GALATAS

GALATAS

¹Pablojon, apóstolon. Mach chocbilonic majlel i cha’an winicob mi ti’ p’ʌtʌlelic winic. Chocbilon majlel i cha’an Jesucristo yic’ot Dios lac Tat tsa’ bʌ i teche ch’ojyel Jesús ba’an chʌmeño’ bʌ. ²Joñon quic’ot pejtelel hermanojob wʌ’ bʌ añob wolic ña’tañet lojon xñopt’añet bʌ la mu’ bʌ la’ tempan la’ bʌ ya’ ti Galacia. ³La’ aq’uentiquetla i yutslel yic’ot i ñʌch’tʌlel la’ pusic’al ch’oyol bʌ ti Dios lac Tat yic’ot ti lac Yum Jesucristo. ⁴Tsi’ yʌc’ʌ i bʌ ti chʌmel cha’an lac mul che’ bajche’ yom Dios lac Tat cha’an mi’ loc’sañonla ti’ p’ʌtʌlel jontolil am bʌ ti pañimil wʌle. ⁵La’ sujbic i ñuclel ti pejtelel ora. Amén.

Ma’anic yambʌ Wen T’an

⁶Woli’ toj sajtel c pusic’al come maxto anic ora tsa’ la’ ñopo, pero wʌle wolix la’ cʌy Dios tsa’ bʌ i pʌyʌyetla ti’ yutslel i pusic’al Cristo. Woli la’ cha’ sutq’uin la’ bʌ cha’an mi la’ ñop yambʌ t’an. ⁷Ma’anic yambʌ wen t’an. An winicob woli bʌ i tic’lañetla cha’an yomob i socben i wen t’an Cristo. ⁸La’ junyajlel chojquic ti Dios majqui jach mi’ sub yambʌ t’an mach bʌ lajalic bajche’ jini wen t’an tsa’ bʌ c subu lojon, mi ángel tilem bʌ ti panchan o mi joñon lojon mu’ bʌ c sub yambʌ t’an, la’ chojquicon lojon. ⁹Che’ bajche’ tsac subeyet lojon ti yambʌ ora wolic cha’ subeñetla. Mi an majch mi’ subeñetla yambʌ wen t’an yilal mach bʌ jinic tsa’ bʌ lac ñopo, la’ chojquic jini winic ti Dios. ¹⁰¿Woli ba c sajcan c ñuclel ti’ tojlel winicob, o ti’ tojlel Dios? ¿Woli ba c cha’len chuqui uts’at cha’an mi’ q’ueloñob ti ñuc winicob? Muq’uic c mel chuqui uts’at cha’an mi’ q’ueloñob ti ñuc winicob, mach i winiconic Cristo.

I ye’tel Pablo cha’an jini Wen T’an

¹¹Com c subeñetla hermanojob, mach ch’oyolic ti winicob jini wen t’an tsa’ bʌ c subu. ¹²Ma’anic tsi’ yʌq’ueyoñob winicob. Mach cʌntesʌbilonic i cha’an winicob. Jesucristo tsi’ pʌsbeyon i sujmlel. ¹³Tsa’ix la’ wubi bajche’ tsac ñopbeyob i costumbre israelob. Ma’anic i p’isol bajche’ tsac tic’la i cha’año’ bʌ Dios mu’ bʌ i tempañob i bʌ. Tsac ñopo c jisañob. ¹⁴Ti pejtelel i costumbre israelob ñumen bʌxon bajche’ c pi’ʌlob. Ñumen bʌxon ti’ subol i t’an c ñojte’elob. ¹⁵Dios tsi’ yajcayon che’ maxto anic tsa quila pañimil. Tsi’ pʌyʌyon ti’ yutslel i pusic’al ¹⁶che’ bʌ tsi’ pʌsbeyon i Yalobil. Tsi’ yʌc’ʌ ti tsictiyel i Yalobil ti joñon che’ bajche’ yom i pusic’al cha’an mic sub Cristo ti’ tojlel jini mach bʌ i cʌñʌyobic Dios. Che’ jini ma’anic tsaj c’ajtibe winicob i sujmlel jini wen t’an. ¹⁷Ma’anic tsa’ majliyon ti Jerusalén ba’an jini ñaxan bʌ apóstolob, pero tsa’ majliyon ti Arabia. Tsa’ cha’ tiliyon ti Damasco.

¹⁸Che’ ñumenix uxp’ejl jab, tsa’ letsiyon majlel ti Jerusalén cha’an mij cʌn Pedro. Ya’ tsa’ jaleyon jo’lujump’ejl (15) q’uin yic’ot Pedro. ¹⁹Ma’anic tsaj q’uele yambʌ apóstol, cojach Jacobo i yijts’in lac Yum. ²⁰Awilan, ti’ tojlel Dios mach c lotic jini woli bʌ c ts’ijbubeñetla. ²¹Ti wi’il tsajniyon ti tejclum tac ya’ ti Siria yic’ot ti Cilicia. ²²Ti jim bʌ ora maxto cʌmbilonic i cha’an año’ bʌ ti Cristo mu’ bʌ i tempañob i bʌ ya’ ti Judea. ²³Tsa’ jach i yubiyob chuqui woli’ yʌlob yaño’ bʌ: Jini tsa’ bʌ i tic’layonla ti yambʌ ora wolix i sub jini wen t’an tsa’ bʌ i lon ñopo i jisan, che’ob. ²⁴Tsi’ q’ueleyob i ñuclel Dios ti joñon.

Jini xcʌnt’añob tsi’ ch’ʌmʌyob ti wenta Pablo

¹Che’ ñumenix chʌnlujump’ejl (14) jab, tsa’ cha’ letsiyon majlel ti Jerusalén quic’ot Bernabé. Tsac pʌyʌ majlel Tito ja’el. ²Cʌntesʌbilon ti Dios tsa’ majliyon cha’an mic tsictesʌbeñob jini wen t’an mu’ bʌ c subeñob gentilob. Tic bajñel lojon yic’ot jini hermanojob año’ bʌ i ye’tel tsac subeyob pejtel chuqui tsac cha’le yic’ot pejtel j cʌntesa, cha’an uts’at mi’ yujtel que’tel ti’ tojlelob che’ junlajal lac pusic’al. ³Uts’at tsi’ pejcayoñob yic’ot Tito am bʌ quic’ot, anquese griego. Ma’anic tsi’ xic’beyob cha’an mi’ ch’ʌm tsep pʌchʌlel, ⁴anquese ya’ añob payxo hermanojob ti mucul tsa’ bʌ ochiyob i yojch’oñon lojon cha’an libre añonla ti Cristo Jesús. Mi’ yʌlob wersa mi lac chʌn jac’ jini mandar cha’an mi laj coltʌntel. ⁵Ma’anic tsac wis jac’beyob lojon come com lojon mi’ chʌn ajñel i sujmlel jini wen t’an ti la’ tojlel. ⁶Jixcu jini wen cʌmbilo’ bʌ año’ bʌ i ye’tel ti’ tojlel xñopt’añob, ma’anic chuqui tsa’ cʌntesʌntiyon ti’ tojlelob. Mi ñucob ti’ tojlel winicob ma’anic chuqui mi’ cha’len, come junlajalonla ti’ wut Dios. ⁷Pero tsi’ ña’tayob aq’uebilon tic wenta cha’an mic sub jini wen t’an ti’ tojlel gentilob che’ bajche’ aq’uebil Pedro cha’an mi’ sub ti’ tojlel israelob. ⁸Che’ bajche’ lac Yum tsi’ wa’choco Pedro cha’an mi’ majlel ba’an israelob, tsi’ wa’chocoyon ja’el cha’an mic majlel ba’an gentilob. ⁹Jacobo yic’ot Pedro yic’ot Juan, mu’ bʌ i q’uejlelob che’ bajche’ oy cha’an ñuc i ye’tel, tsi’ ña’tayob aq’uebilon i yutslel i pusic’al Dios. Che’ jini tsi’ yʌq’ueyoñob cortesía quic’ot Bernabé ti ñoj bʌ i c’ʌb cha’an mic majlel lojon ba’an gentilob. Jini uxtiquil tsa’ majliyob ba’an israelob. ¹⁰Tsi’ subeyon lojon yom jach mic ña’tan lojon jini p’ump’uño’ bʌ che’ bajche’ tsac bajñel ña’ta c mel ti pejtelel c pusic’al.

Pablo tsi’ tiq’ui Pedro

¹¹Che’ bʌ tsa’ c’oti Pedro ti Antioquía, tsac tiq’ui come an i sojquemal. ¹²Come che’ maxto c’otemobic i pi’ʌlob Jacobo, temel tsi’ c’uxu waj Pedro yic’ot gentilob. Ti wi’il che’ bʌ tsa’ tiliyob jini winicob, tsi’ tʌts’ʌ i bʌ Pedro ba’an gentilob. Ma’anix tsi’ chʌn pejcayob, come tsi’ bʌc’ña jini mu’ bʌ i cʌntesañob tsep pʌchʌlel. ¹³Yaño’ bʌ judíojob ja’el cha’chajp tsi’ meleyob i pusic’al lajal bajche’ Pedro. Che’ʌch tsi’ mele ja’el Bernabé. ¹⁴Che’ bʌ tsaj q’uele mach tojic woli’ yajñelob ti’ sujmlel jini wen t’an, tsac sube Pedro che’ temel añob: Jatet anquese israelet, wola’ mel bajche’ jini gentilob. Mi ma’anix wola’ mel bajche’ israelob, ¿chucoch che’ jini, ma’ lon xic’beñob gentilob cha’an mi’ melob lajal bajche’ israelob? cho’on tsac sube.

¹⁵Joñonla tsa’ bʌ la quila pañimil ti Israel, mach i pi’ʌlonicla jini xmulilob, gentilob. ¹⁶Pero la cujil che’ mi’ ñopob Cristo mi’ ñusʌbentelob i mul. Dios mi’ yotsañob ti’ wenta cha’an tsi’ ñopoyob, mach cha’anic i jac’ol mandar. Mi’ yotsañonla ti’ wenta ja’el che’ mi lac ñop Cristo. Mi’ ñusʌbeñonla lac mul cha’an tsa’ lac ñopo, mach cha’anic i jac’ol mandar.

¹⁷Pero che’ woli lac ñop Cristo cha’an mi’ yotsañonla ti’ wenta, mi lajal mi lac taj lac mul bajche’ jini mach bʌ i cʌñʌyobic mandar, ¿jim ba i mul Cristo? Ma’anic. ¹⁸Mi tsa’ cha’ caji c ñop jini mandar che’ bʌ tsa’ix j cʌyʌ, tsiquil xñusa mandaron. Che’ jini an c sajtemal, come tsaj cʌntesayetla mi laj q’uejlel ti toj cha’an ti’ ñopol Cristo, mach cha’anic ti’ jac’ol jini mandar. ¹⁹Che’ bʌ tsac ñopo j coltan c bʌ ti’ jac’ol mandar, tsi’ tsʌnsayon jini mandar yilal. Chʌmeñonix ti’ tojlel jini mandar cha’an mic taj j cuxtʌlel ti Dios. ²⁰Isujm tsa’ ch’ijleyon ti cruz yic’ot Cristo. Mach chʌn cuxulonix joñon, pero cuxul Cristo tic pusic’al. Wʌle che’ cuxulon tic bʌc’tal ti pañimil, wolic taj j cuxtʌlel ti’ ñopol i Yalobil Dios tsa’ bʌ i c’uxbiyon, tsa’ bʌ i yʌc’ʌ i bʌ ti chʌmel cha’añon. ²¹Ma’anic mic ñusʌben i yutslel i pusic’al Dios. Muq’uic laj q’uejlel ti toj cha’an i jac’ol mandar, lolom jach tsa’ chʌmi Cristo.

Tsa’ aq’uentiyob Espíritu che’ bʌ tsi’ ñopoyob

¹¡Sojquemetla añet bʌ la ti Galacia! ¿Majqui tsi’ socoyetla cha’an mi la’ cʌy la’ jac’ben i sujmlel jini wen t’an tsa’ bʌ wen subentiyetla cha’an tsa’ ch’ijle ti cruz Jesucristo? ²Cojach com j c’ajtibeñetla: ¿Tsa’ ba aq’uentiyetla jini Espíritu cha’an ti’ jac’ol i mandar Moisés? ¿Mach ba cha’anic tsa’ la’ ñopo jini wen t’an che’ bʌ tsa’ la’ wubi? ³¿Chucoch sojquem la’ pusic’al? Tsa’ caji la’ ñop Cristo ti’ p’ʌtʌlel jini Espíritu. Wʌle, ¿mu’ ba mejlel la’ taj la’ wenlel ti la’ bajñel wersa? ⁴Tsa’ la’ ñusa cabʌl wocol cha’an jini wen t’an. Mach to’olic jach. ⁵Diosʌch mu’ bʌ i yʌq’ueñetla jini Espíritu. Mi’ cha’len ñuc bʌ i ye’tel ba’ añetla. ¿Cha’an ba tsa’ la’ jac’ʌ jini mandar? ¿Mach ba cha’anic tsa’ la’ ñopo che’ bʌ tsa’ la’ wubi?

⁶Abraham ja’el tsi’ ñopo Dios. Jini cha’an Dios tsi’ yotsʌbe ti’ wenta. Tsi’ q’uele ti toj. ⁷Ña’tanla che’ jini, pejtel mu’ bʌ i ñopob Dios i yalobilobʌch Abraham. ⁸Wʌn ts’ijbubil ti’ t’an Dios, mi caj i ñusʌbeñob i mul. Mi caj i yotsañob jini gentilob ti’ wenta che’ mi’ ñopob Dios. Jini cha’an tsa’ wʌn subenti Abraham jini wen t’an: “Ti a tojlel mi caj i tajob i wenlel pejtel tejclumob”. ⁹Jini cha’an, majqui jach mi’ ñop Dios mi’ taj i wenlel yic’ot Abraham tsa’ bʌ i ñopo Dios.

¹⁰Come pejtelel mu’ bʌ i ñopob i coltañob i bʌ ti’ jac’ol jini mandar mi caj i chojquelob ti Dios. Come ts’ijbubil: “Mux i chojquelob ti Dios pejtelel mu’ bʌ i wis cʌyob i mel ti ts’ʌcʌl chuqui tac ts’ijbubil ti’ juñilel jini mandar”. ¹¹Tsiquil che’ jini, Dios ma’anic mi’ ñusʌben i mul, ma’anic mi’ yotsan ti’ wenta mi juntiquilic cha’an ti’ jac’ol jini mandar. Come mi’ yʌl: “Jini otsʌbilix bʌ ti’ wenta Dios cha’an tsi’ ñopo Dios, cuxul mi’ yajñel”, che’en. ¹²Mach lajalic i jac’ol mandar bajche’ i ñopol Cristo, come mi’ yʌl: “Jini mu’ bʌ i jac’ jini mandar ti ts’ʌcʌl mi’ taj i cuxtʌlel”, che’en. ¹³Pero ya’ ti cruz Cristo tsi’ mʌñʌyonla loq’uel ti’ p’ʌtʌlel jini mandar mu’ bʌ i yʌc’onla ti chojquel, come tsa’ chojqui ti Dios cha’añonla, come ts’ijbubil: “Chocbil ti Dios majqui jach mi’ joc’chocontel ti te’”. ¹⁴Che’ʌch tsa’ ujti cha’an mi’ tajob i wenlel gentilob ja’el ti Cristo Jesús, che’ bajche’ Dios tsi’ wʌn sube Abraham, cha’an mi lac laj aq’uentel jini Espíritu che’ mi lac ñop.

Jini Mandar yic’ot jini Albil bʌ t’an

¹⁵Mic cha’len lajiya hermanojob. Wʌ’ ti pañimil che’ mi lac ts’ijban ti jun bajche’ mi’ caj ti t’oxtʌl lac chubʌ’an che’ mi lac chʌmel, ma’anic majch mi mejlel i jem. Ma’anic majch mi mejlel i xʌ’ ts’ijban yambʌ t’an che’ anix i sellojlel. ¹⁶Dios tsi’ yʌq’ue Abraham yic’ot juntiquil i p’olbal jini albil bʌ t’an. Ma’anic tsi’ yʌlʌ i p’olbalob, pero i p’olbal, come juntiquil jach, jiñʌch Cristo. ¹⁷Jiñʌch i sujmlel woli bʌ c sub: Dios tsi’ wʌn subu cha’an mi caj i tilel Cristo. Che’ ñumenix jumbajc’ yic’ot lujump’ejl i cha’c’al (430) jab, tsi’ yʌc’ʌ jini mandar. Jini mandar tsa’ bʌ tili ti wi’il ma’anic tsi’ jeme jini t’an tsa’ bʌ i ñaxan alʌ. ¹⁸Mi cha’anʌch jini mandar mi laj coltʌntel, che’ jini mach cha’anic jini albil bʌ t’an. Pero Dios ti’ yutslel i pusic’al tsi’ colta Abraham che’ bʌ tsi’ yʌq’ue jini albil bʌ i t’an.

¹⁹¿Chuqui i ye’tel jini mandar che’ jini? Dios tsi’ yʌq’ueyonla jini mandar cha’an mi’ tsictesʌbeñonla lac mul. Pero ma’anix i c’ʌjñibal jini mandar che’ tilemix i P’olbal che’ bajche’ wʌn albil. Dios tsi’ c’ʌñʌ i yángelob i yʌq’uen mandar Moisés i wenta xñusa t’an. ²⁰Che’ an juntiquil jach mach wersajic yom xñusa t’an. Pero Dios, che’ bʌ tsi’ lʌc’ʌ i t’an cha’an mi’ coltan winicob x’ixicob, tsi’ bajñel wa’choco.

²¹Jixcu jini mandar, ¿i contra ba jini t’an albil bʌ i cha’an Dios? Mach i contrajic. Actan tsa’ic aq’uentiyonla laj cuxtʌlel cha’an ti’ jac’ol jini mandar, che’ jini, isujmʌch mi laj q’uejlel ti toj cha’an ti’ jac’ol jini mandar. ²²Pero i t’an Dios mi’ yʌl woli’ yajñelob ti’ p’ʌtʌlel mulil pejtelel año’ bʌ ti pañimil cha’an mi la cʌq’uentel jini albil bʌ ti Dios che’ mi lac ñop Jesucristo, come majqui jach mi’ ñop mi’ coltʌntel.

²³Che’ maxto tilemic jini wen t’an mu’ bʌ lac ñop, añon to la ti’ wenta jini mandar. Ñup’ulonla jinto tsa’ tsictesʌbentiyonla jini wen t’an mu’ bʌ lac ñop. ²⁴Jini mandar tsi’ cʌntesayonla cha’an mi lac ñop Cristo, cha’an mi laj q’uejlel ti toj che’ mi lac ñop. ²⁵Wʌle tilemix jini wen t’an mu’ bʌ lac ñop. Mach chʌn añonixla ti’ wenta jini mandar. ²⁶I yalobiletla Dios ti la’ pejtelel cha’an tsa’ la’ ñopo Cristo Jesús. ²⁷Ti pejteletla tsa’ bʌ ochiyetla ti Cristo ti Espíritu, tsa’ix la’ xojo Cristo. ²⁸Mi judíojet, mi griegojet, mi añet ti a yum, mi to’ol che’ jach añet, mi winiquet, mi x’ixiquet, ma’anic chuqui mi’ cha’len, come juntiquilet jach la ti Cristo Jesús. ²⁹Mi i cha’añetla Cristo, mero i p’olbaletla Abraham. Mi caj la’ taj chuqui mi la’ wʌq’uentel che’ bajche’ albil i cha’an Dios.

¹Yom mi la’ ña’tan ja’el: Che’ alʌl to jini mu’ bʌ caj i yʌq’uentel i chubʌ’an i tat, lajal jach bajche’ x’e’tel, anquese i yumʌch jini chubʌ’añʌl. ²Anto ti’ wenta xcʌntesajob yic’ot xcʌntayajob jinto mi’ c’otel i q’uiñilel i jabil tsa’ bʌ i wʌn alʌ i tat. ³Che’ ja’el joñonla che’ alobon to la, mozojonla yilal. Tsa’ lac jac’be i cʌntesʌbal lac ñojte’el che’ bajche’ i tilel mi’ ñojpel ti pañimil. ⁴Pero Dios tsi’ choco tilel i Yalobil che’ bʌ tsa’ c’oti i yorajlel. Tsi’ yila pañimil ti x’ixic. Tsa’ ochi ti’ wenta mandar ⁵cha’an mi’ mʌñonla loq’uel ti’ wenta jini mandar, cha’an mi la cochel ti’ yalobil. ⁶I yalobiletla. Dios tsi’ choco tilel ti lac pusic’al i yEspíritu i Yalobil mu’ bʌ i yʌl: Papa, c Tat, che’en. ⁷Che’ jini mach chʌn mozojetix la, pero i yalobiletix la. Mi i yalobiletla an chuqui mi caj la’ wʌq’uentel ti Dios yic’ot Cristo.

Mach yomic mi la’ cha’ ñop yambʌ cʌntesa

⁸Ti yambʌ ora, che’ maxto anic tsa’ la’ ñopo Dios, tsa’ la’ cha’le to’ol e’tel ti’ wenta jini mach bʌ mero diosic. ⁹Wʌle mi la’ cʌn Dios, pero ñumen mi’ cʌñetla. ¿Chucoch woli la’ cha’ mulan i cʌntesʌbal lac ñojte’el mach bʌ anic i p’ʌtʌlel cha’an mi’ coltañetla? ¿La’ wom ba la’ cha’ chujquel ti to’ol e’tel? ¹⁰Mi la’ mel q’uin ti’ q’uiñilel tac, ti’ yuwilel tac, ti’ yorajlel tac, ti’ jabilel tac. ¹¹Woli la’ wʌc’on ti tsic pusic’al, ame lolomic jach tsac cha’le e’tel ti la’ tojlel.

¹²Quermanojob, ti wocol t’an mic subeñetla. Ajñenla ti libre che’ bajche’on, come ti yambʌ ora junlajal lac pusic’al. Ma’anic tsa’ la’ ts’a’leyon. ¹³La’ wujil tsac subeyetla ili wen t’an che’ ti ñaxan che’ ya’ añon ba’ añetla cha’an ti’ caj tsi’ tajayon c’amʌjel. ¹⁴Anquese leco tsa’ la’ q’uele jini am bʌ tic bʌc’tal, ma’anic tsa’ la’ bi’leyon. Ma’anic tsa’ la’ ts’a’leyon. Tsa’ la’ pʌyʌyon ochel che’ bajche’ juntiquil ángel ch’oyol bʌ ti Dios, che’ bajche’ Cristo Jesús. ¹⁵¿Baqui tsa’ majli i tijicñʌyel la’ pusic’al? Come mic ña’tan, tsa’ic mejli la’ loc’san la’ wut cha’an mi la’ wʌq’ueñon, tsa’ la’ loc’sa. ¹⁶¿Tsa’ ba ochiyon ti la’ contra cha’an tsac subeyetla i sujmlel? ¹⁷Jini yaño’ bʌ bʌx mi’ melob i bʌ cha’an mi la’ c’uxbiñob. Pero mach uts’atic bajche’ mi’ melob. Yomob i tʌts’etla loq’uel tic tojlel lojon cha’an mi la’ c’uxbiñob. ¹⁸Uts’at mi bʌx mi’ melob i bʌ ti chuqui uts’at ti pejtelel ora, mach cojic jach che’ ya’ añon la’ wic’ot. ¹⁹Calobilob, che’ bajche’ x’ixic woli bʌ ti bajq’uel, che’ʌch wolic cha’ ubin wocol cha’añetla jinto mi’ tsictiyel Cristo ti la’ pusic’al. ²⁰Uts’at ya’ic añon la’ wic’ot cha’an mic wen pejcañetla, come cabʌl woliyon ti tsic pusic’al cha’an mach cujilic bajche’ añetla.

Lajiya cha’an Sara yic’ot Agar

²¹Mi la’ wom la’ wajñel ti’ wenta jini mandar, ¿mach ba anic mi la’ ch’ʌmben isujm jini mandar? Subeñonla. ²²Come ts’ijbubil an cha’tiquil i yalobil Abraham, juntiquil i yalobilʌch criada, yambʌ i yalobilʌch jini libre bʌ mach bʌ criadajic. ²³I yalobil jini criada tsi’ yila pañimil che’ bajche’ i tilel mi’ yilañob pañimil alʌlob. I yalobil jini mero i yijñam bʌ tsa’ tili cha’an albil bʌ i t’an Dios. ²⁴An i sujmlel ili lajiya. Jini cha’tiquil x’ixic i yejtalʌch cha’chajp trato. Agar, jini criada, i yejtalʌch jini trato ch’oyol bʌ ti wits i c’aba’ Sinaí. Tsi’ q’uele pañimil i yalobil che’ chucul ti to’ol e’tel. ²⁵Jini Agar i yejtalʌch wits ya’ ti Arabia i c’aba’ Sinaí yic’ot jini tejclum Jerusalén ba chuculob ti to’ol e’tel jini ya’ bʌ chumulob mu’ bʌ i ñopob i taj i coltʌntel ti’ jac’ol mandar. ²⁶Pero libre jini Jerusalén am bʌ ti chan. Jiñʌch lac ña’ ti lac pejtelel. ²⁷Come ts’ijbubil: “Tijicñesan a pusic’al, jochol bʌ x’ixic, mach bʌ anic a walobil. C’am yom ma’ cha’len t’an, jatet mach bʌ anic a bajq’uel. Come ñumen cabʌl i yalobil jini bajñel bʌ x’ixic bajche’ jini am bʌ i ñoxi’al”. Che’ʌch ts’ijbubil.

²⁸Joñonla, hermanojob, tsa’ la quila pañimil che’ bajche’ Isaac cha’an albil bʌ i t’an Dios. ²⁹Che’ bajche’ tsa’ ujti ti’ yorajlel Isaac che’ʌch mi’ yujtel wʌle. Jini mu’ bʌ i cha’ ilañob pañimil ti Espíritu woli’ tic’lʌntelob ti’ tojlel jini yom bʌ i yʌc’ob ti’ jac’ol mandar. ³⁰¿Chuqui mi’ yʌl i Ts’ijbujel Dios?: “Choco loq’uel jini criada yic’ot i yalobil, come i yalobil criada ma’anic mi’ tem ch’ʌm i chubʌ’an i tat yic’ot i yalobil jini mero i yijñam bʌ”. ³¹Jini cha’an hermanojob, mach i yalobilonicla criada. I yalobilonla jini libre bʌ x’ixic.

Librejonixla ti Cristo

¹Librejonla. Cristo tsi’ yʌc’ʌyonla ti colel ba’ chuculonla. Jini cha’an yom libre mi la’ chʌn ajñel. Mach mi la’ cha’ ac’ la’ bʌ ti chujquel ti to’ol e’tel.

²Awilan joñon, Pablo, mic subeñetla, mi woli la’ ch’ʌm tsep pʌchʌlel, ma’anic i c’ʌjñibal Cristo ti la’ tojlel. ³Mic cha’ subeñetla, majqui jach mi’ ch’ʌm tsep pʌchʌlel, wersa mi’ jac’ pejtelel i mandar Moisés. ⁴Ti pejteletla mu’ bʌ la’ lon ña’tan woli la’ ch’ʌjmel ti’ wenta Dios cha’an i jac’ol jini mandar, chocbiletixla ti Cristo. Mach cʌyʌletixla ti’ yutslel i pusic’al Dios. ⁵Joñonla tsa’ bʌ lac ñopo Dios woli lac pijtan laj coltʌntel ti’ p’ʌtʌlel jini Espíritu cha’an mi laj q’uejlel ti toj. ⁶Come ti Cristo Jesús ma’anic chuqui mi’ cha’len mi tsepbil lac pʌchʌlel, o mi mach tsepbilic lac pʌchʌlel. Pero jiñʌch mero ganar che’ ñopolix lac cha’an jini wen t’an mu’ bʌ i yʌq’ueñonla laj c’uxbin lac bʌ.

⁷Ti yambʌ ora tsa’ la’ jac’ʌ ti uts’at jini wen t’an. ¿Majqui tsi’ mʌctayetla cha’an mi la’ cʌy la’ ch’ujbin i sujmlel? ⁸Mach tilemic ti Dios mu’ bʌ i pʌyetla. ⁹Jasʌl ts’ita’ levadura cha’an mi’ laj xaxan caxlan waj. ¹⁰Cʌyʌlon ti lac Yum wolij c’ajtiben cha’an mi’ cʌntañetla ame mi la’ jac’ yambʌ t’an. Dios mi caj i yʌq’uen i toj i mul majqui jach mi’ tic’lañetla. ¹¹Come ma’anic i tic’lʌntel jini mu’ bʌ i sub tsep pʌchʌlel, pero joñon wolic sub jini wen t’an cha’an jini cruz. Jini cha’an wolic tic’lʌntel. ¹²Uts’at muq’uic i junyajlel tsepob i bʌ cha’an mi’ loq’uelob ti la’ tojlel jini woli bʌ i tic’lañetla.

¹³Hermanojob, tsa’ pʌjyiyetla cha’an libre mi la’ wajñel. Wʌle, mach la’ jac’ben i tsuculel la’ pusic’al che’ libre añetla. Ti la’ c’uxbiya coltan la’ pi’ʌlob. ¹⁴Come uts’at woli la’ jac’ jini mandar ti pejtelel che’ mi la’ jac’ ili t’an: “C’uxbin a pi’ʌlob che’ bajche’ ma’ c’uxbin a bʌ”, che’en. ¹⁵Pero mi woli la’ c’ux la’ bʌ yilal, mi woli la’ jach’ la’ bʌ yilal, tsajiletla ame la’ jisan la’ bʌ.

I yʌc’bal jini Espíritu

¹⁶Mic subeñetla: Cha’lenla xʌmbal ti jini Espíritu cha’an ma’anic mi la’ jac’ i colosojlel la’ pusic’al. ¹⁷Come i colosojlel lac pusic’al mi’ contrajin jini Espíritu. Jini Espíritu mi’ contrajin lac tsucul pusic’al. Jini cha’an mach mejlic la’ mel jini la’ wom bʌ la’ mel. ¹⁸Mi’ woli’ toj’esañetla majlel jini Espíritu, mach chʌn añetixla ti’ wenta jini mandar.

¹⁹Tsiquil i mul lac tsucul pusic’al. Jini mu’ bʌ i jac’ob mi’ tajob i yixic, mi’ cha’leñob ts’i’lel, mi’ melob chuqui bibi’. ²⁰Mi’ ch’ujutesañob dios tac, mi’ cha’leñob wujt, yujilob ts’a’leya yic’ot leto. Tsʌytsʌyña jax i pusic’al cha’an chubʌ’añʌl. Yujilob mich’ajel yic’ot a’leya. Mi’ t’oxob i bʌ ti leto yic’ot ti yambʌ i ñopbal. ²¹Tsʌytsʌyña i pusic’al cha’an i wenlel yaño’ bʌ. Mi’ cha’leñob jontolil, yic’ot yʌc’ʌjel, yic’ot leco bʌ q’uiñijel yic’ot yan tac bʌ mach bʌ wenic. Mic cha’ subeñetla che’ bajche’ tsac subeyetla ti yambʌ ora, jini mu’ bʌ i cha’len che’ bajche’ jini, ma’anic mi caj i yochel ti’ yumʌntel Dios.

²²Pero i yʌc’bal jini Espíritu jiñʌch laj c’uxbiya, i tijicñʌyel lac pusic’al, i ñʌch’tʌlel lac pusic’al, lac p’ʌtʌlel ti’ cuchol wocol, yic’ot p’untaya, coltaya, i xuc’tʌlel lac pusic’al, ²³la cutslel, yic’ot i tic’ol lac pusic’al. Mach tic’bilic jini mu’ bʌ i mel bajche’ iliyi. ²⁴Pejtelel i cha’año’ bʌ Cristo tsa’ix i ch’ijiyob ti cruz i tsucul pusic’al yic’ot pejtelel i colosojlel yic’ot chuqui mi’ mulan. ²⁵Mi cuxulonla cha’an jini Espíritu, la’ lac cha’len chuqui yom Dios ti’ p’ʌtʌlel jini Espíritu. ²⁶La’ laj cʌy lac chañ’esan lac bʌ. Mach yomic mi lac techbeñob i mich’ajel lac pi’ʌlob. Mach yomic tsʌytsʌyña lac pusic’al cha’an i wenlel lac pi’ʌlob.

¹Hermanojob, mi tsa’ yajli ti mulil juntiquil winic, jatetla woli bʌ la’ wajñel ti jini Espíritu, cha’ toj’esanla ti’ yutslel la’ pusic’al. Q’uele la’ bʌ ame pʌjyiquetla ti mulil ja’el. ²Coltan la’ bʌ ti’ cuchol wocol. Che’ jini mi la’ jac’ben i mandar Cristo. ³Come mi an majqui mi’ lon ña’tan an i bajñel wenlel, woli jach i bajñel lotin i bʌ. ⁴Ti jujuntiquiletla bajñel cʌñʌ la’ bʌ. Q’uele mi uts’at a melbal. Tijicñesan a pusic’al mi wen melbil, pero mach ma’ chañ’esan a bʌ ti’ tojlel yaño’ bʌ cha’an a melbal. ⁵Come an ti lac wenta lac melbal ti jujuntiquilonla.

⁶Jini woli bʌ ti cʌntesʌntel ti’ t’an Dios, la’ i coltan i yaj cʌntesa yic’ot i chubʌ’an. ⁷Mach mi la’ wʌc’ la’ bʌ ti lotintel. Mach mejlic ti wajlentel Dios. Pejtelel chuqui jach mi’ pʌc’ winic mi caj i c’aj. ⁸Jini mu’ bʌ i pʌc’ chuqui tilem bʌ ti’ tsucul pusic’al, mi caj i c’aj toj mulil. Pero jini mu’ bʌ i cha’len pac’ ti jini Espíritu, mi caj i c’aj i cuxtʌlel mach bʌ anic mi’ jilel. ⁹Mach yomic mi lac lujban ti’ melol chuqui uts’at, come tal i yorajlel mi caj lac cha’len c’ajbal mi ma’anic mi’ lujban lac pusic’al. ¹⁰Jini cha’an la’ laj coltan pejtelel winicob che’ i yorajlel to. Pero ñumen yom mi laj coltan jini mu’ bʌ i ñopob Cristo.

Pablo mi’ sub i ñuclel i cruz Cristo

¹¹Q’uelela tsac ts’ibubeyetla ili jun ti colem bʌ letra tac tij c’ʌb. ¹²Pejtelel yomo’ bʌ q’uejlel ti ñuc mi’ wersa xic’beñetla cha’an mi la’ ch’ʌm tsep pʌchʌlel, come mach yomobic i yubin wocol cha’an i cruz Cristo. ¹³Pero jini woli bʌ i ch’ʌmob tsep pʌchʌlel mach ts’ʌcʌlic woli’ jac’ob jini mandar. Yomob jach mi la’ ch’ʌm tsep pʌchʌlel cha’an mi’ q’uelob i bʌ ti ñuc cha’an i sellojlel ti’ la’ bʌc’tal. ¹⁴Pero ma’anic mic sʌclan c ñuclel ti la’ tojlel, cojach mi cʌc’ ti ñuc i cruz lac Yum Jesucristo, come ya’ ti cruz tsa’ jili i p’ʌtʌlel pañimil tic tojlel. Tsa’ ch’ijleyon ti cruz cha’an ma’anic mic chʌn mulan i cha’an bʌ pañimil. ¹⁵Come ti Cristo Jesús ma’anic chuqui mi’ cha’len mi tsepbil lac pʌchʌlel o mi mach tsepbilic lac pʌchʌlel. Pero mi cha’ melbilonla ti tsijib jiñʌch yom bʌ. ¹⁶La’ aq’uenticob i ñʌch’tʌlel yic’ot i p’untʌntel ti Dios pejtelel mu’ bʌ i melob che’ bajche’ wolic subeñetla yic’ot pejtel jini mero i cha’año’ bʌ Dios.

¹⁷Mach i chʌn tic’lañon majqui jach an tij contra, come tsiquil i yejtal tac c lojwel cha’an i winicon Jesús. ¹⁸Hermanojob, la’ ajnic ti la’ pusic’al i yutslel lac Yum Jesucristo. Amén.