2 TESALONICENSES

¹Pablojon quic’ot Silvano quic’ot Timoteo, wolic ts’ijbubeñet lojon ili jun xñopt’añet bʌ la mu’ bʌ la’ tempan la’ bʌ ya’ ti Tesalónica, ochemet bʌ la ti Dios lac Tat yic’ot ti lac Yum Jesucristo. ²La’ aq’uentiquetla i yutslel yic’ot i ñʌch’tilel la’ pusic’al ch’oyol bʌ ti Dios lac Tat yic’ot ti lac Yum Jesucristo.

Wocolix i yʌlʌ Dios yic’ot oración

³Yom mic chʌn suben lojon Dios wocolix i yʌlʌ cha’añetla, hermanojob, come ñumen xuc’ul woli la’ ñop, ñumen cabʌl woli la’ c’uxbin la’ bʌ ti jujuntiquiletla. ⁴Jini cha’an wolic tsictesañetla ti ñuc ti’ tojlel xñopt’añob mu’ bʌ i tempañob i bʌ. Come chʌn xuc’ul woli la’ ñop. Ti’ p’ʌtʌlel la’ pusic’al woli la’ cuch la’ tic’lʌntel yic’ot wocol.

⁵Che’ mi la’ cuch wocol ti uts’at, woli la’ tsictesan toj bʌ i meloñel Dios, come mi caj la’ q’uejlel ti uts’at che’ mi’ tilel i yumʌntel Dios. Jini cha’an woli la’ cuch cabʌl wocol. ⁶Come Dios mi caj i melob ti toj. Mi caj i yʌq’ueñob wocol jini woli bʌ i yʌq’ueñetla wocol. ⁷Mi caj i yʌq’ueñetla la’ c’aj la’ wo quic’ot lojon che’ mi’ pʌstʌl lac Yum Jesús ti panchan yic’ot jini ángelob am bʌ i p’ʌtʌlel. ⁸Mi caj i tilel yic’ot c’ajc cha’an mi’ q’uextʌbeñob i jontolil jini mach bʌ anic mi’ cʌñob Dios yic’ot jini mach bʌ anic mi’ ch’ujbibeñob i wen t’an lac Yum Jesucristo. ⁹Mi caj i tojob i mul ti c’ajc ti pejtelel ora. Ma’anic mi caj i chʌn q’uelob lac Yum mi i ñuclelic i p’ʌtʌlel. ¹⁰Ti jim bʌ q’uin mi caj i tilel lac Yum cha’an mi’ sujbel ti ñuc ti’ tojlel i cha’año’ bʌ. Mi caj i q’uejlel ti ñuc lac Yum ti’ tojlel pejtelel tsa’ bʌ i ñopoyob yic’ot ti la’ tojlel. Come tsa’ix la’ ñopo c t’an lojon che’ bʌ tsac subeyetla.

¹¹Jini cha’an wolic chʌn ña’tañet lojon ti oración cha’an uts’at mi la’ q’uejlel ti Dios tsa’ bʌ i pʌyʌyetla. Mij c’ajtiben Dios cha’an mi’ yujtesʌbeñetla pejtelel jini wen bʌ e’tel ti la’ tojlel che’ bajche’ la’ wom. La’ i coltañetla yic’ot i p’ʌtʌlel cha’an mi’ laj ujtel che’ bajche’ woli la’ ñop. ¹²Che’ jini mi caj i ñuq’uesʌntel i c’aba’ lac Yum Jesucristo ti jatetla. Jatetla ja’el mi caj la’ ñuq’uesʌntel ti Jesús cha’an ti’ yutslel i pusic’al Dios yic’ot lac Yum Jesucristo.

Mi’ tsictiyel jini winic but’ul bʌ ti jontolil

¹Cha’ tal lac Yum Jesucristo. Mi caj lac tempʌyel majlel ya’ ba’an. Jini cha’an la’ wocolic, hermanojob, ²mach yomic mi’ bʌc’ tejchel tile bixel bʌ la’ pusic’al. Mach la’ tsic la’ pusic’al. Mach la’ jac’ben espíritu, mi t’an, mi jun mu’ bʌ i yʌl tsa’ix tili i q’uiñilel lac Yum. Mi’ lon alob che’ʌch tsac ts’ijba lojon. ³Mach la’ wʌc’ la’ bʌ ti lotintel mi ts’ita’ic. Come maxto talic i q’uiñilel jinto mi’ cha’ cʌyob jini wen t’an, jinto mi’ tsictiyel ja’el jini winic but’ul bʌ ti jontolil, jini winic mu’ bʌ i majlel ti c’ajc. ⁴Jiñʌch i contra Dios mu’ bʌ i chañ’esan i bʌ ti’ contra pejtelel chuqui tac mi’ diosintel, yic’ot pejtelel chuqui tac mi’ c’uxbintel ti ch’ujyijel. Mi’ caj ti buchtʌl ti’ Templo Dios che’ bajche’ Dios. Mi caj i cuy i bʌ ti Dios.

⁵¿Mach ba c’ajalic la’ cha’an tsac subeyetla ili t’an che’ ya’to añon la’ wic’ot? ⁶Wʌle la’ wujil chuqui woli’ tic’ jini winic cha’an ma’anic mi’ tsictiyel jinto che’ i yorajlelix. ⁷Come wolix ti p’ojlel i p’ʌtʌlel jontolil mach bʌ tsictiyemic ti yambʌ ora. Pero jini woli bʌ i mʌctan mu’to caj i chʌn mʌctan jinto che’ mi’ tʌts’ i bʌ. ⁸Che’ jini mi’ caj ti tsictiyel jini xjontolil. Lac Yum Jesús mi caj i tsʌnsan ti’ yiq’uilel jach i yej. Mi caj i jisan jini winic ti’ sʌclel che’ mi’ tilel. ⁹Mi’ tilel jini xjontolil yic’ot i p’ʌtʌlel Satanás cha’an mi’ melben i ye’tel. Mi’ cajel ti lot yic’ot i yejtal tac i p’ʌtʌlel yic’ot bʌbʌq’uen tac bʌ i melbal, ¹⁰yic’ot pejtelel jontol bʌ lo’loya ti’ tojlel jini woli bʌ i sajtelob, come mach yomobic i c’uxbin i sujmlel cha’an mi’ coltʌntelob. ¹¹Jini cha’an Dios mi’ yʌc’ob ba’ mi’ wen tajob i sojquemal cha’an mi’ ñopob lot, ¹²cha’an mi’ yochelob ti tojmulil pejtelel mach bʌ anic tsi’ ñopbeyob i sujmlel, tsa’ bʌ i mulayob jontolil.

Dios tsi’ yajcayetla cha’an mi la’ coltʌntel

¹³Hermanojob, c’uxbibilet bʌ la i cha’an lac Yum, yom mic chʌn suben lojon Dios wocolix i yʌlʌ cha’añetla. Come ti’ cajibal pañimil Dios tsi’ yajcayetla cha’an mi la’ coltʌntel. Ti’ p’ʌtʌlel jini Espíritu woli’ yotsañetla ti ch’ujul, come woli la’ ñopben i sujmlel Dios. ¹⁴Jini cha’an tsi’ pʌyʌyetla yic’ot jini wen t’an mu’ bʌ c sub lojon, cha’an mi la’ taj i ñuclel lac Yum Jesucristo. ¹⁵Jini cha’an, hermanojob, yom mi la’ xuc’chocon la’ bʌ. Wen ac’ʌla ti la’ pusic’al jini t’an tsa’ bʌ la’ wubi mi tic t’an lojon, o mi tic jun lojon.

¹⁶Jini lac Yum Jesucristo, yic’ot Dios lac Tat tsa’ bʌ i c’uxbiyonla, jini tsa’ bʌ i yʌq’ueyonla i ñuclel lac pusic’al mach bʌ anic mi’ jilel yic’ot wen bʌ lac pijtaya ti’ yutslel i pusic’al, ¹⁷la’ i ñuq’uesʌbeñetla la’ pusic’al. La’ i xuc’chocoñetla ti pejtelel wen bʌ t’an yic’ot ti pejtelel wen bʌ e’tel.

Pablo tsi’ c’ajti oración

¹Wʌle, hermanojob, cha’lenla oración cha’añon lojon, cha’an ora mi’ p’ojlel i t’an lac Yum, cha’an mi’ q’uejlel ti ñuc ti’ tojlel yaño’ bʌ che’ bajche’ ti la’ tojlel. ²Cha’lenla oración cha’an ma’anic chuqui mi’ tumbeñon lojon winicob but’ulo’ bʌ ti jontolil yic’ot i sajtemal, come mach ti pejtelelobic mi’ ñopob Dios. ³Pero xuc’ul lac Yum mu’ bʌ caj i xuc’chocoñetla. Mi caj i cʌntañetla ba’ ora mi’ yilʌbeñet la’ pusic’al jini xiba. ⁴Cujil lojon ti lac Yum, woli la’ jac’beñon lojon c mandar. Cujil lojon mi caj la’ chʌn jac’. ⁵La’ ñijcʌntic la’ pusic’al ti lac Yum cha’an mi la’ c’uxbin Dios yic’ot cha’an mi la’ cuch wocol che’ bajche’ Cristo.

Mach mi la’ to’ol ñusan q’uin

⁶Wʌle, hermanojob, mic subeñet lojon ti mandar ti’ c’aba’ lac Yum Jesucristo, mach la’ ñochtan jini hermanojob to’o che’ jach bʌ mi’ ñusañob q’uin, jini mach bʌ anic mi’ yajñelob bajche’ tsaj cʌntesayet lojon. ⁷Come la’ wujil bajche’ yom mi la’ tsajcañon lojon. Mach to’ol che’ic jach tsac ñusa lojon q’uin ya’ ba’ añetla. ⁸Ma’anic tsaj c’uxu lojon waj tic majtan jach. Tsa’ lujb’ayon lojon ti wocol e’tel ti q’uiñil yic’ot ti ac’ʌlel cha’an ma’anic mi’ c’ojyel la’ mʌc’lañon lojon. ⁹Machic tsac p’untayet lojon tsa’ mejli j c’ajtin lojon j coltʌntel, pero tsac ña’ta lojon c pʌsbeñetla tic melbal lojon bajche’ yom mi la’ cha’len e’tel, cha’an mi la’ tsajcañon lojon. ¹⁰Come che’ ya’to añon lojon la’ wic’ot tsac subeyetla ti mandar: Mi an majqui mach yomic e’tel, mach i to’ol c’ux waj, cho’on lojon.

¹¹Come woli cubin lojon che’ jach woli’ to’ol ñusañob q’uin lamital. Ma’anic mi’ cha’leñob e’tel. Mi’ to’ol bajñel otsañob i bʌ ba’ mach i wentajic. ¹²Jini woli bʌ i melob che’ bajche’ jini, mic subeñob lojon ti mandar, mic xic’beñob lojon ti lac Yum Jesucristo cha’an ñʌch’ʌl mi’ chʌn cha’leñob i ye’tel cha’an mi’ c’uxob i bajñel waj. ¹³Hermanojob, mach la’ lujb’an ti’ melol chuqui uts’at.

¹⁴Mi an majqui mach yomic i ch’ujbin chuqui wolic subeñet lojon ti ili jun, q’uelela jini winic. Tʌts’ʌx la’ bʌ ba’an cha’an che’ jini, mi’ cajel ti quisin. ¹⁵Pero mach la’ q’uele’ che’ bajche’ la’ contra. Yom mi la’ xic’ben ti uts’at bajche’ hermano.

Cortesía

¹⁶Lac Yum mu’ bʌ i yʌq’ueñonla i ñʌch’tilel lac pusic’al, la’ i yʌq’ueñetla i ñʌch’tilel la’ pusic’al ti pejtelel ora bajche’ jach añetla. La’ ajnic lac Yum la’ wic’ot ti la’ pejtelel. ¹⁷Joñon Pablojon mic ts’ijbubeñetla ili cortesía tij c’ʌb. Jiñʌch i marcajlel pejtelel c jun tac. Jiñʌch bajche’ yilal c ts’ijb. ¹⁸La’ ajnic la’ wic’ot ti la’ pejtelel i yutslel lac Yum Jesucristo.