1 Abhakorinto

Enyarubha ya mbere eya Pauro ku

Abhakorinto

Obhukangati

Enyarubha inu yaangʼoorwa na Pauro, omutumwa wa Kiristu Yeesu (1:1). Yaangʼoorera erikanisa rinú ryaringa mumugi gwa Korinto. Pauro uyo ngʼo yaambisya erikanisa riyo. Eramaahikana ega, enyarubha inu yaangʼoorwa omwaka gwa mirongo etaanu na ena (54) eribhaga rinú Yeesu yaaringa amariri okwibhurwa. Pauro yaangʼoora enyarubha inu hanú yaaringa mumugi gwa Efeso.

Omugi gwa Korinto gwamanyikana bhukongʼu mukyaro kya Bhugiriki na mubhukama bhonsego bhwa Ekiruumi. Omugi guyo gwaringa kumurambo gwa enyanja ya Mediteraniani. Abhantu abhaaru okurwa mbaara gyonsego bhaaringa bharagurya na okugura ebhintu ebhyaru mumugi guyo. Abhantu bhayo, bhaaringa na egimiira gyabho ginú gyaringa gya amanga amaaru, kya okusabha na okusyengera ebhisusano bhya abhakuru. Egimiira giyo gyakora Abhakiristu bhakeesanganʼya kuimani yaabho.

Ensonga ya Pauro okungʼoora enyarubha inu, yaaringa okubharagirirya abheekirirya bha Korinto eguru ya amangʼana ga mwikanisa. Kweki munyarubha munu Pauro yaabhangʼoorera kya ego Abhakiristu bhareenderwa okwikara eguru ya obhutetani. Wonse arabhakeerya kya ego bhareenderwa okumusabha Waryubha, kweki arabheehigirya eguru ya ebhibharo bhya Omutima Omurabhu na obhuhyuki bhwa abhaku.

Yaangʼoora gayo, okubheera erikanisa rya Korinto eyo, na okurituura bhujomu, naho bhatige okuhabhana.

Pauro arakeeranʼya Abhakorinto

¹Enyarubha inu, erwiri kuoni Pauro, unú Waryubha yaambirikira kwa obhwendi bhwaye, naho mbe omutumwa1:1 Omutumwa. Maaha Abhatumwa mu Moonjooro eguru ya Amangʼana Amakongʼu. wa Kiristu Yeesu. Oni na omuhiiri weetu kuimani Sositene, ²turabhangʼoorera bheenyu bhanú muringi mwikanisa rya Waryubha, erya mumugi gwa Korinto eyo. Waryubha abhasoreri okubha na obhumwi na Kiristu Yeesu na okubhabhirikira mubhe abhantu bhaaye. Turabhangʼoorera bheenyu hamwi na abhantu bhonsego bha mbaara gyonsego bhanú bharamusabha Yeesu Kiristu, Omukuru waabho na Omukuru weetu bhonse.

³Turabheendera eriruguto na omurembe okurwa ku Taata Waryubha na ku Mukuru Yeesu Kiristu bhibhe hamwi na bheenyu.

Omukumo gwa Pauro ku Waryubha

⁴Ndamukumya Waryubha eribhaga ryonsego kurusumo rwenyu, kwa okubha yaabhanonka okuhitira ku Kiristu Yeesu. ⁵Kwa okugwatana kwenyu na Kiristu, muheerwe obhuniibhi bhwa amangʼana gonsego, ekinene kubhugambi bhwenyu bhonsego na obhumanyi bhwenyu bhonsego. ⁶Gayo garoorokya ega, amangʼana eguru ya Kiristu ganú twabharaarikira n-ga maheene. ⁷Bhoono, mutakusuuhirwa kora ekibharo ekimwi kya Omutima Omurabhu,1:7 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. enu muraganyirira kwa enamba okuhunjuka kwa Omukuru weetu Yeesu Kiristu. ⁸Waryubha aribhakora munage okuhikira kubhuteero, naho mutariija okubha na amasoro, orusiku runú Omukuru weetu Yeesu Kiristu ariija okubhuturira ekiina abhantu. ⁹Waryubha arikora gayo kwa okubha m-muheene, weeki yaabhabhirikira bheenyu, mubhe na obhumwi na Omwana waaye Yeesu Kiristu, Omukuru weetu.

Okubha na obhumwi mwikanisa

¹⁰Mbe bhoono, abhahiiri bhaani kuimani, ndabhakomererya kuriina rya Omukuru weetu Yeesu Kiristu ega, mutabha murahabhana kungamba. Nawe mubhenga mureegwirana, na mubhenga na obhumwi kuganú oranyoora murahairira na kuganú oranyoora mureeganirirya. ¹¹Abhahiiri bhaani kuimani, abhantu nyabhurebhe bha owa Kiroe, bhankeererye ega, eritoongʼana riringi gati yeenyu. ¹²Bhoono, ganú ndeenda okugamba n-ganu, ega, kira omuntu gati weenyu aragamba bhwaye. Oumwi aragamba ega, “Oni, ngʼ-wa Pauro.” Oundi aragamba ega, “Oni, ngʼ-wa Apooro.” Oundi aragamba ega, “Oni, ngʼ-wa Kefa.”1:12 Kefa. Rinu ni-riina erindi rya Petero. Eriina Petero ni-rya ekigambo kya Ekiyunani, na eriina Kefa ni-rya ekigambo kya Ekiaramu. Mubhigambo bhiyo, ensonga ya amariina gayo niiga, eritare. Maaha mukitabho kya Mataayo 16:18. Oundi aragamba ega, “Oni, ngʼ-wa Kiristu.” ¹³Bhoono, Kiristu yaahukeeni? Kasi Pauro yaabhambwa kumusarabha kurusumo rwenyu? Kasi mwabhatiijwa kwa eriina rya Pauro?

¹⁴Ndamukumya Waryubha, kwa okubha ntaabhatiija omuntu wowonse kubheenyu, nawe Kirisipo na Gaayo. ¹⁵Kwa ego, atariho unú aratura okugamba ega, yaabhatiijwa kwa eriina ryani. ¹⁶Ndahiituka ega, kweki naabhatiija abhantu bha owa Sitefano. Nawe, okutiga bhayo, ntakumanya ega, naabhatiija omuntu oundi wowonse. ¹⁷Kiristu ataantuma oni okubhatiija abhantu. Yaantuma okuraarika Amangʼana Amajomu, bira okwisigira obhungʼeeni bhwani bhwa okuhaira bhujomu, naho oruku rwa Kiristu kumusarabha rutabhura eginguru.

Kiristu ngʼo egintungwa na eginguru gya Waryubha

¹⁸Abhantu bhanú bharabhura bhararora ega, amangʼana eguru ya okukwa kwa Kiristu kumusarabha n-ga ekikangi, nawe kubheetu bhanú turatuuribhwa, amangʼana gayo, garoorokya eginguru gya Waryubha. ¹⁹N-kya ego yaangʼoorwa mu Mangʼoore Amarabhu ega,

“Abhantu bha egintungwa ndisarya egintungwa gyabho.

Abhangʼeeni ndibhurya obhungʼeeni bhwabho.”1:19 Maaha mukitabho kya Isaaya 29:14.

²⁰Bhoono bharingi-ha bhanú turagamba ega, bhaana egintungwa? Bharingi-ha bhanú turagamba ega, m-beehigirya bha amaragiriryo,1:20 M-beehigirya bha amaragiriryo. Bhaaringa abhasomi bhanú bhasomeeri amaragiriryo ga Waryubha, na mbo bhoonjooranga na okwihigirya abhantu amaragiriryo gayo, na egimiira gyabho. Maaha Abheehigirya bha amaragiriryo mu Moonjooro eguru ya Amangʼana Amakongʼu. kora bharingi-ha abhantu bhanú bharoonjoora amangʼana bhujomu eginsiku ginu? Waryubha yoorokya ega, egintungwa gya mukyaro kinu m-bukangi. ²¹Ndagamba ego, kwa okubha Waryubha, kwa egintungwa gyaye yaamura ega, abhantu bhatakutura okumumanya okurekana na egintungwa gyabho abheene. Nawe, Waryubha yaahanja okubhatuurya bhanú bharamwikirirya kwa enjira ya amangʼana ganú turaraarika. Amangʼana gayo, ngo abhantu bhanú bhatamanyiri Waryubha, bharabhirikira ega, n-ga ekikangi. ²²Ku Bhayahudi amangʼana gayo n-ga ekikangi, kwa okubha bhareenda bharore ebhika nho bheekirirye. Na ku Bhayunani amangʼana gayo n-ga ekikangi, kwa okubha bhareenda egintungwa. ²³Nawe bheetu, turaraarika amangʼana eguru ya Kiristu unú yaabhambwa kumusarabha. Amangʼana gayo garabhabhihira Abhayahudi, na kubhanú bhataringi Abhayahudi m-mangʼana ga ekikangi. ²⁴Nawe, kubhanú Waryubha yaabhabhirikira okubha abhantu bhaaye, Abhayahudi kasi Abhayunani, Kiristu ni-ginguru gya Waryubha na egintungwa gya Waryubha. ²⁵Amangʼana ganú abhantu bhararora ega, m-bukangi bhwa Waryubha, garakira egintungwa gya abhantu. Na ganú bhararora ega, m-bunyooheeru bhwa Waryubha, gaana eginguru bhukongʼu okukira eginguru gya abhantu.

²⁶Bhoono, abhahiiri bhaani kuimani, muhiituke kya ego mwaringa, eribhaga rinú Waryubha yaabhabhirikira. Abhaaru gati yeenyu mutaaringa na egintungwa embere ya abhantu. Kweki abhaaru gati yeenyu mutaaringa mumanyikeeni, kora muteebhurirwa muginganda gya abhasuukwa. ²⁷Nawe, Waryubha yaagasora amangʼana ganú abhantu bhararora ega, m-bukangi, naho abhasuukye abha egintungwa. Kweki Waryubha yaagasora amangʼana ganú abhantu bhararora ega, m-manyooheeru, naho abhasuukye abha eginguru. ²⁸Kweki Waryubha yaagasora amangʼana ganú abhantu bhararora ega, gatakusuukwa na ganú garajeerwa, na ganú bhararora ega, gataana obhwera, naho asarye amangʼana ganú abhantu bhararora ega, gaana obhwera. ²⁹Yaakora ego, naho omuntu wowonse ateegungya embere ya Waryubha. ³⁰Waryubha omwene ngʼo yaabhagwatanʼya bheenyu na Kiristu Yeesu. Weeki yaamukora Kiristu abhe egintungwa gyetu. Ensonga yaaye niiga, kwa enjira ya Yeesu tubheeri abhaheene embere ya Waryubha, tubheeri abhantu bhaaye, kweki tutunguriibhwe. ³¹N-kya ego yaangʼoorwa mu Mangʼoore Amarabhu ega, “Omuntu wowonse unú areegungya, yeegungye kurusumo rwa Omukuru.”1:31 Maaha mukitabho kya Jeremia 9:23-24.

Okuraarika amangʼana eguru ya Yeesu Kiristu

¹Bhoono, abhahiiri bhaani kuimani, hanú oni naaja kubheenyu, ntaaja okubharaarikira ekinyerera kya Waryubha, kwa okugamba bhujomu, kasi, kwa egintungwa. ²Hanú naaringa kubheenyu eyo, naamura ega, ngambe amangʼana eguru ya Yeesu Kiristu ageenego, ekinene okukwa kwaye kumusarabha, bira okugamba ekintu ekindi. ³Eribhaga riyo naaringa omunyooheeru, naaringa na enkubhi, kweki naarigitanga bhukongʼu. ⁴Eribhaga naaringa ndeehigirya na okuraarika, ntaagambanga amangʼana kwa egintungwa gyani, naho mbangʼeenererye bheenyu munyikirirye. Tiigo-ha! Nawe, eginguru gya Omutima Omurabhu ngyo gyoorokereryanga obhuheene. ⁵Naakora ego, naho eimani yeenyu eteesigira egintungwa gya abhantu, nawe, iisigire eginguru gya Waryubha.

Egintungwa okurwa ku Mutima Omurabhu

⁶Bhoono bheetu, turagamba amangʼana ga egintungwa, kubhantu bhanú bhanagiri kuimani, nawe egintungwa giyo, gitaringi gya mukyaro kinu, kweki gitaringi gya abhatungi bha ekyaro kinu. Bhayo bheeki mbo bharihwa. ⁷Egintungwa ginú turaraarika n-kinyerera kya Waryubha, kinú kyaringa kiibhisiri kubhantu. Eribhaga Waryubha yaaringa atarabhumba ekyaro, yaamura okutumira egintungwa giyo, naho okutukorera amajomu. ⁸Atariho kora oumwi kubhatungi bha ekyaro kinu, unú yaaringa amanyiri egintungwa giyo, kwa okubha bhakaabheeri bhagimanyiri, bhatakaamubhambiri kumusarabha Omukuru wa okutogoonibhwa. ⁹Nawe, n-kya ego yaangʼoorwa mu Mangʼoore Amarabhu ega,

“Ganú Waryubha yaabhaseemerya bhanú bhamuhanjiri,

atariho omuntu unú yaakagaruuji kora okugeegwa,

atariho omuntu unú yaakagatuuriri mumutima gwaye.”2:9 Maaha mukitabho kya Isaaya 64:4.

¹⁰Nawe bheetu, Waryubha yaatutubhurira gayo, okuhitira ku Mutima Omurabhu, kwa okubha Omutima Omurabhu areekomya gonsego, kora ensonga ya Waryubha inú ebhisirwe. ¹¹Atariho omuntu unú aratura okumanya amangʼana ganú garingi mumutima gwa omuntu oundi. Omutima gwaye ogwenego, ngo guragamanya. Egoego, na amangʼana ga Waryubha, atariho omuntu unú aratura okugamanya. Omutima wa Waryubha omwenego, ngʼo aragamanya. ¹²Waryubha yaatuhaana bheetu Omutima waaye, naho tuture okumanya ganú yaatunonka. Kiyo nkyo ekisigo tutakwiganirirya kya abhantu bhanú bhareeganirirya aga ekyaro ageenego.

¹³Kweki tutakugamba amangʼana ganú tweehigiribhwa na egintungwa gya abhantu, nawe, amangʼana ganú tweehigiribhwa na Omutima wa Waryubha. Turoonjoora amangʼana ga Omutima wa Waryubha kubhanú bhaana Omutima uyo.2:13 Kubhanú bhaana Omutima uyo. Ensonga eindi eratura okubha ega, kumangʼana ga Omutima.¹⁴Nawe, omuntu unú ataana Omutima wa Waryubha, atakugwata ganú gararwa mu Mutima wa Waryubha, kwa okubha kumwene gayo m-bukangi, kora atakutura okugamanya, kwa okubha garamanyikana ego, kwa enjira ya Omutima wa Waryubha. ¹⁵Omuntu unú yaana Omutima wa Waryubha, areekomya gonsego, nawe weeki, omuntu wowonse atakutura okumwikomya. ¹⁶Amangʼoore Amarabhu garagamba ega,

“Niwi unú amanyiri ganú Omukuru Waryubha areeganirirya?

Kweki niwi unú aratura okumutongera?”2:16 Maaha mukitabho kya Isaaya 40:13.

Nawe, bheetu abheekirirya tureeganirirya ganú gararwa ku Kiristu.

Obhumwi kumirimu gya Waryubha

¹Abhahiiri bhaani kuimani, hanú naaringa kubheenyu, ntaaringa ndagamba na bheenyu kya abhantu bhanú bharoorokereribhwa na Omutima Omurabhu. Nawe, naaringa ndagamba na bheenyu kya abhantu bhanú bharoorokereribhwa na amangʼana ga ekyaro, kweki kya abhaana abharera kukumwikirirya Kiristu. ²Abhaana abharera, bharanywa amabheere ageenego, bhatakuhaanwa ebhyakurya kwa okubha bhatakubhinagya. Egoego, oni nonse naabhahaana ameehigiryo amanyoohu kwa okubha mwaringa mutaranaga. Na kora bhoono mutaranaga, ³kwa okubha mukyoorokereribhwa na amangʼana ga ekyaro. Neegwiri ega, gati yeenyu muuna orwango na eritoongʼana. Bhoono, gayo gatakoorokya ega, mukyoorokereribhwa na amangʼana ga ekyaro na mukyeekara kya abhantu bha ekyaro? ⁴Ndagamba ego, kwa okubha kira omuntu aragamba bhwaye, oumwi aragamba ega, “Oni ngʼ-wa Pauro,” oundi aragamba ega, “Oni ngʼ-wa Apooro.” Bhoono, gayo gatakoorokya ega, mukyakora kya abhantu bha ekyaro?

⁵Mbe bhoono, Apooro niwi? Na oni Pauro niwi? Bheetu turingi abhakori bha emirimu bhanú Waryubha yaatutuma okubhabheera bheenyu mumwikirirye. Kira oumwi arakora emirimu kya ego yaahaanwa na Omukuru. ⁶Oni naahamba egimbusuro, Apooro akeetiriira amanji, nawe Waryubha ngʼo yaagimerya na okugikiinʼya. ⁷Ego, unú arahamba egimbusuro ataringi ekintu, kora unú areetiriira, nawe Waryubha unú arakiinʼya ngʼo wa okwisigirwa. ⁸Unú arahamba egimbusuro na unú areetiriira bhonsego bharingi ekintu kimwi, na Waryubha arimuhaana kira oumwi omutuho gwaye, okuringʼaana na kya ego yaakora emirimu gyaye. ⁹Ndagamba ego, kwa okubha bheetu turakora emirimu gya Waryubha. Na bheenyu m-mugunda gwaye, na enyumba yaaye.

¹⁰Waryubha kwa eriruguto ryaye, yambeereri okuhagaaja obhurusa kya omuhagaaji omujomu owa egintungwa, na omuntu oundi arahagaaja eguru ya obhurusa bhuyo. Nawe bhoono, kira omuntu yeeyikomye bhujomu, kya ego arahagaaja eguru ya obhurusa bhuyo. ¹¹Akore ego, kwa okubha obhurusa bhunú bhumariri okuhagaajwa n-Yeesu Kiristu omwene, atariho omuntu unú aranagya okuhagaaja obhurusa obhundi. ¹²Omuntu wowonse aratura okuhagaaja eguru ya obhurusa bhuyo, kwa egijahaabhu, kwa ebhigera bhya egimbirya kasi kwa amagina ga obhwera obhunene, kwa emiti, kwa amasya kasi kwa obhunyanki. ¹³Kira omuntu, emirimu gyaye girimaahikana ega, giringi egaki. Orusiku rurya rwa okubhutura ekiina, emirimu gyonsego giribha kubhurabhu, kwa okubha emirimu gya omuntu wowonse, girirengwa kwa omururo gwa okubhuturira ekiina. ¹⁴Nyoore emirimu gya omuntu gitarirungura, omuntu uyo, arinyoora omutuho. ¹⁵Nawe, nyoore emirimu gya omuntu girirungura, hayo atarinyoora omutuho, nawe, weeki omwene arituuribhwa, kya omuntu unú ahoneeri orwa okwagura, okusoha mumururo.

¹⁶Bhoono, mutamanyiri ega, bheenyu ni-risyengerero rya Waryubha, na ega, Omutima wa Waryubha areekara munsi weenyu? ¹⁷Nyoore omuntu araasarye erisyengerero rya Waryubha, omuntu uyo, Waryubha arimusarya, kwa okubha erisyengerero rya Waryubha ni-rirabhu, na erisyengerero riyo m-beenyu.

¹⁸Omuntu wowonse gati yeenyu, ateengʼeena ega, yaana egintungwa. Nyoore omuntu areerore ega, yaana egintungwa mukyaro kinu, abhe areekora omukangi, naho anyoore egintungwa gya maheene. ¹⁹Yeekore okubha ego, kwa okubha egintungwa gya ekyaro kinu, m-bukangi embere ya Waryubha. N-kya ego yaangʼoorwa mu Mangʼoore Amarabhu ega, “Waryubha arabhagwatya abha egintungwa mubhungʼeeni bhwabho.”3:19 Maaha mukitabho kya Ayubhu 5:13.²⁰Kweki yaangʼoorwa ega, “Omukuru amanyiri ameetegeerero ga abha egintungwa, ega, gataana obhwera.”3:20 Maaha mukitabho kya Egijabhuri 94:11.

²¹Bhoono, omuntu wowonse ateegungya kwa okubha weeki m-mwihigira wa omuntu nyabhurebhe. Ndagamba ego, kwa okubha bheetu bhonsego, Waryubha atusoreri okubhabheera bheenyu, ²²abhe oni Pauro, abhe Apooro, kasi abhe Kefa. Kweki Waryubha abhaheeri ebhintu ebhindi bhya okubhabheera, bhibhe ebhya mukyaro, kasi obhuhoru kasi oruku, bhibhe bhinú bhiriho bhoonwego kasi bhinú bhiriija, bhyonsego m-byenyu. ²³Nawe, bheenyu, m-ba Kiristu, na Kiristu ngʼ-wa Waryubha.

Emirimu gya abhatumwa

¹Kwa ego, abhantu bhatubhare ega, bheetu m-bakori bha emirimu bha Kiristu, tuheerwe emirimu gya okuraarika amangʼana ga Waryubha ganú gaaringa geebhisiri. ²Bhoono, omuntu unú aheerwe emirimu, areenderwa abhe omuheene. ³Nawe kuoni, ntakurora ega, n-kintu nkaajongerwa na bheenyu, kora nkaabhuturirwa ekiina na eribharaja. Nawe oni omwene ntakwijongera, ⁴kwa okubha ntakunyahaarika na ryoryonse mumutima gwani. Nawe, riyo ritakunkora mbe ntaana amasoro. Omukuru Yeesu ngʼo arambuturira ekiina. ⁵Mbe bhoono, mutabhuturira ekiina abhantu eribhaga ryabho ritarahika, muganye okuhikira orusiku runú Omukuru ariija. Weeki ngʼo aritubhura ebhintu bhyonsego bhinú bhibhisirwe mukisunte na okoorokya ganú garingi mumitima gya abhantu. Nho kira omuntu arinyoora eginkuma gyaye ginú areenderwa, okurwa ku Waryubha.

⁶Abhahiiri bhaani kuimani, ngambiri amangʼana gayo gonsego, eguru yaani na Apooro, naho tubhe ekirengekanʼyo kurusumo rwenyu. Okurekana na ekirengekanʼyo kiyo, mugwate ganú garagambwa mungamba inu, “Mutatuuma ganú gaangʼoorwa mu Mangʼoore Amarabhu.” Kwa okukora ego, ataabhe-ho omuntu wowonse unú areeheemere omuntu oumwi na okumujeera oundi. ⁷Bhoono, niwi unú yaabhakora bheenyu okubha abha eguru okukira abhandi? N-kintu-ki kinú muunakyo kinú mutaahaanwa na Waryubha? Nyoore mwahaanwa, kwaki mureegungya muna mutaahaanwa?

⁸Bhoono, mureerora mwigutiri! Mureerora muringi abhaniibhi! Mureerora muringi abhakama bira bheetu! Nyakara nyoore mukaabheeri abhakama heene, naho bheetu, tutunge hamwi na bheenyu! ⁹Nawe, ndeeganirirya ega, Waryubha yaatukora bheetu abhatumwa okubha abhantu bha okujeerwa okukira bhonsego. Turingi kya abhantu bhanú bhaabhuturiirwe ekiina okwitwa. Tukorerwe okubha abhantu bha okusekwa mukyaro, kubhamaraika4:9 Kubhamaraika. Maaha Bhamaraika mu Moonjooro eguru ya Amangʼana Amakongʼu. na kubhantu. ¹⁰Bheetu turamaahikana ega, turingi abhakangi, kwa okubha turakora emirimu gya Kiristu, nawe bheenyu mureerora ega, muringi abha egintungwa kwa okubha murasoorana Kiristu. Bheetu turamaahikana ega, turingi abhanyooheeru, nawe bheenyu mureerora ega, muuna eginguru. Bheetu turajeerwa, nawe bheenyu mureerora ega, muringi abhasuukwa. ¹¹Kora bhoonwego tuuna omweko na enyonta, kweki tutaana emyenda, turatemwa, kora tutaana aha okwikara. ¹²Turanyanka enu turakora emirimu kwa amabhoko geetu abheene. Hanú abhantu bharatutuka, bheetu turabhanonka. Hanú abhantu bharatunyankya, tureegumirirya. ¹³Hanú bharatuhaamirirya amabhiibhi, bheetu turabhakyukya bhujomu. Tukorerwe muna obhunyanku bhwa ekyaro okuhikira bhoonwego, kweki tutakwenderwa kuryoryonse.

¹⁴Ntakubhangʼoorera amangʼana gayo, naho mumaahe eginsoni, nawe ndeenda okubhakemera kya abhaana bhaani abhahanje, ¹⁵kwa okubha onyoora muuna abhantu muna ebhiku ekumi bhanú bharabheehigirya eguru ya Kiristu, nawe eseweenyu ngʼ-umwi. Oni nooni naabheebhura ku Kiristu Yeesu, kwa okubharaarikira Amangʼana Amajomu. ¹⁶Bhoono, ndabhakomererya ega, mubhenga murakora kya ego oni ndakora. ¹⁷Kiyo nkyo kikoreri mmutumiri Timoteo, omwana waani omuhanje kuimani. Weeki m-muheene kumirimu gya Omukuru. Mmutumiri naho abhenga arabhahiitukya ganú oni ndagwata kubhuhoru bhwani na Kiristu, ganú ndeehigirya abhantu kira ahasi mumakanisa gonsego.

¹⁸Bhoono, abhandi gati yeenyu, bhareeheema, kwa okubha bhareeganirirya ega, ntakyaaja kweki kubheenyu eyo. ¹⁹Nawe, Omukuru Yeesu akaahanja, ndaaje kubheenyu eyo bhwangu hanu. Hayo nho ndimanya amangʼana ganú bharagamba abhantu bhanú bhareeheema. Na etaringi okumanya amangʼana gayo ageenego, nawe kora okumanya eginguru gyabho gya eimani. ²⁰Ndagamba ego, kwa okubha obhukama bhwa Waryubha,4:20 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. bhutakumaahikana kwa amangʼana ageenego, nawe ekinene kwa eginguru gya eimani. ²¹Bhoono, bheenyu mureenda egaki? Niije kubheenyu eyo na engʼimbo? Kasi niije kwa obhuhanje na obhunyoohu?

Obhusimbe bhutakwenderwa mwikanisa

¹Maheene amangʼana ganyarageeni ega, gati yeenyu bhurimo obhusimbe. Obhusimbe kya bhuyo, bhutaakeebhukiri kora kubhantu bhanú bhatamumanyiri Waryubha, obhusimbe bhwa omuntu okutaara na omukari wa esewaabho. ²Nawe, bheenyu mureeheema! Kora mutakusurumbara, na okumwahura omuntu unú arakora ego, arwe gati yeenyu. ³Onyoora oni ndingi ahare na bheenyu, nawe omutima gwani guringi hamwi na bheenyu. Mbe bhoono, mmariri okumubhuturira ekiina omuntu uyo, kya ego nkaakoreri hanú nkaabheeri eyo. ⁴Eribhaga mureekumanʼya kuriina rya Omukuru weetu Yeesu, oni nonse ndabha hamwi na bheenyu kwa omutima, na obhuturo bhwa Omukuru weetu Yeesu bhonse, bhurabha hamwi na bheenyu. ⁵Hayo mumugwatye omuntu uyo mubhutungi bhwa Erisambwa,5:5 Erisambwa. Maaha eringʼana rinu mu Moonjooro eguru ya Amangʼana Amakongʼu. naho enteemo yaaye ya obhusarya esikibhwe, nawe, weeki omwene atuuribhwe orusiku rwa okuhunjuka kwa Omukuru Yeesu.

⁶Okwigungya kwenyu kutakwenderwa. Mutamanyiri ega, ekimera ekikego, kirabhimbya eriguma erigima? ⁷Ego, mubhenga mureeraama, kwa enjira ya okwahura omuntu omusarya uyo okurwa kubheenyu, kya okuruusya ekimera kya akare. Hayo muribha abhantu bhanú mutaana amasoro, kya eriguma erihya rinú ritaana ekimera. Na ego niigo mwamariri okubha, kwa okubha Kiristu, Omwana wa Eringʼondi weetu wa Epasaka,5:7 Omwana wa eringʼondi weetu wa Epasaka. Abhaisiraeri hanú bhaaringa mubhugaya Misiri erya, bhaagooga omwana wa eringʼondi, na amanyinga gaaye bhakagahaka mubhiseku, naho maraika wa Waryubha atabheeta. Maaha mukitabho kya Okuhuruka 12:21-23. Yeesu ararengekanibhwa na omwana wa eringʼondi, kwa okubha okuhitira ku Yeesu, Waryubha yaatutuurya okurwa mubhusarya, naho tubhe abhantu bhaaye. Maaha Omwana wa Eringʼondi na Epasaka mu Moonjooro eguru ya Amangʼana Amakongʼu. yaamara okuruusibhwa okubha ekimwenso, naho atutuurye. ⁸Bhoono, tutakora Epasaka kwa ekimera kya akare, yaani kwa obhubhiibhi na obhusarya, nawe tuikore kwa emikaate ginú gitakutuurwa-mo ekimera,5:8 Emikaate ginú gitakutuurwa-mo ekimera. Hanú bhaamara enyangi ya Epasaka, Abhaisiraeri bhaaringa na enyangi inú yaabhirikirwanga ega, Emikaate ginú gitakutuurwa-mo ekimera. Bhaaringa bhararya emikaate giyo kwa eginsiku muhungati. Maaha mubhitabho bhya Okuhuruka 12:3-20; Obhuhiituki bhwa Amaragiriryo 16:3, kweki maaha Epasaka mu Moonjooro eguru ya Amangʼana Amakongʼu. yaani kwa omutima omujomu na kwa obhuheene.

⁹Munyarubha inú naabhangʼoorera, naabhakeerya ega, mutagwatana na abhasimbe. ¹⁰Ensonga yaani etaaringa ega, mutagwatana kora hake na abhasimbe bha mukyaro kinu, kasi abha orunamba rwa ebhintu, na bhanú bhararuusya abhantu ebhintu bhyabho kwa eginguru, kora bhanú bharasyengera ebhisusano, kwa okubha riyo rikaabhakoreri murwe mukyaro munu. ¹¹Nawe naabhangʼoorera ega, mutagwatana na abhantu bhanú bhareebhirikira abheekirirya abharikyenyu, enu bharingi abhasimbe, abhantu bha orunamba rwa ebhintu, abhantu bhanú bharasyengera ebhisusano, abhagambi bha abhandi, abhareebhi na bhanú bhararuusya abhantu ebhintu bhyabho kwa eginguru. Abhantu kya bhayo, kora mutige okurya nabho.

^12-13Mbe bhoono, etakuntunʼya okubhuturira ekiina abhantu bhanú bhataringi abheekirirya. Bhayo, Waryubha omwene ngʼo aribhabhuturira ekiina. Nawe bheenyu mureenderwa okubhuturira ekiina bhanú bharingi mwikanisa, kya ego yaangʼoorwa mu Mangʼoore Amarabhu ega, “Omuntu omusarya gati weenyu mumukenyie.”5:12-13 Maaha mukitabho kya Obhuhiituki bhwa Amaragiriryo 17:7, 19:19, 22:21, 24, 24:7.

Okujongerana gati ya abheekirirya

¹Nyoore oumwi gati weenyu yaana eritoongʼana na omwikirirya omurikyaye, kwaki abhe na obhuhaari bhwa okumujongera kubhantu bhanú bhataringi abheekirirya? N-kwaki atige okumuhira kubhantu bha Waryubha? ²Mutamanyiri ega, abhantu bha Waryubha bharibhuturira ekiina ekyaro kinu kyonsego? Na nyoore ekyaro kinu kiribhuturirwa ekiina na bheenyu, kwaki mutamwe okubhutura ekiina kya amangʼana amake gati yeenyu? ³Mutamanyiri ega, turibhabhuturira ekiina kora bhamaraika? Nyoore niigo, mbe, mureenderwa okubhutura ekiina kya amangʼana ga obhuhoru bhwa kira orusiku. ⁴Bhoono, hanú mutoongʼeeni abheene kwa abheene, eguru ya amangʼana ga obhuhoru bhwa kira orusiku, kwaki murahira obhujongeri bhwenyu kubhabhuturi bha ekiina bhanú bhataringi abheekirirya kora bhatakusuukwa na erikanisa? ⁵Ndagamba ego, naho murore eginsoni. Bhoono, gati weenyu atariho kora omuntu oumwi unú yaana egintungwa, unú aratura okubhutura ekiina kyenyu? ⁶Nawe, bheenyu muuna enteemo ya omuntu okumujongera omwikirirya omurikyaye mwibharaja, kweki kubhantu bhanú bhataringi abheekirirya!

⁷Okujongerana kuyo, kuroorokya ega, mutamirwe kimwi. Ekaabheeri bhujomu bhukongʼu, okutiga omuntu akuraarire kasi akuruusye ebhintu bhyaho. ⁸Nawe bhoono, bheenyu mbo muraraarira abhantu na okubharuusya ebhintu bhyabho. Murakorera kora abheekirirya abharikyenyu. ⁹Kasi mutamanyiri ega, abhakori bha amabhiibhi bhatarisoha mubhukama bhwa Waryubha? Mutangʼeenwa! Abhasimbe, abhantu bhanú bharasyengera ebhisusano, abhasuunu, abhasaaja bhanú bharakora ameega na abhasaaja abharikyabho, ¹⁰abheebhi, abha orunamba rwa ebhintu, abhareebhi, abhagambi bha abhandi, na bhanú bhararuusya abhantu ebhintu bhyabho kwa eginguru, bhayo bhonsego bhatarisoha mubhukama bhwa Waryubha. ¹¹Abhandi gati weenyu mwaringa na eginteemo kya giyo. Nawe bhoono, kwa okuhitira ku Mukuru weetu Yeesu Kiristu, na kwa eginguru gya Omutima wa Waryubha weetu, moogiibhwe obhubhiibhi bhwenyu, musorerwe okubha abhantu bha Waryubha, na okubharwa ega, muringi abhaheene embere yaaye.

Abheekirirya bhatige kimwi obhusimbe

¹²Abhantu abhandi gati yeenyu bharagamba ega, “Tureekiriribhwa okukora ebhintu bhyonsego bhinú tureenda.” Nawe, oni ndagamba ega, bhitaringi bhyonsego bhinú bhiina obhwera kubheetu. Onyoora muragamba ega, “Tureekiriribhwa okukora ebhintu bhyonsego bhinú tureenda,” nawe, oni ntakubha omugaya wa ekintu kyokyonse. ¹³Abhandi gati yeenyu bharagamba ega, “Hanú tuuna omweko tureenderwa okurya, kwa okubha emibhiri gyetu gireenda ebhyakurya.” Niigo eringi, nawe, riraaja eribhaga rinú Waryubha arihunjura emibhiri gyetu gibhe gitakwenda ebhyakurya. Mutagamba ega, tureenderwa okukora obhusimbe, kya ego tureenderwa okurya ebhyakurya hanú tuuna omweko. Ndagamba ego, kwa okubha Waryubha ataabhumba emibhiri gyetu kurusumo rwa obhusimbe, nawe yaagibhumba kurusumo rwa okumukorera emirimu Omukuru, na Omukuru wonse aragituga bhwaheene. ¹⁴Kweki Waryubha arituhyukya bheetu kwa obhuturo bhwaye, kya ego yaamuhyukya Omukuru Yeesu okurwa muruku.

¹⁵Bhoono, mutamanyiri ega, emibhiri gyenyu, m-biroobhero bhya Kiristu? Bhoono, muratura okugwatanʼya ebhiroobhero bhya Kiristu na emibhiri gya abhasimbe? Tiigo-ha kora hake! ¹⁶Mutamanyiri ega, omuntu wowonse unú aragwatana na omusimbe, arabha omubhiri gumwi nawe? Kwa okubha engʼoorerwe mu Mangʼoore Amarabhu ega, “Abhabhiri bhayo, bharibha omubhiri gumwi.”6:16 Maaha mukitabho kya Obhwambiro 2:24.¹⁷Nawe, omuntu wowonse unú aragwatana na Omukuru Yeesu Kiristu, arabha omutima gumwi na weeki.

¹⁸Mwiyangararire mutakora obhusimbe. Obhusarya obhundi bhonsego, omuntu arakora kibhara ya omubhiri gwaye, nawe, omuntu unú arataara kibhara, uyo aragukorera obhusarya omubhiri gwaye omwenego. ¹⁹Mutamanyiri ega, emibhiri gyenyu ni-risyengerero rya Omutima Omurabhu, unú Waryubha yaabhahaana, kweki ega, Omutima Omurabhu areekara munsi weenyu? Bhoono emibhiri giyo gitaringi gyenyu, nawe, n-gya Waryubha, ²⁰kwa okubha mwatunguribhwa kwa obhuguri obhunene bhukongʼu. Bhoono mbe, mumugungye Waryubha mumibhiri gyenyu.

Obhutongeri eguru ya obhutetani

¹Bhoono, ndagamba eguru ya amangʼana ganú mwanngʼoorera. Muragamba ega, “M-bujomu omusaaja atakora ameega na omukari.”7:1 M-bujomu omusaaja atakora ameega na omukari. Ensonga eindi eratura okubha ega, M-bujomu omuntu atateta.²Nawe, kwa ekisigo kya amasakyo ga okukora obhusimbe, kira omusaaja abhe na omukari waaye omwene, na kira omukari abhe na omusaaja waaye omwene. ³Omusaaja abhenga aramukorera omukari waaye kya ego ereenderwa, omukari wonse abhenga aramukorera omusaaja waaye kya ego ereenderwa. ⁴Omukari ataana obhwamuri eguru ya omubhiri gwaye, nawe omusaaja waaye ngʼo yaana obhwamuri. Omusaaja wonse ataana obhwamuri eguru ya omubhiri gwaye, nawe omukari waaye ngʼo yaana obhwamuri. ⁵Muteemana, nawe nyoore mureekiriranʼye okutigana kwa eribhaga ekego, naho munyoore omweya gwa okumusabha Waryubha. Mumare muhindirane kweki, naho Erisambwa ritariija okubhasakya okukora obhusimbe kwa okubha mutakutura okwigumirirya.

⁶Amangʼana eguru ya okutigana kwa eribhaga ekego, m-butongeri, gataringi ga okubhabhandirirya. ⁷Bhoono, oni nkaahanjiri abhantu bhonsego bhabhe kya ego ndingi,7:7 Bhabhe kya ego ndingi. Ensonga ya Pauro ya okugamba ego, yaaringa ega, weeki ataateta, na kiyo nkyo kyaringa ekibharo kyaye. nawe etaringi ego, kwa okubha kira omuntu Waryubha amuheeri ekibharo kyaye, oundi kinu, oundi kirya.

⁸Nawe, ndabhakeerya ega, gati yeenyu bhanú bhatarateta na abhasino, m-bujomu bhagendererye okwikara abheene, bhatateta kasi okutetwa, kya ego oni ndingi. ⁹Nyoore bhatakunagya okwiribhira, m-bujomu bhatete kasi okutetwa, kwa okubha nyakara okukora ego, okukira okubha na orunamba orubhiibhi rwa omubhiri.

¹⁰Kubhanú bhaamara okutetana, ndabhahaana eriragiriryo. Eriragiriryo riyo ritaringi ryani, nawe rirwiri ku Mukuru Yeesu, ega, omukari atatigana na omusaaja waaye.7:10 Maaha mubhitabho bhya Mataayo 5:32; Mariko 10:11-12.¹¹Nawe, nyoore araatigane nawe, atatetwa na omusaaja oundi, nyoore tiigo, yeegwane na omusaaja waaye na okuhindirana. Omusaaja wonse, atamutiga omukari waaye.

¹²Bhoono, ndagamba na abheekirirya abhandi. Amangʼana ganú ndabhakeerya m-meetegeerero gaani, gataringi amaragiriryo ga Omukuru Yeesu. Nyoore omusaaja omwikirirya ateteri omukari unú ataringi omwikirirya, na omukari uyo yeekirirye okugendererya okwikarana nawe, atamutiga. ¹³Egoego, omukari omwikirirya, nyoore ateterwe na omusaaja unú ataringi omwikirirya, na omusaaja uyo yeekirirye okugendererya okwikarana nawe, atamutiga. ¹⁴Ndagamba ego, kwa okubha Waryubha aramuraama omusaaja unú ataringi omwikirirya, okuhitira kumukari waaye. Na omukari unú ataringi omwikirirya wonse, Waryubha aramuraama okuhitira kumusaaja waaye. Nyoore etakaabheeri ego, abhaana bheenyu bhatakaabheeri abhaana bha Waryubha, nawe bhoono m-baana bha Waryubha.

¹⁵Nawe, nyoore unú ataringi omwikirirya areenda okutigana na omurikyaye omwikirirya, mutige agye. Hayo omwikirirya uyo, atakubhohwa na obhutetani bhuyo. Nawe Waryubha atubhirikiiri, naho twikare kwa omurembe.7:15 Waryubha atubhirikiiri, naho twikare kwa omurembe. Amangʼoore agandi ga akare aga Ekiyunani garagamba ega, Waryubha abhabhirikiiri, naho mwikare kwa omurembe.¹⁶Uuwe omukari omwikirirya, otakutura okumanya! Hamwi omusaaja waaho aratura okubha omwikirirya okuhitira kuimani yaaho. Na uuwe omusaaja omwikirirya, otakutura okumanya! Hamwi omukari waaho aratura okubha omwikirirya okuhitira kuimani yaaho.

Okwikara kya ego waaringa eribhaga waabhirikirwa na Waryubha

¹⁷Kira omuntu yeekare kya ego Omukuru yaamutuura okubha, na agendererye okubha kya ego yaaringa hanú Waryubha yaamubhirikira. Ego niigo ndaragirirya mumakanisa gonsego. ¹⁸Nyoore omuntu yaabhirikirwa na Waryubha, eribhaga amariri okusaarwa, ateekorya ega, atarasaarwa. Kweki, nyoore omuntu yaabhirikirwa na Waryubha, eribhaga atarasaarwa, uyo atasaarwa. ¹⁹Okusaarwa kutaana obhwera na okwanga okusaarwa kutaana obhwera. Kinú kiina obhwera n-kugwata amaragiriryo ga Waryubha.

²⁰Bhoono, kira omuntu agendererye okubha kya ego yaaringa hanú Waryubha yaamubhirikira. ²¹Nyoore Waryubha yaakubhirikira eribhaga waaringa omugaya, riyo ritakutunʼya. Nawe oraanyoore omweya gwa okwiyagaara, otumire omweya guyo. ²²Ngambiri ega, riyo ritakutunʼya, kwa okubha omuntu unú yaaringa omugaya eribhaga rinú yaabhirikirwa na Omukuru, uyo areeyagaara, embere ya Omukuru. Na unú yaaringa areeyagaara eribhaga rinú yaabhirikirwa, uyo m-mugaya wa Kiristu. ²³Mwatunguribhwa kwa obhuguri obhunene bhukongʼu. Ego, mutabha abhagaya bha abhantu. ²⁴Abhahiiri bhaani kuimani, kira omuntu agendererye okubha embere ya Waryubha kya ego yaaringa hanú Waryubha yaamubhirikira.

Obhutongeri kubhanú bhataratetwa, na abhasino

²⁵Bhoono, kubhahara bhanú bhataratetwa,7:25 Kubhahara bhanú bhataratetwa. Ensonga eindi eratura okubha ega, kubhanú bhatarateta kasi okutetwa. ntaana amaragiriryo eguru yaabho, okurwa ku Mukuru Yeesu. Nawe, ndabhatongera kwa ameetegeerero gaani, oni unú ndeekiriribhwa kwa ekisigo kya ekyabhira kya Waryubha. ²⁶Mbe, okurekana na enyanko inú eriho, ndamanya ekaabheeri bhujomu omuntu atame kya ego aringi. ²⁷Nyoore waateta, oteenda okutigana na mukaaho. Nyoore otarateta, otatuna omukari. ²⁸Nawe, nyoore oraatete, otaabhe okoreri obhusarya. Na omuhara wonse, nyoore araatetwe, ataabhe akoreri obhusarya. Nawe, bhanú bhateteeni bharinyoora enyanko mukyaro. Na oni nkeenderi enyanko iyo, etariija okubhanyoora.

²⁹Abhahiiri bhaani kuimani, ndeenda okugamba ega, eribhaga rinú ryatamiri Kiristu ahunjuke, ni-kego. Mbe, okurwa bhoono, bhanú bhaana abhakari bhatige okwiganirirya abhakari bhaabho abheenego, naho bhakore emirimu gya Omukuru. ³⁰Na bhanú bharakuura, bhanú bharajomerwa, bhanú bharagura ebhintu, ³¹na bhanú bharatunibhwa na obhuhoru bhwa mukyaro kinu, bhayo bhonsego bhatanyanka bhukongʼu na amangʼana gayo. Bhareenderwa bhakore emirimu gya Omukuru, kwa okubha ekyaro kinu kya ego turakimaaha kirahita.

³²Ndeenda muteeganirirya okukira hayo, eguru ya obhuhoru bhwa mukyaro kinu. Omuntu unú atateteri, oranyoora yeeruusirye okukora emirimu gya Omukuru, areeganirirya kya ego araamusambaarukye Omukuru. ³³Nawe, omuntu unú ateteri, oranyoora yeeruusirye okukora ga obhuhoru bhwa mukyaro kinu, areeganirirya kya ego araamujomerye omukari waaye, ³⁴ameetegeerero gaaye garibha mbaara ebhiri. Omukari kasi omuhara unú atateterwe, oranyoora yeeruusirye okukora emirimu gya Omukuru, ature okwiruusya kwa omubhiri na omutima ku Mukuru. Nawe omukari unú ateterwe, oranyoora yeeruusirye okukora ga obhuhoru bhwa mukyaro kinu, areeganirirya kya ego araamujomerye omusaaja waaye. ³⁵Ndagamba amangʼana gayo, kwa obhwera bhwenyu abheene, etaringi ega, ndeenda okubharibhira. Ndeenda ega, mubhenga mureekara kya ego ereenderwa, mumukorerenga Omukuru emirimu, kwa emitima gyenyu gyonsego.

³⁶Nawe, omuntu wowonse unú araarore ega, etaringi bhujomu okutiga okumuteta omuhara unú amurombeeri obhuko, kweki eribhaga rya obhuhara bhwaye erya okutetwa ryahwa,7:36 Kweki eribhaga rya obhuhara bhwaye erya okutetwa ryahwa. Ensonga eindi eratura okubha ega, kweki nyoore enamba yaaye eramuhiga. na omuntu uyo ararora ega, ereenderwa bhatetane, akore kya ego areenda, bhatetane. Hayo aribha atakoreri obhusarya. ³⁷Na nyoore omuntu araamure okurwa mumutima gwaye omwene ega atakuteta, na kitariho ekintu kinú kiramubhandirirya okuteta, kweki aratura okwiribhira enamba yaaye, na yaamure ega, atakumuteta omuhara uyo, aribha akoreri bhwaheene. ³⁸Kwa ego, unú araamura okuteta omuhara unú arombeeri obhuko, arakora bhujomu, na unú aratiga okumuteta arakora bhujomu bhukongʼu.7:36-38 Kumichafwa ginu 36-38, ensonga eindi eratura okubha ega, Nawe, omuntu wowonse unú araarore ega, etaringi bhujomu okutiga okutetya omuhara waaye unú arombeerwe obhuko, kweki eribhaga rya obhuhara bhwaye erya okutetwa ryahwa, amutetye, ataabhe akoreri obhusarya. Na nyoore omuntu araamure okurwa mumutima gwaye omwene ega, atakutetya omuhara waaye, na kitariho ekintu kinú kiramubhandirirya okumutetya, kweki aratura okwiribhira enamba yaaye, na yaamure ega, atakumutetya omuhara uyo, aribha akoreri bhwaheene. Kwa ego, unú araamura okutetya omuhara unú arombeeri obhuko, arakora bhujomu, na unú aratiga okumutetya arakora bhujomu bhukongʼu.

³⁹Omukari unú ateterwe, arabhohwa na obhutetwa eribhaga ryonsego rya obhuhoru bhwa omusaaja waaye. Nyoore omusaaja waaye akwiri, hayo arabha na obhwiyagaari, bhwa okutetwa na omusaaja wowonse unú areende, nawe omusaaja uyo, abhe omwikirirya wa Omukuru. ⁴⁰Nawe, nyakara omusino uyo, atakaateterwe. Ego niigo oni ndarora, na ndeeganirirya ega, kora oni nonse ndoorokereribhwa na Omutima wa Waryubha okugamba amangʼana gayo.

Ebhyakurya bhinú bhimwenseerwe ebhisusano

¹Bhoono ndagamba eguru ya ebhyakurya bhinú bhimwenseerwe ebhisusano.8:1 Ebhyakurya bhinú bhimwenseerwe ebhisusano. Kuginsiku giyo, bhaambanga okumwensa mbere kubhisusano bhinú bhaabhirikiranga ega, abhakuru, hanú bhaamaranga okusyengera, enyama enjaru, bhaaihiranga okugurya mumudiira. Tumanyiri ega, “Bheetu bhonsego tuuna obhumanyi,” kya ego bheenyu muragamba. Nawe, obhumanyi bhurakora abhantu bheeheeme. Na obhuhanje bhurakora abhantu bhanage kuimani. ²Nyoore omuntu areerora ega, amanyiri eringʼana nyabhurebhe, uyo oranyoora ataramanya kya ego areenderwa okumanya. ³Nawe, omuntu unú aramuhanja Waryubha, uyo ngʼo aramanyikana ku Waryubha.

⁴Bhoono, eguru ya okurya ebhyakurya bhinú bhimwenseerwe ebhisusano, tumanyiri ega, ebhisusano bhinú bhirasyengerwa, bhitaringi ekintu mukyaro munu. Kweki tumanyiri ega, ariho Waryubha oumwi omwenego. ⁵Maheene abhantu abhandi bhareeganirirya ega, bhariho abhakuru murwire na mukyaro. Kweki bhiriho ebhintu ebhyaru bhinú abhantu bharabhibhirikira ega, abhakuru kasi abhatungi. ⁶Nawe, kubheetu, ariho Waryubha umwi omwenego, ngʼo Taata, ngʼo yaabhumba ebhintu bhyonsego. Bheetu tureekara kurusumo rwaye. Kweki ariho Omukuru umwi ego, ngʼo Yeesu Kiristu, na ebhintu bhyonsego bhyabhumbwa okuhitira kuweeki, kweki turingi abhahoru okurekana na weeki.

⁷Nawe, etaringi ega, abhantu bhonsego bhaana obhumanyi bhuyo, kwa okubha bhariho abhantu abhandi bhanú bhaaringa na egimiira gya okubhisyengera ebhisusano. Kora bhoono, hanú bhararya ebhyakurya bhinú bhimwenseerwe ebhisusano, ebhyakurya bhiyo bhirabhahiitukya ebhisusano. Hayo bhareerora mumeetegeerero ega, bharakora obhusarya, kwa okubha bhataranaga kuimani. ⁸Bhoono, ebhyakurya bhitakututuura tubhe haangʼi na Waryubha, kwa okubha tukaatiga okurya, tutakusuuhirwa ekintu, kweki kora tukaarya, tutakoongeribhwa ekintu.

⁹Nawe, mwiyangararire, obhwiyagaari bhwenyu bhutabha bhurabhagwisya bhanú bhataranaga kuimani. ¹⁰Ndagamba ego, kwa okubha omuntu unú ataranaga kuimani, hanú araakurore uuwe unú omanyiri ega, ebhisusano bhitaana obhuhoru, orarya ebhyakurya mwisyengerero rya ebhisusano, ateeganirirye mumeetegeerero ega, wonse areenderwa okurya ebhyakurya bhinú bhimwenseerwe ebhisusano? ¹¹Kwa enjira iyo, omwikirirya omurikyaho uyo, ataranaga kuimani, unú Kiristu yaamukwira, arabhura okurekana na obhumanyi bhwaho.

¹²Ego, nyoore muraabhasarirye abheekirirya abharikyenyu bhanú bhataranaga kuimani, bhakore obhusarya, na okubhanyahaara ameetegeerero gaabho, hayo muribha mumusariirye Kiristu omwene. ¹³Kwa ego, nyoore ebhyakurya bhinú ndarya, bhiramukora omwikirirya omurikyani akore obhusarya, mbe, ntakyarya kweki ebhyakurya bhya ekabhira iyo, naho ntariija okukora omwikirirya omurikyani akore obhusarya.

Abhakori bha emirimu bhareenderwa bhahaanwe-ko ebhintu

¹Bhoono, oni ntakwiyagaara? Oni ntaringi omutumwa? Oni ntaamurora Omukuru weetu Yeesu? Emirimu ginú oni naakora tigyo gyakora bheenyu mumwikirirye Omukuru? ²Kora nyoore abhantu abhandi bhararora ega, oni ntaringi omutumwa, nawe, kubheenyu oni m-mutumwa, kwa okubha eimani yeenyu ku Kiristu n-dubhaaso rwa okoorokya ega, oni naatumwa na Omukuru.

³Abhantu bhanú bharanhakaanʼya oni ega, ntaringi omutumwa, ndabhakeerya ega, ⁴bheetu tutakwenderwa okuhaanwa ebhyakurya na ebhya okunywa kurusumo rwa emirimu gyetu gya obhutumwa? ⁵Bhoono, mureeganirirya ega, bheetu tutakwikiriribhwa okugya na abhakari abheekirirya, kurugendo rwa okuraarika amangʼana eguru ya Kiristu, kya ego abhatumwa abhandi, na abhamura bhaabho Omukuru Yeesu bharagenda nabho, na kora Kefa? ⁶Kasi nooni na Bharinabha abheenego mbo tureenderwa okukora emirimu, naho tunyoore ebhintu kurusumo rwa obhuhoru bhwetu? ⁷M-musirikare-ki unú aragya mwiihe kwa okwiriha omwene? M-murimi-ki unú arahamba emijabhibhu mumugunda gwaye atige okurya emisumo gyendeko? Kasi m-muriisya-ki unú arariisya egintugo atige okunywa amabheere ga egintugo giyo?

⁸Amangʼana ganú ndagamba, gataringi ameetegeerero ga abhantu, kora amaragiriryo ga Musa9:8 Amaragiriryo ga Musa. Ganu m-maragiriryo ganú Waryubha yaahaana Abhaisiraeri okuhitira kumurooti Musa. Maaha Musa mu Moonjooro eguru ya Amangʼana Amakongʼu. gonse, garagamba egoego. ⁹Mumaragiriryo ga Musa engʼoorerwe ega, “Hanú engʼombe erahuura obhuro, otaibhoha omunwa.”9:9 Maaha mukitabho kya Obhuhiituki bhwa Amaragiriryo 25:4. Bhoono, nko okugamba ega, Waryubha areeganirirya eguru ya egingʼombe? ¹⁰Kasi aragamba amangʼana gayo kurusumo rwetu? Niigo eringi! Amangʼoore gayo gaangʼoorwa kurusumo rwetu, kwa okubha omurimi wa obhuro, na omugesi wa obhuro, kira oumwi areenderwa okwisiga ega, arinyoora omugabho gwaye. ¹¹Bheetu twabharaarikira amangʼana eguru ya Kiristu, kya omuntu unú arahamba egimbusuro. Bhoono, ni-ringʼana erikongʼu kubheenyu okutuhaana ebhintu bhya okurya na okunywa, naho tunyoore obhwera, kya omuntu unú aragesa? ¹²Nyoore abhandi bhareenderwa okuhaanwa ebhintu kya bhiyo okurwa kubheenyu, bhoono bheetu, tutakwenderwa bhukongʼu okuhaanwa okukira bhayo?

Nawe, bheetu tutaabhatonga ganú tureenderwa okuhaanwa na bheenyu. Twigumiriirye kugonsego, naho tutabharibhira abhantu okwikirirya Amangʼana Amajomu eguru ya Kiristu. ¹³Bhoono, mutamanyiri ega, bhanú bharakora emirimu mwisyengerero erikuru rya Waryubha,9:13 Mwisyengerero erikuru rya Waryubha. Maaha Erisyengerero erikuru rya Waryubha mu Moonjooro eguru ya Amangʼana Amakongʼu. bharanyoora ebhyakurya bhyabho okurwa mwisyengerero muyo? Kweki mutamanyiri ega, bhanú bharakora emirimu ahasi ha okumwensera, bhonse bharanyoora omugabho gwabho, okurwa kubhinú bhiraruusibhwa ekimwenso? ¹⁴Omukuru Yeesu wonse yaaragirirya egoego, ega, bhanú bhararaarika Amangʼana Amajomu, bhabhenga bharanyoora ebhintu okurekana na emirimu giyo.

¹⁵Nawe oni, ntaakabhatongeri kora ekimwi kubhinú ndeenderwa okuhaanwa. Kweki ntakungʼoora ego, naho nhaanwe bhiyo. Kuoni nyakara okukwa, okukira okubheerwa ebhintu okurwa kubheenyu, kwa okubha ntakwenda omuntu wowonse yaandibhire okwigungya kurusumo rwa okuraarika Amangʼana Amajomu, kwa enjira ya okungʼaana ebhintu. ¹⁶Oni ntakwenderwa okwigungya kwa ekisigo kya okuraarika Amangʼana Amajomu, kwa okubha emirimu ginu, ngyo naakomereribhwa okukora. Kweki ndikirora-ko, nyoore ntaaraarike Amangʼana Amajomu gayo. ¹⁷Nyoore nkaabheeri nsoreri emirimu ginu kwa obhwendi bhwani omwene, nkaaganyiriranga omutuho, nawe bhoono, ndeenderwa okugikora kwa okubha Waryubha yangʼeeri emirimu ginu, kwa obhwendi bhwaye. ¹⁸Bhoono, omutuho gwani n-guha? Omutuho gwani n-kuraarika Amangʼana Amajomu bira amariho, bira okutonga ebhintu bhinú ndeenderwa okuhaanwa kurusumo rwa okugaraarika.

Amangʼana ganú abhatumwa bhareenderwa okukora

¹⁹Oni ntaringi omugaya wa omuntu wowonse, ndeeyagaara. Nawe, niikoreri okubha omugaya wa abhantu bhonsego, naho okubhabheera abhantu abhaaru bhamwikirirye Kiristu. ²⁰Ku Bhayahudi, neekora kya Omuyahudi, naho okubhabheera bhamwikirirye Kiristu. Oni omwene ntaringi insi wa amaragiriryo ga Musa, nawe, neetuura insi wa amaragiriryo gayo, naho bhanú bharingi insi wa amaragiriryo bhamwikirirye Kiristu. ²¹Kubhanú bhataana amaragiriryo, nonse neekora ntaana amaragiriryo, naho okubhabheera bhamwikirirye Kiristu. Etaringi ega, ntaana amaragiriryo embere ya Waryubha, nawe niinago kwa okubha ndatungwa na amaragiriryo ga Kiristu. ²²Na kubhanú bhataranaga kuimani, nonse neekora muna ntaranaga kuimani, naho okubhabheera bhamwikirirye Kiristu. Naakora gonsego kubhantu bhonsego, naho kwa enjira yoyonse irya, nture okutuurya abhantu abhandi gati yaabho. ²³Ndakora gayo gonsego kurusumo rwa Amangʼana Amajomu, naho nsange hamwi na abhandi kunonkwe inú erarekana na Amangʼana Amajomu gayo.

²⁴Bhoono mutamanyiri ega, abhantu bhanú bharasongana okukenya, bharakenya bhonsego, nawe, unú aranyoora omutuho ngʼ-umwi ego? Mbe, mubhenga murakenya bhukongʼu, naho munyoore omutuho. ²⁵Bhanú bharasongana kumihooyo, bhareeribhira amangʼana amaaru, naho bhanyoore omutuho gwa eribhaga ekego. Nawe bheetu turakora ego, naho tunyoore omutuho gunú guraguma koko. ²⁶Kora oni nonse, ntakukenya kya omuntu unú atakwenda obhuhigi. Kweki egoego ntakurwana kya omuntu unú ararekera eginkundi bhusa. ²⁷Nawe, ndanyankya omubhiri gwani, na okugunarya okwigumirirya, naho hanú ndimara okuraarikira abhantu Amangʼana Amajomu, oni omwene ntariija okwangwa embere ya Waryubha.

Mutabha muramusarirya Waryubha

¹Abhahiiri bhaani kuimani, ndeenda mumanye ega, eribhaga rinú bhajaaji weetu bhaarwanga Misiri, bhonsego bhoorokereribhwanga na erisaaru,10:1 Maaha mukitabho kya Okuhuruka 13:21-22. kweki bhonsego bhaahita gatigati ya enyanja. ²Eribhaga rinú bhoorokereribhwanga na erisaaru na okuhita gatigati ya enyanja, bhonsego bhakabha bhabhatiijiibhwe okubha abheehigira bha Musa.10:2 Maaha mukitabho kya Okuhuruka 14:22-29.³Bhonsego bhaarya ebhyakurya bhiryabhirya bhyarwanga murwire.10:3 Maaha mukitabho kya Okuhuruka 16:35.⁴Kweki bhonsego bhaanywa amanji garyagarya Waryubha yaabhahaana kwa enjira ya ekika, okurwa kwitare.10:4 Maaha mubhitabho bhya Okuhuruka 17:1-7; Okubhara 20:2-17. Eritare riyo ryaringa n-Kiristu. Weeki yaaringa arasoorana nabho hamwi. ⁵Nawe, abhaaru gati yaabho, bhaaringa bharakora ganú gataamujomeranga Waryubha, kwa ego bhakasikibhwa na emibhiri gyabho gikanyaragana kukibhara.

⁶Mbe, amangʼana gayo gonsego m-birengekanʼyo kubheetu, naho tutabha na orunamba rwa amabhiibhi kya ego bheeki bhaaringa na orunamba rwa amabhiibhi. ⁷Mutasyengera ebhisusano, kya ego abhandi gati yaabho bhaakoranga. Eguru yaabho engʼoorerwe mu Mangʼoore Amarabhu ega, “Abhantu bheekaranga okurya na okunywa, hanú bhaamaranga bhareemirira okubhina.”10:7 Maaha mukitabho kya Okuhuruka 32:6.⁸Kweki tutakora obhusimbe, kya ego abhandi gati yaabho bhaakoranga, okuhikira orusiku rumwi bhakasikibhwa abhantu ebhiku mirongo ebhiri na bhisatu (23,000).10:8 Maaha mukitabho kya Okubhara 25:1-9.⁹Kora tutamusakya Omukuru,10:9a Omukuru. Amangʼoore agandi ga akare aga Ekiyunani garagamba ega, Kiristu. kya ego abhandi gati yaabho bhaamusakya, bhakarumwa na enjoka, bhakakwa.10:9b Maaha mukitabho kya Okubhara 21:4-9.¹⁰Kweki muteengʼeheerya kya ego abhandi gati yaabho bheengʼeheerya, bhakasikibhwa na maraika omusikya.10:10 Maaha mukitabho kya Okubhara 16:41-49.

¹¹Mbe, amangʼana gayo gonsego gaabhanyoora bhajaaji weetu, gaangʼoorwa naho gabhe ebhirengekanʼyo bhya okutukemera bheetu bhanú tureekara kuginsiku ginu gya obhuteero. ¹²Kwa ego, unú areerora ega, yeemiriiri anagiri kuimani, yeeyangararire, naho atariija okugwa. ¹³Amasakyo ganú gabhanyooreri, n-kya ganú abhantu abhandi bharanyoora. Nawe, Waryubha m-muheene, weeki ataabhatige musakibhwe okukira eginguru gyenyu. Hanú bheenyu murasakibhwa, Waryubha arabhahaana eginguru gya okwigumirirya na enjira ya okuhurukira.

Obhukemeri eguru ya eginyangi gya ebhisusanona ebhyakurya bhya Omukuru

¹⁴Kwa ego, abhahanje bhaani, mwiyangararire mutasyengera ebhisusano! ¹⁵Ndahaira na bheenyu abhantu bha obhumanyi, mwiganirirye bheenyu abheene eguru ya ganú ndagamba. ¹⁶Bhoono, hanú turamukumya Waryubha kurusumo rwa ekikombe kya enonkwe kirya turanywera, kwibhaga rya ebhyakurya bhya Omukuru, tutakubha tusangiri amanyinga ga Kiristu? Na hanú turasuunura omukaate, tutakubha tusangiri omubhiri gwa Kiristu? ¹⁷Omukaate guyo turasanga bheetu bhonsego n-gumwi. Kwa ego, bheetu bhonsego m-mubhiri gumwi, onyoora turingi abhaaru.

¹⁸Murore ekirengekanʼyo ku Bhaisiraeri. Bhonsego bhanú bharasanga hamwi okurya ebhimwenso bhinú bhimwenseerwe Waryubha, bharagwatana okumusyengera Waryubha.10:18 Maaha mukitabho kya Abharaawi 7:6-10, 7:14-15.¹⁹Bhoono ndeenda okugamba-ki? Ebhyakurya bhinú bhimwenseerwe ebhisusano bhiina obhwera bhobhonse? Kasi ebhisusano bhyonse n-kintu? ²⁰Tiigo-ha! Ndeenda okugamba ega, ebhimwenso bhinú bhararuusya abhantu bhanú bhatamumanyiri Waryubha, bhatakumuruusirya Waryubha, nawe bhararuusirya ebhihwi. Na oni ntakwenda bheenyu musange na ebhihwi. ²¹Mutakwenderwa munywere ekikombe kya Omukuru, na ekya ebhihwi. Egoego mutakwenderwa okurya ebhyakurya bhya Omukuru, na ebhya ebhihwi. ²²Kasi, tureenda okumukora Omukuru abhe na erihari? Mureeganirirya ega, tuuna eginguru okumukira?

Abheekirirya bhakorenga amangʼanaganú garamutogoonʼya Waryubha

²³Abhantu abhandi gati yeenyu bharagamba ega, “Ebhintu bhyonsego bhiikiririibhwe.” Nawe, oni ndagamba ega, bhitaringi bhyonsego bhinú bhiina obhwera kubheetu. Kweki bharagamba ega, “Ebhintu bhyonsego bhiikiririibhwe.” Nawe oni ndagamba ega, bhitaringi bhyonsego bhinú bhirakora eimani enage. ²⁴Omuntu atatuna ganú garamubheera weeki omwenego, nawe atune ganú garabheera abharikyaye.

²⁵Muryenga enyama yoyonse inú eraguribhwa kumudiira, mutabhuuririrya bhuuririrya, kurusumo rwa ameetegeerero geenyu, ²⁶kwa okubha Amangʼoore Amarabhu garagamba ega, “Ekyaro na ebhintu bhyonsego bhinú bhirimo m-bya Omukuru Waryubha.”10:26 Maaha mukitabho kya Egijabhuri 24:1.

²⁷Nyoore omuntu unú ataringi omwikirirya araabhagenihye okurya, na nyoore mureekirirye okugya, murye enyama yoyonse inú abhaseemeerye, mutabhuuririrya bhuuririrya, kurusumo rwa ameetegeerero geenyu. ²⁸Nawe, nyoore omuntu araabhakeerye ega, “Ebhyakurya bhinu bhimwenseerwe ebhisusano,” mutarya ebhyakurya bhiyo, kurusumo rwa omuntu unú abhakeererye, kweki kurusumo rwa enyanko ya ameetegeerero. ²⁹Hanú ndagamba ega, “Kurusumo rwa enyanko ya ameetegeerero,” ntakugamba eguru ya ameetegeerero geenyu, nawe, ndagamba eguru ya ameetegeerero ga omuntu unú abhakeererye. Bhoono, omuntu aratura okubhuurya ega, “Kwaki enyanko ya ameetegeerero ga omuntu oundi, eribhire okwiyagaara kwani? ³⁰Nyoore oni ndarya ebhyakurya bhiyo kwa okumukumya Waryubha, kwaki ntukwe kwa ekisigo kya ebhyakurya bhinú mmukumirye Waryubha?”

³¹Mbe bhoono, kyokyonse kinú murakora, ebhe okurya, ebhe okunywa, kasi ekintu ekindi, mukikore naho Waryubha agungibhwe. ³²Mutabhahabhya Abhayahudi, abhantu bhanú bhataringi Abhayahudi, na kora erikanisa rya Waryubha. ³³Mubhe kya ego oni ndingi. Ndeekongʼererya okubhangʼarira abhantu bhonsego, kumangʼana gonsego ganú ndakora. Etaringi ega, ndakora ego, kurusumo rwa obhwera bhwani omwene, nawe ndakora ego, kurusumo rwa obhwera bhwa abhantu abhaaru, naho bheeki bhatuuribhwe.

¹Munyihigire oni, kya ego oni nonse ndamwihigira Kiristu.

Kya ego mureenderwa okwibhoha hanú murasabha

²Ndabhagungya kwa okubha muranhiituka kumangʼana gonsego, na okugwata ameehigiryo kya ego naabheehigirya. ³Nawe, bhoono ndeenda mumanye ega, omutwe11:3 Omutwe. Ensonga ya eringʼana rinu niiga, owa obhutungi kweki m-busimuka. gwa omusaaja wowonse omwikirirya n-Kiristu, omutwe gwa omukari m-musaaja waaye na omutwe gwa Kiristu ngʼ-Waryubha. ⁴Kwa ego, omusaaja wowonse omwikirirya unú arakundikirya omutwe hanú arasabha, kasi hanú araruusya obhurooti, uyo arasuukya omutwe gwaye, omutwe guyo n-Kiristu. ⁵Omukari omwikirirya wonse unú atakukundikirya omutwe hanú arasabha, kasi hanú araruusya obhurooti, uyo arasuukya omutwe gwaye, omutwe guyo m-musaaja waaye. Ndagamba ego, kwa okubha arabha kya omukari unú amwegeri orutubhwi.11:5 Amwegeri orutubhwi. Kwibhaga riyo yaaringa ni-nsoni kumukari okumwega orutubhwi.⁶Nyoore omukari atakukundikirya omutwe, ereenderwa amwege egintuukya gyaye. Nawe, kwa okubha ni-ginsoni kumukari okumwega egintuukya, ereenderwa akundikirye omutwe gwaye. ⁷Etakwenderwa omusaaja akundikirye omutwe gwaye, kwa okubha weeki arahunkanibhwa na Waryubha, kweki aroorokya obhukuru bhwa Waryubha. Nawe, omukari aroorokya obhukuru bhwa omusaaja waaye. ⁸Ndagamba ego, kwa okubha Waryubha ataamubhumba omusaaja okurwa kumukari, nawe yaabhumba omukari okurwa kumusaaja. ⁹Kora omusaaja ataabhumbwa kurusumo rwa omukari, nawe omukari ngʼo yaabhumbwa kurusumo rwa omusaaja. ¹⁰Kwa ekisigo kiyo, kweki kwa ekisigo kya bhamaraika, omukari areenderwa okukundikirya omutwe gwaye, okoorokya ega, aringi insi ya obhutungi bhwa omusaaja waaye.11:10 Okoorokya ega, aringi insi ya obhutungi bhwa omusaaja waaye. Ensonga eindi eratura okubha ega, okoorokya obhutungi bhwaye.

¹¹Nawe, kubhumwi bhwetu na Omukuru, omukari atakutura okukora ryoryonse bira omusaaja, kora omusaaja atakutura okukora ryoryonse bira omukari. ¹²Ndagamba ego, kwa okubha kya ego omukari yaabhumbwa okurwa kumusaaja, bhoono, omusaaja wonse areebhurwa na omukari. Nawe ebhintu bhyonsego bhirarwa ku Waryubha. ¹³Bhoono mwamure abheene, m-bujomu omukari okumusabha Waryubha bira okukundikirya omutwe? ¹⁴Ndeegwa kora emibhiri egyene giroorokya ega, ni-nsoni kumusaaja okubha na egintuukya egintambi! ¹⁵Nawe, omukari okubha na egintuukya egintambi kuramukora asuukwe,11:15 Okubha na egintuukya egintambi kuramukora asuukwe. Eribhaga riyo gyaringa egimiira abhakari okutuga egintuukya. kwa okubha aheerwe egintuukya egintambi gibhe kya emyenda gya okukundikirya omutwe. ¹⁶Nawe, nyoore omuntu areende okuhakaana eguru ya amangʼana gayo, bheetu tutaana egimiira egindi okukira giyo, kora amakanisa ga Waryubha gonse gataanagyo.

Abhakorinto bhatakurya ebhyakurya bhya Omukurukya ego ereenderwa

¹⁷Ntakubhagungya eguru ya ganú ndeenda okubhakomererya, kwa okubha hanú oranyoora mwikumeenʼye hamwi mutakukora ga obhwera, nawe, murakora ganú gataana obhwera. ¹⁸Nigwiri ega, hanú oranyoora mwikumeenʼye hamwi abheekirirya bhonsego mutakwigwana. Kugayo nigwiri, agandi ndeekiriranʼya nago. ¹⁹Obhwahukani bhureebhuka gati yeenyu, naho bhanú bharingi abhaheene bhamanyikane. ²⁰Nawe bhoono, hanú oranyoora mwikumeenʼye hamwi mutakurya ebhyakurya bhya Omukuru kya ego ereenderwa, ²¹kwa okubha kira omuntu ararya ebhyakurya bhyaye bira okuganyirira abhandi. Riyo rirakora abhandi bhatame na omweko na abhandi bharehwe. ²²Bhoono, mutaana eginyumba enú muratura okwikara, naho murye na okunywa? Kwaki murajeera erikanisa rya Waryubha na okubhasuukya bhanú bhataana ekintu? Mbakeerye-ki? Mbagungye? Tiigo-ha! Ntakubhagungya kurusumo rwa gayo.

Okurya ebhyakurya bhya Omukuru kya ego ereenderwa

²³Ameehigiryo ganú naanyoora okurwa ku Mukuru Yeesu ngo naabhahaana bheenyu ega, obhutiku bhurya yaakorerwa eniku, yaagega omukaate, ²⁴akamukumya Waryubha, akagusuunura, akagamba ega, “Gunu ngo omubhiri gwani, gunú gwakaruusibhwe kurusumo rwenyu. Mukorenga ego, kwa okunhiituka oni!” ²⁵Egoego, hanú bhaamara okurya ebhyakurya, akagega ekikombe kya edivai,11:25a Edivai. Maaha eringʼana rinu mu Moonjooro eguru ya Amangʼana Amakongʼu. akagamba ega, “Ekikombe kinu kireemiririra eriragano11:25b Eriragano. Maaha eringʼana rinu mu Moonjooro eguru ya Amangʼana Amakongʼu. erihya rinú rirakoreka okuhitira amanyinga gaani. Mukorenga ego, kira hanú muranywera ekikombe kiyo, kwa okunhiituka oni!” ²⁶Kwa ego, hanú murarya omukaate guyo, na okunywera ekikombe kiyo, murabha muraraarika oruku rwa Omukuru okuhikira hanú ariija.

²⁷Omuntu wowonse unú ararya omukaate guyo, kasi okunywera ekikombe kiyo, kya ego etakwenderwa, arabha akoreri obhusarya, kwa okubha ajeereri omubhiri na amanyinga ga Omukuru. ²⁸Kwa ego, kira omuntu yeeyikomye weeki omwene, nho arye omukaate na okunywera ekikombe. ²⁹Ndagamba ego, kwa okubha omuntu unú ararya omukaate na okunywera ekikombe bira okumanya obhumwi bhwaye na omubhiri gwa Omukuru, uyo arabha areetuura omwene mubhubhuturi bhwa ekiina bhwa Waryubha. ³⁰Kiyo nkyo ekisigo kinú kirakora gati yeenyu abhaaru m-banyooheeru na abharweri, kweki abhandi bhakwiri. ³¹Nawe tukaabheeri tureeyikomya bheetu abheene, Waryubha atakaatubhuturiiri ekiina. ³²Nawe bhoono, hanú turabhuturirwa ekiina na Omukuru, hayo turabha tureehigiribhwa, naho Waryubha atariija okutubhuturira ekiina kya ego arabhabhuturira ekiina abhantu bhanú bhatamumanyiri weeki. ³³Kwa ego, abhahiiri bhaani kuimani, hanú mureekumanʼya okurya ebhyakurya bhya Omukuru, muganyiriranenga. ³⁴Nyoore omuntu yaana omweko, abhenga ararya iika owaaye, naho okwikumanʼya kwenyu kubhyakurya bhya Omukuru kutabhakora mubhuturirwe ekiina. Nawe, hanú ndiija, ndituura bhujomu amangʼana agandi ganú gatamiri.

Ebhibharo bhya Omutima Omurabhu

¹Bhoono, abhahiiri bhaani kuimani, ndagamba eguru ya ebhibharo bhinú bhirarwa ku Mutima Omurabhu,12:1 Mutima Omurabhu. Maaha Omutima Omurabhu mu Moonjooro eguru ya Amangʼana Amakongʼu. kwa okubha ndeenda mubhimanye bhujomu. ²Mumanyiri ega, hanú mwaringa mutamumanyiri Waryubha, mwahabhibhwa na okoorokereribhwa okusyengera ebhisusano bhinú bhitakuhaira. ³Kwa ego, ndeenda mumanye ega, omuntu wowonse unú aroorokereribhwa na Omutima wa Waryubha atakutura okugamba ega, “Yeesu yeehiimwe.” Kweki omuntu wowonse nyoore atakoorokereribhwa na Omutima Omurabhu, atakutura okugamba ega, “Yeesu m-Mukuru.”

⁴Mbe, bhiriho ebhibharo amanga amaaru, nawe unú aragabha ebhibharo bhiyo m-Mutima uyouyo. ⁵Kweki okumukorera emirimu Omukuru kuriho kwa amanga amaaru, nawe, Omukuru ngʼ-uyouyo. ⁶Kweki kuriho okukora emirimu kwa amanga amaaru, nawe, Waryubha unú aratubheera bhonsego okukora emirimu giyo ngʼ-uyouyo. ⁷Omutima arakora emirimu munsi wa kira omuntu, naho abhantu bhonsego bhabhe bharanyoora obhwera. ⁸Omutima aramuhaana omuntu oumwi okugamba amangʼana ga egintungwa, na oundi okugamba amangʼana ga obhumanyi. Omutima uyouyo ngʼo araruusya ebhibharo bhiyo kya ego areenda. ⁹Omutima uyouyo, aramuhaana omuntu oundi ekibharo kya okubha na eimani enene, oundi ekibharo kya okuhwenʼya, ¹⁰oundi ekibharo kya okukora ebhika, oundi ekibharo kya obhurooti, oundi ekibharo kya okumanya omutima omubhiibhi na Omutima Omurabhu, oundi ekibharo kya okugamba ebhigambo ebhindi, na oundi ekibharo kya okuhunjura ebhigambo bhiyo. ¹¹Emirimu giyo gyonsego, Omutima oumwi uyo, ngʼo arakora. Weeki aramugabhira kira omuntu ekibharo kyaye okuringʼaana na kya ego omwene areenda.

Ebhiroobhero bhya omubhiri m-byaru, nawe omubhiri n-gumwi

¹²Omubhiri guuna ebhiroobhero ebhyaru, nawe, ebhiroobhero bhiyo, mbyo bhigwateeni okubha omubhiri gumwi. Mbe bhoono, kya ego omubhiri guringi, niigo ego Kiristu aringi. ¹³Ndagamba ego, kwa okubha bheetu bhonsego, tubhe Abhayahudi kasi abhantu bha ebhyaro ebhindi, tubhe abhagaya kasi tubhe tureeyagaara, twabhatiijwa kwa Omutima oumwi na okuhaanwa Omutima oumwi uyouyo, naho tubhe omubhiri gumwi.

¹⁴Mbe, omubhiri gutaana ekiroobhero kimwi ego, nawe guuna ebhiroobhero ebhyaru. ¹⁵Nyoore okuguru kukaagamba ega, “Kwa okubha oni ntaringi okubhoko, ego, oni ntaringi ekiroobhero kya omubhiri,” bhoono kutakubha kwa omubhiri kwa ekisigo kiyo? ¹⁶Kweki okutwi kukaagamba ega, “Kwa okubha oni ntaringi eriiso, ego, oni ntaringi ekiroobhero kya omubhiri,” bhoono kutakubha kya omubhiri kwa ekisigo kiyo? ¹⁷Nyoore omubhiri gonsego gukaabheeri eriiso, ekaabheeri egaki okwigwa? Kasi omubhiri gonsego gukaabheeri okutwi, ekaabheeri egaki okwinyunkirirya? ¹⁸Nawe bhoono, Waryubha yaatuura kira ekiroobhero kumubhiri, kya ego omwene yeenda. ¹⁹Omubhiri gutakaabheeri omubhiri, nyoore gukaabheeri ekiroobhero kimwi ego. ²⁰Bhoono mbe, ebhiroobhero bhya omubhiri m-byaru, nawe omubhiri n-gumwi.

²¹Eriiso ritakutura okukeerya okubhoko ega, “Uuwe ntakukwenda.” Kora omutwe gutakutura okukeerya amaguru ega, “Bheenyu ntakubheenda.” ²²Okutiga gayo, ebhiroobhero bhya omubhiri bhinú bhiramaahikana ega, m-binyooheeru, mbyo bhireenderwa bhukongʼu. ²³Kweki ebhiroobhero bhya omubhiri bhinú bhiramaahikana ega, bhitakwenderwa okusuukwa, mbyo turabhisuuka bhukongʼu. Na ebhiroobhero bhya omubhiri bhinú bhiramaahikana ega, bhirareeta eginsoni, bhiyo mbyo turabhyangararira bhwaheene. ²⁴Kweki ebhiroobhero bhya omubhiri bhinú bhitakureeta eginsoni, bhitakwenderwa okwangararirwa kya ebhindi. Waryubha omwene agwateenʼye omubhiri bhujomu. Ebhiroobhero bhya omubhiri bhinú bhirasuuhirwa obhusuuku, yaabhikora bhisuukwe, ²⁵naho omubhiri gutaahukana, nawe, ebhiroobhero bhya omubhiri bhyonsego bhibheerane. ²⁶Na ekiroobhero ekimwi kikaanyahaarika, bhyonsego bhiranyahaarika hamwi nakyo. Kweki ekiroobhero ekimwi kikaagungibhwa, bhyonsego bhirajomerwa hamwi nakyo.

²⁷Mbe, bheenyu bhonsego m-mubhiri gwa Kiristu, na kira oumwi weenyu n-kiroobhero kumubhiri guyo. ²⁸Waryubha yaatuura abhantu mwikanisa okurekana na ebhibharo bhyabho. Yaatuura-mo abhatumwa, abharooti, na abheehigirya. Kweki akatuura abhakori bha ebhika, abha ekibharo kya okuhwenʼya abharweri, abha ekibharo kya okubheerana, abha ekibharo kya obhutungi, na abha ekibharo kya okugamba ebhigambo ebhindi. ²⁹Bhoono, abhantu bhonsego m-batumwa? Abhantu bhonsego m-barooti? Abhantu bhonsego m-beehigirya? Abhantu bhonsego m-bakori bha ebhika? ³⁰Abhantu bhonsego bhaana ekibharo kya okuhwenʼya abharweri? Abhantu bhonsego bharagamba ebhigambo ebhindi? Kweki abhantu bhonsego bhaana ekibharo kya okuhunjura ebhigambo bhiyo? ³¹Mbe bhoono, mukore ekituunyo okutuna ebhibharo ebhikuru. Nawe bhoono, ndabhoorokya enjira enjomu okukira gyonsego.

Obhuhanje

¹Kora nkaagamba kwa ebhigambo bhya abhantu na ebhigambo bhya bhamaraika, nawe nyoore ntaana obhuhanje, ndabha kya ekituri kya eridebhe rinú ritaana ekintu na kya ekituri kya enkengere inú eratemwa bhusa. ²Kweki kora nkaabha ndaruusya obhurooti na okumanya gonsego ganú geebhisiri, na okubha na obhumanyi bhonsego, kora nkaabha na eimani enene ya okutura okungʼanʼya eginkuku, nawe nyoore ntaana obhuhanje, oni m-busa. ³Kweki nkaaruusya ebhintu bhyani bhyonsego okubhahaana abhatobhu, na kora nkaaruusya omubhiri gwani, naho gusambwe mumururo,13:3 Naho gusambwe mumururo. Amangʼoore agandi ga akare aga Ekiyunani garagamba ega, naho nigungye. nawe nyoore ntaana obhuhanje, ntakunyoora obhwera bhobhonse.

⁴Obhuhanje bhuramukora omuntu abhe omwigumirirya, abhe omuserenʼya, abhe ataana orwango, abhe ataana ekisiraani na abhe atakwiheema. ⁵Obhuhanje bhuramukora omuntu abhe arabhasuuka abhandi, bhutakumukora yeeganirirye eguru yaaye omwenego, kora bhutakukora omuntu ajime bhwangu, kora abhiike ekisiiyomba. ⁶Obhuhanje bhuramukora omuntu atajomererwa obhubhiibhi, nawe bhuramukora ajomererwe obhuheene. ⁷Obhuhanje bhuramukora abhe areegumirirya kugonsego, abhe yaana eimani eribhaga ryonsego, abhe yaana obhwisige eribhaga ryonsego, kweki abhe omwikongʼererya kugonsego.

⁸Obhuhanje bhutaana obhuteero kora hake. Nawe ebhibharo bhya okuruusya obhurooti, okugamba ebhigambo ebhindi, na okubha na obhumanyi, bhyeki bhiina obhuteero. ⁹Erabha ego, kwa okubha tumanyiri amangʼana amakego, na turaruusya obhurooti obhukego. ¹⁰Nawe, eribhaga rinú amangʼana ganú gakunaaniri gariija, amake gayo gatakunaaniri garihwa. ¹¹Hanú naaringa omwana, naaringa ndagamba aga ekyana, ameetegeerero gaani gaaringa aga ekyana, na naaringa ndeeganirirya aga ekyana. Nawe bhoono, kwa okubha ndingi omukuru, aga ekyana naagatiga. ¹²Kya ego turamaaha bhoono, n-kya okumaaha ebhintu mukitu, nawe eribhaga erindi, turibhirora bhyonsego kubhurabhu. Eribhaga rinu mmanyiri hakego, nawe eribhaga erindi ndimanya bhukongʼu kya ego Waryubha aramanya oni. ¹³Mbe bhoono, ebhintu ebhisatu bhinu bhitarihwa, eimani, obhwisige na obhuhanje. Na kubhiyo, eringʼana erikuru okukira gonsego m-buhanje.

Ekibharo kya okuruusya obhurootina ekya okugamba ebhigambo ebhindi

¹Mwikongʼererye okubha na obhuhanje na mukore ekituunyo okunyoora ebhibharo bhya Omutima Omurabhu, ekinene ekibharo kya okuruusya obhurooti. ²Omuntu unú aragamba ekigambo ekindi, atakugamba na abhantu, nawe aragamba na Waryubha, kwa okubha ganú aragamba omuntu oundi wowonse atakugamanya. Weeki arabha aragamba kwa eginguru gya Omutima Omurabhu amangʼana ganú geebhisiri.14:2 Weeki arabha aragamba kwa eginguru gya Omutima Omurabhu amangʼana ganú geebhisiri. Ensonga eindi eratura okubha ega, Weeki arabha aragamba ganú geebhisiri mumutima gwaye.³Nawe, unú araruusya obhurooti, aragamba na abhantu amangʼana ga okubhakora bhanage kuimani, aga okubhahorisya na aga okubhateremya emitima. ⁴Unú aragamba ekigambo ekindi, areenagya omwene kuimani, nawe, unú araruusya obhurooti arakora abheekirirya abhandi bhanage kuimani.

⁵Oni ndeenda bheenyu bhonsego mubhenga muragamba ebhigambo ebhindi, nawe, ekinene ndeenda mubhenga muraruusya obhurooti, kwa okubha emirimu gya okuruusya obhurooti giina obhwera bhukongʼu kubheekirirya abhandi, okukira okugamba ebhigambo ebhindi. Nawe, omuntu unú aragamba ekigambo ekindi akihunjure, naho okubheera abheekirirya abhandi bhanage kuimani. ⁶Bhoono, abhahiiri bhaani kuimani, nyoore ndaaje kubheenyu na okugamba ebhigambo ebhindi, muratura okunyoora obhwera-ki? Mutakunyoora obhwera bhobhonse. Nawe, nyoore ndaabhakeerye ganú Waryubha yaantubhuriiri, kasi ndaabhahaane obhumanyi, ndaaruusye obhurooti kasi ndeehigirye, hayo muranyoora obhwera. ⁷Niigo eringi kora kubhintu bhinú bhitaringi ebhihoru, hanú bhiraruusya eriisi, ebhe ekironge, kasi eritungu. Nyoore bhiraaruusye eriisi bhuyagayaga, omuntu aratura egaki okumanya eriimbo? ⁸Kora enkombi ekaaruusya eriisi rinú ritamanyikeeni kubhantu, niwi unú areeseemye okugya mwiihe? ⁹Niigo eringi na kubheenyu, nyoore muragamba amangʼana ganú gatamanyikeeni, niwi unú aratura okumanya kinú muragamba? Hayo ganú muragamba garibha garagya na omuyaga.

¹⁰Mukyaro bhirimo ebhigambo amanga amaaru, nawe, kitariho kora ekimwi kinú kitaana ensonga yaakyo. ¹¹Bhoono, nyoore ntamanyiri ekigambo kinú oundi aragamba, ndabha omugeni kumuntu uyo, na wonse arabha omugeni kuoni. ¹²Niigo eringi na kubheenyu. Bhoono, kwa okubha mureenda bhukongʼu okubha na ebhibharo bhya Omutima Omurabhu, mwikongʼererye okubha na ebhibharo bhinú bhirakora abheekirirya abhandi bhanage kuimani. ¹³Kwa ego, omuntu unú aragamba ekigambo ekindi, amusabhe Waryubha, amubheere okuhunjura kinú aragamba. ¹⁴Ndagamba ego, kwa okubha nyoore nkaasabha kwa ekigambo ekindi, omutima gwani ngo gurasabha, nawe obhungʼeeni bhwani, bhurabha bhutaana obhwera. ¹⁵Bhoono ndeenderwa nkore-ki? Nsabhe kwa omutima kwa ekigambo ekindi, kweki nsabhe kwa obhungʼeeni, niimbe kwa omutima kwa ekigambo ekindi, kweki niimbe kwa obhungʼeeni. ¹⁶Okaamugungya Waryubha kwa omutima ogwenego, omuntu oundi unú atamanyiri kinú ogambiri, ngʼyeetabha egaki, “Amina”? ¹⁷Kuuwe, m-maheene orabha oramukumya Waryubha bhujomu, nawe, oundi okukumya kwaho kutakumubheera okunaga kuimani.

¹⁸Ndamukumya Waryubha, kwa okubha ndagamba kwa ebhigambo ebhindi okukira bheenyu bhonsego, ¹⁹nawe mwikanisa, nhanjiri bhukongʼu okugamba kwa obhungʼeeni, amangʼana gataanu ganú garamanyikana, naho mbeehigirye abhandi. Riyo ndyo erijomu okukira okugamba amangʼana ebhiku ekumi kwa ekigambo ekindi.

²⁰Abhahiiri bhaani kuimani, muteeganirirya kya abhaana, nawe mubhenga mureeganirirya kya abhantu abhakuru. Nawe, eguru ya obhubhiibhi, mubhe kya abhaana abharera. ²¹Mu Mangʼoore Amarabhu engʼoorerwe ega,

“Omukuru Waryubha aragamba ega,

‘Ndigamba na abhantu bhanu okuhitira abhageni

bhanú bharagamba ebhigambo ebhindi,

kora ego, bhatarinyitegeerera.’”14:21 Maaha mukitabho kya Isaaya 28:11-12.

²²Kwa ego, ekibharo kya okugamba ebhigambo ebhindi, n-kimanyiiriryo kya eginguru gya Waryubha eguru ya bhanú bhatakwikirirya, kitaringi eguru ya bhanú bhareekirirya. Nawe, ekibharo kya okuruusya obhurooti n-kurusumo rwa bhanú bhareekirirya, kitaringi kurusumo rwa bhanú bhatakwikirirya. ²³Mbe, nyoore abheekirirya bhareekumanʼye okusabha, bhonsego bhaambe okugamba kwa ebhigambo ebhindi, kimwi abhantu bhanú bhatamanyiri ekintu, kasi bhanú bhataringi abheekirirya bharaasohe-mo, bhoono bhataagambe ega, mudangeeni? ²⁴Nawe, bhonsego bhakaabha bhararuusya obhurooti, omuntu unú atamanyiri ekintu, kasi unú ataringi omwikirirya asohe-mo, ganú areegwe okurwa kubhonsego garamukora okumanya obhubhiibhi bhwaye. Kweki gonsego ganú areegwe garamubhuturira ekiina. ²⁵Ganú geebhisiri mumutima gwaye, garitubhurwa, nho aritema ebhiru na okumusyengera Waryubha aragamba ega, “M-maheene Waryubha aringi gati yeenyu!”

Kya ego ereenderwa okumusabha Waryubha

²⁶Abhahiiri bhaani kuimani, tugambe egaki? Hanú mureekumanʼya okusabha, oumwi yeembe, oundi yeehigirye, oundi agambe ganú Waryubha amutubhuriiri, oundi agambe ekigambo ekindi, na oundi ahunjure ganú garagambwa kwa ekigambo ekindi. Gonsego gakoreke kurusumo rwa okukora abheekirirya bhanage kuimani. ²⁷Nyoore abhantu bharaagambenga kwa ebhigambo ebhindi, abhagambi bhabhe abhabhiri kasi abhasatu ego, bhatakira hayo, na bhagambenga kiumwi umwi, kweki na abhenga-ho omuntu wa okuhunjura ganú bharagamba. ²⁸Nyoore atariho omuntu wa okuhunjura, omugambi wa ekigambo ekindi atige okugamba mwikanisa, nawe agambe na Waryubha mumutima gwaye.

²⁹Na bhanú bhararuusya obhurooti bhonse, bharuusye abhabhiri kasi abhasatu, na abhandi bheekomye amangʼana gayo. ³⁰Nawe, nyoore oundi kubhanú bhareetegeerera atubhuriirwe eringʼana okurwa ku Waryubha, owa mbere unú yaari araraarika akire. ³¹Kira oumwi abhe na omweya gwa okugamba obhurooti, naho abhantu bhonsego bheehigiribhwe na okuteremibhwa omutima. ³²Ekibharo kya okuruusya obhurooti, kiratungwa na omwene ekibharo kiyo, ³³kwa okubha Waryubha weetu ataringi wa eritoongʼana, ngʼ-wa omurembe.

Kya ego eringi mumakanisa gonsego ga abhantu bha Waryubha, ³⁴abhakari bhareenderwa bhakirenga mwikanisa, kwa okubha bhatakwiriribhwa okugamba. Bhabhe abheegwa kya ego amaragiriryo ga Musa gonse garagamba. ³⁵Nyoore bhareenda okumanya eringʼana nyabhurebhe, bhabhenga bharabhuurya abhasaaja bhaabho iika owaabho, kwa okubha ni-nsoni omukari okugamba mwikanisa.

³⁶Bhoono, eringʼana rya Waryubha ryareka kubheenyu? Kasi ribhahikiiri bheenyu abheenego? ³⁷Nyoore omuntu areerora ega, yaana ekibharo kya okuruusya obhurooti, kasi ega, yaana ekibharo ekindi kya Omutima Omurabhu, amanye ega, ganú ndabhangʼoorera, m-maragiriryo okurwa ku Mukuru. ³⁸Nawe, omuntu unú arajeera gayo, wonse ajeerwe.14:38 Wonse ajeerwe. Amangʼoore agandi ga akare aga Ekiyunani garagamba ega, wonse arajeerwa.

³⁹Ego, abhahiiri bhaani kuimani, mwikongʼereryenga okuruusya obhurooti, kora mutabha muramuribhira omuntu okugamba kwa ekigambo ekindi. ⁴⁰Nawe, amangʼana gonsego gakorekenga bhujomu na kwa obhwangarariri.

Okuhyuka kwa Kiristu

¹Mbe bhoono, abhahiiri bhaani kuimani, ndabhahiitukya Amangʼana Amajomu ganú naabharaarikira na bheenyu mukagagwata. Gayo ngo garabhakora muranaga kuimani inú muunayo. ²Nyoore muragendererya okugagwata amangʼana ganú naabharaarikira, hayo Waryubha arabhatuurya. Nawe nyoore mutakugendererya okugagwata, eimani yeenyu erabha etaana obhwera.

³Naabheehigirya ameehigiryo ga obhwera ganú oni omwene naagagwata, kya ego engʼoorerwe mu Mangʼoore Amarabhu ega, Kiristu yaakwa kurusumo rwa obhusarya bhwetu.15:3 Maaha mukitabho kya Isaaya 53:5-12.⁴Kweki ega, akabhiikwa, na ega, orusiku rwa kasatu okurwa okukwa kwaye, akahyuka kya ego engʼoorerwe mu Mangʼoore Amarabhu.15:4 Maaha mukitabho kya Egijabhuri 16:8-10.⁵Akamwibhukira Kefa, akamara akabheebhukira abhatumwa ekumi na bhabhiri bharya. ⁶Eribhaga erindi akabheebhukira abheekirirya bhanú bhaaringa bharaambuka magana gataanu kwa hamwi. Abhaaru gati ya bhayo, bhakyaringa-ho okuhikira bhoono, na abhandi bhaabho bhaamara okukwa. ⁷Kimwi akamwibhukira Yakobho, akamara akabheebhukira abhatumwa bhonsego. ⁸Hanú yaamara okubheebhukira abhantu bhonsego, akanyibhukira na oni nonse, oni unú ndingi kya omuntu unú yeebhurwa kwibhaga rinú ritaringi eryaye. ⁹Oni m-mutumwa wa obhusuuku obhuke gati ya abhatumwa bhonsego, kora ntakwenderwa okubhirikirwa omutumwa, kwa okubha naanyankyanga erikanisa rya Waryubha. ¹⁰Nawe, n-kwa eriruguto rya Waryubha nkyo kirakora oni m-mutumwa. Eriruguto ryaye kuoni m-bwera obhunene, kwa okubha okurekana na eriruguto riyo, naakora emirimu okukira abhatumwa bhonsego. Ntaakora gayo kwa eginguru gyani omwene, nawe eriruguto rya Waryubha ndyo ryakora emirimu hamwi na oni. ¹¹Mbe bhoono, nkaabha oni ngʼo ndaraarika, kasi abhatumwa abhandi bharya, bhonsego turaraarika amangʼana garyagarya, na ngo mweekirirya.

Obhuhyuki bhwa abhaku

¹²Bhoono, nyoore Kiristu araraarikwa ega, yaahyuka okurwa mubhaku, erabha egaki abhandi gati yeenyu bharagamba ega, obhuhyuki bhwa abhaku bhutariho? ¹³Nyoore obhuhyuki bhwa abhaku bhutariho, mbe, Kiristu wonse ataahyuka. ¹⁴Na nyoore Kiristu ataahyuka, okuraarika kwetu kurabha kutaana obhwera, kora eimani yeenyu erabha etaana obhwera. ¹⁵Kweki bheetu tukaamaahikeeni ega, turingi abheemiririri bha obhubheehi eguru ya amangʼana ga Waryubha, kwa okubha tureemiririra ega, Waryubha yaamuhyukya Kiristu okurwa mubhaku. Nawe, nyoore abhaku bhatakuhyukibhwa, mbe, Waryubha ataamuhyukya. ¹⁶Ndagamba ego, kwa okubha nyoore abhaku bhatakuhyukibhwa, mbe, Kiristu wonse ataahyuka. ¹⁷Na nyoore Kiristu ataahyuka, mbe, eimani yeenyu erabha etaana obhwera na murabha mukyari okutuuribhwa okurwa mubhusarya bhwenyu. ¹⁸Nyoore niigo, abhantu bhonsego bhanú bhaakwa bhamwikiriirye Kiristu, bhaabhura kimwi. ¹⁹Nyoore obhwisige bhwetu ku Kiristu, m-bwa okunyoora obhuhoru bhwa mukyaro kinu ekyenego, hayo turabha abhantu bha okwabhirwa okukira abhantu abhandi bhonsego.

²⁰Nawe bhoono, obhuheene niiga, Kiristu yaahyuka okurwa mubhaku, weeki ngʼo owa mbere okuhyuka kubhanú bhaakwa. ²¹Kya ego oruku rwareetwa na omuntu oumwi mukyaro, egoego obhuhyuki bhwa abhaku bhonse, bhwareetwa na omuntu oumwi. ²²Na kya ego, abhantu bhonsego bharakwa kwa ekisigo kya okugwatana kwabho na Adamu, egoego bhonsego bharihyukibhwa kwa ekisigo kya okugwatana kwabho na Kiristu. ²³Nawe, kira omuntu arihyuka kwibhaga ryaye, Kiristu ngʼo owa mbere okuhyuka, eribhaga erindi abhantu bhaaye bharihyukibhwa hanú ariija. ²⁴Hayo nho, bhuriija obhuteero bhwa bhyonsego, hanú Kiristu arimugwatya Waryubha Taata obhukama, hanú arisikya obhutungi bhonsego, obhuturo bhonsego na eginguru gyonsego, egya abhasigu bhonsego. ²⁵Ndagamba ego, kwa okubha Kiristu areenderwa atunge okuhikira abhahige abhasigu bhaaye bhonsego na okubhatuura mubhutungi bhwaye.15:25 Okubhatuura mubhutungi bhwaye. Ensonga eindi eratura okubha ega, okubhatuura insi ya amaguru gaaye. Maaha mukitabho kya Egijabhuri 110:1.²⁶Omusigu wa obhuteero okusikibhwa, n-duku. ²⁷Amangʼoore Amarabhu garagamba ega, “Waryubha yaatuura ebhintu bhyonsego mubhutungi bhwaye.”15:27 Maaha mukitabho kya Egijabhuri 8:6. Etaringi ega, Waryubha wonse yaatuurwa mubhutungi bhuyo. Tiigo-ha, kwa okubha Waryubha ngʼo ateeri ebhintu bhyonsego mubhutungi bhwa Kiristu. ²⁸Mbe, hanú ebhintu bhyonsego bhiribha bhiteerwe mubhutungi bhwa Omwana waaye,15:28 Omwana waaye. Maaha Omwana wa Waryubha mu Moonjooro eguru ya Amangʼana Amakongʼu. nho Omwana wonse, ariituura mubhutungi bhwa Waryubha unú ateeri ebhintu bhyonsego mubhutungi bhwa Omwana waaye, naho Waryubha abhe omutungi wa bhyonsego.

²⁹Bhoono, abhantu bhanú bharabhatiijwa kurusumo rwa abhaku, bhareesigira okunyoora obhwera-ki? Nyoore abhaku bhatakuhyukibhwa kora orusiku rumwi, kwaki abhantu bharabhatiijwa kurusumo rwabho? ³⁰Na bheetu kwaki twituure mungʼanga kira eribhaga? ³¹Abhahiiri bhaani kuimani, kira orusiku oni ndingi mungʼanga ya okukwa. Na bhunu m-buheene, kya ego ndeegungya kurusumo rwenyu, kwa okugwatana kwani na Kiristu Yeesu Omukuru weetu. ³²Nyoore obhwisige bhwani bhukaabheeri bhwa mukyaro kinu ekyenego, okurwana kwani na egintyenyi egihaari mumugi gwa Efeso, kukaabheeri na obhwera-ki? Na nyoore abhaku bhatakuhyukibhwa, mbe,

“Tubhenga turarya na okunywa,

kwa okubha ejo twakakwe.”15:32 Maaha mukitabho kya Isaaya 22:13.

³³Mutangʼeenwa na abhantu bhanú bharagamba ego, kwa okubha, “Abhasaani abhabhiibhi bharasarya enteemo enjomu.” ³⁴Mungʼeenihe, mwiganirirye bhujomu, mutige okukora obhusarya, kwa okubha abhandi gati weenyu bhatamumanyiri Waryubha. Ndagamba gayo, naho mbasuukye.

Kya ego omubhiri guribha orusiku rwa obhuhyuki

³⁵Omuntu aratura okubhuurya ega, “Abhaku bharahyukibhwa egaki? Na bharibha na omubhiri gwa egaki?” ³⁶Gayo m-mabhuuryo ga ekikangi! Okaahamba embusuro, etakutura okumera bira okukwa. ³⁷Embusuro inú murahamba, ebhe engano kasi embusuro eindi, etakuhunkana na ekiimerya kyayo. ³⁸Waryubha arahaana embusuro omubhiri kya ego omwene areenda, na kira embusuro araihaana omubhiri gwayo eyeene.

³⁹Ebhibhumbwa bhyonsego bhiina emibhiri, nawe, emibhiri giyo gitakuhunkana, emibhiri gya abhantu n-gimwi, na egya egintyenyi giringi bhundi, egya ebhinyonyi giringi bhundi, na egya eginswi giringi bhundi. ⁴⁰Kweki giriho emibhiri gya murwire na emibhiri gya mukyaro. Nawe, obhujomu bhwa emibhiri gya murwire bhuringi bhundi, na obhujomu bhwa emibhiri gya mukyaro bhuringi bhundi. ⁴¹Obhujomu bhwa eryubha bhuringi bhundi, obhujomu bhwa omweri bhuringi bhundi na obhujomu bhwa eginjota bhuringi bhundi. Na kira enjota eimwi iina obhujomu bhwayo.

⁴²Ego niigo eribha, eribhaga rinú abhaku bharihyuka. Kya ego embusuro erahambwa mwirobha, omubhiri gunú gurabhiikwa mwirobha oranyoora gusarikiri, nawe, gurahyukibhwa gunú gutakusarika. ⁴³Omubhiri hanú gurabhiikwa gurajeerwa, nawe, hanú gurahyukibhwa gurajoma. Hanú gurabhiikwa, gurabha mubhunyooheeru, nawe, hanú gurahyukibhwa gurabha na eginguru. ⁴⁴Omubhiri gunú gurabhiikwa, n-gwa obhusimuka, nawe, gunú gurahyukibhwa m-mubhiri omuhya gunú gurarekana na Omutima Omurabhu. Guriho omubhiri gwa obhusimuka, na ego guriho kora omubhiri omuhya gunú Omutima Omurabhu arituhaana.

⁴⁵Mu Mangʼoore Amarabhu engʼoorerwe ega, “Omuntu owa embere Adamu, yaabhumbwa akabha omuntu omuhoru,”15:45 Maaha mukitabho kya Obhwambiro 2:7. nawe, Adamu wa obhuteero, Kiristu, ngʼo Omutima unú arabhahaana abhantu obhuhoru. ⁴⁶Omubhiri gunú gurakangata m-mubhiri gwa obhusimuka, nho, guuja omubhiri omuhya gunú turihaanwa na Omutima Omurabhu. ⁴⁷Omuntu owa embere yaaringa wa mukyaro, yaabhumbwa okurekana na obhutoto. Omuntu wa kabhiri yaarwa murwire. ⁴⁸Abhantu bhonsego bha mukyaro bhaana omubhiri gwa mukyaro kya omubhiri gwa Adamu. Na abhantu bhonsego bha murwire bharibha na omubhiri gwa murwire kya omubhiri gwa Kiristu. ⁴⁹Na kya ego tutuubheeni na unú yaabhumbwa okurekana na obhutoto, egoego turituubhana na unú aringi murwire.

⁵⁰Abhahiiri bhaani kuimani, kinú ndeenda okubhakeerya niiga, omubhiri gunú tuunago bhoonwego gutakutura okugabha obhukama bhwa Waryubha,15:50 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. na kinú kirasarika kitakutura okubha na obhuhoru bhwa koko.

⁵¹Mwitegeerere, ndabhakeerya ekinyerera, ega, bheetu tutarikwa bhonsego, nawe bhonsego turihunjurwa. ⁵²Riyo ririibhuka rumwigo, kya okuhindirirya na okumogora, eribhaga rinú enkombi ya obhuteero erikuura. Hayo nho, abhaku bharihyukibhwa na bharibha na emibhiri ginú gitakusarika kweki, na bheetu bhanú turingi abhahoru turihunjurwa. ⁵³Eribha ego, kwa okubha emibhiri ginú girasarika gireenderwa gihunjurwe gibhe emibhiri ginú gitakusarika, na emibhiri ginú girakwa gireenderwa gihunjurwe gibhe emibhiri ginú gitakukwa. ⁵⁴Mbe bhoono, emibhiri ginú girasarika na okukwa, hanú girihunjurwa okubha emibhiri ginú gitakusarika na okukwa, hayo nho ririkunaana, eringʼana rinú ryangʼoorwa mu Mangʼoore Amarabhu ega,

“Waryubha asikirye oruku kwa obhuhigi!”15:54 Maaha mukitabho kya Isaaya 25:8.

⁵⁵“Oruku, obhuhigi bhwaho bhuringi-ha?

Giringi-ha eginguru gyaho gya okureeta obhururu?”15:55 Maaha mukitabho kya Hosia 13:14.

⁵⁶Eginguru gya oruku girarekana na obhusarya bhunú turakora, na amaragiriryo ngo garakora turamanya ega, turakora obhusarya. ⁵⁷Nawe, tumukumye Waryubha. Weeki aratuhaana obhuhigi kwa enjira ya Omukuru weetu Yeesu Kiristu.

⁵⁸Mbe, abhahiiri bhaani abhahanje kuimani, mwimirire bhwima na munage, mugendererye okukora emirimu gya Omukuru kwa ekituunyo eginsiku gyonsego, kwa okubha mumanyiri ega, emirimu ginú murakora kurusumo rwa Omukuru, gitaringi gya bhusa.

Omusororyo gwa okubhabheera abheekirirya

¹Bhoono, ndagamba eguru ya omusororyo gwa okubhabheera abheekirirya bha Yerusaremu.16:1 Yerusaremu. Maaha eringʼana rinu mu Moonjooro eguru ya Amangʼana Amakongʼu. Bheenyu bhonse mukorenga kya ego naaragirirya amakanisa ga Abhagaratia. ²Orusiku rwa okwamba orwa kira obhutuuro,16:2 Orusiku rwa okwamba orwa kira obhutuuro. N-dusiku rwa Obhooyo. kira oumwi weenyu, abhenga arabhiika emongo okuringʼaana na obhunyoori bhwaye, naho hanú ndiija eyo, kutariija okubha-ho na omusororyo. ³Hanú ndiija ndibhahaana eginyarubha gya obhumanyiiriryo, abhantu bhanú murisora, naho bhahire omusororyo gwenyu mwikanisa rya Yerusaremu. ⁴Na nyoore erimaahikana ega, oni nonse ndeenderwa okugya, ndigya hamwi nabho.

Pauro areeseemya okugya Korinto

⁵Ndiija kubheenyu eyo, hanú ndirwa mukyaro kya Makedonia, kwa okubha ndeenda mbere okuhitira Makedonia. ⁶Hanú ndiija, hamwi ndiikara na bheenyu kwa eribhaga nyabhurebhe kasi kwibhaga ryonsego rya embeho, naho mumbeere okugendererya na orugendo rwani rwa okugya hohonse hanú ndyenda okugya. ⁷Ntakwenda tumaahane na bheenyu bhoonwego kwa okuhitiranʼya ego. Ndeesiga okwikara kubheenyu eribhaga nyabhurebhe, nyoore Omukuru arinyikiririrya. ⁸Nawe bhoono, ndeekara mumugi gwa Efeso hanu, okuhikira orusiku rwa enyangi ya Epentekosite.16:8 Epentekosite. N-dusiku rwa mirongo etaanu okurwa kunyangi ya Epasaka na emikaate ginú gitakutuurwa-mo ekimera. Kweki rwaringa orusiku rwa enyangi ya erigesa.⁹Erabha ego, kwa okubha Waryubha yansiikuriiri ekiseku hanu, okukora emirimu emirito, onyoora abhantu bhanú bharandibhira m-baaru.

¹⁰Bhoono, Timoteo hanú ariija kubheenyu eyo, mumwangararire bhujomu, naho yeekare bira obhoobha, kwa okubha wonse arakora emirimu gya Omukuru kya oni omwene. ¹¹Omuntu wowonse atamujeera, nawe, mumubheere yeemuke eyo kwa omurembe, naho ahunjuke kuoni, kwa okubha oni ndamuganyirira hamwi na abheekirirya abharikyetu.

¹²Eguru ya omwikirirya omurikyetu Apooro, mmukomereerye bhukongʼu ega, yaaje kubheenyu eyo, hamwi na abheekirirya abhandi, nawe, weeki atakwiyigwa okuuja kwibhaga rinu. Ariija kwibhaga rinú arinyoora omweya.

Okukeeranʼya kwa okuraga

¹³Mutengeeje, munage kuimani, kweki mubhe abhasajasaaja na abha eginguru. ¹⁴Amangʼana geenyu gonsego gakoreke kwa obhuhanje.

¹⁵Bhoono, abhahiiri bhaani kuimani, mumanyiri ega, abhantu bha owa Sitefano mbo bhaabha abha mbere okumwikirirya Yeesu Kiristu, mukyaro kya Akaya, na bheeki bheeruusya okubhakorera emirimu, abhantu bha Waryubha. Ego, ndabhakomererya ¹⁶na bheenyu, mubhenga murabheegwa abhantu kya bhayo, na kira omuntu unú arakora emirimu hamwi nabho kwa ekituunyo.

¹⁷Naajomeerwe bhukongʼu hanú Sitefano, Fotunato na Akaiko, bhaahikiri hanu, kwa okubha bheeki bhambeereri amaaru kuganú naasuuhirwanga kwa okwanga okubha-ho kwenyu. ¹⁸Bheeki bhasambaarukirye omutima gwani, na egyenyu gyonse. Mbe bhoono, mubhamanye bhukongʼu abhantu kya bhanu.

¹⁹Amakanisa ga mukyaro kya Asia,16:19 Asia. Eriina rinu ensonga yaaye niiga, ekyaro kya Asia kubhutungi bhwa Ekiruumi. Bhoonwego ekyaro kiyo kirabhirikirwa Bhuturuki. bharabhakeeranʼya. Akira na omukari waaye Pirisikira, hamwi na abheekirirya bhanú bhareekumanʼya iika owaabho, bharabhakeeranʼya bhukongʼu kuriina rya Omukuru. ²⁰Abheekirirya bhonsego bha hanu bharabhakeeranʼya. Bheenyu bhonse mukeeranʼyenga kwa obhuhanje bhwa Ekikiristu.

²¹Oni Pauro, ndangʼoora enkeeranʼya inu kwa okubhoko kwani omwene. ²²Omuntu wowonse unú atamuhanjiri Omukuru, yeehiimwe. Omukuru weetu uuje!

²³Eriruguto rya Omukuru Yeesu ribhe hamwi na bheenyu. ²⁴Obhuhanje bhwani bhubhe na bheenyu bhonsego, kukugwatana na Kiristu Yeesu.