FILIPENSES

FILIPENSES

¹Pablojon quic’ot Timoteo, i winicon lojon Jesucristo. Wolic ts’ijbubeñet lojon ili jun, pejtelel i cha’añet bʌ la Cristo Jesús ya’ ti Filipos, yic’ot xcʌntayajob yic’ot diáconojob. ²La’ aq’uentiquetla i yutslel yic’ot i ñʌch’tʌlel la’ pusic’al ch’oyol bʌ ti Dios lac Tat yic’ot lac Yum Jesucristo.

Pablo tsi’ cha’le oración cha’an xñopt’añob ya’ ti Filipos

³Ti jujunyajl che’ mic ña’tañetla, mic suben c Yum Dios wocolix i yʌlʌ. ⁴Ti pejtelel ora che’ mic tajetla ti oración, mij c’ajtiben Dios la’ wenlel ti’ tijicñʌyel c pusic’al. ⁵Mic suben wocolix i yʌlʌ, come c’ʌlʌl ti’ cajibal che’ bʌ tsa’ caji la’ ñop c’ʌlʌl wʌle, woli la’ coltañon ti’ pucol jini wen t’an. ⁶Cujil Dios mi caj i ts’ʌctesan majlel jini wen bʌ e’tel tsa’ bʌ i teche ti la’ pusic’al c’ʌlʌl ti’ q’uiñilel Jesucristo. ⁷Che’ʌch yom mic chʌn ña’tañetla ti la’ pejtelel ti pejtelel ora, come añetla tic pusic’al. Jini cha’an woli la’ tajben i yutslel i pusic’al Dios quic’ot, come chʌn xuc’ulon ti jini wen t’an wʌ’ ba’ ñup’ulon. Wolic chʌn tsictesan i sujmlel. ⁸Yujil Dios ti pejtelel c pusic’al mic wen c’uxbiñetla ti la’ pejtelel yic’ot i c’uxbiya Jesucristo. ⁹Mij c’ajtiben ti oración cha’an mi’ chʌn p’ojlel la’ c’uxbiya yic’ot la’ ña’tʌbal yic’ot cabʌl la’ pusic’al, ¹⁰cha’an mi la’ yajcan chuqui ñumen wen, cha’an mi la’ wajñel, ti’ sʌclel la’ pusic’al ti’ tojlel la’ pi’ʌlob c’ʌlʌl ti’ q’uiñilel Cristo, ¹¹cha’an cabʌl mi’ yʌc’ i wut toj bʌ la’ pusic’al ti’ tojlel Jesucristo. Che’ jini, mi caj i tsictiyel i ñuclel Dios. Mi caj i subentel wocolix i yʌlʌ.

Che’ cuxulon to wʌ’to mic chʌn ajñel cha’an Cristo

¹²Com mi la’ ña’tan hermanojob, jini wocol tsa’ bʌ cubi tsi’ yʌc’ʌ ti utsi pujquel jini wen t’an ¹³ti’ tojlel pejtelel i soldadojob César woliyo’ bʌ ti cʌntaya, yic’ot yaño’ bʌ ja’el. Laj yujilob ñup’ulon cha’an Cristo. ¹⁴Tsa’ ch’ejl’ayob ti lac Yum cabʌl la quermanojob cha’an ñup’ulon. Ñumen ch’ejl woli’ subob jini wen t’an. Ma’añobix i bʌq’uen.

¹⁵Isujm an winicob mu’ bʌ i subob i t’an Cristo yic’ot i tsʌytsʌyñʌyel i pusic’al tic tojlel, cha’an mi’ t’oxob hermanojob. Pero yaño’ bʌ mi’ subob i t’an Cristo cha’an yomob i mel chuqui uts’at. ^16-17Woliyob ti subt’an come woli’ c’uxbiñoñob. Ña’tʌbil i cha’añob wa’chocobilon ti Dios cha’an mic tsictesan i sujmlel jini wen t’an. Pero yaño’ bʌ mi’ cha’leñob subt’an, come yomob i yotsʌbeñon i tsʌytsʌyñʌyel c pusic’al. Yomob i p’ojlesʌbeñon c wocol ilayi ti mʌjquibʌl. ¹⁸¿Chuqui mi cʌl, che’ jini? Mi woli’ subob i t’an Cristo cha’an yomob i bajñel chañ’esan i bʌ, o mi woli’ subob ti jump’ejl i pusic’al, tijicñayon cha’an woli ti sujbel. Chʌn tijicña mi cubin.

¹⁹Come cujil mi caj cʌjq’uel ti colel cha’an la’ woración yic’ot i ye’tel i yEspíritu Jesucristo. ²⁰Come che’ʌch com ja’el ti pejtelel c pusic’al. Mi cʌl ma’anic mi caj cʌjq’uel ti quisin mi ts’ita’ic, pero ti pejtelel c ch’ejlel che’ bajche’ ti yambʌ ora, che’ ja’el wʌle, mi caj i pʌstʌl i ñuclel Cristo tic tojlel mi cuxul to mi cajñel, o mi mux c chʌmel. ²¹Come cuxul Cristo tic pusic’al. Jiñʌch j cuxtʌlel. Mi tsa’ chʌmiyon ñumen tijicñayon ti’ tojlel. ²²Pero mi anto j c’ʌjñibal wʌ’ ti pañimil ti’ tojlel xñopt’añob, mach cujilic baqui bʌ yom mic yajcan. ²³Come woli ti chʌn q’uextʌyel c pusic’al cha’an cha’chajp wolic ña’tan. Comix chʌmel cha’an mi cajñel yic’ot Cristo. Jiñʌch c’ax uts’at bʌ. ²⁴Pero yom to mic chʌn ajñel quic’otetla cha’an mij cʌntesañetla. ²⁵Che’ʌch wolic ña’tan. Jini cha’an cujil mu’ to cajñel quic’otetla, cha’an mi’ p’ojlel la’ wenlel yic’ot i tijicñʌyel la’ pusic’al ti’ ñopol Cristo. ²⁶Che’ jini mi caj i p’ojlel i ñuclel la’ pusic’al ti Cristo Jesús cha’añon che’ mic cha’ c’otel ba’ añetla.

²⁷Yom jach mi la’ wajñel ti uts’at che’ bajche’ mi’ cʌntesañonla i wen t’an Cristo. Che’ jini mi tsaj q’ueleyetla, o mi ma’anic tsaj q’ueleyetla, mi caj cubin xuc’uletla ti jump’ejl la’ pusic’al, che’ temel mi la’ cha’len wersa cha’an mi’ ñojpel jini wen t’an. ²⁸Mach yomic mi la’ wis bʌc’ñan la’ contrajob. Che’ jini tsiquil ti’ tojlelob mi caj i jisʌntelob, pero mi caj la’ coltʌntel cha’an Dios. ²⁹Come aq’uebiletla la’ c’ʌjñibal ti Cristo, mach cojic jach cha’an mi la’ ñop, pero cha’an ja’el mi la’ wubin wocol cha’an Cristo. ³⁰Lajal woli’ yujtel wocol ti la’ tojlel che’ bajche’ tic tojlel come wolic ñusan wocol che bajche’ tsa’ la’ wubi.

Cristo tsi’ peq’uesa i bʌ

¹An i ñuq’uesʌntel lac pusic’al ti Cristo yic’ot c’uxbiya. Mi lac wen cʌn lac bʌ ti jini Espíritu. Mi laj c’uxbin lac bʌ, mi lac p’untan lac bʌ. ²Jini cha’an ts’ʌctesʌbeñon i tijicñʌyel c pusic’al. Yom junlajal la’ ña’tʌbal yic’ot la’ c’uxbiya yic’ot la’ t’an. Yom jump’ejl jach la’ pusic’al. ³Mach yomic chuqui mi la’ wis mel ti’ tsʌytsʌyñʌyel la’ pusic’al cha’an mi la’ chañ’esan la’ bʌ. Pero yom pec’ mi la’ mel la’ bʌ. Yom ñumen ñuc mi la’ q’uel la’ pi’ʌlob che’ bajche’ mi la’ bajñel q’uel la’ bʌ. ⁴Mach jinic jach la’ bajñel wenlel yom mi la’ ña’tan pero i wenlel la’ pi’ʌlob ja’el.

⁵Yom lajal la’ ña’tʌbal che’ bajche’ i ña’tʌbal Cristo Jesús. ⁶Che’ junlajal Jesús yic’ot Dios, ma’anic tsi’ wersa ña’ta i yajñel che’ bajche’ Dios. ⁷Pero tsi’ wen peq’uesa i bʌ. Tsa’ ajni che’ bajche’ juntiquil am bʌ ti’ yum. Tsi’ yila pañimil che’ bajche’ winic. ⁸Che’ bʌ tsa’ ajni bajche’ winic, tsi’ peq’uesa i bʌ. Tsi’ wen jac’be Dios c’ʌlʌl tsi’ yʌc’ʌ i bʌ ti chʌmel ya’ ti cruz. ⁹Jini cha’an Dios tsi’ yʌq’ue c’ax cabʌl i ñuclel ya’ ti’ tojlel. Tsi’ yʌq’ue ñumen ñuc bʌ i c’aba’ che’ bajche’ pejtelel ñuco’ bʌ am bʌ i ye’tel. ¹⁰Cha’an ti’ c’aba’ Jesús mi caj i ñocchocoñob i bʌ pejtelel año’ bʌ ti panchan yic’ot ti pañimil yic’ot ti’ mal lum. ¹¹Ti pejtelelob mi caj i yʌlob Yumʌlʌch Jesucristo cha’an mi’ tsictesañob i ñuclel Dios lac Tat.

La’ tsictiyic la’ sʌclel ti pañimil

¹²Jini cha’an hermanojob, c’uxbibil bʌ c cha’an, che’ bajche’ tsa’ la’ jac’beyon che’ ya’ to añon la’ wic’ot, ñumen wen woli la’ jac’ wʌle che’ mach ya’ic añon. Ti’ tsiltsilñʌyel la’ pusic’al yic’ot bʌq’uen yom mi la’ chʌn cha’len chuqui uts’at cha’an mi’ tsictiyel woli la’ coltʌntel. ¹³Come Dios woli’ mel i ye’tel ti la’ pusic’al cha’an mi la’ mulan yic’ot cha’an mi la’ mel chuqui yom Dios. ¹⁴Melela ti pejtelel la’ pusic’al. Mach yomic mi la’ cha’len wulwul t’an mi a’leya. ¹⁵Che’ jini toj mi caj la’ wajñel ti jump’ejl la’ pusic’al, i yalobiletla Dios. Che’ jini ma’anic la’ bibi’lel anquese joyoletla ti jini mach bʌ tojobic i pusic’al, jini sojquemob jax bʌ. Mi’ tsictiyel la’ sʌclel ti’ tojlelob che’ bajche’ ec’ ¹⁶che’ woli la’ pʌs jini cuxul bʌ t’an. Che’ jini, tijicña mi caj cubin ti’ q’uiñilel Cristo cha’an mach lolomic jach que’tel. ¹⁷Tsa’ix la’ ñopo Cristo tsa’ bʌ i yʌc’ʌ i bʌ i wenta tsʌnsʌbil bʌ i majtan Dios. Mi che’ʌch yom mic chʌmel ja’el cha’an xuc’ul mi la’ ñop, tijicñayon mi tsa’ mejli c ñuq’uesʌbeñetla la’ pusic’al. ¹⁸Jini cha’an yom tijicñayetla. Yom mi la’ ñuq’uesʌbeñon c pusic’al ja’el.

Timoteo yic’ot Epafrodito

¹⁹Mi cʌl mach jalic mi caj i coltañon lac Yum Jesús, cha’an mic choc tilel Timoteo ba’ añetla, cha’an mi’ ñuc’an c pusic’al che’ mi cubin bajche’ añetla. ²⁰Come ma’anic yambʌ c pi’ʌl ilayi lajal bajche’ Timoteo mu’ bʌ i ña’tan la’ wenlel ti jump’ejl i pusic’al. ²¹Ti pejtelelob mi’ ña’tañob i bajñel wenlel. Ma’anic mi’ ña’tañob chuqui yom Cristo Jesús. ²²La’ wujil an cabʌl i c’ʌjñibal Timoteo. Che’ bajche’ ch’iton mi’ coltan i tat ti e’tel, tsi’ coltayon Timoteo ti’ pucol jini wen t’an. ²³Jini cha’an com c choc majlel ya’ ba’ añetla che’ mic ña’tan chuqui anto yom tic tojlel. ²⁴Mi cʌl mach jalix mi caj i coltañon lac Yum cha’an mic tilel ja’el ba’ añetla. ²⁵Tsac ña’ta ja’el yom mic choc majlel ba’ añetla quermano Epafrodito, c pi’ʌl ti e’tel ti jini wen bʌ guerra. Chocbil tilel la’ cha’an, tsi’ wen coltayon. ²⁶Wersa yom i q’ueletla ti la’ pejtelel, come tsi’ wen mele i pusic’al cha’an tsa’ la’ wubi c’am. ²⁷Isujm tsa’ wen c’am’a Epafrodito. Colel tsi’ yʌlʌ chʌmel. Pero Dios tsi’ p’unta. Mach jinic jach tsi’ p’unta Epafrodito, tsi’ p’untayon ja’el, ame p’ojlic i ch’ijiyemlel c pusic’al. ²⁸Jini cha’an com c bʌc’ choc majlel ba’ añetla, cha’an cha’ tijicña mi la’ wubin che’ mi la’ q’uel, cha’an che’ jini mi’ lajmel jini c tsic pusic’al ja’el. ²⁹Pʌyʌla ochel ti lac Yum ti’ tijicñʌyel la’ pusic’al. Q’uelela ti ñuc pejtel mu’ bʌ i melob che’ bajche’ Epafrodito. ³⁰Come cha’an ti’ ye’tel Cristo colel tsi’ yʌlʌ chʌmel. Tsi’ yʌc’ʌ i bʌ ba’ bʌbʌq’uen mi’ chʌmel cha’an mi’ ts’ʌctesʌbeñetla chuqui anto yom melol tic tojlel.

Wolic cha’len ajñel cha’an mij c’otel ya’ ba’ jaxʌl c bijlel

¹Hermanojob, anto yom mi la’ tijicñesan la’ pusic’al ti lac Yum. Isujm, ma’anic mic lujban c cha’ ts’ijbubeñetla jini jach bʌ t’an. Che’ʌch yom cha’an mi la’ wen jac’. ²Tsajiletla come an winicob lajalo’ bʌ bajche’ ts’i’. Chʌcʌ q’uele la’ bʌ ti’ tojlel jini mu’ bʌ i cha’leñob jontolil. Chʌcʌ q’uele la’ bʌ ti’ tojlel jini woli bʌ i subob wersa mi’ tsejpel lac pʌchʌlel cha’an mi laj coltʌntel. ³Tsepbil lac pʌchʌlel ti isujm, joñonla mu’ bʌ lac ch’ujutesan Dios ti Espíritu. Mi’ ñuc’an lac pusic’al ti Cristo Jesús. La cujil mach mejlic lac bajñel coltan lac bʌ. ⁴Mi an majqui tsi’ lon ña’ta i bajñel coltan i bʌ, che’ ja’el joñon. Mi an majqui mi mejlel i pʌs i bʌ ti ñuc ti’ tojlel Dios, ñumen joñon. ⁵Come tsac ch’ʌmʌ tsep pʌchʌlel che’ waxʌcp’ejl jaxto j q’uiñilel. Loq’uemon ti’ p’olbal israelob, ti’ p’olbal Benjamín. Hebreojon come puro hebreojob c ñojte’el. Fariseojon cha’an ti’ jac’ol mandar. ⁶Cabʌl tsac tic’la xñopt’añob mu’ bʌ i tempañob i bʌ. Ma’anic c mul ti’ tojlel jini mandar.

⁷Pero lolom jach pejtel c bajñel ñuclel. Tsac ña’ta la’ix sajtic cha’an mij c’uxbintel ti Cristo. ⁸Isujm, ma’anic i c’ʌjñibal jini tsa’ bʌ c ñaxan q’uele ti ñuc come ñumen ñuc i cʌñol Cristo Jesús, c Yum. Cha’an Cristo wolij q’uel bajche’ misujelʌl pejtelel tsa’ bʌ j q’uele ti ñuc ti yambʌ ora cha’an mic taj c wenlel ti Cristo, ⁹cha’an mi cajñel ti’ tojlel. Mach cha’anic ti’ jac’ol mandar wolic taj, pero cha’an wolic ñop Cristo, come Dios mi’ yʌq’ueñonla toj bʌ lac pusic’al che’ mi lac ñop. ¹⁰Com jach j cʌn Cristo yic’ot i p’ʌtʌlel Dios tsa’ bʌ i teche ch’ojyel. Com cʌmben i wocol cha’an mic chʌmel lajal bajche’ tsa’ chʌmi, ¹¹cha’an mic cha’ ch’ojyel ja’el ti’ tojlel chʌmeño’ bʌ, bajche’ jach mi’ yujtel, cha’an mi cajñel ti tsiji’ bʌ j cuxtʌlel.

Yom mi lac cha’len wersa

¹²Maxto anic tsac taja pejtelel jini. Maxto ts’ʌctiyemic c wenlel. Wolic cha’len wersa cha’an ts’ʌcʌl mic taj chuqui yom i yʌq’ueñon Cristo Jesús tsa’ bʌ i tajayon. ¹³Hermanojob, ma’anic wolic ña’tan mi ts’ʌcʌl tsac taja, pero junsujm jach wolic ña’tan: Wolic ñajʌtesan jini am bʌ tic pat. Wolic cha’len wersa cha’an mic taj jini am bʌ ti’ tojel c wut. ¹⁴Wolic cha’len wersa che’ bajche’ x’ajñel cha’an mij c’otel ya’ ba’ jaxʌl c bijlel cha’an mic taj jini c’ax uts’at bʌ. Dios woli’ pʌyon ti chan ti Cristo Jesús, jiñʌch jini c’ax uts’at bʌ. ¹⁵Jini cha’an, ti pejtelelonla tsa’ bʌ lac taja laj colel, che’ʌch yom mi lac ña’tan ti lac pusic’al. Mi tilel bixel la’ pusic’al, Dios mi caj i pʌsbeñetla. ¹⁶Mi an chuqui tsa’ lac taja ti Cristo, la’ lac chʌn tsajcan ti jump’ejl lac pusic’al che’ bajche’ cʌntesʌbilonla, che’ bajche’ tsa’ lac mele c’ʌlʌl wʌle.

¹⁷Hermanojob, melela che’ bajche’ wolic mel. Wen q’uelela jini mu’ bʌ i melob che’ bajche’ joñon lojon. ¹⁸Come woli’ yujtel che’ bajche’ tsac wʌn subeyetla. Cabʌlob ti la’ tojlel woli’ contrajiñob i cruz Cristo. Wolic cha’ subeñetla yic’ot i ya’lel c wut. ¹⁹Mi caj i jisʌntelob come woli’ diosiñob chuqui yom i bʌc’tal. Mi’ lon q’uelob i bʌ ti ñuc cha’an i melbalob anquese quisintic. Mi’ yʌc’ob ti’ pusic’al chuqui jach an ti pañimil. ²⁰Pero joñonla an lac lumal ya’ ti panchan ba’ mi caj lac taj la caj Coltaya, lac Yum Jesucristo woli bʌ lac pijtan. ²¹Jini mi caj i q’uextʌbeñonla lac bʌc’tal am bʌ i tsuculel cha’an lajal mi’ yajñel bajche’ i bʌc’tal lac Yum am bʌ i ñuclel, come an i p’ʌtʌlel cha’an mi’ ch’ʌm ti’ wenta pejtelel chuqui tac an.

Tijicñesan la’ pusic’al ti lac Yum Jesucristo ti pejtelel ora

¹C’uxbibil bʌ quermanojob, com j q’ueletla. Mic taj c tijicñʌyel yic’ot c ñuclel ti jatetla. Jini cha’an ajñenla ti xuc’ul ti lac Yum, c’uxbibilet bʌ la. ²Ti wocol t’an mic subeñet Evodia yic’ot Síntique, yom jump’ejl la’ pusic’al ti lac Yum. ³Che’ ja’el ti wocol t’an mic subeñetla, mero c pi’ʌlet bʌ la ti e’tel, coltan jini x’ixicob tsa’ bʌ i cha’leyob e’tel quic’ot ti jini wen t’an, yic’ot ja’el Clemente, yic’ot yaño’ bʌ c pi’ʌlob ti e’tel chucbilo’ bʌ i c’aba’ ti’ jun Dios yic’ot pejtel año’ bʌ i cuxtʌlel. ⁴Tijicñesan la’ pusic’al ti lac Yum ti pejtelel ora. Mic cha’ subeñetla: Tijicñesan la’ pusic’al. ⁵Pʌsbeñob i yutslel la’ pusic’al pejtelel winicob. Lʌc’ʌlix an lac Yum. ⁶Mach mi la’ cha’len tsic pusic’al pero ti pejtelel chuqui tac mi’ yujtel subenla Dios chuqui tac yom ti oración. Chʌn c’ajtibenla. Subenla wocolix i yʌlʌ. ⁷Che’ jini, i ñʌch’tʌlel la’ pusic’al ch’oyol bʌ ti Dios mi caj i cʌntan la’ pusic’al yic’ot la’ ña’tʌbal ti Cristo Jesús. Ma’anic i p’isol i ñʌch’tʌlel lac pusic’al mu’ bʌ i yʌq’ueñonla.

Ña’tanla pejtelel jini

⁸Che’ ja’el hermanojob yom mi la’ ña’tan chuqui tac isujm, chuqui tac toj, chuqui tac uts’at, chuqui tac sʌc, chuqui tac i t’ojol, chuqui tac wen. Mi an chuqui c’ax wen, mi an chuqui yom sujbel ti ñuc, ña’tanla. ⁹Melela ti pejtelel che’ bajche’ cʌntesʌbiletla, che’ bajche’ tsa’ la’ ñopo, che’ bajche’ tsa’ la’ wubi ti joñon, che’ bajche’ tsa’ la’ q’uele ti joñon. Che’ jini mux i yajñel Dios la’ wic’ot. Jiñʌch mu’ bʌ i yʌq’ueñonla i ñʌch’tlel lac pusic’al.

Tsa’ aq’uenti i majtan Pablo

¹⁰C’ax tijicña c pusic’al ti lac Yum wʌle come tsa’ cha’ caji la’ coltañon. Anix ora la’ wom, pero ma’anic tsa’ mejli la’ taj bajche’ mi la’ coltañon. ¹¹Ma’anic woli cʌl mi an to chuqui yom c cha’an. Come cujil ajñel ti tijicña bajche’ jach añon. ¹²Cujil c ñusan wocol che’ ma’anic c chubʌ’an. Cujil wen chumtʌl ja’el che’ cabʌl c chubʌ’an. Cʌntesʌbilon cha’an mi cajñel ti tijicña bajche’ jach añon, chuqui jach mi’ yujtel, mi ñajon, mi wi’ñayon, mi an cabʌl c chubʌ’an, o mi anto yom c chubʌ’an. ¹³Ti Cristo mu’ bʌ i p’ʌtesañon mi mejlel c mel pejtelel chuqui yom. ¹⁴Wen uts’at tsa’ la’ mele che’ bʌ tsa’ la’ coltayon tic wocol. ¹⁵Che’ ti’ cajibal jini wen t’an, che’ bʌ tsa’ loq’uiyon ti Macedonia, ma’anic tsi’ coltayoñob. La’ wujil ma’anic chuqui tsi’ yʌq’ueyoñob yambʌ xñopt’añob, cojach jatetla añet bʌ la ti Filipos. ¹⁶Che’ ya’ añon ti Tesalónica ja’el cha’yajl tsa’ la’ chocbeyon tilel chuqui anto yom c cha’an. ¹⁷Ma’anic wolij c’ajtin c majtan, pero com mi’ p’ojlel wen bʌ la’ melbal cha’an ñumen cabʌl mi la’ taj la’ chobejtʌbal. ¹⁸Tsa’ix la’ wʌq’ueyon pejtelel chuqui yom. An i ñumel. Jasʌlix. Epafrodito tsi’ ch’ʌmbeyon tilel ti pejtelel. La’ wofrenda, xojocña i yujts’il yilal, lajal bajche’ pulbil bʌ i majtan Dios mu’ bʌ i mulan, uts’at bʌ mi’ q’uel. ¹⁹Lac Yum Dios mi caj i yʌq’ueñetla pejtelel chuqui anto yom la’ cha’an che’ bajche’ c’amel an i cha’an Cristo Jesús ya’ ti panchan. ²⁰La’ sujbic i ñuclel Dios lac Tat ti pejtelel ora. Amén.

Cortesía tac

²¹Aq’uenla cortesía pejtelel i cha’año’ bʌ Dios ti Cristo Jesús. Pejtelel la quermanojob año’ bʌ quic’ot mi’ yʌq’ueñetla cortesía. ²²Pejtelel i cha’año’ bʌ Dios mi’ yʌq’ueñetla cortesía, cojcoj jini año’ bʌ ti’ yotot César. ²³La’ ajnic ti la’ pusic’al i yutslel i pusic’al lac Yum Jesucristo.