2 TIMOTEO

¹Pablojon, apóstolon i cha’an Cristo Jesús che’ bajche’ yom Dios, cha’an mic pam puc chuqui tsi’ yʌlʌ Dios mu’ bʌ i yʌq’ueñonla laj cuxtʌlel ti Cristo Jesús. ²Mic ts’ijbubeñet ili jun, Timoteo, c’uxbibil bʌ calobil. La’ i yʌq’ueñet i yutslel i pusic’al yic’ot a p’untʌntel yic’ot i ñʌch’tʌlel a pusic’al Dios lac Tat yic’ot Jesucristo lac Yum.

Xuc’ul yom ma’ ñop jini wen t’an

³Mic suben Dios wocolix i yʌlʌ, come wolic cha’liben i ye’tel ti’ sʌclel c pusic’al che’ bajche’ c ñojte’elob. Mic chʌn ña’tañet che’ mic pejcan Dios, ti q’uiñil ti ac’ʌlel. ⁴Mic ña’tʌbeñet a wuq’uel. Comix j q’uelet cha’an mi’ cha’ ñuc’an c pusic’al. ⁵Wolic ña’tan bajche’ tsa’ ñopo Dios ti isujm che’ bajche’ ti ñaxan tsi’ ñopo a chu’chu’ Loida yic’ot a ña’ Eunice. Wʌle cujil wola’ ñop ja’el.

⁶Jini cha’an mij c’ajtesʌbeñet cha’an ma’ chʌn p’ʌtesan a c’ʌjñibal ti Dios tsa’ bʌ aq’uentiyet che’ bʌ tsa cʌc’ʌ j c’ʌb ti a jol. ⁷Yom ch’ejlonla come Dios ma’anic mi’ yʌc’onla ti bʌq’uen. Tsi’ yʌq’ueyonla lac p’ʌtʌlel yic’ot laj c’uxbiya. Tsi’ yʌq’ueyonla lac tic’ lac pusic’al. ⁸Jini cha’an mach a cha’len quisin che’ ma’ wʌc’ ti cʌjñel lac Yum. Mach yomic ma’ wubin quisin cha’an xñujp’elon i cha’an lac Yum. Ti’ p’ʌtʌlel Dios, ñusan wocol quic’ot cha’an jini wen t’an. ⁹Dios tsi’ coltayonla. Tsi’ pʌyʌyonla cha’an ch’ujul mi la cajñel ti’ tojlel. Mach cha’anic wen bʌ lac melbal, pero cha’an che’ yom i pusic’al tsi’ pʌyʌyonla ti’ yonlel i yutslel tsa’ bʌ i yʌq’ueyonla ti oñiyi yic’ot Cristo Jesús. ¹⁰Tsiquilix i yutslel wʌle cha’an tsa’ tili Cristo Jesús, la caj Coltaya tsa’ bʌ i jisʌbe i p’ʌtʌlel lac mul mu’ bʌ i yʌc’onla ti chʌmel. Tsi’ ch’ʌmbeyonla laj cuxtʌlel mach bʌ yujilic chʌmel, che’ bajche’ mi’ tsictesʌbeñonla ti jini wen t’an.

¹¹Wa’chocobilon cha’an mic subeñob gentilob jini wen t’an. Chocbilon majlel ti subt’an yic’ot cʌntesa ti’ tojlelob. ¹²Jini cha’an woli cubin wocol, pero ma’anic woliyon ti quisin. Come cʌñʌl c cha’an Dios tsa’ bʌ c ñopo. Cujil an i p’ʌtʌlel cha’an mi’ cʌntan jini tsa’ bʌ cʌc’ʌ ti’ wenta c’ʌlʌl ti jini wi’il bʌ q’uin. ¹³Ti’ xuc’tilel a pusic’al yic’ot ti a c’uxbiya ti Cristo Jesús, chʌn lajin a cʌntesa yic’ot toj bʌ c t’an tsa’ bʌ a wubi. ¹⁴Cʌntan jini uts’at tac bʌ tsa’ bʌ i yʌc’ʌ ti a wenta jini Ch’ujul bʌ Espíritu chumul bʌ ti lac pusic’al.

¹⁵Ña’tʌbil a cha’an, tsa’ix i cʌyʌyoñob Figelo yic’ot Hermógenes yic’ot pejtelel yaño’ bʌ ti Asia. ¹⁶La’ p’untʌnticob ti lac Yum jini año’ bʌ ti’ yotot Onesíforo, come cabʌl tsi’ ñuq’uesʌbeyon c pusic’al. Ma’anic tsi’ quisñiyon anquese cʌchʌlon ti cadena. ¹⁷Pero che’ bʌ tsa’ juli ti Roma tsi’ wersa sʌclayon, tsi’ tajayon. ¹⁸La’ i taj i p’untʌntel ti Dios ti’ tojlel lac Yum ti jini tal to bʌ q’uin. Wen cʌñʌl a cha’an bajche’ tsi’ coltayonla Onesíforo ya’ ti Efeso.

Xuc’ul bʌ soldado i cha’an Jesucristo

¹Jini cha’an, calobil, la’ chʌn p’ʌt’aquet ti’ yutslel i pusic’al Cristo Jesús. ²Jini t’an tsa’ bʌ c subeyet ti’ tojlel cabʌlob, aq’ueñob ti’ wenta xuc’ul bʌ winicob mu’ bʌ caj i cʌntesañob yaño’ bʌ.

³Ñusan wocol che’ bajche’ xuc’ul bʌ soldado i cha’an Jesucristo. ⁴Jini soldado woli bʌ ti guerra, ma’anic mi’ mel i ye’tel ti’ yotot come woli’ melben i ye’tel jini tsa’ bʌ i yotsa ti soldado. ⁵Che’ ja’el jini x’alas ma’anic mi’ yʌq’uentel corona mi ma’anic tsi’ cha’le alas ti toj. ⁶Jini xpac’ wersa mi’ ñaxan cha’len e’tel ti lum cha’an mi’ ch’ʌmben i wut. ⁷Ña’tan ti a pusic’al chuqui wolic sub. Lac Yum mi caj i yʌq’ueñet a ch’ʌmben isujm ti pejtelel.

⁸Ña’tan Jesucristo loq’uem bʌ ti’ p’olbal David. Tsa’ ch’ojyi loq’uel ba’an chʌmeño’ bʌ che’ bajche’ mic sub ti jini wen t’an. ⁹Woliyon ti wocol. Cʌchʌlon che’ bajche’ xjontolil. Pero mach cʌchʌlic i t’an Dios. ¹⁰Jini cha’an wolic lʌt’ pejtelel jini wocol, come c’ux mi cubin jini yajcʌbilo’ bʌ, cha’an com mi’ tajob i coltʌntel ti Cristo Jesús yic’ot i ñuclel mach bʌ anic mi’ jilel.

¹¹Xuc’ulʌch ili t’an: Mi tsa’ chʌmiyonla yic’ot Cristo Jesús, cuxul mi caj la cajñel yic’ot. ¹²Mi woli lac lʌt’ wocol, mux caj lac tem cha’len yumʌl la quic’ot. Mi tsa’ la cʌlʌ mach laj cʌñʌyic, ma’anic mi caj i cʌñonla ja’el. ¹³Mi xuc’ulonla o mach xuc’ulonicla, pero xuc’ul Cristo Jesús yic’ot i t’an. Mach yujilic lot.

X’e’tel mach bʌ anic chuqui mi’ quisñin

¹⁴C’ajtesʌbeñob ili t’an. Wersa subeñob ti’ wut lac Yum cha’an ma’anic mi’ cʌlʌx pejcañob i bʌ ti to’ol t’an jach mach bʌ anic i c’ʌjñibal. Che’ jini mi’ sojquelob jini mu’ bʌ i yubiñob. ¹⁵Cha’len wersa cha’an ma’ pʌs a bʌ ti uts’at ti’ wut Dios che’ bajche’ x’e’tel mach bʌ añic chuqui mi’ quisñin, mu’ bʌ i c’ʌn ti uts’at jini isujm bʌ t’an. ¹⁶Mach ma’ majlel ba’ ma’ wubin lolom jach bʌ i t’an pañimil, come mi’ yutsi p’ojlesan i jontolil winicob. ¹⁷Come mi’ p’ojlel majlel i t’an che’ bajche’ leco bʌ tsoy. Che’ʌch yilal i cʌntesa jini Himeneo yic’ot Fileto. ¹⁸Come tsi’ tʌts’ʌyob i bʌ ti jini isujm bʌ t’an. Woli’ socbeñob i pusic’al xñopt’añob, come mi’ lon alob tsa’ix ñumi i yorajlel mi caj lac tejchel ch’ojyel. Mi’ yʌlob ma’anix lac pijtaya. ¹⁹Pero tsʌts chuculonla mu’ bʌ lac ñop Dios. Tsi’ yʌq’ueyonla lac marcajlel ba’ ts’ijbubil: “Lac Yum mi’ cʌn i cha’año’ bʌ”. Jini cha’an la’ i cʌy i jontolil jujuntiquil mu’ bʌ i pejcʌben i c’aba’ Cristo.

²⁰Ti mal colem otot an latu tac melbil bʌ ti oro yic’ot ti sʌsʌc taq’uin yic’ot yambʌ melbil bʌ ti te’ yic’ot ti lum. Ti chajp ti chajp an i c’ʌjñibal. Lamital mi’ c’uxbintel, lamital mi’ ts’a’lentel. ²¹Mi an majqui mi’ cʌy chuqui tac mach wenic, mi’ sʌq’uesan i bʌ. Che’ jini an i c’uxbintel, ch’ujul, cabʌl i c’ʌjñibal ti lac Yum. Chajpʌbil i pusic’al cha’an mi’ mel pejtelel chuqui wen.

²²Mach ma’ jac’ben i colosojlel a pusic’al che’ bajche’ yambʌ ch’iton winicob. Tsajcan chuqui toj, yic’ot c’uxbiya, yic’ot i ñʌch’tʌlel a pusic’al. Chʌn ñopo Dios yic’ot pejtelel mu’ bʌ i pejcañob lac Yum ti’ sʌclelob i pusic’al. ²³Mach ma’ ñich’tʌbeñob i t’an jini sajtemo’ bʌ mu’ bʌ i cʌlʌx pejcañob i bʌ ti lolom t’an mach bʌ anic i sujmlel. Sojquem jax i t’an. A wujil mi’ tech leto. ²⁴Mach yomic mi’ bʌc’ letsan i t’an ti leto jini x’e’tel i cha’an lac Yum. Yom uts mi’ pejcan pejtelel i pi’ʌlob. Yom ch’ejl i pusic’al ti cʌntesa. Yom mi’ ñusʌbeñob i sajtemal yaño’ bʌ. ²⁵Yom mi’ toj’esan i contrajob yic’ot uts bʌ t’an. Tic’ʌl mi Dios mi caj i yʌq’ueñob i cʌy i mul cha’an mi’ ñopob chuqui isujm, ²⁶cha’an mi’ puts’elob ti’ yac jini xiba, tsa’ bʌ i chucuyob cha’an mi’ wersa jac’beñob i mandar.

Jontol winicob che’ ti wi’il bʌ q’uin

¹Yom ma’ ch’ʌmben isujm: Ti cojix bʌ q’uin tac tal i yorajlel bʌbʌq’uen tac bʌ. ²Come jujuntiquil mi caj i bajñel c’uxbin i bʌ. Mi caj i mulañob taq’uin, mi caj i chañ’esañob i bʌ, ñuc mi caj i q’uelob i bʌ. Mi caj i cha’leñob p’ajoñel. Mi caj i ñusʌbeñob i t’an i tat i ña’. Ma’anic mi’ subeñob Dios wocolix i yʌlʌ. Mach i cʌñʌyobic Dios. ³Mach yujilobic c’uxbiya mi p’untaya. X’u’yajob. Ma’anic mi’ tic’ob i pusic’al. Wen jontolob. Mi’ ts’a’leñob chuqui uts’at. ⁴Mi’ yʌc’ob i pi’ʌlob ti’ c’ʌb i contra. Bʌbʌq’uen jax i melbalob. C’ax ñuc mi’ pʌsob i bʌ. Mi’ mulañob pejtel chuqui tac yom i pusic’al. Ma’anic mi’ c’uxbiñob Dios. ⁵An bajche’ mi’ lon ch’ujutesañob Dios, pero ma’anic mi’ cʌmbeñob i p’ʌtʌlel. Tʌts’ʌ a bʌ ti’ tojlel winicob mu’ bʌ i melob che’ bajche’ jini. ⁶Come ti maya jax yic’ot leco bʌ cʌntesa mi’ socbeñob i pusic’al tonto bʌ x’ixicob teñelo’ bʌ ti mulil, mu’ jach bʌ i jac’beñob i colosojlel i pusic’al. ⁷Pejtelel ora woli’ ñich’tañob i cʌntesʌntel, pero ma’anic mi ñopob jini mero isujm bʌ. ⁸Che’ bajche’ tsi’ contrajiyob Moisés jini Janes yic’ot Jambres, che’ ja’el jini winicob mi’ contrajiñob i sujmlel. Jontol chuqui mi’ ña’tañob ti’ pusic’al. Tsi’ junyajlel cʌyʌyob jini woli bʌ lac ñop. ⁹Pero mach ti pejtelelic ora mi caj i melob, come mi’ caj ti cʌjñel i tontojlel i cha’an pejtelelob che’ bajche’ tsa’ cʌjni i tontojlel jini cha’tiquil.

T’an cha’an jini yom bʌ i mel Timoteo

¹⁰Pero jatet tsa’ix a ñopo j cʌntesa yic’ot c melbal, yic’ot jini com bʌ c mel, yic’ot c ñopbal, yic’ot bajche’ mij cuchben i mul yaño’ bʌ, yic’ot j c’uxbiya, yic’ot i xuc’tʌlel c pusic’al ti pijt, ¹¹yic’ot c tic’lʌntel, yic’ot c wocol, yic’ot jini tsa’ bʌ c ñusa ya’ ti Antioquía yic’ot ti Iconio, yic’ot ti Listra. Tsaj cuchu pejtelel c tic’lʌntel. Lac Yum tsi’ coltayon loq’uel ti pejtelel. ¹²Majqui jach yom i yajñel ti ch’ujul ti Cristo Jesús, mux i tic’lʌntel ja’el. ¹³Pero jini jontolo’ bʌ yic’ot xlotiyajob, utsi utsijax mi’ chʌn melob i jontolil. Mi caj i lotiñob yaño’ bʌ. Mi caj i lotintelob ja’el. ¹⁴Jixcu jatet, ajñen che’ bajche’ tsa’ cʌntesʌntiyet come tsa’ wen ch’ʌmbe isujm. A wujil ja’el majqui tsi’ cʌntesayet. ¹⁵C’ʌlʌl che’ alʌlet to, cʌmbilix a cha’an jini Ch’ujul bʌ i Ts’ijbujel Dios, mu’ bʌ i cʌntesañet cha’an ma’ ñop Cristo Jesús cha’an ma’ coltʌntel. ¹⁶Ch’oyol ti Dios pejtelel i Ts’ijbujel. An i c’ʌjñibal ti cʌntesa cha’an lac tic’ol, yic’ot cha’an lac toj’esʌntel, cha’an mi lac mel chuqui toj, ¹⁷cha’an chajpʌbil i winic Dios ti pejtelel chuqui wen, cha’an uts’at mi’ mel i ye’tel ti pejtelel.

¹Jini cha’an mic subeñet ti’ tojlel Dios yic’ot lac Yum Jesucristo mu’ bʌ caj i tilel i mel jini cuxulo’ bʌ yic’ot jini chʌmeño’ bʌ che’ mi’ wa’chocon i yumʌntel: ²Subu jini wen t’an. Yom chajpʌbilet ti’ yorajlel subt’an yic’ot che’ mach i yorajlelic. Xic’beñob i ñop. Subeñob i mul. Xic’beñob ti uts’at ti’ yutslel a pusic’al yic’ot i cʌntesa Dios. ³Come tal i yorajlel che’ ma’anic mi caj i mulañob toj bʌ cʌntesa. Mi caj i mulañob i yubin yambʌ t’an. Mi caj i pʌyob cabʌl i maestrojob mu’ bʌ i subob chuqui mi’ mulañob. ⁴Mi caj i cʌyob i yubin chuqui tac i sujm. Mi caj i jac’beñob i sajtemal i ñojte’elob. ⁵Ti pejtelel chuqui tac mi’ yujtel chʌcʌ q’uele a bʌ. Cuchu wocol. Cha’len e’tel ti subt’an. Ts’ʌcʌl yom ma’ mel a we’tel.

⁶Come mach jalix mi caj cʌjq’uel ti’ majtan Dios. Lʌc’ʌlix i yorajlel cha’an mij cʌy pañimil. ⁷Tsac cha’le wen bʌ guerra. Wʌle, c’otemonix ba’ jaxʌl c bijlel. Tsac wen cʌnta jini mu’ bʌ lac ñop. ⁸Jixcu jini mu’ bʌ caj i yujtel, wolic pijtan jini corona mu’ bʌ caj i tsictesan toj bʌ lac pusic’al. Lac Yum jini toj bʌ melo’ mulil, mi caj i yʌq’ueñon ti jini tal to bʌ q’uin, mach cojic jach joñon pero pejtelel yomo’ bʌ i q’uel lac Yum che’ mi’ tilel.

⁹Cha’len wersa cha’an ma’ tilel ti ora wʌ’ ba’ añon. ¹⁰Come Demas tsi’ cʌyʌyon cha’an tsi’ mula pañimil. Tsa’ majli ti Tesalónica. Tsa’ majli Crescente ti Galacia. Tsa’ majli Tito ti Dalmacia. ¹¹Jini jach Lucas wʌ’an quic’ot. Pʌyʌ tilel Marcos a wic’ot, come an i c’ʌjñibal cha’an mi’ coltañon. ¹²Tsac choco majlel Tíquico ti Efeso. ¹³Che’ ma’ tilel ch’ʌmʌ tilel jini pʌl bʌ chaqueta tsa’ bʌ j cʌyʌ ti’ yotot Carpo ya’ ti Troas, yic’ot jini jun tac. Wersa yom ja’el jini jun ba’ mic cha’len ts’ijb.

¹⁴Alejandro, jini xten taq’uin, cabʌl tsi’ cha’le jontolil tij contra. La’ i yʌq’uen lac Yum i tojol che’ bajche’ an i melbal. ¹⁵Chʌcʌ q’uele a bʌ ti’ tojlel Alejandro come cabʌl tsi’ contraji lac t’an. ¹⁶Ma’anic majqui tsi’ coltayon che’ bʌ tsac ñaxan mele c bʌ. Ti pejtelelob tsi’ cʌyʌyoñob. La’ ñusʌbenticob i mul. ¹⁷Pero lac Yum tsa’ wa’le tic t’ejl. Tsi’ yʌq’ueyon c p’ʌtʌlel cha’an ts’ʌcʌl mic sub jini wen t’an, cha’an mi’ yubiñob pejtelel gentilob. Tsi’ coltayon loq’uel ti’ yej colem bajlum yilal. ¹⁸Lac Yum mi caj i coltañon loq’uel ti pejtelel jontolil. Mi caj i cʌntañon c’ʌlʌl mi cochel ti’ yumʌntel panchan. La’ tsictiyic i ñuclel lac Yum ti pejtelel ora. Amén.

Cortesía

¹⁹Aq’uen cortesía Prisca yic’ot Aquila yic’ot jini año’ bʌ ti’ yotot Onesíforo. ²⁰Tsa’ cʌle Erasto ya’ ti Corinto. C’am tsaj cʌyʌ Trófimo ya’ ti Mileto. ²¹Cha’len wersa cha’an ma’ tilel che’ maxto i yorajlelic tsʌñal. Mi’ yʌq’ueñet cortesía Eubulo yic’ot Pudente, yic’ot Lino, yic’ot Claudia, yic’ot pejtelel la quermanojob. ²²La’ ajnic ti a pusic’al lac Yum Jesucristo. La’ ajnic la’ wic’ot i yutslel i pusic’al Dios.