1 Yoana

Enyarubha ya mbere eya

Yoana

Obhukangati

Eginyarubha esatu gyonsego egya Yoana gitakugamba eriina rya omungʼoori waagyo, nawe, eramaahikana ega, Yoana ngʼo yaagingʼoora na ngʼo yaangʼoora ekitabho kya Amangʼana Amajomu ga Yeesu kya ego gaangʼoorwa na Yoana na ekitabho kya Obhukundukuri. Yoana yaagingʼoora eginyarubha ginu hanú yaaringa amenyeri mumugi gwa Efeso mukyaro kya Asia. Eginsiku ginu ahasi hayo harabhirikirwa Bhuturuki. Kuginyarubha ginu, omungʼoori hanú aragamba ega, “bheetu,” areegamba omwene hamwi na abhatumwa abharikyaye.

Yoana hanú yaangʼoora eginyarubha ginu, yaaringa agoteri. Tutaana obhuheene eguru ya omwaka gunú yaagingʼoora, nawe, n-gati ya emyaka gya mirongo munaane na etaanu na mirongo kenda na etaanu (85-95) okurwa okwibhurwa kwa Kiristu.

Muginyarubha esatu ginu, omungʼoori arangʼoorera Abhakiristu bhanú bhaaringa bharasikana mumakanisa amanga amaaru mukyaro kya Asia. Yoana yaabhahanja bhukongʼu na muginyarubha ginu arabhabhirikira “abhaana bhaani abhahanje kuimani” (maaha mukitabho kya 1 Yoana 2:1).

Munyarubha ya mbere, Yoana arangʼoorera Abhakiristu bhayo, naho abhatongere eguru ya obhuhoru bhwa Ekikiristu. Wonse arabhakomererya bheeyangararire eguru ya ameehigiryo ga obhubheehi. Bhaaringa-ho na abheehigirya nyabhurebhe bhanú bhaaringa bhatigiri amakanisa, bhakabha bhareenaara Asia hayo, na okuraarikira abhantu ameehigiryo ga obhubheehi. Hamwi na gayo, Yoana arakomererya obhuheene bhwa eimani ya Ekikiristu, naho abheemye na okubhahorisya abhantu kuimani. Mumeehigiryo gaaye arahaira eguru ya obhuhanje, okwabhirana, okugwatana, okuhiga obhusarya, okwikara kunú kuramungʼarira Waryubha, na obhuhoru bhwa koko.

Yeesu ngʼo Eringʼana rya obhuhoru

¹Turabharaarikira amangʼana eguru ya Eringʼana rya obhuhoru, rinú ryaringa-ho okurwa obhusimuka.1:1 Maaha mubhitabho bhya Obhwambiro 1:1; Yoana 1:1-3. Bheetu turiigwiri na okurirora na ameeso geetu, turimaahiri na okurigwata na amabhoko geetu. ²Obhuhoru bhuyo, bhwamaahikana, na bheetu tukabhurora. Bhoono turabhwimiririra na okubharaarikira bheenyu, eguru ya obhuhoru bhwa koko bhuyo. Bhweki bhwaringa ku Taata Waryubha, bhukamaahikana kubheetu.1:2 Maaha mukitabho kya Yoana 1:14.³Kinú twamaaha na okwigwa, nkyo turabharaarikira, naho bheenyu bhonse, muture okugwatana na bheetu kubhumwi hamwi na Taata Waryubha na Omwana waaye1:3 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. Yeesu Kiristu. ⁴Turabhangʼoorera amangʼana ganu, naho obhujomerwa bhwetu bhukunaane.

Okwikara mundingaasi

⁵Mbe, amangʼana ganú tweegwa okurwa ku Yeesu Kiristu ngo turabharaarikira, n-ganu, Waryubha ni-ndingaasi, ataana ekisunte kyokyonse munsi waaye. ⁶Nyoore turagamba ega, tuuna obhumwi na Waryubha, enu turagendererya okwikara mukisunte, turabheeha, kweki tutakukora aga obhuheene. ⁷Nawe, nyoore tureekara mundingaasi, kya ego Waryubha aringi mundingaasi, nho turabha na obhumwi, bheetu abheene kwa abheene. Kweki amanyinga ga Omwana waaye Yeesu, garaturaama obhusarya bhwetu bhonsego.

⁸Nyoore turaagambe ega, bheetu tutaana obhusarya, tureengʼeena bheetu abheene, turabha tutamanyiri obhuheene. ⁹Nawe, nyoore tureekirirye ega, tukoreri obhusarya, Waryubha aratwabhira obhusarya bhwetu na okutoogya obhubhiibhi bhonsego, kwa okubha weeki m-muheene, arakora kya ego oranyoora aragiri. ¹⁰Nyoore turaagambe ega, tutarakora obhusarya, turamukora Waryubha okubha omubheehi, na turabha twangiri eringʼana ryaye.

Yeesu Kiristu ngʼo aratusabhira

¹Abhaana bhaani abhahanje kuimani, ndabhangʼoorera amangʼana gayo, naho mutakora obhusarya. Nawe, nyoore omuntu wowonse araakore obhusarya, tuunawe unú aratusabhira ku Taata Waryubha. Uyo n-Yeesu Kiristu omuheene. ²Weeki ngʼo ekimwenso2:2 Ekimwenso. Maaha eringʼana rinu mu Moonjooro eguru ya Amangʼana Amakongʼu. kya okutugwatanʼya na Waryubha, kwa okuturuusya obhusarya bhwetu. Kweki bhutaringi obhusarya bhwetu abheenego, nawe, m-busarya bhwa abhantu bhonsego mukyaro.

³Nyoore turaagwate amaragiriryo ga Waryubha, nho turabha tumanyiri ega, tumumanyiri. ⁴Omuntu wowonse unú aragamba ega, amumanyiri Waryubha, enu atakugwata amaragiriryo gaaye, m-mubheehi, arabha atamanyiri obhuheene. ⁵Nawe, omuntu unú aragwata eringʼana ryaye, aramuhanja Waryubha maheene. Ego niigo turamanya ega, tugwateeni nawe. ⁶Na omuntu unú aragamba ega, agwateeni na Waryubha, areenderwa yeekare kya ego Yeesu yeekara.

Eriragiriryo rya Yeesu eguru ya okuhanjana

⁷Abhahanje bhaani, eriragiriryo rinú ndabhangʼoorera ritaringi erihya, nawe ni-riragiriryo rya akare, rinú mwaringa naryo okurwa hanú mwaamba okumwikirirya Kiristu.2:7 Maaha mukitabho kya Yoana 13:34. Eriragiriryo rya akare riyo, ni-ringʼana rinú mweegwa eguru ya okuhanjana. ⁸Nawe, kwa orubhaara orundi eriragiriryo rinú ndabhangʼoorera ni-rihya. Obhuheene bhwa eriragiriryo riyo, bhwamaahikana kya ego Yeesu Kiristu yeekaranga, na kya ego bheenyu mureekara, kwa okubha obhwikari bhwaye na obhwikari bhwenyu bhuroorokya ega, ekisunte kirahita na endingaasi ya maheene emariri okungʼarabha.

⁹Omuntu wowonse unú aragamba ega, aringi mundingaasi, enu aramujimira omurikyaye, uyo akyari mukisunte. ¹⁰Omuntu wowonse unú arahanja omurikyaye, aringi mundingaasi. Ataana ekintu kyokyonse mumutima gwaye kinú kiraamukore akore obhusarya. ¹¹Nawe, unú arajimira omurikyaye, aringi mukisunte. Kweki aragenda mukisunte, kora atamanyiri enú aragya, kwa okubha ekisunte kimuribhiri ameeso.

¹²Ndabhangʼoorera bheenyu abhaana bhaani abhahanje kuimani,

kwa okubha mwabhiirwe obhusarya bhwenyu, okuhitira ku Yeesu Kiristu.

¹³Ndabhangʼoorera bheenyu bhataata,

kwa okubha mumumanyiri Yeesu Kiristu,

weeki yaaringa-ho okurwa obhusimuka.

Ndabhangʼoorera bheenyu abhamura,

kwa okubha mumuhigiri omusarya urya Erisambwa.2:13 Erisambwa. Maaha eringʼana rinu mu Moonjooro eguru ya Amangʼana Amakongʼu.

Ndabhangʼoorera bheenyu abhaana,

kwa okubha mumumanyiri Taata Waryubha.

¹⁴Ndabhangʼoorera bheenyu bhataata,

kwa okubha mumumanyiri Yeesu Kiristu,

weeki yaaringa-ho okurwa obhusimuka.

Ndabhangʼoorera bheenyu abhamura,

kwa okubha eimani yeenyu iina eginguru,

muragwata eringʼana rya Waryubha,

kweki mumuhigiri omusarya urya Erisambwa.

¹⁵Bhoono mbe, mutahanja okukora amabhiibhi kya abhantu bhanú bhatakumwigwa Waryubha. Kweki, mutahanja obhubhiibhi bhobhonse bhwa mukyaro. Omuntu wowonse unú araahanje aga ekyaro, atakumuhanja Taata Waryubha. ¹⁶Ndagamba ego, kwa okubha aga ekyaro kya ganu, orunamba rwa omubhiri, orunamba rwa okwenda kira kinú orarora, na obhwiheemi bhunú bhurarekana na ebhintu, gatakurekana na Taata Waryubha, nawe, gararekana na ekyaro. ¹⁷Ekyaro kinu hamwi na orunamba rwa abhantu, bhirihita. Nawe, omuntu unú arakora ganú garamujomera Waryubha, arabha na obhuhoru bhwa koko.

Okwiyangararira na abhangi bha Kiristu

¹⁸Abhaana bhaani abhahanje kuimani, eribhaga rya obhuteero ryahikiri! Mwamara okwigwa ega, omwangi wa Kiristu araaja, na kora bhoono abhangi abhaaru bha Kiristu, bhamariri okuuja. Kiyo nkyo ekisigo kinú kirakora turamanya ega, rinu ndyo eribhaga rya obhuteero. ¹⁹Abhantu bhayo, bhaarwa mumakanisa geetu, nawe, maheene bhataaringa abheetu. Maheene uuja okunyoora bhaaringa abheetu, bhakaatamiri kubheetu. Nawe, bhaarwa-mo, naho emanyikane ega, maheene bhataaringa abheetu.

²⁰Nawe bheenyu, Yeesu omurabhu wa Waryubha, abhahakiri amaguta kwa okubhahaana Omutima Omurabhu,2:20 Abhahakiri amaguta kwa okubhahaana Omutima Omurabhu. Maaha mukitabho kya 1 Samweri 16:13. bhoono bheenyu bhonsego mumanyiri obhuheene. ²¹Ndabhangʼoorera enyarubha inu, etaringi kwa okubha mutamanyiri obhuheene. Ndabhangʼoorera kwa okubha mubhumanyiri. Kweki mumanyiri ega, bhutariho obhubheehi bhobhonse bhunú bhurarekana na obhuheene. ²²Omubheehi ngʼ-uuha? Omubheehi m-muntu wowonse unú araanga ega, Yeesu ataringi Kiristu Omutuurya.2:22 Kiristu Omutuurya. Ekiyunani kiragamba ega, Kiristu. Ensonga ya eringʼana rinu niiga, m-muntu unú yaasorwa na Waryubha okutuurya abhantu okurwa munyanko. Maaha Kiristu mu Moonjooro eguru ya Amangʼana Amakongʼu. Wowonse unú aramwanga Taata Waryubha na Omwana waaye Yeesu, uyo ngʼo omwangi wa Kiristu. ²³Kira omuntu unú araanga Omwana wa Waryubha, ataana obhumwi na Taata Waryubha. Nawe, unú aramwikirirya Omwana embere ya abhantu, yaana obhumwi na Taata Waryubha wonse.

²⁴Bhoono bheenyu, mugendererye okugwata amangʼana ganú mweehigiribhwa eguru ya Kiristu, okurwa hanú mwaamba okumwikirirya. Nyoore muraagendererye okugwata ameehigiryo gayo, nho muragendererya okubha na obhumwi na Omwana, na Taata Waryubha. ²⁵Nyoore tureekare ego, turabha na obhuhoru bhwa koko, bhunú Kiristu yaaturaga.

²⁶Mbangʼooreeri amangʼana gayo, okubhakemera eguru ya abhantu bhanú bhareenda okubhahabhya. ²⁷Nawe bheenyu, Kiristu abhaheeri Omutima Omurabhu2:27a Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. unú areekara munsi weenyu. Uyo ngʼo arabheehigirya gonsego, na ameehigiryo gayo, n-ga obhuheene, gataringi ga obhubheehi. Kwa ego, muteenda oundi abheehigirye.2:27b Maaha mukitabho kya Yoana 14:26. Kya ego Omutima yaabheehigirya, mugendererye okubha na obhumwi na Kiristu.

²⁸Bhoono, abhaana bhaani abhahanje kuimani, mugendererye okubha na obhumwi na Kiristu, naho hanú arihunjuka, tubhe na obhuteremu, tutariija okwibhisa kwa eginsoni.

²⁹Mumanyiri ega, Kiristu m-muheene, mbe, mumanye kweki ega, wowonse unú arakora aga heene, ngʼo omwana wa Waryubha.

Okwikara kya abhaana bha Waryubha

¹Mbe, mumaahe kya ego Taata Waryubha atuhanjiri bhukongʼu, kora turabhirikirwa abhaana bha Waryubha! Na heene niigo ego turingi! Nawe, abhantu bhanú bhatakumwigwa Waryubha, bhatamanyiri ega, bheetu m-baana bha Waryubha, kwa okubha bhatamumanyiri weeki. ²Abhahanje bhaani, turamanya ega, bhoonwego bheetu m-baana bha Waryubha, nawe, etaramanyikana kya ego turibha. Nawe, tumanyiri ega, eribhaga rinú Kiristu arihunjuka, turituubhana nawe, kwa okubha turimurora kya ego aringi. ³Kira omuntu unú areesiga ego, yeeraame, naho abhe omurabhu wa omutima, kya ego Kiristu omwene aringi.

⁴Kira omuntu unú araagendereryenga okukora obhusarya, aranyamura amaragiriryo ga Waryubha, kwa okubha okukora obhusarya, nko okunyamura amaragiriryo. ⁵Mumanyiri ega, Kiristu yaaja mukyaro, naho aruusye-ho obhusarya bhwetu. Kweki weeki ataana obhusarya bhobhonse. ⁶Bhoono mbe, kira omuntu unú araagendereryenga okubha na obhumwi nawe, atakugendererya okukora obhusarya. Nawe, kira unú araagendereryenga okukora obhusarya, ataakamuruuji, kora atamanyiri ega, Kiristu niwi.

⁷Bhoono, abhaana bhaani abhahanje kuimani, muteekirirya ega, omuntu wowonse abhangʼeene. Nawe, wowonse unú arakora amangʼana ganú gareenderwa, m-muheene embere ya Waryubha, kya ego Kiristu aringi omuheene. ⁸Nawe, wowonse unú araagendereryenga okukora obhusarya, m-muntu wa Erisambwa, kwa okubha Erisambwa okurwa kubhwambiro rikyagendereryanga okukora obhusarya. Nawe, Omwana wa Waryubha yaaja mukyaro, naho anyamure emirimu gya Erisambwa.

⁹Kira omuntu unú abheeri omwana wa Waryubha, atakugendererya okukora obhusarya, kwa okubha yaana enteemo ya Waryubha. Atakutura okugendererya okukora obhusarya, kwa okubha m-mwana wa Waryubha. ¹⁰Nawe, kira omuntu unú atakukora amangʼana ga heene, kasi unú atakuhanja omurikyaye, uyo ataringi omwana wa Waryubha. Ego niigo turaahukanʼya abhaana bha Waryubha na abhaana bha Erisambwa.

Okuhanjana

¹¹Rinu ndyo eringʼana rinú mweegwa okurwa hanú mwaamba okumwikirirya Kiristu, ega, tureenderwa okuhanjana bheetu abheene kwa abheene. ¹²Tutabha kya Kaini, omwana wa omusarya urya Erisambwa, unú yeeta omuke waaye Abheri.3:12 Maaha mukitabho kya Obhwambiro 4:1-8. Kwaki yaamwita? Yaamwita kwa okubha ebhikorwa bhyaye bhyaringa ebhibhiibhi, nawe, bhya omuke waaye bhyaringa bhya heene.

¹³Bhoono, abhahiiri bhaani kuimani, mutaruguura nyoore abhantu bhanú bhatakumwigwa Waryubha, bharaabhajimire. ¹⁴Bheetu tumanyiri ega, twamara okurwa muruku, tukasoha mubhuhoru bhwa koko. Tumanyiri ego, kwa okubha turahanja abharikyetu. Omuntu wowonse unú ataana obhuhanje, akyatamiri muruku.3:14 Maaha mukitabho kya Yoana 5:24.¹⁵Wowonse unú aramujimira omurikyaye, m-mwiti. Mumanyiri ega, omwiti atakubha na obhuhoru bhwa koko.

¹⁶Kiristu, hanú yaaruusya obhuhoru bhwaye kurusumo rwetu, yaatoorokya obhuhanje bhwa obhuheene. Na bheetu bhonse egoego, tureenderwa kora okuruusya obhuhoru bhwetu kurusumo rwa abharikyetu. ¹⁷Nyoore omuntu yaana ebhintu, na ararora omurikyaye ataana ekintu, nawe, atige okubha na ekyabhira kya okumutuurya, heene yaana obhuhanje bhwa Waryubha?

¹⁸Abhaana bhaani abhahanje kuimani, tutahanjana kwa amangʼana ageenego, nawe, tuhanjane kwa amakorwa amajomu na obhuheene. ¹⁹Tukaahanjana ego, nho turamanya ega, turagwata obhuheene. Kweki emitima gyetu giraterema embere ya Waryubha. ²⁰Kora nyoore emitima gyetu giratubhuturira ekiina ega, turingi abhasarya, turabha na omurembe, kwa okubha tumanyiri ega, Waryubha ngʼo omukuru okukira emitima gyetu. Kweki weeki amanyiri amangʼana gonsego.

²¹Abhahanje bhaani, nyoore emitima gyetu gitakutubhuturira ekiina, turatura okumusabha Waryubha kwa obhuteremu. ²²Na turanyoora okurwa kumwene ryoryonse rinú turamusabha, kwa okubha tureegwa amaragiriryo gaaye na okukora ganú garamujomera.

²³Rinu ndyo eriragiriryo ryaye ega, twikiriirye eriina rya Omwana waaye, Yeesu Kiristu, na okuhanjana bheetu abheene kwa abheene, kya ego yaaturagirirya. ²⁴Omuntu wowonse unú araabhenga areegwa amaragiriryo ga Waryubha, yaana obhumwi nawe. Na Waryubha wonse yaana obhumwi nawe. Tumanyiri ega, tuuna obhumwi na Waryubha, kwa okubha atuheeri Omutima Omurabhu.

Okumanya ameehigiryo ga obhubheehi na aga obhuheene

¹Abhahanje bhaani, muteekirirya kira omuntu unú aragamba ega, yaana Omutima wa Waryubha.4:1 Omutima wa Waryubha. Maaha Omutima Omurabhu mu Moonjooro eguru ya Amangʼana Amakongʼu. Nawe, mwikomye bhwaheene nyoore omuntu aroorokereribhwa na Omutima wa Waryubha kasi-ha. Mwikomye, kwa okubha abharooti abhaaru bha obhubheehi, bheebhukiri mukyaro. ²Enjira ya okumanya ega, omuntu aroorokereribhwa na Omutima wa Waryubha, ngʼ-inu. Omuntu unú areekirirya ega, Yeesu Kiristu yaaja mukyaro akabha na omubhiri kya omuntu, uyo ngʼo aroorokereribhwa na Omutima wa Waryubha. ³Nawe, omuntu wowonse unú atakwikirirya ega, Yeesu yaaja akabha na omubhiri kya omuntu, uyo atakoorokereribhwa na Omutima wa Waryubha. Omuntu uyo, aroorokereribhwa na omutima gwa omwangi wa Kiristu, gunú mwigwiri ega, guraaja, na bhoono gwamariri okubha mukyaro.

⁴Abhaana bhaani abhahanje kuimani, bheenyu muringi abhaana bha Waryubha, na mwamariri okuhiga abharooti bha obhubheehi bhayo. Mwanagya okubhahiga kwa okubha, muuna Omutima wa Waryubha. Weeki yaana obhuturo okukira omutima gwa Erisambwa, gunú guratunga abhantu bhanú bhatamumanyiri Waryubha. ⁵Abharooti bha obhubheehi bhayo, m-ba ekyaro, kwa ego bharagamba amangʼana ga ekyaro. Na abhantu bha ekyaro bhanú bhatakumwikirirya Waryubha, bharabheetegeerera. ⁶Bheetu m-baana bha Waryubha. Omuntu wowonse unú amumanyiri Waryubha, aratwitegeerera. Nawe, unú ataringi omwana wa Waryubha, atakutwitegeerera. Ego niigo turaahukanʼya abhantu bhanú bharoorokereribhwa na Omutima wa obhuheene, na bhanú bharoorokereribhwa na omutima gwa obhubheehi.

Obhuhanje bhwa Waryubha

⁷Abhahanje bhaani, tuhanjane, kwa okubha obhuhanje bhurarwa ku Waryubha. Na kira omuntu unú arahanja abharikyaye, uyo m-mwana wa Waryubha, na weeki amumanyiri Waryubha. ⁸Nawe, omuntu unú atakuhanja abharikyaye, atamumanyiri Waryubha, kwa okubha Waryubha m-buhanje.

⁹Waryubha yoorokya obhuhanje bhwaye kubheetu, kwa enjira ya okumutuma Omwana waaye omumwemwe mukyaro, naho tunyoore obhuhoru bhwa koko okuhitira kumwene. ¹⁰Bhunu mbo obhuhanje, etaringi ega, bheetu twamuhanja Waryubha, weeki ngʼo yaatuhanja bheetu. Weeki yaatuma Omwana waaye, naho abhe ekimwenso kya okutugwatanʼya na Waryubha, kwa okuturuusya obhusarya bhwetu. ¹¹Abhahanje bhaani, kwa okubha Waryubha yaatuhanja ego, mbe, bheetu bhonse tureenderwa tuhanjane. ¹²Atariho omuntu wowonse unú yaakamuruuji Waryubha kora rumwi. Nawe, turaahanjane, Waryubha areekara obhumwi na bheetu, na obhuhanje bhwaye bhurakunaana munsi weetu.

¹³Bheetu tumanyiri ega, tuuna obhumwi na Waryubha, na Waryubha wonse, yaana obhumwi na bheetu, kwa okubha atuheeri Omutima waaye Omurabhu. ¹⁴Na bheetu turuuji na tureemiririra ega, Taata Waryubha yaatuma Omwana waaye abhe Omutuurya wa ekyaro. ¹⁵Kira omuntu unú areekirirya ega, Yeesu m-Mwana wa Waryubha, Waryubha arabha na obhumwi nawe, weeki wonse arabha na obhumwi na Waryubha. ¹⁶Bhoono bheetu, tumanyiri na tureekirirya obhuhanje bhunú Waryubha yaanabho kubheetu. Waryubha m-buhanje. Kira omuntu unú areekara kwa obhuhanje, areekara obhumwi na Waryubha, na Waryubha wonse areekara obhumwi na weeki.

¹⁷Kwa enjira iyo, obhuhanje bhurabha bhukuneeni munsi weetu, naho tubhe na obhuteremu kurusiku rwa okubhuturirwa ekiina. Obhuhanje bhuyo bhukuneeni, kwa okubha obhwikari bhwetu mukyaro munu, bhuhunkeeni na kya ego Yeesu yeekaranga. ¹⁸Omuntu unú yaana obhuhanje, ataana enkubhi. Obhuhanje bhwa obhuheene, bhurakenyia enkubhi, kwa okubha okubhutura ekiina nko kurakora abhantu bhabhe na enkubhi. Omuntu unú yaana enkubhi, obhuhanje bhwa Waryubha bhutarakunaana munsi waaye.

¹⁹Bheetu turamuhanja Waryubha na abharikyetu, kwa okubha Waryubha ngʼo yaakangata okutuhanja. ²⁰Nyoore omuntu aragamba ega, aramuhanja Waryubha, enu aramujimira omurikyaye, uyo m-mubheehi. M-mubheehi, kwa okubha nyoore atakuhanja omurikyaye unú aramurora, atakutura okumuhanja Waryubha unú ataakamuruuji. ²¹Mbe, Waryubha yaatuhaana eriragiriryo rinu, ega, omuntu unú aramuhanja Waryubha, areenderwa ahanje na omurikyaye.4:21 Maaha mubhitabho bhya Abharaawi 19:18; Obhuhiituki bhwa Amaragiriryo 6:4-5; Mariko 12:30-31.

Okuhiga obhusarya

¹Omuntu wowonse unú areekirirya ega, Yeesu ngʼo Kiristu Omutuurya, uyo ngʼo omwana wa Waryubha. Wowonse unú aramuhanja taata, arahanja na abhaana bhaaye bhonse. ²Tumanyiri ega, turahanja abhaana bha Waryubha, kwa okumuhanja Waryubha, na okugwata amaragiriryo gaaye. ³Okumuhanja Waryubha, nko okugwata amaragiriryo gaaye. Na okugwata amaragiriryo gaaye, kutaringi okukongʼu, ⁴kwa okubha kira omwana wa Waryubha arahiga amangʼana ga ekyaro. Turahiga amangʼana ga ekyaro, kwa eimani yeetu. ⁵Mbe bhoono, ngʼ-uuha unú arahiga amangʼana ga ekyaro? Ngʼ-unú areekirirya ega, Yeesu m-Mwana wa Waryubha.

Obhuheene eguru ya Yeesu Kiristu

⁶Mbe, Yeesu Kiristu ngʼo yaaja kwa amanji ga obhubhatiijo bhwaye na kwa amanyinga ga oruku rwaye. Ataabhatiijwa kwa amanji ageenego, nawe kweki, yeetira amanyinga gaaye kumusarabha. ⁷Mbe, Omutima Omurabhu ngʼo areemiririra ega, gayo n-ga maheene, kwa okubha Omutima Omurabhu ngʼo obhuheene. ⁸Kwa ego, bhariho abheemiririri abhasatu bhanú bhareemiririra amangʼana eguru ya Yeesu [murwire, na bhayo m-banu, Taata, Eringʼana, na Omutima Omurabhu. Na abhasatu bhayo, m-bamwi. ⁹Kweki bhariho abhantu abhasatu bhanú bharamwimiririra mukyaro]5:8-9 Amangʼana mumabhano ganu […] gataringi mumangʼoore agandi ga akare aga Ekiyunani. na bhiyo m-binu, Omutima, amanji, na amanyinga. Na ebhisatu bhiyo, obhwimiririri bhwabhyo m-bumwi. Nyoore tureekirirya obhwimiririri bhwa abhantu, mbe obhwimiririri bhwa Waryubha, m-bukuru okukira obhwa abhantu, kwa okubha bhuyo mbo obhwimiririri bhunú Waryubha yaaruusya eguru ya Omwana waaye.

¹⁰Omuntu wowonse unú aramwikirirya Omwana wa Waryubha, yeekirirye ega, obhwimiririri bhwa Waryubha bhuyo, m-bwa maheene. Nawe, unú atakumwikirirya Waryubha, aramukora Waryubha okubha omubheehi, kwa okubha atakwikirirya obhwimiririri bhunú Waryubha yaaruusya eguru ya Omwana waaye. ¹¹Obhwimiririri bhuyo m-bunu, Waryubha atuheeri obhuhoru bhwa koko. Na obhuhoru bhuyo, twabhunyooreri kwa enjira ya okumwikirirya Omwana waaye. ¹²Omuntu wowonse unú yaana obhumwi na Omwana wa Waryubha, yaana obhuhoru bhuyo. Nawe, unú ataana obhumwi nawe, ataana obhuhoru bhuyo.

Okumanya obhuhoru bhwa koko

¹³Mbangʼooreeri amangʼana ganu gonsego, bheenyu bhanú mureekirirya eriina rya Omwana wa Waryubha, naho mumanye ega, muuna obhuhoru bhwa koko. ¹⁴Bheetu m-bateremu bhukongʼu embere ya Waryubha, kwa okubha tumanyiri ega, nyoore turaamusabhe ekintu kyokyonse okuringʼaana na obhwendi bhwaye, aratwitegeerera. ¹⁵Tumanyiri ega, aratwitegeerera hanú turamusabha kyokyonse, nkyo kirakora turamanya ega, turaanyoorenga amangʼana ganú turamusabha.

¹⁶Bhuriho obhusarya bhunú bhutakwahura omuntu abhe ahare na Waryubha koko. Nyoore omuntu araarore omurikyaye arakora obhusarya kya bhuyo, amusabhire ku Waryubha, na Waryubha arimuhaana obhuhoru. Ebhe ego, kubhantu bhanú bharakora obhusarya kya bhuyo. Nawe, bhuriho obhusarya bhunú bhuramwahura omuntu abhe ahare na Waryubha koko. Oni ntakugamba ega, bheenyu mumusabhire ku Waryubha, omuntu unú arakora obhusarya kya bhuyo. ¹⁷Okukora eringʼana ryoryonse rinú ritakwenderwa embere ya Waryubha nko okukora obhusarya. Nawe, hamwi na gayo, bhuriho obhusarya bhunú bhutakwahura omuntu abhe ahare na Waryubha koko.

¹⁸Tumanyiri ega, kira omuntu unú abheeri omwana wa Waryubha, atakugendererya okukora obhusarya,5:18 Maaha mukitabho kya 1 Yoana 3:9. kwa okubha Yeesu Kiristu Omwana wa Waryubha aramwangararira, na omusarya urya Erisambwa, atakunagya okumukora kyokyonse. ¹⁹Tumanyiri ega, bheetu m-baana bha Waryubha. Nawe, abhantu abhandi bhonsego bhanú bhatakumwigwa Waryubha, bharatungwa na omusarya urya. ²⁰Kweki tumanyiri ega, Omwana wa Waryubha amariri okuuja, weeki atuheeri obhungʼeeni, naho tumumanye Waryubha wa obhuheene. Bheetu tuuna obhumwi na Waryubha wa obhuheene, kwa okubha tuuna obhumwi na Omwana waaye Yeesu Kiristu. Uyo ngʼo Waryubha wa obhuheene na ngʼo aratuhaana obhuhoru bhwa koko.

²¹Abhaana bhaani abhahanje kuimani, mwiyangararire mutasyengera ebhisusano.5:21 Mutasyengera ebhisusano. Ensonga eindi eratura okubha ega, mutakora obhusarya.