼoorera abheekirirya bhonsego bhanú bhaanyaragana mukyaro kinu. Petero yaangʼoora enyarubha inu aringi mumugi gwa Ruumi, ahasi hanú yaahabhirikira Bhabheri (5:13).

Abheekirirya bhanú Petero arabhangʼoorera, bharatukwa na okunyoora eginyanko eginjaru, kwa okubha bharamwikirirya Yeesu Kiristu. Ensonga ya Petero okungʼoora enyarubha iyo n-kubhateremya na okubharagirirya bhanage okurekana na eriruguto rya Waryubha (5:12). Petero arabhoorokererya abheekirirya bheekare obhuhoru obhujomu embere ya Waryubha (1:3–2:10), na arabhoorokererya eguru ya obhwigwirani ku Bhakiristu na eguru ya okwigwa abha obhutungi (2:11–3:12). Kweki, Petero arabhateremya omutima abheekirirya, bheegumirirye eribhaga rya enyanko, kwa okubha obhuteero bhwa ekyaro bhuringi haangʼi (3:13–4:19). Kubhuteero, araruusya amoonjooro eguru ya obhwigwirani mwikanisa na okumariisirya na amangʼana ga okuraga (5:1-14).

Okukeeranʼya

¹Enyarubha inu, erwiri kuoni Petero, omutumwa1:1a Omutumwa. Maaha Abhatumwa mu Moonjooro eguru ya Amangʼana Amakongʼu. wa Yeesu Kiristu.

Ndabhangʼoorera bheenyu bhanú musorerwe na Waryubha, bhanú munyarageeni kya abhageni mubhyaro bhya Ponto, Garatia, Kapadokia, Asia1:1b Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki. na Bhitunia. ²Akare hayo, Taata Waryubha yaabhamanya na okubhasora kwa Omutima waaye,1:2a Omutima waaye. Maaha Omutima Omurabhu mu Moonjooro eguru ya Amangʼana Amakongʼu. yaabhakora mubhe abharabhu bha omutima, naho mumwigwe Yeesu Kiristu na okuraamwa na amanyinga gaaye.1:2b Na okuraamwa na amanyinga gaaye. Ekiyunani kiragamba ega, kwa okuhumirirwa amanyinga gaaye. Okurekana na ekitabho kya Okuhuruka 24:3-8, Abhaisiraeri bhaaringa bharahumirirwa amanyinga ga egingʼombe okoorokya ega, bhariigwa eriragano ryabho na Waryubha. Petero aragamba ega, amanyinga ga Yeesu n-dubhaaso rwa eriragano erihya gati ya Waryubha na abhantu bhaaye. Maaha mukitabho kya Abhaebhurania 9:18-21.

Ndabhasabhira ku Waryubha abhoongerye eriruguto na omurembe.

Eimani yeetu

³Tumugungye Waryubha, Taata wa Omukuru weetu Yeesu Kiristu. Okuringʼaana na ekyabhira kyaye ekyaru, yaatwibhura orwa kabhiri kwa okumuhyukya Yeesu Kiristu, okurwa mubhaku. Kwa ego, tunyooreri obhwisige bhwa obhuheene ega, turabha abhahoru koko. ⁴Bhoono turaganyirira okugabha eginonkwe ginú Waryubha atuuriri murwire kurusumo rwa abhantu bhaaye. Eginonkwe giyo, gitakutura okugunda, okunyamuka kora okuhotoka. ⁵Waryubha arabhaangararira kwa eginguru gyaye, kwa okubha muramwikirirya Yeesu Kiristu. Aragendererya okubhaangararira okuhikira obhutuurya hanú bhuryorokibhwa kwibhaga rya obhuteero.

⁶Mbe, mujomererwe bhukongʼu kwa amangʼana gayo, onyoora bhoono kwa eribhaga ekego muraasurumbarenga kwa ekisigo kya amasakyo amanga amaaru. ⁷Amasakyo gayo, garasakya eimani yeenyu emaahikane ega, ngʼ-ya heene, kya ego egijahaabhu girarengwa kwa okusambwa na omururo. Eimani yeenyu iina obhwera obhunene okukira egijahaabhu. Kwa ego, Yeesu Kiristu aribhahaana eginkuma, obhukuru na obhusuuku hanú ariija na okwiyorokya kubhurabhu. ⁸Bheenyu mumuhanjiri, onyoora mutaakamuruuji, na muramwikirirya onyoora mutakumurora bhoonwego. Kwa ego, muuna obhujomerwa bhunú bhuuna obhukuru bhunú bhutakugambwa, ⁹kwa okubha mwanyoora obhutuurya. Obhutuurya bhuyo, mbo ensonga ya eimani yeenyu.

¹⁰Abharooti bha eriragano rya akare, bhaakora ekituunyo okumanya obhutuurya bhuyo, bhaarootanga eguru ya eriruguto rya Waryubha rinú ribhahikiiri bheenyu. ¹¹Omutima wa Kiristu1:11 Omutima wa Kiristu. Omutima wa Kiristu ngʼo Omutima wa Waryubha, kasi Omutima Omurabhu. yaaringa munsi waabho araroota ega, Kiristu arinyanka, na hanú enyanko iyo erihwa, arihaanwa obhukuru. Mbe, bhaatuna bhukongʼu okumanya amangʼana gayo, ega, garibha ruuha na garimunyoora egaki. ¹²Waryubha yaakeerya abharooti bharya ega, amangʼana ganú bhaaringa bhararoota, gataabhatunʼyanga bheeki abheene, nawe bheenyu. Garya bhaagambanga, ngo mwaraarikirwa na bhanú bhaabhareetera Amangʼana Amajomu eguru ya Yeesu Kiristu. Na bhaabhakeerya amangʼana amajomu gayo, kwa obhuturo bhwa Omutima Omurabhu unú yaaringa atumirwe okurwa murwire. Amangʼana gayo, kora bhamaraika1:12 Bhamaraika. Maaha eringʼana rinu mu Moonjooro eguru ya Amangʼana Amakongʼu. bhareegomba bhukongʼu okumanya.

Obhwikari bhwa bira obhusarya

¹³Kwa ego, mwiseemye na mwiyangararire. Mutuure obhwisige bhonsego kwiruguto rinú murihaanwa, hanú Yeesu Kiristu ariija na okwiyorokya kubhurabhu. ¹⁴Bheenyu m-baana bha Waryubha. Bhoono, mbe, mumwigwe, muteekirirya kora ahake okugendererya na orunamba runú mwaringa naro, hanú mwaringa mukyari okumanya eringʼana ryoryonse erijomu. ¹⁵Waryubha unú yaabhabhirikira, m-murabhu. Bhoono bheenyu bhonse, mureenderwa okubha abharabhu kuginteemo gyenyu gyonsego. ¹⁶Waryubha aragamba mu Mangʼoore Amarabhu ega, “Mubhe abharabhu bha omutima kwa okubha oni m-murabhu.”1:16 Maaha mukitabho kya Abharaawi 11:44-45, 19:2, 20:7.

¹⁷Hanú muratogora Waryubha mumasabho geenyu, muramubhirikira Taata. Weeki atakungʼahirya omuntu wowonse. Aribhuturira ekiina kira omuntu okuringʼaana na kinú okoreri. Kwa ego, mwikare kwa okumwigwa weeki, kwibhaga ryenyu rinú ritamiri mukyaro hanu. ¹⁸Mwaringa mumenyeri okuringʼaana na enteemo inú etaringi enjomu, kya ego mwagabha okurwa kubhajaaji weenyu. Bhoono mumanye ega, Waryubha ataabhatungurya bheenyu okurwa kunteemo inu kwa okuhitira ebhintu bhinú bhirasarika kya egimbirya na ejahaabhu. ¹⁹Nawe, yaabhatungurya kwa okutumira amanyinga ganú gaana obhwera obhunene. Amanyinga gayo, ngo aga Kiristu. Weeki yaaringa kya omwana wa eringʼondi1:19 Omwana wa eringʼondi. Maaha eringʼana rinu mu Moonjooro eguru ya Amangʼana Amakongʼu. unú ataringi omubheeru kasi omunyanku. ²⁰Okurwa ekyaro kitarabhumbwa, Waryubha yaaringa amumanyiri kwa ensonga iyo. Nawe, akaganya okuhikira kwibhaga rya obhuteero, nho akamureeta na okumutubhura kubhantu bhonsego mukyaro. Gayo yaagakora kurusumo rwenyu. ²¹Kwa okuhitira ku Kiristu, muramwikirirya Waryubha. Weeki yaamuhyukya na okumuhaana obhukuru, na kiyo nkyo kirakora bheenyu muramwikirirya na okumwisiga Waryubha.

²²Kwa okubha mureekara okuringʼaana na ameehigiryo ga obhuheene eguru ya Yeesu, emitima gyenyu girabhiibhwe. Bhoono mukore ekituunyo okuhanja abharikyenyu mutabha na orwambe. Mbe, muhanjane kwa emitima gyenyu gyonsego. ²³Mukore ego, kwa okubha mweebhurwa orwa kabhiri. Okwibhurwa kuyo, kutakurekana na bheseweenyu, bheeki bharakwa, nawe bheenyu mutakukwa kwa okubha mweebhurwa kwa eringʼana rya Waryubha erihoru. Na eringʼana ryaye, riraguma koko. ²⁴Amangʼoore Amarabhu garagamba ega,

“Abhantu bhonsego n-kya amanyanki,

na obhujomu bhwabho n-kya amauwa ga kumanyanki.

Amanyanki garahotoka na amauwa garagwa,

²⁵nawe, eringʼana rya Omukuru Waryubha riraguma koko.”1:24-25 Maaha mukitabho kya Isaaya 40:6-8.

Eringʼana riyo ndyo Amangʼana Amajomu ganú mwaraarikirwa.

¹Mbe, mutige obhubhiibhi bhonsego, obhungʼeenererya bhwa amanga gonsego, orwambe na orwango, kora mutakorerana amasoro kora amake. ^2-3Bhoono mumariri okumanya ega, Omukuru Yeesu m-muheene.2:2-3 Maaha mukitabho kya Egijabhuri 34:8. Mbe, kya ego abhaana abharera bhareenda amabheere ga bhangʼina waabho, bheenyu mubhe na enamba ya amabheere amajomu ga emitima, naho muture okukongʼa na okutuuribhwa.

Okubha abhantu abharabhu bha omutima

⁴Yeesu ngʼo erigina erihoru rya okuhagaajira. Erigina riyo, abhantu bhaaryanga, nawe ndyo Waryubha yaasora, na riina obhwera obhunene kumwene. Mbe, mumuseete Yeesu, ⁵mumanye ega, bheenyu bhonse n-kya amagina amahoru, murahagaajwa na Waryubha mubhe enyumba ya omutima. Kweki arabhakora mubhe abhasyengeri2:5a Abhasyengeri. Maaha eringʼana rinu mu Moonjooro eguru ya Amangʼana Amakongʼu. bhanú bhasorerwe okuruusya ebhimwenso2:5b Ebhimwenso. Maaha Ekimwenso mu Moonjooro eguru ya Amangʼana Amakongʼu. kurusumo rwa emitima, bhinú bhiramungʼarira kwa obhuturo bhwa Yeesu Kiristu. ⁶Mbe, Amangʼoore Amarabhu garagamba ega,

“Maaha! Ndatuura erigina erikuru rya obhurusa Sayuni,2:6a Sayuni. Ni-riina erindi rya Yerusaremu, ahasi ha erisyengerero rya Waryubha. Maaha Yerusaremu mu Moonjooro eguru ya Amangʼana Amakongʼu.

kweki ndyo erigina rya obhwera rinú naasora.

Nawe, omuntu wowonse nyoore aramwikirirya unú ni-rigina riyo,

atarisuuka kora orusiku rumwi!”2:6b Maaha mukitabho kya Isaaya 28:16.

⁷Kubheenyu bhanú mureekirirya erigina riyo, ni-rya okusuukwa. Nawe, kubhanú bhatakwikirirya, Amangʼoore Amarabhu garagamba ega,

“Erigina rinú abhahagaaji bhaangiri,

ndyo ryabheeri erigina erikuru rya obhurusa.”2:7 Maaha mukitabho kya Egijabhuri 118:22.

⁸Kweki, Amangʼoore garagamba ega,

“Erigina riyo ni-rigina rya okwikuujura,

ni-ritare rya okugwisya abhantu.”2:8 Maaha mukitabho kya Isaaya 8:14.

Abhantu bhareekuujura kwa okubha bhatakugwata Amangʼana ga Waryubha, na ego niigo bhaaringa bhaseemeriibhwe okurwa akare.

⁹Nawe, bheenyu n-hamati inú yaasorwa, abhasyengeri bha Omukama, abhantu bhanú mwasorwa kurusumo rwaye omwenego, abhantu bhanú Waryubha yeendanga muraarike amakorwa gaaye amakuru. Omwene yaabhabhirikira okurwa mukisunte, okugya mundingaasi yaaye ya okuruguurya.2:9 Maaha mubhitabho bhya Isaaya 43:20-21; Okuhuruka 19:6.¹⁰Akare hayo mutaaringa abhantu bha Waryubha, nawe bhoono, bheenyu m-bantu bhaaye. Kwibhaga riyo, mutaaringa mwabhiirwe na Waryubha, nawe bhoono, mwabhiirwe.2:10 Maaha mukitabho kya Hosia 2:23.

Obhwikari bhwa abhagaya bha Waryubha

¹¹Abhahanje bhaani, bheenyu muringi abhageni na m-bahiti bha enjira mukyaro hanu. Kwa ego ndabhakomererya ega, muteekirirya orunamba rwa emibhiri gyenyu, runú rurasongana na bheenyu, rubhahige. ¹²Mukore amajomu kubhanú bhatamumanyiri Waryubha, naho nyoore bharibhahaamirirya ega, muringi abhabhiibhi, bharore amakorwa geenyu amajomu. Nho, bharimugungya Waryubha kurusumo rwenyu, orusiku rwa okuuja kwaye.

¹³Mubhenga murasuuka abhatungi bha abhantu, kurusumo rwa okumusuuka Omukuru. Musuuke Kaisari, kwa okubha weeki ngʼo omutungi omukuru wa ekyaro kyenyu. ¹⁴Kweki, musuuke abhaanangwa bha ebhyaro, bhanú bhaasorwa na omukama uyo. Bhaasorwa naho bhajibhye abhantu bhanú bharakora amabhiibhi na bhagungye bhanú bharakora amajomu. ¹⁵Obhwendi bhwa Waryubha niiga, mukore amangʼana amajomu, naho mukirye abhakangi bhanú bhatamanyiri amangʼana gaaye.

¹⁶Mwikare kwa okwiyagaara, nawe mutatumira obhwiyagaari bhuyo, okukora amabhiibhi, mumenye kya ego abhagaya bha Waryubha bhareenderwa okumenya. ¹⁷Musuuke abhantu bhonsego, na muhanje abheekirirya abharikyenyu. Mumwigwe Waryubha, na musuuke omukama weenyu.

Obhwikari bhwa abhagaya bha abhantu

¹⁸Bheenyu abhagaya bha abhantu, mwigwenga abhakuru bheenyu, kweki mubhasuuke, bhabhe abhanyoohu kasi abharuru. ¹⁹Nyoore mureegumirirya enyanko kwa okwihonerwa, Waryubha, aribhanonka. ²⁰Nyoore mureegumirirya enyanko inú mureenderwa kwa ekisigo kya obhusarya bhwenyu, mutaringʼarira Waryubha. Nawe, nyoore mureegumirirya enyanko kwa ekisigo kya okukora amajomu, mbe murangʼarira Waryubha.

²¹Mureenderwa mwigumiriryenga ego, kwa okubha Kiristu wonse, yaanyankibhwa kurusumo rwenyu. Kweki akabhatigira ekirengekanʼyo, naho mubhenga muramwihigira. ²²Weeki ataakora obhusarya, kora okugamba obhubheehi.2:22 Maaha mukitabho kya Isaaya 53:9.²³Hanú yaatukwanga, ataakyukyanga eringʼana ryoryonse. Hanú yaanyankibhwanga ataasakya okuriha ekisiiyomba. Nawe, gonsego yaatigira Waryubha, abhuture ekiina kwa obhuheene. ²⁴Kiristu omwene yaagega obhusarya bhwetu kumubhiri gwaye, akabhambwa kumusarabha. Yaakora ego, naho bheetu tutatungwa kweki na obhusarya, twikare kwa okumungʼarira Waryubha. Bheenyu mwahonibhwa kwa okuhitira okutemwa kwaye. ²⁵Mwaringa mubhuriri kya amangʼondi ganú gahabhiri enjira, nawe bhoono, muhunjukiiri Omuriisya weenyu unú arabhaangararira.

Obhwikari bhwa omusaaja na omukari

^1-2Egoego, bheenyu abhakari, musuukenga abhasaaja bheenyu, naho nyoore bhariho abhasaaja bhobhonse bhanú bhatakwikirirya amangʼana ga Waryubha, bhature okwikirirya okuhitira kuginteemo gyenyu eginjomu. Ego, bharitura okumwikirirya Waryubha bira okukeeribhwa eringʼana. ³Mutabha abhantu bha okwijomya kwa kibhara aheenego, kya okusuka egintuukya, okwibhoha ebhintu bhya egijahaabhu kasi emyenda gya obhuguri obhunene. ⁴Nawe, obhujomu bhwenyu bhwambire mumutima, obhujomu bhunú bhutakutura okunyamuka kora okugota. Obhujomu bhuyo, n-kubha na omutima omujomu na omunyoohu, na mbo obhujomu bhunú bhuuna obhwera obhunene ku Waryubha. ⁵Ego niigo, abhakari bhanú bhaamwigwanga Waryubha na okumwisiga, bheejomyanga akare hayo, enu bhareegwa abhasaaja bhaabho. ⁶Omukari wa okurengekanʼya n-Saara, omukari wa Abhurahamu.3:6 Abhurahamu. Maaha eringʼana rinu mu Moonjooro eguru ya Amangʼana Amakongʼu. Weeki yeegwanga omusaaja waaye bhujomu, yaamubhirikiranga ega, “omukuru.” Na bheenyu bhonse, nyoore murakora amajomu bira okoobhoha ryoryonse, mbe bhoono mubheeri abhaana bhaaye.

⁷Na bheenyu abhasaaja, mwikare na abhakari bheenyu kwa obhungʼeeni, mumanyiri ega, bhataana eginguru kya bheenyu. Mubhatuge kwa okubhasuuka kwa okubha abheene bhonse bharigabha eriruguto rya obhuhoru. Kwa ego, bheenyu abhasaaja mukorenga ego, naho amasabho geenyu gataribhirwa.

Obhukori bhwa amajomu kwa ekituunyo

⁸Kubhuteero ndabhakeerya bhonsego ega, mugwatane, mubhe na ameetegeerero gamwi, muhanjane kihiiri, mwabhirane, na mubhe abheesuuhya. ⁹Mutarihya abhantu amabhiibhi kwa amabhiibhi, kasi amatuki kwa amatuki, nawe mubhanonke. Mubhirikiirwe okukora gayo, naho bheenyu bhonse munonkwe, ¹⁰kya ego Amangʼoore Amarabhu garagamba ega,

“Omuntu areende okwikara bhwaheene na okubha na obhujomerwa,

atige okugamba abhandi na okubheeha.

¹¹Na atige okukora amabhiibhi, akorenga amajomu.

Kweki akore ekituunyo okwikara kwa omurembe na abharikyaye,

¹²kwa okubha, Omukuru Waryubha ararora bhanú bharakora amajomu,

na areegwa amasabho gaabho.

Nawe, bhanú bharakora amabhiibhi, arabhahaana enkoono.”3:10-12 Maaha mukitabho kya Egijabhuri 34:12-16.

¹³Niwi aribhakorera amabhiibhi, nyoore murakora amajomu kwa ekituunyo eribhaga ryonsego? ¹⁴Nawe, nyoore muranyanka kwa ekisigo kya okukora amajomu, Waryubha aribhanonka. Kwa ego, mutoobhoha kya ego bharabhakanga, nawe mumugungye Kiristu, weeki ngʼo Omukuru wa obhuhoru bhwenyu. ¹⁵Mubhenga mwiseemerye eribhaga ryonsego okukyukya wowonse unú aribhabhuurya kinú mureesiga, nawe mukorenga ego, kwa obhunyoohu na kwa obhusuuku. ¹⁶Mubhenga na ameetegeerero amajomu, naho nyoore abhantu bharibhahaamirirya eguru ya amangʼana ganú murakora kurusumo rwa Kiristu, bhamaahe eginsoni. ¹⁷Nyakara okunyanka kwa ekisigo kya okukora amajomu, nyoore Waryubha akaahanjiri, okukira okunyanka kwa okukora amabhiibhi.

¹⁸Kiristu omwene yaakwa kurusumo rwa obhusarya bhwenyu, yaakwa rumwigo, ekeesa. Omuheene yaakwa kurusumo rwa abhasarya, naho tugwatane na Waryubha. Yeetwa omubhiri, nawe kwa obhuturo bhwa Omutima Omurabhu, yaanyoora kweki obhuhoru. ¹⁹Na kwa obhuturo bhwa Omutima Omurabhu, akagya okuraarikira emitima gya abhantu bhanú bhaakwa, enu gibhoherwe. ²⁰Emitima giyo, n-gya bhanú bhataamwigwanga Waryubha akare hayo, eribhaga Nuhu yaaringa arakora eryato erinene. Waryubha yeegumirirya obhusarya bhwabho, okuhikira hanú eryato ryahwa, nawe kubhuteero, abhantu munaane abheenego, mbo bhaahona okurwa mumanji. ²¹Amanji gayo, n-kirengekanʼyo kya obhubhatiijo bhwenyu, kwa okubha hanú murabhatiijwa eroorokya ega, Waryubha arabhatuurya okuhitira obhuhyuki bhwa Yeesu Kiristu. Obhubhatiijo bhuyo, bhutaringi bhwa okuruusya eriiko kumubhiri, nawe n-kubha na ameetegeerero amajomu ku Waryubha. ²²Weeki yaagya murwire, na bhoono, yeekeeri orubhaara rwa obhuryo rwa Waryubha. Aratunga bhamaraika, na ebhibhumbwa bhyonsego ebhya obhutungi, na ebhya obhuturo.

Obhwikari bhunú bhurangʼarira Waryubha

¹Mbe, kwa okubha Kiristu yaanyankibhwa omubhiri gwaye, na bheenyu bhonse mwiseemye okunyankibhwa kya omwene. Ndagamba ego, kwa okubha omuntu unú amariri okunyanka kumubhiri gwaye, atigeeni na obhusarya. ²Kwa enjira iyo, obhwikari bhwaye bhonsego, areekara okuringʼaana na kya ego Waryubha areenda, etaringi okuringʼaana na orunamba rwa abhantu. ³Akare hayo, mwakoranga amangʼana ga abhantu bhanú bhatamanyiri Waryubha. Mweekaranga kwa orunamba orubhiibhi rwa okuhanja abhakari na abhasaaja abhaaru. Kweki mwaringa abhareebhi bha okuhitiranʼya na mwaringa muhanjiri eginyangi gya ekyaro. Mwasyengeranga ebhisusano, bhyeki bhyaangwa na Waryubha. Mwakora amangʼana gayo, kwa eribhaga eritambi bhukongʼu. ⁴Bhoono, abhantu bhanú bhatamanyiri Waryubha, bhararuguura hanú bhararora ega, mutakyagya nabho obhumwi kweki okukora amabhiibhi, kwa ego bharabhatuka. ⁵Nawe, abheene bharyenderwa okwibhagirira, embere ya Waryubha. Weeki, yeeseemerye okubhuturira ekiina abhantu bhonsego, abhahoru na abhaku. ⁶Kiyo nkyo ekisigo, abhantu bhanú bhaakwa, bhaaraarikirwa Amangʼana Amajomu, naho kora nyoore bhaajibhibhwa omubhiri kya abhandi, bhabhe abhahoru kwa obhuturo bhwa Omutima Omurabhu, kya ego Waryubha m-muhoru.

⁷Obhuteero bhwa amangʼana gonsego, bhuringi haangʼi. Kwa ego, mubhenga mureeribhira na okwiyangararira kugonsego, naho muture okutengeeja murasabha. ⁸Okutiga gayo gonsego, muhanjane bhukongʼu, kwa okubha obhuhanje bhurabhisa obhusarya obhwaru.4:8 Maaha mukitabho kya Egimesaari 10:12.⁹Mubhe abhantu bha okugenihya abharikyenyu bira okwingʼeheerya.

¹⁰Kira oumwi aheerwe obhuturo bhwaye okurwa ku Waryubha, naho abheere abharikyaye. Ereenderwa abhutumire bhujomu, kya omwimiririri owa heene wa eginonkwe amanga amaaru gya Waryubha. ¹¹Nyoore omuntu yaana amangʼana ga okugamba, agagambe muna gararwa ku Waryubha. Na nyoore omuntu arakorera abharikyaye emirimu, akore kwa obhuturo bhunú bhurarwa ku Waryubha. Kwa enjira inu, Waryubha aragungibhwa kumangʼana gonsego, kwa ekisigo kya Yeesu Kiristu. Omwene yaana obhukuru na eginguru, koko na koko. Amina.

Okunyanka kurusumo rwa Yeesu

¹²Abhahanje bhaani, mutaruguura eguru ya enyanko enduru kya omururo, inú ereebhuka gati yeenyu okusakya eimani yeenyu. Mutarora ega, n-kintu ekigeni kinú kirabhanyoora. ¹³Nawe, mujomerwe ega, muranyanka, kya ego Kiristu yaanyanka, naho muriija okubha na obhujomerwa deke, eribhaga rinú obhukuru bhwaye bhuryorokibhwa harabhu. ¹⁴Nyoore muritukwanga kwa ekisigo kya eriina rya Kiristu, mumanye ega, murinonkwa. Eringʼana riyo, riroorokya ega, Omutima wa Waryubha4:14 Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. wa obhukuru aringi hamwi na bheenyu. ¹⁵Mbe, enyanko yeenyu, etariija okurekana na obhwiti, obhwibhi, okukora amabhiibhi kasi okwisohya kumangʼana ga abhandi. ¹⁶Hanú omuntu araanyankibhwe kwa okubha m-Mukirisitu, atarora eginsoni, nawe, amugungye Waryubha ega, arabhirikirwa kwa eriina riyo. ¹⁷Mumanye ega, eribhaga rya okubhutura ekiina rihikiri, na Waryubha aryamba okubhutura ekiina kubhantu bhaaye. Bhoono nyoore okubhutura ekiina kuryambira kubheetu abhantu bhaaye, bhoono eribha egaki kubhanú bhatakwikirirya Amangʼana Amajomu ga Waryubha? ¹⁸Amangʼoore Amarabhu garagamba ega,

“Nyoore m-bukongʼu kumuheene okutuuribhwa,

eribha egaki kumusarya unú atakumwigwa Waryubha?”4:18 Maaha mukitabho kya Egimesaari 11:31.

¹⁹Kwa ego, bhanú bharanyanka kwa okukora kya ego Waryubha areenda,4:19 Kwa okukora kya ego Waryubha areenda. Ensonga eindi eratura okubha ega, kwa obhwendi bhwa Waryubha. bhamanye ega, Waryubha m-Mubhumbi omuheene. Ego, bhagendereryenga okukora amajomu na okumwikirirya Waryubha.

Okwangararira abhantu bha Waryubha

¹Bhoono, ndagamba na bheenyu abhakangati bha erikanisa. Oni m-mukangati omurikyenyu, naarora kwa ameeso gaani kya ego Kiristu yaanyankibhwa. Kweki oni m-mugwatani omurikyenyu wa obhukuru bhunú bhuringi haangʼi okumaahikana. Kwa ego, ndabhakomererya bheenyu, ²mubhe abhaangarariri abhaheene bha omuganda gwa abheekirirya bhanú mwahaanwa na Waryubha. Kweki mugwangararire kwa okwiruusya kya ego Waryubha areenda, etabha kwa okubhandiriribhwa. Mutakora emirimu kwa orunamba rwa egimbirya, nawe, kwa omutima gwa heene. ³Mutabha abhaangarariri abharuru kubhanú muratunga, nawe kya ego mureekara mubhe ekirengekanʼyo ekijomu kubheene. ⁴Na Omwangarariri Omukuru wa erikanisa5:4 Omwangarariri Omukuru wa erikanisa. Uyo ngʼo Yeesu Kiristu. hanú aritubhuka, bheenyu murituhwa eritaaji rya obhukuru rinú ritakugunda.

⁵Egoego, na bheenyu abhamura, mwitegeererenga abhakangati. Bheenyu bhonsego mureenderwa okubha abheesuuhya na abha okubheera abharikyenyu, kwa okubha, Amangʼoore Amarabhu garagamba ega,

“Waryubha arahakaanʼya bhanú bhareerora,

nawe, arahaana abheesuuhya eriruguto.”5:5 Maaha mukitabho kya Egimesaari 3:34.

⁶Mbe, mwiyituumye insi ya obhuturo bhwa Waryubha, weeki aribhariinʼya hanú eribhaga ryaye ririhika. ⁷Mutigire Waryubha enyanko yeenyu yonsego, kwa okubha weeki aratunibhwa bhukongʼu na enyanko yeenyu.

Okwanga Erisambwa kwa okumwikirirya Waryubha

⁸Mutengeejenga, na mubhe ameeso eribhaga ryonsego, kwa okubha omusigu weenyu Erisambwa,5:8 Erisambwa. Maaha eringʼana rinu mu Moonjooro eguru ya Amangʼana Amakongʼu. rireenaaranaara kya endwi inú eratuna omuntu emurye. ⁹Mbe, mwange Erisambwa riyo, kwa okunaga okumwikirirya Waryubha. Mumanye ega, abheekirirya abharikyenyu mukyaro kyonsego, bharanyanka kya bheenyu. ¹⁰Waryubha arabhahaana eriruguto ryonsego! Yaabhabhirikira bheenyu, naho mugwatane nawe mubhukuru bhwaye bhwa koko, hamwi na Kiristu. Muranyanka kwa eribhaga ekego, nawe weeki omwene aribhakora munage, aribhahaana eginguru, na okubhakora mwime. ¹¹Waryubha atunge koko! Amina.

Okukeeranʼya kwa okuraga

¹²Mbangʼooreeri enyarubha enyengʼi inu, kwa obhubheeri bhwa Siriwano.5:12 Siriwano. Eriina erindi arabhirikirwa Siira. Oni mmumanyiri bhujomu, ega, omuhiiri weetu kuimani uyo, m-muheene. Ensonga yaani, n-kubhateremya na okubhoorokya ega, amangʼana ganu maheene, ni-riruguto rya Waryubha. Okurekana na eriruguto riyo, munage. ¹³Abheekirirya bha erikanisa rinú riringi Bhabheri,5:13 Bhabheri. Ni-riina rinú abhantu abhandi bhaaringa bhararitumira kurusumo rwa okuhairira omugi gwa Ruumi. abhasorwa abharikyenyu, bharabhakeeranʼya. Na Mariko wonse, omwana waani kuimani, arabhakeeranʼya. ¹⁴Mukeeranʼyenga kwa obhuhanje bhwa obhuheene.5:14 Mukeeranʼyenga kwa obhuhanje bhwa obhuheene. Ekiyunani kiragamba ega, Mukeeranʼyenga kwa okubhusiana kwa obhuhanje. Okubhusiana, n-kabhira ya okukeeranʼya kwa Ekiyahudi.

Bheenyu bhonsego bhanú muramwikirirya Kiristu, omurembe gubhe hamwi na bheenyu.